ᠠᠷᠢᠬᠢᠨ ᠤ ᠱᠣᠭ ᠰᠢᠯᠦᠭ – ᠴ᠂ ᠵᠢᠭᠮᠢᠳ Архины шог шүлэг – Ч᠂ Жигмид
317ᠠᠷᠢᠬᠢᠨ ᠤ ᠱᠣᠭ ᠰᠢᠯᠦᠭ
ᠴ᠂ ᠵᠢᠭᠮᠢᠳ
ᠠᠯᠢᠮᠠ ᠵᠢᠮᠢᠰᠦᠨ ᠦ᠌ ᠦᠷᠡᠯ ᠡᠴᠡ
ᠲᠠᠷᠢᠮᠠᠯ ᠢ᠋ᠶ᠋ᠠᠷ ᠭᠠᠷᠳᠠᠭ ᠠᠷᠢᠬᠢ ᠴᠤ᠌ ᠪᠣᠢ ᠂
ᠠᠢᠷᠠᠭ ᠰᠦ ᠰᠢᠮᠡ ᠶ᠋ᠢᠨ
ᠨᠡᠷᠡᠮᠡᠯ ᠡᠴᠡ ᠭᠠᠷᠳᠠᠭ ᠠᠷᠢᠬᠢ ᠴᠤ᠌ ᠪᠣᠢ᠃
ᠣᠷᠣᠰ ᠮᠣᠩᠭᠣᠯ ᠠᠷᠢᠬᠢ
ᠣᠯᠠᠨ ᠶᠠᠩᠵᠤ ᠪᠠᠷ ᠪᠣᠢ ᠶᠤᠮ᠂
ᠣᠯᠵᠤ ᠤᠤᠭᠤᠭᠠᠳ ᠬᠡᠲᠦᠷᠡᠪᠡᠯ
ᠣᠨᠴᠠ ᠰᠣᠭᠲᠣᠭᠤ ᠲᠡᠷᠡ ᠶᠦᠮ᠃
ᠴᠡᠭᠡᠯ ᠳ᠋ᠦ᠍ ᠪᠠᠢᠭᠠ ᠵᠢᠭᠠᠰᠤ ᠶ᠋ᠢ
ᠰᠡᠷᠡᠭᠡᠨ ᠲᠡᠮᠦᠷ ᠬᠠᠳᠬᠤᠨᠠ᠃
ᠴᠡᠭᠡᠵᠢᠨ ᠳ᠋ᠦ᠍ ᠪᠠᠢᠭᠠ ᠦᠭᠡ ᠶ᠋ᠢ
ᠰᠢᠯ ᠲᠡᠢ ᠠᠷᠢᠬᠢ ᠬᠠᠳᠬᠤᠨᠠ᠃
ᠨᠠᠭᠤᠷ ᠲᠤ᠌ ᠪᠠᠢᠭᠠ ᠵᠢᠭᠠᠰᠤ ᠶ᠋ᠢ
ᠨᠢᠷᠤᠭᠤᠨ ᠲᠡᠮᠦᠷ ᠬᠠᠳᠬᠤᠨᠠ᠂
ᠨᠢᠭᠤᠵᠤ ᠪᠠᠢᠭᠰᠠᠨ ᠦᠭᠡ ᠶ᠋ᠢ
ᠯᠣᠩᠬᠣ ᠲᠠᠢ ᠠᠷᠢᠬᠢ ᠬᠠᠳᠬᠤᠨᠠ᠃
ᠪᠠᠭᠠ ᠪᠠᠭᠠ ᠪᠠᠷ ᠤᠤᠭᠤᠪᠠᠯ
ᠪᠠᠬᠠᠲᠠᠢ ᠢᠳᠡᠭᠡ ᠠᠷᠢᠬᠢ ᠶᠤᠮ᠂
ᠪᠠᠯᠭᠤᠭᠰᠠᠭᠠᠷ ᠪᠠᠢᠭᠠᠳ ᠠᠬᠠᠳᠠᠪᠠᠯ
ᠪᠠᠯᠠᠷᠠᠭᠤᠯᠴᠢᠬᠠᠳᠠᠭ ᠢᠳᠡᠭᠡ ᠠᠷᠢᠬᠢ ᠶᠤᠮ᠃
ᠭᠡᠮ ᠢ᠋ᠶ᠋ᠡᠷ ᠪᠠᠭᠠ ᠪᠠᠭᠠ ᠤᠤᠭᠤᠪᠠᠯ
ᠬᠡᠨ ᠳ᠋ᠦ᠍ ᠴᠦ᠍ ᠬᠦᠷᠲᠡᠭᠳᠡᠬᠦ ᠢᠳᠡᠭᠡ ᠶᠦᠮ᠂
ᠬᠡᠮᠵᠢᠶᠡᠨ ᠡᠴᠡ ᠪᠡᠨ ᠬᠡᠲᠦᠷᠡᠪᠡᠯ
ᠬᠡᠷᠡᠭ ᠲᠦ᠍ ᠣᠷᠣᠭᠤᠯᠳᠠᠭ ᠢᠳᠡᠭᠡ ᠶᠦᠮ᠃
ᠤᠤᠭᠤᠭᠰᠠᠨ ᠳᠣᠣᠷᠠ ᠪᠠᠨ ᠤᠨᠲᠠᠳᠠᠭ
ᠰᠢᠯᠤᠭᠤᠨ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠤᠴᠢᠷ ᠵᠢᠷᠤᠮ ᠢ᠋ᠶ᠋ᠠᠷ ᠶᠠᠷᠢᠳᠠᠭ
ᠳᠣᠭᠰᠢᠨ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠬᠢᠲᠤᠭᠠ ᠰᠢᠪᠦᠭᠡ ᠡᠷᠭᠢᠭᠦᠯᠳᠡᠭ
ᠲᠡᠨᠡᠭ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠤᠯᠤᠰ ᠣᠯᠠᠨ ᠢ᠋ ᠦᠢᠮᠡᠭᠦᠯᠳᠡᠭ
ᠤᠩᠭᠢᠷᠠᠭᠠ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠤᠨᠤᠭᠰᠠᠨ ᠮᠣᠷᠢ ᠪᠠᠨ ᠮᠠᠭᠲᠠᠳᠠᠭ
ᠭᠠᠢᠬᠠᠭᠤᠷ ᠰᠣᠭᠲᠣᠭᠤ! ᠠᠷᠢᠬᠢᠨ ᠤ᠋ ᠬᠣᠣᠷ!
ᠠᠭᠤᠵᠢᠮ ᠪᠤᠶᠠᠨ ᠪᠠᠢᠨᠠ ᠭᠡᠳ
ᠪᠠᠶᠠᠷᠯᠠᠬᠤ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠤᠷᠢᠳᠤ ᠶ᠋ᠢᠨ ᠲᠡᠦᠬᠡ ᠪᠡᠨ ᠶᠠᠷᠢᠭᠠᠳ
ᠤᠬᠢᠯᠠᠳᠠᠭ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠤᠶᠠᠬᠠᠨ ᠡᠭᠡᠰᠢᠭ ᠬᠣᠭᠣᠯᠠᠢ ᠦᠭᠡᠢ ᠪᠠᠢᠵᠤ
ᠳᠠᠭᠤᠯᠠᠳᠠᠭ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠠᠭᠤᠯᠠ ᠲᠠᠯᠠ ᠪᠠᠷ ᠬᠡᠰᠦᠳᠡᠭ
ᠲᠠᠨᠤᠮᠠᠯ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠤᠨᠠᠭᠰᠠᠨ ᠭᠠᠵᠠᠷ ᠠ᠋ᠴᠠ ᠪᠠᠨ ᠪᠣᠰᠳᠠᠭ ᠦᠭᠡᠢ
ᠬᠡᠳᠡᠷ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠤᠤᠭᠤᠶᠠ ᠂ ᠪᠠᠰᠠ ᠨᠢᠭᠡ ᠪᠠᠯᠭᠤᠶᠠ ᠭᠡᠳ
ᠭᠣᠶᠣᠳᠠᠭ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠤᠨᠲᠠᠭᠠ ᠠᠢᠯ ᠢ᠋ᠶ᠋ᠠᠷ ᠣᠷᠣᠶᠠ ᠭᠡᠳ
ᠬᠡᠰᠦᠳᠡᠭ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠠᠶᠠᠭᠠ ᠲᠠᠢ ᠠᠷᠢᠬᠢ ᠴᠢᠮᠠᠯᠠᠭᠠᠳ ᠪᠠᠢᠬᠤ
ᠬᠡᠩᠬᠡᠭ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠠᠯᠢ ᠪᠠᠰᠠ ᠨᠢᠭᠡ ᠪᠠᠯᠭᠤᠶᠠ ᠭᠡᠳ
ᠭᠣᠶᠣᠳᠠᠭ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ !
ᠠᠶᠠᠭᠠᠨ ᠰᠢᠷᠡᠭᠡ ᠡᠷᠭᠢᠭᠦᠯᠳᠡᠭ
ᠠᠳᠠ ᠲᠠᠢ ᠰᠣᠭᠲᠣᠭᠤ — ᠠᠷᠢᠬᠢᠨ ᠤ᠋ ᠬᠣᠣᠷ !
ᠠᠯᠠᠨᠠ ᠪᠤᠯᠠᠨᠠ ᠭᠡᠳ ᠵᠠᠩᠨᠠᠳᠠᠭ
ᠠᠭᠰᠠᠨ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠠᠪᠠᠭᠠᠢ ᠬᠡᠦᠬᠡᠳ ᠢ᠋ ᠦᠵᠡᠭᠡᠳ
ᠠᠭᠠᠯᠢ ᠦᠭᠡᠢᠳᠡᠬᠦ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠠᠯᠢ ᠮᠠᠭᠤᠬᠠᠢ ᠵᠠᠩ ᠢ᠋ᠶ᠋ᠠᠷ
ᠠᠪᠤᠷᠢᠯᠠᠬᠤ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠠᠵᠢᠯ ᠬᠥᠳᠡᠯᠮᠦᠷᠢ ᠶ᠋ᠢᠨ ᠵᠦᠢᠯ ᠡᠴᠡ
ᠵᠢᠭᠰᠢᠬᠦ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠠᠷᠪᠠ ᠲᠠᠪᠤᠨ ᠮᠠᠯ ᠢ᠋ᠶ᠋ᠠᠨ
ᠠᠷᠠᠴᠢᠯᠠᠳᠠᠭ ᠦᠭᠡᠢ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠠᠷᠠᠭᠠ ᠰᠢᠲᠦ ᠪᠡᠨ ᠱᠠᠵᠢᠭᠢᠨᠠᠭᠤᠯᠳᠠᠭ
ᠠᠶᠤᠮᠠᠷ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠠᠮᠠᠨ ᠤ᠋ ᠰᠢᠯᠦᠰᠦ ᠪᠡᠨ ᠴᠤᠪᠤᠷᠠᠭᠤᠯᠳᠠᠭ
ᠨᠣᠪᠰᠢ ᠶ᠋ᠢᠨ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠠᠢᠯ ᠪᠠᠢᠪᠠᠯ ᠣᠷᠣᠶᠠ ᠭᠡᠳ
ᠲᠡᠨᠦᠳᠡᠭ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠠᠷᠢᠬᠢ ᠪᠠᠢᠪᠠᠯ ᠤᠤᠭᠤᠶᠠ ᠭᠡᠳ
ᠡᠷᠢᠳᠡᠭ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ !
ᠰᠢᠲᠦ ᠠᠮᠠ ᠪᠠᠨ ᠬᠠᠪᠢᠷᠳᠠᠭ
ᠰᠦᠷᠡᠬᠡᠢ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠰᠢᠯᠦᠰᠦ ᠰᠠᠯᠢᠰᠤ ᠴᠤᠪᠤᠷᠠᠭᠤᠯᠳᠠᠭ
ᠱᠦᠯᠦᠬᠡᠢ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠰᠢᠷᠦᠭᠦᠨ ᠳᠣᠭᠰᠢᠨ ᠵᠠᠩᠨᠠᠭᠠᠳ
ᠵᠣᠳᠣᠳᠠᠭ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠰᠢᠭᠦᠬᠦ ᠳ᠋ᠦ᠍ ᠭᠡᠨᠡᠳᠲᠡ ᠰᠢᠯᠵᠢᠭᠳᠡᠭᠡᠳ
ᠭᠡᠰᠬᠡᠯᠲᠡ ᠦᠵᠡᠬᠦ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠣᠷᠣᠨ ᠳᠡᠭᠡᠭᠦᠷ ᠣᠢᠴᠢᠳᠠᠭ
ᠤᠪ ᠲᠠᠢ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠣᠯᠠᠨ ᠠ᠋ᠴᠠ ᠰᠡᠭᠦᠯ ᠳ᠋ᠦ᠍ᠨᠢ ᠵᠥᠪ ᠵᠦᠭᠡᠷ
ᠶᠠᠪᠤᠳᠠᠭ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠡᠳ᠋ᠯᠡᠯ ᠬᠤᠪᠴᠠᠰᠤ ᠪᠠᠨ ᠲᠠᠢᠯᠵᠤ ᠬᠠᠶᠠᠳᠠᠭ
ᠨᠢᠴᠦᠭᠦᠨ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠡᠮᠡᠭᠡᠯ ᠲᠡᠢ ᠮᠣᠷᠢ ᠪᠠᠨ ᠠᠯᠳᠠᠴᠢᠬᠠᠳᠠᠭ
ᠶᠠᠪᠠᠭᠠᠨ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠡᠮᠡᠭᠲᠡᠢᠴᠦᠳ ᠢ᠋ ᠲᠣᠷᠣᠮᠵᠢᠯᠠᠭᠠᠳ
ᠡᠷᠭᠢᠭᠦᠯᠳᠡᠭ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠡᠯᠳᠡᠪ ᠬᠠᠩᠭᠠᠢ ᠶ᠋ᠢᠨ ᠵᠠᠩ ᠢ᠋ᠶ᠋ᠠᠷ
ᠵᠠᠩᠨᠠᠬᠤ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠰᠠᠨᠠᠭᠠᠨ ᠵᠣᠷᠢᠭ ᠢ᠋ᠶ᠋ᠠᠷ ᠵᠠᠩᠨᠠᠨᠠ ᠭᠡᠬᠦ
ᠰᠠᠭᠰᠠᠭᠤ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠰᠠᠩᠬᠦᠦ ᠶ᠋ᠢᠨ ᠮᠥᠩᠭᠥ ᠶ᠋ᠢ ᠪᠦᠷᠢᠯᠭᠡᠬᠦ
ᠰᠦᠢᠳᠦᠯ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠵᠠᠪᠠᠯ ᠥᠨᠥ ᠬᠠᠷᠢᠨᠠ ᠭᠡᠳ
ᠵᠠᠩᠨᠠᠬᠤ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠵᠠᠮ ᠤ᠋ᠨ ᠳᠤᠮᠳᠠ ᠣᠢᠴᠢᠭᠠᠳ
ᠤᠨᠲᠠᠬᠤ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠮᠥᠨ ᠪᠢᠰᠢ ᠦᠭᠡᠢ ᠦᠭᠡ ᠪᠡᠷ ᠢ᠋ᠶ᠋ᠡᠨ
ᠶᠠᠷᠢᠶᠠ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠮᠥᠷᠥᠢ ᠲᠡᠢ ᠲᠣᠭᠯᠠᠭᠠᠮ ᠲᠣᠭᠯᠠᠭᠠᠳ
ᠮᠥᠩᠭᠥ ᠪᠡᠨ ᠪᠠᠷᠠᠳᠠᠭ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠥᠪᠡᠷ ᠦ᠋ᠨ ᠲᠥᠭᠥᠷᠢᠭ ᠢ᠋ᠶ᠋ᠡᠨ ᠪᠠᠷᠠᠴᠢᠬᠠᠭᠠᠳ
ᠥᠷᠢᠲᠦᠬᠦ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠦᠭᠭᠦᠭᠰᠡᠨ ᠨᠥᠬᠥᠷ ᠢ᠋ᠶ᠋ᠡᠨ ᠨᠡᠬᠡᠬᠦ ᠪᠡᠷ
ᠮᠡᠯᠵᠢᠬᠦ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠪᠠᠭᠠ ᠶ᠋ᠢᠨ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠲᠣᠭᠠᠴᠢᠳᠠᠭ
ᠠᠯᠢᠶᠠ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠪᠠᠭᠠᠨᠠ ᠪᠠᠷᠢᠭᠠᠳ ᠡᠷᠭᠢᠭᠦᠯᠳᠡᠭ
ᠪᠠᠯᠠᠮᠠᠳ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠪᠠᠯᠭᠤᠭᠰᠠᠭᠠᠷ ᠪᠠᠢᠵᠤ ᠬᠡᠲᠦᠷᠡᠭᠡᠳ
ᠪᠠᠯᠠᠷᠠᠬᠤ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠪᠠᠯᠠᠢ ᠬᠠᠷᠠᠩᠭᠤᠢ ᠵᠠᠮ ᠢ᠋ᠶ᠋ᠠᠷ
ᠵᠠᠮᠨᠠᠬᠤ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠭᠠᠩ ᠬᠠᠯᠠᠭᠤᠨ ᠨᠠᠷᠠᠨ ᠳ᠋ᠤ᠌
ᠬᠠᠲᠠᠮᠠᠷ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠭᠠᠩᠭᠠᠷ ᠬᠦᠢᠲᠡᠨ ᠡᠪᠦᠯ ᠳ᠋ᠦ᠍
ᠬᠥᠯᠳᠡᠮᠡᠷ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ !
ᠭᠠᠳᠠᠭᠠ ᠬᠥᠳᠡᠭᠡ ᠤᠨᠲᠠᠭᠠᠳ
ᠵᠦᠳᠡᠷᠡᠬᠦ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠭᠠᠷ ᠬᠥᠯ ᠢ᠋ᠶ᠋ᠡᠨ ᠭᠡᠮᠲᠦᠭᠡᠭᠡᠳ
ᠵᠣᠪᠠᠬᠤ ᠰᠣᠭᠲᠣᠭᠤ— ᠠᠷᠢᠬᠢᠨ ᠤ᠋ ᠬᠣᠣᠷ!
ᠰᠠᠮᠠᠭᠤᠨ ᠳᠤᠷᠠᠲᠠᠢ ᠨᠢ ᠲᠠᠨ ᠢ᠋ ᠭᠡᠵᠦ
ᠰᠠᠯᠭᠠᠵᠤ ᠶᠠᠷᠢᠭᠰᠠᠨ ᠪᠢᠰᠢ ᠪᠢ᠂
ᠰᠠᠢᠬᠠᠨ ᠮᠠᠭᠤᠬᠠᠢ ᠶᠠᠪᠤᠳᠠᠯ ᠢ᠋
ᠰᠠᠨᠠᠭᠤᠯᠵᠤ ᠶᠠᠷᠢᠭᠰᠠᠨ ᠦᠭᠡ ᠶᠦᠮ᠃
ᠠᠷᠢᠬᠢ ᠭᠡᠳᠡᠭ ᠢᠳᠡᠭᠡ ᠴᠢᠨᠢ
ᠠᠢᠬᠤᠪᠲᠤᠷ ᠬᠡᠴᠡᠭᠦᠦ ᠢᠳᠡᠭᠡ ᠪᠠᠢᠨᠠ᠃
ᠠᠬᠠᠳᠠᠵᠤ ᠬᠡᠲᠦᠷᠡᠲᠡᠯᠡ ᠤᠤᠭᠤᠪᠠᠯ
ᠠᠯᠳᠠᠭᠠ ᠵᠠᠪᠬᠠᠷᠠᠭᠠ ᠭᠠᠷᠬᠤ ᠶᠤᠮ ᠪᠠᠢᠨᠠ᠃
ᠠᠮᠠ ᠬᠦᠷᠴᠦ ᠪᠣᠯᠬᠤ ᠦᠭᠡᠢ ᠢᠳᠡᠭᠡ ᠭᠡᠵᠦ
ᠴᠠᠭᠠᠵᠠᠯᠠᠵᠤ ᠬᠣᠷᠢᠭᠰᠠᠨ ᠪᠢᠰᠢ᠂
ᠠᠯᠳᠠᠭᠠ ᠵᠠᠪᠬᠠᠷᠠᠭᠠ ᠭᠠᠷᠤᠨᠠ ᠭᠡᠵᠦ
ᠠᠬᠠ ᠳᠡᠭᠦᠦ ᠨᠥᠬᠥᠳ ᠲᠡᠭᠡᠨ ᠰᠠᠨᠠᠭᠤᠯᠤᠭᠰᠠᠨ ᠶᠤᠮ᠃
ᠠᠯᠳᠠᠷ ᠭᠠᠷᠤᠭᠰᠠᠨ ᠬᠥᠪᠡᠭᠦᠳ ᠲᠡᠭᠡᠨ
ᠪᠠᠶᠠᠷ ᠤ᠋ᠨ ᠬᠤᠨᠳᠠᠭᠠ ᠠᠷᠢᠬᠢ ᠶᠤᠮ
ᠠᠷᠠᠳ ᠪᠢᠳᠡᠨ ᠳ᠋ᠡᠭᠡᠨ ᠪᠡᠯᠡᠭ ᠦ᠋ᠨ ᠢᠳᠡᠭᠡ ᠠᠷᠢᠬᠢ ᠶᠤᠮ᠃
ᠠᠯᠳᠠᠷᠲᠤ ᠲᠥᠷᠥ ᠶ᠋ᠢᠨ ᠨᠠᠭᠠᠳᠤᠮ ᠳ᠋ᠠᠭᠠᠨ
ᠨᠠᠢᠷ ᠤ᠋ᠨ ᠢᠳᠡᠭᠡ ᠠᠷᠢᠬᠢ ᠶᠤᠮ᠃
ᠠᠶᠠᠭᠠ ᠬᠤᠨᠳᠠᠭᠠ ᠲᠤᠯᠭᠠᠭᠠᠳ
ᠠᠯᠢ ᠨᠢ ᠴᠦ᠍ ᠬᠠᠮᠢᠭᠠ ᠦᠭᠡᠢ ᠤᠤᠭᠤᠳᠠᠭ ᠶᠤᠮ᠃
ᠡᠷᠬᠡ ᠶ᠋ᠢ ᠣᠯᠤᠭᠰᠠᠨ ᠰᠠᠢᠴᠤᠤᠯ ᠳ᠋ᠠᠭᠠᠨ
ᠪᠠᠶᠠᠷ ᠤ᠋ᠨ ᠬᠤᠨᠳᠠᠭᠠ ᠠᠷᠢᠬᠢ ᠶᠤᠮ᠃
ᠡᠩ ᠦ᠋ᠨ ᠠᠷᠠᠳ ᠪᠢᠳᠡᠨ ᠳ᠋ᠡᠭᠡᠨ
ᠪᠡᠯᠡᠭ ᠢᠳᠡᠭᠡ ᠠᠷᠢᠬᠢ ᠶᠤᠮ᠃
ᠡᠩᠬᠡ ᠲᠥᠷᠥ ᠶ᠋ᠢᠨ ᠨᠠᠭᠠᠳᠤᠮ ᠳ᠋ᠤ᠌
ᠨᠠᠢᠷ ᠤ᠋ᠨ ᠢᠳᠡᠭᠡ ᠠᠷᠢᠬᠢ ᠶᠤᠮ᠃
ᠡᠷᠡᠭᠲᠡᠢ ᠡᠮᠡᠭᠲᠡᠢ ᠢᠯᠭᠠᠭᠠ ᠦᠭᠡᠢ
ᠡᠷᠡᠮᠪᠡ ᠵᠢᠷᠤᠮ ᠲᠠᠢ ᠪᠠᠯᠭᠤᠳᠠᠭ ᠶᠤᠮ᠃
ᠤᠤᠭᠤᠬᠤ ᠪᠠᠨ ᠰᠠᠢᠬᠠᠨ ᠤᠤᠭᠤᠵᠠᠭᠠᠵᠤ
ᠤᠤᠭᠤᠭᠰᠠᠨ ᠢᠳᠡᠭᠰᠡᠨ ᠳ᠋ᠡᠭᠡᠨ ᠡᠵᠡᠨ ᠪᠣᠯᠵᠤ
ᠤᠴᠢᠷ ᠵᠢᠷᠤᠮ ᠢ᠋ᠶ᠋ᠠᠨ ᠰᠠᠬᠢᠵᠠᠭᠠᠵᠤ
ᠤᠯᠤᠰ ᠲᠥᠷᠥ ᠳ᠋ᠡᠭᠡᠨ ᠵᠢᠳᠬᠦᠵᠡᠭᠡᠶᠡ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ
ᠬᠢᠨᠠᠭ᠍ᠴᠢ : ᠴᠣᠯᠮᠣᠨᠲᠤᠶᠠᠭᠠ
2023᠂ 11᠂ 1 ᠤ ᠡᠳᠦᠷ