ᠰᠠᠩᠭᠠ ᠲᠠᠩᠭᠠ ᠬᠣᠶᠠᠷ – ᠳ᠋ᠠᠭ ᠂ ᠵᠠᠮᠢᠶᠠᠨ Санга танга хоёр – Даг ᠂ Жамьяан
292ᠰᠠᠩᠭᠠ ᠲᠠᠩᠭᠠ ᠬᠣᠶᠠᠷ
ᠰᠠᠩᠭᠠ ᠲᠠᠩᠭᠠ ᠬᠣᠶᠠᠷ
ᠰᠠᠳᠤᠨ ᠲᠥᠷᠥᠯ ᠭᠡᠳᠡᠭ ᠦᠭᠡᠢ ᠴᠤ᠌
ᠰᠠᠢᠬᠠᠨ ᠦᠶᠡᠷᠬᠡᠵᠦ ᠶᠠᠪᠤᠭᠰᠠᠨ
ᠨᠠᠢᠵᠠ ᠨᠤᠭᠤᠳ ᠶᠤᠮ ᠪᠠᠢᠵᠠᠢ᠃
ᠭᠡᠲᠡᠯᠡ ᠬᠠᠷᠢᠨ ᠨᠢᠭᠡ ᠡᠳᠦᠷ
ᠭᠡᠷᠡᠯᠲᠦ ᠨᠠᠷᠠ ᠮᠠᠨᠳᠤᠭᠰᠠᠨ ᠥᠷᠯᠥᠭᠡ
ᠰᠠᠩᠭᠠ ᠲᠡᠳᠡᠨ ᠦ᠌ ᠬᠦᠷᠢᠶᠡᠨ ᠳ᠋ᠦ᠍ ᠢᠷᠡᠵᠦ
ᠲᠠᠩᠭᠠ ᠲᠡᠭᠦᠨ ᠢ᠋ ᠤᠭᠲᠤᠭᠠᠳ ᠠᠪᠴᠠᠢ᠃
ᠬᠣᠲᠠᠨ ᠳ᠋ᠤᠨᠢ ᠰᠠᠩᠭᠠ ᠣᠷᠣᠭᠠᠳ ᠶᠠᠪᠤᠴᠢᠬᠠᠵᠤ
ᠬᠣᠨᠢ ᠮᠠᠯ ᠢ᠋ ᠨᠢ ᠠᠵᠢᠭᠠᠳ ᠯᠠ ᠪᠠᠢᠵᠤ
ᠲᠡᠭᠡᠵᠦ ᠪᠠᠬᠠᠨ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ
ᠲᠡᠭᠡᠨᠡᠭᠡᠯᠵᠡᠭᠰᠡᠨ ᠶᠠᠩᠵᠤ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ
ᠲᠠᠩᠭᠠ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠣᠴᠢᠵᠤ ᠭᠡᠨᠡ
ᠳᠠᠯᠤ ᠮᠥᠷᠥ᠍ ᠵᠢ ᠨᠢ ᠠᠯᠠᠭᠠᠳᠠᠵᠤ ᠭᠡᠨᠡ
ᠬᠤᠯᠮᠠᠯᠵᠠᠵᠤ ᠲᠠᠢᠰᠢ ᠪᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ
ᠬᠤᠳᠠᠯ ᠨᠢᠭᠡ ᠬᠥᠬᠥᠷᠡᠭᠰᠡᠨ ᠢ᠋ᠶ᠋ᠡᠨ
ᠠᠮᠢᠨᠴᠢᠯᠠᠵᠤ ᠴᠢᠬᠢᠨ ᠳ᠋ᠦ᠍ᠨᠢ ᠣᠢᠷᠠᠲᠤᠭᠰᠠᠨ ᠢ᠋ᠶ᠋ᠠᠨ
ᠠᠷᠭᠠᠳᠠᠵᠤ ᠬᠣᠰᠢᠭᠤ ᠴᠣᠷᠪᠣᠢᠭᠰᠠᠨ ᠢ᠋ᠶ᠋ᠠᠨ
— ᠰᠡᠭᠦᠯ ᠢ᠋ᠶ᠋ᠡᠨ ᠳᠠᠭᠠᠬᠤ ᠦᠭᠡᠢ ᠢᠷᠭᠡ ᠡᠴᠡ ᠪᠡᠨ
ᠰᠡᠭᠦᠯ ᠳ᠋ᠦ᠍ ᠁ ᠶᠠᠭᠠᠬᠢᠬᠤ ᠪᠠᠷ ᠨᠢᠭᠡ ᠥᠭᠴᠢᠭᠡ
ᠲᠣᠭᠠ ᠲᠣᠯᠣᠭᠠᠢ ᠨᠢ ᠪᠦᠷᠢᠨ ᠪᠠᠢᠪᠠᠯ
ᠲᠣᠮᠣ ᠵᠢᠵᠢᠭ ᠨᠢ ᠬᠠᠮᠢᠭᠠ ᠶᠠᠭᠤ ᠪᠠᠢᠨᠠ
ᠵᠢᠰᠦᠯᠡᠵᠦ ᠮᠠᠨ ᠤ᠋ ᠬᠢᠨᠢ ᠲᠠᠨᠢᠬᠤ ᠪᠢᠰᠢ
ᠰᠢᠳᠦᠯᠡᠵᠦ ᠮᠠᠭᠠᠳᠯᠠᠵᠤ ᠦᠵᠡᠬᠦ ᠪᠢᠰᠢ
ᠬᠦᠴᠦ ᠰᠠᠢᠲᠠᠢ
ᠮᠥᠴᠢ ᠤᠷᠲᠤᠲᠠᠢ
ᠬᠠᠷᠠ ᠨᠢᠳᠦᠨ ᠢᠷᠭᠡ ᠪᠡᠨ ᠥᠭᠴᠢᠭᠡ
ᠰᠢᠷᠠ ᠬᠠᠯᠵᠠᠨ ᠲᠥᠯᠥᠭᠡ ᠠᠪᠴᠢᠬᠠ
ᠦᠳᠡ ᠶ᠋ᠢᠨ ᠪᠡᠯᠴᠢᠭᠡᠷ ᠲᠦ ᠠᠭᠤᠯᠵᠠᠶᠠ
ᠦᠳᠡᠰᠢ ᠶ᠋ᠢᠨ ᠪᠦᠷᠢ ᠪᠡᠷ ᠶᠠᠩᠵᠤᠯᠠᠴᠢᠬᠠᠶᠠ
ᠬᠡᠷᠡᠭ ᠲᠦᠪᠡᠭ ᠪᠣᠯᠬᠤ ᠦᠭᠡᠢ ᠨᠠᠢᠵᠠ ᠮᠢᠨᠢ
ᠬᠡᠳᠦ ᠨᠢ ᠴᠢᠮᠠ ᠶ᠋ᠢ ᠮᠠᠷᠲᠠᠬᠤ ᠦᠭᠡᠢ ᠭᠡᠬᠦ ᠳ᠋ᠦ᠍
ᠲᠠᠩᠭᠠ ᠶ᠋ᠢᠨ ᠴᠢᠷᠠᠢ ᠪᠠᠷᠤᠢᠭᠠᠳ ᠶᠠᠪᠤᠴᠢᠬᠠᠵᠤ
ᠰᠠᠩᠭᠠ ᠶ᠋ᠢᠨ ᠥᠭᠡᠳᠡ ᠡᠴᠡ ᠪᠠᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠢᠷᠳᠡᠵᠦ
ᠲᠡᠭᠡᠵᠦ ᠪᠠᠬᠠᠨ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ
ᠲᠡᠢᠰᠢ ᠡᠢᠰᠢ ᠠᠯᠬᠤᠭᠰᠠᠨ ᠢ᠋ᠶ᠋ᠠᠨ
— ᠰᠤᠷᠯᠠᠵᠤ ᠢᠳᠡᠳᠡᠭ ᠨᠢ ᠴᠢ ᠶᠦᠮ ᠤᠤ?
ᠰᠣᠯᠢᠵᠤ ᠰᠠᠭᠤᠳᠠᠭ ᠨᠢ ᠪᠢ ᠶᠦᠮ ᠤᠤ?
ᠥᠷᠭᠡᠨ ᠲᠦᠮᠡᠨ ᠦ᠌ ᠬᠥᠷᠥᠩᠭᠡ ᠪᠡᠷ
ᠥᠩᠭᠡ ᠵᠠᠰᠠᠬᠤ ᠡᠷᠬᠡ ᠠᠯᠠᠭᠠ
ᠬᠠᠮᠲᠤ ᠣᠯᠠᠨ ᠤ᠋ ᠬᠠᠨᠳᠢᠪ ᠲᠤ
ᠬᠠᠷᠠ ᠰᠠᠨᠠᠬᠤ ᠵᠢᠷᠦᠬᠡ ᠠᠯᠠᠭᠠ
ᠬᠠᠷᠢᠨ ᠴᠢᠮᠠ ᠶ᠋ᠢ ᠪᠣᠯ᠁ ᠭᠡᠩᠭᠦᠲᠡ ᠪᠡᠨ
ᠬᠠᠯᠢᠭᠤ ᠨᠢᠳᠤᠷᠭᠠ ᠶ᠋ᠢ ᠨᠢ ᠰᠡᠭᠰᠦᠷᠦᠭᠡᠳ ᠠᠪᠴᠤ
ᠲᠠᠩᠭᠠ ᠶ᠋ᠢ ᠡᠢᠨ ᠬᠦ᠌ ᠠᠭᠤᠷᠯᠠᠨ ᠪᠥᠭᠰᠢᠬᠦ ᠳ᠋ᠦ᠍
ᠰᠠᠩᠭᠠ ᠲᠡᠢᠨ ᠬᠦ᠌ ᠤᠬᠠᠭᠠᠨ ᠰᠡᠢᠯᠵᠦ
— ᠲᠣᠭᠯᠠᠭᠰᠠᠨ ᠶᠤᠮ ᠳᠠ《 ᠬᠥᠭᠰᠢᠨ》 ᠴᠢᠨᠢ
ᠱᠣᠭᠯᠠᠭᠰᠠᠨ ᠨᠠᠮᠠ ᠪᠠᠨ ᠠᠭᠤᠴᠢᠯᠠᠵᠤ ᠦᠵᠡ ᠭᠡᠳ
ᠠᠨᠳᠠᠭᠤ ᠬᠦᠷᠡᠩ ᠳ᠋ᠡᠭᠡᠨ ᠳᠥᠷᠥᠭᠡᠯᠡᠭᠰᠡᠨ ᠭᠡᠨᠡ
ᠰᠠᠩᠳᠠᠭᠤ ᠮᠡᠩᠳᠡᠭᠦᠦ ᠠᠷᠢᠯᠤᠭᠰᠠᠨ ᠭᠡᠨᠡ ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ
ᠬᠢᠨᠠᠭ᠍ᠴᠢ : ᠲᠤᠭ᠍ᠴᠢ ᠰᠠᠷᠠᠨᠠ
2023᠂ 10᠂ 24 ᠤ ᠡᠳᠦᠷ