ᠮᠠᠨᠳᠠᠲ ᠠᠪᠬᠤ ᠶᠢᠨ ᠡᠮᠦᠨᠡ – ᠪ ᠂ ᠵᠠᠮᠲᠣ Мандат авахын өмнө – Б ᠂ Жамт
256ᠮᠠᠨᠳᠠᠲ ᠠᠪᠬᠤ ᠶᠢᠨ ᠡᠮᠦᠨᠡ
《 ᠲᠤᠰ ᠬᠦᠨᠡᠰᠦᠨ ᠦ᠌ ᠠᠷᠲ᠋ᠧᠯᠢ ( ᠬᠠᠮᠲᠤᠷᠠᠯ ) ᠤ᠋ᠨ ᠠᠵᠢᠯᠴᠢᠨ ᠠᠵᠢᠯᠲᠠᠨ ᠨᠡᠢᠲᠡ ᠪᠡᠷ ᠢ᠋ᠶ᠋ᠡᠨ ᠨᠢᠭᠡ ᠨᠢ ᠨᠡᠢᠲᠡ ᠶ᠋ᠢᠨ ᠲᠥᠯᠥᠭᠡ᠂ ᠨᠡᠢᠲᠡ ᠨᠢ ᠨᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠥᠯᠥᠭᠡ ᠭᠡᠰᠡᠨ ᠰᠠᠨᠠᠭᠠ ᠡᠷᠡᠮᠡᠯᠵᠡᠯ ᠢ᠋ᠶ᠋ᠡᠷ ᠵᠢᠵᠢᠭᠦᠷᠯᠡᠵᠦ ᠰᠣᠼᠢᠶᠠᠯᠢᠰᠲ ᠶᠣᠰᠣ ᠪᠠᠷ ᠬᠠᠮᠲᠤᠷᠠᠨ ᠠᠵᠢᠯᠯᠠᠵᠤ ᠰᠤᠷᠴᠤ ᠠᠮᠢᠳᠤᠷᠠᠵᠤ ᠪᠠᠢᠨᠠ᠃ ᠪᠢᠳᠡ ᠪᠡᠶᠡ ᠪᠡᠶᠡ ᠶ᠋ᠢᠨ ᠢ᠋ᠶ᠋ᠡᠨ ᠵᠣᠪᠠᠯᠠᠩ ᠵᠢᠷᠭᠠᠯ ᠢ᠋ ᠬᠤᠪᠢᠶᠠᠯᠴᠠᠳᠠᠭ᠃ ᠨᠡᠢᠲᠡ ᠶ᠋ᠢᠨ ᠬᠡᠪ ᠵᠢᠷᠤᠮ ᠵᠥᠷᠢᠴᠡᠳᠡᠭ ᠨᠢᠭᠡ ᠴᠤ᠌ ᠬᠥᠮᠦᠨ ᠪᠠᠢᠬᠤ ᠦᠭᠡᠢ 》 ᠭᠡᠬᠦ ᠵᠡᠷᠭᠡ ᠶ᠋ᠢᠨ ᠬᠡᠳᠦᠨ ᠥᠭᠦᠯᠡᠪᠦᠷᠢ ᠬᠡᠨ ᠪᠦᠬᠦᠨ ᠦ᠌ ᠠᠮᠠᠨ ᠤ᠋ ᠤᠩᠰᠢᠯᠭᠠ ᠪᠣᠯᠵᠤ ᠲᠡᠳᠡᠭᠡᠷ ᠥᠭᠦᠯᠡᠪᠦᠷᠢ ᠶ᠋ᠢ ᠠᠷᠲ᠋ᠧᠯᠢ ᠶ᠋ᠢᠨ ᠬᠠᠨᠠ ᠶ᠋ᠢᠨ ᠰᠣᠨᠢᠨ᠂ ᠳᠠᠷᠤᠭᠠ ᠨᠠᠷ ᠤ᠋ᠨ ᠢᠯᠡᠳᠬᠡᠯ ᠵᠡᠷᠭᠡ ᠳ᠋ᠦ᠍ ᠣᠷᠣᠭᠰᠠᠨ ᠢ᠋ ᠥᠭᠦᠯᠡᠪᠡᠯ ᠣᠯᠠᠨ ᠪᠣᠳᠢ ᠪᠣᠯᠬᠤ ᠪᠠᠷ ᠠᠵᠢ᠃ ᠬᠣᠲᠠ ᠶ᠋ᠢᠨ ᠣᠷᠴᠢᠨ ᠳ᠋ᠤ᠌ ᠤᠷᠢ ᠤᠨᠠᠵᠤ ᠠᠭᠤᠯᠠ ᠶ᠋ᠢᠨ ᠴᠠᠰᠤ ᠪᠠᠭᠤᠬᠤ ᠦᠷᠡ ᠪᠡᠷ ᠲᠡᠷᠡ ᠠᠷᠲ᠋ᠧᠯᠢ ᠶ᠋ᠢᠨ ᠬᠢᠨ ᠰᠣᠼᠢᠶᠠᠯᠢᠰᠲ ᠦᠢᠯᠡᠳᠪᠦᠷᠢ ᠪᠣᠯᠵᠤ ᠮᠠᠨᠳᠠᠲ ① ᠠᠪᠤᠨᠠ ᠭᠡᠵᠦ ᠬᠥᠷ ᠲᠡᠢ ᠪᠠᠢᠵᠠᠢ᠃ ᠡᠭᠦᠨ ᠳ᠋ᠡᠭᠡᠨ ᠴᠤ᠌ ᠠᠷᠲ᠋ᠧᠯᠢ ᠨᠡᠷᠡ ᠳ᠋ᠦ᠍ ᠭᠠᠷᠴᠤ ᠰᠢᠯᠢᠳᠡᠭ ᠠᠵᠢᠯᠴᠢᠨ ᠣᠯᠠᠨ ᠲᠠᠢ ᠪᠣᠯᠤᠭᠰᠠᠨ ᠶᠣᠮ᠃ ᠨᠠᠷᠢᠨ ᠪᠤᠤᠪᠤᠨ ᠤ᠋ ᠼᠧᠬᠡ (ᠦᠢᠯᠡᠳᠪᠦᠷᠢ ᠶᠢᠨ ᠳᠠᠰᠤᠭ) ᠶ᠋ᠢᠨ ᠳᠠᠷᠤᠭᠠ ᠮᠠᠯᠢᠭᠠᠷ ᠴᠠᠭᠠᠨ ᠬᠡᠦᠬᠡᠨ ᠠᠵᠢᠯ ᠤ᠋ᠨ ᠢ᠋ᠶ᠋ᠠᠨ ᠴᠠᠭᠠᠨ ᠬᠠᠯᠠᠭᠠᠵᠠ ᠶᠢ ᠲᠠᠢᠯᠤᠨ ᠱᠦᠭᠦᠢ ᠳ᠋ᠦ᠍ ᠡᠯᠭᠦᠵᠦ ᠭᠠᠳᠠᠭᠤᠷ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠦᠭᠡᠳ ᠦᠢᠯᠡᠳᠪᠦᠷᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠭᠠᠯᠭᠠ ᠪᠠᠷ ᠭᠠᠷᠵᠤ ᠶᠠᠪᠤᠲᠠᠯᠠ 《 ᠭᠠᠨᠳᠢᠮᠠ ᠬᠦᠶᠢ ᠪᠠᠷᠢᠭᠠᠳᠠ ᠶ᠋ᠢᠨ ᠠᠬᠠᠯᠠᠭᠴᠢ 》 ᠭᠡᠵᠦ ᠬᠡᠯᠡ ᠨᠢ ᠣᠷᠢᠶᠠᠯᠳᠤᠭᠰᠠᠨ ᠰᠥᠭᠡᠩᠭᠢᠳᠡᠬᠦᠬᠡᠨ ᠫᠠᠷᠭᠢᠶᠠ ᠬᠣᠭᠣᠯᠠᠢ ᠲᠠᠢ ᠬᠥᠮᠦᠨ ᠳᠠᠭᠤᠳᠠᠪᠠ᠃ ᠭᠠᠨᠳᠢᠮᠠ ᠴᠣᠴᠢᠨ ᠡᠷᠭᠢᠵᠦ ᠬᠠᠷᠠᠲᠠᠯᠠ ᠥᠪᠡᠷ ᠦ᠋ᠨ ᠬᠢᠨᠢ ᠤᠳᠤᠷᠢᠳᠤᠳᠠᠭ ᠰᠣᠼᠢᠶᠠᠯᠢᠰᠲ ᠬᠥᠳᠡᠯᠮᠦᠷᠢ ᠶ᠋ᠢᠨ ᠪᠠᠷᠢᠭᠠᠳᠠ ᠶ᠋ᠢᠨ ᠭᠡᠰᠢᠭᠦᠨ ᠰᠠᠭᠰᠠᠢ ᠭᠥᠯᠢᠭᠡᠷ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠡᠭᠴᠡᠯᠡᠨ ᠰᠢᠷᠳᠡᠵᠦ ᠭᠤᠢᠪᠢᠭᠰᠠᠭᠠᠷ ᠳᠥᠭᠥᠨ ᠢᠷᠡᠵᠦ ᠶᠠᠪᠤᠨᠠ᠃ ᠭᠠᠨᠳᠢᠮᠠ ᠶ᠋ᠢᠨ ᠵᠢᠷᠦᠬᠡ ᠤᠷᠤᠭᠤ ᠨᠢᠭᠡ ᠶᠠᠭᠤᠮᠠ ᠴᠢᠴᠢᠬᠦ ᠰᠢᠭ ᠪᠣᠯᠪᠠ ᠃ ᠲᠡᠷᠡ ᠬᠡᠳᠦᠨ ᠬᠣᠷᠣᠮ ᠮᠠᠯ ᠭᠠᠢᠬᠠᠭᠰᠠᠨ ᠢ᠋ᠶ᠋ᠠᠨ:
- ᠦᠭᠡᠢ ᠴᠢ ᠴᠢᠨᠢ ᠶᠠᠭᠠᠬᠢᠵᠤ ᠶᠠᠪᠤᠨᠠ ᠭᠡᠵᠦ ᠴᠡᠴᠡᠷᠡᠩᠬᠦᠢᠬᠡᠨ ᠳᠠᠭᠤ ᠪᠠᠷ ᠥᠭᠦᠯᠡᠪᠡ᠃
- ᠪᠢ ᠶᠠᠭᠠᠬᠢᠬᠤ ᠪᠣᠢ ᠃ ᠲᠠᠨ ᠤ᠋ ᠨᠡᠷᠡ ᠲᠥᠷᠥ ᠳ᠋ᠦ᠍ ᠭᠠᠢ ᠲᠡᠢᠮᠦ ᠪᠢᠵᠠ ᠳᠠ ᠭᠡᠵᠦ ᠬᠥᠯ ᠢ᠋ᠶ᠋ᠡᠨ ᠠᠷᠠᠢ ᠶᠠᠳᠠᠨ ᠰᠣᠯᠪᠢᠴᠠᠭᠤᠯᠤᠨ ᠠᠯᠬᠤᠵᠤ ᠶᠠᠪᠤᠭᠠ ᠰᠠᠭᠰᠠᠢ ᠶ᠋ᠢᠨ ᠡᠩᠭᠡᠷ ᠨᠢ ᠵᠠᠳᠠᠭᠠᠢ ᠭᠠᠳᠠᠭᠤᠷ ᠴᠠᠮᠴᠠᠨ ᠤ᠋ ᠬᠢᠨᠢ ᠮᠦᠷᠦ ᠴᠣᠬᠣᠢ ᠪᠣᠯᠵᠤ ᠥᠮᠥᠳᠥᠨ ᠦ᠌ ᠡᠪᠦᠳᠦᠭ ᠰᠢᠷᠣᠢ ᠪᠣᠯᠤᠭᠰᠠᠨ ᠪᠠᠢᠯᠠ᠃ ᠭᠠᠨᠳᠢᠮᠠ ᠪᠤᠳᠤᠮᠠᠯ ᠰᠣᠷᠮᠤᠤᠰᠤ ᠲᠠᠢ ᠠᠯᠠᠭ ᠨᠢᠳᠦ ᠪᠡᠨ ᠡᠢᠰᠢ ᠲᠠᠢᠰᠢ ᠡᠷᠭᠢᠯᠳᠦᠭᠦᠯᠦᠨ ᠬᠠᠷᠠᠭᠠᠳ 《 ᠮᠠᠨ ᠤ᠋ ᠲᠧᠭᠨᠢᠭ ᠦ᠋ᠨ ᠬᠢᠨᠢ ᠰᠣᠼᠢᠶᠠᠯᠢᠰᠲ ᠬᠥᠳᠡᠯᠮᠦᠷᠢ ᠶ᠋ᠢᠨ ᠪᠠᠷᠢᠭᠠᠳᠠ ᠶ᠋ᠢᠨ ᠮᠠᠨᠳᠠᠲ᠋ ᠠᠪᠬᠤ ᠳ᠋ᠤ᠌ ᠡᠨᠡ ᠯᠡ ᠲᠦᠪᠡᠭ ᠤᠴᠠᠷᠠᠭᠤᠯᠬᠤ ᠨᠢ ᠁ 》 ᠪᠤᠰᠤᠳ ᠪᠠᠷᠢᠭᠠᠳᠠ ᠶ᠋ᠢᠨ ᠬᠢᠨ ᠬᠠᠷᠠᠴᠢᠬᠠᠪᠠᠯ ᠶᠠᠭᠠᠬᠢᠨᠠ ᠭᠡᠵᠦ ᠰᠠᠨᠠᠭᠠᠳ 《 ᠦᠳᠡ ᠶ᠋ᠢᠨ ᠵᠠᠪᠰᠠᠷᠯᠠᠭᠠ ᠪᠣᠯᠤᠯᠠ ᠃ ᠠᠵᠢᠯᠴᠢᠳ ᠭᠠᠷᠴᠤ ᠢᠷᠡᠬᠦ ᠨᠢ 》 ᠭᠡᠰᠡᠨ ᠤᠳᠬᠠ ᠠᠪᠴᠠᠯᠳᠤᠭᠠ ᠮᠠᠭᠤᠲᠠᠢ ᠬᠣᠶᠠᠷ ᠥᠭᠦᠯᠡᠪᠦᠷᠢ ᠬᠡᠯᠡᠭᠡᠳ ᠲᠡᠭᠦᠨ ᠢ᠋ ᠣᠳᠣᠬᠠᠨ ᠳ᠋ᠠᠭᠠᠨ ᠬᠥᠮᠦᠨ ᠦᠭᠡᠢ ᠪᠠᠢᠭᠠ ᠤᠯᠠᠭᠠᠨ ᠪᠤᠯᠤᠩ ᠳ᠋ᠤ᠌ ᠪᠠᠷᠤᠭ ᠴᠢᠷᠦᠬᠦ ᠰᠢᠬᠠᠭᠠᠳ ᠣᠷᠣᠴᠢᠬᠠᠪᠠ᠃ ᠰᠠᠭᠰᠠᠢ ᠰᠠᠨᠳᠠᠯᠢ ᠳᠡᠭᠡᠭᠦᠷ ᠳᠡᠭᠡᠬᠡᠨ ᠣᠢᠴᠢᠭᠰᠠᠨ ᠢ᠋ᠶ᠋ᠠᠨ ᠭᠤᠯᠵᠢᠯᠵᠠᠠ ᠪᠣᠰᠴᠤ ᠢᠷᠡᠭᠡᠳ ᠵᠡᠭᠦᠷᠮᠡᠭᠯᠡᠭᠰᠡᠨ ᠪᠠᠢᠭᠠ ᠬᠥᠮᠦᠨ ᠦ᠌ ᠰᠢᠭ ᠨᠢᠳᠦ ᠪᠡᠷ ᠭᠠᠨᠳᠢᠮᠠ ᠶ᠋ᠢ ᠡᠭᠳᠡᠭᠦᠦ ᠲᠡᠢ ᠰᠢᠷᠲᠡᠭᠡᠳ ᠄
- ᠲᠠ ᠨᠠᠷ ᠲᠤ ᠪᠢ ᠭᠣᠮᠣᠳᠠᠵᠤ ᠪᠠᠢᠨᠠ᠃ ᠮᠠᠭᠤ ᠡᠵᠢ ᠶ᠋ᠢ ᠮᠢᠨᠢ ᠨᠠᠰᠤ ᠪᠠᠷᠠᠬᠤ ᠳ᠋ᠤ᠌ ᠲᠠ ᠨᠠᠷ ᠣᠯᠢᠭᠲᠠᠢ ᠬᠠᠷᠠᠭᠠ ᠦᠭᠡᠢ᠂ ᠪᠠᠷᠢᠭᠠᠲᠠ ᠪᠠᠷᠢᠭᠠᠳᠠ ᠯᠠ ᠭᠡᠨᠡ ᠃ ᠲᠠ ᠨᠠᠷ ᠬᠥᠮᠦᠰ ᠢ᠋ ᠠᠯᠠᠭ ᠦᠵᠡᠳᠡᠭ ᠰᠢᠦ ᠃ ᠵᠠ ᠲᠡᠷᠡ ᠴᠤ᠌ ᠶᠠᠭᠠᠬᠢᠬᠤᠪ ᠂ ᠬᠠᠮᠤᠭ ᠤ᠋ᠨ ᠭᠣᠣᠯ ᠨᠢ ᠲᠠ ᠨᠠᠷ ᠮᠢᠨᠦ ᠰᠠᠨᠠᠭᠠᠴᠢᠯᠠᠭᠠ ᠶ᠋ᠢ ᠳᠡᠮᠵᠢᠳᠡᠭ ᠦᠭᠡᠢ ᠃ ᠪᠢ ᠶᠠᠮᠠᠷ ᠴᠤ ᠭᠡᠰᠡᠨ ᠴᠢᠨᠦ ᠮᠠᠭᠲᠠᠭᠠᠳ ᠪᠠᠢᠭᠠ ᠴᠢᠯᠠᠭᠤᠨ ᠠ᠋ᠴᠠ ᠳᠤᠲᠠᠭᠤ ᠦᠭᠡᠢ ᠶᠠᠭᠤᠮᠠ ᠬᠢᠬᠦ ᠭᠡᠵᠦ ᠣᠷᠣᠯᠳᠣᠭᠰᠠᠨ ᠃ ᠭᠡᠲᠡᠯᠡ ᠲᠠ ᠨᠠᠷ ᠪᠦᠲᠦᠭᠡᠭᠳᠡᠬᠦᠨ ᠦ᠌ ᠭᠣᠯᠣᠭᠳᠠᠯ ᠭᠠᠷᠭᠠᠳᠠᠭ ᠬᠥᠮᠦᠨ ᠢ᠋ ᠴᠢᠮᠡᠭᠡ ᠦᠭᠡᠢ ᠥᠩᠭᠡᠷᠡᠭᠦᠯᠳᠡᠭ ᠮᠥᠷᠲᠡᠯᠡ ᠪᠡᠨ ᠮᠢᠨᠦ ᠰᠠᠨᠠᠭᠠᠴᠢᠯᠠᠭᠠ ᠶ᠋ᠢ ᠳᠡᠮᠵᠢᠳᠡᠭ ᠦᠭᠡᠢ ᠭᠡᠬᠦ ᠳ᠋ᠦ᠍ ᠭᠠᠨᠳᠢᠮᠠ ᠠᠮᠢᠰᠬᠤᠭᠠᠳᠠᠵᠤ᠄
- ᠬᠢᠱ᠌ᠢ᠂ ᠰᠠᠭᠰᠠᠢ ᠮᠢᠨᠢ ᠨᠠᠮᠠ ᠶ᠋ᠢ ᠴᠤ᠌ ᠶᠠᠭᠠᠬᠢᠬᠤ ᠪᠣᠢ? ᠴᠢ ᠪᠠᠷᠢᠭᠠᠳᠠ ᠶ᠋ᠢᠨ ᠭᠡᠰᠢᠭᠦᠨ ᠠᠷᠲ᠋ᠧᠯᠢ ᠶ᠋ᠢᠨ ᠢ᠋ᠶ᠋ᠡᠨ ᠨᠡᠷᠡ ᠲᠥᠷᠥ ᠶ᠋ᠢ ᠪᠣᠳᠣᠭᠠᠴᠢ ᠳᠠ᠃ ᠥᠨᠥᠳᠥᠷ ᠮᠠᠨ ᠤ᠋ ᠠᠳᠠ ᠳᠡᠭᠡᠳᠦ ᠭᠠᠵᠠᠷ ᠤ᠋ᠨ ᠰᠢᠯᠭᠠᠯᠲᠠ ᠢᠷᠡᠬᠦ ᠭᠡᠵᠦ ᠪᠠᠢᠨᠠ᠂ ᠬᠡᠷᠪᠡ ᠴᠢ ᠡᠢᠮᠦ ᠪᠠᠢᠬᠤ ᠶᠤᠮ ᠪᠣᠯ ᠮᠠᠨ ᠤ᠋ ᠪᠠᠷᠢᠭᠠᠳᠠ ᠰᠣᠼᠢᠶᠠᠯᠢᠰᠲ ᠬᠥᠳᠡᠯᠮᠦᠷᠢ ᠶ᠋ᠢᠨ ᠪᠠᠷᠢᠭᠠᠳᠠ ᠶ᠋ᠢᠨ ᠮᠠᠨᠳᠠᠲ ᠶᠠᠭᠠᠬᠢᠵᠤ ᠠᠪᠬᠤ ᠶᠤᠮ ᠪᠣᠢ ? ᠮᠠᠨ ᠤ᠋ ᠬᠢ ᠮᠠᠨᠳᠠᠲ᠋ ᠠᠪᠴᠤ ᠴᠢᠳᠠᠬᠤ ᠦᠭᠡᠢ ᠪᠣᠯ ᠠᠷᠲ᠋ᠧᠯᠢ ᠮᠠᠨᠢ ᠰᠣᠼᠢᠶᠠᠯᠢᠰᠲ ᠬᠥᠳᠡᠯᠮᠦᠷᠢ ᠶ᠋ᠢᠨ ᠦᠢᠯᠡᠳᠪᠦᠷᠢ ᠪᠣᠯᠵᠤ ᠴᠢᠳᠠᠬᠤ ᠦᠭᠡᠢ ᠰᠢᠦ ᠭᠡᠵᠦ ᠳᠡᠭᠡᠷᠡ ᠳᠡᠭᠡᠷᠡ ᠡᠴᠡ ᠨᠢ ᠳᠠᠪᠬᠤᠴᠠᠭᠤᠯᠤᠨ ᠬᠥᠪᠥᠭᠦᠯᠲᠡᠯᠡ ᠰᠠᠭᠰᠠᠢ ᠤᠯᠠᠮ ᠭᠠᠭᠠᠷᠠᠵᠤ᠄
- ᠴᠢ ᠪᠢᠲᠡᠭᠡᠢ ᠰᠤᠷᠭᠠᠭᠠᠳ ᠪᠠᠢ᠂ ᠡᠢᠮᠦ ᠰᠤᠷᠭᠠᠯ ᠢ᠋ ᠴᠢᠨᠢ ᠲᠤᠭᠤᠯᠬᠤ ᠪᠠᠷ ᠢ᠋ᠶ᠋ᠠᠨ ᠪᠣᠯᠤᠯᠠ ᠭᠡᠪᠡ ᠃
- ᠠ᠋ ᠴᠢ ᠳᠠᠩᠴᠤ ᠳᠠ᠂ ᠴᠢᠮᠠ ᠶ᠋ᠢ ᠲᠦᠷᠦᠭᠦᠨ ᠠᠷᠢᠬᠢ ᠤᠤᠭᠤᠵᠤ ᠠᠵᠢᠯ ᠤ᠋ᠨ ᠴᠠᠭ ᠬᠡᠢᠳᠡᠭᠦᠯᠬᠦ ᠳ᠋ᠦ᠍ ᠮᠠᠨ ᠤ ᠪᠠᠷᠢᠭᠠᠳᠠ ᠶ᠋ᠢᠨ ᠬᠢᠨ ᠨᠠᠭᠠᠨᠠᠳᠤᠵᠤ ᠴᠢᠨᠦ ᠨᠡᠷᠡ ᠶ᠋ᠢ᠂ ᠴᠠᠭᠠᠨᠠᠳᠤᠵᠤ ᠪᠠᠷᠢᠭᠠᠳᠠ ᠶᠢᠨ ᠢ᠋ᠶ᠋ᠡᠨ ᠨᠡᠷᠡ ᠶ᠋ᠢ ᠪᠣᠳᠣᠭᠠᠳ ᠴᠢᠮᠡᠭᠡ ᠦᠭᠡᠢ ᠯᠡ ᠥᠩᠭᠡᠷᠡᠭᠦᠯᠦᠭᠰᠡᠨ ᠶᠦᠮ ᠭᠡᠲᠡᠯᠡ ᠰᠠᠭᠰᠠᠢ᠄
- ᠦᠨᠡᠨ ᠶᠠᠭᠤᠮᠠ ᠦᠨᠡᠨ ᠢ᠋ᠶ᠋ᠡᠷ ᠳᠡᠭᠡᠷᠡ ᠭᠡᠵᠦ ᠪᠢ ᠪᠣᠳᠣᠳᠠᠭ ᠪᠣᠯᠤᠯᠠ ᠭᠡᠪᠡ᠃
- ᠵᠠ ᠶᠠᠭᠠᠬᠢᠬᠤ ᠪᠣᠢ ? ᠴᠢ ᠁ ᠰᠠᠭᠰᠠᠢ ᠪᠢ ᠴᠢᠮᠠ ᠶ᠋ᠢ ᠳᠡᠮᠵᠢᠳᠡᠭ ᠰᠢᠦ ᠃ ᠲᠠᠨ ᠤ᠋ ᠡᠬᠡᠨᠡᠷ ᠡᠷᠲᠡᠳᠡ ᠴᠢᠮᠠ ᠳ᠋ᠤ᠌ ᠵᠣᠳᠣᠭᠤᠯᠴᠢᠬᠠᠯᠠ ᠭᠡᠳ ᠨᠢᠳᠦ ᠨᠢ ᠬᠦᠬᠡᠷᠡᠴᠢᠭᠡᠭᠰᠡᠨ ᠤᠬᠢᠯᠠᠭᠰᠠᠭᠠᠷ ᠢᠷᠡᠬᠦ ᠳ᠋ᠦ᠍ ᠪᠢ ᠴᠢᠮᠠ ᠶ᠋ᠢ ᠪᠣᠳᠣᠵᠤ ᠨᠢᠭᠤᠭᠠᠳ ᠥᠩᠭᠡᠷᠡᠭᠦᠯᠦᠭᠰᠡᠨ ᠭᠡᠲᠡᠯᠡ ᠰᠠᠭᠰᠠᠢ ᠪᠠᠰᠠ ᠯᠠ ᠳᠠᠪᠠᠷᠠᠵᠤ᠄
- ᠲᠡᠢᠮᠦ ᠠ᠋᠂ ᠲᠠ ᠨᠠᠷ ᠨᠡᠷᠡ ᠪᠡᠨ ᠪᠣᠳᠣᠨ ᠲᠡᠷᠡ ᠶᠠᠪᠤᠳᠠᠯ ᠢ᠋ ᠳᠠᠷᠤᠵᠤ ᠥᠩᠭᠡᠷᠡᠭᠦᠯᠦᠭᠰᠡᠨ ᠦᠨᠡᠨ ᠂ ᠪᠤᠰᠤᠳ ᠭᠠᠵᠠᠷ ᠤ᠋ᠨ ᠰᠣᠼᠢᠶᠠᠯᠢᠰᠲ ᠬᠥᠳᠡᠯᠮᠦᠷᠢ ᠶ᠋ᠢᠨ ᠪᠠᠷᠢᠭᠠᠳᠠ ᠲᠡᠢᠮᠦ ᠦᠭᠡᠢ ᠪᠠᠢᠨᠠ ᠰᠢᠦ ᠭᠡᠪᠡ ᠃ ᠲᠡᠳᠡᠨ ᠢ᠋ ᠬᠦᠦᠷᠨᠢᠵᠦ ᠪᠠᠢᠲᠠᠯᠠ ᠳᠠᠷᠤᠭᠠ ᠶ᠋ᠢᠨ ᠶᠠᠷᠢᠬᠤ ᠨᠢ ᠳᠤᠭᠤᠯᠳᠠᠪᠠ ᠃ 《 ᠠᠮᠢᠲᠠᠨ ᠤ ᠨᠢᠳᠦᠨ ᠳ᠋ᠦ᠍ ᠨᠢᠭᠡ ᠶᠠᠩᠵᠤ ᠲᠠᠢ ᠪᠠᠢᠭᠠᠴᠢ 》 ᠭᠡᠵᠦ ᠳᠠᠷᠤᠭᠠ ᠶ᠋ᠢᠨ ᠬᠢᠨᠢ ᠠᠩᠬᠠᠷᠤᠭᠤᠯᠬᠤ ᠦᠭᠡ ᠭᠠᠨᠳᠢᠮᠠ ᠶ᠋ᠢᠨ ᠰᠠᠨᠠᠭᠠᠨ ᠳ᠋ᠤ᠌ ᠠᠭᠱᠠᠨ ᠵᠠᠭᠤᠷᠠ ᠪᠠᠭᠤᠵᠤ ᠲᠡᠨᠳᠡ ᠡᠴᠡ ᠳᠠᠷᠤᠢ ᠭᠠᠷᠬᠤ ᠶ᠋ᠢ ᠵᠠᠪᠳᠤᠲᠠᠯᠠ ᠂
- ᠲᠠ ᠨᠠᠷ ᠴᠢᠨᠢ ᠶᠠᠭᠤ ᠪᠣᠯᠤᠭᠠᠳ ᠨᠢᠭᠡ ᠳᠠᠭᠤ ᠲᠡᠭᠷᠢ᠂ ᠨᠢᠭᠡ ᠳᠠᠭᠤ ᠭᠠᠵᠠᠷ ᠲᠤ᠌ ᠬᠠᠲᠠᠭᠠᠳ ᠪᠠᠢᠨᠠ ᠪᠣᠢ ? ᠭᠡᠭᠰᠡᠭᠡᠷ ᠳᠠᠷᠤᠭᠠ ᠨᠢ ᠬᠥᠮᠥᠰᠬᠡ ᠵᠠᠩᠭᠢᠳᠤᠨ ᠣᠷᠣᠵᠤ ᠢᠷᠡᠪᠡᠯ᠄
- ᠠ ᠰᠠᠭᠰᠠᠢ ᠭᠡᠵᠦ ᠭᠠᠨᠳᠢᠮᠠ ᠡᠷᠬᠡ ᠬᠡᠦᠬᠡᠳ ᠮᠡᠲᠦ ᠥᠭᠦᠯᠡᠪᠡ᠃
ᠳᠠᠷᠤᠭᠠ ᠴᠤ ᠰᠢᠷᠦᠭᠦᠨ ᠳᠠᠭᠤ ᠪᠠᠷ 《 ᠲᠠᠨ ᠬᠣᠶᠠᠷ ᠨᠠᠭᠠᠰᠢ ᠪᠠᠨ ᠬᠦᠷᠦᠭᠡᠳ ᠢᠷᠡ 》 ᠭᠡᠳ ᠠᠯᠪᠠᠨ ᠲᠠᠰᠤᠯᠭᠠ ᠪᠠᠨ ᠴᠢᠭᠯᠡᠨ ᠶᠠᠭᠠᠷᠠᠨ ᠠᠯᠬᠤᠬᠤ ᠳ᠋ᠤ᠌ ᠥᠷᠭᠡᠨ ᠥᠮᠥᠳᠥᠨ ᠦ᠌ ᠰᠢᠭᠤᠮᠠᠭ ᠬᠠᠯᠬᠠᠯᠵᠠᠵᠤ ᠬᠠᠷᠠᠭᠳᠠᠯᠠ᠃
ᠲᠠ ᠨᠠᠷ ᠴᠢᠨᠢ ᠶᠠᠭᠠᠬᠢᠴᠢᠬᠠᠭᠰᠠᠨ ᠭᠠᠰᠢᠯᠤᠭᠰᠠᠨ ᠲᠠᠷᠢᠬᠢ ᠨᠤᠭᠤᠳ ᠪᠣᠢ? ᠡᠨᠡ ᠠᠮᠢᠲᠠᠨ ᠤ᠋ ᠵᠠᠮ ᠳᠡᠭᠡᠷᠡ ᠬᠠᠰᠬᠢᠴᠢᠭᠠᠳ ᠭᠡᠵᠦ ᠳᠠᠷᠤᠭᠠ ᠶ᠋ᠢ ᠪᠡᠨ ᠵᠢᠮᠡᠯᠡᠬᠦ ᠳ᠋ᠦ᠍ ᠭᠠᠨᠳᠢᠮᠠ ᠶᠠᠭᠤ ᠴᠤ᠌ ᠡᠰᠡ ᠳᠤᠤᠭᠠᠷᠪᠠ ᠃ ᠬᠠᠷᠢᠨ ᠰᠠᠭᠰᠠᠢ᠄
- ᠲᠡᠢᠮᠦ ᠪᠢ ᠭᠠᠰᠢᠯᠤᠭᠰᠠᠨ ᠬᠥᠮᠦᠨ᠂ ᠲᠠ ᠨᠠᠷ ᠲᠤ᠌ ᠭᠠᠢ ᠲᠠᠷᠢᠵᠤ ᠪᠠᠢᠭᠠ ᠪᠠᠨ ᠮᠡᠳᠡᠵᠦ ᠪᠠᠢᠨᠠ ᠭᠡᠳ ᠭᠠᠷ ᠢ᠋ᠶ᠋ᠠᠨ ᠵᠠᠩᠭᠢᠳᠤᠨ ᠳᠠᠷᠤᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠰᠢᠷᠡᠭᠡ ᠶ᠋ᠢ ᠳᠡᠯᠡᠰᠬᠦ ᠳ᠋ᠦ᠍ ᠮᠣᠨᠴᠣᠭᠣᠷ ᠤᠯᠠᠭᠠᠨ ᠬᠠᠮᠠᠷ ᠲᠠᠢ ᠪᠤᠭᠤᠷᠤᠯ ᠣᠷᠣᠭᠰᠠᠨ ᠬᠠᠯᠢᠮᠠᠭ ᠲᠠᠢ ᠲᠡᠷᠡ ᠬᠥᠮᠦᠨ ᠵᠥᠭᠡᠯᠡᠨ ᠰᠠᠨᠳᠠᠯᠢ ᠠ᠋ᠴᠠ ᠪᠠᠨ ᠥᠨᠳᠡᠰᠬᠢᠵᠦ᠄
- ᠭᠠᠨᠳᠢᠮᠠ ᠰᠣᠼᠢᠶᠠᠯᠢᠰᠲ ᠬᠥᠳᠡᠯᠮᠦᠷᠢ ᠶ᠋ᠢᠨ ᠪᠠᠷᠢᠭᠠᠳᠠ ᠶ᠋ᠢᠨ ᠮᠠᠨᠳᠠᠲ ᠠᠪᠬᠤ ᠪᠡᠯᠡᠳᠬᠡᠯ ᠴᠢᠨᠢ ᠡᠨᠡ ᠤᠤ ? ᠭᠡᠪᠡᠯ ᠰᠠᠭᠰᠠᠢ ᠬᠠᠷᠠᠴᠠ ᠪᠠᠨ ᠤᠯᠠᠮ ᠭᠥᠯᠢᠢᠯᠭᠡᠨ ᠳᠠᠷᠤᠭᠠ ᠶ᠋ᠢᠨ ᠵᠦᠭ ᠭᠤᠢᠪᠢᠨ ᠳᠥᠭᠥᠭᠡᠳ᠄
- ᠲᠡᠢᠮᠦ ᠠ᠋᠂ ᠲᠠ ᠨᠠᠷ ᠤ᠋ᠨ ᠰᠣᠼᠢᠶᠠᠯᠢᠰᠲ ᠬᠥᠳᠡᠯᠮᠦᠷᠢ ᠶ᠋ᠢᠨ ᠪᠠᠷᠢᠭᠠᠳᠠ ᠰᠢᠭ᠋ ᠪᠠᠷᠢᠭᠠᠳᠠ ᠮᠠᠨ ᠤ᠋ ᠣᠷᠣᠨ ᠤ᠋ ᠬᠠᠮᠢᠭᠠ ᠨᠢ ᠴᠤ᠌ ᠪᠠᠢᠬᠤ ᠦᠭᠡᠢ᠃ ᠪᠠᠷᠢᠭᠠᠳᠠ ᠶ᠋ᠢᠨ ᠬᠢᠨ ᠦ᠌ ᠭᠠᠷ ᠢ᠋ ᠪᠢ ᠨᠢᠭᠡ ᠬᠠᠷᠠᠭᠰᠠᠨ ᠳᠠᠬᠢᠵᠤ ᠭᠣᠷᠢᠳᠠᠬᠤ ᠦᠭᠡᠢ᠂ ᠪᠢ ᠡᠵᠢ ᠶ᠋ᠢ ᠪᠡᠨ ᠮᠠᠭᠤ ᠦᠭᠡᠢ ᠣᠷᠣᠰᠢᠭᠤᠯᠤᠭᠰᠠᠨ ᠭᠡᠯᠡ᠃
- ᠭᠠᠨᠳᠢᠮᠠ ᠴᠠᠭᠠᠨᠠ ᠴᠢᠨᠢ ᠰᠢᠯᠭᠠᠯᠲᠠ ᠶ᠋ᠢᠨ ᠬᠢᠨ ᠢᠷᠡᠬᠦ ᠪᠣᠯᠤᠯᠠ᠃ ᠨᠠᠭᠠᠳᠤᠬᠢ ᠪᠠᠨ ᠠᠪᠤᠭᠠᠳ ᠭᠠᠷᠴᠤ ᠦᠵᠡᠭᠡᠴᠢ ᠶᠠᠭᠠᠬᠢᠶᠠ ᠳᠠ ᠭᠡᠵᠦ ᠳᠠᠷᠤᠭᠠ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠠᠯᠠᠭᠠᠨ ᠳ᠋ᠤ᠌ ᠬᠢᠮᠤᠰᠤ ᠪᠠᠨ ᠰᠢᠭᠢᠳᠲᠡᠯᠡ ᠪᠠᠵᠠᠨ ᠠᠳᠬᠤᠵᠤ ᠳᠠᠬᠢᠨ ᠳᠠᠬᠢᠨ ᠬᠠᠨᠢᠶᠠᠵᠤ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠬᠤ ᠳ᠋ᠤ᠌᠂
- ᠲᠠ ᠨᠠᠷ ᠰᠢᠳᠤᠷᠭᠤ ᠪᠢᠰᠢ᠂ ᠬᠥᠮᠦᠨ ᠢ᠋ ᠢᠯᠭᠠᠨ ᠦᠵᠡᠳᠡᠭ ᠭᠡᠳ ᠭᠠᠷ ᠵᠠᠩᠭᠢᠳᠤᠨ ᠳᠠᠷᠤᠭᠠ ᠳ᠋ᠠᠭᠠᠨ ᠪᠦᠷ ᠲᠤᠯᠤᠭᠠᠳ ᠢᠷᠡᠪᠡ᠃ ᠭᠠᠨᠳᠢᠮᠠ ᠰᠠᠭᠰᠠᠢ ᠶ᠋ᠢᠨ ᠬᠠᠨᠴᠤᠢ ᠠ᠋ᠴᠠ ᠪᠠᠷᠢᠵᠤ ᠠᠪᠤᠭᠠᠳ 《 ᠰᠡᠷᠭᠡᠢᠯᠡᠬᠦ ᠳᠠᠭᠤᠳᠠᠶᠠ ᠳᠠᠷᠤᠭᠠ ᠠ᠋ 》 ᠭᠡᠲᠡᠯᠡ 《 ᠲᠡᠭᠡᠪᠡᠯ ᠶᠠᠭᠠᠬᠢᠵᠤ ᠰᠣᠼᠢᠶᠠᠯᠢᠰᠲ ᠦᠢᠯᠡᠳᠪᠦᠷᠢ ᠭᠡᠭᠳᠡᠬᠦ ᠪᠣᠢ ? ᠶᠡᠳᠡᠵᠦ ᠡᠨᠡ ᠰᠢᠯᠭᠠᠯᠲᠠ ᠥᠩᠭᠡᠷᠡᠭᠦᠯᠵᠦ ᠪᠠᠢᠭᠠᠳ ᠤᠤᠭᠤᠵᠤ ᠪᠣᠯᠳᠠᠭ ᠦᠭᠡᠢ ᠁ 》 ᠭᠡᠵᠦ ᠪᠣᠳᠣᠭᠠᠳ ᠤᠲᠠᠰᠤ ᠵᠠᠯᠭᠠᠬᠤ ᠭᠡᠵᠦ ᠪᠠᠢᠭᠰᠠᠨ ᠭᠠᠨᠳᠢᠮᠠ ᠶ᠋ᠢᠨ ᠭᠠᠷ ᠠ᠋ᠴᠠ ᠬᠠᠷᠢᠯᠴᠠᠭᠤᠷ ᠢ᠋ ᠰᠢᠭᠦᠷᠡᠨ ᠠᠪᠴᠤ ᠲᠠᠯᠪᠢᠪᠠ᠃ ᠭᠡᠲᠡᠯᠡ ᠰᠠᠭᠰᠠᠢ ᠳᠠᠷᠤᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠮᠦᠷᠦ ᠤᠷᠤᠭᠤ ᠳᠡᠯᠡᠰᠦᠭᠡᠳ ᠠᠪᠤᠯᠠ᠃ ᠨᠢᠳᠦ ᠨᠢ ᠣᠷᠣᠢ ᠳᠡᠭᠡᠷᠡ ᠪᠡᠨ ᠭᠠᠷᠤᠭᠰᠠᠨ ᠭᠠᠨᠳᠢᠮᠠ 《 ᠪᠣᠯᠬᠤ ᠦᠭᠡᠢ ᠳᠠᠷᠤᠭᠠ ᠠ᠋᠂ ᠰᠡᠷᠭᠡᠢᠯᠡᠬᠦ ᠳᠠᠭᠤᠳᠠᠶᠠ 》ᠭᠡᠳ ᠬᠠᠷᠢᠯᠴᠠᠭᠤᠷ ᠢ ᠲᠠᠬᠢᠨ ᠠᠪᠳᠠᠯᠠ ᠳᠠᠷᠤᠭᠠ ᠤᠤᠭᠤᠵᠤ ᠰᠣᠭᠲᠣᠭᠤᠷᠠᠬᠤ ᠰᠠᠬᠢᠯᠭᠠ ᠪᠠᠲᠤ ᠠᠯᠳᠠᠬᠤ ᠶᠠᠪᠤᠲᠡᠯ ᠣᠭᠲᠣ ᠭᠠᠷᠬᠤ ᠪᠠᠨ ᠪᠠᠢᠭᠰᠠᠨ ᠭᠡᠵᠦ ᠮᠡᠳᠡᠭᠡᠯᠡᠭᠰᠡᠨ ᠢᠶᠠᠨ ᠪᠤᠳᠤᠭᠠᠳ:
- ᠭᠠᠨᠳᠢᠮᠠ ᠮᠢᠨᠢ ᠪᠢ ᠶᠠᠭᠠᠬᠢᠬᠤ ᠪᠣᠢ? ᠨᠠᠭᠠᠳᠤ ᠪᠠᠷᠢᠭᠠᠳᠠ ᠶ᠋ᠢᠨ ᠢ᠋ᠶ᠋ᠡᠨ ᠭᠡᠰᠢᠭᠦᠨ ᠢ᠋ ᠠᠪᠤᠭᠠᠳ ᠭᠠᠷᠴᠤ ᠦᠵᠡ ᠭᠡᠵᠦ ᠠᠷᠭᠠ ᠨᠢ ᠪᠠᠷᠠᠭᠳᠠᠭᠰᠠᠨ ᠰᠢᠨᠵᠢᠲᠡᠢ ᠬᠡᠯᠡᠭᠰᠡᠨ ᠢᠶᠠᠨ᠄
- ᠰᠠᠭᠰᠠᠢ ᠴᠢ ᠰᠣᠨᠣᠰᠤᠭᠠᠴᠢ᠂ ᠴᠢᠨᠦ ᠭᠣᠮᠣᠳᠠᠯ ᠢ᠋ ᠳᠠᠷᠠᠭᠠ ᠬᠡᠯᠡᠯᠴᠡᠶᠡ᠃ ᠪᠣᠯᠤᠨᠠ ᠪᠢᠵᠠ ᠳᠠ᠂ ᠤᠳᠠᠬᠤ ᠦᠭᠡᠢ᠃ ᠡᠨᠡ ᠤᠳᠠᠭᠠ ᠠᠭᠤᠴᠢᠯᠠᠵᠤ ᠦᠵᠡ ᠭᠡᠵᠦ ᠭᠣᠶᠣᠲᠠᠯᠠ ᠤᠲᠠᠰᠤᠨ ᠤ᠋ ᠬᠢᠨᠢ ᠬᠣᠩᠬᠣ ᠳᠤᠤᠭᠠᠷᠤᠯᠠ᠃ ᠳᠠᠷᠤᠭᠠ ᠪᠦᠷ ᠰᠦᠨᠡᠰᠦ ᠰᠦᠯᠳᠡ ᠨᠢ ᠠᠯᠠᠭᠠ ᠪᠣᠯᠴᠢᠬᠠᠪᠠ᠃ ᠰᠠᠭᠰᠠᠢ ᠤᠷᠲᠤ ᠠ᠋ᠴᠠ ᠳᠥᠯᠭᠡᠬᠡᠨ ᠨᠢ ᠠᠷᠭᠠ ᠦᠭᠡᠢ ᠬᠠᠷᠠᠵᠤ ᠵᠣᠭᠰᠣᠭᠠᠳ 《 ᠴᠢ ᠪᠠᠰᠠ ᠲᠡᠭᠡᠮᠡ ᠦᠭᠡᠢ ᠰᠠᠨ ᠳᠠ᠃ ᠪᠢᠲᠡ ᠠᠷᠲ᠋ᠧᠯᠢ ᠶ᠋ᠢᠨ ᠢ᠋ᠶ᠋ᠡᠨ ᠨᠡᠷᠡ ᠲᠥᠷᠥ ᠶ᠋ᠢ ᠪᠣᠳᠣᠵᠤ ᠪᠠᠢᠨᠠ᠂ ᠭᠠᠨᠳᠢᠮᠠ ᠨᠠᠭᠠᠳᠤ ᠤᠲᠠᠰᠤ ᠪᠠᠨ ᠠᠪ 》 ᠭᠡᠯᠡ᠃ ᠬᠠᠷᠢᠯᠴᠠᠭᠤᠷ ᠴᠢᠬᠢᠨ ᠳ᠋ᠡᠭᠡᠨ ᠣᠢᠷᠠᠲᠤᠭᠤᠯᠤᠮᠠᠭᠴᠠ ᠭᠠᠨᠳᠢᠮᠠ ᠶ᠋ᠢᠨ ᠴᠢᠷᠠᠢ ᠬᠤᠪᠢᠰᠬᠢᠵᠤ 《 ᠵᠠ ᠵᠠ 》 ᠭᠡᠵᠦ ᠤᠲᠠᠰᠤ ᠪᠠᠨ ᠲᠠᠰᠤᠯᠤᠭᠠᠳ ᠰᠢᠯᠭᠠᠯᠲᠠ ᠶ᠋ᠢᠨ ᠬᠥᠮᠦᠰ ᠣᠳᠣᠬᠠᠨ ᠢᠷᠡᠬᠦ ᠨᠢ ᠭᠡᠪᠡᠯ ᠰᠠᠨᠳᠤᠷᠤᠯ ᠤ᠋ᠨ ᠤᠯᠠᠮ ᠠ᠋ᠴᠠ ᠴᠢᠰᠤ ᠬᠠᠷᠪᠤᠬᠤ ᠮᠡᠲᠦ ᠪᠣᠯᠵᠤ ᠲᠡᠷᠡ ᠳᠠᠷᠤᠭᠠ᠄
- ᠭᠠᠨᠳᠢᠮᠠ ᠴᠢ ᠡᠨᠡ ᠶ᠋ᠢ ᠪᠡᠨ ᠠᠪᠤᠭᠠᠳ ᠲᠦᠷᠭᠡᠨ ᠭᠠᠷᠴᠤ ᠦᠵᠡ ᠳᠡ ᠪᠢ ᠭᠤᠶᠤᠶᠠ ᠭᠡᠳ ᠭᠠᠢᠬᠠᠰᠢ ᠲᠠᠰᠤᠷᠠᠭᠰᠠᠨ ᠶᠠᠩᠵᠤᠲᠠᠢ ᠰᠢᠷᠡᠭᠡᠨ ᠳᠡᠭᠡᠭᠦᠷ ᠬᠡᠢ ᠲᠡᠮᠲᠡᠷᠢᠪᠡ᠃
- - - -
① ᠡᠷᠬᠡ ᠶ᠋ᠢᠨ ᠦᠨᠡᠮᠯᠡᠬᠦ
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃