ᠶᠠᠷᠢᠶᠠ ᠶᠡᠬᠡᠳᠪᠡᠯ ᠁ – ᠰ ᠂ ᠳᠤᠯᠮᠠ Яриа ихэдвэл ᠁ – Ш ᠂ Дулам
331ᠶᠠᠷᠢᠶᠠ ᠶᠡᠬᠡᠳᠪᠡᠯ ᠁
ᠱ᠂ ᠳᠤᠯᠮᠠ
( ᠱᠣᠭ ᠰᠢᠯᠦᠭ )
ᠳᠠᠨᠳᠠᠪ ᠳᠠᠷᠤᠭᠠ ᠶ᠋ᠢᠨ ᠶᠠᠩᠵᠢᠮᠠ
ᠳᠡᠯᠭᠡᠭᠦᠷ ᠬᠠᠪᠢ ᠶ᠋ᠢᠨ ᠰᠦᠩᠵᠢᠮᠠ
ᠤᠷᠢᠳᠤ ᠬᠠᠭᠠᠯᠭᠠᠨ ᠤ᠋ ᠣᠨᠳᠣᠷᠮᠠ
ᠤᠷᠠᠨ ᠳᠠᠷᠬᠠᠨ ᠤ᠋ ᠬᠠᠨᠲᠠᠷᠮᠠ
ᠪᠠᠷᠠᠭᠤᠨ ᠠᠢᠯ ᠤ᠋ᠨ ᠪᠠᠯᠵᠢᠳᠮᠠ
ᠪᠠᠶᠠᠷ ᠨᠢᠷᠪᠠ ᠶ᠋ᠢᠨ ᠫᠸᠯᠵᠢᠳᠮᠠ
ᠬᠣᠢᠲᠤ ᠮᠤᠬᠤᠯᠠᠭ ᠤ᠋ᠨ ᠳᠠᠵᠢᠳᠮᠠ
ᠬᠣᠯᠠ ᠠ᠋ᠴᠠ ᠢᠷᠡᠭᠰᠡᠨ ᠭᠠᠵᠢᠳᠮᠠ
ᠡᠨᠡ ᠬᠡᠳᠦ ᠨᠡᠢᠯᠡᠭᠡᠳ
ᠡᠷᠡᠭᠡ ᠴᠡᠭᠡᠷ ᠦᠭᠡᠢ ᠪᠤᠷᠠᠵᠤ
ᠣᠯᠠᠨ ᠬᠥᠮᠦᠨ ᠦ᠌ ᠲᠤᠬᠠᠢ
ᠳᠠᠯᠠᠨ ᠬᠡᠯᠡ ᠪᠡᠨ ᠳᠡᠯᠭᠡᠵᠡᠢ᠃
ᠣᠷᠴᠢᠯᠠᠩ ᠤ᠋ᠨ ᠪᠦᠬᠦ ᠶᠠᠭᠤᠮᠠ ᠶ᠋ᠢ
ᠳᠠᠩᠴᠤ ᠦᠯᠡᠳᠡᠭᠡᠯ ᠦᠭᠡᠢ ᠶᠠᠷᠢᠵᠠᠢ᠃
ᠪᠠᠭᠠᠵᠢ ᠶ᠋ᠢᠨ ᠳᠠᠷᠤᠭᠠ ᠶ᠋ᠢᠨ ᠠᠪᠠᠭᠠᠢ ᠠ᠋ᠴᠠ
ᠢᠬᠡᠷᠡ ᠬᠡᠦᠬᠡᠳ ᠭᠠᠷᠤᠭᠰᠠᠨ ᠢ᠋
ᠪᠠᠳᠮᠠ ᠮᠠᠰᠲ᠋ᠧᠷ ᠦ᠋ᠨ ᠥᠬᠢᠨ ᠢ᠋
ᠨᠥᠬᠥᠷ ᠨᠢ ᠬᠠᠶᠠᠭᠠᠳ ᠶᠠᠪᠤᠭᠰᠠᠨ ᠢ᠋
ᠪᠠᠷᠠᠭᠤᠨ ᠠᠢᠯ ᠤ᠋ᠨ ᠵᠢᠪᠵᠠᠮᠠ
ᠨᠢᠭᠤᠴᠠ ᠠᠮᠠᠷᠠᠭ ᠲᠠᠢ ᠪᠣᠯᠤᠭᠰᠠᠨ ᠢ᠋
ᠪᠠᠲᠤ ᠶ᠋ᠢᠨ ᠬᠦᠷᠭᠡᠨ ᠲᠠᠮᠴᠠᠢ
ᠨᠤᠷᠮᠠᠢᠵᠤ ᠰᠠᠭᠤᠳᠠᠭ ᠪᠠᠢᠭᠰᠠᠨ ᠢ᠋
ᠲᠠᠯᠠ ᠲᠠᠯᠠ ᠠ᠋ᠴᠠ ᠱᠤᠤᠭᠢᠯᠳᠤᠨ
ᠬᠡᠳᠦᠨ ᠴᠠᠭ ᠢ᠋ᠶ᠋ᠠᠷ ᠶᠠᠷᠢᠵᠠᠢ᠃
ᠲᠠᠪᠠᠭ ᠲᠠᠢ ᠢᠳᠡᠭᠡ ᠳᠠᠭᠤᠰᠲᠠᠯᠠ
ᠬᠡᠨ ᠬᠥᠮᠦᠨ ᠦᠭᠡᠢ ᠬᠠᠭᠤᠴᠢᠯᠠᠵᠠᠢ᠃
ᠠᠷᠭᠠᠲᠠᠢᠬᠠᠨ ᠨᠢᠭᠡ ᠨᠢ
ᠪᠠᠶᠠᠵᠢᠬᠤ ᠰᠠᠨ ᠭᠡᠵᠦ ᠭᠠᠰᠠᠯᠵᠠᠢ᠃
ᠠᠷᠴᠠᠭᠠ ᠦᠭᠡᠢᠬᠡᠨ ᠨᠥᠭᠥᠭᠡ ᠨᠢ
ᠪᠠᠢᠳᠠᠭ ᠢ᠋ᠶ᠋ᠠᠨ ᠲᠣᠭᠠᠴᠢᠨ ᠭᠠᠩᠰᠠᠷᠠᠵᠠᠢ᠃
ᠠᠳᠠᠭ ᠰᠡᠭᠦᠯ ᠳ᠋ᠦ᠍ᠨᠢ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ
ᠴᠡᠴᠡ ᠪᠤᠯᠢᠶᠠᠯᠳᠤᠵᠤ ᠦᠵᠡᠵᠡᠢ᠃
ᠠᠮᠠ ᠲᠠᠢ ᠨᠢᠭᠡ ᠨᠢ
ᠰᠡᠩᠬᠡᠷᠡᠭᠦᠯᠬᠦ ᠭᠡᠵᠦ ᠶᠠᠳᠠᠵᠠᠢ᠃
ᠪᠦᠷ ᠰᠡᠭᠦᠯ ᠳ᠋ᠡᠭᠡᠨ ᠲᠡᠳᠡ
ᠬᠠᠮᠤᠭ ᠨᠢᠭᠤᠴᠠ ᠪᠠᠨ ᠳᠡᠯᠭᠡᠨ
ᠪᠦᠬᠦᠯᠢ ᠦᠳᠡᠰᠢ ᠶ᠋ᠢᠨ ᠲᠤᠷᠰᠢ
ᠤᠬᠢᠯᠠᠵᠤ ᠳᠠᠭᠤᠯᠠᠵᠤ ᠭᠠᠷᠴᠠᠢ᠃
ᠰᠥᠨᠢ ᠳᠤᠮᠳᠠ ᠶ᠋ᠢᠨ ᠬᠢᠷᠢ ᠳ᠋ᠦ᠍
ᠰᠡᠭᠦᠷᠡᠰᠦ ᠠᠯᠲᠠᠨ ᠪᠣᠰᠴᠠᠭᠠᠵᠤ
ᠭᠡᠷ ᠭᠡᠷ ᠲᠡᠭᠡᠨ ᠬᠠᠷᠢᠬᠤ ᠪᠠᠷ
ᠭᠡᠨᠡᠳᠲᠡ ᠶᠠᠭᠠᠷᠠᠨ ᠭᠠᠷᠲᠠᠯᠠ᠃
ᠬᠣᠲᠠ ᠶ᠋ᠢᠨ ᠬᠥᠯ ᠲᠠᠲᠠᠷᠠᠭᠠᠳ
ᠬᠣᠯᠠ ᠶ᠋ᠢᠨ ᠴᠢᠭᠯᠡᠯ ᠦ᠋ᠨ ᠠᠦ᠋ᠲ᠋ᠣᠪᠦ᠋ᠰ
ᠶᠠᠪᠤᠬᠤ ᠶᠠᠩᠵᠤ ᠦᠭᠡᠢ ᠪᠣᠯᠵᠠᠢ᠃
ᠬᠣᠭᠣᠯᠠ ᠦᠭᠡᠢ ᠣᠷᠬᠢᠭᠰᠠᠨ ᠬᠡᠦᠬᠡᠳ ᠢ᠋ᠶ᠋ᠡᠨ
ᠨᠢᠭᠡ ᠨᠢ ᠶᠠᠷᠢᠭᠠᠳ ᠭᠠᠰᠠᠯᠵᠠᠢ᠃
ᠬᠣᠨᠣᠨ ᠥᠨᠵᠢᠨ ᠬᠠᠷᠢᠭᠠ ᠦᠭᠡᠢ ᠭᠡᠳ
ᠨᠥᠭᠥᠭᠡ ᠨᠢ ᠦᠭᠡᠯᠡᠨ ᠭᠡᠮᠰᠢᠵᠡᠢ᠃
ᠶᠠᠷᠢᠶᠠ ᠶᠡᠬᠡᠳᠪᠡᠯ ᠶᠠᠷᠰᠢᠭ ᠶᠤᠮ ᠭᠡᠵᠦ
ᠠᠮᠠ ᠠᠮᠠᠨ ᠳ᠋ᠠᠭᠠᠨ ᠱᠤᠤᠭᠢᠵᠠᠢ᠃
ᠶᠠᠪᠠᠭᠠᠨ ᠬᠣᠴᠣᠷᠪᠠᠯ ᠪᠠᠯᠠᠭ ᠶᠤᠮ ᠭᠡᠵᠦ
ᠳᠠᠮ ᠳᠠᠮ ᠳ᠋ᠠᠭᠠᠨ ᠳᠡᠮᠵᠢᠵᠡᠢ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤ᠋ᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ
ᠬᠢᠨᠠᠭ᠍ᠴᠢ : ᠴᠣᠯᠮᠣᠨᠲᠤᠶᠠᠭᠠ
2023᠂ 10᠂ 21 ᠶ᠋ᠢᠨ ᠡᠳᠦᠷ