ᠠᠷᠠᠰᠤ ᠬᠠᠲᠠᠭᠰᠠᠨ ᠴᠠᠨᠠ-ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠤᠯᠠᠮᠵᠢᠯᠠᠯᠲᠤ ᠡᠳ᠋ᠯᠡᠯ ᠬᠡᠷᠡᠭᠰᠡᠯ ᠵᠢᠴᠢ ᠲᠡᠭᠦᠨ ᠦ᠌ ᠤᠬᠠᠭᠠᠨ1-05ᠤ᠋· ᠰ· ᠬᠥᠭᠵᠢᠯᠲᠦ
456
ᠠᠷᠠᠰᠤ ᠬᠠᠲᠠᠭᠰᠠᠨ ᠴᠠᠨᠠ
ᠠᠷᠠᠰᠤ ᠬᠠᠲᠠᠭᠰᠠᠨ ᠴᠠᠨᠠ ᠶ᠋ᠢ ᠠᠯᠲᠠᠢ ᠮᠣᠩᠭᠣᠯᠴᠤᠳ ᠡᠯᠪᠡᠭ ᠬᠡᠷᠡᠭᠯᠡᠳᠡᠭ ᠶᠦᠮ᠃ ᠳᠡᠯᠡᠬᠡᠢ ᠶ᠋ᠢᠨ ᠡᠷᠳᠡᠮᠲᠡᠳ ᠠᠯᠲᠠᠢ ᠬᠣᠲᠠ ᠶ᠋ᠢᠨ ᠬᠠᠨᠳᠠᠭᠠᠢᠲᠤ ᠰᠢᠶᠠᠩ ᠤ᠋ᠨ ᠳᠤᠮᠳᠠᠪᠤᠯᠠᠭ ᠲᠣᠰᠬᠣᠨ ᠤ᠋ ᠬᠠᠳᠠᠨ ᠵᠢᠷᠤᠭ ᠢ᠋ ᠰᠢᠨᠵᠢᠯᠡᠭᠡᠳ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠴᠠᠰᠤᠨ ᠳ᠋ᠤ᠌ ᠭᠤᠯᠭᠤᠬᠤ ᠬᠥᠳᠡᠯᠭᠡᠭᠡᠨ ᠬᠠᠮᠤᠭ ᠡᠷᠲᠡ ᠠᠯᠲᠠᠢ ᠣᠷᠣᠨ ᠠ᠋ᠴᠠ ᠡᠭᠦᠰᠴᠦ ᠧᠦ᠋ᠷᠣᠫᠠ ᠪᠠ ᠠᠮᠧᠷᠢᠺᠠ ᠳ᠋ᠤ᠌ ᠤᠯᠠᠮᠵᠢᠯᠠᠯᠠ ᠭᠡᠵᠦ ᠪᠠᠲᠤᠯᠠᠪᠠ᠃ ᠶᠠᠭᠤᠨ ᠤ᠋ ᠡᠮᠦᠨᠡ ᠠᠷᠠᠰᠤᠨ ᠴᠠᠨᠠ ᠨᠢ ᠬᠢᠬᠦ ᠳ᠋ᠦ᠍ ᠲᠤᠢᠯ ᠤ᠋ᠨ ᠳᠥᠭᠥᠮ ᠪᠠᠢᠳᠠᠭ᠃ ᠬᠣᠶᠠᠷ ᠮᠧᠲ᠋ᠷ ᠤᠷᠲᠤ ᠨᠠᠷᠠᠰᠤᠨ ᠮᠣᠳᠣ ᠪᠤᠶᠤ ᠪᠤᠰᠤᠳ ᠴᠢᠨᠠᠷ ᠰᠠᠢᠲᠠᠢ ᠮᠣᠳᠣ ᠶ᠋ᠢ ᠳᠤᠮᠳᠠᠭᠤᠷ ᠨᠢ ᠵᠦᠰᠦᠵᠦ ᠬᠠᠪᠲᠠᠭᠠᠢᠯᠠᠭᠠᠳ ᠨᠢᠭᠡ ᠦᠵᠦᠭᠦᠷ ᠢ᠋ ᠨᠢ ᠵᠢᠭᠠᠬᠠᠨ ᠡᠷᠲᠡᠭᠡᠷ ᠪᠣᠯᠭᠠᠵᠤ ᠴᠠᠰᠤ ᠲᠠᠢ ᠵᠣᠯᠭᠠᠬᠤ ᠨᠢᠭᠤᠷ ᠤ᠋ᠨ ᠬᠡᠰᠡᠭ ᠲᠦ᠍ ᠨᠢ ᠮᠣᠷᠢᠨ ᠤ᠋ ᠡᠪᠦᠳᠦᠭ ᠦ᠋ᠨ ᠠᠷᠠᠰᠤ ᠶ᠋ᠢ ᠦᠰᠦ ᠶ᠋ᠢ ᠨᠢ ᠬᠣᠢᠰᠢ ᠬᠠᠷᠠᠭᠤᠯᠵᠤ ᠬᠠᠲᠠᠭᠠᠳ ᠨᠦᠬᠡ ᠴᠣᠭᠣᠯᠵᠤ ᠬᠥᠯ ᠳ᠋ᠦ᠍ ᠪᠡᠨ ᠤᠶᠠᠬᠤ ᠤᠶᠠᠳᠠᠯ ᠲᠠᠭᠠᠷᠠᠭᠤᠯᠪᠠᠯ ᠭᠣᠶᠣᠬᠠᠨ ᠴᠠᠨᠠ ᠪᠣᠯᠴᠢᠬᠠᠳᠠᠭ᠃ ᠬᠣᠶᠠᠷ᠂ ᠴᠠᠨᠠ ᠬᠣᠢᠰᠢ ᠭᠤᠯᠭᠤᠬᠤ ᠦᠭᠡᠢ ᠪᠠᠢᠳᠠᠭ᠃ ᠥᠭᠡᠳᠡ ᠭᠠᠷᠬᠤ ᠳ᠋ᠤ᠌ ᠴᠠᠨᠠ ᠶ᠋ᠢᠨ ᠡᠯᠢᠭᠡᠨ ᠲᠠᠯᠠ ᠳ᠋ᠤ᠌ ᠬᠠᠲᠠᠭᠰᠠᠨ ᠠᠷᠠᠰᠤᠨ ᠤ᠋ ᠬᠣᠢᠰᠢ ᠬᠠᠷᠠᠭᠰᠠᠨ ᠦᠰᠦ ᠨᠢ ᠥᠷᠥᠯᠲᠡ ᠡᠭᠦᠰᠬᠡᠵᠦ ᠬᠣᠢᠰᠢ ᠭᠤᠯᠭᠤᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠲᠤᠯᠠ ᠡᠢᠮᠦ ᠴᠠᠨᠠ ᠲᠠᠢ ᠬᠥᠮᠦᠨ ᠥᠭᠡᠳᠡ ᠳᠠᠪᠠᠬᠤ ᠳ᠋ᠤ᠌ ᠲᠡᠭᠰᠢ ᠭᠠᠵᠠᠷ ᠶᠠᠪᠤᠵᠤ ᠪᠠᠢᠭᠠ ᠰᠢᠭ᠋ ᠶᠡᠬᠡ ᠠᠯᠬᠤᠮ ᠢ᠋ᠶ᠋ᠠᠷ ᠠᠯᠬᠤᠵᠤ ᠶᠠᠪᠤᠳᠠᠭ᠃ ᠡᠢᠮᠦ ᠡᠴᠡ ᠣᠳᠣᠬᠢᠴᠢᠯᠠᠭᠰᠠᠨ ᠴᠠᠨᠠ ᠰᠢᠭ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠠᠶᠠᠭ ᠲᠤᠯᠵᠤ᠂ ᠪᠡᠶᠡ ᠪᠡᠨ ᠤᠷᠤᠭᠰᠢ ᠲᠦᠯᠬᠢᠬᠦ ᠭᠡᠵᠦ ᠦᠢᠯᠡ ᠪᠡᠨ ᠦᠵᠡᠬᠦ ᠦᠭᠡᠢ ᠪᠥᠭᠡᠳ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠪᠦᠷᠢᠮᠦᠰᠦᠨ ᠴᠢᠯᠥᠭᠡᠯᠡᠵᠡᠢ᠃ ᠡᠨᠡ ᠪᠣᠯ ᠠᠷᠠᠰᠤᠨ ᠴᠠᠨᠠ ᠶ᠋ᠢᠨ ᠬᠠᠮᠤᠭ ᠪᠢᠰᠢᠷᠡᠭᠦᠰᠢᠲᠡᠢ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠴᠢ ᠶᠣᠰᠣ ᠶᠤᠮ᠃ ᠭᠤᠷᠪᠠ ᠳ᠋ᠤ᠌᠂ ᠠᠭᠤᠯᠠᠨ ᠠ᠋ᠴᠠ ᠪᠠᠭᠤᠬᠤ ᠳ᠋ᠤ᠌《S 》ᠵᠠᠮ ᠶᠠᠪᠤᠬᠤ ᠦᠭᠡᠢ ᠪᠣᠯᠵᠠᠢ᠃ ᠴᠡᠴᠡᠨ ᠮᠡᠷᠭᠡᠨ ᠮᠠᠯᠴᠢᠳ ᠮᠠᠨᠢ᠂ ᠴᠢᠯᠥᠭᠡᠯᠡᠭᠳᠡᠭᠰᠡᠨ ᠭᠠᠷ ᠢ᠋ᠶ᠋ᠠᠨ ᠰᠤᠯᠠ ᠪᠠᠢᠯᠭᠠᠭᠰᠠᠨ ᠦᠭᠡᠢ᠂ ᠠᠭᠤᠯᠠᠨ ᠳ᠋ᠤ᠌ ᠭᠠᠷᠬᠤ ᠳ᠋ᠤ᠌ ᠪᠠᠰᠠ ᠤᠷᠲᠤ ᠪᠤᠶᠤ ᠪᠦᠳᠦᠭᠦᠨ ᠲᠠᠶᠠᠭ ᠠᠪᠴᠤ ᠭᠠᠷᠤᠭᠠᠳ ᠪᠠᠭᠤᠵᠤ ᠢᠷᠡᠬᠦ ᠳ᠋ᠦ᠍ ᠪᠡᠨ ᠲᠠᠶᠠᠭ ᠳᠡᠭᠡᠷᠡ ᠪᠡᠨ ᠤᠨᠤᠵᠤ ᠰᠠᠭᠤᠭᠠᠳ ᠪᠡᠶᠡ ᠪᠡᠨ ᠬᠣᠢᠰᠢ ᠭᠡᠳᠡᠢᠵᠦ ᠲᠠᠶᠠᠭ ᠪᠠ ᠭᠠᠵᠠᠷ ᠤ᠋ᠨ ᠭᠠᠳᠠᠷᠭᠤ ᠶ᠋ᠢᠨ ᠬᠣᠭᠣᠷᠣᠨᠳᠣ ᠡᠭᠦᠰᠬᠦ ᠴᠢᠩᠭᠠ ᠥᠷᠥᠯᠲᠡ ᠪᠡᠷ ᠪᠡᠶᠡ ᠶ᠋ᠢᠨ ᠢᠨᠧᠷᠼᠢ ᠪᠡᠨ ᠪᠠᠭᠠᠰᠬᠠᠵᠤ ᠬᠤᠷᠳᠤᠴᠠ ᠪᠠᠨ ᠤᠳᠠᠭᠠᠰᠢᠷᠠᠭᠤᠯᠳᠠᠭ᠃ ᠢᠩᠭᠢᠵᠦ ᠠᠭᠤᠯᠠᠨ ᠤᠷᠤᠭᠤ ᠭᠤᠯᠭᠤᠬᠤ ᠨᠢ ᠭᠤᠷᠪᠠᠨ ᠲᠤᠯᠬᠤ ᠴᠠᠭ ᠲᠠᠢ ᠲᠤᠯᠠ ᠲᠠᠶᠠᠭ ᠦᠭᠡᠢ《S》 ᠱᠤᠭᠤᠮ ᠢ᠋ᠶ᠋ᠠᠷ ᠶᠠᠪᠤᠵᠤ ᠬᠤᠷᠳᠤᠴᠠ ᠪᠠᠨ ᠬᠠᠰᠤᠳᠠᠭ ᠤ᠋ᠨ ᠠᠶᠤᠯ ᠲᠠᠢ ᠪᠠᠢᠳᠠᠯ ᠢ᠋ ᠲᠡᠪᠴᠢᠵᠦ ᠴᠢᠳᠠᠵᠠᠢ᠃ ᠤᠴᠢᠷ ᠨᠢ ᠲᠠᠶᠠᠭ ᠢ᠋ᠶ᠋ᠠᠨ ᠠᠳᠬᠤᠵᠤ ᠭᠤᠯᠭᠤᠬᠤ ᠨᠢ ᠵᠠᠮ ᠮᠥᠷ ᠢ᠋ᠶ᠋ᠡᠨ ᠰᠣᠩᠭᠣᠬᠤ ᠳ᠋ᠤ᠌ ᠪᠣᠯᠤᠮᠵᠢ ᠰᠠᠢᠲᠠᠢ ᠪᠥᠭᠡᠳ《S》 ᠵᠠᠮ ᠲᠠᠢ ᠠᠳᠠᠯᠢᠳᠬᠠᠪᠠᠯ ᠶᠠᠪᠤᠬᠤ ᠵᠠᠮ ᠤ᠋ᠨ ᠤᠷᠲᠤ ᠶ᠋ᠢ ᠪᠣᠭᠣᠨᠢᠰᠬᠠᠭᠰᠠᠨ ᠢ᠋ᠶ᠋ᠠᠷ ᠦᠯᠦ ᠪᠠᠷᠠᠮ ᠬᠠᠮᠤᠭ ᠴᠢᠬᠤᠯᠠ ᠨᠢ ᠰᠣᠬᠣᠷ ᠪᠠᠯᠠᠢ ᠪᠠᠷ《S》 ᠱᠤᠭᠤᠮ ᠶᠠᠪᠤᠵᠤ ᠣᠢᠴᠢᠵᠤ ᠲᠤᠰᠬᠤ᠂ ᠴᠠᠰᠤᠨ ᠤ᠋ ᠨᠤᠷᠠᠯᠲᠠ ᠡᠭᠦᠰᠬᠦ ᠠᠶᠤᠯ ᠢ᠋ ᠪᠠᠭᠠᠰᠬᠠᠵᠠᠢ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ ᠤᠷᠲᠤ ᠲᠠᠶᠠᠭ ᠨᠢ ᠵᠠᠩᠭᠢᠯᠠᠭᠠ ᠶ᠋ᠢᠨ ᠴᠠᠭ ᠲᠤ᠌ ᠰᠢᠳᠠᠮ ᠪᠤᠶᠤ ᠦᠵᠦᠭᠦᠷ ᠲᠦ᠍ ᠨᠢ ᠬᠢᠲᠤᠭᠠ ᠪᠠᠨ ᠤᠶᠠᠪᠠᠯ ᠵᠢᠳᠠ ᠪᠣᠯᠵᠤ ᠪᠡᠶᠡ ᠪᠡᠨ ᠬᠠᠮᠠᠭᠠᠯᠠᠵᠤ ᠪᠣᠯᠳᠠᠭ᠃ ᠳᠥᠷᠪᠡ ᠳ᠋ᠦ᠍᠂ ᠠᠮᠢ ᠠᠪᠤᠷᠠᠬᠤ ᠣᠨᠴᠠᠭᠠᠢ ᠠᠷᠭᠠ ᠶ᠋ᠢ ᠤᠯᠠᠮᠵᠢᠯᠠᠵᠠᠢ᠃ ᠴᠠᠰᠤᠨ ᠳ᠋ᠤ᠌ ᠭᠤᠯᠭᠤᠬᠤ ᠳᠤᠮᠳᠠ ᠮᠠᠯᠴᠢᠳ ᠮᠠᠨᠢ ᠭᠠᠭᠴᠠ ᠠᠯᠲᠠᠢ ᠮᠣᠩᠭᠣᠯᠴᠤᠳ ᠲᠤ᠌ ᠯᠠ ᠪᠠᠢᠳᠠᠭ ᠠᠮᠢ ᠠᠪᠤᠷᠠᠬᠤ ᠤᠪᠠᠳᠢᠰᠲᠤ ᠤᠬᠠᠭᠠᠨ ᠢ᠋ ᠬᠡᠷᠡᠭᠯᠡᠭᠰᠡᠭᠡᠷ ᠢᠷᠡᠵᠡᠢ᠃ ᠴᠠᠰᠤᠨ ᠨᠤᠷᠠᠯᠲᠠ ᠡᠭᠦᠰᠬᠦ ᠦᠶᠡ ᠳ᠋ᠦ᠍ ᠵᠠᠢᠯᠠᠵᠤ ᠠᠮᠵᠢᠬᠤ ᠦᠭᠡᠢ ᠪᠣᠯ ᠮᠠᠯᠴᠢᠳ ᠬᠠᠨᠴᠤᠢ ᠶ᠋ᠢᠨ ᠦᠵᠦᠭᠦᠷ ᠢ᠋ᠶ᠋ᠡᠨ ᠴᠢᠩᠭᠠ ᠬᠠᠵᠠᠭᠠᠳ ᠲᠠᠯᠪᠢᠬᠤ ᠦᠭᠡᠢ ᠪᠠᠢᠳᠠᠭ᠃ ᠢᠩᠭᠢᠬᠦ ᠨᠢ ᠴᠠᠰᠤᠨ ᠨᠤᠷᠠᠯᠲᠠ ᠳᠤᠮᠳᠠ ᠭᠠᠷ ᠪᠠ ᠬᠦᠵᠦᠭᠦᠦ ᠨᠢ ᠬᠠᠷᠢᠯᠴᠠᠨ ᠲᠦᠰᠢᠭ ᠪᠣᠯᠵᠤ ᠬᠠᠮᠤᠭ ᠤ᠋ᠨ ᠡᠮᠵᠡᠭ ᠪᠠᠢᠳᠠᠭ ᠬᠦᠵᠦᠭᠦᠦ ᠶ᠋ᠢᠨ ᠰᠢᠷᠬᠠᠲᠤᠬᠤ ᠠᠶᠤᠯ ᠢ᠋ ᠪᠠᠭᠠᠰᠬᠠᠪᠠ᠃ ᠬᠠᠨᠴᠤᠢ ᠶ᠋ᠢᠨ ᠠᠭᠤᠵᠢᠭᠤ ᠲᠣᠮᠣ ᠨᠢᠳᠤᠷᠭᠠ ᠨᠢ ᠨᠢᠭᠤᠷ ᠴᠢᠷᠠᠢ ᠰᠢᠷᠬᠠᠲᠤᠬᠤ᠂ ᠴᠠᠰᠤ ᠰᠢᠷᠣᠢ ᠠᠮᠠ ᠬᠠᠮᠠᠷ ᠢ᠋ ᠪᠥᠭᠯᠡᠬᠦ ᠦᠭᠡᠢ ᠪᠣᠯᠭᠠᠭᠰᠠᠨ ᠮᠥᠷᠲᠡᠭᠡᠨ ᠬᠠᠮᠤᠭ ᠴᠢᠬᠤᠯᠠ ᠨᠢ ᠴᠠᠰᠤᠨ ᠳ᠋ᠤ᠌ ᠪᠤᠯᠠᠭᠳᠠᠪᠠᠯ ᠶᠠᠭᠤᠨ ᠤ᠋ ᠤᠷᠢᠳᠠ ᠬᠠᠯᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠮᠠ ᠬᠠᠮᠠᠷ ᠤ᠋ᠨ ᠢ᠋ᠶ᠋ᠠᠨ ᠣᠢᠷᠠᠯᠴᠠᠭᠠ ᠪᠠᠢᠭᠠ ᠴᠠᠰᠤ ᠶ᠋ᠢ ᠮᠠᠯᠲᠠᠵᠤ ᠬᠠᠢᠯᠤᠭᠤᠯᠤᠨ ᠠᠮᠢᠰᠬᠤᠯ ᠠᠪᠬᠤ ᠵᠠᠢ ᠭᠠᠷᠭᠠᠵᠤ ᠠᠮᠵᠢᠭᠠᠳ ᠥᠪᠡᠷ ᠢ᠋ ᠪᠡᠨ ᠠᠪᠤᠷᠠᠬᠤ ᠠᠵᠢᠯ ᠢ᠋ᠶ᠋ᠠᠨ ᠡᠬᠢᠯᠡᠭᠦᠯᠬᠦ ᠳ᠋ᠦ᠍ ᠪᠣᠯᠤᠮᠵᠢ ᠣᠯᠭᠤᠵᠠᠢ᠃
ᠢᠷᠡᠯᠲᠡ᠄《ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠤᠯᠠᠮᠵᠢᠯᠠᠯᠲᠤ ᠡᠳ᠋ᠯᠡᠯ ᠬᠡᠷᠡᠭᠰᠡᠯ ᠵᠢᠴᠢ ᠲᠡᠭᠦᠨ ᠦ᠌ ᠤᠬᠠᠭᠠᠨ》 ᠠ᠋ᠴᠠ
ᠵᠣᠬᠢᠶᠠᠭᠴᠢ᠄ ᠶ᠋ᠢᠨ· ᠰ ᠬᠥᠭᠵᠢᠯᠲᠦ ᠵᠣᠷᠢᠭᠲᠤ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠲᠤᠶᠠᠭᠠ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ