ᠬᠤᠷᠤᠭᠤᠪᠴᠢ-ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠤᠯᠠᠮᠵᠢᠯᠠᠯᠲᠤ ᠡᠳ᠋ᠯᠡᠯ ᠬᠡᠷᠡᠭᠰᠡᠯ ᠵᠢᠴᠢ ᠲᠡᠭᠦᠨ ᠦ᠌ ᠤᠬᠠᠭᠠᠨ1-04ᠤ᠋· ᠰ· ᠬᠥᠭᠵᠢᠯᠲᠦ
405
ᠬᠤᠷᠤᠭᠤᠪᠴᠢ
ᠬᠤᠷᠤᠭᠤᠪᠴᠢ ᠶ᠋ᠢ ᠭᠣᠣᠯ ᠨᠢ ᠦᠬᠡᠷ ᠦ᠋ᠨ ᠡᠪᠡᠷ ᠢ᠋ᠶ᠋ᠡᠷ ᠬᠢᠳᠡᠭ᠃ ᠭᠡᠪᠡᠴᠦ ᠶᠠᠰᠤ᠂ ᠠᠷᠠᠰᠤ᠂ ᠵᠡᠰ ᠭᠠᠤᠯᠢ ᠪᠠᠷ ᠬᠢᠭᠰᠡᠨ ᠬᠤᠷᠤᠭᠤᠪᠴᠢ ᠪᠠᠰᠠ ᠪᠣᠢ᠃ ᠶᠠᠭᠤᠨ ᠤ᠋ ᠡᠮᠦᠨᠡ ᠬᠤᠷᠤᠭᠤᠪᠴᠢᠨ ᠳᠣᠲᠣᠷᠠ ᠰᠣᠶᠣᠯ ᠤ᠋ᠨ ᠢᠮ ᠲᠠᠮᠠᠭᠠ ᠬᠠᠳᠠᠭᠠᠯᠠᠭᠳᠠᠵᠤ ᠪᠠᠢᠳᠠᠭ᠃ ᠮᠣᠩᠭᠣᠯ ᠡᠮᠡᠭᠲᠡᠢᠴᠦᠳ ᠬᠤᠷᠤᠭᠤᠪᠴᠢ ᠪᠠᠨ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠳᠣᠯᠢᠶᠠᠪᠤᠷ ᠬᠤᠷᠤᠭᠤᠨ ᠳ᠋ᠤ᠌ ᠪᠠᠨ ᠵᠡᠭᠦᠵᠦ᠂ ᠳᠤᠮᠳᠠ ᠬᠤᠷᠤᠭᠤ ᠪᠠ ᠡᠷᠡᠬᠡᠢ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠵᠡᠭᠦᠦ ᠪᠡᠨ ᠴᠢᠮᠬᠢᠵᠦ ᠪᠠᠷᠢᠭᠠᠳ ᠳᠣᠷᠣᠭᠰᠢ ᠪᠠᠨ ᠬᠠᠳᠬᠤᠳᠠᠭ᠃ ᠢᠩᠭᠢᠵᠦ ᠵᠡᠭᠦᠦ ᠵᠠᠷᠤᠬᠤ ᠨᠢ ᠵᠡᠭᠦᠦ ᠪᠡᠨ ᠭᠠᠳᠠᠭᠰᠢ ᠬᠠᠳᠬᠤᠬᠤ ᠲᠠᠢ ᠠᠳᠠᠯᠢᠳᠬᠠᠪᠠᠯ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠠᠳᠬᠤᠵᠤ ᠪᠠᠷᠢᠬᠤ ᠬᠥᠳᠡᠯᠭᠡᠭᠡᠨ ᠲᠡᠢ ᠨᠡᠢᠴᠡᠪᠦᠷᠢ ᠲᠡᠢ ᠲᠤᠯᠠ ᠨᠡᠩ ᠤᠷᠠ ᠳᠠᠮ ᠲᠠᠢ ᠪᠠᠢᠳᠠᠭ᠃ ᠰᠣᠶᠣᠯ ᠤ᠋ᠨ ᠲᠠᠯᠠ ᠠ᠋ᠴᠠ ᠠᠪᠴᠤ ᠬᠡᠯᠡᠪᠡᠯ ᠵᠡᠭᠦᠦ ᠶ᠋ᠢ ᠳᠣᠷᠣᠭᠰᠢ ᠬᠠᠷᠠᠭᠤᠯᠵᠤ ᠪᠠᠢᠬᠤ ᠨᠢ ᠮᠣᠩᠭᠣᠯ ᠡᠷᠡᠭᠲᠡᠢᠴᠦᠳ ᠪᠤᠰᠤᠳ ᠢ᠋ ᠰᠢᠷᠬᠠᠲᠤᠭᠤᠯᠬᠤ ᠠ᠋ᠴᠠ ᠬᠡᠷᠰᠡᠦᠯᠡᠵᠦ ᠬᠢᠲᠤᠭᠠ ᠪᠠᠨ ᠳᠣᠷᠣᠭᠰᠢ ᠬᠠᠷᠠᠭᠤᠯᠵᠤ ᠵᠠᠷᠤᠬᠤ ᠲᠠᠢ ᠠᠳᠠᠯᠢᠬᠠᠨ ᠵᠠᠩ ᠦᠢᠯᠡ ᠪᠥᠭᠡᠳ ᠮᠣᠩᠭᠣᠯ ᠡᠮᠡᠭᠲᠡᠢᠴᠦᠳ ᠦ᠋ᠨ ᠦᠶᠡ ᠶ᠋ᠢᠨ ᠦᠶᠡ ᠤᠯᠠᠮᠵᠢᠯᠠᠭᠰᠠᠨ ᠰᠣᠶᠣᠯ ᠤ᠋ᠨ ᠢᠮ ᠲᠠᠮᠠᠭᠠ ᠮᠥᠨ᠃ ᠲᠠᠯᠠ ᠨᠤᠲᠤᠭ ᠤ᠋ᠨ ᠰᠣᠶᠣᠯ ᠤ᠋ᠨ ᠣᠷᠴᠢᠨ ᠳ᠋ᠤ᠌ ᠥᠰᠴᠦ ᠲᠥᠷᠥᠭᠰᠡᠨ ᠮᠣᠩᠭᠣᠯ ᠪᠦᠰᠡᠭᠦᠢ ᠪᠣᠯ ᠪᠦᠷ ᠢᠩᠭᠢᠵᠦ ᠦᠢᠯᠡ ᠣᠶᠣᠳᠠᠭ ᠪᠥᠭᠡᠳ ᠡᠨᠡ ᠨᠢ ᠳᠤᠮᠳᠠ ᠬᠤᠷᠤᠭᠤᠨ ᠳ᠋ᠤ᠌ ᠪᠠᠨ ᠬᠤᠷᠤᠭᠤᠪᠴᠢ ᠵᠡᠭᠦᠵᠦ ᠵᠡᠭᠦᠦ ᠪᠡᠨ ᠭᠠᠳᠠᠭᠰᠢ ᠬᠠᠳᠬᠤᠳᠠᠭ ᠬᠢᠲᠠᠳ ᠣᠶᠣᠳᠠᠯᠴᠢᠨ ᠤ᠋ ᠳᠠᠳᠬᠠᠯ ᠲᠠᠢ ᠦᠰᠦᠳ ᠥᠭᠡᠷᠡ ᠶᠦᠮ᠃ ᠨᠠᠰᠤᠲᠠᠢᠴᠤᠳ《 ᠮᠣᠩᠭᠣᠯ ᠬᠢᠲᠠᠳ ᠪᠦᠰᠡᠭᠦᠢ ᠭᠡᠳᠡᠭ ᠢ᠋ ᠨᠢ ᠦᠭᠡ ᠬᠡᠯᠡᠭᠦᠯᠬᠦ ᠦᠭᠡᠢ ᠪᠡᠷ ᠢᠯᠭᠠᠵᠤ ᠲᠠᠨᠢᠬᠤ ᠭᠡᠪᠡᠯ ᠵᠡᠭᠦᠦ ᠪᠠᠷᠢᠭᠤᠯᠵᠤ ᠦᠢᠯᠡ ᠣᠶᠣᠭᠤᠯᠵᠤ ᠦᠵᠡ》 ᠭᠡᠳᠡᠭ ᠦ᠋ᠨ ᠶᠣᠰᠣ ᠤᠴᠢᠷ ᠨᠢ ᠨᠢᠭᠡ ᠬᠥᠮᠦᠨ ᠦ᠌ ᠰᠣᠶᠣᠯ ᠤ᠋ᠨ ᠬᠢᠨᠢ ᠢᠮ ᠲᠠᠮᠠᠭᠠ ᠪᠠᠷ ᠨᠢ ᠢᠯᠭᠠᠵᠤ ᠲᠠᠨᠢᠬᠤ ᠭᠡᠰᠡᠨ ᠤᠬᠠᠭᠠᠨ ᠶᠤᠮ᠃ ᠪᠠᠭᠠ ᠬᠤᠷᠤᠭᠤᠪᠴᠢ ᠳᠣᠲᠣᠷᠠ ᠶᠡᠬᠡ ᠤᠬᠠᠭᠠᠨ ᠪᠠᠢᠳᠠᠭ ᠠᠵᠢ᠃ ᠬᠣᠶᠠᠷ᠂ ᠪᠤᠰᠤᠳ ᠬᠤᠷᠤᠭᠤ ᠰᠢᠷᠬᠠᠲᠤᠬᠤ ᠠ᠋ᠴᠠ ᠰᠡᠷᠭᠡᠢᠯᠡᠵᠦ ᠴᠢᠳᠠᠵᠠᠢ᠃ ᠨᠢᠭᠲᠠᠯᠠᠵᠤ ᠦᠵᠡᠪᠡᠯ ᠬᠤᠷᠤᠭᠤᠪᠴᠢ ᠶ᠋ᠢᠨ ᠬᠥᠨᠳᠡᠢ ᠨᠢ ᠳᠣᠯᠢᠶᠠᠪᠤᠷ ᠬᠤᠷᠤᠭᠤ ᠯᠠᠪᠳᠠᠭᠤᠬᠠᠨ ᠳᠣᠲᠣᠭᠰᠢ ᠣᠷᠣᠮᠠᠷ ᠶᠡᠬᠡ ᠪᠢᠰᠢ᠂ ᠬᠠᠷᠢᠨ ᠳᠣᠯᠣᠪᠣᠷ ᠬᠤᠷᠤᠭᠤᠨ ᠤ᠋ ᠦᠵᠦᠭᠦᠷ ᠳᠥᠩᠭᠡᠵᠦ ᠯᠡ ᠣᠷᠣᠮᠠᠷ ᠢᠪᠴᠤᠤ ᠬᠥᠨᠳᠡᠢᠯᠡᠵᠦ᠂ ᠬᠤᠷᠤᠭᠤᠪᠴᠢ ᠨᠢ ᠳᠥᠩᠭᠡᠵᠢ ᠯᠡ ᠬᠤᠷᠤᠭᠤᠨ ᠦᠵᠦᠭᠦᠷ ᠳᠡᠭᠡᠷᠡ ᠲᠣᠭᠲᠠᠵᠤ ᠪᠠᠢᠳᠠᠭ ᠲᠤᠯᠠ ᠵᠡᠭᠦᠦ ᠬᠠᠯᠲᠤᠷᠢᠪᠠᠯ ᠰᠠᠨᠵᠢ ᠨᠢ ᠭᠠᠳᠠᠭᠰᠢ ᠬᠠᠨᠳᠤᠵᠤ᠂ ᠪᠤᠰᠤᠳ ᠬᠤᠷᠤᠭᠤ ᠶ᠋ᠢ ᠰᠢᠷᠬᠠᠲᠤᠭᠤᠯᠬᠤ ᠦᠭᠡᠢ ᠪᠠᠢᠳᠠᠭ᠃ ᠳᠠᠬᠢᠭᠠᠳ ᠬᠡᠯᠡᠪᠡᠯ᠂ ᠬᠤᠷᠤᠭᠤᠨ ᠦᠵᠦᠭᠦᠷ ᠳᠥᠩᠭᠡᠵᠦ ᠯᠡ ᠣᠷᠣᠭᠰᠠᠨ ᠬᠤᠷᠤᠭᠤᠪᠴᠢ ᠨᠢ ᠵᠡᠭᠦᠦ ᠶ᠋ᠢᠨ ᠥᠭᠭᠦᠭᠰᠡᠨ ᠬᠦᠴᠦᠨ ᠦ᠌ ᠦᠢᠯᠡᠴᠢᠯᠡᠯ ᠳᠣᠣᠷᠠ ᠬᠣᠢᠰᠢ ᠭᠡᠳᠡᠢᠵᠦ᠂ ᠭᠠᠳᠠᠷᠭᠤ ᠬᠠᠪᠲᠠᠭᠠᠢ ᠨᠢ ᠵᠡᠭᠦᠦ ᠶ᠋ᠢᠨ ᠪᠡᠶᠡ ᠲᠡᠢ ᠲᠡᠭᠰᠢ ᠥᠨᠴᠥᠭ ᠡᠭᠦᠰᠴᠦ᠂ ᠵᠡᠭᠦᠦ ᠶ᠋ᠢᠨ ᠰᠠᠨᠵᠢ ᠬᠠᠯᠲᠤᠷᠢᠬᠤ ᠶ᠋ᠢ ᠵᠣᠬᠢᠬᠤ ᠬᠡᠮᠵᠢᠶᠡ ᠪᠡᠷ ᠰᠡᠷᠭᠡᠢᠯᠡᠵᠦ ᠴᠢᠳᠠᠵᠠᠢ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ ᠬᠤᠷᠤᠭᠤᠪᠴᠢᠨ ᠭᠠᠳᠠᠷᠭᠤ ᠳᠡᠭᠡᠷᠡᠬᠢ ᠬᠠᠨᠠᠨ ᠠᠷ ᠪᠠ ᠬᠣᠶᠠᠷ ᠬᠥᠪᠡᠭᠡᠨ ᠦ᠌ ᠬᠥᠨᠳᠡᠯᠡᠨ ᠬᠣᠪᠬᠢᠯ ᠨᠢ ᠵᠡᠭᠦᠦ ᠬᠠᠵᠠᠭᠤ ᠳᠠᠰᠢ ᠬᠠᠯᠲᠤᠷᠢᠬᠤ ᠶ᠋ᠢ ᠵᠣᠬᠢᠬᠤ ᠬᠡᠮᠵᠢᠶᠡ ᠪᠡᠷ ᠬᠣᠷᠢᠭᠯᠠᠵᠤ ᠪᠠᠢᠭᠠ ᠶᠤᠮ᠃
—《 ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠤᠯᠠᠮᠵᠢᠯᠠᠯᠲᠤ ᠡᠳ᠋ᠯᠡᠯ ᠬᠡᠷᠡᠭᠰᠡᠯ ᠵᠢᠴᠢ ᠲᠡᠭᠦᠨ ᠦ᠌ ᠤᠬᠠᠭᠠᠨ》 ᠭᠡᠬᠦ ᠨᠣᠮ ᠠ᠋ᠴᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠵ᠂ ᠪᠤᠶᠠᠨᠲᠣᠭᠲᠠᠬᠤ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠤᠠ᠂ ᠰᠡᠬᠡᠭᠡᠷᠡᠯ᠂ ᠭᠠᠷᠮᠠ