ᠣᠨᠣᠪᠴᠢ-ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠤᠯᠠᠮᠵᠢᠯᠠᠯᠲᠤ ᠡᠳ᠋ᠯᠡᠯ ᠬᠡᠷᠡᠭᠰᠡᠯ ᠵᠢᠴᠢ ᠲᠡᠭᠦᠨ ᠦ᠌ ᠤᠬᠠᠭᠠᠨ1-03ᠤ᠋· ᠰ· ᠬᠥᠭᠵᠢᠯᠲᠦ
454
ᠣᠨᠣᠪᠴᠢ
ᠮᠣᠩᠭᠣᠯᠴᠤᠳ ᠣᠭᠣᠨᠣ ᠶ᠋ᠢᠨ ᠡᠪᠡᠷ᠂ ᠬᠡᠭᠡᠷᠡ ᠶ᠋ᠢᠨ ᠭᠠᠬᠠᠢ ᠶ᠋ᠢᠨ ᠰᠣᠶᠣᠭᠠ ᠪᠤᠶᠤ ᠲᠡᠮᠦᠷ ᠢ᠋ᠶ᠋ᠡᠷ ᠪᠠᠷᠢᠭᠤᠯ ᠬᠢᠭᠰᠡᠨ ᠣᠯᠠᠨ ᠬᠡᠷᠡᠭᠴᠡᠭᠡ᠂ ᠣᠨᠴᠠᠭᠠᠢ ᠴᠢᠳᠠᠮᠵᠢ ᠪᠦᠬᠦᠢ ᠬᠢᠲᠤᠭᠠ ᠪᠠᠨ ᠣᠨᠣᠪᠴᠢ ᠪᠤᠶᠤ ᠰᠣᠶᠣᠭᠠ ᠬᠢᠲᠤᠭᠠ ᠭᠡᠳᠡᠭ᠃ ᠶᠠᠭᠤᠨ ᠤ᠋ ᠡᠮᠦᠨᠡ᠂ ᠣᠨᠣᠪᠴᠢ ᠪᠣᠯ ᠵᠠᠩᠭᠢᠶᠠᠰᠤ ᠲᠠᠢᠯᠬᠤ ᠰᠣᠶᠣᠭᠠ ᠮᠥᠨ᠃ ᠰᠤᠷ ᠵᠠᠩᠭᠢᠶᠠᠰᠤ ᠨᠢ ᠴᠢᠩᠭᠠᠷᠠᠵᠤ ᠵᠢᠪᠳᠡᠭ ᠲᠤᠯᠠ ᠵᠥᠪᠬᠡᠨ ᠬᠣᠭᠣᠰᠣᠨ ᠭᠠᠷ ᠢ᠋ᠶ᠋ᠠᠷ ᠪᠣᠯ ᠠᠮᠠᠷᠬᠠᠨ ᠲᠠᠢᠯᠵᠤ ᠳᠡᠢᠯᠬᠦ ᠦᠭᠡᠢ ᠪᠠᠢᠳᠠᠭ᠃ ᠭᠡᠪᠡᠴᠦ ᠣᠨᠣᠪᠴᠢ ᠶ᠋ᠢᠨ ᠡᠰᠢ ᠶ᠋ᠢᠨ ᠨᠠᠷᠢᠨ ᠦᠵᠦᠭᠦᠷ ᠪᠣᠯ ᠡᠢᠮᠦ ᠬᠠᠷᠠ ᠵᠠᠩᠭᠢᠶᠠᠰᠤ ᠶ᠋ᠢ ᠰᠣᠶᠣᠭᠠᠳᠠᠵᠤ ᠪᠠᠢᠭᠠᠳ ᠲᠤᠩ ᠠᠮᠠᠷᠬᠠᠨ ᠲᠠᠢᠯᠴᠢᠬᠠᠳᠠᠭ ᠲᠤᠰᠬᠠᠢ ᠪᠠᠭᠠᠵᠢ— ᠰᠣᠶᠣᠭᠠ ᠮᠥᠨ᠃ ᠬᠣᠶᠠᠷ ᠲᠤ᠂ ᠣᠨᠣᠪᠴᠢ ᠶ᠋ᠢᠨ ᠮᠥᠷᠥ ᠪᠣᠯ ᠬᠡᠲᠡ ᠮᠥᠨ᠃ ᠡᠪᠬᠡᠭᠰᠡᠨ ᠦ᠌ ᠳᠠᠷᠠᠭᠠᠬᠢ ᠣᠨᠣᠪᠴᠢ ᠶ᠋ᠢᠨ ᠪᠥᠭᠲᠥᠷ ᠮᠥᠷᠥ ᠪᠣᠯ ᠭᠠᠴᠢᠭᠳᠠᠬᠤ ᠦᠶᠡ ᠶ᠋ᠢᠨ ᠬᠠᠪᠤᠲᠠᠢ ᠰᠠᠢᠬᠠᠨ ᠬᠡᠲᠡ ᠮᠥᠨ᠃ ᠵᠠᠷᠢᠮ ᠣᠨᠣᠪᠴᠢ ᠶ᠋ᠢᠨ ᠰᠠᠨᠵᠢ ᠠ᠋ᠴᠠ ᠡᠯᠭᠦᠭᠦᠷ ᠦ᠋ᠨ ᠣᠷᠣᠨ ᠳ᠋ᠤ᠌ ᠴᠠᠬᠢᠭᠤᠷ ᠪᠠ ᠤᠯᠠ ᠠᠬᠤᠭᠤᠯᠵᠤ ᠪᠣᠯᠳᠠᠭ ᠵᠢᠭᠠᠬᠠᠨ ᠠᠷᠠᠰᠤᠨ ᠤᠭᠤᠲᠠ ᠳᠡᠭᠦᠵᠢᠯᠡᠵᠦ ᠪᠠᠢᠳᠠᠭ ᠨᠢ ᠣᠨᠣᠪᠴᠢ ᠪᠠᠷ ᠭᠠᠯ ᠠᠪᠬᠤ ᠶ᠋ᠢᠨ ᠤᠴᠢᠷ ᠲᠠᠢ ᠶᠤᠮ᠃ ᠭᠤᠷᠪᠠ ᠳ᠋ᠤ᠌᠂ ᠠᠷᠠᠰᠤ ᠵᠦᠰᠦᠬᠦ ᠲᠤᠰᠬᠠᠢ ᠬᠢᠲᠤᠭᠠ ᠮᠥᠨ᠃ ᠣᠨᠣᠪᠴᠢ ᠨᠢ ᠶᠠᠮᠠᠷᠴᠤ ᠶᠠᠭᠤᠮᠠ ᠶ᠋ᠢ ᠣᠭᠲᠣᠯᠵᠤ ᠬᠡᠷᠴᠢᠵᠦ ᠴᠢᠳᠠᠳᠠᠭ ᠡᠩ ᠵᠢᠷ ᠦ᠋ᠨ ᠬᠢᠲᠤᠭᠠ ᠶ᠋ᠢᠨ ᠦᠢᠯᠡᠳᠦᠯ ᠭᠦᠢᠴᠡᠳ ᠪᠠᠢᠳᠠᠭ ᠪᠥᠭᠡᠳ ᠢᠷ ᠲᠠᠯᠠ ᠤᠷᠤᠭᠤ ᠪᠠᠨ ᠮᠡᠳᠡᠭᠳᠡᠮᠡ ᠮᠠᠬᠢᠷᠯᠠᠭᠰᠠᠨ ᠤᠴᠢᠷ ᠠ᠋ᠴᠠ ᠠᠷᠠᠰᠤ ᠵᠦᠰᠦᠬᠦ ᠳ᠋ᠦ᠍ ᠭᠠᠷ ᠲᠤ ᠡᠪᠲᠡᠢ᠂ ᠬᠦᠴᠦᠨ ᠳ᠋ᠦ᠍ ᠢᠯᠳᠠᠮ ᠪᠠᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠶᠣᠰᠣᠲᠠᠢ ᠠᠷᠠᠰᠤ ᠵᠦᠰᠦᠬᠦ ᠲᠤᠰᠬᠠᠢ ᠬᠢᠲᠤᠭᠠ ᠶᠤᠮ᠃ ᠳᠥᠷᠪᠡ ᠳ᠋ᠦ᠍᠂ ᠣᠨᠣᠪᠴᠢ ᠪᠣᠯ ᠰᠤᠷ ᠡᠳ᠋ᠯᠡᠯ ᠳᠡᠭᠡᠷᠡ ᠭᠠᠷᠭᠠᠭᠰᠠᠨ ᠨᠦᠬᠡ ᠶ᠋ᠢ ᠶᠡᠬᠡᠰᠬᠡᠳᠡᠭ ᠴᠢᠳᠠᠪᠤᠷᠢᠲᠠᠢ᠃ ᠰᠤᠷ ᠡᠳ᠋ᠯᠡᠯ ᠰᠦᠯᠵᠢᠬᠦ ᠳ᠋ᠦ᠍ ᠰᠤᠷ ᠢ᠋ᠶ᠋ᠠᠨ ᠣᠯᠠᠨ ᠠᠷᠪᠢᠨ ᠨᠦᠬᠡᠯᠡᠬᠦ ᠴᠢᠬᠤᠯᠠ ᠲᠠᠢ ᠪᠠᠢᠳᠠᠭ᠃ ᠭᠡᠪᠡᠴᠦ ᠰᠤᠷ ᠨᠢ ᠬᠠᠷᠢᠮᠠᠬᠠᠢ ᠴᠢᠨᠠᠷ ᠲᠠᠢ ᠣᠭᠲᠣᠯᠵᠤ ᠭᠠᠷᠭᠠᠭᠰᠠᠨ ᠨᠦᠬᠡ ᠨᠢ ᠠᠨᠢᠭᠠᠳ ᠪᠤᠰᠤᠳ ᠰᠤᠷ ᠢ᠋ ᠰᠦᠪᠡᠯᠡᠬᠦ ᠳ᠋ᠦ᠍ ᠬᠦᠴᠢᠷ ᠲᠡᠢ ᠪᠠᠢᠳᠠᠭ ᠲᠤᠯᠠ ᠡᠨᠡ ᠦᠶᠡ ᠳ᠋ᠦ᠍ ᠣᠨᠣᠪᠴᠢ ᠶ᠋ᠢᠨ ᠨᠠᠷᠢᠨ ᠦᠵᠦᠭᠦᠷ ᠢ᠋ᠶ᠋ᠡᠷ ᠰᠣᠶᠣᠭᠠᠳᠠᠪᠠᠯ ᠨᠦᠬᠡ ᠨᠢ ᠶᠡᠬᠡᠰᠴᠦ ᠰᠦᠪᠡᠯᠡᠵᠦ ᠰᠦᠯᠵᠢᠬᠦ ᠳ᠋ᠦ᠍ ᠠᠮᠠᠷᠬᠠᠨ ᠪᠣᠯᠭᠠᠳᠠᠭ ᠪᠠᠰᠠ ᠨᠢᠭᠡᠨ ᠴᠢᠬᠤᠯᠠ ᠬᠡᠷᠡᠭᠴᠡᠭᠡ ᠲᠡᠢ ᠶᠦᠮ᠃ ᠨᠢᠭᠡ ᠡᠳ᠋ ᠬᠡᠳᠦᠨ ᠵᠦᠢᠯ ᠦ᠋ᠨ ᠮᠡᠷᠭᠡᠨ ᠬᠡᠷᠡᠭᠴᠡᠭᠡ ᠲᠡᠢ ᠲᠤᠯᠠ ᠮᠣᠩᠭᠣᠯ ᠡᠷᠡᠭᠲᠡᠢᠴᠦᠳ ᠦ᠋ᠨ ᠪᠦᠰᠡ ᠡᠴᠡ ᠣᠨᠣᠪᠴᠢ ᠶᠡᠷᠦ ᠰᠠᠯᠳᠠᠭ ᠦᠭᠡᠢ ᠶᠦᠮ᠃ ᠱ ᠲᠦᠩᠰᠢᠭ ᠦ᠋ᠨ《ᠶᠤᠸᠠᠨ ᠤ᠋ ᠳᠡᠭᠡᠳᠦ ᠨᠡᠢᠰᠯᠡᠯ ᠱᠠᠩᠳᠤ》(ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ)᠂ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠯ· ᠳᠠᠰᠢᠨᠢᠮᠠ ᠶ᠋ᠢᠨ《ᠮᠣᠩᠭᠣᠯ ᠨᠤᠲᠤᠭ ᠲᠠᠬᠢ ᠲᠡᠦᠬᠡ ᠰᠣᠶᠣᠯ ᠤ᠋ᠨ ᠳᠤᠷᠠᠰᠬᠠᠯ》(ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ) ᠵᠡᠷᠭᠡ ᠨᠣᠮ ᠤ᠋ᠨ ᠵᠡᠭᠦᠯᠲᠡ ᠵᠢᠷᠤᠭ ᠲᠤ ᠪᠠᠢᠭᠠ ᠴᠢᠯᠠᠭᠤᠨ ᠨᠣᠶᠠᠨ ᠤ᠋ ᠪᠥᠰᠡᠨ ᠡᠴᠡ ᠵᠡᠭᠦᠯᠲᠡᠲᠡᠢ ᠬᠢᠲᠤᠭᠠ ᠪᠣᠯ ᠶᠠᠭ ᠰᠠᠢᠬᠠᠨ ᠡᠨᠳᠡ ᠬᠡᠯᠡᠵᠦ ᠪᠠᠢᠭᠠ ᠣᠨᠣᠪᠴᠢ ᠪᠥᠭᠡᠳ ᠡᠷᠲᠡᠨ ᠳ᠋ᠦ᠍ ᠪᠡᠨ ᠮᠣᠩᠭᠣᠯ ᠡᠷᠡᠴᠦᠳ ᠦ᠋ᠨ ᠪᠥᠰᠡᠨ ᠡᠴᠡ ᠣᠨᠣᠪᠴᠢ ᠰᠠᠯᠳᠠᠭ ᠦᠭᠡᠢ ᠭᠡᠳᠡᠭ ᠢ᠋ ᠭᠡᠷᠡᠴᠢᠯᠡᠵᠦ ᠪᠠᠢᠬᠤ ᠶᠤᠮ᠃ ᠡᠢᠮᠦ ᠡᠴᠡ ᠣᠨᠣᠪᠴᠢ ᠪᠣᠯ ᠮᠣᠩᠭᠣᠯᠴᠤᠳ ᠤ᠋ᠨ ᠪᠡᠶᠡ ᠡᠴᠡ ᠪᠡᠨ ᠰᠠᠯᠤᠯ ᠦᠭᠡᠢ ᠰᠦᠢᠷᠡᠵᠦ ᠶᠠᠪᠤᠳᠠᠭ ᠬᠢᠲᠤᠭᠠ ᠪᠥᠭᠡᠳ ᠣᠳᠣᠬᠠᠨ ᠤ᠋ ᠣᠯᠠᠨ ᠬᠡᠷᠡᠭᠴᠡᠭᠡᠲᠦ ᠴᠡᠷᠢᠭ ᠦ᠋ᠨ ᠬᠢᠲᠤᠭᠠ ᠶ᠋ᠢᠨ ᠡᠪᠦᠭᠡ ᠡᠴᠢᠭᠡ ᠨᠢ ᠮᠥᠨ᠃
1. 3 . 4 ᠡᠯᠡ ᠵᠦᠢᠯ ᠦ᠋ᠨ ᠣᠨᠣᠪᠴᠢ
2 ᠴᠢᠯᠠᠭᠤᠨ ᠨᠣᠶᠠᠨ ᠤ᠋ ᠲᠠᠰᠢᠶᠠᠨ ᠳ᠋ᠤ᠌ ᠪᠠᠢᠭᠠ ᠣᠨᠣᠪᠴᠢ
ᠢᠷᠡᠯᠲᠡ《ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠤᠯᠠᠮᠵᠢᠯᠠᠯᠲᠤ ᠡᠳ᠋ᠯᠡᠯ ᠬᠡᠷᠡᠭᠰᠡᠯ ᠵᠢᠴᠢ ᠲᠡᠭᠦᠨ ᠦ᠌ ᠤᠬᠠᠭᠠᠨ》 ᠠ᠋ᠴᠠ
ᠵᠣᠬᠢᠶᠠᠭᠴᠢ᠄ ᠪᠡ᠊· ᠰ· ᠬᠥᠭᠵᠢᠯᠲᠦ ᠵᠣᠷᠢᠭᠲᠤ ᠵᠣᠬᠢᠶᠠᠪᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠲᠤᠶᠠᠭᠠ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ