ᠳᠣᠯᠭᠠᠷ ᠨᠠᠭᠠᠰᠢᠲᠠᠢ ᠪᠣᠯᠪᠠ – ᠴ ᠂ ᠳᠣᠷᠵᠢᠭᠣᠳᠣᠪ Долгор нааштай болов – Ч ᠂ Доржготов
292ᠳᠣᠯᠭᠠᠷ ᠨᠠᠭᠠᠰᠢᠲᠠᠢ ᠪᠣᠯᠪᠠ
( ᠬᠣᠱᠣᠩ ᠥᠭᠦᠯᠡᠯᠭᠡ)
— ᠤᠷᠳᠤᠭᠤᠷ ᠤᠷᠤᠭᠰᠠ ᠬᠣᠶᠠᠷ ᠬᠥᠮᠦᠨ ᠮᠥᠩᠭᠥ ᠪᠡᠨ ᠶᠠᠪᠤᠭᠤᠯᠤᠭᠠᠷᠠᠢ ᠭᠡᠵᠦ ᠺᠤᠨᠲᠤᠺᠲ᠋ᠤᠷ ① ᠢ᠋ ᠬᠠᠰᠬᠢᠷᠬᠤ ᠳ᠋ᠤ᠌᠂
— ᠲᠡᠷᠡ ᠵᠣᠯᠢᠭ ᠢ᠋ ᠴᠢᠨᠢ ᠪᠠᠢᠭᠰᠠᠨ ᠪᠣᠯ ᠡᠳᠦᠢ ᠳ᠋ᠦ᠍ ᠤᠤᠭᠤᠵᠤ ᠰᠠᠭᠤᠬᠤ ᠰᠠᠨ ᠭᠡᠵᠦ ᠠᠥ᠋ᠲ᠋ᠤᠪᠦᠶ᠋ᠰ ᠦ᠋ᠨ ᠤᠷᠲᠤ ᠬᠠᠭᠠᠯᠭᠠ ᠪᠠᠷ ᠳᠠᠭᠠᠷᠢᠵᠤ ᠤᠷᠤᠭᠰᠠ ᠬᠣᠶᠠᠷ ᠰᠣᠭᠲᠣᠭᠤ ᠵᠠᠯᠠᠭᠤ ᠮᠠᠷᠵᠠᠭᠠᠨᠠᠪᠠ᠃
ᠭᠡᠲᠡᠯᠡ ᠠᠷᠤ ᠠ᠋ᠴᠠ ᠨᠢᠭᠡ ᠡᠷᠡ᠄
— ᠠᠪᠤ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠠᠥ᠋ᠲ᠋ᠤᠪᠦᠶ᠋ᠰ ᠲᠦ᠍ ᠰᠠᠭᠤ ᠭᠡᠵᠦ ᠦᠭᠭᠦᠭᠰᠡᠨ ᠮᠥᠩᠭᠥ ᠪᠡᠷ ᠠᠷᠢᠬᠢᠳᠠᠭᠠᠳ ᠰᠣᠭᠲᠣᠴᠢᠬᠠᠭᠰᠠᠨ ᠠᠪᠤ ᠶ᠋ᠢᠨ ᠴᠡᠭᠡᠵᠢ ᠨᠦ᠍ᠭᠦᠳ ᠰᠢᠪ ᠳᠡ ᠭᠡᠵᠦ ᠥᠳᠥᠭᠡᠨ ᠬᠠᠳᠬᠤᠯᠠ᠃ ᠬᠣᠶᠠᠷ ᠰᠣᠭᠲᠣᠭᠤ ᠠᠷᠤ ᠳ᠋ᠠᠭᠠᠨ ᠶᠠᠪᠤᠭᠠ ᠢᠰᠡᠭᠡᠢ ᠮᠠᠯᠠᠭᠠᠢ ᠲᠠᠯᠪᠢᠭᠰᠠᠨ ᠳᠣᠩᠬᠣᠷ ᠡᠷᠡ ᠶ᠋ᠢ( ᠲᠡᠷᠡ ᠨᠢ ᠪᠢ) ᠬᠡᠯᠡᠯᠡ ᠭᠡᠵᠦ ᠡᠨᠳᠡᠭᠦᠷᠡᠭᠡᠳ᠄
— ᠴᠢ ᠪᠢᠳᠡᠨ ᠢ᠋ ᠬᠡᠨ ᠪᠣᠯᠬᠤ ᠶ᠋ᠢ ᠮᠡᠳᠡᠬᠦ ᠤᠤ? ᠭᠡᠪᠡ᠃
— ᠮᠡᠳᠡᠬᠦ ᠦᠭᠡᠢ ᠭᠡᠵᠦ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠪᠡᠯ᠂
— ᠲᠡᠭᠡᠨᠡ ᠲᠡᠷᠡ᠂ ᠳᠠᠩᠴᠤ ᠥᠭᠡᠳᠡ ᠡᠴᠡ ᠴᠣᠷ ᠴᠣᠷ ᠭᠡᠳ ᠪᠠᠢᠭᠰᠠᠨ ᠶᠤᠮ ᠭᠡᠵᠦ ᠬᠣᠶᠠᠷ ᠰᠣᠭᠲᠣᠭᠤ ᠶ᠋ᠢᠨ ᠲᠣᠮᠣ ᠨᠢ ᠮᠢᠨᠦ ᠬᠠᠮᠠᠷ ᠢ᠋ ᠰᠥᠷᠭᠡᠭᠡᠭᠡᠳ ᠬᠠᠷᠢᠨ ᠳᠠᠬᠢᠭᠠᠳ ᠳᠣᠩᠭᠣᠰᠪᠠᠯ ᠴᠢᠮᠠ ᠶ᠋ᠢ ᠬᠤᠪᠢ ᠶ᠋ᠢᠨ ᠢ᠋ᠶ᠋ᠡᠨ ᠵᠠᠷᠤᠳᠠᠯ ᠢ᠋ᠶ᠋ᠠᠷ ᠱᠠᠮᠪᠠᠯ ② ᠳ᠋ᠤ᠌ ᠢᠯᠡᠭᠡᠴᠢᠬᠡᠬᠦ ᠨᠢ ᠰᠢᠦ ᠭᠡᠮᠡᠨ ᠬᠤᠰᠤᠨ ᠮᠤᠨᠠ ᠰᠢᠭ᠋ ᠨᠢᠳᠤᠷᠭᠠ ᠵᠠᠩᠭᠠᠬᠤ ᠳ᠋ᠤ᠌ ᠪᠢ ᠲᠣᠯᠣᠭᠠᠢ ᠤᠷᠤᠭᠤ ᠪᠠᠨ ᠴᠣᠬᠢᠭᠤᠯᠵᠤ ᠬᠠᠰᠢᠷᠠᠴᠢᠬᠠᠭᠰᠠᠨ ᠮᠣᠷᠢ ᠰᠢᠭ᠋ ᠨᠢᠳᠦ ᠪᠡᠨ ᠠᠨᠢᠪᠴᠢᠨ ᠳᠠᠯᠳᠢᠴᠢᠪᠠ᠃ ᠥᠴᠦᠬᠡᠨ ᠪᠢ ᠥᠭᠡᠳᠡ ᠲᠠᠨᠢ ᠲᠡᠭᠡᠵᠦ ᠶᠠᠭᠠᠬᠢᠨ ᠵᠢᠷᠦᠬᠡᠯᠡᠬᠦ ᠪᠢᠯᠡ᠃ ᠠᠷᠤ ᠠ᠋ᠴᠠ ᠲᠡᠷᠡ ᠮᠠᠭᠤ ᠨᠣᠬᠠᠢ ᠯᠠ ᠬᠤᠴᠠᠭᠠᠳ ᠪᠠᠢᠨᠠ ᠭᠡᠳ ᠠᠮᠢ ᠮᠤᠯᠲᠤᠷᠠᠬᠤ ᠪᠠᠢᠪᠠ᠃ ᠭᠡᠪᠡᠴᠦ ᠬᠠᠵᠠᠭᠤ ᠳ᠋ᠤ᠌ ᠴᠠᠬᠢᠭᠤᠷ ᠲᠡᠮᠦᠷ ᠢ᠋ ᠱᠠᠭᠰᠢᠨ ᠶᠠᠷᠢᠳᠠᠭ ᠰᠡᠳᠬᠢᠯ ᠲᠡᠢ ᠪᠦᠰᠡᠭᠦᠢ ᠲᠤᠯᠭᠠᠷ ᠮᠢᠨᠢ ᠶᠠᠪᠤᠳᠠᠭ⁈
ᠬᠣᠶᠠᠷ ᠰᠣᠭᠲᠣᠭᠤ ᠶ᠋ᠢᠨ ᠬᠠᠷᠠᠴᠠ ᠶ᠋ᠢ ᠤᠲᠤᠵᠤ ᠪᠠᠢᠭᠠᠳ ᠨᠥᠭᠦᠭᠡ ᠭᠠᠢᠲᠤ ᠡᠷᠡ᠄
— ᠣᠮᠣᠭᠲᠠᠢ ᠯᠤᠢᠪᠠᠷᠴᠢᠨ ᠨᠤᠭᠤᠳ ᠪᠣᠢ? ᠬᠣᠩᠰᠢᠶᠠᠷ ᠤᠷᠤᠭᠤ ᠨᠢ ᠢᠰᠬᠦᠯᠦᠭᠡᠳ ᠬᠥᠭᠡᠭᠡᠵᠦ ᠭᠠᠷᠭᠠᠪᠠᠯ ᠲᠠᠭᠠᠷᠠᠨᠠ ᠭᠡᠮᠡᠨ ᠳᠠᠬᠢᠨ ᠶᠠᠰᠤ ᠬᠠᠶᠠᠪᠠ᠃
ᠰᠠᠢᠬᠢ ᠬᠣᠶᠠᠷ ᠮᠥᠨ ᠯᠡ ᠨᠠᠮᠠ ᠶ᠋ᠢ ᠡᠳᠦᠯᠡ ᠭᠡᠳ ᠪᠦᠷ ᠪᠠᠢᠵᠤ ᠶᠠᠳᠠᠬᠤ ᠳ᠋ᠠᠭᠠᠨ ᠲᠠᠴᠢᠭᠢᠨᠠᠲᠠᠯᠠ ᠬᠥᠭᠡᠷᠦᠭᠰᠡᠨ ᠢ᠋ᠶ᠋ᠡᠨ ᠲᠣᠮᠣ ᠨᠢ ᠪᠠᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠴᠢᠬᠢᠨ ᠳ᠋ᠦ᠍《 ᠡᠨᠡ ᠰᠢᠷᠠᠯᠵᠢᠨ ᠣᠮᠣᠭᠲᠤ ᠶ᠋ᠢ ᠪᠠᠭᠤᠬᠤᠯᠠᠷ ᠨᠢ ᠪᠢ ᠨᠥᠭᠦᠭᠡ ᠠᠷᠭᠠ ᠪᠠᠨ ᠨᠢᠭᠡ ᠬᠡᠷᠡᠭᠯᠡᠪᠡᠯ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ》 ᠭᠡᠳ ᠳᠠᠬᠢᠨ ᠡᠭ ᠮᠡᠭ ᠦᠭᠡᠢ ᠬᠥᠬᠥᠷᠡᠬᠦ ᠳ᠋ᠦ᠍ ᠪᠠᠭᠠ ᠨᠢ᠄
— ᠠ᠋ ᠪᠠᠽᠠᠷᠪᠠᠨᠢ! ᠭᠡᠳ ᠨᠢᠳᠦ ᠪᠡᠨ ᠣᠷᠣᠢ ᠳᠡᠭᠡᠷᠡ ᠪᠡᠨ ᠭᠠᠷᠭᠠᠭᠰᠠᠨ ᠢ᠋ᠶ᠋ᠠᠨ᠄
— ᠡᠢᠮᠦ ᠡᠷᠡ ᠲᠡᠢᠮᠦ ᠬᠠᠲᠠᠭᠤ《 ᠲᠣᠭᠯᠠᠭᠠᠮ》 ᠢ᠋ ᠶᠠᠭᠠᠬᠢᠵᠤ ᠳᠠᠭᠠᠭᠠᠬᠤ ᠪᠣᠢ ᠭᠡᠯᠡ᠃
ᠡᠨᠡ ᠶᠠᠷᠢᠶᠠ ᠶ᠋ᠢ ᠰᠣᠨᠣᠰᠤᠩᠭᠤᠲᠠ ᠪᠢ ᠲᠠᠤᠯᠠᠢ ᠰᠢᠭ᠋ ᠬᠢᠷᠤᠪᠠ᠃ ᠠᠥ᠋ᠲ᠋ᠤᠪᠦᠶ᠋ᠰ ᠲᠦ᠍ ᠢᠰᠡᠭᠡᠢ ᠮᠠᠯᠠᠭᠠᠢ ᠨᠠᠳᠠ ᠰᠢᠭ᠋ ᠳᠡᠷᠮᠡᠢᠯᠭᠡᠭᠰᠡᠨ ᠬᠥᠮᠦᠨ ᠨᠢᠭᠡ ᠴᠦ᠍ ᠠᠯᠠᠭᠠ᠃ ᠡᠨᠡ ᠮᠠᠭᠤ ᠲᠠᠷᠢᠮᠡᠭᠠᠷ ᠠ᠋ᠴᠠ ᠯᠠ ᠪᠣᠯᠤᠭᠠᠳ ᠲᠠᠨᠢᠭᠳᠠᠭᠠᠳ ᠪᠠᠢᠨᠠ ᠭᠡᠳ ᠪᠢ ᠮᠠᠯᠠᠭᠠᠢ ᠪᠠᠨ ᠠᠪᠴᠤ ᠰᠤᠭᠤᠪᠴᠢᠯᠠᠭᠠᠳ ᠬᠥᠮᠦᠨ ᠦ᠌ ᠠᠷᠤ ᠪᠠᠷ ᠰᠢᠭᠢᠳᠦᠯᠡ᠃ ᠤᠬᠤᠷᠢᠭᠰᠠᠭᠠᠷ ᠨᠥᠭᠦᠭᠡ ᠭᠠᠢ ᠲᠠᠢ ᠡᠷᠡ ᠶ᠋ᠢ ᠤᠷᠲᠤ ᠪᠠᠨ ᠬᠢᠪᠡ᠃ ᠬᠠᠷᠢᠨ ᠲᠡᠷᠡ ᠭᠠᠢᠬᠠᠯ ᠤᠷᠲᠤ ᠣᠷᠣᠭᠠᠳ ᠵᠢᠭᠠᠰᠤ ᠰᠢᠭ᠋ ᠲᠠᠭ ᠳᠤᠭᠤᠢ ᠠᠮᠢᠲᠠᠨ ᠪᠣᠯᠬᠤ ᠨᠢ ᠲᠡᠷᠡ᠃ ᠪᠢ ᠶᠠᠭᠤᠲᠠᠢ ᠴᠤ᠌ ᠭᠡᠰᠡᠨ ᠭᠠᠢ ᠶ᠋ᠢᠨ ᠡᠷᠡ ᠡᠴᠡ ᠬᠠᠷᠢᠭᠤ ᠪᠠᠨ ᠠᠪᠤᠶᠠ ᠭᠡᠳ ᠲᠡᠭᠦᠨ ᠦ᠌ ᠠᠷᠤ ᠠ᠋ᠴᠠ᠄
— ᠲᠠ ᠬᠣᠶᠠᠷ ᠰᠢᠭ᠋ ᠬᠣᠭᠣᠰᠣᠨ ᠳᠦᠷᠢᠮ ᠡᠴᠡ ᠬᠥᠭᠰᠢᠨ ᠪᠢ ᠬᠦᠷᠲᠡᠯᠡ ᠠᠶᠤᠬᠤ ᠦᠭᠡᠢ ᠭᠡᠳ ᠬᠠᠰᠬᠢᠷᠴᠤ ᠣᠷᠭᠢᠲᠠᠯᠠ ᠰᠣᠭᠲᠣᠭᠤ ᠶ᠋ᠢᠨ ᠲᠣᠮᠣ ᠡᠷᠭᠢᠨ ᠨᠥᠭᠦᠭᠡ ᠭᠠᠢ ᠲᠠᠢ ᠡᠷᠡ ᠶ᠋ᠢ ᠵᠠᠭᠠᠮᠠᠳᠠᠭᠠᠳ ᠠᠪᠲᠠᠯᠠ ᠮᠠᠨᠢ ᠬᠥᠮᠦᠨ᠄
— ᠪᠢ ᠬᠡᠯᠡᠭᠡ ᠦᠭᠡᠢ᠂ ᠡᠨᠡ ᠠᠷᠤ ᠶ᠋ᠢᠨ ᠬᠥᠮᠦᠨ ᠭᠡᠵᠦ ᠭᠣᠩᠭᠢᠨᠠᠪᠠ᠃
ᠴᠠᠭᠠᠳᠤᠬᠢ ᠨᠢ ᠨᠠᠮᠠ ᠶ᠋ᠢ ᠬᠠᠷᠠᠭᠠᠳ ᠰᠢᠳᠦ ᠪᠡᠨ《 ᠭᠠᠯ ᠮᠡᠨᠡᠷᠡᠲᠡᠯᠡ》 ᠬᠠᠪᠢᠷᠤᠯᠠ᠃ ᠡᠳᠡᠨ ᠦ᠌ ᠭᠠᠷ ᠠ᠋ᠴᠠ ᠭᠠᠷᠬᠤ ᠦᠭᠡᠢ ᠪᠠᠢᠬᠤ ᠭᠡᠬᠦ ᠡᠴᠡ ᠡᠪᠦᠳᠦᠭ ᠴᠡᠴᠡᠷᠡᠨᠡ᠃ ᠳᠣᠭᠣᠭᠰᠢ ᠪᠠᠨ ᠢᠷᠠᠭᠠᠭᠰᠠᠭᠠᠷ ᠬᠥᠮᠦᠨ ᠦ᠌ ᠬᠥᠯ ᠳ᠋ᠦ᠍ ᠨᠤᠬᠤᠴᠠᠭᠳᠠᠬᠤ ᠤᠤ? ᠠᠷᠠᠢ ᠴᠤ᠌ ᠢᠴᠢᠬᠡᠪᠲᠤᠷ! ᠲᠤᠯᠭᠠᠷ ᠮᠠᠨᠢ ᠨᠠᠮᠠ ᠶ᠋ᠢ ᠲᠠᠤᠯᠠᠢ ᠰᠢᠭ᠋ ᠠᠶᠤᠮᠠᠬᠠᠢ ᠭᠡᠨᠡ ᠪᠠᠢᠬᠠ᠃ ᠭᠡᠪᠡᠴᠦ ᠬᠡᠳᠦᠬᠡᠨ ᠬᠣᠷᠣᠮ ᠤ᠋ᠨ ᠳᠠᠷᠠᠭᠠ ᠲᠠᠩᠬᠠᠢ ᠡᠷᠡ ᠶ᠋ᠢᠨ ᠭᠠᠷ ᠤ᠋ᠨ ᠰᠢᠭᠦᠰᠦ ᠪᠣᠯᠬᠤ ᠨᠢ ᠳᠠᠮᠵᠢᠭ ᠦᠭᠡᠢ᠃ ᠨᠥᠬᠥᠳ ᠮᠢᠨᠢ ᠰᠡᠳᠬᠢᠯ ᠲᠡᠢ ᠪᠦᠰᠡᠭᠦᠢ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡ ᠬᠥᠮᠦᠨ ᠦ᠌ ᠡᠪᠦᠳᠦᠭ ᠳᠣᠣᠷᠠ ᠲᠩᠷᠢ ᠬᠠᠷᠠᠭᠠᠳ ᠬᠣᠨᠢ ᠰᠢᠭ᠋ ᠲᠡᠯᠴᠢᠯᠡᠬᠦ ᠶᠠᠮᠠᠷ ᠪᠣᠢ? ᠵᠣᠷᠢᠭ ᠢ᠋ᠶ᠋ᠠᠨ ᠴᠢᠩᠭᠠᠯᠠᠬᠤ ᠰᠠᠨᠠᠭᠠ ᠲᠠᠢ ᠪᠢ ᠲᠤᠯᠭᠠᠷ ᠲᠦ᠍᠄
— ᠣᠷᠣᠢ ᠦᠳᠡᠰᠢ ᠶᠠᠪᠤᠵᠤ ᠪᠠᠢᠬᠤ ᠳ᠋ᠤ᠌ ᠡᠢᠮᠦᠷᠬᠦᠦ ᠬᠦᠯᠴᠦᠬᠦᠦ ᠶᠠᠭᠤᠮᠠᠨ ᠠᠭᠰᠤᠮ ᠲᠠᠯᠪᠢᠬᠤ ᠶᠤᠮ᠃ ᠵᠢᠭᠤᠲᠠᠴᠢᠬᠠᠶᠠ ᠭᠡᠬᠦᠯᠡᠷ ᠠᠶᠤᠯᠠ ᠭᠡᠬᠦ᠂ ᠨᠤᠯᠢᠴᠢᠬᠠᠶᠠ ᠭᠡᠬᠦᠯᠡᠷ ᠵᠣᠳᠣᠯᠠ ᠭᠡᠬᠦ ᠶᠠᠷᠰᠢᠭᠲᠠᠢ ᠶᠤᠮ ᠭᠡᠵᠦ ᠰᠢᠪᠡᠨᠡᠲᠡᠯᠡ᠂ ᠲᠡᠷᠡ᠄
— ᠨᠤᠯᠢᠴᠢᠬᠭᠠᠳ ᠵᠢᠭᠤᠲᠠᠴᠢᠬᠠᠬᠤ ᠦᠭᠡᠢ ᠤᠤ ᠭᠡᠮᠡᠨ ᠶᠣᠵᠣᠲᠠᠢ ᠨᠠᠮᠵᠤᠷᠳᠠᠪᠠ᠃
ᠡᠨᠡ ᠬᠡᠦᠬᠡᠨ ᠨᠤᠭᠦᠳ ᠶᠠᠯᠢᠮ ᠦᠭᠡᠢ ᠵᠡᠷᠯᠢᠭᠳᠡᠭᠦᠬᠡᠨ ᠬᠠᠷᠠᠴᠤᠤᠯ ᠳ᠋ᠤ᠌ ᠪᠢᠲᠡᠭᠦᠬᠡᠨ ᠳ᠋ᠡᠭᠡᠨ ᠳᠤᠷᠠᠲᠠᠢ ᠭᠡᠪᠡ ᠦᠦ ᠭᠡᠰᠡᠨ ᠪᠣᠳᠣᠯ ᠵᠢᠷᠦᠰ ᠬᠢᠯᠡ᠃
ᠠᠥ᠋ᠲ᠋ᠪᠦᠢ᠍ᠰ ᠲᠦ᠍ ᠬᠥᠮᠦᠰ ᠰᠢᠩᠭᠡᠷᠡᠵᠦ ᠢᠷᠡᠬᠦ ᠦᠶᠡᠰ ᠲᠦ᠍ ᠬᠣᠶᠠᠷ ᠰᠣᠭᠲᠣᠭᠤ ᠡᠪᠰᠢᠶᠡᠵᠦ ᠰᠤᠨᠢᠶᠠᠵᠤ ᠤᠨᠠᠭᠰᠠᠨ ᠶ᠋ᠢᠠᠨ᠄
— ᠴᠢ ᠪᠠᠭᠤᠬᠤ ᠶᠤᠮ ᠤᠤ ᠪᠠᠭᠤᠭᠠᠴᠢ᠂ ᠨᠤᠶ᠋ᠢᠷ ᠬᠦᠷᠦᠭᠡᠳ ᠪᠠᠶ᠋ᠢᠨᠠ ᠭᠡᠵᠦ ᠣᠨᠳᠤᠭᠤᠴᠠᠵᠦ ᠤᠴᠠᠭᠠᠷᠯᠠᠯᠳᠤᠪᠠ᠃ ᠪᠢ ᠲᠡᠳᠡᠨ ᠪ ᠳᠡᠷᠭᠡᠳᠡ ᠲᠥᠬᠦᠵᠤ ᠣᠴᠢᠭᠠᠳ᠄
— ᠪᠠᠭᠤᠬᠤ ᠪᠠᠭᠤᠳᠠᠯ ᠠᠯᠢ ᠡᠷᠲᠡ ᠥᠩᠭᠡᠷᠡᠴᠢᠬᠡᠭᠰᠡᠨ ᠭᠡᠯᠡ᠃
— ᠲᠡᠭᠡᠭᠡᠳ ᠪᠠᠭᠤᠬᠤ ᠦᠭᠡᠢ ᠶᠠᠭᠤ ᠪᠠᠨ ᠬᠢᠭᠰᠡᠨ ᠶᠤᠮ ᠪᠤᠢ ᠬᠠᠮᠤᠭ ᠴᠠᠭ ᠥᠷᠡᠴᠢᠬᠡᠯᠡ᠂ ᠮᠡᠳᠡᠪᠡ ᠤᠤ?
— ᠪᠢ ᠲᠠ ᠬᠣᠶᠠᠷ ᠲᠠᠢ ᠡᠴᠦᠰ ᠪᠠᠭᠤᠳᠠᠯ ᠳ᠋ᠤ᠌ ᠪᠠᠭᠤᠨᠠ᠃ ᠬᠣᠲᠠ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠴᠠᠭᠳᠠᠭᠠ ᠨᠠᠷ ᠬᠣᠯᠠ ᠳᠡᠭᠡᠷᠡ ᠪᠢᠰᠢ ᠦᠦ᠂ ᠮᠠᠯ ᠦ᠋ᠳ ᠡ!
ᠮᠢᠨᠦ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠲᠡᠷᠡ ᠬᠣᠶᠠᠷ ᠦ᠋ᠨ ᠨᠢᠳᠦ ᠦᠷᠭᠦᠭᠰᠡᠨ ᠲᠣᠷᠤᠮ ᠦ᠋ᠨ ᠬᠢ ᠰᠢᠭ᠋ ᠪᠣᠯᠵᠤ ᠪᠡᠶᠡ ᠪᠡᠶᠡ ᠶ᠋ᠢ ᠬᠠᠷᠠᠨ ᠲᠣᠯᠣᠭᠠᠢ ᠰᠡᠭᠰᠤᠷᠤᠭᠡᠳ ᠲᠠᠭᠠᠵᠢᠩᠲᠠᠢ ᠢᠰᠬᠡᠷᠪᠡ᠃
— ᠡᠶ᠋ᠢᠮᠦᠷᠬᠦᠦ ᠡᠷᠡᠴᠦᠦᠯ ᠮᠣᠳᠣ ᠴᠢᠯᠠᠭᠤ ᠭᠡᠳᠡᠭ ᠦᠭᠡᠢ ᠰᠠᠨ ᠭᠡᠳ ᠪᠢ ᠲᠤᠨᠵᠢᠭ ᠲᠣᠮᠣ ᠰᠣᠭᠲᠣᠭᠤ ᠶ᠋ᠢᠨ ᠮᠥᠷᠦᠨ ᠳᠡᠭᠡᠷᠡ ᠠᠯᠠᠭᠠᠳᠠᠭᠠᠳ᠄
— ᠬᠣᠷᠢᠭᠠ ᠲᠠᠢ ᠪᠠᠷᠢᠯᠳᠤᠭᠠᠨ ᠪ ᠠᠯᠢ ᠨᠢ ᠴᠦ᠍ ᠠᠬᠠ ᠳ᠋ᠤᠨᠢ ᠲᠤᠨᠵᠢᠭ ᠨᠢᠭᠡ! ᠭᠡᠪᠡᠴᠦ ᠬᠡᠦᠬᠡᠳ ᠦ᠋ᠳ ᠦᠪᠷᠰᠡᠳ ᠶ᠋ᠢᠡᠨ ᠯᠠ ᠮᠡᠳᠡᠲᠦᠭᠡᠢ᠃ ᠨᠠᠳᠠ ᠳ᠋ᠤ᠌《 ᠲᠣᠭᠯᠠᠭᠠᠮ ᠦ᠋ᠨ》 ᠬᠠᠲᠠᠭᠤᠬᠠᠨ ᠯᠠ ᠬᠤᠵᠢᠷ᠃ ᠬᠠᠷᠢᠨ ᠴᠢᠮᠠ ᠳ᠋ᠤ᠌ ᠭᠡᠵᠦ ᠬᠡᠯᠡᠬᠦ ᠳ᠋ᠤ᠌ ᠭᠡᠳ ᠪᠢ ᠪᠠᠭᠠ ᠰᠣᠭᠲᠣᠭᠤ ᠶ᠋ᠢᠨ ᠴᠢᠬᠢ ᠶ᠋ᠢ ᠮᠤᠰᠬᠢᠭᠠᠳ᠂
— ᠶᠠᠰᠤ ᠭᠡᠮᠲᠦᠬᠦ ᠠᠮᠠᠷ ᠦᠭᠡᠢ ᠰᠢᠦ᠂ ᠲᠡᠭᠦᠨ ᠪ ᠣᠷᠣᠨ ᠳ᠋ᠤ᠌ ᠦᠶᠡ ᠮᠥᠴᠢ ᠪᠡᠨ ᠪᠣᠯᠭᠤᠯᠠᠬᠤ ᠬᠠᠪᠢ ᠦᠭᠡᠢ ᠳᠡᠭᠡᠷᠡ᠃ ᠪᠢ ᠰᠠᠶᠢᠬᠠᠨ ᠨᠢᠭᠡ ᠡᠷᠡ ᠶ᠋ᠢᠨ ᠠᠮᠠᠨ ᠬᠦᠵᠦᠭᠦᠦ ᠶ᠋ᠢ ᠠᠷᠤ ᠳᠡᠭᠡᠷᠡ ᠨᠢ ᠭᠠᠷᠭᠠᠭᠠᠳ ᠬᠣᠶᠠᠷ ᠬᠥᠯ ᠊ᠢ ᠨᠢ ᠰᠢᠯᠢᠨ ᠬᠦᠵᠦᠭᠦᠦ ᠳᠡᠭᠡᠷᠡ ᠨᠢ ᠲᠣᠬᠣᠵᠤ ᠣᠷᠭᠢᠭᠠᠳ ᠭᠤᠳᠤᠮᠵᠢᠨ ᠳ᠋ᠤ᠌ ᠬᠠᠶᠠᠴᠢᠬᠠᠭᠰᠠᠨ ᠶᠤᠮ᠃ ᠭᠡᠲᠡᠯᠡ ᠬᠣᠶᠠᠷ ᠬᠣᠨᠣᠭ ᠦ᠋ᠨ ᠳᠠᠷᠠᠭᠠ《 ᠲᠤᠤᠯᠠ》 ᠷᠸᠰᠲ᠋ᠤᠷᠠᠨ( ᠬᠣᠭᠣᠯᠠ ᠭᠡᠷ) ᠳ᠋ᠤ᠌ ᠫᠢᠸᠦ᠌ ᠤᠤᠭᠣᠭᠠᠳ ᠵᠥᠪ ᠵᠦᠭᠡᠷ ᠰᠠᠭᠤᠵᠤ ᠪᠠᠶ᠋ᠢᠨᠠ ᠯᠡᠢ ᠭᠡᠪᠡᠯ ᠬᠣᠶᠠᠷ ᠰᠢᠳᠦ ᠪᠡᠨ ᠠᠪᠬᠠᠭᠤᠯᠬᠣ ᠭᠡᠵᠦ ᠰᠠᠭᠤᠭᠠ ᠬᠥᠮᠦᠨ ᠡᠮᠴᠢ ᠶ᠋ᠢᠨ ᠪᠠᠷᠢᠭᠰᠠᠨ ᠪᠡᠬᠢ ᠡᠴᠡ ᠳᠠᠯᠳᠢᠷᠠᠬᠤ ᠮᠡᠲᠦ ᠮᠢᠨᠦ ᠪᠦᠬᠦ ᠬᠥᠳᠡᠯᠭᠡᠭᠡᠨ ᠡᠴᠡ ᠳᠠᠯᠳᠢᠴᠢᠵᠤ ᠡᠬᠢᠯᠡᠯᠡ᠃
ᠭᠡᠲᠡᠯᠡ ᠪᠠᠭᠠ ᠨᠢ ᠲᠦᠷᠦᠭᠦᠴᠢ ᠶ᠋ᠢᠨ ᠭᠠᠢ ᠲᠠᠢ ᠡᠷᠡ ᠡᠴᠡ ᠠᠥ᠋ᠲ᠋ᠪᠤᠢ᠍ᠰ ᠶᠠᠮᠠᠷ ᠪᠠᠭᠤᠳᠠᠯ ᠳᠡᠭᠡᠷᠡ ᠢᠷᠡᠵᠦ ᠪᠤᠢ ᠶ᠋ᠢ ᠰᠤᠷᠬᠠᠯᠠᠵᠤ ᠪᠠᠶ᠋ᠢᠨᠠ᠃
— ᠣᠳᠣ ᠪᠢᠳᠡᠨ ᠪ ᠪᠠᠭᠤᠬᠤ ᠡᠴᠦᠰ ᠦ᠋ᠨ ᠪᠠᠭᠤᠳᠠᠯ ᠭᠡᠵᠦ ᠨᠠᠮᠠ ᠶ᠋ᠢ ᠬᠠᠵᠠᠭᠤᠨ ᠠ᠋ᠴᠠ ᠨᠢ ᠵᠠᠩᠳᠤᠷᠲᠠᠯᠠ ᠲᠡᠷᠡ᠄
— ᠵᠣᠭᠰᠣᠭᠠ᠂ ᠵᠣᠭᠰᠣᠭᠠᠷᠠᠢ᠂ ᠪᠠᠭᠤᠶᠠ! ᠭᠡᠵᠦ ᠪᠠᠷᠬᠢᠷᠠᠯᠠ᠃
— ᠵᠣᠭᠰᠣᠭᠠᠯ ᠳᠡᠭᠡᠷᠡ ᠵᠣᠭᠰᠣᠨᠠ ᠭᠦ᠋ ᠭᠡᠵᠦ ᠵᠢᠯᠣᠭᠣᠴᠢ ᠶ᠋ᠢ ᠮᠡᠳᠡᠭᠳᠡᠬᠦ ᠳ᠋ᠤ᠌᠂
— ᠵᠣᠭᠰᠣᠭᠠᠳ ᠥᠭᠭᠦᠭᠡᠴᠢ ᠳ᠋ᠠ ᠭᠡᠵᠦ ᠤᠬᠢᠯᠠᠩᠨᠠᠪᠠ᠃
— ᠠᠶᠤᠭᠠ ᠤᠤ ᠴᠢ᠂ ᠬᠤᠯᠴᠢᠭᠠᠷ ᠨᠤᠪᠰᠢ ᠭᠡᠵᠦ ᠲᠣᠮᠣ ᠨᠢ ᠲᠡᠭᠦᠨ ᠳ᠋ᠤ᠌ ᠳᠡᠭᠡᠷᠡᠯᠬᠡᠯᠡ᠃ ᠪᠠᠭᠠ ᠰᠣᠭᠲᠣᠭᠤ ᠶ᠋ᠢ ᠳᠥᠷᠪᠡᠨ ᠵᠦᠭ ᠦᠭᠡᠢ ᠣᠷᠢᠯᠠᠨ ᠬᠠᠭᠠᠯᠭᠠ ᠨᠦᠳᠦᠬᠦ ᠳ᠋ᠤ᠌ ᠠᠥ᠋ᠲ᠋ᠤᠪᠤᠢ᠍ᠰ ᠠᠷᠭᠠ ᠪᠤᠰᠤ ᠵᠣᠭᠰᠣᠪᠠ᠃
— ᠴᠢ ᠪᠠᠰᠠ ᠤᠯᠤᠰ ᠦ᠋ᠨ ᠬᠥᠯᠥᠰᠥᠨ ᠳ᠋ᠤ᠌ ᠮᠥᠩᠭᠥ ᠲᠦᠯᠤᠬᠦ ᠦᠭᠡᠢ ᠵᠢᠭᠤᠳᠠᠬᠤ ᠨᠢ ᠤᠤ? ᠭᠡᠳ ᠨᠠᠮᠠ ᠶ᠋ᠢ ᠤᠬᠤᠰᠬᠢᠲᠡᠯᠡ ᠲᠡᠷᠡ ᠡᠪᠦᠷ ᠡᠴᠡ ᠨᠢᠭᠡ ᠲᠥᠭᠥᠷᠢᠭ ᠠᠪᠴᠤ ᠴᠢᠯᠠᠭᠤᠳᠠᠭᠠᠳ ᠬᠠᠭᠠᠯᠭᠠ ᠣᠩᠭᠤᠶ᠋ᠢᠬᠤ ᠠ᠋ᠴᠠ ᠡᠮᠦᠨᠡ ᠵᠠᠪᠰᠠᠷ ᠶ᠋ᠢᠠᠷ ᠨᠢ ᠴᠢᠬᠢᠭᠰᠡᠭᠡᠷ ᠭᠠᠳᠠᠭᠠ ᠭᠠᠷᠴᠤ ᠤᠶ᠋ᠢᠴᠢᠯᠠ᠃
— ᠴᠠᠭᠠᠳᠤ ᠮᠠᠭᠤ ᠴᠢᠨᠢ ᠶᠠᠪᠤᠭ᠂ ᠶᠠᠪᠤᠭ! ᠬᠣᠶᠠᠭᠤᠯᠠ ᠯᠠ ᠭᠠᠵᠠᠷ ᠲᠩᠷᠢ ᠶ᠋ᠢᠨ ᠠᠭᠤᠵᠢᠮ ᠳ᠋ᠤ᠌ ᠭᠠᠭᠴᠠ ᠦᠵᠡᠯᠴᠡᠵᠦ ᠬᠠᠶᠠᠶᠠ ᠭᠡᠳ ᠪᠢ ᠲᠣᠮᠣ ᠰᠣᠭᠲᠣᠭᠤ ᠶ᠋ᠢᠨ ᠭᠠᠷ ᠠ᠋ᠴᠠ ᠰᠢᠭᠦᠷᠦᠨ ᠠᠪᠲᠠᠯᠠ ᠲᠡᠷᠡ ᠮᠠᠭᠤᠬᠠᠢ ᠣᠷᠢᠯᠠᠨ ᠬᠠᠭᠠᠯᠭᠠ ᠴᠦᠮᠦ ᠳᠠᠭᠠᠷᠢᠵᠤ ᠭᠠᠷᠤᠭᠠᠳ ᠲᠠᠯᠢᠢᠵᠤ ᠥᠭᠪᠡ ᠭᠦ᠋ ᠴᠢ ᠮᠢᠨᠢ᠃
ᠵᠤᠷᠴᠢᠭᠴᠢᠳ ᠠᠯᠠᠭᠠ ᠨᠢᠵᠢᠭᠢᠨᠡᠭᠦᠯᠦᠨ ᠳᠠᠰᠢᠪᠠ᠃ ᠲᠤᠯᠭᠠᠷ ᠤᠯᠠᠨ ᠪ ᠡᠮᠦᠨᠡ ᠨᠠᠮᠠ ᠶ᠋ᠢ ᠠᠩᠬᠠ ᠤᠳᠠᠭᠠ ᠬᠦᠵᠦᠭᠦᠳᠡᠨ ᠠᠪᠤᠭᠠᠳ ᠁ ᠦᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠲᠤᠯᠭᠠᠷ ᠨᠠᠭᠠᠰᠢᠲᠠᠢ ᠪᠣᠯᠤᠯᠠ᠃
– – – –
① ᠠᠥ᠋ᠲ᠋ᠤᠪᠥᠶ᠋ᠰ ᠦ᠋ᠨ ᠫᠢᠶᠣᠣ ᠰᠢᠯᠭᠠᠭᠴᠢ᠃
② ᠪᠤᠷᠬᠠᠨ ᠱᠠᠰᠢᠨ ᠤ᠋ ᠠᠷᠢᠭᠤᠨ ᠲᠠᠪᠤᠨ ᠣᠷᠣᠨ ᠤ᠋ ᠨᠢᠭᠡ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠪᠠᠭᠠᠲᠤᠷ
ᠬᠢᠨᠠᠭ᠍ᠴᠢ : ᠲᠤᠭ᠍ᠴᠢ ᠰᠠᠷᠠᠨᠠ
2023᠂ 10᠂ 18 ᠤ ᠡᠳᠦᠷ