ᠴᠡᠩᠬᠡᠷ ᠫᠢᠩᠲ᠋ᠸᠣᠲᠤ – ᠴ ᠂ ᠳᠣᠷᠵᠢᠭᠣᠳᠣᠪ Цэнхэр пинтвот – Ч ᠂ Доржготов
272ᠴᠡᠩᠬᠡᠷ ᠫᠢᠩᠲ᠋ᠸᠣᠲᠤ
ᠴᠡᠩᠬᠡᠷ ᠫᠢᠩᠲ᠋ᠸᠦᠲᠤ①
2023᠂ 10᠂ 8 ᠤ ᠡᠳᠦᠷ
( ᠱᠣᠭ ᠥᠭᠦᠯᠡᠯᠭᠡ)
ᠮᠥᠩᠭᠥᠨ ᠦ᠌ ᠠᠪᠳᠠᠷᠠ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠰᠠᠢᠬᠠᠨ ᠴᠡᠩᠬᠡᠷ ᠫᠢᠩᠲ᠋ᠸᠦ ᠲᠡᠢ ᠵᠢᠰᠦ ᠦᠵᠡᠭᠡ ᠦᠭᠡᠢ ᠡᠷᠡ ᠰᠠᠭᠤᠵᠤ ᠪᠠᠢᠭᠰᠠᠨ ᠳ᠋ᠤ᠌ ᠭᠠᠢᠬᠠᠪᠠ᠃ ᠭᠠᠢᠬᠠᠭᠰᠠᠨ ᠮᠢᠨᠢ ᠭᠡᠪᠡᠯ ᠨᠢᠭᠡ ᠪᠣᠯ ᠪᠢ ᠲᠡᠢᠮᠦ ᠨᠢᠷᠪᠠ ᠦᠵᠡᠭᠡ ᠦᠭᠡᠢ᠂ ᠨᠢᠭᠡ ᠪᠣᠯ ᠪᠢ ᠲᠡᠢᠮᠦ ᠴᠡᠩᠬᠡᠷ ᠫᠢᠩᠲ᠋ᠸᠦᠲᠦ ᠲᠡᠢ ᠬᠥᠮᠦᠨ ᠦᠵᠡᠭᠡ ᠦᠭᠡᠢ ᠡᠨᠡ ᠬᠣᠶᠠᠷ ᠤ᠋ᠨ ᠨᠢᠭᠡ᠃
ᠲᠡᠭᠦᠨ ᠡᠴᠡ᠄
— ᠰᠣᠨᠢᠨ ᠳ᠋ᠤ᠌ ᠨᠡᠢᠲᠡᠯᠡᠭᠳᠡᠭᠰᠡᠨ ᠵᠦᠢᠯ ᠦ᠋ᠨ ᠬᠥᠯᠥᠰᠥ ᠮᠥᠩᠭᠥ ᠶ᠋ᠢ ᠲᠠ ᠣᠯᠭᠣᠬᠤ ᠤᠤ? ᠭᠡᠵᠦ ᠠᠰᠠᠭᠤᠪᠠᠯ᠄
— ᠤᠭ ᠨᠢ ᠴᠤ᠌ ᠪᠢ ᠠᠷᠠᠢ ᠬᠠᠮᠢᠭᠠ ᠠ᠋ᠴᠠ ᠮᠥᠩᠭᠥ ᠣᠯᠭᠣᠵᠤ ᠰᠠᠭᠤᠬᠤ ᠪᠣᠢ ᠭᠡᠵᠦ ᠴᠡᠩᠬᠡᠷ ᠫᠢᠩᠲ᠋ᠸᠦᠲᠦ ᠤᠴᠢᠷ ᠣᠢᠯᠠᠭᠠᠮᠵᠢ ᠦᠭᠡᠢ ᠢᠴᠢᠩᠭᠦᠷᠡᠭᠰᠡᠨ ᠢ᠋ᠶ᠋ᠡᠨ᠄
— ᠮᠠᠨ ᠤ᠋ ᠮᠥᠩᠭᠥᠨ ᠦ᠌ ᠨᠢᠷᠪᠠ ᠠᠮᠠᠷᠠᠭᠠᠳ ᠪᠢ ᠡᠨᠡ ᠵᠠᠪᠠᠭᠠᠨ ᠠᠵᠢᠯ ᠳ᠋ᠤ᠌ ᠲᠦᠷ ᠲᠣᠬᠣᠭᠳᠠᠭᠠᠳ ᠪᠠᠢᠨᠠ ᠭᠡᠪᠡ᠃ ᠲᠡᠭᠦᠨ ᠢ᠋ ᠬᠠᠷᠠᠪᠠᠰᠤ ᠨᠢᠷᠪᠠ ᠪᠢᠰᠢ ᠨᠢ ᠢᠯᠡ ᠠᠲᠠᠯᠠ ᠢᠩᠭᠢᠵᠦ ᠢᠴᠢᠳᠡᠭ ᠨᠢ ᠢᠯᠡᠭᠦᠦ ᠵᠠᠩ ᠮᠡᠲᠦ ᠪᠣᠳᠣᠭᠳᠠᠯᠠ᠃
ᠪᠢ ᠲᠡᠭᠦᠨ ᠳ᠋ᠦ᠍ ᠨᠡᠷᠡ ᠤᠰᠤ ᠪᠠᠨ ᠬᠡᠯᠡᠯᠡ᠃ ᠢᠳᠡᠪᠬᠢᠲᠡᠨ ᠪᠢᠴᠢᠭᠲᠡᠳ ᠦ᠋ᠨ ᠱᠠᠩᠨᠠᠯ ᠤ᠋ᠨ ᠬᠦᠰᠦᠨᠦᠭᠲᠦ ᠡᠴᠡ ᠲᠡᠷᠡ ᠮᠢᠨᠦ ᠨᠡᠷᠡ ᠶ᠋ᠢ ᠬᠠᠢᠵᠤ ᠡᠬᠢᠯᠡᠪᠡ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ《 ᠲᠠᠨ ᠤ᠋ ᠨᠡᠷᠡ ᠡᠨᠳᠡ ᠠᠯᠠᠭᠠ ᠳᠠ》 ᠭᠡᠳ ᠨᠠᠳᠠ ᠤᠷᠤᠭᠤ ᠶᠣᠵᠣᠲᠠᠢ ᠬᠠᠷᠠᠯᠠ᠃ ᠪᠢ᠄
— ᠠᠯᠠᠭᠠ ᠤᠤ? ᠭᠡᠵᠦ ᠶᠠᠯᠢᠮ ᠦᠭᠡᠢ ᠭᠣᠮᠣᠳᠠᠯ ᠲᠠᠢ ᠥᠭᠦᠯᠡᠭᠡᠳ ᠤᠭ ᠨᠢ ᠪᠠᠢᠬᠤ ᠶᠣᠰᠣᠲᠠᠢ ᠰᠠᠨ ᠭᠡᠳ ᠰᠠᠨᠠᠭᠠ ᠠᠯᠳᠠᠪᠠ᠃ ᠴᠡᠩᠬᠡᠷ ᠫᠢᠩᠲ᠋ᠸᠦᠲᠦ ᠨᠡᠷᠡᠰ ᠦ᠋ᠨ ᠵᠢᠭᠰᠠᠭᠠᠯᠲᠠ ᠶ᠋ᠢ ᠳᠡᠭᠡᠷᠡ ᠡᠴᠡ ᠳᠣᠭᠣᠭᠰᠢ ᠳᠠᠬᠢᠨ ᠱᠦᠭᠦᠷᠳᠡᠭᠰᠡᠨ ᠢ᠋ᠶ᠋ᠡᠨ ᠳᠣᠣᠷᠠ ᠠ᠋ᠴᠠ ᠨᠢ ᠥᠭᠡᠳᠡ ᠨᠢ ᠰᠥᠷᠭᠡᠭᠡᠵᠦ ᠦᠵᠡᠯᠡ᠃《 ᠵᠠ ᠠᠰᠢᠭᠦᠢ᠂ ᠣᠳᠣ ᠣᠯᠤᠨᠠ ᠪᠠᠢᠬᠠ》 ᠭᠡᠵᠦ ᠭᠣᠷᠢᠳᠠᠯᠠ᠃ ᠲᠡᠭᠡᠲᠡᠯᠡ ᠮᠠᠨᠢ ᠬᠥᠮᠦᠨ ᠨᠠᠳᠠ ᠠ᠋ᠴᠠ《 ᠢᠩᠭᠢᠬᠦ ᠳ᠋ᠦ᠍ ᠴᠢ ᠨᠡᠷᠡ ᠪᠡᠨ ᠬᠡᠨ ᠭᠡᠯᠡ》 ᠭᠡᠵᠦ ᠪᠠᠢᠨᠠ᠃ ᠪᠢ《 ᠳᠣᠷᠵᠢᠭᠣᠲᠤᠪ》 ᠭᠡᠳᠡᠭ ᠭᠡᠯᠡ᠃ ᠲᠡᠷᠡ《 ᠠ ᠲᠡᠢᠮᠦ᠂ ᠨᠡᠭᠡᠷᠡᠨ ᠳᠣᠷᠵᠢᠭᠣᠲᠤᠪ ᠭᠡᠯᠡ ᠤᠤ᠂ ᠬᠡ ᠬᠡ᠁ ᠴᠢ ᠪᠢᠳᠡ ᠬᠣᠶᠷ ᠡᠨᠡᠦᠬᠡᠨ ᠳ᠋ᠡᠭᠡᠨ ᠬᠥᠭᠡᠷᠦᠬᠦᠨ ᠪᠤᠳᠤᠯᠢᠬᠤ ᠨᠢ ᠠ᠋》 ᠭᠡᠭᠰᠡᠭᠡᠷ ᠴᠠᠪ ᠴᠠᠭᠠᠨ ᠴᠠᠭᠠᠰᠤᠨ ᠳᠡᠭᠡᠷᠡ ᠵᠢᠷᠢᠢᠬᠦ ᠨᠡᠷᠡ ᠪᠦᠷᠢ ᠶ᠋ᠢ ᠬᠠᠮᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠡᠳᠡᠷᠡᠪᠡ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠪᠠᠨ ᠰᠡᠬᠦᠵᠦ᠄
— ᠠᠯᠠᠭᠠ ᠳᠠ᠂ ᠳᠣᠷᠵᠢᠫᠦᠷᠪᠦ ᠮᠢᠨᠢ! ᠭᠡᠯᠡ᠃
— ᠲᠠ ᠳᠣᠷᠵᠢᠫᠦᠷᠪᠦ ᠭᠡᠰᠡᠨ ᠨᠡᠷᠡ ᠬᠠᠢᠭᠠᠳ ᠪᠠᠢᠨᠠ ᠤᠤ? ᠭᠡᠪᠡᠯ ᠲᠡᠷᠡ ᠨᠢᠳᠦᠨ ᠦ᠌ ᠪᠡᠨ ᠰᠢᠯ ᠢ᠋ ᠠᠪᠴᠤ ᠨᠠᠳᠠ ᠤᠷᠤᠭᠤ ᠠᠶᠠᠭᠦᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠄
— ᠴᠢ ᠥᠪᠡᠷ ᠢ᠋ᠶ᠋ᠡᠨ ᠳᠣᠷᠵᠢᠫᠦᠷᠪᠦ ᠭᠡᠰᠡᠨ ᠪᠢᠵᠡ ᠳᠡ ᠭᠡᠨᠡ᠃
— ᠦᠭᠡᠢ ᠠ᠋᠂ ᠪᠢ ᠳᠣᠷᠵᠢᠭᠣᠲᠤᠪ ᠭᠡᠰᠡᠨ ᠰᠢᠦ! ᠭᠡᠳ ᠬᠠᠷᠠ ᠪᠠᠭᠠ ᠠ᠋ᠴᠠ ᠣᠯᠤᠭᠰᠠᠨ ᠵᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠷᠠᠴᠠ ᠳᠠᠯᠳᠠᠴᠢᠨ ᠢᠨᠢᠶᠡᠮᠰᠦᠭᠯᠡᠪᠡᠯ ᠰᠠᠢᠬᠠᠨ ᠴᠡᠩᠬᠡᠷ ᠫᠢᠩᠲ᠋ᠸᠦᠲᠦ《 ᠦ ᠶᠠᠮᠠᠷ ᠪᠠᠯᠠᠢ ᠶᠤᠮ ᠪᠣᠢ?》 ᠭᠡᠮᠡᠨ ᠭᠠᠷ ᠳᠠᠬᠢ ᠴᠠᠭᠠᠰᠤ ᠪᠠᠨ ᠰᠢᠳᠡᠭᠡᠳ ᠨᠠᠳᠠ ᠳ᠋ᠤ᠌ ᠠᠭᠤᠷᠯᠠᠬᠤ ᠭᠡᠰᠡᠨ ᠨᠢ ᠨᠢᠷᠪᠠ ᠶ᠋ᠢᠨ ᠠᠵᠢᠯ ᠠ᠋ᠴᠠ ᠪᠣᠯᠪᠠ ᠤᠤ ᠨᠢᠭᠡ ᠯᠡ ᠪᠣᠯᠵᠤ ᠥᠭᠭᠦᠭᠰᠡᠨ ᠦᠭᠡᠢ ᠶᠠᠩᠵᠤ ᠲᠠᠢ᠄
— ᠡᠨᠡ ᠠᠵᠢᠯ ᠴᠤ᠌ ᠶᠣᠰᠣᠲᠠᠢ ᠪᠠᠷᠠᠵᠤ ᠢᠳᠡᠬᠦ ᠦᠭᠡᠢ ᠬᠣᠭᠣᠯᠠ ᠪᠣᠯᠤᠯᠲᠠᠢ ᠭᠡᠳ《 ᠮᠠᠭᠤ ᠨᠢᠷᠪᠠ ᠶ᠋ᠢᠨ ᠠᠵᠢᠯ ᠢ᠋》 ᠳᠣᠭᠣᠭᠢᠯᠠᠬᠤ ᠪᠠᠷ ᠨᠠᠮᠠ ᠶ᠋ᠢ ᠤᠷᠢᠶᠠᠯᠠᠨ ᠢᠨᠢᠶᠡᠪᠡ᠃ ᠲᠡᠭᠦᠨ ᠦ᠌ ᠴᠢᠷᠠᠢ ᠶ᠋ᠢ ᠠᠵᠢᠪᠠᠯ ᠨᠢᠷᠪᠠ ᠶ᠋ᠢᠨ ᠠᠵᠢᠯ ᠳ᠋ᠤ᠌ ᠭᠣᠳᠣᠭᠠᠳ ᠠᠭᠤᠷ ᠲᠠᠭᠠᠨ ᠬᠥᠮᠦᠨ ᠵᠠᠩᠨᠠᠬᠤ ᠭᠡᠳ ᠪᠠᠢᠬᠤ ᠰᠢᠭ᠋ ᠬᠠᠷᠠᠭᠳᠠᠨᠠ᠃ ᠬᠥᠮᠦᠨ ᠵᠠᠩᠨᠠᠬᠤ ᠶᠠᠮᠠᠷ ᠪᠠᠢᠳᠠᠭ ᠢ᠋ ᠵᠠᠶᠠᠭᠠᠨ ᠳᠡᠯᠭᠡᠷ ᠮᠡᠳᠡᠬᠦ ᠦᠭᠡᠢ ᠶᠦ᠍ᠮ᠃ ᠴᠡᠩᠬᠡᠷ ᠫᠢᠩᠲ᠋ᠸᠦᠲᠦ ᠨᠠᠮᠠ ᠶ᠋ᠢ ᠲᠦᠪᠡᠭᠰᠢᠶᠡᠨ ᠳᠤᠷᠠ ᠦᠭᠡᠢᠴᠡᠯ ᠢ᠋ᠶ᠋ᠡᠨ ᠨᠢᠭᠤᠵᠤ ᠶᠠᠳᠠᠨ ᠨᠡᠷᠡᠰ ᠦ᠋ᠨ ᠵᠢᠭᠰᠠᠭᠠᠯᠲᠠ ᠶ᠋ᠢ ᠥᠭᠡᠳᠡ ᠨᠢ ᠠᠪᠴᠤ᠄
— ᠮᠠᠢ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠨᠡᠷᠡ ᠪᠡᠨ ᠬᠠᠷᠠ ᠳᠠ ᠳᠣᠷᠵᠢᠭᠣᠴᠣᠣ! ᠭᠡᠪᠡ᠃
ᠪᠢ ᠵᠢᠭᠰᠠᠭᠠᠯᠲᠠ ᠶ᠋ᠢ ᠭᠠᠷ ᠲᠠᠭᠠᠨ ᠠᠪᠤᠭᠰᠠᠨ ᠦᠭᠡᠢ᠃
— ᠦ ᠮᠢᠨᠦ ᠨᠡᠷᠡ ᠳᠡᠭᠡᠷᠡ ᠡᠴᠡ ᠪᠡᠨ ᠭᠤᠷᠪᠠ ᠳ᠋ᠤ᠌ ᠪᠠᠢᠨᠠ ᠭᠡᠵᠦ ᠳᠠᠭᠤ ᠠᠯᠳᠠᠪᠠ᠃ ᠴᠡᠩᠬᠡᠷ ᠫᠢᠩᠲ᠋ᠸᠦᠲᠦ ᠮᠢᠨᠦ ᠨᠡᠷᠡ ᠶ᠋ᠢ ᠤᠩᠰᠢᠭᠰᠠᠨ ᠢ᠋ᠶ᠋ᠠᠨ᠄
— ᠴᠢ ᠬᠦ ᠨᠡᠷᠡ ᠪᠡᠨ ᠳᠣᠷᠵᠢᠶᠣᠨᠳᠣᠨ ᠭᠡᠬᠦ ᠴᠢᠨᠢ ᠪᠢᠯᠡ᠃ ᠪᠢ ᠡᠨᠳᠡ ᠳᠣᠷᠵᠢᠶᠣᠨᠳᠣᠨ ᠭᠡᠰᠡᠨ ᠨᠡᠷᠡ ᠡᠷᠢᠭᠡᠳ ᠪᠠᠢᠭᠠ ᠶᠤᠮ ᠴᠢᠨᠢ ᠶᠠᠭᠠᠬᠢᠵᠤ ᠳᠣᠷᠵᠢᠪᠠᠯᠳᠠᠨ ᠭᠡᠰᠡᠨ ᠨᠡᠷᠡ ᠶ᠋ᠢ ᠣᠯᠬᠤ ᠶᠤᠮ ᠪᠣᠢ ᠭᠡᠵᠦ ᠤᠴᠠᠭᠠᠷᠯᠠᠪᠠ᠃
ᠳᠣᠷᠵᠢᠭᠣᠲᠤᠪ ᠭᠡᠰᠡᠨ ᠶᠦᠮ ᠰᠠᠨ ᠭᠡᠳ ᠪᠢ ᠳᠣᠣᠷᠠ ᠪᠠᠨ ᠨᠠᠪᠲᠠᠢᠪᠠ᠃
— ᠴᠢᠮᠠ ᠶ᠋ᠢ ᠭᠣᠴᠣᠣᠳᠣᠷᠵᠢ ᠭᠡᠵᠦ ᠬᠡᠯᠡᠭᠰᠡᠭᠡᠷ ᠪᠠᠢᠲᠠᠯᠠ ᠪᠢ ᠳᠣᠵᠣᠣᠳᠣᠷᠵᠢ ᠭᠡᠰᠡᠨ ᠨᠡᠷᠡ ᠡᠷᠢᠭᠡ ᠤᠤ? ᠴᠢ ᠶᠡᠷᠦ ᠨᠢ ᠨᠡᠷᠡ ᠪᠡᠨ ᠶᠠᠩᠵᠤ ᠪᠦᠷᠢ ᠬᠡᠯᠡᠭᠰᠡᠨ ᠬᠠᠮᠢᠭᠠᠰᠢ ᠡᠲᠡᠭᠡᠳ ᠪᠣᠢ?᠁ ᠠᠯᠢᠪ᠂ ᠦᠨᠡᠮᠯᠡᠬᠦ ᠪᠢᠴᠢᠭ ᠪᠠᠢᠳᠠᠭ ᠪᠣᠯ ᠲᠡᠭᠦᠨ ᠢ᠋ ᠪᠡᠨ ᠰᠢᠯᠭᠠᠭᠤᠯ! ᠭᠡᠵᠦ ᠲᠡᠷᠡ ᠰᠦᠷ ᠪᠠᠳᠠᠷᠠᠭᠤᠯᠤᠯᠠ᠃
ᠡᠢᠮᠦ ᠬᠥᠮᠦᠨ ᠲᠡᠢ ᠮᠡᠳᠬᠡᠯᠴᠡᠬᠦ ᠠᠰᠢᠭ ᠦᠭᠡᠢ ᠪᠠᠢᠳᠠᠭ ᠢ᠋ ᠪᠢ ᠭᠠᠳᠠᠷᠯᠠᠬᠤ ᠲᠤᠯᠠ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠤᠭ ᠨᠢ ᠴᠤ᠌ ᠬᠡᠯᠡᠪᠡᠯ ᠬᠡᠯᠡᠮᠡᠷ ᠦᠭᠡ ᠪᠠᠢᠯᠠ᠃ ᠲᠡᠷᠡ ᠪᠡᠷ ᠮᠢᠨᠦ ᠦᠨᠡᠮᠯᠡᠬᠦ ᠶ᠋ᠢ ᠤᠩᠰᠢᠬᠤ ᠪᠢᠰᠢ ᠦᠨᠦᠷᠯᠡᠵᠦ ᠦᠵᠡᠭᠰᠡᠨ ᠢ᠋ᠶ᠋ᠡᠨ ᠨᠠᠳᠠ ᠳ᠋ᠤ᠌ ᠮᠥᠩᠭᠥ ᠥᠭᠬᠦ ᠪᠡᠷ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ ᠮᠥᠩᠭᠥᠨ ᠦ᠌ ᠠᠪᠳᠠᠷᠠ ᠳ᠋ᠤ᠌ ᠲᠦᠯᠬᠢᠭᠦᠷ ᠢ᠋ᠶ᠋ᠡᠨ ᠬᠢᠭᠡᠳ ᠵᠤᠭᠤᠴᠢᠬᠠᠯᠠ᠃ ᠬᠥᠮᠥᠭᠡᠢ ᠵᠠᠭᠤᠨ ᠲᠦᠯᠬᠢᠭᠦᠷ ᠲᠡᠢ ᠪᠡᠨ ᠨᠣᠴᠣᠯᠳᠤᠬᠤ ᠳ᠋ᠠᠭᠠᠨ《 ᠦᠭᠡᠢ ᠡᠢᠮᠦ ᠪᠦᠳᠦᠭᠦᠯᠢᠭ ᠴᠣᠣᠵᠢ ᠪᠠᠢᠳᠠᠭ ᠠ! ᠫᠧᠢ᠂ ᠡᠢᠮᠦ ᠭᠣᠯᠣᠭᠳᠠᠯ ᠲᠦᠯᠬᠢᠭᠦᠷ ᠪᠠᠰᠠ᠁ ᠦᠭᠡᠢ ᠶᠡᠷᠦ ᠶᠠᠭᠤ ᠴᠤ᠌ ᠭᠡᠬᠦ ᠪᠣᠢ ᠳᠠ》 ᠭᠡᠵᠦ ᠴᠥᠬᠦᠷᠡᠩᠭᠦᠢ ᠥᠭᠦᠯᠡᠭᠰᠡᠨ ᠢ᠋ᠶ᠋ᠡᠨ ᠨᠠᠳᠠ ᠳ᠋ᠤ᠌᠄
— ᠡᠭᠦᠨ ᠢ᠋ ᠶᠠᠮᠠᠷ ᠪᠣᠯᠪᠠᠰᠤᠷᠠᠯ ᠦᠭᠡᠢ ᠠᠮᠢᠲᠠᠨ ᠬᠢᠭᠡ ᠪᠣᠯ ᠭᠡᠳ ᠬᠥᠯᠥᠰᠥ ᠪᠡᠨ ᠠᠷᠴᠢᠪᠠ᠃
ᠡᠨᠡ ᠵᠠᠭᠤᠷᠠ ᠨᠠᠳᠠ ᠳ᠋ᠤ᠌ ᠰᠠᠢᠬᠠᠨ ᠴᠡᠩᠬᠡᠷ ᠫᠢᠩᠲ᠋ᠸᠦᠲᠦ ᠶ᠋ᠢ ᠦᠷᠦ ᠡᠪᠡᠳᠬᠦ ᠰᠡᠳᠬᠢᠯ ᠲᠥᠷᠥᠵᠦ ᠲᠤᠰᠠᠯᠠᠬᠤ ᠪᠠᠷ ᠰᠢᠢᠳᠴᠦ᠄
— ᠪᠢ ᠨᠢᠭᠡ ᠣᠷᠣᠯᠳᠣᠭᠠᠳ ᠦᠵᠡᠬᠦ ᠤᠤ? ᠭᠡᠪᠡᠯ ᠲᠡᠷᠡ ᠨᠠᠮᠠ ᠶ᠋ᠢ ᠰᠡᠵᠢᠭᠯᠡᠭᠰᠡᠨ ᠪᠠᠢᠳᠠᠯ ᠲᠠᠢ ᠠᠵᠢᠭᠯᠠᠵᠤ ᠪᠠᠢᠨᠠ᠃ ᠲᠡᠭᠡᠲᠡᠯᠡ ᠤᠲᠠᠰᠤ ᠨᠢ ᠭᠡᠨᠡᠳᠲᠡ ᠳᠡᠰ ᠬᠢᠨ ᠳᠤᠤᠭᠠᠷᠴᠤ ᠪᠢᠳᠡ ᠬᠣᠶᠠᠭᠤᠯᠠ ᠪᠣᠨᠳᠣᠭᠣᠰᠭᠢᠪᠡ᠃ ᠲᠡᠷᠡ ᠤᠲᠠᠰᠤ ᠪᠠᠨ ᠠᠪᠴᠤ ᠴᠢᠩᠨᠠᠭᠠᠳ᠄
— ᠪᠢ ᠤᠤ?᠁ ᠠᠷᠠᠢ ᠴᠤ᠌ ᠨᠢᠷᠪᠠ ᠪᠢᠰᠢ ᠠ᠋᠃ ᠨᠢᠷᠪᠠ ᠠᠮᠠᠷᠠᠭᠰᠠᠨ᠂ ᠮᠥᠩᠭᠥ ᠤᠤ? ᠣᠯᠭᠣᠵᠤ ᠪᠠᠢᠨᠠ᠃ ᠣᠳᠣᠬᠠᠨ ᠳ᠋ᠠᠭᠠᠨ ᠪᠢ ᠴᠤ᠌ ᠣᠯᠭᠣᠵᠤ ᠪᠣᠯᠬᠤ ᠶᠤᠮ᠂ ᠶᠡᠷᠦ ᠨᠢ ᠮᠠᠨ ᠤ᠋ ᠪᠦᠬᠦ ᠬᠠᠷᠢᠭᠤᠴᠠᠯᠭᠠᠲᠠᠨ ᠨᠢᠷᠪᠠ ᠶ᠋ᠢ ᠢᠷᠡᠲᠡᠯᠡ ᠡᠭᠡᠯᠵᠢ ᠪᠡᠷ ᠮᠥᠩᠭᠥ ᠣᠯᠭᠣᠬᠤ ᠶᠤᠮ᠃ ᠬᠡ ᠬᠡ᠂ ᠪᠢ ᠤᠤ? ᠴᠣᠢᠶᠣᠩ! ᠠᠩ? ᠰᠠᠢᠨ! ᠰᠠᠢᠨ ᠪᠠᠢᠨᠠ ᠤᠤ? ᠴᠢ ᠬᠡᠨ ᠪᠣᠢ? ᠦ ᠵᠠᠯᠪᠠᠭᠠ ᠤᠤ? ᠮᠠᠭᠤ ᠬᠥᠭᠰᠢᠨ ᠴᠢᠨᠢ ᠪᠦᠷ ᠨᠢᠷᠪᠠ ᠳᠡᠭᠡᠷᠡ ᠪᠠᠭᠤᠭᠰᠠᠨ ᠰᠢᠦ ᠳᠡ᠃ ᠨᠡᠭᠡᠷᠡᠨ ᠪᠠᠢᠯᠭᠦᠢ ᠶᠠᠭᠠᠬᠢᠬᠤ ᠪᠣᠢ᠃ ᠬᠡ ᠬᠡ᠂ ᠬᠤᠳᠠᠯ ᠠ᠋ ᠬᠤᠳᠠᠯ ᠠ᠋᠂ ᠲᠣᠭᠯᠠᠭᠰᠠᠨ ᠰᠢᠦ ᠳᠡ᠃ ᠠᠷᠠᠢ ᠴᠤ᠌ ᠳᠠ ᠪᠢ ᠪᠠᠰᠠ᠂ ᠬᠠᠷᠢᠨ ᠴᠢ ᠴᠠᠭᠠᠰᠢ ᠨᠢ ᠴᠣᠢᠶᠣᠩ ᠨᠢᠷᠪᠠ ᠪᠣᠯᠤᠭᠰᠠᠨ ᠭᠡᠨᠡ ᠭᠡᠳ ᠪᠢᠲᠡᠭᠡᠢ ᠴᠤᠤᠷᠢᠶᠠᠲᠤᠭᠠᠳ ᠪᠠᠢᠭᠠᠷᠠᠢ᠁ ᠬᠥᠶᠢ ᠵᠠᠯᠪᠠᠭᠠ ᠠ᠋᠂ ᠴᠢ ᠨᠠᠳᠠ ᠳ᠋ᠤ᠌ ᠮᠠᠢᠬᠠᠨ ᠤ᠋ ᠬᠡᠳᠦᠨ ᠮᠣᠳᠣᠨ ᠭᠠᠳᠠᠰᠤ ᠦᠵᠦᠭᠦᠷᠯᠡᠭᠡᠳ ᠥᠭᠭᠦᠭᠡᠴᠢ᠃ ᠶᠠᠭᠠᠬᠢᠬᠤ ᠨᠢ ᠴᠢᠮᠠ ᠳ᠋ᠤ᠌ ᠫᠠᠳ ᠦᠭᠡᠢ᠃ ᠶᠠᠭᠤ? ᠥᠪᠡᠷ ᠢ᠋ᠶ᠋ᠡᠨ ᠦᠵᠦᠭᠦᠷᠯᠡᠪᠡᠯ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ? ᠵᠠ ᠪᠣᠯᠢᠶᠠ ᠳᠠ᠂ ᠠᠷᠠᠢ ᠴᠤ᠌ ᠳᠠ! ᠪᠢ ᠶᠠᠭᠠᠬᠢᠵᠤ ᠭᠠᠳᠠᠰᠤ᠁ ᠮᠡᠳᠡᠭᠡᠵᠢ ᠪᠢ ᠲᠡᠢᠮᠦᠷᠬᠦᠦ ᠠᠵᠢᠯ ᠶᠠᠭᠠᠬᠢᠵᠤ ᠬᠢᠵᠦ ᠰᠠᠭᠤᠬᠤ ᠶᠤᠮ ᠪᠣᠢ᠃ ᠴᠢᠳᠠᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠴᠢ ᠯᠡ ᠬᠥᠭᠰᠢᠨ ᠳ᠋ᠡᠭᠡᠨ ᠲᠤᠰᠠ ᠪᠣᠯ᠃ ᠪᠢ ᠴᠢᠮᠠ ᠶ᠋ᠢ ᠤᠷᠢᠳᠤ ᠰᠠᠢᠨ ᠮᠤᠵᠢᠶᠠᠩ ᠭᠡᠵᠦ ᠮᠠᠨᠳᠤᠭᠤᠯᠵᠤ ᠶᠠᠪᠤᠭᠰᠠᠨ ᠢ᠋ ᠠᠷᠠᠢ ᠮᠠᠷᠲᠠᠭᠠ ᠦᠭᠡᠢ ᠪᠢᠵᠡ ᠂ ᠶᠠᠭᠤ?᠁ ᠦᠭᠡᠢ ᠶᠡᠷᠦ ᠂ ᠴᠢ ᠭᠠᠳᠠᠰᠤ ᠦᠵᠦᠭᠦᠷᠯᠡᠬᠦ ᠦᠭᠡᠢ ᠬᠡᠵᠢᠶᠡ ᠲᠡᠢᠮᠦ ᠯᠤᠲᠤ ᠪᠣᠯᠴᠢᠬᠠᠪᠠ᠃ ᠵᠠ ᠭᠠᠢᠭᠤᠢ ᠴᠤ᠌ ᠶᠤᠮᠰᠠᠨᠵᠠᠢ᠃ ᠶᠡᠬᠡ ᠶᠠᠭᠤᠮᠠ ᠪᠠᠷ ᠪᠣᠭᠣᠵᠤ ᠳᠠ᠂ ᠬᠤᠷᠤᠭᠤᠨ ᠤ᠋ ᠦᠵᠦᠭᠦᠷ ᠢ᠋ᠶ᠋ᠡᠷ ᠪᠦᠲᠦᠭᠡᠬᠦ ᠶᠠᠭᠤᠮᠠ ᠶ᠋ᠢ᠁ ᠪᠢ ᠳᠠᠩᠴᠤ ᠲᠡᠢᠮᠦ ᠠᠵᠢᠯ ᠢ᠋ ᠲᠣᠭᠣᠵᠤ ᠤᠷᠤᠯᠳᠤᠵᠤ ᠶᠠᠪᠤᠭᠰᠠᠨ ᠦᠭᠡᠢ᠃ ᠵᠠ ᠵᠠ ᠪᠣᠯᠢᠶᠠ᠂ ᠪᠣᠯᠢᠶᠠ! ᠦᠭᠡᠢ ᠦᠭᠡᠢ! ᠴᠢᠮᠠ ᠪᠠᠷ ᠬᠢᠯᠭᠡᠬᠦ ᠦᠭᠡᠢ᠃ ᠪᠠᠶᠠᠷᠲᠠᠢ! ᠭᠡᠳ ᠤᠲᠠᠰᠤ ᠪᠠᠨ ᠲᠠᠷ ᠬᠢᠲᠡᠯᠡ ᠰᠢᠲᠠᠪᠠ᠃ ᠬᠡᠯᠡᠮᠡᠭᠳᠡᠭᠰᠡᠨ ᠤᠲᠠᠰᠤ ᠬᠣᠩᠰᠢᠶᠠᠷ ᠤᠷᠤᠭᠤ ᠪᠠᠨ ᠲᠠᠲᠠᠭᠤᠯᠤᠭᠰᠠᠨ ᠨᠣᠬᠠᠢ ᠠᠳᠠᠯᠢ《 ᠭᠠᠩ》 ᠭᠡᠵᠦ ᠭᠠᠰᠠᠯᠤᠭᠠᠳ ᠳᠠᠬᠢᠵᠤ ᠳᠤᠤᠭᠠᠷᠬᠤ ᠪᠠᠷ ᠦᠭᠡᠢ ᠴᠢᠮᠡᠭᠡ ᠲᠠᠰᠤᠷᠠᠪᠠ᠃
ᠴᠡᠩᠬᠡᠷ ᠫᠢᠩᠲ᠋ᠸᠦᠲᠦ ᠨᠠᠳᠠ ᠳ᠋ᠤ᠌᠄
— ᠬᠥᠮᠦᠨ ᠪᠠᠰᠠ ᠬᠠᠴᠢᠨ ᠠ᠋᠂ ᠬᠠᠮᠢᠭᠠ ᠣᠴᠢᠵᠤ ᠮᠣᠳᠣᠨ ᠭᠠᠳᠠᠰᠤ ᠦᠵᠦᠭᠦᠷᠯᠡᠴᠢᠬᠡᠬᠦ ᠬᠥᠮᠦᠨ ᠮᠤᠩᠳᠠᠮᠠᠷ ᠦᠭᠡᠢ ᠰᠠᠨ ᠳᠠ ᠂ ᠬᠥᠭᠡᠷᠦᠬᠦᠢ ᠭᠡᠳ ᠬᠠᠩᠭᠢᠨᠠᠲᠠᠯᠠ ᠰᠠᠨᠠᠭᠠ ᠠᠯᠳᠠᠲᠠᠯᠠ《 ᠶᠠᠭ ᠯᠠ ᠲᠡᠢᠮᠦ ᠬᠥᠮᠦᠰ ᠳᠤᠲᠠᠭᠠᠳ ᠪᠠᠢᠨᠠ》 ᠭᠡᠰᠡᠨ ᠰᠢᠭ ᠮᠥᠩᠭᠥᠨ ᠦ᠌ ᠠᠪᠳᠠᠷᠠ ᠶ᠋ᠢᠨ ᠠᠯᠢ ᠲᠦᠷᠦᠭᠦᠦ ᠲᠦᠭᠵᠢᠶᠡ ᠨᠢ ᠮᠤᠯᠲᠤᠷᠠᠭᠰᠠᠨ ᠯᠤᠵᠢᠷ ᠬᠠᠭᠠᠯᠭᠠ ᠥᠪᠡᠷ ᠢ᠋ᠶ᠋ᠡᠨ ᠠᠯᠭᠤᠷᠬᠠᠨ ᠣᠩᠭᠣᠢᠪᠠ᠃ ᠬᠠᠷᠢᠨ ᠴᠡᠩᠬᠡᠷ ᠲᠣᠯᠣᠭᠠᠢᠲᠤ ᠠᠪᠳᠠᠷᠠ ᠶᠠᠭᠠᠬᠢᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠣᠩᠭᠣᠢᠪᠠ? ᠭᠡᠰᠡᠨ ᠪᠣᠳᠣᠯ ᠣᠷᠣᠭᠰᠠᠨ ᠦᠭᠡᠢ᠂ ᠠᠯᠢᠪᠠ ᠪᠡᠯᠡᠨ ᠵᠠᠯᠠᠨ ᠳ᠋ᠤ᠌ ᠳᠠᠰᠤᠭᠰᠠᠨ ᠵᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠮᠠᠨᠢ ᠬᠥᠮᠦᠨ ᠠᠪᠳᠠᠷᠠ ᠪᠠᠨ ᠰᠤᠭᠤ ᠪᠠᠨ ᠲᠤᠯᠲᠠᠯᠠ ᠰᠦᠢᠯᠡᠭᠰᠡᠨ ᠢ᠋ᠶ᠋ᠡᠨ ᠭᠠᠷ ᠲᠠᠭᠠᠨ ᠮᠥᠩᠭᠥ ᠲᠠᠭᠠᠷᠠᠯᠳᠤᠭᠰᠠᠨ ᠦᠭᠡᠢ ᠳ᠋ᠦ᠍ ᠭᠠᠢᠬᠠᠵᠤ ᠨᠠᠳᠠ ᠤᠷᠤᠭᠤ ᠨᠢᠳᠦ ᠪᠡᠨ ᠲᠣᠪ ᠳᠤᠭᠤᠷᠢᠭᠯᠠᠭᠠᠳ᠄
— ᠪᠢ ᠴᠢᠮᠠ ᠳ᠋ᠤ᠌ ᠮᠥᠩᠭᠥ ᠶ᠋ᠢ ᠴᠢᠨᠢ ᠥᠭᠴᠢᠬᠡᠭᠰᠡᠨ ᠪᠠᠢᠬᠠ ᠠ᠋ ᠭᠡᠬᠦ ᠨᠢ ᠲᠡᠷᠡ᠃ ᠨᠠᠳᠠ ᠳ᠋ᠤ᠌ ᠡᠪ ᠦᠭᠡᠢ ᠰᠣᠨᠢᠨ ᠰᠣᠪᠢᠩ ᠲᠠᠲᠠᠵᠤ᠄
— ᠦᠭᠡᠢ ᠰᠢᠦ᠂ ᠲᠠ ᠨᠠᠳᠠ ᠳ᠋ᠤ᠌ ᠮᠥᠩᠭᠥ ᠥᠭᠭᠦᠭᠡ ᠦᠭᠡᠢ ᠭᠡᠵᠦ ᠰᠠᠨᠳᠤᠷᠪᠠ᠃
— ᠲᠡᠭᠡᠭᠡᠳ ᠡᠨᠡ ᠠᠪᠳᠠᠷᠠ ᠳ᠋ᠤ᠌ ᠰᠠᠶᠢᠬᠠᠨ ᠪᠠᠢᠭᠰᠠᠨ ᠮᠥᠩᠭᠥ ᠶ᠋ᠢ ᠬᠡᠨ ᠠᠪᠴᠢᠬᠠᠪᠠ? ᠭᠡᠳ ᠲᠡᠷᠡ ᠪᠣᠰᠤᠭᠠᠳ ᠢᠷᠡᠯᠡ᠃ ᠪᠢ ᠳᠡᠮᠡᠢ ᠯᠡ᠄
— ᠡᠨᠳᠡ ᠵᠥᠪᠬᠡᠨ ᠲᠠ ᠪᠢᠳᠡ ᠬᠣᠶᠠᠷ ᠯᠠ ᠪᠠᠢᠭᠰᠠᠨ ᠳᠠ ᠭᠡᠪᠡ᠃ ᠲᠡᠷᠡ᠄
— ᠪᠢ ᠶᠠᠭᠤ ᠭᠡᠵᠦ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠮᠥᠩᠭᠥ ᠶ᠋ᠢ ᠬᠤᠯᠠᠭᠠᠢᠯᠠᠬᠤ ᠶᠤᠮ ᠪᠣᠢ? ᠭᠡᠰᠡᠨ ᠢ᠋ᠶ᠋ᠡᠨ ᠨᠢᠭᠡ ᠶ᠋ᠢ ᠰᠠᠨᠠᠵᠤ ᠭᠠᠢᠬᠠᠭᠰᠠᠨ ᠪᠠᠢᠳᠠᠯ ᠲᠠᠢ᠄
— ᠢᠩᠭᠢᠬᠦ ᠳ᠋ᠦ᠍ ᠠᠪᠳᠠᠷᠠ ᠶᠠᠭᠠᠬᠢᠵᠤ ᠣᠩᠭᠣᠢᠭᠰᠠᠨ ᠪᠢᠯᠡ ᠬᠡᠮᠡᠪᠡ᠃
ᠪᠢ ᠳᠣᠲᠣᠷᠠ ᠪᠠᠨ ᠭᠠᠢ ᠶ᠋ᠢᠨ ᠬᠡᠳᠦᠨ ᠲᠦᠭᠦᠷᠡᠭ ᠠᠪᠬᠤ ᠭᠡᠵᠦ ᠶᠠᠪᠤᠵᠤ ᠪᠠᠯᠠᠷᠠᠬᠤ ᠶᠤᠮ ᠪᠢᠰᠢ ᠪᠢᠵᠡ ᠭᠡᠵᠦ ᠪᠣᠳᠣᠩᠭᠠᠨ᠄
— ᠠᠪᠳᠠᠷᠠ ᠥᠪᠡᠷ ᠢ᠋ᠶ᠋ᠡᠨ ᠣᠩᠭᠣᠢᠭᠰᠠᠨ ᠰᠢᠦ ᠳᠡ ᠭᠡᠵᠦ ᠪᠦᠯᠲᠡᠭᠡᠨᠡᠪᠡ᠃
— ᠶᠠᠭᠠᠬᠢᠭᠠᠳ ᠴᠣᠣᠵᠢ ᠲᠠᠢ ᠠᠪᠳᠠᠷᠠ ᠠᠶᠠᠨᠳᠠᠭᠠᠨ ᠣᠩᠭᠣᠢᠪᠠ? ᠭᠡᠳ ᠲᠡᠷᠡ ᠨᠠᠮᠠ ᠶ᠋ᠢ ᠤᠯᠠᠮ ᠰᠢᠷᠳᠡᠯᠡ᠃ ᠮᠢᠨᠦ ᠪᠠᠢᠳᠠᠯ᠂ ᠬᠡᠯᠡᠬᠦ ᠦᠭᠡ ᠦᠭᠡᠢ ᠪᠣᠯᠤᠭᠠᠳ ᠬᠡᠷᠡᠭ ᠢ᠋ᠶ᠋ᠡᠨ ᠬᠦᠯᠢᠶᠡᠬᠦ ᠳ᠋ᠦ᠍ ᠲᠤᠯᠤᠭᠰᠠᠨ ᠬᠥᠮᠦᠨ ᠠᠳᠠᠯᠢ ᠪᠣᠯᠪᠠ᠃ ᠲᠡᠭᠡᠭᠡᠳ ᠬᠡᠢ ᠬᠡᠳᠦ ᠠᠩᠭᠠᠯᠵᠠᠭᠰᠠᠨ ᠢ᠋ᠶ᠋ᠠᠨ᠄
— ᠲᠠᠨ ᠢ᠋ ᠰᠠᠨᠠᠭᠠ ᠠᠯᠳᠠᠬᠤ ᠳ᠋ᠤ᠌ ᠠᠪᠳᠠᠷᠠ ᠥᠪᠡᠷ ᠢ᠋ᠶ᠋ᠡᠨ ᠣᠩᠭᠣᠢᠭᠰᠠᠨ ᠭᠡᠪᠡ᠃
— ᠤᠤᠬᠠᠢ᠂ ᠶᠡᠬᠡ ᠰᠣᠨᠢᠨ ᠬᠡᠷᠡᠭ ᠪᠠᠢᠨᠠ᠂ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠲᠦᠯᠬᠢᠭᠦᠷ ᠢ᠋ᠶ᠋ᠡᠷ ᠣᠩᠭᠣᠢᠯᠭᠠᠭᠠ ᠦᠭᠡᠢ ᠠᠪᠳᠠᠷᠠ ᠨᠠᠮᠠ ᠶ᠋ᠢ ᠰᠠᠨᠠᠭᠠ ᠠᠯᠳᠠᠬᠤ ᠳ᠋ᠤ᠌ ᠣᠩᠭᠣᠢᠭᠰᠠᠨ ᠬᠡᠷᠡᠭ ᠤᠤ? ᠪᠤᠵᠠᠭᠠᠢ ᠤᠬᠠᠭᠠᠨ ᠰᠡᠳᠬᠢᠯ ᠲᠡᠢ ᠠᠪᠳᠠᠷᠠ ᠪᠠᠢᠬᠤ ᠨᠢ ᠠ᠋ ᠭᠡᠳ ᠲᠡᠷᠡ ᠨᠠᠮᠠ ᠶ᠋ᠢ ᠲᠣᠭᠣᠷᠢᠵᠤ ᠰᠢᠨᠵᠢᠭᠰᠡᠨ ᠢ᠋ᠶ᠋ᠡᠨ ᠮᠢᠨᠦ ᠪᠠᠷᠢᠮᠵᠢᠶᠠ ᠢᠲᠡᠭᠡᠯ ᠢ᠋ ᠠᠯᠳᠠᠭᠳᠠᠭᠤᠯᠤᠯᠠ᠃ ᠬᠠᠯᠠᠭᠤᠨ ᠠᠮᠢᠰᠬᠤᠭᠠ ᠰᠢᠯᠢᠨ ᠬᠦᠵᠦᠭᠦᠦ ᠶ᠋ᠢ ᠮᠢᠨᠢ ᠰᠡᠷᠪᠡᠯᠵᠡᠭᠦᠯᠬᠦ ᠳ᠋ᠦ᠍ ᠪᠢ ᠡᠷᠭᠢᠵᠦ ᠬᠠᠷᠠᠵᠤ ᠵᠢᠷᠦᠬᠡᠯᠡᠭᠰᠡᠨ ᠦᠭᠡᠢ᠃ ᠠᠷᠤ ᠳ᠋ᠤ᠌ ᠫᠤᠤ ᠬᠢᠲᠤᠭᠠ ᠬᠣᠶᠠᠷ ᠤ᠋ᠨ ᠠᠯᠢ ᠨᠢᠭᠡ ᠶ᠋ᠢ ᠲᠤᠯᠭᠠᠭᠰᠠᠨ ᠪᠠᠢᠵᠤ ᠪᠣᠯᠵᠣᠰᠢ ᠦᠭᠡᠢ ᠲᠤᠯᠠ ᠠᠶᠤᠭᠰᠠᠨ ᠳ᠋ᠠᠭᠠᠨ ᠴᠡᠴᠡᠷᠡᠵᠦ ᠬᠥᠳᠡᠯᠪᠡᠯ ᠴᠡᠩᠬᠡᠷ ᠫᠢᠩᠲ᠋ᠸᠦᠲᠦ ᠨᠠᠮᠠ ᠶ᠋ᠢ ᠵᠢᠭᠤᠲᠠᠬᠤ ᠨᠢ ᠭᠡᠵᠦ ᠣᠢᠯᠠᠭᠠᠭᠠᠳ ᠤᠭᠤᠴᠠ ᠤᠷᠤᠭᠤ ᠪᠠᠯᠢᠤᠰᠤ ( ᠥᠷᠭᠡᠨ ᠢᠷ ᠲᠡᠢ ᠬᠢᠲᠤᠭᠠ) ᠲᠥᠷᠥᠴᠢᠬᠡᠬᠦ ᠪᠣᠢ ᠭᠡᠰᠡᠨ ᠭᠠᠭᠴᠠᠬᠠᠨ ᠪᠣᠳᠣᠯ ᠲᠣᠯᠣᠭᠠᠢ ᠳ᠋ᠤ᠌ ᠦᠯᠡᠲᠡᠯᠡ᠃
ᠲᠡᠭᠡᠲᠡᠯᠡ ᠠᠷᠤ ᠳ᠋ᠤ᠌ ᠴᠡᠩᠬᠡᠷ ᠫᠢᠩᠲ᠋ᠸᠦᠲᠦ ᠭᠡᠨᠡᠳᠲᠡ《 ᠦ ᠵᠣᠯᠢᠭ》 ᠭᠡᠵᠦ ᠤᠤᠯᠭᠠᠯᠠᠪᠠ᠃ ᠫᠤᠤ ᠨᠢ ᠭᠠᠴᠠᠯᠠ ᠭᠡᠵᠦ ᠪᠣᠳᠣᠭᠠᠳ ᠵᠣᠷᠢᠭᠯᠠᠨ ᠡᠷᠭᠢᠵᠦ ᠬᠠᠷᠠᠪᠠᠯ ᠲᠡᠷᠡ ᠮᠠᠨᠢ ᠦᠨᠡᠨ ᠳ᠋ᠡᠭᠡᠨ ᠭᠠᠷ ᠮᠤᠬᠤᠷ ᠠᠮᠢᠲᠠᠨ ᠪᠠᠢᠵᠠᠢ᠃ ᠲᠡᠷᠡ ᠭᠠᠷ ᠢ᠋ᠶ᠋ᠠᠨ ᠮᠥᠷᠦᠨ ᠳᠡᠭᠡᠷᠡ ᠮᠢᠨᠢ ᠲᠠᠯᠪᠢᠵᠤ ᠰᠤᠷᠮᠠᠭᠠᠢ ᠬᠠᠯᠠᠮᠵᠢᠯᠠᠭᠠᠳ᠄
— ᠪᠢ ᠥᠴᠥᠭᠡᠳᠦᠷ ᠪᠠᠩᠬᠢᠨ ᠠ᠋ᠴᠠ ᠮᠥᠩᠭᠥ ᠠᠪᠬᠤ ᠶᠣᠰᠣᠲᠠᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠣᠳᠣ ᠰᠠᠨᠠᠯᠠ᠂ ᠶᠣ ᠶᠣ ᠳᠣᠲᠣᠷᠠ ᠣᠩᠭᠣᠢᠯᠠ ᠭᠡᠨᠡ᠃
ᠮᠢᠨᠦ ᠴᠤ᠌ ᠳᠣᠲᠣᠷᠠ ᠣᠩᠭᠣᠢᠵᠤ᠄
— ᠲᠠᠨ ᠤ᠋ ᠨᠢᠷᠪᠠ ᠪᠠᠢᠭᠠ ᠦᠭᠡᠢ ᠦᠨᠡᠬᠡᠷ ᠮᠡᠳᠡᠭᠳᠡᠵᠦ ᠪᠠᠢᠨᠠ ᠰᠢᠦ ᠭᠡᠵᠦ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠪᠡᠯ ᠲᠡᠷᠡ ᠪᠠᠶᠠᠷᠯᠠᠨ᠄
— ᠦᠨᠡᠬᠡᠷ ᠮᠡᠳᠡᠭᠳᠡᠵᠦ ᠪᠠᠢᠭᠠ ᠪᠢᠵᠡ ᠭᠡᠳ ᠬᠥᠬᠥᠷᠡᠭᠰᠡᠨ ᠢ᠋ᠶ᠋ᠡᠨ᠄
— ᠤᠭ ᠨᠢ ᠮᠡᠳᠡᠭᠳᠡᠬᠦ ᠯᠡ ᠶᠣᠰᠣᠲᠠᠢ ᠰᠠᠨ ᠭᠡᠳ ᠰᠠᠨᠠᠭᠠ ᠠᠯᠲᠠᠨ ᠪᠠᠭᠠ ᠵᠡᠷᠭᠡ ᠲᠠᠢᠪᠤᠰᠢᠷᠠᠭᠰᠠᠨ ᠶᠠᠩᠵᠤ ᠲᠠᠢ ᠬᠣᠴᠣᠷᠪᠠ᠃
- - - -
① ᠨᠢᠭᠡ ᠲᠦᠷᠦᠯ ᠤᠨ ᠬᠠᠯᠢᠮᠠᠭ ᠦᠰᠦ
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠳᠠᠪᠰᠢᠯᠲᠦ
ᠬᠢᠨᠠᠭ᠍ᠴᠢ : ᠲᠤᠭ᠍ᠴᠢ ᠰᠠᠷᠠᠨᠠ
2023᠂ 10᠂ 8 ᠤ ᠡᠳᠦᠷ