ᠬᠤᠪᠢ ᠪᠠᠨ ᠬᠢᠴᠢᠶᠡᠭᠴᠢ – ᠳᠣᠵᠣᠭᠣᠳᠣᠷᠵᠢ Хувиа хичээгч – Тозгодорж
284ᠬᠤᠪᠢ ᠪᠠᠨ ᠬᠢᠴᠢᠶᠡᠭᠴᠢ
ᠦᠢᠯᠡᠳᠪᠦᠷᠢ ᠶ᠋ᠢᠨ ᠮᠧᠬᠠᠨᠢᠭᠴᠢ ᠴᠡᠮᠪᠡ ᠬᠠᠭᠠᠰ ᠵᠢᠯ ᠦ᠋ᠨ ᠲᠠᠢᠯᠤᠨ ᠤ᠋ ᠬᠤᠷᠠᠯ ᠳᠡᠭᠡᠷᠡ 《 ᠡᠪᠳᠡᠷᠡᠭᠰᠡᠨ ᠬᠡᠮᠬᠡᠷᠡᠭᠰᠡᠨ ᠨᠡᠷᠡᠲᠡᠢ ᠣᠯᠠᠨ ᠶᠠᠩᠵᠤ ᠶ᠋ᠢᠨ ᠰᠠᠦᠷᠢ ᠮᠠᠰᠢᠨ ᠭᠠᠳᠠᠭᠠ ᠬᠠᠰᠢᠶᠠᠨ ᠤ᠋ ᠪᠤᠯᠤᠩ ᠳ᠋ᠤ᠌ ᠬᠣᠭ ᠨᠣᠪᠰᠢ ᠪᠣᠯᠤᠨ ᠬᠡᠪᠲᠡᠭᠰᠡᠭᠡᠷ ᠪᠠᠢᠨᠠ ᠃ ᠮᠠᠨ ᠤ᠋ ᠭᠤᠮᠪᠤᠳᠤᠷᠵᠢ ᠳᠠᠷᠤᠭᠠ ᠠ᠋ᠴᠠ ᠥᠭᠰᠥᠭᠦᠯᠦᠭᠡᠳ ᠤᠯᠤᠰ ᠤ᠋ᠨ ᠡᠨᠡ ᠶᠡᠬᠡ ᠬᠥᠷᠥᠩᠭᠡ ᠶ᠋ᠢ ᠥᠪᠡᠷ ᠦ᠋ᠨ ᠶᠠᠭᠤᠮᠠ ᠰᠢᠭ᠋ ᠥᠭᠡᠳᠡ ᠨᠢ ᠲᠠᠲᠠᠭᠠᠳ ᠠᠪᠴᠢᠬᠤ ᠰᠠᠨᠠᠭᠠ ᠠᠯᠠᠭᠠ᠂ ᠰᠣᠼᠢᠶᠠᠯᠢᠰᠲ ᠥᠮᠴᠢ ᠬᠥᠷᠥᠩᠭᠡ ᠳ᠋ᠦ᠍ ᠡᠨᠡ ᠮᠡᠲᠦ ᠬᠦᠢᠲᠡᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠬᠠᠨᠳᠤᠬᠤ ᠥᠩᠭᠡ ᠲᠡᠢ ᠥᠭᠡᠳᠡ ᠲᠡᠢ ᠡᠴᠡ ᠨᠢ ᠬᠤᠪᠢ ᠳ᠋ᠠᠭᠠᠨ ᠠᠰᠢᠭᠯᠠᠬᠤ ᠶᠠᠪᠤᠳᠠᠯ ᠮᠠᠨ ᠤ᠋ ᠳ᠋ᠤ᠌ ᠶᠡᠷᠦ ᠶ᠋ᠢᠨ ᠦᠵᠡᠭᠳᠡᠯ ᠪᠣᠯᠵᠠᠢ 》᠁ ᠡᠨᠡ ᠲᠡᠷᠡ ᠭᠡᠳ ᠦᠢᠯᠡᠳᠪᠦᠷᠢ ᠶ᠋ᠢᠨ ᠬᠡᠮᠵᠢᠶᠡᠨ ᠳᠡᠭᠡᠷᠡ ᠣᠷᠣᠰᠢᠵᠤ ᠪᠠᠢᠭᠠ ᠳᠤᠲᠠᠭᠳᠠᠯ ᠢ᠋ ᠭᠤᠮᠪᠤᠳᠤᠷᠵᠢ ᠳᠠᠷᠤᠭᠠ ᠶ᠋ᠢᠨ ᠠᠵᠢᠯ ᠤ᠋ᠨ ᠬᠠᠷᠢᠭᠤᠴᠠᠯᠭᠠ ᠲᠠᠢ ᠬᠣᠯᠪᠤᠰᠬᠢᠭᠡᠳ ᠠᠮᠠ ᠬᠠᠯᠠᠭᠰᠠᠨ ᠢ᠋ ᠬᠡᠯᠡᠬᠦ ᠤᠤ ᠰᠢᠭᠦᠮᠵᠢᠯᠡᠵᠦ ᠭᠠᠷᠤᠯᠠ᠃ ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠬᠤᠷᠠᠯ ᠤ᠋ᠨ ᠲᠡᠷᠢᠭᠦᠯᠡᠭᠴᠢᠳ ᠦ᠋ᠨ ᠰᠢᠷᠡᠭᠡᠨ ᠦ᠌ ᠵᠦᠭ ᠡᠴᠡ ᠨᠢᠭᠡ ᠬᠥᠮᠦᠨ ᠴᠢᠩᠭᠠ ᠪᠠᠷ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠬᠤ ᠰᠢᠭ᠋ ᠪᠣᠯᠪᠠ᠃
ᠲᠡᠭᠡᠲᠡᠯᠡ ᠲᠡᠷᠡ ᠨᠢ ᠭᠤᠮᠪᠤᠳᠤᠷᠵᠢ ᠳᠠᠷᠤᠭᠠ ᠪᠠᠢᠯᠠ ᠃ ᠴᠡᠮᠪᠡ ᠡᠭᠦᠨ ᠡᠴᠡ ᠰᠠᠨᠠᠭᠠ ᠠᠪᠴᠤ ᠰᠢᠭᠦᠮᠵᠢᠯᠡᠯ ᠦ᠋ᠨ ᠢ᠋ᠶ᠋ᠡᠨ ᠰᠢᠭᠤᠷᠭᠠᠨ ᠭᠠᠯ ᠢ ᠠᠭᠠᠵᠢᠮ ᠠᠭᠠᠵᠢᠮ ᠢ᠋ᠶ᠋ᠠᠷ ᠵᠥᠭᠡᠯᠡᠷᠡᠭᠦᠯᠬᠦ ᠶ᠋ᠢᠨ ᠵᠡᠷᠭᠡᠴᠡᠭᠡ ᠪᠡᠷ ᠭᠤᠮᠪᠤᠳᠤᠷᠵᠢ ᠳᠠᠷᠤᠭᠠ ᠶ᠋ᠢ ᠨᠢᠳᠦᠨ ᠦ᠌ ᠪᠡᠨ ᠪᠤᠯᠤᠩ ᠢ᠋ᠶ᠋ᠠᠷ ᠰᠡᠮᠬᠡᠨ ᠠᠵᠢᠪᠠᠯ ᠤᠨᠵᠢᠭᠠᠷ ᠤᠷᠲᠤ ᠰᠢᠷᠠ ᠬᠠᠮᠠᠷ ᠨᠢ ᠰᠢᠵᠠᠮᠠ ᠬᠠᠯᠠᠭᠤᠨ ᠤᠰᠤ ᠪᠠᠷ ᠮᠥᠯᠴᠢᠢᠲᠡᠯᠡ ᠤᠬᠢᠶᠠᠭᠰᠠᠨ ᠯᠤᠤᠪᠠᠩ ᠰᠢᠭ᠋ ᠴᠠᠰ ᠤᠯᠠᠭᠠᠨ ᠪᠣᠯᠴᠢᠬᠠᠭᠠᠳ ᠴᠠᠭᠠᠨᠠ ᠪᠠᠨ ᠨᠢᠭᠡ ᠶᠣᠣᠵᠠ ᠮᠠᠭᠤᠲᠠᠢ ᠬᠠᠷᠠᠭᠳᠠᠵᠤ ᠪᠠᠢᠪᠠ᠃
ᠮᠧᠬᠠᠨᠢᠭᠴᠢ ᠴᠡᠮᠪᠡ ᠲᠡᠷᠡ ᠨᠢᠭᠡ ᠭᠠᠢ ᠲᠠᠢ ᠲᠠᠢᠯᠤᠨ ᠤ᠋ ᠬᠤᠷᠠᠯ ᠠ᠋ᠴᠠ ᠬᠣᠢᠰᠢ ᠳᠠᠷᠤᠭᠠ ᠲᠠᠢ ᠪᠠᠨ ᠡᠳᠦᠷ ᠪᠣᠯᠭᠠᠨ ᠵᠠᠷᠢᠮ ᠳ᠋ᠠᠭᠠᠨ ᠬᠡᠳᠦᠨ ᠤᠳᠠᠭᠠ ᠲᠠᠭᠠᠷᠠᠯᠳᠤᠬᠤ ᠠᠪᠠᠴᠤ ᠴᠠᠭᠠᠳᠤᠬᠢ ᠨᠢ ᠬᠠᠷᠠᠭᠰᠠᠨ ᠰᠢᠨᠵᠢ ᠦᠭᠡᠢ ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ ᠬᠥᠮᠥᠰᠬᠡ ᠵᠠᠩᠭᠢᠳᠤᠨ ᠥᠩᠭᠡᠷᠡᠬᠦ ᠪᠣᠯᠤᠭᠰᠠᠨ ᠳ᠋ᠤ᠌ ᠦᠬᠦᠲᠡᠯᠡ ᠪᠡᠨ ᠠᠶᠤᠵᠤ ᠡᠳᠦᠷ ᠨᠢ ᠰᠡᠳᠬᠢᠯ ᠵᠣᠪᠠᠭᠤᠷᠢᠲᠠᠢ᠂ ᠰᠥᠨᠢ ᠨᠢ ᠬᠠᠭᠠᠰ ᠨᠣᠢᠷ ᠲᠠᠢ ᠨᠢᠭᠡ ᠶᠣᠰᠣᠨ ᠳ᠋ᠠᠭᠠᠨ 《 ᠲᠠᠮᠤ ᠶ᠋ᠢᠨ ᠢᠷᠣᠭᠠᠷ 》ᠲᠤ᠌ ᠤᠨᠠᠵᠠᠢ᠃
ᠫᠦᠷᠪᠦ ᠭᠠᠷᠠᠭ ( ᠭᠠᠷᠠᠭ ᠤ᠋ᠨ ᠳᠥᠷᠪᠡᠨ 〉 ᠦᠨ ᠬᠠᠷᠢᠭᠤᠴᠠᠯᠭᠠᠲᠠᠨ ᠤ᠋ ᠰᠢᠭᠤᠷᠬᠠᠢ ᠵᠥᠪᠯᠡᠯᠭᠡᠨ ᠳᠡᠭᠡᠷᠡ 《 ᠴᠡᠮᠪᠡ ᠮᠧᠬᠠᠨᠢᠭᠴᠢ ᠶ᠋ᠢᠨ ᠠᠵᠢᠯ ᠤ᠋ᠨ ᠬᠠᠷᠢᠭᠤᠴᠠᠯᠭᠠ ᠦᠭᠡᠢ ᠡᠴᠡ ᠵᠠᠷᠢᠮ ᠮᠠᠰᠢᠨ ᠨᠤᠭᠤᠳ ᠵᠣᠭᠰᠣᠵᠤ ᠼᠧᠬᠡ ① ᠶ᠋ᠢᠨ ᠳᠠᠮᠵᠢᠭᠤᠯᠭᠠ ᠨᠤᠭᠤᠳ ᠰᠠᠭᠠᠲᠠᠬᠤ ᠳ᠋ᠤ᠌ ᠬᠦᠷᠴᠦ ᠪᠠᠢᠨᠠ ᠂ ᠠᠵᠢᠯ ᠢ᠋ᠶ᠋ᠠᠨ ᠰᠠᠢᠵᠢᠷᠠᠭᠤᠯᠬᠤ ᠦᠭᠡᠢ ᠪᠣᠯ ᠡᠨᠡ ᠨᠥᠬᠥᠷ ᠢ᠋ ᠬᠠᠯᠠᠨᠠ 》 ᠭᠡᠵᠦ ᠭᠤᠮᠪᠤᠳᠤᠷᠵᠢ ᠳᠠᠷᠤᠭᠠ ᠶ᠋ᠢᠨ ᠠᠩᠬᠠᠷᠤᠭᠤᠯᠵᠤ ᠬᠡᠯᠡᠬᠦ ᠳ᠋ᠦ᠍ ᠴᠡᠮᠪᠡ ᠶ᠋ᠢᠨ ᠬᠠᠷᠠ ᠬᠥᠯᠥᠰᠥ ᠨᠢ ᠴᠢᠳᠬᠤᠵᠤ ᠂ ᠲᠣᠯᠣᠭᠠᠢ ᠨᠢ ᠮᠠᠨᠠᠷᠠᠵᠤ ᠠᠷᠠᠢ ᠲᠠᠶ ᠯᠠ ᠤᠬᠠᠭᠠᠨ ᠠᠯᠳᠠᠵᠤ ᠤᠨᠠᠭᠰᠠᠨ ᠦᠭᠡᠢ᠃
ᠴᠡᠮᠪᠡ ᠶ᠋ᠢᠨ ᠪᠡᠶᠡ ᠡᠳᠦᠷ ᠡᠴᠡ ᠡᠳᠦᠷ ᠢᠷᠡᠬᠦ ᠳᠣᠳᠣᠮ ᠰᠤᠯᠠᠷᠠᠭᠠᠳ᠂ ᠬᠤᠭᠤᠯᠠ ᠤᠮᠳᠠ ᠠ᠋ᠴᠠ ᠭᠠᠷᠴᠤ ᠬᠣᠶᠠᠷ ᠨᠢᠳᠦᠨ ᠦ᠌ ᠬᠢᠨᠢ ᠭᠠᠯ ᠤᠨᠲᠠᠷᠠᠵᠤ ᠬᠣᠩᠬᠣᠢᠲᠠᠯᠠ ᠰᠢᠷᠭᠢᠵᠡᠢ᠃ ᠤᠳᠠᠯ ᠦᠭᠡᠢ ᠴᠡᠮᠪᠡ ᠶ᠋ᠢᠨ ᠡᠷᠡᠭᠦᠯ ᠮᠡᠨᠳᠦ ᠡᠷᠡᠰ ᠳᠣᠣᠷᠠᠳᠠᠵᠤ ᠠᠷᠭᠠ ᠪᠠᠨ ᠪᠠᠷᠠᠭᠠᠳ《 ᠲᠦᠷᠭᠡᠨ ᠲᠤᠰᠠᠯᠠᠮᠵᠢ 》 ᠳᠠᠭᠤᠳᠠᠭᠤᠯᠤᠨ ᠠᠮᠢᠰᠬᠤᠭᠠ ᠲᠠᠢ ᠠᠮᠢᠰᠬᠤᠭᠠ ᠦᠭᠡᠢ ᠬᠣᠶᠠᠷ ᠤ᠋ᠨ ᠳᠤᠮᠳᠠ ᠡᠮᠨᠡᠯᠭᠡ ᠳ᠋ᠦ᠍ ᠬᠥᠷᠭᠡᠭᠦᠯᠪᠡᠯ 《ᠲᠠᠨ ᠦ ᠴᠢᠰᠤᠨ ᠳᠠᠷᠤᠯᠲᠠ ᠬᠡᠳᠦ ᠶᠡᠬᠡᠰᠴᠡᠢ ᠂ ᠡᠮ ᠤᠤᠭᠤ ᠂ ᠲᠠᠷᠢᠶᠠ ᠬᠢᠯᠭᠡ ᠂ ᠠᠭᠤᠷᠯᠠᠵᠤ ᠪᠣᠬᠢᠮᠳᠠᠵᠦ ᠪᠣᠯᠬᠤ ᠦᠭᠡᠢ ᠂ ᠬᠠᠮᠤᠭ ᠤ᠋ᠨ ᠭᠣᠣᠯ ᠨᠢ ᠰᠡᠳᠬᠢᠯ ᠲᠠᠢᠪᠤᠩ ᠪᠠᠢᠬᠤ ᠬᠡᠷᠡᠭᠲᠡᠢ 》 ᠭᠡᠵᠦ ᠵᠥᠪᠯᠡᠵᠡᠢ᠃
ᠴᠡᠮᠪᠡ ᠡᠭᠦᠨ ᠡᠴᠡ ᠬᠣᠢᠰᠢ ᠡᠷᠡᠭᠦᠯ ᠶᠠᠪᠤᠬᠤ ᠠ᠋ᠴᠠ ᠡᠷᠬᠢᠮ ᠵᠦᠢᠯ ᠪᠠᠢᠬᠤ ᠦᠭᠡᠢ ᠶᠦᠮ ᠭᠡᠵᠦ ᠪᠣᠳᠣᠭᠠᠳ ᠡᠨᠡ ᠲᠡᠷᠡ ᠰᠢᠭᠦᠮᠵᠢᠯᠡᠯ ᠲᠠᠯᠪᠢᠬᠤ ᠪᠠᠨ ᠪᠦᠷᠢᠮᠦᠰᠦᠨ ᠵᠣᠭᠰᠣᠵᠤ ᠬᠠᠷᠢᠨ ᠬᠤᠷᠠᠯ ᠴᠤᠭᠯᠠᠭᠠᠨ ᠪᠣᠯᠪᠠᠯ ᠳᠠᠷᠤᠭᠠ ᠨᠠᠷ ᠢ᠋ᠶ᠋ᠠᠨ ᠰᠠᠨᠰᠠᠷ ᠲᠤ᠌ ᠭᠠᠷᠲᠠᠯᠠ ᠮᠠᠭᠲᠠᠳᠠᠭ 《 ᠰᠠᠢᠬᠠᠨ ᠵᠠᠩᠰᠢᠯ 》 ᠲᠠᠶ ᠪᠣᠯᠪᠠ ᠃ ᠲᠡᠷᠡ ᠴᠤ ᠪᠠᠢᠲᠤᠭᠠᠢ ᠨᠢᠭᠡᠳᠦᠯ ᠦ᠋ᠨ ᠬᠡᠮᠵᠢᠶᠡᠨ ᠦ᠌ ᠦᠢᠯᠡᠳᠪᠦᠷᠢ ᠶ᠋ᠢᠨ ᠪᠦᠬᠦ ᠠᠵᠢᠯᠴᠢᠳ ᠴᠤᠭᠯᠠᠷᠠᠭᠰᠠᠨ ᠲᠣᠮᠣᠬᠠᠨ ᠬᠤᠷᠠᠯ ᠳᠡᠭᠡᠷᠡ ᠪᠣᠰᠤᠭᠠᠳ 《 ᠮᠠᠨ ᠤ᠋ ᠦᠢᠯᠡᠳᠪᠦᠷᠢ ᠶ᠋ᠢᠨ ᠳᠠᠷᠤᠭᠠ ᠭᠤᠮᠪᠤᠳᠤᠷᠵᠢ ᠭᠤᠸᠠᠢ ᠪᠣᠯ ᠰᠣᠼᠢᠶᠠᠯᠢᠰᠲ ᠥᠮᠴᠢ ᠶ᠋ᠢ ᠬᠠᠢᠷᠠᠯᠠᠨ ᠬᠠᠮᠠᠭᠠᠯᠠᠭᠴᠢ ᠂ ᠠᠷᠪᠢᠵᠢᠭᠤᠯᠠ ᠪᠠᠶᠠᠵᠢᠭᠤᠯᠤᠭᠴᠢ ᠂ ᠶᠡᠷᠦ ᠨᠢ ᠪᠦᠬᠦ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠠᠷᠢᠯᠭᠠᠭᠰᠠᠨ ᠰᠣᠩᠭᠢᠨᠠ ᠰᠢᠭ᠋ ᠴᠠᠪᠡᠷ ᠂ ᠤᠰᠤᠨ ᠪᠣᠯᠣᠷ ᠰᠢᠭ᠋ ᠲᠣᠪ ᠲᠤᠩᠭᠠᠯᠠᠭ ᠂ ᠥᠨᠳᠡᠭᠡ ᠰᠢᠭ ᠦ ᠦᠭᠡᠢ ᠂ ᠲᠡᠷᠢᠭᠦᠨ ᠦ᠌ ᠤᠬᠠᠮᠰᠠᠷ ᠲᠠᠢ ᠂ ᠵᠣᠷᠢᠭᠵᠢᠭᠤᠯᠤᠨ ᠵᠣᠬᠢᠶᠠᠨ ᠪᠠᠢᠭᠤᠯᠬᠤ ᠴᠢᠳᠠᠯ ᠲᠠᠢ ᠬᠥᠮᠦᠨ ᠮᠥᠨ 》 ᠭᠡᠳ ᠠᠮᠠᠨ ᠳ᠋ᠠᠭᠠᠨ ᠣᠷᠣᠭᠰᠠᠨ ᠪᠦᠬᠦᠨ ᠢ ᠬᠠᠷᠠᠮ ᠦᠭᠡᠢ ᠠᠢᠯᠠᠳᠴᠤ ᠭᠠᠷᠪᠠ᠃
ᠴᠠᠮᠪᠠ ᠲᠡᠢᠨ ᠬᠦ ᠲᠡᠭᠷᠢ ᠲᠤᠯᠲᠠᠯᠠ ᠮᠠᠭᠲᠠᠵᠤ ᠪᠠᠢᠬᠤ ᠳ᠋ᠠᠭᠠᠨ ᠨᠢᠳᠦᠨ ᠦ ᠪᠤᠯᠤᠩ ᠢᠶᠠᠷ ᠰᠡᠮᠬᠡᠨ ᠠᠵᠢᠪᠠᠯ ᠭᠣᠮᠪᠣᠳᠣᠷᠵᠢ ᠳᠠᠷᠤᠭᠠ ᠶᠢᠨ ᠤᠨᠵᠢᠭᠠᠷ ᠤᠷᠲᠤ ᠰᠢᠷᠠ ᠬᠠᠮᠠᠷ ᠤᠯᠠᠢᠭᠰᠠᠨ ᠦᠭᠡᠢ ᠬᠠᠷᠢᠨ ᠥᠩᠭᠡ ᠲᠡᠢ ᠪᠣᠯ ᠥᠩᠭᠡᠲᠡᠢ᠂ ᠣᠯᠠᠨ ᠵᠠᠭᠤᠨ ᠬᠠᠮᠠᠷ ᠳᠤᠮᠳᠠ ᠠ᠋ᠴᠠ ᠲᠣᠳᠣ ᠠ᠋ᠴᠠ ᠲᠣᠳᠣ ᠬᠤᠷᠴᠠ ᠡᠴᠡ ᠬᠤᠷᠴᠠ ᠭᠡᠷᠡᠯᠲᠦᠵᠦ ᠪᠠᠢᠪᠠ᠃
ᠴᠠᠮᠪᠠ 《 ᠬᠠᠰᠢᠷ ᠰᠠᠭᠤᠵᠤ 》 ᠰᠡᠭᠦᠯ ᠦᠨ ᠬᠣᠶᠠᠷ ᠭᠤᠷᠪᠠᠨ ᠵᠢᠯ ᠦᠨ ᠲᠤᠷᠰᠢ ᠠᠮᠠ ᠠᠩᠭᠠᠢᠬᠤ ᠵᠠᠪᠰᠢᠶᠠᠨ ᠭᠠᠷᠪᠠᠯ ᠭᠣᠮᠪᠣᠳᠣᠷᠵᠢ ᠲᠥᠷᠥᠬᠦᠦ ᠲᠠᠢ ᠳᠠᠷᠤᠭᠠ ᠨᠠᠷ ᠢ᠋ᠶ᠋ᠠᠨ ᠮᠠᠭᠲᠠᠭᠰᠠᠭᠠᠷ ᠪᠠᠢᠭᠠᠳ ᠠᠵᠢᠯ ᠬᠤᠨᠠᠷ ᠨᠢ ᠠᠯᠬᠤᠮ ᠳᠣᠳᠣᠮ ᠢ᠋ᠶ᠋ᠠᠨ ᠦᠨᠡᠯᠡᠭᠳᠡᠵᠦ᠂ ᠴᠢᠰᠤᠨ ᠳᠠᠷᠤᠯᠲᠠ ᠨᠢ ᠬᠡᠪ ᠲᠡᠭᠡᠨ ᠣᠷᠣᠵᠤ ᠪᠡᠶᠡ ᠨᠢ ᠤᠷᠢᠳᠤ ᠤᠷᠢᠳᠤ ᠶ᠋ᠢᠨ ᠡᠴᠡ ᠪᠡᠨ ᠰᠠᠢᠵᠢᠷᠠᠭᠰᠠᠨ ᠭᠡᠨᠡ ᠯᠡ ᠳᠡ᠃
《 ᠤᠭ ᠨᠢ ᠭᠠᠳᠠᠭᠠ ᠬᠠᠰᠢᠶᠠᠨ ᠳ᠋ᠤ᠌ ᠬᠡᠪᠲᠡᠵᠦ ᠪᠠᠢᠭᠠ ᠬᠡᠳᠦᠨ ᠰᠠᠶᠠ ᠲᠥᠭᠥᠷᠢᠭ ᠦ᠋ᠨ ᠦᠨᠡᠲᠡᠢ ᠮᠠᠰᠢᠨ ᠨᠤᠭᠤᠳ ᠠ᠋ᠴᠠ ᠭᠠᠭᠴᠠ ᠨᠢᠭᠡ ᠶ᠋ᠢ ᠨᠢ ᠴᠦ᠍ ᠪᠣᠯᠤᠭᠰᠠᠨ ᠵᠠᠰᠠᠭᠤᠯᠵᠤ ᠠᠪᠤᠶᠠ ᠭᠡᠵᠦ ᠠᠩᠬᠠ ᠰᠢᠭᠦᠮᠵᠢᠯᠡᠭᠰᠡᠨ ᠶᠦᠮ᠃ ᠲᠡᠭᠡᠯᠡ ᠭᠡᠳ ᠠᠷᠠᠢ ᠲᠠᠢ ᠯᠠ ᠲᠠᠯᠬᠠ ᠠ᠋ᠴᠠ ᠮᠢᠨᠢ ᠰᠠᠯᠭᠠᠴᠢᠬᠠᠭᠰᠠᠨ ᠦᠭᠡᠢ᠃ ᠠᠮᠠ ᠪᠠᠨ ᠬᠠᠮᠬᠢᠵᠤ ᠬᠤᠪᠢ ᠪᠠᠨ ᠬᠢᠴᠢᠶᠡᠰᠬᠢᠭᠡᠳ ᠴᠢᠰᠤᠨ ᠤ᠋ ᠪᠠᠨ ᠳᠠᠷᠤᠯᠲᠠ ᠶ᠋ᠢ ᠬᠡᠪ ᠲᠦ᠋ᠨᠢ ᠪᠠᠢᠯᠭᠠᠵᠤ ᠶᠠᠪᠤᠶᠠ 》 ᠭᠡᠳ ᠴᠡᠮᠪᠡ ᠮᠧᠬᠠᠨᠢᠭᠴᠢ ᠡᠢᠨ ᠬᠦ《 ᠰᠠᠢᠬᠠᠨ ᠵᠠᠩᠰᠢᠯ ᠲᠠᠢ 》 ᠪᠣᠯᠤᠭᠰᠠᠨ ᠶᠤᠮ ᠰᠠᠨᠵᠠᠢ᠃
– – – –
① ᠦᠢᠯᠡᠳᠪᠦᠷᠢ ᠶᠢᠨ ᠠᠵᠢᠯ ᠤᠨ ᠳᠠᠰᠤᠭ
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃