ᠬᠠᠶᠠᠭᠳᠠᠯ – ᠳ ᠂ ᠳᠠᠸᠠᠨᠢᠮᠠ Хаягдал – Д ᠂ Давааням
236ᠬᠠᠶᠠᠭᠳᠠᠯ
( ᠬᠣᠱᠣᠩ ᠥᠭᠦᠯᠡᠯᠭᠡ )
ᠨᠢᠭᠡᠳᠦᠯ ᠦ᠋ᠨ ᠳᠠᠷᠤᠭᠠ ᠯᠣᠪᠣᠢ ᠥᠷᠯᠥᠭᠡ ᠠᠵᠢᠯ ᠳ᠋ᠠᠭᠠᠨ ᠢᠷᠡᠩᠭᠦᠲᠡ ᠠᠵᠤ ᠠᠬᠤᠢ ᠶ᠋ᠢᠨ ᠡᠷᠬᠢᠯᠡᠭᠴᠢ ᠵᠠᠬᠳᠠ ᠶ᠋ᠢ ᠳᠠᠭᠤᠳᠠᠭᠤᠯᠪᠠ᠃ ᠤᠳᠠᠭᠰᠠᠨ ᠴᠤ᠌ ᠦᠭᠡᠢ ᠵᠠᠬᠳᠠ ᠣᠷᠣᠵᠤ ᠢᠷᠡᠭᠡᠳ ᠰᠤᠷᠤᠭᠰᠠᠨ ᠵᠠᠩᠰᠢᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠭᠠᠯᠭᠠᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠨᠣᠮᠣᠬᠠᠨ ᠵᠣᠭᠰᠣᠵᠤ ᠮᠠᠯᠠᠭᠠᠢ ᠪᠠᠨ ᠠᠪᠤᠪᠠ᠃ ᠳᠠᠷᠤᠭᠠ ᠯᠣᠪᠣᠢ ᠤᠷᠲᠤ ᠰᠢᠯᠪᠢ ᠲᠡᠢ ᠲᠠᠮᠠᠬᠢ ᠶᠠᠭᠠᠷᠠᠯ ᠦᠭᠡᠢᠬᠡᠨ ᠰᠣᠷᠣᠵᠤ ᠵᠠᠬᠳᠠ ᠳ᠋ᠤ᠌ ᠰᠠᠭᠤ ᠭᠡᠰᠡᠨ ᠳᠣᠬᠢᠶᠠ ᠦᠭᠬᠦᠯᠡ᠃
– ᠴᠢᠮᠠ ᠶ᠋ᠢ ᠳᠠᠭᠤᠳᠠᠭᠰᠠᠨ ᠤᠴᠢᠷ ᠪᠣᠯ ᠰᠤᠷᠭᠠᠭᠤᠯᠢ ᠶ᠋ᠢᠨ ᠴᠠᠭᠠᠨᠠ ᠪᠠᠢᠭᠠ ᠬᠠᠰᠢᠶᠠᠨ ᠤ᠋ 《 ᠬᠣᠭ》 ᠢ᠋ ᠮᠠᠷᠭᠠᠰᠢ ᠥᠷᠯᠥᠭᠡ ᠴᠡᠪᠡᠷᠯᠡᠭᠦᠯᠦᠭᠰᠡᠨ ᠪᠠᠢᠬᠤ ᠬᠡᠷᠡᠭᠲᠡᠢ ᠶ᠋ᠢ ᠡᠭᠦᠷᠭᠡ ᠪᠣᠯᠭᠠᠬᠤ ᠭᠡᠰᠡᠨ ᠶᠦᠮ᠃ ᠨᠥᠭᠥᠭᠡᠳᠦᠷ ᠥᠷᠯᠥᠭᠡ ᠰᠢᠯᠭᠠᠯᠲᠠ ᠢᠷᠡᠨᠡ ᠭᠡᠳᠡᠭ ᠢ᠋ ᠴᠠᠭᠠᠳᠤᠭᠤᠯᠠ ᠳ᠋ᠠᠭᠠᠨ ᠬᠡᠯᠡ ᠭᠡᠬᠦ ᠳ᠋ᠦ᠍ ᠵᠠᠬᠳᠠ ᠦᠯᠦ ᠮᠡᠳᠡᠭ ᠥᠨᠳᠡᠢᠰᠬᠢᠭᠰᠡᠨ ᠢ᠋ᠶ᠋ᠡᠨ ᠳᠠᠷᠤᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠷᠠᠴᠠ ᠠ᠋ᠴᠠ ᠲᠠᠯᠲᠠᠷᠢᠵᠤ ᠨᠠᠪᠲᠠᠰᠬᠢᠪᠡ᠃
– ᠵᠠ ᠥᠭᠡᠷᠡ ᠶᠠᠭᠤᠮᠠ ᠦᠭᠡᠢ ᠁ ᠠᠰᠠᠭᠤᠬᠤ ᠶᠠᠭᠤᠮᠠ ᠪᠠᠢᠨᠠ ᠤᠤ ᠭᠡᠵᠦ ᠯᠣᠪᠣᠢ ᠬᠡᠯᠡᠬᠦ ᠳ᠋ᠦ᠍ ᠵᠠᠬᠳᠠ᠄
– ᠲᠠᠨ ᠤ᠋ ᠬᠡᠯᠡᠭᠰᠡᠨ ᠪᠦᠭᠦᠳᠡ ᠶ᠋ᠢ ᠣᠢᠯᠠᠭᠠᠯᠠ᠂ ᠪᠡᠶᠡᠯᠡᠭᠦᠯᠦᠶᠡ ᠭᠡᠳ ᠳᠠᠷᠤᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠥᠷᠥᠭᠡᠨ ᠡᠴᠡ ᠭᠠᠷᠤᠭᠰᠠᠨ ᠬᠣᠢᠨᠠ ᠰᠠᠶᠢ ᠰᠡᠭᠡᠭᠡ ᠠᠪᠴᠤ《 ᠰᠢᠯᠭᠠᠯᠲᠠ ᠢᠷᠡᠬᠦ ᠶ᠋ᠢ ᠡᠷᠲᠡᠨ ᠡᠴᠡ ᠬᠡᠯᠡᠬᠦ ᠨᠢ ᠶᠠᠭᠠᠬᠢᠪᠠ ᠳᠠ》 ᠭᠡᠰᠡᠨ ᠢ᠋ᠶ᠋ᠡᠨ ᠰᠤᠷᠭᠠᠭᠤᠯᠢ ᠶ᠋ᠢᠨ ᠴᠠᠭᠠᠨᠠ ᠪᠠᠢᠭᠠ ᠬᠠᠰᠢᠶᠠᠨ ᠤ᠋《 ᠬᠣᠭ》 ᠴᠣᠬᠣᠮ ᠳ᠋ᠠᠭᠠᠨ ᠮᠠᠨ ᠤ᠋ ᠠᠵᠤ ᠠᠬᠤᠢ ᠲᠠᠢ ᠬᠣᠯᠪᠣᠭᠳᠠᠬᠤ ᠤᠴᠢᠷ ᠦᠭᠡᠢ ᠶᠦᠮ᠂ ᠮᠠᠯ ᠡᠮᠨᠡᠯᠭᠡ ᠨᠢᠳᠤᠨᠤᠨ ᠮᠠᠰᠢᠨ ᠨᠤᠭᠤᠳ ᠢ᠋ᠶ᠋ᠠᠨ ᠲᠡᠨᠳᠡ ᠲᠠᠯᠪᠢᠳᠠᠭ ᠪᠣᠯᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠤᠤᠯ ᠬᠣᠭ ᠡᠭᠦᠰᠦᠭᠰᠡᠨ ᠰᠢᠦ ᠭᠡᠵᠦ ᠪᠣᠳᠣᠨ ᠥᠭᠦᠯᠡᠵᠦ ᠶᠠᠪᠤᠪᠠ᠃ ᠮᠠᠯ ᠡᠮᠨᠡᠯᠭᠡ ᠶ᠋ᠢᠨ ᠰᠠᠯᠨᠪᠤᠷᠢ ᠶ᠋ᠢᠨ ᠡᠷᠬᠢᠯᠡᠭᠴᠢ ᠪᠡᠭᠵᠢ᠄
– ᠮᠠᠨ ᠤ᠋ ᠬᠢ ᠶ᠋ᠢ ᠠᠰᠢᠭᠯᠠᠬᠤ ᠡᠴᠡ ᠡᠮᠦᠨᠡ ᠲᠡᠷᠡ ᠬᠠᠰᠢᠶᠠ ᠴᠢᠨᠢ《 ᠮᠠᠰᠢᠨ ᠤ᠋ ᠰᠡᠭᠡᠷ》 ᠳᠦᠭᠦᠷᠡᠩ ᠪᠠᠢᠭᠰᠠᠨ᠂ ᠲᠡᠭᠡᠬᠦ ᠪᠡᠷ ᠡᠨᠡ ᠬᠣᠭ ᠮᠠᠨ ᠤ᠋ ᠪᠠᠢᠭᠤᠯᠭᠠ ᠳ᠋ᠤ᠌ ᠬᠠᠮᠢᠶᠠ ᠦᠭᠡᠢ ᠶᠦᠮ ᠭᠡᠵᠦ ᠡᠷᠡᠰᠬᠡᠨ ᠬᠡᠯᠡᠪᠡ᠃
ᠪᠦᠬᠦ ᠨᠡᠢᠲᠡ ᠶ᠋ᠢᠨ ᠰᠦᠪᠪᠤᠲ᠋ᠨᠢᠺ ① ᠵᠠᠷᠯᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠪᠦᠲᠦᠨ ᠬᠠᠭᠠᠰ ᠴᠠᠭ ᠤ᠋ᠨ ᠳᠠᠷᠠᠭᠠ ᠬᠥᠮᠦᠰ ᠤᠪᠤᠨ ᠴᠤᠪᠤᠭᠰᠠᠭᠠᠷ ᠰᠦᠪᠪᠤᠲ᠋ᠨᠢᠺ ᠵᠢᠭᠳᠡᠷᠡᠪᠡ᠃ ᠵᠠᠷᠢᠮ ᠵᠢᠯᠣᠭᠣᠴᠢ ᠶ᠋ᠢᠨ ᠲᠣᠳᠣᠷᠬᠠᠢᠯᠠᠵᠤ ᠪᠠᠢᠭᠰᠠᠨ《 ᠶᠠᠮᠠᠷ ᠴᠤ᠌ ᠬᠡᠷᠡᠭ ᠦᠭᠡᠢ ᠪᠣᠯᠤᠭᠰᠠᠨ》 ᠡᠷᠭᠢ᠂ ᠪᠣᠭᠣᠯᠲᠠ᠂ ᠮᠣᠲ᠋ᠣᠷ( ᠬᠥᠳᠡᠯᠭᠡᠭᠦᠷ)᠂ ᠳᠤᠭᠤᠢ ᠶᠠᠩᠵᠤ ᠶᠠᠩᠵᠤ ᠶ᠋ᠢᠨ ᠮᠠᠷᠺ ᠲᠡᠮᠳᠡᠭᠲᠦ ᠶ᠋ᠢᠨ ᠮᠠᠰᠢᠨ᠂ ᠲᠷᠠᠺᠲ᠋ᠣᠷ ᠤ᠋ᠨ ᠬᠡᠷᠡᠭᠰᠡᠯ ᠵᠦᠢᠯ ᠪᠦᠷᠢ ᠶ᠋ᠢᠨ ᠬᠣᠭ ᠢ᠋ ᠴᠡᠪᠡᠷᠯᠡᠬᠦ ᠳ᠋ᠦ᠍ ᠶᠡᠬᠡᠬᠡᠨ ᠬᠥᠳᠡᠯᠮᠦᠷᠢ ᠴᠠᠭ ᠵᠠᠷᠤᠴᠠᠭᠤᠯᠤᠨ ᠬᠣᠶᠠᠷ ᠮᠠᠰᠢᠨ ᠳ᠋ᠤ᠌ ᠠᠷᠠᠢᠬᠠᠨ ᠪᠠᠭᠲᠠᠭᠠᠵᠤ ᠬᠣᠩᠬᠣᠷ ᠤ᠋ᠨ ᠬᠣᠭ ᠳᠡᠭᠡᠷᠡ ᠠᠰᠬᠠᠭᠤᠯᠤᠭᠰᠠᠨ ᠢ᠋ᠶ᠋ᠠᠷ ᠵᠠᠭᠳᠠ ᠶ᠋ᠢᠨ ᠰᠠᠨᠠᠭᠠ ᠠᠮᠠᠷᠠᠵᠤ ᠪᠡᠭᠵᠢ ᠬᠠᠨᠴᠤᠢ ᠳᠣᠲᠣᠷᠠ ᠪᠠᠨ ᠵᠠᠯᠪᠠᠷᠢᠵᠠᠢ᠃ ᠡᠯᠡ ᠶᠠᠪᠤᠳᠠᠯ ᠠ᠋ᠴᠠ ᠬᠣᠢᠰᠢ ᠬᠣᠩᠬᠣᠷ ᠤ᠋ᠨ ᠬᠣᠭ ᠠ᠋ᠴᠠ ᠺᠢᠨᠣ᠋ ᠮᠸᠬᠠᠨᠢᠭᠴᠢ ᠮᠡᠷᠭᠡᠵᠢᠯᠲᠡᠨ ᡀᠠᠭᠮᠰᠦ᠋ᠷᠦᠩ᠂ ᠡᠳ᠋ ᠦ᠋ᠨ ᠵᠠᠰᠠᠭᠴᠢ ᠳᠡᠮᠪᠡᠷᠡᠯ ᠨᠠᠷ ᠵᠠᠷᠢᠮ ᠵᠢᠯᠣᠭᠣᠴᠢ ᠨᠠᠷ ᠤ᠋ᠨ《 ᠶᠠᠮᠠᠷ ᠴᠤ᠌ ᠬᠡᠷᠡᠭᠴᠡᠭᠡ ᠦᠭᠡᠢ》 ᠭᠡᠵᠦ ᠪᠠᠢᠭᠰᠠᠨ《 ᠬᠣᠭ》 ᠢ᠋ ᠴᠤᠭᠯᠠᠭᠤᠯᠵᠤ ᠮᠠᠰᠢᠨ ᠪᠤᠰᠬᠠᠬᠤ ᠭᠡᠨᠡ ᠭᠡᠰᠡᠨ ᠶᠠᠷᠢᠶᠠ ᠰᠤᠮᠤ ᠪᠠᠷᠢᠭᠠᠳᠠ ᠪᠠᠷ ᠲᠠᠷᠬᠠᠵᠤ ᠵᠠᠭᠳᠠ᠂ ᠪᠡᠭᠵᠢ ᠬᠣᠶᠠᠷ ᠡᠪᠡᠷᠳᠡᠢ ᠲᠠᠤᠯᠠᠢ ᠦᠵᠡᠭᠰᠡᠨ ᠶᠦᠮ ᠰᠢᠭ ᠪᠣᠯᠪᠠ᠃
– ᠮᠠᠰᠢᠨ ᠤ᠋ ᠪᠠᠨ ᠰᠡᠯᠪᠢᠭ ᠬᠡᠷᠡᠭᠰᠡᠯ ᠢ᠋ ᠬᠡᠨ ᠠᠩᠬᠠ ᠬᠠᠶᠠᠭᠰᠠᠨ ᠢ᠋ ᠲᠣᠳᠣᠷᠬᠠᠢᠯᠠᠵᠤ ᠣᠯᠤᠭᠠᠳ ᠲᠡᠳᠡᠨ ᠦ᠌ ᠬᠣᠭ ᠠ᠋ᠴᠠ ᠮᠠᠰᠢᠨ ᠪᠤᠰᠬᠠᠭᠰᠠᠨ ᠤᠴᠢᠷ《 ᠬᠣᠭ》 ᠤ᠋ᠨ ᠡᠵᠡᠨ ᠳ᠋ᠦ᠍ᠨᠢ ᠮᠠᠰᠢᠨ ᠢ᠋ᠶ᠋ᠠᠨ ᠥᠭᠭᠦᠨᠡ ᠭᠡᠵᠦ ᡀᠠᠭᠮᠰᠦ᠋ᠷᠦᠩ᠂ ᠳᠡᠮᠪᠡᠷᠡᠯ ᠬᠣᠶᠠᠷ ᠶᠠᠷᠢᠵᠤ ᠪᠠᠢᠨᠠ ᠪᠢᠯᠡ ᠭᠡᠰᠡᠨ ᠬᠡᠨ ᠨᠢᠭᠡ ᠬᠥᠮᠦᠨ ᠦ᠌ ᠴᠤᠤ ᠦᠭᠡ ᠠᠮᠠ ᠳᠠᠮᠵᠢᠭᠰᠠᠭᠠᠷ ᠵᠠᠭᠳᠠ᠂ ᠪᠡᠭᠵᠢ ᠬᠣᠶᠠᠷ ᠤ᠋ᠨ ᠰᠣᠨᠣᠷ ᠲᠤ᠌ ᠬᠦᠷᠪᠡ᠃《 ᠬᠣᠩᠬᠣᠷ ᠲᠤ᠌ ᠬᠠᠶᠠᠭᠰᠠᠨ ᠬᠣᠭ ᠮᠠᠨ ᠤ᠋ ᠪᠠᠢᠭᠤᠯᠭᠠ ᠶ᠋ᠢᠨ ᠬᠣᠭ ᠶᠠᠷᠢᠶᠠ ᠦᠭᠡᠢ ᠮᠥᠨ ᠪᠠᠢᠭᠰᠠᠨ ᠪᠠᠢᠨᠠ᠃ ᠡᠭᠦᠨ ᠢ᠋ ᠲᠣᠳᠣᠷᠬᠠᠢᠯᠠᠬᠤ ᠠ᠋ᠴᠠ ᠣᠯᠠᠨ ᠰᠢᠦ ᠳᠡ》 ᠭᠡᠵᠦ ᠵᠠᠭᠳᠠ ᠪᠡᠭᠵᠢ ᠬᠣᠶᠠᠷ ᠮᠠᠷᠭᠤᠬᠤ ᠪᠣᠯᠪᠠ᠃ ᠮᠠᠷᠭᠤᠭᠠᠨ ᠨᠢ ᠰᠡᠭᠦᠯ ᠳ᠋ᠡᠭᠡᠨ ᠵᠣᠳᠣᠭᠠᠨ ᠢ᠋ᠶ᠋ᠠᠷ ᠳᠠᠭᠤᠰᠬᠤ ᠳᠥᠭᠥᠪᠡ᠂ ᠰᠤᠷᠠᠭ ᠢ᠋ ᠨᠢ ᠰᠣᠨᠣᠰᠪᠠᠯ ᡀᠠᠭᠮᠰᠦ᠋ᠷᠦᠩ᠂ ᠲᠠᠮᠪᠠᠷᠠᠯ ᠬᠣᠶᠠᠷ ᠬᠠᠶᠠᠭᠳᠠᠯ ᠠ᠋ᠴᠠ ᠪᠣᠰᠬᠠᠭᠰᠠᠨ ᠮᠠᠰᠢᠨ ᠢ᠋ᠶ᠋ᠠᠨ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠪᠡᠯᠡᠭᠯᠡᠵᠡᠢ᠃
– – – –
① ᠠᠯᠪᠠᠨ ᠵᠢᠷᠤᠮ ᠤᠨ ᠬᠥᠳᠡᠯᠮᠦᠷᠢ ᠶᠢᠨ ᠡᠳᠦᠷ
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃