ᠵᠠᠷᠤᠯᠭᠠ – ᠳ ᠂ ᠳᠠᠸᠠᠨᠢᠮᠠ Зарлага – Д ᠂ Давааням
252ᠵᠠᠷᠤᠯᠭᠠ
ᠲᠡᠷᠡ ᠭᠤᠸᠠᠢ ᠨᠢᠭᠡᠨ ᠪᠠᠢᠭᠤᠯᠭᠠ ᠶ᠋ᠢᠨ ᠠᠵᠤ ᠠᠬᠤᠢ ᠶ᠋ᠢ ᠣᠯᠠᠨ ᠵᠢᠯ ᠬᠠᠷᠢᠭᠤᠴᠠᠬᠤ ᠳ᠋ᠠᠭᠠᠨ ᠲᠤᠩ ᠨᠢᠷᠤᠭᠤ ᠲᠠᠢ ᠭᠡᠭᠳᠡᠵᠦ ᠱᠠᠩᠨᠠᠯ ᠰᠠᠢᠰᠢᠶᠠᠯ ᠴᠢᠮᠠᠯᠠᠯᠲᠠ ᠦᠭᠡᠢ ᠬᠦᠷᠲᠡᠵᠦ ᠪᠠᠢᠭᠰᠠᠨ ᠶᠤᠮ᠃ ᠨᠢᠭᠡ ᠤᠳᠠᠭᠠ ᠳᠠᠷᠤᠭᠠ ᠶ᠋ᠢᠨ ᠢ᠋ᠶ᠋ᠡᠷ ᠥᠷᠥᠭᠡ ᠶ᠋ᠢ ᠵᠠᠰᠠᠭᠤᠯᠵᠤ ᠳᠠᠭᠤᠰᠤᠭᠠᠳ ᠬᠡᠷᠡᠭᠴᠡᠭᠡᠨ ᠡᠴᠡ ᠢᠯᠡᠭᠦᠦ ᠭᠠᠷᠤᠭᠰᠠᠨ ᠤᠯᠠᠭᠠᠨ ᠪᠣᠳᠣᠭ ᠢ᠋ ᠨᠢ ᠭᠡᠷ ᠲᠡᠭᠡᠨ ᠠᠪᠴᠢᠷᠠᠵᠤ ᠣᠨᠢ ᠪᠣᠳᠣᠵᠤ ᠰᠠᠭᠤᠬᠤ ᠳ᠋ᠠᠭᠠᠨ ᠄
— ᠰᠠᠢᠬᠠᠨ ᠴᠤ᠌ ᠪᠣᠳᠣᠭ ᠶᠤᠮ ᠳᠠ᠂ ᠵᠠᠷᠤᠯᠭᠠ ᠠ᠋ᠴᠠ ᠢᠯᠡᠭᠦᠦ ᠭᠠᠷᠤᠭᠰᠠᠨ ᠶᠠᠭᠤᠮᠠ ᠰᠢᠦ ᠳᠡ ᠭᠡᠵᠡᠢ᠃ ᠬᠠᠭᠠᠰ ᠰᠠᠢᠨ ᠡᠳᠦᠷ ᠲᠡᠷᠡ ᠭᠤᠸᠠᠢ ᠬᠡᠰᠡᠭ ᠵᠠᠯᠠᠭᠤᠰ ᠢ᠋ ᠤᠳᠤᠷᠢᠳᠤᠨ ᠬᠠᠭᠤᠴᠢᠨ ᠠᠭᠤᠯᠬᠤ ᠪᠠᠨ ᠪᠠᠭᠤᠯᠭᠠᠵᠠᠢ᠃ ᠣᠷᠣᠢ ᠭᠡᠷ ᠲᠡᠭᠡᠨ ᠬᠠᠷᠢᠬᠤ ᠳ᠋ᠠᠭᠠᠨ ᠬᠣᠶᠠᠷ ᠲᠠᠭᠠᠷᠢᠳᠠᠰᠤ ᠰᠤᠭᠤᠪᠴᠢᠯᠠᠨ ᠢᠷᠡᠭᠡᠳ᠄
— ᠮᠠᠭᠤ ᠠᠭᠤᠯᠬᠤ ᠪᠠᠨ ᠪᠠᠭᠤᠯᠭᠠᠭᠰᠠᠨ ᠴᠢᠨᠢ ᠲᠦᠯᠡᠬᠦ ᠶᠠᠭᠤᠮᠠ ᠵᠥᠩᠳᠡᠭᠡᠨ ᠭᠠᠷᠤᠯᠠ᠂ ᠨᠢᠭᠡᠨᠲᠡ ᠵᠠᠷᠤᠯᠭᠠᠳᠠᠭᠰᠠᠨ ᠬᠣᠢᠨᠠ ᠡᠭᠦᠨ ᠢ᠋ᠶ᠋ᠡᠷ ᠬᠡᠳᠦᠨ ᠡᠳᠦᠷ ᠭᠠᠯ ᠢ᠋ᠶ᠋ᠠᠨ ᠨᠣᠴᠣᠭᠠᠬᠤ ᠦᠭᠡᠢ ᠦᠦ ᠭᠡᠵᠦ ᠡᠬᠡᠨᠡᠷ ᠲᠡᠭᠡᠨ ᠬᠡᠯᠡᠪᠡ᠃ ᠠᠯᠪᠠᠨ ᠭᠠᠵᠠᠷ ᠡᠪᠦᠯ ᠦ᠋ᠨ ᠳᠤᠯᠠᠭᠠᠯᠭᠠ ᠬᠢᠵᠦ ᠪᠦᠬᠦ ᠴᠣᠩᠬᠣ ᠰᠢᠯᠯᠡᠬᠦ ᠳ᠋ᠦ᠍ ᠨᠢᠭᠡ ᠬᠠᠪᠲᠠᠭᠠᠢ ᠰᠢᠯ ᠢᠯᠡᠭᠦᠦ ᠭᠠᠷᠪᠠ᠃《 ᠵᠠᠷᠤᠯᠭᠠ ᠠ᠋ᠴᠠ ᠭᠠᠷᠤᠭᠰᠠᠨ ᠶᠤᠮ ᠳᠠ》 ᠭᠡᠵᠦ ᠲᠡᠷᠡ ᠭᠤᠸᠠᠢ ᠪᠣᠳᠣᠭᠠᠳ ᠲᠣᠭᠣᠨᠣᠨ ᠤ᠋ ᠪᠠᠨ ᠷᠠᠮ( ᠬᠦᠷᠢᠶᠡ᠂ ᠵᠢᠶᠠᠽᠢ) ᠶ᠋ᠢ ᠰᠢᠯᠡᠯᠵᠠᠢ᠃ ᠪᠠᠢᠭᠤᠯᠭᠠ ᠳ᠋ᠤ᠌ ᠰᠢᠯᠭᠠᠯᠲᠠ ᠢᠷᠡᠨᠡ ᠭᠡᠵᠦ ᠬᠥᠯ ᠪᠣᠯᠤᠯᠠ᠃ ᠰᠢᠯᠭᠠᠬᠤ ᠬᠥᠮᠦᠰ ᠢ᠋ ᠢᠷᠡᠬᠦ ᠳ᠋ᠦ᠍ ᠪᠢᠴᠢᠬᠠᠨ ᠪᠤᠳᠠᠭᠠᠯᠠᠭᠠ ᠬᠢᠬᠦ ᠰᠠᠨᠠᠯ ᠢ᠋ ᠳᠠᠷᠤᠭᠠ ᠭᠠᠷᠭᠠᠪᠠ᠃ ᠪᠤᠳᠠᠭᠠᠯᠠᠭᠠ ᠳ᠋ᠤ᠌ ᠪᠡᠯᠡᠳᠬᠡᠬᠦ ᠠᠵᠢᠯ ᠢ᠋ ᠤᠳᠤᠷᠢᠳᠤᠯᠭᠠ ᠶ᠋ᠢᠨ ᠵᠦᠭ ᠡᠴᠡ ᠲᠡᠷᠡ ᠭᠤᠸᠠᠢ ᠳ᠋ᠤ᠌ ᠬᠠᠷᠢᠭᠤᠴᠠᠭᠤᠯᠪᠠ᠃ ᠲᠣᠭᠲᠠᠭᠠᠭᠰᠠᠨ ᠴᠠᠭ ᠲᠠᠭᠠᠨ ᠮᠠᠰᠢᠨ ᠲᠠᠢ ᠬᠥᠮᠦᠨ ᠢᠷᠡᠵᠦ ᠠᠵᠢᠯ ᠰᠢᠯᠭᠠᠬᠤ ᠶ᠋ᠢᠨ ᠡᠮᠦᠨᠡ ᠪᠢᠴᠢᠬᠠᠨ ᠪᠤᠳᠠᠭᠠᠯᠠᠭᠠ ᠣᠷᠣᠭᠠᠳ ᠰᠡᠳᠬᠢᠯ ᠬᠠᠩᠬᠣᠯᠤᠭᠤᠨ ᠭᠠᠷᠴᠠᠢ᠃ ᠪᠤᠳᠠᠭᠠᠯᠠᠭᠠ ᠳ᠋ᠤ᠌ ᠵᠣᠷᠢᠭᠤᠯᠤᠭᠰᠠᠨ ᠵᠦᠢᠯ ᠡᠴᠡ ᠬᠠᠷᠠ ᠠᠷᠢᠬᠢ ᠨᠢᠭᠡ ᠰᠢᠯ᠂ ᠪᠠᠰᠠ ᠪᠤᠰᠤ ᠶᠠᠭᠤᠮᠠᠰ ᠢᠯᠡᠭᠦᠦ ᠭᠠᠷᠤᠭᠰᠠᠨ ᠢ᠋ ᠲᠡᠷᠡ ᠭᠤᠸᠠᠢ ᠭᠡᠷ ᠲᠡᠭᠡᠨ ᠠᠪᠴᠢᠷᠠᠵᠤ᠄
— ᠮᠣᠷᠢᠲᠠᠨ ᠤ᠋ ᠬᠡᠰᠢᠭ ᠶᠠᠪᠠᠭᠠᠨ ᠳ᠋ᠤ᠌ ᠭᠡᠳᠡᠭ ᠤᠴᠢᠷᠲᠠᠢ ᠶᠤᠮ ᠳᠠ᠂ ᠨᠢᠭᠡᠨᠲᠡ ᠵᠠᠷᠤᠯᠭᠠ ᠠ᠋ᠴᠠ ᠢᠯᠡᠭᠦᠦ ᠭᠠᠷᠤᠭᠰᠠᠨ ᠶᠠᠭᠤᠮᠠ ᠶ᠋ᠢ ᠭᠦᠷᠲᠡᠯ ᠦᠭᠡᠢ ᠶᠠᠭᠠᠬᠢᠬᠤᠪ ᠭᠡᠵᠡᠢ᠃ ᠮᠠᠢ ᠶ᠋ᠢᠨ ᠪᠠᠶᠠᠷ ᠤ᠋ᠨ ᠲᠤᠭ ᠯᠣᠽᠦ᠋ᠩ ᠬᠢᠬᠦ ᠳ᠋ᠦ᠍ ᠵᠣᠷᠢᠭᠤᠯᠤᠭᠰᠠᠨ ᠬᠣᠷᠢᠨ ᠮᠧᠲ᠋ᠷ ᠳᠠᠪᠤᠤ ᠠ᠋ᠴᠠ ᠨᠢᠭᠡ ᠮᠧᠲ᠋ᠷ ᠢᠯᠡᠭᠦᠦ ᠭᠠᠷᠤᠭᠰᠠᠨ ᠢ᠋ ᠲᠡᠷᠡ ᠭᠤᠸᠠᠢ ᠡᠬᠡᠨᠡᠷ ᠲᠡᠭᠡᠨ ᠠᠪᠴᠢᠷᠠᠵᠤ ᠥᠭᠬᠦ ᠳ᠋ᠡᠭᠡᠨ᠄
— ᠵᠠᠷᠤᠯᠭᠠ ᠠ᠋ᠴᠠ ᠢᠯᠡᠭᠦᠳᠡᠭᠰᠡᠨ ᠶᠠᠭᠤᠮᠠ᠂ ᠬᠡᠦᠬᠡᠳ ᠦ᠋ᠳ ᠦ᠋ᠨ ᠢᠶᠡᠨ ᠳᠡᠪᠡᠯ ᠦ᠋ᠨ ᠬᠠᠨᠴᠤᠢ ᠶ᠋ᠢ ᠳᠣᠲᠣᠷᠯᠠᠬᠤ ᠦᠭᠡᠢ ᠦᠦ? ᠭᠡᠪᠡ᠃ ᠨᠢᠭᠡᠨᠲᠡ ᠵᠠᠷᠤᠯᠭᠠᠳᠠᠭᠰᠠᠨ ᠪᠣᠯᠬᠣᠷ ᠣᠨᠢ ᠪᠣᠳᠣᠭᠰᠠᠨ ᠪᠣᠳᠣᠭ᠂ ᠲᠣᠭᠣᠨᠣᠨ ᠤ᠋ ᠷᠠᠮ ᠳ᠋ᠤ᠌ ᠬᠢᠭᠰᠡᠨ ᠰᠢᠯ᠂ ᠬᠠᠷᠠ ᠠᠷᠢᠬᠢ ᠶ᠋ᠢ ᠬᠡᠨ ᠴᠦ᠍ ᠦᠭᠡᠢᠯᠡᠭᠰᠡᠨ ᠦᠭᠡᠢ᠃ ᠲᠣᠭᠠᠴᠠᠭᠠᠨ ᠤ᠋ ᠠᠵᠢᠯᠲᠠᠨ ᠨᠤᠭᠤᠳ ᠵᠠᠷᠤᠯᠭᠠ ᠳ᠋ᠠᠭᠠᠨ ᠳ᠋ᠦᠩᠨᠡᠭᠡᠳ ᠯᠡ ᠥᠩᠭᠡᠷᠡᠵᠡᠢ᠃ ᠪᠢᠴᠢᠭ ᠬᠡᠷᠡᠭ ᠦ᠋ᠨ ᠲᠠᠷᠭᠤᠨ ᠰᠢᠷᠠ ᠠᠪᠠᠭᠠᠢ ᠲᠡᠷᠢᠭᠦᠲᠡᠨ ᠲᠡᠷᠡ ᠭᠤᠸᠠᠢ ᠶ᠋ᠢ ᠴᠣᠩᠬᠣᠨ ᠤ᠋ ᠰᠢᠯ ᠵᠥᠪᠰᠢᠶᠡᠷᠡᠯ ᠦᠭᠡᠢ ᠠᠪᠤᠭᠠᠳ ᠲᠣᠭᠣᠨᠣᠨ ᠤ᠋ ᠪᠠᠨ ᠷᠠᠮ ᠳ᠋ᠤ᠌ ᠬᠢᠭᠰᠡᠨ ᠬᠢᠬᠦ ᠶᠦ᠍ᠮ ᠦᠦ᠂ ᠲᠤᠭ ᠯᠣᠽᠦ᠋ᠩ ᠬᠢᠬᠦ ᠳ᠋ᠦ᠍ ᠢᠯᠡᠭᠦᠦ ᠭᠠᠷᠤᠭᠰᠠᠨ ᠮᠧᠲ᠋ᠷ ᠳᠠᠪᠤᠤ ᠶ᠋ᠢ ᠭᠡᠷ ᠲᠦ᠍ ᠪᠡᠨ ᠠᠪᠠᠴᠢᠭᠰᠠᠨ᠂ ᠠᠭᠤᠯᠬᠤ ᠪᠠᠭᠤᠯᠭᠠᠭᠠᠳ ᠬᠣᠶᠠᠷ ᠲᠠᠭᠠᠷᠢᠳᠠᠰᠤ ᠠᠪᠤᠭᠠᠳ ᠶᠠᠪᠤᠵᠤ ᠪᠠᠢᠭᠰᠠᠨ ᠭᠡᠵᠦ ᠰᠢᠪᠡᠷ ᠠᠪᠢᠷ ᠭᠡᠬᠦ ᠶ᠋ᠢ ᠵᠠᠷᠢᠮ ᠬᠥᠮᠦᠰ ᠰᠣᠨᠣᠰᠤᠭᠠᠳ《 ᠬᠠᠮᠢᠭᠠ ᠭᠠᠵᠠᠷ ᠲᠡᠢᠮᠦᠷᠬᠦᠦ ᠶᠠᠭᠤᠮᠠ ᠪᠠᠢᠬᠤ ᠯᠠ ᠳᠠ》ᠭᠡᠨᠡ᠃ ᠨᠥᠭᠥᠭᠡ ᠬᠡᠰᠡᠭ ᠨᠢ ᠲᠡᠷᠡ ᠭᠤᠸᠠᠢ ᠶᠠᠭᠤᠬᠠᠨ ᠢ᠋ᠶ᠋ᠠᠷ ᠴᠤ᠌ ᠶᠠᠭᠤᠮᠠ ᠬᠢᠨᠡ᠃ ᠬᠡᠵᠢᠶᠡ ᠴᠦ᠍ ᠬᠠᠶᠠᠭᠳᠠᠯ ᠭᠠᠷᠭᠠᠳᠠᠭ ᠦᠭᠡᠢ ᠭᠡᠨᠡ᠃ ᠬᠡᠨ ᠴᠦ᠍ ᠲᠡᠭᠦᠨ ᠢ᠋ ᠨᠣᠴᠢᠲᠠᠢ ᠶᠠᠭᠤᠮᠠ ᠭᠡᠵᠦ ᠪᠣᠳᠣᠳᠠᠭ ᠦᠭᠡᠢ ᠪᠠᠢᠪᠠ᠃ ᠲᠡᠷᠡ ᠭᠤᠸᠠᠢ ᠵᠠᠷᠤᠯᠭᠠᠨ ᠠ᠋ᠴᠠ ᠢᠯᠡᠭᠦᠳᠡᠭᠡ ᠦᠭᠡᠢ ᠰᠢᠷᠬᠡᠭ ᠬᠠᠳᠠᠭᠠᠰᠤ ᠴᠤ᠌ ᠠᠪᠬᠤ ᠶ᠋ᠢ ᠴᠡᠭᠡᠷᠯᠡᠳᠡᠭ ᠪᠣᠯᠬᠣᠷ ᠠᠵᠢᠯ ᠳ᠋ᠠᠭᠠᠨ ᠲᠡᠩᠴᠡᠵᠦ ᠶᠠᠪᠤᠭᠠ ᠶᠤᠮ ᠳᠠ᠃ ᠲᠠ ᠮᠢᠨᠦ ᠥᠭᠦᠯᠡᠯᠭᠡ ᠶ᠋ᠢ ᠤᠩᠰᠢᠭᠠᠳ《 ᠵᠠᠷᠤᠯᠭᠠ》 ᠳ᠋ᠤ᠌ ᠲᠠᠯᠪᠢᠬᠤ ᠬᠢᠨᠠᠯᠲᠠ ᠶ᠋ᠢ ᠰᠠᠢᠵᠢᠷᠠᠭᠤᠯᠤᠶᠠ ᠭᠡᠵᠦ ᠪᠣᠳᠣᠬᠤ ᠦᠭᠡᠢ ᠪᠠᠢᠨᠠ ᠭᠡᠵᠦ ᠦᠦ? ᠯᠠᠪ ᠪᠣᠳᠣᠬᠤ ᠪᠢᠵᠡ ᠭᠡᠵᠦ ᠪᠢ ᠨᠠᠢᠳᠠᠵᠤ ᠪᠠᠢᠨᠠ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ
ᠬᠢᠨᠠᠭ᠍ᠴᠢ : ᠴᠣᠯᠮᠣᠨᠲᠤᠶᠠᠭᠠ
2023᠂8᠂31 ᠤ᠋ ᠡᠳᠦᠷ