ᠨᠣᠭᠣᠭᠠᠨ ᠬᠤᠷᠠᠭᠠᠨ ᠤ ᠠᠷᠠᠰᠤ – ᠮ ᠂ ᠬᠦᠷᠰᠡᠳ Ногоон хурганы арьс– М ᠂ Хүрсэд
232ᠨᠣᠭᠣᠭᠠᠨ ᠬᠤᠷᠠᠭᠠᠨ ᠤ ᠠᠷᠠᠰᠤ
( ᠬᠣᠱᠣᠩ ᠥᠭᠦᠯᠡᠯᠭᠡ )
ᠪᠢ ᠡᠬᠡᠨᠡᠷ ᠡᠴᠡ ᠪᠠᠨ ᠰᠠᠯᠵᠤ ᠠᠢᠯ ᠤ᠋ᠨ ᠡᠵᠡᠭᠲᠡᠢ ᠲᠡᠢ ᠭᠡᠷᠯᠡᠪᠡ᠃ ᠮᠠᠨ ᠤ᠋ ᠠᠢᠯ ᠤᠨ ᠬᠠᠷᠠ ᠬᠥᠮᠦᠨ ᠴᠤ᠌ ᠮᠠᠨ ᠤ ᠠᠪᠠᠭᠠᠢ ᠲᠠᠢ ᠠᠶᠠᠨᠳᠠᠭᠠᠨ ᠲᠠᠭᠠᠷᠠᠵᠤ ᠲᠣᠬᠢᠷᠠᠭᠠᠨ ᠤᠴᠢᠷ ᠢ᠋ᠶ᠋ᠠᠨ ᠣᠯᠴᠢᠬᠠᠳᠠᠭ ᠶᠤᠮ ᠪᠠᠢᠨᠠ᠃ ᠶᠠᠭᠤᠮᠠ ᠭᠡᠴᠦ ᠬᠠᠴᠢᠨ ᠳᠠ᠃ ᠪᠢᠳᠡ ᠳᠥᠷᠪᠡ ᠤᠷᠢᠳ ᠡᠮᠦᠨᠡ ᠶᠠᠳᠠᠵᠤ ᠭᠠᠭᠴᠠ ᠤᠳᠠᠭᠠ ᠪᠣᠯᠪᠠ ᠬᠠᠮᠲᠤ ᠺᠢᠨᠣ᠋ ᠦᠵᠡᠵᠦ ᠲᠢᠶᠡᠲᠷ ᠲᠤ᠌ ᠣᠷᠣᠵᠤ ᠵᠣᠭᠣᠭ ᠤ᠋ᠨ ᠭᠠᠵᠠᠷ ᠵᠡᠷᠭᠡᠴᠡᠨ ᠰᠠᠭᠤᠵᠤ ᠪᠠᠢᠭᠠ ᠦᠭᠡᠢ ᠬᠢᠷᠢᠨᠡ ᠪᠡᠨ ᠬᠡᠨ ᠬᠡᠨ ᠳ᠋ᠡᠭᠡᠨ ᠰᠡᠳᠬᠢᠯ ᠲᠡᠢ ᠪᠣᠯᠴᠢᠬᠠᠳᠠᠭ ᠪᠠᠢᠵᠠᠢ᠃ ᠲᠡᠭᠡᠭᠡᠳ ᠨᠢᠭᠡ ᠡᠳᠦᠷ ᠬᠡᠵᠢᠶᠡ ᠵᠠᠶᠠᠭᠠᠨ ᠤ᠋ ᠶᠤᠮ ᠰᠢᠭ᠋ ᠬᠣᠶᠠᠷ ᠴᠤ᠌ ᠰᠢᠨᠡ ᠠᠢᠯ ᠭᠠᠷᠤᠭᠠᠳ ᠢᠷᠡᠳᠡᠭ᠃
ᠮᠠᠨ ᠤ ᠰᠢᠨᠡ ᠠᠪᠠᠭᠠᠢ ᠳᠠᠷᠢᠮᠠ᠂ ᠪᠠᠲᠤᠯᠠᠭᠤᠯᠤᠶᠠ ① ᠭᠡᠨᠡ᠃ ᠪᠢ ᠄
– ᠢᠯᠡᠭᠦᠦ ᠠᠵᠢᠯ ᠳᠠ᠂ ᠪᠠᠲᠤᠯᠠᠭᠠᠨ ᠠ᠋ᠴᠠ ᠢᠯᠡᠭᠦᠦ ᠬᠠᠢᠷᠠ ᠰᠡᠳᠬᠢᠯ ᠪᠠᠢᠬᠤ ᠳ᠋ᠤ᠌ ᠲᠡᠭᠡᠵᠦ ᠪᠠᠰᠠ ᠨᠢᠭᠡ ᠠᠵᠢᠯ ᠣᠲᠣᠭᠠᠳ ( ᠠᠵᠢᠯᠠ ᠭᠠᠷᠭᠠᠬᠤ ) ᠶᠠᠭᠠᠬᠢᠬᠤ ᠶᠤᠮ ᠪᠣᠢ ? ᠶᠠᠳᠠᠬᠤ ᠳ᠋ᠠᠭᠠᠨ ᠠᠮᠠ ᠪᠦᠯᠢ᠂ ᠠᠪᠳᠠᠭ ᠴᠠᠯᠢᠩ ᠴᠤ᠌ ᠭᠡᠯᠡ ᠵᠥᠷᠢᠶᠡ ᠠᠯᠠᠭᠠ ᠭᠡᠯᠡ᠃
ᠳᠠᠷᠢᠮᠠ ᠮᠠᠨᠢ ᠵᠢᠭᠠᠬᠠᠨ ᠳᠤᠷᠠᠮᠵᠢᠬᠠᠨ ᠪᠠᠢᠭᠠ ᠶᠠᠩᠵᠤ ᠲᠠᠢ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠦᠭᠡᠢ ᠲᠡᠢᠮᠦ ᠪᠢᠵᠡ ᠳᠡ᠂ ᠳᠠᠷᠢᠮᠠ᠂ ᠬᠠᠨᠳᠠ ( ᠮᠢᠨᠦ ᠬᠠᠭᠤᠴᠢᠨ ᠡᠬᠡᠨᠡᠷ ) ᠬᠣᠶᠠᠷ ᠤ᠋ᠨ ᠬᠤᠪᠢ ᠳ᠋ᠤ᠌ ᠭᠡᠪᠡᠯ ᠨᠢᠭᠡ ᠬᠣᠶᠠᠷᠬᠠᠨ ᠨᠠᠰᠤᠨ ᠤ᠋ ᠵᠥᠷᠢᠶᠡ ᠲᠡᠢ᠃ ᠬᠠᠷᠢᠨ ᠲᠣᠭᠮᠢᠳ ᠨᠠᠳᠠ ᠠ᠋ᠴᠠ ᠲᠠᠪᠤ ᠵᠢᠷᠭᠤᠭᠠ ᠠᠬᠠ ᠶᠤᠮ ᠃ ᠲᠠᠪᠤ ᠵᠢᠷᠭᠤᠬᠠᠨ ᠰᠢᠦ᠂ ᠲᠡᠷᠡ ᠪᠠᠢᠲᠤᠭᠠᠢ ᠵᠥᠷᠢᠭᠦᠦ ᠠᠯᠢ ᠶ᠋ᠢ ᠲᠡᠷᠡ ᠭᠡᠬᠦ ᠪᠣᠢ? ᠬᠡᠦᠬᠡᠳ ᠦ᠋ᠨ ᠲᠣᠭᠠ ᠪᠠᠷ ᠪᠣᠯ ᠪᠦᠷ ᠢᠪ ᠢᠵᠢᠯᠢ ᠭᠡᠭᠴᠢ᠂ ᠮᠠᠨ ᠤ᠋ ᠬᠢ ᠬᠣᠶᠠᠷ ᠬᠦᠦ ᠲᠡᠢ᠂ ᠲᠡᠳᠡᠨ ᠦ᠌ ᠬᠢ ᠬᠦᠦ ᠥᠬᠢᠨ ᠬᠣᠶᠠᠷ ᠲᠠᠢ᠂ ᠠᠳᠠ ᠴᠢᠨᠢ ᠭᠠᠭᠴᠠᠬᠠᠨ ᠬᠦᠢᠰᠦᠨ ᠦ᠌ ᠯᠡ ᠵᠥᠷᠢᠶᠡ ᠪᠠᠢᠨᠠ ᠃ ᠵᠠ ᠶᠠᠭᠠᠬᠢᠳᠠᠭ ᠶᠤᠮ ᠪᠣᠢ ? ᠲᠣᠭᠠ ᠯᠠ ᠪᠠᠢᠵᠤ ᠪᠠᠢᠪᠠᠯ ᠪᠣᠯᠤᠭᠠ ᠪᠢᠰᠢ ᠦᠦ ?
ᠦᠭᠡᠢ ᠶᠡᠷᠦ ᠨᠢ ᠪᠢᠳᠡ ᠳᠥᠷᠪᠡ ᠡᠢᠮᠦ ᠠᠮᠠᠷᠠᠭ ᠳᠣᠭᠢᠷᠠᠴᠢᠬᠠᠳᠠᠭ ᠪᠠᠢᠬᠠ ᠭᠡᠵᠦ ᠤᠭᠰᠠᠷᠠᠮᠠᠯ ᠬᠢᠴᠡ ᠲᠡᠢ ᠠᠪᠳᠠᠷᠠ ᠬᠠᠢᠷᠴᠠᠭ ᠤ᠋ᠨ ᠡᠳ᠋ ᠬᠡᠰᠡᠭ ᠢ᠋ ᠴᠤ᠌ ᠭᠡᠰᠡᠨ ᠬᠣᠭᠣᠷᠣᠨᠳᠣ ᠨᠢ ᠰᠣᠯᠢᠭᠠᠳ ᠡᠪᠯᠡᠭᠦᠯᠬᠦ ᠳ᠋ᠦ᠍ ᠢᠩᠭᠢᠵᠦ ᠠᠶᠠᠲᠠᠢᠬᠠᠨ ᠡᠪ ᠵᠦᠢ ᠪᠡᠷ ᠢ᠋ᠶ᠋ᠡᠨ ᠪᠣᠯᠳᠠᠭ ᠪᠣᠯ ᠮᠥᠨ ᠳᠣᠬᠢ ᠠ᠋ ! ᠭᠠᠭᠴᠠᠬᠠᠨ ᠮᠠᠨ ᠤ᠋ ᠡᠵᠢ ᠭᠡᠵᠦ ᠨᠢᠭᠡ ᠬᠠᠭᠠᠷᠬᠠᠢ ᠬᠡᠩᠭᠡᠷᠭᠡ ᠰᠢᠭ ᠠᠮᠢᠲᠠᠨ ᠂ ᠠᠭᠤᠯᠵᠠᠵᠤ ᠤᠴᠠᠷᠠᠭᠰᠠᠨ ᠲᠠᠨᠢᠬᠤ ᠮᠡᠳᠡᠬᠦ ᠬᠥᠮᠦᠨ ᠳ᠋ᠡᠭᠡᠨ ᠪᠢᠳᠡᠨ ᠦ᠌ ᠡᠨᠡ ᠶᠠᠪᠤᠳᠠᠯ ᠢ᠋ ᠶᠠᠷᠢᠴᠢᠬᠠᠬᠤ ᠭᠡᠳ ᠪᠣᠯᠳᠠᠭ ᠦᠭᠡᠢ᠃ ᠲᠡᠷᠡ ᠰᠠᠨᠠᠭᠠ ᠶ᠋ᠢ ᠨᠢ ᠮᠡᠳᠡᠭᠡᠳ ᠪᠢ ᠄
– ᠲᠠ ᠶᠡᠷᠦ ᠨᠢ ᠠᠮᠠ ᠪᠠᠨ ᠬᠠᠪᠴᠢᠵᠤ ᠪᠠᠢᠭᠠᠴᠢ᠂ ᠶᠠᠳᠠᠵᠤ ᠨᠢᠭᠡ ᠵᠢᠯ᠂ ᠶᠠᠳᠠᠬᠤ ᠳ᠋ᠠᠭᠠᠨ ᠨᠢᠭᠡ ᠰᠠᠷᠠ᠂ ᠪᠦᠷ ᠲᠡᠰᠬᠦ ᠦᠭᠡᠢ ᠪᠠᠢᠪᠠᠯ ᠨᠢᠭᠡ ᠬᠣᠨᠣᠭ ᠲᠡᠪᠴᠢᠵᠦ ᠦᠵᠡᠭᠡᠴᠢ ᠭᠡᠵᠦ ᠭᠤᠶᠤᠭᠰᠠᠨ ᠮᠠᠨᠢ ᠨᠢᠭᠡ ᠶᠡᠬᠡ ᠨᠡᠮᠡᠷᠢ ᠪᠠᠭᠠ ᠲᠠᠢ᠂ ᠶᠠᠭᠠᠬᠢᠳᠠᠭ ᠶᠤᠮ ᠪᠣᠯ ? ᠠ᠋ ᠳᠠ᠂ ᠡᠨᠡ ᠡᠵᠢ ᠨᠠᠷ ᠭᠡᠳᠡᠭ ᠮᠥᠨ ᠬᠠᠲᠠᠭᠤ ᠤᠯᠤᠰ ᠶᠤᠮ ᠠ᠋ ᠳᠠ᠃ ᠬᠥᠮᠦᠨ ᠦ᠌ ᠤᠴᠢᠷ ᠵᠣᠪᠠᠯᠠᠩ ᠮᠡᠳᠡᠬᠦ ᠦᠭᠡᠢ ᠰᠢᠦ᠂ ᠶᠡᠷᠦ ᠨᠢ ᠬᠡᠨ ᠦ᠌ ᠴᠤ᠌ ᠡᠵᠢ ᠴᠥᠮ ᠠᠳᠠᠯᠢ ᠪᠠᠢᠬᠠ ᠳᠠ᠃ ᠮᠠᠨ ᠤ᠋ ᠡᠵᠢ ᠯᠡ ᠭᠡᠬᠦ ᠳ᠋ᠦ᠍ ᠳᠠᠷᠢᠮᠠ ᠪᠢᠳᠡ ᠬᠣᠶᠠᠷ ᠤ᠋ᠨ ᠬᠡᠨ ᠬᠡᠨ ᠳ᠋ᠡᠭᠡᠨ ᠦᠭᠭᠦᠭᠰᠡᠨ ᠬᠠᠢᠷᠠ ᠰᠡᠳᠬᠢᠯ ᠦ᠋ᠨ ᠨᠠᠷᠢᠨ ᠤᠴᠢᠷ ᠢ᠋ ᠳᠠᠩᠴᠤ ᠮᠡᠳᠡᠬᠦ ᠦᠭᠡᠢ ᠶᠦᠮ᠃ ᠶᠡᠷᠦ ᠨᠢ ᠮᠡᠳᠡᠬᠦ ᠶ᠋ᠢ ᠴᠤ᠌ ᠨᠢᠭᠡ ᠶᠡᠬᠡ ᠬᠦᠰᠡᠬᠦ ᠦᠭᠡᠢ ᠪᠠᠢᠬᠤ ᠰᠢᠭ᠋ ᠪᠠᠢᠨᠠ᠃ 《 ᠬᠠᠨᠳᠠ 》᠂ 《 ᠬᠠᠨᠳᠠ 》 ᠭᠡᠵᠦ ᠬᠡᠯᠡᠴᠢᠬᠡᠬᠦ ᠭᠡᠳ᠂ ᠲᠡᠭᠡᠬᠦᠯᠡᠷ ᠨᠢ ᠪᠠᠰᠠ ᠰᠢᠨᠡ ᠡᠬᠡᠨᠡᠷ ᠦ᠋ᠨ ᠮᠠᠨᠢ ᠰᠡᠳᠬᠢᠯ ᠳ᠋ᠦ᠍ ᠰᠡᠪ ᠣᠷᠣᠴᠢᠬᠠᠬᠤ ᠪᠣᠢ ᠭᠡᠵᠦ ᠮᠢᠨᠦ ᠰᠢᠯᠪᠢᠨ ᠦ᠌ ᠶᠠᠰᠤ ᠬᠦᠷᠲᠡᠯᠡ ᠱᠠᠷᠬᠢᠷᠠᠬᠤ ᠶ᠋ᠢ ᠶᠠᠭᠠᠬᠢᠨᠠ᠃ ᠤᠩᠰᠢᠭᠴᠢ ᠲᠠ ᠮᠢᠨᠦ ᠣᠷᠣᠨ ᠳ᠋ᠤ᠌ ᠪᠠᠢᠭᠠ ᠪᠣᠯ ᠰᠠᠢᠨ ᠮᠡᠳᠡᠨᠡ᠂ ᠲᠡᠭᠦᠨ ᠡᠴᠡ ᠨᠠᠭᠠᠰᠢ ᠡᠨᠡ ᠵᠣᠪᠠᠯᠠᠩ ᠢ᠋ ᠶᠠᠭᠠᠬᠢᠭᠰᠠᠨ ᠴᠤ᠌ ᠮᠡᠳᠡᠬᠦ ᠦᠭᠡᠢ ᠳᠡ᠃
ᠠ ᠲᠡᠢᠮᠦ᠂ ᠬᠣᠶᠠᠷ ᠬᠠᠭᠤᠷᠠᠢ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠲᠤᠬᠠᠢ ᠶᠠᠷᠢᠬᠤ ᠭᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠦᠷ ᠲᠠᠭ ᠮᠠᠷᠲᠠᠬᠤ ᠨᠢ ᠪᠠᠢᠨᠠ ᠰᠢᠦ᠃ ᠡᠭᠡᠴᠢᠮᠡᠳ ᠥᠬᠢᠨ ᠨᠢ ᠴᠤ᠌ ᠤᠴᠢᠷ ᠶᠠᠪᠤᠳᠠᠯ ᠢ᠋ ᠣᠢᠯᠠᠭᠠᠭᠠᠳ ᠨᠠᠳᠠ ᠰᠠᠢᠨ ᠭᠡᠵᠦ ᠬᠠᠴᠢᠨ᠂ ᠭᠠᠷᠪᠠᠴᠤ ᠣᠷᠣᠪᠠᠴᠤ 《 ᠠᠪᠤ 》᠂《 ᠰᠢᠨᠡ ᠠᠪᠤ 》᠂ 《 ᠵᠠᠯᠠᠭᠤ ᠠᠪᠤ 》 ᠭᠡᠳ ᠰᠠᠯᠬᠤ ᠶᠠᠭᠤᠮᠠ ᠪᠢᠰᠢ᠂ ᠬᠠᠷᠢᠨ ᠲᠡᠷᠡ ᠬᠣᠪᠣᠭᠣᠷ ᠪᠠᠨᠳᠢᠳᠠ ᠳ᠋ᠤ᠌ ᠨᠡᠯᠢᠶᠡᠳ ᠶᠠᠪᠤᠳᠠᠯ ᠪᠠᠢᠨᠠ ᠠ᠋᠃ ᠨᠠᠳᠠ ᠤᠷᠤᠭᠤ ᠭᠠᠭᠴᠠ ᠠᠶᠠᠲᠠᠢᠬᠠᠨ ᠬᠠᠷᠠᠬᠤ ᠦᠭᠡᠢ ᠰᠢᠦ᠂ ᠪᠢ ᠨᠢᠭᠡ ᠤᠳᠠᠭᠠ ᠭᠠᠳᠠᠭᠤᠷ ᠴᠠᠮᠴᠠ ᠶ᠋ᠢ ᠨᠢ ᠲᠠᠢᠯᠬᠤ ᠭᠡᠰᠡᠨ ᠴᠢᠨᠢ ᠵᠣᠯ ᠲᠠᠢ ᠯᠠ ᠪᠠᠢᠰᠢᠩ ᠨᠤᠷᠠᠭᠠᠴᠢᠬᠠᠭᠰᠠᠨ ᠦᠭᠡᠢ᠃
《 ᠵᠠ ᠭᠠᠢᠭᠤᠢ᠂ ᠬᠡᠦᠬᠡ ᠠ᠋ ᠴᠢ ᠥᠨᠥᠳᠥᠷ ᠲᠡᠭᠡᠵᠦ ᠯᠡ ᠪᠠᠢ᠂ ᠮᠠᠷᠭᠠᠰᠢ ᠠ᠋ᠴᠠ ᠢᠩᠭᠢᠵᠦ ᠮᠢᠺᠷᠣᠹᠤᠨ ᠤ᠋ ᠳᠠᠭᠤᠴᠢᠨ ᠰᠢᠭ᠋ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠬᠠᠰᠬᠢᠴᠢᠵᠤ ᠪᠠᠢᠬᠠ ᠪᠣᠢ ᠴᠢ᠂ ᠠᠪᠤ ᠬᠥᠮᠦᠨ ᠶᠠᠮᠠᠷ ᠪᠠᠢᠳᠠᠭ ᠢ᠋ ᠴᠢᠮᠠ ᠳ᠋ᠤ᠌ ᠦᠵᠡᠭᠦᠯᠦᠭᠡᠳ ᠥᠭᠭᠦᠨᠡ 》 ᠭᠡᠵᠦ ᠰᠢᠳᠦ ᠵᠠᠭᠤᠨ ᠲᠡᠪᠴᠢᠵᠦ ᠪᠠᠢᠯᠠ᠃
ᠶᠡᠷᠦ ᠨᠢ ᠳᠠᠷᠢᠮᠠ ᠡᠨᠡ ᠬᠦᠦ ᠡᠴᠡ ᠪᠣᠯᠵᠤ ᠬᠠᠭᠤᠴᠢᠨ ᠨᠥᠬᠥᠷ ᠲᠡᠢ ᠪᠡᠨ ᠲᠣᠬᠢᠷᠠᠬᠤ ᠪᠠᠨ ᠪᠠᠢᠭᠰᠠᠨ ᠶᠤᠮ ᠰᠢᠦ ᠳᠡ᠃
ᠶᠠᠭᠠᠬᠢᠵᠤ ᠴᠤ᠌ ᠪᠠᠢᠭᠰᠠᠨ ᠡᠴᠢᠭᠡ ᠨᠢ ᠬᠥᠮᠦᠨ ᠦ᠌ ᠤᠷᠮᠠ ᠳ᠋ᠤ᠌ ᠦᠭᠡ ᠬᠡᠯᠡᠬᠦ ᠪᠠᠢᠲᠤᠭᠠᠢ᠂ ᠬᠣᠭᠣᠯᠠᠢ ᠵᠠᠰᠠᠵᠤ ᠦᠵᠡᠭᠡ ᠦᠭᠡᠢ ᠭᠡᠨᠡ᠂ ᠬᠠᠷᠢᠨ ᠬᠦᠦ ᠳ᠋ᠡᠭᠡᠨ ᠪᠢᠰᠢ ᠳᠠᠷᠢᠮᠠ ᠳ᠋ᠠᠭᠠᠨ᠄
– ᠡᠨᠡ ᠶᠡᠷᠦ ᠨᠢ ᠬᠥᠮᠦᠨ ᠪᠣᠯᠬᠤ ᠦᠭᠡᠢ ᠰᠢᠦ᠂ ᠶᠠᠭᠠᠬᠢᠨᠠ ᠳᠠ᠂ ᠬᠡᠦᠬᠡᠳ ᠦ᠋ᠨ ᠵᠠᠩ ᠢ᠋ ᠵᠠᠰᠠᠳᠠᠭ ᠠᠷᠤ ᠶ᠋ᠢᠨ ᠬᠠᠭᠠᠯᠭᠠ ᠪᠠᠢᠳᠠᠭ ᠪᠣᠯᠤᠭᠠᠰᠠᠢ ᠭᠡᠵᠦ ᠪᠠᠢᠨ ᠪᠠᠢᠨ ᠥᠭᠦᠯᠡᠳᠡᠭ ᠪᠠᠢᠵᠠᠢ᠃ ᠲᠡᠭᠡᠬᠦᠯᠡᠷ ᠬᠥᠭᠡᠷᠦᠬᠦᠢ ᠡᠬᠡ ᠬᠥᠮᠦᠨ ᠬᠦᠦ ᠳ᠋ᠡᠭᠡᠨ ᠳᠠᠷᠤᠭᠤᠯᠭᠠ ᠪᠣᠯᠬᠤ ᠣᠪᠣᠭᠠ ᠵᠣᠷᠢᠭᠲᠠᠢ ᠡᠷᠡ ᠶ᠋ᠢ ᠮᠥᠷᠥᠭᠡᠳᠬᠦ ᠨᠢ ᠲᠦᠮᠡᠨ ᠵᠥᠪ ᠪᠢᠵᠡ ᠳᠡ ? ᠲᠡᠭᠡᠭᠡᠳ ᠨᠠᠮᠠ ᠶ᠋ᠢ ᠲᠡᠭᠡᠭᠡᠳ ᠯᠡ ᠠᠪᠳᠠᠭ ᠪᠠᠢᠨᠠ ᠰᠢᠦ᠂ ᠪᠢ ᠳᠠᠷᠢᠮᠠ ᠲᠠᠢ ᠰᠠᠭᠤᠬᠤ ᠪᠣᠯᠤᠭᠰᠠᠨ ᠨᠢ ᠪᠠᠰᠠ ᠤᠴᠢᠷ ᠲᠠᠢ᠂ ᠨᠢᠭᠡ ᠮᠠᠭᠤ ᠭᠠᠢ ᠲᠠᠢ ᠨᠣᠭᠣᠭᠠᠨ ᠬᠤᠷᠠᠭᠠᠨ ᠤ᠋ ᠠᠷᠠᠰᠤ ᠠ᠋ᠴᠠ ᠪᠣᠯᠤᠭᠰᠠᠨ ᠶᠤᠮ᠃
ᠬᠡᠦᠬᠡᠨ ᠨᠦ᠍ᠭᠦᠳ ᠦ᠋ᠨ ᠡᠨᠡ ᠣᠨ ᠤ᠋ ᠡᠪᠦᠯ ᠦ᠋ᠨ ᠬᠤᠪᠴᠠᠰᠤᠨ ᠤ᠋ ᠵᠠᠭᠪᠤᠷ ᠨᠣᠭᠣᠭᠠᠨ ᠬᠤᠷᠠᠭᠠᠨ ᠤ᠋ ᠠᠷᠠᠰᠤ ᠪᠠᠷ ᠵᠠᠬᠠᠯᠠᠵᠤ ᠡᠮᠵᠢᠭᠰᠡᠨ ᠤᠭᠲᠤᠷ ᠫᠠᠯᠢᠲ᠋ᠣ᠋ ②᠂ ᠪᠠᠰᠠ ᠨᠣᠭᠣᠭᠠᠨ ᠬᠤᠷᠠᠭᠠᠨ ᠰᠡᠪᠰᠡᠭ ᠲᠠᠢ ᠬᠠᠷᠠ ᠬᠢᠯᠢᠩ ᠮᠠᠯᠠᠭᠠᠢ ᠪᠠᠢᠬᠤ ᠶᠤᠮ ᠭᠡᠨᠡ᠃ ᠨᠢᠭᠡ ᠰᠡᠳᠬᠦᠯ ᠳᠡᠭᠡᠷᠡ ᠲᠡᠭᠡᠭᠡᠳ ᠪᠢᠴᠢᠴᠢᠬᠡᠭᠰᠡᠨ ᠢ᠋ ᠬᠠᠨᠳᠠ ᠦᠵᠡᠭᠡᠳ᠄
– ᠯᠣᠴᠢᠨ ᠮᠢᠨᠢ᠂ ᠨᠣᠭᠣᠭᠠᠨ ᠬᠤᠷᠠᠭᠠᠨ ᠤ᠋ ᠠᠷᠠᠰᠤ ᠶᠢ ᠲᠦᠷᠭᠡᠨ ᠣᠯᠣᠶᠠ᠃ ᠲᠡᠭᠡᠬᠦ ᠦᠭᠡᠢ ᠪᠣᠯ ᠨᠠᠮᠠ ᠶᠢ ᠡᠮᠡᠭ᠍ᠲᠡᠢ ᠬᠥᠮᠥᠨ ᠭᠡᠵᠦ ᠬᠡᠨ ᠴᠤ᠌ ᠬᠠᠷᠠᠬᠤ ᠦᠭᠡᠢ ᠪᠣᠯᠤᠯᠠ ᠰᠢᠦ ᠭᠡᠵᠦ ᠨᠠᠳᠠ ᠬᠡᠯᠡᠪᠡ᠃
– ᠪᠢ ᠳᠡᠷᠡᠨ ᠢ᠋ ᠴᠢᠨᠢ ᠬᠠᠮᠢᠭᠠ ᠠ᠋ᠴᠠ ᠣᠯᠬᠤ ᠪᠢᠯᠡ᠂ 《 ᠨᠣᠭᠣᠭᠠᠨ ᠬᠤᠷᠠᠭᠠᠨ ᠤ᠋ ᠠᠷᠠᠰᠤ ᠨᠣᠬᠠᠢ ᠶ᠋ᠢᠨ ᠪᠢᠲᠡᠭᠦᠦ ᠲᠤᠭᠤᠷᠠᠢ 》ᠬᠣᠶᠠᠷ ᠡᠨᠡ ᠳᠡᠯᠡᠬᠡᠢ ᠳ᠋ᠦ᠍ ᠪᠠᠢᠳᠠᠭ ᠦᠭᠡᠢ ᠵᠦᠢᠯ ᠪᠢᠵᠡ ᠳᠡ ? ᠭᠡᠰᠡᠨ ᠴᠢᠨᠢ᠄
– ᠶᠠᠮᠠᠷ ᠪᠠᠢᠬᠤ ᠦᠭᠡᠢ ᠶᠠᠭᠤᠮᠠ ᠪᠠᠷ ᠰᠢᠨᠡ ᠵᠠᠭᠪᠤᠷ ᠭᠠᠷᠭᠠᠭᠰᠠᠨ ᠪᠠᠢᠬᠤ ᠤᠤ᠂ ᠵᠠᠪᠠᠯ ᠣᠯᠤᠨᠠ᠂ ᠲᠡᠢᠮᠦ ᠬᠤᠪᠴᠠᠰᠤ ᠡᠮᠦᠰᠦᠭᠡ ᠦᠭᠡᠢ ᠪᠣᠯ ᠬᠡᠦᠬᠡᠨ ᠪᠢᠰᠢ ᠬᠠᠷᠠᠭᠳᠠᠬᠤ ᠨᠢ ᠪᠠᠢᠨᠠ ᠭᠡᠵᠦ ᠠᠶᠠᠭᠠ ᠴᠠᠢ ᠤᠤᠭᠤᠬᠤ ᠴᠤ᠌ ᠵᠠᠪ ᠦᠭᠡᠢ ᠦᠭᠡᠯᠡᠭᠡᠳ ᠠᠮᠤᠷ ᠵᠠᠶᠠᠭᠠ ᠬᠠᠷᠠᠭᠤᠯᠬᠤ ᠶᠠᠭᠤᠮᠠ ᠪᠢᠰᠢ᠃
– ᠨᠣᠭᠣᠭᠠᠨ ᠬᠤᠷᠠᠭᠠᠨ ᠤ᠋ ᠠᠷᠠᠰᠤ ᠡᠮᠦᠰᠦᠭᠡ ᠦᠭᠡᠢ ᠪᠦᠰᠡᠭᠦᠢ ᠬᠥᠮᠦᠨ ᠪᠦᠰᠡᠭᠦᠢ ᠪᠣᠯᠵᠤ ᠬᠠᠷᠠᠭᠳᠠᠭᠠ ᠦᠭᠡᠢ ᠶᠦᠮ ᠪᠣᠯ ᠪᠣᠯᠢᠵᠤ ᠯᠠ ᠣᠷᠬᠢᠨᠠ ᠪᠢᠵᠡ ᠳᠡ᠃ ᠵᠠᠪᠠᠯ ᠪᠦᠰᠡᠭᠦᠢ ᠬᠠᠷᠠᠭᠳᠠᠬᠤ ᠠᠯᠪᠠ ᠤᠤ? ᠲᠡᠳᠡ ᠴᠢᠮᠠ ᠶ᠋ᠢ ᠶᠠᠭᠤ ᠯᠠ ᠭᠡᠵᠦ ᠬᠠᠷᠠᠭᠳᠠᠭᠰᠠᠨ ᠪᠣᠢ᠂ ᠬᠠᠷᠠᠵᠤ ᠯᠠ ᠪᠠᠢᠭ᠃ ᠴᠢ ᠴᠢᠨᠢ ᠨᠥᠬᠥᠷ ᠲᠡᠢ᠂ ᠬᠡᠦᠬᠡᠳ ᠲᠡᠢ᠂ ᠨᠢᠭᠡ ᠶᠣᠰᠣᠨ ᠳ᠋ᠠᠭᠠᠨ ᠮᠠᠨ ᠤ᠋ ᠭᠡᠷ ᠦ᠋ᠨ ᠬᠠᠲᠤᠨ ᠬᠠᠭᠠᠨ ᠭᠡᠳᠡᠭ ᠢ᠋ ᠴᠢᠨᠢ ᠣᠯᠠᠨ ᠲᠦᠮᠡᠨ ᠮᠡᠳᠡᠨᠡ᠃ ᠲᠡᠷᠡ ᠪᠠᠢᠲᠤᠭᠠᠢ ᠴᠢᠮᠠ ᠶ᠋ᠢ ᠡᠬᠡᠨᠡᠷ ᠨᠢ᠂ ᠨᠠᠮᠠ ᠶ᠋ᠢ ᠨᠥᠬᠥᠷ ᠨᠢ ᠭᠡᠳ ᠪᠠᠲᠤᠯᠠᠭᠠᠳ ᠦᠭᠭᠦᠭᠰᠡᠨ ᠭᠡᠷ ᠪᠦᠯᠢ ᠶ᠋ᠢᠨ ᠪᠠᠲᠤᠯᠠᠭᠠ ᠪᠣᠢ ᠰᠢᠦ ᠳᠡ ᠭᠡᠵᠦ ᠬᠡᠯᠡᠵᠦ ᠦᠵᠡᠯᠡ᠃ ᠪᠠᠲᠤᠯᠠᠭᠠ ᠶ᠋ᠢ ᠶᠡᠷᠦ ᠠᠪᠴᠤ ᠬᠡᠯᠡᠯᠴᠡᠬᠦ ᠶᠠᠭᠤᠮᠠ ᠪᠢᠰᠢ᠃ ᠨᠣᠭᠣᠭᠠᠨ ᠬᠤᠷᠠᠭᠠᠨ ᠤ᠋ ᠠᠷᠠᠰᠤ ᠯᠠ ᠪᠠᠢᠪᠠᠯ ᠨᠢᠭᠡ ᠵᠢᠯ ᠳ᠋ᠡᠭᠡᠨ ᠭᠡᠷ ᠪᠦᠯᠢ ᠶ᠋ᠢᠨ ᠬᠠᠤᠯᠢ᠂ ᠰᠢᠭᠦᠬᠦ ᠶ᠋ᠢᠨ ᠲᠣᠭᠲᠠᠭᠠᠯ᠂ ᠭᠡᠷᠡᠴᠢᠯᠡᠭᠡ ᠪᠠᠲᠤᠯᠠᠭᠠ ᠬᠠᠮᠢᠶᠠ ᠦᠭᠡᠢ ᠭᠡᠨᠡ᠃ ᠪᠢ ᠨᠥᠭᠥᠭᠡ ᠭᠠᠢ ᠲᠠᠢ ᠬᠤᠷᠠᠭᠠᠨ ᠤ᠋ ᠠᠷᠠᠰᠤ ᠶ᠋ᠢ ᠬᠠᠢᠵᠤ ᠬᠠᠪᠤᠷ ᠠ᠋ᠴᠠ ᠬᠣᠢᠰᠢ ᠬᠤᠳᠠᠯᠳᠤᠭᠠᠨ ᠤ᠋ ᠪᠦᠬᠦ ᠳᠡᠯᠭᠡᠭᠦᠷ᠂ ᠬᠠᠭᠤᠴᠢᠨ ᠰᠢᠨᠡ ᠵᠠᠬᠠ᠂ ᠶᠡᠷᠦ ᠨᠢ ᠶᠠᠪᠤᠭᠠ ᠦᠭᠡᠢ ᠭᠠᠵᠠᠷ ᠦᠭᠡᠢ᠂ ᠬᠠᠢᠭᠠᠳ ᠬᠠᠢᠭᠠᠳ ᠶᠠᠪᠤᠭᠰᠠᠨ ᠬᠥᠯ ᠦ᠋ᠨ ᠭᠠᠷᠤᠵᠠ᠂ ᠰᠤᠷᠤᠭᠰᠠᠨ ᠬᠡᠯᠡᠨ ᠦ᠌ ᠭᠠᠷᠤᠵᠠ ᠶᠤᠮ᠃ ᠠᠳᠠ ᠲᠡᠨᠳᠡ ᠦᠭᠡᠢ ᠯᠡ ᠮᠢᠨᠦ ᠢᠵᠢᠯᠢ ᠪᠣᠯᠤᠭᠰᠠᠨ ᠬᠠᠷᠠᠴᠤᠤᠯ ᠬᠡᠦᠬᠡᠨ ᠨᠦ᠍ᠭᠦᠳ ᠲᠠᠭᠠᠷᠠᠯᠳᠤᠨᠠ᠃
ᠠᠷᠭᠠ ᠪᠠᠨ ᠪᠠᠷᠠᠬᠤ ᠳ᠋ᠠᠭᠠᠨ ᠨᠥᠬᠥᠭᠡ ᠰᠡᠳᠬᠦᠯ ᠦ᠋ᠨ ᠭᠠᠵᠠᠷ ᠨᠢ ᠣᠴᠢᠵᠤ᠄
– ᠲᠠ ᠨᠠᠷ ᠪᠠᠢᠬᠤ ᠦᠭᠡᠢ ᠡᠳ᠋ ᠢ᠋ᠶ᠋ᠡᠷ ᠶᠠᠭᠠᠬᠢᠵᠤ ᠬᠤᠪᠴᠠᠰᠤᠨ ᠤ᠋ ᠵᠠᠭᠪᠤᠷ ᠭᠠᠷᠭᠠᠳᠠᠭ ᠤᠯᠤᠰ ᠪᠣᠢ ? ᠭᠡᠰᠡᠨ ᠴᠢᠨᠢ᠄
– ᠪᠠᠢᠭᠠ ᠯᠠ ᠪᠣᠯᠤᠭᠠᠳ ᠭᠠᠷᠭᠠᠭᠰᠠᠨ ᠪᠠᠢᠯᠭᠦᠢ᠂ ᠦᠢᠯᠡᠳᠪᠦᠷᠢ ᠶ᠋ᠢᠨ ᠵᠢᠷᠤᠭᠠᠴᠢᠳ ᠨᠣᠭᠣᠭᠠᠨ ᠪᠣᠳᠣᠭ ᠪᠠᠢᠵᠤ ᠪᠠᠢᠭᠠᠳ ᠵᠢᠷᠤᠵᠤ ᠪᠣᠯᠤᠭᠰᠠᠨ ᠶᠤᠮ ᠴᠢᠨᠢ ᠪᠠᠢᠵᠤ ᠯᠠ ᠲᠠᠭᠠᠷᠠᠨᠠ ᠳᠠ ᠬᠡᠴᠢᠭᠡᠳ ᠥᠭᠡᠷᠡ ᠶᠠᠭᠤᠮᠠ ᠬᠡᠯᠡᠳᠡᠭ ᠦᠭᠡᠢ ᠰᠢᠦ᠃ ᠲᠡᠭᠡᠭᠡᠳ ᠡᠬᠡᠨᠡᠷ ᠲᠡᠭᠡᠨ ᠢᠷᠡᠵᠦ ᠢᠩᠭᠢᠵᠦ ᠤᠴᠢᠷ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠬᠡᠯᠡᠯᠡ᠃
– ᠵᠠ ᠡᠪᠦᠭᠡᠨ ᠴᠢᠨᠢ ᠶᠠᠭᠠᠬᠢᠭᠠᠳ ᠴᠤ᠌ ᠡᠨᠡ ᠵᠢᠯ ᠴᠢᠮᠠ ᠶ᠋ᠢ ᠬᠡᠦᠬᠡᠨ ᠰᠢᠭ ᠬᠡᠦᠬᠡᠨ ᠬᠠᠷᠠᠭᠳᠠᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠶᠦᠮ ᠪᠠᠢᠨᠠ᠃ ᠴᠢ ᠨᠣᠭᠣᠭᠠᠨ ᠬᠤᠷᠠᠭᠠᠨ ᠤ᠋ ᠠᠷᠠᠰᠤ ᠣᠯᠴᠢᠬᠠᠬᠤ ᠪᠠᠷ ᠠᠷᠭᠠ ᠰᠠᠮᠪᠠᠭᠠ ᠲᠠᠢ ᠡᠷᠡ ᠲᠡᠢ ᠭᠠᠭᠴᠠ ᠵᠢᠯ ᠴᠤ᠌ ᠪᠣᠯᠲᠤᠭᠠᠢ᠂ ᠭᠠᠭᠴᠠ ᠰᠠᠷᠠ ᠴᠤ᠌ ᠶᠠᠭᠠᠬᠢᠬᠤ ᠪᠣᠢ ᠬᠠᠮᠢᠶᠠ ᠦᠭᠡᠢ ᠰᠠᠭᠤᠵᠤ ᠦᠵᠡᠭᠡᠴᠢ᠃ ᠴᠢᠮᠠ ᠶ᠋ᠢ ᠨᠣᠭᠣᠭᠠᠨ ᠬᠤᠷᠠᠭᠠᠨ ᠤ᠋ ᠠᠷᠠᠰᠤᠨ ᠬᠤᠪᠴᠠᠰᠤ ᠲᠠᠢ ᠪᠣᠯᠤᠭᠠᠳ ᠣᠷᠬᠢᠪᠠᠯ ᠮᠠᠷᠭᠠᠰᠢ ᠠ᠋ᠴᠠ ᠨᠢ ᠡᠬᠢᠯᠡᠭᠡᠳ ᠯᠡ ᠪᠢ ᠪᠠᠳᠣᠯᠠᠭᠠ ᠭᠡᠷᠡᠴᠢᠯᠡᠭᠡ ᠪᠡᠨ ᠦᠵᠡᠭᠦᠯᠵᠦ ᠵᠠᠳᠠ ᠵᠠᠷᠭᠤᠯᠳᠤᠵᠤ ᠶᠠᠪᠤᠭᠠᠳ ᠪᠤᠴᠠᠭᠠᠭᠠᠳ ᠠᠪᠴᠤ ᠴᠢᠳᠠᠨᠠ ᠭᠡᠪᠡ᠃ ᠮᠢᠨᠦ ᠪᠦᠳᠦᠭᠦᠯᠢᠭ ᠢ᠋ ᠰᠠᠢᠨ ᠮᠡᠳᠡᠬᠦ ᠠᠪᠠᠭᠠᠢ ᠮᠠᠨᠢ ᠴᠤ᠌ ᠦᠭᠡᠨ ᠳ᠋ᠦ᠍ ᠣᠷᠣᠵᠤ ᠠᠷᠭᠠ ᠰᠠᠮᠪᠠᠭᠠ ᠲᠠᠢ ᠪᠠᠷ ᠨᠢ ᠲᠣᠭᠮᠢᠳ ᠢ᠋ ᠲᠦᠰᠢᠭᠰᠡᠨ ᠬᠡᠷᠡᠭ᠃ ᠠ ᠬᠠᠷᠢᠨ ᠲᠣᠭᠮᠢᠳ ᠥᠭᠡᠷᠡ ᠶᠠᠭᠤᠮᠠ ᠪᠣᠳᠣᠵᠤ ᠁ ᠵᠠ ᠪᠣᠯᠢᠶᠠ᠂ ᠪᠢᠴᠢᠪᠡᠯ ᠨᠡᠯᠢᠶᠡᠳ ᠶᠠᠭᠤᠮᠠ ᠪᠠᠢᠨᠠ ᠰᠠᠨᠵᠠᠢ᠃ ᠰᠢᠨᠡᠬᠡᠨ ᠭᠡᠷᠯᠡᠭᠰᠡᠨ ᠬᠥᠮᠦᠨ ᠭᠡᠬᠦ ᠳ᠋ᠦ᠍ ᠡᠬᠡᠨᠡᠷ ᠢ᠋ᠶ᠋ᠡᠨ ᠭᠠᠭᠴᠠᠭᠠᠷ ᠢ᠋ ᠨᠢ ᠤᠨᠲᠠᠯᠭᠠ ᠶ᠋ᠢᠨ ᠥᠷᠥᠭᠡᠨ ᠳ᠋ᠦ᠍ ᠣᠷᠬᠢᠴᠢᠬᠠᠭᠠᠳ ᠠᠳᠠ ᠵᠣᠭᠳᠣᠢᠭᠠᠳ ᠰᠠᠭᠤᠬᠤ ᠶ᠋ᠢᠨ ᠬᠡᠷᠡᠭ ᠶᠠᠭᠤ ᠪᠠᠢᠨᠠ᠂ ᠬᠥᠬᠡᠷᠦᠬᠦᠢ ᠠᠮᠢᠲᠠᠨ ᠭᠣᠮᠣᠳᠠᠨᠠ ᠪᠠᠢᠭᠠ ᠳ᠋ᠠ᠃
– – – –
① ᠤᠷᠤᠭ ᠪᠦᠷᠢᠳᠬᠡᠭᠦᠯᠬᠦ
② ᠳᠤᠯᠠᠭᠠᠨ ᠬᠤᠪᠴᠠᠰᠤ ᠂ ᠳ᠋ᠠᠴᠠᠩ
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃