ᠮᠢᠨᠦ ᠴᠣᠩᠬᠣ ᠪᠠᠷ- ᠷ ᠴᠣᠢᠨᠣᠮМиний цонхоор-Р Чойном
308ᠮᠢᠨᠦ ᠴᠣᠩᠬᠣ ᠪᠠᠷ
ᠷ ᠴᠣᠢᠨᠣᠮ
ᠮᠢᠨᠦ ᠴᠣᠩᠬᠣᠨ ᠤ᠋ ᠡᠮᠦᠨᠡᠭᠦᠷ
ᠬᠥᠮᠦᠨ ᠦ᠌ ᠶᠡᠬᠡ ᠮᠥᠷᠡᠨ ᠤᠷᠤᠰᠤᠨᠠ
ᠠᠯᠳᠠᠭᠠ ᠤᠨᠤᠭᠠ ᠪᠠᠷ ᠳᠠᠪᠠᠯᠭᠠᠯᠠᠩᠬᠠᠨ
ᠠᠮᠢᠳᠤ ᠰᠢᠮᠫᠣᠨᠢ ᠦᠶᠡᠷᠯᠡᠨᠡ
ᠣᠯᠠᠨ ᠮᠢᠩᠭᠠᠨ ᠬᠥᠯ ᠢ᠋ᠶ᠋ᠡᠷ
ᠣᠷᠴᠢᠯᠠᠩ ᠤ᠋ᠨ ᠬᠠᠷᠠ ᠴᠠᠭᠠᠨ ᠬᠣᠶᠠᠷ ᠨᠢᠷ ᠨᠢᠷ ᠠᠯᠬᠤᠯᠠᠨᠠ
ᠠᠶᠤᠵᠤ ᠳᠡᠭᠳᠡᠬᠦ ᠲᠣᠭᠣᠰᠣ ᠪᠠᠷ ᠨᠢ
ᠣᠷᠴᠢᠨ ᠦᠶᠡ ᠶ᠋ᠢᠨ ᠮᠢᠨᠢ ᠵᠢᠷᠭᠠᠯ ᠵᠣᠪᠠᠯᠠᠩ ᠬᠣᠶᠠᠷ ᠠᠯᠠᠭᠯᠠᠩᠬᠠᠨ ᠳᠡᠭᠳᠡᠨᠡ
ᠳᠤᠷᠠᠨ ᠬᠠᠷᠠ ᠨᠢᠳᠦᠨ ᠦ᠌ ᠤᠷᠠᠨ ᠵᠢᠷᠣᠭᠠ ᠬᠠᠷᠠᠴᠠᠨ ᠳ᠋ᠤ᠌
ᠳᠤᠷᠠᠯᠠᠵᠤ ᠬᠠᠭᠠᠴᠠᠬᠤ ᠬᠣᠶᠠᠷ ᠭᠡᠷᠡᠯ ᠰᠡᠭᠦᠳᠡᠷ ᠰᠢᠭ ᠡᠭᠡᠯᠵᠢᠯᠡᠨᠡ
ᠲᠤᠩ ᠴᠠᠭᠠᠨ ᠰᠢᠳᠦ᠂ ᠭᠦᠨ ᠤᠯᠠᠭᠠᠨ ᠤᠷᠤᠭᠤᠯ
ᠳᠠᠭᠤᠯᠠᠬᠤ ᠤᠬᠢᠯᠠᠬᠤ ᠬᠣᠶᠠᠷ ᠡᠳᠦᠷ ᠰᠥᠨᠢ ᠰᠢᠭ ᠰᠡᠯᠭᠦᠨᠡ
ᠬᠥᠮᠦᠨ ᠬᠡᠮᠡᠬᠦ ᠠᠯᠳᠠᠷ ᠢ᠋ ᠬᠦᠷᠲᠡᠵᠦ ᠶᠠᠪᠤᠬᠤ ᠨᠠᠰᠤᠨ ᠳ᠋ᠤ᠌
ᠬᠦᠰᠡᠵᠦ ᠵᠢᠭᠰᠢᠬᠦ ᠬᠣᠶᠠᠷ ᠴᠠᠭ ᠤ᠋ᠨ ᠵᠡᠭᠦᠦ ᠰᠢᠭ ᠡᠷᠭᠢᠨᠡ
ᠡᠨᠡ ᠪᠦᠬᠦᠨ ᠢ᠋ ᠪᠠᠭᠲᠠᠭᠠᠭᠰᠠᠨ ᠬᠥᠮᠦᠨ ᠦ᠌ ᠶᠡᠬᠡ ᠮᠥᠷᠡᠨ
ᠡᠷᠢᠶᠡᠨ ᠨᠢ ᠳᠣᠲᠣᠷᠠ ᠪᠠᠨ ᠰᠠᠢᠬᠠᠨ ᠨᠢ ᠭᠠᠳᠠᠨᠠ ᠪᠠᠨ ᠴᠣᠩᠬᠣᠨ ᠤ᠋ ᠴᠠᠭᠠᠭᠤᠷ ᠤᠷᠤᠰᠤᠨᠠ
ᠡᠭᠡᠯ ᠰᠢᠯᠦᠭᠴᠢ ᠨᠠᠳᠠ ᠲᠠᠢ ᠨᠡᠢᠭᠡᠮ ᠦ᠋ᠨ ᠬᠦᠢ ᠪᠡᠷ ᠢ᠋ᠶ᠋ᠡᠨ ᠬᠣᠯᠪᠣᠭᠠ ᠲᠠᠢ
ᠡᠷᠢᠨ ᠴᠠᠭ ᠤ᠋ᠨ ᠮᠢᠨᠢ ᠰᠠᠴᠠᠭᠤᠳᠠᠨ᠂ ᠠᠬᠠᠨ ᠳᠡᠭᠦᠦᠰ ᠥᠩᠭᠡᠷᠡᠨᠡ
ᠱ᠌ᠢᠷᠦ ᠰᠤᠪᠤᠳ ᠰᠢᠭ᠋ ᠶᠠᠪᠤᠭᠠᠳ ᠬᠦᠷᠢ ᠬᠣᠷᠣᠬᠠᠢ ᠰᠢᠭ᠋ ᠪᠣᠯᠤᠭᠰᠠᠨ
ᠰᠢᠲᠦ ᠦᠭᠡᠢ ᠪᠤᠭᠤᠷᠤᠯ ᠨᠠᠰᠤᠲᠠᠨ ᠲᠠᠶᠠᠭ ᠲᠦᠰᠢᠨ ᠰᠠᠵᠢᠯᠠᠨᠠ
ᠰᠢᠭᠦᠷ ᠦ᠋ᠨ ᠰᠢᠨᠠᠭᠠ ᠰᠢᠭ᠋ ᠪᠣᠯᠬᠤ ᠥᠲᠡᠯᠡ ᠨᠠᠰᠤᠨ ᠳ᠋ᠠᠭᠠᠨ ᠶᠠᠭᠠᠷᠠᠭᠰᠠᠨ
ᠰᠢᠭᠦᠳᠡᠷᠢ ᠶ᠋ᠢᠨ ᠳᠤᠰᠤᠯ ᠠᠳᠠᠯᠢ ᠴᠡᠯ ᠵᠠᠯᠠᠭᠤᠰ ᠴᠤ᠌ ᠠᠯᠬᠤᠨᠠ
ᠮᠥᠩᠭᠥ ᠪᠡᠷ ᠳᠤᠲᠠᠬᠤ ᠶ᠋ᠢᠨ ᠵᠣᠪᠠᠯᠠᠩ ᠢ᠋ ᠦᠵᠡᠭᠡ ᠦᠭᠡᠢ ᠡᠷᠡ
ᠮᠥᠷ ᠳᠡᠭᠡᠷᠡᠬᠢ ᠪᠡᠨ ᠲᠣᠭᠣᠬᠤ ᠦᠭᠡᠢ ᠳᠦᠯᠡᠢ ᠬᠥᠮᠦᠨ ᠰᠢᠭ ᠵᠠᠯᠠᠷᠠᠨᠠ
ᠥᠩᠭᠡ ᠪᠡᠷ ᠳᠤᠲᠠᠬᠤ ᠶ᠋ᠢᠨ ᠵᠣᠪᠠᠯᠠᠩ ᠢ᠋ ᠦᠵᠡᠭᠡ ᠦᠭᠡᠢ ᠡᠮᠡ
ᠥᠪᠡᠷ ᠡᠴᠡ ᠪᠡᠨ ᠪᠤᠰᠤᠳ ᠢ᠋ ᠲᠣᠭᠣᠬᠤ ᠦᠭᠡᠢ ᠰᠣᠬᠣᠷ ᠬᠥᠮᠦᠨ ᠰᠢᠭ ᠮᠣᠷᠢᠯᠠᠨᠠ
ᠬᠣᠶᠠᠷ ᠵᠠᠭᠤᠨ ᠬᠣᠷᠢ ᠠ᠋ᠴᠠ ᠢᠯᠡᠭᠦᠦ ᠶ᠋ᠢ ᠲᠣᠭᠠᠯᠠᠵᠤ ᠦᠵᠡᠭᠡ ᠦᠭᠡᠢ
ᠬᠣᠭᠣᠰᠣᠨ ᠶᠠᠳᠠᠭᠤ ᠴᠡᠪᠡᠷᠯᠡᠭᠴᠢ ᠲᠥᠮᠥᠰᠥ ᠨᠣᠭᠣᠭᠠᠨ ᠳ᠋ᠤ᠌ ᠰᠠᠵᠢᠯᠠᠨᠠ
ᠪᠤᠰᠤᠳ ᠤ᠋ᠨ ᠨᠢᠳᠦᠨ ᠦ᠌ ᠬᠠᠷᠠᠴᠠ ᠶ᠋ᠢ
ᠪᠤᠯᠢᠶᠠᠬᠤ ᠠᠵᠠ ᠦᠭᠡᠢ ᠲᠥᠷᠥᠭᠰᠡᠨ
ᠪᠠᠭᠤᠷᠠᠢ ᠴᠢᠷᠠᠢ ᠲᠠᠢ ᠬᠡᠦᠬᠡᠨ
ᠪᠤᠯᠲᠠᠨ ᠴᠥᠬᠥᠷᠡᠨ ᠠᠯᠬᠤᠨᠠ
ᠠᠭᠤᠷᠬᠠᠢ ᠦᠢᠯᠡᠳᠪᠦᠷᠢ ᠳ᠋ᠦ᠍ ᠠᠵᠢᠯᠯᠠᠳᠠᠭ ᠬᠥᠳᠡᠯᠮᠦᠷᠢ ᠶ᠋ᠢᠨ ᠰᠠᠢᠴᠤᠤᠯ᠂
ᠤᠭᠰᠠᠷᠠᠭᠠ ᠣᠯᠠᠨ ᠡᠨᠭᠢ ᠯᠸᠨ᠋ᠲ ᠲᠡᠢ ᠴᠡᠷᠢᠭ ᠴᠤᠤᠬᠠ ᠶ᠋ᠢᠨ ᠭᠠᠪᠢᠶᠠᠲᠠᠨ
ᠤᠷᠠᠨ ᠵᠢᠷᠤᠭᠠᠴᠢ᠂ ᠪᠠᠭᠰᠢ᠂ ᠬᠥᠭᠵᠢᠮ ᠦ᠋ᠨ ᠵᠣᠬᠢᠶᠠᠯᠴᠢ᠂ ᠡᠮᠴᠢ
ᠤᠰᠤ ᠴᠠᠭ ᠠᠭᠠᠷ ᠤ᠋ᠨ ᠰᠢᠨᠵᠢᠭᠡᠴᠢ᠂ ᠨᠢᠭᠡᠳᠦᠯ ᠦ᠋ᠨ ᠳᠠᠷᠤᠭᠠ ᠨᠠᠷ ᠠᠯᠬᠤᠨᠠ
ᠠᠵᠢᠯ ᠬᠥᠳᠡᠯᠮᠦᠷᠢ ᠡᠴᠡ ᠪᠣᠯᠤᠨ ᠲᠡᠮᠡᠴᠡᠯ ᠡᠴᠡ ᠬᠣᠢᠰᠢ ᠰᠠᠭᠤᠵᠤ
ᠠᠮᠠᠷᠠᠭ ᠰᠠᠳᠤᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠡᠵᠢᠭᠡᠯᠭᠡᠭᠰᠡᠨ ᠦᠬᠦᠮᠡᠯ ᠵᠠᠯᠠᠭᠤᠰ ᠴᠤ᠌ ᠬᠡᠯᠲᠦᠷᠢᠨᠡ
ᠠᠷᠢᠬᠢ ᠲᠣᠭᠯᠠᠭᠠᠮ ᠬᠣᠶᠠᠷ ᠲᠤ᠌ ᠰᠡᠳᠬᠢᠯ ᠵᠢᠷᠦᠬᠡ ᠪᠡᠨ ᠥᠭᠭᠦᠭᠰᠡᠨ
ᠠᠳᠠᠭ ᠤ᠋ᠨ ᠭᠡᠶᠦᠷᠡᠭᠴᠢ ᠬᠢᠭᠡᠳ ᠵᠠᠬᠠ ᠶ᠋ᠢᠨ ᠯᠤᠢᠪᠠᠷᠴᠢᠨ ᠴᠤ᠌ ᠥᠩᠭᠡᠷᠡᠨᠡ
ᠡᠭᠦᠯᠡᠨ ᠳᠡᠭᠡᠷᠡ ᠭᠢᠰᠬᠢᠵᠦ ᠶᠠᠪᠤᠳᠠᠭ ᠡᠬᠡ ᠣᠷᠣᠨ ᠤ᠋ ᠨᠢᠰᠦᠭᠴᠢᠳ
ᠦᠨᠡᠰᠦᠨ ᠳᠡᠭᠡᠷᠡ ᠬᠥᠷᠪᠡᠭᠡᠵᠦ ᠬᠡᠪᠲᠡᠬᠦ ᠡᠷᠡᠭᠡ ᠴᠡᠭᠡᠷ ᠦᠭᠡᠢ ᠪᠠᠭᠠᠰᠢᠲᠠᠨ
ᠦᠬᠦᠯ ᠡᠴᠡ ᠬᠥᠮᠦᠨ ᠢ᠋ ᠠᠪᠤᠷᠠᠳᠠᠭ ᠡᠮᠴᠢ ᠰᠤᠪᠢᠯᠠᠭᠴᠢ ᠬᠢᠭᠡᠳ
ᠦᠵᠦᠭᠦᠷᠲᠦ ᠮᠡᠰᠡ
ᠲᠦᠷᠡᠢᠯᠡᠭᠰᠡᠨ ᠠᠯᠠᠭᠤᠷᠴᠢ ᠪᠠᠰᠠ ᠠᠯᠬᠤᠨᠠ
ᠮᠠᠷᠭᠠᠰᠢ ᠣᠯᠬᠤ ᠠᠯᠳᠠᠷ ᠢ᠋ᠶ᠋ᠠᠨ ᠳᠡᠪᠲᠡᠷ ᠳᠣᠲᠣᠷᠠ ᠪᠠᠨ ᠴᠡᠴᠡᠭᠯᠡᠭᠦᠯᠦᠭᠰᠡᠨ
ᠮᠠᠨᠳᠤᠬᠤ ᠨᠠᠷᠠ ᠰᠢᠭ᠋ ᠰᠢᠨᠡᠬᠡᠨ ᠢᠷᠠᠭᠤ ᠨᠠᠢᠷᠠᠭᠴᠢ ᠴᠤ᠌ ᠠᠯᠬᠤᠨᠠ
ᠰᠡᠷᠭᠦᠨ ᠮᠠᠨᠳᠤᠯᠲᠠ ᠶ᠋ᠢᠨ ᠲᠩᠷᠢ ᠮᠢᠺᠧᠯ ᠳᠧ ᠢᠽᠸᠳ᠋ᠰᠺᠢ ᠳ᠋ᠠᠸᠢᠳ᠋ ᠰᠢᠭ᠋
ᠰᠡᠪ ᠦᠭᠡᠢ ᠰᠠᠢᠬᠠᠨ ᠪᠡᠶᠡ ᠲᠡᠢ ᠵᠠᠯᠠᠭᠤ ᠦᠶᠡ ᠮᠢᠨᠢ ᠠᠯᠬᠤᠨᠠ
《 ᠰᠢᠺᠧᠱᠺᠧᠨ᠋ᠰᠺᠠᠶᠠ》 ᠮᠠᠨᠳᠤᠯᠢᠶᠠ ᠰᠢᠭ᠋ ᠪᠤᠯᠪᠠᠷᠠᠢ ᠥᠬᠢᠨ ᠢ᠋ ᠵᠢᠷᠤᠭᠯᠠᠭᠰᠠᠨ
《 ᠰᠧᠨᠧᠨ᠋ᠲ᠋ᠷᠤᠨ》 ᠤ᠋ ᠬᠥᠮᠦᠨ ᠰᠢᠭ ᠬᠠᠭᠤᠴᠢᠨ ᠤ᠋ ᠬᠠᠰᠢᠷ ᠴᠤ᠌ ᠠᠯᠬᠤᠨᠠ
ᠠᠯᠬᠤᠨ ᠠᠯᠬᠤᠨ ᠥᠩᠭᠡᠷᠡᠬᠦ ᠡᠨᠡ ᠯᠡ ᠣᠯᠠᠨ ᠬᠥᠮᠦᠨ
ᠠᠯᠵᠢᠶᠠᠯ ᠴᠡᠩᠭᠡᠯ ᠢ᠋ ᠳᠠᠭᠤᠯᠠᠬᠤ ᠡᠷᠬᠢᠮ ᠣᠯᠠᠨ ᠢᠷᠭᠡᠳ
ᠮᠥᠩᠬᠡ ᠲᠥᠷᠥᠯ ᠥᠭᠡᠳᠡ ᠪᠡᠨ ᠶᠠᠭᠠᠷᠠᠬᠤ ᠪᠤᠳᠠᠩ ᠳᠤᠮᠳᠠᠬᠢ ᠪᠠᠭᠠᠲᠤᠷ ᠤ᠋ᠳ
ᠮᠥᠷ ᠦ᠋ᠨ ᠨᠣᠮ ᠢ᠋ᠶ᠋ᠠᠨ ᠤᠩᠰᠢᠭᠤᠯᠬᠤ ᠪᠤᠷᠬᠠᠨ ᠤ᠋ ᠣᠯᠠᠨ ᠱᠠᠪᠢ
ᠲᠠ ᠪᠦᠬᠦᠨ ᠦ᠌ ᠳᠤᠮᠳᠠ ᠠᠬᠠᠨ ᠳᠡᠭᠦᠦᠰ ᠮᠢᠨᠢ ᠶᠠᠪᠤᠭᠠ
ᠲᠠᠭᠠᠰᠢᠶᠠᠨ ᠤᠴᠠᠷᠠᠬᠤ ᠨᠥᠬᠥᠳ ᠮᠠᠭᠤᠰᠢᠶᠠᠨ ᠬᠣᠯᠠᠳᠬᠤ ᠳᠠᠢᠰᠤᠨ
ᠲᠠᠪᠢᠨ ᠳᠣᠯᠣᠭᠠᠨ ᠣᠨ ᠤ᠋ ᠠᠷᠪᠠᠨ ᠨᠠᠢ᠍ᠮᠠᠲᠠᠢ ᠷᠤᠽᠠ
ᠲᠠᠩᠰᠤᠭ ᠰᠠᠢᠬᠠᠨ ᠰᠡᠳᠬᠢᠯᠳᠦ ᠯᠣᠪᠰᠠᠩᠵᠤᠩᠳᠤᠢ ᠮᠢᠨᠢ ᠶᠠᠪᠤᠭᠠ
ᠪᠠᠢᠭᠠᠯᠢ ᠶ᠋ᠢᠨ ᠳᠣᠭᠰᠢᠨ ᠠᠶᠤᠯ ᠮᠥᠩᠬᠡ ᠶ᠋ᠢᠨ ᠶᠠᠳᠠᠭᠤᠷᠠᠯ ᠬᠣᠶᠠᠷ ᠲᠠᠢ
ᠪᠠᠢᠯᠳᠤᠵᠤ ᠢᠷᠡᠭᠰᠡᠨ ᠪᠠᠭᠠᠲᠤᠷ ᠬᠥᠳᠡᠭᠡ ᠶ᠋ᠢᠨ ᠮᠠᠯᠴᠢᠳ ᠶᠠᠪᠤᠭᠠ
ᠪᠠᠷᠲᠠᠭᠠ ᠶᠡᠬᠡᠲᠡᠢ ᠵᠠᠮ ᠢ᠋ᠶ᠋ᠠᠷ ᠠᠯᠢ ᠴᠤ᠌ ᠬᠢᠵᠠᠭᠠᠷ ᠤ᠋ᠨ ᠠᠷᠠᠳ ᠲᠤ᠌
ᠪᠠᠷᠠᠭᠠ ᠲᠡᠭᠡᠭᠡᠵᠦ ᠬᠦᠷᠭᠡᠳᠡᠭ ᠠᠥ᠋ᠲ᠋ᠥ᠌ ᠶ᠋ᠢᠨ ᠵᠢᠯᠣᠭᠣᠴᠢ ᠨᠠᠷ ᠶᠠᠪᠤᠭᠠ
ᠠᠷᠪᠠᠨ ᠳᠣᠯᠣᠭᠠᠨ ᠨᠠᠰᠤᠨ ᠳ᠋ᠤ᠌ ᠮᠢᠨᠢ ᠰᠠᠢᠨ ᠰᠠᠭᠠᠷᠠᠤ ᠬᠣᠶᠠᠷ ᠢ᠋
ᠠᠳᠠᠯᠢᠬᠠᠨ ᠵᠢᠭᠠᠵᠤ ᠥᠭᠭᠦᠭᠰᠡᠨ ᠭᠣᠮᠪᠤᠰᠦ᠋ᠷᠦᠩ ᠮᠢᠨᠢ ᠶᠠᠪᠤᠭᠠ
ᠠᠮᠠ ᠪᠦᠯᠢ ᠳ᠋ᠡᠭᠡᠨ ᠪᠠᠭᠲᠠᠭᠠᠵᠤ ᠨᠠᠮᠠᠢ ᠲᠡᠵᠢᠭᠡᠵᠦ ᠶᠠᠪᠤᠭᠰᠠᠨ
ᠠᠪᠤ ᠠ᠋ᠴᠠ ᠴᠤ᠌ ᠥᠭᠡᠷᠡ ᠴᠦ᠍ ᠦᠭᠡᠢ ᠠᠴᠢᠲᠠᠨ ᠢᠰᠢᠵᠠᠮᠰᠤ ᠮᠢᠨᠢ ᠶᠠᠪᠤᠭᠠ
ᠬᠦᠴᠦ ᠲᠤᠰᠢᠶᠠᠯ ᠬᠣᠶᠠᠷ ᠢ᠋ᠶ᠋ᠠᠷ ᠵᠠᠬᠢᠷᠴᠤ ᠲᠤᠰᠢᠶᠠᠵᠤ ᠪᠣᠯᠳᠠᠭ ᠦᠭᠡᠢ
ᠬᠦᠢᠲᠡᠨ ᠬᠠᠯᠠᠭᠤᠨ ᠵᠡᠪᠰᠡᠭ ᠢ᠋ᠶ᠋ᠡᠷ ᠰᠦᠬᠦᠷᠡᠭᠡᠵᠦ ᠤᠬᠤᠷᠢᠭᠠᠵᠤ ᠪᠣᠯᠳᠠᠭ ᠦᠭᠡᠢ
ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠲᠡᠦᠬᠡ ᠶ᠋ᠢᠨ
ᠬᠦᠨᠳᠦ ᠴᠤᠪᠤᠭᠠᠨ ᠤ᠋ ᠨᠢᠭᠡᠨ ᠳ᠋ᠦ᠍
ᠡᠭᠡᠯ ᠮᠢᠨᠦ ᠦᠶᠡ ᠶ᠋ᠢᠨ
ᠰᠠᠢᠨ ᠰᠠᠭᠠᠷᠠᠤ ᠪᠦᠬᠦᠨ
ᠤᠶᠠᠩᠭᠠ ᠳᠤᠯᠢᠬᠠᠨ ᠨᠠᠢᠷᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ
ᠬᠠᠢᠷᠠᠯᠠᠵᠤ ᠶᠠᠪᠤᠭᠰᠠᠨ ᠪᠠᠭᠠᠲᠤᠷ ᠤ᠋ᠳ ᠮᠢᠨᠢ
ᠤᠳᠤᠮ ᠬᠣᠢᠴᠢ ᠶ᠋ᠢᠨ ᠰᠢᠯᠦᠭᠴᠢ ᠨᠦ᠍ᠭᠦᠳ
ᠬᠠᠢᠯᠠᠨ ᠳᠠᠭᠤᠯᠠᠬᠤ ᠭᠠᠪᠢᠶᠠᠲᠠᠨ ᠨᠤᠭᠤᠳ ᠮᠢᠨᠢ
ᠪᠠᠶᠠᠨ— ᠪᠠᠷᠠᠭᠠᠲᠤ ᠶ᠋ᠢᠨ ᠲᠡᠮᠦᠷ ᠡᠴᠡ
ᠣᠶᠤᠨᠴᠢᠮᠡᠭ ᠢ᠋ ᠬᠦᠷᠲᠡᠯᠡ
ᠪᠠᠶᠠᠷ ᠭᠤᠨᠢᠭ ᠢ᠋ ᠳᠠᠭᠤᠯᠠᠭᠰᠠᠨ
ᠣᠯᠠᠨ ᠣᠯᠠᠨ ᠳᠠᠭᠤᠴᠢᠳ ᠮᠢᠨᠢ
ᠠᠪᠤᠷᠭᠤ ᠲᠦᠪᠳᠡᠨᠳᠣᠷᠵᠢ ᠠ᠋ᠴᠠ ᠴᠡᠷᠡᠨᠲᠣᠭᠲᠠᠬᠤ ᠶ᠋ᠢ ᠬᠦᠷᠲᠡᠯᠡ
ᠠᠰᠠᠷ ᠤ᠋ᠨ ᠡᠮᠦᠨᠡ ᠳᠠᠪᠠᠭᠰᠠᠨ
ᠠᠷᠤ ᠬᠠᠯᠬᠠ ᠶ᠋ᠢᠨ ᠬᠡᠦᠬᠡᠳ ᠦ᠋ᠳ ᠮᠢᠨᠢ ᠤᠨᠤᠵᠤ
ᠠᠯᠳᠠᠵᠤ ᠶᠠᠪᠤᠭᠰᠠᠨ ᠢᠳᠡᠷ ᠪᠡᠶᠡ ᠶ᠋ᠢᠨ ᠮᠢᠨᠢ ᠲᠠᠰᠤᠷᠬᠠᠢ
ᠣᠯᠠᠨ ᠣᠯᠠᠨ ᠰᠥᠨᠢ ᠨᠣᠢᠷ ᠦᠭᠡᠢ ᠰᠠᠭᠤᠭᠰᠠᠨ ᠤ᠋ ᠮᠢᠨᠢ ᠦᠷᠡ
ᠣᠷᠴᠢᠨ ᠦᠶᠡ ᠮᠢᠨᠢ᠂ ᠣᠩᠭᠣᠨ ᠰᠢᠯᠦᠭ ᠮᠢᠨᠢ
ᠮᠢᠨᠦ ᠴᠣᠩᠬᠣᠨ ᠤ᠋ ᠡᠮᠦᠨᠡᠭᠦᠷ ᠬᠥᠮᠦᠨ ᠦ᠌ ᠶᠡᠬᠡ ᠮᠥᠷᠡᠨ ᠪᠣᠯᠵᠤ
ᠠᠯᠳᠠᠷ ᠦᠬᠦᠯ ᠤᠷᠤᠭᠤ
ᠠᠯᠬᠤᠯᠠᠩᠬᠠᠨ ᠤᠷᠤᠰᠴᠤ ᠪᠠᠢᠨᠠ
ᠥᠪᠡᠷ ᠢ᠋ ᠪᠡᠨ ᠬᠠᠢᠷᠠᠯᠠᠭᠴᠢ ᠶ᠋ᠢᠨ ᠦᠬᠦᠯ
ᠥᠷᠥᠭᠡᠯ ᠢ᠋ ᠬᠠᠢᠷᠠᠯᠠᠭᠴᠢ ᠶ᠋ᠢᠨ ᠠᠯᠳᠠᠷ ᠬᠣᠶᠠᠷ
ᠨᠠᠷᠢᠨ ᠵᠢᠩᠨᠡᠭᠦᠷ ᠦ᠋ᠨ ᠬᠣᠶᠠᠷ ᠲᠠᠪᠠᠭ ᠰᠢᠭ᠋
ᠨᠠᠰᠤᠨ ᠤ᠋ ᠦᠵᠦᠭᠦᠷ ᠲᠦ᠍ ᠬᠦᠯᠢᠶᠡᠵᠦ ᠪᠠᠢᠨᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣᠳᠬᠠᠨᠰᠣ ᠠ᠋
ᠬᠢᠨᠠᠭᠴᠢ᠄ ᠰᠡᠷᠭᠦᠯᠡᠩ᠂ ᠰᠡᠬᠡᠭᠡᠷᠡᠯ᠂ ᠭᠠᠷᠮᠠ