ᠬᠠᠭᠤᠴᠢᠨ ᠬᠥᠮᠦᠨ – ᠢ ᠂ ᠭᠦᠷᠦᠷᠢᠨᠴᠢᠨ Хуучин хүн – И ᠂ Гүрринчин
251ᠬᠠᠭᠤᠴᠢᠨ ᠬᠥᠮᠥᠨ
( ᠬᠣᠱᠣᠩ ᠥᠭᠦᠯᠡᠯᠭᠡ )
ᠰᠢᠨᠡ ᠳᠠᠷᠤᠭᠠ ᠢᠷᠡᠬᠦ ᠪᠡᠷ ᠬᠠᠮᠢᠭᠠ ᠭᠠᠵᠠᠷ ᠤ᠋ᠨ ᠬᠢᠨ ᠬᠠᠷᠠᠴᠠ ᠶᠠᠪᠤᠳᠠᠯ ᠢᠶᠡᠨ ᠵᠥᠭᠡᠯᠡᠰᠬᠢᠵᠦ ᠳᠠᠭᠤ ᠴᠢᠮᠡᠭᠡ ᠪᠡᠨ ᠨᠠᠮᠰᠠᠭᠠᠬᠤ ᠰᠢᠭ᠋ ᠪᠣᠯᠳᠠᠭ᠃ ᠡᠨᠳᠡ ᠶᠠᠭ ᠲᠡᠢᠮᠦ ᠪᠠᠢᠯᠠ᠃ ᠬᠥᠮᠦᠨ ᠪᠦᠷᠢ ᠥᠪᠡᠷ ᠥᠪᠡᠷ ᠦ᠋ᠨ ᠳ᠋ᠦ᠍ ᠪᠢᠲᠡᠭᠦᠦ ᠬᠠᠲᠠᠭᠤ ᠳᠠᠭᠠᠪᠤᠷᠢ ᠠᠪᠢᠶᠠ ᠰᠢᠪᠡᠷ ᠠᠪᠢᠷ ᠶᠠᠷᠢᠯᠴᠠᠨᠠ᠃
– ᠰᠢᠷᠦᠭᠦᠨ ᠭᠡᠵᠦ ᠪᠠᠢᠭᠠ ᠶᠤᠮ ᠳᠠ ᠭᠡᠵᠦ ᠨᠢᠪᠤ ( ᠨᠢᠭᠲᠠᠯᠠᠨ ᠪᠣᠳᠣᠭᠴᠢ ) ᠵᠠᠯᠠᠭᠤ ᠶ᠋ᠢ ᠲᠠᠮᠰᠢᠶᠠᠬᠤ ᠳ᠋ᠤ᠌᠄
– ᠬᠥᠮᠥᠨ ᠦ ᠥ ᠰᠡᠪ ᠢ᠋ ᠠᠨᠳᠠᠳᠠᠭ ᠦᠭᠡᠢ ᠭᠡᠨᠡ ᠯᠡ ᠰᠢᠦ ᠭᠡᠮᠡᠨ ᠪᠢᠴᠢᠭᠡᠴᠢ ᠬᠡᠦᠬᠡᠨ ᠭᠠᠢᠬᠠᠰᠢᠷᠠᠨᠠ᠃
– ᠬᠠᠷᠠᠪᠠᠴᠤ ᠶᠠᠭ ᠦᠭᠡᠢ ᠲᠣᠯᠣᠭᠠᠢ ᠪᠠᠢᠨᠠ ᠪᠢᠯᠡ ᠭᠡᠵᠦ ᠠᠵᠤ ᠠᠬᠤᠢ ᠶ᠋ᠢᠨ ᠳᠠᠷᠤᠭᠠ ᠶ᠋ᠢ ᠳ᠋ᠦᠩᠨᠡᠬᠦ ᠳ᠋ᠦ᠍
– ᠰᠢᠳᠤᠷᠭᠤ ᠬᠥᠮᠦᠨ ᠳ᠋ᠦ᠍ ᠰᠦᠵᠢᠭᠲᠡᠢ ᠭᠡᠵᠦ ᠪᠠᠢᠭᠠ ᠶᠤᠮ ᠳᠠ ᠭᠡᠵᠦ ᠵᠢᠯᠣᠭᠣᠴᠢ ᠠᠢᠯᠠᠳᠤᠯᠠ᠃
ᠨᠢᠲᠠᠭᠠ ᠣᠷᠣᠯᠴᠠᠭᠠ ᠦᠭᠡᠢ ᠴᠤ᠌ ᠭᠡᠰᠡᠨ ᠬᠥᠮᠦᠰ ᠦ᠋ᠨ ᠶᠠᠷᠢᠶᠠ ᠶ᠋ᠢ ᠲᠠᠯᠠ ᠪᠦᠷᠢ ᠡᠴᠡ ᠨᠢ ᠰᠢᠨᠵᠢᠨ ᠳ᠋ᠦᠩᠨᠡᠵᠦ ᠵᠣᠭᠰᠣᠪᠠ ᠃ ᠣᠯᠠᠨ ᠤ᠋ ᠶᠠᠷᠢᠶᠠ ᠣᠷᠣ ᠲᠠᠢ᠂ ᠰᠢᠷᠦᠭᠦᠨ ᠮᠥᠷᠲᠡᠭᠡᠨ ᠬᠥᠮᠥᠨ ᠦ ᠥ ᠰᠡᠪ ᠠᠨᠳᠠᠳᠠᠭ ᠦᠭᠡᠢ᠂ ᠰᠢᠳᠤᠷᠭᠤ ᠬᠥᠮᠦᠨ ᠳ᠋ᠦ᠍ ᠰᠦᠵᠢᠭᠲᠡᠢ᠂ ᠶᠠᠭ ᠦᠭᠡᠢ ᠲᠣᠯᠣᠭᠠᠢ ᠶᠤᠮ ᠳᠠ ᠭᠡᠵᠦ ᠪᠣᠳᠣᠯᠠ᠃ ᠲᠡᠷᠡ ᠬᠡᠵᠢᠶᠡᠨ ᠦ ᠱᠠᠯᠳᠠᠷ ᠪᠤᠯᠳᠠᠷ ᠶᠠᠷᠢᠶᠠᠨ ᠳ᠋ᠤ᠌ ᠬᠤᠳᠬᠤᠯᠳᠤᠬᠤ ᠪᠠᠨ ᠴᠡᠭᠡᠷᠯᠡᠳᠡᠭ ᠬᠥᠮᠦᠨ᠃ 《 ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ ᠳᠠᠷᠠᠭᠠ ᠨᠢ ᠲᠣᠯᠣᠭᠠᠢ ᠣᠷᠢᠶᠠᠵᠤ ᠮᠡᠳᠡᠨᠡ ᠰᠢᠦ ᠳᠡ 》 ᠭᠡᠵᠦ ᠬᠠᠮᠤᠭ ᠤ᠋ᠨ ᠢᠲᠡᠭᠡᠯ ᠲᠡᠢ ᠬᠥᠮᠦᠨ ᠳ᠋ᠡᠭᠡᠨ ᠨᠠᠮ ᠳᠠᠭᠤ ᠪᠠᠷ ᠰᠤᠷᠭᠠᠮᠵᠢᠯᠠᠳᠠᠭ ᠨᠢ ᠲᠡᠭᠦᠨ ᠦ᠌ ᠠᠮᠠᠨ ᠤ᠋ ᠤᠩᠰᠢᠯᠭᠠ ᠪᠣᠯᠣᠭᠰᠠᠨ ᠭᠠᠭᠴᠠ ᠨᠣᠮᠯᠠᠯ ᠪᠠᠢᠯᠠ᠃ ᠰᠢᠨᠡ ᠳᠠᠷᠤᠭᠠ ᠬᠥᠮᠦᠨ ᠪᠦᠬᠦᠨ ᠲᠡᠢ ᠪᠡᠶᠡᠴᠢᠯᠡᠨ ᠠᠭᠤᠯᠵᠠᠵᠤ ᠪᠠᠢᠭᠠ ᠰᠤᠷᠠᠭ ᠳᠤᠭᠤᠯᠤᠭᠠᠳ ᠮᠠᠨ ᠤ᠋ ᠬᠥᠮᠦᠨ ᠦᠰᠦᠴᠢᠨ ᠤᠷᠤᠭᠤ ᠭᠦᠶᠦᠪᠡ᠃ ᠦᠰᠦᠴᠢᠨ ᠳ᠋ᠦ᠍ ᠰᠤᠯᠠ ᠰᠠᠭᠤᠳᠠᠯ ᠪᠠᠢᠭᠰᠠᠨ ᠦᠭᠡᠢ ᠬᠦᠯᠢᠶᠡᠬᠦ ᠬᠡᠷᠡᠭ ᠭᠠᠷᠪᠠ ᠃
– ᠡᠵᠡᠭᠦᠢ ᠬᠣᠢᠭᠤᠷ ᠨᠠᠮᠠ ᠶ᠋ᠢ ᠳᠠᠭᠤᠳᠠᠪᠠᠯ ᠪᠠᠯᠠᠷᠠᠬᠤ ᠨᠢ ᠲᠡᠷᠡ᠃ ᠠᠵᠢᠯ ᠳ᠋ᠠᠭᠠᠨ ᠬᠠᠷᠢᠭᠤᠴᠠᠯᠭᠠ ᠦᠭᠡᠢ᠂ ᠭᠠᠳᠠᠭᠤᠷ ᠳᠡᠮᠡᠢ ᠰᠡᠯᠡᠭᠦᠴᠡᠭᠴᠢ ᠡᠲᠡᠭᠡᠳ ᠭᠡᠳᠡᠭ ᠳ᠋ᠦᠩᠨᠡᠯᠲᠡ ᠳ᠋ᠦ᠍ ᠣᠷᠣᠨᠠ᠃ ᠠ᠋ ᠪᠣᠯᠢᠶᠠ ᠴᠢ ᠮᠢᠨᠢ᠂ ᠶᠡᠷᠦ ᠨᠢ ᠲᠣᠯᠣᠭᠠᠢ ᠣᠷᠢᠶᠠᠵᠤ ᠮᠡᠳᠡᠬᠦ ᠬᠡᠷᠡᠭ ᠭᠡᠳ ᠡᠷᠭᠢᠭᠡᠳ ᠭᠦᠶᠦᠯᠡ᠃
ᠦᠳᠡ ᠡᠴᠡ ᠬᠣᠢᠰᠢ ᠨᠢᠲᠠᠭᠠ ᠶ᠋ᠢ ᠲᠠᠭᠤᠲᠠᠯᠠ᠂ ᠳᠡᠭᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠠᠪᠴᠢᠷᠠᠵᠤ ᠦᠭᠭᠦᠭᠰᠡᠨ ᠴᠣ ᠰᠢᠨᠡ ᠬᠠᠷᠠ ᠳᠡᠪᠲᠡᠷ ᠢ᠋ ᠳᠣᠯᠣᠭᠠ ᠬᠣᠨᠣᠭ ᠤ᠋ᠨ ᠡᠮᠦᠨᠡᠬᠢ ᠰᠣᠨᠢᠨ ᠤ᠋ ᠳ᠋ᠤᠭᠠᠷ᠂ ᠪᠠᠰᠠ ᠨᠢᠭᠡ ᠵᠤᠵᠠᠭᠠᠨ ᠨᠣᠮ ᠤ᠋ᠨ ᠬᠠᠮᠲᠤ ᠰᠤᠭᠤᠪᠴᠢᠯᠠᠵᠤ ᠣᠷᠣᠯᠠ᠃
ᠳᠠᠷᠤᠭᠠ ᠤᠲᠠᠰᠤ ᠪᠠᠷ ᠶᠠᠷᠢᠵᠤ ᠰᠠᠭᠤᠯᠠ᠃ ᠣᠷᠣᠩᠭᠤᠲᠠ ᠨᠢᠳᠦᠨ ᠳ᠋ᠦ᠍ ᠥᠷᠳᠡᠭᠰᠡᠨ ᠬᠢᠮᠤᠰᠤᠨ ᠤ᠋ ᠴᠢᠨᠡᠭᠡ ᠴᠠᠭᠠᠰᠤ ᠶ᠋ᠢ ᠠᠪᠴᠤ ᠬᠣᠭ ᠤ᠋ᠨ ᠰᠠᠪᠠ ᠤᠷᠤᠭᠤ ᠬᠢᠪᠡ᠃ ᠰᠢᠨᠡ ᠳᠠᠷᠤᠭᠠ ᠬᠥᠯ ᠡᠴᠡ ᠨᠢ ᠲᠣᠯᠣᠭᠠᠢ ᠶ᠋ᠢ ᠨᠢ ᠳᠠᠪᠠᠲᠠᠯᠠ ᠰᠢᠷᠳᠡᠬᠦ ᠰᠢᠭ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ᠄
– ᠲᠠ ᠰᠠᠭᠤᠴᠢᠬᠠ ᠭᠡᠳ ᠭᠠᠷ ᠢ᠋ᠶ᠋ᠠᠨ ᠭᠣᠵᠣᠭᠠᠨᠠᠭᠤᠯᠤᠨ ᠰᠠᠨᠳᠠᠯᠢ ᠤᠷᠤᠭᠤ ᠵᠢᠭᠠᠵᠤ᠄
– ᠨᠡᠷᠡ ᠬᠡᠨ ᠰᠠᠨ ᠪᠢᠯᠡ ᠭᠡᠪᠡ ᠃
– ᠨᠢᠭᠡ ᠯᠡ ᠪᠢᠰᠢ ᠳᠡ᠂ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠰᠦᠷᠡᠬᠡᠢ ᠠᠵᠢᠭᠰᠠᠨ᠃ ᠳᠠᠷᠠᠭᠠ ᠨᠢ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠠᠩᠭᠠᠭᠰᠠᠨ ( ᠳᠣᠬᠢᠶᠠᠯᠠᠬᠤ ) ᠃ ᠨᠡᠷᠡ ᠬᠡᠨ ᠰᠠᠨ ᠪᠢᠯᠡ ᠭᠡᠵᠦ ᠰᠢᠷᠦᠭᠦᠨ ᠠᠰᠠᠭᠤᠵᠤ ᠪᠠᠢᠨᠠ ᠰᠢᠦ᠂ ᠰᠢᠷᠦᠭᠦᠨ ᠭᠡᠳᠡᠭ ᠨᠢ ᠦᠨᠡᠨ ᠪᠣᠯᠬᠤ ᠨᠢ ᠭᠡᠵᠦ ᠁ ᠮᠠᠨ ᠤ᠋ ᠬᠢᠨ ᠮᠢᠨᠦ ᠲᠤᠬᠠᠢ ᠠᠯᠲᠠᠨ ᠬᠣᠰᠢᠭᠤ ᠡᠷᠭᠦᠭᠡᠳ ᠣᠷᠭᠢᠪᠠ ᠦᠦ ᠳᠡ ᠭᠡᠬᠦ ᠡᠴᠡ ᠬᠠᠮᠠᠷ ᠤ᠋ᠨ ᠬᠢᠨ ᠬᠥᠯᠥᠰᠥ ᠪᠤᠷᠵᠠᠢᠨ ᠳᠠᠭᠠᠭᠠᠪᠤᠷᠢᠯᠠᠪᠠ᠃
– ᠠᠵᠢᠯ ᠶᠠᠮᠠᠷ ᠪᠠᠢᠨᠠ ? ᠠᠵᠢᠯ ᠳ᠋ᠠᠭᠠᠨ ᠳᠤᠷᠠ ᠰᠣᠨᠢᠷᠬᠠᠯᠲᠠᠢ ᠪᠢᠵᠡ ᠳᠡ᠃
ᠪᠦᠷ ᠪᠢᠰᠢᠳᠡᠯᠡ᠃ ᠥ ᠰᠡᠪ ᠠᠨᠳᠠᠳᠠᠭ ᠦᠭᠡᠢ ᠶᠠᠭ ᠦᠭᠡᠢ ᠲᠣᠯᠣᠭᠠᠢ ᠨᠢ ᠦᠨᠡᠨ ᠶᠦᠮ ᠠ᠋ ᠭᠡᠵᠦ ᠨᠢᠲᠠᠭᠠ ᠲᠡᠪᠡᠳᠡᠭᠰᠡᠨ ( ᠠᠷᠭᠠ ᠠᠯᠳᠠᠷᠠᠬᠤ ) ᠳ᠋ᠠᠭᠡᠨ ᠬᠡᠯᠡᠬᠦ ᠦᠭᠡ ᠨᠢ ᠬᠣᠭᠣᠯᠠᠢ ᠳᠡᠭᠡᠷᠡ ᠨᠢ ᠵᠠᠩᠭᠢᠷᠠᠵᠤ ᠶᠧᠯᠸᠢᠴᠢᠨ ᠬᠥᠮᠦᠨ ᠰᠢᠭ ᠲᠣᠩᠭᠣᠰ ᠲᠣᠩᠭᠣᠰ ᠨᠠᠬᠢᠯᠵᠠᠪᠠ᠃
– ᠶᠠᠷᠢᠵᠤ ᠬᠡᠯᠡᠬᠦ ᠶᠠᠭᠤᠮᠠ ᠪᠠᠢᠨᠠ ᠤᠤ ?
ᠠᠵᠢᠯᠲᠠᠨ ᠲᠠᠢ ᠪᠠᠨ ᠲᠠᠨᠢᠯᠴᠠᠬᠤ ᠳᠠᠷᠤᠭᠠ ᠶ᠋ᠢᠨ ᠶᠡᠷᠦᠳᠡ ᠶ᠋ᠢᠨ ᠶᠠᠷᠢᠶᠠ ᠡᠢᠨᠬᠦ ᠶᠠᠪᠤᠭᠳᠠᠵᠤ ᠪᠠᠢᠨᠠ᠃
– ᠦᠭᠡᠢ ᠳᠠᠷᠤᠭᠠ ᠡ᠂ ᠶᠠᠭᠤ ᠪᠠᠢᠬᠤ ᠪᠣᠢ ᠳ᠋ᠠ᠂ ᠲᠡᠭᠡᠬᠦᠯᠡᠷ ᠡᠢᠮᠦ ᠶᠦᠮ ᠠ᠋᠂ ᠲᠠ ᠰᠢᠨᠡ ᠢᠷᠡᠭᠰᠡᠨ ᠪᠣᠯᠬᠣᠷ ᠮᠡᠳᠡᠬᠦ ᠦᠭᠡᠢ ᠪᠠᠢᠬᠤ ᠨᠢ ᠠᠷᠭᠠ ᠦᠭᠡᠢ᠂ ᠵᠠᠢᠯᠠᠭᠤᠯ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ᠂ ᠮᠠᠨ ᠤ ᠬᠢᠨ ᠶᠠᠭᠤ ᠶᠤᠮ ᠡ᠂ ᠰᠢᠳᠤᠷᠭᠤ ᠪᠠᠷ ᠬᠡᠯᠡᠬᠦ ᠶᠦᠮ ᠪᠣᠯᠪᠠᠯ ᠰᠢᠳᠤᠷᠭᠤ ᠪᠤᠰᠤ ᠰᠢᠭ᠋ ᠰᠠᠨᠠᠭᠳᠠᠳᠠᠭ ᠶᠤᠮ᠃ ᠵᠢᠱᠢᠶᠡᠯᠡᠬᠦ ᠶᠤᠮ ᠪᠣᠯᠪᠠᠯ ᠲᠡᠷᠢᠭᠦᠨ ᠦ ᠳᠣᠯᠣᠭᠠ ᠬᠣᠨᠣᠭ ᠲᠦ᠍ ᠮᠠᠨ ᠤ ᠬᠢᠨ ᠬᠡᠳᠦᠨ ᠯᠢᠲ᠋ᠷ ᠰᠦ ᠬᠥᠳᠡᠭᠡᠨ ᠡᠴᠡ ᠠᠪᠴᠢᠷᠠᠭᠰᠠᠨ ᠯᠠ ᠳ᠋ᠠ᠂ ᠵᠠᠭᠤᠨ ᠲᠠᠪᠢᠨ ᠯᠢᠲ᠋ᠷ ᠭᠡᠵᠦ ᠪᠠᠢᠭᠠ ᠶᠤᠮ ᠡ᠃
ᠨᠥᠬᠥᠷ ᠭᠠᠵᠢᠳᠮᠠ ᠳ᠋ᠤ᠌ ᠲᠣᠩᠲᠣᠭ ᠬᠡᠯᠡᠭᠰᠡᠨ ᠢ ᠨᠢ ᠴᠡᠪᠡᠷᠯᠡᠭᠴᠢ ᠠᠪᠠᠭᠠᠢ ᠳᠤᠭᠤᠯᠤᠭᠠᠳ ᠨᠠᠳᠠ ᠳ᠋ᠤ᠌ ᠮᠡᠳᠡᠭᠳᠡᠭᠰᠡᠨ ᠶᠦᠮ᠃ ᠲᠡᠭᠡᠬᠦ ᠳ᠋ᠦ᠍ ᠪᠢ ᠰᠢᠨᠡ ᠳᠠᠷᠤᠭᠠ ᠶᠢᠨ ᠬᠤᠪᠢ ᠶᠢ ᠲᠠᠯᠪᠢᠴᠢᠬᠠ ᠂ ᠪᠢᠳᠠᠨ ᠰᠢᠭ᠋ ᠬᠥᠭ᠍ᠰᠢᠨ ᠬᠥᠪᠡᠭᠡ᠂ ᠬᠦᠷᠦᠪᠡ ᠨᠢᠯᠬᠠ ᠲᠠᠢ ᠬᠥᠮᠦᠨ ᠪᠠᠢᠯᠭᠦᠢ ᠭᠡᠳᠡᠭ ᠰᠠᠨᠠᠯ ᠳᠡᠪᠰᠢᠭᠦᠯᠦᠭᠰᠡᠨ᠃ ᠭᠡᠲᠡᠯᠡ ᠡᠨᠡ ᠠᠵᠤ ᠠᠬᠤᠢ ᠶᠢᠨ ᠳᠠᠷᠤᠭᠠ ᠭᠣᠴᠣᠣ ᠪᠠᠢᠨᠠ ᠰᠢᠦ ᠳᠡ᠂ ᠬᠡᠨ ᠭᠡᠳᠡᠭ ᠠᠮᠢᠲᠠᠨ ᠬᠡᠳᠦᠢ ᠳ᠋ᠦ᠍ ᠴᠤ᠌ ᠢᠷᠡᠬᠦ ᠶᠦᠮ ᠪᠢᠯᠡ ᠭᠡᠳ ᠬᠠᠯᠭᠠᠳᠠᠭ ᠦᠭᠡᠢ᠃ ᠶᠠᠮᠠᠷ ᠬᠡᠷᠡᠭ ᠪᠠᠢᠬᠤ ᠪᠣᠢ ᠳᠠ᠂ ᠣᠯᠠᠨ ᠤ᠋ ᠶᠠᠭᠤᠮᠠ ᠶ᠋ᠢ ᠣᠯᠠᠨ ᠳ᠋ᠤᠨᠢ ᠬᠦᠷᠲᠡᠭᠡᠵᠦ ᠣᠷᠬᠢᠪᠠᠯ ᠪᠠᠷᠠᠭᠠ ᠪᠢᠵᠡ᠃
ᠡᠭᠦᠨ ᠢ᠋ ᠪᠢ ᠰᠢᠭᠤᠳ ᠰᠢᠳᠤᠷᠭᠤ ᠪᠢᠰᠢ ᠶᠠᠪᠤᠳᠠᠯ ᠭᠡᠵᠦ ᠦᠵᠡᠵᠦ ᠪᠠᠢᠨᠠ᠃ ᠲᠡᠭᠡᠭᠡᠳ ᠶᠠᠭᠤ ᠳᠠ ᠁ ᠶᠡᠷᠦ ᠨᠢ ᠁ ᠪᠢ ᠬᠠᠭᠤᠴᠢᠨ ᠬᠥᠮᠦᠨ ᠪᠣᠯᠬᠤ ᠪᠠᠷ ᠰᠠᠢᠨ ᠮᠡᠳᠡᠬᠦ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃ ᠮᠠᠨ ᠤ᠋ ᠬᠠᠭᠤᠴᠢᠨ ᠳᠠᠷᠤᠭᠠ ᠳᠤᠲᠠᠭᠳᠠᠯ ᠲᠠᠢ ᠡᠲᠡᠭᠡᠳ ᠪᠠᠢᠭᠰᠠᠨ ᠃ ᠬᠠᠷᠢᠭᠤᠴᠠᠯᠭᠠ ᠲᠠᠶᠠ ᠠᠵᠢᠯ ᠲᠠᠢ ᠪᠢᠳᠠ ᠪᠣᠯᠪᠠᠯ ᠶᠠᠭᠤᠮᠠ ᠶ᠋ᠢ ᠰᠢᠳᠤᠷᠭᠤ ᠪᠠᠷ ᠰᠢᠭᠦᠮᠵᠢᠯᠡᠬᠦ ᠬᠡᠷᠡᠭᠲᠡᠢ᠃ ᠲᠡᠷᠡ ᠨᠥᠬᠥᠷ ᠳᠤᠲᠠᠭᠳᠠᠯ ᠲᠠᠢ ᠂ ᠮᠠᠰᠢ ᠡᠪᠯᠡᠷᠡᠩᠭᠦᠢ ᠰᠢᠳᠤᠷᠭᠤ ᠪᠤᠰᠤ ᠡᠲᠡᠭᠡᠳ ᠮᠥᠨ ᠡᠴᠡ ᠮᠥᠨ ᠪᠠᠢᠯᠠ᠃
ᠲᠠ ᠶᠡᠷᠦ ᠨᠢ ᠡᠳᠡᠨ ᠲᠡᠢ ᠪᠠᠢᠨᠠ ᠰᠢᠦ ᠳᠡ᠂ ᠡᠬᠢᠨ ᠡᠴᠡ ᠨᠢ ᠰᠢᠳᠤᠷᠭᠤ ᠦᠵᠡᠯᠴᠡᠬᠦ ᠬᠡᠷᠡᠭᠲᠡᠢ᠃ ᠬᠠᠭᠤᠴᠢᠨ ᠬᠥᠮᠦᠨ ᠦ᠌ ᠬᠤᠪᠢ ᠳ᠋ᠤ᠌ ᠪᠢ ᠬᠠᠯᠠᠭᠤᠨ ᠲᠤᠰᠠᠯᠠᠯᠴᠠᠭᠠ ᠴᠠᠭ ᠢᠮᠠᠭᠲᠠ ᠦᠵᠡᠭᠦᠯᠵᠦ ᠳᠡᠮᠵᠢᠨᠡ᠃ ᠲᠠ ᠪᠣᠯ ᠰᠢᠯᠢᠵᠦ ᠰᠣᠩᠭᠣᠭᠳᠠᠭᠰᠠᠨ ᠰᠢᠯᠢᠳᠡᠭ ᠺᠠᠳ᠋ᠷ᠂ ᠬᠠᠷᠠᠪᠠᠴᠤ ᠶᠡᠷᠦ ᠨᠢ ᠶᠠᠭ ᠦᠭᠡᠢ ᠲᠤᠯᠠ ᠁ ᠶᠠᠭᠤ ᠯᠠ ᠳᠠ ᠶᠡᠷᠦ ᠨᠢ ᠁ ᠬᠥᠮᠦᠨ ᠦ᠌ ᠥ ᠰᠡᠪ ᠢ᠋ ᠠᠨᠳᠠᠳᠠᠭ ᠦᠭᠡᠢ ᠬᠥᠮᠦᠨ ᠪᠣᠯ ᠮᠠᠰᠢ ᠰᠠᠢᠨ ᠭᠡᠵᠦ ᠪᠢ ᠬᠤᠪᠢ ᠳ᠋ᠠᠭᠠᠨ ᠪᠣᠳᠣᠳᠠᠭ ᠭᠡᠵᠦ ᠭᠥᠯᠲᠥᠯᠵᠡᠨ ᠰᠢᠯᠦᠰᠦ ᠪᠡᠨ ᠵᠠᠯᠭᠢᠯᠠᠪᠠ᠃ ᠶᠡᠷᠦ ᠪᠤᠰᠤ ᠶ᠋ᠢᠨ ᠬᠥᠮᠦᠨ ᠲᠡᠢ ᠤᠴᠠᠷᠠᠭᠰᠠᠨ ᠳ᠋ᠠᠭᠠᠨ ᠰᠢᠨᠡ ᠳᠠᠷᠤᠭᠠ ᠶ᠋ᠢᠨ ᠢᠨᠢᠶᠡᠳᠦ ᠬᠦᠷᠴᠦ ᠵᠤᠮᠠᠯᠵᠠᠪᠠ᠃
ᠵᠠ ᠲᠡᠷᠡ ᠰᠢᠳᠤᠷᠭᠤ ᠬᠥᠮᠦᠨ ᠳ᠋ᠦ᠍ ᠳᠤᠷᠠᠲᠠᠢ ᠭᠡᠭᠴᠢ ᠨᠢ ᠶᠠᠷᠢᠶᠠᠨ ᠦᠭᠡᠢ ᠦᠨᠡᠨ ᠪᠣᠯᠬᠤ ᠨᠢ ᠃ ᠣᠯᠠᠨ ᠤ᠋ ᠦᠭᠡ ᠣᠷᠣ ᠲᠠᠢ ᠁ ᠭᠡᠵᠦ ᠰᠡᠳᠬᠢᠯ ᠨᠢ ᠠᠭᠤᠵᠢᠷᠠᠭᠰᠠᠨ ᠨᠢᠲᠠᠭᠠ᠄
– ᠶᠠᠭᠤ ᠳᠠᠷᠤᠭᠠ ᠠ᠋᠂ ᠪᠢ ᠪᠣᠯᠪᠠᠯ ᠰᠢᠳᠤᠷᠭᠤ ᠪᠤᠰᠤ ᠶᠠᠪᠤᠳᠠᠯ ᠢ᠋ ᠦᠵᠡᠬᠦ ᠨᠢ ᠪᠠᠢᠲᠤᠭᠠᠢ ᠬᠠᠷᠠᠵᠤ ᠴᠢᠳᠠᠳᠠᠭ ᠦᠭᠡᠢ ᠬᠥᠮᠦᠨ ᠪᠠᠢᠭᠠ ᠶᠤᠮ ᠭᠡᠳ ᠥᠨᠳᠡᠯᠵᠡᠬᠦ ᠳ᠋ᠦ᠍ᠨᠢ᠄
– ᠵᠠ ᠥᠭᠡᠷᠡ ᠣᠨᠴᠠ ᠠᠰᠠᠭᠤᠳᠠᠯ ᠪᠠᠢᠬᠤ ᠦᠭᠡᠢ ᠪᠣᠯ ᠠᠵᠢᠯ ᠳᠡᠭᠡᠷᠡ ᠪᠡᠨ ᠣᠴᠢᠵᠤ ᠪᠠᠢ ᠭᠡᠵᠦ ᠰᠢᠨᠡ ᠳᠠᠷᠤᠭᠠ ᠬᠡᠯᠡᠯᠡ᠃
ᠥᠷᠥᠭᠡᠨ ᠦ᠌ ᠪᠡᠨ ᠬᠦᠢᠲᠡᠨ ᠰᠠᠯᠬᠢ ᠶ᠋ᠢ ᠵᠠᠯᠭᠢᠯᠠᠵᠤ ᠠᠮᠢᠰᠬᠤᠭᠠ ᠠᠪᠤᠭᠰᠠᠨ ᠨᠢᠳᠠᠭᠠ ᠶ᠋ᠢᠨ ᠤᠬᠠᠭᠠᠨ ᠳ᠋ᠤ᠌ ᠰᠠᠶᠢ ᠯᠠ ᠶᠣᠰᠣᠲᠠᠢ ᠬᠥᠮᠦᠨ ᠦ᠌ ᠣᠢ ᠲᠣᠢ ᠶ᠋ᠢᠨ ᠣᠩᠭᠣᠳ ᠬᠤᠷᠠ ᠶ᠋ᠢᠨ ᠤᠰᠤ ᠰᠢᠭ᠋ ᠰᠠᠳᠠᠷᠠᠨ ᠣᠷᠣᠵᠤ ᠢᠷᠡᠬᠦ ᠨᠢ ᠲᠡᠷᠡ᠃
– ᠲᠡᠨᠡᠭ ᠲᠠᠷᠢᠬᠢ ᠭᠡᠵᠦ ᠲᠣᠯᠣᠭᠠᠢ ᠤᠷᠤᠭᠤ ᠪᠠᠨ ᠲᠦᠩᠰᠢᠮᠠᠷ ᠰᠠᠨᠠᠭᠳᠠᠯᠠ᠃ ᠠᠵᠢᠯ ᠳ᠋ᠠᠭᠠᠨ ᠰᠣᠨᠢᠷᠬᠠᠯᠲᠠᠢ ᠤᠤ ᠭᠡᠵᠦ ᠠᠰᠠᠭᠤᠵᠤ ᠪᠠᠢᠬᠤ ᠳ᠋ᠤ᠌ ᠶᠠᠭᠤ ᠴᠤ᠌ ᠬᠠᠷᠢᠭᠤᠯᠤᠭᠠ ᠦᠭᠡᠢ ᠣᠷᠬᠢᠭᠰᠠᠨ ᠪᠠᠢᠨᠠ ᠰᠢᠦ ᠳᠡ ᠭᠡᠳ ᠠᠮᠠ ᠪᠠᠨ ᠪᠠᠷᠢᠨ ᠭᠠᠰᠠᠯᠪᠠ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ᠄
– ᠦᠭᠡᠢ ᠶᠡᠷᠦ ᠨᠢ ᠶᠠᠭᠤᠨ ᠳ᠋ᠤ᠌ ᠲᠡᠭᠡᠵᠦ ᠠᠰᠠᠭᠤᠭᠰᠠᠨ ᠶᠤᠮ ᠪᠣᠯ ᠠ᠋᠂ ᠠᠵᠢᠯ ᠳ᠋ᠠᠭᠠᠨ ᠰᠣᠨᠢᠷᠬᠠᠯ ᠦᠭᠡᠢ ᠡᠲᠡᠭᠡᠳ ᠭᠡᠵᠦ ᠬᠡᠨ ᠨᠢᠭᠡ ᠬᠥᠮᠦᠨ ᠬᠣᠪᠯᠠᠪᠠ ᠤᠤ᠂ ᠰᠦᠷᠡᠬᠡᠢ ᠬᠠᠷᠠᠭᠠᠳ ᠪᠠᠢᠭᠰᠠᠨ ᠰᠢᠦ᠂ ᠶᠠᠭᠠᠬᠢᠬᠤ ᠪᠠᠷ ᠢ᠋ᠶ᠋ᠠᠨ ᠲᠡᠭᠡᠭᠰᠡᠨ ᠶᠦᠮ ᠪᠣᠯ᠂ ᠮᠢᠨᠦ ᠳᠤᠲᠠᠭᠳᠠᠯ ᠢ᠋ ᠣᠯᠵᠤ ᠮᠡᠳᠡᠪᠡ ᠤᠤ᠃ ᠶᠠᠮᠠᠷ ᠴᠤ᠌ ᠳᠤᠲᠠᠭᠳᠠᠯ ᠪᠠᠢᠬᠤ ᠪᠣᠢ ᠳᠠ᠂ ᠵᠠ ᠪᠠᠢᠵᠠ᠂ ᠠᠷᠢᠬᠢ ᠤᠤᠭᠤᠭᠰᠠᠨ ᠤᠳᠠᠭᠠ ᠦᠭᠡᠢ᠂ ᠤᠷᠵᠢᠨᠤᠨ ᠠᠬᠠ ᠶ᠋ᠢᠨ ᠬᠡᠦᠬᠡᠳ ᠦ᠋ᠨ ᠤᠬᠢᠶᠠᠯᠭᠠ ᠳᠡᠭᠡᠷᠡ ᠭᠠᠭᠴᠠ ᠬᠤᠨᠳᠠᠭᠠ ᠠᠮᠰᠠᠭᠰᠠᠨ᠂ ᠥᠭᠡᠷᠡ ᠶᠠᠭᠤ ᠰᠠᠨ ᠪᠢᠯᠡ᠃ ᠲᠠᠢᠯᠦᠨ(ᠠᠵᠢᠯ ᠤᠨ ᠲᠣᠳᠣᠷᠬᠠᠢᠯᠠᠯᠲᠠ ) ᠮᠡᠳᠡᠭᠡᠯᠡᠯ ᠢᠶᠡᠨ ᠴᠠᠭ ᠬᠤᠭᠤᠴᠠᠭᠠᠨ ᠳ᠋ᠤᠨᠢ ᠶᠠᠭ ᠭᠠᠷᠭᠠᠵᠤ ᠪᠠᠢᠭᠰᠠᠨ᠃ ᠨᠢᠳᠤᠨᠤᠨ ᠠᠴᠠ ᠬᠣᠢᠰᠢ ᠰᠢᠭᠦᠮᠵᠢᠯᠡᠭᠦᠯᠦᠭᠰᠡᠨ ᠤᠳᠠᠭᠠ ᠦᠭᠡᠢ᠃ ᠬᠠᠷᠢᠨ ᠬᠠᠭᠤᠴᠢᠨ ᠳᠠᠷᠤᠭᠠ ᠨᠠᠮᠠ ᠶᠢ ᠵᠢᠰᠦᠷᠴᠢ ᠠᠮᠢᠳᠠᠨ ᠭᠡᠵᠦ ᠳ᠋ᠦᠩᠨᠠᠭᠡᠳ ᠪᠠᠢᠳᠠᠭ ᠶᠤᠮ᠃
ᠲᠡᠷᠡ ᠨᠥᠬᠥᠷ ᠲᠡᠭᠡᠵᠦ ᠲᠠᠨᠢᠯᠴᠠᠭᠤᠯᠤᠭᠰᠠᠨ ᠶᠤᠮ ᠪᠣᠯᠪᠠ ᠤᠤ᠃ ᠮᠢᠨᠦ ᠶᠠᠷᠢᠶᠠᠨ ᠠᠴᠠ ᠪᠠᠭᠴᠠᠭᠠ ᠠᠪᠤᠭᠰᠠᠨ ᠪᠠᠢᠬᠤ ᠤᠴᠢᠷᠲᠠᠢ᠃ ᠪᠢ ᠰᠢᠳᠤᠷᠭᠤ ᠭᠡᠳᠡᠭ ᠢᠶᠡᠨ ᠦᠵᠡᠭᠦᠯᠵᠦ ᠲᠠᠢᠯᠪᠤᠷᠢᠯᠠᠭᠰᠠᠨ᠂ ᠢᠨᠢᠶᠡᠭᠰᠡᠨ ᠁ ᠥᠭᠡᠷᠡ ᠶᠠᠭᠤᠮᠠ ᠪᠠᠢᠨᠠ ᠳ᠋ᠠ᠃ ᠵᠠ ᠶᠠᠭᠤ ᠰᠠᠨ ᠪᠢᠯᠡ ᠁ ᠠ ᠁ ᠤᠷᠵᠢᠳᠤᠷ ᠲᠡᠷᠡ ᠨᠢᠭᠡ ᠭᠠᠩᠭᠠᠩ ᠬᠡᠦᠬᠡᠨ ᠴᠢᠨᠢ ᠳᠠᠷᠤᠭᠠ ᠶᠢᠨ ᠠᠪᠠᠭᠠᠢ ᠪᠠᠢᠭᠰᠠᠨ ᠶᠤᠮ ᠪᠢᠰᠢ ᠪᠠᠢᠭᠠ᠃ ᠭᠣᠳᠣᠯ ᠴᠣᠬᠢᠵᠤ ᠥᠭᠭᠦᠭᠡᠴᠢ ᠭᠡᠬᠦ ᠳ᠋ᠤᠨᠢ ᠪᠢ ᠥᠭᠭᠦᠭᠡ ᠦᠭᠡᠢ ᠶᠤᠮ ᠰᠢᠦ᠃ ᠲᠡᠭᠡᠵᠦ ᠲᠠᠭᠠᠷᠠᠯᠠ᠂ ᠶᠡᠷᠦᠨᠢ ᠦᠵᠡᠭᠳᠡᠭᠡ ᠦᠭᠡᠢ ᠬᠡᠦᠬᠡᠨ ᠪᠠᠢᠭᠰᠠᠨ ᠶᠤᠮ᠃ ᠥᠨᠥ᠍ ᠮᠠᠭᠤ ᠰᠡᠯᠡᠩᠭᠡ ᠡᠴᠡ ᠪᠣᠯᠵᠤ ᠪᠠᠢᠬᠤ ᠦᠭᠡᠢ ᠤᠤ᠂ ᠲᠡᠷᠡ ᠨᠢᠭᠡ ᠶ᠋ᠢ ᠵᠠᠬᠢᠭᠠᠳ ᠪᠠᠢᠬᠤ ᠪᠠᠷ ᠨᠢ ᠬᠠᠳᠠᠭᠠᠯᠠᠭᠤᠯᠤᠭᠰᠠᠨ ᠶᠤᠮ᠃ ᠤᠤᠯ ᠨᠢ ᠽᠠᠫᠠᠰ ( ᠨᠥᠭᠡᠴᠡ ᠰᠡᠯᠪᠢᠭ ) ᠪᠠᠢᠭᠰᠠᠨ ᠳ᠋ᠠ᠃ ᠭᠠᠢ ᠭᠠᠵᠠᠷ ᠳᠣᠣᠷᠠ ᠠᠴᠠ ᠦᠨᠡᠨ ᠰᠢᠦ᠂ ᠲᠣᠯᠣᠭᠠᠢ ᠣᠷᠢᠶᠠᠬᠤ ᠬᠡᠷᠡᠭ ᠪᠣᠯᠵᠤ᠂ ᠵᠠ ᠪᠠᠢᠵᠠ᠂ ᠶᠠᠭᠠᠬᠢᠬᠤ ᠪᠣᠢ᠂ ᠳᠠᠷᠤᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠭᠤᠴᠢᠨ ᠳᠠᠷᠤᠭᠠ ᠶᠢᠨ ᠪᠠᠢᠰᠢᠩ ᠳ᠋ᠦ᠍ ᠣᠷᠣᠭᠰᠠᠨ ᠪᠣᠯᠪᠠ ᠤᠤ᠂ ᠭᠡᠷ ᠤᠷᠤᠭᠤ ᠨᠢ ᠠᠪᠠᠭᠠᠢ ᠲᠠᠢ ᠨᠢ ᠶᠠᠷᠢᠬᠤ ᠤᠤ᠂ ᠳᠠᠷᠤᠭᠠ ᠳᠡᠭᠡᠷᠡ ᠳᠠᠬᠢᠭᠠᠳ ᠣᠷᠣᠳᠠᠭ ᠬᠡᠷᠡᠭ᠃ ᠳᠤᠲᠠᠭᠳᠠᠯ ᠢᠶᠠᠨ ᠰᠢᠳᠤᠷᠭᠤ ᠪᠠᠷ ᠬᠦᠯᠢᠶᠡᠭᠰᠡᠨ ᠬᠥᠮᠥᠨ ᠪᠣᠯᠣᠶᠠ ᠭᠡᠵᠦ ᠬᠣᠯᠬᠢᠭᠰᠠᠨ ᠢ᠋ᠶ᠋ᠠᠨ ᠳᠠᠷᠤᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠥᠷᠥᠭᠡ ᠤᠷᠤᠭᠤ ᠠᠯᠬᠤᠯᠠ᠂ ᠬᠠᠭᠠᠯᠠᠭᠠ ᠶᠢ ᠨᠢ ᠬᠤᠯᠤᠭᠠᠨᠠ ᠰᠢᠭ᠋ ᠲᠣᠷᠵᠢᠭᠢᠨᠠᠭᠤᠯᠤᠭᠰᠠᠨ ᠢ᠋ᠶ᠋ᠠᠨ᠄
– ᠵᠠ ᠭᠡᠬᠦ ᠳ᠋ᠦ᠍ᠨᠢ ᠵᠣᠷᠢᠭᠵᠢᠩᠭᠤᠢ ᠢᠨᠢᠶᠡᠮᠰᠦᠭᠯᠡᠪᠡ ᠃
– ᠶᠠᠭᠤ ᠳᠠᠷᠤᠭᠠ ᠠ᠋᠂ ᠪᠢ ᠪᠠᠰᠠ ᠮᠠᠷᠲᠠᠵᠤ ᠣᠷᠬᠢᠵᠠᠢ ᠃ ᠶᠡᠷᠦ ᠨᠢ ᠲᠠᠨ ᠤ᠋ ᠡᠮᠦᠨᠡ ᠳᠤᠲᠠᠭᠳᠠᠯ ᠢ᠋ᠶ᠋ᠠᠨ ᠰᠢᠳᠤᠷᠭᠤ ᠪᠠᠷ ᠬᠦᠯᠢᠶᠡᠬᠦ ᠭᠡᠵᠦ ᠢᠷᠡᠯᠡ ᠂ ᠠᠭᠤᠴᠢᠯᠠᠭᠠᠷᠠᠢ᠂ ᠪᠢ ᠳᠤᠲᠠᠭᠳᠠᠯ ᠢ᠋ ᠲᠡᠪᠴᠢᠵᠦ ᠰᠠᠭᠤᠵᠤ ᠴᠢᠳᠠᠳᠠᠭ ᠦᠭᠡᠢ ᠶᠦᠮ᠂ ᠪᠢ ᠲᠠᠨᠢᠬᠤ ᠦᠭᠡᠢ ᠡᠴᠡ ᠪᠣᠯᠵᠤ ᠲᠣᠮᠣ ᠳᠤᠲᠠᠭᠳᠠᠯ ᠳ᠋ᠤ᠌ ᠣᠷᠣᠭᠰᠠᠨ ᠪᠠᠢᠨᠠ ᠭᠡᠬᠦ ᠳ᠋ᠦ᠍ ᠳᠠᠷᠤᠭᠠ ᠭᠠᠢᠬᠠᠯᠠ᠃
– ᠶᠠᠭᠠᠬᠢᠭᠰᠠᠨ ᠪᠠᠢᠨᠠ ᠳᠠᠷᠤᠭᠠ ᠠ᠋ ᠂ ᠡᠷᠭᠢᠭᠦᠦ ᠲᠣᠯᠣᠭᠠᠢ ᠪᠠᠢᠬᠤ ᠦᠭᠡᠢ ᠦᠦ ᠃ ᠲᠠᠨ ᠤ᠋ ᠠᠪᠠᠭᠠᠢ ᠨᠠᠳᠠ ᠪᠠᠷ ᠭᠤᠲᠤᠯ ᠴᠣᠬᠢᠭᠤᠯᠬᠤ ᠪᠠᠷ ᠢᠷᠡᠭᠰᠡᠨ ᠶᠦᠮ ᠠ᠋ ᠂ ᠪᠢ ᠲᠠᠨᠢᠭᠰᠠᠨ ᠦᠭᠡᠢ᠃ ᠲᠠᠨᠢᠭᠰᠠᠨ ᠪᠣᠯ ᠬᠠᠮᠢᠭᠠ ᠠ᠋ᠴᠠ ᠁ ᠭᠠᠭᠴᠠ ᠬᠣᠶᠠᠷ ᠭᠤᠲᠤᠯ ᠤ᠋ᠨ ᠵᠡᠷᠭᠡ ᠬᠥᠮᠦᠨ ᠦ᠌ ᠠᠮᠢᠳᠤᠷᠠᠯ ᠤ᠋ᠨ ᠠᠰᠠᠭᠤᠳᠠᠯ ᠶᠤᠮ ᠴᠢᠨᠢ ᠁
– ᠲᠠᠨ ᠤ᠋ ᠶᠠᠷᠢᠶᠠ ᠶ᠋ᠢ ᠣᠢᠯᠠᠭᠠᠬᠤ ᠦᠭᠡᠢ ᠪᠠᠢᠨᠠ᠃ ᠮᠠᠨ ᠤ᠋ ᠭᠡᠷ ᠪᠦᠯᠢ ᠬᠣᠲᠠ ᠳ᠋ᠤ᠌ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠪᠠᠢᠳᠠᠭ ᠰᠢᠦ ᠳᠡ᠃
– ᠶᠠᠭᠤ ᠳᠠᠷᠤᠭᠠ ᠠ᠋ ᠂ ᠪᠢ ᠬᠠᠭᠤᠴᠢᠨ ᠺᠠᠳ᠋ᠷ ᠰᠢᠦ ᠭᠡᠰᠡᠨ ᠢ᠋ᠶ᠋ᠡᠨ ᠳᠣᠲᠣᠷᠠ ᠨᠢ ᠬᠠᠷᠠᠩᠭᠤᠢᠯᠠᠵᠤ ᠠᠮᠠ ᠨᠢ ᠠᠩᠭᠠᠢᠪᠠ᠃ ᠰᠢᠳᠡᠷᠡ ᠶ᠋ᠢᠨ ᠮᠠᠳᠯᠠᠭᠤᠯᠤᠭᠰᠠᠨ ᠨᠣᠶᠠᠨ ᠠᠮᠢᠳᠤ ᠰᠠᠨ ᠪᠣᠯ ᠲᠡᠢᠮᠦᠷᠬᠦᠦ ᠯᠡ ᠪᠠᠢᠬᠤ ᠪᠢᠵᠡ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃