《ᠬᠠᠲᠠᠭᠤ ᠪᠣᠯᠵᠣᠯ 》 – ᠲ ᠂ ᠭᠠᠯᠰᠠᠩ " Хатуу болзол " – Т᠂ Галсан
273《 ᠬᠠᠲᠠᠭᠤ ᠪᠣᠯᠵᠣᠯ 》
( ᠱᠣᠭ ᠥᠭᠦᠯᠡᠯᠭᠡ)
ᠲ᠂ ᠭᠠᠯᠰᠠᠩ
ᠳᠥᠷᠪᠡᠨ ᠰᠠᠢᠬᠠᠨ ᠥᠬᠢᠨ ᠨᠢᠭᠡ ᠪᠠᠢᠷᠢᠨ ᠳ᠋ᠤ᠌ ᠠᠮᠢᠳᠤᠷᠠᠳᠠᠭ ᠪᠠᠢᠯᠠ᠃ ᠦᠶᠡ ᠶ᠋ᠢᠨ ᠥᠬᠢᠳ ᠶᠠᠭᠤ ᠡᠰᠡ ᠶᠠᠷᠢᠳᠠᠭ ᠰᠠᠨ ᠪᠢᠯᠡ ᠳᠠ᠃ ᠲᠡᠭᠦᠨ ᠦ᠌ ᠨᠢᠭᠡ ᠨᠢ ᠢᠷᠡᠭᠡᠳᠦᠢ ᠶ᠋ᠢᠨ ᠨᠥᠬᠥᠷ ᠦ᠋ᠨ ᠲᠤᠬᠠᠢ ᠤᠷᠠᠨ ᠵᠥᠩᠨᠡᠯ ᠦ᠋ᠨ ᠶᠠᠷᠢᠶᠠ ᠪᠠᠢᠪᠠ᠃
— ᠵᠠᠶᠠᠭᠠᠨ ᠤ᠋ ᠮᠠᠨᠢ ᠬᠠᠨᠢ ᠡᠢᠮᠦ ᠪᠠᠢᠬᠤ ᠶᠣᠰᠣᠲᠠᠢ ᠁
— ᠦᠭᠡᠢ ᠠ᠋᠂ ᠲᠡᠢᠮᠦ ᠪᠠᠢᠬᠤ ᠬᠡᠷᠡᠭᠲᠡᠢ ᠭᠡᠵᠦ ᠲᠡᠳᠡ ᠮᠠᠷᠭᠤᠨᠠ᠃ ᠡᠨᠡ ᠨᠢ ᠨᠢᠭᠡ ᠶᠣᠰᠣᠨ ᠤ᠋ ᠦᠵᠡᠭᠴᠢᠳ ᠦᠭᠡᠢ ᠵᠦᠴᠦᠭᠡ ᠰᠢᠭᠦᠭᠴᠢᠳ ᠦᠭᠡᠢACT（1）ᠪᠠᠢᠯᠠ᠃
— ᠬᠠᠢᠷᠠ ᠶᠡᠬᠡᠲᠡᠢ ᠁ ᠬᠠᠷᠠ ᠪᠠᠭᠠᠲᠠᠢ ᠯᠠ ᠬᠥᠮᠦᠨ ᠦ᠌ ᠠᠪᠠᠭᠠᠢ ᠪᠣᠯᠤᠨᠠ ᠭᠡᠵᠦ ᠳᠤᠯᠮᠠ ᠦᠰᠦ ᠪᠡᠨ ᠢᠮᠡᠷᠦᠨ ᠬᠠᠴᠠᠷ ᠢ᠋ᠶ᠋ᠠᠨ ᠤᠯᠠᠢᠯᠭᠠᠨ ᠥᠭᠦᠯᠡᠨᠡ᠃
— ᠴᠢᠳᠠᠪᠠᠯ ᠢᠷᠠᠭᠤ ᠨᠠᠢᠷᠠᠭᠴᠢ ᠲᠠᠢ᠂ ᠶᠠᠳᠠᠪᠠᠯ ᠠᠢᠮᠠᠭ ᠤ᠋ᠨ ᠵᠠᠭᠠᠨ( ᠪᠥᠬᠡ ᠶ᠋ᠢᠨ ᠴᠣᠯᠠ) ᠲᠠᠢ ᠰᠠᠭᠤᠨᠠ ᠭᠡᠵᠦ《 ᠭᠠᠯ》 ᠲᠤᠯᠭᠠᠷ ᠳᠡᠰ ᠳᠡᠰ ᠢᠨᠢᠶᠡᠨᠡ᠃ ᠭᠤᠷᠪᠠ ᠲᠤᠩᠭᠠᠵᠤ ᠪᠠᠢᠵᠤ ᠨᠢᠭᠡ ᠳᠤᠤᠭᠠᠷᠳᠠᠭ ᠶᠠᠩᠵᠢᠮᠠ ᠯᠠ ᠶᠠᠭᠤ ᠴᠤ᠌ ᠬᠡᠯᠡᠭᠡ ᠦᠭᠡᠢ᠃
— ᠴᠢ ᠶᠠᠮᠠᠷ ᠬᠥᠮᠦᠨ ᠲᠡᠢ ᠬᠠᠨᠢᠯᠠᠨ ᠰᠠᠭᠤᠬᠤ ᠪᠠᠨ ᠬᠡᠯᠡ! ᠭᠡᠵᠦ ᠱᠠᠭᠠᠷᠳᠠᠬᠤ ᠳ᠋ᠤ᠌ ᠪᠦᠷ ᠴᠦ᠍ ᠳᠠᠭᠤ ᠪᠠᠨ ᠬᠣᠷᠢᠶᠠᠨ ᠪᠣᠳᠣᠯᠭᠠᠰᠢᠷᠠᠨᠠ᠃
— ᠮᠠᠭᠤ ᠰᠠᠨᠠᠭᠠᠲᠤ ᠮᠢᠨᠢ ᠬᠡᠯᠡᠬᠦ ᠦᠦ ᠦᠭᠡᠢ ᠦᠦ ᠭᠡᠵᠦ ᠲᠤᠯᠭᠠᠷ ᠭᠡᠵᠢᠭᠡᠳᠡᠨᠡ᠃
— ᠭᠣᠳᠠᠭ ᠭᠣᠳᠠᠭ ᠭᠡᠵᠦ ᠳᠤᠯᠮᠠ ᠬᠤᠷᠤᠭᠤ ᠪᠠᠨ ᠰᠡᠷᠪᠡᠯᠵᠡᠭᠦᠯᠦᠨ ᠣᠢᠷᠠᠲᠤᠨᠠ᠃ ᠭᠡᠵᠢᠭᠡᠳᠡᠬᠦ ᠪᠣᠯ ᠶᠠᠩᠵᠢᠮᠠ ᠶ᠋ᠢᠨ ᠨᠢᠭᠤᠴᠠ ᠶ᠋ᠢ ᠨᠡᠭᠡᠭᠡᠬᠦ ᠭᠠᠭᠴᠠ ᠲᠦᠯᠬᠢᠭᠦᠷ ᠪᠢᠯᠡ᠃ ᠲᠡᠭᠡᠭᠡᠳ ᠴᠦ᠍ ᠲᠡᠭᠰᠢ ᠬᠥᠭᠡᠷᠦᠬᠦᠨ ᠬᠣᠶᠠᠷ ᠮᠥᠷᠥ ᠪᠡᠨ ᠲᠦᠮᠪᠠᠯᠵᠡᠬᠥᠯᠥᠨ ᠬᠡᠰᠡᠭ ᠢᠨᠢᠶᠡᠭᠰᠡᠨ ᠢ᠋ᠶ᠋ᠡᠷ ᠄
— ᠬᠣᠷᠢᠨ ᠵᠢᠷᠭᠤᠭᠠ ᠶ᠋ᠢᠨ ᠤᠮᠳᠠᠭᠠᠨ ᠳ᠋ᠤ᠌ ᠳᠤᠷᠠ ᠦᠭᠡᠢ᠂ ᠬᠣᠷᠢᠨ ᠳᠥᠷᠪᠡ ᠶ᠋ᠢᠨ ᠰᠢᠬᠢᠷ ᠲᠦ᠍ ᠳᠤᠷᠠᠲᠠᠢ ᠠᠬᠠ ᠳᠡᠭᠦᠦ ᠣᠯᠠᠭᠤᠯᠠ ᠪᠠᠨ ᠵᠠᠯᠠᠭᠤ ᠲᠠᠢ ᠰᠠᠭᠤᠨᠠ ᠭᠡᠵᠦ ᠬᠡᠯᠡᠴᠢᠬᠡᠭᠡᠳ ᠰᠠᠨᠠᠭᠠ ᠠᠯᠳᠠᠳᠠᠭ ᠪᠠᠢᠯᠠ᠃
— ᠬᠠᠷᠢᠨ《 ᠲᠣᠯᠢ》 ᠴᠡᠴᠡᠭ ᠢ᠋ ᠶᠠᠭᠤ ᠬᠡᠯᠡᠳᠡᠭ ᠪᠠᠢᠭᠰᠠᠨ ᠭᠡᠵᠦ ᠰᠠᠨᠠᠨᠠ᠃ ᠲᠡᠷᠡ ᠳᠣᠣᠷᠠᠬᠢ ᠠᠷᠪᠠᠨ ᠭᠤᠷᠪᠠᠨ ᠪᠣᠯᠵᠣᠯ ᠢ᠋ ᠶᠠᠭ ᠬᠠᠩᠭᠠᠭᠰᠠᠨ ᠬᠥᠮᠦᠨ ᠲᠡᠢ ᠰᠠᠭᠤᠨᠠ ᠭᠡᠵᠦ ᠬᠤᠷᠤᠭᠤ ᠳᠠᠷᠤᠨ ᠲᠣᠭᠠᠴᠢᠳᠠᠭ ᠪᠠᠢᠯᠠ᠃ ᠡᠭᠦᠨ ᠳ᠋ᠦ᠍ ᠄
ᠨᠢᠭᠡ ᠂ ᠪᠤᠯᠴᠢᠩ ᠨᠢ ᠪᠤᠯᠤ ᠲᠡᠮᠦᠷ ᠰᠢᠭ ᠬᠠᠲᠠᠭᠤ᠂ ᠠᠯᠠᠭᠠ ᠨᠢ ᠴᠡᠴᠡᠭ ᠦ᠋ᠨ ᠳᠡᠯᠪᠢ ᠰᠢᠭ᠋ ᠪᠤᠯᠪᠠᠷᠠᠢ᠃ ᠨᠡᠢᠲᠡ ᠶ᠋ᠢᠨ ᠪᠥᠵᠢᠭ ᠲᠦ᠍ ᠮᠠᠰᠢ ᠰᠠᠢᠨ᠃ ᠭᠡᠬᠦ ᠳ᠋ᠡᠭᠡᠨ ᠠᠪᠠᠭᠠᠢ ᠠ᠋ᠴᠠ ᠪᠠᠨ ᠥᠭᠡᠷᠡ ᠬᠡᠨ ᠲᠡᠢ ᠴᠦ᠍ ᠲᠸᠢᠰᠲ ( ᠭᠤᠢᠪᠢᠵᠤ ᠬᠠᠢᠪᠠᠭᠠᠨᠠᠬᠤ ᠪᠥᠵᠢᠭ) ᠬᠠᠲᠠᠷᠢᠳᠠᠭ ᠦᠭᠡᠢ᠃
ᠬᠣᠶᠠᠷ ᠂ ᠨᠠᠰᠤ ᠪᠠᠷ ᠨᠠᠳᠠ ᠠ᠋ᠴᠠ ᠠᠷᠪᠠᠨ ᠬᠣᠶᠠᠷ ᠠᠬᠠ᠂ ᠣᠪᠣᠷ ᠢ᠋ᠶ᠋ᠠᠷ ᠵᠢᠷᠭᠤᠭᠠ ᠳᠡᠭᠦᠦ᠃
ᠭᠤᠷᠪᠠ᠂ ᠭᠥᠯᠢᠢᠭᠰᠡᠨ ᠬᠠᠷᠠ ᠬᠠᠯᠢᠮᠠᠭ ᠲᠠᠢ ᠪᠤᠷᠵᠢᠭᠢᠷ ᠰᠢᠷᠠ ᠰᠠᠬᠠᠯ ᠲᠠᠢ᠃
ᠳᠥᠷᠪᠡ᠂ ᠰᠠᠢᠨ ᠢ᠋ ᠮᠢᠨᠢ ᠰᠣᠨᠣᠰᠬᠤ ᠳ᠋ᠤ᠌ ᠴᠢᠬᠢ ᠨᠢ ᠳᠡᠯᠳᠡᠢᠳᠡᠭ᠂ ᠰᠠᠭᠠᠷ ᠢ᠋ ᠮᠢᠨᠢ ᠲᠤᠭᠤᠯᠬᠤ ᠳ᠋ᠠᠭᠠᠨ ᠲᠠᠭ ᠳᠦᠯᠡᠢ᠃
ᠲᠠᠪᠤ᠂ ᠲᠦᠯᠡᠭᠡ ᠬᠠᠭᠠᠯᠬᠤ ᠳ᠋ᠠᠭᠠᠨ ᠡᠪᠦᠭᠡ ᠠᠪᠤ᠂ ᠬᠡᠦᠬᠡᠳ ᠠᠰᠠᠷᠠᠬᠤ ᠳ᠋ᠠᠭᠠᠨ ᠡᠮᠡᠭᠡ ᠡᠵᠢ᠃
ᠵᠢᠷᠭᠤᠭᠠ᠂ ᠡᠷᠳᠡᠮ ᠲᠡᠢ ᠲᠡᠨᠡᠭ ᠨᠢ ᠬᠠᠮᠢᠶᠠ ᠦᠭᠡᠢ᠂ ᠡᠬᠡᠨᠡᠷ ᠲᠡᠭᠡᠨ ᠬᠣᠶᠠᠷ ᠷᠣᠮᠪᠤᠲᠠᠢ(2) ᠃
ᠳᠣᠯᠣᠭᠠ᠂ ᠠᠪᠤ ᠶ᠋ᠢᠨ ᠬᠢᠨᠢ ᠨᠢᠭᠡ ᠦᠨᠢᠶᠡ ᠲᠡᠢ᠂ ᠲᠡᠷᠡ ᠨᠢ ᠡᠷᠡ ᠥᠬᠢᠨ ᠬᠣᠶᠠᠷ ᠪᠢᠷᠠᠭᠤ ᠲᠠᠢ᠂ ᠡᠳᠦᠷ ᠲᠦ᠍ ᠦᠬᠡᠷ ᠨᠢ 500 ᠭᠷᠠᠮ ᠡᠪᠡᠰᠦ ᠢᠳᠡᠳᠡᠭ ᠂ ᠭᠡᠬᠦ ᠳ᠋ᠡᠭᠡᠨ ᠨᠢᠭᠡ ᠰᠠᠭᠠᠬᠤ ᠳ᠋ᠤ᠌ ᠠᠷᠪᠠᠨ ᠳᠣᠯᠣᠭᠠᠨ ᠯᠢᠲ᠋ᠷ ᠵᠢᠷᠭᠤᠭᠠᠨ ᠵᠠᠭᠤᠨ ᠬᠣᠷᠢᠨ ᠭᠷᠠᠮ ᠰᠦ ᠭᠠᠷᠳᠠᠭ᠃
ᠨᠠᠢ᠍ᠮᠠ᠂ ᠠᠪᠠᠭᠠᠢ ᠳ᠋ᠠᠭᠠᠨ ᠪᠣᠯ ᠮᠢᠩᠭᠠᠨ ᠲᠥᠭᠥᠷᠢᠭ ᠴᠦ᠍ ᠬᠠᠢᠷᠠᠯᠠᠬᠤ ᠦᠭᠡᠢ᠂ ᠠᠦ᠋ᠲ᠋ᠣᠪᠦ᠋ᠰ ᠲᠦ᠍ ᠪᠣᠯ ᠲᠠᠪᠢᠨ ᠮᠥᠩᠭᠥ ᠴᠦ᠍ ᠲᠥᠯᠥᠬᠦ ᠦᠭᠡᠢ ᠁
ᠶᠢᠰᠦ᠂ ᠵᠡᠭᠡᠭᠡᠭᠰᠡᠨ ᠮᠠᠲᠠᠯ ᠤ᠋ᠨ ᠳᠠᠷᠤᠭᠠ ᠂ ᠭᠡᠬᠦ ᠳ᠋ᠡᠭᠡᠨ ᠨᠠᠷᠢᠨ ᠪᠢᠴᠢᠭ ᠦ᠋ᠨ ᠳᠠᠷᠤᠭᠠ ᠨᠢ ᠡᠷᠡᠭᠲᠡᠢ᠃
ᠠᠷᠪᠠ᠂ ᠠᠪᠠᠭᠠᠢ ᠪᠠᠨ ᠵᠢᠯ ᠪᠣᠯᠭᠠᠨ ᠭᠠᠳᠠᠭᠠᠳᠤ ᠳ᠋ᠤ᠌ ᠵᠢᠭᠤᠯᠴᠢᠯᠠᠭᠤᠯᠳᠠᠭ᠃ ᠥᠪᠡᠷ ᠢᠶᠠᠨ ᠪᠣᠯ ᠡᠭᠡᠯᠵᠢ ᠶ᠋ᠢᠨ ᠢᠶᠠᠨ ᠠᠮᠠᠷᠠᠯᠲᠠ ᠶ᠋ᠢ ᠭᠡᠷ ᠲᠡᠭᠡᠨ ᠦᠭᠡ ᠶ᠋ᠢᠨ ᠰᠦᠯᠵᠢᠶᠡ ᠪᠥᠭᠯᠡᠵᠦ ᠱᠠᠯᠠ ᠤᠬᠢᠶᠠᠵᠤ ᠥᠩᠭᠡᠷᠡᠭᠦᠯᠳᠡᠭ᠃
ᠠᠷᠪᠠᠨ ᠨᠢᠭᠡ᠂ ᠥᠷᠯᠥᠭᠡ ᠶ᠋ᠢᠨ ᠰᠣᠨᠣᠰᠬᠠᠯ ᠳ᠋ᠤ᠌ ᠣᠴᠢᠳᠠᠭ ᠦᠭᠡᠢ᠃ ᠭᠣᠣᠯ ᠨᠢ ᠰᠥᠨᠢ ᠶ᠋ᠢᠨ ᠡᠭᠡᠯᠵᠢᠨ ᠳ᠋ᠦ᠍ ᠭᠠᠷᠳᠠᠭ ᠦᠭᠡᠢ᠃
ᠠᠷᠪᠠᠨ ᠬᠣᠶᠠᠷ᠂ ᠠᠪᠠᠭᠠᠢ ᠶ᠋ᠢᠨ ᠢᠶᠠᠨ ᠡᠮᠦᠨᠡ ᠡᠴᠡ ᠦᠰᠦᠴᠢᠨ ᠳ᠋ᠦ᠍ ᠳ᠋ᠤᠭᠠᠷ ᠠᠪᠬᠤ ᠪᠠᠷ ᠶᠠᠪᠤᠬᠤ ᠳ᠋ᠠᠭᠠᠨ ᠳᠤᠷᠠ ᠦᠭᠡᠢᠯᠡᠳᠡᠭ ᠦᠭᠡᠢ᠂ ᠣᠯᠠᠨ ᠠᠩᠭᠢᠲᠤ ᠺᠢᠨᠣ᠋ ᠦᠵᠡᠬᠦ ᠳ᠋ᠡᠭᠡᠨ ᠬᠤᠷᠬᠢᠷᠠᠳᠠᠭ ᠦᠭᠡᠢ᠃
ᠠᠷᠪᠠᠨ ᠭᠤᠷᠪᠠ᠂ ᠫᠥᠬᠥ! ᠪᠢ ᠭᠡᠷᠡᠯ ᠲᠡᠢ ᠳ᠋ᠦ᠍ ᠬᠡᠯᠡᠬᠦ ᠡᠴᠡ ᠢᠴᠢᠵᠦ ᠪᠠᠢᠨᠠ᠁ ᠴᠡᠴᠡᠭ ᠮᠠᠨᠢ ᠡᠢᠮᠦ ᠯᠡ ᠬᠥᠮᠦᠨ ᠲᠡᠢ ᠰᠠᠭᠤᠨᠠ ᠭᠡᠳᠡᠭ ᠪᠠᠢᠯᠠ᠃ ᠲᠡᠳᠡ ᠣᠳᠣ ᠥᠬᠢᠳ ᠪᠢᠰᠢ ᠴᠡᠭᠡᠵᠢ ᠨᠢ ᠴᠢᠳᠠᠢᠭᠰᠠᠨ( ᠴᠢᠷᠳᠠᠢᠬᠤ) ᠬᠡᠦᠬᠡᠨ ᠨᠦ᠍ᠭᠦᠳ ᠪᠣᠯᠵᠠᠢ᠃ ᠣᠶᠤᠲᠠᠨ ᠨᠤᠭᠤᠳ ᠪᠢᠰᠢ ᠣᠪᠣᠭᠠ ᠬᠡᠳᠦᠨ ᠵᠢᠯ ᠠᠵᠢᠯᠯᠠᠭᠰᠠᠨ ᠡᠮ ᠦ᠋ᠨ ᠰᠠᠩᠴᠢ ᠨᠠᠷ ᠪᠣᠯᠵᠠᠢ᠃ ᠳᠣᠣᠷᠠ ᠪᠦᠷᠢ ᠳ᠋ᠡᠭᠡᠨ ᠬᠠᠨᠢ ᠲᠠᠢ᠂ ᠳᠣᠯᠣᠭᠠ ᠬᠦᠷᠲᠡᠯᠡ ᠬᠡᠦᠬᠡᠳ ᠲᠡᠢ ᠂ ᠡᠷᠡ ᠳ᠋ᠡᠭᠡᠨ ᠬᠠᠯᠠᠮᠵᠢᠲᠠᠢ ᠂ ᠡᠩᠭᠡᠷ ᠲᠡᠭᠡᠨ ᠣᠳᠣᠨᠲᠠᠢ( ᠲᠡᠷᠡ ᠨᠢ ᠮᠡᠳᠡᠭᠡᠵᠢ ᠪᠡᠷ《 ᠠᠯᠳᠠᠷᠲᠤ ᠡᠬᠡ!》) ᠪᠣᠯᠴᠢᠬᠠᠵᠠᠢ᠃
ᠳᠤᠯᠮᠠ ᠵᠢᠯᠣᠭᠣᠴᠢ ᠲᠠᠢ ᠰᠠᠭᠤᠭᠰᠠᠨ ᠶᠣᠰᠣᠲᠠᠢ ᠯᠠ ᠬᠡᠭᠡᠷᠡ ᠭᠠᠷᠬᠤ ᠪᠠᠷ ᠡᠷᠡ᠂ ᠭᠡᠷ ᠲᠦ᠍ ᠢᠷᠡᠬᠦ ᠪᠡᠷ ᠡᠮᠡ᠃ ᠬᠠᠢᠷᠠᠲᠠᠢ᠂ ᠬᠠᠷᠠᠲᠠᠢ᠂ ᠪᠠᠰᠠ ᠬᠠᠯᠠᠮᠵᠢᠲᠠᠢ᠃ ᠦᠳᠡ ᠳᠤᠮᠳᠠ ᠭᠣᠣᠯᠳᠠᠭᠤ ᠵᠠᠮ ᠳ᠋ᠤ᠌ ᠭᠠᠷᠳᠠᠭ᠃ ᠰᠥᠨᠢ ᠳᠤᠮᠳᠠ ᠭᠣᠣᠯᠳᠠᠭᠤ ᠡᠷᠭᠢᠵᠦ ᠢᠷᠡᠳᠡᠭ᠃ ᠬᠠᠭᠠᠯᠭᠠ ᠪᠥᠮᠪᠥᠷ ᠰᠢᠭ ᠳᠡᠯᠡᠳᠳᠡᠭ᠂ ᠬᠠᠲᠠᠪᠴᠢ ᠪᠠᠷ ᠭᠠᠷ ᠴᠢᠳᠧᠩ ( ᠭᠠᠷ ᠳ᠋ᠧᠩ) ᠳᠤᠰᠬᠠᠵᠤ ᠬᠠᠷᠠᠳᠠᠭ᠃ ᠵᠠ ᠲᠡᠷᠡ ᠨᠢ ᠶᠠᠭᠠᠬᠢᠬᠤᠪ ᠁ ᠠᠵᠠ ᠵᠢᠷᠭᠠᠯᠲᠠᠢ ᠯᠠ ᠠᠮᠢᠳᠤᠷᠠᠵᠤ ᠶᠠᠪᠤᠨᠠ᠃ ᠲᠤᠯᠭᠠᠷ ᠮᠠᠨᠢ ᠪᠠᠭᠠ ᠰᠢᠭ᠋ ᠰᠣᠨᠢᠨ ᠤ᠋ ᠲᠣᠮᠣ ᠰᠤᠷᠪᠤᠯᠵᠢᠯᠠᠭᠴᠢ ᠶ᠋ᠢᠨ ᠨᠢᠭᠡ ᠲᠡᠢ ᠰᠠᠭᠤᠵᠠᠢ᠃ ᠰᠢᠯᠦᠭ ᠢ᠋ ᠨᠢ ᠰᠣᠨᠣᠰᠴᠤ ᠰᠡᠭᠦᠷᠡᠰᠦ ᠠᠯᠳᠠᠭᠰᠠᠭᠠᠷ ᠲᠠᠨᠢᠯᠴᠠᠵᠠᠢ ᠃ ᠨᠥᠬᠥᠷ ᠨᠢ ᠣᠳᠣ ᠰᠢᠯᠦᠭ ᠪᠢᠴᠢᠬᠦ ᠪᠡᠨ ᠪᠣᠯᠢᠭᠰᠠᠨ᠂ ᠮᠡᠳᠡᠭᠡ ᠪᠡᠨ ᠳᠡᠩᠨᠡᠳᠡᠭ ᠪᠣᠯᠤᠭᠰᠠᠨ᠃ ᠲᠡᠭᠡᠯᠡ ᠭᠡᠳ ᠰᠠᠯᠵᠤ ᠰᠠᠷᠨᠢᠬᠤ ᠨᠢ ᠥᠩᠭᠡᠷᠡᠭᠰᠡᠨ᠃ ᠶᠠᠩᠵᠢᠮᠠ ᠴᠤ᠌ ᠨᠥᠬᠥᠷ ᠲᠡᠢ᠂ ᠨᠥᠬᠥᠷ ᠨᠢ ᠠᠷᠢᠬᠢ ᠪᠠᠷᠤᠭ ᠤᠤᠭᠤᠳᠠᠭ ᠦᠭᠡᠢ᠂ ᠨᠢᠭᠡ ᠠᠮᠰᠠᠴᠢᠬᠠᠪᠠᠯ ᠣᠢᠷᠠ ᠲᠣᠭᠲᠠᠳᠠᠭ ᠦᠭᠡᠢ᠂ ᠲᠡᠷᠡ ᠡᠳᠦᠷ ᠢ᠋ᠶ᠋ᠡᠷ ᠠᠶᠠᠭᠠ ᠲᠠᠪᠠᠭ ᠢ᠋ᠶ᠋ᠠᠨ ᠬᠠᠭᠠᠯᠳᠠᠭ᠃ ᠮᠠᠷᠭᠠᠰᠢ ᠨᠢ ᠡᠳᠦᠷᠵᠢᠨ ᠭᠡᠮᠰᠢᠳᠡᠭ᠂ ᠡᠨᠳᠡᠵᠦ ᠠᠯᠳᠠᠬᠤ ᠲᠣᠰᠤᠮ ᠢ᠋ᠶ᠋ᠠᠨ ᠢᠯᠡᠭᠦᠦ ᠤᠬᠠᠭᠠᠯᠢᠭ ᠪᠣᠯᠳᠠᠭ ᠨᠥᠬᠥᠷ ᠲᠡᠭᠡᠨ ᠶᠠᠩᠵᠢᠮᠠ ᠲᠤᠩ ᠴᠤ᠌ ᠬᠠᠢᠷᠠᠲᠠᠢ᠃
ᠬᠠᠮᠤᠭ ᠤ᠋ᠨ ᠴᠢᠷᠠᠢᠯᠢᠭ᠋ ᠵᠢᠪᠬᠤᠭᠠᠯᠢᠭ ᠤᠬᠠᠭᠠᠯᠢᠭ ᠨᠢ ᠠᠲᠠᠯᠠ ᠪᠠᠨ ᠴᠡᠴᠡᠭ ᠮᠠᠨᠢ ᠣᠳᠣ ᠬᠦᠷᠲᠡᠯᠡ ᠭᠤᠷᠪᠠᠨ ᠥᠷᠥᠭᠡᠨ ᠦ᠌ ᠳᠤᠮᠳᠠ ᠪᠣᠰᠤᠭᠠ ᠲᠣᠯᠢᠨ ᠤ᠋ ᠤᠷᠢᠳ ᠭᠣᠩ ᠪᠡᠶᠡ ᠪᠡᠷ ᠡᠷᠭᠢᠯᠳᠦᠭᠰᠡᠭᠡᠷ ᠪᠠᠢᠨᠠ᠃ ᠪᠣᠳᠣᠭᠠᠳ ᠪᠠᠢᠬᠤ ᠨᠢ ᠪᠣᠯᠵᠣᠯ ᠨᠢ ᠬᠠᠲᠠᠭᠤᠳᠠᠭᠰᠠᠨ ᠪᠣᠯᠤᠯᠲᠠᠢ᠃ ᠦᠨᠡᠬᠡᠷ ᠭᠠᠭᠴᠠ ᠪᠡᠶᠡ ᠪᠥᠭᠡᠳ ᠳᠡᠭᠡᠷᠡᠬᠢ ᠠᠷᠪᠠᠨ ᠭᠤᠷᠪᠠᠨ ᠪᠣᠯᠵᠣᠯ ᠢ᠋ ᠬᠠᠩᠭᠠᠭᠰᠠᠨ ᠳᠥᠮᠥᠭ( ᠵᠡᠭᠡᠭᠡᠭᠰᠡᠨ) ᠡᠷᠡ ᠪᠠᠢᠪᠠᠯ ᠮᠠᠨ ᠤ᠋ ᠴᠡᠴᠡᠭ ᠲᠡᠢ ᠲᠠᠨᠢᠯᠴᠠᠵᠤ ᠪᠣᠯᠤᠨᠠ ᠰᠢᠦ! ᠰᠠᠢᠨ ᠴᠦ᠍ ᠬᠡᠦᠬᠡᠨ᠂ ᠰᠠᠢᠬᠠᠨ ᠴᠤ᠌ ᠬᠡᠦᠬᠡᠨ᠃
– – – –
（1） ᠠᠪᠬᠠᠯᠵᠢ ᠰᠡᠷᠭᠦᠯᠡᠩᠴᠢᠳ ᠦᠨ ᠲᠡᠮᠡᠴᠡᠭᠡᠨ
（2） ᠶᠡᠬᠡ ᠳᠡᠭᠡᠳᠤ ᠰᠤᠷᠭᠠᠭᠤᠯᠢ ᠲᠡᠭᠦᠰᠦᠭᠴᠢᠳ ᠦᠨ ᠡᠩᠭᠡᠷ ᠦᠨ ᠲᠡᠮᠳᠡᠭ
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
2023᠂᠂23 ᠤ᠋ ᠡᠳᠦᠷ
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ
ᠬᠢᠨᠠᠭ᠍ᠴᠢ : ᠴᠣᠯᠮᠣᠨᠲᠤᠶᠠᠭᠠ
2023᠂᠂23 ᠤ᠋ ᠡᠳᠦᠷ