ᠴᠠᠷᠴᠠ ᠨᠠᠮᠵᠢᠯ - ᠪᠦᠪᠡᠢЦарцаа Намжил - Rokit Bay _ Бүүвэй 2D
1047ᠴᠠᠷᠴᠠ ᠨᠠᠮᠵᠢᠯ - ᠪᠦᠪᠡᠢ
ᠴᠠᠷᠴᠠ ᠨᠠᠮᠵᠢᠯ
ᠲᠠᠨ ᠳ᠋ᠤ᠌ ᠣᠳᠣ ᠶᠠᠭ ᠶᠦᠨᠢᠲ᠋ᠧᠯ ᠭᠥᠷᠤᠹ ᠤ᠋ᠨ ᠪᠦᠤᠪᠠᠢ ᠬᠥᠲᠥᠯᠪᠦᠷᠢ ᠶ᠋ᠢᠨ ᠰᠣᠨᠣᠰᠳᠠᠭ ᠦᠯᠢᠭᠡᠷ ᠦ᠋ᠨ ᠲᠡᠭᠦᠪᠦᠷᠢ ᠬᠦᠷᠴᠦ ᠪᠠᠢᠨᠠ᠃
《ᠴᠠᠷᠴᠠ ᠨᠠᠮᠵᠢᠯ》 ᠦᠯᠢᠭᠡᠷ ᠦ᠋ᠨ ᠣᠷᠣᠨ ᠢ᠋ᠶ᠋ᠠᠷ ᠦᠷᠭᠦᠯᠵᠢᠯᠡᠭᠦᠯᠦᠨ ᠠᠶᠠᠯᠠᠬᠤ ᠶ᠋ᠢ ᠬᠦᠰᠡᠪᠡᠯ ᠰᠣᠨᠣᠰᠴᠠᠭᠠᠶᠠ
ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌ ᠴᠠᠷᠴᠠ ᠨᠠᠮᠵᠢᠯ ᠭᠡᠵᠦ ᠨᠢᠭᠡ ᠲᠡᠨᠡᠭ ᠬᠥᠪᠡᠭᠦᠨ ᠪᠠᠢᠵᠠᠢ᠂ ᠴᠠᠷᠴᠠ ᠨᠠᠮᠵᠢᠯ ᠰᠦᠮᠡ ᠬᠡᠢᠳ ᠲᠦ᠍ ᠰᠠᠭᠤᠵᠤ ᠭᠤᠷᠪᠠᠨ ᠵᠢᠯ ᠦ᠋ᠨ ᠲᠣᠷᠰᠢ ᠨᠣᠮ ᠵᠢᠭᠠᠯᠭᠠᠭᠰᠠᠨ ᠪᠣᠯᠪᠠᠴᠤ ᠶᠠᠭᠤ ᠴᠤ᠌ ᠰᠤᠷᠤᠭᠰᠠᠨ ᠦᠭᠡᠢ ᠲᠡᠨᠡᠭ ᠮᠠᠩᠬᠤᠤ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠭᠰᠠᠨ ᠲᠤᠯᠠ ᠨᠢᠭᠡᠨ ᠡᠳᠦᠷ ᠪᠠᠭᠰᠢ ᠨᠢ ᠴᠠᠷᠴᠠ ᠨᠠᠮᠵᠢᠯ ᠳ᠋ᠤ᠌᠄
《ᠴᠢ ᠶᠠᠭᠤᠮᠠ ᠰᠤᠷᠬᠤ ᠦᠭᠡᠢ ᠨᠢ ᠠ᠋᠂ ᠨᠤᠲᠤᠭ ᠲᠤ᠌ ᠪᠠᠨ ᠪᠤᠴᠠ!》 ᠭᠡᠵᠦ ᠬᠡᠯᠡᠵᠡᠢ᠂ ᠴᠠᠷᠴᠠ ᠨᠠᠮᠵᠢᠯ᠄《ᠪᠠᠭᠰᠢ ᠮᠢᠨᠢ ᠬᠦᠷᠢᠶᠡ ᠬᠡᠢᠳ ᠲᠦ᠍ ᠭᠤᠷᠪᠠᠨ ᠵᠢᠯ ᠨᠣᠮ ᠦᠵᠡᠭᠰᠡᠨ ᠬᠥᠮᠦᠨ ᠭᠡᠬᠦ ᠳ᠋ᠦ᠍ ᠪᠢ ᠮᠠᠨᠢ ᠴᠤ᠌ ᠤᠩᠰᠢᠵᠤ ᠰᠤᠷᠤᠭᠰᠠᠨ ᠦᠭᠡᠢ ᠪᠤᠴᠠᠬᠤ ᠨᠢ ᠳᠠᠩᠴᠤ ᠢᠴᠢᠭᠦᠷᠢᠲᠡᠢ ᠪᠠᠢᠨᠠ᠃ ᠡᠢᠮᠦ ᠳ᠋ᠦ᠍ ᠣᠳᠣ ᠨᠠᠳᠠ ᠳ᠋ᠤ᠌ ᠭᠠᠭᠴᠠᠬᠠᠨ ᠯᠠ ᠨᠣᠮ ᠵᠢᠭᠠᠭᠠᠳ ᠥᠭᠭᠦᠭᠡᠴᠢ᠂ ᠪᠢ ᠵᠠᠮ ᠳ᠋ᠠᠭᠠᠨ ᠤᠩᠰᠢᠭᠰᠠᠭᠠᠷ ᠶᠠᠪᠤᠭᠠᠳ ᠬᠠᠷᠢᠲᠠᠯᠠ ᠪᠠᠨ ᠰᠤᠷᠤᠶᠠ ᠭᠡᠵᠡᠢ᠂
ᠲᠡᠭᠡᠬᠦ ᠳ᠋ᠦ᠍ ᠪᠠᠭᠰᠢ ᠨᠢ᠄《ᠪᠢ ᠴᠢᠮᠠ ᠳ᠋ᠤ᠌ ᠣᠳᠣ ᠶᠠᠮᠠᠷ ᠴᠤ᠌ ᠨᠣᠮ ᠵᠢᠭᠠᠬᠤ ᠦᠭᠡᠢ᠂ ᠵᠠᠮ ᠳ᠋ᠠᠭᠠᠨ ᠲᠣᠬᠢᠶᠠᠯᠳᠤᠭᠰᠠᠨ ᠪᠦᠭᠦᠳᠡ ᠶ᠋ᠢ ᠠᠵᠢᠭᠯᠠᠨ ᠬᠠᠷᠠᠵᠤ ᠲᠣᠭᠲᠠᠭᠠᠳ ᠶᠠᠪᠤᠪᠠᠯ ᠲᠡᠷᠡ ᠴᠢᠨᠢ ᠴᠢᠮᠠ ᠳ᠋ᠤ᠌ ᠰᠠᠢᠨ ᠠ᠋ᠴᠠ ᠰᠠᠢᠨ ᠡᠷᠳᠡᠮ ᠪᠣᠯᠤᠨᠠ ᠪᠢᠵᠡ ᠳᠠ》 ᠭᠡᠵᠡᠢ᠃
ᠲᠡᠭᠡᠭᠡᠳ ᠴᠠᠷᠴᠠ ᠨᠠᠮᠵᠢᠯ ᠴᠤ᠌ ᠬᠥᠳᠥᠰᠥᠨ ᠳᠡᠪᠡᠯ ᠢ᠋ᠶ᠋ᠡᠨ ᠬᠥᠭᠡᠷᠭᠡᠨ ᠪᠦᠰᠡᠯᠡᠵᠦ᠂ ᠬᠦᠮᠡᠨ ᠭᠤᠲᠤᠯ ᠢ᠋ᠶ᠋ᠠᠨ ᠲᠠᠬᠠᠯᠠᠨ ᠡᠮᠦᠰᠦᠭᠡᠳ ᠠᠮᠠᠨ ᠳ᠋ᠠᠭᠠᠨ ᠤᠩᠰᠢᠬᠤ ᠭᠠᠭᠴᠠ ᠴᠤ᠌ ᠮᠠᠨᠢ ᠦᠭᠡᠢ᠂ ᠠᠯᠤᠰ ᠤ᠋ᠨ ᠵᠠᠮ ᠳ᠋ᠤ᠌ ᠭᠠᠷᠤᠭᠠᠳ ᠶᠠᠪᠤᠵᠠᠢ᠃ ᠶᠠᠪᠤᠭᠠᠳ ᠯᠠ ᠪᠠᠢᠵᠤ᠂ ᠶᠠᠪᠤᠭᠠᠳ ᠯᠠ ᠪᠠᠢᠵᠤ᠂
ᠶᠠᠪᠤᠭᠰᠠᠭᠠᠷ ᠪᠠᠢᠲᠠᠯᠠ ᠵᠠᠮ ᠳ᠋ᠤ᠌ ᠨᠢ ᠨᠢᠭᠡ ᠲᠣᠮᠣ ᠬᠠᠷᠠ ᠰᠢᠪᠠᠭᠤ ᠥᠨᠳᠥᠷ ᠮᠣᠳᠣᠨ ᠳᠡᠭᠡᠷᠡ ᠰᠠᠭᠤᠭᠠᠳ᠄《ᠸᠠᠭ᠂ ᠸᠠᠭ》 ᠳᠤᠤᠭᠠᠷᠴᠤ ᠪᠠᠢᠵᠠᠢ᠂ ᠲᠡᠭᠦᠨ ᠢ᠋ ᠬᠠᠷᠠᠭᠠᠳ ᠪᠠᠭᠰᠢ ᠶ᠋ᠢᠨ ᠬᠢᠨᠢ ᠵᠠᠬᠢᠭᠰᠠᠨ ᠦᠭᠡ ᠰᠠᠨᠠᠭᠠᠨ ᠳ᠋ᠤ᠌ ᠨᠢ ᠣᠷᠣᠵᠤ᠂ ᠮᠠᠨᠢ ᠬᠦᠦ᠄《ᠪᠠᠷᠠᠭᠠᠨ ᠰᠢᠪᠠᠭᠤ ᠸᠠᠭ ᠸᠠᠭ᠂ ᠪᠠᠷᠠᠭᠤᠨ ᠰᠢᠪᠠᠭᠤ ᠸᠠᠭ ᠸᠠᠭ》 ᠭᠡᠳ ᠤᠩᠰᠢᠭᠠᠳ ᠶᠠᠪᠤᠵᠠᠢ᠂
ᠲᠡᠭᠡᠵᠦ ᠶᠠᠪᠤᠲᠠᠯᠠ ᠤᠷᠳᠤᠭᠤᠷ ᠨᠢ ᠬᠣᠶᠠᠷ ᠵᠡᠭᠡᠷᠡ ᠳᠠᠪᠬᠢᠭᠠᠳ᠂ ᠥᠩᠭᠡᠷᠡᠵᠡᠢ ᠲᠡᠭᠦᠨ ᠢ᠋ ᠨᠢ ᠬᠠᠷᠠᠭᠠᠳ᠄《ᠬᠣᠶᠠᠷ ᠵᠡᠭᠡᠷᠡ ᠵᠤᠷᠤᠩ ᠵᠤᠷᠤᠩ᠂ ᠬᠣᠶᠠᠷ ᠵᠡᠭᠡᠷᠡ ᠵᠤᠷᠤᠩ ᠵᠤᠷᠤᠩ》 ᠭᠡᠭᠡᠳ ᠤᠩᠰᠢᠭᠠᠳ ᠶᠠᠪᠤᠯᠠ᠂
ᠲᠡᠭᠡᠵᠦ ᠶᠠᠪᠤᠲᠠᠯᠠ ᠵᠠᠮ ᠳ᠋ᠤ᠌ ᠨᠢ ᠬᠣᠶᠠᠷ ᠬᠤᠯᠤᠭᠠᠨᠠ ᠨᠦᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠠᠮᠠᠨ ᠳ᠋ᠤ᠌ ᠰᠠᠭᠤᠴᠢᠬᠠᠭᠠᠳ ᠰᠢᠷᠣᠢ ᠮᠠᠯᠲᠠᠵᠤ ᠪᠠᠢᠭᠠ ᠶ᠋ᠢ ᠬᠠᠷᠠᠭᠠᠳ 《ᠬᠣᠶᠠᠷ ᠬᠤᠯᠤᠭᠠᠨᠠ ᠭᠠᠵᠠᠷ ᠮᠠᠯᠲᠠᠭᠠᠳ ᠪᠤᠪᠠᠰ ᠪᠤᠪᠠᠰ᠂ ᠬᠣᠶᠠᠷ ᠬᠤᠯᠤᠭᠠᠨᠠ ᠭᠠᠵᠠᠷ ᠮᠠᠯᠲᠠᠭᠠᠳ ᠪᠤᠪᠠᠰ ᠪᠤᠪᠠᠰ》 ᠭᠡᠳ ᠯᠡ ᠤᠩᠰᠢᠭᠠᠳ ᠶᠠᠪᠤᠵᠠᠢ᠃
ᠲᠡᠭᠡᠵᠦ ᠶᠠᠪᠤᠲᠠᠯᠠ ᠨᠢᠭᠡ ᠭᠠᠬᠠᠢ ᠶ᠋ᠢᠨ ᠮᠢᠬᠠ ᠠᠴᠢᠭᠰᠠᠨ ᠬᠢᠲᠠᠳ ᠬᠤᠳᠠᠯᠳᠤᠭᠠᠴᠢᠨ ᠲᠠᠭᠠᠷᠠᠯᠳᠤᠵᠠᠢ᠃ ᠴᠠᠷᠴᠠ ᠨᠠᠮᠵᠢᠯ ᠶᠡᠬᠡᠬᠡᠨ ᠥᠯᠥᠰᠴᠦ ᠶᠠᠪᠤᠭᠰᠠᠨ ᠤᠴᠢᠷ ᠭᠠᠬᠠᠢ ᠶ᠋ᠢᠨ ᠲᠠᠷᠭᠤᠨ ᠮᠢᠬᠠ ᠬᠠᠷᠠᠭᠠᠳ ᠠᠷᠠᠭᠠᠨ ᠤ᠋ ᠬᠢᠨᠢ ᠰᠢᠯᠦᠰᠦ ᠠᠰᠬᠠᠷᠠᠵᠤ᠂ ᠠᠪᠬᠤ ᠶ᠋ᠢ ᠬᠦᠰᠡᠭᠰᠡᠨ ᠪᠣᠯᠪᠠᠴᠤ ᠬᠢᠲᠠᠳ ᠬᠡᠯᠡ ᠮᠡᠳᠡᠬᠦ ᠦᠭᠡᠢ ᠤᠴᠢᠷ᠂ ᠮᠢᠬᠠ ᠶᠠᠮᠠᠷ ᠦᠨᠡᠲᠡᠢ ᠪᠣᠯᠬᠤ ᠶ᠋ᠢ ᠳᠡᠮᠡᠢ ᠯᠡ ᠳᠣᠬᠢᠶᠠ ᠪᠠᠷ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠬᠢᠲᠠᠳ ᠬᠤᠳᠠᠯᠳᠤᠭᠠᠴᠢᠨ ᠬᠠᠷᠢᠭᠤ ᠳ᠋ᠤ᠌ ᠨᠢ᠄
《ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠣᠷᠣᠭᠰᠢ ᠰᠤᠩᠭᠠᠵᠤ ᠶᠠᠮᠠᠷ ᠨᠢᠭᠡ ᠶᠠᠭᠤᠮᠠ ᠶ᠋ᠢ ᠲᠡᠪᠡᠷᠢᠬᠦ ᠮᠡᠲᠦ ᠰᠠᠯᠠᠭᠠᠪᠴᠢᠯᠠᠭᠠᠳ ᠳᠠᠷᠠᠭᠠ ᠨᠢ ᠠᠯᠳᠠᠯᠠᠵᠤ᠂ ᠳᠠᠷᠠᠭᠠ ᠨᠢ ᠡᠷᠡᠬᠡᠢ ᠬᠤᠷᠤᠭᠤ ᠪᠠᠨ ᠭᠣᠵᠣᠢᠯᠭᠠᠵᠠᠢ᠃
ᠡᠨᠡ ᠨᠢ ᠪᠦᠳᠦᠭᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠥᠮᠦᠨ ᠦ᠌ ᠲᠡᠪᠡᠷᠢ ᠳ᠋ᠦ᠍ ᠪᠠᠭᠲᠠᠷᠠᠯ ᠦᠭᠡᠢ ᠲᠠᠷᠭᠤᠨ᠂ ᠤᠷᠲᠤ ᠪᠠᠷ ᠢ᠋ᠶ᠋ᠠᠨ ᠠᠯᠲᠠ᠂ ᠡᠢᠮᠦ ᠰᠠᠢᠬᠠᠨ ᠮᠢᠬᠠ ᠪᠠᠢᠨᠠ᠂ ᠠᠪᠤᠪᠠᠯ ᠰᠠᠢᠨ᠂ ᠠᠪᠬᠤ ᠦᠭᠡᠢ ᠪᠣᠯ ᠮᠠᠭᠤ》 ᠭᠡᠰᠡᠨ ᠳᠣᠬᠢᠶᠠ ᠪᠠᠢᠭᠰᠠᠨ ᠪᠣᠯᠪᠠᠴᠤ᠂ ᠴᠠᠷᠴᠠ ᠨᠠᠮᠵᠢᠯ ᠤᠴᠢᠷ ᠢ᠋ ᠨᠢ ᠣᠢᠯᠠᠭᠠᠭᠰᠠᠨ ᠦᠭᠡᠢ᠂
ᠬᠠᠷᠢᠨ ᠤᠭ ᠳᠣᠬᠢᠶᠠ ᠶ᠋ᠢ ᠶᠠᠭ ᠯᠠ ᠳᠠᠭᠤᠷᠢᠶᠠᠵᠤ ᠳᠣᠬᠢᠵᠤ ᠴᠢᠳᠠᠳᠠᠭ ᠪᠣᠯᠤᠭᠠᠳ ᠴᠠᠭᠠᠱᠢ ᠶᠠᠪᠤᠵᠠᠢ᠂
ᠶᠠᠪᠤᠭᠠᠳ ᠯᠠ ᠪᠠᠢᠵᠤ᠂ ᠶᠠᠪᠤᠭᠠᠳ ᠯᠠ ᠪᠠᠢᠵᠤ ᠶᠠᠪᠤᠭᠰᠠᠭᠠᠷ ᠨᠢᠭᠡᠨ ᠪᠠᠶᠠᠨ ᠬᠠᠭᠠᠨ ᠤ᠋ ᠬᠢ ᠲᠠᠭᠠᠷᠠᠯᠳᠤᠵᠠᠢ᠃ ᠲᠡᠳᠡᠨ ᠦ᠌ ᠬᠢᠨ ᠳ᠋ᠦ᠍ ᠴᠠᠷᠴᠠ ᠨᠠᠮᠵᠢᠯ ᠣᠴᠢᠵᠠᠢ ᠭᠡᠨᠡ᠃
ᠬᠠᠭᠠᠨ ᠳ᠋ᠤ᠌ ᠣᠴᠢᠵᠤ ᠨᠤᠲᠤᠭ ᠤᠰᠤ᠂ ᠬᠡᠷᠡᠭ ᠵᠣᠷᠢᠭ ᠢ᠋ᠶ᠋ᠠᠨ ᠶᠠᠷᠢᠯᠴᠠᠵᠤ ᠰᠠᠭᠤᠲᠠᠯᠠ᠂ ᠴᠠᠷᠴᠠ ᠨᠠᠮᠵᠢᠯ ᠢ᠋ ᠬᠦᠷᠢᠶᠡᠨ ᠳ᠋ᠦ᠍ ᠭᠤᠷᠪᠠᠨ ᠵᠢᠯ ᠰᠠᠭᠤᠭᠰᠠᠨ ᠬᠥᠮᠦᠨ ᠭᠡᠳᠡᠭ ᠢ᠋ ᠰᠣᠨᠣᠰᠤᠭᠠᠳ ᠯᠠᠪ ᠶᠡᠬᠡ ᠮᠡᠷᠭᠡᠨ ᠲᠦᠷᠭᠡᠨ ᠬᠥᠮᠦᠨ ᠪᠠᠢᠬᠤ ᠭᠡᠵᠦ ᠪᠣᠳᠣᠨ᠂ ᠬᠠᠲᠤᠨ ᠤ᠋ ᠪᠠᠨ ᠬᠤᠯᠠᠭᠠᠢ ᠳ᠋ᠤ᠌ ᠠᠯᠳᠠᠭᠰᠠᠨ ᠠᠯᠲᠠᠨ ᠪᠥᠭᠡᠵᠢ ᠶ᠋ᠢ ᠣᠯᠣᠭᠤᠯᠬᠤ ᠪᠠᠷ ᠰᠢᠢᠳᠦᠭᠡᠳ ᠮᠡᠷᠭᠡᠯᠡᠵᠦ ᠥᠭᠬᠦ ᠶ᠋ᠢ ᠭᠤᠶᠤᠵᠠᠢ᠃
ᠴᠠᠷᠴᠠ ᠨᠠᠮᠵᠢᠯ ᠮᠠᠰᠢ ᠶᠡᠬᠡ ᠥᠯᠥᠰᠴᠦ ᠶᠠᠳᠠᠷᠠᠵᠤ ᠶᠠᠪᠤᠭᠰᠠᠨ ᠲᠤᠯᠠ᠄《ᠨᠢᠭᠡ ᠰᠠᠢᠨ ᠴᠠᠳᠴᠤ ᠠᠪᠤᠭᠠᠳ ᠦᠬᠦᠶᠡ》 ᠭᠡᠵᠦ ᠪᠣᠳᠣᠭᠠᠳ ᠮᠡᠷᠭᠡᠯᠡᠬᠦ ᠶ᠋ᠢ ᠵᠥᠪᠰᠢᠶᠡᠷᠡᠵᠡᠢ᠃
ᠲᠡᠭᠡᠭᠡᠳ ᠬᠠᠭᠠᠨ ᠳ᠋ᠤ᠌ ᠴᠠᠷᠴᠠ ᠨᠠᠮᠵᠢᠯ᠄《ᠲᠠ ᠨᠢᠭᠡ ᠭᠡᠷ ᠪᠠᠷᠢᠭᠤᠯᠤᠭᠠᠳ ᠳᠣᠲᠣᠷᠠ ᠨᠢ ᠶᠠᠩᠵᠤ ᠪᠦᠷᠢ ᠠᠮᠲᠠᠲᠠᠨ ᠲᠠᠩᠰᠤᠭ ᠢᠳᠡᠭᠡ ᠵᠣᠭᠣᠭ ᠪᠡᠯᠡᠳᠭᠡ᠂ ᠪᠢ ᠲᠡᠨᠳᠡ ᠭᠤᠷᠪᠠᠨ ᠬᠣᠨᠣᠭ ᠰᠠᠭᠤᠵᠤ ᠮᠡᠷᠭᠡᠯᠡᠨᠡ᠃ ᠳᠥᠷᠪᠡ ᠳ᠋ᠡᠬᠢ ᠡᠳᠦᠷ ᠦ᠋ᠨ ᠥᠷᠯᠥᠭᠡ ᠯᠡ ᠲᠠ ᠲᠡᠨᠳᠡ ᠣᠷᠣᠵᠤ ᠪᠥᠭᠡᠵᠢ ᠪᠡᠨ ᠠᠰᠠᠭᠤᠭᠠᠷᠠᠢ᠂》 ᠭᠡᠵᠡᠢ᠃ ᠬᠠᠭᠠᠨ ᠴᠤ᠌ ᠶᠣᠰᠣ ᠪᠠᠷ ᠪᠣᠯᠭᠠᠵᠠᠢ ᠭᠡᠨᠡ᠂
ᠴᠠᠷᠴᠠ ᠨᠠᠮᠵᠢᠯ ᠴᠤ᠌ ᠲᠤᠰᠬᠠᠢ ᠪᠡᠯᠡᠳᠬᠡᠭᠰᠡᠨ ᠭᠡᠷ ᠲᠦ᠍ ᠣᠷᠣᠵᠤ᠂ ᠬᠣᠭᠣᠯᠠ ᠤᠮᠳᠠ ᠢᠳᠡᠵᠦ ᠤᠤᠭᠤᠵᠤ ᠰᠠᠢᠲᠤᠷ ᠴᠠᠳᠤᠭᠰᠠᠨ ᠭᠡᠨᠡ ᠃ ᠲᠡᠭᠡᠭᠡᠳ᠄《ᠵᠠ ᠣᠳᠣ ᠶᠠᠭᠠᠬᠢᠳᠠᠭ ᠪᠢᠯᠡ?》 ᠭᠡᠵᠦ ᠪᠣᠳᠣᠵᠤ ᠪᠠᠢᠭᠠᠳ᠂ ᠨᠥᠬᠥᠭᠡ ᠪᠠᠭᠰᠢ ᠶ᠋ᠢᠨ ᠬᠢᠨᠢ ᠵᠠᠬᠢᠭᠰᠠᠨ ᠦᠭᠡ ᠰᠠᠨᠠᠭᠳᠠᠵᠤ᠂ ᠤᠯᠠᠮ ᠢ᠋ᠶ᠋ᠠᠷ ᠦᠵᠡᠭᠰᠡᠨ ᠶᠠᠭᠤᠮᠠ ᠪᠠᠨ ᠪᠣᠳᠣᠭᠠᠳ᠄
《ᠪᠠᠷᠠᠭᠠᠨ ᠰᠢᠪᠠᠭᠤ ᠸᠠᠭ ᠸᠠᠭ᠂ ᠪᠠᠷᠠᠭᠠᠨ ᠰᠢᠪᠠᠭᠤ ᠸᠠᠭ ᠸᠠᠭ》 ᠭᠡᠳ ᠯᠡ ᠤᠩᠰᠢᠭᠠᠳ ᠬᠡᠪᠲᠡᠵᠦ ᠪᠠᠢᠵᠠᠢ᠂ ᠲᠡᠷᠡ ᠣᠷᠣᠢ ᠬᠠᠭᠠᠨ ᠵᠡᠭᠦᠨ ᠭᠠᠷ ᠤ᠋ᠨ ᠲᠦᠰᠢᠮᠡᠯ ᠢ᠋ᠶ᠋ᠡᠨ ᠳᠠᠭᠤᠳᠠᠵᠤ ᠢᠷᠡᠭᠦᠯᠦᠭᠡᠳ᠄《ᠮᠡᠷᠭᠡᠨ ᠯᠠᠮᠠ ᠶ᠋ᠢᠨ ᠭᠡᠷ ᠦ᠋ᠨ ᠭᠠᠳᠠᠨᠠ ᠣᠴᠢᠵᠤ ᠴᠢᠩᠨᠠᠭᠠᠳ ᠲᠡᠭᠦᠨ ᠦ᠌ ᠶᠠᠭᠤ ᠬᠢᠵᠦ ᠪᠠᠢᠭᠠ ᠶ᠋ᠢ ᠨᠢ ᠮᠡᠳᠡᠭᠡᠳ ᠢᠷᠡ》 ᠭᠡᠵᠦ ᠲᠤᠰᠢᠶᠠᠯ ᠥᠭᠭᠦᠭᠡᠳ ᠶᠠᠪᠤᠭᠤᠯᠵᠠᠢ᠃
ᠲᠦᠰᠢᠮᠡᠯ ᠨᠢ ᠯᠠᠮᠠ ᠶ᠋ᠢᠨ ᠭᠡᠷ ᠦ᠋ᠨ ᠭᠠᠳᠠᠨᠠ ᠢᠷᠡᠵᠦ ᠭᠡᠷ ᠳᠠᠷᠤᠭᠤᠯᠤᠭᠰᠠᠨ ᠴᠢᠯᠠᠭᠤᠨ ᠳᠡᠭᠡᠷᠡ ᠰᠠᠭᠤᠭᠠᠳ ᠴᠢᠩᠨᠠᠭᠰᠠᠨ ᠴᠢᠨᠢ᠄《ᠪᠠᠷᠠᠭᠠᠨ ᠰᠢᠪᠠᠭᠤ ᠸᠠᠭ ᠸᠠᠭ᠂ ᠪᠠᠷᠠᠭᠠᠨ ᠰᠢᠪᠠᠭᠤ ᠸᠠᠭ ᠸᠠᠭ》 ᠭᠡᠳ ᠯᠡ ᠶᠠᠭᠤᠮᠠ ᠶᠠᠷᠢᠭᠠᠳ ᠪᠠᠢᠬᠤ ᠰᠢᠭ᠋ ᠪᠣᠯᠵᠠᠢ ᠭᠡᠨᠡ᠃
ᠲᠡᠭᠦᠨ ᠢ᠋ ᠰᠣᠨᠣᠰᠤᠭᠰᠠᠨ ᠲᠦᠰᠢᠮᠡᠯ᠄《ᠪᠠᠷᠠᠭᠠᠨ ᠰᠢᠪᠠᠭᠤ ᠭᠡᠵᠦ ᠡᠨᠡ ᠯᠠᠮᠠ ᠨᠠᠮᠠ ᠶ᠋ᠢ ᠯᠡ ᠢᠷᠡᠵᠦ ᠰᠠᠭᠤᠭᠰᠠᠨ ᠢ᠋ ᠮᠡᠳᠡᠭᠡᠳ ᠬᠡᠯᠡᠯᠡ ᠳᠠ》 ᠭᠡᠵᠦ ᠪᠣᠳᠣᠭᠠᠳ ᠪᠤᠰᠢᠭᠤᠬᠠᠨ ᠪᠤᠴᠠᠵᠤ ᠢᠷᠡᠭᠡᠳ ᠬᠠᠭᠠᠨ ᠳ᠋ᠤ᠌ ᠪᠠᠨ ᠯᠠᠮᠠ ᠶ᠋ᠢᠨ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢ ᠬᠡᠯᠡᠵᠡᠢ᠃
ᠮᠠᠷᠭᠠᠰᠢ ᠨᠢ ᠬᠠᠭᠠᠨ ᠮᠥᠨ ᠯᠡ᠄《ᠲᠡᠷᠡ ᠯᠠᠮᠠ ᠶ᠋ᠢᠨ ᠶᠠᠭᠤ ᠬᠢᠵᠦ ᠪᠠᠢᠭᠠ ᠶ᠋ᠢ ᠮᠡᠳᠡᠵᠦ ᠢᠷᠡ》 ᠭᠡᠳ ᠬᠠᠲᠤᠨ᠂ ᠥᠬᠢᠨ ᠬᠣᠶᠠᠷ ᠢ᠋ᠶ᠋ᠠᠨ ᠶᠠᠪᠤᠭᠤᠯᠵᠠᠢ᠃ ᠬᠠᠲᠤᠨ ᠥᠬᠢᠨ ᠬᠣᠶᠠᠷ ᠯᠠᠮᠠ ᠶ᠋ᠢᠨ ᠭᠡᠷ ᠦ᠋ᠨ ᠭᠠᠳᠠᠨᠠ ᠰᠡᠮᠡᠬᠡᠨ ᠭᠡᠲᠡᠵᠦ ᠢᠷᠡᠭᠡᠳ ᠴᠢᠩᠨᠠᠬᠤ ᠳ᠋ᠤ᠌ ᠯᠠᠮᠠ᠄
《ᠬᠣᠶᠠᠷ ᠵᠡᠭᠡᠷᠡ ᠵᠤᠷᠤᠩ ᠵᠤᠷᠤᠩ᠂ ᠬᠣᠶᠠᠷ ᠵᠡᠭᠡᠷᠡ ᠵᠤᠷᠤᠩ ᠵᠤᠷᠤᠩ》 ᠭᠡᠳ ᠯᠡ ᠶᠠᠭᠤᠮᠠ ᠶᠠᠷᠢᠵᠤ ᠪᠠᠢᠭᠰᠠᠨ ᠳ᠋ᠤ᠌ ᠲᠡᠷᠡ ᠬᠣᠶᠠᠷ ᠥᠪᠡᠷᠰᠡᠳ ᠢ᠋ ᠨᠢ ᠬᠡᠯᠡᠪᠡ ᠭᠡᠵᠦ ᠪᠣᠳᠣᠭᠠᠳ ᠪᠤᠰᠢᠭᠤᠬᠠᠨ ᠪᠤᠴᠠᠵᠤ ᠢᠷᠡᠭᠡᠳ ᠶᠠᠭᠤ ᠪᠣᠯᠤᠭᠰᠠᠨ ᠢ᠋ ᠶ᠋ᠢ ᠬᠠᠭᠠᠨ ᠳ᠋ᠠᠭᠠᠨ ᠬᠡᠯᠡᠪᠡ᠃
ᠲᠡᠭᠡᠬᠦ ᠳ᠋ᠦ᠍ ᠬᠠᠭᠠᠨ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠲᠦᠰᠢᠮᠡᠯ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠯᠠᠮᠠ ᠶ᠋ᠢᠨ ᠭᠠᠳᠠᠨᠠ ᠣᠴᠢᠭᠠᠳ ᠬᠡᠰᠡᠭ ᠰᠠᠭᠤᠵᠠᠢ᠂ ᠯᠠᠮᠠ ᠴᠢᠮᠡᠭᠡ ᠦᠭᠡᠢ ᠯᠡ ᠪᠠᠢᠵᠠᠢ ᠭᠡᠨᠡ᠂ ᠲᠡᠭᠡᠭᠡᠳ ᠬᠠᠭᠠᠨ ᠲᠦᠰᠢᠮᠡᠯ ᠬᠣᠶᠠᠷ᠄《ᠡᠨᠡ ᠯᠠᠮᠠ ᠦᠨᠡᠬᠡᠷ ᠯᠡ ᠮᠡᠷᠭᠡᠨ ᠶᠦᠮ ᠪᠣᠯ ᠪᠢᠳᠡ ᠬᠣᠶᠠᠷ ᠤ᠋ᠨ ᠭᠠᠳᠠᠨᠠ ᠪᠠᠢᠭᠠ ᠶ᠋ᠢ ᠯᠠᠪ ᠮᠡᠳᠡᠮᠡᠷ ᠶᠦᠮ᠂
ᠳᠠᠭᠤᠤ ᠦᠭᠡᠢ ᠪᠠᠢᠭᠠ ᠶ᠋ᠢ ᠨᠢ ᠦᠵᠡᠪᠡᠯ ᠶᠠᠭᠤᠮᠠ ᠮᠡᠳᠡᠳᠡᠭ ᠦᠭᠡᠢ ᠠᠮᠢᠲᠠᠨ ᠪᠣᠯᠤᠯᠲᠠᠢ᠂ ᠥᠴᠥᠭᠡᠳᠦᠷ ᠦ᠋ᠨ ᠲᠠᠩᠨᠠᠬᠤ ᠪᠠᠷ ᠶᠠᠪᠤᠭᠰᠠᠳ ᠬᠤᠳᠠᠯ ᠬᠡᠯᠡᠭᠰᠡᠨ ᠡᠴᠡ ᠵᠠᠢᠯᠠᠬᠤ ᠦᠭᠡᠢ ᠨᠢ》 ᠭᠡᠵᠦ ᠭᠠᠵᠠᠷ ᠲᠤ᠌ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠪᠢᠴᠢᠯᠴᠡᠨ ᠶᠠᠷᠢᠵᠤ ᠪᠠᠢᠲᠠᠯᠠ ᠭᠡᠨᠡᠳᠲᠡ ᠯᠠᠮᠠ ᠶ᠋ᠢᠨ ᠳᠠᠭᠤ ᠣᠭᠵᠣᠮ ᠴᠢᠩᠭᠠ ᠰᠣᠨᠣᠰᠤᠭᠳᠠᠵᠤ᠄
《ᠬᠣᠶᠠᠷ ᠬᠤᠯᠤᠭᠠᠨᠠ ᠭᠠᠵᠠᠷ ᠮᠠᠯᠲᠠᠭᠠᠳ ᠪᠤᠪᠠᠰ ᠪᠤᠪᠠᠰ᠂ ᠬᠣᠶᠠᠷ ᠬᠤᠯᠤᠭᠠᠨᠠ ᠭᠠᠵᠠᠷ ᠮᠠᠯᠲᠠᠭᠠᠳ ᠪᠤᠪᠠᠰ ᠪᠤᠪᠠᠰ》 ᠭᠡᠳ ᠯᠡ ᠶᠠᠷᠢᠵᠤ ᠡᠬᠢᠯᠡᠵᠡᠢ ᠭᠡᠨᠡ᠂ ᠬᠠᠭᠠᠨ ᠲᠦᠰᠢᠮᠡᠯ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠭᠠᠳ ᠰᠡᠩᠳᠡ ᠮᠡᠩᠳᠡᠯᠠ ᠪᠤᠴᠠᠵᠠᠢ᠂ ᠮᠠᠷᠭᠠᠰᠢ ᠨᠢ ᠭᠤᠷᠪᠠᠳᠠᠬᠢ ᠦᠳᠡᠰᠢ ᠨᠢ ᠪᠣᠯᠵᠤ ᠴᠠᠷᠴᠠ ᠨᠠᠮᠵᠢᠯ ᠴᠤ᠌ ᠰᠠᠨᠳᠤᠷᠴᠤ ᠡᠬᠢᠯᠡᠵᠡᠢ᠃
ᠵᠠᠮ ᠳ᠋ᠠᠭᠠᠨ ᠠᠵᠢᠭᠯᠠᠨ ᠲᠣᠭᠲᠠᠭᠠᠭᠰᠠᠨ ᠬᠡᠳᠦᠨ ᠦᠭᠡ ᠪᠡᠨ ᠤᠩᠰᠢᠴᠢᠬᠠᠭᠰᠠᠨ᠂ ᠬᠡᠯᠡᠬᠦ ᠬᠢᠬᠦ ᠶᠠᠭᠤᠮᠠ ᠦᠭᠡᠢ ᠰᠢᠭ ᠰᠠᠨᠠᠭᠳᠠᠭᠰᠠᠨ ᠲᠤᠯᠠ ᠬᠣᠨᠢᠨ ᠲᠣᠭᠣᠭᠠ ᠳᠦᠭᠦᠷᠡᠩ᠂ ᠲᠦᠭᠦᠬᠡᠢ ᠭᠤᠯᠢᠷ ᠤᠰᠤᠨ ᠳ᠋ᠤ᠌ ᠵᠢᠭᠤᠷᠠᠭᠤᠯᠵᠤ ᠳᠡᠭᠡᠷᠡ ᠡᠴᠡ ᠨᠢ ᠭᠤᠷᠪᠠᠨ ᠰᠢᠨᠠᠭᠠ ᠳᠠᠪᠤᠰᠤ ᠬᠢᠵᠦ᠂ ᠱᠣᠷᠪᠣᠭ ᠲᠦᠭᠦᠬᠡᠢ ᠵᠤᠲᠠᠩ ᠪᠡᠯᠡᠳᠬᠡᠭᠡᠳ ᠲᠡᠭᠦᠨ ᠢ᠋ ᠤᠤᠭᠤᠵᠤ ᠭᠡᠳᠡᠰᠦ ᠪᠡᠨ ᠬᠥᠭᠡᠭᠡᠯᠭᠡᠬᠦ ᠪᠡᠷ ᠰᠢᠢᠳᠴᠡᠢ ᠭᠡᠨᠡ᠃
ᠲᠡᠭᠡᠭᠡᠳ ᠨᠢᠭᠡ ᠲᠣᠭᠣᠭᠠ ᠱᠣᠷᠪᠣᠭ ᠵᠤᠲᠠᠩ ᠤᠤᠭᠤᠭᠠᠳ ᠬᠡᠪᠲᠡᠭᠰᠡᠨ ᠳ᠋ᠦ᠍ ᠭᠡᠳᠡᠰᠦ ᠨᠢ ᠳᠦᠭᠦᠷᠦᠭᠡᠳ᠂ ᠲᠣᠭᠣᠭᠠᠨ ᠴᠢᠨᠡᠭᠡ ᠲᠣᠮᠣ ᠪᠣᠯᠵᠠᠢ᠂ ᠠᠮᠢ ᠨᠢ ᠲᠡᠮᠡᠴᠡᠭᠡᠳ ᠭᠡᠳᠡᠰᠦ ᠪᠡᠨ ᠮᠠᠭᠠᠵᠢᠭᠠᠳ ᠯᠠ
ᠴᠣᠳᠣᠢᠭᠰᠠᠨ ᠮᠠᠭᠤ ᠬᠣᠭ ᠮᠢᠨᠢ ᠠ᠋! ᠴᠢ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠠᠳᠠ ᠳ᠋ᠤ᠌ ᠴᠣᠳᠣᠭᠣᠷ ᠭᠡᠳᠡᠰᠦ ᠪᠡᠨ ᠬᠠᠭᠠᠯᠤᠭᠤᠯᠬᠤ ᠪᠠᠨ ᠮᠡᠳᠡᠵᠦ ᠪᠠᠢᠨᠠ ᠤᠤ?》 ᠭᠡᠳ ᠯᠡ ᠫᠠᠳ ᠬᠢᠲᠡᠯᠡ ᠠᠯᠠᠭᠠᠳᠠᠵᠤ ᠵᠠᠩᠨᠠᠭᠠᠳ ᠠᠷᠭᠠ ᠪᠠᠨ ᠪᠠᠷᠠᠵᠤ ᠪᠠᠢᠵᠠᠢ ᠭᠡᠨᠡ᠃
ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠬᠠᠲᠤᠨ ᠤ᠋ ᠪᠥᠭᠡᠵᠢ ᠶ᠋ᠢ ᠬᠤᠯᠠᠭᠠᠢᠯᠠᠭᠰᠠᠨ ᠪᠡᠶᠡ ᠳᠠᠪᠬᠤᠷ ᠵᠠᠷᠤᠴᠠ ᠬᠡᠦᠬᠡᠨ ᠭᠡᠷ ᠦ᠋ᠨ ᠭᠠᠳᠠᠨᠠ ᠢᠷᠡᠵᠦ ᠴᠢᠩᠨᠠᠵᠤ ᠪᠠᠢᠭᠰᠠᠨ ᠲᠤᠯᠠ ᠳᠡᠭᠡᠷᠡᠬᠢ ᠦᠭᠡ ᠶ᠋ᠢ ᠥᠪᠡᠷ ᠲᠦ᠍ ᠨᠢ ᠬᠡᠯᠡᠵᠦ ᠪᠠᠢᠨᠠ ᠭᠡᠵᠦ ᠪᠣᠳᠣᠭᠠᠳ ᠮᠡᠷᠭᠡᠨ ᠯᠠᠮᠠ ᠠ᠋ᠴᠠ ᠥᠷᠥᠰᠢᠶᠡᠯ ᠭᠤᠶᠤᠬᠤ ᠪᠠᠷ ᠣᠷᠣᠵᠤ᠂ ᠲᠡᠭᠦᠨ ᠳ᠋ᠦ᠍ ᠬᠠᠮᠤᠭ ᠦᠨᠡᠨ ᠢ᠋ᠶ᠋ᠡᠷ ᠲᠣᠭᠠᠴᠢᠨ ᠥᠷᠥᠰᠢᠶᠡᠬᠦ ᠶ᠋ᠢ ᠭᠤᠶᠤᠵᠠᠢ᠃
ᠴᠠᠷᠴᠠ ᠨᠠᠮᠵᠢᠯ ᠲᠡᠷᠡ ᠬᠡᠦᠬᠡᠨ ᠡᠴᠡ ᠬᠠᠲᠤᠨ ᠤ᠋ ᠠᠯᠲᠠᠨ ᠪᠥᠭᠡᠵᠢ ᠶ᠋ᠢ ᠠᠪᠤᠭᠠᠳ᠄《ᠪᠢ ᠥᠪᠡᠷ ᠢ᠋ᠶ᠋ᠡᠨ ᠶᠠᠳᠠᠭᠤ ᠳᠣᠣᠷᠠᠲᠤ ᠬᠥᠮᠦᠨ ᠪᠣᠯᠬᠣᠷ ᠶᠠᠳᠠᠭᠤᠰ ᠢ᠋ ᠦᠷᠦ ᠡᠪᠡᠳᠳᠡᠭ ᠶᠦᠮ᠂ ᠴᠢᠮᠠ ᠶ᠋ᠢ ᠬᠤᠯᠠᠭᠠᠢᠯᠠᠭᠰᠠᠨ ᠭᠡᠵᠦ ᠬᠡᠨ ᠳ᠋ᠦ᠍ ᠴᠦ᠍ ᠬᠡᠯᠡᠬᠦ ᠦᠭᠡᠢ ᠃ ᠬᠣᠢᠰᠢᠳᠠ ᠬᠠᠷᠢᠨ ᠬᠤᠯᠠᠭᠠᠢ ᠪᠢᠲᠡᠭᠡᠢ ᠬᠢᠭᠡᠷᠡᠢ》 ᠭᠡᠵᠡᠢ᠃
ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠬᠠᠭᠠᠨ ᠪᠥᠭᠡᠵᠢ ᠪᠡᠨ ᠠᠰᠠᠭᠤᠬᠤ ᠪᠠᠷ ᠯᠠᠮᠠ ᠶ᠋ᠢᠨ ᠭᠡᠷ ᠲᠦ᠍ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠴᠠᠷᠴᠠ ᠨᠠᠮᠵᠢᠯ ᠪᠥᠭᠡᠵᠢ ᠶ᠋ᠢ ᠨᠢ ᠭᠠᠷᠭᠠᠵᠤ ᠥᠭᠴᠡᠢ᠃
ᠬᠠᠭᠠᠨ ᠶᠡᠬᠡᠳᠡ ᠪᠠᠶᠠᠷᠯᠠᠨ᠂ ᠮᠡᠷᠭᠡᠨ ᠭᠡᠳᠡᠭ ᠲᠦ᠍ ᠨᠢ ᠢᠲᠡᠭᠡᠭᠡᠳ ᠵᠡᠷᠭᠡᠯᠡᠳᠡᠭᠡ ᠬᠤᠰᠢᠭᠤᠨ ᠤ᠋ ᠪᠠᠨ ᠬᠣᠷᠢᠨ ᠵᠢᠯ ᠨᠣᠮ ᠪᠢᠰᠢᠯᠭᠠᠵᠤ ᠲᠡᠢᠨ ᠬᠢᠭᠰᠡᠨ ᠯᠠᠮᠠ ᠨᠠᠷ ᠲᠠᠢ ᠨᠣᠮ ᠬᠠᠶᠠᠯᠴᠠᠬᠤ ᠶ᠋ᠢ ᠭᠤᠶᠤᠵᠠᠢ᠃
ᠴᠠᠷᠴᠠ ᠨᠠᠮᠵᠢᠯ ᠴᠤ᠌ ᠶᠠᠮᠠᠷ ᠴᠤ᠌ ᠠᠷᠭᠠ ᠦᠭᠡᠢ ᠵᠥᠪᠰᠢᠶᠡᠷᠡᠵᠡᠢ ᠭᠡᠨᠡ᠃
ᠨᠣᠮ ᠬᠠᠶᠠᠯᠴᠠᠬᠤ ᠪᠠᠷ ᠬᠠᠭᠠᠨ ᠢ᠋ ᠳᠠᠭᠠᠭᠠᠳ ᠨᠥᠬᠥᠭᠡ ᠬᠤᠰᠢᠭᠤᠨ ᠳ᠋ᠤ᠌ ᠣᠴᠢᠬᠤ ᠳ᠋ᠤ᠌ ᠲᠡᠷᠡ ᠬᠤᠰᠢᠭᠤᠨ ᠤ᠋ ᠬᠢᠨᠢ ᠄《ᠠᠯᠳᠠᠷᠲᠠᠢ᠂ ᠡᠷᠳᠡᠮᠲᠡᠢ᠂ᠨᠣᠮᠲᠠᠢ᠂ ᠯᠠᠮᠠ ᠢᠷᠡᠨᠡ》 ᠭᠡᠳ ᠲᠤᠰᠬᠠᠢ ᠭᠡᠷ ᠪᠠᠷᠢᠭᠤᠯᠤᠨ ᠪᠡᠯᠡᠳᠬᠡᠴᠢᠬᠡᠭᠰᠡᠨ ᠪᠠᠢᠵᠠᠢ᠂ ᠴᠠᠷᠴᠠ ᠨᠠᠮᠵᠢᠯ ᠲᠡᠷᠡ ᠭᠡᠷ ᠲᠦ᠍ ᠣᠷᠣᠭᠠᠳ ᠯᠠ ᠢᠳᠡᠵᠦ ᠤᠤᠭᠤᠭᠠᠳ ᠯᠠ ᠰᠠᠭᠤᠵᠤ ᠪᠠᠢᠵᠠᠢ ᠭᠡᠨᠡ᠃
ᠲᠡᠭᠡᠲᠡᠯᠡ ᠬᠤᠰᠢᠭᠤᠨ ᠤ᠋ ᠬᠠᠮᠤᠭ ᠤ᠋ᠨ ᠶᠡᠬᠡ ᠨᠣᠮᠲᠠᠢ ᠭᠤᠷᠪᠠᠨ ᠯᠠᠮᠠ ᠡᠬᠢᠯᠡᠨ ᠨᠣᠮ ᠬᠠᠶᠠᠯᠴᠠᠬᠤ ᠪᠠᠷ ᠭᠡᠷ ᠲᠦ᠍ ᠣᠷᠣᠭᠠᠳ ᠢᠷᠡᠪᠡ᠃ ᠴᠠᠷᠴᠠ ᠨᠠᠮᠵᠢᠯ ᠬᠡᠯᠡᠬᠦ ᠴᠦ᠍ ᠦᠭᠡ ᠣᠯᠳᠠᠭᠰᠠᠨ ᠦᠭᠡᠢ᠂ ᠳᠡᠮᠡᠢ ᠯᠡ ᠨᠥᠬᠥᠭᠡ ᠬᠢᠲᠠᠳ ᠬᠤᠳᠠᠯᠳᠤᠭᠠᠴᠢᠨ ᠠ᠋ᠴᠠ ᠰᠤᠷᠤᠭᠰᠠᠨ ᠳᠣᠬᠢᠶᠠ ᠶ᠋ᠢ ᠪᠡᠨ ᠬᠢᠵᠦ ᠦᠵᠡᠭᠦᠯᠵᠡᠢ᠃ ᠲᠡᠭᠡᠲᠡᠯᠡ ᠲᠡᠷᠡ ᠭᠤᠷᠪᠠᠨ ᠯᠠᠮᠠ ᠨᠢᠭᠡ ᠴᠦ᠍ ᠦᠭᠡ ᠬᠡᠯᠡᠯ ᠦᠭᠡᠢ ᠭᠠᠷᠤᠭᠠᠳ ᠶᠠᠪᠤᠪᠠ᠃
ᠬᠠᠭᠠᠨ ᠲᠡᠳᠡᠨ ᠡᠴᠡ᠄《ᠵᠠ᠂ ᠲᠠ ᠭᠤᠷᠪᠠ ᠴᠠᠭᠠᠳᠤᠬᠢ ᠶ᠋ᠢ ᠪᠡᠨ ᠬᠠᠷᠠᠪᠠ ᠤᠤ?᠂ ᠬᠢᠷᠢ ᠨᠣᠮᠲᠠᠢ ᠯᠠᠮᠠ ᠪᠠᠢᠨᠠ ᠳᠠ?》 ᠭᠡᠰᠡᠨ ᠳ᠋ᠦ᠍ ᠲᠡᠷᠡ ᠭᠤᠷᠪᠠ᠄《ᠬᠠᠭᠠᠨᠲᠠᠨ ᠮᠢᠨᠢ ᠲᠡᠷᠡ ᠴᠢᠨᠢ ᠪᠢᠳᠡ ᠮᠡᠲᠦ ᠶ᠋ᠢᠨ ᠪᠠᠨᠳᠢ ᠨᠠᠷ ᠲᠠᠢ ᠨᠣᠮ ᠬᠠᠶᠠᠯᠴᠠᠬᠤ ᠪᠠᠷ ᠬᠥᠮᠦᠨ ᠪᠢᠰᠢ ᠶᠦᠮ ᠪᠠᠢᠨᠠ ᠪᠢᠳᠠᠨ ᠢ᠋ ᠣᠷᠣᠩᠭᠤᠲᠠ ᠯᠠ ᠳᠡᠯᠡᠬᠡᠢ ᠶᠠᠮᠠᠷ ᠬᠡᠮᠵᠢᠶᠡ ᠲᠡᠢ ᠪᠣᠢ?ᠭᠡᠵᠦ ᠭᠠᠷ ᠢ᠋ᠶ᠋ᠠᠨ ᠳᠤᠭᠤᠢᠯᠠᠭᠠᠳ ᠯᠠ ᠠᠯᠳᠠᠬᠠᠨ ᠪᠡᠶᠡ ᠪᠡᠷ ᠳᠦᠭᠦᠷᠡᠩ ᠨᠣᠮ ᠰᠤᠷᠤᠭᠰᠠᠨ ᠶᠤᠮ ᠤᠤ ᠳᠠ ᠲᠠ ᠨᠠᠷ?》 ᠭᠡᠵᠦ ᠠᠯᠳᠠᠯᠠᠭᠠᠳ ᠯᠠ ᠮᠡᠳᠡᠪᠡᠯ ᠰᠠᠢᠨ ᠭᠡᠵᠦ᠂ ᠡᠷᠡᠬᠡᠢ ᠬᠤᠷᠤᠭᠤ ᠶ᠋ᠢ ᠪᠡᠨ᠂ ᠮᠡᠳᠡᠬᠦ ᠦᠭᠡᠢ ᠪᠣᠯ ᠮᠠᠭᠤ ᠭᠡᠵᠦ ᠰᠢᠭᠡᠵᠡᠢ ᠬᠤᠷᠤᠭᠤ ᠶ᠋ᠢ ᠪᠡᠨ ᠭᠣᠵᠣᠢᠯᠭᠠᠯᠠ ᠭᠡᠵᠡᠢ᠂
ᠡᠢᠨ ᠬᠦ᠌ ᠴᠠᠷᠴᠠ ᠨᠠᠮᠵᠢᠯ ᠲᠠᠢ ᠨᠣᠮ ᠬᠠᠶᠠᠯᠴᠠᠬᠤ ᠶ᠋ᠢ ᠬᠡᠨ ᠴᠦ᠍ ᠵᠢᠷᠦᠬᠡᠯᠡᠭᠰᠡᠨ ᠦᠭᠡᠢ᠂ ᠲᠡᠭᠦᠨ ᠦ᠌ ᠪᠦᠷᠢᠨ ᠢᠯᠠᠯᠲᠠ ᠪᠣᠯᠵᠤ ᠬᠠᠭᠠᠨ ᠲᠠᠢ ᠪᠠᠨ ᠪᠤᠴᠠᠵᠠᠢ᠃ ᠲᠡᠭᠡᠭᠡᠳ ᠤᠳᠠᠯ ᠦᠭᠡᠢ ᠴᠠᠷᠴᠠ ᠨᠠᠮᠵᠢᠯ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠬᠤ ᠪᠣᠯᠵᠤ ᠬᠠᠭᠠᠨ ᠴᠤ᠌ ᠪᠡᠯᠡᠭ ᠰᠡᠯᠲᠡ ᠡᠯᠪᠡᠭ ᠳᠡᠯᠪᠡᠭ ᠥᠭᠴᠡᠢ᠂
ᠬᠠᠭᠠᠨ ᠴᠠᠷᠴᠠ ᠨᠠᠮᠵᠢᠯ ᠢ᠋ ᠳᠠᠬᠢᠨ ᠰᠣᠷᠢᠵᠤ ᠦᠵᠡᠬᠦ ᠪᠡᠷ ᠳᠣᠲᠣᠷᠠ ᠪᠠᠨ ᠰᠢᠢᠳᠴᠡᠢ ᠭᠡᠨᠡ᠂ ᠴᠠᠷᠴᠠ ᠨᠠᠮᠵᠢᠯ ᠪᠡᠯᠡᠭ ᠲᠦ᠍ ᠠᠪᠤᠭᠰᠠᠨ ᠠᠴᠢᠶᠠ ᠪᠠᠷᠠᠭᠠ ᠪᠠᠨ ᠬᠥᠲᠥᠯᠦᠭᠡᠳ ᠶᠠᠪᠤᠵᠤ ᠪᠠᠢᠯᠠ᠃ ᠨᠠᠮᠤᠷ ᠴᠠᠭ ᠶᠤᠮ ᠰᠠᠨᠵᠠᠢ᠂
ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠨᠢᠭᠡ ᠴᠠᠷᠴᠠ ᠢᠷᠡᠭᠡᠳ ᠪᠠᠭᠤᠬᠤ ᠳ᠋ᠤ᠌ ᠬᠠᠭᠠᠨ ᠪᠠᠷᠢᠵᠤ ᠠᠪᠬᠤ ᠭᠡᠳ ᠴᠢᠳᠠᠭᠰᠠᠨ ᠦᠭᠡᠢ᠂ ᠳᠠᠬᠢᠨ ᠪᠠᠭᠤᠬᠤ ᠳ᠋ᠤ᠌ ᠳᠤᠲᠠᠭᠤ ᠪᠠᠷᠢᠭᠠᠳ ᠠᠯᠳᠠᠴᠢᠬᠠᠪᠠ᠃ ᠳᠠᠬᠢᠨ ᠪᠠᠭᠤᠬᠤ ᠳ᠋ᠤ᠌ ᠨᠢ ᠠᠷᠠᠢᠬᠠᠨ ᠪᠠᠷᠢᠵᠤ ᠠᠪᠤᠭᠠᠳ ᠠᠳᠬᠤᠭᠰᠠᠨ ᠴᠢᠭ ᠢ᠋ᠶ᠋ᠡᠷ ᠮᠣᠷᠢᠨ ᠳ᠋ᠤ᠌ ᠪᠠᠨ ᠮᠣᠷᠳᠠᠵᠤ ᠴᠠᠷᠴᠠ ᠨᠠᠮᠵᠢᠯ ᠤ᠋ᠨ ᠠᠷᠤ ᠠ᠋ᠴᠠ ᠭᠦᠢᠴᠡᠨ ᠢᠷᠡᠭᠡᠳ᠄《ᠵᠠ᠂ ᠯᠠᠮᠠ ᠲᠠ ᠮᠢᠨᠦ ᠭᠠᠷ ᠲᠤ᠌ ᠶᠠᠭᠤ ᠪᠠᠢᠭᠠ ᠶ᠋ᠢ ᠮᠡᠷᠭᠡᠯᠡᠵᠦ ᠠᠢᠯᠠᠳ》 ᠭᠡᠵᠡᠢ ᠄《ᠴᠠᠷᠴᠠ ᠨᠠᠮᠵᠢᠯ ᠲᠠᠨ ᠳ᠋ᠤ᠌ ᠨᠢᠭᠡᠳᠡᠬᠢ ᠤᠳᠠᠭᠠ ᠪᠠᠷᠢᠭᠳᠠᠭᠰᠠᠨ ᠦᠭᠡᠢ᠂ ᠬᠣᠶᠠᠳᠠᠬᠢ ᠤᠳᠠᠭᠠ ᠳ᠋ᠤ᠌ ᠪᠠᠨ ᠪᠠᠷᠢᠭᠳᠠᠬᠤ ᠰᠢᠬᠠᠭᠰᠠᠨ᠂ ᠬᠠᠷᠢᠨ ᠭᠤᠷᠪᠠᠳᠠᠬᠢ ᠤᠳᠠᠭᠠ ᠳ᠋ᠤ᠌ ᠪᠠᠨ ᠠᠷᠭᠠ ᠦᠭᠡᠢ ᠪᠠᠷᠢᠭᠳᠠᠯᠠ᠂ ᠣᠳᠣ ᠴᠤ᠌ ᠦᠬᠦᠬᠦ ᠪᠢᠵᠡ ᠳᠠ》 ᠭᠡᠬᠦ ᠳ᠋ᠦ᠍ ᠬᠠᠭᠠᠨ ᠯᠠᠮᠠ ᠶ᠋ᠢᠨ ᠨᠡᠷᠡ ᠶ᠋ᠢ ᠮᠡᠳᠡᠳᠡᠭ ᠦᠭᠡᠢ ᠪᠠᠢᠭᠰᠠᠨ ᠳᠡᠭᠡᠷᠡ ᠨᠠᠮᠵᠢᠯ ᠭᠡᠳᠡᠭ ᠦᠭᠡ ᠶ᠋ᠢ ᠤᠷᠢᠳᠤ ᠰᠣᠨᠣᠰᠤᠭᠰᠠᠨ ᠦᠭᠡᠢ ᠲᠤᠯᠠ᠄《ᠨᠡᠭᠡᠷᠡᠨ ᠯᠡ ᠲᠡᠢᠮᠦ ᠳᠠ᠂ ᠯᠠᠮᠠᠳᠠᠨ ᠮᠢᠨᠢ᠂ ᠪᠢ ᠶᠠᠭ ᠯᠠ ᠭᠤᠷᠪᠠᠳᠠᠬᠢ ᠤᠳᠠᠭᠠ ᠳ᠋ᠤ᠌ ᠠᠷᠠᠢ ᠭᠡᠵᠦ ᠪᠠᠷᠢᠭᠰᠠᠨ ᠶᠤᠮ᠂ ᠦᠬᠦᠭᠰᠡᠨ ᠨᠢ ᠦᠨᠡᠨ ᠪᠠᠢᠨᠠ》 ᠭᠡᠮᠡᠨ ᠥᠨᠥᠬᠢ ᠴᠠᠷᠴᠠ ᠶ᠋ᠢ ᠪᠡᠨ ᠭᠠᠷᠭᠠᠵᠤ ᠬᠠᠶᠠᠵᠠᠢ ᠭᠡᠨᠡ
ᠡᠢᠨ ᠬᠦ᠌ ᠴᠠᠷᠴᠠ ᠨᠠᠮᠵᠢᠯ ᠥᠪᠡᠷ ᠦ᠋ᠨ ᠨᠤᠲᠤᠭ ᠲᠠᠭᠠᠨ ᠣᠴᠢᠵᠤ᠂ ᠦᠨᠡᠨ ᠴᠠᠭᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠮᠢᠳᠤᠷᠠᠵᠤ ᠠᠮᠤᠷ ᠰᠠᠢᠬᠠᠨ ᠵᠢᠷᠭᠠᠵᠠᠢ᠃
ᠪᠢᠴᠢᠬᠠᠨ ᠦᠷᠡᠰ ᠦ᠋ᠨ ᠢ᠋ᠶ᠋ᠡᠨ ᠲᠥᠰᠦᠭᠡᠯᠡᠯ ᠦ᠋ᠨ ᠶᠢᠷᠲᠢᠨᠴᠦ ᠶ᠋ᠢ ᠬᠥᠭᠵᠢᠭᠦᠯᠵᠦ ᠮᠣᠩᠭᠣᠯ ᠠᠬᠤᠢ ᠰᠡᠳᠬᠢᠯᠭᠡᠨ ᠦ᠌ ᠰᠣᠶᠣᠯ ᠢ᠋ ᠲᠦᠭᠡᠭᠡᠬᠦ ᠵᠣᠷᠢᠯᠭᠠ ᠲᠠᠢ ᠶᠦᠨᠢᠲ᠋ᠧᠯ ᠭᠥᠷᠤᠹ ᠤ᠋ᠨ ᠪᠦᠪᠡᠢ ᠬᠥᠲᠥᠯᠪᠦᠷᠢ ᠶ᠋ᠢᠨ ᠦᠯᠢᠭᠡᠷ ᠢ᠋ ᠬᠦᠯᠢᠶᠡᠨ ᠠᠪᠴᠤ ᠰᠣᠨᠣᠰᠤᠭᠰᠠᠨ ᠳ᠋ᠤ᠌ ᠪᠠᠶᠠᠷᠯᠠᠯᠠ᠃
ᠦᠰᠦᠭ ᠠ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠴᠣᠭᠵᠢᠷᠭᠠᠯ
ᠦᠰᠦᠭ ᠬᠠᠲᠠᠭᠰᠠᠨ ᠨᠢ᠄ ᠭᠠᠸᠠ
ᠬᠢᠨᠠᠭᠴᠢ ᠪᠠᠭᠰᠢ᠄ ᠢᠷᠡᠭᠡᠳᠦᠢ