ᠠᠯᠲᠠᠢ- ᠷ᠂ ᠴᠣᠢᠨᠣᠮАлтай-р,чойном
383ᠠᠯᠲᠠᠢ
ᠷ᠂ᠴᠣᠢᠨᠣᠮ
( ᠤᠶᠠᠩᠭᠠ ᠶ᠋ᠢᠨ ᠨᠠᠶ᠋ᠢᠷᠠᠭᠯᠠᠯ)
ᠬᠦᠯᠦᠭ ᠮᠣᠷᠢ ᠳᠡᠯ ᠢ᠋ᠶ᠋ᠡᠷ ᠢᠶᠠᠨ ᠭᠠᠢᠬᠠᠭᠤᠯᠤᠨᠠ
ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠢᠶᠠᠨ ᠭᠠᠢᠬᠠᠭᠤᠯᠤᠨᠠ
ᠠᠪᠠᠢ ᠺᠦᠨᠡᠡᠪᠠᠶᠸᠸ
ᠣᠷᠣᠰᠢᠯ
ᠠᠶᠠᠰ ᠤ᠋ᠨ ᠪᠣᠳᠣᠯ ᠢ᠋ ᠤᠨᠳᠤᠷᠭᠠᠭᠰᠠᠨ᠂ ᠬᠡᠵᠢᠶᠡᠨ ᠦ᠌ ᠶᠠᠮᠠᠷ ᠳᠤᠷᠠᠳᠬᠠᠯ ᠢ᠋ᠶ᠋ᠠᠷ
ᠠᠮᠲᠠᠲᠤ ᠵᠡᠭᠦᠳᠦ ᠶ᠋ᠢ ᠰᠠᠨᠳᠤᠷᠭᠠᠭᠰᠠᠨ᠂ ᠬᠡᠨ ᠦ᠌ ᠶᠠᠮᠠᠷ ᠳᠠᠭᠤᠳᠠᠯᠭᠠ ᠪᠠᠷ
ᠠᠢᠵᠠᠮ ᠬᠥᠩᠭᠡᠨ ᠰᠢᠯᠦᠭ ᠮᠢᠨᠢ ᠳᠡᠭᠦᠯᠢᠨ ᠳᠡᠭᠦᠯᠢᠨ ᠨᠢᠰᠦᠨᠡᠮ ᠪᠣᠢ?
ᠠᠯᠢᠬᠠᠨ ᠭᠠᠵᠠᠷ ᠤ᠋ᠨ ᠬᠡᠨ ᠢ᠋ ᠳᠠᠭᠤᠯᠠᠨ ᠳᠠᠭᠤᠯᠠᠨ ᠬᠦᠰᠡᠨᠡᠮ ᠪᠣᠢ?
ᠰᠢᠨᠵᠢᠨ ᠬᠠᠷᠠᠬᠤ ᠨᠢᠳᠦᠨ ᠦ᠌ ᠮᠥᠷᠥᠭᠡᠳᠦᠨ ᠳᠤᠷᠠᠯᠠᠬᠤ ᠲᠠᠯᠠᠪᠠᠢ
ᠰᠢᠷᠦᠭᠦᠨ ᠵᠠᠭᠤᠨ ᠨᠤᠭᠤᠳ ᠢ᠋ ᠲᠤᠭᠤᠯᠤᠭᠰᠠᠨ ᠮᠥᠩᠭᠥᠨ ᠪᠤᠭᠤᠷᠤᠯ ᠲᠣᠯᠣᠭᠠᠢ
ᠰᠢᠨᠡ ᠡᠷᠢᠨ ᠢ᠋ ᠳᠠᠭᠤᠯᠤᠭᠰᠠᠨ ᠮᠥᠰᠥᠨ ᠴᠠᠰᠤᠨ ᠮᠠᠯᠠᠭᠠᠢ
ᠰᠢᠵᠢᠷ ᠴᠠᠭᠠᠨ ᠠᠯᠲᠠᠢ ᠶ᠋ᠢᠨ ᠤᠨᠠᠭᠠᠨ ᠪᠦᠰᠡᠭᠦᠢ ᠶ᠋ᠢ ᠳᠠᠭᠤᠯᠠᠨᠠᠮ ᠪᠢ!
ᠴᠡᠷᠢᠭ ᠦ᠋ᠨ ᠱᠤᠭᠤᠮ ᠵᠢᠭᠰᠠᠭᠠᠯ ᠰᠢᠭ᠋ ᠡᠩᠨᠡᠭᠡ ᠵᠢᠭᠳᠡᠷᠡᠬᠦ ᠰᠢᠯᠦᠭ
ᠴᠡᠯᠮᠡᠭ ᠨᠣᠮᠢᠨ ᠲᠩᠷᠢ ᠪᠡᠷ ᠡᠵᠡᠨ ᠢᠶᠠᠨ ᠨᠢᠰᠬᠡᠬᠦ ᠰᠢᠯᠦᠭ
ᠴᠡᠩᠭᠡᠭ ᠬᠠᠷᠠᠬᠠᠨ ᠨᠢᠳᠦᠲᠡᠢ ᠴᠢᠮᠠ ᠳ᠋ᠠᠭᠠᠨ ᠪᠠᠷᠢᠬᠤ ᠪᠡᠯᠡᠭ ᠯᠡ —
ᠴᠡᠴᠡᠨ ᠮᠡᠷᠭᠡᠨ ᠣᠶᠤᠨ ᠳ᠋ᠤ᠌ ᠴᠢᠨᠢ᠂ ᠮᠢᠨᠦ ᠦᠭᠡ ᠶ᠋ᠢ ᠬᠡᠯᠡᠭ!
ᠠᠯᠤᠰ ᠪᠠᠷᠠᠭᠤᠨ ᠬᠢᠵᠠᠭᠠᠷ ᠲᠤ᠌
ᠠᠯᠲᠠᠢ ᠶ᠋ᠢᠨ ᠰᠦᠷᠯᠢᠭ ᠨᠢᠷᠤᠭᠤᠳ ᠯᠠ᠁
ᠠᠯᠲᠠᠢ ᠶ᠋ᠢᠨ ᠰᠡᠷᠢᠭᠦᠨ ᠬᠣᠷᠮᠣᠢ ᠳ᠋ᠤ᠌
ᠠᠶᠠ᠂ ᠮᠢᠨᠦ ᠮᠥᠷᠥᠭᠡᠳᠦᠯ!
ᠤᠤᠭᠠᠨ ᠳᠠᠭᠤᠯᠠᠯ
ᠠᠭᠤᠯᠵᠠᠯ ᠦᠭᠡᠢ ᠪᠢᠳᠡ᠂ ᠬᠣᠯᠠ ᠬᠥᠨᠳᠡᠢᠷᠡᠵᠦ ᠣᠪᠣᠭᠠ ᠤᠳᠠᠯᠠ
ᠤᠷᠭᠤᠮᠠᠯ ᠨᠣᠭᠣᠭᠠ᠂ ᠳᠣᠯᠣᠭᠠ ᠳᠡᠯᠭᠡᠷᠡᠵᠦ ᠳᠣᠯᠣᠭᠠ ᠭᠠᠩᠳᠠᠯᠠ
ᠠᠭᠤᠯᠠ ᠣᠯᠠᠨ ᠢ᠋ ᠭᠡᠲᠦᠯᠦᠭᠦᠯᠵᠦ᠂ ᠤᠰᠤ ᠣᠯᠠᠨ ᠢ᠋ ᠭᠠᠲᠤᠯᠤᠭᠤᠯᠵᠤ
ᠤᠶᠠᠬᠠᠨ ᠬᠣᠩᠭᠣᠷ ᠨᠠᠢᠵᠠ ᠳ᠋ᠠᠭᠠᠨ᠂ ᠤᠤᠭᠠᠨ ᠳᠠᠭᠤᠯᠠᠯ ᠢ᠋ᠶ᠋ᠠᠨ ᠳᠤᠷᠠᠰᠬᠠᠶᠠ
ᠬᠦᠯᠦᠭ ᠮᠣᠷᠢᠳ ᠤ᠋ᠨ ᠮᠢᠨᠢ ᠲᠤᠭᠤᠷᠠᠢ ᠪᠥᠮᠪᠥᠷ ᠰᠢᠭ ᠨᠢᠵᠢᠭᠢᠨᠡᠬᠦ ᠲᠠᠯᠠ ᠪᠠᠷ
ᠰᠢᠯᠦᠭ ᠮᠥᠷᠥᠭᠡᠳᠦᠯ ᠦ᠋ᠨ ᠮᠢᠨᠢ ᠴᠤᠤᠷᠢᠶᠠ᠂ ᠪᠠᠮᠪᠠᠷ ᠰᠢᠭ᠋ ᠭᠡᠷᠡᠯᠲᠦᠨ ᠳᠡᠭᠦᠯᠢᠭᠡᠴᠢ!
ᠡᠭᠦᠯᠡ ᠨᠢ ᠦᠭᠡᠢ ᠲᠩᠷᠢ ᠶ᠋ᠢᠨ᠂ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠰᠢᠭ ᠠᠭᠤᠳᠠᠮ ᠮᠠᠨᠳᠠᠯ ᠢ᠋ᠶ᠋ᠠᠷ
ᠦᠷ ᠦ᠋ᠨ ᠲᠤᠶᠠᠭᠠ ᠲᠡᠷᠢᠭᠦᠯᠡᠨ ᠲᠤᠰᠬᠤ ᠠᠯᠲᠠᠢ ᠬᠠᠨ ᠢ᠋ ᠳᠠᠭᠤᠯᠠᠭᠠᠴᠢ!
ᠠᠯᠲᠠᠢ— ᠴᠠᠢᠳᠠᠮ ᠡᠬᠡ ᠨᠤᠲᠤᠭ ᠤ᠋ᠨ ᠮᠢᠨᠢ ᠮᠥᠩᠭᠥᠨ ᠳᠠᠭᠢᠨᠢ
ᠠᠯᠲᠠᠢ— ᠴᠠᠭ ᠤ᠋ᠨ ᠬᠠᠷᠠᠭᠤᠯ ᠳ᠋ᠤ᠌ ᠵᠣᠭᠰᠣᠭᠰᠠᠨ ᠮᠥᠩᠬᠡ ᠶ᠋ᠢᠨ ᠪᠠᠭᠠᠨᠠ
ᠠᠯᠲᠠᠢ— ᠮᠣᠩᠭᠣᠯ ᠨᠢᠰᠬᠡᠭᠴᠢ ᠶ᠋ᠢ ᠰᠢᠯᠭᠠᠭᠰᠠᠨ ᠶᠣᠰᠣᠯᠠᠯ ᠤ᠋ᠨ ᠬᠠᠭᠠᠯᠭᠠ
ᠠᠯᠲᠠᠢ— ᠮᠣᠩᠭᠣᠯ ᠳᠠᠭᠤᠤ ᠳ᠋ᠤ᠌ ᠤᠶᠠᠷᠠᠭᠰᠠᠨ ᠪᠠᠭᠠᠲᠤᠷ ᠤ᠋ᠨ ᠳᠤᠭᠤᠯᠠᠭᠠ!
ᠬᠠᠨ ᠪᠤᠭᠤᠷᠤᠯ ᠴᠢᠨᠦ ᠬᠤᠭᠤᠷ ᠤ᠋ᠨ ᠮᠥᠩᠭᠥᠨ ᠤᠲᠠᠰᠤ
ᠬᠠᠯᠢᠯ ᠥᠨᠳᠥᠷ ᠡᠴᠡ ᠪᠠᠭᠤᠭᠰᠠᠨ ᠪᠤᠤᠷᠠ ᠶ᠋ᠢᠨ ᠠᠳᠠᠯᠢ ᠮᠥᠷᠡᠨ ᠢ᠋ᠶ᠋ᠡᠷ
ᠬᠠᠳᠠᠨ ᠬᠥᠷᠥᠰᠥ ᠪᠡᠨ ᠤᠮᠳᠠᠭᠠᠯᠠᠭᠰᠠᠨ ᠠᠺ ᠴᠣᠯᠫᠠᠨ ᠤ᠋ ᠨᠤᠲᠤᠭ—
ᠬᠠᠢᠷᠠ ᠶ᠋ᠢᠨ ᠡᠨᠡ ᠳᠠᠭᠤᠤ ᠶ᠋ᠢ ᠵᠣᠷᠢᠭᠤᠯᠤᠭᠰᠠᠨ ᠺᠠᠽᠠᠭ ᠲᠦᠮᠡᠨ ᠢ᠋ ᠳᠠᠭᠤᠯᠠᠶᠠ
ᠣᠷᠣᠭᠰᠠᠨ ᠭᠡᠢᠴᠢᠨ ᠪᠦᠬᠦᠨ ᠳ᠋ᠦ᠍᠂ ᠥᠨᠳᠥᠷ ᠭᠡᠷ ᠨᠢ ᠵᠠᠢ ᠲᠠᠢ
ᠣᠢᠷᠠ ᠬᠣᠯᠠ ᠦᠭᠡᠢ ᠵᠣᠴᠢᠯᠠᠳᠠᠭ ᠥᠳᠬᠡᠨ ᠰᠢᠷᠭᠠᠯ ᠴᠠᠢ ᠲᠠᠢ
ᠣᠨᠳᠣᠣ ᠵᠠᠩᠰᠢᠯ ᠪᠠᠢᠳᠠᠯᠲᠤ ᠡᠨᠡ ᠬᠦ᠌ ᠲᠦᠮᠡᠨ ᠦ᠌ ᠳᠤᠮᠳᠠ
ᠥᠬᠢᠨ ᠬᠣᠩᠭᠣᠷ ᠲᠠᠨᠢᠯ ᠮᠢᠨᠢ ᠨᠢᠭᠡ ᠶ᠋ᠢᠨ ᠵᠡᠷᠭᠡᠬᠡᠨ ᠪᠣᠢ!
ᠲᠡᠷᠡ᠄
ᠭᠦᠨ ᠬᠠᠷᠠᠬᠠᠨ ᠨᠢᠳᠦᠨ ᠳ᠋ᠦ᠍ᠨᠢ ᠬᠣᠷᠢᠳᠠᠬᠢ ᠵᠠᠭᠤᠨ ᠭᠡᠢᠭᠰᠡᠨ
ᠬᠥᠯᠵᠠᠭᠠᠨ ᠭᠡᠳᠡᠭ ᠨᠡᠷᠡ ᠲᠡᠢ᠂ ᠬᠠᠰᠠᠭ ᠪᠦᠰᠡᠭᠦᠢ ᠪᠢᠯᠡ
ᠬᠥᠯ- ᠵᠠᠭᠠᠨ ᠭᠡᠵᠦ ᠮᠣᠩᠭᠣᠯ ᠢ᠋ᠶ᠋ᠠᠷ 《ᠰᠢᠨᠡ ᠴᠡᠴᠡᠭ》 ᠭᠡᠰᠡᠨ
ᠬᠥᠯᠵᠠᠭᠠᠨ ᠭᠡᠵᠦ ᠮᠢᠨᠦ ᠴᠢᠩ ᠬᠠᠢᠷᠠᠲᠠᠨ ᠪᠢᠯᠡ!
ᠬᠠᠭᠤᠴᠢᠨ ᠴᠠᠭ ᠢ᠋ᠶ᠋ᠠᠷ ᠬᠠᠰᠠᠭ ᠤ᠋ᠨ ᠬᠤᠪᠢ ᠦᠭᠡᠢ ᠲᠣᠺᠡᠯ ᠭᠡᠭᠳᠡᠬᠦ
ᠬᠣᠲᠠ ᠶ᠋ᠢᠨ ᠭᠡᠷ ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᠰᠡᠥ᠋ᠺᠸᠯ ᠡᠮᠦᠰᠦᠭᠰᠡᠨ ᠰᠥᠭᠥᠳᠬᠦ
ᠤᠷᠲᠤ ᠦᠰᠦᠨ ᠳᠤᠮᠳᠠ ᠨᠢ ᠮᠥᠩᠭᠥᠨ ᠴᠣᠯᠫ ᠰᠢᠭᠢᠳᠬᠦ
ᠠᠭᠤᠷᠲᠤ ᠪᠠᠢ— ᠪᠠᠱ᠌ᠢ ᠳ᠋ᠤ᠌ ᠵᠠᠩᠨᠠᠭᠤᠯᠬᠤ ᠮᠥᠷᠥᠢ ᠲᠠᠯᠪᠢᠭᠰᠠᠨ ᠨᠠᠰᠤᠨ ᠳ᠋ᠠᠭᠠᠨ
ᠰᠢᠨᠡ ᠴᠠᠭ ᠤ᠋ᠨ ᠠᠭᠠᠷ ᠲᠤ᠌ ᠴᠡᠭᠡᠵᠢ ᠲᠡᠨᠢᠭᠡᠷ ᠥᠰᠴᠦ
ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠲᠠᠯᠠᠪᠤᠷ ᠲᠤ᠌ ᠴᠢᠮᠡᠭ ᠵᠡᠭᠦᠯᠲᠡ ᠦᠭᠡᠢ ᠥᠨᠳᠡᠢᠵᠦ
ᠰᠢᠯᠢ ᠭᠠᠵᠠᠷ ᠤ᠋ᠨ ᠥᠨᠳᠥᠷ ᠡᠴᠡ ᠳᠣᠷᠣᠨᠠ ᠶ᠋ᠢᠨ ᠲᠠᠯᠠ ᠳ᠋ᠤ᠌ ᠮᠢᠨᠢ ᠵᠣᠴᠢᠯᠠᠨ
ᠰᠢᠩᠭᠡᠨ ᠴᠡᠩᠭᠡᠯ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠨ ᠳᠠᠰᠤᠭᠰᠠᠨ ᠬᠥᠯᠵᠠᠭᠠᠨ!
《 ᠮᠥᠩᠭᠥᠨ ᠤᠲᠠᠰᠤ ᠰᠢᠭ᠋ ᠤᠶᠠᠨ ᠴᠡᠮᠴᠡᠭᠡᠷ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ
ᠮᠥᠩᠬᠡ ᠶ᠋ᠢᠨ ᠢᠷᠦᠭᠡᠯᠲᠦ ᠡᠳᠦᠷ ᠢ᠋ᠶ᠋ᠡᠨ ᠣᠯᠵᠤ ᠲᠥᠷᠥᠭᠰᠡᠨ ᠠᠺᠳᠠᠮᠠ》 ᠰᠢᠭ᠋
ᠮᠥᠷᠥ ᠵᠡᠷᠭᠡᠴᠡᠭᠰᠡᠨ ᠵᠠᠯᠠᠭᠤᠰ ᠤ᠋ᠨ ᠥᠷᠭᠡᠨ ᠡᠩᠨᠡᠭᠡᠨ ᠳ᠋ᠦ᠍ ᠪᠠᠭᠲᠠᠵᠤ
ᠮᠥᠰᠥᠨ ᠭᠣᠣᠯ ᠢ᠋ ᠪᠣᠭᠣᠯᠴᠠᠬᠤ ᠠᠵᠠᠲᠠᠢ ᠲᠥᠷᠥᠭᠰᠡᠨ ᠬᠥᠯᠵᠠᠭᠠᠨ ᠮᠢᠨᠢ!
ᠤᠯᠠᠭᠠᠨ ᠵᠢᠷᠦᠬᠡ ᠶ᠋ᠢ ᠪᠤᠯᠭᠢᠭᠤᠯᠵᠤ᠂ ᠬᠣᠷᠣᠮ ᠤ᠋ᠨ ᠲᠡᠳᠦᠢ ᠰᠠᠢᠨ ᠲᠥᠷᠥᠭᠰᠡᠨ ᠴᠦ᠍
ᠤᠬᠠᠭᠠᠨ ᠪᠣᠳᠣᠯ ᠢ᠋ ᠳᠣᠷᠭᠢᠭᠤᠯᠵᠤ᠂ ᠬᠣᠷᠢᠨ ᠨᠠᠰᠤ ᠪᠠᠷ ᠲᠥᠷᠥᠭᠰᠡᠨ ᠴᠦ᠍
ᠤᠷᠤᠭᠤᠯ ᠳᠠᠪᠠᠨ ᠠᠯᠬᠤᠵᠤ᠂ ᠴᠢᠨᠦ ᠰᠣᠨᠣᠷ ᠲᠤ᠌ ᠬᠦᠷᠦᠭᠡ ᠦᠭᠡᠢ
ᠤᠤᠭᠠᠨ ᠬᠠᠢᠷᠠ ᠶ᠋ᠢᠨ ᠳᠥᠯᠥ᠂ ᠮᠢᠨᠦ ᠰᠡᠳᠬᠢᠯ ᠳ᠋ᠦ᠍ ᠪᠠᠢᠳᠠᠭ ᠶᠤᠮ!
ᠡᠩᠬᠦᠷᠡᠢᠬᠡᠨ ᠬᠣᠩᠭᠣᠷ ᠬᠥᠯᠵᠠᠭᠠᠨ
ᠮᠢᠨᠦ
ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠰᠣᠳᠣᠨ ᠤᠴᠠᠷᠠᠯ ᠢ᠋
ᠴᠢᠨᠦ
ᠡᠷᠭᠢᠵᠦ ᠨᠢᠭᠡ ᠳᠤᠷᠠᠰᠤᠶᠠ᠄ ᠵᠤᠨ ᠤ᠋ ᠦᠳᠡᠰᠢ ᠳᠤᠯᠠᠭᠠᠬᠠᠨ
ᠡᠬᠡ ᠨᠤᠲᠤᠭ ᠤ᠋ᠨ ᠴᠢᠨᠢ ᠵᠦᠭ ᠲᠦ᠍᠂ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠ ᠤᠯᠠᠭᠠᠬᠠᠨ
ᠡᠨᠡᠬᠡᠨ ᠪᠠᠢᠳᠠᠯ ᠤ᠋ᠨ ᠳᠤᠮᠳᠠ ᠮᠢᠨᠦ ᠨᠢᠳᠦ ᠶ᠋ᠢ ᠪᠤᠯᠢᠶᠠᠭᠰᠠᠨ
ᠡᠩᠬᠦᠷᠡᠢ ᠴᠢᠮᠠ ᠲᠠᠢ ᠪᠢ᠂ ᠪᠥᠮᠪᠥᠭᠡ ᠲᠣᠭᠯᠠᠵᠤ ᠲᠠᠨᠢᠯᠴᠠᠭᠰᠠᠨ
ᠲᠣᠷᠭᠠᠨ ᠪᠡᠭᠡᠯᠡᠢᠲᠦ ᠮᠣᠳᠣᠷ ᠢ᠋ᠶ᠋ᠠᠷ ᠴᠢᠨᠢ ᠴᠣᠬᠢᠭᠤᠯᠵᠤ ᠢᠷᠡᠭᠰᠡᠨ ᠪᠥᠮᠪᠥᠭᠡ
ᠲᠣᠭᠠᠲᠠᠢ ᠬᠣᠨᠣᠭ ᠤ᠋ᠨ ᠦᠢᠯᠡ ᠪᠡᠷ ᠴᠣᠬᠣᠭᠤᠯᠵᠤ ᠢᠷᠡᠭᠰᠡᠨ ᠶᠦ᠍ᠮ ᠰᠢᠭ
ᠲᠣᠣᠷ ᠤ᠋ᠨ ᠬᠡᠴᠡᠨ ᠳᠡᠭᠡᠭᠦᠷ ᠴᠣᠬᠢᠯᠠᠵᠤ ᠨᠠᠳᠠ ᠳ᠋ᠤ᠌ ᠲᠤᠰᠤᠭᠰᠠᠨ ᠰᠠᠨ
ᠲᠣᠭᠯᠠᠭᠠᠮ ᠤ᠋ᠨ ᠪᠥᠮᠪᠥᠭᠡ ᠰᠢᠭ ᠢ᠋ᠶ᠋ᠡᠨ ᠴᠦᠢᠯᠡᠵᠦ ᠬᠢᠰᠠᠭᠰᠠᠨ ᠰᠠᠨ᠃
ᠨᠠᠮ ᠲᠠᠢᠪᠤᠩ ᠬᠡᠷᠦᠯᠦᠨ ᠦ᠌ ᠠᠯᠠᠭ ᠲᠡᠷᠯᠡᠨ ᠬᠥᠨᠳᠡᠢ ᠪᠡᠷ
ᠨᠠᠮᠤᠭ ᠤ᠋ᠨ ᠰᠢᠪᠠᠭᠤ ᠭᠠᠩᠭᠠᠨᠠᠬᠤ᠂ ᠠᠳᠠᠭ ᠰᠠᠷᠠ ᠶ᠋ᠢᠨ ᠪᠦᠷᠦᠢ ᠪᠡᠷ
ᠨᠠᠮᠠᠶ᠋ᠢ ᠴᠢᠮᠠᠶ᠋ᠢ ᠴᠠᠴᠤᠷᠠᠭᠠᠭᠰᠠᠨ ᠠᠮᠠᠷᠠᠭ ᠰᠠᠯᠬᠢᠨ ᠦᠯᠢᠶᠡᠭᠰᠡᠭᠡᠷ
ᠨᠠᠰᠤᠨ ᠪᠠᠭᠠᠬᠠᠨ ᠵᠢᠷᠦᠬᠡᠨ ᠳ᠋ᠦ᠍ ᠮᠢᠨᠢ ᠤᠷᠬᠠᠭ ᠰᠠᠭᠤᠭᠰᠠᠨ ᠢ᠋ ᠮᠡᠳᠡᠭᠰᠡᠨ ᠦᠦ?
ᠠᠶᠠ᠂ ᠬᠥᠯᠵᠠᠭᠠᠨ!
ᠠᠯᠠᠭᠬᠠᠨ ᠨᠢᠳᠦᠨ ᠬᠥᠯᠵᠠᠭᠠᠨ!
ᠠᠮᠢᠩᠬᠠᠨ ᠰᠤᠳᠠᠰᠤᠨ ᠤ᠋ ᠰᠦᠯᠵᠢᠶᠡ
ᠠᠮᠠᠷᠠᠭᠬᠠᠨ ᠴᠢ ᠮᠢᠨᠢ ᠬᠠᠮᠢᠭᠠ ᠪᠠᠢᠨᠠ?
ᠠᠮᠠᠨ ᠦᠯᠢᠭᠡᠷ ᠦ᠋ᠨ ᠺᠦᠦᠵᠢ ᠰᠢᠭ ᠠᠯᠲᠠᠢ ᠶ᠋ᠢᠨ ᠰᠢᠷᠤᠢᠨᠠ ᠤᠨᠠᠭᠰᠠᠨ
ᠠᠮᠤᠭᠤᠯᠠᠩ ᠲᠣᠯᠪᠣ ᠶ᠋ᠢᠨ ᠤᠰᠤ ᠪᠠᠷ ᠠᠷᠢᠭᠤᠨ ᠪᠡᠶᠡ ᠪᠡᠨ ᠤᠬᠢᠶᠠᠭᠰᠠᠨ
ᠠᠨᠢ— ᠠᠫᠠ ᠶ᠋ᠢᠨ ᠡᠪᠦᠷ ᠳᠡᠭᠡᠷᠡ ᠠᠨᠠᠷ ᠤ᠋ᠨ ᠮᠣᠳᠣ ᠰᠢᠭ᠋ ᠤᠷᠭᠤᠭᠰᠠᠨ
ᠠᠯᠳᠠᠩᠬᠠᠨ ᠬᠠᠷᠢᠶᠠᠴᠠᠢ ᠭᠥᠯᠵᠠᠭᠠᠨ᠂ ᠠᠯᠢᠬᠠᠨ ᠭᠠᠵᠠᠷ ᠶᠠᠪᠤᠨᠠᠮ ᠪᠣᠢ?
ᠤᠳᠠᠭᠠᠬᠢ ᠳᠠᠭᠤᠯᠠᠯ
ᠠᠮᠠᠨ ᠦᠯᠢᠭᠡᠷ ᠺᠦᠦᠵᠢ ᠰᠢᠭ ᠠᠯᠲᠠᠢ ᠶ᠋ᠢᠨ ᠰᠢᠷᠤᠢᠨᠠ ᠤᠨᠠᠭᠰᠠᠨ
ᠠᠮᠤᠭᠤᠯᠠᠩ ᠲᠣᠯᠪᠣ ᠶ᠋ᠢᠨ ᠤᠰᠤ ᠪᠠᠷ ᠠᠷᠢᠭᠤᠨ ᠪᠡᠶᠡ ᠪᠡᠨ ᠤᠬᠢᠶᠠᠭᠰᠠᠨ
ᠠᠨᠢ— ᠠᠫᠠ ᠶ᠋ᠢᠨ ᠡᠪᠦᠷ ᠳᠡᠭᠡᠷᠡ ᠠᠨᠠᠷ ᠤ᠋ᠨ ᠮᠣᠳᠣ ᠰᠢᠭ᠋ ᠤᠷᠭᠤᠭᠰᠠᠨ
ᠠᠯᠳᠠᠩᠬᠠᠨ ᠬᠠᠷᠢᠶᠠᠴᠠᠢ ᠬᠥᠯᠵᠠᠭᠠᠨ᠂ ᠠᠯᠢᠬᠠᠨ ᠭᠠᠵᠠᠷ ᠶᠠᠪᠤᠨᠠᠮ ᠪᠣᠢ?
ᠬᠠᠯᠠᠭᠤᠨ ᠵᠤᠨ ᠤ᠋ ᠲᠩᠷᠢ ᠳ᠋ᠦ᠍᠂ ᠡᠭᠦᠯᠡᠰ ᠴᠢᠭᠤᠯᠭᠠᠨ ᠪᠠᠷᠠᠭᠠᠳᠠᠭᠰᠠᠨ
ᠬᠠᠨ ᠠᠯᠲᠠᠢ ᠶ᠋ᠢᠨ ᠬᠣᠷᠮᠣᠢ ᠳ᠋ᠠᠭᠠᠨ ᠳᠠᠭᠤᠯᠠᠵᠤ ᠶᠠᠪᠤᠨᠠ ᠤᠤ᠂ ᠬᠥᠯᠵᠠᠭᠠᠨ?
ᠬᠠᠷᠠ ᠰᠠᠢᠬᠠᠨ ᠨᠢᠳᠦ ᠶ᠋ᠢ ᠴᠢᠨᠢ ᠮᠠᠷᠲᠠᠯ ᠦᠭᠡᠢ ᠮᠥᠷᠥᠭᠡᠳᠦᠭᠰᠡᠨ
ᠬᠠᠯᠬᠠ ᠶ᠋ᠢᠨ ᠬᠦᠦ ᠶ᠋ᠢᠨ ᠲᠤᠬᠠᠢ ᠳᠤᠷᠠᠰᠴᠤ ᠶᠠᠪᠤᠨᠠ ᠤᠤ᠂ ᠬᠥᠯᠵᠠᠭᠠᠨ?
ᠵᠤᠨ ᠤ᠋ ᠪᠣᠭᠣᠨᠢ ᠰᠥᠨᠢ ᠶ᠋ᠢᠨ ᠵᠡᠭᠦᠳᠦᠨ ᠳᠤᠮᠳᠠ ᠮᠢᠨᠢ ᠡᠰᠡ ᠴᠦ᠍
ᠵᠤᠯᠠ ᠰᠠᠷᠠ ᠶ᠋ᠢᠨ ᠳ᠋ᠧᠩᠯᠦ ᠰᠢᠭ ᠵᠢᠷᠦᠬᠡᠨ ᠳᠤᠮᠳᠠ ᠴᠢᠨᠢ ᠪᠢᠰᠢ ᠴᠦ᠍
ᠵᠤᠭᠠᠯᠠᠵᠤ ᠶᠠᠪᠤᠭᠰᠠᠨ ᠲᠤᠬᠠᠢ ᠬᠠᠶᠠ ᠳᠤᠷᠠᠰᠬᠤ ᠴᠠᠭ ᠲᠤ᠌ ᠴᠢᠨᠢ
ᠵᠢᠷᠤᠭ ᠮᠡᠲᠦ ᠲᠣᠳᠣᠬᠠᠨ᠂ ᠬᠠᠳᠠᠨ ᠴᠣᠬᠢᠶᠠ ᠦᠵᠡᠭᠳᠡᠨᠡ ᠦᠦ?
ᠬᠠᠢᠷᠠ ᠶ᠋ᠢᠨ ᠨᠢᠭᠤᠴᠠᠬᠠᠨ ᠰᠡᠳᠬᠢᠯ ᠳ᠋ᠦ᠍ ᠰᠣᠭᠲᠣᠭᠤ ᠶᠤᠮ ᠰᠢᠭ᠋ ᠡᠷᠭᠦᠭᠳᠡᠵᠦ
ᠬᠠᠳᠠᠨ ᠴᠣᠬᠢᠶᠠᠨ ᠳ᠋ᠤ᠌ ᠠᠪᠠᠷᠢᠭᠰᠠᠭᠠᠷ ᠬᠠᠯᠲᠤᠷᠢᠵᠤ ᠤᠨᠠᠭᠰᠠᠨ ᠢ᠋ᠶ᠋ᠠᠨ ᠪᠣᠳᠣᠵᠤ ᠪᠠᠢᠨᠠ ᠪᠢ
ᠬᠠᠯᠠᠭᠤᠨ ᠨᠢᠷᠤᠭᠤᠨ ᠳ᠋ᠤ᠌ ᠴᠢᠨᠢ ᠡᠭᠦᠷᠦᠭᠦᠯᠦᠨ ᠨᠡᠮᠨᠡᠯᠭᠡ ᠶ᠋ᠢᠨ ᠭᠠᠵᠠᠷ ᠬᠦᠷᠭᠡᠭᠳᠡᠭᠰᠡᠨ
ᠬᠠᠭᠠᠰ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠤᠬᠠᠭᠠᠨ ᠣᠷᠣᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠵᠤ ᠪᠠᠢᠨᠠ ᠪᠢ!
ᠰᠠᠨᠠᠵᠤ ᠶᠠᠷᠢᠬᠤ ᠠ᠋ᠴᠠ ᠢᠯᠡᠭᠦᠦ᠂ ᠣᠯᠠᠨ ᠮᠥᠷ ᠢ᠋ ᠦᠯᠡᠳᠡᠭᠡᠭᠰᠡᠨ
ᠰᠠᠮᠨᠠᠵᠤ ᠤᠷᠭᠤᠭᠤᠯᠤᠭᠰᠠᠨ ᠦᠰᠦ ᠪᠡᠷ ᠤᠯᠠᠭᠠᠨ ᠰᠣᠷᠪᠢ ᠪᠠᠨ ᠪᠦᠲᠡᠭᠡᠭᠰᠡᠨ
ᠰᠠᠭᠰᠠᠭᠤ ᠵᠠᠯᠠᠭᠤ ᠨᠠᠰᠤᠨ ᠤ᠋ ᠮᠢᠨᠢ ᠪᠠᠷᠠᠭᠠᠨ ᠲᠣᠯᠣᠭᠠᠢ ᠳᠣᠲᠣᠷᠠ
ᠰᠠᠢᠨ ᠰᠠᠢᠬᠠᠨ ᠳᠤᠷᠠᠳᠬᠠᠯ᠂ ᠪᠠᠶᠠᠷ ᠭᠤᠨᠢᠭ ᠳᠦᠭᠦᠷᠡᠩ ᠪᠠᠢᠨᠠ᠃
ᠤᠲᠤᠭᠠ ᠲᠣᠭᠣᠰᠣ ᠳᠠᠷᠤᠭᠰᠠᠨ ᠠᠵᠢᠯᠴᠢᠨ ᠬᠦᠦ ᠶ᠋ᠢᠨ ᠵᠢᠷᠦᠬᠡᠨ ᠳ᠋ᠦ᠍
ᠤᠯᠠᠭᠠᠬᠠᠨ ᠣᠴᠢ ᠦᠰᠦᠷᠬᠦ ᠶ᠋ᠢ ᠠᠵᠢᠭᠯᠠᠵᠤ ᠴᠢ ᠮᠡᠳᠡᠭᠡ ᠦᠭᠡᠢ ᠴᠦ᠍
ᠠᠭᠤᠷᠬᠠᠢᠴᠢ ᠠᠬᠠ ᠶ᠋ᠢᠨ ᠳ᠋ᠡᠭᠡᠨ ᠢᠷᠡᠭᠰᠡᠨ ᠠᠮᠠᠷᠠᠯᠲᠠ ᠪᠠᠨ ᠳᠠᠭᠤᠰᠬᠤ ᠲᠡᠷᠡᠬᠡᠨ ᠳ᠋ᠦ᠍
ᠤᠴᠢᠷ ᠶᠡᠬᠡᠲᠡᠢ ᠬᠠᠷᠠᠴᠠ ᠪᠠᠷ ᠰᠢᠷᠲᠡᠨ ᠦᠯᠡᠳᠡᠬᠦ ᠶ᠋ᠢ ᠮᠢᠨᠢ ᠦᠵᠡᠭᠰᠡᠨ ᠴᠢ!
ᠳᠡᠯᠦᠮᠡᠨ ᠵᠢᠷᠣᠭᠠ ᠮᠣᠷᠢᠨ ᠤ᠋ ᠵᠢᠭᠳᠡ ᠳᠥᠷᠪᠡᠨ ᠲᠤᠭᠤᠷᠠᠢ ᠰᠢᠭ᠋
ᠲᠡᠷᠡ ᠡᠳᠦᠷ ᠡᠴᠡ ᠬᠣᠢᠰᠢᠬᠢ ᠵᠢᠯ ᠰᠠᠷᠠ ᠶ᠋ᠢᠨ ᠤᠷᠤᠰᠬᠠᠯ
ᠳᠡᠯᠢᠵᠦ ᠠᠭᠰᠢᠬᠤ ᠪᠠᠢᠳᠠᠭ ᠵᠢᠷᠦᠬᠡᠨ ᠳ᠋ᠦ᠍ ᠭᠠᠷᠤᠭᠰᠠᠨ ᠴᠤᠤᠷᠢᠶᠠ ᠰᠢᠭ᠋
ᠲᠡᠨᠡᠭ ᠪᠠᠭᠠ ᠶ᠋ᠢᠨ ᠰᠡᠳᠬᠢᠯ ᠢ᠋ ᠴᠣᠴᠢᠭᠠᠵᠤ ᠥᠭᠭᠦᠭᠰᠡᠨ ᠳᠤᠷᠠᠰᠬᠠᠯ
ᠡᠨᠡᠬᠡᠨ ᠰᠣᠷᠪᠢᠨ ᠤ᠋ ᠴᠠᠭᠠᠨᠠ ᠡᠩᠬᠦᠷᠡᠢ ᠴᠢ ᠮᠢᠨᠢ ᠪᠦᠬᠦᠯᠢ ᠪᠡᠷ ᠢ᠋ᠶ᠋ᠡᠨ
ᠡᠷᠢᠨ ᠦᠶᠡ ᠪᠡᠷ ᠵᠠᠯᠠᠭᠤᠵᠢᠭᠰᠠᠨ ᠡᠬᠡ ᠣᠷᠣᠨ ᠮᠢᠨᠢ ᠪᠣᠢᠳᠣᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ
ᠡᠭᠡᠯᠵᠢ ᠶ᠋ᠢᠨ ᠠᠵᠢᠯ ᠢ᠋ᠶ᠋ᠠᠷ ᠠᠮᠢᠰᠬᠤᠯᠯᠠᠭᠰᠠᠨ ᠦᠢᠯᠡᠳᠪᠦᠷᠢ ᠵᠠᠪᠤᠳ᠋ ᠪᠦᠭᠦᠳᠡ ᠪᠡᠷ ᠢ᠋ᠶ᠋ᠡᠨ
ᠡᠩᠨᠡᠭᠡ ᠡᠩᠨᠡᠭᠡ ᠰᠢᠯᠦᠭ ᠦ᠋ᠨ ᠬᠦᠳᠡᠷ ᠪᠣᠯᠤᠨ ᠴᠣᠭᠴᠠᠯᠠᠵᠤ ᠪᠠᠢᠨᠠ!
ᠲᠣᠰᠣᠲᠠᠢ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠳᠣᠣᠷᠠ ᠠ᠋ᠴᠠ ᠣᠳᠣ ᠴᠢᠮᠠᠶ᠋ᠢ ᠳᠤᠷᠠᠰᠴᠤ
ᠲᠣᠯᠣᠭᠠᠢ ᠰᠡᠭᠦᠯ ᠨᠡᠢᠯᠡᠭᠰᠡᠨ ᠮᠣᠩᠭᠣᠯ ᠰᠢᠯᠦᠭ ᠤᠷᠤᠰᠴᠤ
ᠠᠰᠬᠠ ᠬᠠᠳᠠᠨ ᠳᠣᠲᠣᠷᠠ ᠠ᠋ᠴᠠ ᠠᠯᠲᠠᠨ ᠤ᠋ ᠰᠢᠷᠬᠡᠭ ᠭᠠᠷᠳᠠᠭ ᠰᠢᠭ᠋
ᠠᠵᠢᠯᠴᠢᠨ ᠡᠷᠡ ᠶ᠋ᠢᠨ ᠰᠡᠳᠬᠢᠯ ᠡᠴᠡ ᠠᠮᠠᠷᠠᠭ ᠤ᠋ᠨ ᠳᠠᠭᠤᠤ ᠭᠠᠷᠴᠤ ᠪᠠᠢᠨᠠ!
ᠥᠷᠭᠡᠨ ᠳᠡᠯᠡᠬᠡᠢ ᠶ᠋ᠢᠨ ᠬᠥᠷᠥᠰᠥᠨ ᠳ᠋ᠦ᠍ ᠵᠠᠯᠠᠭᠤ ᠶᠠᠪᠤᠬᠤ ᠶ᠋ᠢᠨ ᠵᠣᠪᠠᠯᠠᠩ
ᠡᠪᠡᠳᠴᠢᠨ ᠠᠳᠠᠯᠢ ᠲᠣᠰᠳᠠᠭ ᠬᠠᠯᠠᠭᠤᠨ ᠬᠠᠢᠷᠠ ᠶ᠋ᠢᠨ ᠲᠠᠪᠢᠯᠠᠩ
ᠥᠪᠡᠷ ᠦ᠋ᠨ ᠪᠡᠶᠡ ᠡᠴᠡ ᠬᠡᠲᠦᠷᠡᠭᠡ ᠦᠭᠡᠢ᠂ ᠲᠡᠷᠡ ᠡᠳᠦᠷ ᠦ᠋ᠳ ᠦ᠋ᠨ ᠵᠢᠱ᠌ᠢᠶᠡ
ᠥᠨᠥ ᠳᠠᠬᠢᠨ ᠳᠤᠷᠠᠰᠤᠭᠰᠠᠨ ᠮᠢᠨᠢ ᠵᠢᠷ ᠦ᠋ᠨ ᠬᠡᠷᠡᠭ ᠪᠢᠰᠢ ᠠ᠋!
ᠡᠷᠭᠢ ᠱᠠᠩᠳᠠ ᠶ᠋ᠢᠨ ᠬᠥᠪᠡᠭᠡ ᠪᠡᠷ᠂ ᠨᠢᠴᠦᠭᠦᠨ ᠬᠥᠯ ᠢ᠋ᠶ᠋ᠡᠷ ᠤᠷᠤᠯᠳᠤᠵᠤ
ᠡᠷᠢᠶᠡᠨ ᠴᠢᠯᠠᠭᠤ ᠲᠡᠭᠦᠭᠡᠳ ᠭᠡᠷ ᠪᠠᠷᠢᠨ ᠤᠷᠤᠯᠳᠤᠵᠤ
ᠡᠷᠬᠡ ᠲᠣᠮᠣᠭᠠ ᠦᠭᠡᠢ ᠨᠠᠢᠵᠠ ᠨᠤᠭᠤᠳ ᠲᠠᠢ ᠴᠠᠮᠴᠠ ᠪᠠᠨ ᠤᠷᠠᠨ ᠪᠠᠷᠢᠯᠳᠤᠵᠤ
ᠡᠨᠳᠡᠵᠦ ᠭᠡᠨᠡᠳᠡᠵᠦ ᠥᠰᠦᠭᠰᠡᠨ ᠴᠠᠢᠳᠠᠮ ᠲᠠᠯᠠ ᠶ᠋ᠢᠨ ᠬᠦᠦ ᠪᠢ
ᠪᠠᠭᠠ ᠶ᠋ᠢᠨ ᠶᠠᠪᠤᠳᠠᠯ ᠢ᠋ ᠥᠭᠡᠷᠡᠴᠢᠯᠡᠵᠦ ᠬᠥᠯᠵᠠᠭᠠᠨ ᠴᠢᠮᠠᠶ᠋ᠢ ᠬᠠᠷᠠᠬᠤ ᠳ᠋ᠠᠭᠠᠨ
ᠪᠠᠷᠠᠭᠤᠨ ᠬᠢᠵᠠᠭᠠᠷ ᠤ᠋ᠨ ᠲᠤᠬᠠᠢ ᠭᠦᠨ ᠰᠡᠳᠬᠢᠯ ᠲᠥᠷᠥᠬᠦ ᠳ᠋ᠡᠭᠡᠨ
ᠠᠯᠠᠭ ᠨᠢᠳᠦᠨ ᠳ᠋ᠡᠭᠡᠨ ᠢᠲᠡᠭᠡᠭᠰᠡᠨ ᠵᠢᠷ ᠦ᠋ᠨ ᠲᠡᠮᠡᠦᠯᠦᠯ ᠳ᠋ᠦ᠍ ᠣᠷᠣᠬᠤ ᠳ᠋ᠠᠭᠠᠨ
ᠠᠷᠠᠳ ᠠ᠋ᠴᠠ ᠠᠷᠠᠳ ᠲᠤ᠌ ᠳᠤᠷᠠᠯᠠᠭᠰᠠᠨ ᠵᠢᠩᠬᠢᠨᠢ ᠬᠠᠢᠷᠠ ᠶ᠋ᠢ ᠤᠬᠠᠭᠠᠷᠠᠭᠰᠠᠨ ᠶᠤᠮ!
ᠴᠠᠭ ᠤ᠋ᠨ ᠰᠠᠭᠠᠬᠠᠯᠲᠠ ᠳ᠋ᠤ᠌ ᠪᠠᠭᠤᠷᠠᠰᠢ ᠦᠭᠡᠢ ᠬᠥᠮᠦᠨ ᠦ᠌ ᠬᠦᠦ ᠶ᠋ᠢᠨ ᠢᠲᠡᠭᠡᠯ
ᠴᠠᠢᠳᠠᠮ ᠲᠠᠯᠠ ᠨᠤᠲᠤᠭ ᠲᠤ᠌ ᠮᠢᠨᠢ ᠬᠦᠷᠡᠯ ᠵᠠᠭᠤᠨ ᠠ᠋ᠴᠠ ᠦᠯᠡᠳᠡᠭᠰᠡᠨ ᠶᠦᠮ
ᠴᠠᠭᠠᠰᠤᠨ ᠳ᠋ᠤ᠌ ᠪᠠᠭᠤᠯᠭᠠᠨ ᠪᠢᠴᠢᠭᠰᠡᠨ ᠮᠢᠨᠦ ᠬᠠᠯᠠᠭᠤᠨ ᠰᠡᠳᠬᠢᠯ
ᠴᠠᠰᠤᠲᠤ ᠠᠯᠲᠠᠢ ᠶ᠋ᠢᠨ ᠳᠠᠭᠢᠨᠢ ᠳ᠋ᠤ᠌ ᠰᠥᠶᠦ᠋ᠨ᠋ᠰᠡ ᠪᠣᠯᠭᠠᠨ ᠪᠡᠯᠡᠳᠬᠡᠭᠰᠡᠨ ᠶᠦᠮ!
ᠳᠥᠷᠪᠡᠨ ᠮᠣᠩᠭᠣᠯ ᠬᠢᠮᠤᠷᠠᠵᠤ᠂ ᠬᠥᠯᠬᠢᠵᠦ ᠪᠠᠢᠭᠰᠠᠨ ᠨᠤᠲᠤᠭ ᠢ᠋ᠶ᠋ᠠᠷ
ᠳᠥᠩᠭᠡ ᠵᠡᠭᠦᠭᠰᠡᠨ ᠲᠡᠮᠦᠵᠢᠨ ᠮᠥᠯᠬᠥᠵᠦ ᠶᠠᠪᠤᠭᠰᠠᠨ ᠨᠤᠭᠤ ᠪᠠᠷ
ᠳᠥᠷᠥᠭᠡ ᠭᠥᠯᠢᠮ ᠬᠣᠶᠠᠷ ᠢ᠋ᠶ᠋ᠠᠨ ᠮᠢᠨᠦ ᠡᠴᠢᠭᠡ ᠶ᠋ᠢᠨ ᠡᠯᠡᠭᠡᠭᠰᠡᠨ
ᠳᠥᠴᠢᠨ ᠨᠢᠭᠡᠨ ᠴᠢᠯᠠᠭᠤ ᠪᠠᠷ ᠴᠢᠨᠦ ᠠᠪᠤ ᠶ᠋ᠢᠨ ᠬᠦᠯᠢᠶᠡᠭᠰᠡᠨ
ᠬᠥᠭᠵᠢᠯ ᠦ᠋ᠨ ᠬᠠᠪᠤᠷ ᠢᠷᠡᠯᠡ! ᠰᠢᠷᠭᠢᠰᠢ ᠦᠭᠡᠢ ᠨᠠᠷᠠ ᠶ᠋ᠢ ᠭᠠᠷᠭᠠᠯᠠ!
ᠬᠥᠯᠥᠰᠥ᠂ ᠴᠢᠰᠤᠲᠠᠢ ᠰᠢᠷᠦᠢᠨᠡ ᠰᠢᠨᠡ ᠴᠡᠴᠡᠭ ᠤᠷᠭᠤᠯᠠ!
ᠬᠥᠳᠡᠭᠡ ᠬᠡᠭᠡᠷᠡ ᠶ᠋ᠢᠨ ᠪᠡᠯᠴᠢᠭᠡᠷ ᠲᠦ᠍ ᠬᠤᠳᠳᠤᠭ ᠤ᠋ᠨ ᠰᠡᠩᠰᠡ ᠡᠷᠭᠢᠯᠡ!
ᠬᠥᠳᠡᠯᠮᠦᠷᠢ ᠶ᠋ᠢᠨ ᠵᠠᠯᠠᠭᠤ ᠲᠣᠰᠬᠣᠨ ᠳ᠋ᠤ᠌ ᠪᠢ ᠬᠠᠢᠷᠠ ᠪᠠᠨ ᠴᠢᠮᠠ ᠳ᠋ᠠᠭᠠᠨ ᠡᠷᠭᠦᠯᠡ!
ᠥᠷᠭᠡᠨ ᠮᠥᠷᠡᠨ ᠦ᠌ ᠬᠠᠷᠠᠵᠠ ᠰᠢᠭ᠋ ᠮᠣᠢᠯ ᠬᠠᠷᠠᠬᠠᠨ ᠨᠢᠳᠦ ᠪᠡᠷ ᠢ᠋ᠶ᠋ᠡᠷ
ᠥᠨᠳᠥᠷ ᠠᠯᠲᠠᠢ ᠶ᠋ᠢᠨ ᠨᠤᠲᠤᠭ ᠠ᠋ᠴᠠ ᠨᠠᠭᠠᠰᠢ ᠪᠠᠨ ᠬᠠᠷᠠᠭᠠᠴᠢ ᠬᠥᠯᠵᠠᠭᠠᠨ!
ᠡᠪᠴᠢᠭᠦᠦ ᠴᠠᠭᠠᠨ ᠳᠡᠰ ᠦ᠋ᠨ ᠬᠥᠭᠡᠷᠦᠨ ᠨᠢᠰᠬᠦ ᠡᠴᠡ ᠳᠣᠣᠷᠠᠬᠠᠨᠠᠭᠤᠷ
ᠥᠭᠭᠢᠶᠡᠮᠦᠷ ᠪᠠᠶᠠᠨ ᠣᠷᠣᠨ ᠮᠢᠨᠢ ᠬᠥᠬᠡᠷᠡᠩᠬᠡᠨ ᠴᠠᠯᠠᠢᠵᠤ ᠪᠠᠢᠨᠠ!
ᠳᠠᠷᠠᠭᠠᠬᠢ ᠳᠠᠭᠤᠯᠠᠯ
ᠥᠷᠭᠡᠨ ᠮᠥᠷᠡᠨ ᠦ᠌ ᠬᠠᠷᠠᠵᠠ ᠰᠢᠭ᠋ ᠮᠣᠢᠯ ᠬᠠᠷᠠᠬᠠᠨ ᠨᠢᠳᠦ ᠪᠡᠷ ᠢ᠋ᠶ᠋ᠡᠷ
ᠥᠨᠳᠥᠷ ᠠᠯᠲᠠᠢ ᠶ᠋ᠢᠨ ᠨᠤᠲᠤᠭ ᠠ᠋ᠴᠠ ᠨᠠᠭᠠᠰᠢ ᠪᠠᠨ ᠬᠠᠷᠠᠭᠠᠴᠢ ᠬᠥᠯᠵᠠᠭᠠᠨ!
ᠡᠪᠴᠢᠭᠦᠦ ᠴᠠᠭᠠᠨ ᠳᠡᠰ ᠦ᠋ᠨ ᠬᠥᠭᠡᠷᠦᠨ ᠨᠢᠰᠬᠦ ᠡᠴᠡ ᠳᠣᠣᠷᠠᠬᠠᠨᠠᠭᠤᠷ
ᠥᠭᠭᠢᠶᠡᠮᠦᠷ ᠪᠠᠶᠠᠨ ᠣᠷᠣᠨ ᠮᠢᠨᠢ ᠬᠥᠬᠡᠷᠡᠩᠬᠡᠨ ᠴᠠᠯᠠᠢᠵᠤ ᠪᠠᠢᠨᠠ!
ᠢᠰᠡᠭᠡᠢ ᠬᠦᠷᠢᠶᠡᠨ ᠦ᠌ ᠳᠣᠪᠣᠨ ᠠ᠋ᠴᠠ ᠴᠢᠯᠠᠭᠤᠨ ᠬᠣᠲᠠ ᠰᠦᠨᠳᠡᠷᠯᠡᠵᠦ
ᠡᠯᠡᠰᠦᠨ ᠭᠣᠪᠢ ᠶ᠋ᠢᠨ ᠡᠩᠭᠡᠷ ᠡᠴᠡ ᠨᠧᠹᠲ ᠦ᠋ᠨ ᠴᠠᠮᠬᠠᠭ ᠥᠨᠳᠥᠷᠯᠡᠵᠦ
ᠡᠭᠡᠷᠡᠮᠡ ᠲᠠᠯᠠ ᠪᠠᠨ ᠪᠢᠳᠡ ᠭᠠᠩ ᠵᠠᠮ ᠢ᠋ᠶ᠋ᠠᠷ ᠱᠤᠭᠤᠮᠳᠠᠵᠤ
ᠡᠩᠬᠡ ᠬᠥᠭᠵᠢᠯ ᠦ᠋ᠨ ᠳ᠋ᠦᠩ ᠢᠶᠠᠨ ᠢᠯᠴᠢᠲᠦ ᠲᠡᠷᠭᠡ ᠪᠡᠷ ᠪᠢᠴᠢᠵᠦ ᠪᠠᠢᠨᠠ!
ᠵᠢᠯ ᠦ᠋ᠨ ᠠᠭᠠᠰᠢᠨ ᠳ᠋ᠤ᠌ ᠳᠡᠢᠯᠲᠡᠭᠰᠡᠨ ᠨᠡᠭᠦᠳᠡᠯᠴᠢ ᠠᠷᠠᠳ ᠤ᠋ᠨ ᠨᠡᠷᠡ ᠡᠴᠡ
ᠵᠢᠭᠳᠡᠬᠡᠨ ᠵᠠᠯᠠᠭᠤ ᠨᠢᠭᠡᠳᠦᠯ ᠦ᠋ᠳ ᠣᠯᠠᠨ ᠢᠬᠡᠷᠡ ᠰᠢᠭ ᠥᠰᠴᠦ ᠪᠠᠢᠨᠠ!
ᠵᠢᠩ ᠦ᠋ᠨ ᠳᠠᠭᠠᠭᠠᠮᠠᠯ ᠳ᠋ᠤ᠌ ᠵᠠᠩᠨᠠᠭᠤᠯᠤᠭᠰᠠᠨ ᠬᠥᠲᠥᠴᠢ ᠬᠦᠦ ᠶ᠋ᠢᠨ ᠮᠥᠷ ᠡᠴᠡ
ᠵᠢᠷᠢᠯᠵᠡᠨ ᠭᠠᠷᠤᠭᠰᠠᠨ ᠵᠠᠮ ᠢ᠋ᠶ᠋ᠠᠷ ᠲᠡᠭᠡᠭᠡᠪᠦᠷᠢ ᠶ᠋ᠢᠨ ᠮᠠᠰᠢᠨ ᠥᠭᠰᠥᠵᠦ ᠪᠠᠢᠨᠠ!
ᠰᠢᠨᠡ ᠡᠷᠢᠨ ᠢ᠋ ᠡᠪᠦᠷᠯᠡᠭᠰᠡᠨ ᠪᠠᠭᠠᠴᠤᠳ ᠬᠡᠦᠬᠡᠳ ᠦ᠋ᠨ ᠵᠤᠰᠠᠯᠠᠩ ᠲᠠᠢ
ᠰᠢᠨᠡᠰᠦ ᠮᠣᠳᠣᠨ ᠳᠤᠮᠳᠠ ᠨᠢ ᠰᠡᠷᠭᠦᠯᠡᠩ ᠵᠠᠯᠠᠭᠤᠰ ᠤ᠋ᠨ ᠬᠦᠰᠡᠯᠡᠩ ᠲᠡᠢ
ᠰᠢᠯᠢ ᠰᠠᠷᠢᠳᠠᠭ ᠠᠭᠤᠯᠠᠰ ᠢ᠋ ᠮᠢᠨᠢ ᠲᠣᠣᠷ ᠤ᠋ᠨ ᠬᠡᠴᠡ ᠰᠢᠭ ᠳᠠᠪᠠᠵᠤ
ᠰᠢᠳᠡᠵᠦ ᠴᠣᠬᠢᠭᠰᠠᠨ ᠪᠥᠮᠪᠥᠭᠡ ᠰᠢᠭ ᠬᠤᠷᠳᠤᠨ ᠣᠩᠭᠣᠴᠠ ᠨᠢᠰᠬᠦ ᠪᠠᠢᠨᠠ
ᠵᠠᠭᠤᠨ ᠵᠠᠭᠤᠨ ᠢ᠋ ᠥᠩᠭᠡᠷᠡᠭᠡᠭᠰᠡᠨ ᠬᠥᠬᠡ ᠲᠩᠷᠢ ᠶ᠋ᠢᠨ ᠢᠶᠠᠨ ᠮᠠᠨᠳᠠᠯ ᠢ᠋ᠶ᠋ᠠᠷ
ᠳᠠᠭᠤᠤ ᠳᠠᠭᠤᠤ ᠶ᠋ᠢᠨ ᠢᠶᠠᠨ ᠳᠡᠭᠡᠵᠢ ᠶ᠋ᠢ ᠳᠤᠷᠠᠰᠬᠠᠨ ᠵᠣᠷᠢᠭᠤᠯᠤᠭᠰᠠᠨ ᠠᠯᠲᠠᠢ ᠤᠷᠤᠭᠤ
ᠳᠠᠭᠤᠴᠢᠨ ᠵᠢᠭᠠᠬᠠᠨ ᠬᠥᠯᠵᠠᠭᠠᠨ ᠤ᠋ ᠪᠠᠨ ᠮᠡᠨᠳᠦᠯᠡᠨ ᠲᠣᠷᠨᠢᠭᠰᠠᠨ ᠨᠤᠲᠤᠭ ᠤᠷᠤᠭᠤ
ᠲᠤᠤᠯᠢᠮᠠ ᠲᠠᠯᠠ ᠶ᠋ᠢᠨ ᠬᠦᠦ ᠪᠢ᠂ ᠮᠥᠩᠭᠥᠨ ᠣᠩᠭᠣᠴᠠ ᠪᠠᠷ ᠨᠢᠰᠴᠦ ᠪᠠᠢᠨᠠ!
ᠰᠠᠢᠬᠠᠨ ᠳᠠᠰᠢᠭᠰᠠᠨ ᠬᠥᠯᠵᠠᠭᠠᠨ ᠤ᠋ ᠮᠢᠨᠢ ᠳᠤᠷᠠᠨ ᠬᠠᠷᠠ ᠨᠢᠳᠦ
ᠰᠠᠯ ᠳᠣᠮᠪᠣᠷ ᠤ᠋ᠨ ᠠᠶᠠᠨ ᠳ᠋ᠤ᠌ ᠪᠥᠵᠢᠭᠯᠡᠶᠡ ᠭᠡᠵᠦ ᠳᠠᠭᠤᠳᠠᠭᠠᠳ ᠪᠠᠢᠨᠠ!
ᠰᠠᠷᠬᠤᠳ ᠨᠠᠩᠴᠢᠳ ᠳᠡᠯᠭᠡᠭᠰᠡᠨ ᠥᠨᠳᠥᠷ ᠭᠡᠷ ᠦ᠋ᠨ ᠬᠢᠨᠢ ᠡᠭᠦᠳᠡ
ᠰᠠᠳᠤᠨ ᠲᠥᠷᠥᠯ ᠦ᠋ᠨ ᠶᠣᠰᠣ ᠪᠠᠷ ᠪᠤᠵᠢᠭᠢᠨᠠᠶᠠ ᠭᠡᠵᠦ ᠤᠷᠢᠭᠠᠳ ᠪᠠᠢᠨᠠ!
ᠠᠶᠠᠯᠭᠤ ᠰᠠᠢᠬᠠᠨ ᠬᠡᠯᠡ ᠪᠡᠷ ᠨᠢ ᠠᠪᠠᠢ ᠶ᠋ᠢᠨ ᠰᠢᠯᠦᠭ ᠢ᠋ ᠤᠩᠰᠢᠬᠤ ᠭᠡᠵᠦ
ᠠᠭᠠ ᠰᠠᠺᠠᠯᠢ ᠶ᠋ᠢᠨ ᠠᠮᠠᠨ ᠠ᠋ᠴᠠ ᠠᠮᠲᠠᠲᠤ ᠳᠣᠮᠣᠭ ᠢ᠋ ᠨᠢ ᠰᠣᠨᠣᠰᠬᠤ ᠭᠡᠵᠦ
ᠠᠵᠢᠯᠰᠠᠭ ᠲᠦᠮᠡᠨ ᠦ᠌ ᠬᠥᠪᠡᠭᠦᠳ ᠲᠡᠢ ᠲᠣᠭᠠᠰ ᠺᠦᠮᠡᠯᠡᠺ ᠨᠠᠭᠠᠳᠬᠤ ᠭᠡᠵᠦ
ᠠᠯᠲᠠᠢ ᠶ᠋ᠢᠨ ᠥᠨᠳᠥᠷ ᠨᠤᠲᠤᠭ ᠥᠭᠡᠳᠡ ᠰᠡᠳᠬᠢᠯ ᠵᠢᠷᠦᠬᠡ ᠮᠢᠨᠢ ᠶᠠᠭᠠᠷᠠᠵᠤ ᠪᠠᠢᠨᠠ
ᠬᠦᠯᠦᠭ ᠮᠣᠷᠢᠳ ᠤ᠋ᠨ ᠮᠢᠨᠢ ᠲᠤᠭᠤᠷᠠᠢ ᠪᠥᠮᠪᠥᠷ ᠰᠢᠭ ᠨᠢᠵᠢᠭᠢᠨᠡᠬᠦ ᠲᠠᠯᠠ ᠪᠠᠷ
ᠰᠢᠯᠦᠭ ᠮᠥᠷᠥᠭᠡᠳᠦᠯ ᠦ᠋ᠨ ᠮᠢᠨᠢ ᠴᠤᠤᠷᠠᠢ᠂ ᠪᠠᠮᠪᠠᠷ ᠰᠢᠭ᠋ ᠭᠡᠷᠡᠯᠲᠦᠨ ᠳᠡᠭᠦᠯᠢᠭᠡᠴᠢ
ᠡᠭᠦᠯᠡ ᠨᠢ ᠦᠭᠡᠢ ᠲᠩᠷᠢ ᠶ᠋ᠢᠨ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠰᠢᠭ ᠠᠭᠤᠵᠢᠮ ᠮᠠᠨᠳᠠᠯ ᠢ᠋ᠶ᠋ᠠᠷ
ᠦᠷ ᠦ᠋ᠨ ᠲᠤᠶᠠᠭᠠ ᠲᠡᠷᠢᠭᠦᠯᠡᠨ ᠲᠤᠰᠬᠤ ᠠᠯᠲᠠᠢ ᠬᠠᠨ ᠢ᠋ ᠳᠠᠭᠤᠯᠠᠭᠠᠴᠢ!
ᠠᠯᠲᠠᠢ— ᠴᠠᠢᠳᠠᠮ ᠡᠬᠡ ᠨᠤᠲᠤᠭ ᠤ᠋ᠨ ᠮᠢᠨᠢ ᠮᠥᠩᠭᠥᠨ ᠳᠠᠭᠢᠨᠢ
ᠠᠯᠲᠠᠢ— ᠴᠠᠭ ᠤ᠋ᠨ ᠬᠠᠷᠠᠭᠤᠯ ᠳ᠋ᠤ᠌ ᠵᠣᠭᠰᠤᠭᠰᠠ ᠮᠥᠩᠬᠡ ᠶ᠋ᠢᠨ ᠪᠠᠭᠠᠨᠠ!
ᠠᠯᠲᠠᠢ— ᠮᠣᠩᠭᠣᠯ ᠨᠢᠰᠬᠡᠭᠴᠢ ᠶ᠋ᠢ ᠰᠢᠯᠭᠠᠭᠰᠠᠨ ᠶᠣᠰᠣᠯᠠᠯ ᠤ᠋ᠨ ᠬᠠᠭᠠᠯᠭᠠ!
ᠠᠯᠲᠠᠢ— ᠮᠣᠩᠭᠣᠯ ᠳᠠᠭᠤᠤ ᠳ᠋ᠤ᠌ ᠤᠶᠠᠷᠠᠭᠰᠠᠨ ᠪᠠᠭᠠᠲᠤᠷ ᠤ᠋ᠨ ᠳᠤᠭᠤᠯᠠᠭᠠ!
ᠬᠠᠨ ᠪᠤᠭᠤᠷᠤᠯ ᠴᠢᠨᠦ ᠬᠤᠭᠤᠷ ᠤ᠋ᠨ ᠮᠥᠩᠭᠥᠨ ᠤᠲᠠᠰᠤ—
ᠬᠠᠯᠢᠯ ᠥᠨᠳᠥᠷ ᠡᠴᠡ ᠪᠠᠭᠤᠭᠰᠠᠨ ᠪᠤᠤᠷᠠ ᠶ᠋ᠢᠨ ᠠᠳᠠᠯᠢ ᠮᠥᠷᠡᠨ ᠢ᠋ᠶ᠋ᠡᠷ
ᠬᠠᠳᠠᠨ ᠭᠥᠷᠥᠭᠡᠰᠦ ᠪᠡᠨ ᠤᠮᠳᠠᠭᠠᠯᠠᠭᠰᠠᠨ ᠠᠺ ᠴᠣᠯᠫᠠᠨ ᠤ᠋ ᠨᠤᠲᠤᠭ—
ᠬᠠᠢᠷᠠ ᠶ᠋ᠢᠨ ᠡᠨᠡ ᠳᠠᠭᠤᠤ ᠶ᠋ᠢ ᠵᠣᠷᠢᠭᠤᠯᠤᠭᠰᠠᠨ ᠺᠠᠽᠠᠭ ᠤ᠋ᠨ ᠲᠦᠮᠡᠨ ᠪᠣᠢ!
ᠴᠡᠯ ᠪᠤᠭᠤᠷᠤᠯ ᠴᠢᠨᠦ ᠣᠯᠠᠨ ᠵᠠᠭᠤᠨ ᠤ᠋ ᠬᠤᠶᠠᠭ
ᠴᠠᠪᠴᠢᠮᠠ ᠬᠢᠰᠠᠭᠠᠨ ᠣᠷᠣᠢ ᠠ᠋ᠴᠠ ᠥᠯᠥᠨ ᠪᠦᠷᠭᠦᠳ ᠢ᠋ ᠲᠡᠵᠢᠭᠡᠵᠦ
ᠴᠠᠰᠤᠨ ᠮᠥᠰᠥᠨ ᠬᠢᠷᠠ ᠪᠠᠷ ᠨᠢ ᠲᠠᠬᠠ ᠲᠠᠢ ᠮᠣᠷᠢ ᠪᠠᠷ ᠳᠠᠪᠬᠢᠭᠤᠯᠤᠭᠰᠠᠨ
ᠴᠢᠷᠠᠢ ᠰᠢᠭ᠋ ᠢᠶᠠᠨ ᠵᠣᠷᠢᠮᠠᠭ ᠰᠠᠯᠸᠪᠠᠲ ᠪᠠᠭᠠᠲᠤᠷ ᠤ᠋ᠨ ᠤᠳᠤᠮ ᠪᠣᠢ!
ᠡᠷᠡᠮᠡᠭ ᠴᠡᠴᠡᠨ ᠪᠤᠭᠤᠢᠯᠢ ᠶ᠋ᠢ ᠳᠠᠯᠠᠯᠵᠤ ᠥᠰᠦᠭᠰᠡᠨ ᠭᠠᠷ ᠲᠠᠢ
ᠡᠷᠬᠡ ᠴᠢᠯᠥᠭᠡᠨ ᠦ᠌ ᠢᠯᠳᠦ ᠶ᠋ᠢ ᠳᠠᠯᠠᠢᠵᠤ ᠲᠥᠷᠥᠭᠰᠡᠨ ᠪᠢᠷᠠ ᠲᠠᠢ
ᠡᠷᠭᠢᠬᠦ ᠲᠡᠦᠬᠡ ᠶ᠋ᠢᠨ ᠬᠠᠭᠤᠳᠠᠰᠤᠨ ᠳ᠋ᠤ᠌ ᠳᠠᠷᠬᠠᠨ ᠮᠥᠩᠬᠡ ᠶ᠋ᠢᠨ ᠨᠡᠷᠡ ᠲᠡᠢ
ᠡᠨᠡ ᠬᠦ᠌ ᠲᠦᠮᠡᠨ ᠳ᠋ᠦ᠍ ᠪᠢ ᠳᠠᠭᠤᠯᠠᠯ ᠰᠢᠭ᠋ ᠢᠶᠠᠨ ᠳᠤᠷᠠᠲᠠᠢ!
ᠭᠤᠨᠢᠭ ᠪᠠᠶᠠᠰᠤᠯ ᠬᠣᠣᠰᠯᠠᠭᠰᠠᠨ ᠠᠭᠤᠯᠠ ᠶ᠋ᠢᠨ ᠨᠡᠭᠦᠳᠡᠯᠴᠢᠨ ᠦ᠌ ᠤᠶᠠᠩᠭᠠ ᠲᠠᠢ
ᠭᠤᠷᠪᠠᠨ ᠤᠲᠠᠰᠤᠲᠤ ᠳᠣᠮᠪᠣᠷ ᠤ᠋ᠨ ᠴᠣᠭᠭᠢᠭᠤᠯᠬᠤ ᠠᠶᠠᠨ ᠳ᠋ᠤ᠌ ᠪᠠᠶᠠᠷᠯᠠᠳᠠᠭ ᠪᠢ
ᠭᠤᠨᠳᠠᠵᠤ ᠭᠤᠯᠠᠷᠠᠵᠤ ᠰᠤᠷᠤᠭᠠ ᠦᠭᠡᠢ ᠴᠠᠭᠠᠨ ᠠᠯᠴᠢᠭᠤᠷᠲᠤ ᠲᠡᠷᠢᠭᠦᠨ ᠲᠡᠢ
ᠭᠤᠷᠮᠤᠰᠤᠨ ᠰᠤᠷ ᠰᠢᠭ᠋ ᠪᠦᠰᠡᠭᠦᠢ ᠶ᠋ᠢᠨ ᠴᠣᠪᠣᠭᠣ ᠳᠠᠭᠤᠯᠠᠯ ᠳ᠋ᠤ᠌ ᠤᠶᠠᠷᠠᠳᠠᠭ ᠪᠢ
ᠤᠶᠠᠷᠠᠨ ᠲᠡᠮᠡᠦᠯᠬᠦ ᠰᠡᠳᠬᠢᠯ ᠦ᠋ᠨ ᠬᠦᠯᠦᠭ ᠪᠣᠯᠤᠨ ᠵᠢᠷᠣᠭᠠᠯᠠᠬᠤ
ᠠᠭᠤᠳᠠᠮ ᠲᠠᠯᠠ ᠰᠢᠭ᠋ ᠬᠠᠭᠤᠳᠠᠰᠤᠨ ᠳ᠋ᠤ᠌ ᠰᠢᠯᠦᠭ ᠪᠣᠯᠤᠨ ᠵᠢᠷᠢᠯᠵᠡᠬᠦ
ᠤᠯᠠᠭᠠᠨ ᠲᠤᠭ ᠤ᠋ᠨ ᠳᠣᠣᠷᠠ ᠠ᠋ᠴᠠ ᠪᠡᠯᠡᠭ ᠪᠣᠯᠭᠠᠨ ᠡᠷᠭᠦᠯᠴᠡᠬᠦ
ᠤᠶᠠᠩᠭᠠ ᠶ᠋ᠢᠨ ᠡᠨᠡᠬᠡᠨ ᠨᠠᠢᠷᠠᠭᠯᠠᠯ ᠪᠦᠲᠦᠭᠰᠡᠨ ᠤᠴᠢᠷ ᠡᠢᠮᠦᠷᠬᠦ!
1961.4.18 ᠵᠠᠢᠰᠠᠩ
ᠲᠠᠢᠯᠪᠤᠷᠢ᠄
1. ᠠᠺ— ᠰᠤᠯᠫᠠᠨ— ᠺᠠᠽᠠᠭ ᠳᠠᠭᠤᠤ ᠳ᠋ᠤ᠌ ᠭᠠᠷᠳᠠᠭ ᠭᠤᠸᠠ ᠪᠦᠰᠡᠭᠦᠢ ᠶ᠋ᠢᠨ ᠨᠡᠷᠡ᠃
2. ᠲᠣᠺᠡᠯ— ᠪᠠᠭᠠ ᠡᠬᠡᠨᠡᠷ᠃
3. ᠰᠡᠥ᠋ᠺᠸᠯ— ᠪᠣᠭᠲᠣᠯᠠᠨ ᠬᠢᠬᠦ ᠶᠣᠰᠣᠨ ᠳ᠋ᠤ᠌ ᠡᠮᠦᠰᠳᠡᠭ ᠬᠤᠪᠴᠠᠰᠤ᠃
4. ᠱᠤᠯᠫ— ᠦᠰᠦᠨ ᠦ᠌ ᠴᠢᠮᠡᠭ᠃ ᠨᠢᠭᠡᠨ ᠲᠥᠷᠥᠯ ᠦ᠋ᠨ ᠰᠢᠭᠢᠳᠬᠡᠭᠡ( ᠬᠠᠪᠴᠢᠶᠠᠷᠢ)᠃
5. ᠪᠠᠢ— ᠪᠠᠱ᠌ᠢ— ᠶᠡᠬᠡ ᠡᠬᠡᠨᠡᠷ᠃
6. ᠺᠥᠦᠴ— ᠺᠠᠽᠠᠭ ᠦᠯᠢᠭᠡᠷ ᠲᠦ᠍ ᠭᠠᠷᠳᠠᠭ ᠠᠪᠤᠷᠭᠤ ᠪᠡᠶᠡᠳᠡᠨ᠃
7. ᠠᠨᠢ— ᠠᠫᠠ— ᠡᠮᠡᠭᠡ ᠡᠵᠢ᠃
8. ᠰᠥᠶᠦ᠋ᠨ᠋ᠰᠡ— ᠱᠠᠩᠨᠠᠯ᠂ ᠪᠠᠢ ᠭᠡᠰᠡᠨ ᠤᠳᠬᠠ ᠲᠠᠢ ᠦᠭᠡ᠃
9. ᠰᠠᠯ ᠳᠣᠮᠪᠣᠷ— ᠭᠣᠴᠣᠯᠠᠯ ᠳᠣᠮᠪᠣᠷ᠃
10. ᠠᠺ ᠰᠠᠺᠡᠯ— ᠶᠡᠬᠡᠰ ᠪᠤᠭᠤᠷᠤᠯ᠂ ᠥᠭᠡᠴᠢᠯᠡᠪᠡᠯ 《ᠴᠠᠭᠠᠨ ᠰᠠᠬᠠᠯ》᠃
11. ᠲᠣᠭᠠᠰ ᠺᠦ᠋ᠮᠡᠯᠡᠺ— ᠦᠨᠳᠦᠰᠦᠲᠡᠨ ᠦ᠌ ᠲᠣᠭᠯᠠᠭᠠᠮ( ᠵᠢᠷᠭᠢ ᠰᠢ)᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠰᠡᠷᠭᠦᠯᠡᠩ᠂ ᠣᠳᠬᠠᠨᠰᠣᠠ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠤᠠ᠂ ᠰᠡᠬᠡᠭᠡᠷᠡᠯ᠂ ᠨᠠᠷᠠᠨᠲᠣᠭᠣᠨᠣ᠂ ᠨᠤᠮᠤᠴᠢᠨ ᠪᠢᠯᠢᠭ