ᠡᠵᠢ ᠳ᠋ᠦ᠍ ᠪᠡᠨ ᠪᠢᠴᠢᠭᠰᠡᠨ ᠨᠢᠭᠡᠨ ᠵᠠᠬᠢᠳᠠᠯ ᠤ᠋ᠨ ᠲᠡᠦᠬᠡ-ᠷ᠂ ᠴᠣᠢᠨᠣᠮЭэждээ бичсэн нэгэн захидлын түүх-Р.Чойном
383ᠡᠵᠢ ᠳ᠋ᠦ᠍ ᠪᠡᠨ ᠪᠢᠴᠢᠭᠰᠡᠨ ᠨᠢᠭᠡᠨ ᠵᠠᠬᠢᠳᠠᠯ ᠤ᠋ᠨ ᠲᠡᠦᠬᠡ
ᠷ᠂ ᠴᠣᠢᠨᠣᠮ
ᠬᠥᠬᠡ ᠨᠣᠭᠣᠭᠠᠨ ᠤ᠋ ᠤᠨᠢᠶᠠᠷ ᠲᠤ᠌ ᠪᠠᠢᠭᠠᠯᠢ ᠰᠣᠭᠲᠣᠭᠰᠠᠨ ᠵᠤᠨ ᠤ᠋ ᠢᠳᠡ ᠰᠠᠷᠠ ᠳ᠋ᠤ᠌ ᠬᠣᠨᠢ ᠬᠣᠯᠪᠣᠭᠠᠳ ᠰᠠᠭᠠᠵᠤ ᠰᠠᠭᠤᠭᠰᠠᠨ ᠡᠬᠡ ᠳ᠋ᠦ᠍ ᠨᠢ᠄ ᠬᠦᠦ ᠨᠢ ᠤᠯᠤᠰ ᠲᠥᠷᠥ ᠶ᠋ᠢᠨ ᠬᠡᠷᠡᠭᠲᠡᠨ ᠪᠣᠯᠵᠤ ᠱᠣᠷᠣᠩ ᠳ᠋ᠤ᠌ ᠣᠷᠣᠵᠤ ᠭᠡᠨᠡ ᠭᠡᠰᠡᠨ ᠠᠶᠤᠮᠰᠢᠭᠲᠤ ᠮᠡᠳᠡᠭᠡ ᠢᠷᠡᠵᠡᠢ᠃ ᠪᠡᠶᠡ ᠰᠤᠯᠠ ᠲᠠᠢ ᠴᠤ᠌ ᠢᠩᠭᠢᠲᠡᠯᠡ ᠪᠡᠨ ᠵᠣᠪᠠᠭᠠᠵᠤ ᠪᠠᠢᠭᠠ ᠦᠭᠡᠢ ᠬᠦᠦ ᠪᠡᠨ ᠶᠠᠭᠠᠬᠢᠴᠢᠬᠠᠪᠠ ᠳᠠ ᠭᠡᠭᠰᠡᠭᠡᠷ ᠬᠥᠭᠡᠷᠦᠬᠦᠢ ᠡᠬᠡ ᠤᠤᠯᠭᠠ ᠠᠯᠲᠠᠨ ᠰᠠᠨᠳᠤᠷᠴᠤ ᠳᠡᠮᠡᠢ ᠯᠡ᠄ ᠲᠥᠷᠥ ᠶ᠋ᠢᠨ ᠰᠦᠯᠳᠡ ᠥᠷᠥᠰᠢᠶᠡ ᠭᠡᠮᠡᠨ ᠵᠠᠯᠪᠠᠷᠢᠵᠤ ᠪᠠᠢᠪᠠ᠃
ᠭᠠᠭᠴᠠ ᠬᠤᠳᠳᠤᠭ ᠲᠤ᠌ ᠪᠠᠢᠬᠤ ᠳ᠋ᠤ᠌ ᠨᠢ ᠠᠲᠠᠭᠠᠵᠤ ᠲᠡᠪᠡᠳᠡᠭᠰᠡᠭᠡᠷ ᠢᠷᠡᠵᠦ ᠬᠦᠦ ᠲᠡᠢ ᠪᠡᠨ ᠠᠭᠤᠯᠵᠠᠬᠤ ᠭᠡᠰᠡᠨ ᠪᠣᠯᠪᠠᠴᠤ ᠠᠭᠤᠯᠵᠠᠵᠤ ᠴᠢᠳᠠᠯ ᠦᠭᠡᠢ᠂ ᠬᠠᠷᠢᠨ ᠮᠥᠷᠳᠡᠨ ᠪᠠᠢᠴᠠᠭᠠᠭᠴᠢ ᠲᠠᠢ ᠨᠢ ᠠᠭᠤᠯᠵᠠᠭᠰᠠᠨ ᠪᠠᠢᠨᠠ᠃ ᠡᠵᠢ ᠶ᠋ᠢ ᠪᠡᠨ ᠢᠷᠡᠭᠡᠳ ᠵᠣᠪᠠᠵᠤ ᠰᠢᠨᠠᠯᠵᠤ ᠪᠣᠢ ᠶ᠋ᠢ ᠲᠤᠭᠤᠯᠤᠭᠰᠠᠨ ᠬᠦᠦ ᠨᠢ ᠱᠣᠷᠣᠩ ᠤ᠋ᠨ ᠳᠠᠪᠴᠢᠭᠤ ᠥᠷᠥᠭᠡᠨ ᠳ᠋ᠦ᠍ ᠣᠯᠳᠠᠭᠰᠠᠨ ᠠᠯᠠᠭᠠ ᠳᠠᠷᠤᠮᠠ ᠴᠠᠭᠠᠰᠤ ᠶ᠋ᠢ ᠰᠢᠯᠦᠭ ᠢᠶᠠᠨ ᠪᠢᠴᠢᠨᠡ ᠭᠡᠵᠦ ᠬᠠᠢᠷᠠᠯᠠᠯ ᠦᠭᠡᠢ ᠪᠡᠷ ᠵᠢᠵᠢᠭᠬᠡᠨ ᠦᠰᠦᠭ ᠢ᠋ᠶ᠋ᠡᠷ ᠵᠤᠷᠠᠢᠲᠠᠯᠠ ᠪᠢᠴᠢᠭᠰᠡᠨ ᠵᠠᠬᠢᠶᠠ ᠨᠢ ᠬᠤᠷᠢᠶᠠᠭᠳᠠᠵᠤ᠂ ᠡᠵᠢ ᠳ᠋ᠦ᠍ ᠨᠢ ᠣᠴᠢᠭᠰᠠᠨ ᠦᠭᠡᠢ᠂ ᠬᠠᠪᠲᠠᠰᠤᠲᠤ ᠬᠡᠷᠡᠭ ᠲᠦ᠍ ᠨᠢ ᠬᠠᠳᠠᠭᠠᠯᠠᠭᠳᠠᠭᠰᠠᠭᠠᠷ ᠪᠠᠢᠵᠠᠢ᠃ ᠡᠵᠢ ᠳ᠋ᠦ᠍ ᠨᠢ ᠢᠷᠡᠭᠡ ᠦᠭᠡᠢ ᠬᠦᠦ ᠶ᠋ᠢᠨ ᠵᠢᠷᠦᠬᠡᠨ ᠦ᠌ ᠦᠭᠡ ᠶ᠋ᠢ ᠬᠣᠷᠢᠨ ᠬᠡᠳᠦᠨ ᠵᠢᠯ ᠦ᠋ᠨ ᠳᠠᠷᠠᠭᠠ ᠡᠵᠢ ᠨᠢ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠨ ᠤᠩᠰᠢᠭᠴᠢ ᠲᠠᠨ ᠳ᠋ᠤ᠌ ᠰᠣᠨᠣᠷᠳᠠᠭᠤᠯᠤᠶᠠ᠃
ᠮᠥᠷᠳᠡᠨ ᠡᠴᠡ ᠬᠦᠦ ᠴᠣᠢᠨᠣᠮ ᠪᠢᠴᠢᠪᠡ᠃
ᠬᠦᠨᠳᠦᠲᠦ ᠨᠠᠢᠵᠠ ᠲᠣᠭᠣᠭᠠ ᠮᠢᠨᠢ᠂ ᠰᠠᠢᠨ ᠪᠠᠢᠨᠠ ᠤᠤ᠂ ᠮᠢᠨᠦ ᠡᠨᠡ ᠵᠠᠬᠢᠳᠠᠯ ᠢ᠋ ᠡᠵᠢ ᠳ᠋ᠦ᠍ ᠮᠢᠨᠢ ᠤᠩᠰᠢᠵᠤ ᠥᠭᠭᠦᠭᠡᠷᠡᠢ᠃ ᠪᠢ ᠴᠢᠮᠠᠲᠤ ᠶᠡᠬᠡ ᠪᠠᠶᠠᠷᠯᠠᠭᠰᠠᠨ᠃
ᠡᠵᠢ ᠳ᠋ᠦ᠍ ᠪᠢᠴᠢᠬᠦ ᠨᠢ᠄ ᠬᠠᠢᠷᠠᠲᠤ ᠡᠵᠢ ᠮᠢᠨᠢ ᠰᠠᠢᠨ ᠪᠠᠢᠨᠠ ᠤᠤ᠂ ᠶᠠᠭᠤᠨ ᠳ᠋ᠤ᠌ ᠶᠠᠭᠠᠷᠠᠵᠤ ᠰᠠᠨᠳᠤᠷᠴᠤ ᠢᠷᠡᠭᠡ ᠪᠣᠢ᠂ ᠢᠰᠢᠲᠡᠨᠵᠢᠨ ᠠᠬᠠ ᠡᠳᠡ ᠨᠠᠷ ᠰᠦᠷ ᠪᠣᠯᠵᠤ ᠶᠠᠭᠠᠷᠠᠨ ᠬᠡᠯᠡ ᠥᠭᠴᠦ ᠰᠠᠨᠳᠤᠷᠭᠠ ᠰᠢᠪ ᠳᠡ᠃ ᠰᠠᠶᠢ ᠪᠠᠢᠴᠠᠭᠠᠭᠴᠢ ᠮᠠᠨᠢ ᠬᠡᠯᠡ ᠥᠭᠴᠦ ᠡᠨᠡ ᠲᠤᠬᠠᠢ ᠶᠠᠷᠢᠯᠠ᠃ ᠪᠢ ᠮᠥᠷᠳᠡᠨ ᠳ᠋ᠦ᠍ ᠰᠠᠭᠤᠵᠤ ᠯᠠ ᠪᠠᠢᠨᠠ᠃ ᠡᠨᠡ ᠲᠤᠬᠠᠢ ᠲᠠ ᠣᠭᠲᠣ ᠰᠠᠨᠠᠭᠠ ᠵᠣᠪᠠᠬᠤ ᠬᠡᠷᠡᠭ ᠦᠭᠡᠢ᠃ ᠪᠢ ᠴᠠᠭᠠᠳᠬᠠᠭᠳᠠᠬᠤ ᠦᠭᠡᠢ ᠶᠦᠮ ᠭᠡᠬᠦ ᠳ᠋ᠦ᠍ ᠲᠠᠪᠤ ᠠ᠋ᠴᠠ ᠳᠡᠭᠡᠭᠰᠢ ᠵᠢᠯ ᠠᠪᠬᠤ ᠦᠭᠡᠢ᠃ ᠲᠡᠭᠡᠭᠡᠳ ᠶᠡᠬᠡ ᠬᠤᠷᠠᠯ ᠤ᠋ᠨ ᠳᠠᠷᠤᠭᠠ ᠳ᠋ᠤ᠌ ᠡᠷᠭᠦᠳᠡᠯ ᠥᠭᠭᠦᠨᠡ᠃ ᠠᠶᠤᠬᠤ ᠬᠡᠷᠡᠭ ᠶᠠᠭᠤᠮᠠ ᠣᠭᠲᠣ ᠪᠠᠢᠬᠤ ᠦᠭᠡᠢ ᠠ᠋᠃ ᠣᠳᠣ ᠮᠥᠷᠳᠡᠨ ᠳ᠋ᠦ᠍ ᠪᠡᠶᠡ ᠰᠠᠢᠨ᠂ ᠬᠣᠭᠣᠯᠠ ᠡᠮᠨᠡᠯᠭᠡ ᠶ᠋ᠢᠨ ᠵᠥᠪᠰᠢᠶᠡᠷᠡᠯ ᠢ᠋ᠶ᠋ᠡᠷ ᠲᠤᠰ ᠲᠤ᠌ ᠪᠠᠨ ᠬᠣᠨᠢᠨ ᠮᠢᠬᠠ᠂ ᠭᠤᠯᠢᠷ ᠲᠠᠢ ᠬᠣᠭᠣᠯᠠ᠂ ᠬᠠᠭᠠᠰ ᠺᠢᠯᠣᠭ᠌ᠷᠠᠮ ᠲᠠᠯᠬᠠ᠂ ᠰᠢᠷᠠ ᠲᠣᠰᠣ᠂ ᠰᠢᠬᠢᠷ ᠦ᠋ᠨ ᠨᠣᠷᠮᠠ ᠲᠠᠢ᠃ ᠨᠠᠮᠠᠶ᠋ᠢ ᠡᠮᠴᠢ ᠨᠠᠷ ᠦᠷᠭᠦᠯᠵᠢ ᠦᠵᠡᠵᠦ ᠪᠠᠢᠭᠠ᠃ ᠮᠢᠨᠦ ᠬᠡᠷᠡᠭ ᠤᠯᠤᠰ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠭᠡᠳᠡᠭ ᠪᠣᠯᠪᠠᠴᠤ ᠭᠠᠢᠭᠤᠢ ᠬᠥᠩᠭᠡᠨ ᠬᠡᠷᠡᠭ ᠰᠢᠦ ᠳᠡ᠃
ᠪᠢ ᠠᠩᠬᠠ ᠶᠡᠬᠡ ᠠᠶᠤᠭᠰᠠᠨ ᠶᠤᠮ᠃ ᠣᠳᠣ ᠰᠠᠨᠠᠬᠤ ᠳ᠋ᠤ᠌ ᠢᠨᠢᠶᠡᠳᠦ ᠬᠦᠷᠴᠦ ᠪᠠᠢᠨᠠ᠃ ᠡᠨᠳᠡ ᠬᠠᠷᠢᠨ ᠨᠢᠭᠡ ᠮᠠᠭᠤ ᠲᠠᠯᠠ ᠨᠢ ᠨᠣᠮ ᠶᠡᠷᠦ ᠳ᠋ᠦ᠍ ᠪᠡᠨ ᠦᠵᠡᠭᠦᠯᠬᠦ ᠦᠭᠡᠢ᠂ ᠪᠢᠴᠢᠭᠦᠯᠬᠦ ᠦᠭᠡᠢ ᠶᠦᠮ᠃ ᠭᠡᠪᠡᠴᠦ ᠪᠢ ᠴᠠᠭᠠᠰᠤ ᠣᠯᠤᠭᠠᠳ ᠶᠠᠭᠤᠮᠠ ᠪᠠᠨ ᠪᠢᠴᠢᠭᠡᠳ ᠬᠡᠪᠲᠡᠵᠦ ᠪᠠᠢᠨᠠ᠃ ᠡᠵᠢ ᠲᠠᠨ ᠤ᠋ ᠬᠤᠪᠢ ᠳ᠋ᠤ᠌ ᠪᠣᠯ ᠨᠢᠭᠡᠨᠲᠡ ᠣᠳᠣ ᠪᠠᠷ ᠨᠠᠳᠠ ᠲᠠᠢ ᠠᠭᠤᠯᠵᠠᠭᠤᠯᠬᠤ ᠦᠭᠡᠢ ᠲᠤᠯᠠ ᠶᠠᠭᠠᠷᠠᠨ ᠪᠤᠴᠠᠭᠠᠳ ᠰᠡᠳᠬᠢᠯ ᠠᠭᠤᠵᠢᠭᠤ ᠬᠦᠯᠢᠶᠡᠵᠦ ᠪᠠᠢ᠃ ᠪᠢ ᠲᠠᠰᠤᠯᠤᠭᠳᠠᠭᠠᠳ ᠵᠠᠬᠢᠶᠠ ᠪᠢᠴᠢᠨᠡ᠃ ᠥᠭᠡᠷᠡ ᠬᠥᠮᠦᠨ ᠦ᠌ ᠡᠯᠳᠡᠪ ᠵᠠᠬᠢᠳᠠᠯ ᠳ᠋ᠤ᠌ ᠪᠤᠤ ᠢᠲᠡᠭᠡᠭᠡᠷᠡᠢ᠂ ᠶᠠᠭᠤᠮᠠ ᠦᠵᠡᠭᠡ ᠦᠭᠡᠢ ᠲᠡᠳᠡ ᠵᠢᠭᠠᠬᠠᠨ ᠶᠠᠭᠤᠮᠠ ᠳᠣᠭᠣᠯᠴᠢᠬᠠᠭᠠᠳ ᠠᠶᠤᠬᠤ ᠳ᠋ᠠᠭᠠᠨ ᠬᠡᠳᠦ ᠥᠰᠬᠡᠵᠦ( ᠥᠰᠬᠡᠭᠡᠨ ᠲᠥᠰᠭᠡᠭᠡᠨ) ᠴᠦ᠍ ᠪᠠᠢᠵᠤ ᠮᠡᠳᠡᠨᠡ᠃
ᠡᠵᠢ ᠶ᠋ᠢ ᠰ᠂ ᠤᠳᠪᠠᠯᠠ ᠳᠠᠷᠤᠭᠠ(ᠲᠡᠷᠡ ᠮᠣᠩᠭᠣᠯ ᠤ᠋ᠨ ᠵᠣᠬᠢᠶᠠᠯᠴᠢᠳ ᠤ᠋ᠨ ᠬᠣᠷᠢᠶᠠᠨ ᠤ᠋ ᠳᠠᠷᠤᠭᠠ) ᠳ᠋ᠤ᠌ ᠣᠷᠣᠬᠤ ᠳ᠋ᠠᠭᠠᠨ ᠪᠠᠷᠢᠵᠤ ᠣᠷᠣᠬᠤ ᠡᠷᠭᠦᠳᠡᠯ ᠢ᠋ ᠬᠠᠪᠤᠷ ᠥᠭᠭᠦᠨᠡ᠃ ᠭᠤᠷᠪᠠᠳᠤᠭᠠᠷ ᠰᠠᠷᠠ ᠶ᠋ᠢᠨ ᠨᠠᠢ᠍ᠮᠠᠨ ᠤ᠋ ᠨᠠᠭᠠᠨᠠ ᠣᠷᠣᠨᠠ ᠭᠡᠵᠦ ᠪᠣᠳᠣᠭᠠᠳ ᠲᠠ ᠬᠥᠳᠡᠭᠡ ᠪᠠᠢᠵᠤ ᠪᠠᠢ᠃ ᠪᠢ ᠡᠨᠳᠡ ᠠᠯᠵᠢᠬᠤ ᠦᠭᠡᠢ ᠠ᠋᠃ ᠪᠢ ᠲᠠᠰᠤᠯᠤᠭᠳᠠᠭᠠᠳ ᠬᠦᠨᠳᠦ ᠠᠵᠢᠯ ᠬᠢᠬᠦ ᠦᠭᠡᠢ᠂ ᠵᠢᠷᠤᠭ ᠵᠢᠷᠤᠭᠠᠳ ᠳᠤᠯᠠᠭᠠᠨ ᠪᠠᠢᠰᠢᠩ ᠳ᠋ᠤ᠌ ᠰᠠᠭᠤᠨᠠ᠃ ᠮᠢᠨᠦ ᠡᠷᠡᠭᠦᠯ ᠮᠡᠨᠳᠦ ᠶ᠋ᠢ ᠬᠠᠷᠠᠵᠤ ᠬᠠᠮᠠᠭᠠᠯᠠᠬᠤ ᠡᠮᠨᠡᠯᠭᠡ ᠶ᠋ᠢᠨ ᠺᠣᠮᠢᠰ ᠪᠠᠢᠭᠤᠯᠤᠭᠳᠠᠭᠰᠠᠨ᠃ ᠲᠠᠰᠤᠯᠤᠭᠳᠠᠬᠤ ᠪᠠᠷ ᠳᠣᠲᠣᠭᠠᠳᠤ ᠶᠠᠮᠤᠨ ᠥᠪᠡᠷ ᠲᠦ᠍ ᠪᠡᠨ ᠲᠠᠲᠠᠵᠤ ᠠᠪᠴᠤ᠂ ᠠᠵᠤ ᠠᠬᠤᠢ ᠳᠡᠭᠡᠷᠡ ᠪᠡᠨ ᠵᠢᠷᠤᠭᠠᠴᠢ ᠪᠠᠷ ᠠᠵᠢᠯᠯᠠᠭᠤᠯᠤᠨᠠ ᠭᠡᠰᠡᠨ᠃ ᠡᠵᠢ ᠮᠢᠨᠢ ᠲᠠ ᠮᠣᠩᠴᠠᠮᠸ(《ᠮᠣᠩᠭᠣᠯ ᠤ᠋ᠨ ᠴᠠᠬᠢᠯᠭᠠᠨ ᠮᠡᠳᠡᠭᠡ》 ᠭᠡᠬᠦ ᠰᠣᠨᠢᠨ ᠮᠡᠳᠡᠭᠡᠨ ᠦ᠌ ᠪᠠᠢᠭᠤᠯᠤᠯᠭᠠ) ᠠ᠋ᠴᠠ ᠮᠢᠨᠦ ᠬᠡᠳᠦᠨ ᠲᠥᠭᠥᠷᠢᠭ( ᠵᠣᠬᠢᠶᠠᠯ ᠤ᠋ᠨ ᠬᠠᠷᠠᠮᠵᠢ ᠮᠥᠩᠭᠥ ᠶ᠋ᠢ ᠬᠡᠯᠡᠵᠦ ᠪᠠᠢᠭᠠ ᠪᠣᠯᠤᠯᠲᠠᠢ) ᠭᠠᠷᠤᠭᠰᠠᠨ ᠪᠠᠢᠪᠠᠯ ᠠᠪᠴᠤ ᠪᠤᠴᠠᠭᠠᠷᠠᠢ᠃ ᠡᠨᠡ ᠱᠣᠷᠣᠩ ᠳ᠋ᠤ᠌ ᠮᠥᠩᠭᠥ ᠶᠡᠬᠡ ᠬᠡᠷᠡᠭᠲᠡᠢ ᠶᠦᠮ ᠪᠠᠢᠨᠠ᠃ ᠵᠠ ᠪᠠᠶᠠᠷᠲᠠᠢ᠃ ᠶᠣᠰᠣᠯᠠᠭᠰᠠᠨ ᠬᠦᠦ ᠷ᠂ ᠴᠣᠢᠨᠣᠮ ᠭᠡᠵᠡᠢ᠃
ᠬᠦᠦ ᠶ᠋ᠢᠨ ᠵᠠᠬᠢᠳᠠᠯ ᠢ᠋ ᠨᠠᠮᠤᠭᠤᠬᠠᠨ ᠳᠠᠭᠤᠳᠠᠭᠤᠯᠵᠤ ᠰᠠᠭᠤᠭᠠ ᠡᠬᠡ ᠶ᠋ᠢᠨ ᠨᠢᠯᠪᠤᠰᠤ ᠠᠰᠬᠠᠷᠠᠭᠰᠠᠭᠠᠷ ᠪᠢᠳᠡᠨ ᠦ᠌ ᠰᠡᠳᠬᠢᠯ ᠢ᠋ ᠬᠥᠪᠰᠥᠯᠵᠡᠭᠦᠯᠦᠨᠡ᠃ ᠭᠠᠭᠴᠠ ᠬᠤᠳᠳᠤᠭ ᠲᠤ᠌ ᠪᠠᠢᠬᠤ ᠳ᠋ᠤ᠌ ᠨᠢ ᠭᠠᠭᠴᠠᠬᠠᠨ ᠤᠳᠠᠭᠠ ᠬᠥᠭᠡᠭᠡᠴᠡᠯᠳᠦᠵᠦ ᠪᠠᠢᠵᠤ ᠠᠭᠤᠯᠵᠠᠨ ᠬᠦᠦ ᠶ᠋ᠢᠨ ᠢᠶᠠᠨ ᠳᠤᠬᠤ ᠶ᠋ᠢ ᠦᠨᠦᠷᠯᠡᠭᠰᠡᠨ ᠶᠦᠮ᠃ ᠶᠠᠭᠤᠮᠠ ᠴᠤ᠌ ᠶᠠᠷᠢᠵᠤ ᠪᠣᠯᠬᠤ ᠦᠭᠡᠢ᠂ ᠳᠡᠮᠡᠢ ᠵᠢᠭᠠᠬᠠᠨ ᠤᠬᠢᠯᠠᠭᠰᠠᠭᠠᠷ ᠡᠷᠭᠢᠯᠲᠡ ᠶ᠋ᠢᠨ ᠴᠠᠭ ᠳᠠᠭᠤᠰᠴᠤ ᠠᠪᠴᠢᠷᠠᠭᠰᠠᠨ ᠵᠢᠭᠠᠬᠠᠨ ᠶᠠᠭᠤᠮᠠ ᠪᠠᠨ ᠥᠭᠴᠦ ᠬᠤᠪᠴᠠᠰᠤ ᠶ᠋ᠢ ᠨᠢ ᠰᠣᠯᠢᠭᠠᠳ ᠭᠠᠷᠤᠭᠰᠠᠨ ᠠᠵᠠᠢ᠃
ᠢᠷᠠᠭᠤ ᠨᠠᠢᠷᠠᠭᠴᠢ ᠷ᠂ ᠴᠥᠢᠨᠤᠮ ᠡᠵᠡᠨ ᠳ᠋ᠦ᠍ ᠪᠡᠨ ᠬᠦᠷᠦᠭᠡ ᠦᠭᠡᠢ ᠡᠨᠡ ᠵᠠᠬᠢᠳᠠᠯ ᠳ᠋ᠤ᠌ ᠪᠠᠨ ᠨᠠᠮᠠᠶ᠋ᠢ ᠡᠢᠮᠦᠷᠬᠦ ᠶᠠᠪᠤᠭᠠ ᠶ᠋ᠢ ᠨᠥᠬᠥᠳ ᠪᠣᠯᠭᠠᠨ ᠳ᠋ᠤ᠌ ᠳᠣᠭᠣᠯᠭᠠᠭᠠᠷᠠᠢ ᠭᠡᠵᠦ ᠵᠠᠬᠢᠭᠰᠠᠨ ᠨᠢ ᠪᠣᠢ᠃ ᠥᠨᠥᠳᠥᠷ ᠤᠩᠰᠢᠭᠴᠢ ᠣᠯᠠᠨ ᠳ᠋ᠤ᠌ ᠪᠠᠨ᠂ ᠲᠡᠭᠦᠨ ᠦ᠌ ᠢᠷᠠᠭᠤ ᠨᠠᠢᠷᠠᠭ ᠢ᠋ ᠬᠦᠨᠳᠦᠯᠡᠳᠡᠭ ᠪᠦᠬᠦᠨ ᠳ᠋ᠦ᠍ ᠡᠨᠡ ᠦᠭᠡ ᠶ᠋ᠢ ᠳᠣᠭᠣᠯᠭᠠᠵᠤ ᠪᠠᠢᠨᠠ᠃