ᠡᠵᠢ ᠶ᠋ᠢᠨ ᠮᠥᠷᠥᠭᠡᠳᠦᠯ-ᠰᠣᠶᠣᠯᠴᠢᠮᠡᠭЭэжийн мөрөөдөл-соёлчимэг
383ᠡᠵᠢ ᠶ᠋ᠢᠨ ᠮᠥᠷᠥᠭᠡᠳᠦᠯ
ᠰᠣᠶᠣᠯᠴᠢᠮᠡᠭ
ᠠᠯᠲᠠᠨ ᠳᠡᠯᠡᠬᠡᠢ ᠳ᠋ᠦ᠍ ᠠᠮᠢᠳᠤ ᠶ᠋ᠢᠨ ᠵᠠᠶᠠᠭᠠ ᠶ᠋ᠢ ᠬᠠᠢᠷᠠᠯᠠᠭᠰᠠᠨ
ᠠᠴᠢᠲᠤ ᠡᠵᠢ ᠪᠡᠨ ᠪᠢ ᠠᠪᠤᠷᠭᠤ ᠪᠤᠷᠬᠠᠨ ᠢ᠋ᠶ᠋ᠠᠷ ᠬᠦᠨᠳᠦᠯᠡᠳᠡᠭ
ᠠᠯᠠᠭ ᠦᠷᠡ ᠳ᠋ᠦ᠍ ᠪᠡᠨ ᠠᠩᠭᠢᠷ ᠤᠭᠤᠷᠠᠭ ᠢ᠋ᠶ᠋ᠠᠨ ᠰᠢᠮᠡᠭᠦᠯᠦᠭᠰᠡᠨ ᠢ᠋ ᠨᠢ
ᠠᠨᠠᠪᠠᠳ ᠳᠠᠯᠠᠢ ᠶ᠋ᠢᠨ ᠮᠥᠩᠬᠡ ᠶ᠋ᠢᠨ ᠷᠠᠰᠢᠶᠠᠨ ᠠᠮᠰᠠᠭᠰᠠᠨ ᠭᠡᠵᠦ ᠪᠣᠳᠣᠳᠠᠭ
ᠦᠷᠡ ᠪᠡᠨ ᠬᠠᠢᠷᠠᠯᠠᠵᠤ ᠥᠷᠥᠴᠡᠨ ᠳ᠋ᠦ᠍ ᠪᠡᠨ ᠲᠡᠪᠡᠷᠢᠭᠰᠡᠨ ᠡᠵᠢ ᠪᠡᠨ ᠪᠢ
ᠣᠷᠴᠢᠯᠠᠩ ᠢ᠋ ᠭᠡᠢᠭᠦᠯᠦᠭᠰᠡᠨ ᠠᠯᠲᠠᠨ ᠨᠠᠷᠠ ᠪᠠᠷ ᠵᠦᠢᠷᠯᠡᠳᠡᠭ ᠪᠢ
ᠤᠳᠤᠮ ᠢ᠋ ᠨᠢ ᠵᠠᠯᠭᠠᠵᠤ ᠥᠪᠡᠷ ᠢ᠋ ᠪᠡᠨ ᠲᠠᠰᠤᠯᠤᠭᠰᠠᠨ ᠡᠵᠢ ᠪᠡᠨ ᠪᠢ
ᠡᠭᠦᠷᠢᠳᠡ ᠲᠠᠬᠢᠬᠤ ᠮᠥᠩᠬᠡ ᠶ᠋ᠢᠨ ᠰᠢᠲᠦᠭᠡᠨ ᠢ᠋ᠶ᠋ᠡᠷ ᠪᠣᠯᠭᠠᠳᠠᠭ
ᠴᠡᠪᠡᠷᠬᠡᠨ ᠲᠥᠷᠥᠭᠰᠡᠨ ᠵᠠᠯᠠᠭᠤᠬᠠᠨ ᠰᠠᠢᠬᠠᠨ ᠡᠵᠢ ᠡᠴᠡ
ᠴᠡᠴᠡᠭ ᠦ᠋ᠨ ᠰᠣᠶᠣᠭᠠ ᠰᠢᠭ᠋ ᠰᠣᠶᠣᠭᠠᠯᠠᠨ ᠳᠡᠯᠭᠡᠷᠡᠵᠦ ᠭᠠᠷᠬᠤ ᠳ᠋ᠤ᠌ ᠪᠠᠨ
ᠴᠡᠩᠭᠡᠯ ᠵᠢᠷᠭᠠᠯ ᠵᠣᠪᠠᠯᠠᠩ ᠵᠦᠳᠡᠭᠦᠷᠢ ᠪᠦᠬᠦᠨ ᠢ᠋
ᠴᠣᠭ ᠲᠤᠨᠢ ᠠᠪᠴᠢᠷᠠᠵᠤ ᠪᠡᠯᠡᠭᠯᠡᠵᠦ ᠥᠭᠭᠦᠭᠰᠡᠨ ᠪᠢᠯᠡ
ᠰᠢᠷᠭᠠᠯ ᠨᠠᠷᠠᠨ ᠤ᠋ ᠬᠠᠯᠠᠭᠤᠨ ᠢᠯᠴᠢ ᠰᠢᠭ ᠢᠪᠡᠭᠡᠵᠦ᠂
ᠰᠠᠨᠠᠵᠤ ᠬᠠᠢᠷᠠᠯᠠᠳᠠᠭ ᠮᠢᠨᠦ ᠰᠠᠢᠬᠠᠨ ᠡᠵᠢ ᠮᠢᠨᠢ
ᠰᠢᠷᠠ ᠬᠣᠨᠣᠭ ᠪᠣᠷᠣ ᠡᠳᠦᠷ ᠦ᠋ᠳ ᠲᠦ᠍ ᠵᠢᠳᠬᠦᠭᠰᠡᠭᠡᠷ
ᠰᠡᠳᠬᠢᠯ ᠢ᠋ᠶ᠋ᠡᠷ ᠴᠢᠯᠡᠭᠡᠵᠦ ᠵᠢᠷᠦᠬᠡ ᠪᠡᠨ ᠰᠡᠢᠷᠡᠭᠦᠯᠵᠦ ᠶᠠᠪᠤᠭᠰᠠᠨ
ᠤᠶᠠᠩᠭᠠᠲᠤ ᠰᠠᠢᠬᠠᠨ ᠳᠠᠭᠤᠨ ᠳ᠋ᠤ᠌ ᠴᠢᠨᠢ
ᠠᠭᠤᠯᠠᠰ ᠤ᠋ᠨ ᠴᠤᠤᠷᠢᠶᠠ ᠮᠥᠩᠬᠡᠷᠡᠵᠦ
ᠥᠷᠥᠴᠡ ᠵᠢᠷᠦᠬᠡᠨ ᠦ᠌ ᠴᠢᠨᠢ ᠬᠠᠢᠷᠠ ᠳ᠋ᠤ᠌
ᠦᠷᠡ ᠶ᠋ᠢᠨ ᠰᠡᠳᠬᠢᠯ ᠤᠶᠠᠷᠠᠨ ᠤᠶᠠᠷᠠᠨᠠ
ᠪᠣᠳᠣᠯ ᠮᠥᠷᠥᠭᠡᠳᠦᠯ ᠳ᠋ᠦ᠍ ᠪᠡᠨ ᠪᠦᠬᠦᠨ ᠢ᠋ ᠰᠠᠢᠨ ᠢ᠋ᠶ᠋ᠠᠷ ᠵᠥᠩᠨᠡᠵᠦ
ᠪᠤᠶᠠᠨ ᠬᠡᠰᠢᠭ ᠢ᠋ ᠦᠷᠡ ᠳ᠋ᠦ᠍ ᠪᠡᠨ ᠦᠯᠡᠳᠡᠭᠡᠬᠦ ᠶ᠋ᠢ ᠬᠦᠰᠡᠵᠦ
ᠪᠤᠳᠤᠯᠢᠶᠠᠨᠲᠤ ᠬᠣᠷᠸᠠ ᠶ᠋ᠢᠨ ᠡᠩᠬᠦᠯ ᠳᠤᠩᠬᠤᠯ ᠢ᠋ᠶ᠋ᠠᠷ ᠬᠣᠯᠠᠳᠠᠭᠰᠠᠭᠠᠷ
ᠪᠤᠴᠠᠵᠤ ᠢᠷᠡᠯ ᠦᠭᠡᠢ ᠨᠠᠮᠠ ᠪᠠᠨ ᠣᠷᠬᠢᠭᠠᠳ ᠶᠠᠪᠤᠴᠢᠬᠠᠯᠠ
ᠵᠥᠪᠯᠡᠵᠦ ᠶᠠᠷᠢᠯᠴᠠᠬᠤ ᠡᠵᠢ ᠲᠡᠢ ᠪᠡᠨ ᠪᠠᠢᠭᠰᠠᠨ ᠪᠣᠯ
ᠵᠡᠭᠦᠳᠦᠨ ᠳ᠋ᠦ᠍ ᠪᠡᠨ ᠴᠦ᠍ ᠵᠢᠷᠭᠠᠯᠲᠠᠢ ᠪᠠᠢᠬᠤ ᠶᠤᠮ ᠰᠠᠨ
ᠵᠥᠭᠡᠯᠡᠨ ᠪᠣᠷᠣ ᠴᠢᠷᠠᠢ ᠶ᠋ᠢ ᠴᠢᠨᠢ ᠮᠥᠷᠥᠭᠡᠳᠦᠨ ᠪᠣᠳᠣᠬᠤ ᠳ᠋ᠤ᠌
ᠵᠢᠷᠦᠬᠡ ᠰᠡᠳᠬᠢᠯ ᠮᠢᠨᠢ ᠬᠠᠢᠯᠠᠨ ᠡᠮᠵᠡᠭᠯᠡᠭᠡᠳ ᠪᠠᠢᠨᠠ
ᠬᠠᠨ ᠬᠣᠷᠸᠠ ᠶ᠋ᠢᠨ ᠬᠠᠭᠠᠰ ᠲᠤᠯᠭᠠᠭᠤᠷᠢ
ᠬᠠᠨᠠᠲᠤ ᠭᠡᠷ ᠦ᠋ᠨ ᠭᠡᠭᠡᠨ ᠨᠡᠷᠡ ᠡᠵᠢ ᠮᠢᠨᠢ
ᠬᠠᠢᠷᠠᠲᠠᠢ ᠪᠦᠬᠦᠨ ᠢ᠋ᠶ᠋ᠡᠷ ᠦᠷᠡ ᠳ᠋ᠦ᠍ ᠪᠡᠨ ᠦᠯᠡᠳᠡᠭᠡᠵᠦ
ᠬᠠᠲᠠᠭᠤ ᠲᠠᠢ ᠵᠥᠭᠡᠯᠡᠨ ᠲᠡᠢ ᠬᠣᠷᠸᠠ ᠠ᠋ᠴᠠ ᠥᠨᠢᠳᠡ ᠮᠥᠩᠬᠡᠷᠡᠯᠡ
ᠪᠤᠷᠬᠠᠨ ᠰᠡᠳᠬᠢᠯ ᠲᠡᠢ ᠡᠵᠢ ᠪᠡᠨ ᠰᠠᠨᠠᠬᠤ ᠳ᠋ᠤ᠌ ᠪᠠᠨ
ᠪᠣᠳᠣᠯ ᠤ᠋ᠨ ᠭᠦᠨ ᠡᠴᠡ ᠡᠮᠵᠡᠭᠯᠡᠨ ᠤᠶᠠᠷᠠᠬᠤ ᠶᠤᠮ
ᠪᠤᠳᠤᠯᠢᠶᠠᠨᠲᠤ ᠬᠣᠷᠸᠠ ᠶ᠋ᠢᠨ ᠣᠬᠣᠷᠬᠠᠨ ᠵᠠᠢ ᠳ᠋ᠤ᠌
ᠪᠤᠰᠬᠠᠭᠰᠠᠨ ᠠᠴᠢ ᠶ᠋ᠢ ᠨᠢ ᠥᠨᠢᠳᠡ ᠮᠥᠷᠥᠭᠡᠳᠦᠨᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣᠤᠠᠬᠠᠨᠴᠡᠴᠡᠭ
ᠬᠢᠨᠠᠭᠴᠢ ᠪᠠᠭᠰᠢ᠄ ᠰᠡᠷᠭᠦᠯᠡᠩ