ᠪᠢ-ᠷ ᠂ᠴᠣᠢᠨᠣᠮР.Чойном - Би
638ᠪᠢ
ᠷ· ᠴᠣᠢᠨᠣᠮ
ᠪᠢᠲᠡᠭᠡᠢ ᠭᠠᠢᠬᠠᠵᠠᠭᠠ!
ᠪᠢ ᠶᠠᠷᠢᠵᠤ ᠪᠠᠢᠨᠠ᠃
ᠬᠠᠶᠠᠭᠠ ᠨᠢ ᠦᠭᠡᠢ ᠵᠢᠭᠢᠳᠡᠭ ᠬᠥᠯ ᠲᠡᠢ
ᠬᠠᠯᠠᠭᠠ ᠨᠢ ᠦᠭᠡᠢ ᠡᠮᠦᠰᠳᠡᠭ ᠺᠣᠰᠲ᠋ᠶᠤᠮ ᠲᠠᠢ
ᠬᠠ ᠶᠠ ᠦᠭᠡᠢ ᠶᠠᠪᠤᠳᠠᠭ ᠲᠠᠪᠢᠯᠠᠩ ᠲᠠᠢ
ᠬᠠᠯᠬᠠ ᠶ᠋ᠢᠨ ᠰᠢᠯᠦᠭᠴᠢ ᠶᠠᠷᠢᠵᠤ ᠪᠠᠢᠨᠠ᠃
ᠰᠢᠯᠦᠭᠴᠢ ᠶ᠋ᠢ ᠢᠰᠡᠭᠡᠢ ᠭᠡᠷ ᠲᠦ᠍ ᠲᠥᠷᠥᠭᠦᠯᠦᠭᠰᠡᠨ1936 ᠣᠨ ᠶᠠᠷᠢᠵᠤ ᠪᠠᠢᠨᠠ
ᠰᠢᠯᠦᠭᠴᠢ ᠳ᠋ᠦ᠍ ᠡᠬᠢᠨ ᠦ᠌ ᠦᠰᠦᠭ ᠨᠢᠳᠦᠯᠡᠭᠦᠯᠦᠭᠰᠡᠨ1946 ᠣᠨ ᠶᠠᠷᠢᠵᠤ ᠪᠠᠢᠨᠠ
ᠰᠢᠯᠦᠭᠴᠢ ᠶ᠋ᠢ ᠰᠢᠯᠦᠭ ᠦ᠋ᠨ ᠶᠢᠷᠲᠢᠨᠴᠦ ᠳ᠋ᠦ᠍ ᠣᠷᠣᠭᠤᠯᠤᠭᠰᠠᠨ1956 ᠣᠨ ᠶᠠᠷᠢᠵᠤ ᠪᠠᠢᠨᠠ
ᠰᠢᠯᠦᠭᠴᠢ ᠶ᠋ᠢ ᠬᠦᠯᠦᠭ ᠦ᠋ᠨ ᠲᠣᠣᠷ ᠲᠤ᠌ ᠣᠷᠣᠭᠤᠯᠤᠭᠰᠠᠨ1966 ᠣᠨ ᠶᠠᠷᠢᠵᠤ ᠪᠠᠢᠨᠠ
ᠰᠢᠯᠦᠭᠴᠢ ᠶ᠋ᠢ ᠬᠥᠮᠦᠨ ᠦ᠌ ᠶᠢᠷᠲᠢᠨᠴᠦ ᠡᠴᠡ ᠦᠳᠡᠬᠦ ᠮᠡᠳᠡᠭᠳᠡᠭᠡ ᠦᠭᠡᠢ ᠣᠨ ᠤ᠋ ᠡᠮᠦᠨᠡ ᠡᠴᠡ ᠶᠠᠷᠢᠵᠤ ᠪᠠᠢᠨᠠ᠃
ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ
ᠰᠠᠨᠰᠠᠷ ᠤ᠋ᠨ ᠬᠡᠳᠦ ᠪᠣᠭᠣᠨᠢ ᠳᠣᠯᠭᠢᠶᠠᠨ ᠰᠢᠭ᠋
ᠰᠠᠯᠬᠢᠨ ᠠ᠋ᠴᠠ ᠴᠤ᠌ ᠶᠤᠮ ᠤᠤ᠂ ᠡᠰᠡᠬᠦᠯᠡ ᠴᠢᠯᠠᠭᠤᠨ ᠳᠣᠣᠷᠠ ᠠ᠋ᠴᠠ᠁
ᠰᠠᠢᠲᠤᠷ ᠰᠣᠨᠣᠰᠤᠭᠠᠳ ᠬᠣᠢᠴᠢ ᠦᠶᠡ ᠮᠢᠨᠢ
ᠡᠨᠡ ᠳᠠᠭᠤᠨ ᠤ᠋
ᠡᠵᠡᠨ ᠨᠢ ᠬᠡᠨ ᠪᠣᠢ? ᠭᠡᠵᠦ
ᠡᠷᠢᠭᠰᠡᠨ ᠦ᠌ ᠬᠡᠷᠡᠭ ᠦᠭᠡᠢ
ᠬᠠᠷᠢᠨ ᠣᠢᠯᠠᠭᠠᠬᠤ ᠬᠡᠷᠡᠭᠲᠡᠢ
ᠪᠢ ᠲᠠ ᠨᠠᠷ ᠤ᠋ᠨ ᠠᠪᠤ
ᠪᠡᠶᠡ ᠶ᠋ᠢᠨ ᠴᠢᠨᠢ
ᠤᠬᠠᠭᠠᠨ ᠤ᠋ ᠴᠢᠨᠢ
ᠵᠢᠷᠭᠠᠯ᠂ ᠴᠡᠩᠭᠡᠯ ᠦ᠋ᠨ ᠴᠢᠨᠢ
ᠡᠬᠢ ᠣᠨᠳᠣᠷᠣᠭᠠ ᠪᠣᠯᠵᠤ
ᠡᠨᠡ ᠵᠠᠭᠤᠨ ᠳ᠋ᠤ᠌ ᠪᠠᠨ ᠲᠥᠷᠥᠯᠡ᠂
ᠡᠨᠡ ᠵᠠᠭᠤᠨ ᠳ᠋ᠤ᠌ ᠪᠠᠨ ᠦᠯᠡᠳᠡᠨᠡ᠃
ᠥᠨᠥᠳᠥᠷ ᠪᠢ ᠳᠡᠷᠭᠡᠳᠡᠭᠦᠷ ᠨᠢ
ᠥᠩᠭᠡᠷᠡᠬᠦ ᠳ᠋ᠦ᠍ ᠪᠡᠨ ᠲᠣᠯᠣᠭᠠᠢ ᠳᠣᠬᠢᠨ ᠮᠡᠨᠳᠦᠯᠡᠵᠦ ᠶᠠᠪᠤᠭᠠ
ᠥᠴᠦᠬᠡᠨ ᠪᠣᠪ ᠪᠣᠷᠣ ᠪᠦᠰᠡᠭᠦᠢ ᠡᠴᠡ
ᠡᠰᠡᠬᠦᠯᠡ ᠴᠡᠷᠢᠭ ᠦ᠋ᠨ ᠠᠩᠰᠠᠮᠠᠯ ᠤ᠋ᠨ
ᠡᠷᠲᠡᠨ ᠡᠴᠡ ᠮᠢᠨᠦ ᠵᠢᠰᠦᠯᠡᠭᠰᠡᠨ
ᠡᠷᠡᠮᠡᠬᠡᠢ ᠮᠠᠶᠢᠭ ᠤ᠋ᠨ ᠬᠡᠦᠬᠡᠨ ᠡᠴᠡ
ᠡᠩᠬᠦᠷᠡᠢ ᠬᠠᠢᠷᠠ ᠶ᠋ᠢᠨ ᠤᠤᠭᠠᠨ ᠲᠣᠭᠣᠷᠠ ᠠ᠋ᠴᠠ
ᠬᠣᠷᠢᠳᠤᠭᠠᠷ ᠵᠠᠭᠤᠨ ᠤ᠋ ᠳᠠᠯᠠᠨ ᠬᠡᠳᠦᠨ ᠣᠨ ᠠ᠋ᠴᠠ
ᠬᠣᠵᠢᠮ ᠤ᠋ᠨ ᠶᠡᠬᠡ ᠦᠶᠡ— ᠲᠠ ᠪᠦᠬᠦᠨ ᠦ᠌
ᠡᠬᠢ ᠡᠭᠦᠰᠪᠦᠷᠢ ᠴᠦ᠍
ᠡᠨᠡ ᠪᠡᠶᠡ ᠡᠴᠡ ᠮᠢᠨᠢ
ᠲᠠᠰᠤᠷᠠᠬᠤ ᠶᠤᠮ ᠪᠢᠯᠡ ᠤᠤ?
ᠵᠢᠷᠭᠠᠯ ᠠᠯᠳᠠᠷ ᠬᠣᠶᠠᠷ ᠤ᠋ᠨ
ᠬᠣᠯᠠ ᠶ᠋ᠢᠨ ᠪᠠᠷᠠ ᠶ᠋ᠢ ᠬᠠᠷᠠᠭᠰᠠᠨ
ᠵᠢᠷᠠᠭᠠᠳ ᠣᠨ ᠨᠤᠭᠤᠳ ᠤ᠋ᠨ
ᠬᠣᠭ ᠲᠣᠭᠣᠰᠣᠲᠤ ᠭᠤᠳᠤᠮᠵᠢᠨ ᠳ᠋ᠤ᠌
ᠲᠡᠨᠦᠭᠰᠡᠨ ᠤᠴᠠᠷᠠᠭᠰᠠᠨ ᠵᠠᠭᠤᠷᠠᠳᠤᠬᠠᠨ ᠠᠮᠠᠷᠠᠭ ᠤ᠋ᠨ ᠮᠢᠨᠢ
ᠲᠡᠪᠡᠷᠢᠭᠡᠳ ᠬᠣᠴᠣᠷᠤᠭᠰᠠᠨ ᠵᠢᠭᠠᠬᠠᠨ ᠠᠮᠢᠲᠠᠨ ᠠ᠋ᠴᠠ
ᠲᠠ ᠨᠠᠷ ᠤ᠋ᠨ ᠡᠯᠦᠨᠴᠡ ᠬᠤᠯᠤᠨᠴᠠ ᠴᠤ᠌ ᠡᠭᠦᠰᠦᠭᠰᠡᠨ ᠶᠦᠮ ᠪᠢᠯᠡ ᠤᠤ?
ᠶᠠᠮᠠᠷ ᠴᠤ᠌ ᠭᠡᠰᠡᠨ ᠮᠢᠬᠠ ᠴᠢᠰᠤᠨ ᠤ᠋ ᠲᠠᠰᠤᠷᠬᠠᠢ ᠲᠠ ᠨᠠᠷ ᠲᠤ᠌ ᠪᠠᠨ
ᠶᠠᠭᠠᠬᠢᠪᠠᠴᠤ ᠪᠢ ᠥᠷᠢ ᠲᠥᠯᠥᠬᠦ᠂ ᠥᠪ ᠦᠯᠡᠳᠡᠭᠡᠬᠦ ᠤᠴᠢᠷᠲᠠᠢ ᠭᠡᠵᠦ
ᠢᠷᠠᠭᠤ ᠨᠠᠢᠷᠠᠭ ᠤ᠋ᠨ ᠦᠢᠮᠡᠭᠡᠨ ᠠᠢᠮᠠᠭᠠᠨᠳᠤ ᠲᠠᠯᠠᠪᠤᠷ ᠲᠤ᠌
ᠢᠯᠠᠭᠳᠠᠵᠤ ᠢᠯᠠᠵᠤ᠂ ᠢᠯᠠᠵᠤ ᠢᠯᠠᠭᠳᠠᠵᠤ ᠶᠠᠪᠤᠨᠠ
ᠬᠠᠭᠤᠳᠠᠰᠤᠬᠠᠨ ᠰᠢᠯᠦᠭ ᠦ᠋ᠨ ᠲᠥᠯᠥᠭᠡ
ᠬᠤᠪᠢ ᠵᠠᠶᠠᠭᠠᠨ ᠤ᠋ ᠪᠠᠨ ᠲᠣᠭᠣᠷᠢᠭ ᠵᠠᠮ ᠠ᠋ᠴᠠ ᠭᠠᠷᠴᠤ
ᠳ᠋ᠧᠩ ᠦ᠋ᠨ ᠭᠠᠯ ᠳ᠋ᠤ᠌ ᠣᠷᠣᠳᠠᠭ ᠡᠷᠪᠡᠬᠡᠢ ᠰᠢᠭ
ᠲᠢᠭ ᠵᠢᠷᠤᠮ ᠤ᠋ᠨ ᠭᠠᠯ ᠳ᠋ᠤ᠌ ᠬᠤᠢᠬᠠᠯᠠᠭᠤᠯᠤᠭᠰᠠᠨ ᠪᠡᠶᠡ ᠶ᠋ᠢᠨ ᠮᠢᠨᠢ
ᠵᠠᠯᠠᠭᠤ ᠨᠠᠰᠤᠨ ᠤ᠋ ᠮᠢᠨᠢ ᠴᠢᠰᠤ ᠶ᠋ᠢ᠂ ᠬᠥᠭᠰᠢᠷᠡᠬᠦ ᠨᠠᠰᠤᠨ ᠤ᠋ ᠮᠢᠨᠢ ᠬᠥᠯᠥᠰᠥ ᠶ᠋ᠢ
ᠵᠠᠷᠤᠴᠠᠭᠤᠯᠵᠤ᠂ ᠳᠤᠰᠤᠯ ᠳᠤᠰᠤᠯ ᠢ᠋ᠶ᠋ᠠᠷ ᠨᠢ ᠲᠣᠭᠠᠯᠠᠭᠰᠠᠨ
ᠵᠠᠷᠢᠮ ᠨᠢ ᠤᠨᠤᠭᠰᠠᠨ᠂ ᠵᠠᠷᠢᠮ ᠨᠢ ᠠᠯᠳᠠᠭᠰᠠᠨ᠂ ᠵᠠᠷᠢᠮ ᠨᠢ ᠪᠦᠷ ᠲᠥᠭᠡᠷᠢᠭᠰᠡᠨ
ᠵᠠᠳᠠᠭᠠᠢ ᠰᠢᠯᠦᠭ ᠦ᠋ᠳ ᠪᠣᠯ ᠲᠠ ᠨᠠᠷ ᠤ᠋ᠨ ᠮᠢᠨᠢ ᠶᠦᠮ!
ᠲᠠ ᠨᠠᠷ ᠲᠤ᠌ ᠡᠷᠭᠦᠬᠦ ᠮᠢᠨᠦ ᠪᠡᠯᠡᠭ
ᠲᠠ ᠨᠠᠷ ᠤ᠋ᠨ ᠡᠷᠢᠨ ᠦᠶᠡ ᠳ᠋ᠦ᠍ ᠲᠥᠯᠥᠬᠦ ᠮᠢᠨᠦ ᠲᠥᠯᠥᠪᠦᠷᠢ
ᠲᠠ ᠨᠠᠷ ᠤ᠋ᠨ ᠨᠡᠢᠭᠡᠮ ᠳ᠋ᠦ᠍ ᠲᠠᠯᠪᠢᠬᠤ ᠮᠢᠨᠦ
ᠲᠠᠢᠯᠤᠨ ᠢᠯᠡᠳᠬᠡᠯ᠂ ᠲᠠᠨᠢᠯᠴᠠᠭᠤᠯᠬᠤ ᠬᠠᠭᠤᠳᠠᠰᠤ᠂ ᠬᠥᠰᠢᠶᠡ ᠳᠤᠷᠠᠰᠬᠠᠯ ᠮᠥᠨ!
ᠡᠭᠡᠯ ᠠᠷᠠᠳ ᠤ᠋ᠨ ᠡᠭᠡᠯ ᠰᠢᠯᠦᠭ ᠲᠦ᠍ ᠮᠢᠨᠢ
ᠡᠰᠬᠡᠭᠰᠡᠨ᠂ ᠣᠶᠣᠭᠰᠠᠨ ᠭᠣᠶᠣᠯ ᠪᠠᠢᠬᠤ ᠦᠭᠡᠢ
ᠡᠭᠡᠳᠡᠭᠰᠡᠨ ᠪᠣᠳᠣᠭᠰᠠᠨ ᠴᠢᠮᠡᠭ ᠪᠠᠢᠬᠤ ᠦᠭᠡᠢ
ᠡᠷᠡᠭᠡ ᠦᠭᠡᠢ ᠪᠢᠯᠳᠠᠤᠴᠢᠯᠠᠯ᠂ ᠭᠦᠳᠬᠡᠯᠭᠡ ᠪᠠᠢᠬᠤ ᠦᠭᠡᠢ
ᠡᠨᠳᠡ ᠮᠢᠨᠦ ᠳᠣᠲᠣᠭᠠᠳᠤ ᠶᠢᠷᠲᠢᠨᠴᠦ ᠶ᠋ᠢᠨ
ᠡᠬᠢᠯᠡᠯ ᠲᠡᠭᠦᠰᠬᠡᠯ᠂ ᠡᠪᠳᠡᠷᠡᠯ ᠬᠥᠭᠵᠢᠯ᠂ ᠬᠤᠷ ᠲᠣᠭᠲᠠᠴᠠ ᠪᠣᠢ!
ᠪᠤᠷᠤᠭᠤ ᠴᠤ᠌ ᠪᠠᠢ᠂ ᠵᠥᠪ ᠴᠦ᠍ ᠪᠠᠢ᠂
ᠪᠤᠰᠤᠳ ᠬᠡᠨ ᠦ᠌ ᠴᠦ᠍ ᠭᠠᠷᠭᠠᠭᠠ ᠦᠭᠡᠢ
ᠪᠣᠳᠣᠭᠠ ᠦᠭᠡᠢ᠂
ᠪᠣᠳᠣᠭ ᠢ᠋ ᠨᠢ ᠬᠠᠯᠴᠠᠯᠤᠭᠠ ᠦᠭᠡᠢ ᠮᠢᠨᠦ ᠥᠩᠭᠡ ᠪᠣᠢ!
ᠮᠢᠨᠦ ᠰᠢᠯᠦᠭ ᠦ᠋ᠨ ᠴᠠᠷᠠᠭᠠ
ᠮᠢᠯᠢᠮᠧᠲ᠋ᠷ ᠢ᠋ᠶ᠋ᠡᠷ ᠴᠦ᠍ ᠶᠦᠮ ᠦᠦ ᠺᠢᠯᠣᠮᠧᠲ᠋ᠷ ᠢ᠋ᠶ᠋ᠡᠷ ᠴᠦ᠍ ᠶᠦᠮ ᠦᠦ
ᠨᠠᠷᠢᠨ᠂ ᠥᠷᠭᠡᠨ ᠶᠠᠮᠠᠷ ᠬᠡᠮᠵᠢᠶᠡ ᠶ᠋ᠢ ᠬᠠᠮᠤᠷᠤᠭᠰᠠᠨ ᠪᠠᠢᠪᠠᠰᠤ
ᠨᠠᠮᠠ ᠶ᠋ᠢ ᠬᠠᠷᠠᠬᠤ ᠲᠧᠯᠸᠢᠰ ᠦ᠋ᠨ ᠳᠡᠯᠭᠡᠴᠡ ᠲᠡᠷᠡ!
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠰᠡᠷᠭᠦᠯᠡᠩ
ᠦᠰᠦᠭ ᠬᠠᠲᠠᠭᠰᠠᠨ ᠨᠢ᠄ ᠰᠡᠷᠭᠦᠯᠡᠩ
ᠬᠢᠨᠠᠭᠴᠢ ᠪᠠᠭᠰᠢ᠄ ᠢᠷᠡᠭᠡᠳᠦᠢ