ᠵᠤᠵᠢ ᠰᠡᠷᠡᠭᠡᠨᠡᠨᠭ – ᠯ ᠂ ᠸᠠᠩᠭᠠᠨ Зож сэрээнэн – Л ᠂ Вангаан
232ᠵᠤᠵᠢ ᠰᠡᠷᠡᠭᠡᠨᠡᠨᠭ
( ᠱᠣᠭ ᠥᠭᠦᠯᠡᠯᠭᠡ)
ᠯ · ᠸᠠᠩᠭᠠᠨ
ᠰᠡᠷᠡᠭᠡᠨᠡᠩ ᠭᠤᠸᠠᠢ ᠥᠩᠭᠡᠷᠡᠳᠡᠭ ᠨᠠᠮᠤᠷ ᠵᠢᠷᠠᠨ ᠨᠠᠰᠤ ᠬᠦᠷᠴᠦ᠂ ᠨᠢᠭᠡᠳᠦᠯ ᠣᠢ ᠶ᠋ᠢ ᠨᠢ ᠲᠡᠮᠳᠡᠭᠯᠡᠵᠦ ᠨᠢᠵᠢᠭᠡᠷ ᠨᠠᠢᠷ ᠪᠣᠯᠤᠭᠰᠠᠨ ᠶᠤᠮ ᠪᠠᠢᠬᠠ᠂ ᠠᠷᠭᠠ ᠦᠭᠡᠢ ᠳᠡ᠃ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠶ᠋ᠢᠨ ᠣᠢ ᠳᠡᠭᠡᠷᠡ ᠨᠢᠭᠡᠳᠦᠯ ᠭᠠᠷ ᠢ᠋ᠶ᠋ᠠᠨ ᠭᠠᠷᠭᠠᠯ ᠦᠭᠡᠢ ᠴᠦ᠍ ᠶᠠᠭᠠᠬᠢᠬᠤᠪ᠂ ᠵᠢᠳᠬᠦᠯ ᠴᠦ᠍ ᠭᠡᠵᠦ ᠵᠦᠢᠷᠯᠡᠰᠢ ᠦᠭᠡᠢ᠂ ᠤᠬᠠᠮᠰᠠᠷ ᠰᠠᠨᠠᠭᠠᠴᠢᠯᠠᠭᠠ ᠴᠤ᠌ ᠭᠡᠵᠦ ᠶᠣᠰᠣᠲᠠᠢ ᠦᠯᠢᠭᠡᠷ ᠵᠢᠱ᠌ᠢᠶᠡ ᠪᠣᠯᠤᠭᠰᠠᠨ ᠬᠥᠮᠦᠨ ᠶᠦ᠍ᠮ ᠰᠢᠦ᠃
ᠡᠨᠡ ᠣᠢ ᠳ᠋ᠤ᠌ ᠣᠨᠴᠠᠯᠢᠭ ᠰᠣᠨᠢᠨ ᠶᠠᠭᠤᠮᠠ ᠪᠣᠯᠤᠭᠰᠠᠨ ᠶᠤᠮ ᠭᠡᠨᠡ ᠪᠢᠯᠡ᠃ ᠨᠢᠭᠡ ᠨᠢ ᠨᠢᠭᠡᠳᠦᠯ ᠦ᠋ᠨ ᠲᠥᠪ ᠳᠡᠭᠡᠷᠡ ᠪᠡᠨ ᠨᠠᠢ᠍ᠮᠠᠨ ᠬᠠᠨᠠ ᠲᠠᠢ ᠲᠣᠮᠣ ᠭᠡᠷ ᠪᠠᠷᠢᠭᠠᠳ ᠨᠢᠭᠡᠳᠦᠯ ᠦ᠋ᠨ ᠤᠳᠤᠷᠢᠳᠤᠯᠭᠠ ᠠ᠋ᠴᠠ ᠵᠣᠷᠢᠭᠤᠳᠠ ᠮᠣᠨᠲ᠋ᠶᠣᠷ( ᠴᠠᠬᠢᠯᠭᠠᠴᠢᠨ) ᠡᠭᠦᠷᠭᠡ ᠥᠭᠴᠦ ᠲᠡᠷᠡ ᠭᠡᠷ ᠲᠦ᠍ ᠳᠥᠷᠪᠡᠨ ᠴᠢᠳᠧᠩ( ᠴᠠᠬᠢᠯᠭᠠᠨ ᠳ᠋ᠧᠩ) ᠲᠠᠯᠪᠢᠭᠤᠯᠵᠤ ᠡᠳᠦᠷ ᠰᠢᠭ ᠭᠡᠷᠡᠯᠲᠦᠭᠦᠯᠦᠭᠰᠡᠨ ᠶᠦ᠍ᠮ ᠭᠡᠨᠡ ᠪᠢᠯᠡ᠃ ᠬᠣᠶᠠᠷ ᠲᠤ᠌ ᠨᠠᠢᠷ ᠤ᠋ᠨ ᠳᠤᠮᠳᠠ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠲᠡᠷᠡ ᠴᠢᠳᠧᠩ ᠦ᠋ᠨ ᠭᠡᠷᠡᠯ ᠡᠴᠡ ᠰᠠᠨᠠᠭᠠ ᠲᠥᠷᠥᠵᠦ ᠠᠮᠠ ᠨᠢ ᠬᠠᠯᠠᠭᠰᠠᠨ ᠳ᠋ᠠᠭᠠᠨ ᠳᠡᠭᠡᠷᠡ ᠦᠶᠡ ᠳ᠋ᠦ᠍ ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠ ᠣᠷᠣᠭᠠᠳ ᠬᠥᠭ ᠢ᠋ᠶ᠋ᠡᠷ ᠲᠠᠷᠢᠵᠤ ᠲᠡᠭᠦᠨ ᠢ᠋ ᠪᠡᠨ ᠬᠣᠷᠢᠭᠠᠳ ᠵᠢᠯ ᠨᠢᠭᠤᠵᠤ ᠨᠡᠷᠡᠯᠬᠡᠵᠦ ᠶᠠᠪᠤᠭᠰᠠᠨ ᠲᠤᠬᠠᠢ ᠫᠢᠶᠠᠩ( ᠱᠣᠭ ᠲᠠᠢ ᠶᠠᠪᠤᠳᠠᠯ) ᠢ᠋ᠶ᠋ᠠᠨ ᠶᠠᠷᠢᠵᠤ᠂ ᠳᠠᠷᠤᠭᠠ ᠮᠠᠨᠢ ᠴᠤ᠌ ᠳᠥᠷᠪᠡᠨ ᠴᠢᠳᠧᠩ ᠲᠠᠯᠪᠢᠭᠤᠯᠤᠭᠰᠠᠨ ᠤ᠋ ᠪᠠᠨ ᠬᠡᠷᠡᠭ ᠢ᠋ ᠪᠦᠲᠦᠭᠡᠭᠰᠡᠨ ᠶᠦ᠍ᠮ ᠭᠡᠨᠡ ᠪᠢᠯᠡ᠃ ᠲᠡᠭᠦᠨ ᠡᠴᠡ ᠥᠭᠡᠷᠡ ᠴᠠᠭ ᠲᠤ᠌ ᠪᠣᠯ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠳᠠᠭᠤ ᠴᠥᠭᠡᠬᠡᠨ ᠲᠡᠢ ᠠᠳᠠᠭᠠᠷ ᠵᠠᠩ ᠲᠠᠢ᠂ ᠬᠢᠬᠦ ᠶ᠋ᠢ ᠮᠡᠳᠡᠬᠦ ᠡᠴᠡ ᠪᠢᠰᠢ ᠬᠡᠯᠡᠬᠦ ᠶᠠᠷᠢᠬᠤ ᠶ᠋ᠢ ᠮᠠᠷᠲᠠᠭᠰᠠᠨ ᠶᠤᠮ ᠰᠢᠭ᠋ ᠬᠥᠮᠦᠨ᠂ ᠬᠠᠶᠠ ᠨᠤᠲᠤᠭ ᠤ᠋ᠨ ᠵᠠᠷᠢᠮ ᠬᠥᠭᠰᠢᠳ ᠵᠣᠵᠢ ᠰᠡᠷᠡᠭᠡᠨᠡᠩ ᠭᠡᠳᠡᠭ ᠶᠦ᠍ᠮ᠃ ᠴᠣᠬᠣᠮ ᠣᠪᠣᠭ ᠨᠢ ᠪᠣᠯ ᠭᠠᠯᠳᠠᠨ ᠶᠤᠮ ᠃ ᠵᠣᠵᠢ ᠭᠡᠳᠡᠭ ᠡᠨᠡ ᠬᠣᠴᠢ ᠶ᠋ᠢ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠳ᠋ᠤ᠌ ᠬᠣᠷᠢᠨ ᠬᠡᠳᠦᠨ ᠵᠢᠯ ᠦ᠋ᠨ ᠤᠷᠢᠳ ᠨᠤᠲᠤᠭ ᠤ᠋ᠨ ᠬᠢᠨᠢ ᠥᠭᠬᠦ ᠳ᠋ᠡᠭᠡᠨ ᠬᠢᠯᠢᠰᠲᠦᠭᠦᠯᠦᠭᠡ ᠦᠭᠡᠢ ᠶᠦ᠍ᠮ ᠭᠡᠨᠡ ᠪᠢᠯᠡ᠃
ᠰᠡᠷᠡᠭᠡᠨᠡᠩ ᠭᠤᠸᠠᠢ1924 ᠣᠨ ᠳ᠋ᠤ᠌21 ᠨᠠᠰᠤᠲᠠᠢ ᠭᠡᠷᠯᠡᠭᠡᠳ ᠴᠥᠭᠡᠨ ᠮᠠᠯ ᠲᠠᠢ ᠭᠡᠷ ᠪᠣᠯᠵᠤ ᠲᠠᠰᠤᠷᠠᠭᠠᠳ᠂ ᠰᠤᠮᠤ ᠶ᠋ᠢᠨ ᠢᠶᠠᠨ ᠬᠠᠮᠤᠭ ᠤ᠋ᠨ ᠵᠡᠭᠦᠨ ᠤᠷᠲᠤ ᠲᠠᠯᠠ ᠶ᠋ᠢᠨ ᠵᠡᠯᠢᠭᠦᠳ ᠨᠤᠲᠤᠭ《 ᠰᠢᠷᠠ ᠰᠢᠪᠠᠭᠤᠲᠤ ᠶ᠋ᠢᠨ ᠠᠮᠠ》 ᠭᠡᠳᠡᠭ ᠲᠦ᠍ ᠭᠠᠭᠴᠠ ᠪᠡᠶᠡ ᠪᠡᠷ ᠢᠶᠠᠨ ᠭᠤᠴᠢᠭᠠᠳ ᠵᠢᠯ ᠪᠣᠯᠵᠠᠢ᠃ ᠰᠢᠷᠠ ᠰᠢᠪᠠᠭᠤᠲᠤ ᠶ᠋ᠢᠨ ᠠᠷᠤ ᠭᠡᠳᠡᠭ ᠠᠷᠤ ᠳ᠋ᠠᠭᠠᠨ ᠮᠣᠳᠣ ᠲᠠᠢ ᠬᠣᠢᠲᠤ ᠥᠪᠥᠷ ᠨᠢ ᠥᠨᠳᠥᠷ ᠴᠣᠬᠢᠶᠠ ᠬᠠᠳᠠ ᠲᠠᠢ᠂ ᠠᠮᠠ ᠪᠠᠨ ᠥᠭᠰᠥᠬᠡᠷ ᠬᠠᠪᠴᠢᠭᠤ᠂ ᠨᠥᠮᠥᠷᠢ ᠶᠡᠬᠡ ᠲᠡᠢ ᠳᠤᠯᠠᠭᠠᠨ ᠡᠪᠦᠯᠵᠢᠶᠡ ᠲᠡᠢ ᠠᠮᠠ ᠤᠷᠤᠭᠤᠳᠠᠬᠤ ᠪᠠᠷ ᠠᠭᠤᠵᠢᠷᠠᠵᠤ ᠲᠠᠯᠪᠢᠭᠤ ᠰᠡᠷᠢᠭᠦᠨ ᠪᠣᠯᠳᠠᠭ᠂ ᠵᠠᠳᠠᠭᠠᠢ ᠰᠠᠢᠬᠠᠨ ᠭᠣᠷᠣᠬᠠ ᠶ᠋ᠢᠨ ᠤᠰᠤ ᠲᠠᠢ ᠳᠥᠷᠪᠡᠨ ᠤᠯᠠᠷᠢᠯ ᠤ᠋ᠨ ᠪᠡᠯᠴᠢᠭᠡᠷ ᠪᠦᠷᠢᠳᠦᠭᠰᠡᠨ ᠨᠢᠭᠡ ᠰᠡᠷᠡᠭᠡᠨᠡᠩ ᠪᠠᠢᠲᠤᠭᠠᠢ ᠨᠢᠭᠡ ᠬᠡᠰᠡᠭ ᠰᠡᠷᠡᠭᠡᠨᠡᠩ ᠢ᠋ ᠪᠠᠭᠲᠠᠭᠠᠬᠤ ᠠᠮᠠ ᠶᠤᠮ ᠠ᠋᠃ ᠰᠡᠭᠦᠯ ᠦ᠋ᠨ ᠭᠤᠴᠢᠭᠠᠳ ᠵᠢᠯ ᠳ᠋ᠦ᠍ ᠡᠨᠡ ᠠᠮᠠ ᠳ᠋ᠤ᠌ ᠡᠳᠡᠨ ᠦ᠌ ᠬᠢᠨ ᠡᠴᠡ ᠥᠭᠡᠷᠡ ᠨᠢᠭᠡ ᠴᠦ᠍ ᠠᠢᠯ ᠪᠠᠢᠭᠠ ᠦᠭᠡᠢ ᠤᠴᠢᠷ ᠨᠢ ᠨᠢᠭᠡ ᠳ᠋ᠦ᠍ ᠵᠡᠯᠢᠭᠦᠳ ᠬᠣᠯᠠ᠂ ᠬᠣᠶᠠᠷ ᠲᠤ᠌ ᠵᠣᠵᠢᠭ ᠰᠡᠷᠡᠭᠡᠨᠡᠩ ᠦ᠋ᠨ ᠬᠢ ᠲᠡᠨᠳᠡ ᠡᠵᠡᠩᠨᠡᠨ ᠪᠠᠢᠳᠠᠭ ᠶᠤᠮ ᠭᠡᠳᠡᠭ ᠡᠴᠡ ᠳᠤᠷᠠ ᠦᠭᠡᠢᠴᠡᠳᠡᠭ ᠶᠦ᠍ᠮ ᠰᠠᠨᠵᠠᠢ᠃ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠶᠠᠭᠰᠢᠲᠠᠯᠠ ᠠᠮᠢ ᠪᠠᠨ ᠪᠣᠷᠣᠯᠠᠭᠤᠯᠳᠠᠭ ᠬᠥᠮᠦᠨ᠂ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠬᠥᠮᠦᠨ ᠳ᠋ᠦ᠍ ᠶᠠᠭᠤᠮᠠ ᠵᠢᠭᠡᠯᠡᠭᠦᠯᠵᠦ ᠲᠤᠰᠠ ᠬᠦᠷᠭᠡᠵᠦ ᠦᠵᠡᠭᠡ ᠦᠭᠡᠢ᠃ ᠡᠷᠢᠯ ᠦ᠋ᠨ ᠬᠥᠮᠦᠨ ᠳ᠋ᠦ᠍ ᠳᠣᠭᠣᠯᠭᠠᠵᠤ ᠰᠤᠷᠤᠭᠠ ᠦᠭᠡᠢ ᠬᠥᠮᠦᠨ᠂ ᠠᠵᠢᠯᠯᠠᠵᠤ ᠪᠠᠢᠭᠠ ᠬᠡᠳᠦ ᠡᠴᠡ ᠪᠡᠨ ᠠᠯᠳᠠᠵᠤ ᠬᠣᠯᠠᠳᠠᠵᠤ ᠦᠵᠡᠭᠡ ᠦᠭᠡᠢ ᠬᠥᠮᠦᠨ᠃ ᠡᠳᠡᠨ ᠦ᠌ ᠳ᠋ᠦ᠍ ᠬᠥᠯ ᠳᠠᠷᠤᠵᠤ ᠠᠢᠯᠴᠢᠳ ᠬᠣᠨᠣᠴᠠ ᠡᠷᠢᠳᠡᠭ ᠦᠭᠡᠢ ᠰᠢᠬᠠᠮ᠂ ᠬᠥᠭᠵᠢᠶᠡᠨ ᠨᠠᠢᠷ ᠨᠠᠭᠠᠳᠤᠮ ᠬᠢᠳᠡᠭ ᠦᠭᠡᠢ᠂ ᠡᠬᠡᠨᠡᠷ ᠥᠬᠢᠨ ᠬᠣᠶᠠᠷ ᠲᠠᠢ ᠪᠠᠨ ᠭᠤᠷᠪᠠᠭᠤᠯᠠ ᠪᠠᠨ ᠡᠨᠡ ᠠᠮᠠ ᠳ᠋ᠤ᠌ ᠨᠠᠮ ᠭᠦᠮ ᠠᠮᠢᠳᠤᠷᠠᠬᠤ ᠳ᠋ᠠᠭᠠᠨ ᠮᠠᠯ ᠭᠡᠪᠡᠯ ᠠᠷᠭᠠᠮᠵᠢᠶᠠᠨ ᠬᠣᠶᠠᠷ᠂ ᠰᠠᠢᠨ ᠡᠮᠡᠭᠡᠯ ᠦ᠋ᠨ ᠭᠤᠷᠪᠠ᠂ ᠪᠦᠭᠦᠳᠡ ᠲᠠᠪᠤᠨ ᠮᠣᠷᠢ ᠲᠠᠢ᠂ ᠬᠠᠷᠠ ᠬᠦᠷᠡᠩ ᠬᠢᠯᠢᠩ ᠢ᠋ᠶ᠋ᠡᠷ ᠪᠦᠲᠦᠭᠡᠴᠢᠬᠡᠭᠰᠡᠨ ᠦᠬᠡᠷ ᠴᠢᠯᠠᠭᠤ ᠰᠢᠭ᠋ ᠠᠷᠪᠠᠭᠠᠳ ᠭᠢᠯᠲᠠᠭᠠᠷ ᠬᠠᠢᠨᠤᠭ ᠰᠢᠷᠠ ᠲᠡᠷᠭᠡ ᠲᠡᠢ᠂ ᠰᠢᠯᠢᠭᠡᠳ ᠪᠠᠢᠬᠤ ᠶ᠋ᠢᠨ ᠬᠡᠷᠡᠭ ᠦᠭᠡᠢ ᠵᠢᠭᠳᠡᠬᠡᠨ ᠪᠥᠭᠡᠷᠡᠩᠬᠡᠢ ᠭᠤᠷᠪᠠᠨ ᠵᠠᠭᠤᠭᠠᠳ ᠬᠣᠨᠢ ᠲᠠᠢ( ᠦᠷᠡᠵᠢᠯᠡ ᠭᠡᠳ ᠣᠯᠠᠰᠢᠷᠠᠳᠠᠭ ᠦᠭᠡᠢ᠂ ᠦᠬᠦᠯᠡ ᠭᠡᠳ ᠴᠥᠭᠡᠷᠡᠳᠡᠭ ᠦᠭᠡᠢ) ᠡᠢᠮᠦ ᠯᠡ ᠲᠣᠭᠲᠠᠮᠠᠯ ᠮᠠᠯ ᠲᠠᠢ ᠠᠢᠯ ᠶᠤᠮ᠃ ᠨᠣᠭᠳᠠᠭᠰᠠᠨ ᠠᠯᠪᠠ ᠪᠠᠨ ᠦᠭᠡ ᠳᠠᠭᠤ ᠦᠭᠡᠢ ᠵᠠᠯᠭᠠᠭᠤᠯᠳᠠᠭ᠂ ᠨᠣᠣᠰᠣ ᠪᠠᠨ ᠬᠡᠮᠨᠡᠵᠦ ᠬᠤᠷᠠᠮᠳᠤᠭᠤᠯᠵᠤ ᠪᠠᠢᠭᠠᠳ ᠵᠢᠯ ᠥᠨᠵᠢᠭᠡᠳ ᠰᠡᠮᠬᠡᠨ ᠬᠡᠳᠦ ᠭᠤᠷᠪᠠᠨ ᠢᠰᠡᠭᠡᠢ ᠬᠢᠴᠢᠬᠡᠳᠡᠭ᠃ ᠡᠪ ᠨᠢ ᠲᠠᠭᠠᠷᠠᠪᠠᠯ ᠢᠯᠡᠭᠦᠳᠡᠭᠰᠡᠨ ᠡᠳ᠋ ᠮᠠᠯ ᠢ᠋ᠶ᠋ᠠᠨ ᠬᠣᠨᠵᠢᠶᠠ ᠬᠠᠷᠠᠯ ᠦᠭᠡᠢ ᠪᠣᠷᠣᠯᠠᠭᠤᠯᠴᠢᠬᠠᠳᠠᠭ ᠪᠣᠯᠬᠤ ᠠ᠋ᠴᠠ᠂ ᠠᠷᠠᠯᠵᠢᠶᠠ ᠮᠠᠢᠮᠠᠢ ᠬᠥᠭᠡᠭᠡᠴᠡᠯᠳᠦᠵᠦ ᠦᠵᠡᠭᠡ ᠴᠦ᠍ ᠦᠭᠡᠢ ᠬᠥᠮᠦᠨ᠃ ᠠᠷᠢᠬᠢ ᠨᠡᠬᠡᠭᠰᠡᠨ ᠦᠶᠡ ᠶ᠋ᠢᠨ ᠬᠥᠭᠰᠢᠳ ᠢᠷᠡᠪᠡᠯ ᠠᠷᠠᠢ ᠴᠤ᠌ ᠬᠣᠭᠣᠰᠣᠨ ᠰᠠᠭᠤᠬᠤ ᠦᠭᠡᠢ ᠪᠠᠭᠠ ᠮᠥᠷᠳᠡᠯᠡ ᠪᠡᠨ ᠤᠳᠠᠭᠰᠠᠨ ᠶᠠᠭ ᠦᠭᠡᠢ ᠬᠠᠲᠠᠭᠤ ᠶᠠᠭᠤᠮᠠ ᠠᠮᠰᠠᠭᠤᠯᠴᠢᠬᠠᠳᠠᠭ ᠠᠯᠮᠠᠢᠷᠠᠵᠤ ᠶᠠᠪᠤᠭᠠ ᠬᠠᠷᠠᠴᠤᠤᠯ ᠢᠷᠡᠭᠡᠳ ᠱᠤᠤᠭᠢᠬᠤ ᠭᠡᠪᠡᠯ ᠠᠳᠠᠢᠷ ᠨᠢ ᠬᠥᠳᠡᠯᠦᠭᠡᠳ ᠭᠠᠷᠴᠤ ᠣᠷᠣᠵᠤ ᠳᠠᠭᠤ ᠦᠭᠡᠢ ᠰᠢᠷᠪᠢᠴᠢᠭᠰᠡᠭᠡᠷ ᠪᠠᠢᠭᠠᠳ ᠶᠠᠪᠤᠭᠤᠯᠴᠢᠬᠠᠳᠠᠭ ᠶᠤᠮ᠃ ᠶᠠᠮᠠᠷ ᠪᠠᠢᠲᠠᠯᠠ ᠪᠠᠨ ᠭᠠᠭᠴᠠ ᠥᠬᠢᠨ ᠨᠢ ᠭᠤᠴᠢᠨ ᠬᠣᠶᠠᠷ ᠬᠦᠷᠦᠭᠰᠡᠨ ᠬᠣᠢᠨᠠ ᠪᠠᠨ ᠠᠷᠠᠢ ᠭᠡᠵᠦ ᠨᠢᠭᠡ ᠬᠥᠮᠦᠨ ᠲᠡᠢ ᠪᠣᠯᠵᠤ ᠰᠢᠷᠠ ᠰᠢᠪᠠᠭᠤᠲᠤ ᠶ᠋ᠢᠨ ᠠᠮᠠ ᠬᠣᠶᠠᠷ ᠭᠡᠷ ᠠᠢᠯ ᠲᠠᠢ ᠪᠣᠯᠬᠤ ᠪᠣᠢ ᠳᠠ᠃ ᠭᠡᠬᠦ ᠳ᠋ᠡᠭᠡᠨ ᠳᠠᠭᠤ ᠦᠭᠡᠢ ᠪᠡᠨ ᠣᠯᠤᠨᠠ ᠭᠡᠭᠴᠢ ᠪᠡᠷ ᠴᠠᠭᠠᠨᠠ ᠪᠠᠨ ᠬᠠᠮᠢᠶᠠᠲᠠᠨ ᠰᠠᠳᠤᠨ ᠤ᠋ ᠲᠦᠯᠬᠢᠯᠡᠭᠡ ᠪᠠᠭᠠ ᠲᠠᠢ᠂ ᠬᠥᠯ ᠬᠥᠭᠵᠢᠶᠡ ᠴᠥᠭᠡᠨ ᠲᠡᠢ᠃ ᠠᠵᠢᠯ ᠳ᠋ᠤ᠌ ᠵᠢᠳᠬᠦᠬᠦ ᠨᠢ ᠠᠳᠤᠭᠤ ᠰᠢᠭ᠋᠂ ᠠᠮᠠ ᠳᠤᠤᠭᠠᠷᠬᠤ ᠨᠢ ᠵᠢᠭᠠᠰᠤ ᠰᠢᠭ᠋ ᠬᠦᠷᠭᠡᠨ ᠣᠯᠵᠤ ᠠᠪᠤᠭᠰᠠᠨ ᠭᠡᠵᠢ ᠁
ᠡᠢᠮᠦ ᠬᠥᠮᠦᠨ ᠢ᠋ ᠴᠢᠨᠢ ᠵᠣᠵᠢᠭ ᠭᠡᠬᠦ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ᠳᠠ᠃ ᠬᠠᠷᠢᠨ1958 ᠣᠨ ᠳ᠋ᠤ᠌ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠶ᠋ᠢ ᠨᠢᠭᠡᠳᠦᠯ ᠦ᠋ᠨ ᠲᠡᠷᠢᠭᠦᠨ ᠦ᠌ ᠰᠠᠢᠴᠤᠤᠯ ᠤ᠋ᠨ ᠨᠢᠭᠡ ᠭᠡᠵᠦ ᠨᠡᠷᠡᠯᠡᠭᠳᠡᠨ ᠮᠠᠨᠳᠤᠵᠤ ᠡᠬᠢᠯᠡᠭᠰᠡᠨ ᠡᠴᠡ ᠬᠣᠢᠰᠢ ᠵᠣᠵᠢ ᠭᠡᠵᠦ ᠬᠣᠴᠢᠯᠠᠬᠤ ᠪᠠᠨ ᠪᠠᠭᠠ ᠪᠣᠯᠢᠵᠠᠢ᠃ ᠪᠣᠯᠢᠬᠤ ᠦᠭᠡᠢ ᠴᠦ᠍ ᠶᠠᠭᠠᠬᠢᠬᠤᠪ᠃1950 ᠣᠨ ᠳ᠋ᠤ᠌ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠠᠩᠬᠠ ᠨᠢᠭᠡᠳᠦᠯ ᠳ᠋ᠦ᠍ ᠡᠯᠰᠡᠵᠦ ᠭᠡᠨᠡ᠂ ᠮᠥᠨ ᠬᠠᠴᠢᠨ ᠶᠠᠭᠤᠮᠠ ᠭᠡᠵᠦ ᠶᠣᠰᠣᠲᠠᠢ ᠨᠥᠭᠥᠭᠡ ᠡᠷᠡ ᠦᠬᠡᠷ ᠲᠤᠭᠤᠯᠯᠠᠵᠤ᠂ ᠡᠪᠡᠷᠳᠡᠢ ᠲᠠᠤᠯᠠᠢ ᠦᠵᠡᠭᠳᠡᠵᠦ ᠭᠡᠳᠡᠭ ᠴᠢᠨᠢ ᠪᠣᠯᠵᠤ ᠳᠠ ᠭᠡᠯᠴᠡᠵᠦ ᠭᠠᠢᠬᠠᠵᠤ ᠱᠤᠤᠭᠢᠯᠳᠤᠭᠰᠠᠨ ᠭᠡᠨᠡ ᠪᠢᠯᠡ᠃
ᠨᠢᠭᠡᠳᠦᠯ ᠳ᠋ᠦ᠍ ᠣᠷᠣᠭᠠᠳ ᠡᠬᠢᠨ ᠦ ᠬᠡᠳᠦᠨ ᠵᠢᠯ ᠮᠥᠨ ᠯᠡ ᠵᠣᠵᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠶᠠᠪᠤᠭᠰᠠᠨ ᠶᠤᠮ᠃ ᠶᠠᠮᠠᠷ ᠰᠠᠢᠨ ᠳ᠋ᠠᠭᠠᠨ ᠶᠠᠮᠠᠷ ᠮᠠᠯ ᠠᠪᠬᠤ ᠪᠣᠢ ᠭᠡᠬᠦ ᠳ᠋ᠦ᠍ᠨᠢ《 ᠵᠠ ᠪᠢ ᠴᠦ᠍ ᠢᠮᠠᠭᠠ᠂ ᠮᠣᠩᠭᠣᠯ ᠦᠬᠡᠷ ᠬᠣᠶᠠᠷ ᠲᠤ᠌ ᠯᠠ ᠶᠠᠰᠤ ᠠ᠋ᠴᠠ ᠪᠠᠨ ᠳᠤᠷᠠ ᠦᠭᠡᠢ ᠳᠡ᠂ ᠠᠳᠤᠭᠤ ᠲᠡᠮᠡᠭᠡ ᠮᠠᠯᠯᠠᠵᠤ ᠦᠵᠡᠭᠡ ᠦᠭᠡᠢ ᠳᠡ᠂ ᠨᠤᠲᠤᠭ ᠪᠠᠢᠳᠠᠯ ᠨᠢ ᠲᠠᠭᠠᠷᠠᠬᠤ ᠶᠤᠮ ᠪᠣᠯ ᠬᠤᠴᠠ ᠯᠠ ᠠᠪᠬᠤ ᠤᠤ ᠳᠠ》 ᠭᠡᠵᠦ ᠬᠤᠴᠠ ᠬᠠᠷᠢᠭᠤᠯᠤᠭᠰᠠᠨ ᠴᠢᠨᠢ ᠵᠣᠵᠢᠭ ᠤ᠋ᠨ ᠮᠠᠯᠯᠠᠳᠠᠭ ᠮᠠᠯ ᠮᠥᠨ ᠳᠡ ᠭᠡᠵᠦ ᠨᠤᠲᠤᠭ ᠤ᠋ᠨ ᠬᠢᠨ ᠪᠠᠬᠠ ᠲᠠᠪᠠ ᠨᠢ ᠬᠠᠨᠤᠭᠰᠠᠨ ᠶᠤᠮ ᠭᠡᠨᠡ ᠪᠢᠯᠡ᠃ ᠡᠨᠡ ᠱᠤᠤᠭᠢᠶᠠᠨ ᠢ᠋ ᠠᠪᠠᠭᠠᠢ ᠨᠢ ᠳᠠᠮ ᠳᠤᠭᠤᠯᠤᠭᠠᠳ ᠥᠭᠦᠯᠡᠵᠦ ᠭᠡᠨᠡ᠂ ᠬᠦᠷᠭᠡᠨ ᠥᠬᠢᠨ ᠬᠣᠶᠠᠷ ᠤ᠋ᠨ ᠢᠶᠡᠨ ᠨᠡᠷᠡ ᠶ᠋ᠢ ᠪᠣᠳᠣᠵᠤ ᠭᠡᠨᠡ᠂ ᠬᠣᠢᠲᠤ ᠵᠢᠯ ᠨᠢ ᠤᠯᠤᠰ ᠤ᠋ᠨ ᠪᠡᠯᠡᠳᠬᠡᠯ ᠥᠭᠬᠦ ᠡᠷᠡ ᠬᠣᠨᠢ ᠵᠢᠷᠭᠤᠭᠠᠨ ᠵᠠᠭᠤ ᠶ᠋ᠢ ᠬᠦᠷᠭᠡᠨ ᠲᠡᠢ ᠪᠡᠨ ᠬᠣᠶᠠᠭᠤᠯᠠ ᠪᠠᠨ ᠠᠪᠴᠤ ᠮᠠᠯᠯᠠᠭᠠᠳ ᠰᠡᠲᠡᠷ ᠲᠡᠢ ᠢᠷᠭᠡ ᠰᠢᠭ ᠪᠣᠯᠭᠭᠳ ᠲᠤᠰᠢᠶᠠᠭᠰᠠᠨ ᠴᠢᠨᠢ ᠨᠢᠭᠡᠳᠦᠯ ᠳ᠋ᠡᠭᠡᠨ ᠲᠤᠰᠠ ᠲᠠᠢ᠂ ᠥᠪᠡᠷ ᠲᠡᠭᠡᠨ ᠴᠦ᠍ ᠠᠰᠢᠭᠲᠠᠢ ᠪᠣᠯᠵᠤ ᠤᠷᠮᠠ ᠵᠣᠷᠢᠭ ᠣᠷᠣᠭᠰᠠᠨ ᠠ᠋ᠴᠠ ᠬᠣᠢᠰᠢ ᠠᠵᠢᠯ ᠤ᠋ᠨ ᠪᠡᠷᠬᠡᠰᠢᠶᠡᠯ ᠢ᠋ ᠬᠠᠢᠬᠤᠷᠬᠤ ᠦᠭᠡᠢ ᠨᠢᠭᠡᠳᠦᠯ ᠶᠠᠭᠤ ᠯᠠ ᠥᠭᠪᠡᠯ ᠲᠡᠭᠦᠨ ᠢ᠋ ᠨᠢ ᠬᠢᠭᠰᠡᠭᠡᠷ ᠮᠠᠯᠯᠠᠭᠰᠠᠭᠠᠷ ᠰᠡᠭᠦᠯ ᠳ᠋ᠡᠭᠡᠨ ᠲᠠᠪᠤᠨ ᠵᠠᠭᠤᠨ ᠥᠬᠢᠨ ᠬᠤᠷᠠᠭᠠ ᠪᠣᠢᠵᠢᠬᠤᠯᠤᠭᠠᠳ ᠲᠥᠯ ᠠᠪᠬᠤ ᠵᠢᠱ᠌ᠢᠶᠡ ᠲᠡᠢ ᠲᠦᠪᠡᠭᠲᠡᠢ ᠠᠵᠢᠯ ᠤ᠋ᠳ ᠢ᠋ ᠨᠢ ᠭᠠᠷᠮᠠᠭᠠᠢ ᠬᠢᠳᠡᠭ ᠪᠣᠯᠵᠠᠢ᠃ ᠭᠡᠬᠦ ᠳ᠋ᠦ᠍ ᠯᠡ ᠡᠳᠡᠨ ᠦ᠌ ᠬᠢ ᠣᠳᠣ ᠬᠦᠷᠲᠡᠯᠡ ᠰᠢᠷᠠ ᠰᠢᠪᠠᠭᠤᠲᠤ ᠶ᠋ᠢᠨ ᠢ᠋ᠶ᠋ᠡᠷ ᠠᠮᠠᠨ ᠳ᠋ᠤ᠌ ᠰᠢᠦ ᠳᠡ᠃
ᠪᠢ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠶ᠋ᠢᠨ ᠬᠤᠪᠢ ᠶ᠋ᠢᠨ ᠵᠠᠩ ᠴᠢᠨᠠᠷ ᠤ᠋ᠨ ᠲᠤᠬᠠᠢ ᠶᠠᠷᠢᠭᠰᠠᠭᠠᠷ ᠪᠠᠢᠭᠠᠳ ᠲᠠ ᠪᠦᠬᠦᠨ ᠳ᠋ᠦ᠍ ᠬᠡᠯᠡᠬᠦ ᠭᠡᠰᠡᠨ ᠫᠢᠶᠠᠩ ᠠ᠋ᠴᠠ ᠪᠠᠨ ᠬᠣᠯᠠᠳᠠᠴᠢᠬᠠᠯᠠ᠂ ᠠᠭᠤᠴᠢᠯᠠᠭᠠᠷᠠᠢ᠂ ᠣᠳᠣ ᠪᠤᠴᠠᠯᠠ᠃
1954 ᠣᠨ ᠳ᠋ᠤ᠌ ᠨᠢᠭᠡᠳᠦᠯ ᠦ᠋ᠨ ᠲᠥᠪ ᠳᠡᠭᠡᠷᠡ《DC—9》 ᠭᠡᠳᠡᠭ ᠴᠠᠬᠢᠯᠭᠠᠨ ᠰᠲ᠋ᠠᠨᠼ ᠲᠠᠯᠪᠢᠴᠢᠬᠠᠭᠠᠳ ᠳᠣᠯᠣᠳᠤᠭᠠᠷ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠤ᠋ ᠣᠷᠣᠢ ᠰᠢᠨᠡ ᠰᠲ᠋ᠠᠨᠼ ᠢ᠋ᠶ᠋ᠠᠨ ᠠᠵᠢᠯᠯᠠᠭᠤᠯᠵᠠᠢ᠃ ᠰᠢᠨᠡ ᠺᠯᠤᠪ ᠢ᠋ᠶ᠋ᠠᠨ ᠨᠡᠭᠡᠭᠡᠵᠦ ᠴᠠᠬᠢᠯᠭᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠪᠠᠶᠠᠷ ᠤ᠋ᠨ ᠬᠤᠷᠠᠯ ᠢ᠋ᠶ᠋ᠠᠨ ᠬᠢᠵᠦ ᠺᠣᠨᠼᠧᠷᠲ ① ᠢ᠋ᠶ᠋ᠡᠨ ᠲᠣᠭᠯᠠᠵᠤ ᠨᠢᠵᠢᠭᠡᠷ ᠨᠠᠭᠠᠳᠤᠮ ᠬᠢᠬᠦ ᠪᠡᠷ ᠲᠥᠯᠥᠪᠯᠡᠭᠡᠳ᠂ ᠳᠣᠯᠣᠳᠤᠭᠠᠷ ᠰᠠᠷᠠ ᠶ᠋ᠢᠨ ᠨᠢᠭᠡᠨ ᠬᠦᠷᠲᠡᠯᠡ ᠡᠷᠪᠡᠢᠬᠦ ᠳᠡᠷᠪᠡᠢᠬᠦ ᠪᠡᠷ ᠬᠥᠳᠡᠯᠵᠡᠢ᠃ ᠭᠡᠲᠡᠯᠡ ᠴᠢᠳᠧᠩ ᠦ᠋ᠨ ᠰᠢᠯ ᠣᠯᠳᠠᠬᠤ ᠦᠭᠡᠢ ᠡᠷᠢᠵᠦ ᠳᠠᠪᠬᠢᠯᠳᠤᠭᠠᠳ ᠪᠦᠲᠦᠭᠰᠡᠨ ᠦᠭᠡᠢ ᠴᠢᠬᠤᠯᠳᠠᠵᠠᠭᠠᠵᠤ ᠡᠯᠪᠡᠭ ᠪᠠᠢᠬᠤ ᠳ᠋ᠤ᠌ ᠠᠪᠤᠭᠠᠳ ᠳᠠᠯᠳᠠ ᠬᠢᠴᠢᠬᠡᠬᠦ ᠨᠢ ᠶᠠᠭᠠᠬᠢᠯᠠ ᠭᠡᠵᠦ ᠳᠠᠷᠤᠭᠠ ᠨᠢ ᠣᠷᠣᠯᠠᠭᠴᠢ ᠪᠠᠨ ᠣᠷᠣᠯᠠᠭᠴᠢ ᠨᠢ ᠨᠢᠭᠲᠠᠯᠠᠨ ᠢ᠋ᠶ᠋ᠠᠨ᠂ ᠨᠢᠭᠲᠠᠯᠠᠨ ᠨᠢ ᠠᠵᠤ ᠠᠬᠤᠢ ᠶ᠋ᠢᠨ ᠡᠷᠬᠢᠯᠡᠭᠴᠢ ᠪᠡᠨ᠂ ᠡᠷᠬᠢᠯᠡᠭᠴᠢ ᠨᠢ ᠪᠠᠷᠠᠭᠠᠨ ᠤ᠋ ᠠᠬᠧᠨ᠋ᠲ② ᠢᠶᠠᠨ ᠵᠢᠮᠡᠯᠡᠯᠴᠡᠵᠦ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠲᠡᠷᠡ ᠦᠶᠡ ᠳ᠋ᠦ᠍ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠬᠥᠲᠥᠯᠦᠭᠡ ᠮᠣᠷᠢᠨ ᠳ᠋ᠤ᠌ ᠬᠣᠶᠠᠷ ᠬᠠᠢᠷᠴᠠᠭ ᠲᠠᠢ ᠶᠠᠭᠤᠮᠠ ᠲᠡᠩᠨᠡᠵᠦ ᠱᠣᠭᠰᠢᠭᠤᠯᠤᠨ ᠢᠷᠡᠭᠡᠳ ᠨᠢᠭᠡᠳᠦᠯ ᠦ᠋ᠨ ᠺᠣᠨᠲ᠋ᠣᠷ( ᠠᠯᠪᠠᠨ ᠭᠡᠷ) ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᠪᠠᠭᠤᠯᠭᠠᠪᠠ᠃ ᠴᠢᠳᠧᠩ ᠦ᠋ᠨ ᠰᠢᠯ( ᠫᠣᠣᠰᠠ) ᠶ᠋ᠢᠨ ᠪᠣᠳᠣᠯ ᠪᠣᠯᠤᠭᠰᠠᠨ ᠠᠵᠤ ᠠᠬᠤᠢ ᠶ᠋ᠢᠨ ᠡᠷᠬᠢᠯᠡᠭᠴᠢ ᠮᠠᠯ ᠭᠠᠢᠬᠠᠵᠤ ᠳᠡᠮᠡᠢ ᠯᠡ ᠴᠣᠩᠬᠣ ᠪᠠᠷ ᠢ᠋ᠶ᠋ᠠᠨ ᠬᠦᠯᠢᠶᠡᠵᠦ ᠪᠠᠢᠭᠠᠳ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠶ᠋ᠢ ᠡᠨᠡ ᠵᠣᠵᠢ ᠪᠠᠰᠠ ᠯᠠ ᠶᠠᠭᠤ ᠱᠠᠭᠠᠷᠳᠠᠬᠤ ᠭᠡᠵᠦ ᠠᠪᠳᠠᠷᠠ ᠰᠠᠪᠠ ᠪᠠᠨ ᠠᠴᠢᠭᠠᠳ ᠢᠷᠡᠵᠦ ᠪᠠᠢᠭᠠ ᠶᠤᠮ ᠪᠣᠯ ᠳᠠ ᠭᠡᠵᠦ ᠳᠣᠲᠣᠷᠠ ᠪᠠᠨ ᠵᠢᠪᠡᠭᠦᠴᠡᠨ ᠪᠠᠢᠲᠠᠯᠠ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠬᠣᠶᠠᠷ ᠠᠪᠳᠠᠷᠠ ᠶ᠋ᠢ ᠨᠢᠭᠡ ᠨᠢᠭᠡ ᠭᠠᠷ ᠲᠠᠭᠠᠨ ᠪᠠᠷᠢᠵᠤ ᠲᠡᠭᠦᠷᠲᠦᠭᠰᠡᠭᠡᠷ ᠬᠠᠭᠠᠯᠭᠠ ᠳᠡᠯᠭᠡᠨ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠲᠡᠭᠦᠨ ᠢ᠋ ᠲᠠᠭᠠᠯᠠᠮᠵᠢᠲᠠᠢ ᠨᠢᠳᠦ ᠪᠡᠷ ᠬᠠᠷᠠᠵᠤ ᠬᠦᠯᠢᠶᠡᠭᠰᠡᠨ ᠬᠥᠮᠦᠨ ᠨᠢᠭᠡ ᠴᠦ᠍ ᠪᠠᠢᠭᠰᠠᠨ ᠦᠭᠡᠢ ᠴᠥᠮ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠭᠠᠷ ᠪᠠᠢᠵᠠᠢ᠃ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠰᠡᠭᠦᠯᠳᠡᠵᠦ ᠳᠤᠤᠭᠠᠷᠳᠠᠭ ᠪᠠᠷᠢᠯ ᠲᠠᠢ ᠬᠥᠮᠦᠨ ᠬᠣᠢᠨᠠ ᠣᠷᠣᠭᠰᠠᠨ ᠳᠠᠷᠤᠢ ᠳ᠋ᠠᠭᠠᠨ ᠣᠯᠠᠨ ᠶᠠᠭᠤᠮᠠ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ ᠮᠡᠨᠳᠦᠴᠢᠯᠡᠭᠡᠳ ᠰᠠᠭᠤᠵᠤ ᠭᠠᠩᠰᠠ ᠲᠠᠮᠠᠬᠢ ᠪᠠᠨ ᠭᠠᠷᠭᠠᠭᠠᠳ ᠨᠡᠷᠡᠵᠦ ᠡᠬᠢᠯᠡᠪᠡ᠃ ᠭᠡᠲᠡᠯᠡ ᠠᠵᠤ ᠠᠬᠤᠢ ᠶ᠋ᠢᠨ ᠱᠠᠭᠠᠷᠳᠠᠯᠭᠠᠨ ᠳ᠋ᠤ᠌ ᠠᠭᠳᠠᠭᠤᠨ ᠪᠣᠯᠴᠢᠬᠠᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠵᠤ ᠠᠬᠤᠢ ᠶ᠋ᠢᠨ ᠡᠷᠬᠢᠯᠡᠭᠴᠢ ᠲᠦᠷᠦᠭᠦᠯᠡᠨ ᠠᠮᠠ ᠨᠡᠭᠡᠭᠡᠵᠡᠢ᠃
– – – –
① ᠤᠷᠠᠨ ᠰᠠᠢᠬᠠᠨ ᠤ᠋ ᠲᠣᠭᠯᠠᠯᠲᠠ
② ᠵᠥᠭᠡᠭᠡᠪᠦᠷᠢ ᠶ᠋ᠢᠨ ᠬᠤᠳᠠᠯᠳᠤᠭᠴᠢ
— ᠵᠠ᠂ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠶᠠᠭᠤ ᠯᠠ ᠭᠡᠵᠦ ᠶᠠᠪᠤᠨᠠ ᠳ᠋ᠠ ᠭᠡᠪᠡ᠃
ᠰᠡᠷᠡᠬᠡᠨᠡᠩ ᠭᠤᠸᠠᠢ ᠨᠢᠭᠡ ᠨᠡᠷᠡᠵᠦ ᠠᠰᠠᠭᠠᠵᠤ ᠠᠪᠤᠭᠰᠠᠨ ᠲᠠᠮᠠᠬᠢ ᠪᠠᠨ ᠬᠡᠳᠦ ᠰᠣᠷᠣᠵᠤ ᠰᠢᠪᠰᠢᠵᠦ ᠭᠦᠢᠴᠡᠭᠡᠳ ᠡᠰᠢ ᠮᠤᠬᠤᠷ ᠦᠭᠡᠢ ᠯᠡ᠄
— ᠴᠢᠳᠧᠩ ᠦ᠋ᠨ ᠰᠢᠯ ᠠᠪᠴᠢᠷᠠᠯᠠ ᠭᠡᠵᠦ ᠵᠥᠭᠡᠯᠡᠨ ᠳᠤᠤᠭᠠᠷᠪᠠ᠃ ᠡᠨᠡ ᠦᠭᠡ ᠲᠡᠷᠡ ᠥᠷᠥᠭᠡᠨ ᠳᠣᠲᠣᠷᠠ ᠪᠠᠢᠭᠰᠠᠨ ᠬᠥᠮᠦᠰ ᠦ᠋ᠨ ᠳᠣᠲᠣᠷᠠ ᠶ᠋ᠢ ᠦᠨᠡᠬᠡᠷ ᠴᠢᠳᠧᠩ ᠠᠰᠠᠭᠠᠬᠤ ᠰᠢᠭ᠋ ᠪᠣᠯᠪᠠ᠃
— ᠲᠠᠯᠠ ᠪᠦᠷᠢ ᠲᠡᠢᠰᠢ ᠨᠢ ᠰᠤᠷᠠᠭ ᠲᠠᠯᠪᠢᠵᠤ ᠬᠦᠷᠰᠢ ᠨᠢᠭᠡᠳᠦᠯ ᠡᠴᠡ ᠵᠢᠭᠡᠯᠡᠳᠤᠭᠤᠯᠦᠭᠴᠢ ᠭᠡᠵᠦ ᠭᠤᠶᠤᠵᠤ ᠳᠠᠪᠬᠢᠯᠳᠤᠭᠰᠠᠨ ᠠᠯᠪᠠᠷᠬᠠᠤ ᠬᠤᠳᠠᠯᠳᠤᠭᠠᠴᠢᠳ ᠤ᠋ᠨ ᠳᠣᠲᠣᠷᠠ ᠲᠥᠷᠥᠭᠰᠡᠨ ᠪᠣᠳᠣᠯ ᠢ᠋ ᠠᠮᠠ ᠲᠦᠷᠭᠡᠨ ᠲᠡᠢ ᠪᠡᠷ ᠢᠶᠠᠨ᠄
— ᠬᠠᠮᠢᠭᠠ ᠠ᠋ᠴᠠ ᠬᠡᠨ ᠶᠠᠪᠤᠭᠤᠯᠪᠠ ᠭᠡᠵᠦ ᠠᠵᠤ ᠠᠬᠤᠢ ᠡᠷᠬᠢᠯᠡᠭᠴᠢ ᠢᠯᠡᠷᠡᠭᠦᠯᠪᠡ᠃ ᠰᠡᠷᠡᠬᠡᠨᠡᠩ ᠭᠤᠸᠠᠢ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠣᠭᠲᠣ ᠶᠠᠭᠤᠮᠠ ᠪᠣᠳᠣᠭᠰᠠᠨ ᠦᠭᠡᠢ᠃
— ᠪᠢ ᠨᠢᠭᠡᠳᠦᠯ ᠡᠴᠡ ᠥᠭᠴᠦ ᠪᠠᠢᠭᠠ ᠶᠤᠮ ᠠ᠋᠂ ᠬᠡᠷᠡᠭ ᠪᠣᠯᠵᠤ ᠮᠠᠭᠠᠳ ᠦᠭᠡᠢ᠂ ᠰᠲ᠋ᠠᠨᠼ ᠲᠠᠢ ᠪᠣᠯᠵᠤ ᠪᠠᠢᠭᠠ ᠭᠡᠵᠦ ᠲᠤᠭᠤᠯᠤᠭᠰᠠᠨ ᠶᠤᠮ ᠭᠡᠵᠦ ᠣᠭᠲᠣ ᠲᠣᠭᠯᠠᠭᠠᠮ ᠨᠠᠭᠠᠳᠤᠮ ᠬᠢᠭᠰᠡᠨ ᠰᠢᠨᠵᠢ ᠦᠭᠡᠢ ᠬᠡᠯᠡᠭᠡᠳ ᠪᠤᠭᠤᠷᠤᠯ ᠳᠥᠨᠵᠢᠨ ᠲᠣᠯᠣᠭᠠᠢ ᠪᠠᠨ ᠣᠷᠣᠢ ᠳᠡᠭᠡᠷᠡ ᠡᠴᠡ ᠨᠢ ᠤᠷᠤᠭᠰᠢ ᠨᠢ ᠡᠬᠢᠯᠡᠨ ᠨᠢᠭᠤᠷ ᠡᠷᠡᠦ ᠪᠡᠨ ᠰᠢᠪᠲᠤᠷᠠᠲᠠᠯᠠ ᠤᠰᠤ ᠶ᠋ᠢ ᠨᠢ ᠰᠢᠪᠬᠠᠷᠴᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠰᠢᠲᠦᠷᠦᠨ ᠢᠯᠢᠪᠡ᠃ ᠳᠠᠷᠤᠭᠠ ᠨᠠᠷ ᠤ᠋ᠨ ᠮᠠᠨᠢ ᠴᠢᠷᠠᠢ ᠳ᠋ᠤ᠌ ᠮᠥᠨ ᠯᠡ ᠢᠲᠡᠭᠡᠭᠰᠡᠨ ᠰᠢᠨᠵᠢ ᠦᠭᠡᠢ ᠢᠨᠢᠶᠡᠮᠰᠦᠭᠯᠡᠯ ᠲᠣᠳᠣᠷᠠᠵᠠᠢ᠃
ᠨᠢᠭᠡᠳᠦᠯ ᠦ᠋ᠨ ᠳᠠᠷᠤᠭᠠ ᠶᠠᠭᠤ ᠴᠤ᠌ ᠪᠠᠢᠭᠰᠠᠨ ᠴᠢᠳᠧᠩ ᠦ᠋ᠨ ᠰᠢᠯ ᠲᠡᠢ ᠪᠣᠯᠤᠭᠰᠠᠨ ᠳ᠋ᠠᠭᠠᠨ ᠰᠡᠳᠬᠢᠯ ᠨᠢ ᠠᠮᠤᠰᠬᠢᠵᠦ ᠬᠦᠷᠦᠯᠴᠡᠭᠡ ᠨᠢ ᠶᠠᠭᠤ ᠶᠤᠮ ᠭᠡᠵᠦ ᠪᠣᠳᠣᠭᠠᠳ᠄
— ᠬᠡᠳᠦᠨ ᠰᠡᠷᠭᠡᠭ ᠶᠦᠮ ᠭᠡᠨᠡ᠂ ᠰᠡᠷᠡᠬᠡᠨᠡᠩ ᠭᠤᠸᠠᠢ? ᠭᠡᠵᠦ ᠠᠰᠠᠭᠤᠪᠠ᠃
— ᠨᠡᠢᠲᠡ ᠳ᠋ᠡᠭᠡᠨ ᠠᠷᠪᠠᠨ ᠯᠠ ᠶᠤᠮᠰᠠᠨ᠃ ᠨᠢᠭᠡ ᠠᠪᠳᠠᠷᠠ ᠳ᠋ᠤ᠌ ᠲᠠᠪᠢ ᠯᠠ ᠶᠤᠮ ᠳᠠ ᠭᠡᠵᠦ ᠵᠢᠱ᠌ᠢᠮ ᠴᠦ᠍ ᠦᠭᠡᠢ ᠬᠡᠯᠡᠬᠦ ᠳ᠋ᠦ᠍ ᠢᠨᠢᠶᠡᠳᠦ ᠮᠠᠭᠤᠲᠠᠢ ᠪᠠᠷ ᠢ᠋ᠶ᠋ᠠᠨ ᠨᠢᠭᠡᠳᠦᠯ ᠦ᠋ᠨ ᠣᠷᠣᠯᠠᠭᠴᠢ᠂ ᠡᠩᠸᠨ᠋ᠲ ᠬᠣᠶᠠᠷ ᠲᠡᠰᠦᠭᠰᠡᠨ ᠦᠭᠡᠢ ᠢᠨᠢᠶᠡᠵᠡᠭᠡᠪᠡ᠃ ᠨᠢᠭᠡᠳᠦᠯ ᠦ᠋ᠨ ᠳᠠᠷᠤᠭᠠ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠶ᠋ᠢ ᠨᠡᠯᠢᠶᠡᠳ ᠬᠡᠳᠦᠨ ᠵᠢᠯ ᠮᠡᠳᠡᠬᠦ ᠶᠤᠮᠰᠠᠨ᠂ ᠨᠢᠭᠡ ᠴᠦ᠍ ᠢᠩᠭᠢᠵᠦ ᠠᠯᠢᠶᠠᠯᠠᠵᠤ ᠪᠠᠢᠭᠠ ᠶ᠋ᠢ ᠨᠢ ᠦᠵᠡᠭᠡ ᠦᠭᠡᠢ᠂ ᠳᠠᠭᠤ ᠦᠭᠡᠢ ᠪᠠᠢᠵᠤ ᠪᠠᠢᠭᠠ ᠶᠡᠬᠡ ᠨᠠᠷᠭᠢᠶᠠᠨ ᠤ᠋ ᠬᠥᠭᠰᠢᠨ ᠶᠦᠮ᠂ ᠪᠢᠳᠡᠨ ᠢ᠋ ᠶᠠᠭ ᠡᠨᠡ ᠲᠤᠬᠠᠢ ᠶᠠᠷᠢᠯᠴᠠᠵᠤ ᠪᠠᠢᠭᠠ ᠶ᠋ᠢ ᠮᠡᠳᠡᠭᠡᠳ ᠠᠯᠢᠶᠠᠯᠠᠵᠤ ᠪᠠᠢᠨᠠ ᠮᠠᠨ ᠤ᠋ ᠡᠷᠡ᠃ ᠵᠠᠷᠢᠮ ᠳ᠋ᠠᠭᠠᠨ ᠳᠠᠭᠤ ᠦᠭᠡᠢ ᠬᠥᠮᠦᠰ ᠶᠡᠬᠡ ᠴᠢᠮᠡᠭᠡ ᠦᠭᠡᠢ ᠤᠰᠤᠨ ᠠᠯᠢᠶᠠ ᠪᠠᠢᠳᠠᠭ ᠭᠡᠵᠦ ᠪᠣᠳᠣᠭᠠᠳ ᠠᠮᠠ ᠨᠡᠭᠡᠭᠡᠬᠦ ᠭᠡᠲᠡᠯᠡ ᠬᠡᠨ ᠨᠢ ᠢᠩᠭᠢᠵᠦ ᠲᠤᠰᠠ ᠪᠣᠯᠪᠠ ᠭᠡᠳᠡᠭ ᠢ᠋ ᠲᠦᠷᠭᠡᠨ ᠮᠡᠳᠡᠬᠦ ᠭᠡᠰᠡᠨ ᠳ᠋ᠡᠭᠡᠨ᠄
— ᠨᠡᠭᠡᠷᠡᠨ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠮᠢᠨᠢ ᠬᠡᠨ ᠲᠠᠨ ᠢ᠋ᠶ᠋ᠠᠷ ᠶᠠᠪᠤᠭᠤᠯᠪᠠ ᠃ ᠲᠠᠨ ᠤ᠋ ᠴᠠᠭᠠᠳᠤ ᠵᠠᠬᠢᠶᠠᠯᠭᠠ ᠨᠢᠭᠡᠳᠦᠯ ᠦ᠋ᠨ ᠳᠠᠷᠤᠭᠠ ᠢᠳᠠᠮ ᠭᠤᠸᠠᠢ ᠤᠤ? ᠭᠡᠬᠦ ᠳ᠋ᠦ᠍ ᠰᠡᠷᠡᠬᠡᠨᠡᠩ ᠭᠤᠸᠠᠢ ᠨᠢᠭᠡ ᠮᠠᠭᠤᠬᠠᠨ ᠮᠦᠰᠢᠶᠡᠨ᠄
— ᠬᠤᠵᠢᠷᠲᠤ ᠶ᠋ᠢᠨ ᠬᠣᠷᠮᠣᠢ᠂ ᠵᠢᠭᠮᠢᠳ ᠦ᠋ᠨ ᠢᠳᠠᠮ ᠲᠡᠭᠡᠵᠦ ᠬᠥᠮᠦᠨ ᠦ᠌ ᠭᠠᠷ ᠳᠤᠰᠤᠯᠠᠬᠤ ᠦᠭᠡᠢ ᠪᠠᠢᠬᠠ ᠠ᠋᠂ ᠪᠢ ᠨᠢᠭᠡᠳᠦᠯ ᠳ᠋ᠡᠭᠡᠨ ᠲᠤᠰᠠᠯᠠᠵᠤ ᠪᠠᠢᠭᠠ ᠶᠤᠮ᠃ ᠮᠢᠨᠦ ᠶᠠᠭᠤᠮᠠ ᠭᠡᠵᠦ ᠦᠨᠡᠬᠡᠷ ᠢᠳᠡᠭᠡᠭᠦᠯᠬᠦ ᠶ᠋ᠢ ᠤᠷᠤᠯᠳᠤᠨ ᠬᠦᠴᠦᠯᠡᠨ ᠬᠡᠯᠡᠬᠦ ᠳ᠋ᠦ᠍ ᠨᠢᠭᠡᠳᠦᠯ ᠦ᠋ᠨ ᠪᠦᠳᠦᠭᠦᠨ ᠳ᠋ᠠᠯᡁᠨ《 ᠮᠠᠭᠤ ᠵᠤᠵᠢ ᠰᠡᠷᠡᠬᠡᠨᠡᠩ ᠪᠦᠷ ᠭᠠᠯᠵᠠᠭᠤᠷᠠᠵᠤ ᠭᠡᠮ᠃ ᠬᠠᠷᠠᠭᠰᠠᠭᠠᠷ ᠪᠠᠢᠲᠠᠯᠠ ᠠᠯᠪᠠᠨ ᠤ᠋ ᠶᠠᠭᠤᠮᠠ ᠶ᠋ᠢ ᠮᠢᠨᠦᠬᠢ ᠭᠡᠵᠦ ᠪᠢ ᠲᠤᠰᠠᠯᠠᠵᠤ ᠪᠠᠢᠭᠠ ᠶᠤᠮ》 ᠭᠡᠵᠦ ᠵᠢᠳᠬᠦᠭᠡᠳ ᠤᠬᠠᠭᠠᠨ ᠳ᠋ᠠᠭᠠᠨ ᠰᠠᠢᠨ ᠬᠥᠮᠦᠨ ᠪᠣᠯᠵᠤ ᠨᠡᠷᠡ ᠲᠥᠷᠥ ᠰᠠᠢᠰᠢᠶᠠᠯ ᠱᠠᠩᠨᠠᠯ ᠭᠣᠷᠢᠳᠠᠵᠤ ᠶᠠᠪᠤᠭᠠ ᠰᠠᠨᠠᠭᠠ ᠲᠠᠢ ᠶᠤᠮ ᠪᠠᠢᠬᠠ ᠳᠠ ᠭᠡᠵᠦ ᠵᠢᠪᠡᠭᠦᠦ ᠨᠢ ᠬᠦᠷᠦᠭᠡᠳ᠄
— ᠰᠡᠷᠡᠭᠡᠨᠡᠩ ᠮᠢᠨᠢ ᠴᠢ ᠪᠢᠲᠡᠭᠡᠢ ᠵᠣᠯᠢᠭ ᠣᠷᠭᠢ! ᠴᠢᠨᠦ ᠶᠠᠭᠤᠮᠠ ᠪᠣᠯ ᠴᠢ ᠬᠡᠭᠡᠷᠡ ᠡᠴᠡ ᠣᠯᠤᠭᠰᠠᠨ ᠶᠤᠮ ᠤᠤ? ᠴᠢ ᠯᠡ ᠡᠢᠮᠦ ᠣᠯᠠᠨ ᠰᠢᠯ ᠬᠤᠳᠠᠯᠳᠤᠵᠤ ᠠᠪᠤᠯᠠ ᠭᠡᠵᠢ ᠦᠦ? ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ ᠶᠤᠮ ᠪᠣᠯ ᠬᠠᠮᠢᠭᠠ ᠠ᠋ᠴᠠ ᠶᠠᠭᠠᠬᠢᠵᠤ ᠠᠪᠤᠭᠰᠠᠨ ᠶᠤᠮ ᠪᠣᠢ? ᠦᠨᠡ ᠨᠢ ᠬᠡᠳᠦ ᠶᠦᠮ ᠭᠡᠵᠦ ᠤᠴᠠᠭᠠᠷᠯᠠᠨ ᠬᠡᠯᠡᠬᠦ ᠳ᠋ᠦ᠍ ᠰᠡᠷᠡᠬᠡᠨᠡᠩ ᠭᠤᠸᠠᠢ ᠦᠨᠡᠬᠡᠷ ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ ᠭᠡᠬᠦ ᠪᠡᠷ ᠬᠠᠮᠤᠭ ᠫᠢᠶᠠᠩ ᠨᠢ ᠢᠯᠡᠷᠡᠬᠦ ᠪᠣᠯᠤᠨᠠ ᠭᠡᠵᠦ ᠵᠣᠪᠠᠭᠠᠳ ᠴᠣᠬᠣᠮ ᠶᠠᠭᠤ ᠭᠡᠬᠦ ᠪᠡᠨ ᠮᠡᠳᠡᠬᠦ ᠦᠭᠡᠢ ᠬᠡᠰᠡᠭ ᠲᠦᠭᠳᠡᠷᠡᠭᠡᠳ ᠥᠪᠡᠷ ᠡᠴᠡ ᠪᠡᠨ ᠲᠤᠰᠠᠯᠠᠵᠤ ᠪᠠᠢᠭᠠ ᠶ᠋ᠢ ᠨᠢ ᠢᠲᠡᠭᠡᠬᠦ ᠦᠭᠡᠢ ᠪᠣᠯᠬᠣᠷ ᠡᠳᠡ ᠨᠠᠷ ᠨᠠᠮᠠ ᠶ᠋ᠢ ᠨᠥᠬᠥᠭᠡ ᠵᠤᠵᠢ ᠰᠡᠷᠡᠭᠡᠨᠡᠩ ᠭᠡᠳᠡᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠷ ᠯᠡ ᠬᠢᠯᠠᠢᠵᠤ ᠪᠠᠢᠨᠠ ᠭᠡᠵᠦ ᠭᠣᠮᠣᠳᠠᠭᠰᠠᠨ ᠳ᠋ᠠᠭᠠᠨ ᠠᠳᠠᠢᠷ ᠵᠠᠩ ᠨᠢ ᠬᠥᠳᠡᠯᠵᠦ᠄
— ᠪᠢ ᠬᠤᠯᠠᠭᠠᠢ ᠯᠠ ᠬᠢᠭᠡ ᠦᠭᠡᠢ᠂ ᠮᠢᠨᠦ ᠯᠡ ᠶᠠᠭᠤᠮᠠ᠂ ᠬᠤᠳᠠᠯᠳᠤᠬᠤ ᠴᠤ᠌ ᠭᠡᠰᠡᠨ ᠶᠠᠭᠤᠮᠠ ᠪᠢᠰᠢ᠃ ᠬᠡᠷᠡᠭ ᠪᠣᠯᠪᠠᠯ ᠶᠠᠭᠠᠬᠢᠬᠤᠪ ᠠᠪᠤᠭᠠᠷᠠᠢ᠂ ᠪᠣᠯᠬᠤ ᠦᠭᠡᠢ ᠪᠣᠯ ᠬᠣᠭ ᠳᠡᠭᠡᠷᠡ ᠠᠪᠠᠴᠢᠭᠠᠳ ᠬᠠᠶᠠᠴᠢᠬᠠᠭᠠᠷᠠᠢ ᠳᠠᠷᠤᠭᠠ ᠨᠠᠷ ᠮᠢᠨᠢ ᠭᠡᠵᠦ ᠵᠠᠩᠭᠢᠷᠤᠭᠰᠠᠨ ᠬᠣᠭᠣᠯᠠᠢ ᠪᠠᠷ ᠢ᠋ᠶ᠋ᠠᠨ ᠡᠪ ᠳ᠋ᠦᠢ ᠮᠠᠭᠤᠲᠠᠢᠬᠠᠨ ᠬᠡᠯᠡᠴᠢᠬᠡᠭᠡᠳ ᠺᠣᠨᠲ᠋ᠣᠷ ᠤ᠋ᠨ ᠬᠢᠨ ᠬᠠᠭᠠᠯᠭᠠ ᠶ᠋ᠢ ᠲᠡᠰᠬᠢᠲᠡᠯᠡ ᠴᠢᠯᠠᠭᠤᠳᠠᠨ ᠭᠠᠷᠴᠤ᠂ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠭᠠᠳ ᠬᠥᠲᠥᠯᠵᠦ ᠶᠠᠪᠤᠭᠰᠠᠨ ᠳᠤᠬᠤᠰᠢ ᠲᠠᠢ ᠮᠣᠷᠢ ᠪᠠᠨ ᠠᠭᠤᠷ ᠲᠠᠭᠠᠨ ᠲᠠᠰᠢᠭᠤᠷᠳᠠᠨ ᠳᠠᠪᠬᠢᠵᠠᠢ᠃
ᠺᠣᠨᠲ᠋ᠣᠷ ᠲᠤ᠌ ᠦᠯᠡᠳᠡᠭᠴᠢᠳ ᠴᠣᠬᠣᠮ ᠶᠠᠭᠠᠬᠢᠬᠤ ᠤᠴᠢᠷ ᠢ᠋ᠶ᠋ᠠᠨ ᠴᠤ᠌ ᠣᠯᠤᠭᠰᠠᠨ ᠦᠭᠡᠢ ᠭᠠᠢᠬᠠᠵᠠᠭᠠᠨ ᠬᠣᠴᠣᠷᠪᠠ᠃ ᠵᠠᠷᠢᠮ ᠨᠢ ᠰᠡᠷᠡᠬᠡᠨᠡᠩ ᠭᠤᠸᠠᠢ ᠶ᠋ᠢ ᠪᠢᠳᠡ ᠢᠲᠡᠭᠡᠬᠦ ᠦᠭᠡᠢ ᠭᠣᠮᠣᠳᠠᠭᠠᠴᠢᠬᠠᠪᠠ ᠤᠤ ᠳᠠ ᠭᠡᠵᠦ ᠵᠣᠪᠠᠬᠤ ᠮᠠᠶᠢᠬᠲᠠᠢ᠃ ᠵᠠᠷᠢᠮ ᠨᠢ ᠰᠡᠷᠡᠬᠡᠨᠡᠩ ᠳ᠋ᠦ᠍ ᠵᠢᠪᠡᠭᠦᠴᠡᠭᠰᠡᠨ ᠪᠠᠢᠳᠠᠯ ᠲᠠᠢ ᠬᠡᠪ ᠢ᠋ᠶ᠋ᠡᠷ ᠢᠶᠠᠨ᠃ ᠵᠠᠷᠢᠮ ᠨᠢ ᠶᠠᠮᠠᠷ ᠭᠡᠭᠴᠢ ᠶ᠋ᠢᠨ ᠬᠠᠴᠢᠨ ᠶᠠᠭᠤᠮᠠ ᠪᠣᠯᠵᠤ ᠪᠠᠢᠨᠠ ᠭᠡᠵᠦ ᠢᠨᠢᠶᠡᠨ ᠬᠥᠭᠵᠢᠭᠰᠡᠨ ᠬᠡᠪ ᠢ᠋ᠶ᠋ᠡᠷ ᠢᠶᠠᠨ ᠦᠯᠡᠳᠡᠵᠡᠢ᠃ ᠶᠠᠭᠠᠷᠠᠤ ᠳᠠᠭᠤᠳᠠᠭᠤᠯᠤᠭᠰᠠᠨ ᠨᠢᠭᠡᠳᠦᠯ ᠦ᠋ᠨ ᠮᠣᠨᠲ᠋ᠶᠣᠷ ᠣᠷᠣᠵᠤ ᠢᠷᠡᠭᠡᠳ ᠬᠠᠢᠷᠴᠠᠭ ᠵᠠᠳᠠᠯᠬᠤ ᠳ᠋ᠤ᠌ ᠣᠳᠣ ᠶ᠋ᠢᠨ ᠪᠥᠭᠡᠷᠡᠩᠬᠡᠢ ᠬᠡᠯᠪᠡᠷᠢ ᠲᠡᠢ ᠪᠢᠰᠢ᠂ ᠥᠷᠭᠡᠰᠦᠲᠦ ᠬᠡᠮᠬᠡ ᠰᠢᠭ ᠵᠤᠤᠪᠠᠩ ᠪᠥᠭᠡᠷᠡᠩᠬᠡᠢ ᠮᠥᠷᠳᠡᠯᠡ ᠪᠡᠨ ᠤᠷᠲᠤ ᠨᠤᠬᠤᠯᠠᠭᠠ ᠲᠠᠢ ᠪᠠᠢᠭᠰᠠᠨ ᠢ᠋ ᠬᠠᠷᠠᠭᠠᠳ᠄
— ᠡᠨᠡ ᠴᠢᠨᠢ ᠶᠠᠭᠤ ᠪᠣᠢ? ᠰᠡᠭᠦᠯ ᠦ᠋ᠨ ᠬᠣᠷᠢ ᠭᠠᠷᠤᠢ ᠵᠢᠯ ᠮᠠᠨ ᠤ᠋ ᠡᠨᠳᠡ ᠢᠷᠡᠬᠦ ᠪᠡᠨ ᠪᠣᠯᠴᠢᠬᠠᠭᠰᠠᠨ ᠰᠢᠯ ᠪᠠᠢᠬᠠ ᠴᠢᠨᠢ? ᠡᠨᠡ ᠣᠳᠣ ᠬᠠᠮᠢᠭᠠ ᠨᠢ ᠳᠠᠷᠤᠭᠳᠠᠵᠤ ᠪᠠᠢᠭᠠᠳ ᠭᠠᠷᠴᠤ ᠢᠷᠡᠭᠡ ᠶᠦᠮ ᠪᠣᠯ? ᠭᠡᠰᠡᠨ ᠦᠭᠡ ᠳᠠᠷᠤᠭᠠ ᠨᠠᠷ ᠲᠤ᠌ ᠭᠠᠢᠬᠠᠬᠤ ᠰᠡᠳᠬᠢᠯ ᠲᠥᠷᠥᠭᠦᠯᠵᠡᠢ᠃ ᠶᠠᠭᠤᠮᠠ ᠶ᠋ᠢ ᠮᠠᠭᠤ ᠪᠠᠷ ᠪᠣᠳᠣᠳᠠᠭ ᠬᠥᠮᠦᠨ ᠡᠨᠡ ᠰᠡᠷᠡᠬᠡᠨᠡᠩ ᠳᠡᠭᠡᠷᠡ ᠦᠶᠡ ᠳ᠋ᠦ᠍ ᠯᠠᠪ ᠨᠢᠭᠡ ᠬᠤᠷᠰᠢᠶᠠ ᠯᠠ ᠳᠡᠭᠡᠷᠡᠮᠳᠡᠭᠰᠡᠨ ᠪᠠᠢᠵᠤ ᠮᠡᠳᠡᠨᠡ ᠭᠡᠵᠦ ᠪᠣᠳᠣᠭᠰᠠᠨ ᠴᠤ᠌ ᠪᠠᠢᠵᠤ ᠪᠣᠯᠬᠤ ᠪᠢᠵᠡ᠃
ᠰᠡᠷᠡᠬᠡᠨᠡᠩ ᠭᠤᠸᠠᠢ ᠪᠤᠴᠠᠵᠤ ᠶᠠᠪᠤᠬᠤ ᠵᠠᠮ ᠳ᠋ᠠᠭᠠᠨ ᠡᠯᠳᠡᠪ ᠦ᠋ᠨ ᠶᠠᠭᠤᠮᠠ ᠪᠣᠳᠣᠵᠤ ᠶᠠᠪᠤᠵᠠᠢ᠃ ᠡᠳᠦᠢ ᠬᠦᠷᠲᠡᠯᠡ ᠪᠢᠰᠢᠭᠦᠢ ᠯᠡ ᠭᠣᠮᠣᠳᠠᠵᠤ ᠪᠠᠶᠠᠷᠯᠠᠵᠤ ᠶᠠᠪᠤᠭᠰᠠᠨ᠂ ᠭᠡᠬᠦ ᠳ᠋ᠡᠭᠡᠨ ᠢᠩᠭᠢᠵᠦ ᠭᠣᠮᠣᠳᠠᠵᠤ ᠶᠡᠷᠦ ᠦᠵᠡᠭᠡ ᠦᠭᠡᠢ᠃ ᠨᠠᠰᠤ ᠨᠢ ᠥᠲᠡᠯᠦᠭᠰᠡᠨ ᠳ᠋ᠡᠭᠡᠨ ᠴᠦ᠍ ᠲᠡᠷᠡ ᠶᠦᠮ ᠦᠦ᠂ ᠡᠨᠡ ᠭᠣᠮᠣᠳᠠᠯ ᠬᠦᠨᠳᠦ ᠲᠤᠰᠤᠭᠰᠠᠨ ᠢ᠋ ᠶᠠᠭᠠᠬᠢᠨᠠ! ᠬᠥᠮᠦᠨ ᠠᠮᠢᠲᠠᠨ ᠲᠠᠢ ᠵᠥᠪᠯᠡᠵᠦ ᠶᠠᠷᠢᠳᠠᠭ ᠦᠭᠡᠢ᠂ ᠠᠰᠠᠭᠤᠳᠠᠭ ᠦᠭᠡᠢ᠂ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠪᠦᠲᠦᠯ ᠦᠭᠡᠢ ᠶᠠᠭᠤᠮᠠ ᠰᠠᠨᠠᠴᠢᠬᠠᠳᠠᠭ᠂ ᠮᠢᠨᠦ ᠡᠨᠡ ᠡᠪᠡᠳᠴᠢᠨ ᠦᠦ?᠁ ᠵᠠᠪᠠᠯ ᠨᠢᠭᠡ ᠰᠠᠨᠠᠭᠠ ᠦᠭᠡᠢ᠂ ᠪᠣᠳᠣᠭᠠ ᠦᠭᠡᠢ ᠡᠪ ᠦᠭᠡᠢ ᠶᠠᠭᠤᠮᠠᠨ ᠳ᠋ᠤ᠌ ᠣᠷᠣᠭᠤᠯᠤᠨᠠ ᠭᠡᠭᠴᠢ᠂ ᠡᠨᠡ ᠭᠠᠢ ᠪᠣᠯᠤᠭᠰᠠᠨ ᠴᠢᠳᠧᠩ ᠦ᠋ᠨ ᠬᠡᠳᠦᠨ ᠰᠢᠯ ᠨᠠᠮᠠ ᠶ᠋ᠢ ᠮᠥᠨ ᠣᠯᠠᠨ ᠬᠥᠳᠡᠵᠦ ᠪᠠᠢᠵᠤ ᠠᠷᠠᠢ ᠭᠡᠵᠦ ᠨᠢᠭᠡ ᠰᠠᠯᠬᠤ ᠰᠢᠪ᠃ ᠬᠡᠳᠦᠨ ᠮᠥᠩᠭᠥ ᠶ᠋ᠢ ᠮᠢᠨᠢ ᠦᠷᠡᠭᠡᠳ ᠭᠠᠵᠠᠷ ᠳᠡᠭᠡᠷᠡᠬᠢ ᠭᠠᠭᠴᠠ ᠳᠡᠭᠦᠦ ᠲᠡᠢ ᠮᠢᠨᠢ ᠲᠠᠩᠭᠠᠷᠢᠭ ᠲᠠᠰᠤᠯᠤᠭᠠᠳ ᠨᠤᠲᠤᠭ ᠤ᠋ᠨ ᠬᠢᠨ ᠳ᠋ᠦ᠍ ᠮᠢᠨᠢ ᠰᠢᠪᠰᠢᠭ ᠲᠠᠷᠢᠬᠤ ᠰᠢᠬᠠᠭᠠᠳ᠂ ᠲᠡᠭᠡᠭᠡᠳ ᠥᠨᠥᠳᠥᠷ ᠡᠨᠡ᠃ ᠬᠡᠳᠦᠨ ᠮᠢᠨᠦ᠋ᠲ ᠦ᠋ᠨ ᠡᠮᠦᠨᠡ ᠪᠢ ᠶᠠᠭᠠᠬᠢᠭᠰᠠᠨ ᠰᠠᠢᠬᠠᠨ ᠰᠡᠳᠬᠢᠯ ᠲᠡᠢ ᠡᠨᠡ ᠵᠠᠮ ᠢ᠋ᠶ᠋ᠠᠷ ᠲᠡᠷᠡ ᠬᠡᠳᠦᠨ ᠭᠠᠢ ᠲᠠᠢ ᠰᠢᠯ ᠢ᠋ ᠲᠡᠩᠨᠡᠵᠦ ᠶᠠᠪᠤᠭᠰᠠᠨ ᠪᠢᠯᠡ? ᠨᠢᠭᠡᠳᠦᠯ ᠦ᠋ᠨ ᠮᠢᠨᠢ ᠬᠠᠮᠤᠭ ᠤᠳᠤᠷᠢᠳᠤᠯᠭᠠ ᠴᠤᠭᠯᠠᠷᠠᠭᠠᠳ ᠵᠣᠷᠢᠭᠤᠳᠠ ᠨᠠᠮᠠ ᠶ᠋ᠢ ᠬᠦᠯᠢᠶᠡᠵᠦ ᠠᠪᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠪᠠᠢᠭᠰᠠᠨ ᠢ᠋ ᠬᠡᠯᠡᠬᠦ ᠦᠦ᠂ ᠮᠥᠨ ᠬᠦᠯᠢᠶᠡᠵᠦ ᠠᠪᠤᠪᠠ? ᠬᠠᠯᠠᠭᠤᠨ ᠨᠣᠷᠤᠮ ᠤᠷᠤᠭᠤ ᠤᠰᠤ ᠬᠢᠵᠦ ᠪᠠᠢᠭᠠ ᠶᠤᠮ ᠰᠢᠭ᠋᠁ ᠠᠷᠠᠢ ᠯᠠ ᠬᠤᠯᠠᠭᠠᠢ ᠬᠢᠭᠡᠳ ᠢᠷᠡᠪᠡ ᠤᠤ ᠭᠡᠰᠡᠨ ᠦᠭᠡᠢ᠃ ᠳᠣᠲᠣᠷᠠ ᠪᠠᠨ ᠵᠠᠷᠢᠮ ᠨᠢ ᠴᠦ᠍ ᠲᠡᠭᠡᠵᠦ ᠪᠣᠳᠣᠭᠰᠠᠨ ᠴᠤ᠌ ᠪᠠᠢᠬᠠ ᠠ᠋᠂ ᠲᠤᠰᠠᠯᠠᠵᠤ ᠪᠠᠢᠭᠠ ᠶᠠᠭᠤᠮᠠ ᠭᠡᠳ ᠪᠠᠢᠬᠤ ᠳ᠋ᠤ᠌ ᠦᠨᠡ ᠨᠢ ᠶᠠᠭᠤ ᠶᠤᠮ ᠪᠣᠢ ᠴᠤ᠌ ᠭᠡᠬᠦ ᠰᠢᠭ᠂ ᠳᠠᠩᠴᠤ ᠶᠠᠭᠠᠬᠢᠪᠠ᠃ ᠪᠢ ᠭᠡᠳᠡᠭ ᠬᠥᠮᠦᠨ ᠢᠩᠭᠢᠵᠦ ᠣᠯᠠᠨ ᠤ᠋ ᠢᠲᠡᠭᠡᠯ ᠢ᠋ ᠠᠯᠳᠠᠴᠢᠬᠠᠭᠰᠠᠨ ᠨᠡᠷᠡ ᠲᠥᠷᠥ ᠪᠡᠨ ᠪᠠᠷᠠᠴᠢᠬᠠᠭᠰᠠᠨ ᠮᠥᠩᠬᠡ ᠶ᠋ᠢᠨ ᠵᠤᠵᠢ ᠰᠡᠷᠡᠬᠡᠨᠡᠩ ᠶᠦᠮ ᠪᠠᠢᠵᠠᠢ᠃ ᠡᠨᠡ ᠨᠡᠷᠡ ᠦᠬᠦᠯᠡ ᠴᠦ᠍ ᠭᠡᠰᠡᠨ ᠶᠠᠰᠤᠨ ᠠ᠋ᠴᠠ ᠮᠢᠨᠢ ᠰᠠᠯᠬᠤ ᠦᠭᠡᠢ ᠪᠠᠢᠬᠠ ᠭᠡᠵᠦ ᠪᠣᠳᠣᠨ ᠡᠯᠳᠡᠪ ᠢ᠋ ᠲᠣᠭᠣᠷᠢᠭᠤᠯᠤᠨ ᠤᠬᠢᠯᠠᠮᠠᠷ ᠭᠡᠷ ᠲᠡᠭᠡᠨ ᠬᠠᠷᠢᠵᠠᠢ᠃ ᠢᠷᠡᠭᠰᠡᠨ ᠡᠳᠦᠷ ᠢᠶᠠᠨ ᠬᠣᠭᠣᠯᠠ ᠴᠠᠢ ᠨᠢ ᠬᠣᠭᠣᠯᠠᠢ ᠤᠷᠤᠭᠤ ᠨᠢ ᠤᠷᠤᠭᠰᠠ ᠦᠭᠡᠢ᠂ ᠰᠤᠷᠤᠭᠰᠠᠨ ᠵᠠᠩᠰᠢᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠭᠠᠰ ᠰᠠᠷᠠ ᠭᠠᠷᠤᠢ ᠠᠪᠠᠭᠠᠢ ᠳ᠋ᠠᠭᠠᠨ ᠴᠤ᠌ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠠᠪᠠᠭᠠᠢ ᠨᠢ ᠵᠠᠩ ᠢ᠋ ᠨᠢ ᠮᠡᠳᠡᠬᠦ ᠪᠡᠷ ᠢᠶᠠᠨ《 ᠡᠨᠡ ᠮᠠᠨᠢ ᠨᠢᠭᠡ ᠬᠥᠮᠦᠨ ᠲᠡᠢ ᠬᠡᠷᠡᠯᠳᠦᠵᠦ ᠳᠡ᠂ ᠬᠠᠷᠠ ᠥᠷᠯᠥᠭᠡᠭᠦᠷ ᠡᠪᠡᠳᠴᠢᠨ ᠲᠤᠰᠴᠢᠬᠠᠭᠰᠠᠨ ᠶᠤᠮ ᠰᠢᠭ᠋ ᠭᠡᠨᠡᠳᠬᠡᠨ ᠬᠤᠪᠴᠠᠰᠤᠯᠠᠭᠠᠳ ᠯᠠ ᠬᠣᠶᠠᠷ ᠮᠣᠷᠢ ᠪᠠᠨ ᠡᠮᠡᠭᠡᠯᠯᠡᠵᠦ ᠲᠣᠬᠣᠰᠢᠯᠠᠭᠠᠳ ᠡᠪᠦᠯᠵᠢᠶᠡ ᠣᠷᠣᠨᠠ ᠭᠡᠳ ᠶᠠᠪᠤᠭᠰᠠᠨ ᠶᠤᠮ᠃ ᠡᠳᠦᠢ ᠳ᠋ᠦ᠍ ᠳᠠᠢᠰᠢ ᠪᠠᠨ ᠶᠠᠪᠤᠬᠤ ᠬᠡᠷᠡᠭ ᠪᠠᠢᠮᠠᠷ ᠦᠭᠡᠢ ᠯᠡ ᠶᠤᠮᠰᠠᠨ᠃ ᠬᠣᠶᠠᠷ ᠢᠯᠡᠭᠦᠦ ᠰᠢᠨᠡᠬᠡᠨ ᠢᠰᠡᠭᠡᠢ ᠲᠤᠭᠤᠷᠭᠠ ᠪᠠᠢᠭᠰᠠᠨ ᠶᠤᠮ᠂ ᠲᠡᠭᠦᠨ ᠢ᠋ ᠪᠡᠨ ᠬᠥᠮᠦᠨ ᠳ᠋ᠦ᠍ ᠵᠠᠷᠤᠬᠤ ᠭᠡᠰᠡᠨ ᠴᠢᠨᠢ ᠦᠨᠡ ᠳᠠᠭᠠᠷᠠᠭᠠ ᠦᠭᠡᠢ ᠲᠠᠷ ᠲᠣᠷ ᠭᠡᠰᠡᠨ ᠪᠠᠢᠯᠭᠦᠢ ᠳᠡ》 ᠭᠡᠵᠦ ᠪᠣᠳᠣᠭᠠᠳ ᠥᠩᠭᠡᠷᠡᠵᠡᠢ᠃ ᠰᠡᠷᠡᠬᠡᠨᠡᠩ ᠭᠤᠸᠠᠢ ᠪᠠᠶᠠᠷ ᠨᠠᠭᠠᠳᠤᠮ ᠢ᠋ᠶ᠋ᠠᠷ ᠰᠤᠮᠤ ᠣᠷᠣᠳᠠᠭ ᠴᠤ᠌ ᠪᠢᠰᠢ᠂ ᠵᠠᠷᠢᠮ ᠵᠢᠯ ᠠᠪᠠᠭᠠᠢ ᠥᠬᠢᠨ ᠬᠣᠶᠠᠷ ᠢ᠋ᠶ᠋ᠠᠨ ᠶᠠᠪᠤᠭᠤᠯᠳᠠᠭ ᠪᠠᠢᠭᠰᠠᠨ ᠶᠤᠮ᠃ ᠬᠠᠷᠢᠨ ᠨᠢᠭᠡᠳᠦᠯ ᠣᠷᠣᠭᠰᠠᠨ ᠠ᠋ᠴᠠ ᠬᠣᠢᠰᠢ ᠵᠢᠯ ᠪᠦᠷᠢ ᠥᠪᠡᠷ ᠢᠶᠠᠨ ᠨᠠᠭᠠᠳᠤᠮ ᠳ᠋ᠤ᠌ ᠢᠷᠡᠳᠡᠭ ᠪᠣᠯᠤᠭᠰᠠᠨ ᠶᠤᠮᠰᠠᠨ᠃ ᠡᠨᠡ ᠵᠢᠯ ᠭᠣᠮᠣᠳᠠᠭᠰᠠᠨ ᠳ᠋ᠠᠭᠠᠨ ᠥᠪᠡᠷ ᠢᠶᠠᠨ ᠴᠦ᠍ ᠣᠴᠢᠭᠠ ᠦᠭᠡᠢ ᠬᠥᠭᠰᠢᠨ ᠢᠶᠠᠨ ᠣᠴᠢ ᠭᠡᠵᠦ ᠬᠡᠯᠡᠭᠡ ᠦᠭᠡᠢ ᠥᠩᠭᠡᠷᠡᠵᠡᠢ᠃
ᠰᠡᠭᠦᠯ ᠳ᠋ᠦ᠍ ᠲᠤᠭᠤᠯᠬᠤ ᠳ᠋ᠤ᠌ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠶ᠋ᠢᠨ ᠥᠭᠭᠦᠭᠰᠡᠨ ᠰᠢᠯ ᠦ᠋ᠳ220 ᠸᠣᠯᠲ ᠤ᠋ᠨ80—60 ᠯᠡ ᠶ᠋ᠢᠨ ᠭᠡᠷᠡᠯ ᠪᠠᠢᠭᠰᠠᠨ ᠤᠴᠢᠷ ᠠ᠋ᠴᠠ ᠺᠯᠦ᠋ᠪ ᠺᠣᠨᠲ᠋ᠣᠷ ᠭᠤᠸᠠᠩᠵᠠ ᠣᠷᠣᠨ ᠰᠠᠭᠤᠴᠠ ᠳ᠋ᠤ᠌ ᠪᠦᠷᠢᠨ ᠬᠦᠷᠴᠦ ᠲᠡᠷᠡ ᠴᠦ᠍ ᠪᠠᠢᠲᠤᠭᠠᠢ ᠨᠢᠭᠡᠳᠦᠯ ᠦ᠋ᠨ ᠬᠢᠨ ᠺᠯᠦ᠋ᠪ ᠦ᠋ᠨ ᠢ᠋ᠶ᠋ᠡᠷ ᠡᠭᠦᠳᠡᠨ ᠳ᠋ᠦ᠍ ᠬᠦᠷᠲᠡᠯᠡ ᠭᠡᠷᠡᠯ ᠴᠢᠮᠡᠭᠯᠡᠯ ᠬᠢᠵᠦ ᠪᠠᠶᠠᠷ ᠨᠠᠭᠠᠳᠤᠮ ᠢ᠋ᠶ᠋ᠠᠨ ᠰᠦᠷᠲᠡᠢ ᠰᠠᠢᠬᠠᠨ ᠥᠩᠭᠡᠷᠡᠭᠦᠯᠦᠭᠰᠡᠨ ᠭᠡᠨᠡ ᠪᠢᠯᠡ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠨᠢᠭᠡᠳᠦᠯ ᠦ᠋ᠨ ᠵᠠᠬᠢᠷᠭᠠᠨ ᠠ᠋ᠴᠠ ᠴᠢᠳᠧᠩ ᠦ᠋ᠨ ᠰᠢᠯ ᠦ᠋ᠨ ᠦᠨᠡ ᠶ᠋ᠢᠨ ᠣᠷᠣᠨ ᠳ᠋ᠤᠨᠢ ᠰᠣᠯᠢᠬᠤ ᠭᠡᠰᠡᠨ ᠶᠠᠭᠤᠮᠠ ᠭᠡᠵᠦ ᠨᠡᠬᠡᠭᠰᠡᠨ ᠠᠯᠪᠠᠨ ᠭᠠᠵᠠᠷ ᠣᠭᠲᠣ ᠭᠠᠷᠤᠭᠰᠠᠨ ᠦᠭᠡᠢ ᠤᠳᠠᠵᠠᠢ᠃ ᠦᠨᠡᠬᠡᠷ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠲᠤᠰᠠᠯᠠᠭᠰᠠᠨ ᠨᠢ ᠭᠠᠷᠴᠠᠭᠠ ᠦᠭᠡᠢ ᠪᠣᠯᠤᠯᠠ ᠭᠡᠳᠡᠭ ᠢᠲᠡᠭᠡᠯ ᠳᠠᠷᠤᠭᠠ ᠨᠠᠷ ᠲᠤ᠌ ᠲᠥᠷᠥᠭᠰᠡᠨ᠂ ᠭᠡᠪᠡᠴᠦ ᠶᠠᠭᠠᠬᠢᠬᠤ ᠭᠡᠵᠦ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠲᠡᠢᠮᠦ ᠣᠯᠠᠨ ᠢ᠋ ᠬᠡᠵᠢᠶᠡ ᠬᠠᠮᠢᠭᠠ ᠠ᠋ᠴᠠ ᠠᠪᠴᠤ ᠳᠠᠷᠤᠭᠰᠠᠨ ᠨᠢ ᠣᠢᠯᠠᠭᠠᠭᠳᠠᠬᠤ ᠦᠭᠡᠢ ᠣᠨᠢᠰᠣᠭᠠ ᠬᠡᠪ ᠢ᠋ᠶ᠋ᠡᠷ ᠦᠯᠡᠳᠡᠵᠡᠢ᠃ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠶ᠋ᠢ ᠢᠲᠡᠭᠡᠬᠦ ᠦᠭᠡᠢ ᠭᠣᠮᠣᠳᠠᠭᠠᠭᠰᠠᠨ ᠶᠠᠪᠤᠳᠠᠯ ᠢ᠋ ᠰᠡᠭᠦᠯ ᠳ᠋ᠦ᠍ ᠲᠤᠭᠤᠯᠤᠭᠰᠠᠨ ᠨᠢᠭᠡᠳᠦᠯ ᠦ᠋ᠨ ᠨᠠᠮ ᠤ᠋ᠨ ᠡᠭᠦᠷ ᠦ᠋ᠨ ᠳᠠᠷᠤᠭᠠ ᠨᠥᠭᠥᠭᠡ ᠬᠡᠳᠦ ᠶ᠋ᠢ ᠪᠡᠨ ᠵᠢᠮᠡᠯᠡᠵᠦ ᠪᠠᠢᠨᠠ ᠭᠡᠰᠡᠨ ᠰᠤᠷᠠᠭ ᠳᠠᠮ ᠳᠤᠭᠤᠯᠳᠠᠭᠠᠳ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠶ᠋ᠢᠨ ᠰᠡᠳᠬᠢᠯ ᠨᠢ ᠠᠮᠠᠷᠠᠵᠤ ᠭᠣᠮᠣᠳᠠᠭᠰᠠᠨ ᠢ᠋ᠶ᠋ᠠᠨ ᠮᠠᠷᠲᠠᠭᠠᠳ ᠨᠢᠭᠡᠳᠦᠯ ᠦ᠋ᠨ ᠢ᠋ᠶ᠋ᠡᠷ ᠲᠥᠯᠥᠭᠡ ᠦᠷᠭᠦᠯᠵᠢ ᠰᠠᠨᠠᠭᠠ ᠲᠠᠯᠪᠢᠵᠤ ᠵᠢᠳᠬᠦᠭᠰᠡᠭᠡᠷ ᠶᠠᠪᠤᠵᠠᠢ᠃
ᠵᠢᠷᠠᠨ ᠨᠠᠰᠤᠨ ᠤ᠋ ᠨᠠᠢᠷ ᠳᠡᠭᠡᠷᠡ ᠫᠢᠶᠠᠩ ᠢ᠋ᠶ᠋ᠠᠨ ᠶᠠᠷᠢᠬᠤ ᠨᠢ ᠢᠩᠭᠢᠵᠦ ᠡᠬᠢᠯᠡᠭᠰᠡᠨ ᠶᠦ᠍ᠮ᠃ ᠬᠤᠷᠠᠯ ᠶᠣᠰᠣᠯᠠᠯ ᠤ᠋ᠨ ᠬᠡᠰᠡᠭ ᠨᠢ ᠳᠥᠷᠪᠡᠨ ᠴᠠᠭ ᠤ᠋ᠨ ᠦᠶᠡ ᠳ᠋ᠦ᠍ ᠡᠬᠢᠯᠡᠵᠡᠢ᠃ ᠨᠠᠢᠷ ᠤ᠋ᠨ ᠬᠡᠰᠡᠭ ᠨᠢ ᠲᠠᠪᠤᠨ ᠴᠠᠭ ᠲᠤ᠌ ᠡᠬᠢᠯᠡᠭᠰᠡᠨ ᠶᠦ᠍ᠮ᠃ ᠨᠠᠢ᠍ᠮᠠᠨ ᠴᠠᠭ ᠤ᠋ᠨ ᠦᠶᠡ ᠳ᠋ᠦ᠍ ᠨᠠᠢᠷ ᠤ᠋ᠨ ᠪᠠᠢᠳᠠᠯ ᠴᠤ᠌ ᠨᠢᠭᠡ ᠬᠥᠭᠵᠢᠭᠡᠳ ᠢᠷᠡᠯᠡ᠂ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠤᠭ ᠨᠢ ᠶᠠᠭᠤᠮᠠ ᠤᠤᠭᠤᠳᠠᠭ ᠦᠭᠡᠢ ᠳ᠋ᠡᠭᠡᠨ ᠴᠦ᠍ ᠶᠦ᠍ᠮ ᠦᠦ᠂ ᠪᠠᠶᠠᠷ ᠬᠥᠷ ᠪᠣᠯᠤᠭᠰᠠᠨ ᠳ᠋ᠠᠭᠠᠨ ᠴᠤ᠌ ᠶᠤᠮ ᠤᠤ? ᠠᠮᠠᠷᠬᠠᠨ ᠬᠠᠯᠠᠴᠢᠬᠠᠭᠰᠠᠨ ᠪᠠᠢᠵᠠᠢ᠃ ᠭᠡᠲᠡᠯᠡ ᠭᠡᠨᠡᠳᠲᠡᠬᠡᠨ ᠭᠡᠷ ᠳᠦᠭᠦᠷᠡᠩ ᠭᠡᠷᠡᠯ ᠭᠠᠷᠴᠤ ᠴᠢᠳᠧᠩ ᠠᠰᠠᠬᠤ ᠲᠠᠢ ᠵᠡᠷᠭᠡ ᠱᠠᠭᠰᠢᠵᠤ ᠭᠠᠷᠴᠠᠢ᠃ ᠠᠮᠠ ᠠᠮᠠᠨ ᠳ᠋ᠠᠭᠠᠨ《 ᠡᠳᠦᠷ ᠰᠢᠭ ᠮᠥᠨ ᠰᠠᠢᠬᠠᠨ ᠠ᠋᠂ ᠳᠥᠷᠪᠡ ᠶ᠋ᠢ ᠲᠠᠯᠪᠢᠴᠢᠬᠠᠭᠰᠠᠨ ᠪᠠᠢᠨᠠ ᠰᠢᠦ》 ᠭᠡᠯᠴᠡᠬᠦ ᠶ᠋ᠢ ᠰᠣᠨᠣᠰᠤᠭᠠᠳ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠪᠠᠷᠤᠭ ᠡᠨᠡ ᠨᠠᠰᠤᠨ ᠳ᠋ᠠᠭᠠᠨ ᠢᠨᠢᠶᠡᠵᠦ ᠦᠵᠡᠭᠡ ᠦᠭᠡᠢ ᠴᠢᠩᠭᠠ ᠳᠠᠭᠤ ᠪᠠᠷ ᠢᠨᠢᠶᠡᠵᠦ᠄
— ᠲᠠ ᠮᠢᠨᠢ ᠠ᠋᠂ ᠲᠠ ᠮᠢᠨᠢ ᠠ᠋! ᠭᠡᠬᠦ ᠳ᠋ᠦ᠍ ᠠᠪᠠᠭᠠᠢ ᠥᠬᠢᠨ ᠬᠦᠷᠭᠡᠨ ᠭᠤᠷᠪᠠ ᠨᠢ ᠶᠠᠭᠠᠬᠢᠳᠠᠭ ᠪᠢᠯᠡ ᠪᠦᠷ ᠰᠣᠭᠲᠣᠴᠢᠬᠠᠵᠠᠢ ᠭᠡᠵᠦ ᠰᠡᠳᠬᠢᠯ ᠨᠢ ᠵᠣᠪᠠᠵᠠᠭᠠᠵᠠᠢ᠃
— ᠭᠤᠷᠪᠠᠳᠤᠭᠠᠷ ᠪᠠᠷᠢᠭᠠᠳᠠ ᠰᠢᠷᠠ ᠰᠢᠪᠠᠭᠤᠲᠤ ᠶ᠋ᠢᠨ ᠠᠮᠠᠨ ᠳ᠋ᠤ᠌ ᠰᠠᠭᠤᠷᠢᠰᠢᠭᠠᠳ ᠭᠦᠢᠴᠡᠬᠦ ᠪᠡᠷ ᠮᠠᠨ ᠤ᠋ ᠰᠠᠭᠤᠷᠢ ᠬᠦᠷᠲᠡᠯᠡ ᠤᠲᠠᠰᠤ ᠲᠠᠲᠠᠭᠠᠳ ᠭᠡᠷ ᠲᠡᠭᠡᠨ ᠮᠠᠯ ᠤ᠋ᠨ ᠢ᠋ᠶ᠋ᠠᠷ ᠬᠠᠰᠢᠶᠠ ᠰᠠᠷᠠᠪᠴᠢᠨ ᠳ᠋ᠤ᠌ ᠲᠥᠯ ᠦ᠋ᠨ ᠫᠦᠩᠵᠡ᠂ ᠡᠪᠡᠰᠦᠨ ᠦ᠌ ᠬᠠᠰᠢᠶᠠ᠂ ᠵᠣᠷᠯᠣᠩ᠂ ᠣᠩᠭᠣᠢᠳᠠᠭ ᠰᠠᠪᠠ ᠪᠦᠭᠦᠳᠡ ᠳ᠋ᠦ᠍ ᠴᠢᠳᠧᠩ ᠲᠠᠯᠪᠢᠵᠤ ᠬᠦᠰᠡᠯ ᠢ᠋ᠶ᠋ᠡᠷ ᠬᠠᠩᠭᠠᠭᠠᠳ ᠦᠬᠦᠨᠡ ᠳᠡ ᠪᠢ! ᠭᠡᠬᠦ ᠳ᠋ᠦ᠍ ᠨᠠᠢᠷ ᠤ᠋ᠨ ᠬᠢᠨ ᠠᠮᠠ ᠠᠮᠠᠨ ᠳ᠋ᠠᠭᠠᠨ᠄
— ᠰᠡᠷᠡᠭᠡᠨᠡᠩ ᠭᠤᠸᠠᠢ᠂ ᠦᠬᠦᠬᠦ ᠬᠠᠮᠢᠭᠠ ᠴᠤ᠌ ᠪᠠᠢᠭᠰᠠᠨ ᠶᠤᠮ ᠪᠣᠢ᠂ ᠨᠠᠶᠠ ᠠᠭᠤᠵᠢᠭᠤᠬᠠᠨ ᠬᠦᠷᠦᠨᠡ᠃ ᠨᠠᠭᠠᠨᠠ ᠨᠢ ᠳᠠᠯᠠᠨ ᠨᠠᠰᠤᠨ ᠤ᠋ ᠨᠠᠢᠷ᠂ ᠨᠠᠶᠠᠨ ᠨᠠᠰᠤᠨ ᠤ᠋ ᠨᠠᠢᠷ ᠬᠢᠨᠡ᠂ ᠪᠣᠯᠤᠭᠠ ᠦᠭᠡᠢ ᠭᠡᠯᠴᠡᠵᠡᠢ᠃ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠡᠳᠡᠨ ᠦ᠌ ᠦᠭᠡ ᠶ᠋ᠢ ᠲᠤᠭᠤᠯᠤᠭᠰᠠᠨ ᠰᠢᠨᠵᠢ ᠦᠭᠡᠢ᠄
— ᠭᠠᠵᠢᠳ ᠠ᠋᠂ ᠪᠢ ᠬᠡᠳᠦᠨ ᠣᠨ ᠳ᠋ᠤ᠌ ᠬᠣᠲᠠ ᠣᠷᠣᠯᠠ? ᠭᠡᠵᠦ ᠠᠪᠠᠭᠠᠢ ᠳ᠋ᠠᠭᠠᠨ ᠬᠠᠨᠳᠤᠬᠤ ᠳ᠋ᠤ᠌ ᠠᠪᠠᠭᠠᠢ ᠨᠢ ᠬᠤᠷᠤᠭᠤ ᠳᠠᠷᠤᠵᠤ᠄
— ᠥᠬᠢᠨ ᠮᠢᠨᠢ ᠶᠢᠰᠦᠲᠡᠢ ᠪᠠᠢᠭᠰᠠᠨ ᠶᠤᠮᠰᠠᠨ᠂ ᠭᠤᠴᠢᠨ ᠳᠥᠷᠪᠡᠨ ᠣᠨ ᠶᠤᠮ ᠤᠤ ᠳᠠ᠃
— ᠵᠠ ᠲᠡᠢᠮᠦ ᠴᠦ᠍ ᠪᠠᠢᠭᠠ᠂ ᠭᠤᠴᠢᠨ ᠳᠥᠷᠪᠡᠨ ᠣᠨ ᠶᠤᠮ ᠳ᠋ᠠᠭ᠂ ᠪᠢ ᠲᠡᠷᠡ ᠦᠶᠡ ᠳ᠋ᠦ᠍ ᠲᠣᠮᠣᠭᠠ ᠦᠭᠡᠢ ᠮᠠᠭᠤᠬᠠᠢ ᠴᠤ᠌ ᠪᠠᠢᠵᠤ᠂ ᠬᠠᠷᠢᠨ ᠴᠢᠳᠠᠯ ᠲᠡᠩᠬᠡᠭᠡ ᠰᠠᠢᠲᠠᠢ ᠴᠤ᠌ ᠪᠠᠢᠵᠤ᠂ ᠭᠤᠴᠢᠨ ᠳᠥᠷᠪᠡᠨ ᠣᠨ ᠳ᠋ᠤ᠌ ᠬᠣᠲᠠ ᠣᠷᠣᠬᠤ ᠶᠠᠭᠤᠮᠠ ᠪᠣᠯᠤᠯᠠ᠃
— ᠲᠠ ᠮᠢᠨᠢ ᠠ᠋᠂ ᠵᠢᠭᠠᠬᠠᠨ ᠴᠢᠮᠡᠭᠡ ᠦᠭᠡᠢ ᠪᠠᠢᠭᠠᠴᠢ! ᠰᠡᠷᠡᠭᠡᠨᠡᠩ ᠭᠤᠸᠠᠢ ᠶ᠋ᠢᠨ ᠶᠠᠷᠢᠶᠠ ᠶ᠋ᠢ ᠰᠣᠨᠣᠰ ᠭᠡᠵᠦ ᠶᠡᠬᠡ ᠣᠯᠵᠠᠭᠤᠷᠬᠠᠨ ᠰᠣᠨᠢᠷᠬᠠᠭᠰᠠᠨ ᠪᠠᠢᠳᠠᠯ ᠲᠠᠢ ᠨᠢᠭᠡᠳᠦᠯ ᠦ᠋ᠨ ᠳᠠᠷᠤᠭᠠ ᠨᠡᠢᠲᠡ ᠶ᠋ᠢᠨ ᠠᠩᠬᠠᠷᠤᠯ ᠢ᠋ ᠲᠠᠲᠠᠭᠠᠳ ᠴᠢᠮᠡᠭᠡ ᠨᠠᠮᠳᠠᠭᠰᠠᠨ ᠤ᠋ ᠳᠠᠷᠠᠭᠠ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠵᠤ᠄
— ᠣᠳᠣ ᠤᠷᠤᠭᠰᠢ ᠪᠠᠨ ᠨᠡᠭᠦᠭᠡᠳ ᠭᠣᠪᠢ ᠰᠤᠮᠤ ᠣᠷᠣᠴᠢᠬᠠᠭᠰᠠᠨ ᠰᠢᠷᠠ ᠶ᠋ᠢᠨ ᠷᠠᠳᠨᠠ ᠠ᠋ᠴᠠ ᠲᠠᠪᠤᠨ ᠲᠡᠮᠡᠭᠡ ᠬᠥᠯᠥᠰᠥᠯᠡᠭᠡᠳ ᠷᠠᠳᠨᠠ ᠴᠤ᠌ ᠥᠪᠡᠷ ᠢ᠋ᠶ᠋ᠡᠷ ᠵᠢᠷᠭᠤᠭᠠᠨ ᠲᠡᠮᠡᠭᠡ ᠪᠦᠭᠦᠳᠡ ᠠᠷᠪᠠᠨ ᠨᠢᠭᠡᠨ ᠲᠡᠮᠡᠭᠡ᠂ ᠠᠴᠢᠶᠠ ᠲᠠᠢ ᠵᠢᠭᠠᠯ ᠵᠢᠭᠤᠯ ᠵᠠᠷᠤᠬᠤ ᠶᠠᠭᠤᠮᠠ ᠲᠠᠢ᠂ ᠪᠢ ᠭᠠᠭᠴᠠ ᠳᠡᠭᠦᠦ ᠲᠡᠢ ᠪᠡᠨ ᠴᠦ᠍ ᠠᠭᠤᠯᠵᠠᠶᠠ᠂ ᠡᠪᠦᠯ ᠦ᠋ᠨ ᠬᠣᠭᠣᠯᠠᠨ ᠳ᠋ᠤᠨᠢ ᠨᠡᠮᠡᠷᠢ ᠥᠭᠬᠦᠶᠡ᠂ ᠬᠣᠲᠠ ᠬᠦᠷᠢᠶᠡ ᠴᠦ᠍ ᠦᠵᠡᠶᠡ ᠭᠡᠳ ᠭᠠᠷᠤᠭᠠᠳ ᠥᠭᠬᠦᠯᠡ᠃ ᠰᠠᠷᠠ ᠭᠠᠷᠤᠢ ᠯᠠ ᠶᠠᠪᠤᠵᠤ ᠬᠦᠷᠦᠭᠰᠡᠨ ᠶᠦ᠍ᠮ᠃ ᠣᠷᠣᠢᠬᠠᠨ ᠰᠢᠭ᠋ ᠬᠣᠲᠠ ᠣᠷᠣᠴᠢᠬᠠᠭᠰᠠᠨ ᠴᠢᠨᠢ ᠵᠠᠬᠠ ᠬᠢᠵᠠᠭᠠᠷ ᠨᠢ ᠮᠡᠳᠡᠭᠳᠡᠬᠦ ᠦᠭᠡᠢ ᠶᠦ᠍ᠮ᠂ ᠬᠥᠮᠦᠨ ᠠᠮᠢᠲᠠᠨ ᠨᠢ ᠪᠤᠵᠢᠭᠢᠨᠠᠭᠠᠳ ᠮᠠᠰᠢᠨ ᠲᠡᠷᠭᠡ᠂ ᠳᠠᠭᠤ ᠴᠢᠮᠡᠭᠡᠨ ᠡᠴᠡ ᠨᠢ ᠲᠡᠮᠡᠭᠡ᠂ ᠮᠣᠷᠢ᠂ ᠲᠠᠭᠤᠭᠰᠠᠨ ᠬᠡᠳᠦ ᠮᠠᠨᠢ ᠦᠷᠭᠦᠭᠡᠳ ᠠᠯᠳᠠᠴᠢᠬᠠᠬᠤ ᠭᠡᠳ ᠪᠠᠢᠳᠠᠭ᠁ ᠰᠠᠨᠳᠤᠷᠴᠤ ᠲᠡᠪᠡᠳᠡᠵᠦ ᠯᠡ ᠶᠠᠪᠤᠯᠠ᠃ ᠷᠠᠳᠨᠠ ᠮᠢᠨᠢ ᠨᠠᠮᠠ ᠶ᠋ᠢ ᠪᠣᠳᠣᠪᠠᠯ ᠤᠷᠢᠳ ᠨᠢ ᠨᠢᠭᠡ ᠬᠣᠶᠠᠷ ᠬᠣᠲᠠ ᠣᠷᠣᠭᠰᠠᠨ ᠶᠤᠮ ᠭᠡᠰᠡᠨ ᠳ᠋ᠡᠭᠡᠨ ᠤᠰᠤᠨ ᠤ᠋ ᠭᠤᠳᠤᠮᠵᠢᠨ ᠤ᠋ ᠠᠳᠠᠭ ᠭᠡᠳᠡᠭ ᠲᠦ᠍ ᠨᠢᠭᠡ ᠲᠣᠮᠣ ᠬᠦᠷᠡᠩ ᠳ᠋ᠠᠮᠸᠨ ᠬᠠᠭᠠᠯᠭᠠ ᠨᠡᠭᠡᠭᠡᠵᠦ ᠪᠢ ᠴᠢᠨᠢ ᠳᠡᠭᠦᠦ ᠪᠡᠨ ᠣᠯᠵᠤ ᠠᠭᠤᠯᠵᠠᠪᠠ ᠰᠢᠦ ᠳᠡ᠃ ᠬᠠᠰᠢᠶᠠᠨ ᠳ᠋ᠤᠨᠢ ᠲᠡᠮᠡᠭᠡ ᠪᠡᠨ ᠣᠷᠣᠭᠤᠯᠤᠭᠠᠳ ᠠᠴᠢᠶᠠ ᠪᠠᠨ ᠪᠠᠭᠤᠯᠭᠠᠬᠤ ᠭᠡᠰᠡᠨ ᠴᠢᠨᠢ ᠳᠡᠭᠦᠦ ᠮᠢᠨᠢ ᠲᠣᠭᠣᠨᠣ ᠪᠠᠷ ᠢ᠋ᠶ᠋ᠠᠨ ᠴᠢᠳᠧᠩ ᠢ᠋ᠶ᠋ᠡᠷ ᠭᠠᠷᠭᠠᠭᠰᠠᠨ ᠨᠢ ᠬᠠᠰᠢᠶᠠ ᠳᠦᠭᠦᠷᠡᠩ ᠭᠡᠷᠡᠯ ᠲᠡᠢ ᠴᠣ ᠪᠣᠯᠵᠤ᠂ ᠪᠢᠳᠡᠨ ᠴᠦ᠍ ᠲᠠᠪᠠᠲᠠᠢ ᠬᠥᠳᠡᠯᠵᠦ ᠭᠠᠷᠪᠠ ᠳᠠ᠃
ᠵᠠ ᠲᠡᠷᠡ ᠣᠷᠣᠢ ᠠ᠋ᠴᠠ ᠡᠬᠢᠯᠡᠭᠡᠳ ᠯᠡ ᠪᠢ ᠴᠢᠳᠧᠩ ᠭᠡᠳᠡᠭ ᠴᠢᠨᠢ ᠮᠥᠨ ᠲᠠᠭᠠᠲᠠᠢ᠂ ᠬᠥᠮᠦᠨ ᠳ᠋ᠦ᠍ ᠪᠠᠢᠵᠤ ᠪᠠᠢᠭᠤᠱᠢᠲᠠᠢ ᠡᠳ᠋ ᠶᠦ᠍ᠮ ᠠ᠋ ᠭᠡᠵᠦ ᠪᠣᠳᠣᠭᠠᠳ ᠪᠠᠢᠳᠠᠭ ᠪᠣᠯᠴᠢᠬᠠᠪᠠ᠃ ᠡᠢᠮᠦ ᠰᠠᠢᠬᠠᠨ ᠶᠠᠭᠤᠮᠠ ᠲᠠᠢ ᠭᠠᠵᠠᠷ ᠰᠠᠭᠤᠵᠤ ᠪᠠᠢᠭᠠᠳ ᠠᠬᠠ ᠳ᠋ᠠᠭᠠᠨ ᠨᠢᠭᠡ ᠬᠣᠶᠠᠷ ᠢ᠋ ᠣᠯᠤᠭᠠᠳ ᠶᠠᠪᠤᠭᠤᠯᠤᠭᠰᠠᠨ ᠦᠭᠡᠢ ᠮᠥᠨ ᠲᠤᠰᠠ ᠦᠭᠡᠢ ᠬᠥᠮᠦᠨ ᠠ᠋ ᠭᠡᠵᠦ ᠳᠡᠭᠦᠦ ᠪᠡᠨ ᠳᠣᠲᠣᠷᠠ ᠪᠠᠨ ᠵᠢᠮᠡᠯᠡᠬᠦ ᠪᠣᠯᠤᠯᠠ᠃ ᠳᠡᠭᠦᠦ ᠶ᠋ᠢᠨ ᠳ᠋ᠡᠭᠡᠨ ᠥᠭᠭᠦᠭᠰᠡᠨ ᠶᠠᠭᠤᠮᠠ ᠠ᠋ᠴᠠ ᠭᠠᠳᠠᠨᠠ ᠠᠪᠴᠤ ᠣᠴᠢᠭᠰᠠᠨ ᠮᠢᠬᠠ ᠰᠦ᠂ ᠲᠣᠰᠣ᠂ ᠴᠥᠭᠡᠨ ᠬᠤᠷᠠᠭᠠᠨ ᠤ᠋ ᠠᠷᠠᠰᠤ ᠪᠠᠢᠭᠰᠠᠨ ᠢ᠋ ᠮᠢᠨᠢ ᠳᠡᠭᠦᠦ ᠪᠡᠷᠢ ᠬᠣᠶᠠᠷ ᠮᠠᠨᠢ ᠮᠢᠨᠦ ᠪᠣᠳᠣᠵᠤ ᠣᠴᠢᠭᠰᠠᠨ ᠠ᠋ᠴᠠ ᠬᠠᠮᠢᠶᠠ ᠦᠭᠡᠢ ᠠᠶᠠᠲᠠᠢᠬᠠᠨ ᠪᠣᠷᠣᠯᠠᠭᠤᠯᠤᠭᠠᠳ ᠶᠠᠩᠴᠢᠶᠠᠨ ᠪᠣᠯᠭᠠᠭᠠᠳ ᠦᠭᠬᠦᠯᠡ᠃ ᠬᠡᠳᠦᠨ ᠳᠦᠭᠦᠷᠡᠭ ᠢᠶᠠᠨ ᠡᠪᠦᠷᠲᠦᠯᠡᠭᠡᠳ ᠵᠠᠬᠠ ᠳᠡᠯᠭᠡᠭᠦᠷ ᠬᠡᠰᠦᠵᠦ ᠠᠪᠠᠭᠠᠢ ᠥᠬᠢᠨ ᠬᠣᠶᠠᠷ ᠤ᠋ᠨ ᠢ᠋ᠶ᠋ᠠᠷ ᠵᠠᠬᠢᠭᠰᠠᠨ ᠪᠠᠷᠢᠭᠰᠠᠨ ᠢ᠋ ᠠᠪᠴᠤ ᠶᠠᠪᠤᠲᠠᠯᠠ ᠥᠨᠳᠥᠷ ᠬᠣᠷᠰᠢᠶᠠ ᠭᠡᠭᠴᠢ ᠶ᠋ᠢᠨ ᠲᠡᠮᠦᠷ ᠲᠠᠰᠤᠭ ᠲᠤ᠌ ᠨᠥᠭᠥᠭᠡ ᠴᠢᠳᠧᠩ ᠦ᠋ᠨ ᠮᠠᠨᠢ ᠰᠢᠯ ᠬᠢᠮᠳᠠᠬᠠᠨ ᠨᠢ ᠠᠷᠭᠠ ᠦᠭᠡᠢ ᠪᠠᠢᠵᠤ ᠪᠠᠢᠨᠠ᠃ ᠵᠠ ᠡᠨᠡ ᠡᠴᠡ ᠴᠢᠨᠢ ᠪᠠᠬᠠᠨ ᠢ᠋ ᠠᠪᠴᠢᠬᠠᠭᠠᠳ ᠴᠠᠭᠠᠨ ᠳᠡᠭᠡᠰᠦ ᠪᠡᠷ ᠣᠭᠣᠰᠣᠷᠯᠠᠭᠠᠳ ᠳᠡᠭᠦᠵᠢᠯᠡᠭᠡᠳ ᠪᠠᠢᠳᠠᠭ ᠬᠡᠷᠡᠭ ᠭᠡᠵᠦ ᠪᠣᠳᠣᠭᠠᠳ᠂ ᠥᠭᠬᠦ ᠠᠢᠯ ᠪᠦᠬᠦᠨ ᠢ᠋ᠶ᠋ᠡᠨ ᠪᠦᠷᠢᠳᠬᠡᠭᠡᠳ ᠬᠠᠰᠢᠶᠠ ᠰᠠᠷᠠᠪᠴᠢ᠂ ᠫᠥᠩᠵᠡ ᠪᠡᠨ ᠲᠣᠭᠠᠯᠠᠭᠠᠳ ᠬᠠᠭᠠᠴᠠᠬᠤ ᠪᠠᠷ ᠨᠢ ᠰᠣᠯᠢᠨᠠ᠂ ᠲᠡᠨᠳᠡ ᠣᠴᠢᠭᠰᠠᠨ ᠬᠣᠢᠨᠠ ᠪᠠᠨ ᠬᠤᠳᠠᠯᠳᠤᠵᠤ ᠠᠪᠬᠤ ᠴᠤ᠌ ᠬᠥᠮᠦᠨ ᠭᠠᠷᠤᠨᠠ ᠭᠡᠵᠦ ᠪᠣᠳᠣᠭᠠᠳ ᠵᠠᠭᠤᠨ ᠰᠢᠷᠬᠡᠭ ᠢ᠋ ᠪᠢᠴᠢᠭᠦᠯᠵᠦ ᠠᠪᠤᠭᠠᠳ ᠡᠭᠦᠷᠴᠦ ᠳᠡᠭᠦᠦ ᠶ᠋ᠢᠨ ᠢ᠋ᠶ᠋ᠡᠷ ᠫᠢᠩ ᠳ᠋ᠦ᠍ ᠨᠢᠭᠤᠴᠢᠬᠠᠳᠠᠭ ᠪᠠᠢᠭᠠ᠃ ᠳᠡᠭᠦᠦ ᠮᠢᠨᠢ ᠴᠦ᠍ ᠶᠠᠭᠠᠬᠢᠬᠤᠪ ᠬᠥᠭᠡᠷᠦᠬᠦᠢ ᠨᠢᠭᠡ ᠵᠢᠵᠢᠭ ᠳᠠᠷᠤᠭᠠ ᠤᠬᠠᠭᠠᠨᠲᠠᠢ ᠯᠠ ᠠᠵᠢᠯ ᠬᠢᠳᠡᠭ ᠶᠦ᠍ᠮ ᠪᠠᠢᠵᠤ ᠬᠠᠰᠢᠶᠠ᠂ ᠭᠡᠷ ᠣᠷᠣᠨ᠂ ᠡᠬᠡᠨᠡᠷ ᠬᠡᠦᠬᠡᠳ ᠨᠢ ᠭᠣᠶᠣ ᠰᠠᠢᠬᠠᠨ ᠯᠠ ᠶᠤᠮ᠂ ᠳᠠᠩᠴᠤ ᠶᠠᠭᠤᠮᠠ ᠪᠠᠷ ᠶᠠᠭᠤᠮᠠ ᠬᠢᠵᠦ ᠴᠢᠳᠠᠳᠠᠭ ᠦᠭᠡᠢ ᠠᠵᠢᠯ ᠮᠠᠭᠤᠲᠠᠢ᠂ ᠥᠷᠥᠴᠢᠬᠡᠭᠰᠡᠨ ᠪᠤᠷᠬᠠᠨ ᠰᠢᠭ᠋ ᠡᠷᠬᠡ ᠲᠠᠩᠬᠢ ᠶᠤᠮ ᠳᠠ᠃ ᠪᠢᠳᠡᠨ ᠲᠡᠢ ᠠᠳᠠᠯᠢᠬᠠᠨ ᠥᠷᠯᠥᠭᠡ ᠪᠣᠰᠤᠭᠠᠳ ᠯᠠ ᠮᠠᠯ ᠢ᠋ᠶ᠋ᠠᠨ ᠳᠠᠭᠠᠭᠠᠳ ᠭᠠᠷᠤᠨᠠ ᠭᠡᠬᠦ ᠪᠢᠰᠢ᠂ ᠬᠠᠶᠠ ᠨᠢᠭᠡ ᠬᠤᠷᠰᠢᠶᠠ ᠳᠡᠯᠭᠡᠭᠦᠷ ᠭᠡᠳ ᠰᠠᠪᠠ ᠠᠪᠤᠭᠠᠳ ᠯᠠ ᠭᠠᠷᠬᠤ ᠶᠤᠮ᠃ ᠲᠡᠢᠮᠦ ᠤᠯᠤᠰ ᠤ᠋ᠨ ᠴᠢᠨᠢ ᠳᠡᠷᠭᠡᠳᠡ ᠪᠢ ᠣᠯᠠᠨ ᠬᠣᠨᠣᠵᠤ ᠴᠢᠳᠠᠳᠠᠭ ᠶᠤᠮ ᠪᠢᠰᠢ᠂ ᠶᠠᠭᠤᠮᠠ ᠪᠦᠭᠦᠳᠡ ᠨᠢ ᠰᠡᠳᠬᠢᠯ ᠳ᠋ᠦ᠍ ᠳᠠᠭᠠᠷᠠᠳᠠᠭ ᠦᠭᠡᠢ᠂ ᠦᠢᠮᠡᠭᠡᠨ ᠱᠤᠤᠭᠢᠶᠠᠨ ᠳ᠋ᠤᠨᠢ ᠶᠠᠳᠠᠷᠠᠵᠤ ᠭᠦᠢᠴᠡᠯᠡ᠂ ᠶᠡᠷᠦ ᠨᠢ ᠪᠤᠴᠠᠬᠤ ᠪᠠᠨ ᠪᠣᠳᠣᠭᠠᠳ ᠶᠠᠭᠤᠮᠠ ᠬᠡᠦᠮᠡ ᠪᠡᠨ ᠴᠦ᠍ ᠡᠮᠬᠢᠯᠡᠵᠦ ᠠᠪᠤᠯᠠ᠃
ᠮᠠᠷᠭᠠᠰᠢ ᠡᠷᠲᠡ ᠭᠠᠷᠤᠨᠠ ᠭᠡᠳ ᠲᠡᠮᠡᠭᠡ ᠪᠡᠨ ᠠᠪᠴᠤ ᠢᠷᠡᠭᠡᠳ ᠪᠡᠯᠡᠳᠦᠭᠡᠳ ᠪᠠᠢᠭᠰᠠᠨ ᠴᠢᠨᠢ ᠳᠡᠭᠦᠦ ᠪᠡᠷᠢ ᠬᠣᠶᠠᠷ ᠮᠠᠨᠢ ᠨᠠᠳᠠ ᠳ᠋ᠤ᠌ ᠪᠠᠬᠠᠨ ᠦᠨᠡᠲᠡᠢ ᠴᠠᠨᠠᠲᠡᠢ ᠪᠡᠯᠡᠭ ᠪᠠᠷᠢᠵᠤ ᠥᠭᠳᠡᠭ ᠪᠣᠯᠪᠠ ᠠ᠋᠃ ᠳᠠᠷᠠᠭᠠ ᠨᠢ ᠨᠠᠮᠠ ᠶ᠋ᠢ ᠲᠡᠢᠯᠡᠯᠡ᠃ ᠵᠠᠩ ᠢ᠋ ᠨᠢ ᠮᠡᠳᠡᠬᠦ ᠦᠭᠡᠢ ᠣᠷᠣᠰ ᠠᠷᠢᠬᠢ ᠤᠤᠭᠤᠴᠢᠬᠠᠭᠰᠠᠨ ᠴᠢᠨᠢ ᠦᠭᠡ ᠣᠯᠠᠰᠢᠷᠠᠵᠤ ᠳᠡᠭᠦᠦ ᠳ᠋ᠡᠭᠡᠨ ᠠᠭᠰᠤᠮ ᠲᠠᠯᠪᠢᠵᠤ ᠭᠠᠷᠴᠠᠢ᠃
— ᠪᠢ ᠴᠢᠮᠠ ᠳ᠋ᠤ᠌ ᠬᠣᠭᠣᠯᠠ ᠬᠦᠷᠭᠡᠵᠦ ᠪᠠᠷᠠ ᠶ᠋ᠢ ᠴᠢᠨᠢ ᠨᠢᠭᠡ ᠬᠠᠷᠠᠶᠠ ᠭᠡᠵᠦ ᠢᠷᠡᠬᠦ ᠳ᠋ᠡᠭᠡᠨ ᠳᠠᠪᠤᠤ ᠳᠠᠯᠢᠩᠪᠤᠤ ᠭᠣᠷᠢᠳᠠᠵᠤ ᠢᠷᠡᠭᠡ ᠦᠭᠡᠢ᠂ ᠴᠢ ᠶᠠᠭᠠᠬᠢᠭᠰᠠᠨ ᠤᠬᠠᠭᠠᠨ ᠳ᠋ᠤ᠌ ᠤᠬᠤᠨᠠ ᠤᠨᠠᠴᠢᠬᠠᠭᠰᠠᠨ ᠠᠮᠢᠲᠠᠨ ᠪᠣᠢ᠂ ᠶᠡᠷᠦ ᠨᠢ ᠬᠣᠲᠠ ᠭᠠᠵᠠᠷ ᠪᠥᠭᠰᠡᠨ ᠠᠯᠪᠠᠨ ᠤ᠋ ᠵᠢᠷᠭᠠᠯ ᠲᠠᠢ ᠲᠠ ᠨᠠᠷ ᠮᠠᠯᠴᠢᠨ ᠠᠷᠠᠳ ᠢ᠋ ᠪᠡᠨ ᠪᠣᠳᠣᠳᠠᠭ ᠦᠭᠡᠢ ᠶᠠᠭᠠᠬᠢᠭᠰᠠᠨ ᠤᠯᠤᠰ ᠪᠣᠢ᠃ ᠥᠪᠡᠷᠰᠡᠳ ᠢ᠋ᠶ᠋ᠡᠷ ᠡᠢᠮᠦ ᠰᠢᠨᠡᠬᠡᠨ ᠶᠠᠭᠤᠮᠠ ᠬᠡᠷᠡᠭᠯᠡᠵᠦ ᠪᠠᠢᠵᠤ ᠬᠤᠷᠰᠢᠶᠠ ᠳᠡᠯᠭᠡᠭᠦᠷ ᠲᠡᠭᠡᠨ ᠡᠯᠪᠡᠭ ᠬᠢᠮᠳᠠ ᠬᠡᠪᠲᠡᠵᠦ ᠪᠠᠢᠭᠠ ᠶᠠᠭᠤᠮᠠᠨ ᠠ᠋ᠴᠠ ᠭᠠᠭᠴᠠ ᠬᠣᠶᠠᠷ ᠢ᠋ ᠴᠦ᠍ ᠭᠡᠰᠡᠨ ᠠᠪᠤᠭᠠᠳ ᠶᠠᠪᠤᠭᠤᠯᠴᠢᠬᠠᠳᠠᠭ ᠦᠭᠡᠢ᠃ ᠲᠠ ᠨᠠᠷ ᠤ᠋ᠨ ᠡᠭᠦᠨ ᠢ᠋ᠶ᠋ᠡᠷ ᠴᠢᠨᠢ ᠪᠢ ᠶᠠᠭᠠᠬᠢᠬᠤ ᠶᠤᠮ? ᠭᠡᠳ ᠨᠥᠭᠥᠭᠡ ᠪᠡᠯᠡᠭ ᠢ᠋ ᠨᠢ ᠪᠤᠴᠠᠭᠠᠵᠤ ᠴᠢᠯᠠᠭᠤᠳᠠᠵᠤ ᠪᠦᠷ ᠰᠢᠪᠰᠢᠭ ᠢᠶᠡᠨ ᠲᠠᠷᠢᠵᠠᠢ᠃
ᠳᠡᠭᠦᠦ ᠮᠠᠨᠢ ᠨᠠᠮᠠ ᠶ᠋ᠢ ᠠᠷᠭᠠᠳᠠᠵᠤ ᠠᠬᠠ ᠮᠢᠨᠢ ᠶᠠᠭᠤ ᠠᠪᠬᠤ ᠭᠡᠰᠡᠨ ᠶᠦᠮ ᠪᠣᠯ ᠳᠠ ᠬᠡᠯᠡᠭᠡᠴᠢ ᠭᠡᠵᠦ ᠤᠴᠠᠭᠠᠷᠯᠠᠭᠠᠳ ᠪᠠᠢᠬᠤᠯᠠᠷ ᠨᠢ ᠭᠠᠭᠴᠠ ᠰᠢᠷᠬᠡᠭ ᠡᠢᠮᠦ ᠴᠢᠳᠧᠩ ᠴᠦ᠍ ᠭᠡᠰᠡᠨ ᠪᠣᠯᠤᠭᠰᠠᠨ ᠦᠭᠡᠢ ᠦᠦ! ᠭᠡᠳ ᠴᠢᠳᠧᠩ ᠢ᠋ ᠨᠢ ᠵᠢᠭᠠᠯᠠ᠃ ᠲᠠ ᠨᠠᠷ ᠮᠠᠯᠴᠢᠨ ᠠᠷᠠᠳ ᠪᠢᠳᠡᠨ ᠢ᠋ ᠪᠡᠨ ᠶᠡᠷᠦ ᠨᠢ ᠶᠠᠭᠤ ᠪᠠᠷ ᠭᠡᠢᠭᠦᠯᠵᠦ ᠪᠠᠢᠨᠠ! ᠪᠢᠳᠡ ᠴᠢᠨᠢ ᠥᠭᠡᠬᠦᠨ ᠳ᠋ᠧᠩ ᠦ᠋ᠨ ᠭᠡᠷᠡᠯ ᠳ᠋ᠦ᠍ ᠰᠣᠬᠣᠷ ᠶᠤᠮ ᠰᠢᠭ᠋᠁ ᠡᠨᠡ ᠲᠡᠷᠡ ᠯᠠ ᠭᠡᠰᠡᠨ ᠶᠠᠭᠤᠮᠠ ᠪᠠᠢᠬᠠ᠃ ᠳᠡᠭᠦᠦ ᠮᠠᠨᠢ ᠡᠨᠡ ᠴᠢᠨᠢ ᠴᠠᠭᠠᠨᠠ ᠪᠠᠨ ᠴᠠᠬᠢᠯᠭᠠᠨ ᠰᠲ᠋ᠠᠨᠼ ᠭᠡᠳᠡᠭ ᠶᠠᠭᠤᠮᠠ ᠦᠭᠡᠢ ᠪᠣᠯ ᠠᠰᠠᠳᠠᠭ ᠦᠭᠡᠢ ᠶᠠᠭᠤᠮᠠ ᠭᠡᠬᠦ ᠳ᠋ᠦ᠍ᠨᠢ ᠪᠢ ᠴᠦ᠍ ᠶᠠᠭᠠᠬᠢᠬᠤᠪ ᠦᠬᠡᠷ ᠰᠢᠭ ᠵᠢᠳᠬᠦᠭᠡᠳ ᠵᠥᠷᠢᠭᠡ ᠪᠢᠵᠡ᠂ ᠶᠠᠭᠠᠬᠢᠳᠠᠭ ᠶᠤᠮ ᠪᠣᠢ? ᠰᠲ᠋ᠠᠨᠼ ᠮᠢᠲ᠋ᠠᠨᠼ ᠲᠠᠢ ᠨᠢ ᠠᠪᠬᠤ ᠦᠭᠡᠢ ᠦᠦ? ᠭᠡᠵᠦ ᠵᠠᠩᠨᠠᠭᠰᠠᠨ ᠭᠡᠨᠡ᠃
— ᠠᠬᠠ ᠮᠢᠨᠢ ᠲᠡᠷᠡ ᠴᠢᠨᠢ ᠶᠡᠬᠡ ᠦᠨᠡᠲᠡᠢ᠂ ᠪᠠᠰᠠ ᠲᠡᠭᠡᠭᠡᠳ ᠶᠡᠬᠡ ᠠᠵᠢᠯᠲᠠᠢ ᠪᠠᠢᠳᠠᠭ ᠶᠠᠭᠤᠮᠠ ᠭᠡᠬᠦ ᠳ᠋ᠦ᠍ᠨᠢ ᠪᠢ ᠰᠣᠭᠲᠣᠭᠤ ᠵᠣᠯᠢᠭ ᠴᠢᠨᠢ ᠪᠦᠷ ᠭᠠᠯᠵᠠᠭᠤᠷᠠᠵᠤ ᠳᠡᠭᠦᠦ ᠪᠡᠨ ᠪᠠᠷᠢᠵᠤ ᠠᠯᠠᠭᠠᠳᠠᠭᠠᠳ᠄
— ᠴᠢ ᠮᠠᠯᠴᠢᠨ ᠠᠷᠠᠳ ᠤ᠋ᠳ ᠢ᠋ ᠪᠠᠰᠤᠵᠤ ᠳᠣᠷᠣᠮᠵᠢᠯᠠᠵᠤ ᠪᠠᠢᠨᠠ ᠤᠤ? ᠪᠢᠳᠡᠨ ᠳ᠋ᠦ᠍ ᠲᠡᠷᠡ ᠪᠠᠢᠲᠤᠭᠠᠢ ᠶᠠᠭᠤᠮᠠ ᠬᠤᠳᠠᠯᠳᠤᠭᠠᠳ ᠠᠪᠬᠤ ᠮᠥᠩᠭᠥ ᠪᠠᠢᠳᠠᠭ ᠦᠭᠡᠢ᠂ ᠭᠠᠭᠴᠠᠬᠠᠨ ᠬᠣᠲᠠ ᠶ᠋ᠢᠨ ᠲᠠ ᠨᠠᠷ ᠲᠤ᠌ ᠪᠠᠢᠳᠠᠭ ᠬᠡᠷᠡᠭ ᠦᠦ? ᠭᠡᠳ ᠯᠡ ᠤᠯᠠᠮ ᠡᠪᠳᠴᠢᠩᠨᠡᠭᠰᠡᠨ ᠶᠦᠮ ᠭᠡᠨᠡ ᠪᠢᠯᠡ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠦᠦᠷ ᠭᠡᠭᠡᠷᠡᠵᠦ ᠪᠣᠰᠤᠭᠠᠳ ᠯᠠ ᠶᠠᠭᠤᠮᠠ ᠬᠡᠦᠮᠡ ᠪᠡᠨ ᠶᠠᠩᠵᠤᠯᠠᠵᠤ᠂ ᠥᠨᠥ ᠬᠣᠶᠠᠷ ᠠᠪᠳᠠᠷᠠ ᠲᠠᠢ ᠪᠠᠨ ᠬᠡᠷᠡᠭ ᠦᠭᠡᠢ ᠶᠠᠭᠤᠮᠠ ᠠᠪᠴᠢᠬᠠᠵᠤ ᠭᠡᠵᠦ ᠮᠡᠳᠡᠯᠡ᠃ ᠭᠡᠬᠦ ᠳ᠋ᠡᠭᠡᠨ ᠡᠳᠡ ᠨᠠᠷ ᠲᠤ᠌ ᠡᠳᠦᠢ ᠣᠯᠠᠨ ᠢ᠋ ᠠᠪᠤᠭᠰᠠᠨ ᠭᠡᠵᠦ ᠬᠡᠯᠡᠭᠡ ᠦᠭᠡᠢ ᠨᠢ ᠶᠠᠭᠠᠬᠢᠮᠤᠢ ᠭᠡᠵᠦ ᠳᠣᠲᠣᠷᠠ ᠪᠠᠨ ᠵᠠᠯᠪᠠᠷᠢᠭᠠᠳ᠄
— ᠣᠳᠣ ᠡᠨᠡ ᠨᠣᠪᠰᠢ ᠪᠠᠨ ᠶᠠᠭᠠᠬᠢᠨᠠ ᠡᠨᠳᠡ ᠣᠷᠬᠢᠪᠠᠯ ᠬᠣᠲᠠ ᠶ᠋ᠢᠨ ᠬᠢᠨ ᠦ᠌ ᠰᠢᠪᠰᠢᠭ ᠪᠣᠯᠤᠨᠠ᠃ ᠲᠡᠭᠡᠭᠰᠡᠨ ᠳ᠋ᠦ᠍ ᠣᠷᠣᠪᠠᠯ ᠬᠡᠭᠡᠷᠡ ᠠᠪᠠᠴᠢᠭᠠᠳ ᠬᠠᠶᠠᠶᠠ ᠭᠡᠵᠦ ᠪᠣᠳᠣᠭᠠᠳ ᠢᠰᠡᠭᠡᠢ ᠳ᠋ᠦ᠍ ᠣᠷᠢᠶᠠᠵᠤ ᠠᠴᠢᠵᠤ ᠣᠷᠬᠢᠭᠠᠳ ᠭᠠᠷᠪᠠ ᠳᠠ᠃ ᠳᠡᠭᠦᠦ ᠮᠠᠨᠢ ᠴᠤ᠌ ᠭᠣᠮᠣᠳᠠᠭᠰᠠᠨ ᠪᠣᠯᠤᠯᠲᠠᠢ ᠶᠣᠰᠣ ᠭᠦᠢᠴᠡᠳᠬᠡᠵᠦ ᠭᠠᠷᠭᠠᠵᠤ ᠥᠭᠭᠦᠭᠰᠡᠨ ᠪᠣᠯᠤᠯᠠ᠃ ᠵᠠᠮ ᠳ᠋ᠠᠭᠠᠨ ᠬᠡᠭᠡᠷᠡ ᠬᠠᠶᠠᠴᠢᠬᠠᠶᠠ ᠭᠡᠰᠡᠨ ᠴᠢᠨᠢ ᠷᠠᠳᠨᠠ ᠠ᠋ᠴᠠ ᠴᠤ᠌ ᠵᠣᠪᠠᠯᠠ᠃ ᠲᠡᠭᠡᠭᠡᠳ ᠬᠡᠷᠡᠭ ᠦᠭᠡᠢ ᠴᠦ᠍ ᠭᠡᠰᠡᠨ ᠪᠦᠷᠢᠨ ᠪᠦᠲᠦᠨ ᠨᠡᠯᠢᠶᠡᠳ ᠬᠡᠳᠦᠨ ᠳᠦᠭᠦᠷᠡᠭ ᠢ᠋ᠶ᠋ᠡᠷ ᠠᠪᠤᠭᠰᠠᠨ ᠰᠢᠨᠡ ᠶᠠᠭᠤᠮᠠ ᠶ᠋ᠢ ᠴᠢᠨᠢ ᠪᠠᠰᠠ ᠬᠠᠶᠠᠴᠢᠬᠠᠵᠤ ᠴᠢᠳᠠᠬᠤ ᠦᠭᠡᠢ ᠶᠦᠮ ᠪᠠᠢᠨᠠ᠃ ᠲᠡᠭᠡᠭᠰᠡᠭᠡᠷ ᠶᠠᠪᠤᠭᠠᠳ ᠠᠪᠤᠭᠠᠳ ᠢᠷᠡᠴᠡᠭᠡᠳᠡᠭ ᠪᠠᠢᠭᠠ᠃ ᠲᠡᠭᠡᠭᠡᠳ ᠠᠪᠠᠭᠠᠢ ᠬᠡᠦᠬᠡᠨ ᠳ᠋ᠡᠭᠡᠨ ᠴᠦ᠍ ᠦᠵᠡᠭᠦᠯᠬᠦ ᠦᠭᠡᠢ ᠨᠢᠭᠤᠭᠠᠳ ᠪᠥᠷᠢᠶᠡᠰᠦᠨ ᠦ᠌ ᠪᠡᠷ ᠮᠠᠭᠤ ᠫᠥᠩᠵᠠᠨ ᠤ᠋ ᠲᠠᠭᠠᠵᠠ ᠣᠷᠣᠢ ᠬᠣᠶᠠᠷ ᠤ᠋ᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠴᠢᠬᠢᠵᠦ ᠣᠷᠬᠢᠭᠠᠳ ᠬᠣᠷᠢᠨ ᠵᠢᠯ ᠪᠣᠯᠤᠭᠰᠠᠨ ᠬᠡᠷᠡᠭ ᠰᠢᠦ ᠳᠡ ᠭᠡᠬᠦ ᠳ᠋ᠦ᠍ ᠠᠪᠠᠭᠠᠢ ᠨᠢ ᠲᠠᠰᠤᠯᠵᠤ᠄
— ᠲᠡᠢᠮᠦ ᠪᠠᠢᠬᠠ ᠠ᠋ ᠨᠢᠭᠡ ᠲᠡᠮᠡᠭᠡ ᠡᠴᠡ ᠬᠣᠶᠠᠷ ᠴᠠᠭᠠᠨ ᠬᠠᠢᠷᠴᠠᠭ ᠲᠠᠢ ᠶᠠᠭᠤᠮᠠ ᠪᠠᠭᠤᠯᠭᠠᠵᠤ ᠬᠠᠷᠠᠭᠳᠠᠭᠰᠠᠨ ᠶᠤᠮ᠂ ᠲᠡᠭᠡᠭᠡᠳ ᠯᠡ ᠠᠯᠠᠭᠠ ᠪᠣᠯᠴᠢᠬᠠᠭᠰᠠᠨ ᠶᠤᠮ᠃ ᠷᠠᠳᠨᠠ ᠶ᠋ᠢᠨ ᠶᠠᠭᠤᠮᠠ ᠪᠠᠢᠵᠤ ᠭᠡᠵᠦ ᠪᠣᠳᠣᠵᠤ ᠪᠠᠢᠭᠰᠠᠨ ᠰᠠᠨᠠᠭᠳᠠᠨᠠ ᠭᠡᠪᠡ᠃
— ᠲᠠ ᠪᠠᠰᠠ ᠡᠨᠡ ᠶᠠᠪᠤᠳᠠᠯ ᠢ᠋ ᠮᠡᠳᠡᠭᠡ ᠦᠭᠡᠢ ᠬᠡᠷᠡᠭ ᠦᠦ? ᠭᠡᠵᠦ ᠨᠢᠭᠡᠳᠦᠯ ᠦ᠋ᠨ ᠳᠠᠷᠤᠭᠠ ᠠᠰᠠᠭᠤᠵᠠᠢ᠃
— ᠠ ᠦᠭᠡᠢ ᠴᠠᠰᠢ ᠂ ᠵᠣᠯᠢᠭ᠂ ᠡᠨᠡᠬᠦᠨ ᠦ᠌ ᠠᠯᠢ ᠮᠤᠩᠬᠠᠭᠯᠠᠵᠤ ᠶᠠᠪᠤᠬᠤ ᠶ᠋ᠢ ᠲᠡᠷᠡ ᠭᠡᠬᠦᠪ᠂ ᠬᠡᠵᠢᠶᠡ ᠥᠩᠭᠡᠷᠡᠭᠰᠡᠨ ᠬᠣᠢᠨᠠ ᠨᠢ ᠫᠢᠶᠠᠩ ᠨᠢ ᠲᠤᠭᠤᠯᠳᠠᠳᠠᠭ ᠶᠤᠮ ᠭᠡᠬᠦ ᠳ᠋ᠦ᠍ ᠭᠡᠷ ᠳᠦᠭᠦᠷᠡᠩ ᠢᠨᠢᠶᠡᠳᠦ ᠪᠣᠯᠪᠠ᠃
ᠰᠡᠷᠡᠭᠡᠨᠡᠩ ᠭᠤᠸᠠᠢ ᠥᠨᠳᠡᠢᠵᠦ᠄
— ᠵᠠ ᠲᠡᠭᠡᠭᠡᠳ1954 ᠣᠨ ᠳ᠋ᠤ᠌ ᠨᠢᠭᠡᠳᠦᠯ ᠰᠲ᠋ᠠᠨᠼ ᠲᠠᠢ ᠪᠣᠯᠵᠤ ᠪᠠᠢᠭᠠ ᠭᠡᠵᠦ ᠳᠤᠭᠤᠯᠤᠭᠠᠳ ᠨᠠᠭᠠᠳᠤᠮ ᠤ᠋ᠨ ᠤᠷᠢᠳᠬᠠᠨ ᠨᠢᠭᠡ ᠥᠷᠯᠥᠭᠡ ᠡᠷᠲᠡ ᠭᠡᠭᠴᠢ ᠶ᠋ᠢᠨ ᠡᠪᠦᠯᠵᠢᠶᠡ ᠣᠷᠣᠵᠤ ᠂ ᠨᠥᠭᠥᠭᠡ ᠬᠣᠶᠠᠷ ᠢ᠋ ᠪᠡᠨ ᠠᠪᠠᠴᠢᠵᠤ ᠦᠭᠬᠦᠶᠡ ᠭᠡᠳ ᠭᠠᠷᠤᠭᠰᠠᠨ ᠨᠢ ᠲᠡᠷᠡ ᠳᠠ ᠭᠡᠬᠦ ᠳ᠋ᠦ᠍᠂ ᠠᠪᠠᠭᠠᠢ ᠨᠢ ᠰᠢᠭᠦᠷᠡᠨ ᠠᠪᠴᠤ᠄
— ᠪᠢ ᠲᠡᠭᠡᠬᠦ ᠳ᠋ᠦ᠍ ᠬᠡᠳᠦᠨ ᠢᠯᠡᠭᠦᠦ ᠲᠤᠭᠤᠷᠭᠠ ᠪᠠᠨ ᠵᠠᠷᠤᠬᠤ ᠭᠡᠳ ᠶᠠᠪᠤᠯᠠ ᠭᠡᠵᠦ ᠪᠣᠳᠣᠵᠤ ᠰᠠᠭᠤᠭᠠ ᠶᠤᠮ ᠰᠢᠦ᠃ ᠳᠡᠷᠡᠨ ᠡᠴᠡ ᠴᠢᠨᠢ ᠪᠣᠯᠤᠭᠠᠳ ᠥᠬᠢᠨ ᠪᠢᠳᠡ ᠬᠣᠶᠠᠷ ᠢ᠋ ᠨᠠᠭᠠᠳᠤᠮ ᠦᠵᠡᠬᠦᠯᠦᠭᠡ ᠦᠭᠡᠢ ᠭᠡᠭᠴᠢ ᠭᠡᠪᠡ᠃ ᠢᠨᠢᠶᠡᠳᠦᠮ ᠱᠤᠤᠭᠢᠶᠠᠨ ᠳᠤᠮᠳᠠᠭᠤᠷ ᠰᠡᠷᠡᠭᠡᠨᠡᠩ ᠭᠤᠸᠠᠢ ᠪᠣᠰᠴᠤ᠄
— ᠵᠠ ᠳᠡᠭᠦᠦ ᠨᠠᠷ ᠮᠢᠨᠢ ᠨᠡᠭᠡᠷᠡᠨ ᠴᠦ᠍ ᠨᠢᠭᠡ ᠮᠠᠯᠴᠢᠨ ᠬᠡᠴᠢᠨᠡᠭᠡᠨ ᠪᠠᠶᠠᠨ ᠮᠥᠩᠭᠥ ᠲᠡᠢ ᠪᠠᠢᠯᠠ ᠴᠤ᠌ ᠭᠡᠰᠡᠨ ᠡᠨᠡ ᠭᠡᠷᠡᠯ ᠢ᠋ ᠴᠢᠨᠢ ᠮᠠᠯᠴᠢᠨ ᠤ᠋ ᠭᠡᠷ ᠲᠦ᠍ ᠠᠪᠴᠢᠷᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠵᠠᠢ᠃ ᠣᠳᠣ ᠠᠢᠮᠠᠭ ᠬᠣᠲᠠ ᠰᠤᠮᠤ ᠨᠢᠭᠡᠳᠦᠯ ᠪᠠᠷᠢᠭᠠᠳᠠ ᠶ᠋ᠢᠨ ᠲᠥᠪ ᠪᠠᠢᠲᠤᠭᠠᠢ ᠮᠠᠯᠴᠢᠳ ᠤ᠋ᠨ ᠭᠡᠷ ᠲᠦ᠍ ᠣᠷᠣᠵᠤ ᠢᠷᠡᠭᠡᠳ ᠪᠠᠢᠨᠠ᠃
ᠠᠬᠠ ᠶ᠋ᠢᠨ ᠬᠢᠨᠢ ᠬᠦᠰᠡᠯ ᠲᠡᠨᠡᠭᠳᠡᠭᠦᠦ ᠡᠬᠢᠯᠡᠭᠰᠡᠨ ᠴᠦ᠍ ᠭᠡᠰᠡᠨ᠂ ᠡᠨᠡ ᠬᠠᠮᠲᠤᠷᠠᠭᠰᠠᠨ ᠬᠥᠳᠡᠭᠡ ᠠᠵᠤ ᠠᠬᠤᠢ ᠶ᠋ᠢᠨ ᠮᠠᠨᠢ ᠪᠤᠶᠠᠨ ᠢ᠋ᠶ᠋ᠠᠷ ᠪᠡᠶᠡᠯᠡᠵᠦ ᠪᠠᠢᠨᠠ᠃ ᠰᠢᠷᠠ ᠰᠢᠪᠠᠭᠤᠲᠤ ᠶ᠋ᠢᠨ ᠠᠮᠠᠨ ᠳ᠋ᠤ᠌ ᠨᠢᠭᠡ ᠵᠠᠭᠤ ᠪᠢᠰᠢ ᠬᠡᠳᠦᠨ ᠵᠠᠭᠤᠨ ᠡᠢᠮᠦ ᠭᠡᠷᠡᠯ ᠤᠳᠠᠬᠤ ᠦᠭᠡᠢ ᠠᠰᠠᠨᠠ᠃
ᠲᠡᠭᠦᠨ ᠢ᠋ ᠬᠠᠷᠠᠭᠰᠠᠨ ᠪᠦᠬᠦᠨ ᠶᠣᠰᠣᠲᠠᠢ ᠯᠠ ᠰᠣᠼᠢᠶᠠᠯᠢᠰᠮ ᠭᠡᠳᠡᠭ ᠴᠢᠨᠢ ᠡᠨᠡ ᠶᠦ᠍ᠮ ᠲᠠᠭ ᠭᠡᠬᠦ ᠡᠴᠡ ᠵᠣᠵᠢ ᠰᠡᠷᠡᠭᠡᠨᠡᠩ ᠦ᠋ᠨ ᠡᠯᠦᠢ ᠬᠤᠯᠤᠢ ᠠᠮᠠ ᠭᠡᠵᠦ ᠬᠡᠨ ᠴᠦ᠍ ᠬᠡᠯᠡᠬᠦ ᠦᠭᠡᠢ ᠪᠢᠵᠡ ᠠ᠋᠂ ᠳᠡᠭᠦᠦ ᠨᠠᠷ ᠮᠢᠨᠢ ᠲᠡᠷᠡ ᠣᠯᠠᠨ ᠭᠡᠷᠡᠯ ᠦ᠋ᠨ ᠲᠥᠯᠥᠭᠡ ᠭᠡᠵᠦ ᠬᠤᠨᠳᠠᠭᠠ ᠡᠷᠭᠦᠪᠡ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠳᠠᠪᠰᠢᠯᠲᠦ᠂ ᠪᠠᠭᠠᠲᠤᠷ ᠂ ᠲᠡᠭᠷᠢ ᠡᠵᠢ
ᠬᠢᠨᠠᠭ᠍ᠴᠢ : ᠴᠣᠯᠮᠣᠨᠲᠤᠶᠠᠭᠠ
2023᠂7᠂27 ᠤ᠋ ᠡᠳᠦᠷ