ᠡᠷᠬᠡ ᠴᠢᠯᠦᠭᠡ - ᠷ᠂ᠴᠣᠢᠨᠣᠮ Р.Чойном - Эрх чөлөө
619ᠡᠷᠬᠡ ᠴᠢᠯᠦᠭᠡ
ᠭᠠᠯ ᠤᠯᠠᠭᠠᠨ ᠴᠡᠴᠡᠭ ᠦ᠋ᠨ ᠳᠡᠭᠡᠷᠡ
ᠭᠠᠰᠠᠯᠠᠩᠲᠤ ᠱᠣᠷᠣᠩ ᠭᠢᠨᠳᠠᠨ ᠤ᠋
ᠭᠠᠪᠠ ᠭᠢᠨᠵᠢ ᠴᠣᠣᠵᠢᠨ ᠳᠡᠭᠡᠷᠡ
ᠨᠠᠰᠤᠲᠠᠨ ᠪᠤᠭᠤᠷᠤᠯ ᠡᠵᠢ ᠶ᠋ᠢᠨ ᠮᠢᠨᠢ
ᠮᠥᠩᠭᠥᠨ ᠪᠤᠭᠤᠷᠤᠯ ᠲᠡᠷᠢᠭᠦᠨ ᠳᠡᠭᠡᠷᠡ
ᠨᠠᠰᠤᠨ ᠪᠠᠭᠠ ᠦᠷᠡ ᠶ᠋ᠢᠨ ᠢ᠋ᠶ᠋ᠡᠨ
ᠬᠥᠩᠭᠡᠨ ᠮᠢᠰᠢᠶᠡᠬᠦ ᠵᠡᠭᠦᠳᠦᠨ ᠳᠡᠭᠡᠷᠡ
ᠨᠠᠮᠠ ᠶ᠋ᠢ ᠦᠳᠡᠬᠦ ᠳ᠋ᠦ᠍ ᠪᠡᠨ ᠤᠬᠢᠯᠠᠭᠰᠠᠨ
ᠬᠡᠦᠬᠡᠨ ᠬᠣᠩᠭᠣᠷ ᠤ᠋ᠨ ᠵᠢᠷᠦᠬᠡᠨ ᠳᠡᠭᠡᠷᠡ
ᠨᠠᠰᠤᠨ ᠲᠤᠷᠰᠢᠳᠠ ᠪᠠᠨ ᠭᠡᠮᠰᠢᠬᠦ
ᠭᠡᠨᠡᠨ ᠵᠠᠯᠠᠭᠤ ᠶ᠋ᠢᠨ ᠠᠯᠳᠠᠭᠠᠨ ᠳᠡᠭᠡᠷᠡ
ᠡᠷᠬᠡ ᠴᠢᠯᠥᠭᠡ ᠴᠢᠮᠠ ᠶ᠋ᠢ
ᠡᠷᠳᠡᠨᠢ ᠪᠣᠯᠭᠠᠨ ᠲᠠᠬᠢᠶᠠ᠂
《ᠡᠵᠡᠨᠲᠦ ᠶᠡᠬᠡ》 ᠲᠥᠷᠥ ᠶ᠋ᠢᠨ
ᠰᠦᠯᠳᠡ ᠨᠢ ᠪᠣᠯᠭᠠᠨ ᠵᠠᠯᠠᠶᠠ᠃
ᠰᠠᠷᠠᠨ ᠳᠤᠷᠠ ᠪᠠᠷ ᠠᠶᠠᠯᠠᠬᠤ
ᠮᠥᠩᠭᠥᠨ ᠲᠩᠷᠢ ᠶ᠋ᠢᠨ ᠳᠣᠯᠢᠶᠠᠨ ᠳᠣᠣᠷᠠ
ᠰᠠᠯᠬᠢᠨ ᠳᠤᠷᠠ ᠪᠠᠷ ᠢᠰᠬᠡᠷᠬᠦ
ᠥᠷᠭᠡᠨ ᠲᠠᠯᠠ ᠶ᠋ᠢᠨ ᠴᠡᠭᠡᠵᠢᠨ ᠳᠡᠭᠡᠷᠡ
ᠰᠠᠨᠠᠨ ᠰᠠᠨᠠᠨ ᠭᠢᠷᠪᠢᠰᠢᠬᠦ
ᠬᠣᠩᠭᠣᠷ ᠦᠷᠡ ᠶ᠋ᠢᠨ ᠰᠡᠪᠡᠯᠭᠡ ᠳᠡᠭᠡᠷᠡ
ᠰᠠᠯᠵᠤ ᠶᠠᠳᠠᠨ ᠬᠣᠴᠣᠷᠤᠭᠰᠠᠨ
ᠢᠲᠡᠭᠡᠯᠲᠦ ᠬᠠᠨᠢ ᠶ᠋ᠢᠨ ᠬᠠᠢᠷᠠ ᠳᠡᠭᠡᠷᠡ
ᠬᠥᠭᠰᠢᠨ ᠭᠠᠭᠴᠠ ᠤᠯᠢᠶᠠᠰᠤᠨ ᠤ᠋
ᠬᠠᠲᠠᠭᠰᠠᠨ ᠭᠠᠭᠴᠠ ᠮᠥᠴᠢᠷ ᠳᠡᠭᠡᠷᠡ
ᠬᠥᠭᠡᠷᠦᠬᠦᠢ ᠮᠠᠭᠤ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ
ᠲᠦᠮᠡᠨ ᠦᠷᠴᠢᠯᠡᠭᠡᠲᠦ ᠨᠢᠭᠤᠷ ᠳᠡᠭᠡᠷᠡ
ᠬᠦᠯᠦᠭ ᠰᠠᠢᠨ ᠮᠣᠷᠢᠳ ᠤ᠋ᠨ ᠢ᠋ᠶ᠋ᠠᠨ
ᠰᠢᠨᠳᠠᠰᠤ ᠴᠤᠴᠠᠬᠤ ᠡᠭᠡᠷᠡᠮᠡ ᠳᠡᠭᠡᠷᠡ
ᠡᠷᠬᠡ ᠴᠢᠯᠥᠭᠡ ᠴᠢᠮᠠ ᠶ᠋ᠢ
ᠡᠷᠳᠡᠨᠢ ᠪᠣᠯᠭᠠᠨ ᠲᠠᠬᠢᠶᠠ
《ᠡᠵᠡᠨᠲᠦ ᠶᠡᠬᠡ》 ᠲᠥᠷᠥ ᠶ᠋ᠢᠨ
ᠰᠦᠯᠳᠡ ᠨᠢ ᠪᠣᠯᠭᠠᠨ ᠵᠠᠯᠠᠶᠠ᠃
ᠬᠣᠷᠸᠠ ᠳ᠋ᠤ᠌ ᠪᠢᠰᠢᠭᠦᠢ ᠲᠣᠬᠢᠶᠠᠯᠳᠤᠬᠤ
ᠵᠢᠰᠤᠷ ᠪᠢᠯᠳᠠᠤᠴᠢ ᠶ᠋ᠢᠨ ᠰᠦᠨᠡᠰᠦᠨ ᠳᠡᠭᠡᠷᠡ
ᠬᠤᠪᠢ ᠶ᠋ᠢᠨ ᠮᠠᠲᠠᠭᠠᠰᠤ ᠰᠢᠷᠭᠤᠭᠤᠯᠤᠭᠰᠠᠨ
ᠬᠠᠭᠤᠷᠮᠠᠭᠴᠢ ᠭᠡᠷᠡᠴᠢ ᠶ᠋ᠢᠨ ᠨᠢᠭᠤᠷ ᠳᠡᠭᠡᠷᠡ
ᠬᠤᠷᠴᠠ ᠢᠷ ᠨᠢ ᠮᠣᠬᠣᠭᠠ ᠦᠭᠡᠢ
ᠭᠠᠩ ᠬᠢᠲᠤᠭᠠᠨ ᠤ᠋ ᠢᠷ ᠦ᠋ᠨ ᠳᠡᠭᠡᠷᠡ
ᠬᠤᠳᠠᠯ ᠬᠡᠷᠡᠭ ᠲᠦ᠍ ᠭᠦᠳᠬᠡᠭᠰᠡᠨ
ᠵᠠᠨᠤᠯᠲᠤ ᠪᠠᠢᠴᠠᠭᠠᠭᠴᠢ ᠶ᠋ᠢᠨ ᠲᠣᠯᠣᠭᠠᠢ ᠳᠡᠭᠡᠷᠡ
ᠡᠷᠡ ᠶ᠋ᠢᠨ ᠰᠠᠢᠨ ᠢ᠋ᠶ᠋ᠠᠷ ᠣᠯᠳᠠᠳᠠᠭ
ᠡᠷᠳᠡᠨᠢ ᠪᠣᠯᠤᠭᠰᠠᠨ ᠲᠠᠮᠠᠬᠢᠨ ᠳᠡᠭᠡᠷᠡ
ᠡᠭᠡᠵᠡᠭ ᠲᠠᠭᠠᠷᠠᠪᠠᠯ ᠵᠠᠶᠠᠭᠠᠳᠠᠭ
ᠬᠠᠭᠠᠷᠬᠠᠢ ᠴᠣᠩᠬᠣᠨ ᠤ᠋ ᠪᠠᠶᠠᠷ ᠳᠡᠭᠡᠷᠡ
ᠡᠨᠡᠷᠢᠯ ᠥᠷᠥᠰᠢᠶᠡᠯ ᠭᠡᠵᠦ ᠪᠠᠢᠳᠠᠭ ᠦᠭᠡᠢ
ᠲᠠᠮᠤ ᠶ᠋ᠢᠨ ᠱᠣᠷᠣᠩ ᠤ᠋ᠨ ᠳᠡᠭᠡᠪᠦᠷ ᠳᠡᠭᠡᠷᠡ
ᠡᠪ ᠦᠭᠡᠢ ᠬᠠᠷᠠᠭᠳᠠᠪᠠᠯ ᠳᠢᠭᠯᠡᠳᠡᠭ
ᠬᠠᠷᠭᠢᠰ ᠵᠢᠵᠢᠭᠦᠷ ᠦ᠋ᠨ ᠡᠭᠡᠯᠵᠢᠨ ᠳᠡᠭᠡᠷᠡ
ᠡᠷᠬᠡ ᠴᠢᠯᠥᠭᠡ ᠴᠢ
ᠠᠶᠤᠩᠭᠠ ᠪᠣᠯᠵᠤ ᠨᠢᠵᠢᠭᠢᠨᠡᠭᠡᠴᠢ᠂
ᠡᠷᠬᠡ ᠴᠢᠯᠥᠭᠡ ᠴᠢ
ᠠᠲ᠋ᠣᠮ ᠪᠣᠯᠵᠤ ᠳᠡᠯᠪᠡᠷᠡᠭᠡᠴᠢ᠃
ᠬᠠᠤᠯᠢ ᠶ᠋ᠢᠨ ᠡᠨᠡᠷᠢᠯ ᠢ᠋ ᠵᠠᠪᠬᠠᠷᠠᠭᠤᠯᠤᠭᠰᠠᠨ
ᠮᠤᠩᠬᠠᠭ ᠪᠠᠢᠴᠠᠭᠠᠭᠴᠢ ᠶ᠋ᠢᠨ ᠲᠣᠯᠣᠭᠠᠢ ᠳᠡᠭᠡᠷᠡ
ᠬᠢᠭᠤᠷᠰᠤ ᠪᠥᠭᠡᠰᠦ ᠢᠵᠠᠭᠠᠨᠠᠭᠰᠠᠨ
ᠲᠠᠮᠲᠤᠭ ᠪᠣᠯᠤᠭᠰᠠᠨ ᠬᠥᠨᠵᠢᠯᠡ ᠳᠡᠭᠡᠷᠡ
ᠬᠤᠪᠢᠩ ᠳᠦᠭᠦᠷᠡᠩ ᠮᠡᠯᠲᠡᠯᠵᠡᠬᠦ
ᠰᠢᠩᠭᠡᠨ ᠰᠢᠷᠭᠠᠯ ᠰᠢᠭᠡᠰᠦᠨ ᠳᠡᠭᠡᠷᠡ
ᠬᠤᠯᠠᠭᠠᠢ ᠶ᠋ᠢᠨ ᠠᠯᠳᠠᠷ ᠢ᠋ ᠬᠠᠢᠷᠠᠯᠠᠭᠰᠠᠨ
ᠠᠪᠤ ᠶ᠋ᠢᠨ ᠬᠡᠮᠡᠬᠦ ᠣᠷᠳᠣᠨ ᠳᠡᠭᠡᠷᠡ
ᠲᠣᠣᠷ ᠲᠠᠢ ᠴᠣᠩᠬᠣ ᠪᠠᠷ ᠬᠠᠭᠠᠷᠢᠬᠤ
ᠢᠳᠡᠷ ᠶᠢᠰᠦ ᠶ᠋ᠢᠨ ᠵᠢᠪᠠᠷ ᠳᠡᠭᠡᠷᠡ
ᠲᠣᠰᠣᠨ ᠤ᠋ ᠨᠦᠮᠵᠦᠭ ᠦᠵᠡᠭᠡ ᠦᠭᠡᠢ
ᠵᠠᠪᠠᠭᠠᠨ ᠰᠢᠷᠠ ᠪᠠᠨᠲᠠᠩ ᠳᠡᠭᠡᠷᠡ
ᠲᠣᠭᠣᠰᠣᠲᠤ ᠬᠣᠷᠸᠠ ᠳ᠋ᠤ᠌ ᠠᠮᠢᠳᠤᠷᠠᠬᠤ ᠳ᠋ᠤ᠌ ᠪᠠᠨ
ᠬᠠᠰᠢᠷ ᠰᠠᠭᠤᠭᠠ ᠦᠭᠡᠢ ᠲᠣᠯᠣᠭᠠᠢ ᠳᠡᠭᠡᠷᠡ
ᠲᠣᠮᠣᠭᠠ ᠭᠡᠨᠡᠨ ᠲᠡᠢ ᠮᠢᠨᠢ ᠬᠣᠯᠪᠣᠭᠳᠠᠭᠰᠠᠨ
ᠡᠷᠡᠭᠦᠦ ᠶ᠋ᠢᠨ ᠬᠠᠤᠯᠢ ᠶ᠋ᠢᠨ ᠵᠦᠢᠯ ᠠᠩᠭᠢ ᠳᠡᠭᠡᠷᠡ
ᠡᠷᠬᠡ ᠴᠢᠯᠥᠭᠡ ᠴᠢ
ᠠᠶᠤᠩᠭᠠ ᠪᠣᠯᠵᠤ ᠨᠢᠵᠢᠭᠢᠨᠡᠭᠡᠴᠢ
ᠡᠷᠬᠡ ᠴᠢᠯᠥᠭᠡ ᠴᠢ
ᠠᠲ᠋ᠣᠮ ᠪᠣᠯᠵᠤ ᠳᠡᠯᠪᠡᠷᠡᠭᠡᠴᠢ!
ᠵᠢᠷᠦᠬᠡᠨ ᠦ᠌ ᠢᠨᠠᠭ ᠠ᠋ᠴᠠ ᠢᠯᠡᠭᠦᠦ ᠳ᠋ᠦ᠍ ᠦᠵᠡᠬᠦ
ᠵᠦᠰᠦᠮ ᠲᠡᠳᠦᠢ ᠬᠠᠷᠠ ᠲᠠᠯᠬᠠᠨ ᠳᠡᠭᠡᠷᠡ
ᠨᠠᠷᠠᠨ ᠰᠠᠷᠠᠨ ᠡᠭᠡᠯᠵᠢᠯᠡᠭᠰᠡᠨ
ᠴᠢᠯᠥᠭᠡᠲᠦ ᠶᠢᠷᠲᠢᠨᠴᠦ ᠶ᠋ᠢᠨ ᠠᠮᠢᠳᠤᠷᠠᠯ ᠳᠡᠭᠡᠷᠡ
ᠨᠠᠷᠠᠰᠤᠨ ᠠ᠋ᠴᠠ ᠤᠳᠠᠬᠤ ᠦᠭᠡᠢ ᠭᠠᠷᠬᠤ
ᠨᠠᠩᠴᠢᠳ ᠡᠷᠭᠦᠨ ᠰᠡᠷᠵᠢᠮᠳᠡᠬᠦ
ᠨᠡᠷᠡᠭᠦᠢ ᠬᠤᠷᠤᠭᠤᠨ ᠤ᠋ ᠳᠣᠯᠢᠶᠠᠨ ᠳᠡᠭᠡᠷᠡ
ᠨᠠᠢᠷ ᠤ᠋ᠨ ᠲᠣᠭᠣᠷᠠ ᠴᠢᠯᠡᠭᠡ ᠦᠭᠡᠢ
ᠣᠷᠬᠢᠨ ᠢᠷᠡᠭᠰᠡᠨ ᠰᠢᠷᠡᠭᠡᠨ ᠳᠡᠭᠡᠷᠡ
ᠡᠷᠬᠡ ᠴᠢᠯᠥᠭᠡ ᠴᠢᠮᠠᠶ᠋ᠢ
ᠡᠷᠳᠡᠨᠢ ᠪᠣᠯᠭᠠᠨ ᠲᠠᠬᠢᠶᠠ᠂
《ᠡᠵᠡᠨᠲᠦ ᠶᠡᠬᠡ》 ᠲᠥᠷᠥ ᠶ᠋ᠢᠨ
ᠰᠦᠯᠳᠡ ᠨᠢ ᠪᠣᠯᠭᠠᠨ ᠵᠠᠯᠠᠶᠠ᠃
ᠲᠤᠰ ᠰᠢᠯᠦᠭ ᠢ᠋ ᠬᠡᠨᠲᠡᠢ ᠠᠢᠮᠠᠭ᠂ ᠳᠠᠷᠬᠠᠨ ᠰᠤᠮᠤ᠂ ᠳᠡᠭᠦᠦ ᠴ· ᠮᠢᠰᠢᠭ ᠡᠴᠡ ᠨᠢ ᠬᠠᠭᠤᠯᠤᠨ ᠠᠪᠤᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠭᠠᠷᠮᠠ
ᠦᠰᠦᠭ ᠬᠠᠲᠠᠭᠰᠠᠨ ᠨᠢ ᠄ ᠭᠠᠸᠠ
ᠬᠢᠨᠠᠭᠴᠢ᠄ ᠭᠠᠷᠮᠠ᠂ ᠲᠤᠭᠴᠢ ᠰᠠᠷᠠᠨᠠ