ᠲᠠᠯᠠ ᠨᠤᠲᠤᠭ ᠲᠤ ᠲᠡᠷᠢᠭᠦᠯᠡᠬᠦ ᠶᠢᠨ ᠲᠥᠯᠦᠭᠡ ᠬᠢ ᠪᠤᠶᠤ ᠬᠦᠢᠲᠡᠨ ᠦ ᠲᠤᠯᠤᠯᠳᠤᠭᠠᠨТал нутагт тэргүүлэхийн төлөөх буюу Хүйтэний тулалдаан
280ᠲᠠᠯᠠ ᠨᠤᠲᠤᠭ ᠲᠤ ᠲᠡᠷᠢᠭᠦᠯᠡᠬᠦ ᠶᠢᠨ ᠲᠥᠯᠦᠭᠡ ᠬᠢ ᠪᠤᠶᠤ ᠬᠦᠢᠲᠡᠨ ᠦ ᠲᠤᠯᠤᠯᠳᠤᠭᠠᠨ
ᠮᠣᠩᠭᠣᠯᠴᠤᠳ ᠤ᠋ᠨ ᠲᠡᠦᠬᠡᠨ ᠲᠤᠯᠤᠯᠳᠤᠭᠠᠨ-ᠲᠠᠨ ᠤ᠋ ᠰᠣᠨᠣᠰᠬᠤ ᠰᠤᠪᠠᠭ ᠦᠵᠡᠭᠦᠯᠵᠦ ᠪᠠᠢᠨᠠ
ᠢᠷᠡᠭᠡᠳᠦᠢ ᠶ᠋ᠢᠨ ᠶᠢᠷᠲᠢᠨᠴᠦ ᠶ᠋ᠢ ᠪᠠᠢᠯᠳᠤᠨ ᠳᠠᠭᠠᠭᠤᠯᠤᠭᠴᠢ ᠴᠢᠩᠭᠢᠰ ᠬᠠᠭᠠᠨ ᠬᠠᠷᠠ ᠪᠠᠭᠠ ᠨᠠᠰᠤᠨ ᠤ᠋ ᠪᠠᠨ ᠬᠠᠢᠷᠠᠲᠤ ᠡᠴᠢᠭᠡ ᠡᠴᠡ ᠪᠡᠨ ᠥᠨᠥᠴᠢᠷᠡᠨ ᠦᠯᠡᠳᠡᠵᠦ᠂ ᠥᠭᠡᠯᠦᠨ ᠡᠬᠡ ᠪᠣᠯᠤᠨ ᠳᠡᠭᠦᠦ ᠨᠠᠷ ᠤ᠋ᠨ ᠬᠠᠮᠲᠤ ᠭᠠᠴᠢᠭᠳᠠᠵᠤ ᠳᠤᠲᠠᠭᠳᠠᠬᠤ ᠶ᠋ᠢᠨ ᠵᠣᠪᠠᠯᠠᠩ ᠢ᠋ ᠬᠠᠨᠲᠠᠯᠠ ᠠᠮᠰᠠᠭᠰᠠᠨ ᠴᠤ᠌ ᠡᠴᠢᠭᠡ ᠶ᠋ᠢᠨ ᠬᠠᠭᠤᠴᠢᠨ ᠠᠨᠳᠠ ᠸᠠᠩ ᠬᠠᠨ ᠲᠤᠭᠤᠷᠢᠯ ᠪᠣᠯᠤᠨ ᠪᠠᠭᠠ ᠶ᠋ᠢᠨ ᠨᠥᠬᠥᠷ ᠵᠠᠮᠤᠬᠠ ᠨᠠᠷ ᠤ᠋ᠨ ᠳᠡᠮᠵᠢᠯᠭᠡ ᠶ᠋ᠢ ᠠᠪᠴᠤ ᠳᠡᠭᠵᠢᠨ ᠳᠡᠭᠡᠭᠰᠢᠯᠡᠭᠰᠡᠭᠡᠷ ᠥᠪᠡᠷ ᠦ᠋ᠨ ᠵᠦᠢ ᠶᠣᠰᠣᠨ ᠤ᠋ ᠪᠠᠢᠷᠢ ᠰᠠᠭᠤᠷᠢ ᠶ᠋ᠢ ᠡᠵᠡᠯᠡᠵᠦ᠂ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠭᠠᠨ ᠪᠣᠯᠵᠤ ᠴᠢᠳᠠᠭᠰᠠᠨ ᠶᠤᠮ᠃
ᠡᠨᠡ ᠵᠠᠮ ᠳ᠋ᠤ᠌ ᠲᠡᠷᠡ ᠪᠡᠷ ᠥᠪᠡᠷ ᠦ᠋ᠨ ᠦᠰᠲᠡᠨ ᠪᠣᠯᠤᠨ ᠳᠠᠢᠰᠤᠩᠨᠠᠭᠴᠢ ᠣᠯᠠᠨ ᠣᠪᠣᠭ ᠠᠢᠮᠠᠭ ᠤ᠋ᠳ ᠢ᠋ ᠲᠤᠰ ᠲᠤᠰ ᠲᠤ᠌ ᠨᠢ ᠳᠠᠷᠤᠨ ᠮᠣᠬᠣᠭᠠᠵᠠᠢ᠃ ᠭᠡᠲᠡᠯᠡ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠭᠠᠨ ᠲᠡᠮᠦᠵᠢᠨ ᠪᠣᠯᠤᠨ ᠬᠡᠷᠡᠢᠳ ᠦ᠋ᠨ ᠸᠠᠩ ᠬᠠᠨ ᠲᠣᠭᠣᠷᠢᠯ ᠨᠠᠷ ᠤ᠋ᠨ ᠬᠣᠯᠪᠣᠭᠠᠨ ᠤ᠋ ᠡᠮᠦᠨᠡ ᠬᠦᠯᠢᠶᠡᠭᠰᠡᠨ ᠤᠳᠠᠭᠠ ᠳᠠᠷᠠᠭᠠ ᠶ᠋ᠢᠨ ᠢᠯᠠᠭᠳᠠᠯ ᠨᠢ ᠮᠣᠩᠭᠣᠯ ᠤ᠋ᠨ ᠵᠡᠭᠦᠨ ᠵᠦᠭ ᠦ᠋ᠨ ᠠᠢᠮᠠᠭ ᠤ᠋ᠳ ᠲᠤ᠌ ᠰᠡᠷᠡᠮᠵᠢᠯᠡᠭᠦᠯᠬᠦ ᠳᠣᠬᠢᠶᠠ ᠪᠣᠯᠤᠭᠰᠠᠨ ᠤᠴᠢᠷ ᠬᠠᠮᠲᠤ ᠶ᠋ᠢᠨ ᠬᠤᠪᠢ ᠲᠠᠪᠢᠯᠠᠩ ᠨᠢ ᠲᠦᠷ ᠴᠦ᠍ ᠭᠡᠰᠡᠨ ᠨᠢᠭᠡᠳᠬᠦ ᠶᠠᠪᠤᠴᠠ ᠶ᠋ᠢ ᠲᠦᠷᠭᠡᠳᠬᠡᠪᠡ᠃
ᠲᠡᠷᠡ ᠤᠳᠠᠭᠠ ᠳᠠᠷᠠᠭᠠ ᠬᠦᠴᠦᠷᠬᠡᠭ ᠬᠣᠯᠪᠣᠭᠠᠨ ᠤ᠋ ᠡᠮᠦᠨᠡ ᠳᠠᠩ ᠳᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠢᠯᠠᠭᠳᠠᠯ ᠠᠮᠰᠠᠭᠰᠠᠨ ᠴᠤ᠌ ᠪᠤᠰᠤᠳ ᠢ᠋ ᠪᠠᠭᠤᠯᠭᠠᠨ ᠳᠣᠣᠷᠠ ᠣᠷᠣᠬᠤ ᠶ᠋ᠢ ᠬᠦᠰᠡᠬᠦ ᠦᠭᠡᠢ ᠥᠪᠡᠷ ᠥᠪᠡᠷ ᠦ᠋ᠨ ᠳᠤᠷᠠ ᠪᠠᠷ ᠵᠠᠰᠠᠭᠯᠠᠵᠤ ᠶᠠᠪᠤᠬᠤ ᠶ᠋ᠢ ᠢᠯᠡᠭᠦᠦ ᠳ᠋ᠦ᠍ ᠦᠵᠡᠵᠦ ᠪᠠᠢᠪᠠ᠃
1201 ᠣᠨ ᠳ᠋ᠤ᠌ ᠵᠡᠭᠦᠨ ᠵᠦᠭ ᠦ᠋ᠨ ᠪᠦᠬᠦ ᠠᠢᠮᠠᠭ ᠤ᠋ᠳ ᠡᠷᠭᠦᠨᠡ ᠭᠣᠣᠯ᠂ ᠬᠠᠨ ᠭᠣᠣᠯ᠂ ᠲᠡᠯᠮᠡᠨ ᠭᠣᠣᠯ ᠤ᠋ᠨ ᠴᠢᠳᠬᠤᠯᠠᠩ ᠠᠭᠤᠯᠵᠠᠷ ᠭᠠᠵᠠᠷ ᠤᠯᠠᠭᠠᠨ ᠡᠷᠭᠢ ᠭᠡᠳᠡᠭ ᠭᠠᠵᠠᠷ ᠲᠤ᠌ ᠴᠢᠬᠤᠯᠠ ᠴᠢᠭᠤᠯᠭᠠᠨ ᠬᠢᠪᠡ᠃ ᠬᠠᠲᠠᠭᠢᠨ᠂ ᠰᠠᠯᠵᠢᠭᠤᠳ᠂ ᠵᠠᠳᠠᠷᠠᠨ᠂ ᠲᠠᠲ᠋ᠠᠷ᠂ ᠨᠠᠢ᠍ᠮᠠᠨ ᠵᠡᠷᠭᠡ ᠠᠷᠪᠠᠨ ᠬᠣᠶᠠᠷ ᠠᠢᠮᠠᠭ ᠤ᠋ᠨ ᠲᠣᠯᠣᠭᠠᠢᠯᠠᠭᠴᠢᠳ ᠴᠤᠭᠯᠠᠵᠤ᠂ ᠵᠠᠳᠠᠷᠠᠨ ᠠᠢᠮᠠᠭ ᠤ᠋ᠨ ᠵᠠᠮᠤᠬᠠ ᠶ᠋ᠢ ᠬᠥᠷ ᠬᠠᠨ ᠳ᠋ᠤ᠌ ᠡᠷᠭᠦᠮᠵᠢᠯᠡᠬᠦ ᠪᠡᠷ ᠲᠣᠭᠲᠠᠵᠠᠢ᠃ ᠬᠥᠷ ᠬᠠᠨ ᠬᠡᠮᠡᠬᠦ ᠨᠢ ᠬᠠᠨ ᠨᠤᠭᠤᠳ ᠤ᠋ᠨ ᠢ᠋ᠶ᠋ᠠᠨ ᠪᠦᠭᠦᠳᠡ ᠶ᠋ᠢᠨ ᠬᠠᠭᠠᠨ ᠭᠡᠰᠡᠨ ᠤᠳᠬᠠ ᠲᠠᠢ ᠶᠤᠮ᠃
ᠬᠠᠮᠲᠤᠷᠠᠨ ᠪᠠᠢᠯᠳᠤᠵᠤ ᠮᠥᠬᠥᠯ ᠡᠴᠡ ᠠᠪᠤᠷᠠᠭᠳᠠ ᠣᠷᠣᠰᠢᠨ ᠲᠣᠭᠲᠠᠨᠢᠬᠤ ᠶ᠋ᠢᠨ ᠲᠤᠯᠠᠳᠠ ᠴᠠᠭ ᠲᠤ᠌ ᠪᠠᠨ ᠴᠠᠯᠭᠢᠵᠤ ᠶᠠᠪᠤᠭᠠ ᠸᠠᠩ ᠬᠠᠨ ᠲᠡᠮᠦᠵᠢᠨ ᠨᠠᠷ ᠤ᠋ᠨ ᠡᠰᠡᠷᠭᠦ ᠳᠠᠢᠯᠠᠷᠠ ᠮᠣᠷᠳᠠᠬᠤ ᠰᠢᠢᠳᠪᠦᠷᠢ ᠭᠠᠷᠭᠠᠪᠠ᠃ ᠲᠡᠳᠡᠨᠡᠷ ᠠᠵᠢᠷᠭᠠ ᠭᠡᠭᠦᠦ ᠶ᠋ᠢ ᠴᠠᠪᠴᠢᠨ ᠠᠯᠠᠭᠠᠳ᠂ ᠬᠥᠯ ᠢ᠋ᠶ᠋ᠡᠷ ᠡᠷᠭᠢ ᠢᠰᠬᠦᠯᠦᠨ ᠨᠤᠷᠠᠭᠠᠵᠤ᠂ ᠰᠡᠯᠡᠮᠡ ᠪᠡᠷ ᠮᠣᠳᠣ ᠲᠠᠰᠤᠷ ᠴᠠᠪᠴᠢᠨ᠂ ᠡᠳᠡᠨ ᠲᠡᠢ ᠨᠠᠢᠷᠠᠮᠳᠠᠭᠰᠠᠨ ᠬᠡᠨ ᠪᠦᠬᠦᠨ ᠬᠡᠷᠪᠡ ᠡᠨᠡ ᠬᠤᠤᠪᠢᠯᠳᠤᠭᠠᠨ ᠢ᠋ ᠵᠠᠳᠠᠷᠠᠭᠤᠯᠪᠠᠯ ᠶᠠᠭ ᠡᠢᠮᠦ ᠨᠤᠷᠠᠭᠰᠠᠨ ᠰᠢᠷᠣᠢ ᠬᠢᠷᠭᠠᠭᠤᠯᠤᠭᠰᠠᠨ ᠮᠣᠳᠣ ᠰᠢᠭ᠋ ᠪᠣᠯᠤᠨᠠ ᠭᠡᠵᠦ ᠲᠡᠭᠷᠢ ᠳ᠋ᠦ᠍ ᠰᠥᠬᠥᠷᠡᠨ ᠠᠨᠳᠠᠭᠠᠢᠯᠠᠪᠠ᠃ ᠡᠨᠡ ᠨᠢ ᠬᠣᠯᠪᠣᠭᠠᠨ ᠠ᠋ᠴᠠ ᠤᠷᠪᠠᠵᠤ ᠬᠥᠷᠪᠡᠬᠦ ᠶ᠋ᠢ ᠵᠢᠷᠦᠬᠡᠯᠡᠬᠦ ᠬᠥᠮᠦᠨ ᠪᠠᠢᠪᠠᠯ ᠢᠩᠭᠢᠨᠡ ᠭᠡᠰᠡᠨ ᠠᠩᠬᠠᠷᠤᠯᠭᠠ ᠮᠠᠭᠠᠳ᠂ ᠲᠡᠢᠮᠦ ᠬᠥᠮᠦᠨ ᠭᠠᠷᠪᠠᠯ ᠴᠠᠭᠠᠰᠢᠳᠠ ᠪᠠᠨ ᠰᠠᠢᠨ ᠢ᠋ᠶ᠋ᠠᠨ ᠦᠵᠡᠬᠦ ᠦᠭᠡᠢ ᠭᠡᠰᠡᠨ ᠢ᠋ ᠪᠣᠯᠭᠣᠮᠵᠢᠯᠠᠭᠤᠯᠬᠤ ᠣᠷᠣᠯᠳᠣᠯᠭᠠ ᠪᠠᠢᠪᠠ᠃
ᠲᠡᠭᠦᠨ ᠡᠴᠡ ᠬᠣᠢᠰᠢ ᠤᠳᠠᠭᠰᠠᠨ ᠦᠭᠡᠢ ᠪᠠᠷᠠᠭᠤᠨ ᠵᠦᠭ ᠲᠦ᠍ ᠨᠢᠭᠡᠳᠦᠭᠰᠡᠨ ᠴᠡᠷᠢᠭ ᠬᠥᠳᠡᠯᠭᠡᠵᠦ ᠲᠡᠮᠦᠵᠢᠨ ᠸᠠᠩ ᠬᠠᠨ ᠬᠣᠶᠠᠷ ᠢ᠋ ᠭᠡᠨᠡᠳᠡᠭᠦᠯᠦᠨ ᠳᠣᠪᠲᠣᠯᠬᠤ ᠪᠠᠷ ᠪᠡᠯᠡᠳᠬᠡᠪᠡ᠃
ᠡᠨᠡ ᠨᠢ ᠵᠠᠮᠤᠬᠠ ᠲᠡᠷᠢᠭᠦᠲᠡᠢ ᠢᠵᠠᠭᠤᠷᠲᠠᠨ ᠤ᠋ ᠤᠯᠤᠰ ᠲᠥᠷᠥ ᠶ᠋ᠢᠨ ᠬᠣᠯᠪᠣᠭᠠ ᠪᠠᠢᠭᠰᠠᠨ ᠬᠡᠳᠦᠢ ᠴᠦ᠍ ᠲᠡᠢᠮᠦ ᠪᠠᠲᠤ ᠪᠥᠬᠡ ᠪᠠᠢᠭᠰᠠᠨ ᠦᠭᠡᠢ᠃ ᠤᠴᠢᠷ ᠨᠢ ᠠᠢᠮᠠᠭ ᠤ᠋ᠳ ᠤ᠋ᠨ ᠢᠵᠠᠭᠤᠷᠲᠠᠨ ᠨᠠᠷ ᠨᠢᠭᠡᠨᠲᠡ ᠣᠯᠤᠭᠰᠠᠨ ᠤᠯᠤᠰ ᠲᠥᠷᠥ ᠡᠳ᠋ ᠦ᠋ᠨ ᠵᠠᠰᠠᠭ ᠤ᠋ᠨ ᠠᠰᠢᠭ ᠰᠣᠨᠢᠷᠬᠠᠯ ᠢ᠋ᠶ᠋ᠠᠨ ᠠᠯᠳᠠᠬᠤ ᠶ᠋ᠢ ᠬᠦᠰᠡᠬᠦ ᠦᠭᠡᠢ ᠪᠠᠢᠭᠰᠠᠨ ᠤᠴᠢᠷ ᠠ᠋ᠴᠠ ᠤᠯᠤᠰ ᠲᠥᠷᠥ ᠶ᠋ᠢᠨ ᠬᠠᠮᠲᠤ ᠶ᠋ᠢᠨ ᠵᠣᠷᠢᠯᠭᠠ ᠨᠢ ᠬᠠᠩᠭᠠᠯᠲᠠ ᠦᠭᠡᠢ ᠳᠤᠲᠠᠭᠤ ᠳᠤᠯᠢᠮᠠᠭ ᠪᠠᠢᠪᠠ᠃
ᠲᠡᠳᠡ ᠪᠠᠰᠠ ᠲᠤᠰ ᠲᠤᠰ ᠤ᠋ᠨ ᠴᠡᠷᠢᠭ ᠢ᠋ ᠥᠭᠡᠷᠡ ᠬᠥᠮᠦᠨ ᠢ᠋ᠶ᠋ᠡᠷ ᠤᠳᠤᠷᠢᠳᠤᠭᠤᠯᠵᠤ ᠬᠥᠳᠡᠯᠭᠡᠬᠦ ᠳᠤᠷᠠ ᠦᠭᠡᠢ ᠪᠠᠢᠭᠰᠠᠨ ᠤᠴᠢᠷ ᠠ᠋ᠴᠠ ᠨᠢᠭᠡᠨ ᠵᠢᠭᠠᠪᠤᠷᠢ ᠶ᠋ᠢᠨ ᠳᠠᠭᠤ ᠪᠠᠢᠯᠳᠤᠬᠤ ᠨᠢᠭᠡᠳᠦᠮᠡᠯ ᠴᠡᠷᠢᠭ ᠦ᠋ᠨ ᠬᠦᠴᠦ ᠪᠦᠷᠢᠯᠳᠦᠭᠦᠯᠵᠦ ᠴᠢᠳᠠᠭᠠ ᠦᠭᠡᠢ ᠪᠠᠢᠪᠠ᠃
ᠬᠠᠮᠲᠤᠷᠠᠭᠰᠠᠨ ᠴᠡᠷᠢᠭ ᠦ᠋ᠨ ᠬᠦᠴᠦ ᠭᠡᠳᠡᠭ ᠨᠢ᠄《 ᠭᠠᠢ ᠭᠠᠵᠠᠷ ᠳᠣᠣᠷᠠ ᠠ᠋ᠴᠠ᠂ ᠭᠠᠬᠠᠢ ᠮᠣᠳᠣᠨ ᠳᠣᠲᠣᠷᠠ ᠠ᠋ᠴᠠ》 ᠭᠠᠷᠤᠭᠰᠠᠨ ᠴᠠᠭ ᠲᠤ᠌ ᠲᠤᠯᠭᠠᠷᠠᠬᠤ ᠠᠶᠤᠯ ᠠ᠋ᠴᠠ ᠠᠪᠤᠷᠠᠭᠳᠠᠬᠤ ᠶ᠋ᠢᠨ ᠲᠤᠯᠠᠳᠠ᠂ ᠲᠡᠮᠦᠵᠢᠨ ᠸᠠᠩ ᠬᠠᠨ ᠤ᠋ ᠳᠣᠪᠲᠣᠯᠭᠠᠨ ᠳ᠋ᠤ᠌ ᠰᠥᠷᠬᠦ ᠴᠣᠬᠢᠯᠲᠠ ᠥᠭᠬᠦ ᠵᠣᠷᠢᠯᠭᠠ ᠲᠠᠢ ᠳ᠋ᠤᠷ ᠵᠠᠭᠤᠷᠠ ᠡᠮᠬᠢᠯᠡᠨ ᠪᠠᠢᠭᠤᠯᠤᠭᠳᠠᠭᠰᠠᠨ ᠪᠠᠢᠯᠠ᠃
ᠵᠠᠮᠤᠬᠠ ᠶ᠋ᠢᠨ ᠴᠡᠷᠢᠭ ᠬᠥᠳᠡᠯᠵᠦ ᠡᠬᠢᠯᠡᠮᠡᠭᠴᠡ ᠭᠣᠷᠯᠣᠰ ᠤ᠋ᠨ ᠬᠣᠷᠢᠲᠠᠢ ᠠᠮᠢ ᠨᠠᠰᠤ ᠪᠠᠨ ᠠᠯᠳᠠᠬᠤ ᠠᠶᠤᠯ ᠢ᠋ ᠰᠥᠷᠴᠦ ᠰᠥᠨᠢᠵᠢᠨ ᠳᠠᠪᠬᠢᠵᠤ᠂ ᠬᠡᠯᠡ ᠬᠦᠷᠭᠡᠭᠰᠡᠨ ᠡᠴᠡ ᠰᠡᠵᠢᠭ ᠠᠵᠢᠭ ᠦᠭᠡᠢ ᠪᠠᠢᠭᠰᠠᠨ ᠲᠡᠮᠦᠵᠢᠨ ᠢ᠋ ᠢᠯᠠᠭᠳᠠᠯ ᠠ᠋ᠴᠠ ᠵᠠᠢᠯᠠᠭᠤᠯᠵᠤ ᠴᠢᠳᠠᠪᠠ᠃ ᠲᠡᠮᠦᠵᠢᠨ ᠣᠳᠣ ᠶ᠋ᠢᠨ ᠬᠡᠨᠲᠡᠢ ᠠᠢᠮᠠᠭ ᠤ᠋ᠨ ᠴᠡᠩᠬᠡᠷ ᠦ᠋ᠨ ᠭᠣᠣᠯ ᠤ᠋ᠨ ᠡᠬᠢ ᠪᠡᠷ ᠨᠤᠲᠤᠭᠯᠠᠵᠤ ᠪᠠᠢᠬᠤ ᠳ᠋ᠤ᠌ ᠪᠠᠨ ᠳᠠᠢᠰᠤᠨ ᠤ᠋ ᠲᠠᠯᠠ ᠠ᠋ᠴᠠ ᠢᠷᠡᠭᠰᠡᠨ ᠮᠡᠳᠡᠭᠡ ᠶ᠋ᠢ ᠠᠪᠤᠭᠠᠳ ᠲᠡᠷᠡ ᠰᠥᠨᠢ ᠳ᠋ᠦ᠍ ᠪᠡᠨ ᠸᠠᠩ ᠬᠠᠨ ᠳ᠋ᠤ᠌ ᠳᠣᠭᠣᠯᠭᠠᠪᠠ᠃ ᠬᠣᠶᠠᠷ ᠲᠠᠯᠠ ᠴᠡᠷᠢᠭ ᠢ᠋ᠶ᠋ᠡᠨ ᠶᠠᠭᠠᠷᠠᠯᠲᠠᠢ ᠬᠣᠷᠢᠮᠳᠤᠯᠭᠤᠯᠵᠦ ᠬᠡᠷᠦᠯᠦᠨ ᠢ᠋ ᠳ᠋ᠡᠭᠡᠨ ᠤᠷᠤᠭᠤᠳᠠᠬᠤ ᠳ᠋ᠤ᠌ ᠪᠠᠨ ᠠᠰᠢᠭ ᠲᠠᠢ ᠭᠠᠵᠠᠷ ᠢ᠋ ᠡᠵᠡᠯᠡᠨ ᠪᠠᠢᠷᠢᠯᠠᠵᠤ᠂ ᠠᠯᠵᠢᠶᠠᠯ ᠶᠠᠳᠠᠷᠠᠭᠠ ᠶ᠋ᠢ ᠵᠠᠮ ᠵᠠᠭᠤᠷᠠ ᠳᠠᠢᠯᠠᠬᠤ ᠵᠡᠷᠭᠡ ᠪᠡᠷ ᠵᠠᠮᠤᠬᠠ ᠶ᠋ᠢᠨ ᠤᠳᠤᠷᠢᠳᠤᠭᠰᠠᠨ ᠬᠠᠮᠲᠤᠷᠠᠭᠰᠠᠨ ᠴᠡᠷᠢᠭ ᠢ᠋ ᠲᠣᠰᠣᠨ ᠬᠦᠯᠢᠶᠡᠵᠦ ᠪᠠᠢᠪᠠ᠃
ᠬᠣᠯᠪᠣᠭᠠᠲᠠᠨ ᠨᠤᠭᠤᠳ ᠴᠡᠷᠢᠭ ᠦ᠋ᠨ ᠨᠠᠷᠢᠨ ᠲᠥᠯᠥᠪᠯᠡᠭᠡ ᠪᠠᠢᠷᠢᠰᠢᠯ ᠬᠢᠵᠦ᠂ ᠵᠢᠷᠭᠤᠭᠠᠨ ᠮᠠᠩᠯᠠᠢ᠂ ᠭᠤᠷᠪᠠᠨ ᠬᠠᠷᠠᠭᠤᠯ ᠲᠠᠯᠪᠢᠭᠰᠠᠨ ᠪᠥᠭᠡᠳ ᠬᠡᠷᠡᠢᠳ ᠣᠪᠣᠭ ᠤ᠋ᠨ ᠨᠡᠷᠡ ᠲᠥᠷᠥ ᠲᠡᠢ ᠢᠵᠠᠭᠤᠷᠲᠠᠨ ᠠᠯᠲᠠᠨ᠂ ᠬᠣᠴᠢᠷ᠂ ᠳᠠᠷᠢᠳᠠᠢ᠂ ᠸᠠᠩ ᠬᠠᠨ ᠤ᠋ ᠬᠥᠪᠡᠭᠦᠨ ᠰᠡᠩᠭᠦᠨ᠂ ᠸᠠᠩ ᠬᠠᠨ ᠤ᠋ ᠳᠡᠭᠦᠦ ᠵᠠᠬᠠ ᠬᠠᠮᠪᠤ ᠪᠣᠯᠤᠨ ᠪᠢᠯᠭᠡ ᠪᠡᠬᠢ ᠨᠠᠷ ᠢ᠋ᠶ᠋ᠠᠷ ᠮᠠᠩᠯᠠᠢ ᠠᠩᠭᠢ ᠶ᠋ᠢ ᠤᠳᠤᠷᠢᠳᠤᠭᠤᠯᠪᠠ᠃
ᠮᠠᠩᠯᠠᠢ ᠳ᠋ᠤ᠌ ᠶᠠᠪᠤᠭᠰᠠᠳ ᠤ᠋ᠨ ᠲᠡᠷᠢᠭᠦᠨ ᠳ᠋ᠦ᠍ ᠭᠤᠷᠪᠠᠨ ᠬᠠᠷᠠᠭᠤᠯ ᠲᠠᠯᠪᠢᠵᠠᠢ᠃ ᠢᠩᠭᠢᠭᠡᠳ ᠨᠢᠭᠡᠨ ᠦᠳᠡᠰᠢ ᠮᠠᠩᠯᠠᠢ ᠪᠣᠯᠵᠤ ᠶᠠᠪᠤᠭᠰᠠᠳ ᠤ᠋ᠨ ᠲᠦᠷᠦᠭᠦᠴᠢ ᠤᠳᠬᠢᠶᠠ ᠭᠡᠳᠡᠭ ᠭᠠᠵᠠᠷ ᠬᠦᠷᠬᠦ ᠦᠶᠡ ᠳ᠋ᠦ᠍ ᠴᠢᠬᠤᠷᠭᠤ ᠳ᠋ᠤ᠌ ᠲᠠᠯᠪᠢᠭᠰᠠᠨ ᠬᠠᠷᠠᠭᠤᠯ ᠠ᠋ᠴᠠ ᠬᠥᠮᠦᠨ ᠳᠠᠪᠬᠢᠨ ᠢᠷᠡᠵᠦ ᠳᠠᠢᠰᠤᠨ ᠠᠢᠰᠤᠢ ᠭᠡᠵᠦ ᠮᠡᠳᠡᠭᠡᠯᠡᠵᠡᠢ᠃ ᠡᠢᠮᠦ ᠬᠣᠯᠪᠣᠭᠠᠲᠠᠨ ᠨᠤᠭᠤᠳ ᠳᠠᠢᠰᠤᠨ ᠢ᠋ ᠤᠭᠲᠤᠨ ᠪᠠᠢᠯᠳᠤᠬᠤ ᠪᠠᠷ ᠲᠡᠷᠡ ᠳᠠᠷᠤᠢ ᠬᠦᠷᠢᠶᠡ ᠪᠡᠬᠢᠯᠡᠯᠲᠡ ᠪᠡᠨ ᠪᠠᠵᠠᠭᠠᠪᠠ᠃
ᠡᠬᠢᠯᠡᠭᠡᠳ ᠲᠡᠮᠦᠵᠢᠨ ᠸᠠᠩ ᠬᠠᠨ ᠤ᠋ ᠴᠡᠷᠢᠭ ᠲᠡᠢ ᠵᠠᠮᠤᠬᠠ ᠶ᠋ᠢᠨ ᠳᠥᠷᠪᠡᠨ ᠮᠠᠩᠯᠠᠢ ᠴᠡᠷᠢᠭ ᠲᠤᠯᠭᠠᠷᠠᠭᠰᠠᠨ ᠪᠥᠭᠡᠳ ᠲᠠᠢᠴᠢᠭᠤᠳ ᠤ᠋ᠨ ᠠᠭᠤᠴᠤ ᠪᠠᠭᠠᠲᠤᠷ᠂ ᠨᠠᠢ᠍ᠮᠠᠨ ᠤ᠋ ᠪᠣᠢᠷᠤᠭ ᠬᠠᠨ᠂ ᠮᠡᠷᠭᠢᠳ ᠦ᠋ᠨ ᠲᠣᠭᠲᠤᠭᠠ ᠪᠡᠬᠢ ᠶ᠋ᠢᠨ ᠬᠥᠪᠡᠭᠦᠨ ᠬᠣᠳᠣ᠂ ᠣᠢᠷᠠᠳ ᠤ᠋ᠨ ᠬᠤᠳᠤᠭᠠ ᠪᠡᠬᠢ ᠨᠠᠷ ᠲᠡᠭᠦᠨ ᠢ᠋ ᠤᠳᠤᠷᠢᠳᠤᠨ ᠶᠠᠪᠤᠵᠠᠢ᠃
ᠲᠡᠮᠦᠵᠢᠨ ᠸᠠᠩ ᠬᠠᠨ ᠨᠠᠷ ᠤ᠋ᠨ ᠴᠡᠷᠢᠭ ᠪᠡᠯᠡᠳᠬᠡᠯ ᠰᠠᠢᠲᠠᠢ ᠶᠠᠪᠤᠭᠰᠠᠨ ᠤᠴᠢᠷ ᠵᠠᠮᠤᠬᠠ ᠶ᠋ᠢᠨ ᠭᠡᠨᠡᠳᠡᠭᠦᠯᠵᠦ ᠳᠠᠭᠠᠷᠢᠬᠤ ᠠᠷᠭᠠ ᠲᠠᠺᠲ᠋ᠢᠺ ᠨᠤᠷᠠᠨ ᠤᠨᠠᠵᠠᠢ᠃ ᠲᠡᠷᠡ ᠡᠳᠦᠷ ᠲᠡᠭᠷᠢ ᠬᠠᠷᠠᠩᠭᠤᠢ ᠪᠣᠯᠬᠤ ᠳ᠋ᠤ᠌ ᠲᠡᠮᠦᠵᠢᠨ ᠸᠠᠩ ᠬᠠᠨ ᠨᠠᠷ ᠪᠦᠬᠦ ᠮᠠᠩᠯᠠᠢ ᠴᠡᠷᠢᠭ ᠢ᠋ᠶ᠋ᠡᠨ ᠶᠡᠬᠡ ᠬᠤᠸᠠᠷᠠᠨ ᠳ᠋ᠤ᠌ ᠴᠤᠭᠯᠠᠷᠠᠬᠤ ᠶ᠋ᠢ ᠵᠠᠷᠯᠢᠭ
ᠪᠠᠭᠤᠯᠭᠠᠪᠠ᠃ ᠪᠦᠬᠦ ᠴᠡᠷᠢᠭ ᠨᠢᠭᠡ ᠬᠤᠸᠠᠷᠠᠨ ᠳ᠋ᠤ᠌ ᠨᠡᠢᠯᠡᠵᠦ ᠬᠣᠨᠣᠭᠰᠠᠨ ᠢ᠋ᠶ᠋ᠠᠷ ᠥᠪᠡᠷ ᠦ᠋ᠨ ᠴᠡᠷᠢᠭ ᠦ᠋ᠨ ᠬᠦᠴᠦ ᠶ᠋ᠢ ᠳᠡᠭᠡᠳᠦ ᠵᠡᠷᠭᠡ ᠪᠡᠷ ᠪᠥᠭᠡᠭᠡᠨᠡᠭᠦᠯᠦᠭᠡᠳ᠂ ᠳᠠᠢᠰᠤᠨ ᠲᠠᠢ ᠮᠠᠷᠭᠠᠰᠢ ᠪᠠᠢᠯᠳᠤᠬᠤ ᠪᠠᠷ ᠲᠣᠭᠲᠠᠪᠠ᠃
ᠳᠣᠷᠣᠨᠠ ᠠ᠋ᠴᠠ ᠦᠷ ᠬᠡᠬᠡᠷᠡᠭᠡ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠲᠡᠮᠦᠵᠢᠨ ᠸᠠᠩ ᠬᠠᠨ ᠨᠠᠷ ᠳᠠᠢᠰᠤᠨ ᠠ᠋ᠴᠠ ᠥᠷᠢᠰᠦᠨ ᠠᠰᠢᠭᠲᠠᠢ ᠪᠠᠢᠷᠢᠯᠠᠯ ᠡᠵᠡᠯᠡᠭᠡᠳ᠂ ᠵᠠᠮᠤᠬᠠ ᠶ᠋ᠢᠨ ᠬᠠᠮᠲᠤᠷᠠᠭᠰᠠᠨ ᠴᠡᠷᠢᠭ ᠲᠡᠢ ᠬᠦᠢᠲᠡᠨ ᠭᠡᠳᠡᠭ ᠭᠠᠵᠠᠷ ᠲᠤᠯᠭᠠᠷᠠᠨ ᠪᠠᠢᠯᠳᠤᠪᠠ᠃ ᠡᠨᠡ ᠨᠢ ᠣᠳᠣ ᠶ᠋ᠢᠨ ᠬᠢᠲᠠᠳ ᠮᠣᠩᠭᠣᠯ ᠤ᠋ᠨ ᠬᠢᠯᠢ ᠳᠡᠭᠡᠷᠡᠬᠢ ᠬᠦᠢᠲᠡᠨ ᠠᠭᠤᠯᠠ ᠶ᠋ᠢᠨ ᠣᠷᠴᠢᠮ ᠪᠠᠢᠭᠰᠠᠨ ᠪᠥᠭᠡᠳ ᠲᠡᠮᠦᠵᠢᠨ ᠸᠠᠩ ᠬᠠᠨ ᠨᠠᠷ ᠠᠭᠤᠯᠠ ᠲᠦᠰᠢᠵᠦ ᠪᠡᠬᠢᠯᠡᠯᠲᠡ ᠪᠠᠷᠢᠭᠰᠠᠨ ᠲᠤᠯᠠ ᠬᠠᠮᠠᠭᠠᠯᠠᠬᠤ ᠳ᠋ᠤ᠌ ᠠᠮᠠᠷ᠂ ᠳᠣᠪᠲᠣᠯᠬᠤ ᠳ᠋ᠤ᠌ ᠬᠡᠴᠡᠭᠦᠦ ᠶ᠋ᠢᠨ ᠳᠡᠭᠡᠷᠡ ᠬᠥᠮᠦᠨ ᠬᠦᠴᠦ ᠪᠡᠨ ᠪᠠᠭᠴᠠᠯᠠᠭᠠᠳ ᠠᠰᠢᠭᠲᠠᠢ ᠭᠠᠵᠠᠷ ᠢ᠋ ᠣᠯᠤᠭᠠᠳ ᠠᠪᠤᠭᠰᠠᠨ ᠪᠣᠯᠪᠴᠦ ᠲᠡᠷᠡ ᠡᠳᠦᠷ ᠬᠤᠪᠢᠰᠤᠨ ᠥᠭᠡᠷᠴᠢᠯᠡᠭᠳᠡᠵᠦ ᠪᠠᠢᠭᠰᠠᠨ ᠠᠭᠠᠰᠢ ᠨᠢ ᠣᠯᠳᠠᠬᠤ ᠦᠭᠡᠢ ᠲᠡᠭᠷᠢ ᠶ᠋ᠢᠨ ᠴᠢᠷᠠᠢ ᠶ᠋ᠢ ᠬᠠᠷᠠᠬᠤ ᠳ᠋ᠤ᠌ ᠬᠦᠷᠴᠡᠢ᠃ ᠵᠠᠮᠤᠬᠠ ᠶ᠋ᠢᠨ ᠬᠠᠮᠲᠤᠷᠠᠭᠰᠠᠨ ᠴᠡᠷᠢᠭ ᠴᠦ᠍ ᠭᠡᠰᠡᠨ ᠲᠡᠭᠷᠢ ᠴᠠᠭ ᠠᠭᠠᠷ ᠶᠠᠭᠠᠬᠢᠳᠠᠭ ᠪᠣᠯ ᠭᠡᠵᠦ ᠰᠠᠨᠠᠭᠠ ᠵᠣᠪᠠᠵᠤ ᠪᠠᠢᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠨᠠᠢ᠍ᠮᠠᠨ ᠤ᠋ ᠪᠣᠢᠷᠤᠭ᠂ ᠣᠢᠷᠠᠳ ᠤ᠋ᠨ ᠬᠤᠲᠤᠭᠠ ᠪᠡᠬᠢ ᠨᠠᠷ ᠥᠪᠡᠷᠰᠡᠳ ᠦ᠋ᠨ ᠢ᠋ᠶ᠋ᠡᠨ ᠵᠠᠳᠠ ᠶ᠋ᠢᠨ ᠠᠷᠭᠠ ᠶ᠋ᠢ ᠮᠡᠳᠡᠬᠦ ᠢᠳᠡ ᠰᠢᠳᠢᠲᠡᠨ ᠭᠡᠳ ᠬᠤᠷᠠ ᠣᠷᠣᠭᠤᠯᠵᠤ᠂ ᠰᠢᠭᠤᠷᠭᠠ ᠲᠠᠯᠪᠢᠭᠤᠯᠬᠤ ᠪᠤᠶᠤ ᠪᠠᠢᠭᠠᠯᠢ ᠳᠡᠯᠡᠬᠡᠢ ᠲᠡᠢ ᠬᠠᠮᠵᠢᠨ ᠬᠣᠯᠪᠣᠭᠠᠲᠠᠨ ᠤ᠋ ᠴᠡᠷᠢᠭ ᠢ᠋ ᠪᠤᠲᠠ ᠴᠣᠬᠢᠬᠤ ᠠᠷᠭᠠ ᠰᠠᠲᠤᠪᠠ᠃ ᠡᠨᠡ ᠵᠣᠷᠢᠯᠭᠠ ᠪᠠᠷ ᠲᠡᠳᠡ ᠴᠡᠷᠡᠨ ᠳ᠋ᠦ᠍ ᠴᠡᠪᠡᠷ ᠤᠰᠤ ᠠᠪᠴᠢᠷᠠ ᠭᠡᠵᠦ ᠳᠣᠣᠷᠠᠲᠤ ᠬᠥᠮᠦᠰ ᠲᠦ᠍ ᠲᠤᠰᠢᠶᠠᠭᠠᠳ ᠳᠣᠲᠣᠷᠠ ᠨᠢ ᠦᠬᠡᠷ ᠠᠳᠤᠭᠤᠨ ᠤ᠋ ᠭᠡᠳᠡᠰᠦᠨ ᠡᠴᠡ ᠠᠪᠤᠭᠰᠠᠨ ᠭᠡᠬᠦ ᠲᠠᠬᠢᠶᠠᠨ ᠤ᠋ ᠥᠨᠳᠡᠭᠡᠨ ᠦ᠌ ᠴᠢᠨᠡᠭᠡᠨ ᠬᠡᠳᠦᠨ ᠴᠢᠯᠠᠭᠤ ᠬᠢᠭᠡᠳ ᠲᠠᠷᠨᠢᠳᠠᠬᠤ ᠪᠣᠯᠵᠠᠢ᠃ ᠤᠯᠠᠮ ᠢ᠋ᠶ᠋ᠠᠷ ᠠᠮᠠᠨ ᠳ᠋ᠤ᠌ ᠪᠠᠨ ᠨᠣᠮ ᠤᠩᠰᠢᠨ ᠲᠡᠭᠷᠢ ᠡᠴᠡ ᠠᠭᠠᠳᠠᠷ ᠪᠣᠷᠣᠭᠠᠨ ᠣᠷᠣᠭᠤᠯᠵᠤ ᠳᠠᠢᠰᠤᠨ ᠢ᠋ ᠳᠣᠪᠲᠣᠯᠬᠤ ᠳ᠋ᠤ᠌ ᠲᠤᠰᠠᠯᠠᠭᠠᠴᠢ ᠭᠡᠵᠦ ᠱᠦᠩᠰᠢᠭᠯᠡᠪᠡ᠃ ᠬᠡᠯᠡᠬᠦ ᠳ᠋ᠦ᠍ ᠭᠠᠢᠬᠠᠮᠠ ᠲᠣᠬᠢᠶᠠᠯᠳᠤᠯ ᠪᠣᠯᠵᠤ᠂ ᠲᠦᠳᠡᠯ ᠦᠭᠡᠢ ᠲᠡᠭᠷᠢ ᠬᠠᠷᠠᠩᠭᠤᠢᠯᠠᠨ ᠰᠢᠭᠤᠷᠭᠠ ᠲᠠᠯᠪᠢᠵᠤ ᠪᠣᠷᠣᠭᠠ ᠣᠷᠣᠬᠤ ᠨᠢ ᠲᠡᠷᠡ᠂ ᠲᠡᠭᠡᠲᠡᠯᠡ ᠭᠣᠣᠯ ᠬᠡᠷᠡᠭ ᠨᠢ ᠲᠡᠳᠡᠨ ᠦ᠌ ᠰᠠᠨᠠᠭᠰᠠᠨ ᠢ᠋ᠶ᠋ᠠᠷ ᠪᠣᠯᠤᠭᠰᠠᠨ ᠦᠭᠡᠢ ᠪᠤᠷᠤᠭᠤ ᠪᠠᠷ ᠡᠷᠭᠢᠵᠦ᠂ ᠳᠣᠭᠰᠢᠨ ᠰᠠᠯᠬᠢ ᠰᠢᠷᠦᠭᠦᠨ ᠪᠣᠷᠣᠭᠠ ᠬᠤᠢᠯᠠᠷᠠᠭᠤᠯᠤᠨ ᠵᠠᠮᠤᠬᠠ ᠶ᠋ᠢᠨ ᠬᠠᠮᠲᠤᠷᠠᠭᠰᠠᠨ ᠴᠡᠷᠢᠭ ᠳᠡᠭᠡᠷᠡ ᠪᠠᠭᠤᠯᠭᠠᠪᠠ᠃
ᠲᠡᠮᠦᠵᠢᠨ ᠸᠠᠩ ᠬᠠᠨ ᠤ᠋ ᠴᠡᠷᠢᠭ ᠰᠠᠯᠬᠢᠨ ᠤᠷᠤᠭᠤ ᠬᠠᠷᠪᠤᠬᠤ ᠳ᠋ᠤ᠌ ᠪᠦᠷ ᠬᠢᠯᠪᠠᠷ ᠳᠥᠭᠥᠮ ᠪᠣᠯᠵᠤ ᠲᠡᠭᠷᠢ ᠶ᠋ᠢᠨ ᠴᠠᠭ ᠲᠡᠮᠦᠵᠢᠨ ᠳ᠋ᠦ᠍ ᠠᠰᠢᠭᠲᠠᠢ ᠪᠠᠷ ᠥᠭᠡᠷᠡᠴᠢᠯᠡᠭᠳᠡᠪᠡ᠃ ᠰᠠᠯᠬᠢ ᠪᠣᠷᠣᠭᠠ ᠰᠥᠷᠴᠦ ᠠᠭᠤᠯᠠ ᠥᠭᠡᠳᠡ ᠠᠪᠠᠷᠢᠬᠤ ᠵᠠᠮᠤᠬᠠ ᠶ᠋ᠢᠨ ᠬᠠᠮᠲᠤᠷᠠᠭᠰᠠᠨ ᠴᠡᠷᠢᠭ ᠦ᠋ᠳ ᠪᠠᠯᠴᠢᠭ ᠲᠤ᠌ ᠭᠤᠯᠭᠤᠨ᠂ ᠵᠢᠯᠠᠭᠠᠨ ᠳ᠋ᠤ᠌ ᠤᠨᠠᠬᠤ ᠳ᠋ᠤ᠌ ᠲᠡᠳᠡᠨ ᠦ᠌ ᠳᠤᠮᠳᠠ ᠠ᠋ᠴᠠ ᠬᠥᠬᠡ ᠲᠩᠷᠢ ᠪᠢᠳᠡᠨ ᠢ᠋ ᠲᠠᠭᠠᠯᠠᠭᠰᠠᠨ ᠦᠭᠡᠢ᠂ ᠪᠢᠳᠡᠨ ᠳ᠋ᠦ᠍ ᠲᠡᠭᠷᠢ ᠶ᠋ᠢᠨ ᠬᠢᠯᠢᠩ ᠪᠣᠯᠪᠠ ᠭᠡᠵᠦ ᠤᠷᠢ ᠳᠠᠭᠤ ᠲᠠᠯᠪᠢᠬᠤ ᠳᠤᠭᠤᠯᠳᠠᠨᠠ᠃
ᠲᠡᠭᠷᠢ ᠪᠤᠷᠬᠠᠨ ᠠ᠋ᠴᠠ ᠲᠤᠰᠠᠯᠠᠮᠵᠢ ᠭᠣᠷᠢᠯᠠᠭᠰᠠᠨ ᠬᠥᠮᠦᠰ ᠰᠢᠲᠦᠯᠭᠡ ᠪᠢᠰᠢᠷᠡᠯ ᠦ᠋ᠨ ᠢ᠋ᠶ᠋ᠡᠨ ᠭᠠᠢ ᠪᠠᠷᠴᠢᠳ ᠢ᠋ ᠠᠮᠰᠠᠵᠤ᠂ ᠤᠳᠠᠵᠤ ᠲᠦᠳᠡᠯ ᠦᠭᠡᠢ ᠴᠡᠷᠢᠭ ᠦ᠋ᠳ ᠨᠢ ᠴᠥᠮ ᠲᠠᠯᠠ ᠲᠠᠯᠠ ᠲᠡᠰᠢ ᠪᠤᠲᠠᠷᠠᠨ ᠳᠤᠲᠠᠭᠠᠵᠠᠢ᠃ ᠳᠦᠷ ᠵᠠᠭᠤᠷᠠ ᠶ᠋ᠢᠨ ᠡᠰᠡᠬᠦᠯᠡ ᠬᠣᠯᠪᠣᠭᠠ ᠨᠢᠭᠡᠳᠦᠭᠰᠡᠨ ᠤᠳᠤᠷᠢᠳᠤᠯᠭᠠ ᠪᠠᠷ ᠳᠤᠲᠠᠭᠳᠠᠵᠤ ᠬᠦᠴᠦ ᠪᠡᠨ ᠬᠠᠳᠠᠭᠠᠯᠠᠵᠤ ᠦᠯᠡᠳᠡᠬᠦ ᠶ᠋ᠢᠨ ᠲᠤᠯᠠᠳᠠ ᠬᠤᠪᠢ ᠪᠠᠨ ᠪᠣᠷᠣᠯᠠᠭᠤᠯᠵᠤ᠂ ᠳᠣᠪᠣ ᠪᠠᠨ ᠰᠢᠷᠠᠯᠠᠭᠤᠯᠬᠤ ᠭᠡᠭᠴᠢ ᠪᠣᠯᠪᠠ᠃
ᠡᠨᠡ ᠪᠣᠯ ᠠᠩᠬᠠᠨ ᠠ᠋ᠴᠠ ᠪᠠᠨ ᠵᠠᠮᠤᠬᠠ ᠶ᠋ᠢᠨ ᠬᠠᠮᠲᠤᠷᠠᠭᠰᠠᠨ ᠴᠡᠷᠢᠭ ᠦ᠋ᠨ ᠠᠮᠢᠨ ᠳ᠋ᠤ᠌ ᠬᠦᠷᠬᠦ ᠰᠤᠯᠠ ᠲᠠᠯᠠ ᠪᠠᠢᠪᠠ᠃ ᠳᠥᠩᠭᠡᠵᠢ ᠥᠴᠦᠬᠡᠨ ᠰᠠᠭᠠᠳ ᠲᠠᠢ ᠲᠤᠯᠭᠠᠷᠠᠮᠠᠭᠴᠠ ᠵᠠᠮᠤᠬᠠ ᠶ᠋ᠢᠨ ᠳᠥᠷᠪᠡᠨ ᠮᠠᠩᠯᠠᠢ ᠴᠡᠷᠢᠭ ᠡᠢᠨ ᠬᠦ᠌ ᠳᠠᠭᠠᠷᠢᠵᠤ ᠳᠣᠪᠲᠣᠯᠬᠤ ᠴᠢᠳᠠᠪᠤᠷᠢ ᠪᠠᠨ ᠠᠯᠳᠠᠭᠰᠠᠨ ᠪᠠᠢᠨᠠ᠃ ᠨᠠᠢ᠍ᠮᠠᠨ ᠤ᠋ ᠪᠣᠢᠷᠤᠭ ᠬᠠᠨ ᠲᠡᠮᠦᠵᠢᠨ ᠦ᠌ ᠮᠠᠩᠯᠠᠢ ᠠᠯᠲᠠᠨ ᠤ᠋ ᠤᠳᠤᠷᠢᠳᠤᠭᠰᠠᠨ ᠬᠠᠮᠠᠭᠠᠯᠠᠯᠲᠠ ᠶ᠋ᠢᠨ ᠱᠤᠭᠤᠮ ᠢ᠋ ᠰᠡᠲᠡᠯᠵᠦ ᠴᠢᠳᠠᠯ ᠦᠭᠡᠢ ᠮᠣᠷᠢᠨ ᠤ᠋ ᠪᠠᠨ ᠠᠮᠠ ᠶ᠋ᠢ ᠡᠷᠭᠢᠭᠦᠯᠵᠦ᠂ ᠠᠢᠮᠠᠭ ᠤ᠋ᠨ ᠢ᠋ᠶ᠋ᠠᠨ ᠴᠡᠷᠢᠭ ᠢ᠋ ᠳᠠᠭᠠᠭᠤᠯᠵᠤ ᠬᠣᠯᠠᠳᠠᠬᠤ ᠳ᠋ᠤ᠌ ᠪᠠᠨ ᠪᠦᠭᠦᠳᠡ ᠶ᠋ᠢ ᠶᠡᠷᠦᠩᠬᠡᠢᠯᠡᠨ ᠵᠠᠬᠢᠷᠬᠤ ᠶᠣᠰᠣᠲᠠᠢ ᠬᠥᠷ ᠬᠠᠨ ᠵᠠᠮᠤᠬᠠ ᠳ᠋ᠤ᠌ ᠴᠤ᠌ ᠬᠡᠯᠡᠭᠰᠡᠨ ᠦᠭᠡᠢ᠂ ᠮᠥᠷᠥ ᠵᠡᠷᠭᠡᠴᠡᠨ ᠲᠤᠯᠤᠯᠳᠤᠵᠤ ᠶᠠᠪᠤᠭᠠ ᠭᠤᠷᠪᠠᠨ ᠮᠠᠩᠯᠠᠢ ᠳᠠᠢᠴᠢᠳ ᠢ᠋ᠶ᠋ᠠᠨ ᠴᠤ᠌ ᠬᠠᠢᠬᠤᠷᠤᠭᠰᠠᠨ ᠦᠭᠡᠢ ᠪᠠᠷᠠᠭᠤᠨ ᠳᠠᠰᠢ ᠭᠡᠷ ᠦ᠋ᠨ ᠵᠦᠭ ᠲᠡᠷᠡ ᠴᠢᠭ ᠲᠦ᠍ ᠪᠡᠨ ᠳᠤᠲᠠᠭᠠᠵᠤ ᠣᠳᠪᠠ᠃ ᠵᠣᠷᠢᠭ ᠮᠣᠬᠣᠭᠰᠠᠨ ᠴᠡᠷᠢᠭ ᠢᠯᠠᠭᠳᠠᠬᠤ ᠲᠠᠪᠢᠯᠠᠩ ᠠ᠋ᠴᠠ ᠮᠤᠯᠲᠤᠷᠠᠭᠰᠠᠨ ᠦᠭᠡᠢ᠂ ᠲᠦᠷᠦᠭᠦᠦ ᠮᠠᠩᠯᠠᠢ ᠨᠢᠷᠭᠡᠭᠳᠡᠭᠰᠡᠨ ᠦ᠌ ᠤᠷᠰᠢᠭ ᠲᠡᠷᠡ ᠳᠣᠣᠷᠠ ᠪᠠᠨ ᠪᠤᠰᠤᠳ ᠲᠤ᠌ ᠨᠥᠯᠥᠭᠡᠯᠡᠵᠦ᠂ ᠨᠥᠭᠥᠭᠡ ᠭᠤᠷᠪᠠᠨ ᠮᠠᠩᠯᠠᠢ ᠳᠠᠢᠳᠤᠬᠤ ᠠ᠋ᠴᠠ ᠬᠠᠯᠠᠰᠢᠷᠠᠪᠠ᠃ ᠮᠡᠷᠭᠢᠳ ᠦ᠋ᠨ ᠬᠣᠲᠣ ᠪᠠᠢᠳᠠᠯ ᠪᠢᠰᠢᠳᠡᠭᠰᠡᠨ ᠢ᠋ ᠬᠠᠷᠠᠭᠠᠳ ᠥᠪᠡᠷ ᠦ᠋ᠨ ᠠᠢᠮᠠᠭ ᠤ᠋ᠨ ᠬᠢᠨ ᠢ᠋ᠶ᠋ᠡᠨ ᠳᠠᠭᠤᠳᠠᠵᠤ ᠴᠤᠭᠯᠠᠭᠤᠯᠵᠤ ᠠᠷᠤ ᠳ᠋ᠤ᠌ ᠨᠢ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠤᠷᠢᠳᠤ ᠨᠢ ᠭᠠᠷᠴᠤ ᠰᠡᠯᠡᠩᠭᠡ ᠤᠷᠤᠭᠤ ᠤᠬᠤᠷᠢᠪᠠ᠃
ᠣᠢᠷᠠᠳ ᠤ᠋ᠨ ᠬᠤᠳᠤᠭᠠ ᠪᠡᠬᠢ ᠪᠤᠷᠬᠠᠨ ᠳ᠋ᠤ᠌ ᠢᠲᠡᠭᠡᠯ ᠠᠯᠳᠠᠷᠠᠵᠤ᠂ ᠮᠣᠷᠢᠨ ᠤ᠋ ᠳᠥᠷᠪᠡᠨ ᠬᠥᠯ ᠮᠡᠳᠡᠳᠡᠭ ᠦᠭᠡᠢ ᠭᠡᠰᠡᠨ ᠰᠢᠭ ᠲᠠᠰᠢᠭᠤᠷᠳᠠᠭᠰᠠᠭᠠᠷ ᠲᠡᠢᠨ ᠦ᠌ ᠲᠠᠯᠠᠪᠤᠷ ᠠ᠋ᠴᠠ ᠵᠠᠢᠯᠠᠵᠤ ᠤᠮᠠᠷᠠᠲᠤ ᠵᠦᠭ ᠦ᠋ᠨ ᠣᠢ ᠮᠣᠳᠣ ᠶ᠋ᠢ ᠪᠠᠷᠠᠳᠠᠬᠤ ᠪᠠᠷ ᠣᠮ ᠬᠣᠮ ᠦᠭᠡᠢ ᠵᠢᠭᠤᠲᠠᠵᠤ ᠰᠢᠰᠭᠢᠰ ᠢ᠋ ᠵᠣᠷᠢᠪᠠ᠃
ᠪᠠᠭᠠᠲᠤᠷ ᠴᠣᠯᠠ ᠲᠠᠢ ᠲᠠᠢᠴᠢᠭᠤᠳ ᠤ᠋ᠨ ᠠᠭᠤᠴᠤ ᠨᠡᠷᠡ ᠬᠤᠭᠤᠷᠠᠬᠤ ᠴᠤ᠌ ᠶᠠᠭᠠᠬᠢᠮᠤᠢ ᠭᠡᠰᠡᠨ ᠰᠢᠭ ᠪᠤᠰᠤᠳ ᠢ᠋ ᠪᠡᠨ ᠳᠠᠭᠠᠭᠤᠯᠤᠨ ᠤᠨᠤᠨ ᠮᠥᠷᠡᠨ ᠳ᠋ᠡᠬᠢ ᠬᠦᠷᠢᠶᠡ ᠭᠡᠷ ᠤᠷᠤᠭᠤ ᠪᠠᠨ ᠶᠠᠭᠠᠷᠠᠨ ᠰᠠᠨᠳᠤᠷᠤᠨ ᠬᠥᠳᠡᠯᠵᠡᠢ᠃ ᠢᠩᠭᠢᠭᠡᠳ ᠠᠷᠪᠠᠨ ᠬᠣᠶᠠᠷ ᠠᠢᠮᠠᠭ ᠤ᠋ᠨ ᠬᠣᠯᠪᠣᠭᠠ ᠪᠤᠲᠠ ᠦᠰᠦᠷᠴᠡᠢ᠃
ᠬᠠᠮᠲᠤᠷᠠᠭᠰᠠᠨ ᠴᠡᠷᠢᠭ ᠦ᠋ᠨ ᠤᠳᠤᠷᠢᠳᠤᠭᠴᠢ ᠵᠠᠮᠤᠬᠠ ᠪᠤᠰᠤᠳ ᠠ᠋ᠴᠠ ᠳᠡᠭᠡᠷᠡᠳᠡᠬᠦ ᠶᠠᠭᠤᠮᠠ ᠦᠭᠡᠢ ᠪᠣᠯᠵᠤ᠂ ᠲᠡᠭᠦᠨ ᠢ᠋ ᠪᠦᠭᠦᠳᠡ ᠶ᠋ᠢᠨ ᠬᠠᠭᠠᠨ ᠭᠡᠳᠡᠭ ᠬᠥᠷ ᠬᠠᠨ ᠤ᠋ ᠨᠡᠷᠡ ᠰᠦᠷ ᠡᠴᠡ ᠨᠢ ᠰᠢᠪᠬᠠᠷᠤᠤ ᠴᠤ᠌ ᠦᠯᠡᠳᠡᠭᠰᠡᠨ ᠦᠭᠡᠢ᠃ ᠮᠠᠩᠯᠠᠢ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠰᠠᠷᠨᠢᠯ ᠢ᠋ ᠬᠠᠷᠠᠭᠰᠠᠭᠠᠷ ᠪᠠᠢᠵᠤ ᠪᠦᠬᠦ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠰᠡᠳᠬᠢᠯ ᠢ᠋ ᠲᠠᠢᠳᠬᠠᠷᠠᠭᠤᠯᠵᠦ ᠡᠮᠬᠢ ᠴᠡᠭᠴᠡᠨ ᠳ᠋ᠦ᠍ ᠣᠷᠣᠭᠤᠯᠬᠤ ᠶᠣᠰᠣᠲᠠᠢ ᠪᠠᠢᠲᠠᠯᠠ᠂ ᠥᠪᠡᠷ ᠢ᠋ ᠨᠢ ᠡᠷᠭᠦᠮᠵᠢᠯᠡᠭᠰᠡᠨ ᠢᠷᠭᠡᠳ ᠢ᠋ ᠵᠠᠮ ᠳ᠋ᠤ᠌ ᠪᠠᠨ ᠳᠡᠭᠡᠷᠡᠮᠳᠡᠨ ᠲᠡᠳᠡᠨ ᠦ᠌ ᠭᠡᠷ ᠮᠠᠢᠬᠠᠨ ᠢ᠋ ᠣᠩᠭᠢᠴᠢᠨ ᠬᠣᠭᠣᠰᠣᠯᠠᠭᠠᠳ ᠡᠷᠭᠦᠨᠡ ᠭᠣᠣᠯ ᠢ᠋ ᠤᠷᠤᠭᠤᠳᠠᠨ ᠳᠣᠷᠣᠨᠠ ᠵᠦᠭ ᠪᠤᠴᠠᠬᠤ ᠵᠠᠮ ᠢ᠋ᠶ᠋ᠠᠨ ᠬᠥᠭᠡᠭᠡᠵᠡᠢ᠃
ᠡᠨᠳᠡ ᠬᠠᠷᠢᠨ ᠨᠥᠬᠥᠴᠡᠯ ᠪᠠᠢᠳᠠᠯ ᠢ᠋ ᠠᠵᠢᠭᠯᠠᠵᠤ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠣᠷᠣᠭᠠ ᠦᠭᠡᠢ ᠪᠠᠢᠭᠰᠠᠨ ᠬᠣᠩᠭᠢᠷᠠᠳ ᠠᠢᠮᠠᠭ ᠤ᠋ᠨ ᠬᠢᠨ ᠵᠠᠮᠤᠬᠠ ᠶ᠋ᠢᠨ ᠲᠡᠷᠢᠭᠦᠯᠡᠭᠰᠡᠨ ᠡᠪᠰᠡᠯ ᠦ᠋ᠨ ᠬᠦᠴᠦ ᠢᠯᠠᠭᠳᠠᠮᠠᠭᠴᠠ ᠲᠡᠮᠦᠵᠢᠨ ᠲᠡᠢ ᠳᠠᠷᠤᠢ ᠣᠴᠢᠵᠤ ᠨᠡᠢᠯᠡᠨ ᠤᠯᠤᠰ ᠲᠤ᠌ ᠨᠢ ᠨᠢᠭᠡᠳᠦᠭᠰᠡᠨ ᠪᠠᠢᠨᠠ᠃
ᠬᠦᠢᠲᠡᠨ ᠦ᠌ ᠪᠠᠢᠯᠳᠤᠭᠠᠨ ᠡᠢᠨ ᠬᠦ᠌ ᠳᠥᠩᠭᠡᠵᠢ ᠬᠠᠭᠠᠰ ᠡᠳᠦᠷ ᠦᠷᠭᠦᠯᠵᠢᠯᠡᠭᠰᠡᠨ ᠪᠠ ᠵᠡᠭᠡᠭᠡᠭᠰᠡᠨ ᠬᠦᠴᠦᠷᠬᠡᠭ ᠪᠠᠢᠮᠠᠷ ᠵᠠᠮᠤᠬᠠ ᠶ᠋ᠢᠨ ᠬᠣᠯᠪᠣᠭᠠ ᠡᠷᠴᠢ ᠨᠢ ᠵᠠᠳᠠᠷᠠᠭᠰᠠᠨ ᠳᠡᠭᠡᠰᠦ ᠮᠡᠲᠦ ᠨᠢᠭᠡᠮᠦᠰᠦᠨ ᠵᠠᠳᠠᠷᠠᠨ ᠤᠨᠠᠪᠠ᠃
ᠡᠨᠡ ᠴᠠᠭ ᠮᠥᠴᠡ ᠡᠴᠡ ᠡᠬᠢᠯᠡᠨ ᠮᠣᠩᠭᠣᠯ ᠤ᠋ᠨ ᠲᠠᠯᠠ ᠨᠤᠲᠤᠭ ᠲᠤ᠌ ᠠᠩᠬᠠᠨ ᠤ᠋ ᠶᠡᠬᠡ ᠡᠷᠭᠢᠯᠲᠡ ᠭᠠᠷᠤᠭᠰᠠᠨ ᠪᠢᠯᠡ᠃ ᠡᠨᠡ ᠪᠣᠯ ᠮᠣᠩᠭᠣᠯ ᠤ᠋ᠨ ᠲᠠᠯᠠ ᠨᠤᠲᠤᠭ ᠲᠤ᠌ ᠡᠪ ᠨᠢᠭᠡᠳᠦᠯ ᠳᠡᠢᠯᠬᠦ ᠦᠦ? ᠡᠰᠡᠬᠦᠯᠡ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠳᠠᠷᠬᠠᠢ ᠪᠤᠲᠠᠷᠬᠠᠢ ᠭᠡᠪᠡ ᠪᠡᠷ ᠪᠠᠢᠬᠤ ᠤᠤ ᠭᠡᠳᠡᠭ ᠢ᠋ ᠰᠢᠢᠳᠬᠦ ᠭᠣᠣᠯ ᠲᠤᠯᠤᠯᠳᠤᠭᠠᠨ ᠪᠠᠢᠪᠠ᠃
ᠬᠡᠷᠪᠡ ᠬᠣᠯᠪᠣᠭᠠᠲᠠᠨ ᠤ᠋ ᠲᠠᠯᠠ ᠢᠯᠠᠭᠳᠠᠭᠰᠠᠨ ᠪᠣᠯ ᠪᠤᠰᠤᠳ ᠢ᠋ ᠥᠪᠡᠷ ᠲᠦ᠍ ᠪᠡᠨ ᠨᠢᠭᠡᠳᠬᠡᠨ ᠲᠠᠲᠠᠬᠤ ᠲᠥᠪᠯᠡᠷᠡᠭᠰᠡᠨ ᠬᠦᠴᠦ ᠠᠯᠭᠠ ᠪᠣᠯᠵᠤ᠂ ᠲᠥᠪ ᠠᠽᠢᠶᠠ ᠶ᠋ᠢᠨ ᠨᠡᠭᠦᠳᠡᠯᠴᠢᠳ ᠤᠷᠢᠳᠤ ᠶ᠋ᠢᠨ ᠪᠠᠢᠬᠤ ᠪᠠᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠦᠯᠡᠳᠡᠬᠦ ᠪᠠᠢᠪᠠ᠃ ᠬᠠᠷᠢᠨ ᠵᠠᠮᠤᠬᠠ ᠶ᠋ᠢᠨ ᠡᠪᠰᠡᠯ ᠦ᠋ᠨ ᠬᠢᠨ ᠲᠡᠢ ᠬᠢᠭᠰᠡᠨ ᠲᠤᠯᠤᠯᠳᠤᠭᠠᠨ ᠨᠢ ᠲᠡᠮᠦᠵᠢᠨ ᠸᠠᠩ ᠬᠠᠨ ᠬᠣᠶᠠᠷ ᠤ᠋ᠨ ᠡᠭᠡᠯᠵᠢᠲᠦ ᠢᠯᠠᠯᠲᠠ ᠪᠠᠷ ᠡᠢᠨ ᠬᠦ᠌ ᠥᠨᠳᠥᠷᠯᠡᠭᠰᠡᠨ ᠪᠣᠯᠪᠠᠴᠤ ᠨᠥᠭᠥᠭᠡ ᠲᠠᠯᠠ ᠪᠠᠷ ᠲᠡᠳᠡᠨ ᠦ᠌ ᠬᠠᠭᠠᠴᠠᠨ ᠰᠠᠯᠬᠤ ᠶᠠᠪᠤᠳᠠᠯ ᠢ᠋ ᠲᠦᠷᠭᠡᠳᠬᠡᠵᠡᠢ᠃ ᠤᠴᠢᠷ ᠨᠢ ᠵᠠᠮᠤᠬᠠ ᠢᠯᠠᠭᠳᠠᠭᠰᠠᠨ ᠤ᠋ ᠪᠠᠨ ᠳᠠᠷᠠᠭᠠ ᠸᠠᠩ ᠬᠠᠨ ᠲᠠᠢ ᠰᠦᠯᠪᠡᠯᠳᠦᠬᠦ ᠪᠣᠯᠤᠭᠰᠠᠨ ᠪᠥᠭᠡᠳ ᠲᠡᠷᠡ ᠲᠣᠰᠤᠮ ᠢ᠋ᠶ᠋ᠠᠨ ᠲᠡᠮᠦᠵᠢᠨ ᠢ᠋ ᠲᠤᠤᠱᠲᠠᠢ ᠦᠵᠡᠨ ᠶᠠᠳᠠᠭᠴᠢ ᠰᠡᠩᠭᠦᠨ ᠲᠡᠢ ᠳᠣᠲᠣᠨᠣ ᠬᠠᠷᠢᠯᠴᠠᠭᠠ ᠲᠠᠢ ᠪᠣᠯᠤᠭᠰᠠᠨ ᠪᠠᠢᠨᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄
ᠳ᠋ᠠᠰᠢᠨᠢᠮᠠ ᠦᠰᠦᠭ ᠬᠠᠲᠠᠭᠴᠢ᠄ ᠳ᠋ᠠᠰᠨᠢᠮᠠ
ᠦᠰᠦᠭ ᠬᠢᠨᠠᠭᠴᠢ᠄ᠨᠤᠮᠤᠴᠢᠨ ᠪᠢᠯᠢᠭ᠂ ᠠ· ᠰᠠᠷᠠᠩᠭᠡᠷᠡᠯ᠂ ᠢᠷᠡᠭᠡᠳᠦᠢ