ᠠᠽᠢᠶᠠ ᠲᠢᠪ ᠲᠦ ᠪᠢ ᠲᠦᠷᠦᠭᠰᠡᠨ-ᠷ ᠂ᠴᠣᠢᠨᠣᠮР.Чойном - Ази тивд би төрсөн
367ᠠᠽᠢᠶᠠ ᠲᠢᠪ ᠲᠦ ᠪᠢ ᠲᠦᠷᠦᠭᠰᠡᠨ
ᠷ᠂ ᠴᠤᠢᠨᠤᠮ
ᠳᠤᠷᠠᠯᠠᠯ ᠤ᠋ᠨ ᠢ᠋ᠶ᠋ᠠᠨ ᠵᠢᠩᠬᠢᠨᠢ ᠠᠮᠲᠠᠨ ᠳ᠋ᠤ᠌ ᠰᠣᠭᠲᠣᠭᠤᠷᠠᠵᠤ
ᠳᠠᠭᠤᠤ ᠶ᠋ᠢᠨ ᠢ᠋ᠶ᠋ᠡᠨ ᠰᠣᠨᠢᠬᠠᠨ ᠠᠶᠠᠯᠭᠤᠨ ᠳ᠋ᠤ᠌ ᠬᠥᠯᠴᠥᠭᠦᠷᠡᠵᠦ
ᠲᠤᠩ ᠴᠡᠩᠬᠡᠷ ᠲᠩᠷᠢ ᠶ᠋ᠢᠨ ᠢ᠋ᠶ᠋ᠡᠷ ᠲᠤᠬᠠᠢ
ᠲᠤᠤᠯᠢᠮᠠ ᠴᠠᠭᠠᠨ ᠲᠠᠯᠠ ᠶ᠋ᠢᠨ ᠢ᠋ᠶ᠋ᠡᠨ ᠲᠤᠬᠠᠢ
ᠳᠠᠭᠤᠲᠤ ᠥᠨᠳᠥᠷ ᠰᠠᠷᠢᠳᠠᠭ ᠤ᠋ᠨ ᠢ᠋ᠶ᠋ᠠᠨ ᠲᠤᠬᠠᠢ
ᠳᠠᠭᠤᠯᠬᠤ ᠬᠦᠰᠡᠯᠡᠩ ᠨᠠᠳᠠ ᠳ᠋ᠤ᠌ ᠲᠥᠷᠥᠵᠦ ᠪᠠᠢᠨᠠ
ᠭᠦᠨ ᠵᠤᠵᠠᠭᠠᠨ ᠬᠥᠪᠴᠢ ᠶ᠋ᠢᠨ ᠢ᠋ᠶ᠋ᠡᠷ ᠲᠤᠬᠠᠢ
ᠭᠦᠶᠦᠳᠡᠯ ᠦᠭᠡᠢ ᠵᠢᠷᠣᠭᠠ ᠮᠥᠷᠡᠨ ᠭᠣᠣᠯ ᠤ᠋ᠨ ᠢ᠋ᠶ᠋ᠠᠨ ᠲᠤᠬᠠᠢ
ᠠᠯᠳᠠᠯᠠᠭᠰᠠᠨ ᠴᠤ᠌ ᠦᠵᠦᠭᠦᠷ ᠨᠢ
ᠦᠵᠡᠭᠳᠡᠳᠡᠭ ᠦᠭᠡᠢ ᠬᠠᠳᠠᠭ ᠤ᠋ᠨ ᠢ᠋ᠶ᠋ᠠᠨ ᠲᠤᠬᠠᠢ
ᠠᠰᠬᠠᠭᠰᠠᠨ ᠴᠤ᠌ ᠰᠠᠪᠠ ᠨᠢ
ᠴᠠᠭᠠᠨ ᠦᠯᠡᠳᠡᠳᠡᠭ ᠰᠦᠨ ᠦ᠌ ᠪᠡᠨ ᠲᠤᠬᠠᠢ
ᠠᠭᠤᠷᠯᠠᠭᠰᠠᠨ ᠴᠤ᠌ ᠵᠡᠪᠰᠡᠭ ᠢ᠋ᠶ᠋ᠡᠷ ᠦᠵᠡᠭᠦᠯᠳᠡᠭ ᠦᠭᠡᠢ
ᠬᠠᠷᠠᠴᠤ ᠶ᠋ᠢᠨ ᠢ᠋ᠶ᠋ᠡᠨ ᠬᠥᠪᠡᠭᠦᠳ ᠦ᠋ᠨ ᠲᠤᠬᠠᠢ
ᠤᠬᠢᠯᠠᠭᠰᠠᠨ ᠴᠤ᠌ ᠨᠢᠯᠪᠤᠰᠤ ᠪᠠᠨ ᠦᠵᠡᠭᠦᠯᠳᠡᠭ ᠦᠭᠡᠢ
ᠬᠠᠷᠠ ᠨᠢᠳᠦᠲᠡᠨ ᠨᠦ᠍ᠭᠦᠳ ᠦ᠋ᠨ ᠢ᠋ᠶ᠋ᠡᠨ ᠲᠤᠬᠠᠢ
ᠬᠥᠮᠦᠨ ᠦ᠌ ᠵᠣᠪᠠᠯᠠᠩ ᠰᠢᠩᠭᠡᠭᠰᠡᠨ ᠴᠢᠯᠠᠭᠤ ᠪᠦᠬᠦᠨ ᠦ᠌ ᠲᠤᠬᠠᠢ
ᠬᠦᠰᠡᠯ ᠦ᠋ᠨ ᠳᠡᠭᠡᠵᠢ ᠰᠢᠩᠭᠡᠭᠰᠡᠨ ᠨᠠᠢᠷᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠢ ᠳᠠᠭᠤᠯᠠᠨᠠᠮ
ᠬᠠᠮᠢᠭᠠ ᠴᠢ ᠲᠥᠷᠥᠭᠰᠡᠨ ᠶᠦᠮ ᠭᠡᠵᠦ
ᠬᠠᠲᠤᠨ ᠳᠡᠯᠡᠬᠡᠢ ᠴᠢ ᠠᠰᠠᠭᠤ
ᠬᠠᠮᠤᠭ ᠢ᠋ ᠵᠠᠬᠢᠷᠳᠠᠭ ᠣᠮᠣᠭ ᠳᠦᠷᠢ ᠪᠡᠷ ᠢ᠋ᠶ᠋ᠡᠷ
ᠬᠠᠪᠲᠠᠰᠤ ᠨᠡᠭᠡᠭᠡᠭᠡᠳ ᠠᠰᠠᠭᠤ
ᠠᠯᠧᠺᠰᠠᠨᠳᠧᠷ ᠳ᠋ᠶᠦ᠋ᠮ ᠡᠴᠡ
ᠠᠰᠠᠭᠤᠭᠰᠠᠨ ᠰᠢᠭ᠋ ᠢ᠋ᠶ᠋ᠡᠷ ᠠᠰᠠᠭᠤ
ᠠᠯᠢᠱᠸᠷ ᠨᠠᠸᠤᠢ ᠶ᠋ᠢ ᠵᠠᠯᠠᠭᠤ ᠳ᠋ᠤ᠌ ᠨᠢ
ᠠᠰᠠᠭᠤᠭᠰᠠᠨ ᠰᠢᠭ᠋ ᠢ᠋ᠶ᠋ᠡᠷ ᠠᠰᠠᠭᠤ
ᠬᠠᠭᠠᠨ ᠰᠤᠳᠤᠷ ᠪᠢᠴᠢᠭᠰᠡᠨ ᠫᠸᠷᠦᠰᠰ ᠢ᠋
ᠬᠠᠷᠠᠩᠭᠤᠳᠠᠭᠤᠯᠤᠭᠰᠠᠨ ᠰᠢᠭ᠋ ᠢ᠋ᠶ᠋ᠡᠷ ᠠᠰᠠᠭᠤ
ᠬᠠᠨᠤᠭᠰᠠᠨ ᠴᠡᠩᠭᠡᠯ ᠡᠴᠡ ᠫᠦᠱᠺᠢᠨ ᠢ᠋
ᠬᠠᠭᠠᠴᠠᠭᠠᠭᠰᠠᠨ ᠰᠢᠭ᠋ ᠢ᠋ᠶ᠋ᠡᠷ ᠠᠰᠠᠭᠤ
ᠦᠯᠡᠮᠵᠢ ᠶ᠋ᠢᠨ ᠶᠡᠬᠡ ᠪᠠᠢᠷᠤᠨ ᠢ
ᠦᠬᠦᠭᠦᠯᠦᠭᠰᠡᠨ ᠰᠢᠭ ᠢ᠋ᠶ᠋ᠡᠷ ᠠᠰᠠᠭᠤ
ᠡᠭᠦᠨ ᠳ᠋ᠦ᠍ ᠴᠢᠨᠢ ᠪᠢ ᠭᠠᠪ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ
ᠦᠢ ᠲᠦᠮᠡᠨ ᠰᠢᠭ ᠬᠠᠷᠢᠭᠤᠯᠤᠶᠠ
ᠠᠽᠢᠶᠠ ᠲᠢᠪ ᠲᠦ᠍ ᠪᠢ ᠲᠥᠷᠥᠭᠰᠡᠨ ᠶᠦᠮ
ᠠᠽᠢᠶᠠ ᠲᠢᠪ ᠮᠢᠨᠦ ᠨᠤᠲᠤᠭ
ᠠᠪᠤᠷᠭᠤ ᠣᠷᠴᠢᠯᠠᠩ ᠤ᠋ᠨ ᠬᠠᠮᠢᠭᠠ ᠠ᠋ᠴᠠ ᠴᠤ᠌
ᠠᠭᠢᠭᠠᠳ ᠣᠯᠳᠠᠰᠢ ᠦᠭᠡᠢ ᠠᠽᠢᠶᠠ ᠮᠢᠨᠦ ᠨᠤᠲᠤᠭ
ᠠᠷᠪᠠᠨ ᠭᠠᠯᠪᠠ ᠶ᠋ᠢᠨ ᠳᠠᠩᠰᠠᠨ ᠳᠡᠭᠡᠷᠡ
ᠠᠷᠴᠢᠭᠳᠠᠵᠤ ᠬᠤᠰᠤᠭᠳᠠᠵᠤ ᠶᠠᠪᠤᠭᠰᠠᠨ
ᠠᠵᠠ ᠪᠠᠷ ᠳᠤᠯᠢᠬᠠᠨ ᠳᠥᠷᠪᠡᠨ ᠲᠢᠪ ᠦ᠋ᠨ
ᠠᠯᠢᠨ ᠳ᠋ᠤᠨᠢ ᠴᠤ᠌ ᠪᠢ ᠲᠣᠭᠣᠵᠤ ᠳᠥᠷᠥᠭᠡ ᠦᠭᠡᠢ ᠶᠦᠮ
ᠠᠮᠢᠰᠬᠤᠯᠯᠠᠬᠤ ᠳ᠋ᠤ᠌ ᠠᠭᠠᠷ ᠨᠢ ᠴᠢᠯᠥᠭᠡᠲᠡᠢ ᠭᠡᠵᠦ
ᠠᠮᠢᠳᠤᠷᠠᠬᠤ ᠳ᠋ᠤ᠌ ᠭᠠᠵᠠᠷ ᠨᠢ ᠠᠭᠤᠵᠢᠮ ᠭᠡᠵᠦ
ᠠᠮᠰᠠᠬᠤ ᠳ᠋ᠤ᠌ ᠠᠢᠷᠠᠭ ᠨᠢ ᠠᠮᠲᠠᠲᠠᠢ ᠭᠡᠵᠦ
ᠠᠮᠠᠷᠠᠬᠤ ᠳ᠋ᠤ᠌ ᠠᠯᠳᠠᠩᠬᠠᠨ ᠰᠢᠷᠣᠢ ᠨᠢ ᠵᠥᠭᠡᠯᠡᠨ ᠭᠡᠵᠦ
ᠳᠠᠭᠤᠯᠠᠬᠤ ᠳ᠋ᠤ᠌ ᠬᠤᠭᠤᠷ ᠨᠢ ᠬᠥᠭ ᠲᠡᠢ ᠶᠦᠮ ᠭᠡᠵᠦ
ᠳᠤᠷᠠᠰᠬᠤ ᠳ᠋ᠤ᠌ ᠬᠠᠭᠤᠴᠢᠨ ᠲᠡᠦᠬᠡ ᠶᠡᠬᠡ ᠲᠡᠢ ᠶᠦᠮ ᠭᠡᠵᠦ
ᠳᠤᠷᠠᠯᠠᠬᠤ ᠳ᠋ᠤ᠌ ᠬᠡᠦᠬᠡᠨ ᠨᠢ ᠦᠨᠡᠨᠴᠢ ᠶᠦᠮ ᠭᠡᠵᠦ
ᠲᠤᠤᠯᠢᠮᠠ ᠶᠡᠬᠡ ᠠᠽᠢᠶᠠ ᠳ᠋ᠤ᠌ ᠮᠢᠨᠦ ᠪᠡᠶᠡ ᠮᠡᠨᠳᠦᠯᠡᠭᠰᠡᠨ ᠶᠦᠮ᠃
ᠠᠽᠢᠶᠠ ᠲᠢᠪ ᠨᠠᠮᠠ ᠶ᠋ᠢ
ᠠᠥ᠋ᠰᠲ᠋ᠸᠷᠯᠢᠶᠠ ᠲᠢᠪ ᠰᠢᠭ
ᠠᠷᠢᠶᠠᠲᠠᠨ ᠠᠮᠢᠲᠠᠨ ᠢ᠋ᠶ᠋ᠠᠷ
ᠠᠶᠤᠯᠭᠠᠯ ᠦᠭᠡᠢ ᠬᠦᠯᠢᠶᠡᠵᠦ ᠠᠪᠤᠭᠰᠠᠨ
ᠠᠽᠢᠶᠠ ᠲᠢᠪ ᠨᠠᠮᠠ ᠶ᠋ᠢ
ᠠᠮᠧᠷᠢᠺᠠ ᠲᠢᠪ ᠰᠢᠭ
ᠠᠯᠲᠠᠨ ᠵᠣᠭᠣᠰᠤᠨ ᠳ᠋ᠤ᠌
ᠠᠯᠠᠭᠠ ᠳᠤᠰᠤᠭᠤᠯᠤᠯ ᠦᠭᠡᠢ ᠬᠦᠯᠢᠶᠡᠵᠦ ᠠᠪᠤᠭᠰᠠᠨ
ᠠᠽᠢᠶᠠ ᠲᠢᠪ ᠨᠠᠮᠠ ᠶ᠋ᠢ
ᠠᠹᠷᠢᠺᠠ ᠲᠢᠪ ᠰᠢᠭ
ᠠᠩᠭᠠᠭᠠᠨ ᠴᠠᠩᠭᠠᠭᠠᠯ ᠦᠭᠡᠢ
ᠠᠮᠠᠷᠠᠭᠯᠠᠨ ᠲᠡᠪᠡᠷᠢᠵᠦ ᠠᠪᠤᠭᠰᠠᠨ
ᠠᠽᠢᠶᠠ ᠲᠢᠪ ᠨᠠᠮᠠ ᠶ᠋ᠢ
ᠠᠳᠠᠭ ᠤ᠋ᠨ ᠧᠦ᠋ᠷᠣᠫᠠ ᠰᠢᠭ᠋
ᠠᠯᠠᠯᠭᠠᠨ ᠳ᠋ᠤ᠌ ᠳᠠᠭᠤᠳᠠᠯ ᠦᠭᠡᠢ
ᠠᠯᠠᠭᠠ ᠪᠠᠨ ᠲᠣᠰᠴᠤ ᠬᠦᠯᠢᠶᠡᠵᠦ ᠠᠪᠤᠭᠰᠠᠨ
ᠬᠥᠮᠦᠨ ᠦ᠌ ᠠᠭᠤᠵᠢᠮ ᠰᠡᠳᠬᠢᠯ ᠰᠢᠭ
ᠬᠦᠢ ᠴᠠᠭᠠᠨ ᠲᠠᠯᠠ ᠳᠤᠮᠳᠠ ᠳ᠋ᠤ᠌ ᠨᠢ
ᠬᠦᠦ ᠨᠢ ᠶᠤᠮ ᠰᠢᠭ᠋ ᠲᠡᠯᠴᠢᠯᠡᠩᠬᠡᠨ ᠪᠠᠢᠵᠤ
ᠰᠢᠩᠬᠤᠨ ᠤᠯᠠᠭᠠᠨ ᠬᠠᠶᠠᠭᠠ ᠲᠠᠢ
ᠮᠠᠩᠬᠠᠨ ᠴᠡᠩᠬᠡᠷ ᠲᠩᠷᠢ ᠳ᠋ᠦ᠍ ᠨᠢ ᠪᠢ
ᠰᠢᠪᠠᠭᠤ ᠨᠢ ᠶᠦᠮ ᠰᠢᠭ᠋
ᠱᠤᠯᠤᠭᠠᠨᠠᠩᠬᠠᠨ ᠪᠠᠢᠵᠤ
ᠵᠠᠬᠠ ᠦᠭᠡᠢ ᠲᠠᠯᠠ ᠶ᠋ᠢᠨ ᠣᠳᠣᠨ ᠪᠣᠯᠤᠭᠰᠠᠨ
ᠵᠠᠭᠠᠨ ᠤ᠋ ᠰᠡᠭᠦᠯ ᠰᠢᠭ ᠨᠠᠭᠤᠷ ᠲᠤ᠌ ᠨᠢ ᠪᠢ
ᠵᠢᠭᠠᠰᠤ ᠨᠢ ᠶᠤᠮ ᠰᠢᠭ᠋
ᠱᠤᠮᠪᠠᠩᠬᠠᠨ ᠪᠠᠢᠵᠤ
ᠣᠷᠴᠢᠯᠠᠩ ᠳᠡᠯᠡᠬᠡᠢ ᠶ᠋ᠢ ᠲᠣᠭᠣᠷᠢᠵᠤ ᠶᠠᠪᠤᠭᠰᠠᠨ
ᠣᠷᠣᠭᠠ ᠮᠣᠷᠢᠳ ᠤ᠋ᠨ ᠵᠣ ᠳᠡᠭᠡᠷᠡ ᠪᠢ
ᠣᠩᠭᠣᠨ ᠰᠠᠬᠢᠭᠤᠰᠤ ᠰᠢᠭ᠋
ᠳᠥᠷᠥᠭᠡᠯᠡᠩᠭᠡᠨ ᠪᠠᠢᠵᠤ
ᠠᠵᠠ ᠶ᠋ᠢᠨ ᠠᠯᠲᠠᠨ ᠱᠣ ᠶ᠋ᠢᠨ
ᠠᠷᠪᠠᠨ ᠴᠠᠭᠠᠨ ᠨᠢᠳᠦᠨ ᠳᠡᠭᠡᠷᠡ
ᠠᠮᠠ ᠴᠠᠭᠠᠨ ᠬᠤᠯᠤᠭᠠᠨᠠ ᠶ᠋ᠢᠨ
ᠠᠰᠠᠭᠠᠭᠰᠠᠨ ᠭᠠᠯ ᠤ᠋ᠨ ᠲᠥᠯᠥᠨ ᠳᠡᠭᠡᠷᠡ
ᠶᠢᠰᠦᠨ ᠴᠠᠭᠠᠨ ᠮᠡᠩᠭᠡᠨ ᠦ᠌
ᠨᠦᠬᠡ ᠲᠠᠭᠠᠷᠠᠭᠤᠯᠤᠩᠬᠠᠨ ᠲᠥᠷᠥᠭᠰᠡᠨ ᠶᠦᠮ ᠪᠢ
ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠸᠠ ᠬᠡᠦᠬᠡᠨ ᠨᠤᠭᠦᠳ ᠦ᠋ᠨ
ᠨᠢᠳᠦ ᠳᠠᠭᠠᠭᠤᠯᠤᠩᠬᠠᠨ ᠥᠰᠦᠭᠰᠡᠨ ᠶᠦᠮ ᠪᠢ
ᠤᠰᠤᠨ ᠨᠠᠮᠤᠭ ᠪᠠᠮᠪᠠᠯᠵᠠᠭᠠ ᠦᠭᠡᠢ
ᠠᠭᠤᠵᠢᠮ ᠡᠨᠡ ᠠᠽᠢᠶᠠ ᠶ᠋ᠢᠨ ᠲᠠᠯᠠ
ᠤᠲᠤᠭᠠ ᠲᠣᠷᠲᠣᠭ ᠲᠤ᠌ ᠪᠦᠷᠦᠯᠵᠡᠭᠡ ᠦᠭᠡᠢ
ᠤᠷᠢᠬᠠᠨ ᠬᠣᠩᠭᠣᠷ ᠮᠢᠨᠦ ᠲᠠᠯᠠ
ᠤᠯᠤᠰ ᠤ᠋ᠨ ᠨᠢᠷᠤᠭᠤ ᠪᠥᠮᠪᠥᠯᠵᠡᠭᠡ ᠦᠭᠡᠢ
ᠤᠭ ᠠ᠋ᠴᠠ ᠴᠢᠯᠥᠭᠡᠲᠦ ᠮᠣᠩᠭᠣᠯ ᠤ᠋ᠨ ᠲᠠᠯᠠ
ᠤᠬᠠᠭᠠᠨ ᠢ᠋ ᠮᠢᠨᠢ ᠳᠡᠯᠢᠨ ᠳᠡᠯᠢᠨ ᠥᠰᠬᠡᠭᠰᠡᠨ
ᠤᠶᠠᠬᠠᠨ ᠽᠠᠮᠪᠤᠲᠢᠪ ᠤ᠋ᠨ ᠮᠢᠨᠢ ᠲᠠᠯᠠ ᠨᠤᠲᠤᠭ᠃
ᠬᠣᠮᠪᠣᠩ ᠲᠤᠭᠤᠷᠠᠢᠲᠤ ᠮᠣᠷᠢᠳ ᠤ᠋ᠨ
ᠬᠤᠷᠳᠤᠨ ᠬᠥᠯ ᠢ᠋ᠶ᠋ᠡᠷ ᠪᠤᠲᠠᠷᠠᠭᠰᠠᠨ
ᠴᠠᠬᠢᠭᠤᠷ ᠬᠠᠷᠠ ᠴᠢᠯᠠᠭᠤ
ᠴᠠᠭᠠᠨ ᠲᠣᠯᠣᠭᠠᠢᠲᠤ ᠳᠠᠭᠠᠨᠠ
ᠭᠠᠵᠠᠷ ᠲᠩᠷᠢ ᠶ᠋ᠢ ᠬᠣᠯᠪᠣᠭᠰᠠᠨ
ᠭᠠᠨᠳᠠᠷᠢᠰᠤᠨ ᠤᠷᠠᠨ ᠪᠠᠯᠭᠠᠰᠤ
ᠭᠠᠯᠪᠠ ᠶ᠋ᠢᠨ ᠤᠯᠠᠭᠠᠨ ᠲᠡᠮᠡᠭᠡ ᠪᠡᠷ
ᠬᠤᠵᠢᠷ ᠱᠡᠦ ᠪᠡᠷ ᠵᠠᠬᠠᠯᠠᠭᠰᠠᠨ
ᠬᠠᠭᠤᠷᠠᠢ ᠨᠠᠭᠤᠷ ᠤ᠋ᠨ ᠬᠣᠩᠬᠣᠷ
ᠠᠪᠤᠷᠭᠤ ᠮᠠᠲᠠᠷ ᠤ᠋ᠨ ᠠᠷᠠᠰᠤ ᠰᠢᠭ᠋
ᠠᠷᠰᠠᠢᠨ ᠬᠠᠲᠠᠭᠰᠠᠨ ᠰᠢᠪᠡᠷ
ᠴᠠᠭ ᠤ᠋ᠨ ᠰᠠᠭᠠᠬᠠᠯᠲᠠ ᠳ᠋ᠤ᠌ ᠪᠥᠬᠥᠯᠵᠡᠭᠰᠡᠨ
ᠴᠠᠭᠠᠨ ᠳᠡᠷᠡᠰᠦᠨ ᠦ᠌ ᠲᠦᠷᠦᠭᠦᠦ
ᠴᠠᠷᠴᠠ ᠳᠡᠪᠬᠡᠷᠭᠡ ᠱᠠᠭᠠᠬᠢᠬᠰᠠᠨ
ᠴᠠᠢᠳᠠᠮ ᠥᠷᠭᠡᠨ ᠬᠥᠨᠳᠡᠢ
ᠲᠤᠩ ᠴᠠᠭᠠᠨ ᠬᠣᠨᠢᠳ ᠮᠢᠨᠢ
ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠪᠡᠯᠴᠢᠳᠡᠭ ᠲᠠᠯᠠᠪᠠᠢ
ᠳᠠᠭᠤᠴᠢᠨ ᠮᠣᠩᠭᠣᠯ ᠪᠡᠷᠢ ᠮᠢᠨᠢ
ᠳᠠᠭᠤᠯᠠᠵᠤ ᠰᠠᠭᠤᠳᠠᠭ ᠲᠠᠯᠠᠪᠤᠷ
ᠠᠯᠴᠢᠭᠤᠷ ᠰᠢᠯᠪᠢᠭᠦᠷ ᠬᠣᠶᠠᠷ ᠤ᠋ᠨ
ᠠᠯᠳᠠᠷ ᠢ᠋ ᠠᠪᠤᠭᠰᠠᠨ ᠤᠳᠤᠮ
ᠠᠷᠪᠠᠨ ᠶᠢᠰᠦᠨ ᠵᠠᠭᠤᠨ ᠢ᠋
ᠠᠢᠷᠠᠭᠳᠠᠵᠤ ᠥᠩᠭᠡᠷᠡᠭᠡᠭᠰᠡᠨ ᠣᠮᠣᠭ
ᠬᠣᠷᠸᠠ ᠶ᠋ᠢᠨ ᠡᠷᠢᠶᠡᠨ ᠠᠮᠢᠳᠤᠷᠠᠯ ᠢ᠋
ᠬᠣᠷᠢᠨ ᠵᠢᠸᠠ ᠵᠢᠯ ᠢ᠋
ᠬᠣᠶᠠᠷ ᠬᠢᠯᠭᠠᠰᠤᠨ ᠳ᠋ᠤ᠌ ᠪᠠᠨ ᠪᠠᠭᠲᠠᠭᠠᠵᠤ
ᠬᠣᠭᠣᠯᠠᠢ ᠮᠡᠳᠡᠩᠬᠡᠨ ᠳᠠᠭᠤᠯᠠᠳᠠᠭ
ᠡᠨᠡ ᠬᠣᠷᠸᠠ ᠳ᠋ᠤ᠌ ᠴᠤᠤᠲᠠᠢ
ᠢᠰᠡᠭᠡᠢ ᠲᠤᠭᠤᠷᠭᠠᠲᠠᠨ ᠤ᠋ ᠨᠤᠲᠤᠭ
ᠡᠷᠢᠶᠡᠨ ᠠᠯᠠᠭ ᠯᠢᠮᠪᠤᠨ ᠤ᠋
ᠡᠬᠡᠰᠢᠭ ᠰᠢᠩᠭᠡᠭᠰᠡᠨ ᠠᠽᠢᠶᠠ
ᠠᠽᠢᠶᠠ ᠰᠢᠭ᠋ ᠠᠭᠤᠵᠢᠮ ᠲᠢᠪ
ᠠᠯᠲᠠᠨ ᠳᠡᠯᠡᠬᠡᠢ ᠳ᠋ᠦ᠍ ᠪᠠᠢᠨᠠ ᠤᠤ
ᠠᠽᠢᠶᠠ ᠶ᠋ᠢᠨ ᠲᠠᠯᠠ ᠰᠢᠭ᠋ ᠲᠠᠯᠠ
ᠣᠬᠢᠭᠠᠳ ᠴᠠᠭᠠᠨᠠ ᠨᠢ ᠪᠠᠢᠨᠠ ᠤᠤ
ᠲᠠᠯᠠ ᠶ᠋ᠢᠨ ᠬᠠᠷᠠ ᠨᠢᠳᠦᠨ ᠰᠢᠭ
ᠲᠠᠩᠬᠢᠯᠬᠠᠨ ᠵᠤᠷᠢᠮᠠᠭᠬᠠᠨ ᠥᠬᠢᠳ ᠢ᠋
ᠡᠭᠦᠨ ᠡᠴᠡ ᠥᠭᠡᠷᠡ ᠳᠥᠷᠪᠡᠨ ᠲᠢᠪ ᠲᠦ᠍
ᠦᠵᠡᠭᠡᠳ ᠦᠭᠬᠦᠶᠡ ᠳᠠᠬᠢᠭᠠᠳ ᠪᠠᠢᠨᠠ ᠤᠤ
ᠦᠰᠦᠨ ᠬᠥᠯᠵᠢᠬᠦ ᠲᠤᠲᠤᠮ ᠢ᠋ᠶ᠋ᠠᠨ
ᠥᠨᠳᠥᠷ ᠪᠣᠯᠬᠤ ᠶ᠋ᠢ ᠬᠦᠰᠡᠨᠡᠮ ᠪᠢ
ᠥᠨᠢᠷ ᠪᠠᠶᠠᠨ ᠠᠽᠢᠶᠠ ᠶ᠋ᠢᠨ ᠢ᠋ᠶ᠋ᠡᠨ
ᠠᠭᠤᠯᠠ ᠰᠢᠭ᠋ ᠥᠰᠬᠦ ᠶ᠋ᠢ ᠬᠦᠰᠡᠨᠡᠮ ᠪᠢ
ᠣᠷᠴᠢᠯᠠᠩ ᠶᠡᠬᠡ ᠳᠡᠯᠡᠬᠡᠢ ᠳᠡᠭᠡᠷᠡ
ᠣᠷᠭᠢᠯ ᠪᠤᠯᠢᠶᠠᠯᠳᠤᠬᠤ ᠢᠵᠢᠯᠢ ᠦᠭᠡᠢ
ᠣᠮᠣᠭ ᠰᠦᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠮᠠᠨᠳᠤᠭᠰᠠᠨ
ᠾᠢᠮᠠᠯᠠᠶᠠ ᠰᠢᠭ᠋ ᠪᠣᠯᠬᠤ ᠶ᠋ᠢ ᠬᠦᠰᠡᠨᠡᠮ ᠪᠢ
ᠲᠦᠮᠡᠨ ᠵᠢᠯ ᠦ᠋ᠨ ᠴᠠᠰᠤ ᠮᠥᠰᠥ ᠰᠢᠭ
ᠲᠡᠦᠬᠡ ᠨᠠᠮᠲᠠᠷ ᠢ᠋ᠶ᠋ᠠᠨ ᠪᠤᠭᠤᠷᠤᠯᠲᠤᠭᠤᠯᠤᠨ
ᠲᠡᠷᠢᠭᠦᠨ ᠳᠡᠭᠡᠷᠡ ᠪᠡᠨ ᠡᠷᠭᠦᠨ ᠡᠷᠭᠦᠭᠰᠡᠭᠡᠷ
ᠲᠩᠷᠢ ᠳ᠋ᠦ᠍ ᠲᠤᠯᠬᠤ ᠶ᠋ᠢ ᠬᠦᠰᠡᠨᠡᠮ ᠪᠢ
ᠠᠯᠳᠠᠷᠲᠠᠢ ᠶᠠᠪᠤᠭᠰᠠᠨ ᠡᠪᠦᠭᠡᠳ ᠦ᠋ᠨ ᠢ᠋ᠶ᠋ᠡᠷ
ᠠᠯᠳᠠᠷ ᠢ᠋ ᠳᠠᠭᠤᠯᠠᠬᠤ ᠶ᠋ᠢ ᠬᠦᠰᠡᠨᠡᠮ ᠪᠢ
ᠠᠪᠤᠷᠭᠤ ᠣᠷᠴᠢᠯᠠᠩ ᠢ᠋ ᠤᠶᠠᠷᠠᠲᠠᠯᠠ
ᠠᠶᠠᠯᠠᠨ ᠳᠠᠭᠤᠯᠠᠬᠤ ᠶ᠋ᠢ ᠬᠦᠰᠡᠨᠡᠮ ᠪᠢ
ᠬᠡᠷᠦᠯᠦᠨ ᠭᠣᠭᠣᠵᠢ ᠶ᠋ᠢᠨ ᠬᠥᠨᠳᠡᠢ ᠳ᠋ᠦ᠍
ᠬᠡᠨ ᠳ᠋ᠦ᠍ ᠴᠦ᠍ ᠮᠡᠳᠡᠭᠳᠡᠯ ᠦᠭᠡᠢ ᠬᠠᠳᠠᠭᠠᠯᠠᠭᠰᠠᠨ
ᠪᠠᠭᠠᠲᠤᠷ ᠴᠢᠩᠭᠢᠰ ᠦ᠋ᠨ ᠱᠠᠷᠢᠯ ᠢ᠋ᠶ᠋ᠠᠷ
ᠪᠠᠬᠠᠷᠬᠠᠨ ᠪᠠᠢᠵᠤ ᠳᠠᠭᠤᠯᠠᠨᠠᠮ
ᠴᠡᠩᠬᠡᠷᠬᠡᠨ ᠲᠩᠷᠢ ᠳ᠋ᠦ᠍ ᠪᠡᠨ
ᠴᠡᠴᠡᠨ ᠴᠡᠯᠮᠡᠭ ᠮᠢᠨᠦ ᠠᠽᠢᠶᠠ
ᠲᠡᠦᠬᠡ ᠪᠡᠨ ᠪᠦᠲᠦᠭᠡᠭᠰᠡᠨ
ᠲᠦᠮᠡᠨ ᠢ᠋ᠶ᠋ᠡᠷ ᠵᠠᠮᠴᠢᠯᠠᠭᠰᠠᠨ
ᠴᠡᠯ ᠪᠤᠭᠤᠷᠤᠯ ᠠᠯᠳᠠᠷᠲᠠᠨ ᠨᠤᠭᠤᠳ ᠢ᠋
ᠴᠠᠭ ᠤ᠋ᠨ ᠰᠠᠭᠠᠬᠠᠯᠲᠠ ᠳ᠋ᠤ᠌ ᠮᠠᠷᠲᠠᠳᠠᠭ ᠦᠭᠡᠢ
ᠬᠠᠰ ᠲᠥᠷᠥ ᠨᠢ ᠤᠨᠠᠯᠠ ᠴᠤ᠌
ᠬᠠᠭᠠᠳ ᠢ᠋ᠶ᠋ᠠᠨ ᠪᠢᠳᠡ ᠮᠠᠭᠤᠯᠠᠬᠤ ᠦᠭᠡᠢ
ᠬᠠᠯᠲᠤᠷᠢᠵᠤ ᠭᠠᠷᠭᠠᠭᠰᠠᠨ ᠠᠯᠳᠠᠭᠠ ᠶ᠋ᠢ ᠨᠢ
ᠬᠠᠷᠢᠶᠠᠵᠤ ᠪᠠᠢᠬᠤ ᠶ᠋ᠢ ᠨᠢ ᠲᠣᠭᠣᠯᠤᠭᠠ ᠦᠭᠡᠢ
ᠠᠩᠬᠠᠨ ᠤ᠋ ᠰᠤᠮᠤ ᠪᠠᠷ ᠤᠨᠤᠬᠤ ᠭᠡᠵᠦ
ᠧᠦ᠋ᠷᠣᠫᠠ ᠰᠢᠭ᠋ ᠪᠢᠳᠡ ᠣᠩᠭᠢᠷᠠᠬᠤ ᠦᠭᠡᠢ
ᠠᠯᠳᠠᠵᠤ ᠪᠠᠢᠵᠤ ᠤᠨᠤᠳᠠᠭ
ᠶᠣᠰᠣ ᠶ᠋ᠢ ᠪᠢᠳᠡ ᠠᠨᠳᠠᠬᠤ ᠦᠭᠡᠢ᠃
ᠶᠡᠬᠡ ᠣᠯᠤᠯᠲᠠ ᠶ᠋ᠢ ᠳᠠᠭᠠᠵᠤ
ᠶᠡᠬᠡ ᠠᠯᠳᠠᠭᠠ ᠶᠠᠪᠤᠳᠠᠭ ᠶᠤᠮ᠂
ᠶᠡᠬᠡ ᠬᠥᠮᠦᠨ ᠦ᠌ ᠠᠯᠳᠠᠭᠠ ᠶ᠋ᠢ
ᠢᠷᠭᠡᠨ ᠬᠥᠮᠦᠨ ᠰᠢᠭᠦᠳᠡᠭ ᠦᠭᠡᠢ ᠶᠦᠮ᠃
ᠤᠯᠠᠮᠵᠢᠯᠠᠯᠲᠤ ᠡᠢᠮᠦ ᠵᠠᠩᠰᠢᠯ ᠲᠠᠢ ᠠ᠋ᠴᠠ
ᠠᠭᠤᠳᠠᠮ ᠳᠡᠯᠭᠡᠷ ᠮᠢᠨᠦ ᠠᠽᠢᠶᠠ
ᠤᠷᠲᠤ ᠤᠳᠠᠭᠠᠨ ᠲᠡᠦᠬᠡᠨ ᠳ᠋ᠦ᠍ ᠪᠡᠨ
ᠤᠬᠠᠭᠠᠨᠲᠠᠨ ᠣᠯᠠᠨ ᠢ᠋ ᠲᠥᠷᠥᠭᠦᠯᠦᠭᠰᠡᠨ ᠶᠦᠮ᠃
ᠤᠷᠢᠳᠤ ᠶ᠋ᠢᠨ ᠲᠡᠷᠡ ᠮᠡᠷᠭᠡᠳ ᠦ᠋ᠨ
ᠤᠳᠤᠮ ᠪᠣᠯᠵᠤ ᠲᠥᠷᠥᠭᠰᠡᠨ ᠶᠦᠮ ᠪᠢ᠂
ᠲᠤᠭᠤᠯᠵᠤ ᠥᠩᠭᠡᠷᠡᠭᠦᠯᠦᠭᠰᠡᠨ ᠠᠮᠢᠳᠤᠷᠠᠯ ᠤ᠋ᠨ ᠬᠢᠨᠢ
ᠲᠤᠭᠤᠷᠠᠢ ᠶ᠋ᠢ ᠬᠠᠲᠠᠭᠠᠬᠤ ᠪᠠᠷ ᠥᠰᠦᠭᠰᠡᠨ ᠶᠦᠮ ᠪᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠵᠠᠵᠢᠶᠠᠭᠠ
ᠦᠰᠦᠭ ᠬᠢᠨᠠᠭᠴᠢ᠄ ᠠᠵᠠᠵᠢᠶᠠᠭᠠ᠂ ᠢᠷᠡᠭᠡᠳᠦᠢ᠂ ᠪᠠᠶᠠᠷᠴᠡᠴᠡᠭ