ᠠᠮᠢᠳᠤᠷᠠᠯ-ᠷ ᠂ᠴᠣᠢᠨᠣᠮChoinom - Amidral
653ᠠᠮᠢᠳᠤᠷᠠᠯ
ᠷ᠂ ᠴᠣᠢᠨᠠᠮ
ᠠᠮᠢᠳᠤᠷᠠᠯ ᠭᠡᠳᠡᠭ
ᠠᠤᠭᠠ ᠶᠡᠬᠡ ᠶᠦᠮ
ᠠᠤᠭᠠ ᠶᠡᠬᠡ ᠮᠥᠷᠳᠡᠯᠡ ᠪᠠᠰᠠ ᠥᠴᠦᠬᠡᠨ ᠶᠦᠮ᠃
ᠠᠮᠢᠳᠤᠷᠠᠯ ᠢ᠋ ᠬᠥᠮᠦᠰ
ᠠᠵᠢᠭᠯᠠᠬᠤ ᠳ᠋ᠠᠭᠠᠨ
ᠠᠮᠰᠠᠬᠤ ᠳ᠋ᠠᠭᠠᠨ
ᠠᠪᠬᠤ ᠳ᠋ᠠᠭᠠᠨ
ᠤᠯᠤᠰ ᠤ᠋ᠨ ᠶᠡᠬᠡ ᠳᠡᠯᠭᠡᠭᠦᠷ ᠲᠦ᠍ ᠣᠷᠣᠵᠤ ᠪᠠᠢᠭᠠ ᠶᠤᠮ ᠰᠢᠭ᠋
ᠤᠷᠠᠨ ᠵᠢᠷᠤᠭ ᠤ᠋ᠨ ᠮᠦᠽᠧᠢ ᠰᠣᠨᠢᠷᠬᠠᠵᠤ ᠪᠠᠢᠭᠠ ᠶᠤᠮ ᠰᠢᠭ᠋
ᠤᠮᠳᠠᠭᠠᠨ ᠤ᠋ ᠭᠠᠵᠠᠷ ᠤᠤᠭᠤᠵᠤ ᠪᠠᠢᠭᠠ ᠶᠤᠮ ᠰᠢᠭ᠋
ᠤᠩᠰᠢᠯᠭᠠ ᠶ᠋ᠢᠨ ᠥᠷᠥᠭᠡᠨ ᠳ᠋ᠦ᠍ ᠰᠠᠭᠤᠵᠤ ᠪᠠᠢᠭᠠ ᠶᠤᠮ ᠰᠢᠭ᠋
ᠥᠪᠡᠷ ᠥᠪᠡᠷ ᠦ᠋ᠨ ᠬᠢ ᠪᠡᠷ ᠢ᠋ᠶ᠋ᠡᠨ ᠥᠩᠭᠡᠷᠡᠬᠦ ᠶᠦᠮ
ᠠᠮᠢ ᠠᠮᠢᠨ ᠤ᠋ ᠬᠢ ᠪᠡᠷ ᠢ᠋ᠶ᠋ᠡᠨ ᠠᠮᠲᠠᠯᠠᠬᠤ ᠶᠤᠮ᠃
ᠠᠮᠢᠳᠤᠷᠠᠯ ᠭᠡᠭᠴᠢ ᠡᠴᠡ ᠲᠠᠩᠳᠠ ᠠᠪᠴᠤ ᠰᠤᠷᠤᠭᠰᠠᠨ ᠬᠥᠮᠦᠨ ᠪᠠᠢᠬᠤ ᠶᠤᠮ
ᠠᠮᠢᠳᠤᠷᠠᠯ ᠭᠡᠭᠴᠢ ᠳ᠋ᠦ᠍ ᠦᠷᠭᠦᠯᠵᠢ ᠯᠡ ᠥᠭᠴᠦ ᠶᠠᠪᠤᠳᠠᠭ ᠬᠥᠮᠦᠨ ᠪᠠᠢᠬᠤ ᠶᠤᠮ᠃
ᠠᠮᠢᠳᠤᠷᠠᠯ ᠳ᠋ᠤ᠌ ᠵᠦᠭ ᠦᠭᠡᠢ ᠬᠡᠦᠬᠡᠳ ᠰᠢᠭ ᠬᠠᠨᠳᠤᠵᠤ ᠲᠠᠰᠤ ᠠᠯᠠᠭᠠᠳᠠᠭᠤᠯᠤᠭᠠᠳ
ᠠᠬᠢᠭᠠᠳ ᠯᠠ ᠪᠠᠰᠠ ᠮᠠᠷᠲᠠᠵᠤ᠂ ᠳᠠᠬᠢᠭᠠᠳ ᠯᠠ ᠪᠠᠰᠠ ᠠᠯᠠᠭᠠᠳᠠᠭᠤᠯᠤᠭᠰᠠᠭᠠᠷ
ᠵᠣᠪᠠᠯᠠᠩ ᠵᠢᠷᠭᠠᠯ ᠬᠣᠶᠠᠷ ᠢ᠋ ᠢᠯᠭᠠᠬᠤ ᠪᠠᠨ ᠪᠠᠢᠴᠢᠬᠠᠭᠰᠠᠨ
ᠵᠣᠯᠪᠢᠩ ᠨᠣᠬᠠᠢ ᠰᠢᠭ᠋ ᠬᠥᠮᠦᠨ ᠴᠦ᠍ ᠪᠠᠢᠬᠤ ᠶᠤᠮ᠃
ᠠᠮᠢᠳᠤᠷᠠᠯ ᠢ᠋ ᠠᠢᠯ ᠤ᠋ᠨ ᠢ᠋ᠶ᠋ᠠᠨ ᠵᠢᠭᠠᠯ ᠪᠦᠰᠡᠭᠦᠢ ᠶ᠋ᠢ
ᠡᠳᠦᠷ ᠪᠤᠯᠠᠭᠠᠨ ᠮᠡᠬᠡᠯᠡᠬᠦ ᠭᠡᠳ
ᠡᠪᠦᠭᠡᠷᠡᠲᠡᠯᠡ ᠪᠡᠨ ᠥᠭᠡᠳᠡ ᠨᠠᠷᠠ ᠪᠠᠨ ᠬᠠᠷᠠᠯ ᠦᠭᠡᠢ
ᠥᠩᠭᠡᠷᠡᠬᠦ ᠬᠥᠮᠦᠨ ᠴᠦ᠍ ᠪᠠᠢᠬᠤ ᠯᠠ ᠶᠤᠮ᠃
ᠠᠮᠢᠳᠤᠷᠠᠯ ᠢ᠋ ᠠᠮᠠᠨ ᠳ᠋ᠤ᠌ ᠮᠠᠨᠢ ᠥᠪᠡᠷ ᠢ᠋ᠶ᠋ᠡᠨ ᠢᠷᠡᠵᠦ
ᠠᠮᠲᠠᠲᠠᠨ ᠢ᠋ ᠬᠢᠵᠦ ᠥᠭᠬᠦ ᠪᠠᠢᠬᠠ ᠭᠡᠵᠦ
ᠠᠯᠴᠠᠢᠵᠤ ᠬᠡᠪᠲᠡᠭᠰᠡᠭᠡᠷ
ᠠᠷᠴᠠᠭᠠ ᠦᠭᠡᠢ ᠶᠠᠳᠠᠷᠠᠬᠤ ᠶ᠋ᠢᠨ ᠲᠤᠢᠯ ᠳ᠋ᠤ᠌ ᠬᠦᠷᠦᠭᠡᠳ
ᠣᠬᠢᠭᠠᠳ ᠰᠡᠬᠡᠵᠦ ᠰᠠᠷᠪᠠᠢᠵᠤ ᠴᠢᠳᠠᠬᠤ ᠦᠭᠡᠢ ᠲᠡᠷᠲᠡᠭᠡ ᠢᠷᠣᠭᠠᠯ ᠳ᠋ᠤᠨᠢ
ᠬᠣᠷᠣᠬᠠᠢ ᠮᠡᠲᠦ ᠥᠩᠭᠡᠷᠡᠳᠡᠭ ᠬᠥᠮᠦᠨ ᠴᠦ᠍ ᠪᠠᠢᠬᠤ ᠶᠤᠮ᠃
ᠬᠥᠮᠦᠨ ᠶᠡᠷᠦ ᠨᠢ ᠠᠮᠢᠳᠤᠷᠠᠯ ᠢ᠋
ᠬᠦᠴᠦ ᠪᠡᠷ ᠵᠠᠬᠢᠷᠤᠭᠰᠠᠨ ᠨᠢ ᠦᠭᠡᠢ᠂ ᠵᠠᠬᠢᠷᠤᠭᠳᠠᠭᠰᠠᠨ ᠨᠢ ᠣᠯᠠᠨ ᠪᠣᠢ᠃
ᠵᠢᠷᠭᠠᠯᠲᠠᠢ ᠡᠳᠦᠷ ᠢ᠋ᠶ᠋ᠡᠨ ᠠᠮᠢᠳᠤᠷᠠᠯ ᠢ᠋ ᠢᠷᠦᠭᠡᠭᠰᠡᠭᠡᠷ
ᠵᠦᠳᠡᠷᠡᠯᠲᠡᠢ ᠡᠳᠦᠷ ᠢ᠋ᠶ᠋ᠡᠨ ᠠᠮᠢᠳᠤᠷᠠᠯ ᠢ᠋ ᠬᠠᠷᠢᠶᠠᠭᠰᠠᠭᠠᠷ
ᠵᠥᠭᠡᠵᠦ ᠵᠠᠷᠢᠮ ᠨᠢ ᠲᠠᠩᠭᠠᠷᠢᠭ ᠲᠠᠰᠤᠷᠠᠭᠰᠠᠭᠠᠷ
ᠵᠢᠳᠬᠦᠵᠦ ᠵᠠᠷᠢᠮ ᠨᠢ ᠨᠠᠢᠵᠠᠯᠠᠵᠤ ᠵᠡᠷᠭᠡᠴᠡᠭᠰᠡᠭᠡᠷ
ᠥᠪᠡᠷ ᠢ᠋ ᠪᠡᠨ ᠡᠴᠦᠰ ᠲᠦ᠋ᠨᠢ
ᠥᠭᠴᠦ ᠲᠡᠭᠦᠰᠳᠡᠭ ᠪᠠᠢᠨᠠ᠃
ᠬᠠᠷᠢᠨ ᠪᠢ ᠡᠴᠦᠰ ᠲᠦ᠋ᠨᠢ ᠪᠢᠰᠢ ᠡᠬᠢᠨ ᠳ᠋ᠦ᠍ᠨᠢ
ᠬᠠᠷᠠ ᠲᠣᠯᠣᠭᠠᠢ ᠪᠠᠨ ᠠᠮᠢᠳᠤᠷᠠᠯ ᠲᠠᠨᠠ ᠲᠤᠰᠢᠶᠠᠭᠰᠠᠨ ᠪᠢᠯᠡ᠃
ᠤᠰᠤ ᠶ᠋ᠢ ᠨᠢ ᠤᠤᠭᠤᠵᠤ᠂ ᠲᠠᠯᠬᠠ ᠶ᠋ᠢ ᠨᠢ ᠢᠳᠡᠭᠰᠡᠨ ᠡᠨᠡ ᠨᠡᠢᠭᠡᠮ ᠢ᠋ᠶ᠋ᠡᠨ
ᠤᠯᠤᠰ ᠮᠣᠩᠭᠣᠯ ᠢ᠋ᠶ᠋ᠠᠨ᠂ ᠲᠥᠷᠥ ᠵᠠᠰᠠᠭ᠂ ᠠᠷᠠᠳ ᠣᠯᠠᠨ ᠢ᠋ᠶ᠋ᠠᠨ
ᠪᠢ ᠮᠠᠭᠤᠯᠠᠬᠤ ᠦᠭᠡᠢ-
ᠪᠢᠰᠢᠭᠦᠢ ᠵᠢᠷᠭᠠᠭᠰᠠᠨ
ᠴᠡᠩᠭᠡᠭᠰᠡᠨ
ᠲᠠᠩᠬᠠᠢᠷᠠᠭᠰᠠᠨ ᠠ᠋!
ᠪᠤᠰᠤᠳ ᠤ᠋ᠨ ᠡᠳ᠋ᠯᠡᠳᠡᠭ ᠦᠭᠡᠢ ᠶ᠋ᠢ ᠡᠳ᠋ᠯᠡᠵᠦ
ᠢᠳᠡᠳᠡᠭ ᠦᠭᠡᠢ ᠶ᠋ᠢ ᠢᠳᠡᠭᠡ ᠦᠭᠡᠢ ᠴᠦ᠍ ᠭᠡᠰᠡᠨ
ᠪᠤᠰᠤᠳ ᠤ᠋ᠨ ᠡᠳ᠋ᠯᠡᠳᠡᠭ ᠢ᠋ ᠡᠳ᠋ᠯᠡᠵᠦ᠂ ᠢᠳᠡᠳᠡᠭ ᠢ᠋ ᠢᠳᠡᠯᠡ
ᠪᠤᠰᠤᠳ ᠤ᠋ᠨ ᠶᠠᠪᠤᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠷ ᠶᠠᠪᠤᠵᠤ᠂ ᠣᠯᠤᠭᠰᠠᠨ ᠢ᠋ ᠣᠯᠤᠯᠠ
ᠪᠤᠰᠤᠳ ᠤ᠋ᠨ ᠶᠠᠪᠤᠭᠠ ᠦᠭᠡᠢ ᠭᠠᠵᠠᠷ ᠢ᠋ᠶ᠋ᠠᠷ ᠴᠤ᠌ ᠶᠠᠪᠤᠯᠠ᠃
ᠣᠯᠤᠭᠠ ᠦᠭᠡᠢ ᠶ᠋ᠢ ᠴᠦ᠍ ᠣᠯᠤᠯᠠ-
ᠣᠳᠣ ᠪᠣᠯᠤᠯᠠ!
ᠪᠠᠰᠠ ᠵᠣᠪᠠᠵᠤ ᠦᠵᠡᠯᠡ
ᠪᠠᠭᠠ ᠠ᠋ᠴᠠ ᠪᠠᠨ ᠶᠠᠳᠠᠷᠠᠵᠤ᠂ ᠳᠤᠲᠠᠵᠤ᠂ ᠭᠤᠲᠤᠵᠤ ᠦᠵᠡᠯᠡ᠃
ᠬᠠᠷᠢᠨ ᠭᠤᠨᠢᠬᠠᠷᠠᠵᠤ ᠦᠵᠡᠭᠰᠡᠨ ᠦᠭᠡᠢ
ᠬᠠᠮᠢᠭᠠ ᠴᠤ᠌ ᠣᠴᠢᠵᠤ᠂ ᠰᠡᠳᠬᠢᠯ ᠢ᠋ᠶ᠋ᠡᠷ ᠤᠨᠠᠵᠤ᠂ ᠨᠢᠴᠤᠵᠤ ᠶᠠᠪᠤᠭᠰᠠᠨ ᠦᠭᠡᠢ᠃
ᠬᠠᠷᠠᠭᠰᠠᠨ᠂ ᠵᠣᠷᠢᠭᠰᠠᠨ᠂ ᠢᠲᠡᠭᠡᠭᠰᠡᠨ ᠴᠢᠭ ᠡᠴᠡ ᠪᠡᠨ
ᠬᠠᠵᠠᠢᠵᠤ᠂ ᠤᠬᠤᠷᠢᠵᠤ ᠪᠠᠢᠭᠰᠠᠨ ᠦᠭᠡᠢ᠃
ᠭᠡᠲᠡᠯᠡ ᠭᠡᠷᠭᠡᠢ ᠶᠣᠰᠣᠯᠠᠵᠤ ᠠᠪᠤᠭᠠ ᠦᠭᠡᠢ
ᠭᠡᠷᠭᠡᠢ ᠳ᠋ᠡᠭᠡᠨ ᠦᠢᠲᠠᠩ ᠬᠤᠸᠠᠷ ᠡᠮᠦᠰᠬᠡᠭᠡ ᠦᠭᠡᠢ!
ᠭᠡᠷ ᠲᠡᠭᠡᠨ ᠬᠡᠪᠢᠰ ᠣᠯᠵᠤ ᠲᠠᠯᠪᠢᠭᠠ ᠦᠭᠡᠢ ᠬᠥᠮᠦᠨ ᠢ᠋
ᠠᠮᠢᠳᠤᠷᠠᠵᠤ ᠦᠵᠡᠭᠡ ᠦᠭᠡᠢ ᠬᠥᠮᠦᠨ ᠭᠡᠳᠡᠭ ᠪᠣᠯ
ᠠᠷᠭᠠ ᠦᠭᠡᠢ ᠪᠢ ᠠᠮᠢᠳᠤᠷᠠᠵᠤ ᠦᠵᠡᠭᠰᠡᠨ ᠦᠭᠡᠢ᠃
ᠭᠡᠬᠦ ᠳ᠋ᠡᠭᠡᠨ ᠪᠢ ᠬᠠᠷᠠᠮᠰᠠᠬᠤ ᠦᠭᠡᠢ!
ᠭᠡᠷ ᠮᠢᠨᠢ ᠬᠣᠷᠰᠢᠶᠠᠨ ᠳ᠋ᠤ᠌
ᠭᠡᠷᠭᠡᠢ ᠮᠢᠨᠢ ᠲᠥᠷᠬᠥᠮ ᠳ᠋ᠡᠭᠡᠨ᠂ ᠨᠠᠮᠠᠶ᠋ᠢ ᠬᠦᠯᠢᠶᠡᠵᠦ ᠯᠡ ᠪᠠᠢᠭᠠ ᠪᠢᠵᠡ᠃
ᠪᠢ ᠥᠪᠡᠷ ᠢ᠋ᠶ᠋ᠡᠨ
ᠪᠢᠴᠢᠭ ᠦ᠋ᠨ ᠰᠢᠷᠡᠭᠡᠨ ᠳᠦ ᠰᠠᠭᠤᠵᠤ ᠪᠠᠢᠨᠠ᠂
ᠳᠡᠭᠡᠷᠡ ᠨᠢ ᠪᠡᠬᠡᠨ ᠦ ᠴᠣᠬᠣᠷ ᠲᠠᠢ
ᠳᠡᠷᠭᠡᠳᠡ ᠨᠢ ᠠᠷᠢᠬᠢᠨ ᠤ᠋ ᠲᠣᠯᠪᠣ ᠲᠠᠢ
ᠦᠵᠦᠭ᠂ ᠪᠣᠳᠣᠭ᠂ ᠬᠢᠲᠤᠭᠠ
ᠥᠨᠴᠥᠭ ᠳᠡᠭᠡᠷᠡ ᠨᠢ ᠨᠣᠮ ᠪᠢᠴᠢᠭ ᠴᠠᠭᠠᠰᠤ ᠵᠥᠩᠲᠡᠭᠡᠨ
ᠦᠷᠦᠭᠡᠰᠦᠲᠡᠢ ᠡᠨᠡ ᠰᠢᠷᠡᠭᠡ
ᠥᠭᠡᠳᠡᠲᠡᠢ ᠵᠠᠯᠠᠭᠤ ᠶᠠᠪᠤᠬᠤ ᠳ᠋ᠤ᠌ ᠮᠢᠨᠢ
ᠥᠩᠭᠡ᠂ ᠦᠵᠡᠮᠵᠢᠲᠡᠢ ᠡᠬᠡᠨᠡᠷ ᠮᠢᠨᠢ ᠪᠠᠢᠯᠠ᠂
ᠥᠰᠬᠦ ᠡᠴᠡ ᠥᠲᠡᠯᠬᠦ ᠨᠠᠰᠤᠨ ᠳ᠋ᠤ᠌ ᠮᠢᠨᠢ
ᠥᠷᠭᠥᠭᠡ ᠭᠡᠷ
ᠥᠮᠴᠢ ᠬᠥᠷᠥᠩᠭᠡ
ᠥᠨᠳᠥᠷ ᠶᠡᠬᠡ ᠬᠠᠭᠠᠨ ᠰᠢᠷᠡᠭᠡ ᠮᠢᠨᠢ ᠪᠣᠯᠤᠭᠰᠠᠭᠠᠷ ᠢᠷᠡᠯᠡ᠃
ᠡᠨᠡ ᠰᠢᠷᠡᠭᠡᠨ ᠳᠡᠭᠡᠷᠡ ᠪᠢ ᠳᠠᠭᠤᠯᠠᠵᠤ ᠴᠤ᠌ ᠰᠠᠭᠤᠯᠠ
ᠡᠨᠡ ᠰᠢᠷᠡᠭᠡᠨ ᠳᠡᠭᠡᠷᠡ ᠪᠢ ᠤᠬᠢᠯᠠᠵᠤ ᠴᠤ᠌ ᠰᠠᠭᠤᠯᠠ᠃
ᠡᠨᠡ ᠰᠢᠷᠡᠭᠡᠨ ᠳᠡᠭᠡᠷᠡ ᠪᠢ ᠰᠢᠯᠦᠭ ᠬᠡᠷᠬᠢᠨ ᠪᠦᠲᠦᠬᠦ ᠶ᠋ᠢ
ᠮᠡᠳᠡᠬᠦ ᠦᠭᠡᠢ ᠬᠥᠪᠡᠭᠦᠨ ᠢᠷᠡᠵᠦ ᠪᠢᠯᠡ᠂
ᠡᠨᠡ ᠰᠢᠷᠡᠭᠡᠨ ᠳᠡᠭᠡᠷᠡ ᠡᠴᠡ ᠪᠢ ᠰᠢᠯᠦᠭ ᠦᠭᠡᠢ ᠬᠡᠷᠬᠢᠨ ᠠᠮᠢᠳᠤᠷᠠᠬᠤ ᠶ᠋ᠢ
ᠮᠡᠳᠡᠬᠦ ᠦᠭᠡᠢ ᠡᠪᠦᠭᠡᠨ ᠪᠤᠴᠠᠨᠠ᠃
ᠡᠷᠡ ᠭᠠᠭᠴᠠᠬᠠᠨ ᠨᠠᠰᠤ ᠮᠢᠨᠢ
ᠡᠨᠡ ᠳᠡᠭᠡᠷᠡ ᠤᠷᠭᠤᠵᠤ
ᠡᠨᠡ ᠳᠡᠭᠡᠷᠡ ᠤᠨᠠᠬᠤ ᠭᠠᠭᠴᠠᠬᠠᠨ ᠵᠢᠷᠭᠠᠯ ᠪᠠᠢᠨᠠ᠃
ᠡᠴᠦᠰ ᠬᠣᠢᠴᠢ ᠶ᠋ᠢᠨ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠢ᠋
ᠡᠨᠡ ᠳᠡᠭᠡᠷᠡ ᠪᠡᠨ ᠤᠷᠢᠬᠤ
ᠡᠨᠡ ᠳᠡᠭᠡᠷᠡ ᠪᠡᠨ ᠶᠠᠷᠢᠬᠤ ᠭᠠᠪᠢᠶᠠ ᠮᠥᠨ ᠪᠠᠢᠨᠠ᠃
ᠲᠠᠭᠠᠷᠠᠤᠬᠠᠨ ᠬᠥᠮᠦᠨ ᠡᠨᠳᠡ
ᠲᠠᠪᠤᠨ ᠦᠭᠡ ᠣᠢᠯᠠᠭᠠᠯᠴᠠᠬᠤ ᠠ᠋ᠴᠠ ᠪᠠᠨ
ᠲᠠᠮᠠᠬᠢᠨ ᠤ᠋ ᠡᠰᠢ ᠣᠪᠤᠭᠠᠯᠠᠯᠴᠠᠵᠤ ᠥᠭᠭᠦᠭᠡᠳ
ᠠᠪᠤᠭᠰᠠᠨ ᠴᠦ᠍ ᠶᠠᠭᠤᠮᠠ ᠦᠭᠡᠢ᠂
ᠥᠭᠭᠦᠭᠰᠡᠨ ᠴᠤ᠌ ᠶᠠᠭᠤᠮᠠ ᠦᠭᠡᠢ ᠭᠠᠷᠳᠠᠭ ᠶᠤᠮ᠃
ᠳᠠᠭᠠᠷᠠᠮᠵᠢ ᠦᠭᠡᠢ ᠰᠢᠭ ᠬᠡᠦᠬᠡᠨ ᠢ᠋ ᠴᠦ᠍ ᠪᠠᠰᠠ
ᠲᠠᠲᠠᠵᠤ ᠨᠢᠭᠡ ᠦᠵᠡᠭᠡᠳ᠂ ᠲᠦᠯᠬᠢᠵᠦ ᠨᠢᠭᠡ ᠦᠵᠡᠭᠡᠳ
ᠲᠠᠮᠠᠬᠢᠨ ᠤ᠋ ᠡᠰᠢ ᠰᠢᠭ᠂ ᠡᠨᠡ ᠯᠡ ᠰᠢᠷᠡᠭᠡᠨ ᠡᠴᠡ
ᠡᠭᠦᠳᠡ ᠤᠷᠤᠭᠤ ᠨᠢᠰᠠᠯᠵᠤ ᠰᠠᠭᠤᠯᠠ᠃
ᠠᠮᠢᠳᠤᠷᠠᠵᠤ ᠪᠢ ᠦᠵᠡᠭᠡ ᠦᠭᠡᠢ ᠪᠠᠢᠵᠤ ᠪᠣᠯᠤᠨᠠ ᠠ᠋᠂ ᠭᠡᠪᠡᠴᠦ
ᠠᠮᠢᠳᠤᠷᠠᠯ ᠢ᠋ ᠪᠢ ᠦᠵᠡᠯᠡ᠃
ᠠᠮᠰᠠᠯᠠ᠂ ᠬᠠᠷᠢᠨ
ᠠᠪᠤᠭᠰᠠᠨ ᠦᠭᠡᠢ᠂ ᠦᠭᠬᠦᠯᠡ!
ᠠᠮᠢᠳᠤᠷᠠᠯ ᠮᠢᠨᠢ ᠤᠷᠲᠤᠭᠠᠰᠢ ᠪᠠᠨ ᠡᠨᠡ ᠪᠢᠴᠢᠭ ᠦ᠋ᠨ ᠰᠢᠷᠡᠭᠡ ᠪᠠᠢᠨᠠ᠃
ᠦᠰᠦᠭ ᠬᠠᠲᠠᠭᠴᠢ᠄ ᠪᠣᠷᠵᠢᠭᠢᠨ ᠠᠵᠠᠵᠠᠶᠠᠭᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠰᠬᠠ
ᠬᠢᠨᠠᠭᠴᠢ᠄ ᠤᠳᠬᠠᠨᠰᠣᠡ ᠢᠷᠡᠭᠡᠳᠦᠢ
ᠢᠷᠡᠯᠲᠡ᠄《 ᠷ᠂ ᠴᠤᠢᠨᠤᠮ ᠤ᠋ᠨ ᠰᠢᠯᠦᠭ ᠵᠣᠬᠢᠶᠠᠯ ᠬᠤᠷᠢᠶᠠᠬᠤᠢ-》
-ᠤᠶᠠᠩᠭᠠ ᠶ᠋ᠢᠨ ᠰᠢᠯᠦᠭ ᠡᠴᠡ ᠬᠠᠭᠤᠯᠠᠪᠠ
ᠪᠢ᠂ ᠲᠠᠮᠳᠢᠨᠰᠦᠷᠦᠩ ᠡᠮᠬᠢᠳᠬᠡᠨ ᠨᠠᠢᠷᠠᠭᠤᠯᠪᠠ
ᠬᠠᠷᠢᠭᠤᠴᠠᠭᠰᠠᠨ ᠨᠠᠢᠷᠠᠭᠤᠯᠤᠭᠴᠢ᠄ ᠪᠤᠷᠤᠨᠤᠳ ᠳᠣᠷᠵᠢ