ᠠᠪᠤ ᠪᠢᠳᠡᠨ ᠬᠣᠶᠠᠷ-ᠷ ᠂ᠴᠣᠢᠨᠣᠮР.Чойном - Аав бидэн хоёр
541ᠠᠪᠤ ᠪᠢᠳᠡᠨ ᠬᠣᠶᠠᠷ
ᠴᠣᠢᠨᠣᠮ
ᠨᠡᠷᠡ ᠶ᠋ᠢ ᠮᠢᠨᠢ ᠬᠠᠢᠷᠠᠯᠠᠭᠰᠠᠨ ᠬᠥᠮᠦᠨ- ᠠᠪᠤ
ᠨᠢᠭᠡᠨ ᠪᠡᠶᠡ ᠶ᠋ᠢ ᠮᠢᠨᠢ ᠵᠠᠶᠠᠭᠠᠭᠰᠠᠨ ᠬᠥᠮᠦᠨ- ᠠᠪᠤ
ᠨᠡᠭᠡᠭᠡᠭᠳᠡᠵᠦ ᠠᠮᠵᠢᠭᠠ ᠦᠭᠡᠢ ᠥᠷᠭᠡᠰᠦᠲᠦ ᠴᠡᠴᠡᠭ ᠢ᠋ ᠣᠷᠬᠢᠭᠠᠳ
ᠨᠡᠩ ᠡᠷᠲᠡ ᠶᠠᠪᠤᠴᠢᠬᠠᠭᠰᠠᠨ- ᠮᠢᠨᠦ ᠠᠪᠤ !
ᠴᠢᠨᠠᠳᠤ ᠨᠣᠮ ᠤ᠋ᠨ ᠲᠠᠷᠨᠢ ᠶ᠋ᠢᠨ ᠦᠰᠦᠭ ᠢ᠋ᠶ᠋ᠡᠷ
ᠴᠠᠰᠤᠲᠤ ᠡᠾᠢᠮᠠᠯᠠᠶᠠ ᠶ᠋ᠢ ᠳᠠᠪᠠᠭᠤᠯᠤᠨ ᠠᠪᠴᠢᠷᠠᠭᠰᠠᠨ
ᠬᠡᠨ ᠪᠦᠬᠦᠨ ᠳ᠋ᠦ᠍ ᠪᠠᠢᠳᠠᠭ ᠦᠭᠡᠢ ᠨᠡᠷᠡ ᠶ᠋ᠢ ᠪᠠᠷᠠᠭᠤᠨ ᠴᠢᠬᠢᠨ ᠳ᠋ᠦ᠍ ᠮᠢᠨᠢ
ᠭ᠂ ᠴᠷᠠᠩᠰᠤᠳᠨᠠᠮ ᠪᠢᠰᠢ᠂ ᠭᠡᠯᠦᠭᠷᠢᠨᠴᠢᠨ ᠠᠪᠤ ᠮᠢᠨᠢ
ᠬᠡᠯᠡᠵᠦ ᠥᠭᠭᠦᠭᠰᠡᠨ ᠶᠦᠮ 《ᠴᠣᠢᠨᠤᠮ》 ᠭᠡᠵᠦ
(ᠰᠠᠨᠠᠪᠠᠯ᠂ ᠠᠪᠤ ᠮᠢᠨᠢ ᠲᠡᠷᠡ ᠵᠦᠭ ᠦ᠋ᠨ ᠨᠣᠮ ᠳ᠋ᠤ᠌
ᠰᠠᠢᠬᠠᠨ ᠣᠶᠤᠲᠠᠨ ᠠ᠋ᠴᠠ ᠠᠷᠠᠢ ᠳᠡᠭᠡᠷᠡ ᠪᠠᠢᠭᠰᠠᠨ ᠪᠠᠢᠯᠭᠦᠢ)
ᠰᠠᠷᠠ ᠵᠢᠯ ᠦ᠋ᠳ ᠲᠡᠷᠡ ᠦᠶᠡ ᠡᠴᠡ ᠬᠣᠢᠰᠢ ᠤᠯᠠᠷᠢᠭᠰᠠᠭᠠᠷ
ᠰᠠᠬᠠᠯ ᠤᠷᠭᠤᠵᠤ ᠪᠢ ᠭᠤᠴᠢᠨ ᠨᠠᠮᠤᠷ ᠢ᠋ ᠦᠳᠡᠵᠡᠢ᠃
ᠡᠷᠭᠢᠭᠡᠳ ᠪᠣᠳᠣᠬᠤ ᠳ᠋ᠤ᠌ ᠮᠢᠨᠦ ᠪᠠᠭᠠ ᠨᠠᠰᠤ
ᠡᠷᠢᠶᠡᠨ ᠪᠠᠷᠠᠭᠠᠨ ᠪᠣᠯᠤᠭᠠᠳ ᠤᠢᠳᠬᠠᠷ ᠭᠤᠨᠢᠭ ᠶᠡᠬᠡ ᠲᠡᠢ
ᠡᠯᠴᠢᠯᠡᠯ ᠦᠭᠡᠢ ᠨᠡᠭᠦᠳᠡᠯ ᠦ᠋ᠨ ᠵᠡᠷᠭᠡᠯᠭᠡᠨᠲᠦ ᠵᠠᠮ ᠳᠡᠭᠡᠷᠡ
ᠡᠷᠲᠡ ᠥᠨᠥᠴᠢᠷᠡᠵᠦ᠂ ᠣᠷᠣᠢ ᠪᠣᠢᠵᠢᠭᠰᠠᠨ ᠪᠠᠢᠨᠠ᠃
ᠠᠪᠤ ᠮᠢᠨᠢ᠂ ᠬᠥᠭᠡᠷᠦᠬᠦᠢ ᠠᠪᠤ ᠮᠢᠨᠢ
ᠠᠮᠢᠳᠤᠷᠠᠯ ᠬᠡᠮᠡᠬᠦ ᠰᠠᠷᠬᠤᠳ ᠤ᠋ᠨ
ᠠᠯᠳᠠᠩᠬᠠᠨ ᠠᠶᠠᠭᠠ ᠶ᠋ᠢ ᠲᠠ
ᠠᠷᠠᠢ ᠡᠷᠲᠡ ᠬᠥᠮᠥᠷᠢᠵᠡᠢ ᠳᠡ!
ᠡᠷᠲᠡ ᠨᠠᠮᠠ ᠶ᠋ᠢ ᠣᠷᠬᠢᠵᠤ
ᠡᠵᠢ ᠶ᠋ᠢ ᠮᠢᠨᠢ᠂ ᠳᠡᠭᠦᠦ ᠨᠠᠷ ᠢ᠋ ᠮᠢᠨᠢ ᠣᠷᠬᠢᠵᠤ
ᠡᠳᠦᠭᠡ ᠪᠢ᠂ ᠣᠷᠬᠢᠭᠰᠠᠨ ᠨᠠᠰᠤ ᠲᠠᠢ ᠴᠢᠨᠢ ᠴᠢᠴᠠᠤ ᠪᠣᠯᠤᠭᠠᠳ
ᠡᠯᠡ ᠵᠠᠷᠢᠮᠳᠤᠭ ᠰᠢᠯᠦᠭ ᠢ᠋ ᠬᠡᠯᠡᠵᠦ ᠰᠠᠭᠤᠨᠠ᠃
ᠠᠯᠠᠭ ᠦᠷᠡ ᠶ᠋ᠢᠨ ᠡᠯᠢᠭᠡ ᠡᠪᠦᠷᠯᠡᠭᠰᠡᠨ ᠪᠣᠯᠬᠤ ᠪᠠᠷ
ᠠᠪᠤ ᠳ᠋ᠠᠭᠠᠨ ᠪᠢ ᠡᠭᠡᠯ ᠦᠭᠡᠢ ᠬᠠᠢᠷᠠᠲᠠᠢ ᠪᠢᠯᠡ᠂
ᠠᠩᠬᠠ ᠦᠵᠡᠭᠰᠡᠨ ᠶᠢᠷᠲᠢᠨᠴᠦ ᠮᠢᠨᠢ ᠭᠤᠴᠢᠨ ᠬᠡᠳᠦᠨ ᠣᠨ ᠪᠣᠯᠬᠤ ᠪᠠᠷ
ᠠᠪᠤ ᠪᠢᠳᠡ ᠬᠣᠶᠠᠷ᠂ᠨᠢᠭᠡᠨ ᠭᠡᠷ ᠲᠦ᠍ ᠪᠠᠭᠲᠠᠭᠰᠠᠨ ᠦᠭᠡᠢ᠃
ᠡᠷᠬᠡᠯᠡᠵᠦ ᠰᠠᠭᠤᠭᠰᠠᠨ ᠴᠢᠯᠠᠭᠤᠨ ᠲᠣᠭᠯᠠᠭᠠᠮ ᠳᠡᠭᠡᠷᠡ ᠡᠴᠡ ᠮᠢᠨᠢ
ᠡᠴᠢᠭᠡ ᠪᠢᠳᠡ ᠬᠣᠶᠠᠷ᠂ ᠬᠣᠶᠠᠷ ᠲᠠᠢᠰᠢ ᠪᠠᠨ ᠶᠠᠪᠤᠭᠰᠠᠨ ᠶᠤᠮ᠃
ᠡᠷᠭᠢᠵᠦ ᠲᠡᠷᠡ ᠬᠥᠮᠦᠨ ᠴᠦ᠍ ᠬᠠᠷᠠᠭᠰᠠᠨ ᠦᠭᠡᠢ᠂ ᠡᠷᠭᠢᠵᠦ ᠪᠢ ᠴᠦ᠍ ᠬᠠᠷᠠᠭᠰᠠᠨ ᠦᠭᠡᠢ
ᠡᠷᠭᠢᠵᠦ ᠰᠡᠭᠦᠯ ᠳ᠋ᠦ᠍ᠨᠢ ᠬᠠᠷᠠᠬᠤ ᠳ᠋ᠤ᠌ ᠲᠡᠷᠡ ᠬᠥᠮᠦᠨ ᠠᠯᠠᠭᠠ ᠪᠠᠢᠯᠠ᠃
ᠡᠮᠦᠨᠡᠬᠢ ᠦᠶᠡ ᠳ᠋ᠡᠭᠡᠨ ᠪᠢ
ᠥᠷᠢ ᠲᠡᠢ ᠴᠦ᠍ ᠲᠥᠷᠥᠭᠰᠡᠨ ᠶᠦᠮ ᠤᠤ
ᠰᠡᠯᠭᠦᠵᠦ ᠦᠯᠡᠳᠡᠬᠦ ᠦᠶᠡ ᠶ᠋ᠢᠨ ᠬᠢᠨ ᠳ᠋ᠦ᠍ ᠪᠡᠨ ᠠᠪᠤ ᠮᠢᠨᠢ
ᠰᠡᠳᠬᠢᠯ ᠳᠤᠨᠳᠠᠭᠤᠷ ᠴᠤ᠌ ᠪᠠᠢᠭᠰᠠᠨ ᠶᠤᠮ ᠤᠤ
ᠨᠠᠷᠢᠨ ᠶᠠᠭᠤᠮᠠ ᠶ᠋ᠢ ᠨᠢ ᠪᠢ ᠵᠠᠯᠬᠠᠭᠤ ᠦᠭᠡᠢ ᠰᠦᠢᠳᠬᠡᠵᠦ
ᠨᠠᠮᠠ ᠶ᠋ᠢ᠂ ᠡᠴᠢᠭᠡ ᠮᠠᠨᠢ ᠴᠤ᠌ ᠬᠠᠯᠠᠭᠤ ᠦᠭᠡᠢ ᠰᠢᠢᠳᠬᠡᠵᠦ
ᠡᠴᠦᠰ ᠦ᠋ᠨ ᠡᠴᠦᠰ ᠲᠦ᠍ ᠴᠡᠷᠢᠭ ᠰᠤᠷ ᠪᠥᠰᠡᠨ ᠦ᠌
ᠡᠷᠡ ᠴᠥᠩ ᠦ᠋ᠨ ᠵᠤᠵᠠᠭᠠᠨ ᠬᠠᠪᠤᠳᠠᠷ ᠤ᠋ᠳ ᠦᠯᠡᠳᠡᠭᠡᠭᠡᠳ
ᠡᠨᠡ ᠪᠡᠶᠡ ᠶ᠋ᠢᠨ ᠮᠢᠨᠢ ᠳᠣᠯᠣᠭᠠᠬᠠᠨ ᠨᠠᠰᠤᠨ ᠳᠤᠮᠳᠠ
ᠡᠵᠢ ᠳᠡᠭᠦᠦ ᠨᠠᠷ ᠢ᠋ ᠮᠢᠨᠢ ᠤᠯᠠᠩᠬᠠᠨ ᠭᠠᠴᠠᠭᠠᠯ ᠳᠤᠮᠳᠠ
ᠡᠬᠡ ᠣᠷᠣᠨ ᠢ᠋ᠶ᠋ᠠᠨ ᠳᠡᠯᠡᠬᠡᠢ ᠶ᠋ᠢᠨ ᠲᠡᠢᠨ ᠦ᠌ ᠰᠡᠭᠦᠳᠡᠷ ᠳᠤᠮᠳᠠ
ᠭᠤᠴᠢᠨ ᠳᠣᠯᠣᠭᠠᠬᠠᠨ ᠨᠠᠰᠤᠨ ᠳ᠋ᠠᠭᠠᠨ ᠣᠷᠬᠢᠭᠰᠠᠨ!
ᠲᠡᠷᠡ ᠬᠥᠮᠦᠨ ᠢ᠋ ᠪᠠᠢᠬᠤ ᠳ᠋ᠤ᠌ ᠠᠴᠢ ᠭᠠᠪᠢᠶᠠ ᠶ᠋ᠢ ᠨᠢ ᠮᠡᠳᠡᠭᠰᠡᠨ ᠦᠭᠡᠢ
ᠲᠡᠭᠡᠭᠡᠷᠡᠰᠢᠶᠡᠵᠦ ᠪᠠᠷᠤᠭ ᠠᠳᠠ ᠦᠵᠡᠬᠦ ᠳ᠋ᠦ᠍ ᠪᠡᠯᠡᠨ ᠪᠠᠢᠭᠰᠠᠨ
ᠲᠡᠨᠡᠭ᠂ ᠳᠤᠭᠤᠯᠭᠠᠪᠤᠷᠢ ᠦᠭᠡᠢ ᠪᠠᠯᠴᠢᠷ ᠨᠠᠰᠤ ᠮᠢᠨᠢ!
ᠠᠪᠤ ᠶ᠋ᠢ ᠠᠮᠢᠰᠬᠤᠭᠠ ᠬᠤᠷᠢᠶᠠᠭᠰᠠᠨ1943 ᠣᠨ ᠤ᠋ ᠭᠠᠩ ᠲᠠᠢ ᠨᠠᠮᠤᠷ
ᠠᠯᠤᠰ ᠥᠷᠥᠨᠡ ᠵᠦᠭ ᠲᠦ᠍᠂ ᠺᠦᠷᠰᠺ ᠦ᠋ᠨ ᠶᠡᠬᠡ ᠲᠤᠯᠤᠯᠳᠤᠭᠠᠨ ᠳ᠋ᠤ᠌
ᠠᠵᠢᠯᠴᠢᠨ ᠲᠠᠷᠢᠶᠠᠴᠢᠨ ᠤ᠋ ᠬᠡᠦᠬᠡᠳ
ᠠᠷᠢᠴᠣᠳ ᠤ᠋ᠨ ᠭᠠᠩ ᠪᠣᠯᠣᠳ ᠬᠣᠶᠠᠷ ᠬᠤᠳᠬᠤᠯᠳᠤᠵᠤ
ᠠᠵᠠᠢ ᠪᠤᠭᠤᠷᠤᠯ ᠧᠦ᠋ᠷᠣᠫᠠ ᠨᠣᠢᠷ ᠬᠣᠭᠣᠯᠠ ᠦᠭᠡᠢ ᠴᠡᠴᠡᠷᠡᠵᠦ ᠪᠠᠢᠬᠤ ᠳ᠋ᠤ᠌
ᠠᠷᠠᠢ ᠡᠷᠲᠡᠳᠡᠵᠦ ᠬᠤᠭᠤᠴᠠᠭᠠ ᠳᠠᠭᠤᠰᠤᠭᠰᠠᠨ ᠶᠤᠮ᠃
ᠠᠳᠠᠢᠷ᠂ ᠲᠡᠨᠡᠭ ᠪᠠᠯᠴᠢᠷ ᠨᠠᠰᠤ ᠮᠢᠨᠦ!
ᠲᠡᠷᠡ ᠬᠥᠮᠦᠨ ᠢ᠋ ᠶᠠᠪᠤᠴᠢᠬᠠᠬᠤ ᠪᠠᠷ ᠠᠴᠢ ᠭᠠᠪᠢᠶᠠ ᠶ᠋ᠢ ᠨᠢ
ᠪᠢ ᠴᠦ᠍ ᠣᠢᠯᠭᠠᠭᠰᠠᠨ ᠂
ᠪᠢᠰᠢᠳ ᠨᠢ ᠴᠦ᠍ ᠣᠢᠯᠭᠠᠭᠰᠠᠨ ᠶᠤᠮ᠃
《ᠲᠡᠨᠡᠭ ᠦ᠋ᠳ ᠨᠢ ᠠᠮᠢᠳᠤ ᠦᠯᠡᠳᠡᠵᠦ᠂
ᠴᠡᠴᠡᠨ ᠨᠦ᠍ᠭᠦᠳ ᠨᠢ ᠶᠠᠪᠤᠴᠢᠬᠠᠵᠠᠢ ᠳᠠ》ᠭᠡᠵᠦ
ᠠᠮᠢᠳᠤ ᠳ᠋ᠤ᠌ ᠨᠢ ᠬᠡᠷᠡᠯᠳᠦᠵᠦ᠂ ᠮᠠᠭᠤᠯᠠᠵᠤ ᠪᠠᠢᠭᠰᠠᠨ ᠬᠥᠮᠦᠨ
ᠠᠯᠠᠭᠠ ᠪᠠᠷ ᠢ᠋ᠶ᠋ᠠᠨ ᠨᠢᠳᠦ ᠪᠡᠨ ᠠᠷᠴᠢᠭᠰᠠᠨ ᠭᠡᠳᠡᠭ
ᠬᠥᠭᠡᠷᠦᠬᠦᠢ ᠠᠯᠠᠭᠠᠨ ᠳᠡᠭᠡᠷᠡ ᠨᠢ ᠠᠷᠪᠠᠢ ᠶ᠋ᠢᠨ ᠦᠷᠡ ᠶ᠋ᠢᠨ ᠴᠢᠨᠡᠭᠡ ᠳᠣᠭᠣᠯᠠᠩ ᠨᠢᠯᠪᠤᠰᠤ
ᠪᠠᠢᠭᠰᠠᠨ ᠴᠤ᠌ ᠶᠤᠮ ᠤᠤ
ᠪᠠᠢᠭᠠ ᠦᠭᠡᠢ ᠴᠦ᠍ ᠶᠦᠮ ᠤᠤ- ᠪᠦᠦ ᠮᠡᠳᠡ!
ᠪᠠᠢᠭᠰᠠᠨ ᠯᠠ ᠪᠠᠢᠬᠤ ᠪᠣᠯᠲᠤᠭᠠᠢ!
ᠬᠠᠷᠢᠨ ᠲᠡᠷᠡ ᠬᠥᠮᠦᠨ ᠢ᠋ ᠶᠠᠪᠤᠴᠢᠬᠠᠬᠤ ᠪᠠᠷ
ᠬᠠᠨᠠᠲᠤ ᠭᠡᠷ ᠦ᠋ᠨ ᠮᠢᠨᠢ ᠬᠣᠢᠮᠣᠷ ᠲᠠᠯᠠ
ᠬᠠᠷᠠᠯᠠᠨ ᠬᠣᠩᠬᠣᠢᠬᠤ ᠰᠢᠭ᠋ ᠪᠣᠯᠤᠭᠰᠠᠨ ᠶᠤᠮ᠃
ᠠᠢᠯ ᠬᠣᠲᠠ ᠳᠠᠶᠠᠭᠠᠷ ᠲᠡᠷᠡ ᠬᠥᠮᠦᠨ ᠦ᠌
ᠠᠷᠭᠢᠯᠳᠠᠭᠤᠬᠠᠨ ᠳᠠᠭᠤ ᠨᠢ ᠦᠭᠡᠢᠯᠡᠭᠳᠡᠵᠦ
ᠠᠢᠯ ᠬᠣᠲᠠᠯᠠᠭᠠᠷ ᠢ᠋ᠶ᠋ᠠᠨ ᠥᠨᠥᠴᠢᠷᠡᠬᠦ ᠰᠢᠭ ᠪᠣᠯᠤᠭᠰᠠᠨ ᠶᠤᠮ᠃
ᠬᠡᠭᠡᠷᠡ ᠶ᠋ᠢᠨ ᠪᠡᠯᠴᠢᠭᠡᠷ ᠰᠤᠮᠤ ᠶ᠋ᠢᠨ ᠨᠤᠲᠤᠭ ᠲᠤ᠌
ᠬᠡᠭᠡᠷ ᠮᠣᠷᠢᠨ ᠳᠡᠭᠡᠷᠡ
ᠬᠡᠯᠲᠡᠬᠡᠢᠳᠡᠭᠦᠬᠡᠨ ᠰᠠᠭᠤᠭᠰᠠᠨ ᠲᠡᠷᠡ ᠬᠥᠮᠦᠨ ᠢ᠋ᠶ᠋ᠡᠷ ᠳᠤᠲᠠᠵᠤ
ᠬᠡᠰᠡᠭ ᠲᠦ᠍ ᠪᠡᠨ ᠡᠪᠦᠯ ᠪᠣᠯᠵᠤ ᠥᠭᠬᠦ ᠦᠭᠡᠢ ᠤᠳᠠᠵᠤ
ᠮᠡᠭᠲᠡᠷᠡᠬᠦ ᠳ᠋ᠦ᠍ ᠪᠡᠨ
ᠮᠡᠨᠡᠷᠡᠭᠰᠡᠨ ᠲᠡᠭᠷᠢ ᠮᠠᠨᠠᠷᠠᠭᠰᠠᠨ ᠭᠠᠵᠠᠷ ᠬᠣᠶᠠᠷ
ᠮᠡᠭᠰᠢᠨ ᠭᠢᠩᠰᠢᠨ ᠣᠷᠢᠯᠠᠬᠤ ᠰᠢᠭ᠋
ᠮᠡᠴᠢᠨ ᠵᠢᠯ ᠦ᠋ᠨ ᠶᠡᠬᠡ ᠵᠤᠳ ᠪᠣᠯᠤᠭᠰᠠᠨ ᠶᠤᠮ᠃
ᠪᠠᠢᠭᠠᠯᠢ ᠬᠡᠮᠡᠬᠦ ᠲᠣᠭᠰᠢᠨ ᠡᠴᠢᠭᠡ
ᠪᠠᠯᠠᠯᠤᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ
ᠪᠠᠯᠠᠷ ᠤ᠋ᠨ ᠵᠤᠷᠰᠢᠯ
ᠪᠠᠶᠠᠴᠤᠳ ᠤ᠋ᠨ ᠣᠮᠣᠭ᠂ ᠳᠡᠭᠡᠷᠡᠩᠭᠦᠢ ᠵᠠᠩ
ᠬᠤᠲᠠᠲᠠᠢ ᠮᠠᠯ ᠢ᠋ ᠨᠢ
ᠬᠣᠶᠠᠷ ᠵᠠᠭᠤᠨ ᠰᠠᠶᠠ ᠬᠦᠷᠭᠡ ᠭᠡᠰᠡᠨ ᠣᠷᠣᠰ ᠤ᠋ᠨ ᠲᠤᠰᠢᠶᠠᠯ ᠲᠠᠢ ᠬᠠᠮᠲᠤ
ᠠᠷᠴᠢᠭᠠᠳ ᠥᠩᠭᠡᠷᠡᠭᠰᠡᠨ ᠃
ᠠᠳᠠᠯᠢᠬᠠᠨ ᠲᠠᠭᠠᠷᠠᠭᠤᠯᠵᠤ
ᠠᠳᠠᠯᠢᠬᠠᠨ ᠥᠯᠦᠰᠦᠭᠦᠯᠵᠦ
ᠣᠳᠣ ᠶ᠋ᠢᠨ ᠡᠨᠡ ᠨᠡᠢᠭᠡᠮ ᠳ᠋ᠦ᠍
ᠣᠪᠣᠭᠠ ᠳᠥᠬᠥᠭᠦᠯᠵᠦ ᠥᠭᠭᠦᠭᠰᠡᠨ ᠶᠦᠮ᠃
ᠤᠯᠠᠩᠬᠠᠨ ᠬᠥᠮᠦᠨ ᠦ᠌
ᠣᠮᠣᠭ ᠢ᠋ ᠨᠢ ᠳᠠᠷᠤᠵᠤ ᠥᠭᠭᠦᠭᠰᠡᠨ ᠶᠦᠮ ᠃
ᠬᠥᠮᠦᠨ ᠢ᠋ ᠮᠠᠭᠤ ᠬᠡᠯᠡᠬᠦ ᠪᠢᠰᠢ᠂ ᠪᠢ ᠴᠤ᠌ ᠭᠡᠰᠡᠨ
ᠬᠡᠦᠬᠡᠳ ᠪᠠᠢᠬᠤ ᠳ᠋ᠤ᠌ ᠪᠠᠨ
ᠣᠯᠠᠨ ᠤᠳᠠᠭᠠ ᠠᠪᠤ ᠶ᠋ᠢ ᠪᠡᠨ ᠠᠭᠤᠷᠯᠠᠭᠤᠯᠤᠭᠰᠠᠨ
ᠡᠦᠲᠦ ᠭᠤᠴᠢᠨ ᠵᠢᠯ ᠦ᠋ᠨ ᠬᠣᠢᠨᠠ ᠮᠠᠭᠲᠠᠵᠤ ᠰᠠᠭᠤᠨᠠ᠃
ᠬᠠᠮᠢᠭᠠ ᠨᠢ ᠴᠤ᠌ ᠭᠡᠰᠡᠨ᠂ ᠬᠡᠵᠢᠶᠡ ᠴᠤ᠌ ᠭᠡᠰᠡᠨ ᠂ᠬᠡᠨ ᠴᠤ᠌ ᠭᠡᠰᠡᠨ ᠂ᠠᠮᠢᠳᠤ ᠳ᠋ᠤ᠌ ᠨᠢ
ᠬᠠᠷᠢᠶᠠᠵᠤ ᠂ ᠬᠠᠪᠴᠢᠵᠤ ᠂ ᠬᠠᠷᠠᠳᠠᠵᠤ᠂ᠬᠠᠵᠠᠢᠯᠭᠠᠵᠤ
ᠬᠠᠵᠠᠭᠤ ᠪᠥᠭᠡᠷᠡᠨ ᠡᠴᠡ ᠨᠢ ᠂ᠠᠷᠤ ᠬᠣᠩᠭᠣᠨ ᠠ᠋ᠴᠠ ᠨᠢ ᠂ᠣᠯᠠᠨ ᠠ᠋ᠴᠠ ᠨᠢ ᠤᠬᠤᠵᠤ ᠣᠬᠣᠴᠢᠬᠠᠭᠠᠳ
ᠦᠬᠦᠬᠦ ᠪᠡᠷ ᠨᠢ ᠡᠭᠦᠷᠢᠳᠡ ᠰᠠᠳᠠᠭᠠ ᠪᠣᠯᠬᠤ ᠪᠠᠷ ᠦᠭᠡᠢ ᠪᠣᠯᠬᠤ ᠪᠠᠷ ᠨᠢ
ᠥᠪᠡᠷ ᠡᠴᠡ ᠨᠢ ᠲᠠᠯᠬᠠ ᠶ᠋ᠢ ᠨᠢ ᠬᠤᠪᠢᠶᠠᠵᠤ ᠢᠳᠡᠵᠦ ᠪᠣᠯᠬᠤ ᠪᠠᠷ ᠨᠢ ᠥᠷᠭᠡᠨ ᠣᠯᠠᠨ ᠳ᠋ᠤ᠌
ᠠᠷᠠᠢ ᠳᠥᠩᠭᠡᠭᠦᠷ ᠬᠠᠷᠠᠭᠳᠠᠬᠤ ᠪᠠᠷ ᠦᠭᠡᠢ ᠪᠣᠯᠬᠤ ᠪᠠᠷ ᠨᠢ
ᠭᠠᠭᠴᠠ ᠦᠭᠡ ᠪᠡᠷ ᠬᠡᠯᠡᠪᠡᠯ
ᠮᠠᠭᠲᠠᠭᠠᠯ ᠭᠠᠵᠠᠷ ᠠᠪᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠴᠠᠭ ᠲᠤ᠌
ᠭᠠᠢ ᠴᠤ᠌ ᠪᠣᠯᠬᠤ ᠦᠭᠡᠢ
ᠨᠡᠮᠡᠷᠢ ᠴᠦ᠍ ᠪᠣᠯᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠴᠠᠭ ᠲᠤ᠌
ᠭᠠᠰᠢᠭᠤᠳᠠᠵᠤ
ᠭᠠᠵᠠᠷ ᠬᠣᠲᠣᠢᠲᠠᠯᠠ ᠮᠠᠭᠲᠠᠳᠠᠭ ᠶᠤᠮ ᠪᠠᠢᠨᠠ᠃
ᠦᠭᠡᠢ ᠠ᠋᠂ ᠦᠭᠡᠢ ᠠ᠋᠂
ᠦᠬᠦᠭᠰᠡᠨ ᠬᠥᠮᠦᠨ ᠳ᠋ᠦ᠍ ᠨᠡᠬᠡᠨ ᠣᠯᠭᠣᠳᠠᠭ
ᠦᠨᠡ ᠦᠭᠡᠢ ᠠᠯᠳᠠᠷ᠂ ᠦᠨᠡ ᠦᠭᠡᠢ ᠮᠠᠭᠲᠠᠭᠠᠯ ᠬᠡᠷᠡᠭ ᠦᠭᠡᠢ᠃
ᠦᠨᠡᠨ ᠬᠡᠷᠡᠭ ᠲᠡᠢ!
ᠬᠥᠮᠦᠨ ᠢ᠋᠂ ᠬᠡᠨ ᠢ᠋ ᠴᠦ᠍ ᠭᠡᠰᠡᠨ ᠦᠬᠦᠬᠦ ᠪᠡᠷ ᠨᠢ
ᠾᠷᠥ᠋ᠱᠸᠸ ᠰᠢᠭ ᠠᠪᠰᠠ ᠶ᠋ᠢ ᠨᠢ ᠤᠬᠤᠬᠤ ᠦᠭᠡᠢ ᠯᠡ ᠪᠠᠢᠪᠠᠯ ᠪᠣᠯᠤᠭᠠ!
(ᠴᠢᠳᠠᠯ ᠲᠠᠢ ᠪᠣᠯ ᠠᠮᠢᠳᠤ ᠳ᠋ᠤ᠌ ᠨᠢ ᠳᠣᠪᠲᠣᠯᠤᠨᠠ ᠪᠢᠵᠡ
ᠴᠢᠳᠠᠯ ᠦᠭᠡᠢ ᠪᠣᠯ ᠬᠣᠬᠢ ᠨᠢ!)
ᠠᠪᠰᠠ ᠪᠠᠨ ᠲᠣᠨᠣᠭᠤᠯᠤᠭᠰᠠᠨ ᠲᠡᠷᠡ ᠰᠠᠬᠠᠯᠲᠤ ᠬᠥᠮᠦᠨ ᠰᠢᠭ
ᠠᠪᠤ ᠮᠢᠨᠢ ᠲᠡᠢᠮᠦ ᠴᠤ᠌ ᠲᠣᠮᠣ ᠭᠠᠪᠢᠶᠠᠲᠠᠨ ᠪᠢᠰᠢ᠂ ᠨᠢᠭᠦᠯᠲᠡᠨ ᠴᠤ᠌ ᠪᠢᠰᠢ
ᠠᠮᠢᠲᠠᠨ ᠳ᠋ᠤ᠌ ᠬᠠᠯᠠ ᠪᠣᠯᠤᠭᠠ ᠦᠭᠡᠢ
ᠠᠷᠠᠳ ᠬᠥᠮᠦᠨ ᠪᠠᠢᠭᠰᠠᠨ ᠶᠤᠮ᠃
ᠠᠮᠢᠲᠠᠨ ᠳ᠋ᠤ᠌ ᠬᠠᠯᠠ ᠪᠣᠯᠤᠭᠠ ᠦᠭᠡᠢ ᠶᠠᠪᠤᠨᠠ ᠭᠡᠳᠡᠭ ᠦᠨᠡᠨ ᠳ᠋ᠡᠭᠡᠨ
ᠠᠢᠬᠤᠪᠲᠤᠷ ᠲᠣᠮᠣ ᠭᠠᠪᠢᠶᠠ ᠶᠤᠮ ᠰᠢᠦ!
ᠬᠣᠭᠣᠷᠣᠨᠳᠣ ᠮᠠᠨᠢ ᠶᠠᠰᠤ ᠬᠠᠶᠠᠭᠰᠠᠨ ᠲᠡᠷᠡ ᠴᠠᠭ ᠦᠶᠡ ᠶ᠋ᠢᠨ
ᠬᠣᠯᠠ ᠶᠠᠪᠤᠬᠤ ᠦᠭᠡᠢ ᠮᠤᠩᠬᠠᠷᠠᠭᠤᠯᠤᠯ ᠠᠷᠢᠯᠵᠤ
ᠬᠣᠵᠢᠭᠤ ᠪᠢ ᠠᠪᠤ ᠶ᠋ᠢ ᠪᠡᠨ ᠣᠢᠯᠠᠭᠠᠵᠤ
ᠬᠣᠣᠰ ᠦᠭᠡᠢ ᠦᠷᠦ ᠡᠪᠡᠳᠦᠭᠰᠡᠨ ᠶᠦᠮ᠃
ᠠᠪᠤ ᠮᠢᠨᠢ ᠡᠭᠡᠯ ᠨᠢᠭᠡᠨ ᠪᠣᠯᠪᠠᠴᠤ
ᠠᠪᠤ ᠠ᠋ᠴᠠ ᠴᠠᠭᠠᠰᠢᠬᠢ ᠪᠦᠬᠦ ᠦᠶᠡ ᠶ᠋ᠢ ᠬᠠᠷᠠᠬᠤ
ᠠᠷᠭᠠ ᠦᠭᠡᠢ《ᠮᠢᠨᠦ ᠴᠣᠩᠬᠣ》
ᠲᠡᠷᠡ ᠬᠥᠮᠦᠨ ᠪᠠᠢᠯᠠ!
ᠲᠡᠷᠡ ᠬᠥᠮᠦᠨ ᠢ᠋ᠶ᠋ᠡᠷ ᠪᠢ ᠬᠣᠷᠢᠳᠤᠭᠠᠷ ᠵᠠᠭᠤᠨ ᠢ᠋ ᠬᠠᠷᠠᠭᠰᠠᠨ ᠶᠤᠮ᠃
ᠲᠡᠷᠡ ᠬᠥᠮᠦᠨ ᠢ᠋ᠶ᠋ᠡᠷ ᠪᠠᠰᠠ ᠠᠷᠪᠠᠨ ᠶᠢᠰᠦᠳᠦᠭᠡᠷ ᠵᠠᠭᠤᠨ ᠢ᠋ ᠬᠠᠷᠠᠪᠠ
ᠲᠡᠮᠡᠴᠡᠯ ᠴᠥᠬᠥᠷᠡᠯ᠂ ᠠᠮᠤᠷᠰᠠᠨᠠᠭᠠ᠂ ᠴᠢᠩᠭᠦᠨᠵᠠᠪ ᠢ᠋ ᠬᠠᠷᠠᠵᠤ
ᠲᠡᠨᠢᠭᠦᠨ ᠭᠣᠪᠢ ᠶ᠋ᠢᠨ ᠤᠬᠠᠭᠠᠨᠲᠠᠨ ᠷᠠᠪᠵᠢ ᠬᠤᠲᠤᠭᠲᠤ ᠶ᠋ᠢ ᠬᠠᠷᠠᠵᠤ
ᠲᠡᠮᠦᠵᠢᠨ᠂ ᠠᠲ᠋ᠲ᠋ᠢᠯᠢ᠂
ᠡᠷᠲᠡᠨ ᠦ᠌ ᠳᠣᠷᠣᠨᠠ ᠳ᠋ᠠᠬᠢᠨ ᠢ᠋ ᠬᠠᠷᠠᠵᠤ
ᠲᠢᠪ ᠳᠡᠯᠡᠬᠡᠢ ᠶ᠋ᠢᠨ ᠢ᠋ᠶ᠋ᠡᠨ ᠦᠰᠦᠨ ᠪᠤᠭᠤᠷᠤᠯ ᠡᠷᠢᠨ ᠢ᠋
ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠢ᠋
ᠬᠡᠦᠬᠡᠳ ᠦᠶᠡ ᠲᠡᠢ ᠨᠢ ᠴᠣᠭ ᠣᠢᠯᠠᠭᠠᠨᠠᠮ᠃
ᠦᠰᠦᠭ ᠬᠠᠳᠠᠭᠴᠢ᠄ ᠭᠠᠸᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠰᠬᠠ
ᠬᠢᠨᠠᠭᠴᠢ᠄ ᠢᠷᠡᠭᠡᠳᠦᠢ ᠣᠳᠬᠠᠨᠰᠣ ᠠ᠋