ᠴᠥᠬᠥᠷᠡᠯ– ᠷ᠂ ᠴᠣᠢᠨᠣᠮ Цөхрөл– Р᠂ ЧойномTsuhrul-Choinom
505ᠴᠥᠬᠥᠷᠡᠯ
ᠠᠢᠯ ᠳ᠋ᠤ᠌ ᠵᠣᠴᠢᠯᠠᠬᠤ ᠳ᠋ᠤ᠌ ᠠᠷᠢᠬᠢ ᠭᠠᠷᠭᠠᠳᠠᠭ ᠶᠣᠰᠣ ᠶ᠋ᠢ
ᠠᠯᠢ ᠦᠶᠡ ᠳ᠋ᠦ᠍ ᠶᠠᠮᠠᠷ ᠴᠢᠳᠬᠥᠷ ᠨᠢ ᠭᠠᠷᠭᠠᠪᠠ ᠃
ᠬᠠᠮᠤᠭ ᠰᠠᠢᠬᠠᠨ ᠰᠠᠨᠠᠵᠤ ᠶᠠᠪᠤᠳᠠᠭ ᠬᠥᠮᠦᠨ ᠳ᠋ᠡᠭᠡᠨ
ᠬᠠᠲᠠᠭᠤ ᠬᠣᠣᠷ ᠢ᠋ ᠬᠣᠶᠠᠷ ᠭᠠᠷᠳᠠᠨ ᠪᠠᠷᠢᠵᠤ
ᠬᠠᠷᠠᠭᠰᠠᠭᠠᠷ ᠪᠠᠢᠵᠤ ᠠᠶᠠᠭᠠ ᠠᠶᠠᠭᠠ ᠪᠠᠷ ᠤᠤᠭᠤᠯᠭᠠᠬᠤ
ᠬᠠᠴᠢᠨ ᠶᠤᠮ ᠰᠢᠦ ᠂ ᠠ᠋ ᠳᠠ ᠡᠨᠡ ᠬᠥᠮᠦᠨ ᠭᠡᠳᠡᠭ ᠤᠤ
ᠵᠠᠷᠢᠮ ᠨᠢ ᠭᠡᠲᠡᠯᠡ ᠠᠶᠠᠭᠠ ᠴᠠᠢ ᠪᠠᠷ ᠳᠠᠢᠯᠠᠭᠤᠯᠤᠭᠠᠳ
ᠵᠠᠪᠠᠯ ᠠᠷᠢᠬᠢ ᠭᠣᠷᠢᠳᠠᠵᠤ ᠰᠠᠭᠤᠭᠰᠠᠭᠠᠷ ᠪᠠᠢᠳᠠᠭ
ᠬᠣᠭᠣᠯᠠᠨ ᠤ᠋ ᠱᠦᠭᠦᠢ ᠂ ᠠᠪᠳᠠᠷᠠ ᠰᠠᠪᠠ ᠣᠩᠭᠣᠢᠯᠭᠠᠬᠤ ᠪᠦᠷᠢ
ᠬᠣᠶᠠᠷ ᠨᠢᠳᠦ ᠨᠢ ᠭᠠᠷ ᠳᠠᠭᠠᠵᠤ ᠭᠦᠶᠦᠭᠰᠡᠭᠡᠷ ᠪᠠᠢᠳᠠᠭ
ᠶᠠᠮᠠᠷ ᠴᠤ᠌ ᠠᠢᠯ ᠳ᠋ᠤ᠌ ᠪᠣᠢ ᠂ ᠪᠠᠢᠬᠤ ᠦᠭᠡᠢ ᠶ᠋ᠢᠨ ᠵᠣᠪᠠᠯᠠᠩ ᠭᠡᠵᠦ ᠪᠠᠢᠳᠠᠭ
ᠶᠠᠭᠠᠬᠢᠬᠤ ᠪᠣᠢ ᠂ ᠵᠠᠷᠢᠮ ᠵᠣᠴᠢᠨ ᠢ᠋ ᠠᠷᠢᠬᠢ ᠦᠭᠡᠢ ᠭᠠᠷᠭᠠᠳᠠᠭ
ᠭᠠᠷᠤᠭᠰᠠᠨ ᠵᠣᠴᠢᠨ ᠠᠷᠢᠬᠢ ᠥᠭᠭᠦᠭᠰᠡᠨ ᠦᠭᠡᠢ ᠭᠡᠵᠦ ᠲᠡᠳᠡᠨ ᠦ᠌ ᠬᠢ ᠶ᠋ᠢ
ᠭᠠᠰᠢᠭᠤᠨ ᠢ᠋ᠶ᠋ᠠᠷ ᠬᠠᠷᠢᠶᠠᠵᠤ ᠂ ᠭᠠᠰᠢᠭᠤᠨ ᠤᠰᠤ ᠰᠢᠭ᠋ ᠠᠭᠠᠰᠢ ᠭᠠᠷᠭᠠᠳᠠᠭ ᠃
ᠭᠡᠲᠡᠯᠡ ᠵᠠᠷᠢᠮ ᠠᠢᠯ
ᠭᠡᠷ ᠲᠡᠭᠡᠨ ᠣᠷᠣᠭᠰᠠᠨ ᠪᠦᠬᠦᠨ ᠢ᠋ ᠰᠢᠬᠠᠵᠤ ᠰᠠᠭᠤᠳᠠᠭ ᠂
ᠤᠤᠭᠤᠬᠤ ᠦᠭᠡᠢ ᠭᠡᠰᠡᠨ ᠢ᠋ ᠤᠤᠭᠤ ᠭᠡᠵᠦ ᠠᠯᠪᠠᠲᠠᠨ
ᠤᠷᠠᠨ ᠰᠡᠴᠡᠨ ᠦᠭᠡ ᠪᠡᠷ ᠶᠥᠭᠡᠳᠡᠵᠦ ᠲᠤᠨᠢᠷᠬᠠᠳᠠᠭ ᠃
ᠠᠢ ᠳᠠ ᠂ ᠡᠨᠡ ᠭᠡᠭᠡᠨ ᠴᠡᠯᠮᠡᠭ ᠡᠳᠦᠷ ᠦ᠋ᠨ ᠳᠤᠮᠳᠠᠬᠢ
ᠠᠯᠢ ᠡᠷᠲᠡᠨ ᠦ᠌ ᠬᠠᠷᠠ ᠪᠠᠷᠠᠭᠠᠨ ᠵᠤᠷᠰᠢᠯ ᠬᠡᠵᠢᠶᠡ ᠳᠠᠭᠤᠰᠤᠨᠠ ᠪᠣᠯ ᠳᠠ
ᠠᠢᠯ ᠳ᠋ᠤ᠌ ᠣᠷᠣᠬᠤ ᠳ᠋ᠤ᠌ ᠠᠷᠢᠬᠢ ᠭᠠᠷᠭᠠᠳᠠᠭ ᠶᠣᠰᠣ ᠶ᠋ᠢ
ᠠᠯᠢ ᠦᠶᠡ ᠳ᠋ᠦ᠍ ᠶᠠᠮᠠᠷ ᠪᠤᠷᠬᠠᠨ ᠨᠢ ᠤᠰᠠᠳᠬᠠᠬᠤ ᠪᠣᠯ ᠳᠠ ?