ᠲᠡᠮᠦᠵᠢᠨ ᠡᠷᠲᠡᠮ ᠶ᠋ᠢᠡᠷ ᠢᠲᠡᠭᠡᠯᠲᠦ ᠨᠥᠬᠥᠷ ᠊ᠢ ᠣᠯᠪᠠ（ ᠬᠡᠯᠡ ᠪᠢᠴᠢᠭ – ᠳᠣᠯᠣᠳᠤᠭᠠᠷ ᠳᠡᠪᠲᠡᠷ） Тэмүүжин эрдмээр итгэлт нөхрийг олов（ Хэл бичиг – Долдугар дэвтэр）
247ᠲᠡᠮᠦᠵᠢᠨ ᠡᠷᠲᠡᠮ ᠶ᠋ᠢᠡᠷ ᠢᠲᠡᠭᠡᠯᠲᠦ ᠨᠥᠬᠥᠷ ᠊ᠢ ᠣᠯᠪᠠ
ᠨᠢᠭᠡᠨ ᠡᠳᠦᠷ ᠲᠡᠮᠦᠵᠢᠨ ᠦ᠌ ᠨᠠᠢ᠍ᠮᠠᠨ ᠰᠢᠷᠭᠠ ᠠᠭᠲᠠ ᠶ᠋ᠢ ᠳᠡᠭᠡᠷᠡᠮ ᠲᠠᠭᠤᠵᠤ ᠣᠳᠪᠠ᠃ ᠲᠡᠮᠦᠵᠢᠨ ᠡᠪᠡᠰᠦᠨ ᠦ᠌ ᠨᠠᠯᠠᠷᠬᠠᠢ ᠪᠠᠷ ᠮᠥᠷ ᠮᠥᠰᠬᠢᠵᠦ ᠭᠤᠷᠪᠠᠨ ᠬᠣᠨᠣᠭ ᠡᠷᠢᠵᠦ ᠶᠠᠪᠤᠭᠠᠳ ᠨᠢᠭᠡᠨ ᠶᠡᠬᠡ ᠪᠠᠭᠤᠳᠠᠯ ᠤ᠋ᠨ ᠡᠮᠦᠨᠡ ᠬᠦᠷᠬᠦ ᠳ᠋ᠦ᠍ ᠲᠡᠨᠳᠡ ᠬᠡᠳᠦᠨ ᠮᠢᠩᠭᠠᠨ ᠠᠳᠤᠭᠤ ᠬᠤᠷᠠᠭᠰᠠᠨ ᠪᠠᠢᠪᠠ᠃ ᠪᠠᠭᠤᠳᠠᠯ ᠤ᠋ᠨ ᠳᠣᠲᠣᠷᠠ ᠨᠢᠭᠡᠨ ᠬᠦᠳᠡᠷ ᠴᠢᠬᠢᠷᠡᠭ ᠵᠠᠯᠠᠭᠤ᠂ ᠬᠤᠷᠴᠠ ᠬᠢᠲᠤᠭᠠ ᠪᠠᠷᠢᠵᠤ ᠦᠬᠡᠷ ᠲᠤᠶᠠᠴᠢᠵᠤ ᠪᠠᠢᠵᠠᠢ᠃ ᠲᠡᠮᠦᠵᠢᠨ ᠥᠪᠡᠷ ᠦ᠋ᠨ ᠨᠠᠢ᠍ᠮᠠᠨ ᠰᠢᠷᠭᠠ ᠨᠢ ᠡᠨᠡ ᠠᠳᠤᠭᠤᠨ ᠳ᠋ᠤ᠌ ᠪᠠᠢᠬᠤ ᠪᠣᠯᠪᠠ ᠤᠤ? ᠭᠡᠮᠡᠨ ᠠᠵᠢᠶᠠᠷᠠᠨ ᠦᠵᠡᠲᠡᠯᠡ ᠲᠡᠷᠡ ᠵᠠᠯᠠᠭᠤ ᠢᠯᠳᠦ ᠪᠠᠷᠢᠵᠤ ᠮᠣᠷᠢᠨ ᠳ᠋ᠠᠭᠠᠨ ᠠᠯᠠᠪᠬᠢᠨ ᠮᠣᠷᠳᠠᠵᠤ ᠢᠷᠡᠭᠡᠳ᠄《ᠴᠢ ᠬᠠᠮᠢᠭᠠ ᠠ᠋ᠴᠠ ᠢᠷᠡᠭᠰᠡᠨ ᠠᠯᠢ ᠠᠢᠮᠠᠭ ᠤ᠋ᠨ ᠬᠥᠮᠦᠨ ᠪᠣᠢ? ᠶᠠᠭᠤᠨ ᠳ᠋ᠤ᠌ ᠠᠶᠤᠮᠰᠢᠭ ᠦᠭᠡᠢ ᠮᠢᠨᠦ ᠠᠳᠤᠭᠤ ᠶ᠋ᠢ ᠰᠠᠮ ᠠᠵᠢᠬᠤ ᠪᠣᠢ?》ᠭᠡᠮᠡᠨ ᠵᠠᠩᠳᠠᠨ ᠠᠰᠠᠭᠤᠪᠠ᠃ ᠲᠡᠮᠦᠵᠢᠨ ᠢᠨᠢᠶᠡᠨ᠄
《ᠪᠣᠷᠵᠢᠭᠢᠨ ᠣᠪᠣᠭ ᠤ᠋ᠨ ᠲᠡᠮᠦᠵᠢᠨ ᠭᠡᠭᠴᠢ ᠪᠢ ᠮᠥᠨ᠃ ᠨᠠᠢ᠍ᠮᠠᠨ ᠰᠢᠷᠭᠠ ᠠᠭᠲᠠ ᠪᠠᠨ ᠠᠯᠳᠠᠭᠠᠳ ᠡᠷᠢᠵᠦ ᠶᠠᠪᠤᠨᠠ᠂ ᠡᠷᠬᠢᠮ ᠲᠠ ᠰᠤᠷᠠᠭ ᠰᠣᠨᠣᠰᠪᠠ ᠤᠤ?》 ᠭᠡᠵᠦ ᠠᠰᠠᠭᠤᠪᠠ᠃ ᠲᠡᠷᠡ ᠵᠠᠯᠠᠭᠤ ᠪᠣᠷᠵᠢᠭᠢᠨ ᠣᠪᠣᠭ ᠤ᠋ᠨ ᠲᠡᠮᠦᠵᠢᠨ ᠭᠡᠰᠡᠨ ᠢ᠋ ᠰᠣᠨᠣᠰᠤᠭᠠᠳ ᠠᠯᠠᠰᠬᠢᠨ ᠪᠠᠶᠠᠷᠯᠠᠵᠤ᠄
《ᠰᠤᠷᠠᠭ ᠰᠣᠨᠣᠰᠬᠤ ᠶ᠋ᠢ ᠪᠠᠢᠲᠤᠭᠠᠢ᠂ ᠪᠢ ᠨᠢᠳᠦ ᠪᠡᠷ ᠦᠵᠡᠪᠡ᠃ ᠲᠦᠷ ᠪᠠᠢᠵᠠ᠂ ᠪᠢ ᠤᠷᠢᠳᠠ ᠪᠠᠷ ᠴᠢᠮᠠ ᠠ᠋ᠴᠠ ᠬᠡᠳᠦᠨ ᠦᠭᠡ ᠠᠰᠠᠭᠤᠶᠠ᠄ ᠬᠥᠮᠦᠰ ᠴᠢᠮᠠ ᠶ᠋ᠢ ᠴᠠᠭᠯᠠᠰᠢ ᠦᠭᠡᠢ ᠰᠡᠴᠡᠨ ᠮᠡᠷᠭᠡᠨ᠂ ᠲᠡᠩᠴᠡᠰᠢ ᠦᠭᠡᠢ ᠲᠡᠮᠦᠵᠢᠨ᠂ ᠬᠣᠢᠴᠢ ᠡᠳᠦᠷ ᠬᠣᠯᠠ ᠣᠢᠷᠠ ᠶ᠋ᠢ ᠬᠤᠷᠢᠶᠠᠵᠤ ᠬᠣᠣᠰ ᠦᠭᠡᠢ ᠬᠠᠭᠠᠨ ᠰᠠᠭᠤᠨᠠ ᠭᠡᠵᠦ ᠬᠡᠯᠡᠯᠴᠡᠨᠡ ᠪᠢᠯᠡ᠃ ᠡᠷᠬᠢᠮ ᠴᠢᠮᠠ ᠳ᠋ᠤ᠌ ᠬᠡᠳᠦᠨ ᠬᠥᠪᠴᠢᠲᠦ ᠨᠤᠮᠤ ᠲᠠᠲᠠᠬᠤ᠂ ᠬᠡᠳᠦᠢ ᠬᠦᠨᠳᠦ ᠴᠢᠯᠠᠭᠤ ᠡᠷᠭᠦᠬᠦ ᠬᠦᠴᠦᠨ ᠲᠡᠢ ᠪᠣᠢ?》ᠭᠡᠵᠦ ᠠᠰᠠᠭᠤᠪᠠ᠃ ᠲᠡᠮᠦᠵᠢᠨ ᠲᠡᠷᠡ ᠵᠠᠯᠠᠭᠤ ᠶ᠋ᠢ ᠪᠠᠭᠠᠲᠤᠷ ᠬᠦᠴᠦᠲᠡᠨ ᠮᠥᠨ ᠭᠡᠮᠡᠨ ᠲᠠᠨᠢᠭᠠᠳ᠄
《ᠲᠦᠮᠡᠨ ᠢ᠋ ᠬᠤᠷᠢᠶᠠᠵᠤ ᠲᠥᠷᠥ ᠶ᠋ᠢ ᠲᠣᠭᠲᠠᠭᠠᠬᠤ ᠳ᠋ᠤ᠌ ᠢᠳᠡ ᠬᠦᠴᠦᠨ ᠢ᠋ ᠲᠦᠰᠢᠳᠡᠭ ᠪᠢᠰᠢ᠂ ᠢᠲᠡᠭᠡᠯ ᠡᠷᠳᠡᠮ ᠬᠣᠶᠠᠷ ᠲᠤ᠌ ᠲᠦᠰᠢᠳᠡᠭ ᠶᠦ᠍ᠮ᠃ ᠳᠡᠯᠡᠬᠡᠢ ᠳ᠋ᠠᠬᠢᠨ ᠢ᠋ ᠵᠠᠰᠠᠬᠤ ᠭᠡᠳᠡᠭ ᠮᠥᠨ ᠡᠨᠡ ᠦᠬᠡᠷ ᠲᠤᠶᠠᠴᠢᠬᠤ ᠲᠠᠢ ᠠᠳᠠᠯᠢ ᠶᠣᠰᠣ ᠪᠢᠯᠡ᠃ ᠦᠬᠡᠷ ᠲᠤᠶᠠᠴᠢᠵᠤ ᠴᠢᠳᠠᠬᠤ ᠦᠭᠡᠢ ᠬᠥᠮᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠪᠣᠯ ᠡᠨᠡ ᠭᠠᠭᠴᠠ ᠪᠦᠬᠦᠯᠢ ᠦᠬᠡᠷ ᠦᠵᠡᠭᠳᠡᠨᠡ᠃ ᠭᠡᠲᠡᠯᠡ ᠦᠬᠡᠷ ᠲᠤᠶᠠᠴᠢᠵᠤ ᠴᠢᠳᠠᠬᠤ ᠬᠥᠮᠦᠨ ᠦ᠌ ᠴᠡᠭᠡᠵᠢᠨ ᠳ᠋ᠦ᠍ ᠲᠡᠭᠦᠨ ᠦ᠌ ᠦᠶᠡ ᠭᠡᠰᠢᠭᠦᠦ ᠶ᠋ᠢᠨ ᠵᠠᠪᠰᠠᠷ ᠵᠠᠭᠠᠯᠢᠬᠠᠢ ᠨᠢ ᠲᠣᠳᠣᠷᠬᠠᠢ ᠪᠠᠢᠳᠠᠭ ᠲᠤᠯᠠ ᠲᠡᠭᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠲᠣᠯᠣᠭᠠᠢ ᠰᠢᠭᠢᠷᠡ ᠡᠪᠴᠢᠭᠦᠦ ᠤᠭᠤᠴᠠ ᠵᠡᠷᠭᠡ ᠦᠶᠡ ᠮᠥᠴᠢ ᠨᠢ ᠲᠤᠰ ᠲᠤᠰ ᠴᠤᠴᠠᠷᠬᠠᠢ ᠬᠠᠷᠠᠭᠳᠠᠨᠠ᠃ ᠢᠩᠭᠢᠬᠦᠯᠡᠷ ᠬᠢᠲᠤᠭᠠ ᠬᠥᠳᠡᠯᠦᠮᠡᠭᠴᠡ ᠲᠣᠷᠬᠤ ᠶᠠᠭᠤᠮᠠ ᠦᠭᠡᠢ ᠳᠠᠭᠠᠭᠠᠵᠤ᠂ ᠬᠢᠲᠤᠭᠠᠨ ᠤ᠋ ᠢᠷ ᠴᠦ᠍ ᠮᠢᠷᠠᠳᠠᠭ ᠦᠭᠡᠢ ᠶᠦ᠍ᠮ᠃ ᠲᠤᠶᠠᠴᠢᠵᠤ ᠡᠰᠡ ᠴᠢᠳᠠᠬᠤ ᠬᠥᠮᠦᠨ ᠪᠣᠯ ᠦᠬᠡᠷ ᠦ᠋ᠨ ᠦᠶᠡ ᠭᠡᠰᠢᠭᠦᠦ ᠶ᠋ᠢ ᠦᠯᠦ ᠣᠯᠬᠤ ᠲᠤᠯᠠ ᠨᠢᠭᠡ ᠦᠬᠡᠷ ᠲᠦ᠍ ᠠᠷᠪᠠᠨ ᠬᠢᠲᠤᠭᠠ ᠬᠡᠷᠡᠭᠯᠡᠪᠡᠴᠦ ᠮᠥᠨ ᠬᠦ᠌ ᠮᠣᠬᠣᠭᠠᠳ᠂ ᠪᠦᠳᠦᠭᠦᠨ ᠶᠠᠰᠤᠨ ᠳ᠋ᠤ᠌ ᠰᠦᠬᠡ ᠣᠷᠣᠭᠤᠯᠵᠤ ᠬᠦᠴᠦ ᠪᠡᠨ ᠰᠦᠢᠳᠬᠡᠬᠦ ᠮᠥᠷᠲᠡᠭᠡᠨ ᠵᠦᠢ ᠶᠣᠰᠣᠨ ᠠ᠋ᠴᠠ ᠵᠥᠷᠢᠴᠡᠨᠡ᠃ ᠦᠯᠢᠳᠬᠡᠵᠦ ᠬᠡᠯᠡᠪᠡᠯ᠂ ᠳᠡᠯᠡᠬᠡᠢ ᠳ᠋ᠠᠬᠢᠨ ᠭᠡᠭᠴᠢ ᠦᠬᠡᠷ ᠲᠡᠢ ᠠᠳᠠᠯᠢ᠂ ᠳᠡᠯᠡᠬᠡᠢ ᠳ᠋ᠠᠬᠢᠨ ᠢ᠋ ᠵᠠᠰᠠᠬᠤ ᠨᠢ ᠦᠬᠡᠷ ᠲᠤᠶᠠᠴᠢᠬᠤ ᠲᠠᠢ ᠠᠳᠠᠯᠢ᠂ ᠳᠡᠯᠡᠬᠡᠢ ᠳ᠋ᠠᠬᠢᠨ ᠤ᠋ ᠵᠦᠢ ᠶᠣᠰᠣ ᠨᠢ ᠦᠬᠡᠷ ᠦ᠋ᠨ ᠦᠶᠡ ᠭᠡᠰᠢᠭᠦᠦ ᠲᠡᠢ ᠠᠳᠠᠯᠢ᠂ ᠳᠡᠯᠡᠬᠡᠢ ᠳ᠋ᠠᠬᠢᠨ ᠢ᠋ ᠵᠠᠰᠠᠬᠤ ᠤᠬᠠᠭᠠᠨ ᠨᠢ ᠬᠢᠲᠤᠭᠠᠨ ᠤ᠋ ᠢᠷ ᠲᠡᠢ ᠠᠳᠠᠯᠢ ᠶᠤᠮ᠃ ᠡᠢᠮᠦ ᠡᠴᠡ ᠶᠠᠭᠤᠨ ᠳ᠋ᠤ᠌ ᠦᠨᠡᠨ ᠡᠷᠳᠡᠮ ᠢ᠋ ᠲᠦᠰᠢᠬᠦ ᠦᠭᠡᠢ ᠦᠬᠡᠷ ᠬᠦᠴᠦᠨ ᠳ᠋ᠦ᠍ ᠲᠦᠰᠢᠭᠯᠡᠬᠦ ᠪᠣᠢ?》ᠭᠡᠵᠦ ᠶᠣᠰᠣ ᠤᠴᠢᠷ ᠢ᠋ ᠲᠣᠭᠤᠷᠲᠠᠯᠠ ᠶᠠᠷᠢᠵᠤ ᠥᠭᠪᠡ᠃
ᠲᠡᠷᠡ ᠵᠠᠯᠠᠭᠤ ᠲᠡᠮᠦᠵᠢᠨ ᠦ᠌ ᠶᠠᠷᠢᠭᠰᠠᠨ ᠢ᠋ ᠰᠣᠨᠣᠰᠤᠭᠠᠳ ᠰᠡᠳᠬᠢᠯ ᠰᠡᠬᠡᠭᠡᠷᠡᠨ᠂ ᠦᠨᠡᠨ ᠵᠢᠷᠦᠬᠡᠨ ᠡᠴᠡ ᠪᠡᠨ ᠪᠢᠰᠢᠷᠡᠨ ᠢᠲᠡᠭᠡᠵᠦ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠨ ᠰᠥᠭᠥᠳᠦᠨ ᠳᠠᠭᠠᠪᠠ᠃ ᠲᠡᠷᠡ ᠪᠣᠯ ᠪᠣᠳᠣᠯᠭᠠ ᠤᠬᠠᠭᠠᠨ ᠮᠡᠷᠭᠡᠨ᠂ ᠪᠠᠭᠠᠲᠤᠷ ᠬᠦᠴᠦᠨ ᠲᠡᠭᠦᠰ ᠪᠣᠭᠣᠷᠴᠤ ᠭᠡᠳᠡᠭ ᠵᠠᠯᠠᠭᠤ ᠶᠤᠮ᠃
ᠪᠣᠭᠣᠷᠴᠤ ᠲᠡᠨᠳᠡ ᠡᠴᠡ᠄《ᠡᠷᠡ ᠶ᠋ᠢᠨ ᠮᠤᠩ ᠠᠳᠠᠯᠢ ᠪᠢᠵᠡ᠂ ᠪᠢ ᠬᠠᠮᠲᠤ ᠡᠴᠢᠶᠡ》 ᠬᠡᠮᠡᠭᠡᠳ ᠲᠡᠮᠦᠵᠢᠨ ᠯᠦ᠍ᠭᠡ ᠬᠠᠮᠲᠤ ᠶᠠᠪᠤᠵᠤ ᠨᠠᠢ᠍ᠮᠠᠨ ᠰᠢᠷᠭᠠ ᠠᠭᠲᠠ ᠶ᠋ᠢ ᠳᠡᠭᠡᠷᠡᠮ ᠡᠴᠡ ᠪᠤᠯᠢᠶᠠᠨ ᠠᠪᠴᠢᠷᠠᠪᠠ᠃ ᠲᠡᠷᠡ ᠴᠠᠭ ᠠ᠋ᠴᠠ ᠬᠣᠢᠰᠢ ᠲᠡᠮᠦᠵᠢᠨ ᠪᠣᠭᠣᠷᠴᠤ ᠬᠣᠶᠠᠷ ᠳᠣᠲᠣᠨᠣ ᠰᠠᠢᠨ ᠠᠨᠳᠠ ᠪᠣᠯᠤᠯᠴᠠᠵᠤ᠂ ᠪᠣᠭᠣᠷᠴᠤ ᠪᠠᠭᠠᠲᠤᠷ ᠴᠢᠩᠭᠢᠰ ᠬᠠᠭᠠᠨ ᠲᠡᠮᠦᠵᠢᠨ ᠦ᠌ ᠲᠤᠯᠭᠤᠷ ᠲᠥᠷᠥ ᠪᠠᠢᠭᠤᠯᠤᠭᠰᠠᠨ ᠳᠥᠷᠪᠡᠨ ᠬᠦᠯᠦᠭ ᠦ᠋ᠨ ᠨᠢᠭᠡ ᠨᠢ ᠪᠣᠯᠤᠭᠰᠠᠨ ᠪᠠᠢᠨᠠ᠃
※ᠢᠷᠡᠯᠲᠡ ᠄
ᠠᠯᠪᠠᠨ ᠵᠢᠷᠤᠮ ᠤ᠋ᠨ ᠲᠠᠪᠤᠨ ᠵᠢᠯ ᠦ᠋ᠨ ᠳᠦᠷᠢᠮᠲᠦ ᠪᠠᠭᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠦᠵᠡᠬᠦ
ᠬᠡᠯᠡ ᠪᠢᠴᠢᠭ ᠳᠣᠯᠣᠳᠤᠭᠠᠷ ᠳᠡᠪᠲᠡᠷ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ ᠨᠠᠢᠷᠠᠭᠤᠯᠤᠨ ᠬᠡᠪᠯᠡᠭᠦᠯᠪᠡ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠢᠨᠬᠤᠸᠠ ᠨᠣᠮ ᠤ᠋ᠨ ᠳᠡᠯᠭᠡᠭᠦᠷ ᠲᠠᠷᠬᠠᠭᠠᠪᠠ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠬᠡᠪᠯᠡᠬᠦ ᠦᠢᠯᠡᠳᠪᠦᠷᠢ ᠬᠡᠪᠯᠡᠪᠡ
1991 ᠣᠨ ᠤ᠋ 3 ᠰᠠᠷᠠ ᠳ᠋ᠤ᠌ ᠠᠩᠬᠠᠳᠤᠭᠠᠷ ᠬᠡᠪ ᠢ᠋ ᠬᠢᠪᠡ
1993 ᠣᠨ ᠤ᠋ 4 ᠰᠠᠷᠠ ᠳ᠋ᠤ᠌ ᠭᠤᠷᠪᠠᠳᠤᠭᠠᠷ ᠤᠳᠠᠭᠠ ᠬᠡᠪᠯᠡᠪᠡ᠃
ᠦᠨᠡ᠄1.40 ᠲᠥᠭᠥᠷᠢᠭ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠨᠠᠷᠠᠨᠰᠤᠶᠤᠯ
ᠬᠢᠨᠠᠭᠴᠢ᠄ ᠣᠳᠣᠨᠬᠤᠸᠠᠷ᠂ ᠣᠳᠬᠠᠨᠰᠸᠠ
2023.7.18