ᠮᠢᠨᠦ ᠲᠥᠷᠥᠭᠰᠡᠨ ᠡᠳᠦᠷ - ᠳ ᠂ ᠪᠠᠲᠤᠪᠠᠶᠠᠷ Миний төрсөн өдөр - Д ᠂ Батбаяр
312ᠮᠢᠨᠦ ᠲᠥᠷᠥᠭᠰᠡᠨ ᠡᠳᠦᠷ
( ᠬᠣᠱᠣᠩ ᠥᠭᠦᠯᠡᠯᠭᠡ)
ᠪᠢ ᠳᠥᠷᠪᠡᠨ ᠰᠠᠷᠠ ᠶ᠋ᠢᠨ ᠨᠢᠭᠡᠨ ᠳ᠋ᠦ᠍ ᠲᠥᠷᠥᠭᠰᠡᠨ᠃ ᠲᠥᠷᠥᠭᠰᠡᠨ ᠴᠠᠭ ᠠ᠋ᠴᠠ ᠬᠣᠢᠰᠢ ᠨᠢᠭᠡ ᠴᠦ᠍ ᠤᠳᠠᠭᠠ ᠣᠢ ᠪᠠᠨ ᠲᠡᠮᠳᠡᠭᠯᠡᠵᠦ ᠦᠵᠡᠭᠡ ᠦᠭᠡᠢ᠃
ᠬᠡᠨ ᠴᠦ᠍ ᠨᠠᠳᠠ ᠲᠥᠷᠥᠭᠰᠡᠨ ᠡᠳᠦᠷ ᠦ᠋ᠨ ᠪᠡᠯᠡᠭ ᠰᠡᠯᠲᠡ ᠥᠭᠴᠦ ᠶᠠᠪᠤᠭᠰᠠᠨ ᠦᠭᠡᠢ᠂ ᠬᠠᠷᠢᠨ ᠴᠤ᠌ ᠨᠠᠮᠠ ᠶ᠋ᠢ ᠬᠠᠭᠤᠷᠴᠤ ᠨᠠᠳᠠ ᠪᠠᠷ ᠳᠠᠭᠠᠵᠢᠩᠨᠠᠳᠠᠭ( ᠱᠣᠭᠯᠠᠳᠠᠭ)᠃
ᠪᠤᠰᠤᠳ ᠡᠳᠦᠷ ᠲᠡᠭᠡᠳᠡᠭ ᠦᠭᠡᠢ ᠮᠥᠷᠲᠡᠯᠡ ᠵᠠᠪᠠᠯ ᠮᠢᠨᠦ ᠲᠥᠷᠥᠭᠰᠡᠨ ᠡᠳᠦᠷ ᠲᠡᠭᠡᠬᠦ ᠡᠴᠡ ᠲᠡᠭᠡᠬᠦ ᠭᠡᠰᠡᠨ ᠶᠦ᠍ᠮ ᠰᠢᠭ ᠨᠠᠮᠠ ᠶ᠋ᠢ ᠬᠠᠭᠤᠷᠴᠢᠬᠠᠳᠠᠭ᠃ ᠥᠷᠯᠥᠭᠡ ᠶᠠᠭᠠᠬᠢᠭᠠ ᠴᠤ᠌ ᠦᠭᠡᠢ ᠡᠷᠲᠡ ᠨᠠᠢ᠍ᠮᠠᠨ ᠴᠠᠭ ᠤ᠋ᠨ ᠦᠶᠡ ᠳ᠋ᠦ᠍ ᠳᠡᠭᠦᠦ ᠮᠢᠨᠢ( ᠨᠥᠬᠥᠭᠡ 3 ᠳ᠋ᠤᠭᠠᠷ ᠠᠩᠭᠢ ᠳ᠋ᠤ᠌ ᠬᠣᠶᠠᠷ ᠵᠢᠯ ᠤᠯᠠᠷᠢᠳᠠᠭ)《 ᠴᠠᠭ ᠴᠢᠨᠢ ᠪᠣᠯᠴᠢᠬᠠᠵᠤ ᠠᠬᠠ ᠠ᠋᠂ ᠲᠠ ᠠᠵᠢᠯ ᠳ᠋ᠠᠭᠠᠨ ᠶᠠᠪᠤᠭᠠ ᠦᠭᠡᠢ ᠶᠦ᠍ᠮ ᠦᠦ?》 ᠭᠡᠵᠦ ᠳᠠᠭᠤᠳᠠᠬᠤ ᠪᠠᠷ ᠨᠢ ᠰᠡᠩᠳᠡ ᠮᠡᠩᠳᠡ ᠪᠣᠰᠬᠤ ᠲᠠᠢ ᠵᠡᠷᠭᠡ《 ᠮᠣᠯᠢᠭᠤ ᠠ᠋! ᠳᠥᠷᠪᠡᠨ ᠰᠠᠷᠠ ᠶ᠋ᠢᠨ ᠨᠢᠭᠡᠨ》 ᠭᠡᠵᠦ ᠬᠥᠭᠡᠷᠦᠭᠡᠳ ᠵᠢᠭᠤᠲᠠᠴᠢᠬᠠᠨᠠ᠃ ᠲᠡᠭᠡᠬᠦ ᠲᠡᠢ ᠵᠡᠷᠭᠡ ᠠᠭᠤᠷ ᠮᠢᠨᠢ ᠮᠠᠰᠢᠨ ᠤ᠋ ᠤᠰᠤ ᠰᠢᠭ᠋ ᠪᠤᠴᠠᠯᠤᠭᠠᠳ ᠢᠷᠡᠨᠡ᠃ ᠡᠮᠦᠰᠴᠦ ᠪᠠᠢᠭᠰᠠᠨ ᠱᠠᠬᠠᠢ ᠪᠠᠨ ᠬᠣᠢᠨᠠ ᠠ᠋ᠴᠠ ᠨᠢ ᠶᠠᠪᠤᠭᠤᠯᠴᠢᠬᠠᠮᠠᠷ ᠰᠠᠨᠠᠭᠳᠠᠪᠠᠴᠤ ᠨᠢᠭᠡ ᠳ᠋ᠦ᠍ ᠣᠴᠢᠵᠤ ᠠᠪᠬᠤ ᠨᠢ ᠲᠦᠪᠡᠭ᠂ ᠬᠣᠶᠠᠷ ᠲᠤ᠌ ᠰᠤᠷᠭᠠᠨ ᠬᠥᠮᠦᠵᠢᠭᠦᠯᠬᠦ ᠤᠬᠠᠭᠠᠨ ᠳ᠋ᠤ᠌ ᠲᠠᠭᠠᠷᠠᠬᠤ ᠦᠭᠡᠢ ᠪᠣᠯᠤᠭᠠᠳ ᠠᠷᠠᠢ ᠭᠡᠵᠦ ᠠᠭᠤᠷ ᠣᠮᠣᠭ ᠢ᠋ᠶ᠋ᠠᠨ ᠠᠯᠠᠭᠠᠨ ᠳ᠋ᠠᠭᠠᠨ ᠣᠴᠢᠬᠤ ᠠ᠋ᠴᠠ ᠡᠮᠦᠨᠡᠬᠡᠨ ᠪᠠᠷᠢᠵᠤ ᠠᠪᠤᠨᠠ᠃ ᠨᠥᠬᠥᠭᠡ ᠳᠡᠭᠦᠦ ᠴᠦ᠍ ᠲᠡᠨᠳᠡ ᠢᠨᠢᠶᠡᠳᠦᠨ ᠳ᠋ᠡᠭᠡᠨ ᠬᠠᠬᠠᠵᠤ ᠴᠡᠴᠡᠨ《 ᠥᠨᠥᠳᠥᠷ ᠴᠢᠨᠢ ᠬᠥᠮᠦᠨ ᠬᠠᠭᠤᠷᠳᠠᠭ ᠡᠳᠦᠷ ᠪᠠᠢᠨᠠ ᠰᠢᠦ ᠳᠡ》 ᠭᠡᠵᠦ ᠪᠠᠢᠨᠠ᠃ ᠶᠠᠭᠤ ᠴᠤ᠌ ᠭᠡᠬᠦᠪ᠂ ᠡᠨᠡ ᠰᠠᠢᠨ ᠬᠥᠮᠦᠨ ᠪᠣᠯᠬᠤ ᠦᠭᠡᠢ ᠨᠢ ᠭᠡᠵᠦ ᠪᠣᠳᠣᠭᠠᠳ ᠬᠤᠷᠳᠤᠬᠠᠨ ᠯᠠ ᠭᠠᠷᠤᠭᠠᠳ ᠶᠠᠪᠤᠴᠢᠬᠠᠬᠤ ᠭᠡᠰᠡᠨ ᠴᠢᠨᠢ ᠤᠲᠠᠰᠤ ᠳᠤᠤᠭᠠᠷᠤᠯᠠ᠃ ᠬᠠᠷᠢᠯᠴᠠᠭᠤᠷ ᠢ᠋ ᠠᠪᠬᠤ ᠲᠠᠢ ᠵᠡᠷᠭᠡ《 ᠥᠨᠥᠳᠥᠷ ᠳᠥᠷᠪᠡᠨ ᠰᠠᠷᠠ ᠶ᠋ᠢᠨ ᠨᠢᠭᠡᠨ ᠨᠠᠢᠵᠠ ᠠ᠋》 ᠭᠡᠰᠡᠨ ᠰᠢᠩᠭᠡᠨ ᠳᠠᠭᠤ ᠰᠣᠨᠣᠰᠲᠠᠯᠠ᠃ ᠮᠢᠨᠦ ᠠᠭᠤᠷ ᠤᠯᠠᠮ ᠶᠡᠬᠡ ᠬᠦᠷᠴᠦ ᠰᠠᠢᠬᠠᠨ ᠤ᠋ ᠠᠭᠤᠷᠤᠨ ᠳᠡᠭᠡᠷᠡ ᠥᠩᠭᠡᠷᠡᠭᠰᠡᠨ ᠵᠢᠯ ᠦ᠋ᠳ ᠦ᠋ᠨ ᠠᠭᠤᠷ ᠨᠡᠮᠡᠭᠳᠡᠨ ᠪᠢ ᠪᠠᠷᠤᠭ ᠪᠠᠩᠵᠠᠨ ᠱᠦᠳᠡᠨᠵᠡ( ᠴᠦᠳᠡᠩ) ᠰᠢᠭ ᠥᠪᠡᠷ ᠢ᠋ᠶ᠋ᠡᠷ ᠠᠰᠠᠬᠤ ᠭᠡᠵᠦ ᠶᠠᠪᠤᠯᠠ᠃ ᠲᠡᠭᠡᠲᠡᠯᠡ ᠬᠠᠵᠠᠭᠤᠨ ᠠ᠋ᠴᠠ《 ᠬᠥᠮᠦᠨ ᠭᠤᠸᠠᠢ ᠪᠦᠰᠡ ᠪᠡᠨ ᠠᠪ》 ᠭᠡᠵᠦ ᠪᠠᠢᠨᠠ᠃ ᠪᠢ ᠪᠦᠰᠡᠭᠦᠢ ᠬᠢᠷᠢᠨᠡ ᠪᠦᠰᠡᠲᠡᠢ ᠶᠦ᠍ᠮ ᠰᠢᠭ ᠲᠡᠮᠲᠡᠴᠢᠵᠦ ᠦᠵᠡᠬᠦ ᠪᠡᠷ ᠲᠡᠷᠡ ᠵᠢᠭᠠᠯ ᠢᠨᠢᠶᠡᠳᠦ ᠠᠯᠲᠠᠨ《 ᠳᠥᠷᠪᠡᠨ ᠰᠠᠷᠠ ᠶ᠋ᠢᠨ ᠨᠢᠭᠡᠨ》 ᠭᠡᠳ ᠭᠦᠶᠦᠭᠡᠳ ᠶᠠᠪᠤᠴᠢᠬᠠᠪᠠ᠃ ᠪᠠᠰᠠ ᠯᠠ ᠰᠠᠢᠨ ᠬᠥᠮᠦᠨ ᠪᠣᠯᠬᠤ ᠦᠭᠡᠢ ᠬᠡᠦᠬᠡᠳ ᠶᠦ᠍ᠮ ᠭᠡᠵᠦ ᠪᠣᠳᠣᠭᠳᠠᠪᠠ᠃ ᠢᠩᠭᠢᠭᠡᠳ ᠴᠠᠭᠠᠱᠢ ᠪᠠᠨ ᠶᠠᠪᠤᠬᠤ ᠳ᠋ᠠᠭᠠᠨ ᠬᠠᠮᠢᠭᠠ ᠠ᠋ᠴᠠ ᠮᠠᠰᠢᠨ ᠭᠠᠷᠴᠤ ᠢᠷᠡᠭᠡᠳ ᠲᠠᠭᠠᠷᠠᠴᠢᠬᠠᠬᠤ ᠪᠣᠯ ᠭᠡᠵᠦ ᠠᠶᠤᠭᠰᠠᠨ ᠬᠥᠮᠦᠨ ᠰᠢᠭ ᠳᠠᠬᠢᠨ ᠬᠠᠭᠤᠷᠲᠠᠭᠳᠠᠬᠤ ᠠ᠋ᠴᠠ ᠠᠶᠤᠨ ᠠᠶᠤᠨ ᠠᠵᠢᠯ ᠳᠡᠭᠡᠷᠡ ᠪᠡᠨ ᠢᠷᠡᠪᠡ᠃
ᠠᠵᠢᠯ ᠤ᠋ᠨ ᠥᠷᠥᠭᠡᠨ ᠦ᠌ ᠬᠠᠭᠠᠯᠭᠠ ᠲᠠᠲᠠᠲᠠᠯᠠ《 ᠴᠢᠮᠠ ᠶ᠋ᠢ ᠬᠡᠯᠲᠡᠰ ᠦ᠋ᠨ ᠳᠠᠷᠤᠭᠠ ᠳᠠᠭᠤᠳᠠᠭᠰᠠᠨ》 ᠭᠡᠯᠡ᠃ ᠵᠠ ᠳᠠ ᠡᠨᠡ ᠴᠢᠨᠢ ᠱᠠᠯ ᠬᠤᠳᠠᠯ ᠰᠢᠦ ᠳᠡ ᠭᠡᠵᠦ ᠮᠡᠳᠡᠭᠰᠡᠨ ᠬᠢᠷᠢᠨᠡ ᠨᠡᠭᠡᠷᠡᠨ ᠳᠠᠭᠤᠳᠠᠭᠰᠠᠨ ᠪᠣᠯ ᠰᠡᠭᠦᠯ ᠳ᠋ᠦ᠍ᠨᠢ ᠳᠠᠪᠬᠤᠷ ᠵᠠᠩᠨᠠᠭᠤᠯᠬᠤ ᠶᠤᠮ ᠳᠠ᠃ ᠰᠠᠢᠬᠠᠨ ᠴᠢᠨᠦ ᠠᠪᠠᠭᠠᠢ ᠡᠪᠡᠳᠦᠯᠡ ᠭᠡᠵᠦ ᠬᠡᠯᠡᠨᠡ ᠦᠦ ᠭᠡᠵᠦ ᠪᠣᠳᠣᠭᠠᠳ ᠣᠴᠢᠬᠤ ᠳ᠋ᠤ᠌ ᠳᠠᠭᠤᠳᠠᠭᠠ ᠦᠭᠡᠢ ᠶᠦ᠍ᠮ ᠪᠠᠢᠨᠠ᠃ ᠨᠠᠮᠠ ᠶ᠋ᠢ ᠡᠷᠭᠢᠵᠦ ᠣᠷᠣᠬᠤ ᠲᠠᠢ ᠵᠡᠷᠭᠡ《 ᠳᠥᠷᠪᠡᠨ ᠰᠠᠷᠠ ᠶ᠋ᠢᠨ ᠨᠢᠭᠡᠨ》 ᠭᠡᠵᠦ ᠢᠨᠢᠶᠡᠯᠳᠦᠨᠡ ᠭᠡᠵᠦ ᠪᠣᠳᠣᠬᠤ ᠠ᠋ᠴᠠ ᠠᠵᠢᠯ ᠤ᠋ᠨ ᠢ᠋ᠶ᠋ᠠᠷ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠮᠠᠷ ᠦᠭᠡᠢ ᠰᠠᠨᠠᠭᠳᠠᠨᠠ᠃
ᠬᠡᠨ ᠨᠢᠭᠡ ᠬᠥᠮᠦᠨ ᠬᠠᠷᠠᠬᠤ ᠲᠠᠢ ᠵᠡᠷᠭᠡ ᠯᠡ ᠶᠠᠭᠠᠬᠢᠵᠤ ᠬᠠᠭᠤᠷᠬᠤ ᠭᠡᠵᠦ ᠪᠠᠢᠭᠠ ᠪᠣᠯ ᠭᠡᠬᠦ ᠡᠴᠡ ᠠᠶᠤᠬᠤ ᠪᠣᠯᠤᠯᠠ᠃ ᠪᠢ ᠤᠭ ᠨᠢ ᠰᠣᠬᠣᠷ ᠬᠣᠷᠣᠬᠠᠢ᠂ ᠬᠣᠨᠢᠨ ᠬᠦᠷᠪᠡᠯ᠂ ᠣᠭᠣᠲᠣᠨᠠ᠂ ᠢᠮᠠᠭᠠᠨ ᠠ᠋ᠴᠠ ᠴᠤ᠌ ᠠᠶᠤᠳᠠᠭ ᠦᠭᠡᠢ ᠬᠥᠮᠦᠨ᠃ ᠲᠡᠷᠡ ᠪᠠᠢᠲᠤᠭᠠᠢ ᠠᠪᠠᠭᠠᠢ ᠠ᠋ᠴᠠ ᠪᠠᠨ ᠠᠶᠤᠳᠠᠭ ᠦᠭᠡᠢ ᠬᠥᠮᠦᠨ᠃ ᠡᠳᠦᠷ ᠮᠥᠩᠭᠥ ᠦᠭᠡᠢ᠂ ᠰᠥᠨᠢ ᠮᠥᠩᠭᠥ ᠲᠡᠢ ᠶᠠᠪᠤᠭᠰᠠᠨ ᠴᠤ᠌ ᠠᠶᠤᠳᠠᠭ ᠦᠭᠡᠢ᠃ ᠭᠡᠲᠡᠯᠡ ᠪᠢ ᠲᠥᠷᠥᠭᠰᠡᠨ ᠡᠳᠦᠷ ᠢ᠋ᠶ᠋ᠡᠷ ᠢᠩᠭᠢᠵᠦ ᠠᠶᠤᠵᠤ ᠶᠠᠪᠤᠬᠤ ᠴᠤ᠌ ᠭᠡᠵᠢ ᠳᠡ᠂ ᠪᠢ ᠳᠠᠷᠤᠯᠲᠠ ᠶᠡᠬᠡᠲᠡᠢ᠂ ᠵᠢᠷᠦᠬᠡ ᠮᠠᠭᠤᠲᠠᠢ᠂ ᠨᠢᠭᠡ ᠯᠡ ᠬᠦᠴᠦᠲᠡᠢ ᠬᠠᠭᠤᠷᠤᠯᠲᠠᠨ ᠳ᠋ᠤ᠌ ᠲᠣᠭᠳᠣᠢ( ᠨᠤᠭᠳᠤᠢᠬᠤ) ᠪᠠᠨ ᠥᠭᠴᠢᠬᠡᠬᠦ ᠪᠠᠢᠬᠠ ᠭᠡᠵᠦ ᠭᠡᠵᠦ ᠶᠡᠬᠡ ᠠᠶᠤᠳᠠᠭ᠃ ᠭᠡᠲᠡᠯᠡ ᠮᠢᠨᠦ ᠪᠡᠶᠡ ᠶ᠋ᠢ ᠪᠣᠳᠣᠬᠤ ᠦᠭᠡᠢ᠂ ᠲᠥᠷᠥᠭᠰᠡᠨ ᠡᠳᠦᠷ ᠢ᠋ᠶ᠋ᠡᠷ ᠮᠢᠨᠢ ᠨᠠᠮᠠ ᠶ᠋ᠢ ᠬᠠᠭᠤᠷᠴᠤ ᠴᠠᠭᠠᠱᠢ ᠨᠢ ᠬᠠᠷᠠᠭᠤᠯᠴᠢᠬᠠᠬᠤ ᠭᠡᠳ ᠪᠠᠢᠳᠠᠭ ᠪᠠᠢᠯᠠ᠃ ᠢᠩᠭᠢᠵᠦ ᠠᠶᠤᠳᠠᠰᠤᠨ ᠠ᠋ᠴᠠ ᠠᠶᠤᠳᠠᠰᠤᠨ ᠳ᠋ᠤ᠌᠂ ᠠᠭᠤᠷ ᠠ᠋ᠴᠠ ᠠᠭᠤᠷ ᠲᠤ᠌ ᠬᠦᠷᠴᠦ᠂ ᠣᠨ ᠵᠢᠯ ᠦ᠋ᠳ ᠢ᠋ ᠠᠷᠠᠢ ᠴᠢᠮᠠᠢ ᠳᠠᠪᠠᠵᠤ ᠶᠠᠪᠤᠲᠠᠯᠠ ᠨᠢᠳᠤᠨᠤᠨ ᠤ᠋ ᠰᠢᠷᠠ ᠪᠡᠴᠢᠨ ᠵᠢᠯ ᠭᠠᠷᠪᠠ᠃
ᠥᠷᠯᠥᠭᠡ ᠰᠡᠷᠡᠲᠡᠯᠡ ᠡᠬᠡᠨᠡᠷ ᠮᠠᠨᠢ ᠴᠡᠯᠮᠡᠭ ᠲᠩᠷᠢ ᠰᠢᠭ ᠰᠠᠢᠬᠠᠨ ᠪᠠᠢᠯᠠ᠃ ᠥᠨᠥᠳᠥᠷ ᠴᠢᠨᠦ ᠲᠥᠷᠥᠭᠰᠡᠨ ᠡᠳᠦᠷ ᠪᠢ ᠴᠢᠮᠠ ᠳ᠋ᠤ᠌ ᠢᠨᠢᠶᠡᠳᠦ ᠪᠡᠯᠡᠭᠯᠡᠨᠡ ᠭᠡᠳ ᠯᠡ ᠨᠠᠷᠠ ᠰᠠᠷᠠ ᠰᠢᠭ᠋ ᠮᠡᠯᠲᠡᠯᠵᠡᠵᠦ ᠪᠠᠢᠨᠠ᠃ ᠶᠠᠩᠵᠤ ᠶᠠᠩᠵᠤ ᠶ᠋ᠢᠨ ᠮᠠᠯᠠᠭᠠᠢ ᠢᠨᠢᠶᠡᠳᠦ ᠬᠦᠷᠭᠡᠮᠡᠷ ᠬᠠᠴᠢᠨ ᠬᠠᠴᠢᠨ ᠡᠮᠦᠰᠴᠦ ᠨᠠᠮᠠ ᠶ᠋ᠢ ᠢᠨᠢᠶᠡᠳᠦ ᠠᠯᠳᠠᠭᠤᠯᠪᠠ᠃ ᠡᠬᠡᠨᠡᠷ ᠮᠢᠨᠢ ᠶᠠᠮᠠᠷ ᠣᠯᠠᠨ ᠮᠠᠯᠠᠭᠠᠢ ᠲᠠᠢ ᠶᠤᠮ ᠪᠣᠢ? ᠭᠡᠵᠦ ᠪᠢ ᠭᠠᠢᠬᠠᠨ ᠢᠨᠢᠶᠡᠵᠦ ᠪᠠᠢᠯᠠ᠃ ᠲᠡᠭᠡᠭᠰᠡᠨ ᠡᠴᠡ ᠥᠨᠥᠳᠥᠷ ᠢᠨᠢᠶᠡᠳᠦ ᠶ᠋ᠢᠨ ᠡᠳᠦᠷ ᠬᠥᠮᠦᠨ ᠪᠣᠯᠭᠠᠨ ᠢᠨᠢᠶᠡᠬᠦ ᠶᠣᠰᠣᠲᠠᠢ ᠭᠡᠵᠦ ᠢᠷᠡᠭᠡᠳ ᠯᠡ ᠨᠠᠮᠠ ᠶ᠋ᠢ ᠭᠡᠵᠢᠭᠡᠳᠡᠵᠦ( ᠰᠡᠳᠬᠢᠯ ᠢ᠋ ᠥᠳᠥᠭᠡᠬᠦ) ᠡᠬᠢᠯᠡᠪᠡ᠃ ᠪᠢᠳᠡ ᠵᠥᠩᠳᠡᠭᠡᠨ ᠬᠥᠭᠡᠷᠪᠡ᠃ ᠭᠤᠳᠤᠮᠵᠢᠨ ᠳ᠋ᠤ᠌ ᠨᠢᠭᠡ ᠰᠢᠨᠡ ᠲᠠᠨᠢᠯ ᠬᠠᠭᠤᠴᠢᠨ ᠲᠠᠨᠢᠯ ᠰᠢᠭ᠋ ᠠᠭᠤᠯᠵᠠᠭᠠᠳ ᠪᠠᠭᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠳᠣᠲᠣᠭᠤᠷ ᠪᠠᠢᠷᠢᠨ ᠳ᠋ᠤ᠌ ᠬᠥᠯᠳᠡᠭᠦᠦ ᠯᠤᠤᠪᠠᠩ ᠨᠢᠭᠤᠵᠤ ᠢᠳᠡᠵᠦ᠂ ᠬᠥᠭ ᠢ᠋ᠶ᠋ᠡᠷ ᠲᠠᠷᠢᠭᠰᠠᠨ ᠢ᠋ᠶ᠋ᠠᠨ ᠶᠠᠷᠢᠵᠤ ᠢᠨᠢᠶᠡᠯᠳᠦᠵᠦ ᠰᠠᠯᠪᠠ᠃ ᠠᠵᠢᠯ ᠳᠡᠭᠡᠷᠡ ᠪᠠᠰᠠ ᠨᠢᠭᠡ ᠬᠥᠮᠦᠨ ᠴᠢᠮᠠ ᠳ᠋ᠤ᠌ ᠢᠨᠢᠶᠡᠳᠦ ᠲᠡᠢ ᠶᠠᠭᠤᠮᠠ ᠶᠠᠷᠢᠶᠠ ᠭᠡᠵᠦ ᠬᠡᠯᠡᠭᠡᠳ ᠣᠢ ᠮᠠᠭ ᠦᠭᠡᠢ ᠢᠨᠢᠶᠡᠵᠦ ᠪᠢ ᠳᠠᠭᠠᠨ ᠪᠠᠬᠠᠨ ᠬᠥᠭᠡᠷᠴᠦ ᠬᠥᠭᠡᠷᠴᠦ ᠪᠢᠳᠡ ᠬᠣᠶᠠᠷ ᠶᠠᠭᠤ ᠶᠠᠷᠢᠬᠤ ᠪᠠᠨ ᠮᠠᠷᠲᠠᠲᠠᠯᠠ ᠪᠠᠨ ᠢᠨᠢᠶᠡᠯᠳᠦᠵᠦ ᠪᠢᠯᠡ᠃ ᠡᠨᠡ ᠡᠳᠦᠷ ᠬᠠᠮᠢᠭᠠ ᠯᠠ ᠶᠠᠪᠤᠭᠰᠠᠨ ᠢᠨᠢᠶᠡᠳᠦ ᠬᠦᠷᠴᠦ ᠪᠠᠢᠪᠠ᠃ ᠲᠥᠷᠥᠭᠰᠡᠨ ᠡᠳᠦᠷ ᠢ᠋ᠶ᠋ᠡᠷ ᠨᠢᠭᠡ ᠴᠦ᠍ ᠪᠡᠯᠡᠭ ᠠᠪᠴᠤ ᠪᠠᠢᠭᠠ ᠦᠭᠡᠢ ᠪᠢ ᠬᠥᠮᠦᠨ ᠦ᠌ ᠡᠨᠡ ᠶᠡᠬᠡ ᠢᠨᠢᠶᠡᠳᠦᠮ ᠦ᠋ᠨ ᠪᠡᠯᠡᠭ ᠲᠦ᠍ ᠪᠠᠶᠠᠷᠯᠠᠨ ᠬᠥᠭᠡᠷᠴᠦ ᠪᠠᠢᠯᠠ᠃ ᠨᠥᠬᠥᠭᠡ ᠡᠬᠡᠨᠡᠷ ᠦ᠋ᠨ ᠳᠡᠭᠦᠦ ᠮᠠᠨᠢ ᠴᠤ᠌ ᠲᠣᠬᠢᠲᠠᠢ ᠲᠣᠮᠣᠭᠠ ᠲᠠᠢ ᠪᠠᠷ ᠬᠥᠮᠦᠨ ᠪᠣᠯᠵᠤ ᠳᠠᠷᠬᠠᠨ ᠠ᠋ᠴᠠ ᠤᠲᠠᠰᠤ ᠪᠠᠷ ᠢᠨᠢᠶᠡᠳᠦ ᠪᠡᠯᠡᠭᠯᠡᠵᠦ ᠪᠠᠢᠬᠤ ᠶᠤᠮ᠃ ᠪᠢ ᠤᠭ ᠨᠢ ᠵᠦᠳᠡᠢᠴᠢᠭᠡᠭᠡᠳ( ᠳᠦᠩᠭᠢᠳᠡᠬᠦ) ᠨᠢᠭᠡ ᠮᠠᠭᠤ ᠢᠨᠢᠶᠡᠬᠦᠢᠴᠡᠭᠡᠨ ᠰᠢᠦ ᠪᠣᠯᠳᠠᠭ ᠪᠠᠢᠯᠠ᠃ ᠭᠡᠲᠡᠯᠡ ᠣᠳᠣ ᠲᠣᠮᠣ ᠲᠣᠮᠣ ᠲᠤᠤᠭᠠᠷᠤᠨ ᠲᠷᠠᠺᠲ᠋ᠣᠷ ᠠᠰᠠᠬᠤ ᠰᠢᠭ᠋ ᠢᠨᠢᠶᠡᠳᠡᠭ ᠪᠣᠯᠤᠭᠰᠠᠨ᠃ ᠳᠠᠷᠤᠯᠲᠠ ᠮᠢᠨᠢ ᠵᠦᠭᠡᠷ᠂ ᠪᠣᠳᠣᠪᠠᠯ ᠠᠶᠤᠭᠰᠠᠨ ᠠ᠋ᠴᠠ ᠲᠡᠭᠡᠳᠡᠭ ᠪᠠᠢᠭᠰᠠᠨ ᠪᠠᠢᠬᠠ᠃ ᠶᠡᠷᠦ ᠡᠨᠡᠭᠦᠬᠡᠨ ᠳ᠋ᠡᠭᠡᠨ ᠭᠡᠬᠦ ᠳ᠋ᠦ᠍ ᠳᠠᠷᠤᠯᠲᠠᠨ ᠳ᠋ᠤ᠌ ᠨᠣᠬᠠᠢ ᠶ᠋ᠢᠨ ᠬᠣᠰᠢᠭᠤ᠂ ᠬᠠᠷᠠ ᠮᠣᠳᠣᠨ ᠤ᠋ ᠬᠤᠯᠲᠤᠰ᠂ ᠡᠨᠡ ᠲᠡᠷᠡ ᠡᠮ ᠲᠣᠮ ᠠ᠋ᠴᠠ ᠢᠨᠢᠶᠡᠳᠦ ᠢᠯᠡᠭᠦᠦ ᠰᠠᠢᠨ ᠶᠤᠮ ᠪᠢᠯᠡ᠃ ᠲᠡᠭᠡᠭᠡᠳ ᠴᠦ᠍ ᠰᠡᠳᠬᠢᠯ ᠦ᠋ᠨ ᠪᠡᠶᠡ ᠶ᠋ᠢᠨ ᠲᠠᠮᠢᠷ ᠪᠣᠯᠳᠠᠭ ᠶᠤᠮ ᠰᠢᠦ ᠳᠡ᠃
ᠠ ᠳᠠ᠃ ᠳᠥᠷᠪᠡᠨ ᠰᠠᠷᠠ ᠶ᠋ᠢᠨ ᠨᠢᠭᠡᠨ ᠮᠢᠨᠦ ᠲᠥᠷᠥᠭᠰᠡᠨ ᠡᠳᠦᠷ ᠢ᠋ ᠢᠨᠢᠶᠡᠳᠦᠮ ᠦ᠋ᠨ ᠡᠳᠦᠷ ᠪᠣᠯᠭᠠᠭᠠ ᠦᠭᠡᠢ ᠪᠣᠯ ᠠᠯᠢ ᠬᠡᠳᠦᠢᠨ ᠨᠢᠭᠡ ᠬᠦᠴᠦᠲᠡᠢᠬᠡᠨ ᠬᠠᠭᠤᠷᠲᠠᠯᠳᠠᠨ ᠳ᠋ᠤ᠌ ᠲᠣᠭᠳᠣᠢ ᠪᠠᠨ ᠥᠭᠴᠢᠬᠡᠬᠦ ᠪᠠᠢᠭᠰᠠᠨ ᠰᠢᠦ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ: ᠳᠠᠪᠰᠢᠯᠲᠦ
ᠬᠢᠨᠠᠭ᠍ᠴᠢ : ᠲᠤᠭ᠍ᠴᠢ ᠰᠠᠷᠠᠨᠠ
2023᠂7᠂14 ᠤ᠋ ᠡᠳᠦᠷ