ᠪᠣᠭᠣᠳᠠᠭ - ᠪ ᠂ ᠪᠠᠭᠠᠰᠤᠳᠤ Боодог - Б ᠂ Багасод
277ᠪᠣᠭᠣᠳᠠᠭ
( ᠬᠣᠱᠣᠩ ᠥᠭᠦᠯᠡᠯᠭᠡ)
ᠤᠲᠠᠰᠤ ᠳᠤᠤᠭᠠᠷᠪᠠ᠂ ᠲᠣᠯᠣᠭᠠᠢ ᠲᠠᠲᠠᠬᠤ ᠦᠭᠡᠢ ᠠᠵᠢᠯ ᠲᠠᠢ ᠪᠠᠢᠬᠤ ᠳ᠋ᠤ᠌᠂ ᠤᠲᠠᠰᠤ ᠳᠠᠬᠢᠨ ᠳᠠᠬᠢᠨ ᠳᠤᠤᠭᠠᠷᠬᠤ ᠲᠤᠩ ᠶᠠᠷᠰᠢᠭᠲᠠᠢ᠃ ᠠᠪᠬᠤ ᠦᠭᠡᠢ ᠪᠠᠢᠶᠠ ᠭᠡᠲᠡᠯᠡ ᠠᠯᠪᠠ ᠠᠵᠢᠯ ᠡᠰᠡ ᠪᠣᠯᠪᠠᠴᠤ ᠠᠮᠢᠨ ᠬᠤᠪᠢ ᠶ᠋ᠢᠨ ᠴᠢᠬᠤᠯᠠ ᠵᠦᠢᠯ ᠶᠠᠷᠢᠬᠤ ᠭᠡᠵᠦ ᠠᠪᠠᠭᠠᠢ ᠬᠡᠦᠬᠡᠳ ᠨᠢ ᠴᠦ᠍ ᠶᠦᠮ ᠦᠦ ᠠᠬᠠ ᠳᠡᠭᠦᠦ ᠨᠠᠷ ᠨᠢ ᠤᠲᠠᠰᠤᠳᠠᠵᠤ ᠪᠠᠢᠪᠠᠯ ᠶᠠᠭᠠᠬᠢᠬᠤ ᠪᠣᠢ᠂ ᠨᠢᠭᠡ᠂ ᠬᠣᠶᠠᠷ᠂ ᠭᠤᠷᠪᠠ ᠳᠠᠬᠢᠨ ᠤᠲᠠᠰᠤᠳᠠᠬᠤ ᠳ᠋ᠤᠨᠢ ᠠᠪᠬᠤ ᠦᠭᠡᠢ ᠪᠠᠢᠵᠤ ᠳᠡᠪᠴᠢᠭᠰᠡᠨ ᠪᠣᠯᠪᠠᠴᠤ ᠳᠥᠷᠪᠡ ᠲᠠᠪᠤᠳᠠᠬᠢ ᠤᠳᠠᠭᠠ ᠳ᠋ᠤ᠌ ᠪᠦᠷ ᠣᠢᠷᠠ ᠣᠢᠷᠠᠬᠠᠨ ᠤᠲᠠᠰᠤᠳᠠᠬᠤ ᠳ᠋ᠤᠨᠢ ᠸᠠᠩᠲᠠᠨ ᠠᠷᠭᠠ ᠪᠤᠶᠤ ᠤᠲᠠᠰᠤ ᠪᠠᠨ ᠠᠪᠴᠤ ᠴᠢᠩᠨᠠᠪᠠᠯ ᠲᠠᠨᠢᠯ ᠳᠠᠭᠤ᠄
— ᠪᠠᠢᠨᠠ ᠤᠤ? ᠭᠡᠵᠦ ᠶᠡᠬᠡ ᠯᠡ ᠠᠶᠠᠲᠠᠢ ᠥᠩᠭᠡᠲᠡᠢ ᠰᠣᠨᠣᠰᠳᠠᠬᠤ ᠳ᠋ᠤᠨᠢ᠄
— ᠪᠠᠢᠨᠠ ᠭᠡᠵᠦ ᠸᠠᠩᠲᠠᠨ ᠢ᠋ ᠬᠠᠷᠢᠭᠤ ᠳᠤᠤᠭᠠᠷᠪᠠᠯ᠂
— ᠨᠤᠲᠤᠭ ᠤ᠋ᠨ ᠬᠠᠨᠠᠭᠠᠷ ᠠ᠋᠂ ᠶᠠᠭᠤ ᠪᠣᠳᠣᠵᠤ ᠪᠠᠢᠨᠠ᠂ ᠥᠨᠥᠳᠥᠷ ᠲᠠᠪᠤᠳᠠᠬᠢ ᠡᠳᠦᠷ᠃
— ᠶᠠᠭᠤ ᠪᠣᠳᠣᠬᠤ ᠪᠣᠢ᠂ ᠮᠠᠭᠤ ᠡᠪᠦᠭᠡᠨ ᠴᠢᠨᠢ ᠲᠤᠩ ᠴᠤ᠌ ᠵᠠᠪ ᠠᠯᠠᠭᠠ ᠳᠠ᠂ ᠤᠭ ᠨᠢ ᠴᠦ᠍ ᠴᠢᠨᠦ ᠰᠠᠨᠠᠭᠠ ᠶ᠋ᠢ ᠣᠢᠯᠠᠭᠠᠵᠤ ᠯᠠ ᠪᠠᠢᠨᠠ᠂ ᠣᠳᠣ ᠴᠤ᠌ ᠬᠤᠯᠠᠭᠠᠷ ᠰᠢᠷᠠ ᠮᠥᠨ ᠰᠠᠢᠬᠠᠨ ᠪᠣᠯᠤᠭᠰᠠᠨ ᠪᠠᠢᠭᠠ ᠳᠠ᠁
— ᠰᠠᠢᠬᠠᠨ ᠪᠣᠯᠤᠭᠰᠠᠨ ᠢ᠋ ᠨᠢ ᠮᠡᠳᠡᠭᠰᠡᠭᠡᠷ ᠪᠠᠢᠭᠠᠳ ᠴᠢᠮᠠ ᠳ᠋ᠤ᠌ ᠠᠯᠪᠠᠨ ᠳᠤᠰᠤᠯᠭᠠᠨ ᠳ᠋ᠤ᠌ ᠪᠥᠭᠡᠬᠦ ᠵᠢᠷᠦᠬᠡ ᠮᠥᠨ ᠪᠠᠢᠬᠤ ᠶᠤᠮ ᠤᠤ?
— ᠵᠢᠷᠦᠬᠡ ᠭᠠᠷᠭᠠᠬᠤ ᠦᠭᠡᠢ ᠭᠡᠳ ᠶᠠᠭᠠᠬᠢᠬᠤ ᠶᠤᠮ ᠪᠣᠢ᠂ ᠴᠠᠭ ᠬᠤᠭᠤᠴᠠᠭᠠ ᠪᠣᠯᠤᠭᠠ ᠦᠭᠡᠢ᠂ ᠬᠠᠤᠯᠢ ᠳᠦᠷᠢᠮ ᠪᠣᠯ ᠬᠠᠤᠯᠢ ᠳᠦᠷᠢᠮ ᠰᠢᠦ ᠳᠡ!
— ᠵᠠ ᠵᠠ᠂ ᠠᠯᠤᠰᠬᠠᠨ ᠭᠠᠷᠤᠭᠠᠳ ᠲᠠᠭᠤᠴᠢᠬᠠᠬᠤ ᠳ᠋ᠤ᠌ ᠬᠡᠨ ᠮᠡᠳᠡᠳᠡᠭ ᠶᠦ᠍ᠮ ᠪᠣᠢ?
— ᠮᠠᠷᠭᠠᠰᠢ ᠬᠠᠭᠠᠰ ᠠᠵᠢᠯ ᠲᠠᠢ ᠡᠳᠦᠷ᠂ ᠲᠡᠭᠦᠨ ᠢ᠋ ᠶᠠᠭᠠᠬᠢᠵᠤ ᠠᠷᠭᠠᠯᠠᠬᠤ ᠶᠤᠮ ᠪᠣᠢ? ᠳᠠᠷᠤᠭᠠ ᠶ᠋ᠢᠨ ᠳᠠᠪᠠᠭᠠ ᠶ᠋ᠢ ᠪᠢ ᠯᠡ ᠶᠠᠭᠠᠬᠢᠭᠰᠠᠨ ᠴᠤ᠌ ᠠᠷᠭᠠᠯᠠᠬᠤ ᠦᠭᠡᠢ᠂ ᠡᠯᠳᠡᠪ ᠠᠷᠭᠠ ᠰᠠᠮᠪᠠᠭᠠ ᠳᠤᠷᠠᠳᠤᠨ ᠴᠢᠯᠥᠭᠡ ᠠᠪᠤᠭᠰᠠᠭᠠᠷ ᠪᠠᠢᠭᠠᠳ ᠳᠠᠷᠤᠭᠠ ᠶ᠋ᠢᠨ ᠢ᠋ᠶ᠋ᠡᠷ ᠨᠢᠭᠤᠷ ᠢ᠋ ᠪᠢ ᠪᠦᠷ ᠬᠠᠷᠠᠬᠤ ᠡᠷᠬᠡ ᠦᠭᠡᠢ ᠪᠣᠯᠤᠭᠰᠠᠨ ᠬᠥᠮᠦᠨ ᠰᠢᠦ ᠳᠡ᠁
— ᠳᠠᠷᠤᠭᠠ ᠠ᠋ᠴᠠ ᠴᠢᠨᠢ ᠴᠢᠯᠥᠭᠡ ᠠᠪᠬᠤ ᠶ᠋ᠢ ᠪᠢ ᠠᠷᠭᠠᠯᠠᠶᠠ᠃ ᠨᠢᠭᠡ ᠨᠤᠲᠤᠭ ᠤᠰᠤᠨ ᠤ᠋᠂ ᠮᠥᠨ ᠴᠦ᠍ ᠨᠢᠭᠡ ᠰᠤᠷᠭᠠᠭᠤᠯᠢ ᠶ᠋ᠢᠨ᠂ ᠨᠢᠭᠡ ᠲᠣᠭᠣᠭᠠᠨ ᠤ᠋ ᠬᠣᠶᠠᠷ ᠤ᠋ᠨ ᠬᠡᠷᠡᠭ ᠶᠠᠭᠤ ᠪᠢᠯᠡ᠃ ᠲᠡᠭᠡᠭᠡᠳ ᠦᠳᠡ ᠳ᠋ᠦ᠍ ᠬᠣᠢᠰᠢ ᠭᠠᠷᠤᠭᠠᠳ ᠵᠢᠯᠢᠢᠭᠡᠳ ᠥᠭᠬᠦᠶᠡ᠃
— ᠴᠢᠯᠥᠭᠡ ᠭᠠᠷᠭᠠᠬᠤ᠂ ᠵᠢᠯᠢᠢᠭᠡᠳ ᠥᠭᠬᠦ ᠬᠣᠶᠠᠷ ᠴᠤ᠌ ᠶᠠᠭᠠᠬᠢᠬᠤ ᠪᠣᠢ ᠪᠣᠯᠳᠠᠭ ᠯᠠ ᠪᠠᠢᠵᠤ᠂ ᠮᠢᠨᠦ ᠮᠠᠭᠤ < 67 > ᠬᠥᠳᠡᠯᠬᠦ ᠦᠭᠡᠢ ᠪᠣᠯᠤᠭᠰᠠᠭᠠᠷ ᠤᠳᠠᠭᠰᠠᠨ ᠰᠢᠦ ᠳᠡ᠃ ᠲᠡᠭᠡᠭᠡᠬᠦ ᠪᠡᠷ ᠤᠨᠤᠭᠠ ᠶᠠᠭᠠᠬᠢᠬᠤ ᠪᠣᠢ?
— ᠤᠨᠤᠭᠠ ᠤᠤ?
— ᠲᠡᠢᠮᠦ!
— ᠵᠠ ᠪᠠᠰᠠ ᠶᠠᠭᠠᠬᠢᠵᠤ ᠠᠷᠭᠠᠯᠠᠬᠤ ᠨᠢ ᠪᠣᠢ?
— ᠳᠠᠷᠤᠭᠠ ᠶ᠋ᠢᠨ ᠴᠢᠨᠢ ᠣᠷᠣᠯᠠᠭᠴᠢ ᠶ᠋ᠢᠨ ᠬᠣᠶᠠᠷ ᠳᠤᠭᠤᠢᠲᠤ ᠶ᠋ᠢ ᠭᠣᠶᠣᠴᠢᠬᠠᠳᠠᠭ ᠪᠠᠢᠭᠠ᠁
— ᠲᠡᠷᠡ ᠴᠢᠨᠢ ᠰᠠᠶᠢᠬᠠᠨ ᠠᠪᠤᠭᠰᠠᠨ ᠠ᠋᠂ ᠬᠥᠮᠦᠨ ᠳ᠋ᠦ᠍ ᠥᠭᠬᠦ ᠨᠢ ᠪᠠᠢᠲᠤᠭᠠᠢ ᠬᠡᠦᠬᠡᠨ ᠬᠡᠦᠬᠡᠳ ᠢ᠋ᠶ᠋ᠡᠷ ᠭᠠᠷ ᠬᠦᠷᠬᠦ ᠳ᠋ᠦ᠍ᠨᠢ ᠬᠥᠮᠥᠰᠬᠡ ᠵᠠᠩᠭᠢᠳᠳᠠᠭ ᠶᠤᠮ ᠪᠠᠢᠬᠤ ᠴᠢᠨᠢ ᠪᠢᠯᠡ᠃
— ᠲᠡᠷᠡ ᠶᠠᠭᠠᠬᠢᠬᠤ ᠪᠣᠢ᠂ ᠴᠠᠭᠠᠳᠤᠬᠢ ᠴᠢᠨᠢ ᠨᠢᠭᠡ ᠳ᠋ᠦ᠍ ᠬᠤᠯᠠᠭᠠᠷ ᠰᠢᠷᠠ ᠬᠥᠭᠡᠭᠡᠴᠡᠯᠳᠦᠬᠦ ᠳ᠋ᠡᠭᠡᠨ ᠳᠤᠷᠠᠲᠠᠢ᠃ ᠬᠣᠶᠠᠷ ᠲᠤ᠌ ᠭᠡᠪᠡᠯ ᠪᠢ ᠭᠤᠶᠤᠵᠤ ᠪᠠᠢᠭᠠ᠂ ᠭᠤᠷᠪᠠ ᠳ᠋ᠤ᠌ ᠭᠡᠪᠡᠯ ᠴᠢᠮᠠ ᠶ᠋ᠢ ᠪᠠᠷᠢᠬᠤ ᠶᠤᠮ ᠭᠡᠬᠦ ᠳ᠋ᠦ᠍《 ᠶᠠᠸᠠ》( ᠽᠸᠬᠤ᠋ ᠶ᠋ᠢᠨ ᠮᠠᠰᠢᠨ) ᠪᠠᠢᠲᠤᠭᠠᠢ《 ᠮᠧᠷᠰᠸᠤᠸᠸᠰ》( ᠪᠸᠨ ᡂᠢ) ᠪᠠᠢᠭᠰᠠᠨ ᠴᠤ᠌ ᠥᠭᠬᠦᠨᠠ ᠰᠢᠦ ᠳᠡ᠃ ᠸᠠᠩᠲᠠᠨ ᠢᠨᠢᠶᠡᠮᠰᠦᠭᠯᠡᠭᠡᠳ᠄
— ᠴᠢ ᠨᠡᠭᠡᠷᠡᠨ ᠬᠠᠴᠢᠨ ᠮᠠᠭᠤ ᠵᠠᠯᠢ ᠲᠠᠢ ᠨᠣᠪᠰᠢ ᠳᠠ ᠭᠡᠲᠡᠯᠡ᠂
— ᠶᠠᠭᠠᠬᠢᠵᠤ ᠪᠠᠢᠨᠠ ᠭᠡᠵᠦ ᠴᠠᠭᠠᠳᠤ ᠶᠠᠷᠢᠭᠴᠢ ᠨᠢ ᠬᠠᠷᠢᠭᠤ ᠠᠰᠠᠭᠤᠬᠤ ᠳ᠋ᠤ᠌᠃
— ᠶᠠᠭᠠᠬᠢᠬᠤ ᠪᠣᠢ ᠳᠠ᠂ ᠴᠢ ᠶᠡᠷᠦ ᠨᠢ ᠠᠶᠠᠭᠦᠢ ᠪᠣᠯ ᠦᠬᠦᠯ ᠢ᠋ ᠴᠦ᠍ ᠠᠷᠭᠠᠯᠠᠬᠤ ᠳ᠋ᠠᠭ ᠰᠢᠦ᠂
— ᠬᠡᠷᠡᠭᠲᠡᠢ ᠪᠣᠯ ᠦᠬᠦᠯ ᠢ᠋ ᠡᠰᠡ ᠪᠣᠯᠪᠠᠴᠤ ᠬᠡᠦᠬᠡᠨ ᠦ᠌ ᠵᠢᠷᠦᠬᠡ ᠶ᠋ᠢ ᠨᠢᠭᠡ ᠤᠳᠠᠭᠠ ᠬᠤᠯᠠᠭᠠᠢᠯᠠᠵᠤ ᠳᠥᠩᠭᠡᠨᠡ᠃
— ᠮᠠᠭᠠᠳ ᠦᠭᠡᠢ᠁
— ᠨᠡᠭᠡᠷᠡᠨ ᠰᠢᠦ᠂ ᠵᠠ ᠢᠩᠭᠢᠭᠡᠳ ᠪᠢ ᠳᠠᠷᠤᠭᠠ ᠨᠠᠷ ᠲᠠᠢ ᠴᠢᠨᠢ ᠶᠠᠷᠢᠬᠤ ᠤᠤ?
— ᠵᠠ ᠪᠠᠢᠵᠠ᠂ ᠠ ᠲᠡᠢᠮᠦ᠂ ᠫᠤᠤ ᠪᠠᠢᠬᠤ ᠦᠭᠡᠢ ᠶᠠᠭᠠᠬᠢᠬᠤ ᠪᠢᠯᠡ?
— ᠲᠡᠷᠡ ᠠᠮᠠᠷᠬᠠᠨ᠂ ᠲᠠᠨ ᠤ᠋ ᠨᠥᠭᠥᠭᠡᠳᠡᠬᠢ ᠬᠡᠯᠲᠡᠰ ᠦ᠋ᠨ ᠳᠠᠷᠤᠭᠠ ᠬᠡᠨ ᠪᠢᠯᠡ?
— ᠳᠣᠩᠷᠣᠪ ᠤᠤ?
— ᠪᠢᠰᠢ ᠠ᠋!
— ᠨᠠᠸᠠᠩ ᠤᠤ?
— ᠠ ᠲᠡᠢᠮᠦ᠂ ᠰᠢᠷᠠ ᠨᠠᠸᠠᠩ ᠤ᠋ᠨ ᠫᠤᠤ ᠶ᠋ᠢ ᠠᠪᠤᠨᠠ᠃
— ᠲᠡᠷᠡ ᠴᠦ᠍ ᠶᠡᠬᠡ ᠬᠠᠷᠠᠮᠴᠢ ᠰᠢᠦ ᠳᠡ᠂ ᠦᠭᠡᠢ ᠬᠠᠷᠠᠮᠴᠢ ᠭᠡᠵᠦ ᠮᠡᠳᠡᠭᠡᠵᠢ ᠶ᠋ᠢᠨ ᠬᠡᠷᠡᠭ᠃ ᠫᠤᠤ ᠮᠡᠲᠦ ᠣᠰᠣᠯ ᠲᠠᠢ ᠵᠡᠪᠰᠡᠭ ᠢ᠋ ᠬᠡᠨ ᠮᠠᠨᠢ ᠶᠠᠭᠤ ᠭᠡᠵᠦ ᠪᠣᠳᠣᠵᠤ ᠬᠥᠮᠦᠨ ᠳ᠋ᠦ᠍ ᠥᠭᠬᠦ ᠶᠦᠮ ᠪᠣᠢ? ᠭᠠᠢ ᠭᠡᠳᠡᠭ ᠭᠠᠢ ᠰᠢᠦ ᠳᠡ᠃
— ᠨᠠᠸᠠᠩ ᠢ᠋ ᠪᠢ ᠠᠷᠭᠠᠯᠠᠨᠠ ᠴᠢ ᠪᠢᠲᠡᠭᠡᠢ ᠵᠣᠪᠠ!
— ᠨᠠᠸᠠᠩ ᠥᠴᠥᠭᠡᠳᠦᠷᠬᠡᠨ ᠪᠠᠢᠬᠠ ᠂ ᠰᠤᠮᠤ ᠦᠭᠡᠢ ᠭᠡᠳ ᠶᠠᠪᠤᠭᠰᠠᠨ ᠰᠢᠦ ᠳᠡ᠃
— ᠰᠤᠮᠤ ᠶᠠᠭᠠᠬᠢᠬᠤ ᠪᠣᠢ᠂ ᠲᠠᠨ ᠤ᠋ ᠳᠠᠷᠤᠭᠠ ᠶ᠋ᠢᠨ ᠨᠠᠷᠢᠨ ᠪᠢᠴᠢᠭ ᠦ᠋ᠨ ᠳᠠᠷᠤᠭᠠ ᠭᠡᠵᠦ ᠬᠤᠯᠠᠭᠠᠷ ᠰᠢᠷᠠ ᠭᠡᠬᠦ ᠪᠡᠷ ᠯᠠ ᠠᠷᠠᠭᠠᠨ ᠤ᠋ ᠰᠢᠭᠦᠰᠦ ᠠᠷᠠᠭᠠᠨ ᠳ᠋ᠠᠭᠠᠨ ᠠᠰᠬᠠᠷᠠᠵᠤ ᠪᠠᠢᠳᠠᠭ ᠨᠢᠭᠡ ᠬᠦᠮᠦᠨ ᠪᠤᠢ ᠰᠢᠦ ᠳᠠ᠃ ᠲᠡᠷᠡ ᠴᠢᠨᠢ ᠫᠣᠣᠳᠠᠵᠤ ᠴᠢᠳᠠᠳᠠᠭ ᠦᠭᠡᠢ ᠪᠣᠯᠪᠠᠴᠤ ᠰᠤᠮᠤ ᠬᠥᠮᠦᠨ ᠳ᠋ᠦ᠍ ᠦᠭᠭᠦᠭᠡᠳ ᠵᠢᠯ ᠳ᠋ᠦ᠍ ᠬᠤᠯᠠᠭᠠᠷ ᠰᠢᠷᠠ ᠶ᠋ᠢᠨ ᠬᠡᠰᠢᠭ ᠲᠠᠰᠤᠷᠠᠳᠠᠭ ᠦᠭᠡᠢ ᠬᠥᠮᠦᠨ ᠰᠢᠦ ᠳᠡ ᠃
— ᠦᠭᠡᠢ ᠴᠢ ᠮᠠᠨ ᠤ᠋ ᠬᠢᠨ ᠦ᠌ ᠬᠡᠨ ᠳ᠋ᠦ᠍ ᠶᠠᠭᠤ ᠪᠠᠢᠳᠠᠭ ᠢ᠋ ᠮᠥᠨ ᠰᠠᠢᠨ ᠮᠡᠳᠡᠵᠦ ᠪᠠᠢᠨᠠ ᠃ ᠠᠶᠠᠭᠦᠢ ᠪᠣᠯ ᠬᠡᠨ ᠦ᠌ ᠬᠡᠲᠡᠪᠴᠢᠨ ᠳ᠋ᠦ᠍ ᠬᠡᠳᠦᠨ ᠶᠠᠭᠤᠮᠠ ᠪᠠᠢᠭᠠ ᠶ᠋ᠢ ᠴᠦ᠍ ᠮᠡᠳᠡᠬᠦ ᠨᠢ ᠪᠠᠢᠨᠠ ᠰᠢᠦ ᠃
— ᠪᠠᠷᠳᠠᠮᠨᠠᠬᠤ ᠨᠢ ᠴᠦ᠍ ᠪᠢᠰᠢ ᠂ ᠮᠡᠳᠡᠨᠡ ᠳᠠ ᠮᠡᠳᠡᠨᠡ ᠃ ᠴᠢ ᠨᠠᠮᠠ ᠶ᠋ᠢ ᠪᠧᠨ᠋ᠽᠢᠨ ( ᠴᠢᠶᠣᠤ ) ᠶᠠᠭᠠᠬᠢᠵᠤ ᠠᠷᠭᠠᠯᠠᠨᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠂ ᠲᠠᠨ ᠤ᠋ ᠠᠵᠤ ᠠᠬᠤᠢ ᠶ᠋ᠢᠨ ᠬᠥᠮᠦᠨ ᠡᠴᠡ ᠠᠷᠭᠠᠯᠠᠨᠠ ᠰᠢᠦ ᠳᠡ ᠃
— ᠦᠭᠡᠢ ᠡᠨᠡ ᠴᠢᠨᠢ ᠶᠠᠭᠤ ᠪᠣᠯᠵᠤ ᠪᠠᠢᠨᠠ ᠂ ᠨᠢᠭᠡ ᠮᠡᠳᠡᠬᠦᠶᠡ ᠮᠠᠨ ᠤ᠋ ᠬᠢᠨ ᠴᠢᠨᠢ ᠤᠯᠤᠰ ᠤ᠋ᠨ ᠠᠯᠪᠠᠨ ᠪᠠᠢᠭᠤᠯᠭᠠ ᠪᠠᠰᠢ ᠴᠢᠨᠦ ᠬᠦᠰᠡᠭᠰᠡᠨ ᠪᠦᠬᠦᠨ ᠢ᠋ ᠨᠡᠢᠯᠡᠭᠦᠯᠳᠡᠭ ᠭᠠᠵᠠᠷ ᠪᠣᠯᠴᠢᠬᠠᠵᠤ ᠪᠠᠢᠨᠠ ᠤᠤ ?
— ᠠᠷᠭᠠ ᠶ᠋ᠢ ᠨᠢ ᠣᠯᠪᠠᠯ ᠡᠨᠡ ᠪᠠᠢᠲᠤᠭᠠᠢ ᠶᠠᠭᠤᠮᠠ ᠶ᠋ᠢ ᠠᠷᠭᠠᠯᠠᠵᠤ ᠪᠣᠯᠳᠠᠭ ᠶᠤᠮ ᠂ ᠬᠠᠮᠫᠠᠨ ① ᠴᠢᠨᠢ ᠬᠡᠷᠡᠭᠲᠡᠢ ᠴᠠᠭ ᠲᠤ᠌ ᠡᠭᠦᠨ ᠡᠴᠡ ᠴᠠᠭᠠᠳᠤᠬᠢ ᠶ᠋ᠢ ᠠᠷᠭᠠᠯᠠᠨᠠ ᠃ ᠴᠢ ᠡᠭᠦᠨ ᠳ᠋ᠦ᠍ ᠭᠠᠢᠬᠠᠬᠤ ᠨᠢ ᠶᠠᠭᠤ ᠪᠣᠢ ᠃ ᠵᠦᠭᠡᠷ ᠯᠡ ᠶᠠᠪᠤᠬᠤ ᠳ᠋ᠤ᠌ ᠪᠡᠯᠡᠳᠬᠡᠵᠦ ᠪᠠᠢ ᠃ ᠪᠦᠬᠦ ᠶᠠᠭᠤᠮᠠ ᠪᠡᠯᠡᠨ ᠪᠣᠯᠬᠤ ᠪᠠᠷ ᠬᠣᠶᠠᠷ ᠴᠠᠭ ᠲᠤ᠌ ᠪᠢ ᠴᠢᠮᠠ ᠤᠷᠤᠭᠤ ᠤᠲᠠᠰᠤᠳᠠᠨᠠ ᠂ ᠭᠤᠷᠪᠠᠨ ᠴᠠᠭ ᠲᠤ᠌ ᠭᠠᠷᠤᠨᠠ ᠂ ᠵᠠ ᠢᠩᠭᠢᠵᠦ ᠲᠣᠬᠢᠷᠠᠬᠤ ᠤᠤ ?
— ᠵᠠ ᠪᠠᠢᠵᠠ ᠪᠠᠢᠵᠠ ᠂ ᠪᠦᠬᠦ ᠶᠠᠭᠤᠮᠠ ᠪᠦᠷᠢᠳᠦᠭᠡᠳ ᠶᠠᠪᠤᠯᠠ ᠭᠡᠵᠦ ᠪᠣᠳᠣᠶᠠ ᠂ ᠢᠩᠭᠢᠭᠡᠳ ᠶᠠᠪᠤᠬᠤ ᠳ᠋ᠤ᠌ ᠴᠢᠨᠦ ᠣᠷᠣᠭᠤᠯᠬᠤ ᠬᠤᠪᠢ ᠶᠠᠭᠤ ᠪᠠᠢᠨᠠ ᠃ ᠴᠢ ᠶᠠᠭᠠᠬᠢᠬᠤ ᠳ᠋ᠠᠭᠠᠨ 《 ᠶᠠᠸᠠ 》 ᠪᠠᠷᠢᠬᠤ ᠦᠭᠡᠢ ᠂ ᠫᠤᠤ ᠫᠤᠤᠳᠠᠵᠤ ᠴᠢᠳᠠᠬᠤ ᠦᠭᠡᠢ ᠂ ᠬᠤᠯᠠᠭᠠᠢ ᠰᠢᠷᠠ ᠶ᠋ᠢ ᠪᠣᠭᠣᠵᠤ ᠴᠢᠳᠠᠬᠤ ᠦᠭᠡᠢ ᠂ ᠨᠠᠢᠵᠠ ᠨᠢ ᠬᠠᠮᠤᠭ ᠠᠵᠢᠯ ᠢᠶᠠᠨ ᠠᠯᠳᠠᠭᠠᠳ ᠭᠠᠭᠴᠠ ᠡᠳᠦᠷ ᠭᠡᠷ ᠣᠷᠣᠨ ᠤ ᠬᠢᠨ ᠲᠠᠢ ᠪᠠᠨ ᠠᠶᠠᠲᠠᠢ ᠠᠮᠠᠷᠠᠭᠰᠠᠨ ᠴᠤ᠌ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ᠂ ᠭᠡᠴᠡᠭᠦᠳᠡᠬᠦ ᠶᠤᠮ ᠪᠢᠰᠢ ᠤᠤ?
— ᠪᠢ ᠴᠢᠮᠠ ᠶ᠋ᠢ ᠭᠣᠮᠣᠳᠠᠭᠠᠬᠤ ᠦᠭᠡᠢ ᠂ ᠨᠠᠢᠵᠠ ᠨᠢ ᠢᠩᠭᠢᠭᠡᠳ ᠶᠠᠪᠤᠬᠤ ᠳ᠋ᠤ᠌ ᠢᠳᠡᠬᠦ ᠡᠴᠡ ᠥᠭᠡᠷᠡ ᠡᠭᠦᠷᠭᠡ ᠦᠭᠡᠢ ᠶᠠᠭᠤᠮᠠ ᠪᠢᠰᠢ ᠪᠠᠢᠭᠠ ᠪᠣᠯᠪᠠᠴᠤ ᠡᠨᠡ ᠪᠦᠬᠦ ᠠᠵᠢᠯ ᠢ᠋ ᠠᠮᠵᠢᠭᠠᠵᠤ ᠶᠠᠪᠤᠬᠤ ᠪᠣᠯᠤᠯᠴᠠᠭᠠ ᠨᠥᠬᠥᠴᠡᠯ ᠪᠦᠷᠢᠳᠦᠭᠦᠯᠵᠦ ᠪᠠᠢᠭᠠ ᠶ᠋ᠢ ᠴᠢ ᠪᠣᠳᠣ ᠯᠠ ᠳᠠ ᠂ ᠨᠥᠬᠥᠷ ᠦ᠋ᠨ ᠲᠤᠰᠠ ᠶ᠋ᠢ ᠪᠣᠳᠣᠭᠠᠳ ᠴᠢ ᠮᠢᠨᠦ ᠴᠣᠷ ᠤ᠋ᠨ ᠭᠠᠭᠴᠠ ᠭᠤᠶᠤᠯᠲᠠ ᠶ᠋ᠢ ᠨᠢᠭᠡ ᠤᠳᠠᠭᠠ ᠭᠦᠢᠴᠡᠭᠡᠵᠦ ᠦᠵᠡ ᠯᠡ ᠳᠡ ᠃
— ᠶᠠᠳᠠᠬᠤ ᠳ᠋ᠠᠭᠠᠨ ᠴᠠᠭ ᠬᠤᠭᠤᠴᠠᠭᠠ ᠨᠢ ᠪᠣᠯᠤᠭᠠ ᠦᠭᠡᠢ ᠪᠠᠢᠳᠠᠭ᠁
— ᠲᠡᠷᠡ ᠶᠠᠭᠠᠬᠢᠬᠤ ᠪᠣᠢ ᠃ ᠢᠩᠭᠢᠵᠦ ᠶᠠᠪᠤᠭᠠ ᠨᠢ ᠶᠠᠮᠠᠷ ᠶᠡᠷᠦ ᠳ᠋ᠡᠭᠡᠨ ᠪᠢᠳᠡ ᠬᠣᠶᠠᠷᠬᠠᠨ ᠤᠤ ? ᠲᠡᠭᠡᠵᠦ ᠴᠦ᠍ ᠶᠠᠷᠢᠬᠤ ᠦᠭᠡᠢ ᠰᠢᠦ ᠃ ᠡᠨᠡ ᠬᠣᠲᠠ ᠶ᠋ᠢᠨ ᠴᠢᠨᠢ ᠪᠦᠬᠦ ᠬᠣᠶᠠᠷ ᠭᠤᠷᠪᠠᠨ ᠳᠤᠭᠤᠢᠳᠠᠨ ᠂ ᠬᠤᠪᠢ ᠶ᠋ᠢᠨ ᠮᠠᠰᠢᠨᠳᠠᠨ ᠨᠤᠭᠤᠳ ᠤ᠋ᠨ ᠶᠡᠬᠡᠩᠬᠢ ᠨᠢ ᠡᠰᠡ ᠪᠣᠯᠪᠠᠴᠤ ᠳᠠᠩ ᠬᠠᠭᠠᠰ ᠨᠢ ᠪᠠᠷᠤᠭ ᠢᠩᠭᠢᠳᠡᠭ ᠭᠡᠬᠦ ᠳ᠋ᠦ᠍ ᠳᠡᠭᠡᠰᠳᠡᠬᠦ ( ᠬᠢᠷᠢ ᠡᠴᠡ ᠬᠡᠲᠦᠷᠡᠭᠦ ) ᠦᠭᠡᠢ ᠪᠠᠢᠬᠠ ᠰᠢᠦ᠃
— ᠵᠠ ᠡᠨᠡ ᠡᠢᠮᠦ ᠪᠠᠢᠵᠤ ᠂ ᠭᠠᠢ ᠪᠣᠯᠤᠭᠠᠳ ᠢᠩᠭᠢᠵᠦ ᠶᠠᠪᠤᠲᠠᠯᠠ ᠬᠢᠨᠠᠯᠲᠠ ᠰᠢᠯᠭᠠᠯᠲᠠ ᠶ᠋ᠢᠨ ᠤᠯᠤᠰ ᠲᠠᠭᠠᠷᠠᠯᠳᠤᠵᠤ ᠣᠷᠬᠢᠪᠠᠯ ᠶᠠᠭᠠᠬᠢᠬᠤ ᠪᠣᠢ ?
— ᠲᠡᠢᠮᠦ ᠂ ᠵᠠᠶᠠᠭᠠ ᠨᠢ ᠵᠠᠪᠠᠭ ᠲᠤ ᠣᠷᠣᠭᠰᠠᠨ ᠶᠠᠭᠤᠮᠠ ᠠᠷᠠᠢ ᠴᠤ᠌ ᠪᠣᠯᠬᠤ ᠦᠭᠡᠢ ᠪᠣᠢ ᠃ ᠪᠣᠯᠤᠯᠠ ᠴᠤ᠌ ᠭᠡᠰᠡᠨ ᠲᠡᠷᠡ ᠵᠡᠷᠭᠡ ᠶ᠋ᠢᠨ ᠶᠠᠭᠤᠮᠠ ᠶ᠋ᠢ ᠠᠷᠭᠠᠯᠠᠬᠤ ᠤᠬᠠᠭᠠᠨ ᠬᠠᠨᠠᠭᠠᠷ ᠨᠢ ᠣᠯᠬᠤ ᠪᠣᠢ ᠃ ᠵᠠ ᠢᠩᠭᠢᠭᠡᠳ ᠴᠢ ᠵᠦᠭᠡᠷ ᠯᠡ ᠶᠠᠪᠤᠨᠠ ᠭᠡᠵᠦ ᠪᠣᠳᠣᠭᠠᠳ ᠨᠠᠭᠠᠳᠤ ᠠᠵᠢᠯ ᠢ᠋ᠶ᠋ᠠᠨ ᠪᠤᠰᠢᠭᠤᠬᠠᠨ ᠨᠢᠭᠡ ᠳᠠᠢᠰᠢ ᠨᠢ ᠪᠣᠯᠭᠠᠬᠤ ᠶ᠋ᠢ ᠪᠣᠳᠣ! ᠪᠢ ᠪᠦᠬᠦ ᠶᠠᠭᠤᠮᠠ ᠶ᠋ᠢ ᠪᠦᠷᠢᠳᠦᠭᠦᠯᠦᠭᠡᠳ ᠭᠤᠷᠪᠠᠨ ᠴᠠᠭ ᠲᠤ᠌ ᠶᠡᠷᠦ ᠳ᠋ᠡᠭᠡᠨ ᠯᠡ ᠶᠠᠪᠤᠬᠤ ᠳ᠋ᠤ᠌ ᠪᠡᠯᠡᠨ ᠭᠡᠳᠡᠭ ᠢ ᠤᠲᠠᠰᠤᠳᠠᠵᠤ ᠬᠡᠯᠡᠶᠡ ᠃ ᠶᠠᠩ ᠢᠩᠭᠢᠵᠦ ᠲᠣᠬᠢᠷᠠᠬᠤ ᠤᠤ ?
— ᠬᠠᠷᠢᠨ ᠠ᠋ ᠃ ᠬᠡᠴᠡᠭᠦᠦ ᠯᠡ ᠪᠠᠢᠨᠠ ᠃ ᠲᠤᠩ ᠬᠡᠴᠡᠭᠦᠦ ᠪᠠᠢᠨᠠ ᠃ ᠲᠠᠢᠯᠤᠨ ᠲᠣᠭᠠᠴᠠᠭᠠ ᠳᠠᠭᠤᠰᠬᠠᠬᠤ ᠂ ᠴᠢᠬᠤᠯᠠ ᠮᠡᠳᠡᠭᠡ ᠭᠠᠷᠭᠠᠬᠤ ᠂ ᠠᠵᠢᠯᠴᠢᠳ ᠤ᠋ᠨ ᠴᠠᠯᠢᠩ ᠣᠯᠭᠣᠬᠤ ᠳ᠋ᠤ᠌ ᠪᠡᠯᠡᠳᠬᠡᠬᠦ ᠂ ᠭᠡᠲᠡᠯᠡ ᠁
— ᠵᠠ ᠵᠠ ᠭᠠᠭᠴᠠ ᠤᠳᠠᠭᠠ ᠶ᠋ᠢᠨ ᠶᠠᠭᠤᠮᠠᠨ ᠳ᠋ᠤ᠌ ᠪᠢᠲᠡᠭᠡᠢ ᠨᠢᠭᠡ ᠶᠡᠬᠡ ᠲᠤᠨᠢᠷᠬᠠᠭᠠᠳ ᠪᠠᠢᠭᠠ ᠭᠡᠳ ᠴᠠᠭᠠᠳᠤ ᠶᠠᠷᠢᠭᠴᠢ ᠨᠢ ᠤᠲᠠᠰᠤ ᠪᠠᠨ ᠲᠠᠰᠤᠯᠵᠠᠢ᠃
— — — —
① ᠲᠣᠲᠣᠨᠤ ᠨᠠᠢᠵᠠ ᠨᠣᠭᠣᠳКОМПОНИ ᠭᠡᠰᠡᠨ ᠣᠷᠣᠰ ᠬᠡᠯᠡᠡᠴᠡ ᠭᠠᠷᠤᠯ ᠲᠠᠢ ᠦᠭᠡ
ᠸᠠᠩᠳᠠᠨ ᠤᠲᠠᠰᠤ ᠪᠠᠨ ᠳᠠᠯᠪᠢᠭᠠᠳ ᠨᠠᠭᠠᠨᠠ ᠴᠠᠭᠠᠨᠠ ᠨᠢ ᠡᠯᠳᠡᠪ ᠶᠠᠭᠤᠮᠠ ᠪᠣᠳᠣᠭᠰᠠᠨ ᠦᠭᠡᠢ ᠠᠵᠢᠯ ᠢᠶᠠᠨ ᠦᠷᠭᠦᠯᠵᠢᠯᠡᠭᠦᠯᠪᠡ᠃
ᠡᠢᠨ ᠬᠦ᠌ ᠰᠠᠭᠤᠭᠰᠠᠭᠠᠷ ᠸᠠᠩᠲᠠᠨ ᠡᠳᠦᠷ ᠦ᠋ᠨ ᠢ᠋ᠶ᠋ᠡᠨ ᠠᠮᠠᠷᠠᠯᠲᠠ ᠪᠠᠷ ᠬᠠᠷᠢᠵᠤ ᠤᠮᠳᠠᠭᠠ ᠤᠤᠭᠤᠬᠤ ᠪᠠᠨ ᠴᠤ᠌ ᠮᠠᠷᠲᠠᠵᠠᠢ ᠃ ᠨᠢᠭᠡ ᠮᠡᠳᠡᠭᠰᠡᠨ ᠴᠢᠨᠢ ᠤᠲᠠᠰᠤ ᠳᠤᠤᠭᠠᠷᠪᠠ ᠂ ᠬᠠᠷᠢᠯᠴᠠᠭᠤᠷ ᠢ᠋ ᠠᠪᠤᠭᠰᠠᠨ ᠦᠭᠡᠢ ᠂ ᠬᠣᠶᠠᠷ ᠭᠤᠷᠪᠠ ᠳᠥᠷᠪᠡᠳᠡᠬᠢ ᠤᠳᠠᠭᠠ ᠳᠤᠤᠭᠠᠷᠤᠭᠰᠠᠨ ᠳ᠋ᠤ᠌ ᠴᠤ᠌ ᠠᠪᠤᠭᠰᠠᠨ ᠦᠭᠡᠢ ᠃ ᠲᠣᠭᠠᠯᠠᠭᠰᠠᠭᠠᠷ ᠳᠣᠯᠣᠭᠠᠲᠠᠬᠢ ᠤᠳᠠᠭᠠ ᠳᠤᠤᠭᠠᠷᠬᠤ ᠪᠠᠷ ᠠᠪᠤᠭᠰᠠᠨ ᠳ᠋ᠤ᠌ ᠥᠨᠥ ᠭᠠᠢᠬᠠᠯ ᠡᠢ ᠄
— ᠭᠦᠶᠢ ᠂ ᠴᠢ ᠶᠠᠭᠠᠬᠢᠴᠢᠬᠠᠬᠤ ᠨᠢ ᠡᠨᠡ ᠪᠣᠢ ? ᠠᠯᠢᠪ ᠬᠥᠳᠡᠯᠦᠶᠡ ᠃ ᠪᠦᠬᠦ ᠶᠠᠭᠤᠮᠠ ᠪᠡᠯᠡᠨ ᠂ ᠲᠡᠳᠡᠨ ᠦ᠌ ᠬᠢ ᠪᠡᠷ ᠣᠷᠣᠭᠠᠳ 《 ᠶᠠᠸᠠ 》 ᠶ᠋ᠢ ᠨᠢ ᠤᠨᠤᠭᠠᠳ ᠂ ᠲᠡᠳᠡᠨ ᠦ᠌ ᠳ᠋ᠦ᠍ ᠣᠴᠢᠵᠤ ᠫᠤᠤ ᠶ᠋ᠢ ᠨᠢ ᠠᠪᠤᠭᠠᠳ ᠂ ᠲᠡᠭᠡᠭᠡᠳ ᠲᠡᠳᠡᠨ ᠦ᠌ ᠳ᠋ᠦ᠍ ᠣᠴᠢᠭᠠᠳ ᠲᠡᠷᠡ ᠲᠡᠷᠡ ᠶᠠᠭᠤᠮᠠ ᠶ᠋ᠢ ᠠᠪᠤᠭᠠᠳ ᠂ ᠮᠠᠨ ᠦ᠌ ᠳ᠋ᠦ᠍ ᠬᠦᠷᠦᠭᠡᠳ ᠢᠷᠡ! ᠶᠠᠭ ᠭᠤᠷᠪᠠᠨ ᠴᠠᠭ ᠲᠤ ᠭᠡᠵᠡᠢ᠃
— ᠪᠠᠯᠪᠠᠷ ᠮᠢᠨᠢ ᠡ᠂ ᠮᠢᠨᠦ ᠠᠵᠢᠯ ᠨᠢᠭᠡ ᠯᠠ ᠪᠢᠰᠢ ᠳᠠ᠂ ᠮᠠᠷᠭᠠᠰᠢ ᠪᠣᠯᠪᠠᠯ ᠶᠠᠭᠠᠬᠢᠭ᠍ᠰᠠᠨ ᠪᠤᠢ ?
— ᠮᠠᠷᠭᠠᠰᠢ ᠪᠣᠯᠴᠢᠬᠠᠪᠠᠯ ᠪᠢᠳᠠ ᠬᠣᠶᠠᠷ ᠲᠤ ᠬᠡᠨ ᠴᠤ᠌ ᠶᠠᠭᠤ ᠪᠠᠨ ᠴᠤ᠌ ᠥᠭᠬᠦ ᠦᠭᠡᠢ ᠰᠢᠦ ᠳᠠ ᠃
— ᠪᠢ ᠶᠠᠳᠠᠬᠤ ᠳ᠋ᠠᠭᠠᠨ ᠭᠡᠷ ᠣᠷᠣᠨ ᠢᠶᠠᠷ ᠢᠶᠠᠨ ᠤᠷᠤᠮᠠᠷ ᠁
— ᠵᠠ ᠵᠠ ᠪᠢ ᠡᠨᠳᠡ ᠡᠴᠡ ᠬᠡᠦᠬᠡᠳ ᠭᠦᠶᠦᠯᠭᠡᠭᠡᠳ ᠬᠡᠯᠡᠭᠦᠯᠴᠢᠭᠡᠶᠡ᠃
— ᠡᠩ ᠤᠨ ᠬᠣᠭᠣᠴᠠᠭᠠ ᠪᠣᠯᠣᠭᠠ ᠦᠭᠡᠢ᠂ ᠬᠣᠯᠠᠭᠠᠷ ᠰᠢᠷᠠ ᠶ᠋ᠢᠨ ᠦᠰᠦ ᠨᠣᠣᠰᠣ᠌ ᠴᠤ᠌ ᠬᠦᠢᠴᠡᠭᠡ ᠦᠭᠡᠢ᠃ ᠬᠦᠢᠴᠡᠭᠰᠡᠨ ᠴᠤ᠌ ᠪᠠᠢᠯᠠ ᠭᠡᠰᠡᠨ ᠬᠠᠦᠯᠢ ᠳᠦᠷᠢᠮ ᠪᠠᠢᠬᠤ ᠳ᠋ᠦ᠍ ᠁
— ᠵᠠ ᠶᠠᠷᠰᠢᠭ᠋ ᠂ ᠪᠢ ᠠᠷᠪᠠᠭᠠᠳ ᠬᠤᠨᠤᠭ ᠤᠨ ᠡᠮᠦᠨᠡ ᠥᠨᠥᠬᠢ ᠬᠡᠨ ᠢ ᠭᠣᠶᠣᠵᠤ ᠠᠪᠴᠤ ᠶᠠᠪᠤᠭᠠᠳ ᠭᠤᠷᠪᠠ ᠶ᠋ᠢ ᠪᠣᠭᠣᠭᠠᠳ ᠢᠷᠡᠬᠦ ᠳ᠋ᠦ᠍ ᠰᠠᠢᠬᠠᠨ ᠯᠠ ᠪᠣᠯᠴᠢᠬᠠᠭᠰᠠᠨ ᠪᠠᠢᠭ᠍ᠰᠠᠨ ᠰᠢᠦ ᠳᠠ᠂ ᠬᠠᠷᠢᠨ ᠲᠡᠭᠡᠬᠦ ᠳ᠋ᠦ᠍ ᠪᠢ ᠴᠢᠮᠠ ᠳ᠋ᠦ᠍ ᠶᠠᠭᠤᠮᠠ ᠠᠮᠰᠠᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ᠂ ᠴᠢ ᠲᠡᠭᠦᠨ ᠳ᠋ᠦ᠍ ᠭᠤᠮᠤᠳᠠᠭᠠᠳ ᠪᠠᠢᠭᠠ ᠶᠤᠮ ᠤᠤ ᠳᠠ?
— ᠵᠠ ᠵᠠ ᠡᠯᠳᠡᠪ ᠶᠠᠭᠤᠮᠠ ᠪᠢᠲᠡᠭᠡᠢ ᠳᠣᠩᠭᠣᠰ᠂ ᠴᠢᠨᠦ ᠬᠡᠯᠡᠭᠰᠡᠨ ᠢᠶᠡᠷ ᠪᠣᠯᠣᠶᠠ ᠳᠠ ᠭᠡᠳ ᠸᠠᠩᠳᠠᠨ ᠬᠠᠷᠢᠯᠴᠠᠭᠤᠷ ᠢᠶᠡᠨ ᠲᠠᠯᠪᠢᠵᠠᠢ᠃
ᠸᠠᠩᠳᠠᠨ ᠪᠠᠯᠪᠠᠷ ᠬᠣᠶᠠᠷ ᠲᠣᠪᠯᠠᠭᠰᠠᠨ ᠴᠠᠭ ᠲᠠᠭᠠᠨ ᠶᠠᠪᠤᠵᠠᠢ᠃ ᠲᠡᠷᠡ ᠡᠳᠦᠷ ᠲᠡᠭᠡᠨ ᠬᠦᠷᠬᠦ ᠭᠠᠵᠠᠷ ᠢᠶᠡᠨ ᠬᠦᠷᠴᠡᠢ᠃ ᠮᠠᠷᠭᠠᠰᠢ ᠥᠷᠯᠦᠭᠡᠭᠦᠷ ᠳᠠᠷᠪᠠᠭᠠ ᠭᠠᠷᠬᠤ ᠦᠶᠡ ᠪᠡᠷ ᠡᠬᠢᠯᠡᠭᠡᠳ ᠯᠠ ᠨᠢᠭᠡ ᠶ᠋ᠢ ᠫᠣᠣᠳᠠᠵᠠᠢ᠃
— ᠵᠠ ᠮᠦᠨ ᠰᠠᠢᠬᠠᠨ ᠠᠮᠢᠲᠠᠨ ᠡ ᠂ ᠠᠢ ᠳᠠ ᠴᠢᠮᠠ ᠰᠢᠭ᠋ ᠢᠩᠬᠢᠵᠦ ᠬᠣᠯᠬᠢ ᠲᠠᠷᠢᠬᠢ ᠬᠣᠶᠠᠷ ᠤᠨ ᠵᠠᠪᠰᠠᠷ ᠢᠶᠠᠷ ᠨᠠᠮ ᠫᠣᠣᠳᠠᠳᠠᠭ ᠪᠣᠯ ᠮᠦᠨ ᠰᠠᠢᠬᠠᠨ ᠠ᠁ ᠭᠡᠵᠦ ᠪᠠᠯᠪᠠᠷ ᠢ ᠦᠭᠦᠯᠡᠲᠡᠯᠡ᠂
— ᠵᠠ ᠵᠠ ᠣᠯᠠᠨ ᠲᠠᠪᠤᠨ ᠦᠭᠡ ᠪᠡᠷ ᠶᠠᠭᠠᠬᠢᠬᠤ ᠪᠣᠢ ᠂ ᠤᠯᠤᠰ ᠠᠮᠢᠲᠠᠨ ᠢᠷᠡᠬᠦ ᠡᠴᠡ ᠡᠮᠦᠨᠡ ᠡᠭᠦᠨ ᠢ᠋ ᠪᠡᠨ ᠨᠢᠭᠡ ᠵᠢᠯᠠᠭᠠᠨ ᠳ᠋ᠤ᠌ ᠪᠣᠷᠣᠯᠠᠭᠤᠯᠵᠤ ᠬᠣᠷᠣᠬᠠᠢ ᠪᠠᠨ ᠳᠠᠷᠤᠭᠠᠳ ᠪᠤᠰᠢᠭᠤᠬᠠᠨ ᠪᠤᠴᠠᠶᠠ ᠭᠡᠵᠦ ᠸᠠᠩᠲᠠᠨ ᠢ᠋ ᠥᠭᠦᠯᠡᠲᠡᠯᠡ ᠂
—《 ᠨᠡᠭᠡᠷᠡᠨ ᠴᠦ᠍ ᠲᠡᠢᠮᠦ ᠳᠠ》 ᠭᠡᠵᠦ ᠸᠠᠩᠲᠠᠨ ᠪᠣᠳᠣᠵᠠᠢ ᠃ ᠲᠡᠭᠡᠲᠡᠯᠡ ᠴᠦ᠍ ᠠᠩᠨᠠᠭᠤᠷ ᠡᠬᠢᠯᠡᠭᠡ ᠦᠭᠡᠢ ᠣᠩᠭᠣᠨᠳᠠᠭᠤᠬᠠᠨ ᠪᠠᠢᠭᠰᠠᠨ ᠴᠠᠭ᠃ ᠲᠠᠷᠪᠠᠭᠠ ᠴᠤ᠌ ᠰᠢᠨᠡ ᠰᠣᠨᠢᠨ ᠥᠩᠭᠡᠲᠡᠢ《 ᠶᠠᠸᠠ》 ᠶ᠋ᠢᠨ ᠬᠤᠷᠳᠤ ᠪᠠᠷ ᠡᠢᠰᠢ ᠪᠡᠨ ᠴᠦ᠍ ᠳᠠᠪᠬᠢᠨ᠂ ᠲᠡᠢᠰᠢ ᠪᠡᠨ ᠴᠦ᠍ ᠳᠠᠪᠬᠢᠨ ᠫᠤᠤᠳᠠᠵᠤ ᠪᠠᠢᠵᠤ᠂ ᠪᠠᠯᠪᠠᠷ ᠴᠤ᠌ ᠭᠦᠶᠦᠭᠡᠳ ᠯᠡ ᠲᠡᠭᠦᠭᠡᠳ ᠯᠡ ᠪᠠᠢᠵᠠᠢ᠃ ᠪᠠᠭᠠ ᠦᠳᠡ ᠪᠣᠯᠬᠤ ᠳ᠋ᠤ᠌ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠬᠣᠷᠢ ᠰᠢᠬᠠᠮ ᠲᠠᠷᠪᠠᠭᠠ ᠤᠨᠠᠭᠠᠵᠤ ᠠᠴᠢᠬᠤ ᠭᠠᠨᠵᠤᠭᠠᠯᠠᠬᠤ ᠭᠠᠵᠠᠷ ᠦᠭᠡᠢ ᠪᠣᠯᠳᠠᠭ ᠪᠠᠢᠨᠠ᠃ ᠠᠷᠠᠢ ᠭᠡᠵᠦ ᠨᠢᠭᠡ ᠵᠢᠯᠠᠭᠠᠨ ᠳ᠋ᠤ᠌ ᠣᠷᠣᠵᠤ ᠨᠢᠭᠡ ᠶ᠋ᠢ ᠬᠣᠶᠠᠷ ᠭᠤᠷᠪᠠ ᠶ᠋ᠢ ᠪᠣᠭᠣᠵᠤ ᠡᠭᠦᠨ ᠢ᠋ ᠳᠠᠷᠤᠭᠠ ᠳ᠋ᠤ᠌᠂ ᠡᠭᠦᠨ ᠢ᠋ ᠣᠷᠣᠯᠠᠭᠴᠢ ᠳ᠋ᠤ᠌᠂ ᠡᠭᠦᠨ ᠢ᠋ ᠲᠡᠭᠦᠨ ᠳ᠋ᠦ᠍ ᠲᠡᠭᠦᠨ ᠢ᠋ ᠡᠭᠦᠨ ᠳ᠋ᠦ᠍ ᠭᠡᠳ ᠯᠡ ᠭᠠᠯ ᠤᠯᠠᠯᠵᠠᠭᠤᠯᠤᠨ ᠤᠲᠤᠭᠠ ᠭᠡᠳᠡᠭ ᠢ᠋ ᠤᠭᠤᠭᠢᠭᠤᠯᠵᠤ ᠪᠠᠢᠲᠠᠯᠠ ᠮᠠᠰᠢᠨ ᠤ᠋ ᠳᠠᠭᠤ ᠰᠣᠨᠣᠰᠳᠠᠵᠠᠢ᠃ ᠪᠠᠯᠪᠠᠷ᠄
— ᠮᠠᠰᠢᠨ ᠳᠤᠤᠭᠠᠷᠤᠯᠠ ᠭᠡᠳ ᠰᠠᠨᠳᠤᠷᠴᠠᠢ᠃
— ᠶᠠᠭᠤ ᠮᠠᠰᠢᠨ ᠳᠤᠤᠭᠠᠷᠤᠯᠠ ᠭᠡᠵᠦ᠂ ᠸᠤ᠌ᠲ ① ᠪᠣᠯᠪᠠᠯ ᠢᠩᠭᠢᠭᠡᠳ ᠂ ᠪᠣᠭᠣᠳᠠᠭ ᠪᠣᠯᠪᠠᠯ ᠬᠢᠭᠡᠳ ᠢᠳᠡᠴᠡᠭᠡᠳᠡᠭ ᠬᠡᠷᠡᠭ᠂ ᠪᠢ ᠠᠷᠭᠠᠯᠠᠨᠠ ᠭᠡᠰᠡᠨ ᠴᠢᠨᠢ ᠶᠠᠭᠠᠬᠢᠯᠠ ᠭᠡᠵᠦ ᠸᠠᠩᠲᠠᠨ ᠥᠭᠦᠯᠡᠬᠦ ᠳ᠋ᠦ᠍᠂
— ᠪᠢ ᠶᠠᠭᠠᠬᠢᠵᠤ ᠠᠷᠭᠠᠯᠠᠬᠤ ᠶᠤᠮ ᠪᠣᠢ᠃ ᠪᠣᠯᠭᠠᠭᠰᠠᠨ ᠢ᠋ ᠪᠡᠨ ᠰᠢᠭᠤᠳᠠᠢᠯᠠᠭᠠᠳ᠂ ᠪᠣᠯᠤᠭᠠ ᠦᠭᠡᠢ ᠶ᠋ᠢ ᠨᠢ ᠬᠠᠶᠠᠭᠠᠳ ᠵᠢᠭᠤᠲᠠᠬᠤ ᠯᠠ ᠠᠷᠭᠠ ᠪᠠᠢᠨᠠ ᠭᠡᠵᠦ ᠪᠠᠯᠪᠠᠷ ᠥᠭᠦᠯᠡᠵᠡᠢ᠃ ᠲᠡᠷᠡ ᠬᠣᠶᠠᠷ ᠠᠮᠵᠢᠵᠤ ᠪᠣᠷᠣᠯᠠᠭᠤᠯᠤᠭᠰᠠᠨ ᠬᠡᠳᠦ ᠶ᠋ᠢ ᠪᠡᠨ ᠠᠪᠤᠭᠠᠳ ᠪᠤᠰᠤᠳ ᠢ᠋ ᠨᠢ ᠡᠢᠰᠢ ᠲᠠᠢᠰᠢ ᠨᠢ ᠡᠪᠡᠰᠦ ᠨᠣᠭᠣᠭᠠ ᠨᠦᠬᠡ ᠭᠣᠣ ᠤᠷᠤᠭᠤ ᠬᠠᠶᠠᠯᠠᠭᠠᠳ ᠵᠢᠭᠤᠲᠠᠲᠠᠯᠠ ᠰᠠᠬᠤᠯᠢᠭ ᠡᠪᠡᠰᠦᠨ ᠳᠤᠮᠳᠠᠭᠤᠷ ᠵᠢᠷᠢᠢᠭᠰᠡᠨ ᠰᠢᠨᠡᠬᠡᠨ ᠮᠥᠷ ᠢ᠋ᠶ᠋ᠡᠷ ᠮᠠᠰᠢᠨ ᠴᠦ᠍ ᠳᠠᠭᠠᠨ ᠡᠯᠳᠡᠵᠡᠢ᠃
— ᠵᠢᠭᠤᠲᠠᠬᠤ ᠶ᠋ᠢ ᠴᠢ ᠮᠡᠳᠡ᠂ ᠵᠢᠭᠤᠷᠠᠬᠤ ᠶ᠋ᠢ ᠪᠢ ᠮᠡᠳᠡᠶᠡ ᠭᠡᠵᠦ ᠪᠠᠯᠪᠠᠷ ᠬᠡᠯᠡᠪᠡ᠃
ᠴᠣ ᠰᠢᠨᠡ ᠬᠣᠶᠠᠷ ᠳᠤᠭᠤᠢᠲᠤ ᠶ᠋ᠢᠨ ᠴᠢᠳᠠᠯ ᠮᠡᠳᠡᠨ ᠸᠠᠩᠲᠠᠨ ᠴᠤ᠌ ᠵᠢᠷᠢᠯᠭᠡᠵᠦ᠂ ᠪᠠᠯᠪᠠᠷ ᠴᠤ᠌ ᠵᠢᠭᠤᠷᠠᠵᠤ ᠭᠡᠨᠡ᠃ ᠨᠠᠬᠢᠰ ᠬᠥᠪᠡᠭᠡ ᠲᠤᠷᠤᠯᠵᠢᠨ ᠥᠩᠭᠡᠷᠡᠵᠦ ᠭᠣᠣ ᠵᠢᠯᠠᠭᠠ ᠣᠭᠲᠣᠯᠤᠨ ᠬᠠᠷᠠᠢᠯᠠᠭᠰᠠᠭᠠᠷ ᠶᠠᠪᠤᠲᠠᠯᠠ ᠭᠠᠵᠠᠷ ᠲᠩᠷᠢ ᠨᠡᠢᠯᠡᠬᠦ ᠮᠡᠲᠦ ᠭᠠᠢᠬᠠᠯᠲᠠᠢ ᠬᠠᠴᠢᠨ ᠪᠣᠯᠤᠭᠠᠳ ᠢᠷᠡᠵᠦ ᠭᠡᠨᠡ᠃ ᠲᠡᠭᠡᠵᠦ ᠶᠠᠪᠤᠭᠰᠠᠨ ᠴᠢᠨᠢ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠯᠡ᠁
ᠨᠢᠭᠡᠳᠡᠬᠢ ᠡᠳᠦᠷ ᠸᠠᠩᠲᠠᠨ ᠠᠵᠢᠯ ᠳ᠋ᠠᠭᠠᠨ ᠢᠷᠡᠭᠰᠡᠨ ᠦᠭᠡᠢ᠂ ᠤᠳᠠᠭᠰᠠᠨ ᠦᠭᠡᠢ ᠪᠠᠯᠪᠠᠷ ᠴᠤ᠌ ᠠᠵᠢᠯ ᠳ᠋ᠠᠭᠠᠨ ᠢᠷᠡᠭᠡ ᠦᠭᠡᠢ ᠨᠢ ᠮᠡᠳᠡᠭᠳᠡᠪᠡ᠃ ᠲᠡᠭᠡᠲᠡᠯᠡ ᠲᠡᠷᠡ ᠬᠣᠶᠠᠷ ᠭᠡᠷ ᠣᠷᠣᠨ ᠤ᠋ ᠬᠢᠨ ᠴᠦ᠍ ᠭᠦᠶᠦᠯᠳᠦᠨ ᠢᠷᠡᠪᠡ᠃ ᠴᠢᠯᠥᠭᠡ ᠂ ᠤᠨᠤᠭᠠ᠂ ᠫᠤᠤ ᠰᠤᠮᠤ᠂ ᠪᠸᠨᠽᠢᠨ ᠲᠣᠰᠣ ᠥᠭᠭᠦᠭᠰᠡᠨ ᠬᠥᠮᠦᠰ ᠴᠥᠮ ᠰᠠᠨᠳᠤᠷᠤᠨ ᠡᠢᠰᠢ ᠲᠠᠢᠰᠢ ᠤᠲᠠᠰᠤᠳᠠᠨ ᠳᠠᠪᠬᠢᠯᠳᠤᠨ ᠰᠤᠷᠠᠭᠯᠠᠪᠠ᠃ ᠭᠡᠪᠡᠴᠦ ᠲᠡᠳᠡ ᠨᠢᠭᠡ ᠯᠡ ᠭᠠᠵᠠᠷ ᠤᠷᠤᠭᠤ ᠵᠢᠷᠦᠬᠡᠯᠡᠵᠦ ᠤᠲᠠᠰᠤᠳᠠᠵᠤ ᠴᠢᠳᠠᠬᠤ ᠦᠭᠡᠢ ᠴᠢ ᠶᠠᠷᠢ ᠂ ᠪᠢ ᠶᠠᠷᠢ ᠭᠡᠵᠦ ᠨᠢᠭᠡ ᠨᠢᠭᠡ ᠤᠷᠤᠭᠤ ᠪᠠᠨ ᠲᠦᠯᠬᠢᠯᠴᠡᠵᠦ ᠪᠠᠢᠲᠠᠯᠠ ᠳᠠᠷᠤᠭᠠ ᠶ᠋ᠢᠨ ᠥᠷᠥᠭᠡᠨ ᠦ᠌ ᠤᠲᠠᠰᠤ ᠳᠤᠤᠭᠠᠷᠪᠠ᠃
ᠳᠠᠷᠤᠭᠠ ᠵᠢᠭᠠᠬᠠᠨ ᠬᠣᠯᠬᠢᠭᠰᠠᠨ ᠢ᠋ᠶ᠋ᠠᠨ ᠤᠲᠠᠰᠤ ᠪᠠᠨ ᠠᠪᠴᠤ᠄
— ᠪᠠᠢ᠊ ᠁ ᠊ᠨᠠ ᠤᠤ? ᠬᠠᠮᠢ᠊ ᠁ ᠊ᠬ᠋ᠠ ᠠ᠋ᠴᠠ ᠶᠡᠷᠢ᠊ ᠁ ᠭᠡᠲᠡᠯᠡ
— ᠪᠠᠢᠨᠠ᠂ ᠭᠡᠮᠲᠦᠯ ᠪᠡᠷᠲᠡᠯ ᠦ᠋ᠨ ᠲᠠᠰᠤᠭ ᠠ᠋ᠴᠠ ᠶᠠᠷᠢᠵᠤ ᠪᠠᠢᠨᠠ᠃ ᠲᠠᠨ ᠤ᠋ ᠠᠵᠢᠯᠲᠠᠨ ᠸᠠᠩᠲᠠᠨ ᠪᠠᠰᠠ ᠪᠠᠯᠪᠠᠷ ᠭᠡᠳᠡᠭ ᠬᠥᠮᠦᠨ ᠲᠡᠢ ᠬᠣᠶᠠᠭᠤᠯᠠ ᠮᠠᠨ ᠤ᠋ ᠳ᠋ᠤ᠌ ᠬᠦᠷᠭᠡᠭᠳᠡᠨ ᠢᠷᠡᠭᠰᠡᠨ᠁
— ᠪᠠᠰᠠ ᠲᠡᠭᠡ᠊ ᠁ ᠊ᠭᠡᠳ ᠪᠡᠶᠡᠰ ᠦ᠋ᠳ ᠨᠢ ᠁
— ᠪᠡᠶᠡᠰ ᠦ᠋ᠳ ᠨᠢ ᠶᠠᠭᠠᠬᠢᠬᠤ ᠪᠣᠢ᠂ ᠪᠣᠭᠣᠯᠭᠠᠴᠢᠠᠬᠠᠰᠠᠨ ᠲᠠᠷᠪᠠᠭᠠ ᠰᠢᠭ᠋ ᠬᠡᠪᠲᠡᠵᠦ ᠪᠠᠢᠨᠠ᠂ ᠶᠥᠭᠡᠭᠡᠨ ᠳ᠋ᠡᠭᠡᠨ( ᠱᠠᠷᠬᠢᠷᠠᠨ ᠡᠪᠡᠳᠴᠦ) ᠭᠠᠢᠭᠤᠢ ᠪᠣᠯᠪᠠ ᠤᠤ! ᠬᠠᠷᠢᠨ ᠤᠨᠤᠭᠠ᠂ ᠫᠤᠤ ᠡᠨᠡ ᠲᠡᠷᠡ ᠨᠢ ᠪᠦᠲᠦᠨ ᠦᠯᠡᠳᠡᠭᠰᠡᠨ ᠶᠠᠭᠤᠮᠠ ᠠᠯᠠᠭᠠ ᠳᠠ᠃
— ᠵᠠ᠁ ᠠ! ᠭᠡᠳ ᠳᠠᠷᠤᠭᠠ ᠳᠠᠭᠤ ᠦᠭᠡᠢ ᠪᠣᠯᠪᠠ᠃
— — — —
① < ᠡᠨᠡ > ᠭᠡᠰᠡᠨ ᠣᠷᠣᠰ ᠦᠭᠡ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃
ᠲᠩᠷᠢ ᠡᠵᠢ ᠬᠠᠭᠤᠯᠪᠠ
ᠬᠢᠨᠠᠭ᠍ᠴᠢ : ᠭᠠᠸᠠ
2023᠂7᠂18 ᠤ᠋ ᠡᠳᠦᠷ