ᠪᠢᠴᠢᠬᠠᠨ 《ᠠᠵᠢᠯᠴᠢᠳ》（ ᠬᠡᠯᠡ ᠪᠢᠴᠢᠭ – ᠳᠣᠯᠣᠳᠤᠭᠠᠷ ᠳᠡᠪᠲᠡᠷ）Бяцхан ажилчид （ Хэл бичиг – Долдугар дэвтэр）
480ᠪᠢᠴᠢᠬᠠᠨ 《 ᠠᠵᠢᠯᠴᠢᠳ 》
ᠠᠮᠠᠷᠠᠯᠲᠠ ᠶ᠋ᠢᠨ ᠡᠳᠦᠷ ᠪᠠᠢᠯᠠ᠃ ᠪᠢ ᠡᠷᠡᠭᠦᠯ ᠠᠭᠠᠷ ᠲᠤ᠌ ᠵᠤᠭᠠᠯᠠᠬᠤ ᠪᠠᠷ ᠣᠢ ᠶ᠋ᠢᠨ ᠵᠥᠷᠢᠭ ᠢ᠋ ᠳᠠᠭᠠᠨ ᠠᠯᠬᠤᠵᠤ ᠶᠠᠪᠤᠪᠠ᠃ ᠮᠠᠨ ᠤ᠋ ᠵᠤᠰᠠᠯᠠᠩ ᠤ᠋ᠨ ᠬᠠᠮᠤᠭ ᠤ᠋ᠨ ᠵᠠᠬᠠ ᠶ᠋ᠢᠨ ᠪᠠᠢᠰᠢᠩ ᠤ᠋ᠨ ᠬᠠᠶᠠᠭᠠᠨ ᠠ᠋ᠴᠠ ᠵᠠᠯᠭᠠᠭᠠᠳ ᠯᠠ ᠪᠦᠷ ᠣᠢ᠃ ᠡᠨᠳᠡ ᠵᠢᠮᠢᠰ ᠰᠠᠮᠤᠷ ᠬᠡᠵᠢᠶᠡᠨᠡᠢ ᠡᠯᠪᠡᠭ ᠤᠷᠭᠤᠳᠠᠭ ᠭᠠᠵᠠᠷ ᠯᠠ ᠳᠠ᠃ ᠡᠨᠡ ᠵᠢᠯ ᠴᠦ᠍ ᠭᠡᠰᠡᠨ ᠪᠠᠢᠭᠠᠯᠢ ᠡᠬᠡ ᠬᠡᠰᠢᠭ ᠢ᠋ᠶ᠋ᠡᠨ ᠬᠠᠷᠠᠮ ᠦᠭᠡᠢ ᠥᠭᠭᠦᠭᠡᠵᠢ ᠳᠡᠯᠭᠡᠵᠡᠢ᠃ ᠥᠨᠳᠥᠷ ᠭᠣᠭᠣᠯᠢᠭ᠋ ᠬᠣᠱ᠌ᠢ ᠨᠤᠭᠤᠳ ᠤ᠋ᠨ ᠰᠠᠯᠠᠭᠠ ᠮᠥᠴᠢᠷ ᠪᠦᠬᠦᠨ ᠳ᠋ᠦ᠍ ᠪᠣᠯᠴᠠ ᠨᠢ ᠭᠦᠢᠴᠡᠭᠰᠡᠨ ᠪᠣᠷᠭᠣᠴᠠᠢ ᠨᠤᠭᠤᠳ ᠪᠠᠭᠰᠠᠢᠨ ᠪᠥᠩᠵᠢᠭᠢᠨᠡᠨᠡ᠃ ᠭᠡᠪᠡᠴᠦ ᠪᠢ ᠲᠦᠩᠰᠢᠭᠦᠷ ᠮᠣᠳᠣ ᠠᠪᠴᠤ ᠭᠠᠷᠤᠭᠠ ᠦᠭᠡᠢ ᠳ᠋ᠡᠭᠡᠨ ᠬᠠᠷᠠᠮᠰᠠᠨ ᠳᠡᠮᠡᠢ ᠯᠡ ᠬᠣᠷᠣᠬᠠᠢᠰᠠᠨ ᠶᠠᠪᠤᠯᠠ᠃ ᠭᠡᠨᠡᠳᠲᠡ ᠬᠠᠵᠠᠭᠤᠬᠠᠨ ᠳ᠋ᠤ᠌ ᠨᠢᠭᠡ ᠬᠡᠦᠬᠡᠳ᠄
《 ᠪᠦᠯᠲᠡᠭᠡᠢ᠂ ᠪᠦᠯᠲᠡᠭᠡᠢ᠂ ᠮᠠᠢ ᠦᠵᠦᠮ》 ᠭᠡᠬᠦ ᠨᠢ ᠳᠤᠭᠤᠯᠳᠠᠪᠠ᠃ ᠰᠠᠮᠤᠷ ᠲᠡᠭᠦᠵᠦ ᠶᠠᠪᠤᠭᠠ ᠬᠡᠦᠬᠡᠳ ᠪᠠᠢᠬᠤ ᠨᠢ ᠠ᠋᠂ ᠮᠣᠳᠣᠨ ᠤ᠋ ᠮᠥᠴᠢᠷ ᠬᠤᠭᠤᠯᠵᠤ ᠭᠡᠮᠲᠦᠭᠡᠵᠦ ᠪᠠᠢᠬᠤ ᠪᠣᠢ᠃ ᠦᠭᠡᠢ ᠳ᠋ᠡᠭᠡᠨ ᠯᠡ ᠥᠪᠡᠷ ᠢ᠋ᠶ᠋ᠡᠨ ᠤᠨᠠᠵᠤ ᠪᠠᠷᠳᠠᠪᠠᠯ ᠶᠠᠭᠠᠬᠢᠨᠠ᠃ ᠶᠠᠭᠤ ᠴᠤ᠌ ᠭᠡᠰᠡᠨ ᠰᠢᠯᠭᠠᠵᠤ ᠦᠵᠡᠶᠡ ᠭᠡᠵᠦ ᠪᠣᠳᠣᠭᠠᠳ ᠰᠡᠮᠬᠡᠨ ᠭᠡᠲᠡᠭᠰᠡᠭᠡᠷ ᠳᠥᠭᠥᠵᠦ ᠣᠴᠢᠪᠠ᠃
ᠠᠷᠪᠠ ᠣᠷᠴᠢᠮ ᠨᠠᠰᠤᠨ ᠤ᠋ ᠬᠥᠭᠡᠷᠦᠬᠦᠨ ᠪᠣᠷᠣ ᠬᠦᠦ᠂ ᠲᠣᠮᠣ ᠬᠣᠱ᠌ᠢ ᠶ᠋ᠢᠨ ᠰᠡᠭᠦᠳᠡᠷ ᠲᠦ᠍ ᠨᠤᠮᠤ ᠰᠤᠮᠤ ᠤᠷᠠᠯᠠᠵᠤ ᠪᠠᠢᠭᠠ ᠪᠣᠯᠤᠯᠲᠠᠢ ᠪᠤᠷᠭᠠᠰᠤ ᠵᠣᠷᠭᠣᠨ ᠬᠡᠪᠯᠡᠭᠦᠬᠡᠨ ᠨᠢ ᠠᠷᠭᠠ ᠦᠭᠡᠢ ᠰᠠᠭᠤᠵᠤ ᠪᠠᠢᠪᠠ᠃ ᠨᠣᠭᠣᠭᠠᠨ ᠮᠣᠳᠣᠨ ᠤ᠋ ᠮᠥᠴᠢᠷ ᠬᠠᠢᠷᠠ ᠭᠠᠮ ᠦᠭᠡᠢ ᠬᠤᠭᠤᠯᠵᠤ ᠰᠦᠢᠳᠬᠡᠳᠡᠭ ᠬᠡᠦᠬᠡᠳ ᠡᠨᠡ ᠶᠠᠭᠠᠬᠢᠪᠠᠴᠤ ᠪᠢᠰᠢ ᠠ᠋᠃ ᠪᠤᠷᠤᠭᠤ ᠬᠡᠷᠡᠭ ᠬᠢᠭᠰᠡᠨ ᠬᠡᠦᠬᠡᠳ ᠬᠠᠷᠠᠭᠤᠳᠠ ᠯᠠ ᠠᠨᠳᠠᠰᠢ ᠦᠭᠡᠢ ᠪᠠᠢᠳᠠᠭ᠃ ᠳᠡᠷᠭᠡᠳᠡ ᠪᠡᠨ ᠬᠤᠪᠢᠩ ᠳᠦᠭᠦᠷᠡᠩ ᠴᠥᠮᠥᠭᠰᠡᠨ ᠰᠠᠮᠤᠷ ᠲᠠᠯᠪᠢᠵᠠᠢ᠃ ᠭᠠᠭᠴᠠ ᠶ᠋ᠢᠨ ᠲᠡᠳᠦᠢ ᠶᠠᠰᠤ ᠪᠢᠲᠡᠭᠡᠢ ᠬᠡᠯᠡ᠂ ᠦᠵᠡᠶᠡ ᠭᠡᠬᠦ ᠳ᠋ᠦ᠍ ᠬᠠᠯᠢᠰᠤ ᠴᠤ᠌ ᠦᠭᠡᠢ ᠪᠣᠯᠲᠠᠯᠠ ᠮᠥᠯᠴᠢᠢᠲᠡᠯᠡ ᠴᠡᠪᠡᠷᠯᠡᠭᠰᠡᠨ ᠴᠡᠪᠡᠷ ᠴᠠᠭᠠᠨ ᠰᠠᠮᠤᠷ ᠢ᠋ ᠬᠠᠷᠠᠭᠠᠳ ᠬᠣᠷᠣᠬᠠᠢ ᠬᠦᠷᠦᠮᠡᠷ᠃
《 ᠫᠥᠬᠥ᠂ ᠶᠠᠭᠠᠬᠢᠵᠤ ᠡᠢᠮᠦ ᠶᠡᠬᠡ ᠰᠠᠮᠤᠷ ᠴᠥᠮᠥᠭᠡ ᠪᠣᠢ?》 ᠭᠡᠵᠦ ᠪᠢ ᠭᠠᠢᠬᠠᠭᠰᠠᠨ ᠢ᠋ᠶ᠋ᠠᠨ ᠨᠢᠭᠤᠯ ᠦᠭᠡᠢ ᠠᠰᠠᠭᠤᠵᠤ ᠣᠷᠬᠢᠪᠠ᠃ ᠬᠦᠦ ᠨᠠᠳᠠ ᠤᠷᠤᠭᠤ ᠬᠠᠷᠠᠨ ᠢᠨᠢᠶᠡᠮᠰᠦᠭᠯᠡᠵᠦ ᠨᠢᠭᠡ ᠶᠠᠭᠤᠮᠠ ᠬᠡᠯᠡᠬᠦ ᠶ᠋ᠢᠨ ᠵᠠᠭᠤᠷᠠ ᠭᠡᠨᠡᠳᠲᠡ ᠮᠢᠨᠦ ᠳᠤᠬᠤᠨ ᠳᠡᠭᠡᠷᠡ ᠵᠠᠩᠭᠢᠳᠤᠭᠰᠠᠨ ᠨᠢᠳᠤᠷᠭᠠ ᠶ᠋ᠢᠨ ᠴᠢᠨᠡᠭᠡ ᠲᠣᠮᠣ ᠪᠣᠷᠭᠣᠴᠠᠢ ᠳᠡᠰ ᠬᠢᠲᠡᠯᠡ ᠤᠨᠠᠬᠤ ᠨᠢ ᠲᠡᠷᠡ᠃ ᠡᠪᠡᠳᠦᠭᠰᠡᠨ ᠭᠡᠵᠦ ᠵᠢᠭᠲᠡᠢᠬᠡᠨ᠃ ᠠ ᠮᠣᠳᠣᠨ ᠳᠡᠭᠡᠷᠡ ᠪᠠᠰᠠ ᠨᠢᠭᠡ ᠨᠢ ᠠᠪᠠᠷᠢᠵᠤ ᠭᠠᠷᠴᠢᠬᠠᠭᠠᠳ ᠨᠠᠮᠠ ᠶ᠋ᠢ ᠪᠣᠷᠭᠣᠴᠠᠢ ᠪᠠᠷ ᠵᠣᠷᠢᠭᠤᠳᠠ ᠰᠢᠳᠡᠭᠰᠡᠨ ᠪᠠᠢᠬᠤ ᠨᠢ᠃ ᠠᠬᠠᠮᠠᠳ ᠬᠥᠮᠦᠨ ᠢ᠋ ᠳᠠᠭᠠᠵᠢᠩᠨᠠᠭᠰᠠᠨ ᠴᠢᠮᠠ ᠶ᠋ᠢ ᠳ᠋ᠠ ᠭᠡᠵᠦ ᠪᠣᠳᠣᠨ ᠳᠡᠭᠡᠭᠰᠢ ᠪᠡᠨ ᠬᠠᠷᠠᠪᠠᠯ ᠶᠠᠭᠤ ᠴᠤ᠌ ᠬᠠᠷᠠᠭᠳᠠᠭᠰᠠᠨ ᠦᠭᠡᠢ᠃ ᠠᠭᠤᠷ ᠴᠤ᠌ ᠬᠦᠷᠬᠦ ᠰᠢᠭ᠃ ᠭᠡᠨᠡᠳᠲᠡ ᠨᠢᠳᠦᠨ ᠪᠤᠯᠤᠩ ᠳ᠋ᠤ᠌ ᠨᠢᠭᠡ ᠶᠠᠭᠤᠮᠠ ᠵᠢᠷᠪᠢᠰᠬᠢᠨ ᠥᠷᠲᠥᠭᠡᠳ ᠣᠷᠬᠢᠯᠠ᠃ ᠬᠠᠷᠠᠪᠠᠯ ᠨᠢᠭᠡ ᠬᠡᠷᠡᠮᠦ ᠳᠡᠭᠦᠯᠢᠵᠦ ᠪᠠᠢᠬᠤ ᠠᠵᠢ᠃ ᠪᠢ ᠨᠠᠷᠠᠨ ᠰᠥᠭᠡᠷᠭᠦ ᠰᠠᠷᠠᠪᠴᠢᠯᠠᠨ ᠪᠠᠢᠵᠤ ᠪᠦᠷ ᠰᠠᠢᠨ ᠯᠠᠪᠯᠠᠨ ᠠᠵᠢᠭᠯᠠᠪᠠ ᠁ ᠪᠠᠢᠵᠠ ᠭᠦ᠋! ᠨᠢᠳᠦᠨ ᠳ᠋ᠡᠭᠡᠨ ᠴᠦ᠍ ᠪᠠᠷᠤᠭ ᠢᠲᠡᠭᠡᠮᠡᠷ ᠦᠭᠡᠢ ᠶᠠᠭᠤᠮᠠ ᠣᠯᠵᠤ ᠬᠠᠷᠠᠯᠠ᠃ ᠡᠨᠡ ᠴᠢᠨᠢ ᠶᠠᠭᠤ ᠪᠣᠢ ᠲᠠ ᠮᠢᠨᠢ᠂ ᠶᠠᠮᠠᠷ ᠣᠯᠠᠨ ᠬᠡᠷᠡᠮᠦ ᠪᠣᠢ? ᠠᠷᠪᠠ᠂ ᠬᠣᠷᠢ᠂ ᠪᠠᠷᠤᠭ ᠭᠤᠴᠢ ᠴᠤ᠌ ᠬᠦᠷᠬᠦ ᠪᠠᠢᠬᠤ ᠠ᠋᠃ ᠲᠡᠢᠮᠦ ᠣᠯᠠᠨ ᠬᠡᠷᠡᠮᠦ ᠮᠥᠴᠢᠷ ᠳᠠᠮᠵᠢᠨ ᠳᠡᠭᠦᠯᠢᠵᠦ ᠪᠠᠢᠭᠠ ᠬᠠᠷᠠᠭᠳᠠᠨᠠ᠃ ᠬᠡᠷᠡᠮᠦ ᠬᠠᠷᠠᠭᠰᠠᠨ ᠬᠡᠦᠬᠡᠳ ᠬᠡᠵᠢᠶᠡ ᠯᠡ ᠵᠦᠭᠡᠷ ᠲᠣᠮᠣᠭᠠᠲᠠᠢ ᠰᠠᠭᠤᠵᠤ ᠪᠠᠢᠯᠠ ᠳᠠ᠃ ᠡᠨᠡ ᠬᠥᠮᠦᠨ ᠲᠡᠷᠡ ᠰᠣᠨᠢᠨ ᠦᠵᠡᠪᠦᠷᠢ ᠶ᠋ᠢ ᠯᠠᠪ ᠬᠠᠷᠠᠭᠠᠳᠤᠢ ᠪᠣᠯᠵᠤ ᠲᠠᠭᠠᠷᠠᠪᠠ ᠠ ᠳᠠ ᠭᠡᠵᠦ ᠪᠣᠳᠣᠨ᠄
《 ᠲᠡᠷᠡ ᠬᠠᠷᠠᠭᠠᠴᠢ! ᠲᠣᠯᠣᠭᠠᠢ ᠳᠡᠭᠡᠷᠡ ᠴᠢᠨᠢ᠁》 ᠭᠡᠵᠦ ᠳᠡᠭᠡᠭᠰᠢ ᠪᠡᠨ ᠵᠢᠭᠠᠪᠠᠯ ᠬᠦᠦ ᠣᠭᠲᠣ ᠲᠣᠭᠣᠭᠰᠠᠨ ᠶᠠᠩᠵᠤ ᠦᠭᠡᠢ ᠨᠢᠳᠦ ᠪᠡᠨ ᠣᠨᠢᠢᠯᠭᠠᠨ ᠲᠡᠷᠡ ᠵᠦᠭ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠬᠠᠷᠢᠨ᠄
《 ᠠᠬᠠ ᠠ᠋᠂ ᠠᠬᠠ ᠠ᠋᠂ ᠲᠠ ᠵᠢᠭᠠᠬᠠᠨ ᠬᠣᠯᠠᠳᠤᠭᠠᠷᠠᠢ᠂ ᠮᠢᠨᠦ ᠬᠡᠷᠡᠮᠦ ᠨᠦ᠍ᠭᠦᠳ ᠦ᠋ᠨ ᠠᠵᠢᠯ ᠤ᠋ᠨ ᠴᠠᠭ ᠡᠬᠢᠯᠡᠴᠢᠬᠡᠯᠡ》 ᠭᠡᠪᠡ᠃
《 ᠠᠵᠢᠯ ᠤ᠋ᠨ ᠴᠠᠭ ᠠ!》
《 ᠲᠡᠢᠮᠦ ᠠ᠋᠂ ᠰᠠᠶᠢ ᠡᠳᠡ ᠮᠠᠨᠢ ᠲᠠᠪᠤᠨ ᠮᠢᠨᠦ᠋ᠲ ᠠᠮᠠᠷᠠᠭᠰᠠᠨ ᠶᠤᠮ ᠯᠠ ᠳᠠ》 ᠭᠡᠵᠦ ᠪᠠᠢᠨᠠ᠃ ᠪᠢ ᠪᠦᠷ ᠭᠠᠢᠬᠠᠵᠤ ᠣᠷᠬᠢᠯᠠ᠃ ᠭᠡᠲᠡᠯᠡ ᠮᠣᠳᠣᠨ ᠳᠡᠭᠡᠷᠡᠡᠴᠡ ᠪᠣᠷᠭᠣᠴᠠᠢ ᠨᠤᠭᠤᠳ ᠡᠨᠳᠡ ᠲᠡᠨᠳᠡ ᠦᠭᠡᠢ ᠫᠣᠳ ᠫᠣᠳ ᠬᠢᠨ ᠵᠠᠢ ᠵᠠᠪᠰᠠᠷ ᠦᠭᠡᠢ ᠤᠨᠠᠵᠤ ᠭᠠᠷᠤᠯᠠ ᠰᠢᠦ᠃ ᠪᠠᠷᠤᠭ ᠯᠠ ᠪᠣᠷᠭᠣᠴᠠᠢ ᠶ᠋ᠢᠨ ᠪᠣᠷᠣᠭᠠᠨ ᠣᠷᠣᠵᠤ ᠪᠠᠢᠨᠠ ᠤᠤ ᠳᠠ ᠭᠡᠮᠡᠷ᠃ ᠬᠡᠳᠦᠨ ᠮᠢᠨᠦ᠋ᠲ ᠦ᠋ᠨ ᠳᠠᠷᠠᠭᠠ ᠥᠨᠥ ᠬᠡᠷᠡᠮᠦ ᠨᠦ᠍ᠭᠦᠳ ᠮᠤᠳᠤᠨ ᠠ᠋ᠴᠠ ᠪᠠᠨ ᠱᠠᠯᠠᠮᠠᠭᠠᠢᠯᠠᠨ ᠪᠠᠭᠤᠵᠠᠭᠠᠵᠤ ᠤᠨᠠᠭᠠᠭᠰᠠᠨ ᠪᠣᠷᠭᠣᠴᠠᠢ ᠨᠤᠭᠤᠳ ᠢ᠋ᠶ᠋ᠠᠨ ᠬᠦᠦ ᠶ᠋ᠢᠨ ᠬᠠᠵᠠᠭᠤᠬᠠᠨ ᠳ᠋ᠤ᠌ ᠣᠪᠣᠭᠠᠯᠠᠨ ᠭᠦᠶᠦᠯᠳᠦᠨᠡ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠥᠨᠥᠬᠢ ᠣᠪᠣᠭᠠᠯᠠᠭᠰᠠᠨ ᠣᠯᠵᠠ ᠪᠠᠨ ᠲᠣᠭᠣᠷᠢᠨ ᠬᠣᠢᠲᠤ ᠬᠣᠶᠠᠷ ᠬᠥᠯ ᠳᠡᠭᠡᠷᠡ ᠪᠡᠨ ᠬᠡᠪᠯᠡᠭᠦᠬᠡᠨ ᠨᠢ ᠠᠷᠭᠠ ᠦᠭᠡᠢ ᠴᠣᠮᠴᠣᠢᠨ ᠰᠠᠭᠤᠵᠠᠭᠠᠭᠠᠳ ᠨᠢᠭᠡ ᠨᠢᠭᠡ ᠪᠣᠷᠭᠣᠴᠠᠢ ᠲᠡᠪᠡᠷᠢᠨ ᠴᠥᠮᠥᠵᠦ ᠭᠠᠷᠤᠯᠠ᠃ ᠡᠨᠡ ᠶᠡᠷᠦ ᠨᠢ ᠶᠠᠮᠠᠷ ᠤᠴᠢᠷ ᠲᠠᠢ ᠰᠣᠨᠢᠨ《 ᠠᠵᠢᠯᠴᠢᠳ》 ᠪᠠᠢᠳᠠᠭ ᠪᠠᠢᠨᠠ᠃ ᠲᠡᠳᠡᠨ ᠦ᠌ ᠰᠠᠮᠤᠷ ᠴᠥᠮᠥᠵᠦ ᠪᠠᠢᠭᠠ ᠶ᠋ᠢ ᠬᠠᠷᠠᠬᠤ ᠳ᠋ᠤ᠌ ᠬᠡᠴᠢᠨᠡᠨ ᠰᠤᠷᠮᠠᠭ ᠪᠠᠰᠠ ᠱᠠᠯᠠᠮᠠᠭ ᠶᠤᠮ ᠪᠣᠢ ᠭᠡᠵᠦ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠳᠠᠭᠤ ᠠᠯᠳᠠᠮᠠᠷ᠃ ᠣᠯᠠᠨ ᠪᠢᠴᠢᠬᠠᠨ ᠠᠮᠢᠳᠤ ᠬᠡᠦᠬᠡᠯᠳᠡᠢ ᠨᠦ᠍ᠭᠦᠳ ᠰᠢᠭ ᠶᠠᠮᠠᠷ ᠬᠥᠭᠡᠷᠦᠬᠦᠨ ᠭᠥᠷᠳᠡᠮᠡᠷ ᠪᠠᠢᠭᠰᠠᠨ ᠪᠢᠯᠡ᠃ ᠬᠦᠦ ᠲᠡᠳᠡᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠨᠢᠭᠡ ᠬᠣᠭᠣᠰᠣᠨ ᠬᠤᠪᠢᠩ ᠠᠪᠠᠴᠢᠵᠤ ᠲᠠᠯᠪᠢᠭᠠᠳ᠄
《 ᠪᠦᠯᠲᠡᠭᠡᠢ᠂ ᠪᠦᠯᠲᠡᠭᠡᠢ ᠠᠩᠬᠠᠷ! ᠡᠨᠳᠡ ᠡᠨᠳᠡ》 ᠭᠡᠪᠡ᠃
ᠬᠦᠦ ᠶ᠋ᠢᠨ ᠪᠢᠴᠢᠬᠠᠨ《 ᠠᠵᠢᠯᠴᠢᠳ》 ᠬᠤᠪᠢᠩ ᠢ᠋ ᠶᠠᠭᠠᠬᠢᠵᠤ ᠡᠢᠬᠦ ᠶ᠋ᠢᠨ ᠵᠠᠭᠤᠷᠠ ᠴᠥᠮᠥᠭᠰᠡᠨ ᠰᠠᠮᠤᠷ ᠢ᠋ᠶ᠋ᠠᠷ ᠳᠦᠭᠦᠷᠭᠡᠵᠦ ᠣᠷᠬᠢᠪᠠ᠃ ᠬᠦᠦ᠄
《 ᠪᠦᠯᠲᠡᠭᠡᠢ᠂ ᠮᠠᠢ᠁ ᠪᠦᠯᠲᠡᠭᠡᠢ᠂ ᠮᠠᠢ᠁ ᠦᠵᠦᠮ》 ᠭᠡᠬᠦ ᠳ᠋ᠦ᠍ ᠠᠵᠢᠯ ᠢ᠋ᠶ᠋ᠠᠨ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠨ ᠳ᠋ᠦ᠍ ᠳᠠᠭᠤᠰᠬᠠᠭᠰᠠᠨ ᠨᠢᠭᠡ ᠬᠡᠷᠡᠮᠦ ᠭᠣᠳ ᠬᠢᠨ ᠭᠦᠶᠦᠵᠦ ᠢᠷᠡᠭᠡᠳ ᠪᠢᠴᠢᠬᠠᠨ ᠡᠵᠡᠨ ᠦ᠌ ᠪᠡᠨ ᠭᠠᠷ ᠠᠴᠠ ᠨᠢᠭᠡ ᠦᠵᠦᠮ ᠵᠠᠭᠤᠭᠠᠳ ᠭᠦᠶᠦᠵᠦ ᠣᠳᠤᠯᠠ᠃ ᠪᠤᠰᠤᠳ ᠨᠢ ᠴᠦ᠍ ᠮᠥᠨ ᠥᠪᠡᠷ ᠥᠪᠡᠷ ᠦ᠋ᠨ ᠬᠤᠪᠢ ᠶ᠋ᠢ ᠠᠪᠤᠨ ᠪᠤᠪᠠᠷ ᠪᠤᠪᠠᠷ ᠮᠡᠷᠡᠵᠦ ᠭᠠᠷᠪᠠ᠃ ᠦᠵᠦᠮ ᠢᠳᠡᠵᠦ ᠪᠠᠢᠭᠠ ᠶ᠋ᠢ ᠨᠢ ᠬᠦᠷᠲᠡᠯᠡ ᠬᠠᠷᠠᠭᠠᠳ ᠯᠠ ᠪᠠᠢᠮᠠᠷ ᠬᠥᠭᠡᠷᠦᠬᠦᠨ᠃ ᠬᠠᠷᠠᠭᠰᠠᠨ ᠬᠥᠮᠦᠨ ᠬᠦᠷᠲᠡᠨ ᠢᠨᠢᠶᠡᠬᠦ ᠦᠭᠡᠢ ᠪᠠᠢᠬᠤ ᠶ᠋ᠢᠨ ᠴᠦ᠍ ᠠᠷᠭᠠ ᠠᠯᠠᠭᠠ᠃ ᠡᠢᠮᠦ ᠣᠯᠠᠨ ᠭᠠᠪᠰᠢᠭᠠᠢ ᠪᠠᠰᠠ ᠳᠤᠭᠤᠯᠭᠠᠷ ᠲᠠᠢ ᠪᠢᠴᠢᠬᠠᠨ《 ᠠᠵᠢᠯᠴᠢᠳ》 ᠭᠡᠵᠦ ᠪᠠᠰᠠ ᠪᠠᠢᠳᠠᠭ ᠠ᠋ ᠭᠡᠵᠦ ᠪᠢ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠪᠣᠳᠣᠵᠤ ᠵᠣᠭᠰᠣᠪᠠ᠃
《 ᠠᠬᠠ ᠠ᠋᠂ ᠰᠠᠮᠤᠷ ᠢᠳᠡ》 ᠭᠡᠵᠦ ᠬᠦᠦ ᠮᠢᠨᠦ ᠪᠣᠳᠣᠯ ᠢ᠋ ᠲᠠᠰᠤᠯᠪᠠ᠃ ᠢᠩᠭᠢᠭᠡᠳ ᠪᠢ ᠴᠥᠮᠥᠭᠰᠡᠨ ᠰᠠᠮᠤᠷ ᠢ᠋ᠶ᠋ᠠᠷ ᠲᠠᠢᠯᠠᠭᠤᠯᠵᠤ ᠰᠠᠭᠤᠬᠤ ᠳ᠋ᠠᠭᠠᠨ ᠪᠦᠬᠦ ᠤᠴᠢᠷ ᠢ᠋ ᠲᠣᠳᠣᠷᠬᠠᠢ ᠠᠰᠠᠭᠤᠵᠤ ᠮᠡᠳᠡᠵᠦ ᠠᠪᠴᠤ ᠪᠢᠯᠡ᠃ ᠬᠦᠦ ᠨᠠᠳᠠ ᠳ᠋ᠤ᠌᠂ ᠶᠠᠭᠠᠬᠢᠵᠤ ᠡᠢᠮᠦ ᠣᠯᠠᠨ ᠦᠨᠡᠨᠴᠢ ᠰᠠᠢᠨ ᠪᠢᠴᠢᠬᠠᠨ ᠨᠠᠢᠵᠠ ᠲᠠᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠲᠣᠳᠣᠷᠬᠠᠢ ᠲᠠᠢᠯᠪᠤᠷᠢᠯᠠᠵᠤ ᠥᠭᠭᠦᠭᠰᠡᠨ ᠶᠦ᠍ᠮ᠃ ᠶᠠᠭᠤ ᠴᠤ᠌ ᠭᠡᠰᠡᠨ ᠭᠤᠷᠪᠠ ᠳᠥᠷᠪᠡᠨ ᠵᠢᠯ ᠣᠢᠭᠠ ᠦᠭᠡᠢ ᠰᠢᠷᠭᠠᠭᠤ ᠬᠥᠳᠡᠯᠮᠦᠷᠢᠯᠡᠵᠦ ᠪᠠᠢᠵᠤ ᠡᠢᠨ ᠬᠦ᠌ ᠵᠣᠷᠢᠭᠰᠠᠨ ᠳ᠋ᠠᠭᠠᠨ ᠬᠦᠷᠦᠭᠰᠡᠨ ᠶᠦ᠍ᠮ ᠪᠠᠢᠨᠠ ᠭᠡᠳᠡᠭ ᠢ᠋ ᠪᠢ ᠲᠡᠭᠦᠨ ᠦ᠌ ᠶᠠᠷᠢᠶᠠᠨ ᠠᠴᠠ ᠣᠢᠯᠠᠭᠠᠭᠰᠠᠨ ᠶᠤᠮ᠃
※ ᠢᠷᠡᠯᠲᠡ᠄
ᠠᠯᠪᠠᠨ ᠵᠢᠷᠤᠮ ᠤ᠋ᠨ ᠲᠠᠪᠤᠨ ᠵᠢᠯ ᠦ᠋ᠨ ᠳᠦᠷᠢᠮᠲᠦ ᠪᠠᠭᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠦᠵᠡᠬᠦ
ᠬᠡᠯᠡ ᠪᠢᠴᠢᠭ ᠳᠣᠯᠣᠳᠤᠭᠠᠷ ᠳᠡᠪᠲᠡᠷ ※
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ ᠨᠠᠢᠷᠠᠭᠤᠯᠤᠨ ᠬᠡᠪᠯᠡᠭᠦᠯᠪᠡ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠢᠩᠬᠤᠸᠠ ᠨᠣᠮ ᠤ᠋ᠨ ᠳᠡᠯᠭᠡᠭᠦᠷ ᠲᠠᠷᠬᠠᠭᠠᠪᠠ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠬᠡᠪᠯᠡᠬᠦ ᠦᠢᠯᠡᠳᠪᠦᠷᠢ ᠬᠡᠪᠯᠡᠪᠡ
1991 ᠣᠨ ᠤ᠋ 3 ᠰᠠᠷᠠ ᠳ᠋ᠤ᠌ ᠠᠩᠬᠠᠳᠤᠭᠠᠷ ᠬᠡᠪ ᠢ᠋ ᠬᠢᠪᠡ
1993 ᠣᠨ ᠤ᠋ 4 ᠰᠠᠷᠠ ᠳ᠋ᠤ᠌ ᠭᠤᠷᠪᠠᠳᠤᠭᠠᠷ ᠤᠳᠠᠭᠠ ᠬᠡᠪᠯᠡᠪᠡ
ᠦᠨᠡ᠄1.40 ᠲᠥᠭᠥᠷᠢᠭ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣᠳᠣᠨᠬᠤᠸᠠᠷ
ᠬᠢᠨᠠᠭᠴᠢ᠄ ᠳ · ᠣᠶᠤᠨᠴᠡᠴᠡᠭ᠂ ᠪᠦᠷᠢᠨᠴᠡᠴᠡᠭ
2023.7.15