ᠡᠷᠡ ᠬᠥᠮᠦᠨ – ᠷ ᠂ ᠴᠣᠢᠨᠣᠮ Эр хүн – Р ᠂ Чойном
463ᠡᠷᠡ ᠬᠥᠮᠥᠨ
ᠬᠠᠮᠤᠭ ᠤ᠋ᠨ ᠲᠣᠮᠣ ᠨᠢ ᠨᠠᠳᠠ ᠰᠠᠢᠨ ᠪᠠᠢᠭᠠ ᠶᠤᠮ ᠴᠢᠨᠢ ᠪᠠᠭᠠ ᠨᠢ ᠴᠦ᠍ ᠪᠦᠷ ᠪᠠᠭᠠᠷᠠᠭ ᠦᠭᠡᠢ ! ᠭᠡᠵᠦ ᠳᠠᠸᠠ ᠨᠠᠴᠢᠨ ᠂ ᠥᠯᠵᠡᠢ ᠬᠡᠦᠬᠡᠨ ᠤ ᠬᠡᠳᠦᠨ ᠬᠡᠦᠬᠡᠳ ᠢ᠋ ᠦᠵᠡᠭᠡᠳ ᠰᠡᠳᠬᠢᠯ ᠠᠮᠠᠷᠠᠵᠤ ᠪᠣᠷᠣ ᠭᠡᠷ ᠦ᠋ᠨ ᠬᠢᠨᠢ ᠡᠵᠡᠨ ᠪᠣᠯᠤᠨ ᠰᠠᠭᠤᠵᠠᠢ ᠃
ᠥᠯᠵᠡᠢ ᠬᠡᠦᠬᠡᠨ ᠭᠤᠴᠢᠨ ᠭᠤᠷᠪᠠᠲᠠᠢ ᠂ ᠥᠨᠳᠥᠷ ᠂ ᠴᠡᠪᠡᠷᠬᠡᠨ ᠂ ᠶᠠᠳᠠᠭᠤᠬᠠᠨ ᠃
ᠶᠡᠬᠡ ᠬᠦᠦ ᠯᠤᠲᠠ ᠨᠢ ᠠᠷᠪᠠᠨ ᠨᠢᠭᠡ ᠲᠡᠢ ᠂ ᠬᠠᠮᠤᠭ ᠤ᠋ᠨ ᠪᠠᠭᠠ ᠬᠦᠦ ᠪᠠᠶᠠᠷ ᠨᠢ ᠭᠤᠷᠪᠠᠨ ᠨᠠᠰᠤ ᠲᠠᠢ ᠪᠣᠯᠪᠠᠴᠤ ᠬᠡᠯᠡ ᠳ᠋ᠦ᠍ ᠰᠠᠢᠨ᠃ ᠲᠡᠳᠡᠨ ᠤ ᠵᠠᠪᠰᠠᠷ ᠤ᠋ᠨ ᠬᠡᠳᠦᠨ ᠥᠬᠢᠳ ᠭᠡᠮ ᠦᠭᠡᠢ ᠳᠠᠷᠤᠤᠬᠠᠨ᠃ ᠳᠠᠸᠠ ᠨᠠᠴᠢᠨ ᠳᠥᠴᠢ ᠡᠷᠭᠢᠮᠡ ᠨᠠᠰᠤ ᠲᠠᠢ ᠂ ᠠᠮᠢᠨ ᠵᠢᠭᠤᠯᠭᠠ ᠰᠠᠢᠲᠠᠢ ᠂ ᠭᠠᠭᠴᠠ ᠪᠡᠶᠡ ᠲᠤᠯᠠ ᠥᠯᠵᠡᠢ ᠲᠡᠢ ᠡᠢᠨ ᠬᠦ᠌ ᠨᠡᠢᠯᠡᠵᠡᠢ ᠃
ᠥᠯᠵᠡᠢ ᠴᠦ᠍ ᠰᠠᠢᠨ ᠂ ᠬᠡᠦᠬᠡᠳ ᠦ᠋ᠳ ᠴᠦ᠍ ᠰᠠᠢᠨ ᠲᠤᠯᠠ ᠳᠠᠸᠠ ᠤᠯᠠᠮ ᠤᠯᠠᠮ ᠢ᠋ᠶ᠋ᠠᠷ ᠳᠠᠪᠠᠷᠠᠵᠤ ᠪᠦᠭᠦᠳᠡ ᠶ᠋ᠢ ᠦᠭᠡ ᠳᠠᠭᠤᠨ ᠦᠭᠡᠢ ᠵᠠᠬᠢᠷᠴᠤ ᠂ ᠬᠡᠮᠵᠢᠶᠡ ᠦᠭᠡᠢ ᠡᠵᠡᠨ ᠪᠣᠯᠵᠤ ᠡᠳᠦᠷ ᠢᠷᠡᠬᠦ ᠲᠤᠲᠤᠮ ᠢ᠋ᠶ᠋ᠠᠨ ᠴᠢᠩᠭᠠᠷᠠᠪᠠ ᠃
ᠨᠢᠭᠡ ᠡᠳᠦᠷ ᠮᠣᠳᠣᠨ ᠣᠷᠣ ᠳᠡᠭᠡᠷᠡ ᠨᠢᠴᠦᠭᠦᠨ ᠴᠦᠷᠡᠢᠵᠦ ᠬᠡᠪᠲᠡᠭᠡᠳ ᠬᠠᠯᠠᠭᠤᠨ ᠳ᠋ᠤ᠌ ᠤᠨᠲᠠᠵᠤ ᠶᠠᠳᠠᠨ ᠴᠢᠬᠤᠯᠳᠠᠵᠤ ᠪᠠᠢᠲᠠᠯᠠ ᠭᠡᠷ ᠲᠦ᠍ ᠬᠤᠪᠢᠩ ᠰᠠᠪᠠ ᠬᠠᠩᠭᠢᠨᠠᠨ ᠶᠡᠬᠡ ᠴᠢᠮᠡᠭᠡ ᠭᠠᠷᠴᠤ ᠰᠣᠴᠢᠭᠠᠪᠠ ᠃ ᠡᠷᠭᠢᠨ ᠬᠠᠷᠠᠪᠠᠯ ᠶᠡᠬᠡ ᠬᠦᠦ ᠯᠤᠲᠠ ᠤᠰᠤ ᠤᠤᠭᠤᠬᠤ ᠭᠡᠳ ᠪᠤᠳᠤᠯᠢᠵᠤ ᠪᠠᠢᠪᠠ ᠃
– ᠶᠠᠮᠠᠷ ᠶᠠᠭᠤᠮᠠ ᠪᠠᠨ ᠬᠠᠩᠭᠢᠨᠠᠭᠤᠯᠤᠭᠠᠳ ᠪᠠᠢᠭᠠ ᠶᠤᠮ ᠪᠣᠢ ? ᠬᠥᠮᠦᠨ ᠤᠨᠲᠠᠭᠤᠯᠬᠤ ᠦᠭᠡᠢ ! ᠭᠡᠰᠡᠨ ᠳ᠋ᠦ᠍ ᠯᠤᠲᠠ ᠲᠣᠪ ᠳᠤᠭᠤᠢ ᠭᠣᠳᠬᠢᠨ ᠭᠠᠷᠪᠠ ᠃
ᠲᠡᠭᠡᠭᠡᠳ ᠨᠡᠯᠢᠶᠡᠳ ᠵᠡᠭᠦᠷᠮᠡᠭᠯᠡᠲᠡᠯᠡ ᠬᠣᠶᠠᠷ ᠥᠬᠢᠨ ᠠᠷᠤ ᠳ᠋ᠤᠨᠢ ᠫᠠᠷᠭᠢᠲᠠᠯᠠ ᠢᠨᠢᠶᠡᠳᠦ ᠠᠯᠳᠠᠭᠰᠠᠨ ᠳ᠋ᠤ᠌ ᠳᠠᠸᠠ ᠰᠣᠴᠢᠵᠤ ᠬᠣᠶᠠᠷ ᠲᠣᠮᠣ ᠤᠯᠠᠭᠠᠨ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠲᠡᠳᠡᠨ ᠢ᠋ ᠬᠠᠷᠠᠨ᠄
– ᠶᠠᠭᠠᠬᠢᠪᠠ ? ᠭᠠᠷᠴᠠᠭᠠ ! ᠭᠡᠵᠦ ᠵᠠᠩᠳᠤᠷᠪᠠ ᠃ ᠬᠣᠶᠠᠷ ᠥᠬᠢᠨ ᠴᠦ᠍ ᠦᠷᠭᠦᠭᠰᠡᠨ ᠢᠮᠠᠭᠠ ᠮᠡᠲᠦ ᠱᠣᠷᠳ᠋ᠬᠢᠨ ᠣᠳᠪᠠ ᠃
ᠠᠷᠠᠢ ᠭᠡᠵᠦ ᠨᠠᠮ ᠤᠨᠲᠠᠬᠤ ᠭᠡᠲᠡᠯᠡ ᠪᠦᠷ ᠠᠷᠤ ᠳ᠋ᠤᠨᠢ ᠰᠠᠨᠳᠠᠯᠢ ᠥᠩᠬᠥᠷᠢᠭᠦᠯᠴᠢᠬᠡᠪᠡ ᠃ ᠳᠠᠸᠠ ᠨᠢᠳᠦ ᠪᠡᠨ ᠠᠨᠢᠭ᠍ᠰᠠᠨ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠄
– ᠶᠠᠮᠠᠷ ᠴᠢᠰᠤ ᠪᠠᠨ ᠬᠢᠭᠡᠳ ᠶᠠᠭᠤᠮᠠ ᠫᠢᠵᠢᠭᠢᠨᠡᠭᠦᠯᠦᠭᠡᠳ ᠬᠥᠮᠦᠨ ᠤᠨᠲᠠᠭᠤᠯᠬᠤ ᠦᠭᠡᠢ ᠪᠠᠢᠨᠠ ? ᠴᠢᠮᠡᠭᠡ ᠦᠭᠡᠢ ᠪᠠᠢᠬᠤ ᠦᠭᠡᠢ ᠪᠣᠯ ᠨᠠᠮ ᠴᠣᠬᠢᠴᠢᠬᠠᠨᠠ ᠰᠢᠦ ! ᠭᠡᠵᠦ ᠥᠭᠦᠯᠡᠪᠡ᠃
ᠭᠡᠲᠡᠯᠡ ᠠᠷᠤ ᠳ᠋ᠤᠨᠢ :
– ᠴᠣᠬᠢᠵᠤ ᠦᠵᠡ ᠯᠡ ᠳᠠ ! ᠭᠡᠬᠦ ᠳᠠᠭᠤᠨ ᠳᠤᠭᠤᠯᠳᠠᠬᠤ ᠳ᠋ᠤ᠌ ᠭᠠᠢᠬᠠᠨ ᠡᠷᠭᠢᠵᠦ ᠬᠠᠷᠠᠪᠠᠯ ᠭᠡᠷ ᠲᠦ᠍ ᠬᠥᠮᠦᠨ ᠠᠯᠠᠭᠠ ᠃ ᠪᠦᠷ ᠭᠠᠢᠬᠠᠨ ᠥᠨᠳᠡᠢᠨ ᠰᠠᠭᠤᠲᠠᠯᠠ :
– ᠴᠢᠮᠠᠶ᠋ᠢ ᠨᠠᠮ ᠴᠣᠬᠢᠨᠠ ᠰᠢᠦ ! ᠭᠡᠵᠦ ᠪᠦᠷ ᠳᠡᠷᠭᠡᠳᠡ ᠨᠢ ᠲᠣᠳᠣᠬᠠᠨ ᠬᠡᠯᠡᠬᠦ ᠳ᠋ᠦ᠍ ᠰᠠᠶᠢ ᠣᠯᠵᠤ ᠬᠠᠷᠠᠪᠠᠯ ᠥᠯᠵᠡᠢ ᠶ᠋ᠢᠨ ᠬᠠᠮᠤᠭ ᠤ᠋ᠨ ᠪᠠᠭᠠ ᠬᠦᠦ ᠪᠠᠶᠠᠷ ᠪᠢᠴᠢᠬᠠᠨ ᠭᠠᠷ ᠲᠠᠭᠠᠨ ᠠᠯᠤᠬᠠ ᠪᠠᠷᠢᠴᠢᠬᠠᠭᠰᠠᠨ ᠨᠢᠴᠦᠭᠦᠨ ᠵᠣᠭᠰᠣᠵᠤ ᠪᠠᠢᠪᠠ ᠃
ᠳᠠᠸᠠ ᠨᠠᠴᠢᠨ ᠤ᠋ ᠢᠨᠢᠶᠡᠳᠦ ᠬᠦᠷᠦᠭᠰᠡᠨ ᠢ᠋ᠶ᠋ᠡᠨ ᠤᠳᠠᠯ ᠦᠭᠡᠢ ᠠᠶᠤᠬᠤ ᠴᠤ᠌ ᠰᠢᠭ᠋ ᠨᠢᠭᠡ ᠯᠡ ᠠᠶᠠᠭᠦᠢ ᠪᠣᠯᠪᠠ ᠃
ᠬᠠᠮᠤᠭ ᠪᠠᠭᠠ ᠨᠢ ᠡᠢᠮᠦ ᠪᠠᠢᠭᠠ ᠶᠤᠮ ᠴᠢᠨᠢ ᠲᠣᠮᠣ ᠨᠤᠭᠤᠳ ᠨᠢ ᠴᠦ᠍ ᠪᠦᠷ ᠪᠠᠭᠠᠷᠠᠭ ᠦᠭᠡᠢ ᠭᠡᠵᠦ ᠪᠣᠳᠣᠭᠠᠳ ᠴᠢᠪ ᠴᠢᠮᠡᠭᠡ ᠦᠭᠡᠢ ᠪᠣᠰᠴᠤ ᠭᠠᠷᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ ᠨᠠᠷᠠᠨ ᠲᠣᠭᠣᠨᠣ