ᠳᠡᠩᠳᠡᠬᠦᠦ ᠳᠡᠨᠳᠡᠪ – ᠯ᠂ ᠪᠠᠳᠠᠷᠴᠢ Дэндүү дэндэв – Л ᠂ Бадарч
319ᠳᠡᠩᠳᠡᠬᠦᠦ ᠳᠡᠨᠳᠡᠪ
ᠠᠯᠢᠶᠠ ᠭᠠᠯᠰᠠᠩ ᠭᠤᠸᠠᠢ ᠶ᠋ᠢ ᠲᠠ ᠲᠠᠨᠢᠬᠤ ᠤᠤ ? ᠮᠥᠨ ᠰᠦᠷᠡᠬᠡᠢ ᠠᠯᠢᠶᠠ ᠬᠥᠮᠦᠨ ᠶᠦᠮ ᠰᠢᠦ ᠂ ᠪᠢ ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ ᠠᠯᠢᠶᠠ ᠭᠠᠯᠰᠠᠩ ᠲᠠᠢ ᠠᠭᠤᠯᠵᠠᠵᠤ ᠪᠢᠯᠡ ᠃ ᠲᠡᠭᠡᠬᠦ ᠳ᠋ᠦ᠍ ᠭᠠᠯᠰᠠᠩ ᠭᠤᠸᠠᠢ ᠨᠡᠢᠰᠯᠡᠯ ᠦ᠋ᠨ ᠨᠢᠭᠡ ᠪᠠᠢᠭᠤᠯᠭᠠ ᠳ᠋ᠤ᠌ ᠮᠣᠷᠢᠨ ᠲᠡᠷᠭᠡ ᠬᠥᠲᠥᠯᠳᠡᠭ ᠪᠠᠢᠯᠠ᠃ ᠨᠠᠮᠤᠷ ᠤ᠋ᠨ ᠠᠵᠢᠷᠭᠠᠨ ᠪᠣᠷᠣᠭᠠ ᠵᠦᠰᠡᠷᠡᠭᠰᠡᠨ ᠨᠢᠭᠡ ᠡᠳᠦᠷ ᠪᠢ ᠂ ᠲᠡᠭᠦᠨ ᠢ᠋ ᠰᠤᠷᠠᠯᠠᠭᠰᠠᠭᠠᠷ ᠠᠵᠢᠯᠯᠠᠳᠠᠭ ᠭᠠᠵᠠᠷ ᠤ᠋ᠨ ᠬᠢᠨᠢ ᠠᠵᠤ ᠠᠬᠤᠢ ᠶ᠋ᠢᠨ ᠬᠠᠰᠢᠶᠠᠨ ᠳ᠋ᠤ᠌ ᠣᠴᠢᠯᠠ᠃ ᠰᠠᠢᠳ ᠳᠠᠷᠤᠭᠠ ᠨᠠᠷ ᠤ᠋ᠨ ᠢ᠋ᠶ᠋ᠠᠨ ᠨᠢᠳᠦᠨ ᠡᠴᠡ ᠳᠠᠯᠳᠠ ᠪᠠᠢᠳᠠᠭ ᠰᠠᠩ ᠤ᠋ᠨ ᠬᠠᠰᠢᠶᠠ ᠵᠠᠪᠠᠯ ᠵᠠᠮᠪᠠᠷᠠᠭᠠ ᠦᠭᠡᠢ ᠪᠠᠢᠳᠠᠭ ᠶᠣᠰᠣᠲᠠᠢ ᠪᠢᠰᠢ ᠪᠣᠯᠪᠠᠴᠤ ᠲᠡᠷᠡ ᠬᠠᠰᠢᠶᠠ ᠲᠡᠢᠮᠦ ᠶᠣᠰᠣᠲᠠᠢ ᠶᠤᠮ ᠰᠢᠭ᠋ ᠲᠡᠮᠡᠭᠡ ᠲᠤᠶᠢᠯᠵᠤ ᠂ ᠲᠡᠷᠭᠡ ᠬᠥᠭᠯᠡᠭᠦᠯᠴᠢᠬᠡᠭᠰᠡᠨ ᠶᠦᠮ ᠦᠦ ᠳᠡ ᠭᠡᠮᠡᠷ ᠪᠠᠢᠵᠤ ᠪᠢᠯᠡ᠃ ᠬᠠᠰᠢᠶᠠᠨ ᠤ᠋ ᠬᠢᠨᠢ ᠬᠠᠭᠠᠯᠭᠠ ᠥᠥ᠋ᠷᠥᠭᠡᠰᠦᠨ ᠳᠠᠯᠪᠠᠭᠠ ᠦᠭᠡᠢ ᠥᠷᠥᠭᠡᠰᠦᠨ ᠨᠢ ᠳᠠᠯᠪᠠᠭᠲᠠᠯᠠ ᠣᠢᠴᠢᠭᠠᠳ ᠬᠠᠭᠠᠭᠳᠠᠬᠤ ᠪᠠᠨ ᠪᠤᠯᠢᠴᠢᠬᠠᠭᠰᠠᠨ ᠠᠵᠢ᠃ ᠡᠢᠮᠦ ᠬᠠᠭᠠᠯᠭᠠ ᠶ᠋ᠢ ᠮᠥᠩᠬᠡ ᠶ᠋ᠢᠨ ᠣᠩᠭᠣᠷᠬᠠᠢ ᠬᠠᠭᠠᠯᠭᠠ ᠭᠡᠯᠲᠡᠢ ᠃
ᠲᠡᠷᠡ ᠮᠥᠩᠬᠡ ᠶ᠋ᠢᠨ ᠬᠠᠭᠠᠯᠭᠠ ᠪᠠᠷ ᠣᠷᠣᠪᠠᠯ ᠂ ᠬᠠᠰᠢᠶᠠ ᠳᠣᠲᠣᠷᠠ ᠨᠢ ᠭᠢᠰᠬᠢᠬᠦ ᠭᠠᠵᠠᠷ ᠦᠭᠡᠢ ᠱᠠᠯᠪᠠᠭ ᠨᠠᠯᠠᠢᠵᠤ᠂ ᠡᠯᠳᠡᠪ ᠦ᠋ᠨ ᠬᠣᠭ ᠳᠣᠲᠣᠷᠠ ᠨᠢ ᠬᠥᠪᠦᠭᠡᠳ ᠪᠣᠷᠣᠭᠠᠨ ᠤ᠋ ᠳᠤᠰᠤᠯ ᠤ᠋ᠨ ᠠᠶᠠ ᠪᠠᠷ ᠢᠵᠠᠭᠠᠨᠠᠨ ᠪᠤᠴᠠᠯᠵᠤ ᠪᠠᠢᠪᠠ ᠃ ᠲᠡᠷᠡ ᠱᠠᠯᠪᠠᠭ ᠳᠤᠮᠳᠠᠭᠤᠷ ᠰᠢᠨᠡᠬᠡᠨ ᠲᠤᠢᠫᠤᠤ᠂ ᠴᠠᠭᠠᠰᠤᠨ ᠬᠡᠦᠳᠡᠢ ᠲᠡᠢ ᠼᠸᠮᠸᠨᠲ᠂ ᠮᠣᠳᠣᠨ ᠬᠠᠢᠷᠴᠠᠭ ᠲᠠᠢ ᠬᠠᠳᠠᠭᠠᠰᠤ᠂ ᠡᠪᠳᠡᠷᠡᠭᠰᠡᠨ ᠰᠠᠨᠳᠠᠯᠢ ᠶ᠋ᠢᠨ ᠵᠥᠭᠡᠯᠡᠪᠴᠢ ᠂ ᠵᠢᠪᠡᠷᠡᠭᠰᠡᠨ ᠲᠡᠮᠦᠷ ᠬᠤᠪᠢᠩ᠂ ᠠᠺᠺᠥ᠋ᠮᠯᠶᠠᠲ᠋ᠣᠷ ( ᠳ᠋ᠢᠶᠠᠨ ᡂᠢ) ᠂ ᠷᠠᠳᠢᠶᠠᠲ᠋ᠣᠷ ( ᠬᠥᠷᠥᠭᠡᠬᠦ ᠲᠥᠬᠥᠭᠡᠷᠦᠮᠵᠢ) ᠂ ᠶᠠᠢᠪᠠᠢᠭᠰᠠᠨ ᠶᠠᠨᠲᠤᠩ ᠂ ᠶᠠᠢᠪᠠᠢᠭᠰᠠᠨ ᠳᠠᠩᠳᠦᠩ (ᠬᠣᠭ ᠬᠠᠶᠠᠬᠤ ᠰᠠᠪᠠ) ᠵᠡᠷᠭᠡ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠶᠠᠭᠤᠮᠠ ᠪᠠᠷ ᠳᠠᠮᠵᠢᠭᠤᠷ ᠲᠠᠯᠪᠢᠵᠠᠢ ᠃
ᠨᠠᠮᠠ ᠶ᠋ᠢ ᠬᠠᠰᠢᠶᠠᠨ ᠳᠤᠮᠳᠠ ᠬᠦᠷᠦᠭᠡ ᠦᠭᠡᠢ ᠶᠠᠪᠤᠲᠠᠯᠠ ᠭᠠᠳᠠᠨᠠ ᠠ᠋ᠴᠠ ᠶᠠᠨᠳᠠᠩ ᠴᠠᠭᠠᠨ ᠮᠣᠷᠢ ᠬᠥᠯᠦᠭᠰᠡᠨ ᠲᠡᠷᠭᠡ ᠣᠷᠣᠵᠤ ᠢᠷᠡᠪᠡ᠃ ᠲᠡᠷᠭᠡᠨ ᠳᠡᠭᠡᠷᠡ ᠨᠡᠯᠢᠶᠡᠳ ᠶᠠᠭᠤᠮᠠ ᠠᠴᠢᠭᠠᠳ ᠬᠣᠶᠠᠷ ᠬᠥᠮᠦᠨ ᠰᠠᠭᠤᠵᠠᠢ᠃ ᠲᠡᠷᠡ ᠬᠣᠶᠠᠷ ᠤ᠋ᠨ ᠨᠢᠭᠡ ᠨᠢ ᠵᠢᠵᠢᠭᠬᠡᠨ ᠪᠡᠶᠡ ᠲᠡᠢ᠂ ᠬᠥᠬᠡ ᠡᠪᠦᠭᠡᠨ ᠣᠨᠢᠭᠠᠷ ᠨᠢᠳᠦ ᠪᠡᠷ ᠢᠨᠢᠶᠡᠮᠰᠦᠭᠯᠡᠨᠡ᠃ ᠡᠨᠡ ᠪᠣᠯ ᠠᠯᠢᠶᠠ ᠭᠠᠯᠰᠠᠩ ᠠᠵᠢ᠃ ᠨᠥᠭᠥᠭᠡᠬᠢ ᠨᠢ ᠳᠤᠮᠳᠠ ᠵᠡᠷᠭᠡ ᠶ᠋ᠢᠨ ᠨᠢᠷᠤᠭᠤ ᠲᠠᠢ᠂ ᠲᠤᠷᠠᠩᠬᠠᠢ ᠰᠢᠷᠠ ᠴᠢᠷᠠᠢ ᠲᠠᠢ ᠢᠷᠪᠠᠭᠠᠷ ᠬᠥᠮᠦᠨ᠂ ᠲᠡᠷᠡ ᠳᠡᠭᠡᠷᠡ ᠲᠠᠯᠪᠢᠭ᠌ᠰᠠᠨ ᠳᠤᠭᠤᠢ ᠶ᠋ᠢ ᠬᠢᠴᠢᠶᠡᠩᠭᠦᠢᠯᠡᠨ ᠲᠦᠰᠢᠵᠦ ᠢᠷᠡᠵᠡᠢ᠃ ᠲᠡᠳᠡ ᠮᠣᠷᠢᠨ ᠲᠡᠷᠭᠡ ᠪᠡᠨ ᠤᠬᠤᠷᠢᠭᠤᠯᠤᠨ᠂ ᠰᠺᠠᠯᠠᠳ᠋ ( ᠠᠭᠤᠯᠬᠤ᠂ ᠬᠥᠮᠥᠷᠭᠡ ) ᠶ᠋ᠢᠨ ᠬᠠᠭᠠᠯᠭᠠᠨ ᠳ᠋ᠤ᠌ ᠲᠤᠯᠭᠠᠨ ᠵᠣᠭᠰᠣᠭᠠᠭᠠᠳ ᠶᠠᠭᠤᠮᠠ ᠪᠠᠨ ᠪᠠᠭᠤᠯᠭᠠᠬᠤ ᠪᠠᠷ ᠪᠡᠯᠡᠳᠬᠡᠪᠡ᠃ ᠨᠠᠮᠠ ᠶ᠋ᠢ ᠭᠠᠯᠰᠠᠩ ᠭᠤᠸᠠᠢ ᠲᠠᠢ ᠶᠠᠷᠢᠯᠴᠠᠵᠤ ᠪᠠᠢᠬᠤ ᠵᠠᠭᠤᠷᠠ ᠥᠨᠥᠬᠢ ᠢᠷᠪᠠᠭᠠᠷ ᠬᠥᠮᠦᠨ ᠰᠺᠠᠯᠠᠳ᠋ ᠤ᠋ᠨ ᠢ᠋ᠶ᠋ᠠᠨ ᠬᠠᠭᠠᠯᠭᠠ ᠶ᠋ᠢ ᠨᠡᠭᠡᠭᠡᠵᠦ ᠨᠠᠨᠳᠢᠨ ᠳᠤᠭᠤᠢ ᠪᠠᠨ ᠡᠷᠭᠦᠵᠦ ᠠᠪᠠᠴᠢᠭᠠᠳ ᠰᠺᠠᠯᠠᠳ᠋ ᠲᠠᠭᠠᠨ ᠣᠷᠣᠭᠤᠯᠤᠯᠠ᠃ ᠲᠡᠭᠡᠭᠡᠳ ᠲᠡᠷᠡ ᠬᠥᠮᠦᠨ ᠲᠡᠷᠭᠡᠨ ᠳᠡᠭᠡᠷᠡ ᠪᠠᠢᠭᠰᠠᠨ ᠴᠠᠭᠠᠰᠤᠨ ᠬᠠᠢᠷᠴᠠᠭ ᠲᠠᠢ ᠶᠠᠭᠤᠮᠠ ᠶ᠋ᠢ ᠰᠢᠭᠦᠷᠡᠵᠦ ᠠᠪᠤᠭᠠᠳ ᠰᠺᠠᠯᠠᠳ᠋ ᠤ᠋ᠨ ᠢ᠋ᠶ᠋ᠠᠨ ᠱᠠᠯᠠ ᠳᠡᠭᠡᠷᠡ ᠳ᠋ᠦ᠍ᠷ ᠲᠠᠷ ᠬᠢᠲᠡᠯᠡ ᠨᠢ ᠰᠢᠷᠦᠭᠦᠨ ᠳᠣᠷᠢᠭᠤᠨ ᠲᠠᠯᠪᠢᠵᠤ ᠡᠬᠢᠯᠡᠪᠡ᠃
– ᠡᠨᠡ ᠴᠢᠨᠢ ᠴᠢᠳᠡᠩ ( ᠴᠠᠬᠢᠯᠭᠠᠨ ᠳ᠋ᠧᠩ) ᠦ᠋ᠨ ᠪᠦᠷᠬᠦᠭᠦᠯ᠂ ᠷᠠᠳᠢᠣ᠋ ᠡᠨᠡ ᠲᠡᠷᠡ ᠭᠡᠰᠡᠨ ᠳᠠᠩᠳᠠ ᠡᠮᠵᠡᠭ ᠶᠠᠭᠤᠮᠠ ᠭᠡᠳᠡᠭ ᠢ᠋ ᠳᠠᠨᠳᠠᠪ ᠮᠢᠨᠢ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠰᠠᠢᠨ ᠮᠡᠳᠡᠬᠦ ᠬᠥᠮᠦᠨ᠂ ᠲᠡᠭᠡᠭᠡᠳ ᠶᠠᠭᠠᠬᠢᠭ᠌ᠰᠠᠨ ᠴᠤ᠌ ᠰᠢᠷᠦᠭᠦᠨ ᠬᠠᠶᠠᠯᠠᠵᠤ ᠰᠠᠴᠤᠯᠠᠬᠤ ᠶᠤᠮ ᠪᠣᠢ ᠳᠠ᠁ ᠭᠡᠵᠦ ᠭᠠᠯᠰᠠᠩ ᠭᠤᠸᠠᠢ ᠪᠠᠪᠠᠲᠤᠨᠠᠭᠠᠳ ᠲᠡᠷᠡ ᠶᠠᠭᠤᠮᠠᠰ ᠢ᠋ ᠶᠡᠬᠡ ᠯᠡ ᠪᠣᠯᠭᠣᠮᠵᠢᠯᠠᠨ ᠵᠥᠭᠡᠭᠡᠬᠦ ᠵᠠᠭᠤᠷᠠ ᠨᠠᠳᠠ ᠬᠠᠨᠳᠤᠵᠤ ᠬᠡᠯᠡᠭᠰᠡᠨ ᠨᠢ᠄
– ᠡᠨᠡ ᠳᠠᠨᠳᠠᠪ ᠡᠨᠳᠡᠬᠢ ᠶ᠋ᠢᠨ ᠠᠵᠤ ᠠᠭᠤᠢ ᠶ᠋ᠢᠨ ᠳᠠᠷᠤᠭᠠ᠂ ᠺᠣᠮᠸᠨᠳ᠋ᠨᠠᠲ᠋ ( ᠡᠷᠬᠢᠯᠡᠭᠴᠢ) ᠬᠣᠶᠠᠷ ᠢ᠋ ᠬᠠᠪᠰᠤᠷᠤᠨ ᠬᠢᠵᠦ ᠪᠠᠢᠭᠠ ᠶᠤᠮ᠃ ᠨᠢᠮᠪᠠᠢᠯᠠᠬᠤ ᠶᠠᠭᠤᠮᠠᠨ ᠳᠡᠭᠡᠷᠡ ᠡᠨᠡ ᠰᠢᠭ ᠨᠢᠮᠪᠠᠢ ᠬᠥᠮᠦᠨ ᠣᠯᠬᠤ ᠳ᠋ᠤ᠌ ᠪᠡᠷᠬᠡ᠂ ᠲᠡᠷᠡ ᠳᠤᠭᠤᠢ ᠶ᠋ᠢ ᠬᠠᠷᠠ᠂ ᠠᠷᠪᠠᠨ ᠵᠢᠯ ᠤᠨᠤᠭᠰᠠᠨ ᠭᠡᠬᠦ ᠳ᠋ᠦ᠍ ᠣᠳᠣ ᠴᠤ᠌ ᠰᠢᠨᠡ ᠪᠡᠷ ᠰᠢᠦ᠃ ᠡᠬᠡᠨᠡᠷ ᠳᠤᠭᠤᠢ ᠬᠣᠶᠠᠷ ᠤ᠋ᠨ ᠠᠯᠢᠨ ᠳ᠋ᠤᠨᠢ ᠢᠯᠡᠭᠦᠦ ᠬᠠᠢᠷᠠᠲᠠᠢ ᠪᠣᠢ ᠭᠡᠵᠦ ᠠᠰᠠᠭᠤᠪᠠᠯ ᠳᠠᠨᠳᠠᠪ ᠳᠤᠭᠤᠢ ᠳ᠋ᠠᠭᠠᠨ ᠬᠠᠢᠷᠠᠲᠠᠢ ᠭᠡᠬᠦ ᠬᠥᠮᠦᠨ ᠶᠦᠮ ᠰᠢᠦ᠃
– ᠳᠠᠨᠳᠠᠪ ᠴᠢᠨᠦ ᠡᠨᠡ ᠴᠢᠨᠢ ᠭᠸᠷᠮᠠᠨ ᠳᠤᠭᠤᠢ ᠭᠡᠳᠡᠭ ᠪᠠᠢᠬᠠ ᠠ᠋ ᠭᠡᠵᠦ ᠶᠣᠵᠣᠲᠠᠢ ᠨᠢ ᠠᠷᠭᠠ ᠦᠭᠡᠢ ᠬᠡᠯᠡᠭᠡᠳ ᠨᠠᠳᠠ ᠤᠷᠤᠭᠤ ᠨᠢᠳᠦ ᠪᠡᠨ ᠢᠷᠮᠡᠵᠦ ᠪᠠᠢᠵᠤ ᠪᠢᠯᠡ᠃ ᠲᠡᠳᠡ ᠶᠠᠭᠤᠮᠠ ᠪᠠᠨ ᠣᠷᠣᠭᠤᠯᠵᠤ ᠭᠦᠢᠴᠡᠯᠡ᠂ ᠳᠠᠨᠳᠠᠪ ᠰᠺᠠᠯᠠᠳ᠋ ᠤ᠋ᠨ ᠢ᠋ᠶ᠋ᠠᠨ ᠳᠣᠲᠣᠭᠠᠳᠤ ᠪᠠᠢᠳᠠᠯ ᠢ᠋ ᠨᠢᠭᠡ ᠰᠢᠷᠪᠠᠵᠤ ᠬᠠᠷᠠᠯᠠ᠃ ᠡᠨᠡ ᠰᠺᠠᠯᠠᠳ ᠲᠤ᠌ ᠰᠠᠢᠬᠠᠨ ᠡᠳ᠋ ᠬᠣᠭ᠌ᠰᠢᠯ ᠵᠥᠩᠳᠡᠭᠡᠨ ᠪᠠᠢᠭᠠ ᠪᠣᠯᠪᠠᠴᠤ ᠪᠣᠬᠢᠷ ᠱᠠᠯᠠᠨ ᠳᠡᠭᠡᠷᠡ ᠬᠣᠭ ᠰᠤᠭ ᠰᠢᠭ᠋ ᠣᠪᠣᠭᠠᠯᠠᠵᠤ ᠣᠷᠭᠢᠭ᠌ᠰᠠᠨ ᠨᠢ ᠬᠠᠷᠠ ᠪᠠᠭᠤᠮᠠᠷ ᠰᠠᠨᠠᠭᠳᠠᠯᠠ᠃ ᠲᠡᠷᠡ ᠶᠠᠭᠤᠮᠠᠰ ᠤ᠋ᠨ ᠳᠣᠣᠷᠠ ᠠ᠋ᠴᠠ ᠨᠢᠭᠡ ᠰᠠᠢᠬᠠᠨ ᠴᠢᠨᠣᠠ ᠶ᠋ᠢᠨ ᠳᠠᠬᠤ ᠶ᠋ᠢᠨ ᠬᠠᠨᠴᠤᠢ ᠴᠤᠬᠤᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠷ ᠳᠠᠨᠳᠠᠪ 《 ᠳᠠᠨᠳᠠᠪ ᠪᠣᠷᠣᠭᠠᠨ ᠳ᠋ᠤ᠌ ᠶᠠᠭᠠᠬᠢᠮᠤᠢ ᠭᠡᠵᠦ ᠡᠮᠦᠰᠴᠦ ᠶᠠᠪᠤᠭᠠ 》 ᠮᠠᠢᠵᠢᠭᠠᠢ ᠭᠤᠲᠤᠯ ᠤ᠋ᠨ ᠢ᠋ᠶ᠋ᠠᠨ ᠰᠢᠪᠠᠬᠠᠢ ᠶ᠋ᠢ ᠠᠵᠢᠭ ᠴᠤ᠌ ᠦᠭᠡᠢ ᠠᠷᠴᠢᠵᠤ ᠪᠠᠢᠪᠠ ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠲᠡᠷᠡ ᠬᠣᠶᠠᠷ ᠭᠤᠲᠤᠯ ᠢ᠋ᠶ᠋ᠠᠨ ᠲᠠᠢᠯᠴᠢᠬᠠᠭᠠᠳ ᠢᠨᠴᠠᠭᠯᠠᠨ ᠪᠠᠢᠵᠤ ᠥᠮᠥᠳᠦᠨ ᠦ᠌ ᠪᠡᠨ ᠪᠠᠴᠢᠭᠤᠬᠠᠨ ᠰᠢᠷᠬᠤᠨᠠᠭ ᠢ᠋ ᠡᠪᠦᠳᠦᠭ ᠲᠡᠭᠡᠨ ᠬᠦᠷᠲᠡᠯᠡ ᠰᠢᠮᠡᠯᠦᠯᠡ ᠃ ᠲᠡᠭᠡᠭᠡᠳ ᠭᠤᠲᠤᠯ ᠲᠣᠭᠣᠷ ᠬᠣᠶᠠᠷ ᠢ᠋ᠶ᠋ᠠᠨ ᠠᠪᠴᠤ ᠭᠠᠷᠤᠭᠠᠳ ᠰᠬᠡᠯᠡᠳ᠋ ᠢ᠋ᠶ᠋ᠡᠨ ᠴᠣᠣᠵᠢᠯᠠᠯᠠ᠃ ᠯᠣᠮᠪᠣᠳᠠᠯᠠ ① ᠃ ᠪᠣᠷᠣᠭᠠ ᠴᠤ᠌ ᠣᠪᠣᠭᠠ ᠰᠡᠪ ᠬᠢᠭᠰᠡᠨ ᠪᠠᠢᠯᠠ ᠃
ᠳᠠᠨᠳᠠᠪ ᠵᠡᠭᠦᠨ ᠰᠤᠭᠤᠨ ᠳ᠋ᠠᠭᠠᠨ ᠬᠣᠶᠠᠷ ᠭᠤᠲᠤᠯ ᠢ᠋ᠶ᠋ᠠᠨ ᠬᠠᠪᠴᠢᠭᠤᠯᠤᠭᠠᠳ ᠪᠠᠷᠠᠭᠤᠨ ᠮᠥᠷᠦᠨ ᠳᠡᠭᠡᠷᠡ ᠪᠡᠨ ᠨᠠᠨᠳᠢᠨ ᠳᠤᠭᠤᠢ ᠪᠠᠨ ᠡᠭᠦᠷᠴᠦ᠂ ᠨᠢᠴᠦᠭᠦᠨ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠱᠠᠯᠪᠠᠭᠠ ᠶ᠋ᠢ ᠲᠤᠭᠤᠯᠵᠤ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠ ᠤᠷᠤᠭᠤ ᠠᠯᠬᠤᠯᠠᠪᠠ ᠃ 《 ᠬᠥᠯ ᠦ᠋ᠨ ᠲᠥᠯᠥᠭᠡ᠂ ᠭᠤᠲᠤᠯ ᠪᠠᠢᠳᠠᠭ ᠪᠢᠰᠢ ᠪᠢᠯᠡ ᠤᠤ 》 ᠭᠡᠵᠦ ᠰᠠᠨᠠᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠬᠦ ᠳ᠋ᠦ᠍ ᠮᠢᠨᠢ ᠭᠠᠮᠰᠠᠩ ᠭᠤᠸᠠᠢ ᠳᠠᠨᠳᠠᠪ ᠤ᠋ᠨ ᠵᠢᠪᠡᠬᠡᠢ ᠴᠠᠭᠠᠨ ᠰᠢᠯᠪᠢ ᠶ᠋ᠢ ᠬᠠᠭᠠᠯᠭᠠ ᠪᠠᠷ ᠭᠠᠷᠴᠤ ᠳᠠᠯᠳᠠ ᠣᠷᠣᠲᠠᠯᠠ ᠨᠢ ᠰᠢᠷᠳᠡᠭᠡᠳ᠄
– ᠳᠠᠨᠳᠠᠪ ᠲᠤ᠌ ᠭᠤᠲᠤᠯ ᠨᠢ᠂ ᠳᠤᠭᠤᠢ ᠨᠢ ᠶᠡᠷᠦ ᠨᠢ ᠥᠪ ᠬᠥᠷᠥᠩᠭᠡ ᠨᠢ ᠶᠠᠭᠤᠨ ᠠ᠋ᠴᠠ ᠴᠤ᠌ ᠢᠯᠡᠭᠦᠦ ᠦᠨᠡᠲᠡᠢ ᠶᠦᠮ᠃ ᠢᠩᠭᠢᠵᠦ ᠪᠠᠶᠠᠵᠢᠳᠠᠭ ᠶᠤᠮ ᠪᠢᠵᠡ ᠳᠡ᠃ ᠪᠠᠶᠠᠵᠢᠬᠤ ᠰᠢᠨᠤᠯ ᠡᠳ᠋ ᠭᠥᠷᠥᠩᠬᠡᠨ ᠳ᠋ᠡᠭᠡᠨ ᠭᠢᠨᠵᠢᠯᠡᠭᠦᠯᠦᠭᠰᠡᠨ ᠬᠥᠮᠦᠨ ᠦ᠌ ᠲᠠᠮᠲᠤᠭ ᠭᠡᠳ ᠭᠠᠯᠰᠠᠩ ᠭᠤᠸᠠᠢ ᠵᠢᠪᠡᠭᠦᠴᠡᠭᠰᠡᠨ ᠳ᠋ᠡᠭᠡᠨ ᠪᠣᠬᠢᠮᠳᠠᠵᠤ᠂《 ᠲᠦᠢ》 ᠭᠡᠵᠦ ᠨᠤᠯᠮᠤᠬᠤ ᠳᠦᠷᠢᠮ ᠦᠵᠡᠭᠦᠯᠵᠦ ᠪᠢᠯᠡ᠃ ᠭᠠᠯᠰᠠᠩ ᠭᠤᠸᠠᠢ ᠲᠡᠷᠭᠡ ᠪᠡᠨ ᠪᠠᠭᠤᠯᠭᠠᠵᠤ ᠮᠣᠷᠢ ᠪᠠᠨ ᠰᠠᠷᠠᠪᠴᠢᠨ ᠳ᠋ᠤ᠌ ᠤᠶᠠᠵᠤ ᠶᠠᠩᠵᠤᠯᠠᠬᠤ ᠵᠠᠭᠤᠷᠠ ᠶᠠᠷᠢᠭ᠌ᠰᠠᠨ ᠨᠢ᠄
– ᠳᠠᠨᠳᠠᠪ ᠤ᠋ᠨ ᠬᠠᠷᠢᠭᠤᠴᠠᠵᠤ ᠪᠠᠢᠭᠠ ᠠᠯᠪᠠᠨ ᠤ᠋ ᠡᠨᠡ ᠬᠠᠰᠢᠶᠠ ᠪᠠᠢᠰᠢᠩ ᠡᠳ᠋ ᠬᠣᠭ᠌ᠰᠢᠯ ᠤ᠋ᠨ ᠪᠠᠢᠵᠤ ᠪᠠᠢᠭᠠ ᠶ᠋ᠢ ᠬᠠᠷᠠ᠂ ᠭᠡᠲᠡᠯᠡ ᠬᠤᠪᠢ ᠶ᠋ᠢᠨ ᠬᠠᠰᠢᠶᠠ ᠪᠠᠢᠰᠢᠩ ᠵᠥᠭᠡᠭᠡᠷᠢ② ᠶ᠋ᠢ ᠶᠠᠭᠤ ᠭᠡᠵᠦ ᠰᠠᠨᠠᠨᠠ᠃
ᠳᠠᠨᠳᠠᠪ ᠬᠠᠪᠢ ᠣᠢᠷᠠ ᠪᠠᠨ ᠬᠡᠰᠦᠨ ᠶᠠᠪᠤᠵᠤ ᠬᠠᠰᠢᠶᠠ ᠬᠠᠳᠤᠷᠴᠤ᠂ ᠬᠠᠪᠢ ᠣᠢᠷᠠ ᠶ᠋ᠢᠨ ᠭᠠᠵᠠᠷ ᠬᠣᠩᠬᠣᠢᠯᠭᠠᠨᠠ ᠭᠡᠵᠦ ᠪᠣᠯᠭᠣᠮᠵᠢᠯᠠᠭᠠᠳ ᠥᠷᠭᠡᠨ ᠬᠠᠰᠢᠶᠠᠨ ᠤ᠋ ᠪᠠᠨ ᠥᠨᠴᠥᠭ ᠪᠦᠷᠢ ᠳ᠋ᠦ᠍ ᠥᠨᠳᠥᠷ ᠲᠡᠮᠦᠷ ᠶᠣᠷᠳᠣᠢᠯᠭᠠᠭᠠᠳ᠂ ᠡᠭᠦᠳᠡ ᠬᠠᠭᠠᠯᠭᠠᠨ ᠤ᠋ ᠪᠠᠨ ᠬᠠᠪᠢ ᠳ᠋ᠤ᠌ ᠬᠠᠷᠠ ᠴᠢᠯᠠᠭᠤ ᠵᠣᠷᠭᠣᠴᠢᠬᠠᠭᠰᠠᠨ᠁ ᠬᠠᠰᠢᠶᠠᠨ ᠤ᠋ ᠬᠢᠨᠢ ᠬᠠᠭᠠᠯᠭᠠ ᠬᠠᠲᠠᠪᠴᠢ ᠶᠠᠩ ᠳᠠᠩ᠂ ᠴᠥ᠋ ᠴᠤᠤᠷᠭᠠ ᠴᠤ᠌ ᠭᠡᠵᠦ ᠬᠠᠩ ᠶᠠᠩ᠂ ᠲᠦᠯᠬᠢᠬᠦ ᠲᠡᠢ ᠵᠡᠷᠭᠡ ᠲᠣᠮᠣ ᠬᠣᠩᠬᠣ ᠲᠦᠩ ᠳᠠᠩ᠂ ᠱᠠᠭᠠᠢᠬᠤ ᠲᠠᠢ ᠵᠡᠷᠭᠡ ᠭᠠᠷᠵᠢ ᠨᠣᠬᠠᠳ ᠬᠠᠷ ᠶᠠᠷ᠂ ᠬᠠᠰᠢᠶᠠᠨ ᠳᠣᠲᠣᠷᠠ ᠪᠠᠨ ᠪᠥᠷᠲᠥᠢᠬᠦ ᠴᠦ᠍ ᠬᠣᠭ ᠦᠭᠡᠢ ᠰᠢᠯ ᠲᠣᠯᠢ᠂ ᠫᠧᠩ ᠪᠠᠢᠰᠢᠩ ᠨᠢ ᠫᠢᠭ᠋ ᠳᠦᠭᠦᠷᠡᠩ ᠬᠥᠷᠥᠩᠭᠡ ᠵᠣᠭᠣᠷᠢ᠃ ᠵᠠ ᠲᠡᠭᠡᠭᠡᠳ ᠳ᠋ᠦᠩᠵᠡᠨ ᠪᠠᠢᠰᠢᠩ ᠳ᠋ᠤᠨᠢ ᠬᠠᠮᠢᠭᠠ ᠬᠠᠮᠢᠭᠠᠭᠠᠤᠷ ᠢ᠋ᠶ᠋ᠠᠨ ᠳᠥᠷᠪᠡᠨ ᠳᠠᠪᠬᠤᠷ ᠪᠦᠷᠢᠶᠡᠰᠦ ᠲᠡᠢ ᠪᠠᠷᠢᠵᠤ ᠂ ᠡᠨᠡ ᠤᠰᠤᠨ ᠪᠣᠷᠣᠭᠠᠨ ᠳ᠋ᠤ᠌ ᠢᠯᠵᠠᠯᠠᠵᠤ ᠭᠦᠢᠴᠡᠵᠦ ᠪᠠᠢᠬᠤ ᠶᠤᠮ᠃ ᠬᠣᠷᠢᠨ ᠵᠢᠯ ᠡᠳ᠋ᠯᠡᠵᠦ ᠬᠣᠷᠴᠣᠢᠲᠠᠯᠠ ᠪᠠᠨ ᠲᠦᠯᠡᠭᠳᠡᠴᠢᠬᠡᠭᠰᠡᠨ ᠮᠠᠭᠤ ᠵᠤᠤᠬᠠ ᠪᠠᠨ ᠰᠢᠪᠡᠷ ᠫᠧᠩ ᠳ᠋ᠡᠭᠡᠨ ᠣᠷᠣᠭᠤᠯᠵᠤ᠂ ᠱᠠᠭᠠᠵᠠᠩ ᠮᠠᠯᠢᠭᠠᠷ ᠰᠢᠭ᠋ 《ᠵᠠᠯᠠᠴᠢᠬᠠᠭᠠᠳ》 ᠰᠠᠩ ᠤ᠋ᠨ ᠰᠠᠢᠬᠠᠨ ᠰᠢᠨᠡ ᠵᠤᠤᠬᠠ ᠶ᠋ᠢ ᠵᠤᠨ ᠤ᠋ ᠲᠣᠷᠰᠢ ᠭᠠᠳᠠᠭᠠ ᠲᠠᠯᠪᠢᠵᠤ ᠭᠠᠯᠯᠠᠭᠠᠳ ᠵᠢᠪᠡ ᠶ᠋ᠢᠨ ᠬᠣᠭᠣᠯᠠ᠂ ᠳᠠᠩᠰᠠᠨ ᠤ᠋ ᠪᠥᠭᠯᠡᠭᠡ ᠪᠣᠯᠭᠠᠯᠠ᠃
ᠮᠠᠨ ᠤ᠋ ᠬᠢᠨ ᠦ᠌ ᠠᠵᠢᠯᠴᠢᠳ ᠤ᠋ᠨ ᠳᠤᠮᠳᠠ ᠳᠡᠩᠳᠡᠭᠦᠦ ᠳᠠᠨᠳᠠᠪ ᠤ᠋ᠨ ᠲᠤᠬᠠᠢ ᠣᠯᠠᠨ ᠱᠣᠭ ᠶᠠᠪᠤᠳᠠᠭ ᠶᠤᠮ᠃ ᠳᠠᠨᠳᠠᠪ ᠲᠤ᠌ ᠨᠠᠢ᠍ᠮᠠᠨ ᠵᠢᠯ ᠡᠮᠦᠰᠦᠭᠰᠡᠨ ᠨᠠᠷᠢᠨ ᠴᠠᠭᠠᠨ ᠢᠰᠡᠭᠡᠢ ᠭᠤᠲᠤᠯ ᠪᠣᠢ᠃ ᠳᠠᠨᠳᠠᠪ ᠨᠢᠭᠡ ᠡᠳᠦᠷ ᠨᠠᠢ᠍ᠮᠠᠨ ᠨᠠᠰᠤᠲᠠᠢ ᠨᠠᠷᠢᠨ ᠴᠠᠭᠠᠨ ᠢ᠋ᠶ᠋ᠠᠨ ᠡᠮᠦᠰᠦᠭᠡᠳ ᠳ᠋ᠦᠩᠨᠵᠡᠨ ᠪᠠᠢᠰᠢᠩ ᠤ᠋ᠨ ᠢ᠋ᠶ᠋ᠠᠨ ᠳᠡᠭᠡᠪᠦᠷ ᠦ᠋ᠨ ᠴᠠᠰᠤ ᠶ᠋ᠢ ᠠᠷᠢᠯᠭᠠᠵᠤ ᠪᠠᠢᠵᠤ ᠭᠡᠨᠡ᠃ ᠡᠷᠡ ᠬᠥᠮᠦᠨ ᠨᠢᠭᠡ ᠡᠨᠳᠡᠵᠦ᠂ ᠡᠷᠭᠢ ᠨᠢᠭᠡ ᠨᠤᠷᠠᠨᠠ ᠭᠡᠭᠴᠢ ᠪᠡᠷ ᠳᠠᠨᠳᠠᠪ ᠨᠢᠭᠡ ᠲᠡᠭᠰᠢ ᠭᠢᠰᠬᠢᠵᠦ ᠬᠠᠯᠲᠤ ᠦᠰᠦᠷᠦᠭᠡᠳ ᠳ᠋ᠦᠩᠨᠵᠡᠨ ᠪᠠᠢᠰᠢᠩ ᠳᠡᠭᠡᠷᠡ ᠡᠴᠡ《ᠳ᠋ᠦᠩ》 ᠭᠡᠲᠡᠯᠡ ᠤᠨᠠᠪᠠ ᠭᠡᠨᠡ᠃ ᠤᠨᠠᠬᠤ ᠳ᠋ᠠᠭᠠᠨ ᠤᠭ ᠤ᠋ᠨ ᠤᠬᠠᠭᠠᠨ ᠲᠠᠢ ᠬᠥᠮᠦᠨ ᠪᠣᠯᠬᠣᠷ ᠢ᠋ᠶ᠋ᠠᠨ ᠨᠠᠢ᠍ᠮᠠᠨ ᠨᠠᠰᠤᠲᠠᠢ ᠨᠠᠷᠢᠨ ᠴᠠᠭᠠᠨ ᠢ᠋ᠶ᠋ᠠᠨ ᠮᠠᠷᠲᠠᠭᠰᠠᠨ ᠦᠭᠡᠢ᠂ ᠬᠥᠯᠳᠡᠭᠦᠦ ᠭᠠᠵᠠᠷ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠭᠤᠪᠠᠯ ᠭᠤᠲᠤᠯ ᠰᠦᠢᠳ ᠪᠣᠯᠤᠨᠠ ᠭᠡᠳ ᠬᠣᠶᠠᠷ ᠬᠥᠯ ᠢ᠋ᠶ᠋ᠡᠨ ᠳᠡᠭᠡᠭᠰᠢ ᠨᠢ ᠭᠣᠵᠣᠢᠯᠭᠠᠭᠠᠳ ᠬᠣᠨᠳᠣᠯᠠᠢ ᠵᠣ᠌ ᠪᠠᠷ ᠢ᠋ᠶ᠋ᠠᠨ ᠭᠠᠵᠠᠷ ᠲᠤᠰᠤᠭᠰᠠᠨ ᠶᠤᠮ ᠭᠡᠳᠡᠭ᠃
ᠳᠠᠨᠳᠠᠪ ᠤ᠋ᠨ ᠭᠣᠣᠯ ᠢ᠋ ᠬᠠᠷᠠᠯᠠᠭᠤᠯᠳᠠᠭ ᠶᠠᠭᠤᠮᠠ ᠳᠠᠩᠴᠤ ᠣᠯᠠᠨ ᠭᠡᠨᠡ᠃ ᠮᠠᠨ ᠤ᠋ ᠳᠠᠨᠳᠠᠪ ᠳ᠋ᠦᠩᠨᠵᠡᠨ ᠪᠠᠢᠰᠢᠩ ᠠ᠋ᠴᠠ ᠪᠠᠨ ᠢᠮᠠᠭᠠᠨ ᠳᠠᠬᠤ ᠪᠠᠨ ᠭᠠᠷᠭᠠᠵᠤ ᠢᠷᠡᠭᠡᠳ ᠶᠠᠭ ᠦᠭᠡᠢ ᠰᠢᠷᠦᠭᠦᠨ ᠰᠡᠭᠰᠦᠷᠦᠭᠡᠳᠴᠦ ᠭᠡᠨᠡ᠃ ᠲᠡᠭᠡᠭᠰᠡᠨ ᠴᠢᠨᠢ ᠳᠠᠬᠤ ᠠ᠋ᠴᠠ ᠨᠢ ᠨᠢᠭᠡ ᠰᠢᠷᠬᠡᠭ ᠦᠰᠦ ᠰᠤᠭᠤᠷᠠᠭᠠᠳ ᠣᠢᠴᠢᠵᠤ ᠭᠡᠨᠡ ᠰᠢᠦ᠃ ᠦᠢᠴᠢᠭᠰᠡᠨ ᠦᠰᠦ ᠶ᠋ᠢ ᠣᠯᠬᠤ ᠭᠡᠵᠦ ᠠᠷᠪᠠᠭᠠᠳ ᠮᠢᠨᠦ᠋ᠲ ᠠᠮᠢᠰᠬᠤᠯ ᠳᠠᠷᠤᠨ ᠡᠷᠢᠭᠡᠳ ᠠᠷᠠᠢ ᠭᠡᠵᠦ ᠣᠯᠵᠤ ᠨᠠᠷᠢᠨ ᠬᠤᠷᠤᠭᠤᠨ ᠤ᠋ ᠦᠵᠦᠭᠦᠷ ᠢ᠋ᠶ᠋ᠡᠷ ᠨᠠᠬᠢᠯᠵᠠᠭᠤᠯᠤᠨ ᠴᠢᠮᠬᠢᠵᠦ᠂ ᠨᠠᠭᠠᠯᠳᠤᠭᠰᠠᠨ ᠰᠢᠷᠣᠢ ᠲᠣᠭᠣᠰᠣ ᠶ᠋ᠢ ᠨᠢ ᠬᠣᠭᠣᠯᠠᠢ ᠪᠠᠨ ᠬᠠᠲᠠᠲᠠᠯᠠ ᠦᠯᠢᠶᠡᠵᠦ ᠪᠠᠢᠵᠤ ᠴᠡᠪᠡᠷᠯᠡᠵᠦ ᠭᠡᠨᠡ ᠳᠡ᠃ ᠵᠠ ᠲᠡᠭᠡᠭᠡᠳ ᠴᠡᠪᠡᠷᠯᠡᠭᠰᠡᠨ ᠦᠰᠦ ᠪᠡᠨ ᠰᠣᠬᠣᠷᠠᠭᠰᠠᠨ ᠨᠦᠬᠡᠨ ᠳ᠋ᠦ᠍ᠨᠢ ᠣᠯᠵᠤ ᠬᠢᠬᠦ ᠭᠡᠵᠦ ᠥᠨᠥᠬᠢ ᠳᠠᠬᠤ ᠪᠠᠨ ᠡᠪᠦᠷᠯᠡᠵᠦ ᠠᠷᠤᠯᠠᠵᠤ ᠡᠷᠢᠭᠡᠳ ᠡᠳᠦᠷ ᠦ᠋ᠨ ᠬᠠᠭᠠᠰ ᠢ᠋ ᠪᠠᠷᠠᠵᠤ ᠪᠠᠢᠵᠤ ᠠᠷᠠᠢ ᠭᠡᠵᠦ ᠨᠦᠬᠡ ᠶ᠋ᠢ ᠨᠢ ᠣᠯᠤᠭᠠᠳ ᠦᠰᠦ ᠪᠡᠨ ᠠᠶᠠᠲᠠᠢᠬᠠᠨ ᠰᠢᠷᠭᠤᠭᠤᠯᠵᠤ ᠳᠠᠬᠤ ᠪᠠᠨ ᠡᠪᠲᠡᠢᠬᠡᠨ ᠡᠪᠬᠡᠭᠡᠳ ᠳ᠋ᠦᠩᠨᠵᠡᠨ ᠪᠠᠢᠰᠢᠩ ᠳ᠋ᠠᠭᠠᠨ ᠬᠢᠵᠦ《 ᠳ᠋ᠠᠩ》 ᠬᠢᠲᠡᠯᠡ ᠴᠣᠣᠵᠢᠯᠠᠭᠰᠠᠨ ᠤ᠋ ᠳᠠᠷᠠᠭᠠ ᠰᠠᠨᠠᠭᠠ ᠨᠢ ᠠᠮᠠᠷᠠᠭᠰᠠᠨ ᠭᠡᠳᠡᠭ᠃
ᠡᠨᠡ ᠬᠥᠮᠦᠨ ᠦ᠌ ᠳ᠋ᠦᠩᠨᠵᠡᠨ ᠪᠠᠢᠰᠢᠩ ᠨᠢ ᠳᠦᠭᠦᠷᠡᠩ ᠪᠣᠯᠪᠠᠴᠤ ᠲᠦᠩᠬᠦᠢᠭᠰᠡᠨ ᠲᠣᠯᠣᠭᠠᠢ ᠨᠢ ᠬᠣᠭᠣᠰᠣᠨ ᠶᠤᠮ ᠰᠢᠦ᠂᠃ ᠮᠠᠨ ᠤ᠋ ᠰᠠᠢᠬᠠᠨ ᠣᠷᠣᠨ ᠳ᠋ᠤ᠌ ᠡᠨᠡ ᠬᠥᠮᠦᠨ ᠦ᠌ ᠲᠣᠯᠣᠭᠠᠢ ᠶ᠋ᠢ ᠳᠦᠭᠦᠷᠭᠡᠬᠦ ᠶᠠᠭᠤᠮᠠ ᠮᠥᠨ ᠶᠡᠬᠡ ᠪᠠᠢᠨᠠ ᠰᠠᠨᠵᠠᠢ᠃ ᠶᠡᠷᠦ ᠨᠢ ᠲᠡᠭᠡᠭᠡᠳ ᠠᠮᠢᠨ ᠬᠤᠪᠢ ᠶ᠋ᠢᠨ ᠶᠠᠭᠤᠮᠠ ᠪᠣᠯᠬᠣᠷ ᠭᠤᠷᠪᠠᠯᠵᠢᠨ ᠮᠣᠳᠣ ᠴᠤ᠌ ᠭᠤᠷᠪᠠᠨ ᠲᠥᠭᠥᠷᠢᠭ᠂ ᠳᠥᠷᠪᠡᠯᠵᠢᠨ ᠮᠣᠳᠣ ᠴᠤ᠌ ᠳᠥᠷᠪᠡᠨ ᠲᠥᠭᠥᠷᠢᠭ ᠭᠡᠵᠦ ᠬᠠᠢᠷᠠᠯᠠᠵᠤ ᠪᠠᠢᠳᠠᠭ ᠮᠥᠷᠳᠡᠯᠡ ᠪᠡᠨ ᠠᠯᠪᠠᠨ ᠰᠠᠩ ᠤ᠋ᠨ ᠶᠠᠭᠤᠮᠠ ᠪᠣᠯᠬᠣᠷ ᠠᠯᠲᠠ ᠴᠤ᠌ ᠪᠠᠢᠭᠰᠠᠨ ᠠᠯᠬᠤᠭᠠᠳ ᠭᠠᠷᠳᠠᠭ᠂ ᠲᠣᠷᠭᠠ ᠴᠤ᠌ ᠪᠠᠢᠭᠰᠠᠨ ᠲᠣᠰᠣᠳᠠᠭᠠᠳ ᠬᠠᠶᠠᠳᠠᠭ᠃ ᠳᠠᠨᠳᠠᠪ ᠮᠡᠲᠦ ᠶ᠋ᠢᠨ ᠬᠠᠷᠠ ᠡᠯᠢᠭᠡᠳᠡᠨ ᠦ᠌ ᠵᠢᠰᠦ ᠴᠢᠷᠠᠢ ᠨᠢ ᠤᠯᠤᠰ ᠤ᠋ᠨ ᠬᠥᠷᠥᠩᠭᠡ ᠣᠯᠠᠨ ᠤ᠋ ᠥᠮᠴᠢ ᠶ᠋ᠢ ᠬᠤᠯᠠᠭᠠᠢᠯᠠᠨ ᠱᠠᠮᠰᠢᠭᠴᠢᠳ ᠤ᠋ᠨ ᠪᠤᠵᠠᠷ ᠴᠢᠷᠠᠢ ᠠ᠋ᠴᠠ ᠨᠢᠭᠡ ᠯᠡ ᠶᠡᠬᠡ ᠢᠯᠭᠠᠷᠠᠬᠤ ᠶᠠᠭᠤᠮᠠ ᠦᠭᠡᠢ ᠳᠠ ᠭᠡᠵᠦ ᠠᠯᠢᠶᠠ ᠭᠠᠯᠰᠠᠩ ᠭᠤᠸᠠᠢ ᠠᠯᠢᠶᠠᠯᠠᠯ ᠦᠭᠡᠢ ᠬᠡᠯᠡᠭᠰᠡᠨ ᠪᠢᠯᠡ ᠃
– – – –
① ᠲᠣᠭᠣᠯᠭᠠᠨ ᠲᠡᠮᠳᠡᠭ ᠲᠠᠯᠪᠢᠵᠤ ᠪᠢᠲᠡᠭᠦᠮᠵᠢᠯᠡᠬᠦ
② ᠵᠥᠭᠡᠭᠡᠵᠦ ᠬᠤᠷᠢᠶᠠᠭᠰᠠᠨ ᠶᠠᠭᠤᠮᠠ
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃