ᠰᠡᠭᠦᠯᠡᠨ ᠬᠦᠦСүүлэн хүү
1124ᠰᠡᠭᠦᠯᠡᠨ ᠬᠦᠦ
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌ ᠡᠮᠡᠭᠡᠨ ᠡᠪᠦᠭᠡᠨ ᠬᠣᠶᠠᠷ ᠠᠮᠢᠳᠤᠷᠠᠵᠤ ᠪᠠᠢᠵᠠᠢ᠃
ᠨᠢᠭᠡ ᠡᠳᠦᠷ ᠡᠮᠡᠭᠡᠨ ᠢᠮᠠᠭᠠ ᠪᠠᠨ ᠬᠠᠷᠢᠭᠤᠯᠵᠤ ᠶᠠᠪᠤᠭᠠᠳ ᠲᠤᠷᠭᠢᠭᠠᠳ ᠣᠷᠬᠢᠵᠠᠢ᠃ ᠭᠡᠲᠡᠯᠡ ᠨᠢᠭᠡ ᠢᠮᠠᠭᠠᠨ ᠤ᠋ ᠰᠡᠭᠦᠯ ᠲᠠᠰᠤᠷᠠᠭᠠᠳ ᠤᠨᠠᠴᠢᠬᠠᠵᠠᠢ ᠭᠡᠨᠡ᠃ ᠲᠡᠷᠡ ᠶ᠋ᠢ ᠡᠪᠦᠭᠡᠨ ᠳ᠋ᠦ᠍ ᠪᠡᠨ ᠬᠡᠯᠡᠬᠦ ᠦᠭᠡᠢ ᠨᠢᠭᠤᠭᠠᠳ ᠭᠡᠷ ᠦ᠋ᠨ ᠬᠢ ᠪᠡᠨ ᠵᠠᠪᠠᠭ ᠲᠤ᠌ ᠬᠠᠪᠴᠢᠭᠤᠯᠵᠠᠢ᠃ ᠡᠭᠦᠨ ᠡᠴᠡ ᠬᠣᠢᠰᠢ ᠣᠯᠠᠨ ᠴᠤ᠌ ᠬᠣᠨᠣᠭ ᠥᠩᠭᠡᠷᠡᠴᠦ᠂ ᠨᠢᠭᠡ ᠡᠳᠦᠷ ᠡᠮᠡᠭᠡᠨ ᠰᠦ ᠪᠡᠨ ᠲᠠᠯᠪᠢᠵᠤ ᠳᠠᠭᠤᠰᠤᠭᠠᠳ ᠲᠣᠭᠣᠭᠠ ᠪᠠᠨ ᠬᠤᠰᠤᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂ ᠢᠰᠢ᠂ ᠴᠠᠪᠠᠰᠤ ᠳᠠ᠂ ᠬᠤᠰᠤᠮ ᠢᠳᠡᠬᠦ ᠬᠡᠦᠬᠡᠳ ᠲᠡᠢ ᠴᠦ᠍ ᠪᠣᠯᠤᠭᠠᠰᠠᠢ ᠭᠡᠵᠦ ᠬᠡᠯᠡᠭᠰᠡᠨ ᠳ᠋ᠦ᠍ ᠬᠥᠶᠢ᠂ ᠪᠢ ᠶᠠᠭᠠᠬᠢᠭᠠ ᠪᠣᠢ? ᠭᠡᠳ ᠪᠢᠴᠢᠬᠠᠨ ᠰᠡᠭᠦᠯ ᠰᠢᠭ ᠵᠢᠵᠢᠭᠬᠡᠨ ᠬᠡᠦᠬᠡᠳ ᠣᠷᠣᠭᠠᠳ ᠢᠷᠡᠵᠡᠢ᠃ ᠲᠡᠭᠡᠬᠦ ᠳ᠋ᠦ᠍ ᠨᠢ ᠬᠤᠰᠤᠮ ᠢ᠋ᠶ᠋ᠠᠨ ᠥᠭᠭᠦᠭᠡᠳ ᠡᠮᠡᠭᠡᠨ ᠬᠦᠦ ᠲᠡᠢ ᠪᠣᠯᠤᠯᠠ ᠭᠡᠳ ᠶᠡᠬᠡᠳᠡ ᠪᠠᠶᠠᠷᠯᠠᠨ ᠡᠪᠦᠭᠡᠨ ᠢ᠋ ᠪᠡᠨ ᠢᠮᠠᠭᠠᠨ ᠠ᠋ᠴᠠ ᠪᠠᠨ ᠢᠷᠡᠬᠦ ᠳ᠋ᠦ᠍ ᠪᠠᠶᠠᠷ ᠬᠥᠷ ᠪᠣᠯᠭᠠᠨ ᠶᠠᠷᠢᠯᠠ᠃ ᠡᠪᠦᠭᠡᠨ ᠪᠠᠰᠠ ᠪᠠᠶᠠᠷᠯᠠᠵᠤ ᠬᠦᠦ ᠪᠡᠨ ᠦᠨᠦᠰᠦᠯᠡ᠂ ᠡᠭᠦᠨ ᠡᠴᠡ ᠬᠣᠢᠰᠢ ᠭᠤᠷᠪᠠᠭᠤᠯᠠ ᠪᠠᠨ ᠠᠮᠢᠳᠤᠷᠠᠵᠤ ᠡᠬᠢᠯᠡᠭᠰᠡᠨ ᠪᠥᠭᠡᠳ ᠬᠦᠦ ᠪᠡᠨ ᠰᠡᠭᠦᠯᠡᠨ ᠬᠦᠦ ᠭᠡᠵᠦ ᠨᠡᠷᠡᠯᠡᠵᠡᠢ᠃ ᠰᠡᠭᠦᠯᠡᠨ ᠬᠦᠦ ᠣᠪᠣᠭᠠ ᠲᠣᠮᠣᠷᠠᠵᠤ ᠦᠳᠡᠰᠢ ᠣᠷᠣᠢ ᠮᠠᠯ ᠢ᠋ᠶ᠋ᠠᠨ ᠬᠣᠲᠠᠯᠠᠭᠤᠯᠬᠤ ᠪᠣᠯᠵᠠᠢ᠃ ᠨᠢᠭᠡ ᠣᠷᠣᠢ ᠰᠡᠭᠦᠯᠡᠨ ᠬᠦᠦ ᠮᠠᠯ ᠢ᠋ᠶ᠋ᠠᠨ ᠬᠣᠲᠠᠯᠠᠭᠤᠯᠵᠤ ᠶᠠᠪᠤᠲᠠᠯᠠ ᠬᠣᠶᠠᠷ ᠲᠠᠨᠢᠬᠤ ᠦᠭᠡᠢ ᠬᠥᠮᠦᠨ ᠢᠷᠡᠭᠡᠳ ᠰᠡᠭᠦᠯᠡᠨ ᠬᠦᠦ ᠶ᠋ᠢ ᠬᠢ ᠬᠢ ᠬᠢ ᠭᠤᠷᠪᠠᠭᠤᠯᠠ ᠪᠠᠨ ᠬᠠᠭᠠᠨ ᠤ᠋ ᠬᠢ ᠡᠴᠡ ᠶᠠᠭᠤᠮᠠ ᠬᠤᠯᠠᠭᠠᠢ ᠬᠢᠶᠡ ᠬᠢᠬᠦ ᠳ᠋ᠦ᠍ ᠨᠢ ᠰᠡᠭᠦᠯᠡᠨ ᠬᠦᠦ ᠵᠥᠪᠰᠢᠶᠡᠷᠡᠵᠦ ᠮᠠᠯ ᠢ᠋ᠶ᠋ᠠᠨ ᠠᠪᠠᠴᠢᠵᠤ ᠬᠠᠰᠢᠴᠢᠬᠠᠭᠠᠳ ᠲᠡᠳᠡᠨ ᠦ᠌ ᠬᠠᠮᠲᠤ ᠶᠠᠪᠤᠵᠠᠢ᠃ ᠰᠥᠨᠢ ᠪᠣᠯᠵᠤ ᠠᠮᠢᠲᠠᠨ ᠬᠥᠮᠦᠨ ᠤᠨᠲᠠᠭᠠᠳ ᠨᠠᠮ ᠭᠦᠮ ᠪᠣᠯᠬᠤ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠰᠡᠭᠦᠯᠡᠨ ᠬᠦᠦ ᠴᠢ ᠣᠴᠢᠭᠠᠳ ᠬᠠᠭᠠᠨ ᠤ᠋ ᠬᠦᠷᠡᠩ ᠱᠠᠷ ᠢ᠋ ᠪᠠᠷᠢᠭᠠᠳ ᠢᠷᠡ ᠭᠡᠬᠦ ᠳ᠋ᠦ᠍ ᠨᠢ ᠰᠡᠭᠦᠯᠡᠨ ᠬᠦᠦ ᠵᠥᠪᠰᠢᠶᠡᠷᠡᠭᠡᠳ ᠬᠠᠭᠠᠨ ᠤ᠋ ᠦᠬᠡᠷ ᠲᠦ᠍ ᠣᠴᠢᠭᠠᠳ ᠲᠣᠮᠣ ᠬᠦᠷᠡᠩ ᠱᠠᠷ ᠢ᠋ ᠠᠪᠬᠤ ᠤᠤ? ᠵᠢᠵᠢᠭ ᠬᠦᠷᠡᠩ ᠱᠠᠷ ᠢ᠋ ᠠᠪᠬᠤ ᠤᠤ? ᠭᠡᠳ ᠬᠠᠰᠬᠢᠷᠴᠠᠢ᠃ ᠭᠡᠲᠡᠯᠡ ᠬᠠᠭᠠᠨ ᠤ᠋ ᠬᠢᠨ ᠦᠬᠡᠷ ᠲᠦ᠍ ᠬᠤᠯᠠᠭᠠᠢ ᠣᠷᠣᠯᠠ ᠭᠡᠳ ᠯᠡ ᠨᠠᠭᠠᠨᠠ ᠤᠤ ᠴᠠᠭᠠᠨᠠ ᠤᠤ ᠪᠣᠯᠵᠤ ᠫᠤᠤ ᠱᠣᠣ ᠲᠠᠯᠪᠢᠵᠤ ᠨᠣᠬᠠᠢ ᠪᠣᠷᠭᠣᠵᠤ ᠰᠦᠢᠳ ᠪᠣᠯᠤᠯᠠ᠃ ᠲᠡᠭᠡᠬᠦ ᠳ᠋ᠦ᠍ ᠰᠡᠭᠦᠯᠡᠨ ᠬᠦᠦ ᠦᠬᠡᠷ ᠦ᠋ᠨ ᠴᠢᠬᠢᠨ ᠳᠣᠲᠣᠷᠠ ᠨᠢᠭᠤᠭᠳᠠᠭᠠᠳ ᠴᠢᠮᠡᠭᠡ ᠨᠠᠮᠵᠢᠭᠰᠠᠨ ᠤ᠋ ᠳᠠᠷᠠᠭᠠ ᠲᠣᠮᠣ ᠬᠦᠷᠡᠩ ᠱᠠᠷ ᠢ᠋ ᠬᠥᠳᠡᠯᠦᠭᠡᠳ ᠣᠴᠢᠵᠤ ᠭᠡᠨᠡ᠃
ᠱᠠᠷ ᠢ᠋ᠶ᠋ᠠᠨ ᠠᠯᠠᠬᠤ ᠭᠡᠲᠡᠯᠡ ᠰᠦᠬᠡ ᠪᠠᠢᠳᠠᠭ ᠦᠭᠡᠢ᠃ ᠲᠡᠭᠡᠲᠡᠯᠡ ᠰᠡᠭᠦᠯᠡᠨ ᠬᠦᠦ ᠳ᠋ᠦ᠍᠂ ᠵᠠ ᠴᠢ ᠰᠦᠬᠡ ᠬᠤᠯᠠᠭᠠᠢ ᠬᠢᠭᠡᠳ ᠢᠷᠡ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠳᠠᠬᠢᠭᠠᠳ ᠯᠠ ᠰᠡᠭᠦᠯᠡᠨ ᠬᠦᠦ ᠶᠠᠪᠤᠵᠤ ᠭᠡᠨᠡ᠂ ᠰᠡᠭᠦᠯᠡᠨ ᠬᠦᠦ ᠬᠠᠭᠠᠨ ᠤ᠋ ᠭᠠᠳᠠᠭᠠ ᠣᠴᠢᠭᠠᠳ ᠲᠦᠯᠡᠭᠡᠨ ᠳᠡᠭᠡᠷᠡ ᠨᠢ ᠢᠷᠡᠭᠡᠳ ᠲᠣᠮᠣ ᠪᠠᠯᠲᠠ ᠶ᠋ᠢ ᠨᠢ ᠠᠪᠬᠤ ᠤᠤ? ᠵᠢᠵᠢᠭ ᠪᠠᠯᠲᠠ ᠶ᠋ᠢ ᠨᠢ ᠠᠪᠬᠤ ᠤᠤ? ᠭᠡᠳ ᠬᠠᠰᠬᠢᠷᠬᠤ ᠳ᠋ᠤ᠌ ᠬᠠᠭᠠᠨ ᠤ᠋ ᠬᠢᠨ᠂ ᠦᠭᠡᠢ ᠰᠦᠬᠡ ᠬᠤᠯᠠᠭᠠᠢ ᠳ᠋ᠤ᠌ ᠠᠪᠤᠯᠠ ᠭᠡᠳ ᠫᠤᠤ ᠱᠣᠣ ᠲᠠᠯᠪᠢᠵᠤ ᠨᠣᠬᠠᠢ ᠬᠤᠴᠠᠵᠤ ᠪᠠᠢᠭᠠᠳ ᠴᠢᠮᠡᠭᠡ ᠨᠠᠮᠳᠠᠬᠤ ᠪᠠᠷ ᠨᠢ ᠲᠣᠮᠣ ᠪᠠᠯᠲᠠ ᠶ᠋ᠢ ᠨᠢ ᠠᠪᠤᠭᠠᠳ ᠢᠩᠭᠢᠭᠡᠳ ᠭᠤᠷᠪᠠᠭᠤᠯᠠ ᠪᠠᠨ ᠱᠠᠷ ᠢ᠋ᠶ᠋ᠠᠨ ᠠᠯᠠᠭᠠᠳ ᠬᠤᠪᠢᠶᠠᠬᠤ ᠪᠣᠯᠵᠠᠢ᠂ ᠰᠡᠭᠦᠯᠡᠨ ᠬᠦᠦ ᠴᠢ ᠶᠠᠭᠤ ᠶ᠋ᠢ ᠨᠢ ᠠᠪᠬᠤ ᠪᠣᠢ ᠭᠡᠵᠦ ᠥᠨᠥ ᠬᠣᠶᠠᠷ ᠬᠤᠯᠠᠭᠠᠢᠴᠢ ᠠᠰᠠᠭᠤᠬᠤ ᠳ᠋ᠤ᠌ ᠥ᠂ ᠪᠢ ᠰᠡᠭᠦᠯ ᠭᠦᠵᠡᠭᠡ ᠬᠣᠶᠠᠷ ᠢ᠋ ᠨᠢ ᠠᠪᠤᠶᠠ ᠭᠡᠵᠦ ᠰᠡᠭᠦᠯᠡᠨ ᠬᠦᠦ ᠬᠡᠯᠡᠭᠡᠳ ᠰᠡᠭᠦᠯ ᠭᠦᠵᠡᠭᠡ ᠬᠣᠶᠠᠷ ᠢ᠋ᠶ᠋ᠠᠨ ᠠᠪᠤᠭᠠᠳ ᠶᠠᠪᠤᠵᠤ ᠭᠡᠨᠡ᠃ ᠲᠡᠭᠡᠭᠡᠳ ᠰᠡᠭᠦᠯᠡᠨ ᠬᠦᠦ ᠬᠣᠶᠠᠷ ᠬᠤᠯᠠᠭᠠᠢᠴᠢ ᠶ᠋ᠢᠨ ᠶᠠᠪᠤᠬᠤ ᠶ᠋ᠢ ᠶᠠᠭ ᠵᠠᠮ ᠢ᠋ ᠨᠢ ᠲᠣᠰᠴᠤ ᠣᠴᠢᠭᠠᠳ ᠭᠦᠵᠡᠭᠡ ᠪᠡᠨ ᠦᠯᠢᠶᠡᠵᠦ ᠰᠡᠭᠦᠯ ᠦ᠋ᠨ ᠶ᠋ᠢᠡᠨ ᠬᠢᠯᠭᠠᠰᠤ ᠪᠠᠷ ᠠᠮᠠ ᠶ᠋ᠢ ᠨᠢ ᠪᠣᠭᠣᠭᠠᠳ ᠵᠠ ᠴᠢ ᠬᠡᠨ ᠲᠡᠢ ᠠᠪᠤᠭᠰᠠᠨ ᠪᠣᠢ? ᠬᠡᠯᠡ᠂ ᠬᠡᠯᠡᠬᠦ ᠦᠭᠡᠢ ᠦᠦ? ᠴᠢ᠂ ᠠ ᠲᠡᠢᠮᠦ ᠪᠣᠢ᠂ ᠵᠠᠳᠠᠷᠠᠭᠰᠠᠨ ᠵᠣᠯᠢᠭ ᠤᠤ ᠭᠡᠵᠦ ᠬᠤᠳᠠᠯ ᠢ᠋ᠶ᠋ᠠᠷ ᠵᠠᠩᠨᠠᠨ ᠬᠠᠷᠢᠶᠠᠵᠤ᠂ ᠰᠡᠭᠦᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠷ ᠦᠯᠢᠶᠡᠭᠰᠡᠨ ᠭᠦᠵᠡᠭᠡ ᠶ᠋ᠢ ᠫᠠᠳ ᠬᠢᠲᠡᠯᠡ ᠫᠢᠳ ᠬᠢᠲᠡᠯᠡ ᠤᠷᠢᠶᠠᠯᠠᠭᠠᠨ ᠨᠦᠳᠦᠵᠦ ᠪᠠᠢᠵᠠᠢ᠂ ᠡᠭᠦᠨ ᠢ᠋ ᠬᠣᠶᠠᠷ ᠬᠤᠯᠠᠭᠠᠢᠴᠢ ᠬᠣᠯᠠ ᠠ᠋ᠴᠠ ᠰᠣᠨᠣᠰᠤᠭᠠᠳ ᠰᠡᠭᠦᠯᠡᠨ ᠬᠦᠦ ᠪᠠᠷᠢᠭᠳᠠᠴᠢᠬᠠᠵᠠᠢ ᠭᠡᠵᠦ ᠪᠣᠳᠣᠵᠤ ᠠᠶᠤᠭᠠᠳ ᠬᠠᠮᠤᠭ ᠮᠢᠬᠠ ᠪᠠᠨ ᠬᠠ ᠭᠤᠶᠠ ᠪᠠᠷ ᠨᠢ ᠡᠢᠰᠢ ᠲᠡᠢᠰᠢ ᠰᠢᠳᠡᠵᠦ ᠣᠷᠬᠢᠭᠠᠳ ᠶᠠᠪᠤᠭᠠᠳ ᠥᠭᠴᠡᠢ᠃ ᠰᠡᠭᠦᠯᠡᠨ ᠬᠦᠦ ᠱᠠᠷ ᠤ᠋ᠨ ᠪᠦᠬᠦ ᠮᠢᠬᠠ ᠶ᠋ᠢ ᠬᠡᠪ ᠢ᠋ᠶ᠋ᠡᠷ ᠨᠢ ᠠᠪᠤᠭᠠᠳ ᠬᠠᠷᠢᠵᠠᠢ ᠭᠡᠨᠡ᠂ ᠲᠡᠭᠡᠭᠡᠳ ᠨᠢᠭᠡ ᠡᠳᠦᠷ ᠬᠠᠭᠠᠨ ᠰᠡᠭᠦᠯᠡᠨ ᠬᠦᠦ ᠶ᠋ᠢ ᠵᠣᠷᠢᠭᠤᠳᠠ ᠦᠵᠡᠬᠦ ᠪᠡᠷ ᠢᠷᠡᠬᠦ ᠳ᠋ᠦ᠍ ᠰᠡᠭᠦᠯᠡᠨ ᠬᠦᠦ ᠬᠠᠭᠠᠨ ᠤ᠋ ᠮᠣᠷᠢ ᠶ᠋ᠢ ᠤᠶᠠᠵᠤ ᠥᠭᠬᠦ ᠳ᠋ᠦ᠍ ᠪᠡᠨ ᠮᠣᠷᠢᠨ ᠤ᠋ ᠬᠢᠨᠢ ᠬᠠᠮᠠᠷ ᠢ᠋ ᠨᠢ ᠠᠪᠤᠭᠠᠳ᠂ ᠡᠭᠦᠳᠡ ᠰᠡᠬᠦᠭᠡᠳ ᠣᠷᠣᠭᠤᠯᠬᠤ ᠳ᠋ᠤ᠌ ᠪᠠᠨ ᠮᠠᠯᠠᠭᠠᠢ ᠶ᠋ᠢᠨ ᠬᠢᠨᠢ ᠤᠲᠤᠭᠠ ᠵᠢᠩᠰᠡ ᠶ᠋ᠢ ᠨᠢ ᠠᠪᠴᠢᠬᠠᠵᠠᠢ᠂ ᠭᠤᠲᠤᠰᠤ ᠳᠡᠪᠢᠰᠴᠦ ᠥᠭᠬᠦ ᠳ᠋ᠦ᠍ ᠪᠡᠨ ᠭᠤᠲᠤᠯ ᠤ᠋ᠨ ᠬᠢᠨᠢ ᠤᠯᠠ ᠶ᠋ᠢ ᠨᠢ ᠠᠪᠴᠢᠬᠠᠵᠠᠢ᠂ ᠬᠠᠭᠠᠨ ᠨᠡᠯᠢᠶᠡᠳ ᠰᠠᠭᠤᠵᠤ ᠴᠠᠢ ᠤᠤᠭᠤᠵᠤ ᠪᠠᠢᠭᠠᠳ ᠶᠠᠪᠤᠬᠤ ᠪᠣᠯᠤᠭᠰᠠᠨ ᠳ᠋ᠤ᠌ ᠰᠡᠭᠦᠯᠡᠨ ᠬᠦᠦ ᠬᠠᠭᠠᠨᠲᠠᠨ ᠭᠤᠸᠠᠢ ᠬᠠᠭᠠᠨ ᠬᠥᠮᠦᠨ ᠪᠠᠢᠲᠠᠯᠠ ᠪᠠᠨ ᠤᠯᠠ ᠦᠭᠡᠢ ᠭᠤᠲᠤᠯ᠂ ᠤᠲᠤᠭᠠ ᠦᠭᠡᠢ ᠮᠠᠯᠠᠭᠠᠢ᠂ ᠬᠠᠮᠠᠷ ᠦᠭᠡᠢ ᠮᠣᠷᠢ ᠶᠠᠭᠤᠨ ᠳ᠋ᠤ᠌ ᠡᠳ᠋ᠯᠡᠵᠦ ᠤᠨᠤᠵᠤ ᠶᠠᠪᠤᠳᠠᠭ ᠶᠤᠮ ᠳᠠ ᠭᠡᠵᠦ ᠠᠰᠠᠭᠤᠵᠠᠢ᠃ ᠭᠡᠲᠡᠯᠡ ᠬᠠᠭᠠᠨ ᠭᠤᠲᠤᠯ ᠮᠣᠷᠢ ᠪᠠᠨ ᠦᠵᠡᠭᠡᠳ ᠰᠡᠭᠦᠯᠡᠨ ᠬᠦᠦ ᠳ᠋ᠦ᠍ ᠴᠢᠳᠠᠭᠳᠠᠭᠰᠠᠨ ᠳ᠋ᠤ᠌ ᠪᠠᠨ ᠰᠢᠷᠠᠯᠬᠠᠵᠤ᠂ ᠠ ᠰᠡᠭᠦᠯᠡᠨ ᠬᠦᠦ ᠴᠢ ᠲᠡᠢᠮᠦ ᠰᠦᠷᠡᠬᠡᠢ ᠴᠢᠳᠠᠮᠠᠭᠠᠢ ᠶᠤᠮ ᠪᠣᠯ ᠮᠢᠨᠦ ᠬᠠᠲᠤᠨ ᠤ᠋ ᠡᠷᠳᠡᠨᠢ ᠶ᠋ᠢᠨ ᠠᠯᠲᠠᠨ ᠪᠥᠭᠡᠵᠢ ᠶ᠋ᠢ ᠥᠨᠥ ᠣᠷᠣᠢ ᠠᠪᠤᠭᠠᠳ ᠣᠷᠭᠢ᠂ ᠰᠡᠭᠦᠯᠡᠨ ᠬᠦᠦ ᠴᠦ᠍ ᠵᠠ ᠭᠡᠵᠦ ᠵᠥᠪᠰᠢᠶᠡᠷᠡᠴᠡᠢ᠃
ᠬᠠᠭᠠᠨ ᠭᠡᠷ ᠤᠷᠤᠭᠤ ᠪᠠᠨ ᠶᠠᠪᠤᠭᠠᠳ ᠥᠭᠴᠡᠢ ᠭᠡᠨᠡ᠂ ᠰᠡᠭᠦᠯᠡᠨ ᠬᠦᠦ ᠦᠳᠡᠰᠢ ᠶ᠋ᠢᠨ ᠪᠦᠷᠦᠩᠬᠡᠢ ᠪᠣᠯᠬᠤ ᠳ᠋ᠤ᠌ ᠬᠠᠭᠠᠨ ᠤ᠋ ᠳ᠋ᠤ᠌ ᠣᠴᠢᠵᠤ ᠭᠡᠷ ᠳᠡᠭᠡᠷᠡ ᠨᠢ ᠭᠠᠷᠤᠭᠠᠳ ᠲᠣᠭᠣᠨᠣ ᠶ᠋ᠢᠨ ᠴᠠᠮᠬᠠᠭ ᠲᠤ᠌ ᠨᠢᠭᠤᠭᠳᠠᠭᠠᠳ ᠬᠠᠷᠠᠵᠠᠢ ᠭᠡᠨᠡ᠂ ᠬᠠᠲᠤᠨ ᠣᠷᠣᠨ ᠳᠡᠭᠡᠷᠡ ᠪᠡᠨ ᠤᠨᠲᠠᠬᠤ ᠳ᠋ᠤ᠌ ᠪᠠᠨ ᠡᠷᠳᠡᠨᠢ ᠶ᠋ᠢᠨ ᠠᠯᠲᠠᠨ ᠪᠥᠭᠡᠵᠢ ᠪᠡᠨ ᠠᠮᠠᠨ ᠳ᠋ᠤ᠌ ᠪᠠᠨ ᠬᠢᠵᠡᠢ᠂ ᠣᠷᠣ ᠶ᠋ᠢᠨ ᠤᠷᠳᠤᠭᠤᠷ ᠬᠠᠭᠠᠨ ᠥᠪᠡᠷ ᠢ᠋ᠶ᠋ᠡᠷ ᠬᠡᠪᠲᠡᠪᠡ᠂ ᠬᠣᠢᠮᠣᠷ ᠲᠤ᠌ ᠨᠢ ᠬᠣᠶᠠᠷ ᠯᠠᠮᠠ᠂ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠬᠣᠶᠠᠷ ᠡᠷᠡᠭᠲᠡᠢ ᠵᠠᠷᠤᠴᠠ᠂ ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠬᠠᠭᠠᠨ ᠤ᠋ ᠬᠥᠯ ᠳ᠋ᠦ᠍ ᠠᠶᠠᠭᠠᠴᠢᠨ ᠰᠢᠪᠡᠭᠴᠢᠨ ᠬᠣᠶᠠᠷ ᠬᠡᠦᠬᠡᠨ᠂ ᠬᠣᠶᠠᠷ ᠬᠠᠲᠠᠪᠴᠢᠨ ᠳ᠋ᠤ᠌ ᠨᠢ ᠵᠢᠰ ᠭᠠᠤᠯᠢ ᠬᠣᠰᠢᠭᠤ ᠲᠠᠢ ᠬᠣᠶᠠᠷ ᠰᠢᠮᠨᠤ᠂ ᠭᠡᠷ ᠦ᠋ᠨ ᠭᠠᠳᠠᠨᠠ ᠠᠰᠠᠷ ᠪᠠᠰᠠᠷ ᠬᠣᠶᠠᠷ ᠨᠣᠬᠠᠢ᠂ ᠳᠠᠷᠠᠭᠠ ᠨᠢ ᠬᠠᠵᠠᠳᠠᠭ ᠬᠠᠢᠷᠳᠠᠭ ᠪᠤᠤᠷᠠ ᠪᠠᠨ ᠤᠶᠠᠵᠤ ᠲᠤᠰ ᠲᠤ᠌ ᠨᠢ ᠰᠡᠷᠡᠩᠭᠡ ᠪᠠᠢᠬᠤ ᠶ᠋ᠢ ᠵᠠᠬᠢᠵᠠᠢ᠃ ᠡᠭᠦᠨ ᠢ᠋ ᠮᠡᠳᠡᠭᠰᠡᠨ ᠰᠡᠭᠦᠯᠡᠨ ᠬᠦᠦ ᠬᠠᠲᠤᠨ ᠤ᠋ ᠡᠷᠳᠡᠨᠢ ᠶ᠋ᠢᠨ ᠠᠯᠲᠠᠨ ᠪᠥᠭᠡᠵᠢ ᠶ᠋ᠢ ᠠᠪᠬᠤ ᠪᠠᠷ ᠰᠢᠢᠳᠴᠦ᠂ ᠰᠥᠨᠢ ᠳᠤᠮᠳᠠ ᠪᠣᠯᠬᠤ ᠶ᠋ᠢᠨ ᠬᠢᠷᠢ ᠬᠣᠲᠠᠨ ᠳ᠋ᠤ᠌ ᠨᠢ ᠣᠷᠣᠵᠤ᠂ ᠨᠢᠭᠡ ᠬᠡᠭᠡᠯ ᠲᠡᠢ ᠪᠦᠳᠦᠭᠦᠨ ᠡᠮᠡ ᠬᠣᠨᠢ ᠠᠯᠠᠭᠠᠳ ᠬᠣᠷᠮᠣᠢ ᠱᠣᠷᠪᠤᠭᠤ ᠣᠯᠤᠭᠠᠳ ᠬᠠᠭᠠᠨ ᠤ᠋ ᠡᠭᠦᠳᠡᠨ ᠳ᠋ᠦ᠍ ᠣᠴᠢᠵᠠᠢ᠃ ᠲᠡᠭᠡᠭᠡᠳ ᠬᠠᠵᠠᠳᠠᠭ ᠬᠠᠢᠷᠳᠠᠭ ᠬᠣᠶᠠᠷ ᠪᠤᠤᠷᠠ ᠳ᠋ᠤ᠌ ᠨᠢ ᠬᠣᠶᠠᠷ ᠬᠣᠷᠮᠣᠢ ᠱᠣᠷᠪᠣᠭᠤ ᠪᠠᠨ ᠬᠤᠪᠢᠶᠠᠵᠤ ᠥᠭᠪᠡ᠃ ᠠᠰᠠᠷ ᠪᠠᠰᠠᠷ ᠨᠣᠬᠠᠢ ᠳ᠋ᠤ᠌ ᠨᠢ ᠬᠣᠨᠢᠨ ᠤ᠋ ᠪᠥᠭᠰᠡ ᠴᠡᠭᠡᠵᠢ ᠶ᠋ᠢ ᠥᠭᠭᠦᠭᠡᠳ ᠵᠢᠰ ᠭᠠᠤᠯᠢ ᠬᠣᠰᠢᠭᠤ ᠲᠠᠢ ᠰᠢᠮᠨᠤᠰ ᠲᠤ᠌ ᠨᠢ ᠡᠯᠢᠭᠡ ᠠᠭᠤᠰᠬᠢ ᠶ᠋ᠢ ᠨᠢ ᠨᠢᠭᠡ ᠨᠢᠭᠡ ᠪᠡᠷ ᠨᠢ ᠥᠭᠭᠦᠭᠡᠳ ᠭᠡᠷ ᠲᠦ᠍ ᠨᠢ ᠣᠷᠣᠭᠠᠳ ᠬᠣᠶᠠᠷ ᠵᠠᠷᠤᠴᠠ ᠬᠠᠷᠠ ᠬᠥᠮᠦᠨ ᠦ᠌ ᠬᠤᠴᠢᠯᠭᠠ ᠶ᠋ᠢ ᠰᠡᠬᠦᠵᠦ ᠬᠣᠳᠣᠭᠣᠳᠣ ᠴᠢᠴᠠᠭᠠ ᠶ᠋ᠢ ᠨᠢ ᠠᠰᠬᠠᠵᠤ᠂ ᠠᠶᠠᠭᠠᠴᠢᠨ ᠰᠢᠪᠡᠭᠴᠢᠨ ᠬᠡᠦᠬᠡᠨ ᠦ᠌ ᠬᠤᠴᠢᠯᠭᠠ ᠶ᠋ᠢ ᠪᠠᠰᠠ ᠰᠡᠬᠦᠵᠦ ᠳᠤᠲᠠᠭᠤ ᠤᠯᠠᠭᠠᠨ ᠨᠢᠴᠦᠭᠦᠨ ᠬᠤᠷᠠᠭᠠ ᠶ᠋ᠢ ᠬᠢᠵᠦ᠂ ᠬᠣᠶᠠᠷ ᠯᠠᠮᠠ ᠶ᠋ᠢᠨ ᠲᠣᠯᠣᠭᠠᠢ ᠳ᠋ᠤ᠌ ᠰᠡᠮᠡᠵᠡ ᠶ᠋ᠢ ᠰᠡᠮᠬᠡᠨ ᠣᠷᠢᠶᠠᠵᠤ᠂ ᠬᠠᠭᠠᠨ ᠤ᠋ ᠡᠪᠦᠷ ᠲᠦ᠍ ᠬᠣᠶᠠᠷ ᠪᠥᠭᠡᠷᠡ ᠶ᠋ᠢ ᠨᠢ ᠬᠢᠭᠡᠳ ᠬᠠᠲᠤᠨ ᠤ᠋ ᠠᠮᠠ ᠳ᠋ᠤ᠌ ᠰᠥᠰᠥ ᠶ᠋ᠢ ᠨᠢ ᠬᠢᠴᠢᠬᠡᠵᠡᠢ᠃ ᠬᠠᠲᠤᠨ᠄ ᠠ ᠬᠠᠭ ᠲᠦᠢ ᠭᠡᠳ ᠯᠡ ᠨᠢᠯᠪᠤᠵᠤ ᠣᠷᠬᠢᠲᠠᠯᠠ ᠠᠯᠲᠠᠨ ᠪᠥᠭᠡᠵᠢ ᠨᠢ ᠭᠠᠷᠤᠭᠠᠳ ᠢᠷᠡᠵᠡᠢ᠃ ᠰᠡᠭᠦᠯᠡᠨ ᠬᠦᠦ ᠪᠥᠭᠡᠵᠢ ᠶ᠋ᠢ ᠠᠪᠤᠭᠠᠳ ᠭᠦᠶᠦᠵᠦ ᠭᠠᠷᠤᠭᠰᠠᠨ ᠢ᠋ᠶ᠋ᠠᠨ ᠭᠡᠷ ᠳᠡᠭᠡᠷᠡ ᠨᠢ ᠭᠠᠷᠤᠭᠠᠳ ᠲᠣᠭᠣᠨᠣ ᠶ᠋ᠢᠨ ᠴᠠᠮᠬᠠᠭ ᠲᠤ᠌ ᠣᠬᠢᠭᠠᠳ ᠨᠢᠭᠤᠭᠳᠠᠭᠠᠳ ᠬᠠᠷᠠᠵᠠᠢ ᠭᠡᠨᠡ᠂ ᠬᠠᠲᠤᠨ ᠤᠴᠢᠷ ᠦᠭᠡᠢ ᠶᠡᠬᠡ ᠨᠢᠯᠪᠤᠨ ᠬᠠᠬᠠᠵᠤ ᠴᠠᠴᠠᠵᠤ ᠪᠠᠢᠬᠤ ᠮᠥᠷᠲᠡᠭᠡᠨ ᠬᠠᠭᠠᠨ ᠭᠤᠸᠠᠢ᠂ ᠬᠠᠭᠠᠨ ᠭᠤᠸᠠᠢ᠂ ᠪᠣᠰᠤᠭᠠᠷᠠᠢ᠂ ᠠᠯᠲᠠᠨ ᠪᠥᠭᠡᠵᠢ ᠶ᠋ᠢ ᠰᠡᠭᠦᠯᠡᠨ ᠬᠦᠦ ᠠᠪᠤᠭᠠᠳ ᠶᠠᠪᠤᠯᠠ᠃ ᠬᠠᠭᠠᠨ ᠨᠣᠢᠷ ᠲᠤ᠌ ᠪᠠᠨ ᠤᠨᠲᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠡᠪ ᠦᠭᠡᠢ ᠬᠦᠢᠲᠡᠨ ᠶᠠᠭᠤᠮᠠ ᠬᠣᠶᠠᠷ ᠲᠠᠯᠠ ᠤᠷᠤᠭᠤ ᠨᠢ ᠤᠨᠠᠬᠤ ᠳ᠋ᠤ᠌ ᠶᠣᠣ ᠶᠣᠣ ᠶᠣᠣ᠂ ᠬᠣᠶᠠᠷ ᠪᠥᠭᠡᠷᠡ ᠤᠨᠠᠴᠢᠬᠠᠯᠠ ᠭᠡᠵᠦ ᠶᠠᠩᠭᠤᠷᠬᠠᠭᠠᠳ ᠪᠣᠰᠤᠭᠰᠠᠨ ᠦᠭᠡᠢ᠃
ᠬᠣᠶᠠᠷ ᠯᠠᠮᠠ ᠭᠤᠸᠠᠢ᠂ ᠪᠣᠰᠤᠭᠠᠷᠠᠢ ᠭᠡᠵᠦ ᠬᠠᠲᠤᠨ ᠳᠠᠭᠤᠳᠠᠪᠠ᠃
ᠪᠠᠢᠵᠠᠭᠠᠷᠠᠢ᠂ ᠪᠠᠢᠵᠠᠭᠠᠷᠠᠢ᠂ ᠪᠠᠩᠵᠢᠯ ᠴᠠᠮᠴᠠ ᠲᠣᠯᠣᠭᠠᠢ ᠳ᠋ᠤ᠌ ᠣᠷᠢᠶᠠᠯᠳᠤᠴᠢᠬᠠᠭᠠᠳ ᠤᠷᠠᠭᠳᠠᠭᠠᠳ ᠪᠠᠢᠨᠠ᠃
ᠵᠠᠷᠤᠴᠠ ᠬᠣᠶᠠᠷ ᠬᠦᠦ ᠮᠢᠨᠢ ᠪᠣᠰᠤᠭᠠᠷᠠᠢ
ᠬᠦᠢ ᠂ ᠴᠢ ᠦᠦ? ᠪᠢ ᠦᠦ? ᠴᠢ ᠯᠡ ᠴᠢᠴᠠᠭᠠ ᠠᠯᠳᠠᠴᠢᠬᠠᠵᠠᠢ᠂ ᠦᠭᠡᠢ ᠪᠢ ᠪᠢᠰᠢ ᠠ᠋᠂ ᠦᠭᠡᠢ ᠴᠢ ᠠᠯᠳᠠᠴᠢᠬᠠᠵᠠᠢ ᠭᠡᠵᠦ ᠬᠡᠷᠡᠯᠳᠦᠭᠡᠳ ᠪᠣᠰᠤᠭᠰᠠᠨ ᠦᠭᠡᠢ᠃
ᠠᠶᠠᠭᠠᠴᠢᠨ ᠰᠢᠪᠡᠭᠴᠢᠨ ᠬᠣᠶᠠᠷ ᠬᠡᠦᠬᠡᠨ ᠠ᠋᠂ ᠪᠣᠰᠤᠭᠠᠷᠠᠢ᠂ ᠪᠣᠰᠤᠭᠠᠷᠠᠢ᠂ ᠠᠯᠲᠠᠨ ᠪᠥᠭᠡᠵᠢ ᠁ ᠶᠠᠭᠠᠬᠢᠳᠠᠭ ᠪᠢᠯᠡ? ᠭᠡᠬᠦ ᠳ᠋ᠦ᠍ ᠴᠢᠨᠦ ᠬᠦᠦ ᠦᠦ ᠮᠢᠨᠦ ᠬᠦᠦ ᠦᠦ ᠭᠡᠵᠦ ᠪᠤᠯᠢᠶᠠᠯᠴᠠᠯᠳᠤᠭᠠᠳ ᠪᠣᠰᠤᠭᠰᠠᠨ ᠦᠭᠡᠢ᠃
ᠵᠢᠰ ᠭᠠᠤᠯᠢ ᠬᠣᠰᠢᠭᠤ ᠲᠠᠢ ᠬᠣᠶᠠᠷ ᠰᠢᠮᠨᠤ ᠶᠠᠪᠤᠭᠠᠷᠠᠢ᠂ ᠠᠯᠲᠠᠨ ᠪᠥᠭᠡᠵᠢ ᠶ᠋ᠢ ᠮᠢᠨᠢ ᠠᠪᠤᠭᠠᠳ ᠢᠷᠡ!
ᠴᠢ ᠠᠭᠤᠰᠬᠢ ᠢᠳᠡᠭᠰᠡᠨ
ᠠᠢ ᠪᠢ ᠵᠢᠷᠦᠬᠡ ᠢᠳᠡᠭᠰᠡᠨ᠂ ᠴᠢ ᠶᠠᠪᠤ
ᠦᠭᠡᠢ᠂ ᠴᠢ ᠶᠠᠪᠤ
ᠴᠢ ᠶᠠᠪᠤ
ᠦᠭᠡᠢ᠂ ᠴᠢ ᠶᠠᠪᠤ ᠭᠡᠵᠦ ᠬᠡᠷᠡᠭᠦᠯᠳᠡᠭᠡᠳ ᠬᠥᠲᠥᠯᠦᠭᠰᠡᠨ ᠦᠭᠡᠢ᠃
ᠬᠠᠲᠤᠨ ᠪᠦᠷ ᠲᠡᠪᠡᠳᠡᠨ ᠰᠠᠨᠳᠤᠷᠴᠤ᠂ ᠠᠯᠲᠠᠨ ᠪᠥᠭᠡᠵᠢ᠂ ᠠᠰᠠᠷ ᠪᠠᠰᠠᠷ ᠬᠣᠶᠠᠷ ᠨᠣᠬᠠᠢ ᠳᠠᠭᠤ ᠳᠠᠭᠤ
ᠦᠭᠡᠢ᠂ ᠪᠢ ᠴᠡᠭᠡᠵᠢ ᠢᠳᠡᠭᠰᠡᠨ᠂ ᠴᠢ ᠪᠥᠭᠰᠡ ᠢᠳᠡᠭᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠷ ᠶᠠᠪᠤ
ᠦᠭᠡᠢ᠂ ᠴᠡᠭᠡᠵᠢ ᠶᠡᠬᠡ ᠮᠢᠬᠠ ᠲᠠᠢ᠂ ᠴᠢ ᠶᠠᠪᠤ
ᠰᠡᠭᠦᠯ ᠲᠡᠢ ᠤᠭᠤᠴᠠ ᠢᠳᠡᠭᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠷ ᠴᠢ ᠶᠠᠪᠤᠬᠤ ᠦᠭᠡᠢ ᠦᠦ ᠭᠡᠵᠦ ᠬᠡᠷᠡᠯᠳᠦᠵᠦ ᠨᠣᠴᠣᠯᠳᠤᠭᠠᠳ ᠪᠠᠰᠠ ᠯᠠ ᠶᠠᠪᠤᠭᠰᠠᠨ ᠦᠭᠡᠢ᠃
ᠬᠠᠵᠠᠳᠠᠭ ᠬᠠᠢᠷᠳᠠᠭ ᠪᠤᠤᠷᠠ ᠮᠢᠨᠢ᠂ ᠶᠠᠪᠤᠭᠠᠷᠠᠢ ᠰᠡᠭᠦᠯᠡᠨ ᠬᠦᠦ ᠪᠥᠭᠡᠵᠢ ᠶ᠋ᠢ ᠮᠢᠨᠢ ᠠᠪᠤᠭᠠᠳ ᠶᠠᠪᠤᠴᠢᠬᠠᠯᠠ ᠭᠡᠬᠦ ᠳ᠋ᠦ᠍ ᠨᠢ ᠴᠢ ᠶᠡᠬᠡ ᠬᠣᠷᠮᠣᠢ ᠱᠣᠷᠪᠣᠭᠣ ᠢᠳᠡᠭᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠷ ᠶᠠᠪᠤ᠂ ᠪᠢ ᠪᠠᠭᠠ ᠬᠣᠷᠮᠣᠢ ᠢᠳᠡᠭᠰᠡᠨ᠂ ᠸᠠ ᠴᠢ ᠶᠠᠪᠤ
ᠦᠭᠡᠢ᠂ ᠴᠢ ᠶᠠᠪᠤ
ᠪᠢ ᠶᠠᠪᠤᠬᠤ ᠦᠭᠡᠢ ᠭᠡᠵᠦ ᠵᠥᠷᠢᠯᠳᠦᠭᠡᠳ ᠠᠯᠢ ᠠᠯᠢ ᠨᠢ ᠶᠠᠪᠤᠭᠰᠠᠨ ᠦᠭᠡᠢ᠃
ᠬᠠᠲᠤᠨ ᠬᠡᠢ ᠳᠡᠮᠡᠢ ᠪᠤᠬᠢᠨᠢᠳᠤᠨ ᠬᠣᠴᠣᠷᠬᠤ ᠳ᠋ᠤ᠌ ᠡᠷᠳᠡᠨᠢ ᠶ᠋ᠢᠨ ᠠᠯᠲᠠᠨ ᠪᠥᠭᠡᠵᠢ ᠶ᠋ᠢ ᠠᠪᠤᠭᠰᠠᠨ ᠰᠡᠭᠦᠯᠡᠨ ᠬᠦᠦ ᠪᠠᠶᠠᠷ ᠲᠠᠢ ᠪᠠᠷ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠡᠷᠳᠡᠨᠢ ᠶ᠋ᠢᠨ ᠬᠦᠴᠦᠲᠦ ᠷᠢᠳᠢ ᠰᠢᠳᠢᠲᠦ ᠪᠥᠭᠡᠵᠢ ᠪᠡᠨ ᠡᠮᠡᠭᠡᠨ ᠡᠵᠢ ᠳ᠋ᠦ᠍ ᠪᠡᠨ ᠥᠭᠭᠦᠭᠡᠳ ᠠᠮᠠᠷ ᠰᠠᠢᠬᠠᠨ ᠳ᠋ᠤ᠌ ᠪᠠᠨ ᠵᠢᠷᠭᠠᠵᠠᠢ᠃
ᠦᠰᠦᠭ ᠬᠠᠲᠠᠭᠰᠠᠨ ᠨᠢ᠄ ᠮᠣᠳᠣᠲᠤ ᠬᠠᠪᠤᠷᠵᠢᠶᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠣᠳᠣᠨᠭᠡᠷᠡᠯ
ᠬᠢᠨᠠᠭᠴᠢ᠄ ᠮᠥᠴᠢᠷ