ᠰᠡᠭᠦᠯᠴᠢ ᠶᠢᠨ ᠡᠳᠦᠷ – ᠷ ᠂ ᠴᠣᠢᠨᠣᠮ Сүүлчийн өдөр – Р ᠂ Чойном
460ᠰᠡᠭᠦᠯᠴᠢ ᠶᠢᠨ ᠡᠳᠦᠷ
ᠠᠷᠠᠢ ᠭᠡᠵᠦ ᠦᠦᠷ ᠦ᠋ᠨ ᠭᠣᠵᠣᠩ ᠭᠡᠭᠡ ᠲᠤᠰᠬᠤ ᠳ᠋ᠤ᠌ ᠲᠣᠭᠣᠨᠣᠨ ᠳᠡᠭᠡᠷᠡ ᠪᠣᠯᠵᠣᠮᠣᠷ ᠵᠢᠷᠭᠢᠪᠡ᠃
ᠭᠡᠷ ᠦ᠋ᠨ ᠳᠣᠲᠣᠷᠠ ᠨᠠᠮ ᠭᠦᠮ ᠂ ᠥᠨᠥᠴᠢᠨ ᠭᠠᠭᠴᠠ ᠬᠥᠮᠦᠨ ᠦ᠌ ᠴᠡᠴᠡᠭᠡᠨᠡᠭᠰᠡᠨ ᠠᠮᠢᠰᠬᠤᠯ ᠰᠤᠯᠠᠬᠠᠨ ᠰᠣᠨᠣᠰᠳᠠᠬᠤ ᠪᠥᠭᠡᠳ ᠦᠶᠡ ᠦᠶᠡ ᠳᠣᠣᠷᠠᠬᠠᠨ ᠳᠤᠤᠭᠠᠷᠴᠤ ᠰᠡᠭᠦᠷᠡᠰᠦ ᠠᠯᠳᠠᠬᠤ ᠨᠢ ᠪᠡᠶᠡ ᠰᠡᠳᠬᠢᠯ ᠬᠣᠶᠠᠷ ᠵᠣᠪᠠᠭᠤᠷᠢ ᠶᠡᠬᠡᠲᠡᠢ ᠶ᠋ᠢᠨ ᠭᠡᠷᠡᠴᠢ ᠠᠵᠢ᠃
ᠥᠩᠭᠡᠷᠡᠭᠰᠡᠨ ᠰᠥᠨᠢ ᠪᠠᠷᠤᠭ ᠤᠨᠲᠠᠭᠠ ᠦᠭᠡᠢ᠃ ᠲᠠᠷᠢᠬᠢ ᠲᠣᠯᠣᠭᠠᠢ ᠨᠢ ᠬᠠᠯᠠᠭᠤ ᠣᠷᠬᠢᠨ ᠳᠦᠢᠷᠡᠬᠦ ᠪᠥᠭᠡᠳ ᠴᠡᠭᠡᠵᠢᠨ ᠳᠣᠲᠣᠷᠠ ᠨᠢ ᠰᠢᠳᠡᠵᠦ ᠪᠠᠢᠬᠤ ᠮᠡᠲᠦ ᠲᠤᠯᠠ ᠠᠮᠠ ᠨᠢ ᠠᠭᠰᠠᠵᠤ ᠂ ᠵᠡᠰ ᠦ᠋ᠨ ᠪᠠᠯ ᠮᠡᠲᠦ ᠵᠦᠢᠯ ᠠᠮᠲᠠᠯᠠᠭᠳᠠᠨᠠ᠃
ᠨᠣᠢᠷ ᠲᠤ᠌ ᠮᠠᠭᠤ ᠪᠣᠯᠤᠭᠰᠠᠭᠠᠷ ᠵᠢᠯ ᠢᠯᠡᠭᠦᠦ ᠪᠣᠯᠵᠤ ᠪᠠᠢᠭᠠ ᠪᠣᠯᠪᠠᠴᠤ᠂ ᠰᠠᠶᠢᠬᠠᠨ ᠤ᠋ ᠬᠡᠳᠦ ᠬᠣᠨᠣᠭ ᠠ᠋ᠴᠠ ᠪᠦᠷ ᠤᠨᠲᠠᠵᠤ ᠠᠮᠠᠷᠠᠵᠤ ᠴᠢᠳᠠᠬᠤ ᠪᠠᠨ ᠪᠣᠯᠢᠭ᠍ᠰᠠᠨ ᠡᠨᠡ ᠬᠥᠮᠦᠨ ᠂ ᠥᠪᠡᠷ ᠦ᠋ᠨ ᠨᠠᠮᠲᠠᠷ ᠶᠠᠪᠤᠳᠠᠯ ᠢ᠋ ᠬᠠᠶᠠ ᠡᠷᠭᠢᠨ ᠨᠡᠬᠡᠨ ᠪᠣᠳᠣᠬᠤ ᠪᠣᠯᠪᠠᠴᠤ ᠲᠡᠷᠡ ᠪᠦᠷᠢ ᠶ᠋ᠢ ᠨᠠᠷᠢᠨ ᠳᠡᠰ ᠳᠠᠷᠠᠭᠠᠯᠠᠨ ᠰᠠᠨᠠᠵᠤ ᠡᠰᠡ ᠴᠢᠳᠠᠨᠠ᠃
ᠬᠥᠳᠡᠭᠡ ᠨᠤᠲᠤᠭ ᠤ᠋ᠨ ᠪᠦᠷᠦᠭ ᠳᠠᠷᠤᠤᠬᠠᠨ ᠪᠠᠭᠠ ᠨᠠᠰᠤ᠂ ᠶᠣᠰᠣ ᠰᠤᠷᠪᠤᠯᠵᠢ᠂ ᠤᠳᠤᠮ ᠤᠭᠰᠠᠭᠠ ᠪᠦᠬᠦᠢ ᠡᠴᠢᠭᠡ ᠶ᠋ᠢᠨ ᠭᠠᠯ ᠭᠣᠯᠣᠮᠲᠠ ᠂ ᠨᠣᠮ ᠡᠷᠳᠡᠮ ᠦ᠋ᠨ ᠮᠥᠷ ᠬᠥᠭᠡᠭᠡᠭᠰᠡᠨ ᠡᠬᠢᠨ ᠦ᠌ ᠵᠢᠯ ᠦ᠋ᠳ᠂ ᠵᠢᠪᠬᠤᠯᠠᠩᠲᠤ ᠵᠠᠯᠠᠭᠤ ᠨᠠᠰᠤ᠂ ᠬᠢᠯᠪᠠᠷᠬᠠᠨ ᠮᠠᠨᠳᠤᠬᠤ ᠠᠯᠳᠠᠷ ᠨᠡᠷᠡ ᠬᠢᠭᠡᠳ ᠠᠩᠬᠠᠨ ᠤ᠋ ᠢᠨᠠᠭ ᠰᠡᠳᠬᠢᠯ ᠁ ᠡᠢᠨ ᠬᠦ᠌ ᠂ ᠢᠨᠠᠭ ᠰᠡᠳᠬᠢᠯ ᠦ᠋ᠨ ᠲᠡᠷᠡ ᠲᠠᠩᠰᠤᠭᠬᠠᠨ ᠦᠶᠡ ᠶ᠋ᠢ ᠰᠠᠨᠠᠬᠤ ᠠ᠋ᠴᠠ ᠰᠡᠳᠬᠢᠯ ᠳᠣᠲᠤᠷᠠ ᠨᠢ ᠶᠠᠮᠠᠷᠬᠠᠨ ᠨᠢᠭᠡᠨ ᠵᠦᠢᠯ ᠲᠠᠰᠤᠷᠠᠨ ᠤᠨᠠᠬᠤ ᠰᠢᠭ᠋ ᠪᠣᠯᠵᠤ ᠰᠠᠮ ᠰᠠᠨᠠᠭᠠ ᠠᠯᠳᠠᠨᠠ᠃
ᠰᠠᠨᠠᠭᠠ ᠠᠯᠳᠠᠬᠤ ᠳ᠋ᠤ᠌ ᠠᠶᠤᠤᠯᠢᠬᠠᠢ ᠴᠡᠭᠡᠵᠢ ᠬᠥᠨᠳᠡᠭᠳᠡᠨᠡ ᠃
– ᠪᠢ ᠭᠡᠳᠡᠭ ᠬᠥᠮᠦᠨ ᠳᠦ᠋ᠭᠦᠷᠴᠢᠬᠡᠭᠰᠡᠨ ᠠᠷᠢᠬᠢᠴᠢᠨ ᠪᠣᠯᠵᠠᠢ ! ᠭᠡᠵᠦ ᠦᠯᠦ ᠮᠡᠳᠡᠭ ᠰᠢᠪᠡᠨᠡᠨ ᠬᠡᠯᠡᠭᠰᠡᠨ ᠨᠢ ᠲᠡᠭᠷᠢ ᠲᠤᠯᠲᠠᠯᠠ ᠬᠠᠰᠬᠢᠷᠤᠨ ᠬᠡᠯᠡᠭᠰᠡᠨ ᠮᠡᠲᠦ ᠂ ᠠᠶᠤᠮᠰᠢᠭ᠍ᠲᠤ ᠴᠤᠤᠷᠢᠶᠠ ᠨᠢ ᠤᠭᠤᠷᠠᠭ ᠲᠠᠷᠢᠬᠢᠨ ᠤ᠋ ᠭᠦᠨ ᠤᠷᠤᠭᠤ ᠳᠠᠭᠤᠷᠢᠰᠤᠨ ᠵᠠᠮᠬᠠᠷᠠᠪᠠ᠃
ᠠᠩᠬᠠᠨ ᠤ᠋ ᠢᠨᠠᠭ ᠲᠡᠷᠡ ᠬᠦ᠌ ᠲᠣᠭᠣᠷᠢᠭ ᠴᠠᠭᠠᠨ ᠴᠢᠷᠠᠢ ᠲᠠᠢ ᠂ ᠨᠠᠷᠢᠬᠠᠨ ᠪᠡᠯᠭᠡᠭᠦᠰᠦᠲᠦ ᠲᠣᠶᠢᠬᠠᠨ ᠪᠦᠰᠡᠭᠦᠢ ᠨᠢ ᠪᠠᠰᠠ ᠯᠠ ᠡᠨᠡ ᠬᠣᠲᠠ ᠳ᠋ᠤ᠌ ᠠᠷᠢᠬᠢ ᠤᠤᠭᠤᠵᠤ ᠰᠡᠳᠬᠢᠯ ᠰᠢᠷᠬᠠ ᠲᠠᠢ ᠶᠠᠪᠤᠳᠠᠭ ᠢ᠋ ᠰᠠᠨᠠᠨ ᠵᠢᠷᠦᠬᠡᠨ ᠳᠣᠲᠣᠷᠠ ᠪᠠᠨ ᠭᠠᠰᠠᠯᠤᠨᠠ ᠃ 《 ᠬᠥᠭᠡᠷᠦᠬᠦᠢ !ᠪᠢ ᠲᠡᠭᠦᠨ ᠢ᠋ ᠥᠪᠡᠷ ᠤᠷᠤᠭᠤ ᠪᠠᠨ ᠣᠢᠷᠠᠲᠤᠭᠤᠯᠤᠭᠠ ᠦᠭᠡᠢ ᠰᠠᠨ ᠪᠣᠯ ᠳᠡᠭᠡᠷᠡ ᠪᠠᠢᠵᠠᠢ ᠳᠠ᠁ 》
ᠲᠡᠷᠡ ᠬᠥᠮᠦᠨ ᠶᠡᠬᠡ ᠰᠢᠷᠠᠲᠤᠵᠠᠢ ᠃ ᠨᠣᠢᠷ ᠦᠭᠡᠢ ᠬᠣᠨᠣᠭᠰᠠᠨ ᠣᠢ ᠤᠬᠠᠭᠠᠨ ᠨᠢ ᠤᠨᠲᠠᠭᠠ ᠰᠡᠷᠢᠭᠦᠨ ᠬᠣᠶᠠᠷ ᠤ᠋ᠨ ᠵᠠᠪᠰᠠᠷ ᠲᠤ᠌ ᠪᠥᠭᠡᠳ ᠬᠤᠷᠤᠭᠤ ᠪᠠᠨ ᠬᠥᠳᠡᠯᠭᠡᠬᠦ ᠳ᠋ᠦ᠍ ᠪᠡᠷᠬᠡ ᠪᠣᠳᠣᠭᠳᠠᠨ ᠂ ᠬᠡᠭᠦᠷ ᠮᠡᠲᠦ ᠭᠤᠯᠳᠤᠢᠨ ᠬᠡᠪᠲᠡᠨᠡ᠃
ᠰᠢᠷᠠᠲᠤᠯ ᠳ᠋ᠤ᠌ ᠬᠡᠮᠵᠢᠶᠡ ᠭᠡᠵᠦ ᠪᠠᠢᠳᠠᠭ ᠪᠣᠯ ᠲᠡᠷᠡ ᠬᠡᠮᠵᠢᠶᠡ ᠬᠡᠲᠦᠷᠡᠭᠰᠡᠭᠡᠷ ᠳᠠᠷᠤᠢ ᠭᠤᠷᠪᠠᠨ ᠵᠢᠯ ᠲᠠᠪᠤᠨ ᠰᠠᠷᠠ ᠠᠷᠪᠠᠨ ᠶᠢᠰᠦᠨ ᠬᠣᠨᠣᠭ ᠪᠣᠯᠪᠠ ᠃
ᠡᠨᠡ ᠵᠠᠪᠰᠠᠷ ᠶᠢᠷᠲᠢᠨᠴᠦ ᠶ᠋ᠢᠨ ᠦᠢᠯᠡ ᠶᠠᠪᠤᠳᠠᠯ ᠢ᠋ ᠵᠡᠭᠦᠳᠦ ᠮᠡᠲᠦ ᠥᠩᠭᠡᠷᠡᠭᠡᠵᠦ᠂ ᠰᠠᠨᠠᠬᠤ ᠪᠠ ᠢᠴᠢᠬᠦ᠂ ᠰᠠᠨᠳᠤᠷᠬᠤ ᠪᠠ ᠡᠷᠡᠮᠡᠯᠵᠡᠬᠦ᠂ ᠠᠵᠤ ᠲᠥᠷᠥᠬᠦ ᠶ᠋ᠢᠨ ᠡᠭᠡᠯ ᠶᠣᠰᠣᠨ ᠠ᠋ᠴᠠ ᠭᠠᠳᠠᠨᠠ ᠭᠠᠷᠴᠤ᠂ ᠭᠠᠨᠢᠬᠠᠷᠠᠵᠤ ᠭᠠᠢᠬᠠᠰᠢᠷᠠᠵᠤ ᠢᠷᠡᠵᠡᠢ᠃
ᠣᠳᠣ ᠭᠡᠷ ᠦ᠋ᠨ ᠳᠣᠲᠣᠷᠠ ᠥᠪᠡᠷ ᠡᠴᠡ ᠨᠢ ᠥᠭᠡᠷᠡ ᠬᠥᠮᠦᠨ ᠦᠭᠡᠢ ᠂ ᠡᠷᠭᠢᠨ ᠲᠣᠭᠣᠷᠢᠨ ᠡᠯᠦᠢ ᠬᠤᠯᠤᠢ᠃ ᠠᠷᠠᠢ ᠭᠡᠵᠦ ᠦᠦᠷ ᠭᠡᠢᠭᠡᠳ᠂ ᠪᠣᠷᠣ ᠪᠣᠯᠵᠣᠮᠣᠷ ᠲᠣᠭᠣᠨᠣᠨ ᠳᠡᠭᠡᠷᠡ ᠵᠢᠷᠭᠢᠬᠦ ᠨᠢ ᠠᠲᠠᠭᠠᠷᠬᠠᠮᠠ ᠬᠠᠷᠠᠭᠳᠠᠪᠠ ᠃
– ᠪᠢ ᠴᠦ᠍ ᠮᠥᠨ ᠳᠦᠭᠦᠷᠦᠭᠰᠡᠨ ᠠᠷᠢᠬᠢᠴᠢᠨ ᠪᠣᠯᠵᠠᠢ ᠳᠠ! ᠭᠡᠵᠦ ᠤᠷᠤᠭᠤᠯ ᠢ᠋ᠶ᠋ᠠᠨ ᠠᠶᠠᠷᠬᠠᠨ ᠬᠥᠳᠡᠯᠭᠡᠵᠦ ᠦᠯᠦ ᠮᠡᠳᠡᠭ ᠰᠢᠪᠡᠨᠡᠬᠦ ᠳ᠋ᠦ᠍ ᠥᠪᠡᠷ ᠲᠦ᠋ᠨᠢ ᠲᠡᠷᠡ ᠦᠭᠡᠰ ᠢ᠋ ᠲᠩᠷᠢ ᠲᠤᠯᠲᠠᠯᠠ ᠬᠠᠰᠬᠢᠷᠤᠨ ᠬᠡᠯᠡᠭᠰᠡᠨ ᠮᠡᠲᠦ ᠰᠠᠨᠠᠭᠳᠠᠵᠤ ᠂ ᠤᠭᠤᠷᠠᠭ ᠲᠠᠷᠢᠬᠢᠨ ᠳ᠋ᠤᠨᠢ ᠤᠳᠠᠲᠠᠯᠠ ᠳᠠᠭᠤᠷᠢᠰᠪᠠ ᠃ ᠵᠢᠷᠦᠬᠡ ᠨᠢ ᠲᠦᠭᠰᠢᠭᠦᠷᠢᠯᠡᠨ ᠴᠣᠬᠢᠯᠠᠬᠤ ᠨᠢ ᠲᠣᠳᠣ ᠳᠤᠭᠤᠯᠲᠠᠯᠠ᠃
ᠬᠠᠮᠤᠭ ᠠᠮᠢᠲᠠᠨ ᠪᠤᠶᠠᠨᠲᠤ ᠬᠤᠸᠠ ᠶ᠋ᠢᠨ ᠰᠠᠷᠠᠭᠤᠯ ᠰᠠᠢᠬᠠᠨ ᠳᠡᠨᠵᠢ ᠳᠡᠭᠡᠷᠡ ᠨᠠᠭᠠᠳᠤᠮ ᠬᠢᠭᠡᠳ ᠨᠠᠷᠭᠢᠨ ᠴᠡᠩᠭᠡᠵᠦ ᠪᠠᠢᠬᠤ ᠳ᠋ᠤ᠌ ᠨᠠᠮ ᠭᠦᠮ ᠡᠵᠡᠭᠦᠢ ᠬᠣᠲᠠ ᠳ᠋ᠤ᠌ ᠭᠠᠪ ᠭᠠᠭᠴᠠᠬᠠᠨ ᠠᠪᠤᠷᠭᠤ ᠲᠣᠮᠣ ᠵᠢᠷᠦᠬᠡ ᠦᠯᠡᠳᠡᠭᠡᠳ ᠴᠣᠬᠢᠯᠠᠵᠤ ᠪᠠᠢᠭᠠ ᠮᠡᠲᠦ ᠬᠠᠴᠢᠨ ᠲᠣᠳᠣ᠃ ᠵᠢᠷᠦᠬᠡᠨ ᠦ᠌ ᠴᠣᠬᠢᠯᠲᠠ ᠮᠡᠲᠦ ᠮᠣᠷᠢᠨ ᠤ᠋ ᠬᠥᠯ ᠦ᠋ᠨ ᠴᠢᠮᠡᠭᠡ ᠨᠣᠢᠲᠠᠨ ᠭᠠᠵᠠᠷ ᠳᠡᠭᠡᠭᠦᠷ ᠲᠦᠪᠡᠷ ᠲᠦᠪᠡᠷ ᠲᠦᠪᠡᠷᠭᠡᠨ ᠢᠷᠡᠵᠦ ᠬᠠᠰᠢᠶᠠᠨ ᠤ᠋ ᠡᠭᠦᠳᠡ ᠣᠷᠴᠢᠮ ᠳ᠋ᠤ᠌ ᠵᠣᠭᠰᠣᠪᠠ ᠪᠣᠯᠤᠯᠲᠠᠢ᠃
ᠤᠳᠠᠯ ᠦᠭᠡᠢ ᠬᠥᠩᠭᠡᠬᠡᠨ ᠬᠥᠯ ᠲᠡᠢ ᠬᠥᠮᠦᠨ ᠭᠡᠷ ᠦ᠋ᠨ ᠡᠭᠦᠳᠡ ᠤᠷᠤᠭᠤ ᠠᠢᠰᠤᠨ ᠂ ᠬᠠᠭᠠᠯᠭᠠ ᠶ᠋ᠢ ᠵᠥᠭᠡᠯᠡᠨ ᠲᠠᠲᠠᠵᠤ ᠦᠵᠡᠭᠡᠳ :
– ᠨᠠᠴᠤᠭᠳᠣᠷᠵᠢ ᠭᠤᠸᠠᠢ !ᠭᠡᠵᠦ ᠨᠠᠷᠢᠬᠠᠨ ᠴᠣᠪᠣᠭᠣ ᠬᠣᠭᠣᠯᠠᠢ ᠪᠠᠷ ᠳᠤᠤᠭᠠᠷᠬᠤ ᠳ᠋ᠤᠨᠢ《 ᠪᠣᠶᠠᠨᠵᠢᠷᠭᠠᠯ 》 ᠭᠡᠰᠡᠨ ᠨᠡᠷᠡ ᠰᠡᠳᠬᠢᠯ ᠦ᠋ᠨ ᠪᠦᠷᠦᠩᠬᠦᠢ ᠳᠣᠲᠣᠷᠠ ᠪᠢᠴᠢᠬᠠᠨ ᠵᠤᠯᠠ ᠮᠡᠲᠦ ᠰᠦᠮᠡᠯᠵᠡᠨ ᠂ ᠲᠡᠷᠡ ᠬᠦ᠌ ᠶᠡᠬᠡ ᠰᠢᠷᠠᠲᠤᠭᠰᠠᠨ ᠬᠥᠮᠦᠨ ᠠᠷᠭᠠ ᠪᠤᠶᠤ ᠣᠷᠣ ᠠ᠋ᠴᠠ ᠴᠡᠴᠡᠷᠡᠨ ᠰᠠᠯᠭᠠᠨᠠᠨ ᠪᠣᠰᠴᠤ ᠡᠭᠦᠳᠡᠨ ᠦ᠌ ᠲᠦᠭᠵᠢᠶᠡ ᠶ᠋ᠢ ᠲᠠᠢᠯᠤᠭᠠᠳ ᠶᠠᠭᠠᠷᠠᠨ ᠰᠢᠨᠠᠭᠠ ᠠᠪᠴᠤ ᠤᠰᠤ ᠣᠳᠬᠣᠨ ᠵᠠᠯᠭᠢᠯᠠᠪᠠ᠃
– ᠰᠠᠢᠨ ᠤᠤ ᠭᠡᠭᠰᠡᠭᠡᠷ ᠪᠣᠱᠣᠭᠠ ᠠᠯᠬᠤᠨ ᠣᠷᠣᠵᠤ ᠢᠷᠡᠵᠦ ᠪᠠᠢᠭᠠ ᠵᠢᠵᠢᠭᠬᠡᠨ ᠪᠡᠶᠡᠲᠦ ᠪᠣᠷᠣ ᠪᠦᠰᠡᠭᠦᠢ :
– ᠫᠧᠢ᠂ ᠬᠠᠷᠠ ᠤᠰᠤ ᠲᠦᠭᠦᠬᠡᠢ ᠵᠠᠯᠭᠢᠯᠠᠭᠠᠳ ᠲᠠ ᠶᠠᠭᠠᠬᠢᠵᠤ ᠪᠠᠢᠭᠠ ᠬᠥᠮᠦᠨ ᠪᠣᠢ ?ᠠᠯᠢ ᠪᠣᠢ ᠂ ᠰᠦ ᠲᠣᠰᠤᠭᠠᠭᠠᠴᠢ ! ᠪᠢ ᠵᠢᠭᠠᠬᠠᠨ ᠰᠦ ᠠᠪᠴᠤ ᠢᠷᠡᠯᠡ ᠭᠡᠳ ᠰᠢᠨᠠᠭᠠ ᠲᠠᠢ ᠤᠰᠤ ᠤᠷᠤᠭᠤ ᠨᠢ ᠰᠦ ᠳᠤᠰᠤᠭᠠᠪᠠ᠃
ᠮᠥᠨ ᠡᠨᠡᠴᠢᠯᠡᠨ ᠨᠠᠴᠤᠭᠳᠣᠷᠵᠢ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠪᠢᠴᠢᠬᠠᠨ ᠴᠠᠭᠠᠨ ᠲᠣᠯᠪᠣ ᠡᠭᠦᠰᠦᠨ ᠵᠤᠨ ᠤ᠋ ᠰᠥᠨᠢ ᠶ᠋ᠢᠨ ᠦᠦᠷ ᠭᠡᠢᠬᠦ ᠮᠡᠲᠦ ᠲᠤᠶᠠᠭᠠᠷᠠᠵᠤ ᠡᠬᠢᠯᠡᠪᠡ᠃
ᠲᠡᠷᠡ ᠵᠤᠨ ᠤ᠋ ᠢᠳᠡ ᠳᠣᠯᠣᠭᠠᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠬᠣᠶᠠᠷ ᠤ᠋ᠨ ᠡᠳᠦᠷ ᠡᠢᠨ ᠬᠦ᠌ ᠡᠬᠢᠯᠡᠪᠡ᠃
ᠡᠨᠡ ᠭᠡᠷ ᠦ᠋ᠨ ᠡᠵᠡᠳ ᠮᠣᠷᠢᠨ ᠲᠡᠷᠭᠡᠨ ᠳ᠋ᠦ᠍ 《 ᠮᠠᠢᠬᠠᠨ᠂ ᠲᠣᠭᠣᠭᠠ ᠂ ᠰᠢᠨᠠᠭᠠ 》 ᠠᠴᠢᠭᠠᠳ ᠪᠤᠶᠠᠨᠲᠤ ᠬᠤᠸᠠ ᠳ᠋ᠤ᠌ ᠨᠠᠭᠠᠳᠤᠮᠯᠠᠬᠤ ᠭᠡᠵᠦ ᠣᠳᠤᠭᠰᠠᠨ ᠪᠥᠭᠡᠳ ᠨᠠᠴᠤᠭᠳᠣᠷᠵᠢ ᠶ᠋ᠢ ᠭᠡᠷ ᠰᠠᠬᠢᠵᠤ᠂ ᠰᠡᠷᠢᠭᠦᠨ ᠪᠥᠭᠡᠳ ᠰᠡᠯᠡᠭᠦᠨ ᠂ ᠶᠠᠭᠤᠮᠠ ᠪᠢᠴᠢᠪᠡᠯ ᠪᠢᠴᠢᠭᠡᠳ ᠠᠷᠢᠬᠢ ᠤᠤᠭᠤᠪᠠᠯ ᠤᠤᠭᠤᠭᠠᠳ ᠂ ᠬᠣᠭᠣᠯᠠ ᠤᠮᠳᠠ ᠬᠢᠵᠦ ᠢᠳᠡᠭᠡᠳ ᠠᠮᠠᠷᠠᠵᠤ ᠪᠠᠢ ᠭᠡᠵᠦ ᠦᠯᠡᠳᠡᠭᠡᠭᠰᠡᠨ ᠪᠢᠯᠡ ᠃ ᠨᠠᠴᠤᠭᠳᠣᠷᠵᠢ ᠴᠤ᠌ ᠬᠡᠳᠦᠨ ᠨᠣᠮ ᠣᠯᠤᠭᠰᠠᠨ ᠢ᠋ᠶ᠋ᠠᠨ ᠤᠩᠰᠢᠵᠤ ᠬᠡᠳᠦ ᠬᠣᠨᠣᠭ ᠴᠢᠮᠡᠭᠡ ᠦᠭᠡᠢ ᠠᠮᠤᠷ ᠵᠢᠮᠤᠷ ᠬᠡᠪᠲᠡᠶᠡ ᠭᠡᠰᠡᠨ ᠪᠢᠯᠡ᠃
– ᠨᠠᠭᠠᠳᠤᠮ ᠰᠠᠢᠬᠠᠨ ᠤᠤ ? ᠭᠡᠵᠦ ᠶᠠᠭᠠᠬᠢᠵᠤ ᠳᠠᠭᠤ ᠦᠭᠡᠢ ᠪᠠᠢᠬᠤ ᠪᠣᠢ ᠭᠡᠰᠡᠨ ᠰᠢᠭ ᠬᠠᠴᠢᠨ ᠲᠣᠪᠴᠢᠯᠠᠭᠰᠠᠨ ᠦᠭᠡ ᠠᠰᠠᠭᠤᠭᠰᠠᠨ ᠪᠣᠯᠤᠭᠠᠳ ᠨᠠᠴᠤᠭᠳᠣᠷᠵᠢ ᠬᠡᠢ ᠣᠭᠭᠢᠭᠣᠯᠪᠠ ᠃ ᠪᠦᠰᠡᠭᠦᠢ ᠰᠠᠨᠳᠤᠷᠴᠤ᠂ ᠲᠦᠮᠫᠡᠨ ᠪᠠᠷᠢᠵᠤ ᠭᠦᠶᠦᠬᠦ ᠵᠠᠭᠤᠷᠠ᠄
– ᠲᠠ ᠬᠡᠪᠲᠡ᠂ ᠬᠡᠪᠲᠡ ! ᠳᠣᠲᠣᠷᠠ ᠴᠢᠨᠢ ᠮᠠᠭᠤᠬᠠᠢ ᠪᠠᠢᠭᠠ ᠶᠤᠮ ᠪᠠᠢᠨᠠ ᠃ ᠳᠠᠩᠴᠤ ᠴᠢᠷᠠᠢ ᠴᠢᠨᠢ ᠬᠠᠴᠢᠨ ᠪᠠᠢᠭᠰᠠᠨ ᠶᠤᠮ ᠭᠡᠭᠰᠡᠭᠡᠷ ᠨᠠᠴᠤᠭᠳᠣᠷᠵᠢ ᠶ᠋ᠢ ᠣᠷᠣ ᠳᠡᠭᠡᠷᠡ ᠨᠢ ᠬᠡᠪᠲᠡᠭᠦᠯᠦᠭᠡᠳ ᠲᠦᠮᠫᠡᠨ ᠲᠠᠯᠪᠢᠵᠤ᠂ ᠬᠥᠨᠵᠢᠯᠡ ᠶ᠋ᠢ ᠨᠢ ᠵᠠᠰᠠᠵᠤ ᠥᠭᠭᠦᠭᠡᠳ ᠄
– ᠪᠢ ᠣᠳᠣᠬᠠᠨ ᠬᠢᠷᠠᠮᠠ ᠪᠤᠴᠠᠯᠭᠠᠭᠠᠳ ᠪᠠᠨᠲᠠᠩ ᠬᠢᠵᠦ ᠥᠭᠬᠦᠶᠡ ᠃ ᠠᠷᠢᠬᠢ ᠪᠣᠢ ᠤᠤ? ᠲᠠ ᠪᠤᠷᠵᠠᠩ ᠢ᠋ᠶ᠋ᠠᠨ ᠲᠠᠢᠯᠴᠢᠬᠠ ᠭᠡᠪᠡ ᠃
ᠨᠠᠴᠤᠭᠳᠣᠷᠵᠢ ᠣᠯᠠᠨ ᠦᠭᠡ ᠬᠡᠯᠡᠬᠦ ᠴᠦ᠍ ᠲᠡᠩᠬᠡᠭᠡ ᠦᠭᠡᠢ ᠲᠤᠯᠠ :
– ᠣᠷᠣᠨ ᠤ᠋ ᠴᠡᠭᠡᠵᠢᠨ ᠦ᠌ ᠳᠣᠣᠭᠤᠷ ᠁ᠭᠡᠵᠦ ᠬᠡᠯᠡᠭᠡᠳ ᠳᠡᠭᠡᠭᠰᠢ ᠬᠠᠷᠠᠨ ᠬᠡᠪᠲᠡᠵᠦ᠂ ᠨᠢᠳᠦ ᠪᠡᠨ ᠠᠨᠢᠨ ᠠᠮᠢᠰᠬᠤᠭᠠᠳᠠᠪᠠ᠃
ᠪᠤᠶᠠᠨᠵᠢᠷᠭᠠᠯ ᠣᠷᠣᠨ ᠤ᠋ ᠴᠡᠭᠡᠵᠢᠨ ᠳᠣᠣᠭᠤᠷ ᠱᠠᠯᠠᠮᠠᠭᠠᠢᠬᠠᠨ ᠪᠥᠬᠥᠢᠵᠦ᠂ ᠪᠡᠰᠡᠷᠡᠭᠬᠡᠨ ᠸᠠᠭᠠᠷ ᠲᠠᠢ ᠠᠷᠢᠬᠢ ᠭᠠᠷᠭᠠᠵᠤ ᠂ ᠪᠠᠭᠠ ᠮᠥᠩᠭᠥᠨ ᠠᠶᠠᠭᠠᠨ ᠳ᠋ᠤ᠌ ᠬᠢᠬᠦ ᠳ᠋ᠦ᠍ ᠬᠠᠲᠠᠭᠤ ᠬᠠᠷᠠ ᠠᠷᠢᠬᠢᠨ ᠤ᠋ ᠦᠨᠦᠷ ᠭᠡᠷ ᠳᠦᠭᠦᠷᠡᠩ ᠬᠠᠩᠬᠤᠯᠪᠠ ᠃ ᠨᠠᠴᠤᠭᠳᠣᠷᠵᠢ ᠣᠯᠠᠨ ᠰᠢᠯ ᠠᠮᠲᠠᠯᠠᠨ ᠴᠡᠩᠭᠡᠵᠦ ᠮᠠᠩᠰᠢᠭᠤᠷᠠᠨ ᠭᠤᠩᠬᠠᠵᠤ ᠶᠠᠪᠤᠭᠰᠠᠨ ᠲᠡᠷᠡ ᠬᠦᠴᠦᠲᠦ ᠤᠮᠳᠠᠭᠠᠨ ᠤ᠋ ᠳᠣᠭ᠍ᠰᠢᠨ ᠦᠨᠦᠷ ᠲᠦ᠍ ᠲᠡᠰᠴᠦ ᠶᠠᠳᠠᠨ ᠣᠭᠭᠢᠭᠣᠯᠵᠣ ᠲᠦᠮᠫᠡᠨ ᠤᠷᠤᠭᠤ ᠲᠣᠩᠭᠣᠢᠨ ᠲᠣᠩᠭᠣᠢᠨ ᠲᠠᠷᠴᠢᠯᠠᠪᠠ᠃ ᠪᠤᠶᠠᠨᠵᠢᠷᠭᠠᠯ ᠲᠡᠭᠦᠨ ᠦ᠌ ᠳᠤᠬᠤ ᠶ᠋ᠢ ᠨᠢᠭᠡ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠦᠰᠢᠵᠦ᠂ ᠨᠥᠬᠥᠭᠡ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠣᠶᠠᠷ ᠲᠠᠯᠤᠨ ᠤ᠋ ᠬᠢᠨᠢ ᠬᠣᠭᠣᠷᠣᠨᠳᠣᠭᠤᠷ ᠳᠣᠷᠣᠭᠰᠢ ᠨᠤᠬᠤᠯᠠᠨ ᠳᠠᠷᠤᠵᠤ ᠵᠣᠭᠰᠣᠬᠤ ᠵᠠᠭᠤᠷᠠ ᠡᠨᠡ ᠬᠥᠮᠦᠨ ᠦ᠌ ᠬᠥᠭᠡᠷᠦᠬᠦᠢᠯᠡᠯᠲᠡᠢ ᠪᠠᠢᠳᠠᠯ ᠢ᠋ ᠠᠵᠢᠭᠯᠠᠨ ᠲᠣᠯᠣᠭᠠᠢ ᠰᠡᠭᠰᠦᠷᠦᠨ ᠥᠷᠦᠪᠳᠦᠪᠡ ᠃ ᠨᠠᠴᠤᠭᠳᠣᠷᠵᠢ ᠶ᠋ᠢᠨ ᠳᠤᠬᠤᠨ ᠳ᠋ᠤ᠌ ᠬᠦᠢᠲᠡᠨ ᠥᠳᠬᠡᠨ ᠬᠥᠯᠥᠰᠥ ᠨᠢᠯᠴᠠᠭᠠᠨᠠᠨ ᠬᠠᠯᠢᠮᠠᠭ ᠦᠰᠦ ᠨᠢ ᠥᠩᠭᠡ ᠠᠯᠲᠠᠨ ᠰᠡᠭᠰᠡᠢᠵᠦ᠂ ᠳᠠᠯᠤ ᠮᠥᠷᠥ ᠨᠢ ᠴᠡᠴᠡᠭᠡᠨᠡᠨ ᠪᠠᠢᠵᠤ ᠣᠭᠭᠢᠭᠣᠯᠪᠠ᠃
– ᠤᠭ ᠨᠢ ᠨᠢᠳᠦ ᠪᠡᠨ ᠠᠨᠢᠵᠤ ᠪᠠᠢᠭᠠᠳ ᠯᠠ ᠨᠢᠭᠡ ᠪᠠᠯᠭᠤᠴᠢᠬᠠᠪᠠᠯ ᠭᠠᠢᠭᠤᠢ ᠪᠣᠯᠬᠤ ᠰᠠᠨ ᠳᠠ !ᠭᠡᠵᠦ ᠪᠤᠶᠠᠨᠵᠢᠷᠭᠠᠯ ᠥᠭᠦᠯᠡᠬᠦ ᠠᠪᠠᠴᠤ᠂ ᠲᠡᠢᠨ ᠬᠦ᠌ ᠪᠠᠯᠭᠤᠬᠤ ᠵᠠᠪ ᠲᠡᠷᠡ ᠬᠥᠮᠦᠨ ᠳ᠋ᠦ᠍ ᠣᠯᠳᠠᠬᠤ ᠦᠭᠡᠢ ᠪᠠᠢᠪᠠ᠃
– ᠶᠠᠭᠠᠬᠢᠨᠠ ᠳᠠ ᠂ ᠶᠠᠭᠠᠬᠢᠨᠠ ? ᠭᠡᠵᠦ ᠡᠨᠡ ᠴᠡᠯ ᠵᠠᠯᠠᠭᠤ ᠪᠦᠰᠡᠭᠦᠢ ᠴᠢᠩ ᠦᠨᠡᠨ ᠡᠴᠡ ᠬᠠᠯᠬᠠᠯᠠᠨ ᠱᠣᠭᠰᠢᠷᠠᠬᠤ ᠵᠠᠭᠤᠷᠠ ᠰᠡᠳᠬᠢᠯ ᠳᠣᠲᠣᠷᠠ ᠪᠠᠨ ᠬᠦᠨᠳᠦᠯᠡᠨ ᠬᠠᠢᠷᠠᠯᠠᠵᠤ᠂ ᠰᠢᠳᠦᠨ ᠪᠢᠰᠢᠷᠡᠬᠦ ᠳ᠋ᠦ᠍ ᠬᠦᠷᠴᠦ ᠶᠠᠪᠤᠳᠠᠭ ᠡᠨᠡ ᠬᠥᠮᠦᠨ ᠦ᠌ ᠲᠤᠬᠠᠢ ᠳ᠋ᠤ᠌ ᠬᠠᠷᠠᠭᠤᠰᠤᠨ ᠰᠠᠨᠳᠤᠷᠴᠤ ᠪᠠᠢᠯᠠ᠃
ᠬᠡᠳᠦᠬᠡᠨ ᠵᠢᠯ ᠦ᠋ᠨ ᠡᠮᠦᠨᠡ ᠂ ᠡᠭᠡᠯ ᠪᠦᠰᠡᠭᠦᠢ ᠶ᠋ᠢᠨ ᠬᠥᠷᠥᠰᠢ ᠦᠭᠡᠢ ᠥᠨᠳᠥᠷ ᠲᠦ᠍ ᠮᠠᠨᠳᠤᠵᠤ ᠪᠠᠢᠭᠰᠠᠨ ᠵᠠᠯᠠᠭᠤ ᠰᠠᠢᠬᠠᠨ ᠳᠠᠷᠤᠭᠠ ᠂ ᠡᠷᠳᠡᠮ ᠲᠡᠭᠦᠰ ᠶᠡᠬᠡ ᠬᠥᠮᠦᠨ ᠂ ᠡᠷᠬᠢᠮ ᠤᠷᠠᠨ ᠵᠣᠬᠢᠶᠠᠯᠴᠢ ᠪᠥᠭᠡᠳ ᠡᠷᠲᠡᠨ ᠦ᠌ ᠶᠣᠰᠣ ᠶ᠋ᠢ ᠪᠣᠳᠣᠭᠰᠠᠨ ᠴᠤ᠌ ᠂ ᠠᠷᠢᠭᠤᠨ ᠴᠠᠭᠠᠨ ᠶᠠᠰᠤᠲᠤ ᠂ ᠢᠵᠠᠭᠤᠷ ᠲᠡᠭᠦᠯᠳᠡᠷ ᠲᠠᠢᠵᠢ᠂ ᠠᠯᠤᠰ ᠬᠣᠯᠠ ᠶ᠋ᠢᠨ ᠭᠠᠵᠠᠷ ᠣᠷᠣᠨ ᠢ᠋ᠶ᠋ᠠᠷ ᠶᠠᠪᠤᠵᠤ ᠶᠠᠭᠤᠮᠠ ᠦᠵᠡᠵᠦ ᠨᠢᠳᠦ ᠲᠠᠢᠯᠤᠭᠰᠠᠨ ᠰᠤᠤ ᠪᠢᠯᠢᠭᠲᠦ ᠰᠠᠢᠬᠠᠨ ᠡᠷᠡ ᠣᠳᠣ ᠲᠡᠭᠦᠨ ᠦ᠌ ᠳᠣᠣᠷᠠ ᠲᠦᠮᠫᠡᠨ ᠤᠷᠤᠭᠤ ᠲᠣᠯᠣᠭᠠᠢ ᠤᠨᠵᠢᠭᠤᠯᠤᠨ ᠂ ᠠᠷᠢᠭᠤᠨ ᠪᠤᠵᠠᠷ ᠬᠣᠯᠢᠯᠳᠤᠨ ᠠᠷᠴᠠᠭᠠ ᠪᠠᠨ ᠠᠯᠲᠠᠨ ᠪᠠᠢᠵᠤ ᠪᠠᠢᠭᠠ ᠶ᠋ᠢ ᠦᠨᠡᠮᠰᠢᠬᠦ ᠳ᠋ᠦ᠍ ᠪᠡᠷᠬᠡ ᠡᠮᠭᠡᠨᠢᠯᠲᠦ ᠶᠠᠪᠤᠳᠠᠯ ᠪᠣᠯᠵᠤ ᠰᠠᠨᠠᠭᠳᠠᠨᠠ᠃
ᠭᠡᠪᠡᠴᠦ ᠦᠨᠡᠨ ᠪᠣᠯᠵᠤ ᠪᠠᠢᠭᠠ ᠶᠠᠪᠤᠳᠠᠯ ᠢ᠋ ᠦᠨᠡᠮᠰᠢᠬᠦ ᠡᠴᠡ ᠥᠭᠡᠷᠡ ᠶᠠᠭᠠᠬᠢᠬᠤ ᠪᠣᠢ !
ᠡᠨᠡ ᠪᠣᠯ ᠶᠢᠷᠲᠢᠨᠴᠦ ᠶ᠋ᠢᠨ ᠥᠭᠭᠦᠭᠡ ᠠᠪᠤᠭᠠ ᠬᠣᠶᠠᠷ᠂ ᠠᠮᠢᠳᠤᠷᠠᠯ ᠤ᠋ᠨ ᠤᠨᠤᠭᠠ ᠠᠯᠳᠠᠭᠠ ᠬᠣᠶᠠᠷ᠂ ᠬᠥᠮᠦᠨ ᠦ᠌ ᠪᠠᠶᠠᠷ ᠭᠤᠨᠢᠭ ᠬᠣᠶᠠᠷ ᠠᠵᠤᠭᠤ᠃
《 ᠬᠠᠢᠷᠠᠨ ᠬᠥᠮᠦᠨ ! 》 ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠪᠤᠶᠠᠨᠵᠢᠷᠭᠠᠯ ᠤ᠋ᠨ ᠨᠢᠳᠦᠨ ᠳ᠋ᠦ᠍ ᠨᠢᠯᠪᠤᠰᠤ ᠳᠦᠭᠦᠷᠴᠦ ᠢᠷᠡᠭᠰᠡᠨ ᠲᠤᠯᠠ ᠳᠣᠷᠣᠭ᠍ᠰᠢ ᠨᠠᠴᠤᠭᠳᠣᠷᠵᠢ ᠶ᠋ᠢᠨ ᠨᠢᠴᠦᠭᠦᠨ ᠬᠦᠵᠦᠭᠦᠨ ᠳᠡᠭᠡᠷᠡ ᠲᠤᠰᠬᠤ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠨ ᠵᠥ᠋ᠷᠢᠭᠦᠦ ᠬᠠᠷᠠᠪᠠᠯ ᠲᠡᠨᠳᠡ ᠨᠠᠴᠤᠭᠳᠣᠷᠵᠢ ᠶ᠋ᠢᠨ ᠦᠩᠭᠡᠭᠳᠡᠭᠰᠡᠨ ᠬᠠᠷᠠ ᠥᠮᠥᠳᠥ ᠂ ᠬᠠᠯᠴᠠᠷᠠᠵᠤ ᠬᠠᠵᠠᠢᠭᠰᠠᠨ ᠬᠣᠶᠠᠷ ᠮᠠᠭᠤ ᠭᠤᠲᠤᠯ ᠵᠡᠷᠭᠡ ᠶᠠᠳᠠᠭᠤᠬᠠᠨ ᠬᠤᠪᠴᠠᠰᠤ ᠬᠠᠷᠠᠭᠳᠠᠬᠤ ᠳ᠋ᠤ᠌᠂ ᠤᠷᠢᠳᠤ ᠨᠠᠴᠤᠭᠳᠣᠷᠵᠢ ᠭᠡᠵᠦ ᠭᠠᠳᠠᠭᠠᠳᠤ ᠣᠷᠣᠨ ᠤ᠋ ᠴᠡᠮᠴᠡᠢᠭᠰᠡᠨ ᠭᠣᠶᠣ ᠬᠤᠪᠴᠠᠰᠤ ᠲᠠᠢ ᠂ ᠴᠠᠭᠠᠰᠤ ᠮᠡᠲᠦ ᠴᠠᠭᠠᠨ ᠴᠠᠮᠴᠠ ᠲᠠᠢ ᠂ ᠬᠥᠮᠦᠨ ᠦ᠌ ᠭᠠᠷ ᠬᠦᠷᠦᠭᠡ ᠦᠭᠡᠢ ᠮᠡᠲᠦ ᠴᠡᠪᠡᠷᠬᠡᠨ ᠰᠠᠭᠠᠷᠠᠯ ᠢᠰᠡᠭᠡᠢ ᠮᠠᠯᠠᠭᠠᠢ ᠲᠠᠢ ᠪᠥᠭᠡᠳ ᠰᠢᠯ ᠲᠣᠯᠢ ᠮᠡᠲᠦ ᠭᠢᠯᠠᠯᠵᠠᠭᠰᠠᠨ ᠬᠠᠷᠠ ᠱᠠᠬᠠᠢ ᠭᠤᠲᠤᠯ ᠲᠠᠢ ᠶᠠᠪᠤᠳᠠᠭ ᠪᠠᠢᠭᠰᠠᠨ ᠨᠢ ᠰᠠᠨᠠᠭᠳᠠᠪᠠ᠃
《 ᠬᠥᠭᠡᠷᠦᠬᠦᠢ ᠳᠠ! ᠡᠷᠡ ᠬᠥᠮᠦᠨ ᠡᠨᠳᠡᠳᠡᠭ ᠂ ᠡᠷᠭᠢ ᠰᠢᠷᠣᠢ ᠨᠤᠷᠠᠳᠠᠭ ᠭᠡᠳᠡᠭ ᠶᠦᠮ ᠃ ᠡᠨᠡ ᠬᠥᠮᠦᠨ ᠢ᠋ ᠥᠭᠡᠳᠡ ᠨᠢ ᠲᠠᠲᠠᠵᠤ ᠶᠠᠪᠤᠬᠤ ᠦᠭᠡᠢ ᠪᠣᠯ ᠮᠣᠩᠭᠣᠯ ᠤ᠋ᠨ ᠵᠠᠶᠠᠭᠠᠨ ᠳ᠋ᠤ᠌ ᠮᠠᠭᠤ ᠪᠣᠯᠤᠨᠠ ! ᠪᠢ᠁ ᠥᠭᠡᠳᠡ ᠨᠢ ᠲᠠᠲᠠᠵᠤ ᠠᠪᠴᠤ ᠴᠢᠳᠠᠬᠤ ᠪᠣᠯ ᠤᠤ ? 》 ᠭᠡᠵᠦ ᠪᠣᠳᠣᠨ ᠲᠣᠯᠣᠭᠠᠢ ᠶ᠋ᠢ ᠨᠢ ᠪᠡᠷᠢᠯᠡᠵᠦ ᠪᠠᠢᠲᠠᠯᠠ ᠨᠠᠴᠤᠭᠳᠣᠷᠵᠢ᠄
– ᠵᠠ ᠪᠣᠯᠢ ! ᠠᠯᠢ ᠪᠣᠢ ᠂ ᠨᠥᠭᠥᠭᠡᠳᠡᠬᠢ ᠪᠡᠨ ᠭᠡᠵᠦ ᠥᠨᠳᠡᠢᠪᠡ᠃
ᠨᠢᠭᠤᠷ ᠨᠢ ᠬᠥᠯᠥᠰᠥ ᠨᠢᠯᠪᠤᠰᠤ ᠵᠡᠷᠭᠡ ᠪᠦᠬᠦᠢᠯᠡ ᠨᠦᠬᠡ ᠰᠦᠪᠡ ᠡᠴᠡ ᠪᠡᠨ ᠭᠠᠷᠤᠭᠰᠠᠨ ᠨᠣᠢᠲᠠᠨ ᠬᠦᠢᠲᠡᠨ ᠵᠦᠢᠯ ᠢ᠋ᠶ᠋ᠡᠷ ᠨᠢᠯᠴᠠᠭᠠᠨᠠᠨ ᠬᠠᠷᠠᠭᠳᠠᠬᠤ ᠪᠥᠭᠡᠳ ᠨᠢᠭᠤᠷ ᠤᠨ ᠬᠢᠨᠢ ᠨᠥᠷᠥᠭᠡ （ ᠴᠣᠬᠣᠷ） ᠤᠯᠠᠮ ᠴᠤ᠌ ᠲᠣᠳᠣ ᠪᠣᠯᠤᠭᠰᠠᠨ ᠠᠭᠠᠳ ᠨᠢᠳᠦ ᠨᠢ ᠠᠶᠤᠮᠰᠢᠭ᠍ᠲᠠᠢ ᠪᠥᠯᠴᠥᠢᠨ ᠤᠯᠠᠢᠵᠤ ᠂ ᠤᠷᠤᠭᠤᠯ ᠠᠮᠠ ᠨᠢ ᠴᠡᠴᠡᠭᠡᠨᠡᠨ ᠂ ᠠᠶᠠᠭᠦᠢ ᠰᠠᠯᠭᠠᠨᠠᠭᠰᠠᠨ ᠭᠠᠷ ᠢ᠋ᠶ᠋ᠠᠨ ᠠᠷᠢᠬᠢ ᠤᠷᠤᠭᠤ ᠰᠠᠷᠪᠠᠢᠬᠤ ᠨᠢ ᠡᠷᠯᠢᠭ ᠲᠠᠮᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠲᠠᠭᠤᠭᠳᠠᠨ ᠣᠴᠢᠭᠰᠠᠨ ᠬᠥᠭᠡᠷᠦᠬᠦᠢ ᠨᠢᠴᠦᠭᠦᠨ ᠬᠥᠮᠦᠨ ᠦᠬᠦᠯ ᠭᠡᠭᠴᠢ ᠲᠡᠢ ᠭᠠᠷ ᠪᠠᠷᠢᠬᠤ ᠭᠡᠵᠦ ᠪᠠᠢᠭᠠ ᠮᠡᠲᠦ ᠁
ᠪᠣᠶᠠᠨᠵᠢᠷᠭᠠᠯ᠂ ᠮᠥᠩᠭᠥᠨ ᠠᠶᠠᠭᠠ ᠲᠠᠢ ᠠᠷᠢᠬᠢ ᠶ᠋ᠢ ᠭᠠᠷ ᠲᠤᠨᠢ ᠪᠠᠷᠢᠭᠤᠯᠬᠤ ᠳ᠋ᠤ᠌ ᠨᠠᠴᠤᠭᠳᠣᠷᠵᠢ ᠰᠠᠯᠭᠠᠨᠠᠨ ᠴᠡᠴᠡᠷᠡᠵᠦ ᠂ ᠠᠰᠬᠠᠨ ᠴᠢᠳᠬᠤᠨ ᠠᠮᠠᠨ ᠳ᠋ᠠᠭᠠᠨ ᠲᠤᠯᠭᠠᠭᠠᠳ ᠂ ᠨᠢᠭᠤᠷ ᠲᠣᠯᠣᠭᠠᠢ ᠨᠢ ᠠᠶᠤᠮᠰᠢᠭ᠍ᠲᠠᠢ ᠲᠠᠲᠠᠯᠳᠤᠨ ᠰᠠᠯᠭᠠᠨᠠᠵᠤ᠂ ᠨᠢᠳᠦ ᠨᠢ ᠴᠠᠭᠠᠨ ᠢ᠋ᠶ᠋ᠠᠷ ᠭᠢᠯᠠᠯᠵᠠᠨ ᠪᠠᠢᠵᠤ ᠠᠮᠢᠰᠬᠤᠭᠠ ᠦᠭᠡᠢ ᠵᠠᠯᠭᠢᠯᠠᠭᠠᠳ᠂ ᠪᠠᠰᠠ ᠬᠣᠶᠠᠷ ᠵᠠᠪᠠᠵᠢ ᠪᠠᠷ ᠨᠢ ᠠᠷᠢᠬᠢ ᠨᠢ ᠵᠠᠮ ᠲᠡᠳᠡᠨ ᠠᠰᠬᠠᠷᠠᠵᠤ ᠪᠠᠢᠪᠠ᠃
ᠠᠷᠢᠬᠢ ᠴᠤ᠌ ᠳᠠᠭᠤᠰᠪᠠ᠂ ᠠᠶᠠᠭᠠ ᠴᠤ᠌ ᠤᠨᠠᠪᠠ᠃ ᠨᠠᠴᠤᠭᠳᠣᠷᠵᠢ ᠴᠤ᠌ ᠣᠷᠣ ᠳᠡᠭᠡᠷᠡ ᠪᠡᠨ ᠪᠥᠬᠥᠢᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠨᠢᠳᠦ ᠪᠡᠨ ᠳᠠᠷᠤᠨ ᠤᠨᠠᠪᠠ᠃ ᠭᠡᠷ ᠦ᠋ᠨ ᠳᠣᠲᠣᠷᠠ ᠴᠢᠪ ᠴᠢᠮᠡᠭᠡ ᠦᠭᠡᠢ᠃
ᠬᠣᠷᠸᠠ ᠶ᠋ᠢᠨ ᠠᠷᠴᠠᠭᠠ ᠦᠭᠡᠢ ᠪᠥᠭᠡᠳ ᠥᠷᠥᠪᠳᠦᠮᠡ ᠦᠵᠡᠭᠳᠡᠯ ᠳ᠋ᠦ᠍ ᠪᠠᠯᠠᠮᠠᠭᠳᠠᠭᠰᠠᠨ ᠬᠣᠷᠢᠨ ᠨᠢᠭᠡᠬᠡᠨ ᠨᠠᠰᠤ ᠲᠠᠢ ᠮᠣᠩᠭᠣᠯ ᠪᠦᠰᠡᠭᠦᠢ ᠴᠢᠯᠠᠭᠤ ᠮᠡᠲᠦ ᠬᠥᠰᠢᠨ ᠵᠣᠭᠰᠣᠪᠠ᠃
ᠲᠣᠭᠣᠨᠣ ᠶ᠋ᠢᠨ ᠴᠠᠭᠠᠷᠢᠭ ᠲᠤᠰᠤᠭᠰᠠᠨ ᠨᠠᠷᠠ ᠨᠢᠭᠡᠨ ᠰᠢᠷᠠ ᠪᠤᠳᠠᠭᠠ ᠳᠣᠭᠣᠭᠰᠢᠯᠠᠭᠳᠠᠯᠠ ᠮᠣᠩᠭᠣᠯ ᠭᠠᠵᠠᠷ ᠤ᠋ᠨ ᠪᠦᠬᠦ ᠬᠥᠳᠡᠯᠭᠡᠭᠡᠨ ᠨᠠᠮ ᠵᠣᠭᠰᠣᠬᠤ ᠮᠡᠲᠦ ᠲᠦᠭᠰᠢᠭᠦᠷᠢᠲᠦ ᠨᠢᠭᠡᠨ ᠬᠣᠷᠣᠮ ᠥᠩᠭᠡᠷᠡᠪᠡ᠃
– ᠶᠣ᠂ ᠶᠣ! ᠣᠳᠣ ᠪᠣᠯᠤᠯᠠ ! ᠭᠡᠭᠰᠡᠭᠡᠷ ᠨᠠᠴᠤᠭᠳᠣᠷᠵᠢ ᠣᠷᠣᠨ ᠳᠡᠭᠡᠷᠡ ᠥᠨᠳᠡᠢᠨ ᠰᠠᠭᠤᠬᠤ ᠳ᠋ᠤ᠌ ᠂ ᠬᠡᠦᠬᠡᠨ ᠰᠠᠶᠢ ᠤᠷᠲᠤ ᠠᠮᠢᠰᠬᠤᠭᠠ ᠠᠪᠴᠤ ᠰᠢᠷᠢᠳᠡᠭ ᠳᠡᠭᠡᠷᠡ ᠤᠨᠠᠭᠰᠠᠨ ᠠᠶᠠᠭᠠ ᠶ᠋ᠢ ᠰᠢᠭᠦᠷᠦᠨ ᠠᠪᠴᠤ ᠠᠷᠴᠢᠭᠠᠳ ᠄
– ᠵᠠ ᠪᠢ ᠭᠠᠯᠯᠠᠶᠠ ᠃ ᠪᠣᠯᠳᠠᠭ ᠰᠠᠨ ᠪᠣᠯ ᠲᠠᠨ ᠤ᠋ ᠳᠡᠷᠭᠡᠳᠡ ᠪᠠᠢᠭᠠᠳ ᠯᠠ ᠪᠠᠢᠮᠠᠷ ᠪᠠᠢᠨᠠ᠃ ᠲᠠᠨ ᠳ᠋ᠤ᠌ ᠪᠡᠶᠡ ᠶ᠋ᠢ ᠴᠢᠨᠢ ᠠᠰᠠᠷᠠᠬᠤ ᠨᠢᠭᠡ ᠬᠥᠮᠦᠨ ᠬᠡᠷᠡᠭᠲᠡᠢ ᠪᠠᠢᠨᠠ ᠳᠠ ! ᠳᠠᠩᠴᠤ ᠠᠪᠤ ᠮᠠᠨᠢ ᠪᠤᠰᠢᠭᠤ ᠢᠷᠡᠭᠡᠷᠡᠢ ᠭᠡᠰᠡᠨ᠃ ᠣᠳᠣ ᠪᠤᠶᠠᠨᠲᠤ ᠬᠤᠸᠠ ᠳ᠋ᠤ᠌ ᠨᠠᠭᠠᠰᠢ ᠪᠠᠨ ᠬᠠᠷᠠᠭᠤᠯᠳᠠᠭᠠᠰᠤᠲᠠᠢ ᠯᠠ ᠪᠠᠢᠭᠠ ᠃ ᠨᠠᠮᠠᠶ᠋ᠢ ᠭᠡᠷ ᠡᠴᠡ ᠬᠣᠶᠠᠷ ᠰᠢᠨᠡ ᠰᠤᠷ ᠴᠢᠳᠥᠷ ᠠᠪᠴᠤ ᠢᠷᠡ ᠭᠡᠵᠦ ᠡᠭᠦᠪᠡᠷ ᠶᠠᠪᠤᠭᠤᠯᠤᠭᠰᠠᠨ ᠶᠤᠮ ᠃ ᠤᠷᠢᠳᠤ ᠰᠥᠨᠢ ᠮᠣᠷᠢᠳ ᠴᠢᠳᠥᠷ ᠢ᠋ᠶ᠋ᠠᠨ ᠤᠷᠠᠭᠤᠯᠵᠠᠢ ᠭᠡᠵᠦ ᠶᠡᠬᠡ ᠯᠡ ᠠᠮᠢᠨᠴᠢᠷ ᠪᠠᠢᠳᠠᠯ ᠢ᠋ᠶ᠋ᠠᠷ ᠶᠠᠷᠢᠶᠠ ᠳᠡᠯᠭᠡᠨᠡ᠃
ᠨᠠᠴᠤᠭᠳᠣᠷᠵᠢ ᠳ᠋ᠤ᠌ ᠦᠭᠡ ᠰᠣᠯᠢᠬᠤ ᠲᠡᠩᠬᠡᠯ᠂ ᠰᠣᠨᠢᠷᠬᠠᠯ ᠬᠣᠶᠠᠷ ᠲᠡᠳᠦᠢᠯᠡ ᠰᠠᠢᠨ ᠪᠠᠢᠭᠠ ᠦᠭᠡᠢ ᠲᠤᠯᠠ ᠡᠯᠢᠭᠡ ᠳᠣᠲᠣᠷᠠ ᠶ᠋ᠢᠨ ᠰᠢᠨᠠᠯᠭᠠᠨ ᠳ᠋ᠤ᠌ ᠪᠠᠬᠠᠨ ᠢᠷᠪᠠᠢᠰᠬᠢᠵᠦ ᠪᠦᠰᠡᠭᠦᠢ ᠶ᠋ᠢ ᠰᠢᠷᠲᠡᠨᠡ᠃
ᠡᠪᠯᠢᠭ ᠭᠠᠷ ᠢ᠋ᠶ᠋ᠠᠷ ᠭᠠᠯ ᠲᠣᠭᠣᠭᠠ ᠪᠠᠷᠢᠵᠤ ᠰᠢᠨᠡ ᠮᠢᠬᠠ ᠬᠠᠶᠠᠵᠤ ᠬᠥᠰᠬᠥᠯᠡᠨ ᠰᠠᠭᠤᠭᠠ ᠡᠨᠡ ᠪᠠᠭᠠᠬᠠᠨ ᠪᠦᠰᠡᠭᠦᠢ ᠶ᠋ᠢᠨ ᠡᠭᠡᠯ ᠪᠣᠷᠣ ᠴᠢᠷᠠᠢ ᠳ᠋ᠤ᠌ ᠵᠠᠯᠠᠭᠤ ᠬᠥᠮᠦᠨ ᠤ ᠭᠡᠷᠡᠯᠲᠦ ᠰᠠᠢᠬᠠᠨ ᠵᠢᠪᠬᠤᠭᠠ᠂ ᠡᠷᠡᠭᠦᠯ ᠴᠢᠰᠤ ᠲᠤᠶᠠᠭᠠᠷᠠᠭᠰᠠᠨ ᠴᠡᠩᠭᠡᠯ ᠵᠢᠷᠭᠠᠯ ᠤ᠋ᠨ ᠲᠡᠮᠡᠦᠯᠦᠯ ᠲᠣᠳᠣᠬᠠᠨ ᠠᠭᠠᠳ ᠪᠦᠬᠦ ᠪᠠᠢᠳᠠᠯ ᠳ᠋ᠤᠨᠢ ᠴᠤᠴᠠᠰᠢ ᠦᠭᠡᠢ ᠬᠥᠳᠡᠯᠮᠦᠷᠢᠴᠢ ᠵᠠᠩᠰᠢᠯ᠂ ᠨᠢᠩᠵᠢᠨ ᠴᠠᠭᠠᠨ ᠰᠡᠳᠬᠢᠯ ᠭᠦᠨ ᠰᠢᠩᠭᠡᠭᠰᠡᠨ ᠢ᠋ ᠨᠠᠴᠤᠭᠳᠣᠷᠵᠢ ᠬᠡᠳᠦᠢ ᠪᠦᠷᠦᠭ ᠪᠠᠷᠤᠭ ᠤᠬᠠᠭᠠᠨ ᠲᠠᠢ ᠪᠠᠢᠪᠠᠴᠤ ᠲᠣᠪ ᠲᠣᠳᠣ ᠣᠯᠵᠤ ᠬᠠᠷᠠᠪᠠ᠃
ᠡᠨᠡ ᠪᠦᠰᠡᠭᠦᠢ ᠶ᠋ᠢᠨ ᠪᠣᠷᠣ ᠪᠠᠭᠠᠵᠠᠬᠠᠨ ᠬᠤᠪᠴᠠᠰᠤ ᠫᠠᠭᠮᠠᠳᠣᠯᠮᠠ ᠶ᠋ᠢᠨ ᠰᠢᠭ᠋ ᠬᠠᠷᠠᠭᠳᠠᠬᠤ ᠦᠭᠡᠢ ᠴᠦ᠍ ᠭᠡᠰᠡᠨ ᠬᠦᠷᠢᠶᠡᠨ ᠤ ᠣᠪᠣᠭᠠ ᠯᠠ ᠬᠡᠦᠬᠡᠨ ᠨᠦ᠍ᠭᠦᠳ ᠦ᠋ᠨ ᠨᠢᠭᠡ ᠪᠣᠯᠵᠤ ᠦᠵᠡᠭᠳᠡᠬᠦ ᠪᠢᠵᠡ ᠠ᠋ ᠭᠡᠵᠦ ᠨᠠᠴᠤᠭᠳᠣᠷᠵᠢ ᠵᠢᠷᠪᠢᠰᠬᠢᠨ ᠪᠣᠳᠣᠭᠠᠳ ᠰᠠᠨᠠᠭᠠ ᠠᠯᠳᠠᠪᠠ᠃
ᠡᠨᠡ ᠪᠦᠰᠡᠭᠦᠢ ᠶ᠋ᠢ ᠥᠪᠡᠷ ᠲᠡᠭᠡᠨ ᠬᠡᠴᠢᠨᠡᠭᠡᠨ ᠰᠠᠢᠨ ᠪᠠᠢᠳᠠᠭ ᠢ᠋ ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ ᠡᠴᠡ ᠮᠡᠳᠡᠬᠦ ᠪᠣᠯᠪᠠᠴᠤ ᠲᠡᠭᠦᠨ ᠳ᠋ᠦ᠍ ᠨᠢᠭᠤᠷ ᠦᠭᠭᠦᠯ ᠦᠭᠡᠢ ᠡᠳᠦᠢ ᠬᠦᠷᠦᠭᠰᠡᠨ ᠨᠢ ᠬᠠᠴᠢᠨ ᠰᠠᠨᠠᠭᠳᠠᠨᠠ᠃
ᠠᠯᠤᠰ ᠬᠣᠯᠠ ᠶ᠋ᠢᠨ ᠳᠠᠯᠠᠢ ᠶ᠋ᠢᠨ ᠡᠷᠭᠢ ᠳ᠋ᠦ᠍ ᠪᠠᠯᠴᠢᠷ ᠥᠬᠢᠨ ᠢ᠋ᠶ᠋ᠡᠨ ᠲᠡᠪᠡᠷᠢᠨ ᠣᠳᠤᠭᠰᠠᠨ ᠵᠠᠭᠤᠷᠠᠳᠤ ᠶ᠋ᠢᠨ ᠬᠠᠯᠠᠭᠤᠨ ᠢᠨᠠᠭ ᠨᠢᠨᠠ ᠠ᠋ᠴᠠ ᠪᠠᠨ ᠬᠣᠢᠰᠢ ᠰᠡᠳᠬᠢᠯ ᠦ᠋ᠨ ᠶᠡᠬᠡ ᠡᠪᠳᠡᠷᠡᠯ ᠳ᠋ᠦ᠍ ᠣᠷᠣᠵᠤ ᠠᠷᠢᠬᠢ ᠳᠠᠷᠠᠰᠤ ᠪᠠᠷ ᠤᠮᠳᠠ ᠬᠣᠭᠣᠯᠠ ᠬᠢᠵᠦ ᠵᠠᠯᠠᠭᠤ ᠬᠠᠯᠠᠭᠤᠨ ᠪᠡᠶᠡ ᠪᠡᠨ ᠬᠠᠢᠷᠠ ᠨᠠᠢᠷ ᠦᠭᠡᠢ ᠰᠦᠢᠳᠬᠡᠨ ᠠᠬᠤᠢ ᠠᠮᠢᠳᠤᠷᠠᠯ᠂ ᠨᠡᠷᠡ ᠲᠥᠷᠥ ᠪᠡᠨ ᠭᠠᠷᠭᠠᠭᠤᠨ ᠳ᠋ᠤ᠌ ᠭᠠᠷᠭᠠᠵᠤ ᠶᠠᠪᠤᠬᠤ ᠳ᠋ᠠᠭᠠᠨ᠂ ᠨᠠᠭᠠᠰᠢ ᠪᠠᠨ ᠭᠡᠰᠡᠨ ᠬᠥᠮᠦᠨ ᠤᠷᠤᠭᠤ ᠨᠢᠳᠦ ᠠᠨᠢᠨ ᠣᠴᠢᠵᠤ ᠨᠠᠭᠠᠯᠳᠤᠬᠤ ᠳ᠋ᠤ᠌ ᠪᠡᠯᠡᠬᠡᠨ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ ᠭᠠᠭᠴᠠ ᠬᠦ᠌ ᠡᠨᠡ ᠯᠡ ᠬᠡᠦᠬᠡᠨ ᠢ᠋ ᠲᠣᠭᠣᠷᠢᠨ ᠲᠥᠯᠥᠭᠰᠡᠭᠡᠷ ᠢᠷᠡᠵᠡᠢ᠃
ᠡᠢᠨ ᠬᠦ᠌ ᠲᠥᠯᠥᠭᠰᠡᠨ ᠤᠴᠢᠷ ᠢ᠋ᠶ᠋ᠠᠨ ᠳᠠᠪ ᠤ᠋ᠨ ᠡᠮᠦᠨᠡ ᠲᠠᠢᠯᠪᠤᠷᠢᠯᠠᠬᠤ ᠳ᠋ᠤ᠌ ᠪᠡᠷᠬᠡ᠃ ᠥᠬᠢᠨ ᠪᠠᠭᠠ ᠶ᠋ᠢᠨ ᠠᠷᠢᠭᠤᠨ ᠨᠠᠨᠳᠢᠨ ᠪᠦᠬᠦᠨ ᠨᠢ ᠬᠡᠭᠡᠷᠡ ᠶ᠋ᠢᠨ ᠴᠡᠴᠡᠭ ᠦ᠋ᠨ ᠳᠡᠯᠪᠡᠭᠡ ᠮᠡᠲᠦ ᠤᠷᠭᠤᠵᠤ ᠪᠠᠢᠭᠠ ᠡᠨᠡ ᠪᠣᠶᠠᠨᠵᠢᠷᠭᠠᠯ ᠨᠠᠰᠤ ᠪᠤᠶᠠᠨ᠂ ᠵᠢᠷᠭᠠᠯ ᠴᠡᠩᠭᠡᠯ ᠦ᠋ᠨ ᠠᠮᠢᠳᠤ ᠪᠤᠯᠠᠭ ᠢ᠋ ᠡᠯᠳᠡᠪ ᠢ᠋ ᠦᠵᠡᠭᠰᠡᠨ ᠨᠢᠭᠦᠯᠲᠦ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠪᠤᠯᠠᠩᠭᠢᠷᠲᠤᠭᠤᠯᠬᠤ ᠠ᠋ᠴᠠ ᠵᠢᠷᠦᠬᠡᠰᠢᠶᠡᠭᠰᠡᠨ ᠲᠠᠯᠠ ᠪᠣᠢ᠃ ᠬᠠᠢᠷᠠ ᠰᠡᠳᠬᠢᠯ ᠢ᠋ ᠬᠠᠰ ᠴᠢᠯᠠᠭᠤ ᠮᠡᠲᠦ ᠪᠥᠬᠡ᠂ ᠲᠩᠷᠢ ᠮᠡᠲᠦ ᠮᠥᠩᠬᠡ ᠶᠠᠭᠤᠮᠠ ᠭᠡᠵᠦ ᠢᠳᠡᠭᠡᠨ ᠪᠠᠢᠭᠠ ᠪᠦᠰᠡᠭᠦᠢ ᠶ᠋ᠢᠨ ᠬᠠᠯᠠᠭᠤᠨ ᠡᠪᠦᠷ ᠲᠦ᠍᠂ ᠤᠴᠠᠷᠠᠵᠤ ᠬᠠᠭᠠᠴᠠᠵᠤ᠂ ᠳᠤᠷᠠᠯᠠᠵᠤ ᠵᠢᠭᠰᠢᠵᠦ᠂ ᠠᠨᠳᠠᠭᠠᠢᠯᠠᠵᠤ ᠬᠠᠭᠤᠷᠴᠤ ᠂ ᠢᠲᠡᠭᠡᠵᠦ ᠲᠡᠷᠰᠯᠡᠵᠦ ᠠᠯᠢ ᠬᠡᠳᠦᠢᠨ ᠲᠤᠯᠤ ᠴᠣᠬᠢᠭ᠍ᠰᠠᠨ᠂ ᠠᠷᠪᠠᠨ ᠨᠠᠰᠤ ᠪᠠᠷ ᠠᠬᠠ ᠬᠥᠮᠦᠨ ᠤ ᠰᠡᠷᠢᠭᠦᠨ ᠬᠦᠢᠲᠡᠨ ᠰᠠᠯᠬᠢ ᠣᠷᠣᠭᠤᠯᠬᠤ ᠶ᠋ᠢ ᠲᠦᠪᠳᠡᠬᠦ ᠦᠭᠡᠢ ᠪᠠᠢᠭᠰᠠᠨ ᠦᠶᠡ ᠪᠣᠢ᠃
ᠬᠥᠮᠦᠨ ᠤ ᠰᠠᠢᠬᠠᠨ ᠢᠲᠡᠭᠡᠯ ᠵᠠᠳᠠᠷᠠᠭᠠ ᠨᠢ ᠦᠭᠡᠢ ᠥᠨᠳᠡᠭᠡᠨ ᠳᠡᠭᠡᠷᠡ ᠂ ᠬᠠᠷᠢ ᠣᠷᠣᠨ ᠨᠤᠭᠤᠳ ᠢ᠋ᠶ᠋ᠠᠷ ᠡᠯᠳᠡᠪ ᠢ᠋ ᠦᠵᠡᠵᠦ ᠬᠠᠨᠤᠭᠰᠠᠨ ᠡᠷᠡ ᠶ᠋ᠢᠨ ᠠᠭᠠᠭᠯᠠᠭᠤ ᠰᠡᠭᠦᠳᠡᠷ ᠳᠤᠰᠬᠠᠬᠤ ᠶ᠋ᠢ ᠶᠠᠭᠠᠷᠠᠭᠰᠠᠨ ᠦᠭᠡᠢ ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠂ ᠲᠡᠷᠡ ᠬᠦ᠌ ᠪᠢᠴᠢᠬᠠᠨ ᠨᠠᠨᠳᠢᠨ ᠢᠲᠡᠭᠡᠯ ᠦ᠋ᠨ ᠰᠦᠮᠡ ᠳ᠋ᠦ᠍ ᠠᠷᠢᠬᠢ ᠲᠠᠮᠠᠬᠢ ᠬᠠᠩᠬᠤᠯᠤᠭᠤᠯᠤᠨ ᠣᠷᠣᠬᠤ ᠠ᠋ᠴᠠ ᠪᠠᠨ ᠲᠦᠳᠡᠭᠡᠯᠵᠡᠭᠰᠡᠨ ᠪᠥᠭᠡᠳ ᠪᠠᠰᠠ ᠢᠵᠠᠭᠤᠷ ᠡᠴᠡ ᠦᠶᠡ ᠵᠠᠯᠭᠠᠮᠵᠢᠯᠠᠨ ᠢᠷᠡᠭᠰᠡᠨ ᠲᠠᠢᠵᠢ ᠤᠭᠰᠠᠭᠠᠨ ᠤ᠋ ᠪᠡᠶᠡ ᠂ ᠳᠡᠯᠡᠬᠡᠢ ᠶ᠋ᠢᠨ ᠬᠥᠭᠵᠢᠯᠲᠦ ᠣᠷᠣᠨ ᠨᠤᠭᠤᠳ ᠢ᠋ᠶ᠋ᠠᠷ ᠴᠡᠴᠡᠭᠯᠡᠨ ᠮᠠᠨᠳᠤᠵᠤ ᠶᠠᠪᠤᠭᠰᠠᠨ ᠥᠨᠳᠥᠷ ᠶᠡᠬᠡ ᠨᠡᠷᠡ ᠂ ᠬᠦᠷᠢᠶᠡ ᠬᠥᠳᠡᠭᠡ ᠦᠭᠡᠢ ᠡᠰᠡ ᠠᠨᠳᠠᠬᠤ ᠨᠢᠭᠤᠷ ᠲᠠᠯᠠ ᠶ᠋ᠢ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡᠨ ᠤ ᠦᠭᠡᠢᠭᠦᠦ ᠶᠠᠳᠠᠭᠤ ᠮᠣᠷᠢᠨ ᠲᠡᠷᠭᠡᠴᠢᠨ ᠂ ᠦᠰᠦᠭ ᠪᠢᠴᠢᠭ ᠴᠦ᠍ ᠦᠯᠦ ᠮᠡᠳᠡᠬᠦ ᠬᠠᠷᠠ ᠪᠣᠷᠣ ᠥᠬᠢᠨ ᠲᠡᠢ ᠬᠣᠯᠪᠣᠬᠤ ᠳ᠋ᠤ᠌ ᠶᠡᠬᠡ ᠵᠣᠷᠢᠭ ᠬᠡᠷᠡᠭᠲᠡᠢ᠃
ᠣᠯᠠᠨ ᠤ᠋ ᠬᠡᠯᠡ ᠶᠠᠷᠢᠶᠠ ᠂ ᠳᠣᠭᠣᠭᠢ ᠲᠣᠬᠣᠭᠤ ᠭᠡᠳᠡᠭ ᠶᠠᠮᠠᠷ ᠴᠤ᠌ ᠠᠶᠤᠯ ᠠ᠋ᠴᠠ ᠂ ᠲᠡᠷᠡ ᠴᠦ᠍ ᠪᠠᠢᠲᠤᠭᠠᠢ ᠵᠠᠷᠢᠮ ᠳ᠋ᠠᠭᠠᠨ ᠦᠬᠦᠯ ᠡᠴᠡ ᠴᠦ᠍ ᠠᠶᠤᠯᠲᠠᠢ ᠪᠠᠢᠳᠠᠭ᠃
《 ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠤ ᠦᠵᠡᠯ ᠰᠠᠨᠠᠭᠠ ᠬᠥᠭᠵᠢᠨ ᠳᠠᠪᠰᠢᠵᠤ ᠪᠠᠢᠭᠠ ᠨᠢ ᠦᠨᠡᠨ ᠪᠣᠯᠪᠠᠴᠤ ᠠᠯᠢ ᠦᠶᠡ ᠳ᠋ᠦ᠍ ᠠᠵᠤ ᠲᠥᠷᠥᠵᠦ ᠪᠠᠢᠭᠠ ᠬᠥᠮᠦᠨ ᠲᠡᠷᠡ ᠦᠶᠡ ᠶ᠋ᠢᠨ ᠢ᠋ᠶ᠋ᠡᠨ ᠭᠣᠷᠢᠮ ᠳ᠋ᠤ᠌ ᠪᠠᠢᠬᠤ ᠠ᠋ᠴᠠ ᠠᠷᠭᠠ ᠦᠭᠡᠢ ᠁ 》 ᠭᠡᠵᠦ ᠨᠠᠴᠤᠭᠳᠣᠷᠵᠢ ᠥᠪᠡᠷ ᠲᠡᠭᠡᠨ ᠥᠭᠦᠯᠡᠵᠡᠢ᠃ ᠬᠡᠳᠦᠢ ᠲᠡᠢᠮᠦ ᠪᠣᠯᠪᠠᠴᠤ ᠡᠨᠡ ᠬᠡᠦᠬᠡᠨ ᠤ ᠳᠠᠭᠤ ᠶ᠋ᠢ ᠰᠣᠨᠣᠰᠬᠤ ᠳ᠋ᠤ᠌ ᠰᠡᠳᠬᠢᠯ ᠳ᠋ᠦ᠍ ᠪᠢᠴᠢᠬᠠᠨ ᠭᠡᠭᠡ ᠣᠷᠣᠵᠤ ᠂ ᠵᠢᠰᠦ ᠶ᠋ᠢ ᠦᠵᠡᠬᠦ ᠳ᠋ᠦ᠍ ᠨᠢᠳᠦ ᠣᠩᠭᠣᠢᠬᠤ ᠮᠡᠲᠦ ᠪᠢᠯᠡ᠃
– ᠵᠠ ᠂ ᠡᠨᠡ ᠪᠠᠨᠲᠠᠩ ᠢ᠋ ᠢᠳᠡᠴᠢᠬᠡ ᠃ ᠨᠠᠭᠠᠳᠤᠬᠢ ᠪᠠᠨ ᠤᠤᠭᠤᠴᠢᠬᠠ᠁ ᠪᠢ ᠶᠠᠪᠤᠯ ᠦᠭᠡᠢ ᠭᠣᠷᠢ ᠦᠭᠡᠢ᠂ ᠨᠠᠷᠠ ᠶᠠᠪᠤᠴᠢᠬᠠᠯᠠ ᠭᠡᠵᠦ ᠪᠤᠶᠠᠨᠵᠢᠷᠭᠠᠯ ᠬᠡᠯᠡᠬᠦ ᠳ᠋ᠦ᠍ ᠄
– ᠲᠡᠭᠡ ᠳ᠋ᠠ ! ᠲᠦᠷᠦᠭᠦᠨ ᠦᠬᠦᠬᠦ ᠭᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠣᠳᠣᠪᠠᠯ ᠣᠪᠣᠭᠠ ᠪᠣᠯᠤᠯᠠ ᠭᠡᠳ ᠨᠠᠴᠤᠭᠳᠣᠷᠵᠢ᠂ ᠪᠤᠶᠠᠨᠵᠢᠷᠭᠠᠯ ᠤ᠋ᠨ ᠬᠢᠵᠦ ᠥᠭᠭᠦᠭᠰᠡᠨ ᠪᠠᠨᠲᠠᠩ ᠢ᠋ ᠬᠣᠶᠠᠷ ᠭᠠᠷᠳᠠᠨ ᠠᠪᠬᠤ ᠳ᠋ᠠᠭᠠᠨ:
– ᠴᠢ ᠮᠢᠨᠦ ᠠᠮᠢ ᠶ᠋ᠢ ᠡᠨᠡ ᠤᠳᠠᠭᠠ ᠠᠪᠤᠷᠠᠯᠠ ᠂ ᠣᠳᠣ ᠶᠠᠪᠤ ᠳᠠ᠃ ᠠᠪᠤ ᠴᠢᠨᠢ ᠵᠠᠩᠨᠠᠨᠠ ᠭᠡᠳ ᠢᠨᠢᠶᠡᠮᠰᠦᠭᠯᠡᠬᠦ ᠭᠡᠰᠡᠨ ᠪᠣᠯᠪᠠᠴᠤ ᠴᠢᠳᠠᠭᠰᠠᠨ ᠦᠭᠡᠢ ᠤᠯᠠᠮ ᠢᠷᠪᠠᠢᠵᠠᠢ᠃
ᠰᠢᠨᠡ ᠮᠢᠬᠠ ᠲᠠᠢ ᠪᠠᠨᠲᠠᠩ ᠤ᠋ᠨ ᠦᠨᠦᠷ ᠬᠠᠩᠬᠤᠯᠬᠤ ᠰᠠᠴᠠᠭᠤ ᠳᠣᠲᠣᠷᠠ ᠨᠢ ᠮᠠᠭᠤᠬᠠᠢ ᠣᠷᠬᠢᠨᠠ᠃ ᠲᠡᠭᠦᠨ ᠡᠴᠡ ᠬᠡᠳᠦ ᠬᠠᠯᠪᠠᠭᠠᠳᠠᠨ ᠵᠠᠯᠭᠢᠮᠠᠭᠴᠠ ᠬᠥᠯᠥᠰᠥ ᠨᠢ ᠪᠣᠷᠣᠭᠠ ᠮᠡᠲᠦ ᠪᠥᠩᠵᠢᠭᠡᠨᠡᠨ ᠤᠷᠤᠰᠪᠠ᠃
ᠪᠤᠶᠠᠨᠵᠢᠷᠭᠠᠯ ᠳᠡᠷᠭᠡᠳᠡ ᠨᠢ ᠣᠴᠢᠵᠤ᠂ ᠪᠢᠴᠢᠬᠠᠨ ᠠᠭᠠᠳ ᠬᠠᠲᠠᠭᠤᠬᠠᠨ ᠠᠯᠠᠭᠠ ᠪᠠᠷ ᠢ᠋ᠶ᠋ᠠᠨ ᠮᠠᠩᠨᠠᠢ ᠳᠡᠭᠡᠷᠡ ᠨᠢ ᠳᠠᠷᠤᠵᠤ ᠄
– ᠪᠡᠶᠡ ᠲᠠᠨᠢ ᠲᠤᠩ ᠶᠠᠳᠠᠷᠠᠭᠤ ᠪᠠᠢᠨᠠ ᠳᠠ ᠃ ᠣᠳᠣ ᠲᠠ ᠪᠡᠶᠡ ᠪᠡᠨ ᠪᠣᠳᠣᠯ ᠦᠭᠡᠢ ᠶᠠᠭᠠᠬᠢᠵᠤ ᠪᠣᠯᠬᠤ ᠪᠣᠢ ! ᠮᠠᠨ ᠤ᠋ ᠮᠡᠲᠦ ᠶ᠋ᠢᠨ ᠶᠠᠭᠤᠮᠠ ᠪᠣᠯ ᠴᠤ᠌ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ ᠃ ᠬᠠᠷᠢᠨ ᠲᠠ ᠪᠣᠯ ᠥᠭᠡᠷᠡ ᠬᠥᠮᠦᠨ ᠰᠢᠦ ᠳᠠ ! ᠭᠡᠵᠦ ᠰᠠᠨᠠᠭᠠ ᠠᠯᠳᠠᠪᠠ᠃
– ᠪᠢ ᠶᠠᠭᠤ ᠨᠢ ᠥᠭᠡᠷᠡ ᠪᠠᠢᠭᠰᠠᠨ ᠶᠤᠮ ᠪᠣᠢ ? ᠨᠢᠭᠤᠷ ᠨᠢ ᠴᠣᠬᠣᠷ ᠭᠡᠵᠦ ᠦᠦ ? ᠭᠡᠳ ᠨᠠᠴᠤᠭᠳᠣᠷᠵᠢ ᠬᠣᠱᠣᠩᠨᠠᠨ ᠢᠨᠢᠶᠡᠮᠰᠦᠭᠯᠡᠬᠦ ᠳ᠋ᠦ᠍᠂ ᠭᠠᠭᠴᠠ ᠬᠦ᠌ ᠢᠩᠭᠢᠵᠦ ᠢᠨᠢᠶᠡᠮᠰᠦᠭᠯᠡᠬᠦ ᠶ᠋ᠢ ᠯᠡ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠮᠡᠲᠦ ᠪᠤᠶᠠᠨᠵᠢᠷᠭᠠᠯ᠄
– ᠶᠠᠭᠠᠬᠢᠯᠠ ᠭᠡᠵᠦ ! ᠵᠠ ᠪᠢ ᠶᠠᠪᠤᠶᠠ᠃ ᠴᠢᠳᠠᠪᠠᠯ ᠦᠳᠡᠰᠢ ᠢᠷᠡᠨᠡ᠃ ᠲᠤᠩ ᠴᠢᠳᠠᠬᠤ ᠦᠭᠡᠢ ᠪᠣᠯ ᠥᠷᠯᠥᠭᠡ ᠡᠷᠲᠡ ᠢᠷᠡᠨᠡ᠃ ᠲᠠ ᠪᠢᠲᠡᠭᠡᠢ ᠭᠠᠳᠠᠭ᠍ᠰᠢ ᠭᠠᠷᠤᠭᠠᠷᠠᠢ ! ᠭᠡᠳ ᠶᠠᠭᠠᠷᠠᠨ ᠣᠳᠪᠠ᠃
ᠨᠠᠴᠤᠭᠳᠣᠷᠵᠢ ᠦᠭᠡ ᠳᠤᠤᠭᠠᠷᠴᠤ ᠴᠤ᠌ ᠠᠮᠵᠢᠭ᠍ᠰᠠᠨ ᠦᠭᠡᠢ ᠭᠠᠭᠴᠠ ᠬᠦ᠌ ᠪᠠᠶᠠᠷᠯᠠᠨ ᠬᠠᠢᠯᠤᠭᠰᠠᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠲᠡᠷᠡ ᠪᠦᠰᠡᠭᠦᠢ ᠶ᠋ᠢᠨ ᠠᠷᠤ ᠠ᠋ᠴᠠ ᠰᠢᠷᠳᠡᠨ᠂ ᠮᠥᠩᠭᠥᠨ ᠠᠶᠠᠭᠠᠨ ᠳ᠋ᠤ᠌ ᠠᠷᠢᠬᠢ ᠴᠡᠯᠡᠯᠵᠡᠭᠦᠯᠦᠨ ᠪᠠᠷᠢᠭ᠍ᠰᠠᠨ ᠥᠩᠭᠡ ᠮᠠᠭᠤᠲᠠᠢ ᠵᠢᠷᠤᠭ ᠮᠡᠲᠦ ᠬᠣᠴᠣᠷᠪᠠ᠃ ᠦᠷᠴᠢᠯᠡᠭᠡ ᠰᠠᠭᠤᠵᠤ ᠠᠮᠵᠢᠭᠠ ᠦᠭᠡᠢ ᠰᠢᠷᠭᠠᠯ ᠳᠤᠬᠤᠨ ᠤ᠋ ᠬᠢᠨᠢ ᠬᠣᠶᠠᠷ ᠲᠠᠯᠠ ᠪᠠᠷ ᠪᠤᠭᠤᠷᠤᠯᠲᠤᠬᠤ ᠪᠣᠯᠤᠭᠠ ᠦᠭᠡᠢ ᠬᠠᠷᠠ ᠦᠰᠦ ᠨᠢ ᠲᠤᠭ ᠲᠤᠭ ᠢ᠋ᠶ᠋ᠠᠷ ᠤᠨᠵᠢᠢᠵᠤ᠂ ᠬᠠᠷᠠᠴᠠ ᠶ᠋ᠢᠨ ᠬᠢᠨᠢ ᠱᠣᠨᠲᠣᠭᠣᠷ ᠢ᠋ ᠥᠩᠭᠡᠷᠡᠨ ᠰᠡᠷᠪᠡᠭᠡᠨᠡᠭᠦᠯᠬᠦ ᠪᠥᠭᠡᠳ ᠪᠥᠯᠴᠥᠩ ᠵᠣᠪᠬᠢᠨ ᠤ᠋ ᠳᠣᠣᠷᠠ ᠠ᠋ᠴᠠ ᠭᠠᠯ ᠰᠤᠯᠠᠷᠠᠭᠠᠨ ᠬᠣᠶᠠᠷ ᠨᠢᠳᠦ ᠬᠥᠳᠡᠯᠭᠡᠭᠡᠨ ᠦᠭᠡᠢ ᠭᠥᠯᠢᠷᠡᠨ ᠤᠳᠠᠲᠠᠯᠠ ᠰᠠᠭᠤᠪᠠ᠃
ᠰᠠᠢᠬᠠᠨ ᠭᠢᠯᠠᠯᠵᠠᠭᠰᠠᠨ ᠴᠣᠪᠣᠭᠣ ᠵᠢᠪᠬᠤᠯᠠᠩᠲᠠᠢ ᠬᠠᠷᠠ ᠨᠢᠳᠦᠨ ᠪᠠᠢᠭᠰᠠᠨ ᠨᠢ ᠬᠥᠮᠦᠨ ᠤ ᠶᠠᠪᠤᠳᠠᠯ ᠤ᠋ᠨ ᠰᠠᠭᠠᠷᠤ ᠪᠦᠬᠦᠨ ᠢ᠋ ᠣᠯᠵᠤ ᠬᠠᠷᠠᠭᠠᠳ ᠭᠥᠯᠢᠷᠡᠨ ᠲᠣᠭᠲᠠᠵᠤ ᠪᠠᠰᠠ ᠬᠦ᠌ ᠬᠡᠳᠦᠨ ᠵᠢᠯ ᠦ᠋ᠨ ᠨᠢᠭᠤᠷ ᠢ᠋ ᠦᠵᠡᠵᠡᠢ᠃ ᠲᠠᠪᠤᠨ ᠵᠢᠯ ᠦ᠋ᠨ ᠡᠮᠦᠨᠡ ᠡᠨᠡ ᠨᠢᠳᠦ ᠭᠡᠨᠡᠨ ᠬᠣᠩᠭᠣᠷ ᠵᠠᠯᠠᠭᠤ ᠨᠠᠰᠤᠨ ᠤ᠋ ᠡᠷᠳᠡᠮ ᠲᠡᠭᠦᠰ ᠰᠠᠢᠬᠠᠨ ᠬᠠᠷᠠᠴᠠ ᠪᠠᠷ ᠢᠯᠴᠢ ᠪᠠᠳᠠᠷᠠᠭᠤᠯᠬᠤ ᠮᠡᠲᠦ ᠰᠢᠷᠲᠡᠳᠡᠭ ᠪᠠᠢᠪᠠ᠃ ᠭᠡᠲᠡᠯᠡ ᠬᠣᠷᠢᠨ ᠵᠢᠷᠭᠤᠭᠠᠬᠠᠨ ᠨᠠᠰᠤᠨ ᠠ᠋ᠴᠠ ᠪᠠᠨ ᠡᠬᠢᠯᠡᠨ ᠲᠡᠭᠦᠨ ᠤ ᠬᠣᠶᠠᠷ ᠨᠢᠳᠦ ᠪᠤᠷᠤᠭᠤ ᠬᠠᠷᠠᠵᠤ ᠪᠠᠢᠭᠠ ᠪᠦᠬᠦᠨ ᠳ᠋ᠡᠭᠡᠨ ᠦᠯᠦ ᠢᠲᠡᠭᠡᠬᠦ ᠂ ᠮᠡᠳᠡᠭᠰᠡᠨ ᠴᠦ᠍ ᠮᠡᠳᠡᠭᠡ ᠦᠭᠡᠢ ᠭᠡᠬᠦ ᠲᠡᠨᠡᠭ ᠪᠦᠳᠡᠭᠢ ᠬᠠᠷᠠᠴᠠ ᠲᠠᠢ ᠪᠣᠯᠪᠠ ᠃ ᠡᠨᠡ ᠨᠢᠳᠦᠨ ᠤ ᠪᠤᠷᠤᠭᠤ ᠶᠤᠮ ᠭᠡᠵᠦ ᠦᠦ ? ᠡᠰᠡᠬᠦᠯᠡ ᠂ ᠡᠳᠦᠢ ᠳ᠋ᠦ᠍ ᠲᠥᠷᠥᠭᠰᠡᠨ ᠪᠡᠶᠡ ᠶ᠋ᠢᠨ ᠪᠤᠷᠤᠭᠤ ᠭᠡᠵᠦ ᠦᠦ ? ᠡᠷᠭᠢᠴᠡᠭᠦᠯᠦᠨ ᠲᠤᠩᠭᠠᠬᠤ ᠴᠢᠳᠠᠯ ᠲᠠᠢ ᠣᠢ ᠤᠬᠠᠭᠠᠨ ᠤ᠋ ᠪᠤᠷᠤᠭᠤ ᠶᠤᠮ ᠭᠡᠵᠦ ᠦᠦ ᠁
ᠲᠡᠭᠡᠭᠡᠳ ᠠᠶᠠᠭᠠ ᠪᠠᠨ ᠮᠡᠯᠡᠬᠡᠢ ᠰᠢᠷᠡᠭᠡᠨ ᠳᠡᠭᠡᠷᠡ ᠳᠡᠰ ᠬᠢᠲᠡᠯᠡ ᠲᠠᠯᠪᠢᠭᠠᠳ ᠠᠮᠢᠰᠬᠤᠭᠠᠳᠠᠨ ᠪᠠᠢᠵᠤ᠂ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠶ᠋ᠢ ᠭᠢᠯᠤᠢᠨ ᠬᠠᠷᠠᠵᠤ᠄
《 ᠦᠭᠡᠢ !᠁ ᠪᠢ ᠬᠥᠮᠦᠨ ᠪᠣᠯᠬᠤ ᠠ᠋ᠴᠠ ᠪᠢᠰᠢ ᠂ ᠬᠥᠮᠦᠰ ᠦ᠋ᠨ ᠲᠣᠭᠯᠠᠭᠠᠮ ᠪᠢᠰᠢ ! ᠥᠴᠦᠬᠡᠨ ᠶᠠᠭᠤᠮᠠᠰ ᠢ᠋ᠶ᠋ᠠᠷ ᠲᠣᠭᠯᠠᠭᠤᠯᠵᠤ ᠠᠮᠢᠳᠤᠷᠠᠭᠰᠠᠨ ᠠ᠋ᠴᠠ ᠥᠪᠡᠷ ᠢ᠋ᠶ᠋ᠡᠨ ᠥᠪᠡᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠣᠭᠯᠠᠭᠠᠳ ᠥᠩᠭᠡᠷᠡᠭᠰᠡᠨ ᠨᠢ ᠳᠡᠭᠡᠷᠡ ! ᠡᠷᠳᠡᠮ ᠦᠭᠡᠢ ᠶ᠋ᠢᠨ ᠡᠮᠦᠨᠡ᠂ ᠡᠷᠳᠡᠮᠲᠦ ᠲᠡᠷᠢᠭᠦᠨ ᠢ᠋ ᠪᠥᠬᠥᠢᠵᠦ ᠠᠮᠢ ᠲᠡᠵᠢᠭᠡᠬᠦ ᠭᠡᠵᠦ ᠦᠦ ?᠁ ᠴᠢᠳᠠᠬᠤ ᠦᠭᠡᠢ ! ᠬᠡᠵᠢᠶᠡ ᠴᠦ᠍ ᠦᠭᠡᠢ 》 ᠭᠡᠵᠦ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠶᠠᠷᠢᠬᠤ ᠳ᠋ᠤ᠌ ᠲᠡᠳᠡᠭᠡᠷ ᠭᠠᠰᠢᠭᠤᠨ ᠦᠭᠡᠰ ᠂ ᠭᠠᠰᠢᠭᠤᠨ ᠣᠷᠭᠢᠭ᠍ᠰᠠᠨ ᠴᠡᠭᠡᠵᠢᠨ ᠤ ᠬᠢᠨᠢ ᠭᠠᠰᠢᠭᠤᠨ ᠢᠷᠣᠭᠠᠯ ᠠ᠋ᠴᠠ ᠭᠠᠷᠴᠤ ᠢᠷᠡᠬᠦ ᠮᠡᠲᠦ ᠠᠶᠠᠷᠬᠠᠨ ᠰᠢᠪᠡᠨᠡᠨ ᠳᠠᠭᠤᠷᠢᠰᠤᠭᠰᠠᠭᠠᠷ ᠪᠦᠷ ᠲᠣᠳᠣᠷᠠᠵᠤ᠂ ᠴᠢᠩᠭᠠ ᠬᠡᠯᠡᠵᠦ ᠲᠡᠭᠦᠰᠦᠭᠡᠳ ᠬᠣᠢᠨᠠ ᠠ᠋ᠴᠠ ᠨᠢ ᠬᠦᠷᠬᠢᠷᠡᠬᠦ ᠮᠡᠲᠦ ᠳᠠᠭᠤ ᠭᠠᠷᠴᠤ ᠴᠢᠮᠡᠭᠡ ᠦᠭᠡᠢ ᠪᠣᠯᠪᠠ ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠰᠠᠶᠢ ᠰᠠᠨᠠᠭᠰᠠᠨ ᠮᠡᠲᠦ ᠲᠠᠮᠠᠬᠢ ᠪᠠᠨ ᠨᠡᠷᠡᠵᠦ᠂ ᠤᠲᠤᠭᠠ ᠶ᠋ᠢ ᠬᠣᠢᠨᠠ ᠬᠣᠢᠨᠠ ᠠ᠋ᠴᠠ ᠨᠢ ᠭᠠᠷᠭᠠᠨ ᠲᠠᠮᠰᠢᠶᠠᠵᠤ ᠠᠷᠠᠢᠬᠠᠨ ᠲᠠᠢᠪᠤᠰᠢᠷᠠᠪᠠ ᠪᠣᠯᠤᠯᠲᠠᠢ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ᠶ᠋ᠠᠨ ᠬᠠᠷᠠᠵᠤ ᠭᠡᠳᠡᠷᠭᠦ ᠪᠡᠨ ᠬᠡᠪᠲᠡᠪᠡ᠃
ᠭᠠᠵᠠᠷ ᠳᠡᠯᠡᠬᠡᠢ ᠦᠯᠦ ᠮᠡᠳᠡᠭ ᠳᠠᠢᠪᠠᠯᠵᠠᠬᠤ ᠮᠡᠲᠦ ᠪᠣᠯᠵᠤ᠂ ᠲᠠᠷᠢᠬᠢ ᠲᠣᠯᠣᠭᠠᠢ ᠨᠢᠭᠡᠨ ᠦᠶᠡ ᠪᠡᠨ ᠪᠣᠳᠣᠪᠠᠯ ᠵᠢᠷᠭᠠᠯᠲᠠᠢ ᠪᠠᠷ ᠮᠠᠩᠰᠢᠭᠤᠷᠠᠨ ᠂ ᠨᠣᠮ ᠡᠷᠳᠡᠮ ᠦ᠋ᠨ ᠮᠥᠷ ᠬᠥᠭᠡᠭᠡᠭᠰᠡᠨ ᠬᠣᠷᠢᠭᠠᠳ ᠵᠢᠯ ᠢ᠋ᠶ᠋ᠡᠨ ᠳᠤᠷᠠᠰᠤᠨ ᠬᠥᠳᠡᠯᠦᠯ ᠦᠭᠡᠢ ᠬᠡᠪᠲᠡᠭᠰᠡᠭᠡᠷ ᠪᠠᠢᠪᠠ ᠃
ᠨᠠᠢ᠍ᠮᠠᠨ ᠨᠠᠰᠤᠨ ᠳ᠋ᠠᠭᠠᠨ ᠠᠯᠲᠠᠨᠭᠡᠷᠡᠯ ᠭᠤᠸᠠᠢ ᠪᠠᠷ ᠠᠩᠬᠠ ᠮᠣᠩᠭᠣᠯ ᠦᠰᠦᠭ ᠵᠢᠭᠠᠯᠭᠠᠵᠤ ᠡᠬᠢᠯᠡᠭᠰᠡᠨ ᠦᠶᠡ ᠰᠠᠨᠠᠭᠠᠨ ᠳ᠋ᠤᠨᠢ ᠣᠷᠣᠨ᠂ ᠤᠯᠠᠮ ᠢ᠋ᠶ᠋ᠠᠷ ᠮᠣᠩᠭᠣᠯ – ᠮᠠᠨᠵᠤ ᠪᠣᠯᠤᠨ ᠬᠢᠲᠠᠳ ᠬᠡᠯᠡ ᠪᠢᠴᠢᠭ ᠦ᠋ᠨ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠰᠤᠷᠴᠤ᠂ ᠴᠡᠷᠢᠭ ᠦ᠋ᠨ ᠶᠠᠮᠤᠨ ᠳ᠋ᠤ᠌ ᠣᠨ ᠤᠳᠠᠭᠠᠨ ᠪᠢᠴᠢᠭᠡᠴᠢ ᠠᠭᠰᠠᠨ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠠᠨ ᠣᠷᠣ ᠶ᠋ᠢ ᠣᠷᠣᠯᠠᠵᠤ ᠨᠡᠷᠡ ᠶ᠋ᠢ ᠨᠡᠷᠡᠯᠡᠭᠦᠯᠦᠭᠰᠡᠨ ᠪᠢᠴᠢᠭᠡᠴᠢ ᠶ᠋ᠢᠨ ᠡᠭᠦᠷᠭᠡ ᠭᠦᠢᠴᠡᠳᠬᠡᠬᠦ ᠳ᠋ᠡᠭᠡᠨ ᠮᠣᠩᠭᠣᠯ ᠳᠠᠶᠠᠭᠠᠷ ᠳᠠᠢᠴᠢᠨ ᠠᠯᠳᠠᠷ ᠨᠢ ᠳᠠᠭᠤᠷᠢᠰᠤᠭᠰᠠᠨ ᠴᠡᠷᠢᠭ ᠦ᠋ᠨ ᠶᠡᠬᠡ ᠵᠠᠩᠵᠤᠨ ᠮᠠᠭᠰᠤᠷᠵᠠᠪ ᠂ ᠰᠥᠭᠡᠪᠠᠭ᠋ᠡᠳᠦᠷ ᠪᠣᠯᠤᠨ ᠴᠣᠢᠪᠠᠯᠰᠠᠩ ᠵᠡᠷᠭᠡ ᠬᠥᠮᠦᠨ ᠲᠡᠢ ᠬᠠᠮᠲᠤ ᠠᠵᠢᠯᠯᠠᠵᠤ ᠪᠠᠢᠭᠰᠠᠨ ᠨᠢ ᠥᠰᠪᠥᠷᠢ ᠪᠠᠭᠠ ᠦᠶᠡ ᠶ᠋ᠢᠨ ᠠᠯᠲᠠᠨ ᠡᠳᠦᠷ ᠦ᠋ᠳ ᠮᠡᠲᠦ ᠰᠠᠨᠠᠭᠳᠠᠨᠠ᠃
ᠠᠷᠪᠠ ᠶᠢᠰᠦᠨ ᠨᠠᠰᠤᠨ ᠳ᠋ᠠᠭᠠᠨ ᠤᠯᠤᠰ ᠤᠨ ᠬᠢᠯᠢ ᠠᠯᠬᠤᠵᠤ ᠂ ᠪᠠᠯᠲ ᠤᠨ ᠳᠠᠯᠠᠢ ᠶ᠋ᠢᠨ ᠡᠷᠭᠢ᠂ ᠯᠧᠨᠢᠩᠭᠷᠡᠳ᠋ ᠬᠤᠲᠠᠨᠠ ᠣᠴᠢᠭᠠᠳ ᠲᠡᠨᠳᠡ ᠮᠣᠩᠭᠣᠯ ᠭᠠᠵᠠᠷ ᠤ᠋ᠨ ᠤᠤᠭᠠᠨ ᠬᠠᠢᠷᠠᠲᠤ ᠪᠦᠰᠡᠭᠦᠢ ᠫᠠᠭᠮᠠᠳᠤᠯᠮᠠ ᠲᠠᠢ ᠪᠠᠨ ᠬᠠᠮᠲᠤ ᠰᠤᠷᠴᠤ᠂ ᠬᠣᠷᠢᠨ ᠨᠠᠰᠤᠨ ᠳ᠋ᠠᠭᠠᠨ ᠭᠧᠷᠮᠠᠨ ᠣᠷᠣᠨ ᠳ᠋ᠤ᠌ ᠣᠳᠤᠭᠰᠠᠨ ᠨᠢ ᠥᠨᠢ ᠡᠷᠲᠡᠨ ᠤ ᠶᠦᠮ ᠰᠢᠭ ᠪᠣᠳᠣᠭᠳᠠᠨᠠ᠃
ᠯᠠᠢᠫᠢᠰᠢ ᠬᠤᠲᠠᠨᠠ ᠥᠷᠥᠨᠡ ᠵᠦᠭ ᠦ᠋ᠨ ᠶᠣᠰᠣ ᠵᠠᠩᠰᠢᠯ ᠂ ᠨᠣᠮ ᠡᠷᠳᠡᠮ ᠂ ᠲᠡᠦᠬᠡ ᠢᠷᠭᠡᠨᠰᠢᠯ ᠰᠤᠳᠤᠯᠵᠤ ᠂ ᠢᠨᠠᠭ ᠪᠦᠰᠡᠭᠦᠢ ᠫᠠᠭᠮᠠᠳᠤᠯᠮᠠ ᠶ᠋ᠢᠨ ᠬᠠᠮᠲᠤ ᠂ ᠬᠥᠮᠥᠨ ᠦ ᠭᠠᠵᠠᠷ ᠲᠤ᠌ ᠥᠪᠡᠷ ᠦ᠋ᠨ ᠵᠢᠷᠭᠠᠯ ᠢ᠋ᠶ᠋ᠠᠷ ᠴᠡᠩᠭᠡᠵᠦ ᠪᠠᠢᠲᠠᠯᠠ ᠡᠴᠦᠰ ᠲᠦ᠍ ᠬᠠᠯᠠᠭᠤᠨ ᠬᠠᠢᠷᠠ ᠶ᠋ᠢᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠴᠤᠴᠠᠯᠬᠤ ᠪᠤᠷᠤᠭᠤ ᠰᠠᠨᠠᠭᠠ ᠲᠥᠷᠥᠭᠰᠡᠨ ᠢ᠋ ᠣᠳᠣ ᠪᠣᠳᠣᠬᠤ ᠳ᠋ᠤ᠌ ᠳᠣᠲᠣᠷᠠ ᠡᠪ ᠦᠭᠡᠢ ᠣᠷᠬᠢᠬᠤ ᠲᠤᠯᠠ ᠨᠢᠭᠤᠷ ᠢ᠋ᠶ᠋ᠡᠨ ᠢᠷᠪᠠᠢᠯᠭᠠᠨ᠂ ᠪᠤᠰᠢᠭᠤᠬᠠᠨ ᠥᠭᠡᠷᠡ ᠵᠦᠢᠯ ᠢ᠋ ᠪᠣᠳᠣᠪᠠ᠃ ᠭᠡᠪᠡᠴᠦ ᠂ ᠣᠷᠣᠰ ᠨᠤᠲᠤᠭ ᠤ᠋ᠨ ᠡᠷᠬᠡ ᠵᠠᠩ ᠲᠠᠢ ᠂ ᠨᠣᠭᠣᠭᠠᠨ ᠨᠢᠳᠦᠲᠦ ᠤᠯᠠᠭᠠᠨ ᠪᠠᠰᠠᠭᠠᠨ ᠨᠢᠨᠠ ᠨᠢᠺᠦᠯᠠᠢᠶᠧᠨᠠ ᠴᠢᠰᠲ᠋ᠶᠠᠺᠣᠸᠠ ᠰᠡᠳᠬᠢᠯ ᠳ᠋ᠦ᠍ ᠤᠷᠭᠤᠨ ᠲᠡᠭᠦᠨ ᠲᠡᠢ ᠬᠠᠨᠢᠯᠠᠨ ᠥᠩᠭᠡᠷᠡᠭᠡᠭᠰᠡᠨ ᠵᠢᠷᠭᠠᠯ ᠴᠡᠩᠭᠡᠯ ᠬᠡᠳᠦ ᠪᠢᠯᠬᠠᠮᠠᠯ ᠴᠥᠭᠡᠬᠡᠨ ᠰᠠᠷᠠ ᠰᠠᠨᠠᠭᠳᠠᠪᠠ᠃ ᠥᠭᠡᠷᠡ ᠶᠠᠭᠤᠮᠠ ᠪᠣᠳᠣᠬᠤ ᠰᠠᠨ ᠭᠡᠬᠦ ᠡᠴᠡ ᠶᠡᠬᠡ ᠴᠡᠩᠭᠡᠯ ᠦ᠋ᠨ ᠳᠤᠮᠳᠠ ᠠ᠋ᠴᠠ ᠲᠥᠷᠥᠭᠰᠡᠨ ᠪᠢᠴᠢᠬᠠᠨ ᠥᠬᠢᠨ ᠠᠨᠠᠨᠳᠠ – ᠱᠷᠢ᠂ ᠰᠠᠨᠠᠮᠰᠠᠷ ᠦᠭᠡᠢ ᠰᠠᠯᠤᠯᠲᠠ ᠶ᠋ᠢ ᠲᠤᠯᠭᠠᠨ ᠢᠷᠡᠭᠰᠡᠨ ᠶᠢᠷᠲᠢᠨᠴᠦ ᠶ᠋ᠢᠨ ᠲᠡᠷᠡ ᠨᠢᠭᠡᠨ ᠬᠠᠲᠠᠭᠤ ᠡᠳᠦᠷ᠂ ᠥᠬᠢᠨ ᠦᠷᠡ ᠪᠡᠨ ᠲᠡᠪᠡᠷᠢᠨ ᠣᠳᠤᠭᠰᠠᠨ ᠨᠢᠨᠠ ᠶ᠋ᠢᠨ ᠪᠠᠷᠠ ᠰᠡᠳᠬᠢᠯ ᠳ᠋ᠦ᠍ ᠤᠷᠭᠤᠨ᠂ ᠬᠣᠭᠣᠯᠠᠢ ᠵᠠᠩᠭᠢᠷᠠᠬᠤ ᠲᠤᠯᠠ ᠣᠷᠣ ᠠ᠋ᠴᠠ ᠪᠠᠨ ᠪᠣᠰᠤᠨ ᠬᠠᠷᠠᠢᠵᠤ᠂ ᠶᠠᠭᠠᠷᠠᠨ ᠬᠤᠪᠴᠠᠰᠤᠯᠠᠭᠠᠳ ᠭᠠᠳᠠᠭᠠ ᠭᠠᠷᠪᠠ ᠃ ᠶᠠᠭᠠᠬᠢᠵᠤ ᠡᠢᠭᠰᠡᠭᠡᠷ ᠪᠠᠢᠲᠠᠯᠠ ᠦᠳᠡ ᠳᠥᠭᠥᠵᠡᠢ᠃ ᠲᠡᠭᠷᠢ ᠪᠥᠷᠥᠭᠬᠡᠨ ᠪᠣᠯᠪᠠᠴᠤ ᠪᠣᠷᠣᠭᠠᠨ ᠣᠷᠣᠬᠤ ᠦᠭᠡᠢ᠂ ᠤᠷᠢᠳᠤ ᠰᠥᠨᠢ ᠶ᠋ᠢᠨ ᠪᠠᠭᠠ ᠰᠠᠭᠠ ᠰᠢᠪᠡᠷᠡᠭᠡ ᠪᠣᠷᠣᠭᠠᠨ ᠢ᠋ᠶ᠋ᠠᠷ ᠭᠠᠵᠠᠷ ᠳᠡᠯᠡᠬᠡᠢ ᠶ᠋ᠢᠨ ᠲᠣᠭᠣᠰᠣ ᠳᠠᠷᠤᠭᠳᠠᠭᠠᠳ ᠂ ᠰᠠᠯᠬᠢ ᠦᠭᠡᠢ ᠪᠦᠦᠳᠡᠭᠡᠷ ᠡᠨᠡ ᠡᠳᠦᠷ᠂ ᠨᠠᠭᠠᠳᠤᠮ ᠨᠠᠷᠭᠢᠶᠠᠨ ᠳ᠋ᠤ᠌ ᠨᠡᠩ ᠲᠠᠭᠠᠲᠠᠢ ᠮᠡᠲᠦ᠃
ᠪᠣᠰᠤᠭᠠ ᠱᠤᠷᠭᠠᠭ ᠬᠠᠰᠢᠶᠠ ᠨᠤᠭᠤᠳ ᠪᠠ ᠳ᠋ᠠᠩ ᠴᠠᠭᠠᠨ ᠪᠠᠢᠰᠢᠩ ᠭᠣᠣᠯᠯᠠᠭᠰᠠᠨ ᠮᠣᠩᠭᠣᠯ ᠤᠯᠤᠰ ᠤᠨ ᠨᠡᠢᠰᠯᠡᠯ ᠬᠣᠲᠠ ᠶᠡᠬᠡᠪᠴᠢᠯᠡᠨ ᠢᠰᠡᠭᠡᠢ ᠭᠡᠷ ᠂ ᠵᠢᠵᠢᠭ ᠥᠮᠥᠭᠥᠷ ᠪᠠᠢᠰᠢᠩ ᠠᠴᠠ ᠪᠦᠷᠢᠳᠦᠨ ᠲᠣᠭᠠ ᠲᠣᠮᠰᠢ ᠦᠭᠡᠢ ᠣᠯᠠᠨ ᠱᠣᠩ ᠮᠣᠳᠣ᠂ ᠪᠦᠳᠦᠭᠦᠨ ᠨᠠᠷᠢᠨ ᠬᠣᠯᠢᠯᠳᠤᠨ ᠳᠡᠭᠡᠭᠰᠢ ᠰᠢᠪᠡᠭᠡᠯᠡᠨ ᠬᠠᠷᠠᠭᠳᠠᠬᠤ ᠨᠢ ᠨᠠᠪᠴᠢ ᠮᠥᠴᠢᠷ ᠦᠭᠡᠢ ᠰᠢᠭᠤᠢ ᠮᠡᠲᠦ ᠬᠠᠷᠠᠭᠳᠠᠨᠠ᠃ ᠡᠳᠡᠭᠡᠷ ᠱᠣᠩ ᠤ᠋ᠨ ᠠᠴᠢ ᠪᠠᠷ ᠬᠣᠲᠠ ᠶ᠋ᠢᠨ ᠠᠢᠯ ᠪᠦᠬᠦᠨ ᠭᠡᠷᠡᠯ ᠴᠢᠳᠧᠩ ᠲᠡᠢ᠂ ᠠᠯᠪᠠᠨ ᠭᠠᠵᠠᠷ ᠤ᠋ᠨ ᠶᠡᠬᠡᠩᠬᠢ ᠨᠢ ᠶᠠᠷᠢᠳᠠᠭ ᠤᠲᠠᠰᠤ᠂ ᠵᠠᠷᠢᠮ ᠨᠢ ᠷᠠᠳᠢᠣ᠋ ᠲᠠᠢ ᠪᠠᠢᠭᠠ ᠠᠵᠢ᠃
ᠡᠨᠡ ᠥᠪᠡᠷᠮᠢᠴᠡ ᠪᠢᠴᠢᠬᠠᠨ ᠬᠣᠲᠠ ᠶ᠋ᠢᠨ ᠭᠤᠳᠤᠮᠵᠢᠨ ᠳ᠋ᠤ᠌ ᠬᠥᠰᠬᠡ ᠲᠡᠷᠭᠡ ᠂ ᠮᠣᠷᠢ ᠲᠡᠮᠡᠭᠡ ᠂ ᠨᠣᠬᠠᠢ ᠭᠠᠬᠠᠢ ᠪᠣᠯᠤᠨ ᠲᠠᠬᠢᠶᠠ ᠦᠬᠡᠷ ᠬᠦᠷᠲᠡᠯᠡ ᠦᠵᠡᠭᠳᠡᠬᠦ ᠨᠢ ᠶᠡᠷᠦ ᠶ᠋ᠢᠨ ᠵᠦᠢᠯ ᠪᠥᠭᠡᠳ ᠬᠥᠮᠦᠰ᠂ ᠬᠣᠲᠠ ᠬᠥᠳᠡᠭᠡ ᠶ᠋ᠢᠨ ᠬᠢᠨ ᠲᠡᠳᠦᠢ ᠦᠭᠡᠢ ᠶᠡᠬᠡ ᠢᠯᠭᠠᠭᠠ ᠲᠠᠢ ᠪᠤᠰᠤ ᠬᠤᠪᠴᠠᠰᠤᠯᠠᠵᠤ᠂ ᠬᠥᠯᠥᠰᠥᠨ ᠤ ᠮᠣᠷᠢᠨ ᠲᠡᠷᠭᠡ ᠂ ᠤᠨᠤᠳᠠᠭ ᠳᠤᠭᠤᠢ ᠬᠣᠶᠠᠷ ᠡᠯᠪᠡᠭ ᠦᠶᠡ ᠪᠠᠢᠪᠠ᠃ ᠨᠠᠴᠤᠭᠳᠣᠷᠵᠢ ᠤᠷᠢᠳᠤ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠶ᠋ᠢ ᠬᠠᠷᠠᠪᠠᠯ ᠡᠭᠦᠯᠡ ᠮᠠᠨᠠᠨ ᠲᠠᠢ ᠴᠡᠩᠬᠡᠷ ᠪᠠᠷᠠᠭᠠᠨ ᠬᠥᠪᠴᠢ ᠬᠠᠷᠠᠭᠳᠠᠬᠤ ᠲᠤᠯᠠ ᠄
ᠴᠡᠩᠬᠡᠷᠯᠡᠨ ᠬᠠᠷᠠᠭᠳᠠᠬᠤ ᠠᠭᠤᠯᠠ ᠨᠢ ᠬᠥ᠋
ᠴᠡᠴᠡᠭ ᠵᠢᠮᠢᠰ ᠲᠡᠢ ᠠᠭᠤᠯᠠ ᠪᠠᠢᠨᠠ ᠬᠥ᠋
ᠴᠡᠴᠡᠷᠯᠢᠭ ᠰᠠᠢᠬᠠᠨ ᠠᠭᠤᠯᠠᠨ ᠳ᠋ᠤᠨᠢ
ᠬᠦᠦ ᠲᠡᠢ ᠪᠡᠨ ᠵᠢᠷᠭᠠᠮᠠᠷ ᠠᠭᠤᠯᠠ ᠪᠠᠢᠨᠠ ᠭᠡᠵᠦ ᠰᠡᠳᠬᠢᠯ ᠰᠡᠷᠭᠦᠨ ᠠᠶᠠᠯᠭᠤᠯᠠᠵᠤ᠂ ᠪᠡᠶᠡ ᠶ᠋ᠢᠨ ᠠᠯᠵᠢᠶᠠᠯ ᠢ᠋ ᠮᠠᠷᠲᠠᠨ ᠰᠤᠨᠢᠶᠠᠨ᠂ ᠬᠠᠰᠢᠶᠠᠨ ᠳᠣᠲᠣᠭᠤᠷ ᠡᠢᠰᠢ ᠲᠠᠢᠰᠢ ᠶᠠᠪᠤᠵᠤ᠂ ᠵᠢᠵᠢᠭ ᠴᠢᠯᠠᠭᠤ ᠠᠪᠴᠤ ᠰᠢᠳᠡᠭᠰᠡᠨ ᠨᠢ ᠬᠠᠰᠢᠶᠠᠨ ᠠ᠋ᠴᠠ ᠲᠡᠷᠲᠡᠭᠡ ᠤᠷᠢᠳᠤ ᠪᠠᠢᠭᠠ ᠲᠡᠮᠦᠷ ᠲᠣᠷᠬᠠ ᠲᠠᠢ ᠬᠣᠭ ᠢ᠋ ᠲᠦᠰ ᠬᠢᠲᠡᠯᠡ ᠤᠨᠤᠬᠤ ᠳ᠋ᠤ᠌ ᠲᠡᠭᠦᠪᠡᠷ ᠶᠠᠪᠤᠭᠰᠠᠨ ᠵᠣᠯᠪᠢᠩ ᠨᠣᠬᠠᠳ ᠭᠠᠰᠠᠯᠤᠨ ᠵᠠᠢᠯᠠᠪᠠ᠃
《 ᠬᠡᠨ ᠲᠡᠢ ᠪᠡᠨ ᠴᠦ᠍ ᠵᠤᠭᠠᠯᠠᠬᠤ ᠪᠢᠯᠡ ᠳᠠ 》 ᠭᠡᠵᠦ ᠠᠮᠠᠨ ᠳ᠋ᠠᠭᠠᠨ ᠥᠭᠦᠯᠡᠭᠡᠳ᠂ ᠮᠥᠨ ᠯᠡ ᠲᠡᠷᠡ ᠠᠭᠤᠯᠠ ᠶ᠋ᠢᠨ ᠵᠡᠭᠦᠨ ᠳᠡᠭᠡᠭᠦᠷ ᠠᠯᠤᠰ ᠢ᠋ ᠬᠠᠷᠠᠬᠤ ᠳ᠋ᠤ᠌ ᠵᠠᠷᠢᠮ ᠭᠠᠵᠠᠷ ᠡᠭᠦᠯᠡᠨ ᠴᠢᠯᠥᠭᠡ ᠪᠡᠷ ᠨᠠᠷᠠ ᠲᠤᠰᠤᠭᠰᠠᠨ ᠨᠢ ᠪᠣᠶᠠᠨᠵᠢᠷᠭᠠᠯ ᠤ᠋ᠨ ᠨᠡᠷᠡ ᠮᠡᠲᠦ᠁ ᠲᠡᠷᠡ ᠠᠭᠤᠯᠠᠰ ᠠ᠋ᠴᠠ ᠴᠠᠭᠠᠨᠠ ᠨᠠᠷᠠ ᠭᠡᠢᠭᠰᠡᠨ ᠴᠡᠯᠡᠭᠡᠷ ᠰᠠᠢᠬᠠᠨ ᠬᠥᠨᠳᠡᠢ ᠳ᠋ᠦ᠍ ᠳᠡᠷᠡᠰᠦᠨ ᠳᠤᠮᠳᠠ ᠠ᠋ᠴᠠ ᠬᠣᠶᠠᠷ ᠨᠠᠭᠤᠷ ᠁ ᠬᠢᠯᠭᠠᠨᠠ ᠬᠠᠯᠢᠭᠤᠷᠠᠭᠰᠠᠨ ᠰᠢᠷᠭᠠᠯ ᠠᠷ᠂ ᠨᠣᠭᠣᠭᠠ ᠵᠢᠭᠳᠡᠷᠡᠭᠰᠡᠨ ᠲᠠᠯᠪᠢᠭᠤᠨ ᠡᠩᠭᠡᠷ᠂ ᠰᠡᠷᠢᠭᠦᠨ ᠰᠠᠢᠬᠠᠨ ᠳᠡᠨᠵᠢ ᠪᠣᠢ ᠃ ᠡᠨᠡ ᠮᠠᠭᠤ ᠪᠡᠶᠡ ᠶ᠋ᠢᠨ ᠮᠢᠨᠢ ᠲᠥᠷᠥᠵᠦ ᠥᠰᠦᠭᠰᠡᠨ ᠥᠯᠥᠭᠡᠢ ᠲᠡᠷᠡ ᠪᠢᠯᠡ᠃ ᠬᠥᠭᠡᠷᠦᠬᠦᠢ ᠡᠵᠢ ᠡᠴᠡ ᠪᠡᠨ ᠳᠣᠯᠣᠭᠠᠨ ᠨᠠᠰᠤᠨ ᠳ᠋ᠠᠭᠠᠨ ᠥᠨᠥᠴᠢᠷᠡᠭᠡᠳ ᠤᠬᠢᠯᠠᠵᠤ ᠪᠠᠢᠭᠰᠠᠨ ᠨᠤᠲᠤᠭ ( ᠪᠠᠭᠤᠴᠠ ) ᠮᠢᠨᠢ ᠲᠡᠨᠳᠡ ᠪᠣᠢ᠃ ᠰᠢᠯᠤᠭᠤᠨ ᠰᠢᠳᠤᠷᠭᠤ᠂ ᠬᠢᠴᠢᠶᠡᠩᠭᠦᠢ ᠨᠢᠮᠪᠠᠢ ᠡᠴᠢᠭᠡ ᠮᠢᠨᠢ ᠲᠡᠨᠳᠡ ᠨᠢᠭᠡᠨ ᠨᠠᠰᠤ ᠶ᠋ᠢ ᠡᠯᠡᠭᠡᠪᠡ ᠭᠡᠵᠦ ᠪᠣᠳᠣᠨ ᠶᠠᠭᠤ ᠶᠠᠭᠤ ᠦᠭᠡᠢ ᠨᠢᠳᠦᠨ ᠤ ᠬᠢᠨᠢ ᠨᠢᠯᠪᠤᠰᠤ ᠴᠡᠯᠡᠯᠵᠡᠨ ᠢᠷᠡᠪᠡ᠃ ᠨᠢᠳᠦᠨ ᠤ ᠵᠣᠪᠬᠢ ᠥᠩᠭᠡᠯᠵᠡᠨ ᠳᠦᠭᠦᠷᠬᠦ ᠲᠡᠷᠡ ᠬᠦ᠌ ᠨᠢᠯᠪᠤᠰᠤᠨ ᠳᠤᠮᠳᠠ᠂ ᠡᠴᠢᠭᠡ ᠳ᠋ᠠᠰᠢᠳᠤᠷᠵᠢ ᠶ᠋ᠢᠨ ᠬᠢᠨᠢ ᠪᠣᠳᠣᠯᠭᠠᠰᠢᠷᠠᠩᠭᠤᠢ ᠰᠢᠷᠠ ᠴᠢᠷᠠᠢ᠂ ᠡᠬᠡ ᠫᠠᠭᠮᠠ ᠶ᠋ᠢᠨ ᠬᠢᠨᠢ ᠲᠠᠢᠪᠤᠩ ᠳᠦᠷᠢ᠂ ᠪᠠᠭᠠ ᠶ᠋ᠢᠨ ᠨᠤᠲᠤᠭ ᠤ᠋ᠨ ᠠᠢᠯ ᠬᠦᠷᠰᠢ ᠶ᠋ᠢᠨ ᠬᠥᠮᠦᠰ ᠦ᠋ᠨ ᠲᠠᠨᠢᠯ ᠳᠤᠯᠠᠭᠠᠬᠠᠨ ᠴᠢᠷᠠᠢ ᠨᠤᠭᠤᠳ ᠵᠢᠪᠦᠨ ᠵᠢᠪᠦᠨ ᠥᠩᠭᠡᠷᠡᠵᠦ ᠨᠢᠳᠦ ᠨᠢ ᠪᠦᠷᠬᠦᠨ ᠬᠠᠷᠠᠩᠭᠤᠢᠯᠠᠪᠠ᠃
ᠡᠨᠡ ᠬᠥᠮᠦᠰ ᠦ᠋ᠨ ᠡᠮᠦᠨᠡ ᠶᠠᠮᠠᠷ ᠨᠢᠭᠡᠨ ᠭᠡᠮ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ ᠮᠡᠲᠦ ᠰᠠᠨᠠᠭᠳᠠᠪᠠ᠃ ᠪᠣᠳᠣᠪᠠᠰᠤ ᠂ ᠠᠰᠤᠷᠤ ᠶᠡᠬᠡ ᠪᠤᠷᠤᠭᠤᠲᠠᠨ ᠪᠣᠯᠵᠤ ᠭᠡᠨᠡᠳᠲᠡ ᠭᠠᠰᠠᠯᠤᠨ ᠭᠣᠮᠣᠳᠠᠬᠤ ᠰᠡᠳᠬᠢᠯ ᠲᠥᠷᠥᠪᠡ᠃ ᠭᠡᠪᠡᠴᠦ ᠬᠡᠨ ᠳ᠋ᠦ᠍ ᠶᠠᠭᠤᠨ ᠳ᠋ᠤ᠌ ᠭᠣᠮᠣᠳᠠᠬᠤ ᠪᠢᠯᠡ ? ᠠᠪᠤ ᠡᠵᠢ ᠪᠣᠯᠤᠨ ᠠᠷᠠᠳ ᠣᠯᠠᠨ ᠳ᠋ᠠᠭᠠᠨ ᠭᠣᠮᠣᠳᠠᠬᠤ ᠶ᠋ᠢ ᠪᠤᠤ ᠬᠡᠯᠡ᠂ ᠪᠠᠶᠠᠷᠯᠠᠭᠠᠳ ᠪᠠᠷᠠᠰᠢ ᠦᠭᠡᠢ᠃ ᠤᠯᠤᠰ ᠣᠷᠣᠨ ᠂ ᠲᠥᠷᠥ ᠵᠠᠰᠠᠭ ᠲᠠᠭᠠᠨ ᠭᠣᠮᠣᠳᠠᠬᠤ ᠶᠠᠮᠠᠷ ᠴᠤ᠌ ᠵᠦᠢᠯ ᠦᠭᠡᠢ ᠪᠥᠭᠡᠳ ᠬᠠᠷᠢᠨ ᠴᠤ᠌ ᠭᠠᠷ ᠢ᠋ ᠭᠠᠨᠵᠤᠭᠠᠨ ᠳ᠋ᠤ᠌᠂ ᠬᠥᠯ ᠢ᠋ ᠳᠥᠷᠦᠭᠡᠨ ᠳ᠋ᠦ᠍ ᠬᠦᠷᠭᠡᠵᠦ ᠭᠠᠳᠠᠭᠠᠳᠤ ᠣᠯᠠᠨ ᠤᠯᠤᠰ ᠤ᠋ᠨ ᠬᠣᠲᠠ ᠪᠠᠯᠭᠠᠳ ᠲᠤ᠌ ᠰᠠᠭᠤᠯᠭᠠᠨ ᠡᠷᠳᠡᠮ ᠨᠣᠮ ᠦᠵᠡᠭᠦᠯᠦᠭᠰᠡᠨ ᠶᠡᠬᠡ ᠠᠴᠢ ᠶ᠋ᠢ ᠨᠢ ᠬᠠᠷᠢᠭᠤᠯᠠᠵᠤ ᠪᠠᠷᠠᠰᠢ ᠦᠭᠡᠢ ᠃
ᠭᠡᠲᠡᠯᠡ ᠭᠣᠮᠣᠳᠠᠬᠤ ᠶ᠋ᠢᠨ ᠤᠴᠢᠷ ᠶᠠᠭᠤᠨ ᠳ᠋ᠤ᠌ ᠪᠣᠢ ! ᠥᠪᠡᠷ ᠲᠡᠭᠡᠨ ᠭᠣᠮᠣᠳᠠᠬᠤ ᠭᠡᠵᠦ ᠦᠦ ? ᠡᠰᠡᠪᠡᠯ ᠬᠤᠪᠢ ᠵᠠᠶᠠᠭᠠᠨ ᠳ᠋ᠠᠭᠠᠨ ᠭᠣᠮᠣᠳᠠᠬᠤ ᠭᠡᠭᠴᠢ ᠪᠣᠢ ᠤᠤ?
ᠬᠤᠪᠢ ᠵᠠᠶᠠᠭᠠ ᠨᠠᠴᠤᠭᠳᠣᠷᠵᠢ ᠶ᠋ᠢ ᠭᠣᠮᠣᠳᠠᠭᠠᠬᠤ ᠪᠠᠷ ᠬᠠᠲᠠᠭᠤ ᠰᠢᠷᠦᠭᠦᠨ ᠪᠠᠢᠭᠰᠠᠨ ᠤᠳᠠᠭᠠ ᠪᠠᠢᠬᠤ ᠦᠭᠡᠢ ᠪᠥᠭᠡᠳ ᠶᠡᠷᠦ ᠨᠠᠴᠤᠭᠳᠣᠷᠵᠢ ᠵᠣᠪᠠᠯᠠᠩ ᠭᠡᠭᠴᠢ ᠶ᠋ᠢ ᠦᠵᠡᠭᠡ ᠦᠭᠡᠢ ᠂ ᠦᠵᠡᠬᠦ ᠴᠦ᠍ ᠵᠠᠪ ᠪᠣᠯᠤᠭᠠ ᠦᠭᠡᠢ ᠪᠠᠢᠨᠠᠮ᠃ ᠬᠠᠷᠢᠨ ᠥᠪᠡᠷ ᠲᠡᠭᠡᠨ ᠭᠣᠮᠣᠳᠠᠬᠤ ᠤᠴᠢᠷ ᠪᠠᠢᠵᠤ ᠪᠣᠯᠬᠤ ᠠᠪᠠᠴᠤ᠂ ᠶᠡᠬᠡᠩᠬᠢ ᠬᠥᠮᠦᠨ ᠶᠡᠬᠡ ᠤᠬᠠᠭᠠᠨ ᠲᠠᠢ ᠪᠠᠢᠭᠰᠠᠨ ᠴᠤ᠌ ᠭᠡᠰᠡᠨ ᠂ ᠥᠪᠡᠷ ᠲᠡᠭᠡᠨ ᠭᠣᠮᠣᠳᠠᠬᠤ ᠴᠠᠭ ᠪᠣᠯᠬᠤ ᠳ᠋ᠤ᠌ ᠶᠠᠮᠠᠷ ᠨᠢᠭᠡᠨ ᠬᠥᠨᠳᠡᠯᠡᠨ ᠤ ᠰᠢᠯᠲᠠᠭᠠᠨ ᠢ᠋ ᠵᠠᠪᠠᠯ ᠡᠷᠢᠵᠦ ᠣᠯᠳᠠᠭ ᠨᠢ ᠮᠠᠨ ᠠ᠋ᠴᠠ ᠪᠠᠢᠲᠤᠭᠠᠢ ᠂ ᠠᠪᠤ ᠡᠵᠢ ᠡᠴᠡ ᠤᠷᠢᠳᠤ ᠶ᠋ᠢᠨ ᠭᠡᠮ ᠪᠤᠶᠤ ᠃
ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢ ᠥᠴᠦᠬᠡᠨ ᠥᠮᠥᠭᠯᠡᠬᠦ ᠶ᠋ᠢᠨ ᠲᠤᠯᠠᠳᠠ ᠲᠤᠬᠠᠢ ᠶ᠋ᠢᠨ ᠨᠡᠢᠭᠡᠮ ᠦ᠋ᠨ ᠰᠢᠯᠲᠠᠭᠠᠨ ᠤᠷᠤᠭᠤ ᠶᠠᠭᠤᠨ ᠤ᠋ ᠲᠡᠷᠢᠭᠦᠨ ᠳ᠋ᠦ᠍ ᠬᠠᠨᠳᠤᠳᠠᠭ ᠪᠥᠭᠡᠳ ᠬᠠᠨᠢᠯᠠᠭᠰᠠᠨ ᠬᠠᠨᠢ ᠦᠶᠡᠷᠬᠡᠭᠰᠡᠨ ᠨᠥᠬᠥᠳ ᠤᠷᠤᠭᠤ ᠡᠷᠭᠢᠳᠡᠭ ᠤᠳᠠᠭᠠ ᠣᠯᠠᠨ ᠪᠣᠢ ᠃
ᠨᠥᠬᠥᠳ ᠭᠡᠪᠡᠰᠦ ᠂ ᠨᠠᠴᠤᠭᠳᠣᠷᠵᠢ ᠳ᠋ᠤ᠌ ᠣᠯᠠᠨ ᠰᠠᠢᠬᠠᠨ ᠨᠥᠬᠥᠳ ᠪᠠᠢᠭᠰᠠᠨ ᠪᠢᠯᠡ᠃ ᠲᠡᠳᠡ ᠡᠷᠳᠡᠮ ᠰᠣᠶᠣᠯ ᠤ᠋ᠨ ᠲᠤᠯᠠᠳᠠ ᠨᠢᠭᠡᠨ ᠵᠤᠨ ᠤ᠋ ᠨᠣᠭᠣᠭᠠ ᠮᠡᠲᠦ ᠬᠠᠮᠲᠤ ᠨᠠᠢᠭᠤᠨ ᠴᠡᠴᠡᠭᠯᠡᠵᠦ ᠨᠠᠢᠵᠠᠯᠠᠨ ᠳᠠᠰᠤᠭᠰᠠᠨ ᠪᠥᠭᠡᠳ 《 ᠬᠡᠭᠡᠷᠡ ᠶ᠋ᠢᠨ ᠭᠠᠯᠠᠭᠤ ᠨᠢᠰᠦᠨ ᠦᠯᠦ ᠬᠦᠷᠬᠦ ᠭᠠᠵᠠᠷ ᠠ᠋ᠴᠠ᠂ ᠬᠥᠮᠦᠨ ᠤ ᠬᠦᠦ ᠡᠷᠳᠡᠮ ᠡᠪᠦᠷᠯᠡᠨ ᠢᠷᠡᠭᠰᠡᠨ 》 ᠤᠴᠢᠷ᠂ ᠨᠢᠭᠡᠨ ᠨᠠᠭᠤᠷ ᠲᠤ᠌ ᠴᠤᠭᠯᠠᠭᠰᠠᠨ ᠰᠢᠪᠠᠭᠤᠳ ᠮᠡᠲᠦ ᠨᠢᠭᠡᠨ ᠨᠢᠭᠡᠨ ᠤ ᠳ᠋ᠡᠭᠡᠨ ᠴᠤᠭᠯᠠᠨ ᠴᠡᠩᠭᠡᠳᠡᠭ ᠰᠠᠨ᠃
ᠭᠣᠣᠯᠴᠠᠭᠤ ᠨᠠᠴᠤᠭᠳᠣᠷᠵᠢ ᠶ᠋ᠢᠨ ᠳ᠋ᠦ᠍ ᠴᠤᠭᠯᠠᠷᠠᠵᠤ ᠡᠯᠳᠡᠪ ᠪᠠᠶᠠᠷᠲᠤ ᠦᠢᠯᠡ ᠶᠠᠪᠤᠳᠠᠯ ᠢ᠋ ᠶᠣᠰᠣᠯᠠᠨ ᠲᠡᠮᠳᠡᠭᠯᠡᠬᠦ ᠨᠢ ᠤᠯᠠᠮ ᠤᠯᠠᠮ ᠢ᠋ᠶ᠋ᠠᠷ ᠨᠢᠵᠢᠭᠢᠷ ᠥᠷᠭᠡᠨ ᠪᠣᠯᠤᠭᠰᠠᠭᠠᠷ ᠪᠠᠢᠭᠰᠠᠨ ᠪᠢᠯᠡ᠃ ᠨᠠᠴᠤᠭᠳᠣᠷᠵᠢ ᠶ᠋ᠢᠨ ᠣᠬᠣᠷᠬᠠᠨ ᠴᠡᠩᠭᠡᠯ ᠦ᠋ᠨ ᠠᠯᠳᠠᠩᠬᠠᠨ ᠰᠥᠩᠴᠢ ᠪᠠᠢᠭᠰᠠᠨ ᠨᠢᠨᠡ ᠪᠣᠯ ᠲᠡᠷᠡ ᠮᠡᠲᠦ ᠴᠡᠩᠭᠡᠯ ᠨᠠᠷᠭᠢᠶᠠᠨ ᠳ᠋ᠤ᠌ ᠳᠤᠷᠠᠲᠠᠢ ᠪᠥᠭᠡᠳ ᠠᠮᠲᠠᠲᠤ ᠤᠤᠭᠤᠰᠢ ᠵᠠᠭᠤᠰᠢ᠂ ᠠᠯᠢᠶᠠ ᠨᠠᠷᠭᠢᠶᠠᠨ ᠢ᠋ ᠨᠠᠢᠷᠠᠯ ᠬᠥᠭᠵᠢᠮ ᠤᠳᠤᠷᠢᠳᠬᠤ ᠮᠡᠲᠦ ᠴᠢᠳᠠᠮᠠᠭᠠᠢ ᠤᠳᠤᠷᠢᠳᠤᠨ ᠬᠥᠲᠥᠯᠵᠦ ᠴᠢᠳᠠᠳᠠᠭ ᠠᠪᠢᠶᠠᠰ ᠪᠦᠬᠦᠢ《 ᠡᠯᠪᠡᠭ ᠭᠠᠷ 》ᠲᠠᠢ ᠵᠠᠶᠠᠭᠠᠯᠠᠬᠣ ᠶ᠋ᠢᠨ ᠶᠡᠬᠡ ᠨᠠᠢᠷᠴᠢᠨ ᠪᠠᠢᠯᠠ᠃ ᠲᠡᠷᠡ ᠦᠶᠡ ᠡᠴᠡ ᠨᠠᠢᠵᠠ ᠨᠥᠬᠥᠳ ᠨᠠᠴᠤᠭᠳᠣᠷᠵᠢ ᠶ᠋ᠢᠨ ᠤᠷᠤᠭᠤ ᠂ ᠵᠤᠯᠠ ᠤᠷᠤᠭᠤ ᠲᠡᠮᠡᠦᠯᠬᠦ ᠦᠳᠡᠰᠢ ᠶ᠋ᠢᠨ ᠡᠷᠪᠡᠬᠡᠢ ᠮᠡᠲᠦ ᠲᠠᠲᠠᠭᠳᠠᠨ ᠰᠢᠪᠠᠵᠤ ᠪᠠᠢᠯᠠ᠃ ᠶᠡᠷᠦ ᠳᠡᠯᠡᠬᠡᠢ ᠶ᠋ᠢᠨ ᠲᠡᠩᠭᠡᠯᠢᠭ ᠨᠢ ᠨᠠᠴᠤᠭᠳᠣᠷᠵᠢ ᠶ᠋ᠢᠨ ᠬᠢ ᠪᠥᠭᠡᠳ ᠨᠠᠷᠭᠢᠶᠠᠨᠲᠤ ᠲᠥᠪ ᠨᠢ ᠨᠢᠨᠠ᠂ ᠮᠠᠭᠲᠠᠭᠠᠯ ᠤ᠋ᠨ ᠲᠥᠪ ᠨᠢ ᠨᠠᠴᠤᠭᠳᠣᠷᠵᠢ ᠪᠣᠯᠤᠭᠰᠠᠨ ᠮᠡᠲᠦ ᠪᠠᠢᠪᠠ᠃ ᠨᠠᠴᠤᠭᠳᠣᠷᠵᠢ ᠴᠤ᠌ ᠡᠨᠡ ᠬᠦ᠌ ᠬᠠᠭᠤᠷᠠᠢ ᠭᠠᠵᠠᠷ ᠤ᠋ᠨ ᠳ᠋ᠧᠪᠠᠵᠠᠨ ᠳ᠋ᠤ᠌ ᠬᠥᠯ ᠬᠥᠰᠡᠷ ᠬᠥᠯᠴᠥᠭᠦᠷᠡᠩᠬᠡᠨ ᠵᠢᠷᠭᠠᠵᠤ᠂ ᠪᠦᠬᠦ ᠵᠦᠢᠯ ᠭᠠᠭᠴᠠ ᠬᠦ᠌ ᠰᠠᠨᠠᠭᠠᠨ ᠤ᠋ ᠵᠣᠷᠭᠠ ᠪᠠᠷ ᠥᠪᠡᠷ ᠢ᠋ᠶ᠋ᠡᠨ ᠪᠦᠲᠦᠵᠦ ᠡᠨᠡ ᠣᠷᠴᠢᠯᠠᠩ ᠤ᠋ᠨ ᠪᠦᠬᠦᠢ ᠯᠡ ᠦᠢᠯᠡ ᠶᠠᠪᠤᠳᠠᠯ᠂ ᠤᠷᠠᠯᠢᠭ᠋ – ᠰᠣᠶᠣᠯ ᠤ᠋ᠨ ᠠᠮᠢᠨ ᠰᠤᠳᠠᠰᠤ ᠲᠡᠭᠦᠨ ᠤ ᠭᠠᠷ ᠲᠤ᠌ ᠪᠠᠢᠬᠤ ᠮᠡᠲᠦ ᠰᠠᠨᠠᠭᠳᠠᠨ᠂ ᠡᠷᠭᠢᠨ ᠲᠣᠭᠣᠷᠢᠨ ᠤ᠋ ᠠᠮᠢᠳᠤᠷᠠᠯ ᠢ᠋ ᠵᠡᠭᠦᠳᠦᠨ ᠳᠤᠮᠳᠠ ᠮᠡᠲᠦ ᠪᠦᠷᠦᠭ ᠪᠠᠷᠤᠭ ᠣᠢᠯᠠᠭᠠᠵᠤ ᠪᠠᠢᠪᠠ ᠃
ᠰᠢᠯᠦᠭ ᠵᠣᠬᠢᠶᠠᠯ ᠢ᠋ ᠰᠣᠭᠲᠣᠭᠤᠷᠠᠩᠬᠠᠨ ᠪᠠᠢᠬᠤ ᠳ᠋ᠠᠭᠠᠨ ᠬᠥᠨᠳᠡᠯᠡᠨ ᠭᠤᠯᠳᠤ ᠰᠢᠭᠤᠳ ᠲᠠᠲᠠᠯᠠᠨ ᠪᠢᠴᠢᠬᠦ ᠪᠥᠭᠡᠳ ᠲᠡᠷᠡ ᠳᠣᠣᠷᠠ ᠨᠢ ᠰᠢᠷᠡᠭᠡ ᠲᠣᠭᠣᠷᠢᠭ᠍ᠰᠠᠨ ᠬᠠᠯᠠᠮᠴᠠᠭᠤ ᠨᠥᠬᠥᠳ ᠲᠡᠭᠡᠨ ᠥᠨᠳᠥᠷ ᠳᠠᠭᠤ ᠪᠠᠷ ᠤᠩᠰᠢᠬᠤ ᠳ᠋ᠤ᠌ ᠲᠡᠳᠡ ᠨᠢᠭᠡᠨ ᠳᠠᠭᠤ ᠪᠠᠷ ᠲᠦᠷᠬᠢᠷᠡᠨ ᠮᠠᠭᠲᠠᠵᠤ᠂ ᠣᠶᠤᠨ ᠤᠬᠠᠭᠠᠨ ᠤ᠋ ᠣᠨᠴᠠᠭᠠᠢ ᠠᠪᠢᠶᠠᠰ ᠡᠪᠦᠷᠯᠡᠨ ᠲᠥᠷᠥᠭᠰᠡᠨ ᠰᠤᠤᠲᠤ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠲᠥᠯᠥᠭᠡ ᠬᠤᠨᠳᠠᠭᠠ ᠡᠷᠭᠦᠨᠡ᠃ ᠡᠳᠡᠭᠡᠷ 《 ᠬᠥᠯᠴᠥᠭᠦᠦ ᠰᠢᠯᠦᠭ ᠦ᠋ᠳ》 ᠶᠠᠮᠠᠷ ᠴᠤ᠌ ᠵᠠᠰᠠᠪᠤᠷᠢ ᠦᠭᠡᠢ ᠪᠡᠷ ᠬᠠᠨᠠ ᠶ᠋ᠢᠨ ᠰᠣᠨᠢᠨ᠂ ᠨᠣᠮ ᠬᠡᠪᠯᠡᠯ ᠳ᠋ᠦ᠍ ᠣᠷᠣᠭᠰᠠᠨ ᠨᠢ ᠴᠥᠭᠡᠨ ᠦᠭᠡᠢ ᠪᠥᠭᠡᠳ ᠪᠠᠰᠠ ᠣᠷᠣᠰ ᠬᠡᠯᠡᠨ ᠡᠴᠡ ᠂ ᠶᠡᠬᠡ ᠢᠷᠠᠭᠤ ᠨᠠᠢᠷᠠᠭᠴᠢ ᠫᠦᠱᠺᠢᠨ ᠤ 《 ᠰᠡᠷᠡᠬᠦᠢ 》 ᠬᠡᠮᠡᠬᠦ ᠰᠢᠯᠦᠭ ᠢ᠋ ᠲᠡᠢᠨ ᠰᠣᠭᠲᠣᠭᠤᠷᠠᠵᠤ ᠣᠷᠴᠢᠭᠤᠯᠤᠭᠰᠠᠨ ᠨᠢ ᠂ ᠬᠡᠳᠦᠢᠪᠡᠷ ᠡᠷᠡᠭᠦᠯ ᠰᠠᠷᠠᠭᠤᠯ ᠴᠠᠭ ᠲᠠᠭᠠᠨ ᠭᠠᠢᠬᠠᠮᠰᠢᠭᠲᠠᠢ ᠵᠥᠪ ᠣᠷᠴᠢᠭᠤᠯᠤᠭᠰᠠᠨ 《 ᠠᠨᠴᠢᠷ 》 ᠮᠡᠲᠦ ᠶ᠋ᠢᠨ ᠰᠢᠯᠦᠭ ᠦ᠋ᠨ ᠬᠢᠨᠢ ᠳᠡᠷᠭᠡᠳᠡ ᠂ ᠠᠮᠢᠳᠤ ᠮᠣᠷᠢᠨ ᠤ᠋ ᠳᠡᠷᠭᠡᠳᠡ ᠮᠣᠳᠣᠨ ᠮᠣᠷᠢ ᠮᠡᠲᠦ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ᠂ ᠲᠡᠷᠡ ᠦᠶᠡ ᠶ᠋ᠢᠨ ᠭᠡᠷᠡᠴᠢ ᠪᠣᠯᠵᠤ ᠨᠣᠮ ᠪᠢᠴᠢᠭ ᠲᠦ᠍ ᠬᠡᠪ ᠢ᠋ᠶ᠋ᠡᠷ ᠦᠯᠡᠳᠡᠪᠡ᠃ ᠨᠢᠭᠡ ᠦᠭᠡ ᠪᠡᠷ ᠬᠡᠯᠡᠪᠡᠯ᠂ ᠠᠯᠢᠪᠠ ᠵᠢᠷᠭᠠᠯ ᠴᠡᠩᠭᠡᠯ ᠳ᠋ᠦ᠍ ᠥᠪᠡᠷ ᠦ᠋ᠨ ᠳᠠᠷᠬᠠᠨ ᠬᠡᠮᠵᠢᠶᠡ ᠪᠠᠢᠳᠠᠭ ᠪᠥᠭᠡᠳ ᠲᠡᠷᠡ ᠬᠡᠮᠵᠢᠶᠡ ᠶ᠋ᠢ ᠬᠡᠲᠦᠷᠡᠭᠦᠯᠪᠡᠯ ᠴᠡᠩᠭᠡᠯ ᠵᠢᠷᠭᠠᠯ ᠤ᠋ᠨ ᠠᠯᠲᠠᠨ ᠬᠤᠴᠢᠯᠭᠠᠨ ᠳᠣᠣᠷᠠ ᠬᠠᠷᠠᠭᠤᠰᠤᠯ ᠵᠣᠪᠠᠯᠠᠩ ᠤ᠋ᠨ ᠦᠷᠡ ᠰᠡᠮᠬᠡᠨ ᠪᠣᠯᠪᠠᠰᠤᠷᠠᠵᠤ ᠪᠠᠢᠳᠠᠭ ᠤ᠋ᠨ ᠬᠠᠤᠯᠢ ᠪᠠᠷ ᠬᠥᠭᠡᠷᠦᠬᠦᠢ ᠵᠠᠯᠠᠭᠤ ᠬᠠᠯᠠᠭᠤᠨ᠂ ᠠᠪᠢᠶᠠᠰ ᠪᠢᠯᠢᠭ ᠲᠡᠭᠦᠯᠳᠡᠷ ᠡᠷᠡ ᠶ᠋ᠢᠨ ᠳᠡᠩᠳᠡᠭᠦᠦ ᠴᠡᠩᠭᠡᠯ ᠦ᠋ᠨ ᠪᠤᠳᠠᠩ ᠳᠤᠮᠳᠠ ᠦᠢᠯᠡ ᠶᠠᠪᠤᠳᠠᠯ ᠤ᠋ᠨ ᠭᠠᠵᠢᠭ ᠡᠭᠦᠰᠴᠦ᠂ ᠠᠵᠠ ᠶ᠋ᠢᠨ ᠠᠯᠲᠠᠨ ᠲᠤᠤᠵᠠ ᠣᠩᠬᠤᠯᠢᠳᠠᠬᠣ ᠡᠳᠦᠷ ᠵᠠᠢᠯᠠᠰᠢ ᠦᠭᠡᠢ ᠲᠤᠯᠵᠠᠢ᠃
ᠲᠡᠷᠡ ᠡᠳᠦᠷ ᠢ᠋ ᠬᠥᠨᠳᠡᠯᠡᠨ ᠡᠴᠡ ᠬᠠᠯᠠ ᠦᠵᠡᠵᠦ ᠬᠠᠰᠢᠷ ᠲᠠᠨᠢᠭ᠍ᠰᠠᠨ ᠬᠥᠮᠦᠨ ᠣᠯᠵᠤ ᠬᠠᠷᠠᠬᠤ ᠠ᠋ᠴᠠ ᠪᠤᠰᠤ᠂ ᠥᠪᠡᠷ ᠢ᠋ᠶ᠋ᠡᠨ ᠣᠯᠵᠤ ᠬᠠᠷᠠᠬᠤ ᠨᠢ ᠬᠣᠪᠣᠷ ᠪᠢᠯᠡ᠃ ᠨᠠᠴᠤᠭᠳᠣᠷᠵᠢ ᠲᠡᠷᠡᠴᠢᠯᠡᠨ ᠪᠣᠯᠵᠤ᠂ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠠᠮᠤᠭᠤᠯᠠᠩᠪᠠᠭᠠᠲᠤᠷ ᠬᠡᠮᠡᠬᠦ ᠬᠠᠭᠤᠴᠢᠨ ᠮᠠᠢᠮᠠᠢᠴᠢᠨ ᠬᠣᠲᠠ ᠶ᠋ᠢᠨ ᠰᠢᠷᠣᠢ ᠲᠣᠭᠣᠰᠣᠲᠤ ᠭᠤᠳᠤᠮᠵᠢᠨ ᠳ᠋ᠤ᠌ ᠰᠣᠭᠲᠣᠭᠤ ᠰᠠᠭᠤᠵᠤ ᠪᠠᠢᠪᠠ ᠁
《 ᠶᠠᠭᠤ ᠰᠠᠨ ᠪᠢᠯᠡ ? 》 ᠭᠡᠵᠦ ᠰᠠᠶᠢ ᠰᠡᠷᠡᠵᠦ ᠲᠤᠩᠭᠠᠨ ᠬᠠᠷᠠᠬᠤ ᠦᠶᠡᠰ᠂ ᠠᠯᠢ ᠬᠡᠳᠦᠢᠨ ᠪᠣᠯᠬᠤ ᠪᠣᠯᠬᠤ ᠦᠭᠡᠢ ᠪᠦᠬᠦᠨ ᠪᠣᠯᠤᠭᠠᠳ ᠥᠩᠭᠡᠷᠡᠵᠦ ᠂ ᠠᠵᠠ ᠵᠢᠷᠭᠠᠯ ᠤ᠋ᠨ ᠬᠢᠨᠢ ᠰᠢᠪᠠᠭᠤ ᠲᠡᠭᠷᠢ ᠶ᠋ᠢᠨ ᠬᠠᠶᠠᠭᠠᠨ ᠳ᠋ᠤ᠌ ᠪᠠᠷᠠ ᠲᠠᠰᠤᠷᠠᠵᠤ᠂ ᠠᠮᠠᠷᠠᠭ ᠬᠠᠨᠢ᠂ ᠦᠷᠡ ᠬᠡᠦᠬᠡᠳ᠂ ᠨᠠᠢᠵᠠ ᠨᠥᠬᠥᠳ ᠰᠡᠯᠲᠡ ᠡᠴᠡ ᠵᠥᠪᠬᠡᠨ ᠰᠠᠢᠬᠠᠨ ᠳᠤᠷᠠᠳᠬᠠᠯ ᠰᠠᠭᠠᠷᠠᠯ ᠲᠣᠭᠣᠰᠣ ᠬᠣᠶᠠᠷ ᠯᠠ ᠦᠯᠡᠳᠡᠵᠡᠢ᠃
ᠢᠰᠦ᠋ᠰ ᠨᠠᠸᠢᠨ ᠰᠢᠭ᠋ ᠲᠡᠭᠷᠢ ᠶ᠋ᠢᠨ ᠨᠠᠷᠠ ᠶ᠋ᠢ ᠲᠤᠱᠠᠨ ᠵᠣᠭᠰᠣᠭᠠᠵᠤ᠂ ᠦᠢᠯᠡ ᠶᠠᠪᠤᠳᠠᠯ ᠢ᠋ ᠨᠥᠬᠥᠨ ᠭᠦᠢᠴᠡᠳᠬᠡᠬᠦ ᠷᠢᠳᠢ ᠰᠢᠳᠢ ᠪᠠᠢᠬᠤ ᠦᠭᠡᠢ ᠡᠴᠡ ᠬᠣᠢᠰᠢ ᠠᠯᠳᠠᠭᠰᠠᠨ ᠴᠠᠭ᠂ ᠠᠯᠳᠠᠭᠠ ᠬᠣᠶᠠᠷ ᠢ᠋ ᠪᠤᠴᠠᠭᠠᠵᠤ ᠠᠪᠴᠢᠷᠠᠭᠠᠳ ᠳᠠᠬᠢᠨ ᠰᠢᠨᠡ ᠪᠡᠷ ᠡᠬᠢᠯᠡᠵᠦ ᠪᠣᠯᠬᠤ ᠦᠭᠡᠢ ᠠᠵᠢ᠃
ᠬᠠᠷᠢᠨ ᠠᠯᠳᠠᠭᠰᠠᠨ ᠠᠯᠳᠠᠭᠠ ᠶ᠋ᠢᠨ ᠢ᠋ᠶ᠋ᠠᠨ ᠬᠣᠢᠨᠠ ᠠ᠋ᠴᠠ ᠥᠭᠡᠷᠡ ᠵᠠᠮ ᠢ᠋ᠶ᠋ᠠᠷ ᠨᠡᠬᠡᠯ ᠬᠠᠲᠠᠭᠤ ᠬᠥᠭᠡᠭᠡᠵᠦ ᠭᠦᠢᠴᠡᠭᠡᠳ ᠤᠯᠠᠮ ᠢ᠋ᠶ᠋ᠠᠷ ᠢᠯᠠᠨ ᠳᠡᠢᠯᠦᠨᠡ ᠭᠡᠳᠡᠭ ᠠᠰᠤᠷᠤ ᠶᠡᠬᠡ ᠲᠡᠪᠴᠢᠶᠡᠷᠢ ᠵᠣᠷᠢᠭ ᠰᠢᠯᠭᠠᠭᠰᠠᠨ ᠵᠠᠮ᠂ ᠡᠰᠡᠬᠦᠯᠡ ᠨᠢᠭᠡᠨᠲᠡ ᠥᠩᠭᠡᠷᠡᠵᠡᠢ ᠭᠡᠵᠦ ᠬᠠᠰᠬᠢᠷᠤᠭᠠᠳ ᠭᠠᠰᠠᠯᠤᠩᠬᠠᠨ ᠦᠯᠡᠳᠡᠬᠦ ᠵᠠᠮ ᠡᠨᠡ ᠬᠣᠶᠠᠷ ᠯᠠ ᠪᠠᠢᠪᠠ ᠃ ᠭᠡᠲᠡᠯᠡ ᠨᠠᠴᠤᠭᠳᠣᠷᠵᠢ ᠭᠠᠩ ᠲᠡᠮᠦᠷ ᠢ᠋ᠶ᠋ᠡᠷ ᠵᠦᠢᠷᠯᠡᠪᠡᠯ ᠳᠤᠲᠠᠭᠤ ᠬᠠᠲᠠᠲᠠᠢ ᠲᠣᠶᠢᠬᠠᠨ ᠪᠣᠯᠣᠳ ᠪᠠᠢᠭᠰᠠᠨ ᠲᠤᠯᠠ ᠡᠬᠢᠨ ᠤ ᠭᠠᠭᠴᠠ ᠴᠣᠬᠢᠯᠲᠠ ᠳ᠋ᠤ᠌ ᠢᠷ ᠨᠢ ᠰᠢᠨᠲᠠᠷᠠᠵᠤ ᠬᠣᠶᠠᠳᠤᠭᠠᠷ ᠵᠠᠮ ᠢ᠋ᠶ᠋ᠠᠷ ᠣᠷᠣᠵᠠᠢ ᠃ ᠡᠢᠨ ᠬᠦ᠌ ᠲᠣᠭᠠᠲᠠᠢ ᠴᠡᠩᠭᠡᠯ ᠦ᠋ᠨ ᠳᠠᠭᠤᠨ ᠲᠠᠰᠤᠷᠠᠵᠤ ᠲᠣᠭᠣᠰᠣᠲᠤ ᠵᠠᠮ ᠳᠡᠭᠡᠷᠡ ᠳᠤᠷᠠᠢᠲᠠᠯᠠ ᠬᠣᠴᠣᠷᠴᠠᠢ ᠃
ᠠᠭᠤᠯᠵᠠᠮᠠᠭᠴᠠ ᠳᠠᠭᠤᠨ ᠠᠯᠲᠠᠨ ᠲᠡᠪᠡᠷᠢᠵᠦ ᠪᠠᠢᠳᠠᠭ ᠨᠠᠢᠵᠠ ᠨᠥᠬᠥᠳ᠂ ᠳᠠᠭᠤ ᠱᠣᠣ ᠨᠢ ᠪᠠᠭᠠᠰᠴᠤ ᠭᠠᠷ ᠪᠠᠷᠢᠬᠤ ᠨᠢ ᠴᠥᠭᠡᠷᠡᠵᠦ᠂ ᠠᠭᠠᠵᠢᠮ ᠢ᠋ᠶ᠋ᠠᠷ ᠲᠣᠯᠣᠭᠠᠢ ᠳᠣᠬᠢᠨ ᠥᠩᠭᠡᠷᠡᠬᠦ ᠪᠣᠯᠤᠭᠰᠠᠭᠠᠷ ᠰᠡᠭᠦᠯ ᠳ᠋ᠡᠭᠡᠨ ᠦᠯᠦ ᠲᠠᠨᠢᠬᠤ ᠮᠡᠲᠦ ᠦᠵᠡᠵᠦ ᠬᠠᠷᠠᠭᠠ ᠦᠭᠡᠢ ᠳᠦᠷᠢ ᠦᠵᠡᠭᠦᠯᠦᠨ ᠥᠩᠭᠡᠷᠡᠨᠡ ᠃ 《 ᠥᠴᠦᠬᠡᠨ ᠬᠥᠮᠦᠰ ᠦ᠋ᠨ ᠠᠭᠠᠰᠢ ᠵᠠᠩ ᠥᠭᠡᠷᠡᠴᠢᠯᠡᠭᠳᠡᠬᠦ ᠳ᠋ᠦ᠍ ᠥᠴᠦᠬᠡᠨ ᠬᠤᠭᠤᠴᠠᠭᠠ ᠬᠡᠷᠡᠭᠲᠡᠢ 》ᠠᠵᠢ᠃
ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠨᠠᠴᠤᠭᠳᠣᠷᠵᠢ ᠭᠡᠷ ᠦ᠋ᠨ ᠭᠠᠳᠠᠭᠠ ᠬᠠᠰᠢᠶᠠᠨ ᠳᠤᠮᠳᠠ ᠂ ᠡᠮᠦᠨᠡ ᠵᠦᠭ ᠥᠰᠦᠭᠰᠡᠨ ᠲᠥᠷᠥᠭᠰᠡᠨ ᠪᠣᠷᠵᠢᠭᠢᠨ ᠤ᠋ ᠨᠤᠲᠤᠭ ᠤ᠋ᠨ ᠴᠢᠭ ᠲᠦ᠍ ᠬᠠᠷᠠᠨ ᠵᠣᠭᠰᠣᠵᠤ᠂ ᠴᠢᠪ ᠴᠢᠮᠡᠭᠡ ᠦᠭᠡᠢ ᠤᠬᠢᠯᠠᠭᠰᠠᠭᠠᠷ ᠪᠠᠢᠭᠠ ᠪᠠᠨ ᠰᠠᠶᠢ ᠮᠡᠳᠡᠪᠡ ᠃
– ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠨᠢ ᠡᠨᠡ ᠪᠣᠢ ? ᠣᠢᠷᠠᠬᠠᠨ ᠢ᠋ᠶ᠋ᠠᠷ ᠥᠩᠭᠡᠷᠡᠭᠰᠡᠨ ᠬᠥᠮᠦᠰ ᠣᠩᠭᠣᠢᠲᠠᠯᠠ ᠪᠠᠨ ᠬᠠᠷᠠᠵᠤ ᠪᠡᠶᠡ ᠪᠡᠶᠡ ᠪᠡᠨ ᠴᠢᠮᠡᠭᠡ ᠦᠭᠡᠢ ᠨᠢᠳᠤᠷᠤᠨᠠ ᠃
– ᠶᠠᠭᠠᠬᠢᠵᠤ ᠪᠠᠢᠭᠠ ᠨᠢ ᠡᠨᠡ ᠪᠣᠢ ? ᠥᠪᠡᠷ ᠢ᠋ᠶ᠋ᠡᠨ ᠣᠢᠴᠢᠭᠰᠠᠨ ᠬᠡᠦᠬᠡᠳ ᠤᠬᠢᠯᠠᠳᠠᠭ ᠦᠭᠡᠢ ᠭᠡᠵᠦ ᠡᠷᠲᠡᠨ ᠤ ᠮᠣᠩᠭᠣᠯ ᠦᠭᠡ ᠪᠠᠢᠳᠠᠭ ᠪᠤᠰᠤ ᠤᠤ !
ᠨᠠᠴᠤᠭᠳᠣᠷᠵᠢ ᠭᠠᠵᠠᠷ ᠲᠤ᠌ ᠰᠢᠷᠦᠭᠦᠨ ᠨᠤᠯᠮᠤᠭᠠᠳ ᠭᠡᠷ ᠲᠦ᠍ ᠭᠦᠶᠦᠨ ᠣᠷᠣᠵᠤ ᠮᠥᠩᠭᠥᠨ ᠠᠶᠠᠭᠠᠨ ᠳ᠋ᠤ᠌ ᠠᠷᠢᠬᠢ ᠮᠡᠯᠮᠡᠯᠵᠡᠲᠡᠯᠡ ᠬᠢᠭᠡᠳ ᠳᠤᠮᠳᠠ ᠨᠢ ᠣᠷᠣᠲᠠᠯᠠ ᠵᠠᠯᠭᠢᠯᠠᠪᠠ ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠥᠪᠡᠷ ᠦ᠋ᠨ ᠪᠤᠷᠤᠭᠤ ᠶ᠋ᠢ ᠬᠡᠯᠡᠵᠦ᠂ ᠡᠬᠡ ᠣᠷᠣᠨ ᠠ᠋ᠴᠠ ᠪᠠᠨ ᠠᠭᠤᠴᠢᠯᠠᠯ ᠭᠤᠶᠤᠭᠰᠠᠨ ᠰᠢᠯᠦᠭ ᠡᠬᠢᠯᠡᠭᠦᠯᠦᠨ ᠥᠭᠦᠯᠡᠵᠦ ᠂ ᠤᠯᠠᠮ ᠢ᠋ᠶ᠋ᠠᠷ ᠬᠡᠯᠡ ᠨᠢ ᠣᠷᠢᠶᠠᠯᠳᠤᠨ ᠳᠠᠭᠤ ᠨᠢ ᠲᠠᠰᠤᠯᠳᠠᠭᠰᠠᠭᠠᠷ᠂ ᠰᠠᠭᠤᠭᠠ ᠪᠠᠷ ᠢ᠋ᠶ᠋ᠠᠨ ᠤᠨᠲᠠᠵᠤ ᠬᠣᠴᠣᠷᠪᠠ ᠃
ᠬᠠᠷᠠᠩᠭᠤᠢ ᠶ᠋ᠢᠨ ᠳᠤᠮᠳᠠ ᠨᠠᠴᠤᠭᠳᠣᠷᠵᠢ ᠭᠡᠨᠡᠳᠲᠡ ᠰᠡᠷᠡᠪᠡᠯ ᠱᠠᠯᠠ ᠳᠡᠭᠡᠷᠡ ᠶᠡᠬᠡ ᠯᠡ ᠡᠪ ᠦᠭᠡᠢ ᠬᠡᠪᠲᠡᠬᠦ ᠲᠤᠯᠠ ᠶᠡᠬᠡ ᠵᠢᠪᠡᠭᠦᠴᠡᠨ ᠠᠶᠤᠵᠤ ᠬᠠᠮᠤᠭ ᠪᠡᠶᠡ ᠨᠢ ᠠᠷᠵᠠᠰᠬᠢᠪᠡ ᠃ ᠵᠤᠤᠬᠠᠨ ᠤ᠋ ᠳᠡᠷᠭᠡᠳᠡ ᠪᠦᠲᠦᠨ ᠴᠠᠭᠠᠨ ᠬᠤᠪᠴᠠᠰᠤ ᠲᠠᠢ ᠥᠨᠳᠥᠷ ᠭᠤᠸᠠᠯᠢᠭ᠋ ᠬᠡᠦᠬᠡᠨ ᠵᠣᠭᠰᠣᠭᠠᠳ ᠨᠠᠴᠤᠭᠳᠣᠷᠵᠢ ᠤᠷᠤᠭᠤ ᠬᠠᠷᠠᠭᠠᠳ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠪᠠ ᠃
– ᠡᠨᠡ ᠶᠠᠭᠤ ᠪᠣᠢ ? ᠬᠡᠢ ᠦᠵᠡᠭᠳᠡᠯ ᠦᠦ ? ᠡᠳ᠋ᠭ᠋ᠠᠷ ᠫᠣ ᠶ᠋ᠢᠨ ᠵᠣᠬᠢᠶᠠᠯ ᠤ᠋ᠳ ᠢ᠋ ᠭᠧᠷᠮᠠᠨ ᠬᠡᠯᠡ ᠪᠡᠷ ᠤᠩᠰᠢᠵᠤ ᠪᠠᠢᠬᠤ ᠳ᠋ᠤ᠌ ᠬᠡᠢ ᠦᠵᠡᠭᠳᠡᠯ᠂ ᠠᠳᠠᠯ ᠶᠠᠪᠤᠳᠠᠯ ᠭᠠᠷᠴᠤ ᠪᠠᠢᠭᠰᠠᠨ ᠨᠢ ᠰᠠᠨᠠᠭᠳᠠᠪᠠ᠃ ᠨᠢᠳᠦ ᠪᠡᠨ ᠴᠠᠪᠴᠢᠯᠠᠨ ᠰᠢᠷᠳᠡᠪᠡᠯ ᠲᠡᠷᠡ ᠪᠦᠰᠡᠭᠦᠢ ᠠᠯᠠᠭᠠ ᠪᠣᠯᠤᠭᠰᠠᠨ ᠦᠭᠡᠢ ᠂ ᠬᠠᠷᠢᠨ ᠤᠯᠠᠮ ᠴᠤ᠌ ᠲᠣᠳᠣᠷᠠᠨ ᠬᠠᠮᠠᠷ ᠤ᠋ᠨ ᠬᠣᠶᠠᠷ ᠤᠬᠤᠷᠬᠠᠢ ᠶ᠋ᠢᠨ ᠳᠣᠣᠷᠠ ᠠ᠋ᠴᠠ ᠵᠠᠨᠤᠯᠲᠠᠢ ᠮᠡᠲᠦ ᠬᠠᠷᠠᠴᠠ ᠪᠠᠷ ᠡᠭᠴᠡᠯᠡᠨ ᠰᠢᠷᠲᠡᠬᠦ ᠨᠢ ᠲᠡᠷᠡ ᠵᠣᠪᠬᠢ ᠠ᠋ᠴᠠ ᠳᠣᠷᠣᠭ᠍ᠰᠢ ᠤᠨᠠᠵᠤ ᠪᠠᠢᠭᠠ ᠭᠡᠷᠡᠯᠲᠦ ᠨᠢᠯᠪᠤᠰᠤ᠂ ᠵᠤᠤᠬᠠᠨ ᠤ᠋ ᠠᠮᠠᠨ ᠤ᠋ ᠲᠡᠮᠦᠷ ᠳᠡᠭᠡᠷᠡ ᠱᠠᠷ ᠭᠡᠵᠦ ᠱᠠᠵᠢᠭᠢᠨᠠᠨ᠂ ᠬᠡᠩᠰᠢᠭᠦᠦ ᠦᠨᠦᠷᠲᠦᠬᠦ ᠨᠢ ᠬᠦᠷᠲᠡᠯᠡ ᠲᠣᠳᠣ ᠮᠡᠳᠡᠭᠳᠡᠵᠦ ᠪᠠᠢᠪᠠ᠃
ᠨᠠᠴᠤᠭᠳᠣᠷᠵᠢ ᠬᠥᠳᠡᠯᠬᠦ ᠡᠴᠡ ᠡᠮᠢᠶᠡᠵᠦ ᠴᠢᠮᠡᠭᠡ ᠦᠭᠡᠢ ᠬᠡᠪᠲᠡᠨ ᠠᠮᠢᠰᠬᠤᠯ ᠢ᠋ᠶ᠋ᠠᠨ ᠳᠠᠷᠤᠨ ᠰᠢᠷᠲᠡᠵᠦ ᠪᠠᠢᠪᠠ ᠃
ᠬᠡᠦᠬᠡᠨ ᠭᠠᠷ ᠢ᠋ᠶ᠋ᠠᠨ ᠨᠠᠴᠤᠭᠳᠣᠷᠵᠢ ᠶ᠋ᠢᠨ ᠵᠦᠭ ᠰᠤᠩᠭᠠᠬᠤ ᠳ᠋ᠤ᠌᠂ ᠤᠷᠲᠤ ᠤᠷᠲᠤ ᠵᠢᠪᠡᠬᠡᠢ ᠬᠤᠷᠤᠭᠤ ᠨᠢ ᠴᠢᠪ ᠴᠢᠮᠡᠭᠡ ᠦᠭᠡᠢ ᠴᠡᠴᠡᠭᠡᠨᠡᠨ ᠪᠠᠢᠬᠤ ᠠᠭᠠᠳ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠨᠠᠴᠤᠭᠳᠣᠷᠵᠢ ᠳ᠋ᠤ᠌ ᠬᠡᠳᠦᠨ ᠳᠣᠬᠢᠶᠠ ᠵᠠᠩᠭᠠᠭᠠ ᠪᠠᠷ ᠶᠠᠭᠤᠮᠠ ᠬᠡᠯᠡᠭᠡᠳ ᠮᠤᠰᠢᠯᠵᠠᠨ ᠢᠨᠢᠶᠡᠮᠰᠦᠭᠯᠡᠪᠡ ᠃ ᠨᠠᠴᠤᠭᠳᠣᠷᠵᠢ ᠶ᠋ᠢᠨ ᠵᠢᠷᠦᠬᠡ ᠨᠢ ᠰᠦᠷᠡᠬᠡᠢ ᠲᠦᠭᠰᠢᠵᠦ ᠂ ᠣᠢ ᠤᠬᠠᠭᠠᠨ ᠳᠣᠲᠣᠷᠠ ᠪᠠᠨ 《 ᠡᠨᠡ ᠂ ᠬᠡᠢ ᠦᠵᠡᠭᠳᠡᠯ! ᠡᠨᠡ ᠬᠤᠳᠠᠯ ! 》 ᠭᠡᠵᠦ ᠳᠠᠪᠲᠠᠬᠤ ᠪᠥᠭᠡᠳ ᠨᠢᠳᠦ ᠲᠣᠮᠣᠷᠠᠨ ᠰᠢᠷᠳᠡᠭᠰᠡᠭᠡᠷ ᠬᠡᠪᠲᠡᠨᠡ᠃ ᠬᠡᠦᠬᠡᠨ ᠭᠠᠰᠢᠭᠤᠨ ᠢ᠋ᠶ᠋ᠠᠷ ᠥᠮᠥᠯᠵᠡᠨ ᠬᠣᠷᠮᠣᠢ ᠳᠣᠣᠷᠠ ᠠ᠋ᠴᠠ ᠪᠠᠨ ᠪᠢᠴᠢᠬᠠᠨ ᠨᠢᠴᠦᠭᠦᠨ ᠬᠡᠦᠬᠡᠳ ᠭᠠᠷᠭᠠᠵᠤ ᠨᠠᠴᠤᠭᠳᠣᠷᠵᠢ ᠤᠷᠤᠭᠤ ᠠᠶᠠᠷᠬᠠᠨ ᠲᠦᠯᠬᠢᠬᠦ ᠳ᠋ᠦ᠍ ᠲᠡᠷᠡ ᠪᠢᠴᠢᠬᠠᠨ ᠵᠢᠭᠠᠯ ᠡᠨᠳᠡ ᠲᠡᠨᠳᠡ ᠭᠢᠰᠬᠢᠭᠰᠡᠭᠡᠷ᠂ ᠨᠠᠴᠤᠭᠳᠣᠷᠵᠢ ᠤᠷᠤᠭᠤ ᠳᠥᠭᠥᠨ ᠢᠷᠡᠪᠡ᠃ ᠪᠢᠴᠢᠬᠠᠨ ᠬᠥᠯ ᠦ᠋ᠨ ᠬᠢᠨᠢ ᠳᠣᠣᠷᠠ ᠂ ᠱᠠᠯᠠᠨ ᠤ᠋ ᠬᠠᠭᠰᠠᠭᠰᠠᠨ ᠪᠠᠩᠵᠠ ᠠᠶᠠᠷᠬᠠᠨ ᠬᠢᠬᠤᠲᠤᠨᠠᠬᠤ ᠰᠢᠭ᠋ ᠪᠣᠯᠬᠤ ᠪᠥᠭᠡᠳ ᠪᠦᠷ ᠳᠥᠭᠥᠨ ᠢᠷᠡᠬᠦ ᠳ᠋ᠦ᠍ᠨᠢ ᠵᠢᠭᠠᠯ ᠤ᠋ᠨ ᠬᠥᠭᠰᠢᠨ ᠨᠢᠭᠤᠷ ᠴᠢᠷᠠᠢ ᠪᠠᠢᠬᠤ ᠳ᠋ᠤ᠌ ᠴᠣᠴᠢᠷᠳᠠᠨ ᠠᠶᠤᠬᠤ ᠶ᠋ᠢᠨ ᠲᠤᠢᠯ ᠳ᠋ᠤ᠌ ᠬᠦᠷᠦᠭᠰᠡᠨ ᠨᠠᠴᠤᠭᠳᠣᠷᠵᠢ ᠳᠠᠷᠤᠢ ᠥᠨᠳᠡᠢᠵᠦ ᠭᠡᠳᠡᠷᠭᠦ ᠪᠡᠨ ᠴᠠᠬᠢᠯᠤᠨ ᠴᠢᠷᠠᠯᠠᠪᠠ ᠃
ᠲᠡᠷᠡ ᠵᠢᠭᠠᠯ – ᠡᠪᠦᠭᠡᠨ᠂ ᠨᠢᠭᠤᠷ ᠤ᠋ᠨ ᠳᠤᠮᠳᠠᠭᠤᠷ ᠨᠢ ᠭᠠᠯ ᠪᠤᠲᠠᠷᠠᠲᠠᠯᠠ ᠴᠣᠬᠢᠭᠠᠳ ᠠᠪᠬᠤ ᠰᠢᠭ᠋ ᠪᠣᠯᠵᠤ᠂ ᠪᠦᠬᠦ ᠬᠡᠢ ᠦᠵᠡᠭᠳᠡᠯ ᠠᠷᠢᠯᠤᠨ ᠨᠠᠴᠤᠭᠳᠣᠷᠵᠢ ᠴᠤ᠌ ᠪᠦᠷᠢᠨ ᠰᠡᠷᠭᠦᠵᠦ ᠥᠨᠳᠡᠢᠪᠡ᠃ ᠬᠠᠮᠤᠭ ᠬᠥᠯᠥᠰᠥ ᠨᠢ ᠠᠰᠬᠠᠷᠠᠭᠰᠠᠨ ᠪᠠᠢᠬᠤ ᠪᠥᠭᠡᠳ ᠰᠡᠳᠬᠢᠯ ᠮᠠᠰᠢ ᠡᠪ ᠦᠭᠡᠢ᠂ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠪᠦᠬᠦ ᠮᠡᠳᠡᠯᠭᠡ ᠤᠬᠠᠮᠰᠠᠷ ᠨᠢ ᠣᠷᠣ ᠦᠭᠡᠢ ᠠᠷᠢᠯᠤᠭᠠᠳ ᠵᠥᠪᠬᠡᠨ ᠠᠶᠤᠮᠰᠢᠭ᠋᠂ ᠰᠢᠲᠦᠯᠭᠡ ᠬᠣᠶᠠᠷ ᠯᠠ ᠣᠢ ᠤᠬᠠᠭᠠᠨ ᠢ᠋ ᠨᠢ ᠡᠵᠡᠯᠡᠭᠰᠡᠨ ᠪᠠᠢᠪᠠ᠃ ᠭᠡᠷᠡᠯ ᠭᠠᠷᠬᠤ ᠠ᠋ᠴᠠ ᠴᠤ᠌ ᠠᠶᠤᠵᠤ᠂ ᠸᠠᠭᠠᠷ ᠲᠠᠢ ᠠᠷᠢᠬᠢ ᠶ᠋ᠢ ᠰᠢᠭᠦᠷᠡᠨ ᠠᠪᠴᠤ ᠭᠦᠶᠦᠨ ᠭᠠᠷᠪᠠ ᠃ ᠴᠢᠭᠢᠭ ᠬᠠᠩᠬᠤᠯᠤᠭᠰᠠᠨ ᠰᠠᠷᠠ ᠦᠭᠡᠢ ᠬᠠᠷᠠᠩᠭᠤᠢ ᠰᠠᠯᠬᠢ ᠦᠭᠡᠢ ᠳᠦᠩᠰᠦᠭᠡᠷ ᠰᠥᠨᠢ ᠪᠠᠢᠪᠠ᠃ ᠬᠣᠲᠠ ᠶ᠋ᠢᠨ ᠴᠢᠳᠧᠩ ᠭᠡᠷᠡᠯ ᠪᠠᠭᠠ᠂ ᠬᠣᠯᠠ ᠣᠢᠷᠠ ᠳ᠋ᠤ᠌ ᠨᠣᠬᠠᠢ ᠬᠤᠴᠠᠨ ᠬᠠᠶᠠ ᠮᠣᠷᠢᠲᠠᠢ ᠬᠥᠮᠦᠨ ᠱᠣᠭᠰᠢᠭᠤᠯᠤᠨ ᠥᠩᠭᠡᠷᠡᠬᠦ ᠪᠥᠭᠡᠳ ᠠᠯᠤᠰ ᠲᠤ᠌ ᠮᠠᠰᠢᠨ ᠳᠦᠩᠭᠢᠨᠡᠨ᠂ ᠪᠠᠰᠠ ᠮᠣᠷᠢᠨ ᠲᠡᠷᠭᠡᠨ ᠤ ᠰᠢᠯᠪᠢᠭᠦᠷ ᠦ᠋ᠨ ᠳᠠᠭᠤ ᠳᠡᠰ ᠬᠢᠵᠦ᠂ ᠬᠡᠨ ᠬᠥᠮᠦᠨ ᠤ ᠬᠠᠰᠬᠢᠷᠬᠤ᠂ ᠢᠨᠢᠶᠡᠯᠳᠦᠬᠦ᠂ ᠳᠠᠭᠤᠤ ᠠᠶᠠᠯᠬᠤ ᠵᠡᠷᠭᠡ ᠪᠦᠳᠡᠭᠢ ᠪᠠᠳᠠᠭ ᠠᠪᠢᠶᠠ ᠴᠢᠮᠡᠭᠡ ᠰᠣᠨᠣᠰᠳᠠᠨᠠ᠃
ᠨᠠᠴᠤᠭᠳᠣᠷᠵᠢ ᠭᠡᠷ ᠡᠴᠡ ᠠᠶᠤᠭᠰᠠᠨ ᠮᠡᠲᠦ ᠶᠠᠭᠠᠷᠠᠨ ᠬᠣᠯᠠᠳᠴᠤ᠂ ᠬᠠᠰᠢᠶᠠᠨ ᠤ᠋ ᠡᠭᠦᠳᠡᠨ ᠤ ᠰᠠᠨᠳᠠᠯᠢ ᠳᠡᠭᠡᠷᠡ ᠰᠠᠭᠤᠭᠠᠳ ᠠᠷᠢᠬᠢ ᠪᠠᠨ ᠬᠡᠳᠦ ᠳᠠᠷᠠᠭᠠᠯᠠᠨ ᠣᠢᠷᠠ ᠣᠢᠷᠠᠬᠠᠨ ᠵᠠᠯᠭᠢᠪᠠ᠃ ᠪᠡᠶᠡ ᠰᠡᠳᠬᠢᠯ ᠦ᠋ᠨ ᠡᠪ ᠦᠭᠡᠢ ᠴᠤᠴᠠᠷᠠᠯ ᠨᠠᠮᠳᠠᠵᠤ᠂ ᠴᠢᠬᠢ ᠳᠦᠯᠡᠢᠷᠡᠨ ᠱᠤᠤᠭᠢᠵᠤ ᠨᠢᠳᠦᠨ ᠳ᠋ᠦ᠍ᠨᠢ ᠬᠠᠷᠠᠩᠭᠤᠢ ᠶ᠋ᠢᠨ ᠳᠤᠮᠳᠠ ᠦᠢ ᠣᠯᠠᠨ ᠴᠠᠭᠠᠨ ᠤᠴᠢᠰ ᠪᠤᠵᠢᠭᠢᠨᠠᠨ ᠭᠢᠯᠠᠯᠵᠠᠵᠤ ᠦᠵᠡᠭᠳᠡᠬᠦ ᠪᠥᠭᠡᠳ ᠣᠭᠲᠣ ᠬᠥᠳᠡᠯᠦᠯ ᠦᠭᠡᠢ ᠰᠥᠨᠢᠵᠢᠨ ᠡᠳᠦᠷᠵᠢᠨ ᠰᠠᠭᠤᠭᠠᠳ ᠯᠠ ᠪᠠᠢᠮᠠᠷ ᠰᠠᠨᠠᠭᠳᠠᠨᠠ᠃
ᠨᠥᠭᠥᠭᠡᠬᠢ ᠭᠡᠮ ᠪᠤᠷᠤᠭᠤ᠂ ᠣᠰᠣᠯ ᠴᠠᠯᠠᠭᠠᠢ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠪᠤᠷᠤᠭᠤᠰᠢᠶᠠᠨ ᠡᠬᠡ ᠣᠷᠣᠨ ᠠ᠋ᠴᠠ ᠪᠠᠨ ᠠᠭᠤᠴᠢᠯᠠᠯ ᠡᠷᠢᠭᠰᠡᠨ ᠰᠢᠯᠦᠭ ᠳᠠᠬᠢᠨ ᠰᠠᠨᠠᠭᠠᠨ ᠳ᠋ᠤᠨᠢ ᠣᠷᠣᠪᠠ᠃
ᠬᠠᠷᠠᠩᠭᠤᠢ ᠵᠠᠰᠠᠭ ᠢ᠋ ᠲᠦᠯᠬᠢᠨ ᠤᠨᠠᠭᠠᠵᠤ
ᠬᠠᠷᠠ ᠰᠢᠷᠠ ᠹᠧᠣᠳᠠᠯ ᠢ᠋ ᠲᠦᠪᠰᠢᠳᠬᠡᠨ ᠳᠠᠷᠤᠵᠤ
ᠠᠷᠠᠳ ᠤ᠋ᠨ ᠡᠷᠬᠡᠲᠦ ᠰᠢᠨᠡ ᠶᠣᠰᠣ ᠶ᠋ᠢ ᠲᠣᠭᠲᠠᠭᠠᠭᠰᠠᠨ
ᠠᠷᠢᠭᠤᠨ ᠦᠶᠡ ᠶ᠋ᠢᠨ ᠰᠢᠳᠤᠷᠭᠤ ᠰᠡᠬᠡᠭᠡᠲᠡᠨ ᠪᠢ ᠭᠡᠵᠦ ᠠᠮᠠᠨ ᠳ᠋ᠠᠭᠠᠨ ᠡᠪᠯᠡᠭᠦᠯᠵᠦ ᠶᠠᠳᠠᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠳᠠᠷᠠᠭᠠᠬᠢ ᠪᠠᠳᠠᠭ ᠢ᠋ ᠶᠠᠭᠤ ᠪᠠᠷ ᠬᠣᠯᠪᠣᠬᠤ ᠪᠣᠢ ᠭᠡᠳᠡᠭ ᠢ᠋ ᠪᠣᠳᠣᠨ᠂ ᠭᠠᠷ ᠬᠤᠷᠤᠭᠤ ᠪᠠᠨ ᠬᠥᠳᠡᠯᠭᠡᠨ ᠰᠠᠭᠤᠪᠠ᠃
ᠲᠡᠭᠡᠭᠰᠡᠭᠡᠷ ᠶᠡᠬᠡ ᠯᠡ ᠤᠷᠲᠤ ᠰᠠᠢᠬᠠᠨ ᠰᠢᠯᠦᠭ ᠰᠡᠳᠬᠢᠯ ᠳ᠋ᠦ᠍ᠨᠢ ᠵᠢᠭᠳᠡᠷᠡᠬᠦ ᠰᠢᠭ ᠰᠠᠨᠠᠭᠳᠠᠭᠰᠠᠨ ᠲᠤᠯᠠ ᠬᠡᠨ ᠨᠢᠭᠡᠨ ᠳ᠋ᠦ᠍ ᠤᠩᠰᠢᠵᠤ ᠥᠭᠰᠦᠭᠡᠢ ᠭᠡᠰᠡᠨ ᠣᠷᠭᠢᠯᠤᠮᠠ ᠪᠣᠳᠣᠯ ᠲᠠᠷᠢᠬᠢᠨ ᠳ᠋ᠤᠨᠢ ᠭᠡᠨᠡᠳᠲᠡ ᠵᠢᠷᠦᠰ ᠬᠢᠪᠡ ᠃ 《 ᠨᠠᠴᠤᠭᠳᠣᠷᠵᠢ ᠰᠥᠨᠥᠭᠡ ᠦᠭᠡᠢ ᠪᠠᠢᠨᠠ ! 》 ᠭᠡᠵᠦ ᠬᠠᠰᠬᠢᠷᠤᠮᠠᠷ ᠰᠠᠨᠠᠭᠳᠠᠨ ᠥᠪᠡᠷ ᠲᠡᠭᠡᠨ ᠪᠠᠬᠠᠷᠬᠠᠬᠤ ᠠᠭᠠᠷᠬᠠᠯ ᠴᠡᠭᠡᠵᠢ ᠳᠦᠭᠦᠷᠴᠦ ᠢᠷᠡᠭᠡᠳ ᠳᠠᠷᠤᠢ ᠠᠷᠢᠬᠢ ᠶ᠋ᠢ ᠡᠩᠭᠡᠷ ᠤᠷᠤᠭᠤ ᠪᠠᠨ ᠠᠰᠬᠠᠨ ᠠᠰᠬᠠᠨ ᠵᠠᠯᠭᠢᠯᠠᠪᠠ᠃ ᠬᠣᠭᠣᠯᠠᠢ ᠬᠣᠷᠣᠰᠤᠨ ᠭᠡᠳᠡᠰᠦ ᠳᠣᠲᠣᠷᠠ ᠬᠠᠯᠠᠭᠤᠨ ᠣᠷᠬᠢᠨ᠂ ᠤᠯᠠᠮ ᠢ᠋ᠶ᠋ᠠᠷ ᠬᠠᠮᠤᠭ ᠪᠡᠶᠡ ᠪᠠᠳᠠᠢᠷᠠᠨ ᠬᠠᠮᠠᠷ ᠱᠤᠤᠬᠢᠨᠠᠨ ᠰᠢᠯᠦᠰᠦ ᠠᠰᠬᠠᠷᠠᠵᠤ᠂ ᠤᠴᠢᠷ ᠦᠭᠡᠢ ᠰᠣᠭᠲᠣᠪᠠ᠃ ᠣᠢᠷᠠᠬᠠᠨ ᠬᠣᠶᠠᠷ ᠬᠥᠮᠦᠨ ᠶᠠᠪᠤᠬᠤ ᠶ᠋ᠢ ᠦᠵᠡᠵᠦ ᠲᠡᠳᠡᠨ ᠢ᠋ ᠳᠠᠭᠤᠳᠠᠪᠠᠯ ᠄
– ᠶᠠᠭᠤ ᠪᠣᠢ ᠂ ᠶᠠᠭᠠᠬᠢᠨᠠ ? ᠭᠡᠭᠰᠡᠭᠡᠷ ᠢᠳᠡᠷᠬᠡᠨ ᠡᠷᠡ ᠡᠮᠡ ᠬᠣᠶᠠᠷ ᠣᠢᠷᠠᠲᠤᠨ ᠢᠷᠡᠪᠡ ᠃
– ᠪᠢ ᠲᠠ ᠨᠠᠷ ᠲᠤ᠌ ᠤᠴᠢᠷ ᠢ᠋ ᠬᠡᠯᠡᠨᠡ ᠭᠡᠵᠦ ᠨᠠᠴᠤᠭᠳᠣᠷᠵᠢ ᠠᠷᠠᠢ ᠭᠡᠵᠦ ᠬᠡᠯᠡ ᠪᠡᠨ ᠡᠪᠯᠡᠭᠦᠯᠦᠨ ᠥᠭᠦᠯᠡᠪᠡᠰᠦ᠂ ᠲᠡᠷᠡ ᠬᠣᠶᠠᠷ ᠬᠥᠮᠦᠨ ᠰᠣᠭᠲᠣᠭᠤ ᠬᠥᠮᠦᠨ ᠢ᠋ ᠰᠠᠶᠢ ᠠᠩᠵᠠᠭᠠᠷᠠᠨ ᠠᠶᠤᠬᠤ ᠴᠣᠴᠢᠷᠳᠠᠬᠤ ᠵᠦᠢᠯ ᠦᠭᠡᠢ ᠬᠠᠷᠢᠨ ᠴᠤ᠌ ᠲᠣᠬᠣᠭᠤᠷᠬᠠᠬᠤ ᠠᠶᠠᠰ ᠣᠷᠣᠵᠤ ᠄
– ᠵᠠ᠂ ᠶᠠᠭᠤᠨ ᠤ᠋ ᠤᠴᠢᠷ ᠢ᠋ ᠬᠡᠯᠡᠬᠦ ᠬᠡ ᠪᠣᠢ ? ᠭᠡᠪᠡ ᠃
– ᠥᠪᠡᠷ ᠦ᠋ᠨ ᠪᠣᠯᠤᠭᠠᠳ ᠶᠢᠷᠲᠢᠨᠴᠦ ᠶ᠋ᠢᠨ ᠤᠴᠢᠷ ᠢ᠋ ᠲᠠᠨᠢᠭᠤᠯᠤᠶᠠ ᠃ ᠪᠢ ᠬᠡᠨ ᠪᠣᠢ ? ᠭᠡᠪᠡᠰᠦ ᠬᠡᠦᠬᠡᠨ ᠨᠢ ᠄
– ᠬᠠᠷᠢᠨ ᠲᠠ ᠬᠡᠨ ᠪᠣᠢ ? ᠬᠢ ᠬᠢ ! ᠭᠡᠨᠡ ᠃
– ᠪᠢ ᠪᠣᠯ ᠨᠠᠴᠤᠭᠳᠣᠷᠵᠢ ! ᠭᠡᠬᠦ ᠳ᠋ᠦ᠍ᠨᠢ ᠡᠷᠡᠭᠲᠡᠢ ᠬᠥᠮᠦᠨ ᠄
– ᠪᠠᠰᠠ ᠂ ᠦᠭᠡᠢ ᠶᠡᠷᠦ ! ᠭᠡᠳ ᠡᠮᠡᠭᠲᠡᠢ ᠪᠡᠨ ᠰᠤᠭᠤᠳᠠᠨ ᠠᠪᠴᠤ ᠴᠠᠭᠠᠱᠢ ᠡᠷᠭᠢᠪᠡ ᠃
– ᠪᠠᠢᠵᠠ ᠯᠠ ᠳᠠ ! ᠪᠢ ! ᠨᠠᠴᠤᠭᠳᠣᠷᠵᠢ ᠦᠭᠡ ᠬᠡᠯᠡᠵᠦ ᠪᠠᠢᠨᠠ ! ᠭᠡᠬᠦ ᠳ᠋ᠦ᠍ ᠂
– ᠲᠣᠩᠭᠣᠰ ᠴᠢ ! ᠪᠢᠲᠡᠭᠡᠢ ᠶᠡᠬᠡ ᠬᠥᠮᠦᠨ ᠤ ᠨᠡᠷᠡ ᠪᠠᠷᠢᠵᠤ ᠭᠠᠯᠵᠠᠭᠤᠷᠠ ! ᠡᠨᠡ ᠮᠠᠭᠤ ᠠᠷᠢᠬᠢᠴᠢᠨ ᠪᠠᠰᠠ ᠮᠥᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠣᠭᠲᠣᠭᠤᠷᠠᠵᠤ ᠴᠢᠳᠠᠬᠤ ᠦᠭᠡᠢ ᠁ᠭᠡᠵᠦ ᠥᠭᠦᠯᠡᠨ ᠵᠠᠩᠨᠠᠭᠰᠠᠭᠠᠷ ᠬᠠᠷᠠᠩᠭᠤᠢ ᠶ᠋ᠢᠨ ᠳᠤᠮᠳᠠ ᠬᠣᠯᠠᠳᠠᠨ ᠣᠳᠪᠠ ᠁
ᠨᠠᠴᠤᠭᠳᠣᠷᠵᠢ ᠲᠡᠷᠡ ᠬᠣᠶᠠᠷ ᠤ᠋ᠨ ᠳᠠᠯᠳᠠ ᠣᠷᠣᠭᠰᠠᠨ ᠵᠦᠭ ᠲᠦ᠍ ᠤᠳᠠᠲᠠᠯᠠ ᠭᠥᠯᠢᠷᠡᠨ᠂ ᠠᠮᠠ ᠪᠠᠨ ᠬᠠᠭᠠᠰ ᠠᠩᠭᠠᠢᠨ ᠲᠣᠪ ᠳᠤᠭᠤᠢ ᠵᠣᠭᠰᠣᠭᠰᠠᠭᠠᠷ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠴᠢᠬᠤᠯᠳᠠᠨ ᠬᠠᠰᠬᠢᠷᠴᠤ ᠄
– ᠦᠬᠦᠭᠰᠡᠨ ᠬᠣᠢᠨᠠ ᠪᠠᠨ ! ᠬᠡᠨ ᠨᠢ ᠬᠥᠮᠦᠨ ᠤ ᠨᠡᠷᠡ ᠵᠢᠭᠡᠯᠡᠳᠴᠦ ᠪᠠᠢᠨᠠ?᠁ ᠠ᠋ ᠮᠠᠯ ᠤ᠋ᠳ ! ᠭᠡᠵᠦ ᠸᠠᠭᠠᠷ ᠲᠠᠢ ᠠᠷᠢᠬᠢ ᠶ᠋ᠢ ᠠᠶᠠᠭᠠᠯᠠᠨ ᠵᠠᠯᠭᠢᠯᠠᠭᠠᠳ ᠦᠯᠡᠳᠡᠭᠰᠡᠨ ᠢ᠋ ᠨᠢ ᠸᠠᠭᠠᠷ ᠲᠠᠢ ᠨᠢ ᠬᠠᠰᠢᠶᠠ ᠤᠷᠤᠭᠤ ᠴᠢᠯᠠᠭᠤᠳᠠᠴᠢᠬᠠᠪᠠ ᠃ ᠬᠠᠰᠢᠶᠠ ᠲᠠᠰᠬᠢᠨ ᠳᠤᠤᠭᠠᠷᠴᠤ᠂ ᠸᠠᠭᠠᠷ ᠭᠠᠵᠠᠷ ᠲᠤ᠌ ᠲᠦᠰᠬᠢᠨ ᠤᠨᠠᠭᠠᠳ ᠨᠠᠴᠤᠭᠳᠣᠷᠵᠢ ᠰᠠᠯᠭᠠᠨᠠᠨ ᠭᠠᠩᠬᠤᠵᠤ ᠲᠡᠷᠯᠢᠭ ᠦ᠋ᠨ ᠢ᠋ᠶ᠋ᠡᠨ ᠵᠠᠭᠠᠮᠠ ᠶ᠋ᠢ ᠱᠠᠵᠢᠭᠢᠨᠠᠭᠤᠯᠤᠨ ᠤᠷᠠᠵᠤ ᠂ ᠣᠷᠣᠰ ᠂ ᠭᠧᠷᠮᠠᠨ ᠂ ᠬᠢᠲᠠᠳ ᠬᠡᠯᠡ ᠪᠡᠷ ᠬᠡᠨ ᠨᠢᠭᠡᠨ ᠢ᠋ ᠵᠠᠩᠨᠠᠵᠤ ᠵᠦᠬᠡᠨ ᠥᠭᠦᠯᠡᠭᠰᠡᠭᠡᠷ ᠭᠤᠳᠤᠮᠵᠢ ᠤᠷᠤᠭᠤ ᠣᠳᠪᠠ ᠃
ᠲᠡᠨᠳᠡ ᠭᠤᠷᠪᠠᠨ ᠬᠥᠮᠦᠨ ᠶᠠᠪᠤᠭᠰᠠᠨ ᠢ᠋ ᠵᠣᠭᠰᠣᠭᠠᠵᠤ ᠰᠢᠯᠦᠭ ᠢ᠋ᠶ᠋ᠡᠨ ᠲᠡᠳᠡᠨ ᠳ᠋ᠦ᠍ ᠤᠩᠰᠢᠬᠤ ᠭᠡᠵᠦ ᠶᠠᠳᠠᠪᠠ ᠃
ᠲᠡᠳᠡ ᠬᠡᠰᠡᠭ ᠬᠦᠯᠢᠭᠡᠯᠵᠡᠭᠡᠳ
– ᠰᠡᠭᠦᠯ ᠳ᠋ᠦ᠍ ᠤᠩᠰᠢᠭᠠᠷᠠᠢ ᠬᠥ᠋!
– ᠣᠳᠣ ᠤᠨᠲᠠᠭᠰᠠᠨ ᠴᠢᠨᠢ ᠳᠡᠭᠡᠷᠡ ᠠ᠋!
– ᠮᠥᠩᠭᠥ ᠲᠡᠢ ᠶᠤ᠋ ᠴᠢ ! ᠭᠡᠵᠦ ᠳᠤᠤᠭᠠᠷᠵᠠᠭᠠᠨ ᠬᠥᠭᠡᠷᠦᠯᠳᠦᠨ ᠣᠳᠪᠠ ᠃ ᠬᠣᠢᠨᠠ ᠠ᠋ᠴᠠ ᠨᠢ ᠨᠠᠴᠤᠭᠳᠣᠷᠵᠢ ᠳ᠋ᠠᠭᠠᠨ ᠰᠠᠵᠢᠯᠠᠵᠤ :
– ᠬᠥᠶᠢ ! ᠬᠥᠶᠢ ! ᠪᠢ ᠲᠠ ᠨᠠᠷ ᠲᠤ᠌ ᠬᠡᠯᠡᠶᠡ ᠃ ᠮᠣᠩᠭᠣᠯ ᠠᠬᠠ ᠳᠡᠭᠦᠦ ᠨᠠᠷ ᠠ᠋ ᠂ ᠨᠠᠮᠠᠶ᠋ᠢ ᠢᠲᠡᠭᠡᠭᠡᠴᠢ ! ᠭᠡᠵᠦ ᠬᠣᠭᠣᠯᠠᠢ ᠵᠠᠩᠭᠢᠷᠠᠭᠤᠯᠤᠨ ᠬᠠᠰᠬᠢᠷᠤᠭᠰᠠᠭᠠᠷ ᠦᠯᠡᠳᠡᠪᠡ ᠃ ᠳᠡᠷᠭᠡᠳᠡᠭᠦᠷ ᠨᠢ ᠨᠢᠭᠡ ᠬᠥᠮᠦᠨ ᠶᠠᠪᠤᠵᠤ ᠪᠠᠢᠬᠤ ᠶ᠋ᠢ ᠮᠡᠳᠡᠭᠡᠳ ᠲᠡᠭᠦᠨ ᠤᠷᠤᠭᠤ ᠣᠴᠢᠵᠤ᠄
– ᠬᠥᠶᠢ ! ᠬᠦᠨᠳᠦᠲᠦ ᠨᠥᠬᠥᠷ ᠮᠢᠨᠢ ᠠ᠋ ! ᠭᠡᠵᠦ ᠣᠢᠷᠠᠲᠤᠨ ᠣᠴᠢᠪᠠᠯ ᠲᠡᠷᠡ ᠬᠥᠮᠦᠨ :
– ᠶᠠᠭᠤ ᠭᠡᠵᠦ ᠬᠤᠴᠠᠭᠠᠳ ᠪᠠᠢᠭᠠ ᠶᠤᠮ ᠪᠣᠢ ᠴᠢ ? ᠭᠡᠵᠦ ᠰᠢᠳᠦ ᠵᠠᠭᠤᠨ ᠬᠡᠯᠡᠭᠡᠳ ᠵᠠᠭᠠᠮᠠᠳᠠᠨ ᠠᠪᠤᠪᠠ ᠃
– ᠬᠤᠴᠠᠭᠠᠳ ᠭᠡᠨᠡ ? ᠨᠣᠬᠠᠢ ᠤᠤ ? ᠭᠡᠵᠦ ᠨᠠᠴᠤᠭᠳᠣᠷᠵᠢ ᠬᠡᠯᠡ ᠨᠢ ᠣᠷᠢᠶᠠᠯᠳᠤᠨ ᠠᠰᠠᠭᠤᠵᠤ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠡᠷᠡ ᠬᠥᠮᠦᠨ ᠤ ᠬᠠᠲᠠᠭᠤ ᠭᠠᠷ ᠢ᠋ ᠲᠠᠯᠪᠢᠭᠤᠯᠬᠤ ᠭᠡᠵᠦ ᠤᠷᠤᠯᠳᠤᠲᠠᠯᠠ ᠄
– ᠴᠢᠮᠠ ᠰᠢᠭ᠋ ᠨᠣᠬᠠᠢ ! ᠭᠡᠳ ᠴᠢᠬᠢᠯᠵᠢᠭᠦᠷ ᠤᠷᠤᠭᠤ ᠨᠢ ᠳᠡᠰ ᠭᠡᠲᠡᠯᠡ ᠴᠣᠬᠢᠭ᠍ᠰᠠᠨ ᠳ᠋ᠤ᠌ ᠬᠥᠭᠡᠷᠦᠭᠡᠢ ᠰᠣᠭᠲᠣᠭᠤ ᠡᠷᠡ ᠭᠤᠳᠤᠮᠵᠢᠨ ᠤ᠋ ᠬᠦᠢᠲᠡᠨ ᠰᠢᠷᠣᠢ ᠳᠡᠭᠡᠷᠡ ᠳᠡᠭᠡᠭᠰᠢ ᠬᠠᠨᠳᠤᠨ ᠲᠡᠷᠡᠢᠵᠦ ᠤᠨᠠᠪᠠ ᠃
ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠬᠠᠮᠤᠭ ᠪᠡᠶᠡ ᠨᠢ ᠵᠢᠬᠡᠭᠦᠴᠡᠨ ᠭᠡᠨᠡᠳᠲᠡ ᠭᠠᠳᠠᠭᠠ ᠬᠡᠪᠲᠡᠵᠦ ᠪᠠᠢᠭᠠ ᠪᠠᠨ ᠮᠡᠳᠡᠭᠰᠡᠨ ᠨᠠᠴᠤᠭᠳᠣᠷᠵᠢ ᠄
– ᠪᠠᠢᠵᠠᠭᠠᠷᠠᠢ ! ᠲᠡᠭᠡᠬᠦ ᠦᠭᠡᠢ ᠰᠢᠦ ᠬᠥ᠋ ! ᠭᠡᠵᠦ ᠬᠠᠰᠬᠢᠷᠤᠨ ᠪᠣᠰᠪᠠ ᠃
ᠡᠷᠭᠢᠨ ᠲᠣᠭᠣᠷᠢᠨ ᠬᠠᠷᠠᠩᠭᠤᠢ ᠪᠥᠭᠡᠳ ᠨᠢᠳᠦᠨ ᠳ᠋ᠦ᠍ᠨᠢ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠣᠴᠢ ᠪᠤᠵᠢᠭᠢᠨᠠᠨ ᠬᠥᠯ ᠨᠢ ᠭᠤᠢᠪᠢᠵᠤ ᠰᠡᠳᠬᠡᠯ ᠵᠢᠷᠦᠬᠡ ᠨᠢ ᠣᠪᠣᠯᠵᠠᠨ᠂ ᠠᠮᠠᠨ ᠳ᠋ᠤᠨᠢ ᠴᠢᠰᠤ ᠠᠮᠲᠠᠯᠠᠭᠳᠠᠵᠤ ᠠᠭᠤᠷ ᠣᠮᠣᠭ ᠨᠢ ᠰᠢᠳᠡᠨᠡ ᠃ ᠶᠠᠮᠠᠷ ᠨᠢᠭᠡ ᠪᠦᠳᠦᠭᠦᠯᠢᠭ ᠯᠤᠢᠪᠠᠷᠴᠢᠨ ᠡᠲᠡᠭᠡᠳ ᠡᠨᠡ ᠬᠠᠷᠠᠩᠭᠤᠢ ᠳᠤᠮᠳᠠᠭᠤᠷ ᠬᠣᠲᠠ ᠬᠦᠷᠢᠶᠡ ᠪᠡᠷ ᠲᠡᠨᠦᠵᠦ᠂ ᠰᠢᠳᠤᠷᠭᠤ ᠴᠠᠭᠠᠨ ᠠᠷᠠᠳ ᠢ᠋ ᠵᠠᠭᠠᠮᠠᠨᠳᠠᠵᠤ ᠠᠪᠤᠨ 《 ᠨᠣᠬᠠᠢ! 》 ᠭᠡᠵᠦ ᠬᠠᠷᠢᠶᠠᠵᠤ ᠳᠣᠷᠣᠮᠵᠢᠯᠠᠨ ᠶᠠᠪᠤᠨᠠ ᠭᠡᠮᠡᠨ ᠰᠡᠳᠬᠢᠯ ᠳ᠋ᠦ᠍ᠨᠢ ᠪᠦᠦᠷ ᠲᠦᠦᠷ ᠰᠠᠨᠠᠭᠳᠠᠬᠤ ᠪᠥᠭᠡᠳ ᠲᠡᠭᠦᠨ ᠲᠡᠢ ᠲᠡᠮᠡᠴᠡᠬᠦ ᠵᠣᠷᠢᠭ ᠵᠢᠷᠦᠬᠡ᠂ ᠠᠭᠠᠭ ᠣᠮᠣᠭ ᠨᠢ ᠪᠢᠯᠬᠠᠪᠠ ᠃ ᠡᠢᠰᠢ ᠲᠡᠢᠰᠢ ᠬᠠᠷᠠᠨ ᠪᠠᠷᠠᠭᠤᠨ ᠵᠡᠭᠦᠨ ᠳᠠᠢᠰᠢ ᠲᠦᠷᠭᠡᠨ ᠠᠯᠬᠤᠯᠠᠨ ᠬᠥᠯ ᠳ᠋ᠦ᠍ᠨᠢ ᠲᠣᠷᠤᠭᠰᠠᠨ ᠵᠦᠢᠯ ᠢ᠋ ᠢᠰᠭᠦᠯᠡᠨ ᠠᠭᠠᠬᠢᠯᠠᠵᠤ ᠶᠠᠪᠤᠲᠠᠯᠠ ᠪᠠᠷᠠᠭᠤᠨ ᠵᠦᠭ ᠡᠴᠡ ᠨᠢᠭᠡᠨ ᠪᠠᠷᠠᠭᠠᠨ ᠳᠦᠷᠰᠦ ᠰᠡᠭᠦᠳᠡᠭᠡᠨᠡᠨ ᠲᠣᠳᠣᠷᠠᠵᠤ ᠲᠦᠷᠭᠡᠨ ᠲᠦᠷᠭᠡᠨ ᠠᠯᠬᠤᠯᠠᠨ ᠠᠢᠰᠤᠢ ᠃
ᠨᠠᠴᠤᠭᠳᠣᠷᠵᠢ ᠲᠡᠭᠦᠨ ᠢ᠋ ᠲᠣᠰᠣᠨ ᠭᠦᠶᠦᠵᠦ ᠣᠴᠢᠬᠤ ᠳ᠋ᠠᠭᠠᠨ᠄
– ᠠ ᠴᠢ ᠮᠠᠭᠤ ᠁ ᠣᠳᠣ ᠬᠣᠶᠠᠭᠤᠯᠠ ᠭᠡᠳ ᠤᠬᠤᠰᠬᠢᠨ ᠪᠠᠷᠢᠵᠤ ᠠᠪᠬᠤ ᠭᠡᠲᠡᠯᠡ ᠶᠠᠮᠠᠷ ᠨᠢᠭᠡᠨ ᠬᠠᠲᠠᠭᠤ ᠶᠠᠭᠤᠮᠠ ᠪᠠᠷ ᠲᠣᠯᠣᠭᠠᠢ ᠳᠤᠮᠳᠠᠭᠤᠷ ᠨᠢ ᠬᠦᠴᠦᠲᠡᠢ ᠴᠣᠬᠢᠬᠤ ᠰᠢᠭ᠋ ᠪᠣᠯᠵᠤ ᠲᠡᠷᠡ ᠳᠣᠣᠷᠠ ᠪᠠᠨ ᠭᠡᠳᠡᠷᠭᠦ ᠭᠠᠵᠠᠷ ᠰᠠᠪᠠᠨ ᠤᠨᠠᠪᠠ᠃ ᠲᠡᠨᠳᠡ ᠡᠴᠡ ᠪᠣᠰᠴᠤ ᠪᠣᠯᠤᠭᠰᠠᠨ ᠦᠭᠡᠢ ᠁ ᠭᠠᠵᠠᠷ ᠳᠡᠯᠡᠬᠡᠢ ᠳᠠᠢᠪᠠᠯᠵᠠᠨ ᠲᠣᠯᠣᠭᠠᠢ ᠨᠢ ᠠᠰᠤᠷᠤ ᠲᠣᠮᠣ᠂ ᠬᠦᠴᠢᠷ ᠬᠦᠨᠳᠦ ᠪᠣᠯᠤᠭᠰᠠᠨ ᠰᠢᠭ᠋ ᠰᠠᠨᠠᠭᠳᠠᠬᠤ ᠳ᠋ᠤ᠌ ᠭᠠᠷ ᠬᠥᠯ ᠢ᠋ᠶ᠋ᠡᠷ ᠭᠠᠵᠠᠷ ᠲᠡᠮᠲᠡᠴᠢᠨ ᠮᠠᠭᠠᠵᠢᠵᠤ᠂ ᠠᠮᠢᠰᠬᠤᠯ ᠪᠥᠭᠯᠡᠷᠡᠨ ᠲᠠᠷᠴᠢᠯᠠᠪᠠ᠃ ᠲᠡᠭᠡᠭᠰᠡᠭᠡᠷ ᠠᠷᠠᠢ ᠴᠢᠷᠠᠢ᠂ ᠵᠤᠨ ᠤ᠋ ᠰᠥᠨᠢ ᠶ᠋ᠢᠨ ᠦᠦᠷ ᠲᠡᠮᠳᠡᠭᠷᠡᠬᠦ ᠦᠶᠡ ᠪᠡᠷ ᠭᠡᠨᠡᠳᠲᠡ ᠬᠦᠴᠦᠯᠡᠨ ᠥᠨᠳᠡᠢᠵᠦ᠂ ᠴᠢᠰ ᠤᠯᠠᠭᠠᠨ ᠨᠢᠳᠦ ᠪᠡᠷ ᠬᠣᠷᠸᠠ ᠶᠢᠷᠲᠢᠨᠴᠦ ᠶ᠋ᠢ ᠬᠠᠷᠠᠪᠠᠯ᠂ ᠲᠡᠨᠳᠡ ᠨᠢᠭᠡᠨ ᠬᠥᠮᠦᠨ ᠵᠣᠭᠰᠣᠵᠤ ᠪᠠᠢᠬᠤ ᠰᠢᠭ᠋ ᠬᠠᠷᠠᠭᠳᠠᠵᠠᠢ᠃ ᠲᠡᠭᠦᠨ ᠳ᠋ᠦ᠍ ᠡᠴᠦᠰ ᠦ᠋ᠨ ᠬᠦᠴᠦ ᠶ᠋ᠢ ᠰᠢᠪᠬᠠᠵᠤ᠂ ᠬᠣᠶᠠᠷ ᠰᠢᠷᠭᠤᠨ ᠤᠨᠠᠨ ᠪᠠᠢᠵᠤ ᠳᠥᠷᠪᠡᠨ ᠬᠥᠯᠯᠡᠨ ᠣᠴᠢᠭᠠᠳ ᠲᠡᠪᠡᠷᠢᠵᠦ ᠠᠪᠤᠪᠠ᠃ ᠦᠭᠡ ᠬᠡᠯᠡᠬᠦ ᠭᠡᠰᠡᠨ ᠪᠣᠯᠪᠠᠴᠤ ᠠᠮᠠ ᠨᠢ ᠬᠡᠳᠦᠢᠨ ᠵᠠᠭᠤᠷᠠᠵᠤ᠂ ᠳᠣᠲᠣᠷᠠ ᠨᠢ ᠴᠢᠰᠤ ᠨᠥᠵᠢᠷᠡᠨ ᠳᠦᠭᠦᠷᠴᠡᠢ᠃ ᠲᠡᠢᠨ ᠬᠦ᠌ ᠲᠡᠮᠦᠷ ᠲᠣᠷᠬᠠ ᠲᠠᠢ ᠬᠣᠭ ᠲᠡᠪᠡᠷᠢᠨ ᠤᠨᠠᠵᠤ᠂ ᠵᠤᠨ ᠤ᠋ ᠥᠷᠯᠥᠭᠡᠨ ᠤ ᠨᠠᠷᠠ ᠲᠤᠰᠲᠠᠯᠠ ᠪᠡᠶᠡ ᠶ᠋ᠢᠨ ᠭᠦᠨ ᠳᠣᠲᠣᠷᠠᠬᠢ ᠢᠳᠡᠷ ᠵᠠᠯᠠᠭᠤ ᠡᠳ᠋ ᠡᠰ ᠨᠢ ᠠᠭᠠᠵᠢᠮ ᠢ᠋ᠶ᠋ᠠᠷ ᠬᠦᠷᠦᠵᠦ ᠶᠢᠷᠲᠢᠨᠴᠦ ᠶ᠋ᠢᠨ ᠮᠥᠩᠬᠡ ᠪᠤᠰᠤ ᠶ᠋ᠢ ᠦᠵᠡᠭᠦᠯᠪᠡ᠃
ᠲᠡᠷᠡ ᠬᠦ᠌ ᠣᠶᠤᠨ ᠤᠬᠠᠭᠠᠨ ᠤ᠋ ᠬᠣᠪᠣᠷ ᠨᠢᠭᠡᠨ ᠣᠳᠣ ᠂ ᠠᠩᠭᠢ ᠶ᠋ᠢᠨ ᠲᠡᠮᠡᠴᠡᠯ ᠦ᠋ᠨ ᠰᠢᠷᠦᠭᠦᠨ ᠣᠨ ᠵᠢᠯ ᠦ᠋ᠨ ᠲᠣᠭᠣᠰᠣᠨ ᠳᠤᠮᠳᠠ ᠶᠡᠷᠦ ᠪᠤᠰᠤ ᠪᠠᠷ ᠬᠠᠷᠪᠤᠨ᠂ ᠬᠠᠭᠤᠴᠢᠨ ᠬᠦᠷᠢᠶᠡᠨ ᠤ ᠰᠢᠨᠡ ᠭᠤᠳᠤᠮᠵᠢᠨ ᠳ᠋ᠤ᠌ ᠮᠥᠩᠬᠡ ᠨᠣᠢᠷ ᠲᠤ᠌ ᠳᠠᠷᠤᠭᠳᠠᠨ ᠤᠨᠠᠭᠰᠠᠨ ᠥᠷᠯᠥᠭᠡ ᠂ ᠲᠡᠷᠡ ᠬᠥᠮᠦᠨ ᠤ ᠳᠡᠷᠭᠡᠳᠡ ᠨᠢᠭᠡᠨ ᠴᠡᠯ ᠵᠠᠯᠠᠭᠤ ᠵᠢᠷᠦᠬᠡ ᠰᠢᠮᠰᠢᠷᠡᠨ ᠪᠠᠯᠠᠮᠠᠭᠳᠠᠨ ᠵᠣᠭᠰᠣᠭᠰᠠᠨ ᠨᠢ ᠪᠤᠶᠠᠨᠵᠢᠷᠭᠠᠯ ᠪᠠᠢᠪᠠ᠃
ᠪᠤᠶᠠᠨᠵᠢᠷᠭᠠᠯ ᠡᠢᠮᠦ ᠶᠠᠭᠤᠮᠠ ᠪᠣᠯᠤᠨᠠ ᠭᠡᠵᠦ ᠣᠭᠲᠣ ᠰᠠᠨᠠᠭᠰᠠᠨ ᠦᠭᠡᠢ᠃ ᠶᠢᠷᠲᠢᠨᠴᠦ ᠶ᠋ᠢᠨ ᠲᠦ᠋ᠮᠡᠨ ᠰᠠᠢᠬᠠᠨ ᠢ᠋ ᠪᠣᠳᠣᠨ ᠪᠣᠳᠣᠨ᠂ ᠠᠮᠢᠳᠤᠷᠠᠯ ᠵᠢᠷᠭᠠᠯ ᠤ᠋ᠨ ᠰᠢᠨᠲᠠᠷᠠᠰᠢ ᠦᠭᠡᠢ ᠲᠡᠮᠡᠦᠯᠦᠯ ᠢ᠋ᠶ᠋ᠡᠷ ᠵᠢᠭᠦᠷᠯᠡᠨ ᠥᠷᠯᠥᠭᠡ ᠡᠷᠲᠡ ᠶ᠋ᠢᠨ ᠭᠡᠭᠡᠨ ᠳ᠋ᠦ᠍ ᠢᠨᠢᠶᠡᠮᠰᠦᠭᠯᠡᠨ ᠮᠢᠰᠢᠶᠡᠭᠰᠡᠭᠡᠷ ᠢᠷᠡᠭᠰᠡᠨ ᠲᠡᠷᠡ ᠪᠦᠰᠡᠭᠦᠢ ᠨᠠᠴᠤᠭᠳᠣᠷᠵᠢ ᠶ᠋ᠢᠨ ᠴᠣᠭᠴᠠᠰ ᠢ᠋ ᠦᠵᠡᠭᠡᠳ ᠴᠡᠯᠮᠡᠭ ᠡᠳᠦᠷ ᠦ᠋ᠨ ᠠᠶᠤᠩᠭᠠᠨ ᠳ᠋ᠤ᠌ ᠵᠠᠳᠠ ᠴᠣᠬᠢᠭᠤᠯᠬᠤ ᠰᠢᠭ᠋ ᠪᠣᠯᠪᠠ ᠃
ᠶᠢᠷᠲᠢᠨᠴᠦ ᠶ᠋ᠢᠨ ᠬᠠᠷᠠ ᠴᠠᠭᠠᠨ ᠬᠣᠶᠠᠷ ᠢᠩᠭᠢᠵᠦ ᠭᠡᠨᠡᠳᠲᠡ ᠬᠠᠷᠰᠢᠵᠤ ᠠᠯᠠᠭᠯᠠᠬᠤ ᠶ᠋ᠢ ᠵᠡᠭᠦᠳᠦᠯᠡᠭᠡ ᠴᠦ᠍ ᠦᠭᠡᠢ ᠶᠠᠪᠤᠵᠠᠢ᠃ ᠭᠠᠢᠬᠠᠮᠰᠢᠭ᠍ᠲᠤ ᠰᠠᠢᠬᠠᠨ ᠬᠥᠮᠦᠨ ᠡᠨᠳᠡ ᠣᠰᠣᠯᠳᠠᠨ ᠬᠠᠯᠢᠭᠠᠳ ᠭᠠᠭᠴᠠ ᠪᠦᠰᠡᠭᠦᠢ ᠳᠡᠷᠭᠡᠳᠡ ᠨᠢ ᠬᠥᠮᠦᠨ ᠴᠢᠯᠠᠭᠤ ᠮᠡᠲᠦ ᠬᠥᠰᠢᠨ ᠵᠣᠭᠰᠣᠵᠤ ᠪᠠᠢᠬᠤ ᠳ᠋ᠤ᠌᠂ ᠲᠡᠭᠷᠢ ᠶ᠋ᠢᠨ ᠲᠤᠩᠭᠠᠯᠠᠭ ᠨᠠᠷᠠᠨ ᠠᠵᠢᠭ ᠴᠤ᠌ ᠦᠭᠡᠢ ᠮᠠᠨᠳᠤᠵᠤ᠂ ᠬᠥᠮᠦᠨ ᠵᠤᠨ ᠠᠵᠤ ᠠᠮᠢᠳᠤᠷᠠᠯ ᠥᠴᠦᠬᠡᠨ ᠴᠦ᠍ ᠴᠤᠴᠠᠷᠠᠬᠤ ᠦᠭᠡᠢ ᠦᠷᠭᠦᠯᠵᠢᠯᠡᠨ᠂ ᠲᠡᠷᠲᠡᠭᠡ ᠪᠤᠶᠠᠨᠲᠤ ᠬᠤᠸᠠ ᠶ᠋ᠢᠨ ᠳᠡᠨᠵᠢ ᠳᠡᠭᠡᠷᠡ ᠤᠯᠤᠰ ᠤ᠋ᠨ ᠨᠠᠭᠠᠳᠤᠮ ᠨᠢᠵᠢᠭᠢᠨᠡᠵᠦ᠂ ᠬᠤᠷᠳᠤᠨ ᠮᠣᠷᠢ ᠤᠷᠤᠯᠳᠤᠨ᠂ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠨᠠᠷ ᠰᠡᠴᠡ ᠰᠢᠯᠭᠠᠨ ᠤᠤᠬᠠᠢᠯᠠᠵᠤ᠂ ᠪᠥᠬᠡ ᠶ᠋ᠢᠨ ᠳᠡᠪᠵᠢᠶᠡᠨ ᠳ᠋ᠦ᠍ ᠪᠠᠷᠭᠤ ᠶ᠋ᠢᠨ ᠭᠡᠯᠥᠭ ᠠᠷᠪᠠ ᠳᠠᠪᠠᠵᠤ ᠲᠡᠷᠢᠭᠦᠯᠡᠨ᠂ ᠠᠷᠤ ᠬᠠᠩᠭᠠᠢ ᠨᠤᠲᠤᠭ ᠤ᠋ᠨ ᠯᠣᠪᠰᠠᠩᠵᠠᠮᠰᠤ ᠶᠢᠰᠦ ᠳᠠᠪᠠᠵᠤ ᠦᠵᠦᠭᠦᠷᠯᠡᠭᠡᠳ᠂ ᠪᠠᠶᠠᠨ ᠪᠠᠷᠠᠭᠠᠲᠤ ᠶ᠋ᠢᠨ ᠲᠡᠮᠦᠷ 《 ᠳᠥᠮᠥᠨ ᠳᠥᠮᠥᠨ ᠭᠢᠰᠬᠢᠳᠡᠯ ᠲᠡᠢ ᠪᠠᠷᠠᠭᠠᠬᠠᠨ ᠨᠢᠳᠦᠨ ᠰᠢᠷᠭᠠ 》 ᠶ᠋ᠢ ᠪᠡᠨ ᠬᠠᠩᠭᠢᠨᠠᠭᠤᠯᠤᠨ ᠳᠠᠭᠤᠯᠠᠭᠰᠠᠭᠠᠷ ᠪᠠᠢᠯᠠ ᠃
《 ᠠᠶᠠ ᠂ ᠣᠷᠴᠢᠯᠠᠩ ᠭᠡᠳᠡᠭ ᠶᠠᠭᠠᠬᠢᠭ᠍ᠰᠠᠨ ᠬᠠᠲᠠᠭᠤ ᠶᠤᠮ ᠪᠣᠢ ? ᠬᠦᠰᠡᠯ ᠬᠢᠰᠠᠯ ᠬᠣᠶᠠᠷ ᠶᠠᠭᠠᠬᠢᠭ᠍ᠰᠠᠨ ᠬᠠᠢᠷᠠ ᠨᠠᠢᠷ ᠦᠭᠡᠢ ᠲᠤᠯᠤᠯᠳᠤᠳᠠᠭ ᠶᠤᠮ ᠪᠣᠢ ? 》 ᠭᠡᠵᠦ ᠬᠠᠯᠬᠠᠯᠠᠨ ᠪᠣᠳᠣᠭᠠᠳ ᠪᠤᠶᠠᠨᠵᠢᠷᠭᠠᠯ ᠨᠠᠴᠤᠭᠳᠣᠷᠵᠢ ᠶ᠋ᠢᠨ ᠠᠮᠢ ᠦᠭᠡᠢ ᠴᠣᠭᠴᠠᠰ ᠢ᠋ ᠳᠠᠬᠢᠨ ᠰᠠᠢᠲᠤᠷ ᠰᠢᠷᠳᠡᠪᠡ ᠃
ᠪᠣᠷᠣ ᠲᠡᠷᠯᠢᠭ ᠦ᠋ᠨ ᠵᠠᠭᠠᠮᠠ ᠤᠷᠠᠩᠬᠠᠢ᠂ ᠡᠨᠳᠡ ᠲᠡᠨᠳᠡ ᠪᠡᠨ ᠰᠢᠪᠡᠷ ᠰᠢᠷᠣᠢ ᠪᠣᠯᠤᠭᠰᠠᠨ ᠪᠥᠭᠡᠳ ᠡᠪ ᠦᠭᠡᠢ ᠨᠤᠭᠤᠯᠵᠤ ᠤᠨᠠᠭᠰᠠᠨ ᠬᠥᠯ᠂ ᠲᠡᠮᠦᠷ ᠲᠣᠷᠬᠠᠨ ᠳ᠋ᠤ᠌ ᠰᠢᠨᠡ ᠪᠡᠨ ᠴᠢᠩᠭᠠ ᠨᠠᠭᠠᠵᠤ ᠠᠶᠠᠭᠦᠢ ᠮᠤᠷᠤᠢᠭᠰᠠᠨ ᠴᠠᠢᠪᠤᠷ ᠨᠣᠭᠣᠭᠠᠨ ᠲᠤᠶᠠᠭᠠᠲᠤ ᠠᠮᠢ ᠦᠭᠡᠢ ᠨᠢᠭᠤᠷ ᠳᠡᠭᠡᠭᠦᠷ ᠦᠰᠦ ᠨᠢ ᠲᠤᠭ ᠲᠤᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠭᠡᠳᠡᠷᠡᠨ ᠪᠦᠷᠬᠦᠭᠡᠳ ᠤᠷᠤᠭᠤᠯ ᠤ᠋ᠨ ᠬᠢᠨᠢ ᠬᠠᠵᠠᠭᠤ ᠪᠠᠷ ᠬᠠᠷᠠ ᠶᠠᠭᠤᠮᠠ ᠴᠤᠬᠤᠢᠭᠠᠳ ᠬᠠᠳᠠᠵᠠᠢ᠃ ᠭᠠᠷ ᠨᠢ ᠲᠣᠷᠬᠠ ᠶ᠋ᠢᠨ ᠢᠷᠣᠭᠠᠯ ᠳ᠋ᠤ᠌ ᠲᠡᠭᠦᠨ ᠢ᠋ ᠲᠡᠪᠡᠷᠢᠨ ᠮᠠᠭᠠᠵᠢᠵᠤ ᠪᠠᠢᠬᠤ ᠰᠢᠭ᠋ ᠰᠡᠷᠪᠡᠢᠨ᠂ ᠬᠢᠮᠤᠰᠤ ᠪᠠᠨ ᠨᠣᠢᠲᠠᠨ ᠭᠠᠵᠠᠷ ᠰᠢᠭᠢᠳᠬᠡᠨ ᠲᠣᠭᠲᠠᠭᠰᠠᠨ ᠨᠢ ᠬᠡᠵᠢᠶᠡ ᠨᠢᠭᠡᠨ ᠴᠠᠭ ᠲᠤ᠌ ᠮᠣᠩᠭᠣᠯ᠂ ᠬᠢᠲᠠᠳ᠂ ᠭᠧᠷᠮᠠᠨ᠂ ᠣᠷᠣᠰ ᠪᠣᠯᠤᠨ ᠲᠥᠪᠡᠳ᠂ ᠮᠠᠨᠵᠤ ᠬᠡᠯᠡ ᠪᠢᠴᠢᠭ ᠢ᠋ ᠴᠡᠪᠡᠷ ᠰᠠᠢᠬᠠᠨ ᠲᠠᠲᠠᠯᠠᠨ ᠶᠠᠪᠤᠭᠰᠠᠨ ᠡᠷᠳᠡᠮᠲᠦ ᠬᠥᠮᠦᠨ ᠤ ᠭᠠᠷ ᠭᠡᠬᠦ ᠳ᠋ᠦ᠍ ᠬᠡᠨ ᠴᠦ᠍ ᠦᠨᠡᠮᠰᠢᠬᠦ ᠦᠭᠡᠢ ᠬᠠᠷᠠᠭᠳᠠᠨᠠ᠃
《 ᠪᠢ ᠴᠦ᠍ ᠶᠡᠬᠡ ᠶᠠᠭᠤᠮᠠ ᠪᠣᠳᠣᠵᠤ ᠶᠠᠪᠤᠭᠰᠠᠨ ᠳᠠ ᠃ ᠡᠨᠡ ᠬᠥᠮᠦᠨ᠂ ᠨᠠᠮᠠ ᠶ᠋ᠢ ᠣᠯᠵᠤ ᠬᠠᠷᠠᠭᠰᠠᠨ ᠦᠭᠡᠢ᠂ ᠬᠣᠭ ᠤ᠋ᠨ ᠪᠤᠭ᠍ᠰᠢᠭ᠋ ᠢ᠋ ᠤᠷᠢᠲᠠᠵᠤ ᠲᠡᠪᠡᠷᠢᠵᠡᠢ ᠳᠠ᠁ 》 ᠭᠡᠵᠦ ᠪᠣᠳᠣᠭᠠᠳ ᠪᠤᠶᠠᠨᠵᠢᠷᠭᠠᠯ ᠮᠡᠯᠮᠡᠷᠡᠨ ᠪᠠᠢᠭᠰᠠᠨ ᠨᠢᠯᠪᠤᠰᠤ ᠪᠠᠨ ᠬᠦᠴᠦ ᠪᠡᠷ ᠲᠣᠭᠲᠠᠭᠠᠨ ᠡᠪᠦᠷ ᠢᠶᠡᠨ ᠰᠦ᠋ᠢᠯᠡᠨ ᠬᠦᠵᠦᠭᠦᠨ ᠡᠴᠡ ᠪᠡᠨ ᠵᠡᠭᠦᠭᠰᠡᠨ ᠬᠠᠳᠠᠭ ᠳᠠᠬᠢ ᠪᠣᠭᠣᠳᠠᠯᠲᠠᠢ ᠵᠦᠢᠯ ᠢ᠋ᠶ᠋ᠡᠨ ᠪᠠᠷᠢᠵᠤ ᠦᠵᠡᠪᠡ ᠃
ᠨᠠᠴᠤᠭᠳᠣᠷᠵᠢ ᠭᠡᠨᠡᠳᠲᠡ ᠲᠡᠷᠡ ᠰᠠᠢᠬᠠᠨ ᠬᠡᠦᠬᠡᠨ ᠢ᠋ ᠠᠩᠬᠠ ᠬᠠᠷᠠᠭᠰᠠᠨ ᠠ᠋ᠴᠠ ᠡᠬᠢᠯᠡᠨ ᠠᠷᠪᠠᠨ ᠬᠡᠳᠦᠨ ᠨᠠᠰᠤ ᠲᠠᠢ ᠥᠬᠢᠨ ᠤ ᠳᠣᠲᠣᠷᠠ ᠬᠦᠨᠳᠦᠯᠡᠯ ᠪᠠ ᠬᠠᠢᠷᠠ ᠶ᠋ᠢᠨ ᠰᠡᠳᠬᠢᠯ ᠨᠢᠭᠡᠨ ᠵᠡᠷᠭᠡ ᠲᠥᠷᠥᠭᠡᠳ ᠤᠯᠠᠮ ᠢ᠋ᠶ᠋ᠠᠷ ᠨᠠᠴᠤᠭᠳᠣᠷᠵᠢ ᠶ᠋ᠢ ᠠᠷᠢᠬᠢ ᠳᠡᠷᠡᠰᠦᠨ ᠳ᠋ᠦ᠍ ᠣᠷᠣᠵᠤ ᠶᠠᠳᠠᠭᠤᠷᠠᠬᠤ ᠰᠠᠴᠠᠭᠤ᠂ ᠪᠤᠶᠠᠨᠵᠢᠷᠭᠠᠯ ᠥᠬᠢᠨ ᠬᠡᠳᠦᠢᠨ ᠶᠠᠳᠠᠭᠤ ᠵᠦᠳᠡᠭᠦᠦ ᠠᠮᠢᠳᠤᠷᠠᠯ ᠤ᠋ᠨ ᠢ᠋ᠶ᠋ᠠᠨ ᠬᠠᠵᠠᠭᠤ ᠪᠠᠷ ᠡᠯᠳᠡᠪ ᠠᠷᠭᠠ ᠲᠡᠪᠴᠢᠶᠡᠷᠢ᠂ ᠬᠡᠮᠨᠡᠯᠲᠡ ᠠᠷᠪᠢᠯᠠᠯᠲᠠ ᠰᠦᠪᠡᠭᠴᠢᠯᠡᠨ ᠪᠤᠲᠠᠷᠬᠠᠢ ᠮᠥᠩᠭᠥ ᠪᠦᠬᠦᠨ ᠢ᠋ ᠴᠢᠩᠳᠠᠯᠠᠨ ᠴᠤᠭᠯᠠᠭᠤᠯᠤᠭᠰᠠᠭᠠᠷ ᠣᠪᠣᠭᠠ ᠮᠥᠩᠭᠥ ᠬᠤᠷᠠᠮᠳᠤᠭᠤᠯᠤᠭᠰᠠᠨ ᠨᠢ ᠡᠨᠡ ᠬᠠᠳᠠᠭ ᠳᠣᠲᠣᠷᠠ ᠪᠣᠭᠣᠯᠲᠠᠲᠠᠢ ᠪᠠᠢᠭᠠ ᠠᠵᠢ᠃
ᠡᠨᠡ ᠪᠣᠯ ᠨᠠᠴᠤᠭᠳᠣᠷᠵᠢ ᠶ᠋ᠢ ᠥᠭᠡᠳᠡ ᠲᠡᠳᠡᠨ ᠠᠮᠢᠳᠤᠷᠠᠬᠤ ᠪᠤᠶᠠᠨᠵᠢᠷᠭᠠᠯ ᠤ᠋ᠨ ᠥᠪ ᠬᠥᠷᠥᠩᠭᠡ ᠪᠠᠢᠯᠠ᠃ ᠭᠡᠪᠡᠴᠦ ᠣᠳᠣ ᠡᠨᠡ ᠬᠡᠷᠡᠭ ᠦᠭᠡᠢ ᠪᠣᠯᠵᠠᠢ ᠃ ᠪᠤᠶᠠᠨᠵᠢᠷᠭᠠᠯ ᠬᠡᠰᠡᠭ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠨᠢᠭᠡᠨᠲᠡ ᠥᠭᠡᠷᠡ ᠬᠥᠮᠦᠰ ᠡᠰᠡ ᠬᠠᠢᠬᠤᠷᠬᠤ ᠡᠨᠡ ᠬᠥᠮᠦᠨ ᠤ ᠴᠣᠭᠴᠠᠰ ᠢ᠋ ᠣᠯᠠᠨ ᠤ᠋ ᠨᠢᠳᠦᠨ ᠳᠡᠭᠡᠷᠡ ᠢᠩᠭᠢᠵᠦ ᠪᠠᠢᠯᠭᠠᠭᠠᠳ ᠶᠠᠭᠠᠬᠢᠬᠤ ᠪᠣᠢ ᠭᠡᠵᠦ ᠪᠣᠳᠣᠨ ᠠᠯᠪᠠᠨ ᠤ᠋ ᠤᠯᠤᠰ ᠲᠤ᠌ ᠮᠡᠳᠡᠭᠳᠡᠭᠡᠳ᠂ ᠬᠡᠳᠦᠨ ᠬᠢᠲᠠᠳ ᠠᠵᠢᠯᠴᠢᠨ ᠣᠯᠵᠤ ᠦᠨᠡ ᠬᠥᠯᠥᠰᠥ ᠶ᠋ᠢ ᠲᠥᠯᠥᠨ ᠲᠡᠳᠡᠨ ᠢ᠋ᠶ᠋ᠠᠷ ᠨᠠᠴᠤᠭᠳᠣᠷᠵᠢ ᠶ᠋ᠢᠨ ᠪᠡᠶᠡ ᠶ᠋ᠢ ᠬᠣᠲᠠ ᠶ᠋ᠢᠨ ᠣᠷᠣᠰᠢᠭᠤᠯᠭᠠ ᠶ᠋ᠢᠨ ᠭᠠᠵᠠᠷ ᠲᠤ᠌ ᠨᠤᠲᠤᠭᠯᠠᠭᠤᠯᠬᠤ ᠠᠵᠢᠯ ᠢ᠋ ᠲᠡᠷᠡ ᠡᠳᠦᠷ ᠲᠤᠨᠢ ᠬᠢᠯᠭᠡᠵᠦ᠂ ᠬᠤᠷᠠᠯ ᠨᠣᠮ ᠤ᠋ᠨ ᠭᠠᠵᠠᠷ ᠡᠷᠭᠦᠯ ᠪᠣᠯᠭᠠᠵᠤ ᠦᠯᠡᠳᠡᠭᠡᠭᠰᠡᠨ ᠮᠥᠩᠭᠥ ᠪᠡᠨ ᠡᠷᠭᠦᠭᠡᠳ ᠶᠠᠳᠠᠭᠤ ᠪᠣᠷᠣ ᠭᠡᠷ ᠥᠭᠡᠳᠡ ᠪᠡᠨ ᠤᠬᠢᠯᠠᠨ ᠬᠠᠢᠯᠤᠨ ᠪᠤᠴᠠᠭᠰᠠᠨ ᠪᠠᠢᠯᠠ᠃
ᠲᠡᠷᠡ ᠦᠶᠡ ᠳ᠋ᠦ᠍ ᠂ ᠭᠠᠭᠴᠠᠬᠠᠨ ᠪᠤᠶᠠᠨᠵᠢᠷᠭᠠᠯ ᠬᠠᠯᠬᠠ ᠲᠦᠮᠡᠨ ᠤ ᠶᠡᠬᠡ ᠭᠠᠷᠤᠵᠠ ᠶ᠋ᠢ ᠪᠢᠴᠢᠬᠠᠨ ᠨᠢᠷᠤᠭᠤᠨ ᠳ᠋ᠠᠭᠠᠨ ᠡᠭᠦᠷᠦᠨ ᠭᠠᠰᠢᠭᠤᠳᠠᠭᠰᠠᠨ ᠪᠠᠢᠨᠠᠮ ᠃
ᠣᠷᠴᠢᠯᠠᠩ ᠤ᠋ᠨ ᠬᠤᠪᠢ ᠵᠣᠬᠢᠶᠠᠯ ᠤᠨ ᠡᠨᠳᠡᠭᠦᠷᠡᠯ ᠪᠣᠯᠤᠭᠰᠠᠨ ᠲᠡᠷᠡ ᠡᠳᠦᠷ 1937 ᠣᠨ ᠤ᠋ 7 ᠰᠠᠷᠠ ᠶ᠋ᠢᠨ13 ᠤ᠋ ᠡᠳᠦᠷ ᠪᠠᠢᠯᠠ ᠃ 1971.12.31 ᠬᠠᠵᠠᠭᠤ ᠤᠯᠠᠭᠠᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ ᠨᠠᠷᠠᠨ ᠲᠣᠭᠣᠨᠣ