ᠶᠡᠬᠡ ᠲᠩᠷᠢ ᠶ᠋ᠢᠨ ᠳᠦᠯᠠᠢ - ᠰ᠂ ᠪᠤᠶᠠᠨᠨᠡᠮᠡᠬᠦ Их тэнгэрийн дүлэй - С᠂ Буяннэмэх
298ᠶᠡᠬᠡ ᠲᠩᠷᠢ ᠶ᠋ᠢᠨ ᠳᠦᠯᠠᠢ ①
( ᠬᠣᠱᠣᠩ ᠥᠭᠦᠯᠡᠯᠭᠡ )
ᠶᠠᠮᠠᠷ ᠵᠣᠯᠢᠭ ᠰᠢᠭ᠋ ᠨᠥᠵᠢ ᠨᠢ ᠢᠩᠭᠢᠵᠦ ᠤᠭᠯᠠᠭᠰᠠᠨ ᠶᠤᠮ᠂ ᠱᠠᠲᠤᠨ ᠤ᠋ ᠳᠣᠣᠲᠠᠢ ᠨᠢ ᠢᠩᠭᠢᠵᠦ ᠮᠤᠯᠲᠤᠷᠠᠳᠠᠭ ᠢ᠋ ᠪᠢ ᠶᠡᠷᠦ ᠦᠵᠡᠭᠡ ᠦᠭᠡᠢ᠂ ᠬᠠᠷᠢᠨ ᠬᠥᠮᠦᠨ ᠶᠠᠪᠤᠭᠰᠠᠨ ᠳ᠋ᠠᠭᠠᠨ ᠰᠠᠢᠨ ᠪᠣᠯᠤᠯᠠ᠃ ᠬᠡᠷᠪᠡ ᠠᠴᠢᠶᠠ ᠶᠠᠪᠤᠭᠰᠠᠨ ᠪᠣᠯ ᠬᠠᠶᠠᠭᠳᠠᠬᠤ ᠪᠢᠰᠢ ᠦᠦ ᠭᠡᠵᠦ ᠬᠠᠷᠢᠶᠠᠯ ᠢᠷᠦᠭᠡᠯ ᠲᠠᠯᠪᠢᠯᠴᠠᠵᠤ ᠲᠡᠨᠳᠡ ᠪᠡᠨ ᠪᠠᠭᠤᠭᠠᠳ ᠥᠨᠥᠬᠢ ᠲᠡᠮᠡᠭᠡᠨ ᠦ᠌ ᠲᠣᠮᠣ ᠱᠠᠲᠤ ᠶ᠋ᠢ ᠵᠠᠰᠠᠵᠤ ᠳᠣᠣᠲᠠᠢ ᠬᠡᠷᠦᠭᠡ ᠶ᠋ᠢ ᠨᠢ ᠴᠢᠩᠭᠠᠯᠠᠨ ᠵᠠᠰᠠᠵᠤ ᠪᠠᠢᠪᠠ᠃ ᠲᠡᠳᠡᠨ ᠦ᠌ ᠳᠡᠷᠭᠡᠳᠡᠭᠦᠷ ᠮᠠᠰᠢ ᠣᠢᠷᠠᠬᠠᠨ ᠥᠩᠭᠡᠷᠡᠭᠰᠡᠨ ᠨᠢᠭᠡᠨ ᠶᠡᠬᠡ ᠵᠠᠮ ᠤᠷᠤᠭᠰᠢ ᠬᠥᠨᠳᠡᠯᠢᠳᠦᠨ ᠵᠤᠷᠠᠢᠵᠤ ᠬᠢᠵᠠᠭᠠᠷ ᠦᠭᠡᠢ ᠭᠣᠪᠢ ᠳ᠋ᠤ᠌ ᠲᠡᠰᠪᠦᠷᠢ ᠦᠭᠡᠢ ᠣᠳᠤᠭᠰᠠᠨ ᠬᠠᠷᠠᠭᠳᠠᠨᠠ᠃ ᠪᠠᠰᠠ ᠡᠨᠳᠡ ᠲᠡᠨᠳᠡ ᠬᠠᠷᠭᠠᠨᠠ ᠪᠤᠲᠠ ᠪᠠᠭᠰᠢᠷᠠᠨ ᠣᠷᠭᠣᠭᠠᠳ ᠠᠷᠭᠠᠯ ᠵᠠᠷᠭᠠᠯ ᠵᠥᠩᠳᠡᠭᠡᠨ ᠬᠡᠪᠲᠡᠨᠡ᠃ ᠰᠥᠬᠡᠨᠳᠠᠢ ᠬᠡᠵᠢᠶᠡᠨ ᠦ᠌ ᠲᠡᠮᠡᠭᠡ ᠤᠨᠤᠭᠠᠳ ᠶᠠᠪᠤᠬᠤ ᠶ᠋ᠢ ᠵᠠᠪᠳᠤᠲᠠᠯᠠ ᠭᠡᠨᠡᠳᠲᠡ ᠥᠨᠥᠬᠢ ᠬᠠᠯᠴᠠᠭᠠᠢ ᠭᠣᠨᠴᠣᠭ ᠬᠠᠷᠢᠶᠠᠯ ᠲᠠᠯᠪᠢᠭᠠᠳ ᠭᠠᠷᠪᠠ᠃ ᠪᠤᠰᠤᠳ ᠨᠢ ᠮᠥᠨ ᠯᠡ ᠭᠠᠢᠬᠠᠵᠤ ᠪᠠᠰᠠ ᠶᠠᠮᠠᠷ ᠶᠠᠭᠤᠮᠠ ᠨᠢ ᠮᠤᠯᠲᠤᠷᠠᠵᠤ ᠰᠢᠪᠲᠤᠷᠠᠭᠰᠠᠨ ᠶᠤᠮ ᠪᠣᠯ ᠭᠡᠯᠴᠡᠨ ᠪᠤᠴᠠᠵᠤ ᠢᠷᠡᠬᠦ ᠳ᠋ᠦ᠍ ᠬᠠᠯᠴᠠᠭᠠᠢ ᠭᠣᠨᠴᠣᠭ ᠬᠡᠯᠡᠷᠦᠨ᠄
ᠲᠠ ᠨᠠᠷ ᠴᠢᠨᠢ ᠬᠠᠮᠢᠭᠠᠰᠢ ᠪᠠᠨ ᠨᠥᠵᠢ ᠰᠢᠭ ᠬᠥᠮᠦᠰ ᠪᠣᠢ? ᠠᠯᠢ ᠥᠷᠯᠥᠭᠡ ᠭᠠᠷᠤᠭᠠᠳ ᠣᠳᠣ ᠦᠳᠡ ᠥᠩᠭᠡᠷᠡᠲᠡᠯᠡ ᠶᠡᠷᠦ ᠲᠡᠮᠡᠭᠡ ᠮᠠᠯ ᠢ᠋ᠶ᠋ᠠᠨ ᠠᠮᠠᠷᠠᠭᠤᠯᠬᠤ ᠶ᠋ᠢ ᠪᠣᠳᠣᠬᠤ ᠦᠭᠡᠢ᠂ ᠶᠠᠮᠠᠷ ᠦᠬᠦᠭᠰᠡᠨ ᠳ᠋ᠡᠭᠡᠨ ᠶᠠᠭᠠᠷᠠᠭᠰᠠᠨ ᠶᠤᠮ᠃ ᠡᠨᠳᠡ ᠪᠠᠭᠤᠭᠠᠳ ᠲᠡᠮᠡᠭᠡ ᠪᠡᠨ ᠪᠠᠭᠠ ᠢᠳᠡᠭᠦᠯᠵᠦ ᠴᠠᠢ ᠤᠤᠭᠤᠯᠴᠠᠭᠠᠳ ᠣᠷᠣᠢ ᠶ᠋ᠢᠨ ᠰᠡᠷᠢᠭᠦᠨ ᠳ᠋ᠦ᠍ ᠠᠶᠠᠲᠠᠢ ᠶᠠᠪᠤᠪᠠᠯ ᠲᠡᠮᠡᠭᠡ ᠮᠠᠯ ᠳ᠋ᠤ᠌ ᠲᠤᠰᠠᠲᠠᠢ ᠪᠢᠰᠢ ᠦᠦ?᠂ ᠭᠡᠬᠦ ᠳ᠋ᠦ᠍ ᠪᠤᠰᠤᠳ ᠨᠢ ᠳᠠᠷᠤᠢ ᠵᠥᠪᠰᠢᠶᠡᠷᠡᠨ ᠲᠡᠨᠳᠡ ᠪᠡᠨ ᠪᠠᠭᠤᠵᠤ ᠲᠡᠮᠡᠭᠡᠨ ᠦ᠌ ᠠᠴᠢᠶᠠ ᠶ᠋ᠢ ᠪᠠᠭᠤᠯᠭᠠᠵᠤ᠂ ᠲᠣᠭᠣᠭᠠ ᠰᠢᠨᠠᠭᠠ ᠭᠠᠷᠭᠠᠨ ᠠᠶᠠᠭᠠ ᠰᠠᠪᠠ ᠪᠠᠨ ᠬᠠᠩᠭᠢᠨᠠᠭᠤᠯᠵᠤ᠂ ᠠᠷᠭᠠᠯ ᠰᠢᠪᠠᠭ ᠲᠡᠭᠦᠬᠦ᠂ ᠤᠰᠤ ᠠᠪᠴᠢᠷᠠᠬᠤ ᠭᠡᠯᠴᠡᠨ ᠭᠤᠷᠪᠠᠭᠤᠯᠠ ᠪᠠᠨ ᠭᠤᠷᠪᠠᠨ ᠳᠠᠢᠰᠢ ᠶᠠᠭᠠᠷᠠᠨ ᠭᠠᠷᠴᠤ ᠣᠳᠪᠠ᠃ ᠲᠦᠩᠰᠢ ᠶ᠋ᠢᠨ ᠲᠦᠪᠳᠡᠨ ᠭᠡᠭᠴᠢ ᠨᠢ ᠵᠠᠪᠠᠯ ᠬᠠᠭᠤᠷᠠᠢ ᠠᠷᠭᠠᠯ ᠣᠯᠵᠤ ᠲᠦᠯᠡᠬᠦ ᠭᠡᠵᠦ ᠳᠡᠮᠡᠢ ᠲᠡᠨᠦᠭᠰᠡᠭᠡᠷ ᠬᠥᠨᠳᠡᠯᠡᠨ ᠬᠠᠷᠠᠭᠳᠠᠭᠴᠢ ᠶᠡᠬᠡ ᠵᠠᠮ ᠳᠡᠭᠡᠷᠡ ᠬᠦᠷᠴᠦ᠂ ᠡᠨᠡ ᠵᠠᠮ ᠢ᠋ᠶ᠋ᠠᠷ ᠴᠣᠬᠣᠮ ᠶᠠᠭᠤ ᠶᠠᠪᠤᠭᠰᠠᠨ ᠪᠠᠢᠳᠠᠭ ᠪᠣᠯ ᠭᠡᠵᠦ ᠠᠵᠢᠭᠯᠠᠨ ᠦᠵᠡᠪᠡᠯ᠂ ᠶᠡᠷᠦ ᠵᠢᠭ᠍ᠲᠡᠢᠬᠡᠨ ᠵᠢᠭ᠍ᠲᠡᠢᠬᠡᠨ ᠤᠭᠠᠯᠵᠠ ᠲᠠᠢ ᠬᠡ ᠲᠡᠢ ᠵᠢᠷᠪᠢᠭᠢᠷ ᠬᠥᠷᠪᠡᠬᠡᠷ ᠵᠦᠢᠯ ᠪᠦᠷᠢ ᠶ᠋ᠢᠨ ᠤᠷᠠᠨ ᠬᠡᠪ ᠲᠡᠢ ᠮᠥᠷ ᠦ᠋ᠳ ᠭᠠᠷᠤᠭᠰᠠᠨ ᠪᠠᠢᠬᠤ ᠳ᠋ᠤ᠌ ᠶᠡᠬᠡ ᠯᠡ ᠰᠣᠨᠢᠷᠬᠠᠨ ᠭᠠᠢᠬᠠᠵᠤ ᠡᠨᠡ ᠨᠢ ᠶᠠᠮᠠᠷ ᠶᠠᠭᠤᠮᠠᠨ ᠤ᠋ ᠮᠥᠷ ᠪᠣᠯᠬᠤ ᠶ᠋ᠢ ᠪᠣᠳᠣᠵᠤ ᠣᠯᠬᠤ ᠦᠭᠡᠢ ᠵᠣᠭᠰᠣᠵᠤ ᠪᠠᠢᠲᠠᠯᠠ ᠬᠡᠪ ᠭᠡᠨᠡᠳᠲᠡ ᠲᠡᠭᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠨᠢᠭᠡ ᠲᠣᠮᠣ ᠪᠥᠨᠲᠥᠭᠡᠷ ᠶᠠᠭᠤᠮᠠ ᠵᠠᠮ ᠳᠡᠭᠡᠷᠡ ᠬᠡᠪᠲᠡᠵᠦ ᠪᠠᠢᠪᠠ᠃ ᠲᠦᠩᠰᠢ ᠶ᠋ᠢᠨ ᠲᠦᠪᠳᠡᠨ ᠶᠡᠬᠡ ᠯᠡ ᠭᠠᠢᠬᠠᠵᠤ ᠠᠯᠠᠭᠤᠷ ᠠᠯᠭᠤᠷ ᠠᠯᠬᠤᠭᠰᠠᠭᠠᠷ ᠣᠴᠢᠪᠠ ᠃ ᠦᠵᠡᠪᠡᠯ ᠨᠢᠭᠡ ᠬᠣᠵᠢᠭᠢᠷ ᠰᠢᠷᠠ ᠲᠣᠰᠣ ᠠᠵᠤᠭᠤ᠃ ᠲᠦᠩᠰᠢ ᠶ᠋ᠢᠨ ᠲᠦᠪᠳᠡᠨ ᠶᠡᠬᠡᠳᠡ ᠪᠠᠶᠠᠷᠯᠠᠵᠤ ᠣᠴᠢᠵᠤ ᠠᠪᠬᠤ ᠭᠡᠰᠡᠨ ᠪᠣᠯᠪᠠᠴᠤ ᠪᠠᠰᠠ ᠯᠠ ᠭᠡᠳᠡᠷᠭᠦ ᠪᠣᠯᠤᠭᠠᠳ ᠳᠣᠲᠣᠷᠠ ᠪᠠᠨ ᠪᠤᠳᠤᠷᠤᠨ᠄ ᠦᠭᠡᠢ ᠡᠨᠡ ᠶᠡᠷᠦ ᠦᠬᠦᠭᠰᠡᠨ ᠬᠥᠮᠦᠨ ᠦ᠌ ᠶᠠᠭᠤᠮᠠ ᠪᠠᠢᠬᠤ ᠮᠠᠭᠠᠳ ᠦᠭᠡᠢ ᠭᠡᠵᠦ ᠰᠡᠵᠢᠭᠯᠡᠭᠡᠳ ᠠᠪᠤᠯ ᠦᠭᠡᠢ ᠡᠢᠰᠢ ᠳᠠᠢᠰᠢ ᠬᠠᠷᠠᠪᠠᠯ ᠰᠦᠬᠡᠨᠳᠠᠢ ᠲᠡᠭᠦᠨ ᠦ᠌ ᠳᠡᠷᠭᠡᠳᠡ ᠮᠠᠰᠢ ᠣᠢᠷᠠᠬᠠᠨ ᠰᠢᠪᠠᠭ ᠲᠡᠭᠦᠵᠦ ᠶᠠᠪᠤᠨᠠ᠃
ᠲᠦᠩᠰᠢ ᠶ᠋ᠢᠨ ᠲᠦᠪᠳᠡᠨ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠨ ᠡᠷᠭᠦᠵᠦ ᠳᠠᠯᠠᠯᠤᠨ ᠳᠠᠭᠤᠳᠠᠵᠤ᠄ ᠬᠥᠶᠢ ᠨᠠᠭᠠᠰᠢ ᠢᠷᠡ ᠨᠠᠭᠠᠰᠢ ᠢᠷᠡ᠂ ᠡᠨᠳᠡ ᠰᠣᠨᠢᠨ ᠶᠠᠭᠤᠮᠠ ᠪᠠᠢᠨᠠ᠂ ᠰᠣᠨᠢᠨ ᠶᠠᠭᠤᠮᠠ ᠪᠠᠢᠨᠠ᠃ ᠰᠦᠬᠡᠨᠳᠠᠢ ᠲᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ ᠶᠠᠭᠠᠷᠠᠨ ᠬᠦᠷᠴᠦ ᠢᠷᠡᠭᠡᠳ ᠴᠢ ᠶᠠᠭᠤᠨ ᠳ᠋ᠤ᠌ ᠨᠠᠮᠠ ᠶ᠋ᠢ ᠳᠠᠭᠤᠳᠠᠪᠠ᠂ ᠶᠠᠭᠤ ᠪᠣᠯᠤᠭᠰᠠᠨ ᠪᠣᠢ? ᠲᠡᠮᠡᠭᠡ ᠶᠠᠪᠤᠴᠢᠬᠠᠪᠠ ᠤᠤ? ᠭᠡᠵᠦ ᠪᠠᠢᠪᠠ᠃ ᠲᠦᠩᠰᠢ ᠶ᠋ᠢᠨ ᠲᠦᠪᠳᠡᠨ᠄ ᠦᠭᠡᠢ ᠴᠢ ᠦᠵᠡ ᠭᠡᠵᠦ ᠲᠡᠷᠡ ᠪᠥᠨᠲᠥᠭᠡᠷ ᠶᠠᠭᠤᠮᠠ ᠶ᠋ᠢ ᠬᠤᠷᠤᠭᠤ ᠪᠠᠷ ᠵᠢᠭᠠᠵᠤ ᠡᠨᠡ ᠬᠣᠵᠢᠭᠢᠷ ᠰᠢᠷᠠ ᠲᠣᠰᠣ ᠬᠡᠪᠲᠡᠵᠦ ᠪᠠᠢᠨᠠ ᠪᠢᠰᠢ ᠦᠦ? ᠭᠡᠪᠡ᠃ ᠰᠦᠬᠡᠨᠳᠠᠢ ᠦᠵᠡᠭᠡᠳ᠄ ᠬᠥᠶᠢ ᠲᠡᠢᠮᠦ ᠪᠠᠢᠨᠠ᠂ ᠴᠢ ᠲᠡᠭᠡᠭᠡᠳ ᠠᠪᠬᠤ ᠦᠭᠡᠢ ᠶᠠᠭᠤ ᠬᠢᠵᠦ ᠪᠠᠢᠭᠠ ᠶᠤᠮ ? ᠲᠦᠩᠰᠢ ᠶ᠋ᠢᠨ ᠲᠦᠪᠳᠡᠨ᠄ ᠪᠢ ᠬᠠᠷᠢᠨ ᠠᠪᠬᠤ ᠭᠡᠰᠡᠨ ᠢ᠋ᠶ᠋ᠡᠷ ᠰᠡᠵᠢᠭᠯᠡᠭᠡᠳ ᠴᠢᠮᠠ ᠶ᠋ᠢ ᠳᠠᠭᠤᠳᠠᠭᠰᠠᠨ ᠶᠤᠮ ᠭᠡᠪᠡ᠃ ᠰᠦᠬᠡᠨᠳᠡᠢ᠄ ᠤᠨᠲᠤᠭᠤᠴᠠᠵᠤ ᠶᠠᠭᠤᠨ ᠳ᠋ᠤ᠌ ᠰᠡᠵᠢᠭᠯᠡᠭᠰᠡᠨ ᠶᠦᠮ᠂ ᠠᠪᠤᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ᠭᠡᠳ ᠥᠨᠥᠬᠢ ᠬᠣᠵᠢᠭᠢᠷ ᠰᠢᠷᠠ ᠲᠣᠰᠣ ᠶ᠋ᠢ ᠶᠠᠭᠠᠷᠠᠨ ᠣᠴᠢᠵᠤ ᠰᠢᠭᠦᠷᠡᠨ ᠠᠪᠲᠠᠯᠠ᠂ ᠬᠠᠷᠢᠨ ᠬᠥᠩᠭᠡᠨ ᠪᠥᠭᠡᠳ ᠳᠣᠲᠣᠷᠠ ᠨᠢ ᠶᠠᠭᠤᠮᠠ ᠴᠤ᠌ ᠦᠭᠡᠢ ᠬᠥᠨᠳᠡᠢ ᠰᠠᠪᠠ ᠰᠢᠭ᠋ ᠪᠠᠢᠪᠠ᠃ ᠬᠣᠶᠠᠭᠤᠯᠠ ᠪᠠᠨ ᠶᠡᠬᠡᠳᠡ ᠭᠠᠶ᠋ᠢᠬᠠᠵᠤ ᠶᠠᠮᠠᠷ ᠭᠡᠭᠴᠢ ᠶᠢ ᠮᠡᠳᠡᠯ ᠥᠭᠡᠢ ᠶᠠᠭᠤ ᠴᠤ᠌ ᠠᠲᠤᠭᠠᠢ ᠬᠠᠭᠠᠯᠵᠤ ᠥᠵᠡᠶᠡ ᠭᠡᠳ᠂ ᠨᠦᠭᠦᠭᠡ ᠨᠢ ᠭᠢᠲᠤᠭᠠ ᠭᠠᠷᠭᠠᠵᠤ ᠨᠢᠭᠡᠨ ᠡᠲᠡᠭᠡᠳ ᠡᠴᠡ ᠵᠥᠰᠥᠵᠤ ᠥᠵᠡᠪᠡᠯ᠂ ᠳᠤᠲᠤᠷᠠ ᠪᠠᠨ ᠮᠠᠰᠢ ᠵᠦᠭᠡᠯᠡᠨ ᠰᠡᠪᠰᠡᠭᠡᠷ ᠶᠠᠭᠤᠮᠠ ᠪᠠᠷ ᠪᠥᠷᠢᠯᠳᠥᠨ ᠪᠦᠲᠦᠭᠰᠡᠨ ᠶᠡᠷᠦ ᠨᠢᠭᠡ ᠮᠦᠬᠥ ᠮᠡᠲᠥ ᠤᠷᠭᠤᠮᠠᠯ ᠤᠨ ᠵᠥᠢᠯ ᠪᠠᠶ᠋ᠢᠪᠠ᠃ ᠬᠤᠶᠠᠭᠤᠯᠠ ᠪᠠᠨ ᠭᠠᠶ᠋ᠢᠬᠠᠵᠤ ᠶᠠᠳᠠᠭᠠᠳ ᠤᠴᠢᠷ ᠢ ᠤᠯᠤᠭᠰᠠᠨ ᠥᠭᠡᠢ ᠨᠦᠭᠦᠭᠡ ᠬᠠᠯᠴᠠᠭᠠᠢ ᠭᠤᠨᠴᠤᠭ ᠲᠠᠭᠠᠨ ᠥᠵᠡᠭᠦᠯᠭᠦ ᠭᠡᠵᠤ ᠠᠪᠴᠤ ᠢᠷᠡᠪᠡ᠃
ᠲᠡᠷᠡ ᠬᠤᠶᠠᠷ ᠠᠶᠠᠨᠴᠢᠨ ᠰᠤᠨᠢᠨ ᠵᠢᠭᠲᠡᠢ ᠶᠠᠭᠤᠮᠠ ᠶᠢ ᠲᠡᠪᠡᠷᠢᠭᠰᠡᠭᠡᠷ ᠪᠠᠰᠠ ᠯᠠ ᠠᠷᠵᠠᠶ᠋ᠢᠲᠠᠯᠠ ᠢᠨᠢᠶᠡᠯᠳᠦᠭᠰᠡᠭᠡᠷ ᠭᠥᠷᠴᠦ ᠢᠷᠡᠪᠡ᠃ ᠨᠦᠭᠦᠭᠡ ᠬᠠᠯᠴᠠᠭᠠᠢ ᠭᠤᠨᠴᠤᠭ ᠬᠡᠳᠥᠢᠨ ᠤ ᠭᠥᠷᠴᠥ ᠢᠷᠡᠭᠡᠳ ᠭᠠᠯ ᠢᠶ᠋ᠠᠨ ᠨᠤᠴᠤᠭᠠᠵᠤ ᠶᠡᠬᠡᠳᠡ ᠬᠠᠷᠢᠶᠠᠯ ᠵᠦᠭᠡᠯ ᠲᠠᠯᠪᠢᠵᠤ ᠰᠠᠭᠤᠲᠠᠯᠠ᠂ ᠡᠨᠡ ᠬᠤᠶᠠᠷ ᠢ ᠬᠠᠷᠠᠭᠠᠳ ᠪᠠᠰᠠ ᠪᠠᠷᠢᠭᠰᠠᠨ ᠶᠠᠭᠤᠮᠠ ᠶᠢ ᠨᠢ ᠥᠵᠡᠭᠡᠳ ᠶᠡᠬᠡ ᠯᠠ ᠬᠥᠯᠢᠷᠡᠵᠤ᠂ ᠲᠠ ᠬᠤᠶᠠᠷ ᠡᠶ᠋ᠢᠮᠦ ᠤᠳᠠᠲᠠᠯᠠ ᠬᠠᠮᠢᠭᠠ ᠶᠠᠮᠠᠷ ᠥᠬᠥᠭᠰᠡᠨ ᠬᠠᠬᠠᠭᠰᠠᠨ ᠢᠶ᠋ᠠᠨ ᠲᠡᠭᠥᠵᠤ ᠶᠠᠪᠤᠭᠰᠠᠨ ᠶᠤᠮ ᠭᠡᠪᠡ᠃ ᠰᠥᠭᠡᠨᠲᠡᠢ ᠢᠨᠢᠶᠡᠨ ᠬᠡᠯᠡᠷᠥᠨ᠄ ᠴᠢ ᠮᠡᠳᠡᠬᠦ ᠥᠭᠡᠢ ᠪᠠᠶ᠋ᠢᠨᠠ᠂ ᠪᠢᠳᠠ ᠬᠤᠶᠠᠷ ᠡᠶ᠋ᠢᠮᠦ ᠤᠳᠠᠲᠠᠯᠠ ᠶᠠᠪᠤᠬᠤ ᠳᠠᠭᠠᠨ ᠨᠢᠭᠡ ᠰᠤᠨᠢᠨ ᠶᠠᠭᠤᠮᠠ ᠤᠯᠵᠤ ᠢᠷᠡᠪᠡ᠃ ᠪᠢᠳᠠ ᠬᠤᠶᠠᠷ ᠠᠩᠬᠠᠨ ᠳᠤ ᠬᠤᠵᠢᠭᠡᠷ ᠰᠢᠷᠠ ᠳᠤᠰᠤ ᠭᠡᠵᠤ ᠬᠠᠭᠤᠷᠳᠠᠵᠤ ᠪᠠᠶ᠋ᠢᠲᠠᠯᠠ ᠠᠳᠠᠭ ᠲᠤ ᠬᠠᠷᠢᠨ ᠲᠠᠨᠢᠬᠤ ᠥᠭᠡᠢ ᠶᠠᠭᠤᠮᠠ ᠪᠤᠯᠵᠤ᠂ ᠶᠠᠳᠠᠬᠤ ᠳᠠᠭᠠᠨ ᠠᠪᠴᠤ ᠢᠷᠡᠪᠡ᠃ ᠮᠠᠨ ᠤ ᠬᠠᠭᠤᠴᠢᠨ ᠬᠥᠮᠥᠨ ᠴᠢ ᠥᠵᠡ ᠭᠡᠵᠤ ᠦᠨᠦᠬᠢ ᠪᠦᠨᠳᠦᠭᠡᠷ ᠶᠠᠭᠤᠮᠠ ᠪᠠᠨ ᠦᠭᠴᠦ ᠤᠷᠬᠢᠪᠠ᠃ ᠬᠠᠯᠴᠠᠭᠠᠢ ᠭᠤᠨᠴᠤᠭ ᠬᠥᠯᠢᠶᠡᠨ ᠠᠪᠴᠤ ᠡᠷᠭᠢᠭᠥᠯᠦᠨ ᠲᠤᠭᠤᠷᠢᠭᠤᠯᠤᠨ ᠥᠵᠡᠵᠤ ᠥᠵᠡᠭᠡᠳ ᠶᠠᠭᠠᠷᠠᠨ ᠳᠡᠪᠡᠯ ᠢᠶ᠋ᠠᠨ ᠲᠠᠶ᠋ᠢᠯᠵᠤ ᠪᠠᠶ᠋ᠢᠪᠠ ᠃ ᠨᠦᠭᠦᠭᠡ ᠬᠤᠶᠠᠷ ᠨᠢ ᠶᠡᠬᠡ ᠯᠠ ᠭᠠᠶ᠋ᠢᠬᠠᠨ ᠬᠠᠷᠠᠵᠤ ᠪᠠᠶ᠋ᠢᠲᠠᠯᠠ ᠴᠠᠮᠴᠠ ᠪᠠᠨ ᠲᠠᠶ᠋ᠢᠯᠤᠭᠠᠳ ᠲᠡᠷᠡ ᠶᠠᠭᠤᠮᠠ ᠶᠢ ᠴᠠᠮᠴᠠᠨ ᠳᠠᠭᠠᠨ ᠬᠤᠮᠢᠵᠤ ᠬᠤᠶ᠋ᠢᠳᠤ ᠲᠠᠯᠠ ᠳᠤ ᠲᠠᠯᠪᠢᠭᠠᠳ᠂ ᠠᠮᠠᠨ ᠳᠠᠭᠠᠨ ᠨᠢᠭᠡ ᠶᠠᠭᠤᠮᠠ ᠶᠠᠷᠢᠵᠤ᠂ ᠪᠠᠰᠠ ᠯᠠ ᠬᠠᠷᠢᠶᠠᠯ ᠲᠠᠯᠪᠢᠬᠤ ᠰᠠᠨᠠᠭᠠᠳᠠᠢ ᠡᠨᠡ ᠬᠤᠶᠠᠷ ᠢ ᠮᠠᠭᠤᠬᠠᠢ ᠬᠠᠷᠠᠵᠤ ᠪᠠᠶ᠋ᠢᠨᠠ᠃
ᠲᠥᠪᠳᠡᠨ ᠲᠡᠭᠥᠨ ᠦ ᠪᠠᠶ᠋ᠢᠳᠠᠯ ᠢ ᠬᠠᠷᠠᠵᠤ ᠳᠠᠰᠴᠤ ᠶᠠᠳᠠᠨ ᠢᠨᠢᠶᠡᠳᠥᠮ ᠠᠯᠳᠠᠵᠤ ᠪᠠᠶ᠋ᠢᠬᠤ ᠳᠤ ᠬᠠᠯᠴᠠᠭᠠᠢ ᠭᠤᠨᠴᠤᠭ ᠤᠨ ᠠᠭᠤᠷ ᠨᠢ ᠬᠦᠷᠴᠦ ᠰᠢᠯᠦᠰᠦ ᠨᠢ ᠪᠤᠷᠭᠢᠵᠤ ᠶᠠᠮᠠᠷ ᠥᠬᠥᠭᠰᠡᠨ ᠬᠠᠬᠠᠭᠰᠠᠨ ᠳᠠᠭᠠᠨ ᠢᠨᠢᠶᠡᠭᠰᠡᠨ ᠵᠤᠯᠢᠭ ᠤᠳ ᠪᠤᠢ᠂ ᠡᠶ᠋ᠢᠮᠦ ᠴᠤᠬᠠᠭ ᠵᠥᠢᠯ ᠢ ᠤᠯᠤᠭᠰᠠᠨ ᠠᠲᠠᠯᠠ ᠵᠠᠶᠠᠭᠠ ᠮᠠᠭᠤᠳᠠᠢ ᠵᠤᠯᠢᠭ ᠤᠳ ᠪᠦᠬᠦᠯᠢ ᠪᠡᠷ ᠨᠡᠳᠡ ᠳᠦ ᠠᠪᠴᠢᠷᠠᠵᠤ ᠥᠵᠡᠬᠥᠯᠬᠦ ᠥᠭᠡᠢ᠃ ᠬᠠᠷᠢᠨ ᠬᠠᠭᠠᠯᠵᠤ ᠡᠪᠳᠡᠭᠰᠡᠨ ᠶᠠᠮᠠᠷ ᠮᠠᠭᠤ ᠢᠷᠣᠠ ᠶᠢᠨ ᠨᠢᠭᠥᠯ ᠲᠠᠢ ᠵᠤᠯᠢᠭ ᠤᠳ ᠪᠤᠢ ᠭᠡᠵᠤ ᠳᠠᠬᠢᠨ ᠳᠠᠬᠢᠨ ᠬᠠᠷᠢᠶᠠᠨᠠ᠂ ᠬᠠᠯᠴᠠᠭᠠᠢ ᠭᠤᠨᠴᠤᠭ ᠤᠨ ᠬᠠᠷᠢᠶᠠᠯᠴᠢ ᠨᠢ ᠤᠭ ᠠᠴᠠ ᠨᠡᠷᠡᠲᠡᠢ ᠲᠤᠯᠠ ᠨᠥᠭᠦᠭᠡ ᠬᠤᠶᠠᠷ ᠨᠢ ᠲᠡᠭᠥᠨ ᠦ ᠬᠠᠷᠢᠶᠠᠬᠤ ᠶᠢ ᠶᠡᠷᠥ ᠶᠠᠭᠤᠮᠠ ᠶᠢᠨ ᠲᠡᠳᠥᠢ ᠪᠤᠳᠤᠬᠤ ᠥᠭᠡᠢ ᠪᠥᠭᠡᠳ ᠬᠠᠷᠢᠨ ᠲᠡᠭᠥᠨ ᠦ ᠬᠡᠯᠡᠭᠰᠡᠨ ᠴᠢᠬᠤᠯᠠ ᠡᠷᠳᠡᠨᠢ ᠭᠡᠰᠡᠨ ᠨᠢ ᠶᠠᠭᠤ ᠪᠣᠯᠬᠤ ᠶᠢ ᠠᠰᠠᠭᠤᠬᠤ ᠭᠡᠵᠦ ᠰᠥᠭᠡᠲᠡᠢ ᠡᠢᠨ ᠬᠡᠯᠡᠷᠦᠨ ᠄
ᠵᠠ ᠶᠠᠷᠰᠢᠭ ᠳ᠋ᠠ ᠂ ᠬᠠᠷᠢᠶᠠᠯ ᠲᠠᠯᠪᠢᠬᠤ ᠶᠠᠭᠤ ᠪᠣᠢ ? ᠬᠠᠷᠢᠨ ᠶᠠᠭᠤᠮᠠ ᠶᠢ ᠲᠠᠨᠢᠬᠤ ᠪᠣᠯ ᠣᠴᠢᠷ ᠢ ᠪᠢᠳᠡ ᠬᠣᠶᠠᠷ ᠲᠤ ᠬᠡᠯᠡᠵᠦ ᠠᠯᠢ ᠭᠡᠪᠡ ᠃ ᠬᠠᠯᠴᠠᠭᠠᠢ ᠭᠣᠨᠴᠣᠭ ᠬᠡᠳᠥᠢ᠋ᠪᠡᠷ ᠬᠠᠷᠢᠶᠠᠯᠴᠢ ᠮᠠᠭᠤ ᠵᠠᠩ ᠲᠠᠢ ᠪᠣᠯᠪᠠᠴᠤ ᠬᠠᠷᠢᠭᠤᠴᠠᠬᠤ ᠬᠥᠮᠦᠨ ᠭᠠᠷᠪᠠᠯ ᠨᠤᠭᠤᠯᠤᠷᠠᠬᠤ ᠨᠢ ᠮᠥᠨ ᠵᠥᠭᠡᠯᠡᠨ ᠠᠵᠤᠭᠤ ᠃ ᠰᠦᠭᠡᠨᠲᠡᠢ ᠶᠢᠨ ᠲᠡᠷᠡ ᠬᠦ ᠠᠰᠠᠭᠤᠯᠲᠠ ᠶᠢ ᠰᠣᠨᠣᠰᠤᠭᠠᠳ ᠳᠠᠷᠤᠢ ᠡᠶᠡᠯᠳᠡᠭ ᠴᠢᠷᠠᠢ ᠭᠠᠷᠭᠠᠨ ᠬᠡᠯᠡᠷᠦᠨ ᠄
ᠠᠢ ᠲᠠ ᠬᠣᠶᠠᠷ ᠶᠠᠭᠤ ᠴᠤ᠌ ᠦᠵᠡᠵᠦ ᠶᠠᠭᠤ ᠴᠤ᠌ ᠰᠣᠨᠣᠰᠤᠭᠠ ᠥᠬᠡᠢ ᠳᠡᠭᠡᠨ ᠲᠡᠨᠡᠭ ᠮᠤᠩᠬᠠᠭ ᠤᠨ ᠲᠤᠶ᠋ᠢᠯ ᠪᠣᠯᠣᠭᠰᠠᠨ ᠬᠥᠮᠦᠰ ᠪᠠᠶ᠋ᠢᠨᠠ ᠃ ᠡᠨᠡ ᠬᠡᠮᠡᠭᠴᠢ ᠲᠥᠢᠯ ᠤᠨ ᠴᠢᠬᠤᠯᠠ ᠡᠷᠳᠡᠨᠢ ᠶᠢᠨ ᠵᠦᠢᠯ ᠪᠣᠯᠵᠠᠢ ᠃ ᠡᠭᠦᠨ ᠤ ᠨᠡᠷᠡ ᠶᠢ ᠶᠡᠬᠡ ᠲᠡᠭᠷᠢ ᠶᠢᠨ ᠳᠦᠯᠡᠢ ᠭᠡᠳᠡᠭ ᠪᠣᠯᠬᠤ ᠂ ᠡᠭᠦᠨ ᠢ ᠣᠯᠵᠤ ᠳᠠᠬᠢᠭᠰᠠᠨ ᠶᠠᠮᠠᠷᠪᠠ ᠬᠥᠮᠦᠰ ᠪᠤᠶᠠᠨ ᠤ ᠳᠡᠭᠡᠳᠦ ᠂ ᠪᠠᠶᠠᠨ ᠤ ᠵᠤᠵᠠᠭᠠᠨ ᠢ ᠡᠳ᠋ᠯᠡᠵᠦ ᠨᠠᠰᠤᠨ ᠲᠤᠷᠰᠢ ᠵᠢᠷᠭᠠᠵᠤ ᠂ ᠦᠷᠡ ᠠᠴᠢ ᠳᠡᠯᠭᠡᠷᠡᠵᠦ ᠂ ᠳᠡᠭᠡᠳᠦ ᠶᠢᠨ ᠮᠥᠷ ᠢ ᠣᠯᠬᠤ ᠰᠠᠶ᠋ᠢᠨ ᠵᠠᠶᠠᠭᠠᠲᠠᠨ ᠪᠣᠯᠳᠠᠭ ᠪᠣᠯᠠᠢ ᠭᠡᠪᠡ ᠃ ᠨᠥᠭᠥᠭᠡ ᠬᠣᠶᠠᠷ ᠨᠢ ᠲᠡᠭᠦᠨ ᠢ ᠰᠣᠨᠣᠰᠤᠭᠠᠳ ᠴᠥᠮ ᠭᠠᠶ᠋ᠢᠬᠠᠯᠴᠠᠨ ᠨᠠᠩ ᠢᠯᠠᠩᠭᠤᠶᠠ ᠲᠦᠩᠰᠢ ᠶᠢᠨ ᠲᠥᠪᠳᠡᠨ ᠤ ᠬᠠᠷᠠᠮ ᠰᠡᠳᠬᠢᠯ ᠨᠢ ᠬᠥᠳᠡᠯᠵᠦ ᠶᠠᠭᠠᠷᠠᠨ ᠢᠢᠨ ᠬᠡᠯᠡᠷᠦᠨ ᠄ ᠲᠡᠶ᠋ᠢᠮᠥ ᠪᠣᠯ ᠡᠨᠡ ᠴᠢᠨᠢ ᠦᠨᠡᠬᠡᠷ ᠡᠷᠳᠡᠨᠢ ᠶᠤᠮ ᠤᠤ ? ᠬᠠᠯᠴᠠᠭᠠᠢ ᠭᠣᠨᠴᠣᠭ ᠳᠠᠷᠤᠢ ᠨᠢᠳᠦ ᠪᠠᠨ ᠲᠣᠮᠣ ᠪᠣᠯᠭᠠᠵᠤ ᠶᠡᠬᠡ ᠳᠠᠭᠤ ᠭᠠᠷᠭᠠᠨ ᠴᠢ ᠶᠠᠮᠠᠷ ᠬᠥᠮᠦᠨ ᠤ ᠦᠭᠡ ᠮᠡᠳᠡᠳᠡᠭ ᠥᠬᠡᠢ ᠮᠤᠨᠤᠰᠢ ᠪᠣᠢ ᠂ ᠡᠨᠡ ᠨᠢ ᠶᠡᠬᠡ ᠲᠡᠭᠷᠢ ᠶᠢᠨ ᠳᠦᠯᠡᠢ ᠬᠡᠮᠡᠭᠴᠢ ᠡᠷᠳᠡᠨᠢ ᠪᠣᠯᠠᠢ ᠬᠡᠮᠡᠨ ᠪᠢ ᠬᠡᠯᠡᠵᠦ ᠪᠠᠶ᠋ᠢᠭᠠ ᠪᠢᠰᠢ ᠤᠤ ? ᠭᠡᠪᠡ ᠃
ᠲᠦᠩᠰᠢ ᠶᠢᠨ ᠲᠥᠪᠳᠡᠨ ᠲᠡᠶ᠋ᠢᠮᠦ ᠪᠣᠯ ᠡᠭᠦᠨ ᠢ ᠠᠩᠬᠠ ᠣᠯᠬᠤ ᠳᠤ ᠲᠥᠪᠳᠡᠨ ᠪᠢ ᠣᠯᠤᠭᠰᠠᠨ ᠶᠤᠮ ᠂ ᠡᠨᠡ ᠡᠦᠲᠦ ᠮᠢᠨᠦᠬᠢ ᠪᠣᠯᠬᠤ ᠶᠣᠮ ᠪᠠᠶ᠋ᠢᠨᠠ ᠂ ᠭᠡᠲᠡᠯᠡ ᠬᠠᠯᠴᠠᠭᠠᠢ ᠭᠣᠨᠴᠣᠭ ᠪᠣᠰᠤᠨ ᠬᠠᠷᠠᠶ᠋ᠢᠵᠤ ᠠᠭᠤᠷᠯᠠᠨ ᠵᠠᠩᠳᠤᠷᠴᠤ ᠴᠢ ᠶᠠᠮᠠᠷ ᠵᠦᠳᠡᠭ ᠤᠨ ᠵᠣᠯᠢᠭ ᠪᠣᠢ ᠂ ᠡᠨᠡ ᠵᠠᠮ ᠢᠶ᠋ᠠᠷ ᠭᠤᠷᠪᠠᠭᠤᠯᠠ ᠶᠠᠪᠤᠭᠠ ᠠᠲᠠᠯᠠ ᠬᠠᠷᠢᠨ ᠭᠠᠭᠴᠠᠭᠠᠷ ᠡᠵᠡᠷᠬᠡᠬᠦ ᠪᠣᠢ ᠤᠤ ? ᠴᠢ ᠠᠩᠬᠠ ᠣᠯᠤᠭᠰᠠᠨ ᠬᠡᠮᠡᠪᠡᠴᠦ ᠪᠢ ᠠᠩᠬᠠ ᠲᠠᠨᠢᠭᠰᠠᠨ ᠪᠢᠰᠢ ᠤᠤ ? ᠶᠠᠭᠤ ᠴᠤ᠌ ᠠᠲᠤᠭᠠᠢ ᠭᠤᠷᠪᠠᠭᠤᠯᠠ ᠬᠡᠮ ᠲᠡᠭᠰᠢ ᠬᠤᠪᠢᠶᠠᠨᠠ ᠭᠡᠪᠡ ᠃ ᠨᠥᠭᠥᠭᠡ ᠰᠦᠭᠡᠨᠳᠡᠢ ᠨᠢ ᠣᠴᠢᠷ ᠢ ᠰᠠᠶ᠋ᠢᠨ ᠣᠯᠤᠭᠠ ᠥᠬᠡᠢ ᠪᠠᠰᠠ ᠯᠠ ᠭᠠᠢᠬᠠᠭᠰᠠᠨ ᠪᠥᠭᠡᠳ ᠠᠰᠠᠭᠤᠷᠤᠨ ᠄
ᠵᠠ ᠨᠥᠬᠥᠳ ᠡᠨᠡ ᠬᠦ᠌ ᠶᠠᠯᠢᠮ ᠥᠬᠡᠢ ᠶᠠᠭᠤᠮᠠᠨ ᠳᠡᠭᠡᠷᠡ ᠪᠣᠤ ᠲᠡᠮᠡᠴᠡᠯᠳᠦᠶᠡ ᠂ ᠬᠡᠨ ᠴᠤ᠌ ᠠᠪᠤᠭᠰᠠᠨ ᠶᠠᠭᠠᠬᠢᠬᠤ ᠪᠣᠢ ᠂ ᠪᠢ ᠲᠡᠭᠦᠨ ᠠᠴᠠ ᠠᠪᠤᠶᠠ ᠭᠡᠵᠦ ᠰᠠᠨᠠᠬᠤ ᠥᠬᠡᠢ ᠂ ᠭᠠᠭᠴᠠ ᠬᠦ᠌ ᠮᠢᠨᠦ ᠭᠠᠶ᠋ᠢᠬᠠᠬᠤ ᠨᠢ ᠡᠨᠡ ᠬᠦ᠌ ᠶᠠᠭᠤᠮᠠ ᠶᠢ ᠲᠡᠭᠷᠢ ᠶᠢᠨ ᠳᠦᠯᠡᠢ ᠭᠡᠬᠦ ᠳᠤ ᠢᠲᠡᠭᠡᠬᠦ ᠥᠬᠡᠢ ᠪᠠᠶ᠋ᠢᠨᠠ ᠂ ᠮᠢᠨᠦ ᠦᠵᠡᠭᠰᠡᠨ ᠲᠡᠭᠷᠢ ᠶᠢᠨ ᠳᠦᠯᠡᠢ ᠪᠣᠯ ᠰᠢᠪᠠᠭᠤᠨ ᠤ ᠥᠨᠳᠡᠭᠡ ᠰᠢᠭ᠌ ᠶᠠᠭᠤᠮᠠ ᠪᠠᠶ᠋ᠢᠳᠠᠭ ᠪᠥᠭᠡᠳ ᠪᠦᠷ ᠲᠣᠮᠣ ᠳᠠᠭᠠᠨ ᠠᠶᠠᠭᠠᠨ ᠤ ᠠᠮᠠᠰᠠᠷ ᠠᠴᠠ ᠲᠣᠮᠣ ᠥᠬᠡᠢ ᠪᠠᠶ᠋ᠢᠳᠠᠭ ᠪᠣᠯᠠᠢ ᠃ ᠭᠡᠲᠡᠯᠡ ᠡᠶ᠋ᠢᠮᠥ ᠲᠣᠮᠣ ᠲᠡᠭᠷᠢ ᠶᠢᠨ ᠳᠦᠯᠡᠢ ᠬᠠᠮᠢᠭᠠ ᠠᠴᠠ ᠭᠠᠷᠴᠤ ᠬᠠᠯᠴᠠᠭᠠᠢ ᠵᠠᠮ ᠳᠡᠭᠡᠷᠡ ᠤᠷᠭᠤᠳᠠᠭ ᠪᠢᠯᠠ ᠂ ᠲᠡᠷᠡ ᠨᠢ ᠶᠡᠷᠦ ᠰᠡᠵᠢᠭ ᠲᠠᠢ ᠬᠡᠷᠡᠭ ᠰᠢᠭ᠌ ᠰᠠᠨᠠᠭᠳᠠᠨᠠ ᠂ ᠭᠡᠲᠡᠯᠡ ᠬᠠᠯᠴᠠᠭᠠᠢ ᠭᠣᠨᠴᠣᠭ ᠬᠠᠵᠠᠭᠤ ᠲᠠᠯᠠ ᠠᠴᠠ ᠤᠨᠲᠤᠭᠤᠴᠠᠵᠤ ᠬᠡᠯᠡᠷᠦᠨ ᠄
ᠬᠠᠷᠢᠨ ᠪᠢ ᠴᠢᠮᠡ ᠳᠦ ᠬᠡᠯᠡᠵᠤ ᠪᠠᠶ᠋ᠢᠨᠠ ᠪᠢᠰᠢ ᠤᠤ᠃ ᠴᠢᠨᠤ ᠥᠵᠡᠭᠰᠡᠨ ᠲᠡᠭᠷᠢ ᠶᠢᠨ ᠳᠦᠯᠡᠢ ᠪᠤᠯ ᠪᠠᠭᠠ ᠲᠡᠭᠷᠢ ᠶᠢᠨ ᠳᠥᠯᠡᠢ ᠭᠡᠳᠡᠭ ᠶᠤᠮ᠂ ᠡᠨᠡ ᠪᠤᠯ ᠶᠡᠭᠡ ᠲᠡᠭᠷᠢ ᠶᠢᠨ ᠳᠥᠯᠡᠢ ᠭᠡᠳᠡᠭ ᠪᠦᠭᠡᠳ ᠬᠠᠯᠴᠠᠭᠠᠢ ᠵᠠᠮ ᠳᠡᠭᠡᠷᠡ ᠪᠠᠶ᠋ᠢᠲᠤᠭᠠᠢ ᠬᠠᠪᠴᠢᠯ ᠬᠠᠳᠠᠨ ᠳᠡᠭᠡᠷᠡ ᠴᠤ᠌ ᠤᠷᠭᠤᠵᠤ ᠪᠤᠯᠤᠨᠠ᠃ ᠡᠶ᠋ᠢᠮᠥ ᠳᠤᠮᠤ ᠲᠡᠭᠷᠢ ᠶᠢᠨ ᠳᠥᠯᠡᠢ ᠲᠡᠷᠡ ᠪᠦᠷ ᠪᠠᠶ᠋ᠢᠳᠠᠭ ᠥᠭᠡᠢ ᠤᠴᠢᠷ ᠤᠯᠳᠠᠳᠠᠭ ᠴᠤ᠌ ᠥᠭᠡᠢ ᠶᠤᠮ᠂ ᠭᠡᠷᠪᠡ ᠤᠯᠳᠠᠪᠠᠯ ᠴᠢᠬᠤᠯᠠ ᠡᠷᠳᠡᠨᠢ ᠶᠤᠮ ᠪᠤᠯᠠᠢ᠃ ᠬᠠᠷᠢᠨ ᠪᠢᠳᠠ ᠭᠤᠷᠪᠠ ᠶᠢᠨ ᠵᠠᠶᠠᠭᠠ ᠰᠠᠶ᠋ᠢᠨ ᠲᠤᠯᠠ ᠢᠢᠨ ᠶᠠᠭᠤᠮᠠ ᠲᠠᠢ ᠳᠤᠭᠢᠶᠠᠯᠳᠤᠪᠠ ᠭᠡᠪᠡ᠃
ᠵᠠ ᠶᠠᠭᠤ ᠴᠤ᠌ ᠠᠲᠤᠭᠠᠢ ᠨᠤᠲᠤᠭ ᠤᠷᠤᠨ ᠳᠠᠭᠠᠨ ᠬᠠᠷᠢᠵᠤ ᠪᠤᠯᠤᠶᠠ ᠬᠡᠯᠴᠡᠨ ᠦᠨᠦᠬᠢ ᠶᠡᠬᠡ ᠲᠡᠭᠷᠢ ᠶᠢᠨ ᠳᠥᠯᠡᠢ ᠪᠡᠨ ᠠᠶᠠᠲᠠᠢ ᠰᠠᠶ᠋ᠢᠬᠠᠨ ᠢᠶ᠋ᠠᠷ ᠤᠷᠢᠶᠠᠨ ᠪᠠᠭᠯᠠᠵᠤ ᠲᠤᠰᠬᠠᠢ ᠲᠡᠮᠡᠭᠡᠨ ᠳᠦ ᠠᠴᠢᠭᠠᠳ ᠬᠠᠮᠤᠭ ᠤᠨ ᠲᠥᠷᠥᠭᠥᠨ ᠳᠦ ᠭᠦᠲᠦᠯᠵᠤ᠂ ᠵᠠᠮ ᠤᠨ ᠳᠤᠷᠰᠢ ᠲᠡᠭᠥᠨ ᠦ ᠡᠷᠳᠡᠮ ᠴᠢᠳᠠᠯ ᠢ ᠶᠠᠷᠢᠯᠴᠠᠨ ᠶᠠᠷᠢᠯᠴᠠᠭᠰᠠᠭᠠᠷ ᠨᠢᠭᠡᠨ ᠡᠳᠥᠷ ᠨᠤᠲᠤᠭ ᠤᠷᠤᠨ ᠳᠠᠭᠠᠨ ᠬᠥᠷᠴᠥ ᠢᠷᠡᠭᠡᠳ ᠠᠮᠤᠷ ᠮᠡᠨᠳᠥ ᠰᠠᠶ᠋ᠢᠨ ᠰᠠᠶ᠋ᠢᠬᠠᠨ ᠶᠠᠪᠤᠭᠰᠠᠨ ᠰᠠᠭᠤᠭᠰᠠᠨ ᠢᠶ᠋ᠠᠨ ᠶᠠᠷᠢᠯᠴᠠᠬᠤ ᠶᠢᠨ ᠨᠦᠭᠦᠭᠡᠲᠡᠭᠦᠷ ᠶᠡᠭᠡ ᠲᠡᠭᠷᠢ ᠶᠢᠨ ᠳᠥᠯᠡᠢ ᠭᠡᠭᠴᠢ ᠭᠠᠶ᠋ᠢᠬᠠᠮᠰᠢᠭᠲᠠᠢ ᠡᠷᠳᠡᠨᠢ ᠤᠯᠤᠭᠰᠠᠨ ᠢᠶ᠋ᠠᠨ ᠶᠠᠷᠢᠯᠴᠠᠵᠤ ᠤᠤᠯ ᠡᠷᠳᠡᠨᠢ ᠶᠢ ᠬᠥᠮᠥᠰ ᠲᠦ ᠥᠵᠡᠭᠥᠯᠬᠦ ᠳᠦ ᠨᠢᠭᠡ ᠴᠤ᠌ ᠬᠥᠮᠥᠨ ᠦᠯᠦ ᠲᠠᠨᠢᠵᠤ ᠪᠢᠰᠢᠷᠡᠨ ᠭᠠᠶ᠋ᠢᠬᠠᠵᠤ ᠲᠡᠨᠳᠡ ᠡᠴᠡ ᠠᠷᠭᠠ ᠥᠭᠡᠢ ᠲᠡᠷᠡ ᠬᠦ᠌ ᠠᠩᠬᠠ ᠤᠯᠤᠭᠰᠠᠨ ᠳᠥᠩᠰᠢ ᠶᠢᠨ ᠲᠥᠪᠳᠡᠨ ᠦ ᠭᠡᠷ ᠲᠦ ᠵᠠᠯᠠᠵᠤ ᠬᠠᠳᠠᠭ ᠶᠠᠨᠳᠠᠷ ᠰᠠᠮᠪᠠᠢ ᠲᠡᠷᠢᠭᠥᠳᠡᠨ ᠢᠶ᠋ᠠᠷ ᠤᠷᠢᠶᠠᠨ ᠪᠤᠰᠤᠳ ᠲᠤ ᠥᠵᠡᠭᠥᠯᠬᠥ ᠦᠭᠡᠢ ᠪᠤᠷᠬᠠᠨᠴᠢᠯᠠᠨ ᠳᠠᠬᠢᠵᠤ ᠤᠳᠠᠯ ᠥᠭᠡᠢ ᠨᠡᠷᠡ ᠠᠯᠳᠠᠷ ᠴᠢᠮᠡᠭᠡ ᠴᠤᠤᠷᠬᠠᠯ ᠢ ᠬᠤᠯᠠ ᠣᠶ᠋ᠢᠷᠠ ᠳᠤ ᠳᠠᠭᠤᠷᠢᠰᠬᠠᠭᠠᠳ ᠬᠤᠯᠠ ᠣᠶ᠋ᠢᠷᠠ ᠶᠢᠨ ᠠᠬᠠ ᠲᠡᠭᠦᠦ ᠠᠶ᠋ᠢᠯ ᠠᠶ᠋ᠢᠮᠠᠭ ᠴᠦᠮ ᠢᠶ᠋ᠠᠷ ᠢᠷᠡᠵᠤ ᠮᠥᠷᠭᠥᠵᠤ ᠰᠢᠲᠥᠬᠥ ᠪᠠ ᠪᠠᠶ᠋ᠢᠨ ᠪᠠᠶ᠋ᠢᠭᠰᠠᠭᠠᠷ ᠡᠷᠭᠥᠯ ᠮᠥᠷᠭᠥᠯ ᠳᠠᠬᠢᠯ ᠳᠠᠪᠢᠯᠭᠠ ᠭᠡᠮᠡᠨ ᠤᠯᠠᠨ ᠠᠷᠠᠳ ᠤᠳ ᠦᠪᠡᠷ ᠦᠪᠡᠷᠰᠡᠳ ᠦᠨ ᠰᠤᠨᠢᠨ ᠰᠥᠰᠥᠭ ᠦᠨ ᠡᠭᠥᠳᠡᠨ ᠡᠴᠡ ᠡᠳ᠋ ᠮᠠᠯ ᠬᠦᠷᠦᠩᠭᠡ ᠵᠤᠭᠤᠷᠢ ᠪᠠᠨ ᠦᠭᠭᠦᠭᠰᠡᠭᠡᠷ ᠳᠥᠩᠰᠢ ᠶᠢᠨ ᠳᠥᠪᠳᠡᠨ ᠦ ᠭᠡᠷ ᠥᠨᠡᠭᠡᠷ ᠲᠡᠷᠡ ᠡᠷᠳᠡᠨᠢ ᠶᠢᠨ ᠭᠦᠴᠦ ᠪᠡᠷ ᠪᠠᠶᠠᠵᠢᠵᠤ ᠬᠠᠷᠢᠨ ᠶᠠᠪᠤᠭᠰᠠᠭᠠᠷ ᠲᠡᠷᠡ ᠬᠦ᠌ ᠡᠷᠳᠡᠨᠢ ᠨᠢ ᠬᠠᠨᠢᠶᠠᠳᠤ ᠲᠤᠮᠤᠭᠤ ᠡᠪᠡᠳᠴᠢᠨ ᠡᠮᠬᠡᠭ ᠲᠠᠢ ᠬᠥᠮᠥᠰ ᠡᠷᠭᠥᠯ ᠥᠢᠯᠡᠳᠪᠡᠯ ᠠᠶᠠᠨᠳᠠᠭᠠᠨ ᠡᠳᠡᠭᠡᠵᠤ ᠠᠷᠢᠯᠳᠠᠭ ᠠᠭᠤᠤ ᠶᠡᠬᠡ ᠰᠢᠳᠢ ᠲᠠᠢ ᠴᠢᠳᠠᠯ ᠲᠠᠢ ᠡᠷᠳᠡᠮ ᠭᠠᠶ᠋ᠢᠬᠠᠮᠰᠢᠭᠲᠠᠢ ᠪᠠᠶ᠋ᠢᠨᠠ ᠭᠡᠵᠤ ᠨᠢᠭᠡᠨ ᠶᠡᠬᠡ ᠨᠡᠷᠡ ᠰᠥᠷ ᠠᠯᠳᠠᠷᠰᠢᠵᠠᠢ᠃
ᠲᠡᠨᠳᠡ ᠡᠴᠡ ᠨᠢᠭᠡ ᠡᠳᠦᠷ ᠲᠡᠲᠡᠨ ᠦ ᠠᠶ᠋ᠢᠯ ᠳᠡᠭᠡᠷᠡ ᠤᠯᠤᠰ ᠤᠨ ᠲᠥᠪ ᠨᠠᠶ᠋ᠢᠰᠯᠠᠯ ᠡᠴᠡ ᠠᠯᠪᠠᠨ ᠴᠢᠬᠤᠯᠠ ᠡᠭᠦᠷᠭᠡ ᠪᠡᠷ ᠲᠤᠮᠢᠯᠠᠭᠳᠠᠭᠰᠠᠨ ᠨᠢᠭᠡᠨ ᠲᠦᠯᠦᠭᠡᠯᠡᠭᠴᠢ ᠬᠥᠮᠥᠨ ᠢᠷᠡᠵᠡᠢ᠃ ᠲᠡᠷᠡ ᠪᠡᠷ ᠨᠤᠲᠤᠭ ᠤᠨ ᠠᠷᠠᠳ ᠤᠳ ᠢ ᠬᠤᠷᠠᠯᠳᠤᠭᠤᠯᠤᠨ ᠰᠤᠮᠤ ᠶᠢᠨ ᠰᠤᠩᠭᠤᠭᠤᠯᠢ ᠶᠢ ᠶᠠᠪᠤᠭᠤᠯᠬᠤ ᠡᠶ᠋ᠢᠮᠥ ᠠᠵᠢᠯ ᠤ᠋ᠨ ᠲᠥᠯᠥᠪᠯᠡᠭᠡ ᠲᠡᠢ ᠠᠵᠤᠭᠤ᠃ ᠲᠡᠷᠡ ᠬᠦ᠌ ᠲᠥᠯᠥᠭᠡᠯᠡᠭᠴᠢ ᠶ᠋ᠢᠨ ᠪᠠᠭᠤᠭᠰᠠᠨ ᠠᠢᠯ ᠨᠢ ᠰᠦᠭᠡᠨᠲᠠᠢ ᠶ᠋ᠢᠨ ᠭᠡᠷ ᠠᠵᠤᠭᠤ᠃
ᠣᠷᠣᠢ ᠪᠣᠯᠵᠤ ᠲᠥᠯᠥᠭᠡᠯᠡᠭᠴᠢ ᠪᠦᠷ ᠬᠣᠭᠣᠯᠠ ᠤᠮᠳᠠ ᠢᠳᠡᠵᠦ ᠤᠤᠭᠤ ᠭᠡᠵᠦ ᠥᠪᠡᠷ ᠦ᠋ᠨ ᠪᠣᠭᠴᠣ ᠰᠠᠪᠠᠨ ᠠ᠋ᠴᠠ ᠪᠥᠨᠲᠥᠭᠡᠷ ᠴᠠᠭᠠᠨ ᠲᠠᠯᠬᠠ ᠭᠠᠷᠭᠠᠵᠤ ᠢᠷᠡᠭᠡᠳ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠯᠪᠢᠪᠠ᠂ ᠰᠦᠬᠡᠨᠲᠠᠢ ᠶ᠋ᠢᠨ ᠡᠬᠡᠨᠡᠷ ᠳᠠᠷᠢᠰᠦ᠋ᠷᠦᠩ ᠭᠡᠨᠡᠳᠲᠡ ᠲᠡᠭᠦᠨ ᠢ᠋ ᠦᠵᠡᠭᠡᠳ ᠳᠠᠭᠤ ᠠᠯᠳᠠᠵᠤ ᠬᠡᠯᠡᠷᠦᠨ᠄
ᠡᠷᠬᠢᠮ ᠭᠤᠸᠠᠢ ᠲᠠ ᠡᠨᠡ ᠴᠢᠬᠤᠯᠠ ᠡᠷᠳᠡᠨᠢ ᠶ᠋ᠢ ᠶᠠᠭᠤᠨ ᠳ᠋ᠤ᠌ ᠡᠢᠮᠦ ᠮᠠᠭᠤᠬᠠᠢ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠯᠪᠢᠪᠠ᠃ ᠳᠡᠭᠡᠭᠰᠢ ᠪᠤᠷᠬᠠᠨ ᠳᠡᠭᠡᠷᠡ ᠵᠠᠯᠠᠬᠤ ᠤᠤ? ᠭᠡᠪᠡ᠃ ᠨᠥᠬᠥᠭᠡ ᠲᠥᠯᠥᠭᠡᠯᠡᠭᠴᠢ ᠲᠡᠭᠦᠨ ᠦ᠌ ᠬᠡᠯᠡᠬᠦ ᠶ᠋ᠢ ᠰᠣᠨᠣᠰᠤᠭᠠᠳ ᠳᠣᠲᠣᠷᠠ ᠪᠠᠨ ᠭᠠᠢᠬᠠᠭᠰᠠᠨ ᠪᠣᠯᠪᠠᠴᠤ ᠪᠠᠰᠠ ᠢᠳᠡᠭᠡ ᠤᠮᠳᠠ ᠶ᠋ᠢᠨ ᠵᠦᠢᠯ ᠢ᠋ ᠡᠨᠡ ᠭᠠᠵᠠᠷ ᠤ᠋ᠨ ᠬᠥᠮᠦᠰ ᠡᠷᠳᠡᠨᠢ ᠭᠡᠵᠦ ᠥᠭᠦᠯᠡᠳᠡᠭ ᠪᠣᠢ ᠊ᠢᠠ᠂ ᠲᠡᠷᠡ ᠨᠢ ᠪᠠᠰᠠ ᠵᠦᠢᠲᠡᠢ ᠶᠦᠮ ᠳᠡ ᠭᠡᠵᠦ ᠰᠠᠨᠠᠭᠠᠳ ᠬᠡᠯᠡᠷᠦᠨ᠄
ᠵᠠ ᠶᠠᠭᠠᠬᠢᠬᠤ ᠪᠣᠢ? ᠵᠦᠭᠡᠷ ᠲᠠᠨ ᠤ᠋ ᠬᠦᠨᠳᠦᠯᠡᠬᠦ ᠵᠥᠪ᠂ ᠥᠨᠢᠷ ᠮᠠᠨ ᠤ᠋ ᠮᠣᠩᠭᠣᠯ ᠤ᠋ᠨ ᠮᠠᠯ ᠬᠥᠷᠥᠩᠭᠡ ᠪᠣᠯ ᠴᠥᠮ ᠡᠢᠮᠦ ᠴᠤᠬᠠᠭ ᠡᠷᠳᠡᠨᠢ ᠮᠥᠨ ᠪᠣᠯᠠᠢ᠂ ᠲᠠ ᠪᠦᠬᠦᠨ ᠮᠠᠯ ᠬᠥᠷᠥᠩᠭᠡ ᠪᠡᠨ ᠲᠤᠢᠯ ᠤ᠋ᠨ ᠴᠢᠬᠤᠯᠠ ᠡᠷᠳᠡᠨᠢ ᠮᠡᠲᠦ ᠪᠡᠷ ᠬᠠᠢᠷᠠᠯᠠᠵᠤ ᠬᠠᠮᠠᠭᠠᠯᠠᠵᠤ ᠥᠰᠬᠡᠵᠦ ᠦᠷᠡᠵᠢᠭᠦᠯᠪᠡᠯ ᠴᠣᠬᠣᠮ ᠬᠦ᠌ ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠬᠥᠭᠵᠢᠵᠦ ᠮᠠᠨᠳᠤᠬᠤ ᠨᠢ ᠲᠡᠭᠦᠨ ᠳ᠋ᠦ᠍ ᠭᠡᠵᠦ ᠪᠢᠳᠡ ᠨᠠᠷ ᠲᠤᠢᠯ ᠤ᠋ᠨ ᠴᠢᠬᠤᠯᠠᠯᠴᠢᠯᠠᠨ ᠰᠠᠨᠠᠨᠠ ᠭᠡᠪᠡ᠃ ᠳᠠᠷᠢᠰᠦ᠋ᠷᠦᠩ ᠲᠡᠭᠦᠨ ᠦ᠌ ᠬᠡᠯᠡᠵᠦ ᠪᠠᠢᠭᠠ ᠦᠭᠡ ᠶ᠋ᠢ ᠪᠠᠰᠠ ᠯᠠ ᠳᠡᠮᠡᠢ ᠤᠬᠠᠵᠤ ᠮᠡᠳᠡᠭᠰᠡᠨ ᠦᠭᠡᠢ ᠭᠠᠭᠴᠠ ᠬᠦ᠌ ᠲᠡᠭᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠴᠤᠬᠠᠭ ᠡᠷᠳᠡᠨᠢ ᠪᠣᠯᠬᠤ ᠶᠡᠬᠡ ᠲᠩᠷᠢ ᠶ᠋ᠢᠨ ᠳᠦᠯᠡᠢ ᠬᠠᠢᠷᠠᠯᠠᠯᠲᠠᠢ ᠬᠠᠷᠠᠭᠳᠠᠵᠤ ᠶᠠᠭᠠᠷᠠᠨ ᠪᠠᠰᠠ ᠡᠢᠨ ᠬᠡᠯᠡᠷᠦᠨ᠄
ᠡᠨᠡ ᠬᠦ᠌ ᠴᠤᠬᠠᠭ ᠡᠷᠳᠡᠨᠢ ᠶ᠋ᠢ ᠬᠠᠮᠢᠭᠠ ᠠ᠋ᠴᠠ ᠣᠯᠪᠠ᠂ ᠶᠠᠳᠠᠬᠤ ᠳ᠋ᠠᠭᠠᠨ ᠪᠢᠳᠡᠨ ᠨᠢᠭᠡ ᠬᠠᠳᠠᠭ ᠪᠠᠷᠢᠪᠠᠯ ᠪᠣᠯᠬᠤ ᠤᠤ? ᠭᠡᠪᠡ᠃
ᠲᠡᠷᠡ ᠲᠥᠯᠥᠭᠡᠯᠡᠭᠴᠢ ᠳᠣᠲᠣᠷᠠ ᠪᠠᠨ ᠪᠠᠰᠠ ᠯᠠ ᠡᠨᠡ ᠡᠬᠡᠨᠡᠷ ᠡᠰᠡᠪᠡᠯ ᠢᠳᠡᠭᠡ ᠤᠮᠳᠠ ᠶ᠋ᠢᠨ ᠵᠦᠢᠯ ᠳ᠋ᠦ᠍ ᠡᠢᠮᠦ ᠶᠡᠬᠡ ᠰᠦᠰᠦᠭ ᠪᠢᠰᠢᠷᠡᠯ ᠲᠠᠢ ᠶᠤᠮ ᠤᠤ? ᠡᠰᠡᠬᠦᠯᠡ ᠪᠠᠭᠠ ᠵᠡᠷᠭᠡ ᠬᠡᠢ ᠡᠪᠡᠳᠴᠢᠨ ᠲᠠᠢ ᠶᠤᠮ ᠤᠤ? ᠭᠡᠵᠦ ᠤᠴᠢᠷ ᠢ᠋ ᠣᠯᠬᠤ ᠦᠭᠡᠢ ᠪᠣᠯᠪᠠᠴᠤ ᠲᠡᠭᠦᠨ ᠦ᠌ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠦᠨᠡᠬᠡᠷ ᠬᠠᠷᠢᠭᠤᠯᠬᠤ ᠶ᠋ᠢ ᠪᠣᠳᠣᠵᠤ ᠡᠢᠨ ᠬᠡᠯᠡᠷᠦᠨ᠄
ᠡᠨᠡ ᠮᠢᠨᠦ ᠢᠳᠡᠵᠦ ᠶᠠᠪᠤᠭᠠ ᠲᠠᠯᠬᠠ ᠪᠢᠯᠡ᠂ ᠶᠡᠷᠦ ᠨᠢ ᠡᠨᠳᠡ ᠲᠡᠨᠳᠡ ᠡᠴᠡ ᠣᠯᠤᠭᠰᠠᠨ ᠶᠠᠭᠤᠮᠠ ᠪᠤᠰᠤ᠂ ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠ ᠠ᠋ᠴᠠ ᠭᠠᠷᠬᠤ ᠳ᠋ᠠᠭᠠᠨ ᠠᠪᠴᠤ ᠭᠠᠷᠤᠭᠰᠠᠨ ᠶᠤᠮ᠂ ᠲᠠ ᠶᠠᠭᠤᠨ ᠳ᠋ᠤ᠌ ᠡᠢᠮᠦ ᠬᠦᠨᠳᠦᠳᠬᠡᠨ ᠦᠵᠡᠳᠡᠭ ᠪᠣᠢ? ᠭᠡᠪᠡ᠃ ᠲᠡᠷᠡ ᠡᠬᠡᠨᠡᠷ ᠲᠡᠭᠦᠨ ᠦ ᠬᠡᠯᠡᠭᠰᠡᠨ ᠦᠭᠡ ᠲᠣᠲᠣᠷᠠ ᠠᠴᠠ ᠢᠳᠡᠳᠡᠭ ᠶᠠᠭᠤᠮᠠ ᠭᠡᠬᠦ ᠶᠢ ᠣᠨᠴᠠ ᠪᠠᠷ ᠲᠡᠮᠲᠡᠭ᠍ᠯᠡᠵᠦ ᠶᠠᠭᠤ ᠭᠡᠨᠡ᠂ ᠲᠠ ᠢᠳᠡᠬᠦ ᠶᠠᠭᠤᠮᠠ ᠭᠡᠨᠡ ᠤᠤ? ᠭᠡᠪᠡ᠃
ᠲᠡᠢᠮᠦ ᠲᠡᠢᠮᠦ ᠢᠳᠡᠳᠡᠭ ᠶᠠᠭᠤᠮᠠ᠂ ᠲᠠᠨ ᠤ᠋ ᠡᠨᠡ ᠭᠠᠵᠠᠷ ᠡᠭᠦᠨ ᠢ᠋ ᠦᠵᠡᠭᠡ ᠦᠭᠡᠢ ᠦᠦ? ᠭᠡᠪᠡ᠃
ᠡᠬᠡᠨᠡᠷ ᠶᠡᠬᠡᠳᠡ ᠰᠣᠨᠢᠷᠬᠠᠵᠤ᠂ ᠠ ᠲᠡᠢᠮᠦ ᠤᠤ᠂ ᠶᠠᠭᠤᠲᠠᠢ ᠵᠢᠭᠲᠡᠢ ᠪᠣᠢ᠂ ᠡᠨᠡ ᠨᠢ ᠤᠷᠭᠤᠳᠠᠭ ᠲᠠᠷᠢᠳᠠᠭ ᠶᠠᠭᠤᠮᠠ ᠤᠤ? ᠭᠡᠪᠡ᠃
ᠲᠥᠯᠥᠭᠡᠯᠡᠭᠴᠢ ᠲᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ ᠶᠡᠬᠡᠳᠡ ᠢᠨᠢᠶᠡᠨ ᠲᠡᠷᠡ ᠡᠬᠡᠨᠡᠷ ᠲᠦ᠍ ᠲᠠᠯᠬᠠ ᠬᠢᠳᠡᠭ ᠤᠴᠢᠷ ᠢ᠋ ᠲᠣᠭᠠᠴᠢᠨ ᠴᠠᠭᠠᠨ ᠭᠤᠯᠢᠷ ᠢ᠋ ᠬᠡᠷᠬᠢᠨ ᠵᠢᠭᠤᠷᠠᠭᠠᠳ ᠬᠡᠷᠬᠢᠨ ᠬᠠᠯᠠᠭᠠᠳ ᠵᠤᠤᠬᠠᠨ ᠳ᠋ᠤ᠌ ᠬᠢᠭᠡᠳ ᠬᠡᠷᠬᠢᠨ ᠪᠣᠯᠭᠣᠵᠤ ᠬᠡᠷᠬᠢᠨ ᠢᠳᠡᠳᠡᠭ ᠢ᠋ ᠶᠠᠷᠢᠵᠤ ᠥᠭᠪᠡ᠂ ᠡᠬᠡᠨᠡᠷ ᠲᠡᠷᠡ ᠤᠴᠢᠷ ᠢ᠋ ᠪᠦᠷᠢᠨ ᠮᠡᠳᠡᠭᠰᠡᠨ ᠦ᠌ ᠬᠣᠢᠨᠠ ᠪᠠᠰᠠ ᠰᠡᠵᠢᠭ ᠨᠢ ᠠᠯᠳᠠᠷᠠᠭᠠ ᠦᠭᠡᠢ ᠰᠣᠨᠢᠨ ᠶᠤᠮ ᠳᠠ ᠭᠡᠵᠦ ᠳᠠᠬᠢᠨ ᠳᠠᠬᠢᠨ ᠭᠠᠢᠬᠠᠨᠠ᠃ ᠲᠥᠯᠥᠭᠡᠯᠡᠭᠴᠢ ᠠᠰᠠᠭᠤᠷᠤᠨ᠄
ᠶᠠᠭᠤᠨ ᠳ᠋ᠤ᠌ ᠲᠠ ᠡᠨᠡ ᠲᠠᠯᠬᠠ ᠶ᠋ᠢ ᠡᠢᠮᠦ ᠶᠡᠬᠡ ᠪᠡᠷ ᠭᠠᠢᠬᠠᠨᠠ?
ᠡᠬᠡᠨᠡᠷ ᠬᠡᠯᠡᠷᠦᠨ᠄ ᠦᠭᠡᠢ ᠪᠢ ᠲᠠᠨ ᠢ᠋ ᠲᠠᠯᠬᠠ ᠶ᠋ᠢ ᠢᠳᠡᠳᠡᠭ ᠶᠠᠭᠤᠮᠠ ᠭᠡᠬᠦ ᠳ᠋ᠦ᠍ ᠶᠡᠬᠡᠳᠡ ᠭᠠᠢᠬᠠᠨᠠ᠂ ᠤᠴᠢᠷ ᠨᠢ ᠡᠭᠦᠨ ᠦ᠌ ᠤᠷᠢᠳ ᠮᠠᠨ ᠤ᠋ ᠠᠢᠯ ᠤ᠋ᠨ ᠨᠢᠭᠡᠨ ᠬᠥᠮᠦᠨ ᠠᠶᠠᠨ ᠢ᠋ᠶ᠋ᠠᠷ ᠶᠠᠪᠤᠵᠤ ᠵᠠᠮ ᠤ᠋ᠨ ᠵᠠᠭᠤᠷᠠ ᠠ᠋ᠴᠠ ᠶᠡᠬᠡ ᠲᠩᠷᠢ ᠶ᠋ᠢᠨ ᠳᠦᠯᠡᠢ ᠭᠡᠳᠡᠭ ᠨᠢᠭᠡ ᠡᠷᠳᠡᠨᠢ ᠶ᠋ᠢᠨ ᠵᠦᠢᠯ ᠢ᠋ ᠣᠯᠵᠤ ᠲᠡᠭᠦᠨ ᠢ᠋ ᠡᠳᠦᠭᠡ ᠮᠠᠨ ᠤ᠋ ᠠᠢᠯ ᠬᠣᠲᠠ ᠪᠠᠷ ᠰᠢᠲᠦᠳᠡᠭ ᠪᠣᠯᠠᠢ᠂ ᠭᠡᠲᠡᠯᠡ ᠲᠡᠷᠡ ᠬᠦ᠌ ᠲᠩᠷᠢ ᠶ᠋ᠢᠨ ᠳᠦᠯᠡᠢ ᠪᠣᠯ ᠲᠠᠨ ᠤ᠋ ᠡᠨᠡ ᠢᠳᠡᠭᠴᠢ ᠶᠠᠭᠤᠮᠠ ᠲᠠᠢ ᠠᠳᠠᠯᠢᠬᠠᠨ ᠪᠣᠯᠤᠯᠲᠠᠢ ᠲᠤᠯᠠ ᠭᠠᠢᠬᠠᠨᠠ ᠭᠡᠪᠡ᠃ ᠲᠥᠯᠥᠭᠡᠯᠡᠭᠴᠢ ᠲᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ᠄ ᠦᠭᠡᠢ ᠲᠡᠢᠮᠦ ᠪᠣᠯ ᠲᠡᠷᠡ ᠨᠢ ᠮᠥᠨ ᠡᠢᠮᠦ ᠲᠠᠯᠬᠠ ᠪᠠᠢᠯᠭᠦᠢ ᠳᠡ ᠭᠡᠪᠡ᠃
ᠦᠭᠡᠢ ᠦᠭᠡᠢ ᠲᠡᠷᠡ ᠨᠢ ᠠᠷᠠᠢ ᠲᠠᠯᠬᠠ ᠪᠤᠰᠤ ᠪᠣᠢ ᠊ᠢᠠ! ᠶᠠᠭᠤ ᠭᠡᠪᠡᠯ ᠡᠷᠳᠡᠨᠢ ᠶ᠋ᠢ ᠣᠯᠤᠭᠰᠠᠨ ᠠᠢᠯ ᠡᠳᠦᠭᠡ ᠪᠠᠶᠠᠵᠢᠭᠰᠠᠨ ᠪᠥᠭᠡᠳ ᠲᠡᠷᠡ ᠴᠦ᠍ ᠪᠠᠢᠲᠤᠭᠠᠢ ᠲᠡᠷᠡ ᠡᠷᠳᠡᠨᠢ ᠳ᠋ᠦ᠍ ᠮᠥᠷᠭᠥᠭᠰᠡᠨ ᠲᠠᠬᠢᠭᠰᠠᠨ ᠬᠥᠮᠦᠰ ᠡᠪᠡᠳᠴᠢᠨ ᠵᠣᠪᠠᠯᠠᠩ ᠠ᠋ᠴᠠ ᠬᠡᠳᠦᠯᠳᠡᠭ᠂ ᠡᠢᠮᠦ ᠴᠢᠳᠠᠯ ᠲᠠᠢ ᠪᠣᠯᠠᠢ ᠭᠡᠪᠡ᠃
ᠲᠥᠯᠥᠭᠡᠯᠡᠭᠴᠢ ᠲᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ ᠪᠠᠰᠠ ᠨᠢᠭᠡ ᠵᠡᠷᠭᠡ ᠤᠤᠯ ᠤᠴᠢᠷ ᠲᠡᠦᠬᠡ ᠶ᠋ᠢ ᠠᠰᠠᠭᠤᠵᠤ ᠦᠵᠡᠪᠡᠯ ᠶᠡᠷᠦ ᠵᠠᠮ ᠳᠡᠭᠡᠷᠡ ᠭᠡᠭᠡᠭᠳᠡᠭᠰᠡᠨ ᠲᠠᠯᠬᠠ ᠣᠯᠤᠭᠰᠠᠨ ᠠ᠋ᠴᠠ ᠵᠠᠢᠯᠠᠰᠢ ᠦᠭᠡᠢ ᠲᠤᠯᠠ ᠡᠢᠨ ᠬᠡᠯᠡᠪᠡ᠄
ᠪᠢ ᠲᠠᠨ ᠤ᠋ ᠬᠡᠯᠡᠵᠦ ᠪᠠᠢᠭᠠ ᠪᠠᠢᠳᠠᠯ ᠢ᠋ ᠦᠵᠡᠪᠡᠯ ᠲᠡᠷᠡ ᠨᠢ ᠵᠠᠪᠠᠯ ᠲᠠᠯᠬᠠ ᠪᠣᠯᠪᠠ ᠤᠤ ᠭᠡᠵᠦ ᠰᠠᠨᠠᠨᠠ᠃ ᠶᠠᠭᠤ ᠭᠡᠪᠡᠯ ᠶᠡᠬᠡ ᠲᠩᠷᠢ ᠶ᠋ᠢᠨ ᠳᠦᠯᠡᠢ ᠨᠢ ᠤᠷᠭᠤᠮᠠᠯ ᠤ᠋ᠨ ᠵᠦᠢᠯ ᠲᠤᠯᠠ ᠶᠠᠮᠠᠷ ᠡᠷᠳᠡᠨᠢ ᠭᠡᠵᠦ ᠦᠨᠡᠯᠡᠭᠳᠡᠬᠦ ᠠᠵᠢ᠂ ᠬᠠᠷᠢᠨ ᠲᠠ ᠪᠦᠬᠦᠨ ᠲᠡᠭᠦᠨ ᠢ᠋ ᠤᠷᠢᠳ ᠬᠣᠵᠢᠳ ᠦᠵᠡᠭᠡ ᠦᠭᠡᠢ ᠶ᠋ᠢᠨ ᠬᠠᠷᠠᠭᠠ ᠪᠠᠷ ᠲᠡᠢᠨ ᠬᠦ᠌ ᠡᠨᠳᠡᠭᠦᠷᠡᠨ ᠰᠢᠲᠦᠵᠦ ᠳᠠᠬᠢᠵᠤ ᠰᠢᠲᠦᠭᠰᠡᠨ ᠦ᠌ ᠤᠯᠠᠮ ᠢ᠋ᠶ᠋ᠠᠷ ᠣᠯᠠᠨ ᠲᠦᠮᠡᠨ ᠦ᠌ ᠡᠷᠭᠦᠯ ᠪᠠᠷᠢᠴᠠ ᠠ᠋ᠴᠠ ᠲᠡᠷᠡ ᠠᠢᠯ ᠪᠠᠶᠠᠵᠢᠵᠤ ᠬᠥᠮᠦᠨ ᠦ᠌ ᠰᠦᠰᠦᠭ ᠰᠠᠨᠠᠭᠠ ᠶ᠋ᠢᠨ ᠬᠠᠷᠠᠭᠠ ᠪᠠᠷ ᠵᠠᠷᠢᠮ ᠬᠥᠩᠭᠡᠨ ᠱᠦᠩᠭᠡᠨ ᠡᠪᠡᠳᠴᠢᠨ ᠢ᠋ ᠡᠳᠡᠭᠡᠪᠡ ᠭᠡᠵᠦ ᠰᠠᠨᠠᠵᠤ ᠲᠡᠢᠨ ᠬᠦ᠌ ᠭᠡᠨᠡᠳᠡᠵᠦ ᠶᠠᠪᠤᠭᠠ ᠠ᠋ᠴᠠ ᠥᠭᠡᠷᠡ ᠶᠠᠭᠤᠮᠠ ᠦᠭᠡᠢ ᠭᠡᠪᠡ᠃ ᠳᠠᠷᠢᠰᠦ᠋ᠷᠦᠩ ᠬᠠᠷᠢᠨ ᠬᠡᠨ ᠮᠡᠳᠡᠬᠦ ᠪᠣᠢ ᠳᠠ᠂ ᠲᠠᠨ ᠤ᠋ ᠬᠡᠯᠡᠳᠡᠭ ᠪᠠ ᠬᠡᠷᠡᠭᠯᠡᠵᠦ ᠪᠠᠢᠭᠠ ᠵᠦᠢᠯ ᠨᠢ ᠥᠨᠥᠬᠢ ᠲᠩᠷᠢ ᠶ᠋ᠢᠨ ᠳᠦᠯᠡᠢ ᠲᠡᠢ ᠶᠡᠷᠦ ᠠᠳᠠᠯᠢ ᠰᠢᠬᠠᠭᠤ ᠶᠠᠭᠤᠮᠠ ᠪᠠᠢᠨᠠ᠂ ᠪᠠᠰᠠ ᠲᠡᠷᠡ ᠠᠢᠯ ᠲᠡᠭᠦᠨ ᠢ᠋ ᠴᠤᠬᠠᠭ ᠡᠷᠳᠡᠨᠢ ᠮᠡᠲᠦ ᠳᠠᠬᠢᠳᠠᠭ ᠲᠤᠯᠠ ᠬᠡᠨ ᠬᠥᠮᠦᠨ ᠳ᠋ᠦ᠍ ᠬᠠᠮᠢᠶᠠ ᠦᠭᠡᠢ ᠦᠵᠡᠭᠦᠯᠳᠡᠭ ᠦᠭᠡᠢ ᠪᠣᠯᠠᠢ᠃ ᠬᠡᠷᠪᠡ ᠲᠠᠨ ᠳ᠋ᠤ᠌ ᠦᠵᠡᠭᠦᠯᠬᠦ ᠦᠭᠡᠢ ᠭᠡᠪᠡᠯ ᠬᠡᠷᠬᠢᠬᠦ ᠪᠣᠢ? ᠲᠥᠯᠥᠭᠡᠯᠡᠭᠴᠢ ᠲᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ ᠪᠠᠰᠠ ᠴᠤ᠌ ᠳᠣᠲᠣᠷᠠ ᠪᠠᠨ ᠪᠣᠳᠣᠵᠤ ᠦᠵᠡᠪᠡᠯ ᠡᠳᠡᠨ ᠦ᠌ ᠡᠨᠡ ᠪᠢᠲᠡᠭᠦᠦ ᠮᠤᠬᠤᠷ ᠬᠡᠷᠡᠭ ᠢ᠋ ᠰᠢᠭᠤᠳ ᠬᠠᠯᠳᠤᠨ ᠨᠡᠭᠡᠭᠡᠭᠳᠡᠭᠦᠯᠬᠦ ᠭᠡᠪᠡᠯ ᠪᠣᠯᠬᠤ ᠦᠭᠡᠢ ᠲᠤᠯᠠ ᠳᠠᠬᠢᠨ ᠳᠠᠬᠢᠨ ᠪᠣᠳᠣᠵᠤ ᠪᠠᠢᠲᠠᠯᠠ ᠭᠡᠨᠡᠳᠲᠡ ᠨᠢᠭᠡ ᠠᠷᠭᠠ ᠰᠠᠨᠠᠭᠳᠠᠵᠤ ᠳᠠᠷᠤᠢ ᠡᠢᠨ ᠬᠡᠯᠡᠷᠦᠨ᠄
ᠲᠡᠢᠮᠦ ᠪᠣᠯ ᠲᠡᠷᠡ ᠨᠢ ᠮᠥᠨ ᠬᠢᠯᠪᠠᠷ ᠪᠠᠢᠨᠠ᠂ ᠲᠠ ᠭᠠᠭᠴᠠ ᠬᠦ᠌ ᠨᠠᠳᠠ ᠲᠠᠢ ᠶᠠᠷᠢᠯᠴᠠᠭᠰᠠᠨ ᠦᠭᠡ ᠪᠡᠨ ᠴᠢᠨᠠᠭᠰᠢ ᠠᠯᠳᠠᠷᠰᠢᠭᠤᠯ᠃ ᠬᠠᠷᠢᠨ ᠮᠢᠨᠦ ᠠᠪᠴᠤ ᠶᠠᠪᠤᠭᠠ ᠡᠨᠡ ᠲᠩᠷᠢ ᠶ᠋ᠢᠨ ᠳᠦᠯᠡᠢ ᠶ᠋ᠢ ᠰᠠᠢᠲᠤᠷ ᠬᠠᠳᠠᠭ ᠰᠠᠮᠪᠠᠢ ᠳ᠋ᠤ᠌ ᠪᠠᠭᠯᠠᠵᠤ ᠪᠤᠷᠬᠠᠨ ᠳᠡᠭᠡᠷᠡ ᠪᠡᠨ ᠳᠡᠯᠪᠢ ᠭᠡᠪᠡ᠃ ᠡᠬᠡᠨᠡᠷ ᠲᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ ᠪᠠᠰᠠ ᠥᠨᠥᠬᠢ ᠲᠠᠯᠬᠠ ᠪᠠᠨ ᠶᠡᠬᠡ ᠲᠩᠷᠢ ᠶ᠋ᠢᠨ ᠳᠦᠯᠡᠢ ᠮᠡᠲᠦ ᠳᠠᠬᠢ ᠭᠡᠬᠦ ᠳ᠋ᠦ᠍ ᠪᠦᠷ ᠴᠦ᠍ ᠭᠠᠢᠬᠠᠵᠤ ᠰᠠᠶ᠋ᠢᠬᠠᠨ ᠡᠨᠡ ᠬᠥᠮᠦᠨ ᠢᠳᠡᠳᠡᠭ ᠲᠠᠯᠬᠠ ᠭᠡᠬᠦ ᠠᠲᠠᠯᠠ ᠪᠠᠰᠠ ᠶᠠᠭᠠᠬᠢᠨ ᠲᠩᠷᠢ ᠶ᠋ᠢᠨ ᠳᠦᠯᠡᠢ ᠪᠣᠯᠤᠭᠰᠠᠨ ᠪᠣᠯ᠂ ᠡᠰᠡᠬᠦᠯᠡ ᠨᠠᠮᠠ ᠶ᠋ᠢ ᠮᠡᠬᠡᠯᠡᠭᠰᠡᠨ ᠶᠦᠮ ᠪᠣᠯᠪᠠ ᠤᠤ ᠭᠡᠵᠦ ᠰᠡᠵᠢᠭᠯᠡᠵᠦ ᠤᠴᠢᠷ ᠢ᠋ ᠴᠣᠬᠣᠮ ᠣᠯᠬᠤ ᠦᠭᠡᠢ ᠪᠣᠯᠵᠤ ᠠᠷᠭᠠ ᠪᠤᠶᠤ ᠲᠡᠭᠦᠨ ᠦ᠌ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠬᠠᠷᠢᠨ ᠴᠤ᠌ ᠳᠤᠷᠠᠲᠠᠢ ᠪᠠᠷ ᠬᠠᠳᠠᠭ ᠰᠠᠮᠪᠠᠢ ᠪᠠᠷ ᠣᠷᠢᠶᠠᠵᠤ ᠲᠠᠯᠪᠢᠪᠠ᠃ ᠲᠥᠯᠦᠭᠡᠯᠡᠭᠴᠢ ᠬᠡᠯᠡᠷᠦᠨ᠄
ᠵᠠ ᠲᠠ ᠡᠨᠡ ᠬᠠᠪᠢ ᠶ᠋ᠢᠨ ᠠᠢᠯ ᠢ᠋ ᠬᠡᠰᠦᠵᠦ ᠤᠮᠠᠷᠠ ᠵᠦᠭ ᠡᠴᠡ ᠴᠣᠬᠣᠮ ᠬᠦ᠌ ᠦᠨᠡᠨ ᠲᠩᠷᠢ ᠶ᠋ᠢᠨ ᠳᠦᠯᠡᠢ ᠣᠯᠤᠭᠰᠠᠨ ᠨᠢᠭᠡᠨ ᠭᠠᠢᠬᠠᠮᠰᠢᠭᠲᠠᠢ ᠬᠥᠮᠦᠨ ᠮᠠᠨ ᠤ᠋ ᠭᠡᠷ ᠲᠦ᠍ ᠥᠭᠡᠳᠡ ᠪᠣᠯᠤᠨ ᠢᠷᠡᠭᠡᠳ ᠪᠠᠢᠨᠠ ᠭᠡᠵᠦ ᠬᠡᠯᠡᠵᠦ ᠵᠠᠷᠯᠠᠨ ᠲᠠᠷᠬᠠᠭᠠ ᠭᠡᠪᠡ᠃ ᠥᠨᠥ ᠡᠬᠡᠨᠡᠷ ᠲᠡᠳᠡᠭᠡᠷ ᠰᠣᠨᠢᠨ ᠦᠭᠡᠰ ᠢ᠋ ᠰᠣᠨᠣᠰᠴᠤ ᠳᠣᠲᠣᠷᠠ ᠨᠢ ᠬᠠᠷᠢᠨ ᠴᠤ᠌ ᠰᠠᠢᠬᠠᠨ ᠰᠠᠨᠠᠭᠳᠠᠵᠤ ᠶᠡᠷᠦ ᠨᠢ ᠡᠢᠮᠦ ᠲᠡᠢᠮᠦ ᠪᠢᠲᠡᠭᠦᠦ ᠶᠣᠭᠲᠠ ᠰᠦᠰᠦᠭ ᠪᠢᠰᠢᠷᠡᠯ ᠲᠥᠷᠥᠭᠦᠯᠳᠡᠭ ᠦᠭᠡ ᠥᠭᠦᠯᠡᠯ ᠢ᠋ ᠲᠠᠷᠬᠠᠭᠠᠬᠤ ᠳ᠋ᠠᠭᠠᠨ ᠲᠤᠢᠯ ᠤ᠋ᠨ ᠳᠤᠷᠠᠲᠠᠢ ᠢᠳᠡᠪᠬᠢ ᠴᠢᠳᠠᠪᠤᠷᠢᠲᠠᠢ ᠬᠥᠮᠦᠨ ᠪᠠᠢᠳᠠᠭ ᠲᠤᠯᠠ ᠵᠠ ᠭᠡᠬᠦ ᠦᠭᠡ ᠶ᠋ᠢ ᠲᠥᠯᠥᠭᠡᠯᠡᠭᠴᠢ ᠶ᠋ᠢᠨ ᠡᠮᠦᠨᠡ ᠬᠦᠯᠢᠶᠡᠭᠡᠳ ᠬᠠᠨᠴᠤᠢ ᠪᠦᠴᠡ ᠶ᠋ᠢ ᠰᠠᠵᠢᠭᠠᠳ ᠭᠠᠷᠬᠤ ᠨᠢ ᠬᠠᠷᠠᠭᠳᠠᠭᠰᠠᠨ ᠪᠢᠯᠡ᠃ ᠬᠠᠷᠢᠨ ᠳᠡᠮᠡᠢ ᠤᠳᠠᠭᠠ ᠦᠭᠡᠢ ᠲᠡᠷᠡ ᠬᠠᠪᠢ ᠶ᠋ᠢᠨ ᠠᠢᠯ ᠠᠢᠮᠠᠭ ᠤ᠋ᠨ ᠰᠢᠷᠠ ᠬᠠᠷᠠ ᠡᠷᠡ ᠡᠮᠡ ᠣᠯᠠᠨ ᠶᠠᠩᠵᠤ ᠶ᠋ᠢ ᠬᠥᠮᠦᠰ ᠲᠡᠳᠡᠨ ᠦ᠌ ᠭᠡᠷ ᠲᠦ᠍ ᠪᠠᠭᠲᠠᠬᠤ ᠦᠭᠡᠢ ᠪᠡᠷ ᠴᠤᠭᠯᠠᠵᠤ ᠥᠨᠥᠬᠢ ᠲᠩᠷᠢ ᠶ᠋ᠢᠨ ᠳᠦᠯᠡᠢ ᠲᠡᠢ ᠢᠷᠡᠭᠰᠡᠨ ᠭᠠᠢᠬᠠᠮᠰᠢᠭᠲᠤ ᠬᠥᠮᠦᠨ ᠢ᠋ ᠦᠵᠡᠬᠦ ᠭᠡᠵᠦ ᠬᠤᠷᠠᠯᠳᠤᠵᠠᠢ᠃
ᠤᠮᠠᠷᠠ ᠵᠦᠭ ᠡᠴᠡ ᠴᠣᠬᠣᠮ ᠬᠦ᠌ ᠦᠨᠡᠨ ᠲᠩᠷᠢ ᠶ᠋ᠢᠨ ᠳᠦᠯᠡᠢ ᠶ᠋ᠢ ᠠᠪᠴᠢᠷᠠᠭᠰᠠᠨ ᠭᠠᠢᠬᠠᠮᠰᠢᠭᠲᠤ ᠬᠥᠮᠦᠨ ᠭᠡᠭᠳᠡᠭᠰᠡᠨ ᠥᠨᠥᠬᠢ ᠲᠥᠯᠥᠭᠡᠯᠡᠭᠴᠢ ᠡᠢᠨ ᠬᠦ᠌ ᠵᠠᠷᠯᠢᠭ ᠪᠣᠯᠤᠷᠤᠨ᠄
ᠵᠠ ᠬᠤᠷᠠᠯᠳᠤᠭᠰᠠᠨ ᠣᠠᠯᠨ ᠪᠦᠭᠦᠳᠡ ᠳ᠋ᠦ᠍ ᠮᠢᠨᠦ ᠪᠡᠶᠡ ᠲᠤᠰᠬᠠᠢᠯᠠᠨ ᠤᠬᠠᠭᠤᠯᠤᠨ ᠰᠡᠩᠬᠡᠷᠡᠭᠦᠯᠬᠦ ᠨᠢᠭᠡᠨ ᠵᠦᠢᠯ ᠦ᠋ᠨ ᠴᠢᠬᠤᠯᠠ ᠶᠡᠬᠡ ᠤᠴᠢᠷ ᠤᠳᠬᠠ ᠪᠠᠢᠨᠠ᠃ ᠶᠠᠭᠤ ᠪᠣᠢ ᠭᠡᠪᠡᠯ ᠮᠢᠨᠦ ᠪᠡᠶᠡ ᠪᠣᠯ ᠤᠮᠠᠷᠠ ᠵᠦᠭ ᠦ᠋ᠨ ᠴᠣᠬᠣᠮ ᠬᠦ᠌ ᠦᠨᠡᠨ ᠲᠡᠭᠷᠢ ᠶ᠋ᠢᠨ ᠳᠦᠯᠡᠢ ᠶ᠋ᠢ ᠣᠯᠵᠤ ᠲᠠ ᠪᠦᠬᠦᠨ ᠳ᠋ᠦ᠍ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠪᠥᠭᠡᠳ ᠲᠡᠷᠡ ᠵᠢᠯ ᠦ᠋ᠨ ᠭᠤᠷᠪᠠᠨ ᠰᠠᠷᠠ ᠶ᠋ᠢᠨ ᠳᠣᠯᠣᠭᠠᠨ ᠤ᠋ ᠡᠳᠦᠷ ᠵᠠᠮ ᠤ᠋ᠨ ᠡᠭᠦᠳᠡ ᠭᠡᠳᠡᠭ ᠶᠡᠬᠡ ᠵᠠᠮ ᠳᠡᠭᠡᠷᠡ ᠡᠴᠡ ᠭᠣᠨᠴᠣᠭ᠂ ᠰᠦᠬᠡᠨᠲᠡᠢ᠂ ᠲᠦᠪᠳᠡᠨ ᠨᠠᠷ ᠤ᠋ᠨ ᠣᠯᠤᠭᠰᠠᠨ ᠲᠡᠭᠷᠢ ᠶ᠋ᠢᠨ ᠳᠦᠯᠡᠢ ᠭᠡᠭᠴᠢ ᠪᠣᠯ ᠴᠣᠬᠣᠮ ᠦᠨᠡᠨ ᠲᠡᠭᠷᠢ ᠶ᠋ᠢᠨ ᠳᠦᠯᠡᠢ ᠪᠢᠰᠢ ᠬᠠᠭᠤᠷᠮᠠᠭ ᠠᠮᠤᠢ᠂ ᠡᠢᠮᠦ ᠳ᠋ᠦ᠍ ᠤᠴᠢᠷ ᠢ᠋ ᠲᠠ ᠪᠦᠬᠦᠨ ᠳ᠋ᠦ᠍ ᠲᠠᠢᠯᠪᠤᠷᠢᠯᠠᠵᠤ ᠦᠨᠡᠨ ᠲᠡᠭᠷᠢ ᠶ᠋ᠢᠨ ᠳᠦᠯᠡᠢ ᠶ᠋ᠢ ᠦᠵᠡᠭᠦᠯᠦᠶᠡ ᠭᠡᠰᠡᠨ ᠶᠦᠮ᠃ ᠣᠳᠣ ᠲᠡᠷᠡ ᠬᠦ᠌ ᠲᠦᠪᠳᠡᠨ ᠦ᠌ ᠣᠯᠵᠤ ᠢᠷᠡᠭᠰᠡᠨ ᠲᠡᠭᠷᠢ ᠶ᠋ᠢᠨ ᠳᠦᠯᠡᠢ ᠯᠦ᠍ᠭᠡ ᠵᠡᠷᠭᠡᠴᠡᠭᠦᠯᠦᠨ ᠦᠵᠡᠭᠦᠯᠬᠦ ᠬᠡᠷᠡᠭᠲᠡᠢ ᠠᠮᠤᠢ ᠭᠡᠮᠡᠭᠴᠡ ᠲᠡᠳᠡᠭᠡᠷ ᠴᠤᠭᠯᠠᠷᠠᠭᠰᠠᠳ ᠶᠡᠬᠡᠳᠡ ᠭᠠᠢᠬᠠᠵᠤ ᠰᠤᠴᠢᠭ᠍ᠰᠠᠨ ᠪᠣᠯᠪᠠᠴᠤ ᠲᠡᠭᠦᠨ ᠦ᠌ ᠳᠤᠮᠳᠠ ᠡᠴᠡ ᠨᠢᠭᠡ ᠬᠥᠮᠦᠨ ᠡᠢᠨ ᠥᠭᠦᠯᠡᠷᠦᠨ᠄
ᠭᠠᠢᠬᠠᠮᠰᠢᠭ᠍ᠲᠤ ᠬᠥᠮᠦᠨ ᠦ᠌ ᠠᠪᠴᠢᠷᠠᠭᠰᠠᠨ ᠲᠡᠭᠷᠢ ᠶ᠋ᠢᠨ ᠳᠦᠯᠡᠢ ᠬᠠᠮᠢᠭᠠ ᠪᠠᠢᠭᠠ ᠪᠣᠯ ᠪᠢᠳᠡᠨ ᠳ᠋ᠦ᠍ ᠦᠵᠡᠭᠦᠯᠦᠨ ᠰᠣᠶᠣᠷᠬᠠᠵᠤ ᠪᠣᠯᠬᠤ ᠪᠣᠯᠪᠠ ᠤᠤ? ᠥᠨᠥᠬᠢ ᠲᠥᠯᠥᠭᠡᠯᠡᠭᠴᠢ ᠬᠡᠯᠡᠷᠦᠨ᠄
ᠪᠣᠯᠤᠨᠠ ᠪᠣᠯᠤᠨᠠ᠂ ᠭᠠᠭᠴᠠ ᠬᠦ᠌ ᠲᠠᠨ ᠤ᠋ ᠲᠡᠷᠡ ᠲᠡᠭᠷᠢ ᠶ᠋ᠢᠨ ᠳᠦᠯᠡᠢ ᠶ᠋ᠢ ᠠᠪᠴᠢᠷᠠᠵᠤ ᠵᠡᠷᠭᠡᠴᠡᠭᠦᠯᠦᠨ ᠦᠵᠡᠮᠡᠭᠴᠡ ᠠᠯᠢᠨ ᠡᠴᠡ ᠨᠢ ᠭᠡᠷᠡᠯ ᠭᠠᠷᠬᠤ ᠶ᠋ᠢ ᠣᠯᠠᠨ ᠲᠠ ᠪᠦᠬᠦᠨ ᠦᠵᠡᠭᠰᠡᠨ ᠬᠣᠢᠨᠠ ᠰᠠᠶᠢ ᠦᠨᠡᠨ ᠬᠤᠳᠠᠯ ᠢ᠋ ᠮᠡᠳᠡᠨᠡ ᠭᠡᠪᠡ᠃ ᠲᠡᠳᠦᠢ ᠴᠤᠭᠯᠠᠷᠠᠭᠰᠠᠨ ᠪᠦᠭᠦᠳᠡ ᠱᠤᠤᠭᠢᠯᠳᠤᠵᠤ ᠥᠨᠥᠬᠢ ᠲᠦᠪᠳᠡᠨ ᠦ᠌ ᠶᠡᠬᠡ ᠲᠡᠭᠷᠢ ᠶ᠋ᠢᠨ ᠳᠦᠯᠡᠢ ᠶ᠋ᠢ ᠠᠪᠴᠢᠷᠠᠵᠤ ᠦᠵᠡᠶᠡ ᠭᠡᠯᠴᠡᠪᠡ᠃ ᠥᠪᠡᠷᠰᠡᠳ ᠦ᠋ᠨ ᠳᠤᠮᠳᠠ ᠡᠴᠡ ᠬᠡᠳᠦᠨ ᠬᠥᠮᠦᠰ ᠢ᠋ ᠭᠠᠷᠭᠠᠵᠤ ᠳᠠᠷᠤᠢ ᠤᠳᠠᠯ ᠦᠭᠡᠢ ᠠᠪᠤᠨ ᠬᠦᠷᠴᠦ ᠢᠷᠡᠪᠡ᠃ ᠲᠥᠯᠥᠭᠡᠯᠡᠭᠴᠢ ᠲᠡᠭᠦᠨ ᠢ᠋ ᠦᠵᠡᠪᠡᠯ ᠬᠠᠳᠠᠭ ᠶᠡᠨᠳᠡᠷ ᠢ᠋ᠶ᠋ᠡᠷ ᠴᠢᠮᠡᠭᠯᠡᠭᠰᠡᠨ ᠭᠬᠢᠪ ᠫᠠᠩᠰᠠ ᠪᠠᠷ ᠣᠷᠢᠶᠠᠭᠰᠠᠨ ᠦᠨᠡᠬᠡᠷ ᠨᠢᠭᠡᠨ ᠴᠢᠬᠤᠯᠠ ᠡᠷᠳᠡᠨᠢ ᠮᠡᠲᠦ ᠳᠠᠬᠢᠯᠠᠭᠰᠠᠨ ᠠᠵᠤᠭᠤ᠃ ᠲᠡᠭᠦᠨ ᠢ᠋ ᠲᠥᠯᠦᠭᠡᠯᠡᠭᠴᠢ ᠡᠴᠡ ᠵᠢᠭᠠᠪᠤᠷᠢ ᠭᠠᠷᠭᠠᠵᠤ ᠨᠢᠭᠡᠨ ᠳᠥᠷᠪᠡᠯᠵᠢᠨ ᠴᠡᠪᠡᠷᠬᠡᠨ ᠮᠣᠳᠣ ᠠᠪᠴᠢᠷᠠᠭᠤᠯᠤᠭᠠᠳ ᠥᠨᠥᠬᠢ ᠬᠣᠶᠠᠷ ᠲᠡᠭᠷᠢ ᠶ᠋ᠢᠨ ᠳᠦᠯᠡᠢ ᠶ᠋ᠢ ᠭᠠᠷᠭᠠᠨ ᠢᠷᠡᠵᠦ ᠲᠡᠭᠦᠨ ᠦ᠌ ᠳᠡᠭᠡᠷᠡ ᠲᠠᠯᠪᠢᠭᠠᠳ ᠭᠬᠢᠪ ᠬᠠᠳᠠᠭ ᠤ᠋ᠨ ᠣᠷᠢᠶᠠᠯᠲᠠ ᠶ᠋ᠢ ᠵᠠᠳᠠᠯᠵᠤ ᠦᠵᠡᠪᠡᠯ ᠶᠡᠷᠦ ᠨᠢᠭᠡ ᠠᠳᠠᠯᠢ ᠪᠦᠨᠳᠦᠭᠡᠷ ᠴᠠᠭᠠᠨ ᠲᠠᠯᠬᠠ ᠪᠠᠢᠪᠠ᠃ ᠭᠠᠭᠴᠠ ᠬᠦ᠌ ᠲᠦᠪᠳᠡᠨ ᠦ᠌ ᠲᠠᠯᠬᠠ ᠨᠢ ᠣᠨ ᠵᠢᠯ ᠤᠳᠠᠭᠠᠳ ᠴᠢᠯᠠᠭᠤ ᠮᠡᠲᠦ ᠪᠠᠲᠤᠵᠢᠨ ᠬᠠᠳᠠᠵᠠᠢ᠃ ᠲᠡᠳᠦᠢ ᠲᠥᠯᠥᠭᠡᠯᠡᠭᠴᠢ ᠲᠡᠳᠡᠭᠡᠷ ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠠ᠋ᠴᠠ ᠡᠢᠨ ᠠᠰᠠᠭᠤᠪᠠ᠄
ᠵᠠ ᠡᠨᠡ ᠬᠣᠶᠠᠷ ᠤ᠋ᠨ ᠠᠯᠢᠨ ᠡᠴᠡ ᠭᠡᠷᠡᠯ ᠭᠠᠷᠴᠤ ᠪᠠᠢᠨᠠ᠃ ᠲᠡᠳᠡᠭᠡᠷ ᠠᠷᠠᠳ ᠤ᠋ᠳ ᠳᠠᠬᠢᠨ ᠳᠠᠬᠢᠨ ᠨᠢᠳᠦ ᠪᠡᠨ ᠠᠷᠴᠢᠵᠤ ᠦᠵᠡᠪᠡᠯ ᠲᠣᠳᠣᠷᠬᠠᠢ ᠭᠡᠷᠡᠯ ᠭᠠᠷᠴᠤ ᠪᠣᠢ ᠨᠢ ᠠᠯᠢ ᠠᠯᠢᠨ ᠨᠢ ᠴᠦ᠍ ᠦᠵᠡᠭᠳᠡᠬᠦ ᠦᠭᠡᠢ ᠲᠤᠯᠠ ᠭᠠᠢᠬᠠᠰᠢ ᠲᠠᠰᠤᠷᠠᠵᠤ ᠭᠡᠷᠡᠯ ᠭᠠᠷᠴᠤ ᠪᠠᠢᠭᠠ ᠶᠠᠭᠤᠮᠠ ᠦᠵᠡᠭᠳᠡᠬᠦ ᠦᠭᠡᠢ ᠪᠠᠢᠨᠠ ᠭᠡᠵᠡᠭᠡᠪᠡ᠃ ᠲᠥᠯᠥᠭᠡᠯᠡᠭᠴᠢ ᠲᠡᠷᠡ ᠪᠠᠢᠳᠠᠯ ᠢ᠋ ᠦᠵᠡᠭᠡᠳ ᠵᠠ ᠲᠡᠢᠮᠦ ᠪᠣᠯ ᠯᠠᠪ ᠡᠨᠡ ᠬᠣᠶᠠᠷ ᠪᠡᠶᠡ ᠪᠡᠶᠡ ᠪᠡᠨ ᠦᠵᠡᠭᠡᠳ ᠡᠪᠡᠳᠴᠢᠨ ᠣᠯᠤᠭᠰᠠᠨ ᠪᠠᠢᠬᠤ ᠮᠠᠭᠠᠳ ᠦᠭᠡᠢ᠂ ᠪᠢ ᠣᠳᠣ ᠬᠠᠭᠠᠯᠪᠤᠷᠢᠯᠠᠵᠤ ᠵᠠᠪᠰᠠᠷ ᠭᠠᠷᠭᠠᠵᠤ ᠲᠠ ᠪᠦᠬᠦᠨ ᠳ᠋ᠦ᠍ ᠦᠵᠡᠭᠦᠯᠦᠶᠡ᠃ ᠨᠠᠳᠠ ᠨᠢᠭᠡ ᠲᠣᠮᠣ ᠰᠠᠢᠨ ᠬᠢᠲᠤᠭᠠ ᠠᠪᠴᠢᠷᠠ ᠭᠡᠪᠡ᠃ ᠲᠡᠳᠦᠢ ᠤᠳᠠᠯ ᠦᠭᠡᠢ ᠬᠢᠲᠤᠭᠠ ᠭᠠᠷᠭᠠᠵᠤ ᠥᠭᠭᠦᠮᠡᠭᠴᠡ ᠥᠨᠥᠬᠢ ᠬᠢᠲᠤᠭᠠ ᠪᠠᠷ ᠲᠡᠷᠡ ᠬᠣᠶᠠᠷ ᠲᠠᠯᠬᠠ ᠶ᠋ᠢ ᠵᠦᠰᠦᠵᠦ ᠬᠡᠳᠦᠨ ᠬᠡᠰᠡᠭ ᠪᠣᠯᠭᠠᠭᠠᠳ ᠵᠠ ᠡᠨᠡ ᠬᠣᠶᠠᠷ ᠤ᠋ᠨ ᠳᠣᠲᠣᠷᠠ ᠲᠠᠯᠠ ᠨᠢ ᠠᠳᠠᠯᠢ ᠪᠠᠢᠨᠠ ᠤᠤ ᠭᠡᠵᠦ ᠬᠥᠮᠦᠨ ᠬᠥᠮᠦᠨ ᠳ᠋ᠦ᠍ ᠠᠪᠴᠤ ᠥᠭᠪᠡ᠃ ᠲᠡᠳᠡᠭᠡᠷ ᠦ᠋ᠳ ᠲᠡᠭᠦᠨ ᠢ᠋ ᠦᠵᠡᠭᠡᠳ ᠡᠨᠡ ᠨᠢ ᠠᠳᠠᠯᠢ ᠴᠤ᠌ ᠠᠳᠠᠯᠢ ᠪᠠᠢᠨᠠ᠃ ᠭᠠᠭᠴᠠ ᠬᠦ᠌ ᠡᠨᠡ ᠨᠢ ᠬᠠᠲᠠᠭᠤ᠂ ᠡᠨᠡ ᠨᠢ ᠵᠥᠭᠡᠯᠡᠨ ᠪᠠᠢᠨᠠ ᠭᠡᠪᠡ᠃ ᠲᠥᠯᠥᠭᠡᠯᠡᠭᠴᠢ ᠬᠡᠯᠡᠷᠦᠨ᠄
ᠡᠨᠡ ᠮᠥᠨ ᠲᠡᠢᠮᠦ ᠪᠠᠢᠬᠤ ᠶᠣᠰᠣᠲᠠᠢ ᠶᠤᠮ᠂ ᠨᠢᠭᠡ ᠨᠢ ᠡᠳᠦᠷ ᠬᠣᠨᠣᠭ ᠤᠳᠠᠭᠠᠳ ᠬᠠᠲᠠᠭᠰᠠᠨ ᠶᠤᠮ᠃ ᠡᠨᠡ ᠪᠣᠯ ᠠᠷᠭᠠ ᠦᠭᠡᠢ ᠰᠢᠨᠡᠬᠡᠨ ᠠᠪᠴᠤ ᠶᠠᠪᠤᠭᠠ ᠲᠤᠯᠠ ᠡᠢᠮᠦ ᠵᠥᠭᠡᠯᠡᠨ ᠪᠠᠢᠳᠠᠭ ᠪᠣᠯᠠᠢ᠃ ᠡᠨᠡ ᠬᠣᠶᠠᠷ ᠦᠨᠡᠨ ᠳ᠋ᠡᠭᠡᠨ ᠶᠡᠬᠡ ᠲᠡᠭᠷᠢ ᠶ᠋ᠢᠨ ᠳᠦᠯᠡᠢ ᠪᠤᠰᠤ ᠭᠡᠪᠡ᠃ ᠭᠡᠲᠡᠯᠡ ᠲᠡᠳᠡᠭᠡᠷ ᠬᠥᠮᠦᠰ ᠦ᠋ᠨ ᠲᠤᠲᠤᠷᠠ ᠡᠴᠡ ᠲᠡᠢᠮᠦ ᠪᠣᠯ ᠡᠨᠡ ᠶᠠᠭᠤ ᠪᠣᠢ ᠭᠡᠵᠦ ᠠᠰᠠᠭᠤᠪᠠ᠃ ᠡᠨᠡ ᠪᠣᠯ ᠲᠠᠯᠬᠠ ᠭᠡᠳᠡᠭ ᠶᠠᠭᠤᠮᠠ ᠭᠡᠳ ᠳᠠᠬᠢᠨ ᠥᠪᠡᠷ ᠦ᠋ᠨ ᠪᠣᠭᠴᠣ ᠰᠠᠪᠠ ᠶ᠋ᠢ ᠵᠠᠳᠠᠯᠵᠤ ᠬᠡᠳᠦ ᠬᠡᠳᠦᠨ ᠪᠦᠬᠦᠯᠢ ᠶ᠋ᠢ ᠭᠠᠷᠭᠠᠭᠠᠳ᠄
ᠵᠠ ᠪᠢ ᠮᠡᠬᠡᠯᠡᠬᠦ ᠪᠤᠰᠤ᠂ ᠡᠨᠡ ᠪᠣᠯ ᠪᠢᠳᠡ ᠨᠠᠷ ᠤ᠋ᠨ ᠢᠳᠡᠳᠡᠭ ᠲᠠᠯᠬᠠ ᠪᠥᠭᠡᠳ ᠢᠩᠭᠢᠵᠦ ᠢᠩᠭᠢᠵᠦ ᠬᠢᠳᠡᠭ ᠶᠦᠮ ᠭᠡᠵᠡᠢ᠃ ᠴᠤᠭᠯᠠᠷᠠᠭᠰᠠᠨ ᠪᠦᠭᠦᠳᠡ ᠳ᠋ᠦ᠍ ᠦᠨᠡᠨ ᠤᠴᠢᠷ ᠢ᠋ ᠨᠢᠭᠡᠨ ᠵᠡᠷᠭᠡ ᠬᠡᠯᠡᠭᠡᠳ ᠪᠠᠰᠠ ᠲᠡᠷᠡ ᠬᠦ᠌ ᠳᠠᠯᠬᠠ ᠡᠴᠡ ᠥᠪᠡᠷ ᠢ᠋ᠶ᠋ᠡᠨ ᠬᠡᠰᠡᠭ ᠢ᠋ ᠠᠪᠴᠤ ᠢᠳᠡᠭᠡᠳ ᠲᠡᠳᠡᠭᠡᠷ ᠴᠤᠭᠯᠠᠷᠠᠭᠰᠠᠳ ᠲᠤ᠌ ᠲᠤᠰ ᠪᠦᠷᠢ ᠨᠢᠭᠡ ᠶ᠋ᠢ ᠥᠭᠭᠦᠭᠡᠳ᠄
ᠵᠠ ᠳᠠ ᠪᠦᠬᠦᠳᠡ ᠡᠨᠡ ᠶᠡᠬᠡ ᠲᠡᠭᠷᠢ ᠶ᠋ᠢᠨ ᠳᠦᠯᠡᠢ ᠶ᠋ᠢᠨ ᠠᠮᠲᠠ ᠶ᠋ᠢ ᠢᠳᠡᠵᠦ ᠦᠵᠡ ᠭᠡᠬᠦ ᠳ᠋ᠦ᠍ ᠲᠡᠳᠡ ᠰᠣᠨᠢᠷᠬᠠᠨ ᠢᠳᠡᠵᠦ ᠦᠵᠡᠪᠡᠯ ᠦᠨᠡᠬᠡᠷ ᠢᠰᠬᠡᠭᠰᠡᠨ ᠭᠤᠯᠢᠷ ᠤ᠋ᠨ ᠠᠮᠲᠠ ᠲᠠᠢ ᠪᠠᠢᠪᠠ᠃ ᠭᠡᠨᠡᠳᠲᠡ ᠲᠡᠳᠡᠨ ᠦ᠌ ᠳᠤᠮᠳᠠ ᠡᠴᠡ ᠨᠢᠭᠡ ᠬᠥᠮᠦᠨ ᠪᠣᠰᠤᠨ ᠬᠠᠷᠠᠢᠵᠤ ᠥᠨᠳᠥᠷ ᠳᠠᠭᠤ ᠪᠠᠷ ᠬᠡᠯᠡᠭᠰᠡᠨ ᠨᠢ᠄
ᠨᠥᠬᠥᠳ ᠠ᠋᠂ ᠡᠨᠡ ᠨᠢ ᠨᠡᠭᠡᠷᠡᠨ ᠢᠳᠡᠳᠡᠭ ᠶᠠᠭᠤᠮᠠ ᠮᠥᠨ ᠪᠠᠢᠨᠠ᠂ ᠭᠡᠲᠡᠯᠡ ᠬᠠᠷᠭᠢᠰ ᠬᠡᠷᠴᠡᠭᠡᠢ ᠮᠠᠭᠤ ᠵᠣᠯᠢᠭ ᠬᠠᠯᠴᠠᠭᠠᠢ ᠭᠣᠨᠴᠣᠭ᠂ ᠲᠦᠩᠰᠢ ᠶ᠋ᠢᠨ ᠲᠦᠪᠳᠡᠨ ᠨᠠᠷ ᠡᠷᠳᠡᠨᠢ ᠭᠡᠵᠦ ᠡᠨᠡ ᠬᠠᠪᠢ ᠶ᠋ᠢ ᠮᠡᠬᠡᠯᠡᠵᠦ ᠣᠯᠠᠨ ᠲᠦᠮᠡᠨ ᠦ᠌ ᠮᠠᠯ ᠬᠥᠷᠥᠩᠭᠡ ᠶᠢ ᠠᠰᠢᠭ᠍ᠯᠠᠭᠰᠠᠭᠠᠷ ᠣᠨ ᠤᠳᠠᠭᠰᠠᠨ ᠲᠤᠯᠠ ᠵᠦᠢ ᠨᠢ ᠲᠡᠭᠦᠨ ᠢ᠋ ᠬᠠᠤᠯᠢ ᠶ᠋ᠢᠨ ᠭᠠᠵᠠᠷ ᠰᠢᠯᠵᠢᠭᠦᠯᠵᠦ ᠰᠢᠢᠳᠬᠡᠭᠦᠯᠬᠦ ᠬᠡᠷᠡᠭᠲᠡᠢ ᠠᠮᠤᠢ᠃ ᠬᠡᠷᠬᠢᠪᠡᠴᠦ ᠵᠦᠭᠡᠷ ᠥᠩᠭᠡᠷᠡᠭᠦᠯᠬᠦ ᠦᠭᠡᠢ ᠭᠡᠵᠦ ᠬᠠᠰᠬᠢᠷᠪᠠ᠃ ᠪᠦᠭᠦᠳᠡ ᠲᠡᠭᠦᠨ ᠢ᠋ ᠰᠣᠨᠣᠰᠪᠠᠯ ᠶᠣᠰᠣᠨ ᠳ᠋ᠤ᠌ ᠨᠡᠢᠴᠡᠬᠦ ᠰᠠᠨᠠᠯ ᠮᠥᠨ ᠲᠤᠯᠠ ᠲᠤᠢᠯ ᠤ᠋ᠨ ᠬᠠᠲᠠᠭᠤ ᠪᠠᠷ ᠰᠢᠢᠳᠬᠡᠬᠦ ᠪᠠ ᠬᠥᠷᠥᠩᠭᠡ ᠶ᠋ᠢ ᠬᠤᠷᠢᠶᠠᠬᠤ ᠭᠡᠵᠦ ᠰᠠᠨᠠᠯ ᠭᠠᠷᠭᠠᠯᠴᠠᠵᠤ ᠮᠠᠰᠢ ᠳᠣᠭᠰᠢᠷᠠᠨ ᠪᠣᠰᠴᠠᠭᠠᠬᠤ ᠲᠥᠯᠥᠪ ᠪᠣᠯᠪᠠ᠃ ᠡᠨᠡ ᠬᠦ᠌ ᠪᠠᠢᠳᠠᠯ ᠢ᠋ ᠥᠨᠥ ᠲᠥᠯᠥᠭᠡᠯᠡᠭᠴᠢ ᠦᠵᠡᠭᠡᠳ᠄
ᠪᠠᠢᠵᠠ᠂ ᠪᠠᠢᠵᠠ ᠂ ᠨᠥᠬᠥᠳ ᠠ᠋᠂ ᠡᠨᠡ ᠮᠤᠬᠤᠷ ᠰᠦᠰᠦᠭ ᠮᠤᠩᠬᠠᠭ ᠭᠡᠨᠡᠨ ᠢ᠋ᠶ᠋ᠡᠷ ᠮᠡᠬᠡᠯᠡᠭᠰᠡᠨ ᠶᠠᠯᠠ ᠵᠢᠮᠡᠯᠡᠯ ᠦᠨᠡᠬᠡᠷ ᠬᠥᠨᠭᠭᠡᠨ ᠪᠤᠰᠤ ᠪᠣᠯᠪᠠᠴᠤ᠂ ᠪᠢ ᠦᠵᠡᠪᠡᠯ ᠤᠭ ᠠ᠋ᠴᠠ ᠰᠠᠨᠠᠭᠠ ᠲᠠᠢ ᠪᠠᠷ ᠡᠭᠦᠰᠦᠭᠰᠡᠨ ᠬᠡᠷᠡᠭ ᠪᠤᠰᠤ ᠪᠣᠯᠤᠯᠲᠠᠢ᠃ ᠶᠠᠭᠤ ᠭᠡᠪᠡᠯ ᠵᠠᠮ ᠤ᠋ᠨ ᠬᠥᠮᠦᠰ ᠦ᠋ᠨ ᠭᠡᠭᠡᠭᠳᠡᠭᠦᠯᠦᠭᠰᠡᠨ ᠲᠠᠯᠬᠠ ᠶ᠋ᠢ ᠠᠩᠬᠠ ᠣᠯᠤᠭᠰᠠᠨ ᠲᠤᠯᠠ ᠲᠡᠭᠦᠨ ᠳ᠋ᠦ᠍ ᠨᠡᠷᠡ ᠥᠭᠴᠦ ᠶᠠᠳᠠᠬᠤ ᠳ᠋ᠠᠭᠠᠨ ᠲᠡᠭᠷᠢ ᠶ᠋ᠢᠨ ᠳᠦᠯᠡᠢ ᠭᠡᠵᠦ ᠪᠠᠯᠠᠢᠷᠠᠵᠤ᠂ ᠲᠡᠷᠡ ᠨᠢ ᠶᠠᠪᠤᠨ ᠶᠠᠪᠤᠭᠰᠠᠭᠠᠷ ᠣᠯᠠᠨ ᠨᠡᠢᠲᠡ ᠡᠴᠡ ᠪᠢᠰᠢᠷᠡᠨ ᠦᠭᠦᠯᠡᠭᠳᠡᠬᠦ ᠡᠢᠮᠦ ᠳ᠋ᠦ᠍ ᠬᠦᠷᠭᠡᠭᠰᠡᠨ ᠬᠡᠷᠡᠭ ᠪᠠᠢᠨᠠ᠃ ᠡᠭᠦᠨ ᠳ᠋ᠦ᠍ ᠬᠡᠨ ᠬᠡᠨ ᠦ᠌ ᠬᠢᠨᠠᠮᠠᠭᠠᠢ ᠦᠭᠡᠢ ᠣᠰᠣᠯ ᠲᠠᠰᠢᠶᠠ ᠪᠥᠭᠡᠳ ᠦᠨᠳᠦᠰᠦᠨ ᠳ᠋ᠡᠭᠡᠨ ᠮᠠᠨ ᠤ᠋ ᠮᠣᠩᠭᠣᠯ ᠣᠯᠠᠨ ᠶᠠᠭᠤᠮᠠ ᠶ᠋ᠢ ᠦᠵᠡᠭᠡ ᠦᠭᠡᠢ ᠰᠣᠨᠣᠰᠤᠭᠠ ᠦᠭᠡᠢ ᠪᠦᠳᠦᠭᠦᠯᠢᠭ ᠪᠠᠭᠤᠷᠠᠢ ᠪᠠ ᠳᠠᠮ ᠤ᠋ᠨ ᠦᠭᠡ ᠵᠠᠪᠰᠠᠷ ᠤ᠋ᠨ ᠶᠠᠷᠢᠶᠠᠨ ᠳ᠋ᠤ᠌ ᠶᠠᠭᠠᠷᠠᠨ ᠠᠪᠲᠠᠭᠠ ᠶ᠋ᠢᠨ ᠬᠠᠷᠠᠭᠠ ᠮᠥᠨ ᠲᠤᠯᠠ ᠡᠭᠦᠨ ᠡᠴᠡ ᠠᠯᠢᠪᠠ ᠳ᠋ᠤ᠌ ᠶᠠᠭᠠᠷᠠᠨ ᠲᠥᠰᠦᠭᠡᠯᠡᠬᠦ ᠶ᠋ᠢ ᠪᠠᠢᠵᠤ᠂ ᠶᠠᠭᠤᠨ ᠤ᠋ ᠤᠷᠢᠳ ᠲᠡᠭᠦᠨ ᠦ᠌ ᠦᠨᠡᠨ ᠴᠢᠨᠠᠷ ᠢ᠋ ᠬᠢᠨᠠᠬᠤ᠂ ᠡᠢᠮᠦ ᠪᠣᠯ ᠡᠨᠡ ᠵᠦᠢᠯ ᠦ᠋ᠨ ᠡᠨᠳᠡᠭᠦᠷᠡᠯ ᠲᠠᠰᠢᠶᠠᠷᠠᠯ ᠤ᠋ᠨ ᠡᠪᠡᠳᠴᠢᠨ ᠠᠷᠢᠯᠵᠤ ᠪᠤᠷᠤᠭᠤ ᠵᠠᠮ ᠳ᠋ᠤ᠌ ᠣᠷᠣᠬᠤ ᠦᠭᠡᠢ ᠪᠣᠯᠬᠤ ᠶ᠋ᠢᠨ ᠰᠡᠳᠬᠢᠯ ᠨᠢ ᠡᠨᠡ ᠪᠣᠯᠤᠨᠠ ᠭᠡᠬᠦ ᠳ᠋ᠦ᠍ ᠪᠦᠭᠦᠳᠡᠭᠡᠷ ᠲᠤᠢᠯ ᠤ᠋ᠨ ᠶᠡᠬᠡ ᠵᠥᠪᠰᠢᠶᠡᠷᠡᠵᠦ ᠪᠦᠭᠦᠳᠡᠭᠡᠷ ᠲᠠᠯᠬᠠ ᠶ᠋ᠢᠨ ᠤᠴᠢᠷ ᠢ᠋ ᠣᠯᠵᠤ ᠪᠦᠷ ᠶᠡᠬᠡ ᠪᠡᠷ ᠢᠨᠢᠶᠡᠯᠴᠡᠨ ᠲᠠᠷᠬᠠᠵᠠᠢ᠃
– – – –
① ᠨᠢᠭᠡ ᠵᠦᠢᠯ ᠦᠨ ᠮᠥᠭᠥ
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ᠂ ᠪᠠᠭᠠᠲᠤᠷ
ᠬᠢᠨᠠᠭᠴᠢ᠄ ᠭᠠᠸᠠ