ᠠᠷᠠᠭ ᠤᠯᠠᠭᠠᠨ ᠬᠣᠩᠭᠣᠷ ᠳᠠᠯᠠᠨ ᠬᠠᠭᠠᠨ ᠲᠠᠢ ᠪᠠᠶ᠋ᠢᠷᠢ ᠪᠠᠷᠢᠯᠲᠤᠭᠰᠠᠨ ᠪᠦᠯᠦᠭ ᠠ᠋ᠴᠠ
1199ᠠᠷᠠᠭ ᠤᠯᠠᠭᠠᠨ ᠬᠣᠩᠭᠣᠷ ᠳᠠᠯᠠᠨ ᠬᠠᠭᠠᠨ ᠲᠠᠢ ᠪᠠᠶ᠋ᠢᠷᠢ ᠪᠠᠷᠢᠯᠲᠤᠭᠰᠠᠨ ᠪᠦᠯᠦᠭ ᠠ᠋ᠴᠠ
ᠰᠢᠨᠵᠢᠶᠠᠩ ᠤ᠋ᠨ ᠲᠠᠷᠪᠠᠭᠠᠲᠠᠢ ᠠᠶ᠋ᠢᠮᠠᠭ ᠤ᠋ᠨ ᠬᠤᠪᠤᠭᠰᠠᠶ᠋ᠢᠷᠢ ᠮᠣᠩᠭᠣᠯ ᠥᠪᠡᠷᠲᠡᠭᠡᠨ ᠵᠠᠰᠬᠠᠤ ᠰᠢᠶᠠᠨ ( ᠬᠤᠰᠢᠭᠤᠨ ) ᠤ᠋
ᠵᠠᠩᠭᠠᠷ ᠣᠷᠳᠣᠨ ᠤ᠋ ᠠᠯᠳᠠᠷᠲᠤ ᠵᠠᠩᠭᠠᠷᠴᠢ ᠳᠣᠷᠵᠢ ᠶ᠋ᠢᠨ ᠨᠢᠮᠠ ᠬᠠᠶ᠋ᠢᠯᠠᠪᠠ
ᠲᠤᠷᠪᠢ ᠬᠦᠷᠦᠭᠰᠡᠨ ᠰᠠᠢᠬᠠᠨ ᠵᠢᠷᠭᠠᠯ ᠲᠠᠢ
ᠳᠦᠭᠦᠷᠡᠩ ᠰᠠᠢᠬᠠᠨ ᠠᠮᠤᠭᠤᠯᠠᠩ
ᠳᠠᠭᠤᠲᠠᠢ ᠬᠠᠭᠠᠨ ᠨᠣᠶᠠᠨ ᠵᠠᠩᠭᠠᠷ ᠤ᠋ᠨ ᠬᠢᠨ
ᠳᠣᠯᠣᠭᠠᠨ ᠲᠤᠩᠭᠠᠷᠠᠢ ᠭᠦᠢᠴᠡᠭᠰᠡᠭᠡᠷ
ᠠᠷᠠᠵᠠ ᠰᠠᠭᠤᠷᠢ ᠶ᠋ᠢᠨ ᠨᠠᠶ᠋ᠢᠷᠠᠨ ᠳ᠋ᠤ᠌ ᠯᠠ
ᠠᠮᠠᠨ ᠭᠦᠵᠡᠭᠡᠨ ᠬᠠᠯᠠᠭᠠᠳ
ᠠᠷᠪᠠᠨ ᠬᠣᠶᠠᠷ ᠪᠠᠭᠠᠲᠤᠷ ᠨᠢ
ᠠᠲᠠᠭᠠ ᠮᠠᠷᠭᠤᠭᠠ ᠪᠤᠯᠢᠶᠠᠯᠳᠤᠭᠠᠳ
ᠰᠠᠭᠤᠵᠤ ᠪᠠᠶ᠋ᠢᠬᠰᠠᠨ ᠴᠠᠭ ᠲᠤ᠌ ᠭᠡᠨᠡ ᠯᠡ ᠶᠢ
ᠡᠨᠡ ᠴᠠᠭ ᠲᠤ᠌ ᠪᠣᠯᠬᠤᠯᠠ ᠭᠡᠨᠡ ᠯᠡ ᠶᠢ
ᠢᠷᠡᠭᠡᠳ ᠦᠭᠡᠢ ᠶᠡᠷᠡᠨ ᠶᠢᠰᠦᠨ ᠵᠢᠯ ᠊ᠢ
ᠠᠶ᠋ᠢᠯᠠᠲᠤᠭᠠᠳ ᠮᠡᠳᠡᠭᠡᠳ ᠰᠠᠭᠤᠳᠠᠭ
ᠥᠩᠭᠡᠷᠡᠭ᠍ᠰᠡᠨ ᠶᠡᠷᠡᠨ ᠶᠢᠰᠦᠨ ᠵᠢᠯ ᠊ᠢ
ᠡᠷᠭᠢᠴᠡᠭᠦᠯᠦᠭᠡᠳ ᠮᠡᠳᠡᠳᠡᠭ
ᠶᠡᠨᠳᠡᠷ ᠶᠠᠯᠠᠭᠠ ᠴᠠᠭᠠᠨ ᠡᠪᠦᠭᠡᠨ ᠦ᠌ ᠯᠡ
ᠶᠡᠨᠳᠡᠷ ᠰᠢᠷᠠ ᠬᠠᠶ᠋ᠢᠷᠴᠠᠭ ᠨᠢ
ᠵᠠᠷ ᠭᠠᠷᠴᠤ ᠭᠡᠨᠡ ᠯᠡ ᠶᠢ
ᠪᠠᠷᠠᠭᠤᠨ ᠬᠣᠶ᠋ᠢᠲᠤ ᠵᠦᠭ ᠲᠦ᠍ ᠪᠠᠶ᠋ᠢᠬᠰᠠᠨ
ᠪᠠᠭᠠᠲᠤᠷ ᠤ᠋ᠨ ᠣᠷᠣᠨ ᠤ᠋ ᠬᠣᠩᠭᠣᠷ
ᠪᠣᠱᠣᠭᠣ ᠪᠠᠷ ᠨᠢ ᠪᠣᠰᠤᠭᠠ ᠬᠠᠭᠠᠨ ᠭᠡᠨᠡ ᠯᠡ ᠶᠢ
ᠲᠤᠰᠠᠭᠤᠷᠢ ᠨᠢ ᠲᠣᠰᠤᠭᠠ ᠬᠠᠭᠠᠨ ᠭᠡᠨᠡ ᠯᠡ ᠶᠢ
ᠡᠨᠡ ᠬᠣᠶᠠᠷ ᠬᠠᠭᠠᠨ ᠨᠡᠶ᠋ᠢᠯᠡᠵᠦ ᠠᠪᠤᠭᠠᠳ
ᠬᠠᠮᠤᠭ ᠳᠡᠯᠡᠬᠡᠢ ᠶ᠋ᠢᠨ ᠶᠠᠭᠤᠮᠠ ᠪᠦᠬᠦᠨ ᠊ᠢ ᠡᠵᠡᠯᠡᠨ ᠠᠪᠤᠭᠠᠳ
ᠲᠠᠬᠢᠯ ᠵᠤᠯᠠ ᠬᠠᠭᠠᠨ ᠤ᠋ ᠦᠯᠡᠳᠡᠯ
ᠲᠠᠩᠰᠤᠭ ᠪᠤᠮᠪᠠ ᠬᠠᠭᠠᠨ ᠤ᠋ ᠠᠴᠢ
ᠥᠵᠥᠩ ᠠᠯᠳᠠᠷ ᠬᠠᠭᠠᠨ ᠤ᠋ ᠬᠥᠪᠡᠭᠦᠨ
ᠦᠶᠡ ᠶ᠋ᠢᠨ ᠥᠨᠥᠴᠢᠨ ᠵᠠᠩᠭᠠᠷ ᠤ᠋ᠨ
ᠦᠨᠳᠦᠰᠦ ᠤᠭᠰᠠᠭᠠ ᠶ᠋ᠢ ᠨᠢ ᠲᠠᠰᠤᠯᠠᠭᠠᠳ
ᠦᠨᠡᠰᠦᠨ ᠲᠣᠪᠷᠠᠭ ᠬᠢᠭᠡᠳ ᠬᠠᠶᠠᠨᠠ ᠭᠡᠵᠦ ᠪᠠᠶ᠋ᠢᠨᠠ ᠭᠡᠨᠡ ᠯᠡ ᠶᠢ
ᠭᠡᠷ ᠯᠡ ᠨᠡᠪᠲᠡ ᠭᠡᠷᠡᠯ ᠲᠡᠢ᠂ ᠭᠡᠭᠡ ᠨᠡᠪᠲᠡ ᠲᠣᠯᠢ ᠲᠠᠢ
ᠢᠳᠢ ᠲᠡᠢ ᠰᠢᠳᠢ ᠲᠡᠢ ᠲᠥᠷᠥᠭᠰᠡᠨ
ᠠᠪᠠᠢ ᠭᠡᠷᠡᠯ ᠬᠠᠲᠤᠨ ᠊ᠢ ᠨᠢ
ᠠᠮᠢᠳᠤ ᠪᠠᠷ ᠨᠢ ᠪᠠᠷᠢᠵᠤ ᠯᠠ ᠠᠪᠴᠤ ᠢᠷᠡᠭᠡᠳ
ᠠᠶ᠋ᠢᠯ ᠬᠣᠭᠣᠷᠣᠨᠳᠣ ᠪᠠᠨ ᠵᠠᠷᠤᠴᠠ ᠬᠢᠭᠡᠳ
ᠠᠯᠠᠭᠠᠨ ᠳᠡᠭᠡᠷᠡ ᠪᠡᠨ ᠤᠰᠤ ᠬᠢᠯᠭᠡᠨᠡ ᠯᠡ
ᠭᠡᠵᠦ ᠪᠠᠶ᠋ᠢᠨᠠ ᠭᠡᠨᠡ ᠯᠡ ᠶᠢ
ᠡᠨᠡ ᠴᠠᠭ ᠲᠤ᠌ ᠪᠣᠯᠬᠤᠯᠠ ᠭᠡᠨᠡ ᠯᠡ ᠶᠢ
ᠣᠷᠴᠢᠯᠠᠩ ᠳ᠋ᠤ᠌ ᠬᠣᠪᠣᠷᠬᠠᠨ ᠪᠠᠭᠠᠲᠤᠷ ᠮᠤᠳ ( ᠦ᠋ᠳ ) ᠦ᠋ᠨ
ᠠᠭᠤᠰᠬᠢ ᠵᠢᠷᠦᠬᠡ ᠨᠢ ᠴᠡᠴᠡᠷᠡᠭᠡᠳ
ᠤᠷᠤᠭᠤ ᠬᠠᠯᠠᠶ᠋ᠢᠭᠠᠳ ᠬᠣᠲᠣᠯᠵᠠᠭᠠᠳ
ᠦᠭᠡ ᠳᠠᠭᠤᠨ ᠲᠠᠰᠤᠷᠠᠭᠠᠳ ᠣᠳᠴᠤ ᠭᠡᠨᠡ ᠯᠡ ᠶᠢ
ᠡᠨᠡ ᠴᠠᠭ ᠲᠤ᠌ ᠪᠣᠯᠬᠤᠯᠠ ᠭᠡᠨᠡ ᠯᠡ ᠶᠢ
ᠪᠥᠬᠡ ᠪᠥᠬᠡ ᠪᠥᠭᠡᠯᠲᠡᠢ
ᠪᠥᠬᠡ ᠮᠥᠩᠭᠥᠨ ᠰᠢᠭᠰᠢᠷᠡᠭᠡ ᠶ᠋ᠢᠨ
ᠤᠤᠭᠠᠨ ᠭᠠᠨᠴᠠᠬᠠᠨ ᠬᠥᠪᠡᠭᠦᠨ
ᠠᠷᠰᠠᠯᠠᠩ ᠤ᠋ᠨ ᠠᠷᠠᠭ ᠤᠯᠠᠭᠠᠨ ᠬᠣᠩᠭᠣᠷ ᠤ᠋ᠨ
ᠠᠷᠪᠠᠨ ᠴᠠᠭᠠᠨ ᠬᠤᠷᠤᠭᠤᠨ ᠭᠡᠳᠡᠭ ᠴᠢᠨᠢ
ᠠᠯᠢᠬᠠᠨ ( ᠠᠯᠠᠭᠠᠨ ) ᠲᠠᠯᠠ ᠳ᠋ᠠᠭᠠᠨ ᠦᠢᠮᠡᠯᠳᠦᠭᠡᠳ
ᠠᠷᠠᠭᠠ ᠰᠣᠶᠣᠭᠠ ᠭᠡᠳᠡᠭ ᠴᠢᠨᠢ
ᠠᠮᠠᠨ ᠳᠣᠲᠣᠷᠠ ᠪᠠᠨ ᠬᠠᠷᠵᠢᠭᠢᠨᠠᠭᠠᠳ
ᠠᠪᠬᠤ ᠱᠣᠩᠬᠣᠷ ᠤ᠋ᠨ ᠨᠢᠳᠦᠨ ᠭᠠᠷᠤᠭᠠᠳ
ᠬᠡᠯᠡᠵᠦ ᠪᠠᠶ᠋ᠢᠨᠠ ᠭᠡᠨᠡ ᠯᠡ ᠶᠢ
ᠪᠤᠮᠪᠠ ᠶ᠋ᠢᠨ ᠣᠷᠣᠨ ᠤ᠋ ᠲᠥᠯᠥᠭᠡ ᠪᠣᠯᠬᠤᠯᠠ ᠯᠠ
ᠠᠰᠬᠠᠷᠠᠭᠠᠳ ᠣᠳᠬᠤᠯᠠ ᠯᠠ
ᠠᠶ᠋ᠢᠬ᠋ᠠ ᠴᠢᠰᠤᠨ ᠪᠡᠯᠡᠨ ᠬᠣᠩᠭᠣᠷ ᠡᠰᠡ ᠶᠣ᠌
ᠠᠭᠢᠷᠠᠭᠠᠳ ᠤᠳᠬᠤᠨᠠ ᠶ᠋ᠢᠨ
ᠨᠠᠢ᠍ᠮᠠᠨ ᠴᠢᠮᠥᠭᠡ ᠨᠢ ᠪᠡᠯᠡᠨ ᠬᠣᠩᠭᠣᠷ ᠡᠰᠡ ᠶᠣ᠌
ᠲᠣᠭᠣᠰ ᠠᠯᠲᠠᠢ ᠶ᠋ᠢᠨ ᠲᠥᠯᠥᠭᠡ ᠪᠣᠯᠬᠤᠯᠠ ᠯᠠ
ᠲᠣᠪᠴᠢ ᠶ᠋ᠢᠨ ᠴᠢᠨᠡᠭᠡᠨ ᠡᠨᠡ ᠬᠠᠷᠠ ᠲᠣᠯᠣᠭᠠᠢ
ᠪᠡᠯᠡᠨ ᠬᠣᠩᠭᠣᠷ ᠡᠰᠡ ᠶᠣ᠌
ᠠᠯᠳᠠᠷ ᠨᠣᠶᠠᠨ ᠵᠠᠩᠭᠠᠷ ᠮᠢᠨᠢ
ᠠᠪᠠᠢ ᠭᠡᠷᠡᠯ ᠬᠠᠲᠤᠨ ᠮᠢᠨᠢ
ᠠᠷᠪᠠᠨ ᠬᠣᠶᠠᠷ ᠪᠠᠭᠠᠲᠤᠷ ᠮᠢᠨᠢ
ᠠᠪᠤ ᠡᠵᠢ ᠬᠣᠶᠠᠷ ᠮᠢᠨᠢ
ᠠᠯᠪᠠᠲᠤ ᠰᠠᠢᠬᠠᠨ ᠨᠤᠲᠤᠭ ᠮᠢᠨᠢ
ᠠᠮᠤᠢ ᠮᠡᠨᠳᠦ ᠰᠠᠭᠤᠵᠤ ᠪᠠᠶ᠋ᠢᠲᠤᠨ ᠬᠢᠭᠡᠳ
ᠤᠴᠤᠯ ᠬᠥᠬᠡ ᠬᠦᠯᠦᠭ ᠲᠡᠭᠡᠨ
ᠮᠣᠷᠳᠠᠭᠠᠳ ᠭᠠᠷᠴᠤ ᠭᠡᠨᠡ ᠯᠡ ᠶᠢ ᠃
ᠲᠠᠢᠯᠪᠤᠷᠢ᠄
ᠠᠷᠰᠠᠯᠠᠩ--- ᠠᠷᠰᠯᠠᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠳ·ᠨᠠᠷᠠᠰᠤ
ᠦᠰᠦᠭ ᠬᠠᠳᠠᠭᠴᠢ᠄ ᠠᠵᠠᠵᠠᠶᠠᠭᠠ
ᠬᠢᠨᠠᠭᠴᠢ᠄ ᠳ·ᠨᠠᠷᠠᠰᠤ