ᠱᠠᠭᠠ ᠶᠢᠨ ᠢᠷᠦᠭᠡᠯШагаагийн ерөөл
378ᠱᠠᠭᠠ ᠶᠢᠨ ᠢᠷᠦᠭᠡᠯ
ᠣᠮ ᠰᠠᠢᠨ ᠠᠮᠤᠭᠤᠯᠠᠩ ᠲᠠᠨ ᠪᠣᠯᠲᠤᠭᠠᠢ
ᠡᠩᠬᠡ ᠰᠠᠢᠨ ᠵᠢᠷᠭᠠᠯᠠᠩ ᠲᠠᠨ ᠪᠣᠯᠲᠤᠭᠠᠢ
ᠡᠩ ᠤᠷᠢᠳᠤ ᠶ᠋ᠢᠨ ᠨᠢᠭᠡᠨ ᠴᠠᠭ ᠲᠤ᠌
ᠡᠵᠡᠨ ᠪᠣᠭᠳᠠ ᠴᠢᠩᠭᠢᠰ ᠬᠠᠭᠠᠨ
ᠪᠠᠭᠠ ᠨᠠᠰᠤᠨ ᠳ᠋ᠠᠭᠠᠨ ᠪᠠᠢᠬᠤ ᠶ᠋ᠢᠨ ᠴᠠᠭ ᠲᠤ᠌
ᠵᠠᠳᠠᠷᠠᠨ ᠣᠪᠣᠭ ᠤ᠋ᠨ ᠵᠠᠮᠤᠬᠠ ᠲᠠᠢ
ᠤᠨᠤᠨ ᠮᠥᠷᠡᠨ ᠦ᠌ ᠮᠥᠰᠥᠨ ᠳᠡᠭᠡᠷᠡ
ᠠᠯᠲᠠᠨ ᠮᠥᠩᠭᠥᠨ ᠱᠠᠭᠠ ᠲᠣᠭᠯᠠᠵᠤ
ᠠᠩᠬᠠᠨ ᠤ᠋ ᠠᠨᠳᠠ ᠪᠣᠯᠤᠯᠴᠠᠨ
ᠠᠷᠢᠭᠤᠨ ᠱᠠᠭᠠ ᠰᠣᠯᠢᠯᠴᠠᠭᠰᠠᠨ ᠭᠡᠨᠡ
ᠵᠠ ᠡᠨᠡ ᠱᠠᠭᠠ ᠶ᠋ᠢ ᠨᠢ ᠠᠪᠤᠭᠠᠳ ᠰᠢᠨᠵᠢᠭᠡᠳ ᠦᠵᠡᠪᠡᠯ
ᠠᠳᠤᠭᠤ ᠮᠠᠯ ᠲᠠᠪᠤᠨ ᠡᠷᠳᠡᠨᠢ
ᠠᠯᠲᠠᠨ ᠱᠠᠭᠠ ᠠᠷᠪᠠᠨ ᠡᠷᠳᠡᠨᠢ
ᠮᠣᠷᠢᠨ ᠱᠠᠭᠠ ᠮᠣᠯᠣᠷ ᠡᠷᠳᠡᠨᠢ
ᠮᠥᠩᠭᠥᠨ ᠱᠠᠭᠠ ᠪᠤᠶᠠᠨᠲᠤ ᠡᠷᠳᠡᠨᠢ
ᠮᠠᠯ ᠤ᠋ᠨ ᠱᠠᠭᠠ ᠮᠥᠩᠬᠡ ᠡᠷᠳᠡᠨᠢ
ᠮᠠᠯᠴᠢᠨ ᠲᠦᠮᠡᠨ ᠦ᠌ ᠡᠷᠬᠢᠮ ᠡᠷᠳᠡᠨᠢ
ᠬᠣᠨᠢᠨ ᠱᠠᠭᠠ ᠬᠣᠪᠣᠷ ᠡᠷᠳᠡᠨᠢ
ᠬᠣᠲᠠᠯᠠ ᠣᠯᠠᠨ ᠤ᠋ ᠲᠣᠭᠯᠠᠭᠠᠮ ᠤ᠋ᠨ ᠡᠷᠳᠡᠨᠢ
ᠮᠢᠬᠠᠨ ᠳᠣᠲᠣᠷᠠ ᠶᠠᠰᠤ ᠡᠷᠳᠡᠨᠢ
ᠶᠠᠰᠤᠨ ᠳᠣᠲᠣᠷᠠ ᠱᠠᠭᠠ ᠡᠷᠳᠡᠨᠢ
ᠲᠡᠭᠰᠢ ᠲᠠᠯᠠ ᠨᠢ ᠮᠣᠷᠢᠨ ᠡᠷᠳᠡᠨᠢ
ᠡᠰᠡᠷᠭᠦ ᠲᠠᠯᠠ ᠨᠢ ᠲᠡᠮᠡᠭᠡᠨ ᠡᠷᠳᠡᠨᠢ
ᠬᠦᠳᠦᠩ ᠲᠠᠯᠠ ᠨᠢ ᠦᠬᠡᠷ ᠡᠷᠳᠡᠨᠢ
ᠬᠣᠲᠣᠩ ᠲᠠᠯᠠ ᠨᠢ ᠬᠣᠨᠢ ᠢᠮᠠᠭᠠᠨ ᠡᠷᠳᠡᠨᠢ
ᠳᠡᠭᠡᠭᠰᠢ ᠪᠡᠨ ᠬᠠᠨᠳᠤᠪᠠᠯ ᠠᠯᠲᠠᠨ ᠪᠠᠭᠠᠨᠠ
ᠳᠣᠷᠣᠭᠰᠢ ᠪᠠᠨ ᠬᠠᠨᠳᠤᠪᠠᠯ ᠱᠣᠷᠣᠨ ᠪᠠᠭᠠᠨᠠ
ᠬᠤᠷᠤᠢ ᠬᠤᠷᠤᠢ ᠬᠤᠷᠤᠢ
ᠵᠠ ᠡᠨᠡ ᠲᠡᠭᠰᠢ ᠲᠠᠯᠠ ᠠ᠋ᠴᠠ ᠨᠢ ᠦᠵᠡᠪᠡᠯ
ᠴᠡᠭᠷᠠᠸᠠᠷᠳᠢ ᠬᠠᠭᠠᠨ ᠤ᠋ ᠰᠠᠩ ᠳ᠋ᠤ᠌
ᠰᠠᠩᠪᠤᠤ ᠵᠠᠯᠰᠠᠨ ᠤ᠋ ᠬᠠᠲᠤᠨ ᠤ᠋ ᠰᠦᠷᠦᠭ ᠲᠦ᠍
ᠽᠠᠨᠳᠠᠨ ᠬᠦᠷᠡᠩ ᠮᠣᠷᠢᠨ ᠠ᠋ᠴᠠ ᠭᠠᠷᠤᠭᠰᠠᠨ
ᠪᠢᠯᠢᠭᠦᠨ ᠬᠡᠭᠡᠷ ᠮᠣᠷᠢ ᠪᠠᠢᠨᠠ
ᠴᠢᠭᠢᠭ ᠲᠡᠢ ᠭᠠᠵᠠᠷ ᠪᠡᠯᠴᠢᠭᠡᠷᠯᠡᠭᠰᠡᠨ
ᠴᠡᠴᠡᠭ ᠲᠡᠢ ᠭᠠᠵᠠᠷ ᠵᠣᠭᠰᠣᠭᠠᠭᠰᠠᠨ
ᠬᠢᠵᠠᠯᠠᠩ ᠳ᠋ᠤ᠌ ᠨᠢ ᠬᠢᠨᠠᠭᠰᠠᠨ
ᠰᠣᠶᠣᠯᠠᠩ ᠳ᠋ᠤ᠌ ᠨᠢ ᠰᠣᠷᠢᠭᠰᠠᠨ
ᠲᠥᠭᠡ ᠰᠠᠢᠬᠠᠨ ᠴᠢᠬᠢ ᠲᠡᠢ
ᠲᠥᠭᠥᠷᠢᠭ ᠬᠠᠷᠠ ᠨᠢᠳᠦ ᠲᠡᠢ
ᠲᠤᠷᠤᠭ ᠰᠠᠢᠬᠠᠨ ᠪᠡᠶᠡ ᠲᠡᠢ
ᠲᠤᠭ ᠰᠠᠢᠬᠠᠨ ᠰᠡᠭᠦᠯ ᠲᠡᠢ
ᠥᠨᠳᠥᠷ ᠰᠠᠢᠬᠠᠨ ᠪᠡᠶᠡ ᠲᠡᠢ
ᠥᠷᠭᠡᠨ ᠰᠠᠢᠬᠠᠨ ᠴᠡᠭᠡᠵᠢ ᠲᠡᠢ
ᠤᠷᠲᠤ ᠰᠠᠢᠬᠠᠨ ᠵᠣ᠌ ᠲᠠᠢ
ᠠᠭᠤᠵᠢᠮ ᠰᠠᠢᠬᠠᠨ ᠲᠠᠰᠢᠶᠠ ᠲᠠᠢ
ᠬᠥᠯ ᠳ᠋ᠡᠭᠡᠨ ᠵᠢᠷᠣᠭᠠ ᠲᠠᠢ
ᠬᠦᠵᠦᠭᠦᠨ ᠳ᠋ᠡᠭᠡᠨ ᠤᠶᠠᠯᠭᠠ ᠲᠠᠢ
ᠦᠶᠡᠨ ᠳ᠋ᠡᠭᠡᠨ ᠦᠵᠦᠭ ᠲᠡᠢ
ᠦᠰᠦᠨ ᠳ᠋ᠡᠭᠡᠨ ᠲᠡᠮᠳᠡᠭ ᠲᠡᠢ
ᠡᠷᠳᠡᠨᠢ ᠶ᠋ᠢᠨ ᠴᠠᠭᠠᠨ ᠮᠣᠷᠢ ᠪᠠᠢᠨᠠ
ᠬᠣᠶᠠᠷ ᠴᠢᠬᠢ ᠨᠢ ᠬᠣᠩᠬᠣᠨ ᠸᠴᠢᠷ ᠪᠣᠯᠤᠭᠰᠠᠨ
ᠬᠣᠶᠠᠷ ᠨᠢᠳᠦ ᠨᠢ ᠳᠤᠷᠠᠨ ᠪᠣᠯᠤᠭᠰᠠᠨ
ᠬᠣᠷᠢᠨ ᠳᠥᠷᠪᠡᠨ ᠯᠠᠪᠠᠢ ᠴᠠᠭᠠᠨ ᠰᠢᠲᠦ ᠨᠢ
ᠠᠷᠪᠠᠨ ᠵᠦᠭ ᠦ᠋ᠨ ᠲᠠᠬᠢᠯ ᠪᠣᠯᠤᠭᠰᠠᠨ
ᠳᠡᠯ ᠰᠡᠭᠦᠯ ᠨᠢ ᠪᠠᠳᠮᠠᠨ ᠵᠢᠮᠰᠡ ᠪᠣᠯᠤᠭᠰᠠᠨ
ᠵᠠᠭᠠᠨ ᠤ᠋ ᠲᠡᠷᠢᠭᠦᠨ ᠲᠡᠢ
ᠯᠤᠤ ᠶ᠋ᠢᠨ ᠬᠦᠵᠦᠭᠦᠦ ᠲᠡᠢ
ᠭᠠᠷᠤᠳᠢ ᠶ᠋ᠢᠨ ᠬᠣᠩᠰᠢᠶᠠᠷ ᠲᠠᠢ
ᠠᠷᠰᠯᠠᠨ ᠤ᠋ ᠭᠡᠳᠡᠰᠦ ᠲᠡᠢ
ᠴᠣᠯᠮᠣᠨ ᠬᠣᠶᠠᠷ ᠨᠢᠳᠦ ᠲᠡᠢ
ᠴᠢᠨ᠋ᠸᠠ ᠶ᠋ᠢᠨ ᠬᠣᠶᠠᠷ ᠴᠢᠬᠢ ᠲᠡᠢ
ᠦᠶᠡᠩ ᠳᠥᠷᠪᠡᠨ ᠲᠤᠭᠤᠷᠠᠢ ᠲᠠᠢ
ᠦᠰᠦ ᠪᠦᠷᠢ ᠨᠢ ᠭᠠᠷᠴᠠᠭ ᠲᠠᠢ
ᠡᠢᠮᠦ ᠰᠠᠢᠬᠠᠨ ᠲᠡᠭᠷᠢ ᠶ᠋ᠢᠨ
ᠶᠢᠰᠦᠨ ᠰᠢᠨᠵᠢ ᠲᠡᠭᠦᠰᠦᠭᠰᠡᠨ
ᠠᠵᠢᠨᠠᠢ ᠬᠦᠯᠦᠭ ᠮᠣᠷᠢ ᠡᠷᠳᠡᠨᠢ ᠭᠡᠨᠡ
ᠬᠤᠷᠤᠢ ᠬᠤᠷᠤᠢ ᠬᠤᠷᠤᠢ!