ᠬᠡᠦᠬᠡᠳ ᠦᠨ ᠵᠠᠶᠠᠭᠠ ᠭᠣᠮᠣᠳᠠᠳᠠᠭ ᠮᠣᠩᠭᠣᠯ ᠠᠷᠠᠳ ᠤᠨ ᠦᠯᠢᠭᠡᠷХүүхдийн заяа гомддог Монгол ардын үлгэр
465ᠬᠡᠦᠬᠡᠳ ᠦ᠋ᠨ ᠵᠠᠶᠠᠭᠠ ᠭᠣᠮᠣᠳᠠᠳᠠᠭ
ᠠᠯᠲᠠᠨ ᠰᠢᠷᠭᠠᠯ ᠭᠣᠪᠢ ᠶ᠋ᠢᠨ ᠥᠷᠯᠥᠭᠡᠨ ᠦ᠌ ᠨᠠᠷᠠᠨ ᠮᠠᠨᠳᠤᠵᠤ᠂ᠠᠪᠢᠳᠠ ᠡᠪᠦᠭᠡᠨ ᠦ᠌ ᠳᠥᠷᠪᠡᠨ ᠬᠠᠨᠠ ᠲᠠᠢ ᠭᠡᠷ ᠦ᠋ᠨ ᠲᠣᠭᠣᠨᠣ ᠪᠠᠷ ᠲᠤᠰᠤᠭᠰᠠᠨ ᠲᠤᠶᠠᠭᠠ ᠠᠷᠢᠶᠠᠪᠠᠯᠤ ᠡᠮᠡᠭᠡᠨ ᠦ᠌ ᠨᠢᠭᠤᠷ ᠤ᠋ᠨ ᠳᠡᠭᠡᠷᠡ ᠲᠤᠰᠴᠠᠢ᠃ ᠡᠮᠡᠭᠡᠨ ᠴᠠᠢ ᠰᠠᠮᠤᠷᠴᠤ ᠪᠠᠢᠭᠰᠠᠨ ᠭᠠᠤᠯᠢᠨ ᠰᠢᠨᠠᠭᠠ ᠪᠠᠨ ᠲᠤᠯᠭᠠᠨ ᠤ᠋ ᠪᠠᠨ ᠵᠠᠬᠠ ᠤᠷᠤᠭᠤ ᠠᠯᠳᠠᠭᠠᠳ ᠪᠥᠬᠥᠢᠵᠦ ᠠᠪᠬᠤ ᠳ᠋ᠤ᠌ ᠪᠠᠨ᠄《ᠬᠥᠶᠢ᠂ ᠡᠪᠦᠭᠡᠨ! ᠪᠢ ᠴᠢᠮᠠ ᠳ᠋ᠤ᠌ ᠨᠢᠭᠡ ᠦᠭᠡ ᠬᠡᠯᠡᠪᠡᠯ ᠴᠢ ᠦᠨᠡᠮᠰᠢᠬᠦ ᠦᠦ?》ᠭᠡᠵᠡᠢ ᠭᠡᠨᠡ᠃《ᠨᠠᠶᠠ ᠭᠠᠷᠲᠠᠯᠠ ᠨᠠᠰᠤᠯᠠᠬᠤ ᠳ᠋ᠤ᠌ ᠪᠠᠨ ᠨᠢᠭᠡᠨ ᠦ᠌ ᠪᠡᠨ ᠦᠭᠡ ᠶ᠋ᠢ ᠢᠲᠡᠭᠡᠬᠦ ᠦᠭᠡᠢ ᠶᠠᠭᠠᠬᠢᠵᠤ ᠪᠣᠯᠬᠤᠪ ᠳᠠ!》 ᠭᠡᠬᠦ ᠳ᠋ᠦ᠍ ᠨᠢ ᠡᠮᠡᠭᠡᠨ᠄《ᠦᠭᠡᠢ ᠬᠥᠶᠢ! ᠠᠮᠢᠳᠤ ᠶᠠᠪᠤᠪᠠᠯ ᠠᠯᠲᠠᠨ ᠠᠶᠠᠭᠠᠨ ᠳ᠋ᠤ᠌ ᠤᠰᠤ ᠤᠤᠭᠤᠨᠠ ᠭᠡᠵᠦ ᠲᠠᠪᠤᠨ ᠥᠷᠯᠥᠭᠡ ᠳᠠᠷᠠᠭᠠᠯᠠᠨ ᠲᠤᠯᠭᠠᠨ ᠤ᠋ ᠭᠠᠯ ᠳᠣᠲᠣᠷᠠ ᠨᠢᠭᠡ ᠢᠰᠡᠭᠡᠢ ᠪᠣᠢᠲᠣᠭ ᠲᠠᠢ ᠳᠠᠩ ᠴᠠᠮᠴᠠ ᠲᠠᠢ ᠭᠤᠷᠪᠠᠨ ᠨᠠᠰᠤ ᠲᠠᠢ ᠪᠣᠯᠪᠠ ᠤᠤ ᠭᠡᠮᠡᠷ ᠬᠥᠭᠡᠷᠦᠬᠦᠨ ᠥᠬᠢᠨ ᠬᠤᠪᠢᠩ ᠪᠠᠷᠢᠵᠤ ᠵᠣᠭᠰᠣᠭᠠᠳ ᠨᠠᠮᠠ ᠶ᠋ᠢ ᠬᠠᠷᠠᠵᠤ ᠢᠨᠢᠶᠡᠭᠡᠳ ᠪᠠᠢᠬᠤ ᠶᠤᠮ》 ᠭᠡᠬᠦ ᠳ᠋ᠦ᠍ ᠨᠢ ᠡᠪᠦᠭᠡᠨ᠄《ᠦᠭᠡᠢ ᠲᠡᠷᠡ ᠴᠢᠨᠢ ᠭᠠᠯ ᠤ᠋ᠨ ᠪᠤᠷᠬᠠᠨ ᠪᠠᠢᠯᠭᠦᠢ ᠳᠡ!》 ᠭᠡᠵᠡᠢ᠃《ᠢᠱ᠌ᠢ ᠂ ᠠᠪᠢᠳᠠ ᠮᠢᠨᠢ ᠳᠡ᠂ ᠠᠪᠢᠳᠠ ᠮᠢᠨᠢ! ᠡᠳᠦᠢ ᠪᠣᠯᠲᠠᠯᠠ ᠭᠡᠨᠡᠨ ᠨᠢ ᠠᠷᠢᠯᠳᠠᠭ ᠦᠭᠡᠢ ᠶᠠᠭᠠᠬᠢᠭᠰᠠᠨ ᠶᠤᠮ ᠳᠠ! ᠭᠠᠯ ᠤ᠋ᠨ ᠪᠤᠷᠬᠠᠨ ᠪᠢᠲᠡᠭᠡᠢ ᠬᠡᠯᠡ ᠬᠣᠢᠮᠣᠷ ᠢ᠋ᠶ᠋ᠠᠨ ᠵᠠᠯᠠᠭᠰᠠᠨ ᠪᠤᠷᠬᠠᠨ ᠠᠮᠢᠯᠠᠵᠤ ᠪᠠᠢᠬᠤ ᠶ᠋ᠢ ᠦᠵᠡᠭᠡ ᠦᠭᠡᠢ ᠰᠢᠦ ᠳᠡ! ᠪᠤᠷᠬᠠᠨ ᠭᠡᠳ ᠵᠠᠯᠪᠠᠷᠢᠭᠰᠠᠭᠠᠷ ᠲᠣᠯᠣᠭᠠᠢ ᠪᠠᠨ ᠴᠣᠭᠣᠷᠠᠲᠠᠯᠠ ᠮᠥᠷᠭᠥᠵᠦ ᠥᠨᠳᠡᠭᠡ ᠪᠡᠨ ᠴᠣᠭᠣᠷᠠᠲᠠᠯᠠ ᠡᠷᠢᠭᠡ ᠡᠷᠭᠢᠭᠦᠯᠦᠭᠡᠳ ᠴᠢ ᠪᠢᠳᠡ ᠬᠣᠶᠠᠷ ᠲᠤ᠌ ᠲᠡᠭᠡᠭᠡᠳ ᠠᠴᠢ ᠲᠤᠰᠠ ᠪᠠᠨ ᠥᠭᠭᠦᠭᠡ ᠦᠭᠡᠢ ᠰᠢᠦ ᠳᠡ! ᠪᠣᠢ ᠠ᠋ᠴᠠ ᠲᠠᠪᠤᠨ ᠬᠠᠷᠠ ᠢᠮᠠᠭᠠ ᠪᠣᠲᠣᠭᠣ ᠲᠠᠢ ᠭᠠᠭᠴᠠ ᠢᠩᠭᠡᠨ ᠡᠴᠡ ᠥᠭᠡᠷᠡ ᠶᠠᠭᠤ ᠪᠠᠢᠨᠠ ᠤᠤ ᠳᠠ! ᠢᠳᠡᠷ ᠨᠠᠰᠤᠨ ᠠ᠋ᠴᠠ ᠪᠠᠨ ᠡᠬᠢᠯᠡᠭᠡᠳ ᠡᠨᠡ ᠪᠡᠶᠡ ᠪᠡᠨ ᠡᠯᠡᠭᠳᠡᠲᠡᠯᠡ ᠦᠷᠡ ᠲᠡᠢ ᠪᠣᠯᠬᠤ ᠰᠠᠨ ᠭᠡᠵᠦ ᠮᠥᠷᠥᠭᠡᠳᠦᠭᠡᠳ ᠪᠠᠢᠭᠠ ᠪᠢᠰᠢ ᠦᠦ!》 ᠭᠡᠵᠡᠢ ᠭᠡᠨᠡ᠃《ᠡᠮᠡᠭᠡᠨ᠂ ᠨᠠᠮᠠ ᠶ᠋ᠢ ᠨᠡᠬᠡᠢ ᠡᠯᠳᠡᠵᠦ ᠪᠠᠢᠬᠤ ᠳ᠋ᠤ᠌ ᠤᠷᠭᠠ ᠪᠠᠷᠢᠭᠰᠠᠨ ᠭᠤᠷᠪᠠᠨ ᠨᠠᠰᠤ ᠲᠠᠢ ᠪᠣᠯᠪᠠ ᠤᠤ ᠭᠡᠮᠡᠷ ᠨᠢᠭᠡᠨ ᠬᠥᠭᠡᠷᠦᠬᠦᠨ ᠬᠦᠦ ᠭᠡᠳᠡᠷᠭᠡᠨ ᠦ᠌ ᠢᠷ ᠦ᠋ᠨ ᠳᠡᠭᠡᠷᠡ ᠰᠠᠭᠤᠭᠠᠳ ᠨᠠᠮᠠ ᠶ᠋ᠢ ᠬᠠᠷᠠᠵᠤ ᠢᠨᠢᠶᠡᠭᠡᠳ ᠪᠠᠢᠭᠰᠠᠨ ᠰᠢᠦ!》 《ᠬᠥᠱ᠌ᠢ ᠂ ᠠᠪᠢᠳᠠ ᠮᠢᠨᠢ᠂ ᠡᠷᠲᠡᠬᠡᠨ ᠨᠠᠳᠠ ᠳ᠋ᠤ᠌ ᠬᠡᠯᠡᠬᠦ ᠦᠭᠡᠢ ᠶᠠᠭᠠᠬᠢᠭᠠ ᠪᠣᠢ ᠲᠡᠭᠡᠭᠡᠳ》 ᠭᠡᠬᠦ ᠳ᠋ᠦ᠍ ᠠᠪᠢᠳᠠ ᠡᠪᠦᠭᠡᠨ᠄《ᠠᠷᠢᠶᠠᠪᠠᠯᠤ ᠮᠢᠨᠢ ᠳᠡ! ᠴᠢ ᠪᠢᠳᠡ ᠬᠣᠶᠠᠷ ᠨᠢᠭᠡ ᠨᠢᠭᠡᠨ ᠢ᠋ ᠪᠡᠨ ᠬᠡᠯᠡᠯᠲᠡ ᠦᠭᠡᠢ ᠯᠡ ᠪᠠᠢᠨᠠ ᠰᠢᠦ ᠳᠡ᠂ ᠴᠢᠮᠠ ᠶ᠋ᠢ ᠭᠣᠷᠢᠳᠠᠭᠠᠴᠢᠬᠠᠬᠤ ᠪᠣᠯᠪᠠ ᠤᠤ ᠭᠡᠵᠦ ᠪᠣᠳᠣᠭᠠᠳ ᠬᠡᠯᠡᠭᠡ ᠦᠭᠡᠢ ᠶᠦ᠍ᠮ᠃》 ᠭᠡᠬᠦ ᠳ᠋ᠦ᠍《ᠦᠭᠡᠢ ᠬᠥ ᠂ ᠴᠢ ᠡᠷᠡ ᠬᠥᠮᠦᠨ ᠪᠠᠢᠨᠠ ᠳᠠ! ᠨᠢᠭᠡ ᠶ᠋ᠢ ᠪᠣᠳᠣᠵᠤ ᠦᠵᠡᠭᠡᠴᠢ ᠳᠡ!》《ᠴᠢ ᠪᠢᠳᠡ ᠬᠣᠶᠠᠷ ᠴᠢᠨᠢ ᠡᠨᠡ ᠥᠯᠥᠭᠡᠢ ᠬᠤᠳᠳᠤᠭ ᠳᠡᠭᠡᠷᠡ ᠵᠢᠷᠠᠨ ᠵᠢᠯ ᠪᠣᠯᠵᠠᠢ ᠰᠢᠦ! ᠬᠡᠵᠢᠶᠡ ᠨᠢᠭᠡᠨ ᠴᠠᠭ ᠲᠤ᠌ ᠠᠯᠲᠠᠨ ᠬᠦᠦ ᠮᠥᠩᠭᠥᠨ ᠥᠬᠢᠨ ᠬᠣᠶᠠᠷ ᠢᠷᠡᠵᠦ ᠬᠤᠳᠳᠤᠭ ᠠ᠋ᠴᠠ ᠤᠰᠤ ᠠᠪᠬᠤ ᠲᠡᠦᠬᠡ ᠲᠠᠢ ᠶᠤᠮ ᠭᠡᠳᠡᠭ᠂ ᠦᠭᠡᠢ ᠲᠡᠷᠡ ᠨᠢ ᠠᠷᠠᠢ ᠪᠣᠯᠵᠤ ᠪᠠᠢᠭᠠ ᠪᠢᠰᠢ ᠪᠢᠵᠡ!》《ᠬᠠᠷᠢᠨ ᠠ᠋ ᠬᠥ ᠂ ᠮᠣᠩᠭᠣᠯ ᠬᠥᠮᠦᠨ ᠰᠣᠪᠢᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠡᠵᠦ ᠶᠠᠭᠤᠮᠠ ᠶ᠋ᠢ ᠶᠡᠷᠦ ᠨᠢ ᠶᠠᠭᠠᠬᠢᠵᠤ ᠮᠡᠳᠡᠬᠦᠪ! ᠥᠬᠢᠨ ᠬᠦᠦ ᠬᠣᠶᠠᠷ ᠲᠤ᠌ ᠪᠠᠨ ᠢᠰᠢᠭᠡᠨ ᠦ᠌ ᠠᠷᠠᠰᠤᠨ ᠳᠡᠪᠡᠯ ᠪᠣᠲᠣᠭᠣᠨ ᠤ᠋ ᠠᠷᠠᠰᠤᠨ ᠭᠤᠲᠤᠯ ᠬᠢᠵᠦ ᠲᠠᠯᠪᠢᠨᠠ ᠪᠠᠢᠭᠠ!》 《ᠲᠡᠭᠡ ᠠ᠋! ᠲᠡᠭᠡ᠂ ᠡᠮᠡᠭᠡᠨ ᠮᠢᠨᠢ᠂＜ᠳᠥᠷᠥᠭᠡ ᠦᠭᠡᠢ ᠬᠡᠦᠬᠡᠳ ᠲᠦ᠍ ᠲᠡᠮᠦᠷ ᠥᠯᠥᠭᠡᠢ ᠪᠡᠯᠡᠳᠬᠡᠨᠡ＞ ᠭᠡᠵᠦ ᠦᠭᠡ ᠳ᠋ᠡᠭ ᠂ ᠬᠡᠦᠬᠡᠳ ᠢᠳᠡᠮᠡᠷ ᠠᠶᠠᠲᠠᠢᠬᠠᠨ ᠵᠥᠭᠡᠯᠡᠨ ᠶᠠᠭᠤᠮᠠ ᠶᠠᠭᠤ ᠪᠠᠢᠳᠠᠭ ᠪᠢᠯᠡ? ᠡᠮᠡᠭᠡᠨ ᠮᠢᠨᠢ ᠪᠣᠳᠣᠨᠠ ᠪᠠᠢᠭᠠ!》 ᠭᠡᠵᠦ ᠬᠡᠯᠡᠭᠡᠳ ᠬᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ᠠ᠋ᠴᠠ ᠤᠶᠠᠭᠰᠠᠨ ᠮᠣᠳᠣᠨ ᠲᠠᠬᠢᠮ ᠳ᠋ᠤ᠌ ᠪᠠᠨ ᠰᠡᠷᠬᠡ ᠢᠮᠠᠭᠠᠨ ᠤ᠋ ᠠᠷᠠᠰᠤ ᠬᠠᠪᠴᠢᠭᠤᠯᠤᠭᠠᠳ ᠲᠠᠯᠬᠢᠳᠠᠬᠤ ᠭᠡᠲᠡᠯᠡ ᠠᠪᠢᠳᠠ ᠡᠪᠦᠭᠡᠨ ᠦ᠌ ᠪᠢᠷᠠ ᠨᠢ ᠬᠦᠷᠬᠦ ᠦᠭᠡᠢ ᠠᠮᠢᠰᠬᠤᠭᠠᠳᠠᠵᠤ ᠭᠠᠩᠰᠠ ᠲᠠᠮᠠᠬᠢ ᠠᠪᠴᠤ ᠬᠡᠲᠡ ᠴᠠᠬᠢᠭᠤᠷ ᠢ᠋ᠶ᠋ᠠᠨ ᠴᠠᠬᠢᠵᠠᠢ᠃ ᠪᠠᠰᠠ ᠯᠠ ᠬᠦᠴᠦ ᠨᠢ ᠬᠦᠷᠴᠦ ᠠᠰᠠᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠵᠠᠢ ᠭᠡᠨᠡ᠃ ᠠᠪᠢᠳᠠ ᠰᠢᠨᠠ ᠪᠠᠨ ᠲᠤᠯᠵᠤ ᠮᠣᠢᠨᠣᠭ ᠬᠤᠷᠤᠭᠤᠨ ᠤ᠋ ᠪᠠᠨ ᠦᠷᠴᠢᠯᠡᠭᠡ ᠶ᠋ᠢ ᠲᠣᠭᠠᠯᠠᠵᠤ ᠰᠠᠭᠤᠭᠠᠳ《ᠥᠲᠡᠯᠦᠶᠡ ᠭᠡᠵᠦ ᠥᠲᠡᠯᠦᠭᠰᠡᠨ ᠦᠭᠡᠢ᠂ ᠥᠩᠭᠡᠲᠦ ᠶᠢᠷᠲᠢᠨᠴᠦ ᠶ᠋ᠢᠨ ᠵᠢᠮᠡ ᠪᠡᠷ ᠥᠲᠡᠯᠦᠯᠡ ᠳᠡ᠂ ᠬᠠᠷᠠᠬᠤ ᠨᠢᠳᠦᠨ ᠦ᠌ ᠮᠢᠨᠢ ᠬᠠᠷᠠᠭᠠ ᠮᠠᠭᠤᠳᠠᠵᠤ ᠬᠠᠵᠠᠬᠤ ᠰᠢᠳᠦᠨ ᠦ᠌ ᠮᠢᠨᠢ ᠠᠷᠠᠭᠠ ᠤᠨᠠᠵᠤ᠂ ᠬᠣᠶᠠᠷ ᠭᠠᠷ ᠤ᠋ᠨ ᠮᠢᠨᠢ ᠬᠦᠴᠦ ᠪᠠᠷᠠᠭᠳᠠᠭᠰᠠᠨ ᠨᠢ ᠨᠠᠰᠤᠨ ᠤ᠋ ᠬᠢᠵᠢᠶᠡᠯ ᠪᠣᠯᠵᠤ ᠨᠡᠷᠡᠲᠦ ᠶᠢᠷᠲᠢᠨᠴᠦ ᠡᠴᠡ ᠬᠠᠯᠢᠬᠤ ᠶ᠋ᠢᠨ ᠲᠡᠮᠳᠡᠭ ᠢᠷᠡᠵᠦ ᠶᠠᠪᠤᠭᠠ ᠮᠠᠨᠢ ᠡᠨᠡ ᠶᠦᠮ ᠪᠣᠯᠪᠠ ᠤᠤ ᠳᠠ!》 ᠭᠡᠵᠦ ᠬᠡᠯᠡᠭᠡᠳ ᠰᠠᠨᠠᠭᠠ ᠠᠯᠳᠠᠵᠤ ᠲᠣᠭᠣᠨᠣ ᠤᠷᠤᠭᠤ ᠪᠠᠨ ᠬᠠᠷᠠᠭᠰᠠᠨ ᠴᠢᠨᠢ ᠭᠤᠷᠪᠠᠨ ᠨᠠᠰᠤᠲᠠᠢ ᠬᠦᠦ ᠲᠣᠭᠣᠨᠣ ᠶ᠋ᠢᠨ ᠴᠠᠮᠬᠠᠭ ᠢ᠋ᠶ᠋ᠠᠷ ᠳᠠᠮᠵᠢᠨ ᠪᠠᠭᠤᠵᠤ ᠠᠪᠢᠳᠠ ᠡᠪᠦᠭᠡᠨ ᠦ᠌ ᠳᠡᠷᠭᠡᠳᠡ ᠢᠷᠡᠭᠡᠳ᠄《ᠡᠪᠦᠭᠡᠨ ᠠᠪᠤ ᠠ᠋᠂ ᠬᠦᠦ ᠴᠢᠨᠢ ᠢᠷᠡᠯᠡ》 ᠭᠡᠵᠡᠢ᠃ ᠠᠪᠢᠳᠠ ᠬᠦᠦ ᠤᠷᠤᠭᠤ ᠬᠠᠷᠠᠵᠤ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠡᠪᠡᠷᠢᠵᠦ ᠠᠪᠴᠠᠢ ᠭᠡᠨᠡ᠃ ᠬᠦᠦ ᠡᠯᠢᠭᠡᠨ ᠳ᠋ᠦ᠍ ᠨᠢ ᠨᠠᠭᠠᠯᠳᠤᠵᠤ ᠵᠣᠭᠰᠣᠭᠠᠳ᠄《ᠠᠴᠢᠲᠤ ᠪᠤᠭᠤᠷᠤᠯ ᠠᠪᠤ ᠮᠢᠨᠢ᠂ ᠲᠠ ᠰᠡᠷᠬᠡ ᠢᠮᠠᠭᠠᠨ ᠤ᠋ ᠠᠷᠠᠰᠤ ᠶᠠᠭᠠᠬᠢᠬᠤ ᠭᠡᠵᠦ ᠡᠯᠳᠡᠵᠦ ᠪᠠᠢᠭᠠ ᠶᠤᠮ ᠪᠣᠢ?》 ᠭᠡᠬᠦ ᠳ᠋ᠦ᠍ ᠨᠢ᠄《ᠠᠯᠲᠠᠨ ᠬᠦᠦ ᠳ᠋ᠦ᠍ ᠪᠡᠨ ᠳᠡᠪᠡᠯ ᠬᠢᠵᠦ ᠥᠭᠬᠦ ᠭᠡᠵᠦ ᠡᠯᠳᠡᠬᠦ ᠭᠡᠰᠡᠨ ᠶᠦᠮ》 ᠭᠡᠵᠡᠢ ᠭᠡᠨᠡ᠃ ᠲᠡᠭᠡᠬᠦ ᠳ᠋ᠦ᠍ ᠬᠦᠦ ᠨᠢ᠄《ᠥ᠂ ᠬᠦᠦ ᠴᠢᠨᠢ ᠬᠢᠴᠢᠬᠡᠨᠡ ᠠᠪᠤ ᠠ᠋! ᠠᠪᠤ ᠣᠳᠣ ᠵᠢᠷᠭᠠᠬᠤ ᠴᠠᠭ ᠴᠢᠨᠢ ᠪᠣᠯᠤᠭᠰᠠᠨ ᠰᠢᠦ ᠳᠡ!》 ᠭᠡᠵᠦ ᠬᠡᠯᠡᠵᠡᠢ᠃ ᠡᠨᠡ ᠬᠣᠶᠠᠷ ᠢ᠋ ᠭᠡᠷ ᠲᠦ᠍ ᠪᠡᠨ ᠢᠩᠭᠢᠵᠦ ᠶᠠᠷᠢᠵᠤ ᠪᠠᠢᠬᠤ ᠬᠣᠭᠣᠷᠣᠨᠳᠣ ᠠᠷᠢᠶᠠᠪᠠᠯᠤ ᠡᠮᠡᠭᠡᠨ ᠭᠡᠷ ᠦ᠋ᠨ ᠢ᠋ᠶ᠋ᠡᠷ ᠭᠠᠳᠠᠭᠠ ᠲᠠᠷᠴᠢ ᠠᠷᠠᠰᠤ ᠳᠡᠯᠭᠡᠵᠦ ᠴᠢᠯᠠᠭᠤᠨ ᠲᠡᠭᠡᠷᠮᠡ ᠳ᠋ᠦ᠍ ᠬᠠᠭᠤᠷᠤᠭᠰᠠᠨ ᠠᠷᠪᠠᠢ ᠬᠢᠭᠡᠳ ᠲᠠᠲᠠᠬᠤ ᠭᠡᠳ ᠪᠠᠰᠠ ᠯᠠ ᠬᠦᠴᠦ ᠨᠢ ᠬᠦᠷᠬᠦ ᠦᠭᠡᠢ ᠡᠭᠡᠷᠡᠭᠦᠯ ᠲᠡᠢ ᠤᠲᠠᠰᠤ ᠪᠠᠨ ᠪᠠᠷᠢᠵᠤ ᠰᠠᠨᠠᠭᠠᠰᠢᠷᠠᠵᠤ᠄《ᠠᠷᠭᠠ ᠪᠠᠭᠠᠰᠢ ᠭᠠᠷᠭᠠᠵᠤ ᠠᠵᠢᠯ ᠠ᠋ᠴᠠ ᠬᠣᠢᠰᠢ ᠰᠠᠭᠤᠵᠤ ᠪᠠᠢᠭᠠ ᠴᠢᠨᠢ ᠪᠢᠰᠢ ᠳᠡ᠂ ᠡᠨᠡ ᠪᠡᠶᠡ ᠶ᠋ᠢ ᠨᠠᠰᠤ ᠳᠠᠷᠤᠵᠤ ᠡᠷᠡᠬᠡᠢ ᠬᠤᠷᠤᠭᠤᠨ ᠤ᠋ ᠬᠦᠴᠦ ᠪᠠᠷᠠᠭᠳᠠᠵᠠᠢ ᠳᠠ! ᠭᠠᠯᠪᠠ ᠶᠢᠷᠲᠢᠨᠴᠦ ᠶ᠋ᠢᠨ ᠵᠠᠮ ᠢ᠋ᠶ᠋ᠠᠷ ᠠᠮᠢᠳᠤᠷᠠᠬᠤ ᠬᠤᠭᠤᠴᠠᠭᠠ ᠳᠠᠭᠤᠰᠬᠤ ᠳᠥᠭᠥᠵᠡᠢ ᠳᠡ!》 ᠭᠡᠵᠦ ᠪᠣᠳᠣᠭᠠᠳ ᠤᠢᠳᠬᠠᠷᠯᠠᠵᠤ ᠲᠩᠷᠢ ᠥᠭᠡᠳᠡ ᠬᠠᠷᠠᠲᠠᠯᠠ ᠡᠷᠦᠬᠡᠨ ᠦ᠌ ᠵᠠᠪᠰᠠᠷ ᠠ᠋ᠴᠠ ᠭᠤᠷᠪᠠᠨ ᠨᠠᠰᠤᠲᠠᠢ ᠮᠥᠩᠭᠥᠨ ᠥᠬᠢᠨ ᠭᠠᠷᠴᠤ ᠠᠷᠢᠶᠠᠪᠠᠯᠤ ᠡᠮᠡᠭᠡᠨ ᠦ᠌ ᠳᠡᠷᠭᠡᠳᠡ ᠢᠷᠡᠭᠡᠳ᠄《ᠠᠴᠢᠲᠤ ᠪᠤᠭᠤᠷᠤᠯ ᠡᠵᠢ ᠮᠢᠨᠢ᠂ ᠲᠠ ᠲᠠᠷᠢᠶᠠ ᠲᠡᠭᠡᠷᠮᠡᠳᠡᠵᠦ ᠶᠠᠭᠠᠬᠢᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠪᠣᠢ?》 ᠭᠡᠵᠦ ᠠᠰᠠᠭᠤᠵᠠᠢ᠃ ᠡᠮᠡᠭᠡᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠰᠠᠷᠪᠠᠢᠵᠤ᠄《ᠢᠱ᠌ᠢ᠂ ᠬᠣᠩᠭᠣᠷᠬᠠᠨ ᠥᠬᠢᠨ ᠮᠢᠨᠢ ᠨᠠᠭᠠᠰᠢ ᠪᠠᠨ ᠢᠷᠡ!》 ᠭᠡᠬᠦ ᠳ᠋ᠦ᠍ ᠥᠬᠢᠨ ᠡᠮᠡᠭᠡᠨ ᠦ᠌ ᠡᠪᠦᠷ ᠳᠡᠭᠡᠷᠡ ᠭᠠᠷᠴᠤ ᠰᠠᠭᠤᠭᠠᠳ᠄《ᠡᠵᠢ ᠶ᠋ᠢᠨ ᠢ᠋ᠶ᠋ᠡᠷ ᠣᠷᠣ ᠶ᠋ᠢ ᠵᠠᠯᠭᠠᠬᠤ ᠥᠬᠢᠨ ᠴᠢᠨᠢ ᠬᠢᠨᠡ᠃ ᠡᠵᠢ ᠣᠳᠣ ᠠᠮᠠᠷᠠ ᠳᠠ!》 ᠭᠡᠵᠡᠢ ᠭᠡᠨᠡ᠃ ᠠᠪᠢᠳᠠ ᠡᠪᠦᠭᠡᠨ ᠠᠷᠢᠶᠠᠪᠠᠯᠤ ᠡᠮᠡᠭᠡᠨ ᠬᠣᠶᠠᠷ ᠬᠦᠦ ᠥᠬᠢᠨ ᠬᠣᠶᠠᠷ ᠢ᠋ᠶ᠋ᠠᠷ ᠡᠭᠡᠯᠵᠢᠯᠡᠨ ᠠᠪᠴᠤ ᠦᠨᠦᠰᠦᠭᠡᠳ ᠬᠣᠢᠮᠣᠷ ᠢ᠋ᠶ᠋ᠠᠨ ᠰᠠᠭᠤᠯᠭᠠᠵᠤ ᠬᠣᠷᠮᠣᠢ ᠳᠡᠪᠢᠰᠦᠨ ᠬᠦᠨᠳᠦᠳᠬᠡᠭᠡᠳ ᠠᠶᠠᠭᠠᠨ ᠳ᠋ᠤ᠌ ᠰᠦ᠍ ᠬᠢᠵᠦ ᠠᠮᠠᠨ ᠳ᠋ᠤ᠌ ᠨᠢ ᠪᠠᠷᠢᠪᠠᠯ ᠥᠬᠢᠨ ᠬᠦᠦ ᠬᠣᠶᠠᠷ ᠠᠮᠲᠠᠷᠬᠠᠨ ᠵᠠᠯᠭᠢᠯᠠᠴᠢᠬᠠᠭᠠᠳ ᠠᠶᠠᠭᠠ ᠪᠠᠨ ᠠᠪᠳᠠᠷᠠ ᠳᠡᠭᠡᠷᠡ ᠲᠠᠯᠪᠢᠵᠠᠢ᠃ ᠲᠡᠭᠡᠭᠡᠳ᠄《ᠠᠪᠤ ᠠ᠋᠂ ᠡᠵᠢ ᠠ᠋! ᠶᠠᠭᠤ ᠬᠢᠬᠦᠪ? ᠠᠷᠭᠠᠯ ᠲᠦᠯᠡᠭᠡᠨ ᠳ᠋ᠦ᠍ ᠶᠠᠪᠤᠬᠤ ᠤᠤ? ᠬᠤᠳᠳᠤᠭ ᠠ᠋ᠴᠠ ᠤᠰᠤ ᠠᠪᠴᠢᠷᠠᠬᠤ ᠤᠤ? ᠢᠮᠠᠭᠠ ᠪᠠᠨ ᠬᠠᠷᠢᠭᠤᠯᠬᠤ ᠤᠤ?》 ᠭᠡᠵᠦ ᠵᠡᠷᠭᠡ ᠵᠡᠷᠭᠡ ᠠᠰᠠᠭᠤᠵᠤ ᠭᠡᠨᠡ᠃ ᠠᠪᠤ ᠡᠵᠢ ᠬᠣᠶᠠᠷ ᠨᠢ ᠠᠷᠭᠠ ᠤᠬᠠᠭᠠᠨ ᠢ᠋ᠶ᠋ᠠᠨ ᠣᠯᠬᠤ ᠦᠭᠡᠢ ᠰᠠᠨᠳᠤᠷᠴᠤ᠄《ᠬᠣᠩᠭᠣᠷᠬᠠᠨ ᠬᠣᠶᠠᠷ ᠦᠷᠡ ᠮᠢᠨᠢ ᠠ᠋! ᠭᠠᠵᠠᠷ ᠳᠡᠯᠡᠬᠡᠢ ᠶ᠋ᠢᠨ ᠢ᠋ᠶ᠋ᠡᠷ ᠬᠥᠷᠥᠰᠥᠨ ᠳᠡᠭᠡᠷᠡ ᠭᠢᠰᠬᠢᠵᠦ ᠦᠵᠡᠭᠡᠴᠢ ᠳᠡ!》 ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠬᠦᠦ ᠥᠬᠢᠨ ᠬᠣᠶᠠᠷ ᠨᠢ ᠤᠷᠤᠯᠳᠤᠨ ᠭᠠᠷᠴᠠᠢ ᠭᠡᠨᠡ᠃ ᠡᠮᠡᠭᠡᠨ ᠡᠪᠦᠭᠡᠨ ᠬᠣᠶᠠᠷ ᠮᠠᠩᠨᠠᠢ ᠬᠠᠭᠠᠷᠠᠲᠠᠯᠠ ᠪᠠᠨ ᠪᠠᠶᠠᠷᠯᠠᠵᠤ ᠮᠠᠰᠢ ᠪᠠᠶᠠᠰᠬᠤᠯᠠᠩ ᠲᠠᠢ ᠪᠣᠯᠵᠤ ᠮᠡᠷ ᠮᠡᠷ ᠢᠨᠢᠶᠡᠵᠦ ᠮᠠᠰᠢ ᠡᠷᠲᠡᠨ ᠦ᠌ ᠶᠠᠭᠤᠮᠠ ᠶᠠᠷᠢᠵᠤ ᠶᠠᠪᠤᠭᠠᠳ ᠬᠦᠦ ᠥᠬᠢᠨ ᠬᠣᠶᠠᠷ ᠢ᠋ ᠮᠢᠨᠢ ᠬᠥᠪᠴᠢᠨ ᠳᠡᠯᠡᠬᠡᠢ ᠥᠷᠥᠰᠢᠶᠡᠵᠡᠢ ᠳᠡ᠂ ᠬᠥᠷᠥᠰᠥ ᠰᠢᠷᠣᠢ ᠳ᠋ᠤ᠌ ᠴᠢᠨᠢ ᠭᠢᠰᠬᠢᠬᠦ ᠬᠦᠦ ᠥᠬᠢᠨ ᠮᠢᠨᠢ ᠭᠠᠷᠤᠭᠰᠠᠨ ᠰᠢᠦ! ᠨᠠᠷᠠᠨ ᠴᠢᠮᠠ ᠶ᠋ᠢ ᠢᠪᠡᠭᠡᠭ! ᠨᠠᠰᠤᠨ ᠬᠤᠲᠤᠭ ᠨᠡᠮᠡᠭ! ᠰᠠᠷᠠᠨ ᠴᠢᠮᠠ ᠶ᠋ᠢ ᠢᠪᠡᠭᠡᠭ! ᠰᠠᠢᠬᠠᠨ ᠵᠠᠶᠠᠭᠠ ᠶ᠋ᠢ ᠬᠠᠢᠷᠠᠯᠠ! ᠭᠠᠵᠠᠷ ᠴᠢᠮᠠ ᠶ᠋ᠢ ᠲᠡᠳᠬᠦᠭ! ᠭᠠᠢᠬᠠᠮᠰᠢᠭ ᠰᠢᠳᠢ ᠶ᠋ᠢ ᠣᠯᠤᠭ!》 ᠭᠡᠵᠦ ᠢᠷᠦᠭᠡᠭᠡᠳ ᠪᠠᠶᠠᠷ ᠬᠥᠷ ᠪᠣᠯᠵᠤ᠂ ᠪᠠᠢᠵᠤ ᠰᠠᠭᠤᠬᠤ ᠪᠠᠨ ᠣᠯᠵᠤ ᠶᠠᠳᠠᠵᠤ ᠪᠠᠢᠲᠠᠯᠠ ᠬᠦᠦ ᠥᠬᠢᠨ ᠬᠣᠶᠠᠷ ᠨᠢ ᠣᠷᠣᠵᠤ ᠢᠷᠡᠭᠡᠳ᠄《ᠠᠪᠤ ᠡᠵᠢ ᠬᠣᠶᠠᠷ ᠠ᠋! ᠪᠢᠳᠡ ᠬᠣᠶᠠᠷ ᠬᠤᠳᠳᠤᠭ ᠳᠡᠭᠡᠷᠡ ᠣᠴᠢᠵᠤ ᠤᠰᠤ ᠠᠪᠤᠭᠠᠳ ᠳᠡᠨᠵᠢ ᠳᠡᠭᠡᠷᠡ ᠭᠠᠷᠴᠤ ᠢᠮᠠᠭᠠ ᠪᠠᠨ ᠬᠠᠷᠠᠭᠠᠳ ᠢᠷᠡᠬᠦ ᠦᠦ?》 ᠭᠡᠬᠦ ᠳ᠋ᠦ᠍ ᠠᠪᠢᠳᠠ ᠡᠪᠦᠭᠡᠨ᠄《ᠲᠥᠷᠥᠬᠦ ᠶ᠋ᠢᠨ ᠵᠠᠶᠠᠭᠠ ᠪᠠᠢᠪᠠᠴᠤ ᠠᠮᠢᠳᠤᠷᠠᠬᠤ ᠶ᠋ᠢᠨ ᠵᠠᠶᠠᠭᠠ ᠥᠭᠡᠷᠡ ᠰᠢᠦ! ᠬᠥᠯ ᠳ᠋ᠦ᠍ ᠣᠷᠣᠵᠤ ᠭᠠᠵᠠᠷ ᠭᠢᠰᠬᠢᠭᠰᠡᠨ ᠡᠳᠦᠷ ᠢ᠋ᠶ᠋ᠡᠷ ᠭᠡᠷ ᠡᠴᠡ ᠪᠡᠨ ᠬᠣᠯᠠᠳᠠᠬᠤ ᠭᠡᠳᠡᠭ ᠲᠡᠢᠮᠦ ᠠᠮᠠᠷ ᠦᠭᠡᠢ ᠰᠢᠦ! ᠡᠷᠡ ᠬᠥᠮᠦᠨ ᠪᠠᠢᠨᠠ ᠬᠥ ᠂ ᠡᠷᠡᠬᠡᠢ ᠣᠷᠢᠶᠠᠬᠤ ᠰᠤᠷ ᠠᠪᠴᠤ ᠶᠠᠪᠤ!》 ᠭᠡᠬᠦ ᠳ᠋ᠦ᠍ ᠡᠮᠡᠭᠡᠨ᠄《ᠦᠷᠡ ᠲᠡᠢ ᠬᠥᠮᠦᠨ ᠵᠢᠷᠭᠠᠯ ᠲᠠᠢ ᠭᠡᠵᠦ ᠤᠰᠤ ᠪᠠᠨ ᠠᠪᠤᠭᠠᠳ ᠢᠮᠠᠭᠠ ᠪᠠᠨ ᠬᠠᠷᠠᠭᠠᠳ ᠢᠷᠡ ᠳᠡ! ᠬᠦᠦ ᠮᠢᠨᠢ᠂ ᠬᠠᠷᠢᠨ ᠡᠮᠡᠭᠲᠡᠢ ᠬᠥᠮᠦᠨ ᠳ᠋ᠦ᠍ ᠤᠲᠠᠰᠤ ᠣᠷᠢᠶᠠᠬᠤ ᠵᠡᠭᠦᠦ ᠬᠡᠷᠡᠬᠲᠡᠢ ᠰᠢᠦ! ᠵᠡᠭᠦᠦ ᠪᠡᠨ ᠠᠪᠴᠤ ᠶᠠᠪᠤ!》 ᠭᠡᠵᠡᠢ᠃ ᠠᠯᠲᠠᠨ ᠬᠦᠦ ᠨᠢ᠄《ᠠᠪᠤ ᠡᠵᠢ ᠬᠣᠶᠠᠷ ᠤ᠋ᠨ ᠰᠠᠨᠠᠭᠠ ᠵᠥᠷᠢᠵᠦ ᠪᠠᠢᠨᠠ᠂ ᠬᠡᠷᠪᠡ ᠰᠠᠨᠳᠤᠷᠬᠤ ᠴᠠᠭ ᠲᠣᠬᠢᠶᠠᠯᠳᠤᠪᠠᠯ ᠡᠭᠦᠪᠡᠷ ᠨᠠᠷᠠ ᠵᠥᠪ ᠭᠤᠷᠪᠠ ᠳᠠᠯᠠᠯᠤᠭᠠᠷᠠᠢ!》 ᠭᠡᠵᠦ ᠬᠡᠯᠡᠭᠡᠳ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠷ ᠭᠤᠶᠠᠪᠴᠢ ᠶ᠋ᠢ ᠥᠬᠭᠦᠭᠡᠳ ᠶᠠᠪᠤᠵᠠᠢ᠃ ᠠᠯᠲᠠᠨ ᠬᠦᠦ ᠮᠥᠩᠭᠥᠨ ᠥᠬᠢᠨ ᠬᠣᠶᠠᠷ ᠬᠤᠳᠳᠤᠭ ᠲᠤ᠌ ᠢᠷᠡᠭᠡᠳ ᠤᠰᠤ ᠠᠪᠴᠤ ᠪᠠᠢᠲᠠᠯᠠ ᠬᠣᠯᠠ ᠮᠣᠷᠢ ᠤᠨᠤᠭᠰᠠᠨ ᠬᠤᠯᠤᠰᠤᠨ ᠤᠷᠭᠠ ᠪᠠᠷᠢᠭᠰᠠᠨ ᠨᠢᠭᠡᠨ ᠨᠣᠶᠠᠨ ᠬᠦᠷᠴᠦ ᠢᠷᠡᠭᠡᠳ᠄《ᠵᠠ᠂ ᠦᠭᠡᠢ ᠡᠨᠡ ᠴᠦ᠍ ᠣᠳᠣ᠂ ᠭᠠᠵᠠᠷ ᠤ᠋ᠨ ᠬᠠᠮᠢᠭᠠ ᠠ᠋ᠴᠠ ᠢᠷᠡᠭᠰᠡᠨ ᠬᠡᠦᠬᠡᠳ ᠦ᠋ᠳ ᠪᠣᠢ?》 ᠭᠡᠵᠡᠢ ᠭᠡᠨᠡ᠃ ᠬᠦᠦ᠄《ᠠᠪᠢᠳᠠ ᠡᠪᠦᠭᠡᠨ ᠠᠷᠢᠶᠠᠪᠠᠯᠤ ᠡᠮᠡᠭᠡᠨ ᠦ᠌ ᠬᠦᠦ ᠥᠬᠢᠨ ᠬᠣᠶᠠᠷ ᠪᠠᠢᠨᠠ》 ᠭᠡᠵᠦ ᠬᠠᠷᠢᠭᠤᠯᠵᠠᠢ ᠭᠡᠨᠡ᠃ ᠨᠣᠶᠠᠨ᠄《ᠶᠠᠭᠤ? ᠲᠡᠷᠡ ᠬᠣᠶᠠᠷ ᠲᠤ᠌ ᠲᠡᠢᠮᠦ ᠬᠡᠦᠬᠡᠳ ᠪᠠᠢᠬᠤ ᠦᠭᠡᠢ ᠰᠢᠦ ᠳᠡ! ᠡᠨᠡ ᠴᠦ᠍ ᠯᠠᠪ ᠨᠢᠭᠡ ᠤᠴᠢᠷ ᠲᠠᠢ ᠬᠡᠷᠡᠭ ᠪᠣᠯᠤᠯᠠ ᠰᠢᠦ!》 ᠭᠡᠳ ᠬᠤᠯᠤᠰᠤᠨ ᠤᠷᠭᠠᠨ ᠤ᠋ ᠪᠠᠨ ᠬᠤᠢᠪᠢ ᠪᠠᠷ ᠣᠷᠢᠶᠠᠯᠭᠠᠵᠤ ᠬᠥᠭᠡᠭᠡᠭᠡᠳ ᠶᠠᠪᠤᠭᠠᠳ ᠥᠬᠴᠡᠢ ᠭᠡᠨᠡ᠃ ᠨᠣᠶᠠᠨ ᠬᠦᠦ ᠥᠬᠢᠨ ᠬᠣᠶᠠᠷ ᠢ᠋ ᠦᠬᠡᠷ ᠦ᠋ᠨ ᠰᠢᠷᠢᠨ ᠳ᠋ᠦ᠍ ᠬᠢᠵᠦ ᠠᠮᠠ ᠶ᠋ᠢ ᠨᠢ ᠪᠣᠭᠣᠭᠠᠳ ᠭᠡᠷ ᠦ᠋ᠨ ᠢ᠋ᠶ᠋ᠡᠷ ᠬᠠᠶᠠᠭᠠᠨ ᠳ᠋ᠤ᠌ ᠬᠠᠶᠠᠴᠢᠬᠠᠭᠠᠳ ᠭᠡᠷ ᠲᠦ᠍ ᠪᠡᠨ ᠣᠷᠣᠵᠤ ᠠᠯᠪᠠᠲᠤ ᠪᠠᠨ ᠳᠠᠭᠤᠳᠠᠵᠤ ᠢᠷᠡᠭᠦᠯᠦᠭᠡᠳ᠄《ᠠᠪᠢᠳᠠ ᠡᠪᠦᠭᠡᠨ ᠠᠷᠢᠶᠠᠪᠠᠯᠤ ᠡᠮᠡᠭᠡᠨ ᠦ᠌ ᠪᠡᠷ ᠣᠴᠢᠭᠠᠳ ᠢᠷᠡ!》 ᠭᠡᠵᠦ ᠲᠤᠰᠢᠶᠠᠭᠠᠳ ᠶᠠᠪᠤᠭᠤᠯᠵᠠᠢ ᠭᠡᠨᠡ᠃ ᠲᠦᠰᠢᠮᠡᠯ ᠢ᠋ ᠬᠦᠷᠴᠦ ᠢᠷᠡᠬᠦ ᠳ᠋ᠦ᠍ ᠡᠮᠡᠭᠡᠨ ᠡᠪᠦᠭᠡᠨ ᠬᠣᠶᠠᠷ ᠭᠡᠷ ᠦ᠋ᠨ ᠢ᠋ᠶ᠋ᠡᠷ ᠭᠠᠳᠠᠭᠠ ᠰᠠᠷᠠᠪᠴᠢᠯᠠᠭᠠᠳ ᠵᠣᠭᠰᠣᠵᠤ ᠪᠠᠢᠵᠠᠢ᠃ ᠲᠦᠰᠢᠮᠡᠯ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ᠄《ᠵᠠ᠂ ᠳᠠ ᠬᠣᠶᠠᠷ ᠶᠠᠭᠤ ᠬᠠᠷᠠᠵᠤ ᠰᠠᠷᠠᠪᠴᠢᠯᠠᠭᠠᠳ ᠪᠠᠢᠭᠠ ᠶᠤᠮ?》 ᠭᠡᠰᠡᠨ ᠳ᠋ᠦ᠍ ᠠᠪᠢᠳᠠ ᠡᠪᠦᠭᠡᠨ᠄《ᠬᠠᠷᠠᠬᠤ ᠨᠢᠳᠦ ᠮᠢᠨᠢ ᠪᠦᠷᠦᠯᠵᠡᠭᠡᠳ ᠪᠠᠢᠬᠤ ᠪᠠᠷ ᠬᠣᠷᠸᠠ ᠳᠡᠯᠡᠬᠡᠢ ᠪᠡᠨ ᠬᠠᠷᠠᠶᠤ ᠯᠠ ᠭᠡᠵᠦ ᠰᠠᠷᠠᠪᠴᠢᠯᠠᠵᠤ ᠪᠠᠢᠨᠠ ᠳᠠ!》 ᠭᠡᠬᠦ ᠳ᠋ᠦ᠍ ᠠᠷᠢᠶᠠᠪᠠᠯᠤ ᠡᠮᠡᠭᠡᠨ᠄《ᠠᠯᠠᠭ ᠦᠷᠡ ᠪᠡᠨ ᠠᠯᠳᠠᠴᠢᠬᠠᠭᠠᠳ ᠠᠶᠠᠭᠠ ᠠᠶᠠᠭᠠ ᠨᠢᠯᠪᠤᠰᠤ ᠪᠠᠨ ᠠᠰᠬᠠᠷᠠᠬᠤ ᠪᠠᠷ ᠠᠷᠭᠠ ᠪᠤᠶᠤ ᠠᠯᠢ ᠵᠦᠭ ᠡᠴᠡ ᠭᠠᠷᠤᠭᠠᠳ ᠢᠷᠡᠬᠦ ᠪᠣᠯ ᠯᠠ ᠭᠡᠵᠦ ᠰᠠᠷᠠᠪᠴᠢᠯᠠᠵᠤ ᠪᠠᠢᠨᠠ ᠳᠠ᠂ ᠬᠦᠦ ᠮᠢᠨᠢ!》 ᠭᠡᠵᠡᠢ᠃ ᠲᠦᠰᠢᠮᠡᠯ ᠡᠨᠡ ᠦᠭᠡ ᠶ᠋ᠢ ᠳᠤᠭᠤᠯᠤᠭᠠᠳ ᠲᠠᠭ ᠳᠠᠭᠤ ᠦᠭᠡᠢ ᠳᠠᠪᠬᠢᠭᠠᠳ ᠶᠠᠪᠤᠴᠢᠬᠠᠵᠠᠢ ᠭᠡᠨᠡ᠃ ᠲᠡᠭᠡᠭᠡᠳ ᠨᠣᠶᠠᠨ ᠳ᠋ᠤ᠌ ᠪᠠᠨ ᠬᠦᠷᠴᠦ ᠢᠷᠡᠭᠡᠳ ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ ᠤ᠋ᠨ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢ ᠨᠡᠮᠡᠵᠦ ᠴᠢᠮᠡᠯ ᠦᠭᠡᠢ ᠴᠢᠩ ᠦᠨᠡᠨ ᠢ᠋ᠶ᠋ᠡᠷ ᠨᠢ ᠬᠡᠯᠡᠬᠦ ᠳ᠋ᠦ᠍ ᠨᠣᠶᠠᠨ ᠰᠢᠷᠢᠯᠡᠬᠰᠡᠨ ᠬᠦᠦ ᠥᠬᠢᠨ ᠬᠣᠶᠠᠷ ᠢ᠋ ᠭᠣᠣᠯ ᠤ᠋ᠨ ᠤᠰᠤᠨ ᠳ᠋ᠤ᠌ ᠬᠢᠭᠡᠳ ᠬᠦᠷᠦᠭᠡᠳ ᠢᠷᠡᠵᠡᠢ ᠭᠡᠨᠡ᠃
ᠨᠣᠶᠠᠨ ᠤ᠋ ᠬᠠᠲᠤᠨ ᠥᠷᠯᠥᠭᠡ ᠨᠢ ᠪᠣᠰᠤᠭᠠᠳ᠄《ᠬᠥᠶᠢ᠂ ᠪᠢ ᠤᠷᠢᠳᠤ ᠰᠥᠨᠢ ᠤᠰᠤᠨ ᠳ᠋ᠤ᠌ ᠤᠷᠤᠰᠴᠤ ᠶᠠᠪᠤᠭᠰᠠᠨ ᠬᠦᠦ ᠥᠬᠢᠨ ᠬᠣᠶᠠᠷ ᠢ᠋ ᠣᠯᠵᠤ ᠦᠷᠡ ᠲᠡᠢ ᠪᠣᠯᠤᠯᠠ ᠭᠡᠵᠦ ᠵᠡᠭᠦᠳᠦᠯᠡᠬᠦ ᠶᠦᠮ᠃》 ᠭᠡᠬᠦ ᠳ᠋ᠦ᠍ ᠨᠣᠶᠠᠨ᠄《ᠨᠠᠮ— ᠴᠢᠨᠦ ᠵᠡᠭᠦᠳᠦ ᠴᠢᠨᠢ ᠶᠠᠭᠠᠬᠢᠭᠰᠠᠨ ᠰᠣᠨᠢᠨ ᠰᠠᠢᠬᠠᠨ ᠵᠡᠭᠦᠳᠦ ᠭᠡᠵᠢ ᠦᠦ! ＜ᠮᠣᠩᠭᠣᠯ ᠬᠥᠮᠦᠨ ᠰᠣᠪᠢᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ》 ᠭᠡᠵᠦ ᠪᠢ ᠭᠠᠳᠠᠭᠤᠷ ᠭᠠᠷᠴᠤ ᠬᠣᠯᠠ ᠣᠢᠷᠠ ᠶ᠋ᠢᠨ ᠪᠠᠷᠠ ᠬᠠᠷᠠᠵᠤ ᠶᠠᠪᠤᠭᠠᠳ ᠢᠷᠡᠶᠡ!》 ᠭᠡᠵᠦ ᠬᠡᠯᠡᠭᠡᠳ ᠬᠦᠦ ᠥᠬᠢᠨ ᠬᠣᠶᠠᠷ ᠢ᠋ ᠤᠷᠤᠰᠬᠠᠭᠰᠠᠨ ᠭᠣᠣᠯ ᠤ᠋ᠨ ᠡᠷᠭᠢ ᠳᠡᠭᠡᠷᠡ ᠣᠴᠢᠵᠤ ᠮᠠᠯ ᠭᠠᠢᠬᠠᠵᠤ ᠴᠡᠯ ᠬᠥᠬᠡᠷᠡᠭᠡᠳ ᠪᠤᠴᠠᠵᠤ ᠢᠷᠡᠵᠡᠢ ᠭᠡᠨᠡ᠃
ᠦᠬᠡᠷ ᠦ᠋ᠨ ᠰᠢᠷᠢᠨ ᠳᠣᠲᠣᠷᠠ ᠤᠷᠤᠰᠴᠤ ᠶᠠᠪᠤᠬᠤ ᠳ᠋ᠤ᠌ ᠪᠠᠨ ᠠᠯᠲᠠᠨ ᠬᠦᠦ᠄《ᠠᠪᠤ ᠡᠵᠢ ᠬᠣᠶᠠᠷ ᠵᠠᠪᠠᠯ ᠤᠴᠢᠷ ᠲᠠᠢ ᠶᠠᠭᠤᠮᠠ ᠥᠬᠭᠦᠬᠰᠡᠨ ᠳᠡ!》 ᠭᠡᠬᠦ ᠳ᠋ᠦ᠍ ᠮᠥᠩᠭᠥᠨ ᠥᠬᠢᠨ᠄《＜ᠡᠮᠡᠭᠲᠡᠢ ᠬᠥᠮᠦᠨ ᠤᠲᠠᠰᠤ ᠣᠷᠢᠶᠠᠬᠤ ᠵᠡᠭᠦᠦ ᠠᠪ＞ ᠭᠡᠰᠡᠨ》 ᠭᠡᠵᠦ ᠬᠡᠯᠡᠭᠡᠳ ᠵᠡᠭᠦᠦ ᠪᠡᠷ ᠢ᠋ᠶ᠋ᠡᠷ ᠰᠢᠷᠢ ᠶ᠋ᠢ ᠰᠢᠪᠡᠭᠡᠳ ᠪᠠᠢᠲᠠᠯᠠ ᠥᠴᠦᠬᠡᠨ ᠨᠦᠬᠡ ᠭᠠᠷᠴᠤ ᠲᠡᠭᠦᠪᠡᠷ ᠨᠢ ᠤᠰᠤ ᠪᠠᠯᠭᠤᠵᠤ ᠭᠣᠣᠯ ᠢ᠋ᠶ᠋ᠠᠨ ᠵᠠᠯᠭᠠᠵᠤ ᠶᠠᠪᠤᠲᠠᠯᠠ ᠵᠡᠭᠦᠨ ᠦ᠌ ᠨᠦᠬᠡ ᠪᠡᠷ ᠤᠰᠤ ᠣᠷᠣᠭᠰᠠᠭᠠᠷ ᠪᠠᠢᠭᠠᠳ ᠤᠰᠤᠨ ᠳ᠋ᠤ᠌ ᠠᠪᠲᠠᠵᠤ ᠶᠠᠭᠠᠬᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠣᠯᠬᠤ ᠳ᠋ᠤ᠌ ᠨᠢ ᠠᠯᠲᠠᠨ ᠬᠦᠦ᠄《＜ᠡᠷᠡ ᠬᠥᠮᠦᠨ ᠡᠷᠡᠬᠡᠢ ᠣᠷᠢᠶᠠᠬᠤ ᠰᠤᠷ ᠠᠪᠴᠤ ᠶᠠᠪᠤ＞ ᠭᠡᠵᠦ ᠠᠪᠤ ᠬᠡᠯᠡᠭᠰᠡᠨ ᠶᠦ᠍ᠮ᠂ ᠡᠨᠡ ᠯᠠᠪ ᠨᠢᠭᠡ ᠤᠴᠢᠷ ᠲᠠᠢ ᠪᠠᠢᠬᠤ》 ᠭᠡᠳ ᠨᠠᠷᠢᠬᠠᠨ ᠰᠤᠷ ᠤ᠋ᠨ ᠢ᠋ᠶ᠋ᠠᠷ ᠦᠵᠦᠭᠦᠷ ᠢ᠋ ᠵᠡᠭᠦᠨ ᠦ᠌ ᠪᠡᠨ ᠰᠦᠪᠡᠬᠴᠢ ᠤᠷᠤᠭᠤ ᠣᠷᠣᠭᠤᠯᠵᠤ ᠤᠰᠤ ᠶ᠋ᠢ ᠨᠢ ᠲᠣᠭᠲᠠᠭᠠᠭᠠᠳ ᠶᠠᠪᠤᠵᠤ ᠪᠠᠢᠲᠠᠯᠠ ᠦᠬᠡᠷ ᠦ᠋ᠨ ᠰᠢᠷᠢᠨ ᠳ᠋ᠦ᠍ ᠤᠰᠤ ᠳᠦᠭᠦᠷᠴᠦ ᠬᠥᠪᠬᠦ ᠪᠡᠨ ᠪᠠᠢᠭᠠᠳ ᠭᠠᠵᠠᠷᠳᠠᠴᠢᠬᠠᠵᠠᠢ ᠭᠡᠨᠡ᠃ ᠠᠪᠢᠳᠠ ᠡᠪᠦᠭᠡᠨ ᠠᠷᠢᠶᠠᠪᠠᠯᠤ ᠡᠮᠡᠭᠡᠨ ᠬᠣᠶᠠᠷ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠷ ᠪᠣᠷᠪᠢᠴᠢ ᠪᠠᠷ ᠨᠠᠷᠠ ᠵᠥᠪ ᠳᠠᠯᠠᠯᠵᠤ ᠡᠳᠦᠷ ᠰᠥᠨᠢ ᠬᠣᠶᠠᠷ ᠤᠬᠢᠯᠠᠭᠠᠳ ᠰᠠᠭᠤᠵᠤ ᠪᠠᠢᠲᠠᠯᠠ ᠬᠦᠦ ᠥᠬᠢᠨ ᠬᠣᠶᠠᠷ ᠨᠢ ᠭᠡᠷ ᠲᠦ᠍ ᠪᠡᠨ ᠬᠦᠷᠦᠭᠡᠳ ᠢᠷᠡᠵᠡᠢ ᠭᠡᠨᠡ᠃ ᠡᠮᠡᠭᠡᠨ ᠡᠪᠦᠭᠡᠨ ᠬᠣᠶᠠᠷ ᠳᠠᠭᠤ ᠠᠯᠳᠠᠵᠤ ᠥᠬᠢᠨ ᠬᠦᠦ ᠬᠣᠶᠠᠷ ᠢ᠋ᠶ᠋ᠠᠨ ᠲᠡᠪᠡᠷᠢᠵᠦ ᠠᠪᠤᠭᠠᠳ《ᠶᠠᠭᠤ ᠪᠣᠯᠪᠠ?》 ᠭᠡᠵᠦ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠬᠦᠦ ᠥᠬᠢᠨ ᠬᠣᠶᠠᠷ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠢ᠋ ᠨᠢᠭᠡᠳ ᠨᠢᠭᠡᠨ ᠦᠭᠡᠢ ᠬᠡᠯᠡᠵᠡᠢ ᠭᠡᠨᠡ᠃《ᠰᠠᠢᠨ ᠠᠪᠤ ᠰᠠᠢᠬᠠᠨ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠷ ᠬᠦᠴᠦ ᠪᠡᠷ ᠠᠮᠢᠳᠤ ᠮᠡᠨᠳᠦ ᠢᠷᠡᠯᠡ ᠳᠠ! ᠠᠪᠤ ᠡᠵᠢ ᠮᠢᠨᠢ ᠰᠠᠨᠠᠭᠠ ᠪᠠᠨ ᠵᠣᠪᠠᠬᠤ ᠬᠡᠷᠡᠭ ᠦᠭᠡᠢ ᠰᠢᠦ!》 ᠭᠡᠵᠦ ᠥᠬᠢᠨ ᠬᠦᠦ ᠬᠣᠶᠠᠷ ᠨᠢ ᠬᠡᠯᠡᠵᠡᠢ ᠭᠡᠨᠡ᠃ ᠲᠡᠭᠡᠭᠡᠳ ᠮᠠᠷᠭᠠᠰᠢ ᠨᠢ ᠪᠣᠯᠵᠤ ᠮᠠᠨᠳᠤᠬᠤ ᠶ᠋ᠢᠨ ᠤᠯᠠᠭᠠᠨ ᠨᠠᠷᠠᠨ ᠢ᠋ᠶ᠋ᠠᠷ ᠨᠣᠶᠠᠨ ᠬᠠᠲᠤᠨ ᠬᠣᠶᠠᠷ ᠮᠣᠷᠢᠨ ᠳ᠋ᠤ᠌ ᠵᠢᠶᠤᠤᠵᠠ ᠲᠡᠷᠭᠡ ᠬᠥᠯᠯᠡᠴᠢᠬᠡᠬᠰᠡᠨ ᠠᠴᠢᠶᠠ ᠬᠥᠰᠬᠡ ᠬᠥᠲᠥᠯᠦᠭᠡᠳ ᠠᠢᠰᠤᠢ ᠭᠡᠨᠡ᠃《ᠠᠪᠤ ᠠ᠋᠂ ᠡᠵᠢ ᠠ᠋! ᠠᠶᠤᠬᠤ ᠶᠠᠭᠤᠮᠠ ᠦᠭᠡᠢ!》 ᠭᠡᠵᠦ ᠬᠡᠯᠡᠭᠡᠳ ᠲᠤᠯᠭᠠ ᠲᠠᠢ ᠭᠠᠯ ᠳ᠋ᠤ᠌ ᠪᠠᠨ ᠣᠷᠣᠭᠠᠳ ᠠᠯᠠᠭᠠ ᠪᠣᠯᠵᠠᠢ ᠭᠡᠨᠡ᠃ ᠨᠣᠶᠠᠨ ᠬᠠᠳᠠᠭ ᠪᠠᠷᠢᠵᠤ᠂ ᠬᠠᠲᠤᠨ ᠲᠣᠷᠭᠠ ᠪᠠᠷᠢᠵᠤ ᠰᠥᠭᠥᠳᠦᠭᠡᠳ᠄《ᠬᠦᠰᠡᠭᠰᠡᠨ ᠦᠷᠡ ᠮᠢᠨᠢ ᠲᠠᠨ ᠤ᠋ ᠳ᠋ᠤ᠌ ᠪᠠᠢᠨᠠ ᠭᠡᠨᠡ᠂ ᠣᠳᠣ ᠬᠠᠮᠢᠭᠠ ᠪᠠᠢᠭᠠ ᠶ᠋ᠢ ᠬᠡᠯᠡᠵᠦ ᠬᠠᠢᠷᠠᠯᠠ! ᠲᠡᠷᠭᠡ ᠪᠡᠷ ᠮᠥᠩᠭᠥ᠂ ᠰᠠᠭᠤᠷᠢ ᠪᠠᠷ ᠮᠠᠯ ᠥᠬᠭᠦᠶᠡ! ᠬᠦᠦ ᠥᠬᠢᠨ ᠬᠣᠶᠠᠷ ᠢ᠋ ᠮᠢᠨᠢ ᠥᠬᠴᠦ ᠬᠠᠢᠷᠠᠯᠠ!》 ᠭᠡᠵᠦ ᠭᠤᠶᠤᠵᠠᠢ ᠭᠡᠨᠡ᠃ ᠠᠪᠢᠳᠠ ᠡᠪᠦᠭᠡᠨ᠄《ᠥᠬᠢᠨ ᠬᠦᠦ ᠬᠣᠶᠠᠷ ᠢ᠋ ᠮᠢᠨᠢ ᠬᠠᠷᠭᠢᠰ ᠨᠣᠶᠠᠨ ᠦᠬᠡᠷ ᠦ᠋ᠨ ᠰᠢᠷᠢᠨ ᠳ᠋ᠦ᠍ ᠰᠢᠷᠢᠯᠡᠭᠦᠯᠦᠭᠡᠳ ᠭᠣᠣᠯ ᠤ᠋ᠨ ᠤᠰᠤᠨ ᠳ᠋ᠤ᠌ ᠬᠠᠶᠠᠭᠰᠠᠨ ᠰᠢᠦ ᠳᠡ!》 ᠭᠡᠵᠦ ᠬᠡᠯᠡᠭᠡᠳ ᠪᠠᠷᠢᠭᠰᠠᠨ ᠬᠠᠳᠠᠭ ᠢ᠋ ᠨᠢ ᠲᠦᠯᠬᠢᠴᠢᠬᠡᠭᠡᠳ ᠪᠤᠷᠤᠭᠤ ᠬᠠᠷᠠᠭᠠᠳ ᠰᠠᠭᠤᠴᠢᠬᠠᠵᠠᠢ ᠭᠡᠨᠡ᠃《ᠥᠬᠢᠨ ᠬᠦᠦ ᠬᠣᠶᠠᠷ ᠢ᠋ ᠮᠢᠨᠢ ᠥᠭᠡᠳᠡ ᠦᠭᠡᠢ ᠮᠠᠭᠤ ᠨᠣᠶᠠᠨ ᠣᠶᠣᠳᠠᠯ ᠲᠠᠢ ᠰᠢᠷᠢᠨ ᠳ᠋ᠦ᠍ ᠣᠷᠣᠭᠤᠯᠤᠭᠠᠳ ᠣᠷᠣ ᠮᠥᠷ ᠦᠭᠡᠢ ᠠᠯᠠᠭᠠ ᠪᠣᠯᠭᠠᠭᠰᠠᠨ!》 ᠭᠡᠵᠦ ᠠᠷᠢᠶᠠᠪᠠᠯᠤ ᠡᠮᠡᠭᠡᠨ ᠬᠡᠯᠡᠭᠡᠳ ᠪᠠᠷᠢᠭᠰᠠᠨ ᠲᠣᠷᠭᠠ ᠶ᠋ᠢ ᠨᠢ ᠪᠤᠴᠠᠭᠠᠵᠤ ᠪᠠᠰᠠ ᠯᠠ ᠪᠤᠷᠤᠭᠤ ᠬᠠᠷᠠᠭᠠᠳ ᠰᠠᠭᠤᠴᠢᠬᠠᠵᠠᠢ ᠭᠡᠨᠡ᠃ ᠬᠠᠲᠤᠨ ᠨᠣᠶᠠᠨ ᠬᠣᠶᠠᠷ ᠬᠠᠷᠠ ᠴᠠᠭᠠᠨ ᠳᠠᠭᠤ ᠦᠭᠡᠢ ᠪᠣᠯᠤᠭᠠᠳ ᠪᠤᠴᠠᠭᠠᠳ ᠶᠠᠪᠤᠵᠠᠢ ᠭᠡᠨᠡ᠃
ᠬᠦᠦ ᠥᠬᠢᠨ ᠬᠣᠶᠠᠷ ᠲᠤᠯᠭᠠ ᠲᠠᠢ ᠭᠠᠯ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠪᠠᠨ ᠢᠨᠢᠶᠡᠳᠦ ᠠᠯᠲᠠᠨ ᠭᠠᠷᠴᠤ ᠠᠪᠤ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠷ ᠡᠪᠦᠷ ᠳᠡᠭᠡᠷᠡ ᠰᠠᠭᠤᠵᠤ ᠡᠷᠬᠡᠯᠡᠨ ᠨᠠᠭᠠᠳᠴᠤ ᠢᠨᠢᠶᠡᠯᠳᠦᠨ ᠬᠥᠭᠵᠢᠯᠳᠦᠵᠦ ᠵᠢᠷᠭᠠᠯᠲᠠᠢ ᠰᠠᠢᠬᠠᠨ ᠠᠮᠢᠳᠤᠷᠠᠭᠰᠠᠨ ᠶᠤᠮ ᠭᠡᠨᠡ᠃
ᠬᠡᠵᠢᠶᠡ ᠴᠦ᠍ ᠶᠦᠮ ᠳᠡ᠂ ᠪᠦᠦ ᠮᠡᠳᠡ ᠡᠢᠮᠦ ᠨᠢᠭᠡ ᠶᠠᠪᠤᠳᠠᠯ ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠨᠢᠭᠡᠨ ᠴᠠᠭ ᠲᠤ᠌ ᠪᠣᠯᠤᠭᠰᠠᠨ ᠶᠤᠮ ᠭᠡᠨᠡ᠃ ᠡᠭᠦᠨ ᠡᠴᠡ ᠬᠣᠢᠰᠢ ᠦᠷᠡ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠷ ᠬᠣᠢᠨᠠ ᠠ᠋ᠴᠠ ᠬᠤᠪᠴᠠᠰᠤ ᠪᠠᠷ ᠨᠢ ᠳᠠᠯᠠᠯᠳᠠᠭ ᠵᠠᠩᠰᠢᠯ ᠭᠠᠷᠤᠭᠰᠠᠨ ᠭᠡᠵᠦ ᠶᠠᠷᠢᠯᠴᠠᠳᠠᠭ ᠶᠤᠮ᠃ 《ᠡᠳ᠋ ᠶᠠᠭᠤᠮᠠ ᠬᠦᠰᠡᠬᠦ ᠪᠡᠷ ᠦᠷᠡ ᠬᠡᠦᠬᠡᠳ ᠬᠦᠰᠡ!》 ᠭᠡᠳᠡᠭ ᠰᠡᠴᠡᠨ ᠦᠭᠡ ᠴᠦ᠍ ᠭᠠᠷᠤᠭᠰᠠᠨ ᠶᠤᠮ ᠭᠡᠳᠡᠭ᠃ ᠶᠠᠮᠠᠷ ᠪᠣᠯᠪᠠᠴᠤ ᠦᠯᠢᠭᠡᠷ ᠪᠣᠯᠵᠤ ᠥᠨᠥ ᠶ᠋ᠢᠨ ᠪᠢᠳᠡᠨ ᠳ᠋ᠦ᠍ ᠰᠣᠨᠢᠷᠬᠠᠭᠳᠠᠭᠰᠠᠭᠠᠷ ᠪᠠᠢᠭᠠ ᠶᠤᠮ ᠰᠢᠦ ᠳᠡ ᠬᠡᠦᠬᠡᠳ ᠦ᠋ᠳ ᠠ᠋!
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ᠮᠥᠩᠭᠦᠨᠴᠡᠴᠡᠭ
ᠦᠰᠦᠭ ᠬᠠᠲᠠᠭᠰᠠᠨ ᠨᠢ᠄ᠮᠥᠩᠭᠦᠨᠴᠡᠴᠡᠭ
ᠬᠢᠨᠠᠭᠴᠢ ᠪᠠᠭᠰᠢ ᠨᠢ᠄ᠮᠥᠴᠢᠷ᠂ ᠰᠡᠷᠭᠦᠯᠡᠩ᠂ ᠢᠷᠡᠭᠡᠳᠦᠢ