ᠰᠣᠨᠳᠣᠷ- ᠮᠠᠤᠫᠠᠰᠰᠠᠨСондор-Мопассан
413ᠰᠣᠨᠳᠣᠷ
ᠮᠠᠤᠫᠠᠰᠰᠠᠨ
ᠲᠡᠷᠡ ᠮᠥᠨ ᠴᠦ᠍ ᠨᠢᠭᠡ ᠯᠡ ᠰᠡᠳᠬᠢᠯ ᠬᠥᠳᠡᠯᠭᠡᠮᠡ ᠰᠠᠢᠬᠠᠨ ᠲᠥᠷᠥᠭᠰᠡᠨ ᠬᠡᠦᠬᠡᠨ ᠶᠦᠮ᠃ ᠬᠤᠪᠢ ᠵᠠᠶᠠᠭᠠᠨ ᠳ᠋ᠤᠨᠢ ᠠᠨᠳᠠᠭᠤᠷᠠᠯ ᠭᠠᠷᠤᠭᠰᠠᠨ ᠡᠴᠡ ᠴᠤ᠌ ᠶᠤᠮ ᠤᠤ ᠨᠢᠭᠡᠨ ᠪᠠᠭᠠᠬᠠᠨ ᠲᠤᠰᠢᠶᠠᠯᠲᠠᠨ ᠤ᠋ ᠭᠡᠷ ᠲᠦ᠍ ᠲᠥᠷᠥᠵᠡᠢ᠃ ᠲᠡᠭᠦᠨ ᠳ᠋ᠦ᠍ ᠵᠠᠰᠠᠯ ᠵᠢᠮᠰᠡᠭ ᠪᠠᠢᠭᠠ ᠦᠭᠡᠢ ᠶ᠋ᠢᠨ ᠳᠡᠭᠡᠷᠡ ᠨᠢᠭᠡᠨ ᠪᠠᠶᠠᠨ ᠬᠡᠭᠡᠨᠴᠢᠷ ᠬᠥᠮᠦᠨ ᠳ᠋ᠦ᠍ ᠲᠠᠨᠢᠭᠳᠠᠬᠤ᠂ ᠣᠢᠯᠠᠭᠠᠭᠳᠠᠬᠤ᠂ ᠳᠤᠷᠠᠯᠠᠭᠳᠠᠬᠤ᠂ ᠪᠣᠭᠲᠣᠯᠠᠭᠳᠠᠬᠤ ᠶ᠋ᠢᠨ ᠠᠷᠭᠠ ᠴᠤ᠌ ᠪᠠᠰᠠ ᠪᠠᠢᠭᠰᠠᠨ ᠦᠭᠡᠢ᠃ ᠡᠴᠦᠰ ᠲᠡᠭᠡᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠶᠠᠮᠤᠨ ᠤ᠋ ᠨᠢᠭᠡ ᠪᠢᠴᠢᠭᠡᠴᠢ ᠲᠠᠢ ᠯᠠ ᠭᠡᠷᠯᠡᠨ ᠰᠠᠭᠤᠵᠠᠢ᠃
ᠲᠡᠷᠡ ᠭᠤᠶᠤᠬᠤ ᠵᠠᠰᠠᠬᠤ ᠶ᠋ᠢ ᠤᠷᠤᠯᠳᠤᠵᠤ ᠴᠢᠳᠠᠬᠤ ᠦᠭᠡᠢ ᠳ᠋ᠡᠭᠡᠨ ᠪᠣᠷᠣ ᠳᠦᠷᠢ ᠶ᠋ᠢᠨ ᠬᠤᠪᠴᠠᠰᠤ ᠲᠠᠢ ᠯᠠ ᠶᠠᠪᠤᠳᠠᠭ ᠪᠣᠯᠤᠭᠰᠠᠨ ᠨᠢ ᠲᠡᠭᠦᠨ ᠦ᠌ ᠪᠠᠢᠷᠢ ᠰᠠᠭᠤᠷᠢ ᠶ᠋ᠢ ᠳᠣᠷᠣᠭᠰᠢᠯᠠᠭᠤᠯᠤᠭᠰᠠᠨ ᠰᠢᠭ᠋ ᠪᠣᠯᠵᠤ᠂ ᠲᠤᠩ ᠵᠣᠯ ᠦᠭᠡᠢ ᠶᠠᠪᠤᠳᠠᠯ ᠭᠡᠵᠦ ᠥᠪᠡᠷ ᠢ᠋ᠶ᠋ᠡᠨ ᠪᠣᠳᠣᠳᠠᠭ ᠪᠠᠢᠵᠠᠢ᠃ ᠤᠴᠢᠷ ᠨᠢ ᠡᠮᠡᠭᠲᠡᠢ ᠬᠥᠮᠦᠨ ᠳ᠋ᠦ᠍ ᠶᠡᠷᠦ ᠡᠴᠡ ᠠᠩᠭᠢ᠂ ᠠᠷᠠᠰᠤᠲᠠᠨ ᠤ᠋ ᠢᠯᠭᠠᠭᠠ ᠪᠠᠢᠬᠤ ᠦᠭᠡᠢ᠃ ᠲᠡᠳᠡᠨ ᠦ᠌ ᠦᠵᠡᠰᠬᠦᠯᠡᠩ ᠭᠤᠸᠠ᠂ ᠲᠡᠳᠡᠨ ᠦ᠌ ᠭᠠᠩᠭᠠᠩ ᠭᠣᠶᠣ᠂ ᠲᠡᠳᠡᠨ ᠦ᠌ ᠤᠷᠠᠨ ᠨᠣᠬᠢᠯᠤᠯ ᠪᠣᠯ ᠲᠡᠳᠡᠨ ᠦ᠌ ᠭᠠᠷᠤᠯ ᠮᠥᠨ᠃ ᠲᠡᠳᠡᠨ ᠦ᠌ ᠲᠥᠷᠥᠯᠬᠢ ᠰᠡᠴᠡᠨ ᠰᠡᠷᠭᠦᠯᠡᠩ᠂ ᠲᠡᠳᠡᠨ ᠦ᠌ ᠰᠢᠯᠢᠳᠡᠭ ᠰᠠᠢᠬᠠᠨ ᠴᠢᠨᠠᠷ ᠪᠠᠢᠳᠠᠯ᠂ ᠲᠡᠳᠡᠨ ᠦ᠌ ᠡᠶᠡᠯᠳᠡᠭ ᠵᠥᠭᠡᠯᠡᠨ ᠰᠡᠳᠬᠢᠯ ᠰᠠᠨᠠᠭᠠ ᠪᠣᠯ ᠲᠡᠳᠡᠨ ᠦ᠌ ᠴᠣᠷ ᠤ᠋ᠨ ᠭᠠᠭᠴᠠ ᠬᠢᠷᠢ ᠬᠡᠮᠵᠢᠶᠡ ᠨᠢ ᠮᠥᠨ ᠲᠤᠯᠠ ᠡᠭᠡᠯ ᠠᠷᠠᠳ ᠤ᠋ᠨ ᠥᠬᠢᠨ ᠢ᠋ ᠡᠷᠬᠢᠮ ᠢᠵᠠᠭᠤᠷᠲᠠᠨ ᠤ᠋ ᠬᠠᠲᠤᠨ ᠲᠠᠢ ᠳᠠᠩ ᠰᠠᠴᠠᠭᠤ ᠪᠣᠯᠭᠠᠳᠠᠭ ᠴᠤ᠌ ᠪᠠᠢᠨᠠ᠃
ᠲᠡᠷᠡ ᠥᠪᠡᠷ ᠢ᠋ ᠪᠡᠨ ᠡᠷᠬᠢᠮᠰᠦᠭ ᠳᠡᠭᠡᠳᠦ ᠳᠡᠭᠡᠷᠡ ᠪᠡᠨ ᠱᠠᠯᠢᠨ ᠪᠦᠷᠢᠯᠭᠡᠳᠡᠭ ᠠᠮᠢᠳᠤᠷᠠᠯ ᠬᠢᠬᠦ ᠶ᠋ᠢᠨ ᠲᠥᠯᠥᠭᠡ ᠲᠥᠷᠥᠭᠰᠡᠨ ᠭᠡᠵᠦ ᠪᠣᠳᠣᠳᠠᠭ ᠲᠤᠯᠠ ᠦᠷᠭᠦᠯᠵᠢ ᠭᠠᠰᠢᠭᠤᠨ ᠵᠣᠪᠠᠭᠤᠷᠢᠲᠠᠢ ᠰᠠᠨᠠᠭᠳᠠᠨᠠ᠃ ᠣᠷᠣᠨ ᠪᠠᠢᠷᠢ ᠶ᠋ᠢᠨ ᠦᠵᠡᠰᠢ ᠦᠭᠡᠢ ᠮᠠᠭᠤᠬᠠᠢ᠂ ᠬᠠᠨᠠ ᠲᠤᠭᠤᠷᠭᠠ ᠶ᠋ᠢᠨ ᠬᠠᠷᠠ ᠪᠣᠷᠣ᠂ ᠰᠢᠷᠡᠭᠡ ᠰᠠᠨᠳᠠᠯᠢ ᠶ᠋ᠢᠨ ᠴᠤᠴᠠᠷᠬᠠᠢ ᠬᠠᠭᠤᠴᠢᠨ᠂ ᠬᠤᠪᠴᠠᠰᠤ ᠬᠤᠨᠠᠷ ᠤ᠋ᠨ ᠪᠦᠳᠦᠭᠦᠯᠢᠭ ᠬᠣᠮᠰᠠ ᠨᠢ ᠴᠥᠮ ᠲᠡᠭᠦᠨ ᠢ᠋ ᠪᠤᠬᠢᠨᠢᠳᠤᠭᠤᠯᠤᠨᠠ᠃ ᠡᠳᠡᠭᠡᠷ ᠶᠠᠭᠤᠮᠠ ᠲᠡᠭᠦᠨ ᠲᠡᠢ ᠠᠳᠠᠯᠢ ᠪᠠᠢᠷᠢ ᠰᠠᠭᠤᠷᠢ ᠲᠠᠢ ᠣᠨᠳᠣᠣ ᠬᠠᠲᠤᠨ ᠳ᠋ᠤ᠌ ᠪᠣᠯ ᠬᠠᠢᠬᠤᠷᠤᠭᠳᠠᠬᠤ ᠦᠭᠡᠢ ᠴᠦ᠍ ᠪᠠᠢᠵᠤ ᠮᠡᠳᠡᠨᠡ᠃ ᠬᠠᠷᠢᠨ ᠲᠡᠷᠡ ᠡᠭᠦᠨ ᠡᠴᠡ ᠪᠣᠯᠵᠤ ᠡᠢᠨ ᠬᠦ᠌ ᠵᠣᠪᠠᠨᠢᠵᠤ᠂ ᠡᠢᠨ ᠬᠦ᠌ ᠡᠮᠭᠡᠨᠢᠳᠡᠭ ᠠᠵᠢ᠃ ᠲᠡᠷᠡ᠂ ᠭᠡᠷ ᠦ᠋ᠨ ᠠᠷᠰᠠᠷ ᠠᠵᠢᠯ ᠢ᠋ ᠨᠢ ᠬᠢᠵᠦ ᠪᠠᠢᠭᠠ ᠪᠷᠧᠲ᠋ᠠᠨᠧ ᠮᠣᠵᠢ ᠶ᠋ᠢᠨ ᠪᠢᠴᠢᠬᠠᠨ ᠰᠢᠪᠡᠭᠴᠢᠨ ᠢ᠋ᠶ᠋ᠡᠨ ᠬᠠᠷᠠᠭᠠᠳ᠂ ᠰᠡᠳᠬᠢᠯ ᠦ᠋ᠨ ᠬᠢᠨᠢ ᠳᠣᠲᠣᠷᠠ ᠭᠤᠨᠢᠭᠲᠤ ᠪᠣᠳᠣᠯᠭᠠᠰᠢᠷᠠᠯ᠂ ᠳᠡᠮᠡᠢᠷᠡᠭᠰᠡᠨ ᠬᠡᠢ ᠬᠦᠰᠡᠯ ᠲᠥᠷᠥᠭᠳᠡᠪᠡ᠃ ᠬᠠᠨᠠ ᠲᠤᠭᠤᠷᠭᠠ ᠶ᠋ᠢ ᠨᠢ ᠳᠣᠷᠣᠨᠠᠳᠠᠬᠢᠨ ᠤ᠋ ᠦᠢᠯᠡᠳᠦᠭᠰᠡᠨ ᠬᠥᠰᠢᠭᠡ ᠪᠡᠷ ᠴᠢᠮᠡᠭᠯᠡᠭᠰᠡᠨ ᠲᠡᠷᠡ ᠬᠦ᠌ ᠰᠡᠯᠡᠭᠦᠨ ᠲᠤᠩᠭᠠᠯᠠᠭ ᠥᠷᠥᠭᠡ ᠲᠠᠩᠬᠢᠮ ᠳ᠋ᠤ᠌ ᠥᠨᠳᠥᠷ ᠬᠥᠯ ᠲᠡᠢ ᠭᠠᠤᠯᠢᠨ ᠳ᠋ᠧᠩ ᠪᠠᠷᠢᠴᠢᠬᠠᠭᠰᠠᠨ᠂ ᠪᠠᠰᠠ ᠣᠬᠣᠷ ᠥᠮᠥᠳᠥ ᠲᠡᠢ ᠬᠣᠶᠠᠷ ᠵᠠᠷᠤᠴᠠ ᠪᠠᠢᠬᠤ ᠪᠥᠭᠡᠳ ᠠᠭᠤᠵᠢᠮ ᠲᠠᠯᠪᠢᠭᠤ ᠰᠠᠨᠳᠠᠯᠢ ᠳᠡᠭᠡᠷᠡ ᠬᠡᠪᠲᠡᠵᠦ ᠵᠤᠤᠬᠠᠨ ᠤ᠋ ᠬᠠᠯᠠᠭᠤᠨ ᠳ᠋ᠤ᠌ ᠡᠭᠡᠭᠡᠭᠳᠡᠭᠡᠳ ᠳᠤᠭᠵᠢᠷᠠᠯᠠ ᠭᠡᠵᠦ ᠬᠡᠢ ᠰᠠᠨᠠᠪᠠ᠃ ᠲᠡᠷᠡ ᠬᠦ᠌ ᠠᠭᠤᠵᠢᠮ ᠰᠠᠷᠠᠭᠤᠯ ᠵᠣᠴᠢᠳ ᠤ᠋ᠨ ᠥᠷᠥᠭᠡᠨ ᠳ᠋ᠦ᠍ ᠡᠷᠲᠡᠨ ᠦ᠌ ᠮᠠᠶᠢᠭ ᠤ᠋ᠨ ᠬᠡᠮᠡᠷᠯᠢᠭ ᠬᠥᠰᠢᠭᠡ ᠲᠠᠲᠠᠴᠢᠬᠠᠭᠰᠠᠨ ᠪᠠᠢᠬᠤ ᠪᠥᠭᠡᠳ ᠤᠷᠠᠨ ᠬᠢᠴᠡᠲᠡᠢ ᠮᠣᠳᠣᠨ ᠡᠳ᠋ᠯᠡᠯ᠂ ᠡᠷᠲᠡᠨ ᠦ᠌ ᠮᠠᠶᠢᠭ ᠤ᠋ᠨ ᠡᠷᠬᠢᠮ ᠰᠣᠨᠢᠨ ᠲᠣᠭᠯᠠᠭᠠᠮ ᠢ᠋ ᠥᠷᠥᠨ ᠲᠠᠯᠪᠢᠭᠰᠠᠨ ᠪᠠᠢᠨᠠ ᠭᠡᠵᠦ ᠬᠡᠢ ᠰᠠᠨᠠᠨᠠ᠃ ᠲᠡᠷᠡ ᠬᠦ᠌ ᠰᠠᠢᠬᠠᠨ ᠦᠨᠦᠷ ᠠᠩᠬᠢᠯᠤᠭᠰᠠᠨ ᠦᠵᠡᠰᠬᠦᠯᠡᠩ ᠭᠣᠶᠣ ᠵᠣᠴᠢᠳ ᠤ᠋ᠨ ᠪᠢᠴᠢᠬᠠᠨ ᠲᠠᠰᠤᠯᠭᠠᠨ ᠳ᠋ᠤ᠌ ᠦᠳᠡ ᠶ᠋ᠢᠨ ᠬᠣᠢᠨᠠᠬᠢ ᠲᠠᠪᠤᠨ ᠴᠠᠭ ᠤ᠋ᠨ ᠦᠶᠡᠰ ᠲᠡᠭᠦᠨ ᠲᠡᠢ ᠬᠠᠮᠤᠭ ᠤ᠋ᠨ ᠳᠣᠲᠣᠨᠣ ᠪᠣᠯᠤᠭᠰᠠᠨ ᠡᠷᠡᠭᠲᠡᠢ ᠨᠠᠢᠵᠠ ᠲᠠᠢ ᠪᠠᠨ ᠵᠣᠭᠣᠭ ᠲᠠᠭᠠᠷᠠᠬᠤ ᠪᠤᠶᠤ ᠪᠦᠰᠡᠭᠦᠢᠴᠦᠳ ᠦ᠋ᠨ ᠬᠠᠮᠤᠭ ᠤ᠋ᠨ ᠬᠦᠰᠡᠵᠦ᠂ ᠬᠠᠮᠤᠭ ᠤ᠋ᠨ ᠠᠭᠤᠯᠵᠠᠬᠤ ᠳᠤᠷᠠᠲᠠᠢ ᠡᠷᠡᠭᠲᠡᠢ ᠲᠡᠢ ᠶᠠᠷᠢᠯᠴᠠᠨ ᠰᠠᠭᠤᠨᠠ ᠭᠡᠵᠦ ᠬᠡᠢ ᠰᠠᠨᠠᠪᠠ᠃
ᠲᠡᠷᠡ᠂ ᠭᠤᠷᠪᠠᠨ ᠡᠳᠦᠷ ᠤᠭᠠᠭᠰᠠᠨ ᠦᠭᠡᠢ ᠪᠦᠲᠡᠭᠡᠯᠭᠡ ᠪᠡᠷ ᠪᠦᠲᠡᠭᠡᠭᠰᠡᠨ ᠲᠥᠭᠥᠷᠢᠭ ᠰᠢᠷᠡᠭᠡᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠰᠠᠭᠤᠵᠤ᠂ ᠣᠷᠣᠢ ᠶ᠋ᠢᠨ ᠬᠣᠭᠣᠯᠠ ᠪᠠᠨ ᠢᠳᠡᠬᠦ ᠪᠣᠯᠭᠠᠨ ᠡᠮᠦᠨᠡ ᠡᠴᠡ ᠨᠢ ᠬᠠᠷᠠᠵᠤ ᠰᠠᠭᠤᠭᠰᠠᠨ ᠡᠷᠡᠭᠲᠡᠢ ᠨᠥᠬᠥᠷ ᠨᠢ ᠱᠥᠯᠥ ᠲᠡᠢ ᠲᠣᠭᠣᠭᠠᠨ ᠤ᠋ ᠬᠠᠪᠬᠠᠭᠠᠰᠤ ᠶ᠋ᠢ ᠠᠪᠴᠤ᠂ ᠰᠣᠴᠢᠨ ᠪᠠᠶᠠᠷᠯᠠᠭᠰᠠᠨ ᠴᠢᠷᠠᠢ ᠭᠠᠷᠭᠠᠭᠠᠳ: 《ᠠ! ᠠᠩᠬᠢᠯᠤᠮᠠ ᠰᠠᠢᠬᠠᠨ ᠮᠢᠬᠠᠨ ᠤ᠋ ᠱᠥᠯᠥ ᠳᠠ! ᠡᠭᠦᠨ ᠡᠴᠡ ᠰᠠᠢᠬᠠᠨ ᠶᠠᠭᠤᠮᠠ ᠭᠡᠵᠦ ᠬᠠᠮᠢᠭᠠ ᠪᠠᠢᠬᠤ ᠪᠣᠢ! ᠁》 ᠭᠡᠵᠦ ᠬᠡᠯᠡᠬᠦ ᠦᠶᠡᠰ ᠲᠡᠷᠡ ᠲᠡᠳᠡᠭᠡᠷ ᠨᠠᠷᠢᠯᠢᠭ ᠰᠠᠢᠬᠠᠨ ᠣᠷᠣᠢ ᠶ᠋ᠢᠨ ᠪᠤᠳᠠᠭᠠᠯᠠᠯᠭᠠ᠂ ᠭᠢᠯᠲᠦᠭᠡᠨᠡᠨ ᠭᠢᠯᠠᠯᠵᠠᠭᠰᠠᠨ ᠮᠥᠩᠭᠥᠨ ᠰᠠᠪᠠ ᠬᠡᠷᠡᠭᠯᠡᠯ ᠢ᠋ ᠨᠢ ᠬᠡᠢ ᠰᠠᠨᠠᠭᠠᠳ ᠠᠪᠤᠨᠠ᠃ ᠲᠤᠭᠤᠷᠭᠠᠨ ᠳ᠋ᠤ᠌ ᠲᠠᠲᠠᠭᠰᠠᠨ ᠬᠥᠰᠢᠭᠡ᠂ ᠲᠡᠭᠦᠨ ᠦ᠌ ᠳᠡᠭᠡᠷᠡ ᠡᠷᠲᠡᠨ ᠦ᠌ ᠬᠤᠪᠴᠠᠯᠠᠭᠠ ᠲᠠᠢ ᠬᠥᠮᠦᠰ᠂ ᠳᠠᠭᠢᠨᠢ ᠶ᠋ᠢᠨ ᠣᠷᠣᠨ ᠤ᠋ ᠮᠡᠲᠦ ᠶ᠋ᠢᠨ ᠬᠦᠷᠢᠶᠡᠯᠡᠩ᠂ ᠡᠯᠳᠡᠪ ᠰᠣᠨᠢᠨ ᠵᠢᠭᠦᠷᠲᠡᠨ ᠢ᠋ ᠬᠠᠳᠬᠤᠭᠰᠠᠨ ᠪᠠᠢᠨᠠ ᠭᠡᠵᠦ ᠬᠡᠢ ᠰᠠᠨᠠᠪᠠ᠃ ᠬᠣᠪᠣᠷ ᠬᠠᠴᠢᠨ ᠲᠠᠪᠠᠭ ᠫᠢᠯᠠ ᠶ᠋ᠢᠨ ᠳᠣᠲᠣᠷᠠ ᠡᠷᠬᠢᠮ ᠰᠠᠢᠬᠠᠨ ᠵᠠᠭᠤᠰᠢ ᠢᠳᠡᠭᠡᠨ ᠬᠢᠭᠰᠡᠨ ᠪᠠᠢᠨᠠ ᠭᠡᠵᠦ ᠬᠡᠢ ᠰᠠᠨᠠᠪᠠ᠃ ᠶᠠᠭᠠᠨ ᠥᠩᠭᠡ ᠲᠡᠢ ᠠᠯᠠᠭᠠᠨᠠ ᠵᠢᠭᠠᠰᠤ ᠪᠤᠶᠤ ᠬᠥᠬᠡ ᠨᠤᠭᠲᠤᠷᠤ ᠶ᠋ᠢᠨ ᠵᠢᠭᠦᠷ ᠢ᠋ ᠢᠳᠡᠨ ᠪᠠᠢᠬᠤ ᠳ᠋ᠠᠭᠠᠨ ᠬᠥᠮᠦᠨ ᠢ᠋ ᠰᠣᠭᠲᠣᠭᠤᠷᠠᠭᠤᠯᠤᠮᠠ ᠢᠰᠪᠡᠯᠵᠡᠵᠦ᠂ ᠵᠣᠴᠢᠨ ᠤ᠋ ᠳᠣᠲᠣᠨᠣᠴᠢᠷᠬᠠᠭ ᠶᠠᠷᠢᠶᠠ ᠶ᠋ᠢ ᠰᠣᠨᠣᠰᠤᠨ ᠰᠠᠭᠤᠨᠠ ᠭᠡᠵᠦ ᠬᠡᠢ ᠰᠠᠨᠠᠨᠠ᠃ ᠲᠡᠭᠦᠨ ᠳ᠋ᠦ᠍ ᠰᠠᠢᠬᠠᠨ ᠬᠤᠪᠴᠠᠰᠤ ᠪᠠᠢᠬᠤ ᠦᠭᠡᠢ᠂ ᠱ᠌ᠢᠷᠦ ᠰᠤᠪᠤᠳ ᠪᠠᠢᠬᠤ ᠦᠭᠡᠢ᠂ ᠶᠠᠭᠤ ᠴᠤ᠌ ᠪᠠᠢᠬᠤ ᠦᠭᠡᠢ᠃ ᠲᠡᠭᠡᠪᠡᠴᠦ ᠬᠠᠷᠢᠨ ᠡᠳᠡᠭᠡᠷ ᠶᠠᠭᠤᠮᠠᠨ ᠳ᠋ᠤ᠌ ᠯᠠ ᠳᠤᠷᠠᠯᠠᠳᠠᠭ᠃ ᠥᠪᠡᠷ ᠢ᠋ᠶ᠋ᠡᠨ ᠡᠳᠡᠭᠡᠷ ᠶᠠᠭᠤᠮᠠᠨ ᠤ᠋ ᠲᠥᠯᠥᠭᠡ ᠶᠢᠷᠲᠢᠨᠴᠦ ᠳ᠋ᠦ᠍ ᠬᠥᠮᠦᠨ ᠪᠣᠯᠤᠭᠰᠠᠨ ᠭᠡᠵᠦ ᠪᠣᠳᠣᠳᠠᠭ ᠪᠠᠢᠵᠠᠢ᠃ ᠡᠷᠡᠭᠲᠡᠢᠴᠦᠳ ᠲᠦ᠍ ᠬᠦᠰᠡᠭᠳᠡᠬᠦ᠂ ᠡᠮᠡᠭᠲᠡᠢᠴᠦᠳ ᠲᠦ᠍ ᠲᠠᠴᠢᠶᠠᠭᠳᠠᠬᠤ᠂ ᠥᠳᠥᠭᠡᠨ ᠲᠠᠲᠠᠬᠤ ᠬᠦᠴᠦᠨ ᠲᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠪᠤᠰᠤᠳ ᠲᠤ᠌ ᠡᠭᠡᠷᠡᠭᠳᠡᠬᠦ ᠶ᠋ᠢ ᠶᠡᠷᠦ ᠨᠢ ᠡᠷᠡᠮᠡᠯᠵᠡᠨ ᠪᠣᠳᠣᠭᠰᠠᠭᠠᠷ ᠢᠷᠡᠵᠡᠢ᠃
ᠲᠡᠷᠡ ᠱᠠᠰᠢᠨ ᠤ᠋ ᠬᠤᠷᠠᠯ ᠤ᠋ᠨ ᠥᠬᠢᠳ ᠦ᠋ᠨ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠬᠠᠮᠲᠤ ᠰᠤᠷᠤᠭᠴᠢ ᠪᠠᠢᠭᠰᠠᠨ ᠨᠢᠭᠡᠨ ᠪᠠᠶᠠᠨ ᠴᠢᠨᠡᠭᠡᠯᠢᠭ ᠪᠦᠰᠡᠭᠦᠢ ᠨᠠᠢᠵᠠ ᠲᠠᠢ ᠶᠤᠮ᠂ ᠭᠡᠪᠡᠴᠦ ᠲᠡᠭᠦᠨ ᠲᠡᠢ ᠳᠠᠬᠢᠨ ᠠᠭᠤᠯᠵᠠᠬᠤ ᠶ᠋ᠢ ᠬᠦᠰᠡᠬᠦ ᠦᠭᠡᠢ ᠪᠣᠯᠵᠠᠢ᠃ ᠤᠴᠢᠷ ᠨᠢ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠭᠠᠳ ᠬᠠᠷᠢᠵᠤ ᠢᠷᠡᠪᠡᠯ ᠲᠤᠢᠯ ᠤ᠋ᠨ ᠵᠣᠪᠠᠭᠤᠷᠢᠲᠠᠢ ᠪᠣᠳᠣᠭᠳᠠᠳᠠᠭ ᠪᠠᠢᠨᠠ᠃ ᠡᠮᠭᠡᠨᠢᠯ᠂ ᠭᠡᠮᠰᠢᠯ᠂ ᠮᠤᠬᠤᠷᠳᠠᠯ ᠵᠣᠪᠠᠨᠢᠯ ᠢ᠋ᠶ᠋ᠠᠷ ᠪᠠᠢᠨ ᠪᠠᠢᠨ ᠡᠳᠦᠷ ᠲᠣᠷᠰᠢ ᠤᠬᠢᠯᠠᠨᠠ᠃
ᠲᠡᠭᠡᠲᠡᠯᠡ᠂ ᠨᠢᠭᠡ ᠣᠷᠣᠢ ᠨᠥᠬᠥᠷ ᠨᠢ ᠲᠣᠮᠣ ᠲᠣᠭᠳᠣᠢ ᠲᠠᠢ ᠵᠠᠬᠢᠳᠠᠯ ᠪᠠᠷᠢᠭᠠᠳ ᠣᠯᠵᠠᠷᠬᠠᠨ ᠪᠠᠶᠠᠷᠲᠠᠢ ᠬᠠᠷᠢᠵᠤ ᠢᠷᠡᠪᠡ᠃
《ᠬᠠᠷᠠ ᠳᠠ 》 ᠭᠡᠳ: 《ᠡᠭᠦᠨ ᠦ᠌ ᠳᠣᠲᠣᠷᠠᠬᠢ ᠶᠠᠭᠤᠮᠠ ᠶ᠋ᠢ ᠴᠢᠮᠠ ᠳ᠋ᠤ᠌ ᠥᠭᠬᠦᠶᠡ》 ᠭᠡᠪᠡ᠃
ᠲᠡᠷᠡ ᠬᠥᠭᠵᠢᠯ ᠪᠠᠶᠠᠷᠲᠠᠢ ᠪᠠᠷ ᠵᠠᠬᠢᠳᠠᠯ ᠢ᠋ ᠵᠠᠳᠠᠯᠵᠤ ᠨᠢᠭᠡᠨ ᠬᠠᠭᠤᠳᠠᠰᠤ ᠤᠷᠢᠯᠭᠠ ᠶ᠋ᠢᠨ ᠪᠢᠴᠢᠭ ᠭᠠᠷᠭᠠᠭᠰᠠᠨ ᠳ᠋ᠤ᠌ ᠳᠡᠭᠡᠷᠡ ᠨᠢ:
《ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠶᠠᠮᠤᠨ ᠤ᠋ ᠰᠠᠢᠳ ᠪᠠ ᠰᠠᠢᠳ ᠤ᠋ᠨ ᠬᠠᠲᠤᠨ ᠵᠢᠦᠷᠭᠢ ᠯᠠᠮᠪᠷᠠ ᠡᠴᠡ ᠯᠦᠸᠠᠼᠢ ᠠᠪᠤᠭᠠᠢ ᠬᠠᠲᠤᠨ ᠲᠠᠢ ᠪᠠᠨ ᠨᠢᠭᠡᠳᠦᠭᠡᠷ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠨᠠᠢ᠍ᠮᠠᠨ ᠤ᠋ ᠡᠳᠦᠷ (ᠭᠠᠷᠠᠭ ᠤ᠋ᠨ ᠨᠢᠭᠡᠨ) ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠶᠠᠮᠤᠨ ᠤ᠋ ᠶᠣᠰᠣᠯᠠᠯ ᠤ᠋ᠨ ᠲᠠᠩᠬᠢᠮ ᠳ᠋ᠤ᠌ ᠭᠡᠷᠡᠯᠲᠦᠭᠦᠯᠦᠨ ᠮᠣᠷᠢᠯᠠᠵᠤ᠂ ᠦᠳᠡᠰᠢᠯᠡᠭᠡ ᠳ᠋ᠦ᠍ ᠣᠷᠣᠯᠴᠠᠬᠤ ᠶ᠋ᠢ ᠬᠦᠨᠳᠦᠳᠬᠡᠨ ᠤᠷᠢᠪᠠ》 ᠭᠡᠵᠦ ᠬᠡᠪᠯᠡᠭᠰᠡᠨ ᠪᠠᠢᠪᠠ᠃
ᠲᠡᠷᠡ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠪᠣᠳᠣᠭᠰᠠᠨ ᠰᠢᠭ᠋ ᠲᠡᠭᠡᠵᠦ ᠪᠠᠶᠠᠷᠯᠠᠭᠰᠠᠨ ᠦᠭᠡᠢ᠂ ᠤᠷᠢᠯᠭᠠ ᠶ᠋ᠢᠨ ᠪᠢᠴᠢᠭ ᠢ᠋ ᠭᠤᠲᠤᠷᠠᠩᠭᠤᠢ ᠪᠠᠷ ᠰᠢᠷᠡᠭᠡᠨ ᠳᠡᠭᠡᠷᠡ ᠬᠠᠶᠠᠭᠠᠳ:
《ᠴᠢ ᠨᠠᠳᠠ ᠡᠨᠡ ᠶᠠᠭᠤᠮᠠ ᠶ᠋ᠢ ᠪᠠᠷᠢᠭᠤᠯᠤᠭᠠᠳ ᠶᠠᠭᠠᠬᠢᠬᠤ ᠨᠢ ᠪᠣᠢ?》 ᠭᠡᠵᠦ ᠳᠦᠳᠦᠨᠡᠪᠡ᠃
《ᠭᠡᠲᠡᠯᠡ᠂ ᠬᠠᠢᠷᠠᠲᠤ ᠮᠢᠨᠢ᠂ ᠪᠢ ᠤᠭ ᠨᠢ ᠴᠢᠮᠠᠶ᠋ᠢ ᠶᠡᠬᠡ ᠪᠠᠶᠠᠷᠯᠠᠨᠠ ᠭᠡᠵᠦ ᠪᠣᠳᠣᠭᠰᠠᠨ᠃ ᠶᠡᠷᠦ ᠨᠢ ᠭᠡᠷ ᠡᠴᠡ ᠭᠠᠷᠳᠠᠭ ᠦᠭᠡᠢ ᠪᠣᠯᠬᠣᠷ ᠡᠨᠡ ᠨᠢᠭᠡᠨ ᠲᠣᠬᠢᠶᠠᠯ ᠮᠥᠨ! ᠪᠢ ᠬᠡᠴᠢᠨᠡᠨ ᠬᠦᠴᠦ ᠭᠠᠷᠭᠠᠵᠤ ᠪᠠᠢᠵᠤ ᠰᠠᠶᠢ ᠣᠯᠤᠭᠰᠠᠨ᠃ ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠴᠥᠮ ᠣᠯᠵᠤ ᠠᠪᠬᠤ ᠶ᠋ᠢ ᠬᠦᠰᠡᠭᠰᠡᠨ ᠪᠣᠯᠪᠠᠴᠤ ᠲᠤᠩ ᠭᠣᠷᠢ ᠦᠭᠡᠢ᠃ ᠶᠡᠷᠦ ᠡᠴᠡ ᠠᠵᠢᠯᠲᠠᠨ ᠳ᠋ᠤ᠌ ᠴᠥᠭᠡᠨ ᠥᠭᠳᠡᠭ ᠶᠦᠮ᠃ ᠴᠢ ᠲᠡᠨᠳᠡ ᠠᠯᠢᠪᠠ ᠲᠦᠰᠢᠮᠡᠳ ᠲᠤᠰᠢᠶᠠᠯᠲᠠᠨ ᠢ᠋ ᠬᠠᠷᠠᠵᠤ ᠪᠣᠯᠤᠨᠠ᠃ 》
ᠲᠡᠷᠡ ᠠᠭᠤᠷᠲᠠᠢ ᠬᠠᠷᠠᠴᠠ ᠪᠠᠷ ᠨᠥᠬᠥᠷ ᠢ᠋ᠶ᠋ᠡᠨ ᠰᠢᠷᠳᠡᠭᠡᠳ:
《ᠴᠢ ᠨᠠᠮᠠᠶ᠋ᠢ ᠶᠠᠭᠤ ᠡᠮᠦᠰᠦᠭᠦᠯᠦᠭᠡᠳ ᠣᠴᠢᠭᠤᠯᠬᠤ ᠪᠣᠢ?》 ᠭᠡᠵᠦ ᠤᠴᠠᠭᠠᠷᠯᠠᠨ ᠪᠠᠷᠬᠢᠷᠠᠪᠠ᠃
ᠨᠥᠬᠥᠷ ᠨᠢ ᠡᠭᠦᠨ ᠢ᠋ ᠪᠣᠳᠣᠭᠰᠠᠨ ᠦᠭᠡᠢ ᠲᠤᠯᠠ:
《ᠴᠢ ᠲᠢᠶᠠᠲᠷ ᠲᠤ᠌ ᠣᠴᠢᠬᠤ ᠳ᠋ᠠᠭᠠᠨ ᠡᠮᠦᠰᠦᠭᠰᠡᠨ ᠲᠡᠷᠡ ᠳᠡᠪᠡᠯ ᠮᠢᠨᠦ ᠪᠣᠳᠣᠬᠤ ᠪᠠᠷ ᠲᠤᠩ ᠵᠦᠭᠡᠷ᠂ ᠪᠢ ᠦᠵᠡᠬᠦ ᠳ᠋ᠦ᠍ ᠁》 ᠭᠡᠵᠦ ᠡᠪᠯᠡᠭᠦᠯᠵᠦ ᠶᠠᠳᠠᠨ ᠬᠡᠯᠡᠪᠡ᠃
ᠲᠡᠷᠡ ᠳᠤᠭᠤᠢ ᠪᠣᠯᠤᠯᠠ᠃ ᠤᠬᠠᠭᠠᠨ ᠨᠢ ᠭᠠᠷᠴᠤ ᠤᠴᠢᠷ ᠢ᠋ᠶ᠋ᠠᠨ ᠣᠯᠬᠤ ᠦᠭᠡᠢ ᠪᠣᠯᠪᠠ᠃ ᠤᠴᠢᠷ ᠨᠢ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠤᠬᠢᠯᠠᠭᠰᠠᠨ ᠢ᠋ ᠣᠯᠵᠤ ᠬᠠᠷᠠᠵᠠᠢ᠃ ᠬᠣᠶᠠᠷ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠨᠢᠯᠪᠤᠰᠤᠨ ᠳᠤᠰᠤᠯ ᠵᠣᠪᠬᠢ ᠶ᠋ᠢ ᠨᠢ ᠳᠠᠭᠠᠵᠤ ᠮᠡᠯᠡᠷᠡᠭᠰᠡᠭᠡᠷ ᠵᠠᠪᠠᠵᠢᠨ ᠳ᠋ᠤᠨᠢ ᠬᠦᠷᠦᠯᠡ᠃
《ᠴᠢ ᠶᠠᠭᠠᠬᠢᠪᠠ? ᠴᠢ ᠶᠠᠭᠠᠬᠢᠪᠠ?》 ᠭᠡᠵᠦ ᠮᠡᠩᠳᠡᠭᠦᠷᠡᠪᠡ᠃
ᠲᠡᠷᠡ ᠲᠤᠩ ᠶᠡᠬᠡ ᠬᠦᠴᠦ ᠭᠠᠷᠭᠠᠨ ᠪᠠᠢᠵᠤ᠂ ᠭᠤᠨᠢᠭᠯᠠᠯ ᠢ᠋ᠶ᠋ᠠᠨ ᠰᠠᠶᠢ ᠳᠠᠷᠤᠵᠤ ᠠᠪᠤᠭᠠᠳ᠂ ᠨᠣᠢᠲᠠᠨ ᠬᠣᠶᠠᠷ ᠬᠠᠴᠠᠷ ᠢ᠋ᠶ᠋ᠠᠨ ᠠᠷᠴᠢᠵᠤ:
《ᠵᠦᠭᠡᠷ ᠵᠦᠭᠡᠷ᠃ ᠬᠠᠷᠢᠨ ᠣᠯᠢᠭ ᠲᠠᠢ ᠬᠤᠪᠴᠠᠰᠤ ᠦᠭᠡᠢ ᠪᠣᠯ ᠪᠢ ᠡᠨᠡ ᠦᠳᠡᠰᠢᠯᠡᠭᠡ ᠳ᠋ᠦ᠍ ᠣᠴᠢᠵᠤ ᠴᠢᠳᠠᠬᠤ ᠦᠭᠡᠢ᠃ ᠴᠢᠨᠦ ᠬᠠᠮᠲᠤ ᠠᠵᠢᠯᠯᠠᠭᠴᠢ ᠶ᠋ᠢᠨ ᠬᠡᠨ ᠦ᠌ ᠬᠢᠨᠢ ᠡᠬᠡᠨᠡᠷ ᠵᠠᠰᠠᠯ ᠵᠢᠮᠰᠡᠭ ᠢ᠋ᠶ᠋ᠡᠷ ᠨᠠᠳᠠ ᠡᠴᠡ ᠰᠠᠢᠬᠠᠨ ᠪᠣᠯ ᠡᠨᠡ ᠤᠷᠢᠯᠭᠠ ᠶ᠋ᠢᠨ ᠪᠢᠴᠢᠭ ᠢ᠋ ᠬᠡᠨ ᠳ᠋ᠦ᠍ ᠴᠦ᠍ ᠪᠣᠯᠤᠭᠰᠠᠨ ᠥᠭᠴᠢᠬᠡ》 ᠭᠡᠵᠦ ᠲᠠᠢᠪᠤᠰᠢᠷᠠᠭᠰᠠᠨ ᠳᠠᠭᠤ ᠪᠠᠷ ᠬᠠᠷᠢᠭᠤᠯᠪᠠ᠃
ᠨᠥᠬᠥᠷ ᠨᠢ ᠵᠣᠪᠠᠩᠭᠤᠢᠷᠠᠯᠠ᠃ ᠲᠡᠭᠡᠭᠡᠳ:
《ᠢᠩᠭᠢᠶᠡ ᠮᠠᠽᠢᠯᠳ᠋᠃ ᠲᠠᠭᠠᠷᠠᠮᠵᠢᠲᠠᠢ ᠥᠪᠴᠢ ᠬᠤᠪᠴᠠᠰᠤ ᠬᠢᠯᠭᠡᠶᠡ᠂ ᠣᠨᠳᠣᠣ ᠭᠠᠵᠠᠷ ᠴᠤ᠌ ᠡᠮᠦᠰᠴᠦ ᠪᠣᠯᠤᠨᠠ᠃ ᠨᠡᠯᠢᠶᠡᠳ ᠪᠣᠷᠣ ᠳᠦᠷᠢ ᠶ᠋ᠢᠨ ᠬᠢᠨᠢ ᠳᠡᠭᠡᠷᠡ᠃ ᠬᠡᠳᠦᠢ ᠵᠣᠭᠣᠰ ᠣᠷᠣᠨᠠ ᠪᠣᠢ?》 ᠭᠡᠪᠡ᠃
ᠮᠠᠽᠢᠯᠳ᠋ ᠬᠡᠳᠦᠨ ᠰᠧᠺᠦ᠋ᠨ᠋ᠳ᠋ ᠪᠣᠳᠣᠭᠠᠳ ᠨᠢᠭᠡ ᠲᠣᠭᠠ ᠨᠡᠢᠯᠡᠭᠦᠯᠵᠦ ᠠᠪᠤᠯᠠ᠃ ᠡᠨᠡ ᠠᠷᠪᠢᠴᠢ ᠪᠢᠴᠢᠭᠡᠴᠢ ᠰᠢᠭᠤᠳ ᠬᠦᠯᠢᠶᠡᠬᠦ ᠦᠭᠡᠢ ᠪᠤᠶᠤ ᠰᠣᠴᠢᠨ ᠲᠤᠯᠭᠠᠷᠠᠭᠰᠠᠨ ᠳᠠᠭᠤᠨ ᠭᠠᠷᠭᠠᠬᠤ ᠳ᠋ᠤ᠌ ᠬᠦᠷᠬᠦ ᠦᠭᠡᠢ ᠪᠠᠢᠬᠤ ᠠ᠋᠂ ᠲᠡᠢᠨ ᠬᠦ᠌ ᠡᠨᠡ ᠲᠣᠭᠠ ᠶ᠋ᠢ ᠬᠡᠯᠡᠵᠦ ᠪᠣᠯᠤᠨᠠ ᠭᠡᠵᠦ ᠪᠣᠳᠣᠯᠬᠢᠯᠠᠪᠠ᠃
《ᠶᠠᠭ ᠬᠡᠳᠦᠢ ᠣᠷᠣᠬᠤ ᠶ᠋ᠢ ᠪᠢ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ᠂ ᠭᠡᠪᠡᠴᠦ ᠮᠢᠨᠦ ᠦᠵᠡᠬᠦ ᠪᠡᠷ ᠳᠥᠷᠪᠡᠨ ᠵᠠᠭᠤᠨ ᠹᠷᠠᠩᠺ ᠪᠠᠢᠪᠠᠯ ᠪᠣᠯᠬᠤ ᠨᠢ ᠲᠡᠷᠡ》 ᠭᠡᠵᠦ ᠡᠴᠦᠰ ᠲᠡᠭᠡᠨ ᠲᠠᠲᠠᠭᠠᠯᠵᠠᠩᠬᠠᠨ ᠬᠡᠯᠡᠪᠡ᠃
ᠨᠥᠬᠥᠷ ᠦ᠋ᠨ ᠬᠢᠨᠢ ᠴᠢᠷᠠᠢ ᠬᠣᠵᠢᠢᠰᠬᠢᠯᠡ᠃ ᠲᠡᠷᠡ ᠶᠠᠭ ᠡᠳᠦᠢ ᠯᠡ ᠵᠣᠭᠣᠰ ᠬᠠᠳᠠᠭᠠᠯᠠᠭᠤᠯᠵᠤ ᠪᠠᠢᠭᠰᠠᠨ ᠪᠥᠭᠡᠳ ᠲᠡᠭᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠠᠩ ᠤ᠋ᠨ ᠫᠤᠤ ᠠᠪᠴᠤ ᠠᠩᠴᠢᠳ ᠤ᠋ᠨ ᠪᠦᠯᠬᠦᠮ ᠳ᠋ᠦ᠍ ᠣᠷᠣᠯᠴᠠᠭᠠᠳ ᠵᠤᠨ ᠤ᠋ ᠤᠯᠠᠷᠢᠯ ᠤ᠋ᠨ ᠭᠠᠷᠠᠭ ᠤ᠋ᠨ ᠡᠳᠦᠷ ᠬᠡᠳᠦᠨ ᠨᠠᠢᠵᠠ ᠲᠠᠢ ᠪᠠᠨ ᠬᠠᠮᠲᠤ ᠯᠠᠨᠳ᠋ᠧᠷ ᠲᠠᠯᠠ ᠳ᠋ᠤ᠌ ᠣᠴᠢᠵᠤ ᠳᠠᠭᠤᠲᠤ ᠪᠣᠯᠵᠣᠮᠣᠷ ᠠᠩᠨᠠᠬᠤ ᠭᠡᠵᠦ ᠪᠣᠳᠣᠵᠤ ᠪᠠᠢᠵᠠᠢ᠃
ᠲᠡᠭᠡᠪᠡᠴᠦ ᠲᠡᠷᠡ: 《ᠵᠠ ᠪᠣᠯᠤᠨᠠ᠂ ᠪᠢ ᠴᠢᠮᠠ ᠳ᠋ᠤ᠌ ᠳᠥᠷᠪᠡᠨ ᠵᠠᠭᠤᠨ ᠹᠷᠠᠩᠺ ᠦᠭᠬᠦᠶᠡ᠃ ᠴᠢ ᠬᠠᠷᠢᠨ ᠡᠨᠡ ᠬᠤᠪᠴᠠᠰᠤ ᠪᠠᠨ ᠭᠣᠶᠣᠬᠠᠨ ᠯᠠ ᠬᠢᠯᠭᠡᠬᠦ ᠬᠡᠷᠡᠭᠲᠡᠢ ᠰᠢᠦ》 ᠭᠡᠪᠡ᠃
ᠦᠳᠡᠰᠢᠯᠡᠭᠡ ᠶ᠋ᠢᠨ ᠡᠳᠦᠷ ᠣᠢᠷᠠᠲᠤᠯᠠ᠂ ᠭᠡᠲᠡᠯᠡ ᠮᠠᠽᠢᠯᠳ᠋ ᠬᠠᠲᠤᠨ ᠪᠤᠬᠢᠨᠢᠳᠤᠵᠤ᠂ ᠰᠡᠳᠬᠢᠯ ᠠᠮᠤᠷ ᠦᠭᠡᠢ ᠲᠡᠪᠡᠳᠡᠭᠰᠡᠨ ᠨᠢ ᠢᠯᠡᠷᠬᠡᠢ ᠪᠣᠯᠪᠠ᠃ ᠲᠡᠭᠦᠨ ᠦ᠌ ᠬᠤᠪᠴᠠᠰᠤ ᠴᠤ᠌ ᠰᠠᠢᠬᠠᠨ ᠪᠣᠯᠵᠠᠢ᠃ ᠨᠥᠬᠥᠷ ᠨᠢ ᠨᠢᠭᠡ ᠣᠷᠣᠢ ᠲᠡᠭᠦᠨ ᠳ᠋ᠦ᠍:
《ᠴᠢ ᠶᠠᠭᠠᠬᠢᠪᠠ? ᠡᠨᠡ ᠬᠡᠳᠦᠨ ᠡᠳᠦᠷ ᠲᠣᠩ ᠬᠠᠴᠢᠨ ᠵᠢᠭᠲᠡᠢ ᠪᠣᠯᠴᠢᠬᠠᠵᠠᠢ》 ᠭᠡᠪᠡ᠃
《ᠨᠢᠭᠡ ᠯᠡ ᠦᠨᠡᠲᠦ ᠰᠤᠪᠤᠳ᠂ ᠨᠢᠭᠡ ᠪᠥᠭᠡᠷᠡᠩᠬᠡᠢ ᠪᠠᠳᠮᠠᠷᠠᠭᠠ ᠴᠤ᠌ ᠪᠠᠢᠬᠤ ᠦᠭᠡᠢ᠂ ᠵᠡᠭᠦᠮᠡᠷ ᠴᠦ᠍ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ ᠨᠢ ᠨᠠᠮᠠᠶ᠋ᠢ ᠵᠣᠪᠠᠭᠠᠵᠤ ᠪᠠᠢᠨᠠ᠃ ᠭᠠᠵᠠᠷ ᠪᠣᠯᠭᠠᠨ ᠭᠤᠢᠷᠠᠨᠴᠢ ᠪᠠᠨ ᠭᠠᠢᠬᠠᠭᠤᠯᠤᠭᠠᠳ ᠶᠠᠭᠠᠬᠢᠬᠤ ᠪᠣᠢ᠃ ᠡᠨᠡ ᠦᠳᠡᠰᠢᠯᠡᠭᠡ ᠳ᠋ᠦ᠍ ᠣᠴᠢᠬᠤ ᠪᠠᠨ ᠪᠣᠯᠢᠶᠠ ᠭᠡᠵᠦ ᠰᠠᠨᠠᠵᠤ ᠪᠠᠢᠨᠠ》 ᠭᠡᠵᠦ ᠬᠠᠷᠢᠭᠤᠯᠪᠠ᠃
《ᠬᠡᠳᠦᠨ ᠰᠢᠨᠡ ᠴᠡᠴᠡᠭ ᠵᠡᠭᠦᠴᠢᠬᠡ᠃ ᠣᠳᠣ ᠶ᠋ᠢᠨ ᠤᠯᠠᠷᠢᠯ ᠳ᠋ᠤ᠌ ᠡᠨᠡ ᠴᠢᠨᠢ ᠬᠠᠷᠢᠨ ᠲᠤᠩ ᠰᠢᠨᠡ ᠮᠠᠶᠢᠭ ᠤ᠋ᠨ ᠰᠢᠦ᠃ ᠠᠷᠪᠠᠨ ᠹᠷᠠᠩᠺ ᠵᠠᠷᠤᠪᠠᠯ ᠪᠠᠭᠯᠠᠭᠠᠷ ᠰᠠᠢᠬᠠᠨ ᠬᠣᠶᠠᠷ ᠰᠠᠷᠭᠠᠢ ᠴᠡᠴᠡᠭ ᠠᠪᠴᠤ ᠴᠢᠳᠠᠨᠠ》 ᠭᠡᠵᠦ ᠨᠥᠬᠥᠷ ᠨᠢ ᠬᠡᠯᠡᠪᠡ᠃
ᠲᠡᠷᠡ ᠪᠠᠰᠠ ᠵᠥᠪᠰᠢᠶᠡᠷᠡᠭᠰᠡᠨ ᠦᠭᠡᠢ᠃
《ᠪᠣᠯᠬᠤ ᠦᠭᠡᠢ ᠁ ᠰᠣᠷᠲᠤᠭᠤᠯᠢᠭ ᠬᠠᠲᠤᠳ ᠤ᠋ᠨ ᠳᠤᠮᠳᠠ ᠭᠤᠢᠷᠠᠨᠴᠢ ᠪᠠᠨ ᠭᠠᠢᠬᠠᠭᠤᠯᠬᠤ ᠡᠴᠡ ᠮᠠᠭᠤᠬᠠᠢ ᠶᠠᠭᠤᠮᠠ ᠭᠡᠵᠦ ᠬᠠᠮᠢᠭᠠ ᠪᠠᠢᠬᠤ ᠪᠣᠢ᠃ 》
《ᠴᠢ ᠶᠠᠭᠠᠬᠢᠭᠠᠳ ᠡᠷᠭᠢᠭᠦᠦ ᠪᠣᠢ? ᠹᠯᠧᠰᠵᠧ ᠬᠠᠲᠤᠨ ᠨᠠᠢᠵᠠ ᠶ᠋ᠢᠨ ᠳ᠋ᠡᠭᠡᠨ ᠣᠴᠢᠭᠠᠳ ᠲᠡᠭᠦᠨ ᠡᠴᠡ ᠬᠡᠳᠦᠨ ᠵᠦᠢᠯ ᠦ᠋ᠨ ᠰᠤᠪᠤᠳ ᠵᠢᠭᠡᠯᠡ᠃ ᠴᠢ ᠲᠡᠭᠦᠨ ᠲᠡᠢ ᠲᠤᠩ ᠳᠣᠲᠣᠨᠣᠰᠣᠭ ᠪᠣᠯᠬᠣᠷ ᠡᠨᠡᠦᠬᠡᠨ ᠶᠠᠪᠤᠳᠠᠯ ᠶᠠᠭᠤ ᠪᠠᠢᠬᠤ ᠪᠣᠢ》 ᠭᠡᠵᠦ ᠨᠥᠬᠥᠷ ᠨᠢ ᠴᠢᠩᠭᠠ ᠭᠡᠭᠴᠢ ᠬᠡᠯᠡᠪᠡ᠃
ᠮᠠᠽᠢᠯᠳ᠋ ᠰᠣᠴᠢᠨ ᠪᠠᠶᠠᠷᠯᠠᠵᠤ ᠳᠠᠭᠤᠨ ᠠᠯᠳᠠᠪᠠ᠃
《ᠨᠡᠭᠡᠷᠡᠨ! ᠪᠢ ᠬᠠᠷᠢᠨ ᠡᠭᠦᠨ ᠢ᠋ ᠰᠠᠨᠠᠵᠤ ᠣᠯᠤᠭᠰᠠᠨ ᠦᠭᠡᠢ᠃ 》
ᠳᠠᠷᠠᠭᠠ ᠡᠳᠦᠷ ᠨᠢ ᠮᠠᠽᠢᠯᠳ᠋ ᠨᠠᠢᠵᠠ ᠶ᠋ᠢᠨ ᠳ᠋ᠡᠭᠡᠨ ᠣᠴᠢᠵᠤ ᠥᠪᠡᠷ ᠦ᠋ᠨ ᠵᠣᠪᠠᠯᠠᠩ ᠢ᠋ᠶ᠋ᠠᠨ ᠲᠣᠭᠠᠴᠢᠯᠠ᠃ ᠹᠯᠧᠰᠵᠧ ᠬᠠᠲᠤᠨ ᠰᠢᠯ ᠰᠠᠭᠤᠯᠭᠠᠭᠰᠠᠨ ᠬᠤᠪᠴᠠᠰᠤᠨ ᠤ᠋ ᠬᠣᠷᠭᠣᠨ ᠳ᠋ᠠᠭᠠᠨ ᠣᠴᠢᠵᠤ᠂ ᠲᠣᠮᠣ ᠬᠠᠢᠷᠴᠠᠭ ᠭᠠᠷᠭᠠᠨ ᠠᠪᠴᠤ ᠨᠡᠭᠡᠭᠡᠨ ᠲᠠᠯᠪᠢᠭᠠᠳ᠂ ᠮᠠᠽᠢᠯᠳ᠋ ᠬᠠᠲᠤᠨ ᠳ᠋ᠤ᠌:
《ᠰᠢᠯᠢ ᠳᠡ᠂ ᠬᠠᠢᠷᠠᠲᠤ ᠮᠢᠨᠢ》 ᠭᠡᠪᠡ᠃
ᠲᠡᠷᠡ ᠤᠷᠢᠳᠠ ᠪᠠᠷ ᠬᠡᠳᠦᠨ ᠪᠠᠭᠤᠪᠴᠢ᠂ ᠳᠠᠷᠠᠭᠠ ᠨᠢ ᠨᠢᠭᠡ ᠰᠤᠪᠤᠳ ᠰᠣᠨᠳᠣᠷ᠂ ᠰᠡᠭᠦᠯ ᠳ᠋ᠦ᠍ᠨᠢ ᠪᠠᠳᠮᠠᠷᠠᠭᠠ ᠰᠢᠭᠢᠳᠬᠡᠭᠰᠡᠨ ᠲᠤᠢᠯ ᠤ᠋ᠨ ᠨᠠᠷᠢᠨ ᠬᠢᠴᠡᠲᠡᠢ ᠸᠢᠨ᠋ᠸᠼᠢᠶᠠ ᠬᠡᠯᠪᠡᠷᠢ ᠶ᠋ᠢᠨ ᠠᠯᠲᠠᠨ ᠵᠠᠭᠠᠯᠮᠠᠢ ᠶ᠋ᠢ ᠦᠵᠡᠯᠡ᠃ ᠲᠡᠷᠡ ᠲᠣᠯᠢᠨ ᠤ᠋ ᠡᠮᠦᠨᠡ ᠣᠴᠢᠵᠤ ᠡᠳᠡᠭᠡᠷ ᠵᠢᠮᠰᠡᠭ ᠢ᠋ ᠵᠡᠭᠦᠵᠦ ᠦᠵᠡᠭᠡᠳ ᠠᠯᠢᠨ ᠢ᠋ ᠨᠢ ᠠᠪᠴᠤ ᠠᠯᠢᠨ ᠢ᠋ ᠨᠢ ᠲᠠᠯᠪᠢᠬᠤ ᠪᠠᠨ ᠮᠡᠳᠡᠬᠦ ᠦᠭᠡᠢ ᠲᠠᠲᠠᠭᠠᠯᠵᠠᠯᠠ᠃ ᠲᠡᠭᠡᠭᠡᠳ ᠮᠠᠽᠢᠯᠳ᠋ :
《ᠣᠨᠳᠣᠣ ᠰᠠᠢᠬᠠᠨ ᠤ᠋ ᠪᠠᠢᠬᠤ ᠦᠭᠡᠢ ᠦᠦ?》 ᠭᠡᠵᠦ ᠪᠠᠢᠨ ᠪᠠᠢᠨ ᠠᠰᠠᠭᠤᠨᠠ᠃
《ᠪᠣᠢ ᠪᠣᠢ᠃ ᠥᠪᠡᠷ ᠢ᠋ᠶ᠋ᠡᠨ ᠯᠡ ᠡᠷᠢ᠃ ᠶᠠᠮᠠᠷ ᠶᠠᠩᠵᠤ ᠲᠠᠢ ᠨᠢ ᠴᠢᠨᠦ ᠰᠠᠨᠠᠭᠠᠨ ᠳ᠋ᠤ᠌ ᠨᠡᠢᠴᠡᠬᠦ ᠶ᠋ᠢ ᠪᠢ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ᠃ 》
ᠮᠠᠽᠢᠯᠳ᠋ ᠬᠥᠬᠡ ᠲᠣᠷᠭᠠᠨ ᠭᠠᠳᠠᠷᠲᠠᠢ ᠵᠢᠵᠢᠭ ᠬᠠᠢᠷᠴᠠᠭ ᠳᠣᠲᠤᠷᠠ ᠡᠴᠡ ᠨᠠᠷᠢᠯᠢᠭ ᠰᠠᠢᠬᠠᠨ ᠠᠯᠮᠠᠰ ᠡᠷᠳᠡᠨᠢ ᠶ᠋ᠢᠨ ᠰᠣᠨᠳᠣᠷ ᠢ᠋ ᠭᠡᠨᠡᠳᠲᠡ ᠣᠯᠵᠤ ᠠᠪᠤᠭᠠᠳ ᠪᠠᠶᠠᠷᠯᠠᠭᠰᠠᠨ ᠳ᠋ᠠᠭᠠᠨ ᠵᠢᠷᠦᠬᠡ ᠨᠢ ᠯᠤᠭᠰᠢᠵᠤ ᠭᠠᠷᠤᠯᠠ᠃ ᠲᠡᠷᠡ ᠰᠣᠨᠳᠣᠷ ᠢ᠋ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠷᠢᠭᠠᠳ ᠰᠠᠯᠭᠠᠨᠠᠨᠠ᠃ ᠲᠡᠷᠡ ᠰᠣᠨᠳᠣᠷ ᠢ᠋ᠶ᠋ᠠᠷ ᠬᠦᠵᠦᠭᠦᠦ ᠪᠡᠨ ᠣᠷᠢᠶᠠᠯᠭᠠᠨ ᠤᠷᠲᠤ ᠭᠡᠭᠴᠢ ᠶ᠋ᠢᠨ ᠥᠨᠳᠥᠷ ᠵᠠᠭᠠᠮᠠ ᠳᠡᠭᠡᠷᠡ ᠪᠡᠨ ᠵᠡᠭᠦᠭᠡᠳ ᠲᠣᠯᠢᠨ ᠤ᠋ ᠡᠮᠦᠨᠡ ᠵᠣᠭᠰᠣᠵᠤ ᠪᠡᠶᠡ ᠪᠡᠨ ᠲᠤᠩ ᠤᠳᠠᠲᠠᠯᠠ ᠱᠣᠬᠣᠭᠣᠷᠠᠪᠠ᠃
ᠲᠡᠭᠡᠵᠦ ᠲᠡᠭᠡᠵᠦ ᠲᠡᠷᠡ:
《ᠴᠢ ᠡᠭᠦᠨ ᠢ᠋ ᠨᠠᠳᠠ ᠵᠢᠭᠡᠯᠡᠵᠦ ᠥᠭᠭᠦᠨᠡ ᠦᠦ? ᠪᠢ ᠡᠭᠦᠨ ᠢ᠋ ᠯᠡ ᠵᠢᠭᠡᠯᠡᠶᠡ》 ᠭᠡᠵᠦ ᠲᠡᠭᠡᠨᠡᠭᠡᠯᠵᠡᠭᠰᠡᠨ ᠳᠡᠭᠡᠷᠡ ᠪᠡᠨ ᠲᠡᠪᠡᠳᠡᠩᠭᠦᠢ ᠬᠡᠯᠡᠪᠡ᠃
《ᠪᠣᠯᠤᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃ 》
ᠮᠠᠽᠢᠯᠳ᠋ ᠭᠦᠶᠦᠵᠦ ᠢᠷᠡᠭᠡᠳ ᠨᠠᠢᠵᠠ ᠶ᠋ᠢᠨ ᠢ᠋ᠶ᠋ᠡᠨ ᠬᠦᠵᠦᠭᠦᠦ ᠪᠡᠷ ᠲᠡᠪᠡᠷᠢᠵᠦ ᠰᠡᠳᠬᠢᠯ ᠬᠥᠭᠡᠷᠦᠨ ᠦᠨᠦᠰᠴᠦ ᠦᠨᠦᠰᠦᠭᠡᠳ ᠲᠡᠷᠡ ᠬᠦ᠌ ᠬᠣᠪᠣᠷ ᠬᠠᠴᠢᠨ ᠶᠠᠭᠤᠮᠠ ᠪᠠᠨ ᠠᠪᠤᠭᠠᠳ ᠭᠦᠶᠦᠨ ᠣᠳᠪᠠ᠃
ᠦᠳᠡᠰᠢᠯᠡᠭᠡ ᠶ᠋ᠢᠨ ᠡᠳᠦᠷ ᠪᠣᠯᠤᠯᠠ᠃ ᠮᠠᠽᠢᠯᠳ᠋ ᠬᠠᠲᠤᠨ ᠠᠮᠵᠢᠯᠲᠠ ᠣᠯᠪᠠ᠃ ᠲᠡᠷᠡ ᠡᠮᠡᠭᠲᠡᠢ ᠵᠣᠴᠢᠳ ᠤ᠋ᠨ ᠠᠯᠢᠨ ᠡᠴᠡ ᠴᠤ᠌ ᠦᠵᠡᠰᠬᠦᠯᠡᠩ᠂ ᠴᠡᠪᠡᠷᠬᠡᠨ᠂ ᠰᠡᠳᠬᠢᠯ ᠬᠥᠳᠡᠯᠭᠡᠮᠡ ᠪᠥᠭᠡᠳ ᠴᠢᠷᠠᠢ ᠳᠦᠭᠦᠷᠡᠩ ᠢᠨᠢᠶᠡᠮᠰᠦᠭᠯᠡᠯ ᠲᠣᠳᠣᠷᠠᠭᠤᠯᠵᠤ᠂ ᠰᠡᠳᠬᠢᠯ ᠳᠦᠭᠦᠷᠡᠩ ᠪᠠᠢᠳᠠᠯ ᠣᠷᠭᠢᠭᠤᠯᠤᠨᠠ᠃ ᠡᠷᠡᠭᠲᠡᠢ ᠵᠣᠴᠢᠳ ᠤ᠋ᠨ ᠠᠯᠢ ᠨᠢ ᠴᠦ᠍ ᠴᠥᠮ ᠲᠡᠭᠦᠨ ᠳ᠋ᠦ᠍ ᠨᠢᠳᠦ ᠬᠠᠶᠠᠵᠤ᠂ ᠨᠡᠷᠡ ᠣᠪᠣᠭ ᠢ᠋ ᠨᠢ ᠰᠤᠷᠠᠭᠯᠠᠵᠤ᠂ ᠪᠤᠰᠤᠳ ᠢ᠋ ᠭᠤᠶᠤᠨ ᠲᠡᠭᠦᠨ ᠲᠡᠢ ᠲᠠᠨᠢᠯᠴᠠᠨᠠ᠃ ᠶᠠᠮᠤᠨ ᠤ᠋ ᠨᠠᠷᠢᠨ ᠪᠢᠴᠢᠭᠡᠴᠢ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠠᠵᠢᠯᠲᠠᠨ ᠪᠦᠬᠦᠨ ᠲᠡᠭᠦᠨ ᠲᠡᠢ ᠪᠥᠵᠢᠭᠯᠡᠬᠦ ᠶ᠋ᠢ ᠡᠳᠦᠵᠦ᠂ ᠰᠠᠢᠳ ᠴᠤ᠌ ᠲᠡᠭᠦᠨ ᠢ᠋ ᠠᠩᠬᠠᠷᠪᠠ᠃
ᠮᠠᠽᠢᠯᠳ᠋ ᠰᠡᠳᠬᠢᠯ ᠬᠥᠭᠡᠷᠦᠨ ᠪᠠᠶᠠᠷ ᠪᠠᠶᠠᠰᠬᠤᠯᠠᠩᠲᠠᠢ ᠪᠥᠵᠢᠭᠯᠡᠵᠦ ᠴᠡᠩᠭᠡᠯ ᠦ᠋ᠨ ᠳᠤᠮᠳᠠ ᠱᠤᠩᠪᠠᠨ ᠠᠯᠮᠠᠢᠷᠠᠭᠰᠠᠭᠠᠷ ᠶᠠᠭᠤ ᠶ᠋ᠢ ᠴᠦ᠍ ᠰᠠᠨᠠᠬᠤ ᠪᠠᠨ ᠪᠣᠯᠢᠪᠠ᠃ ᠲᠡᠷᠡ ᠭᠤᠸᠠ ᠰᠠᠢᠬᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠯᠢᠪᠠ ᠡᠮᠡᠭᠲᠡᠢ ᠵᠣᠴᠢᠳ ᠡᠴᠡ ᠳᠠᠪᠠᠭᠰᠠᠨ ᠳ᠋ᠠᠭᠠᠨ ᠰᠣᠭᠲᠣᠭᠤᠷᠠᠨᠠ᠃ ᠠᠮᠵᠢᠯᠲᠠ ᠣᠯᠤᠭᠰᠠᠨ ᠤ᠋ ᠠᠯᠳᠠᠷ ᠭᠡᠷᠡᠯ ᠳ᠋ᠡᠭᠡᠨ ᠰᠣᠭᠲᠣᠭᠤᠷᠠᠨᠠ᠂ ᠬᠥᠮᠦᠰ ᠲᠡᠭᠦᠨ ᠢ᠋ ᠱᠠᠭᠰᠢᠨ ᠭᠠᠢᠬᠠᠵᠤ᠂ ᠲᠡᠭᠦᠨ ᠳ᠋ᠦ᠍ ᠬᠦᠰᠡᠨ ᠲᠠᠴᠢᠶᠠᠭᠰᠠᠨ ᠡᠴᠡ ᠪᠣᠯᠤᠭᠰᠠᠨ ᠵᠢᠷᠭᠠᠯ ᠤ᠋ᠨ ᠪᠤᠳᠠᠩ ᠳᠣᠲᠣᠷᠠ ᠰᠣᠭᠲᠣᠭᠤᠷᠠᠨᠠ᠂ ᠡᠮᠡᠭᠲᠡᠢᠴᠦᠳ ᠦ᠋ᠨ ᠪᠣᠳᠣᠳᠠᠭ ᠬᠠᠮᠤᠭ ᠤ᠋ᠨ ᠲᠡᠭᠦᠰ ᠰᠠᠢᠬᠠᠨ ᠬᠠᠮᠤᠭ ᠤ᠋ᠨ ᠲᠠᠭᠠᠯᠠᠮᠵᠢᠲᠠᠢ ᠢᠯᠠᠯᠲᠠ ᠶ᠋ᠢᠨ ᠳᠤᠮᠳᠠ ᠰᠣᠭᠲᠣᠭᠤᠷᠠᠨᠠ᠃
ᠮᠠᠽᠢᠯᠳ᠋ ᠡᠷᠲᠡ ᠶ᠋ᠢᠨ ᠳᠥᠷᠪᠡᠨ ᠴᠠᠭ ᠤ᠋ᠨ ᠦᠶᠡᠰ ᠢ᠋ᠶ᠋ᠡᠷ ᠭᠠᠷᠤᠯᠠ᠃ ᠲᠡᠭᠦᠨ ᠦ᠌ ᠨᠥᠬᠥᠷ ᠨᠢ ᠰᠥᠨᠢ ᠳᠤᠮᠳᠠ ᠡᠴᠡ ᠡᠬᠢᠯᠡᠭᠡᠳ ᠭᠤᠷᠪᠠᠨ ᠡᠷᠡᠭᠲᠡᠢ ᠵᠣᠴᠢᠨ ᠲᠠᠢ ᠬᠠᠮᠲᠤ ᠵᠠᠢᠳᠠᠭᠤᠬᠠᠨ ᠨᠢᠭᠡ ᠵᠣᠴᠢᠳ ᠤ᠋ᠨ ᠥᠷᠥᠭᠡᠨ ᠳ᠋ᠦ᠍ ᠤᠨᠲᠠᠵᠤ ᠣᠷᠬᠢᠵᠠᠢ᠃ ᠲᠡᠷᠡ ᠵᠠᠪᠰᠠᠷ ᠡᠨᠡ ᠭᠤᠷᠪᠠᠨ ᠡᠷᠡᠭᠲᠡᠢ ᠵᠣᠴᠢᠨ ᠤ᠋ ᠡᠬᠡᠨᠡᠷ ᠴᠦ᠍ ᠮᠥᠨ ᠪᠥᠵᠢᠭᠯᠡᠨ ᠬᠥᠭᠵᠢᠯᠳᠦᠭᠰᠡᠭᠡᠷ ᠪᠠᠢᠪᠠ᠃
ᠮᠠᠽᠢᠯᠳ᠋ ᠤ᠋ᠨ ᠨᠥᠬᠥᠷ ᠨᠢ ᠶᠠᠪᠤᠬᠤ ᠦᠶᠡ ᠳ᠋ᠦ᠍ ᠡᠮᠦᠰᠦᠭᠦᠯᠬᠦ ᠭᠡᠵᠦ ᠭᠡᠷ ᠡᠴᠡ ᠪᠡᠨ ᠠᠪᠴᠢᠷᠠᠭᠰᠠᠨ ᠬᠤᠪᠴᠠᠰᠤ ᠶ᠋ᠢ ᠮᠥᠷᠦᠨ ᠳᠡᠭᠡᠭᠦᠷ ᠨᠢ ᠨᠥᠮᠥᠷᠦᠭᠦᠯᠪᠡ᠃ ᠡᠨᠡ ᠪᠣᠯ ᠭᠡᠷ ᠲᠦ᠍ ᠡᠮᠦᠰᠳᠡᠭ ᠪᠣᠷᠣ ᠳᠦᠷᠢ ᠶ᠋ᠢᠨ ᠬᠤᠪᠴᠠᠰᠤ ᠲᠤᠯᠠ ᠡᠭᠦᠨ ᠦ᠌ ᠦᠵᠡᠰᠢ ᠦᠭᠡᠢ ᠳᠦᠷᠢ ᠶ᠋ᠢ ᠦᠳᠡᠰᠢᠯᠡᠭᠡ ᠳᠡᠭᠡᠷᠡᠬᠢ ᠬᠤᠪᠴᠠᠰᠤᠨ ᠤ᠋ ᠬᠡᠭᠡᠨᠴᠢᠷ ᠵᠢᠪᠬᠤᠭᠠ ᠲᠠᠢ ᠵᠡᠷᠭᠡᠴᠡᠭᠦᠯᠬᠦ ᠠᠷᠭᠠ ᠦᠭᠡᠢ᠃ ᠲᠡᠷᠡ ᠡᠭᠦᠨ ᠢ᠋ ᠰᠡᠷᠡᠵᠦ ᠮᠡᠳᠡᠭᠰᠡᠨ ᠪᠣᠯᠬᠣᠷ ᠬᠣᠪᠣᠷ ᠦᠨᠡᠲᠡᠢ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠡᠮᠡᠭᠲᠡᠢᠴᠦᠳ ᠲᠦ᠍ ᠦᠯᠦ ᠬᠠᠷᠠᠭᠳᠠᠬᠤ ᠶ᠋ᠢᠨ ᠲᠥᠯᠥᠭᠡ ᠬᠤᠷᠳᠤᠬᠠᠨ ᠢ᠋ᠶ᠋ᠠᠷ ᠪᠤᠷᠤᠭᠤᠯᠠᠨ ᠣᠳᠬᠤ ᠭᠡᠪᠡ᠃
ᠯᠦᠸᠠᠼᠢ ᠲᠡᠭᠦᠨ ᠢ᠋ ᠴᠢᠩᠭᠠᠭᠠᠵᠤ:
《ᠪᠠᠢᠵᠠ ᠪᠠᠢᠵᠠ᠂ ᠴᠢ ᠭᠠᠷᠪᠠᠯ ᠲᠠᠭᠠᠷᠠᠨᠠ ᠰᠢᠦ᠂ ᠪᠢ ᠮᠣᠷᠢᠨ ᠲᠡᠷᠭᠡ ᠳᠠᠭᠤᠳᠠᠭᠠᠳ ᠢᠷᠡᠶᠡ》 ᠭᠡᠪᠡ᠃
ᠭᠡᠲᠡᠯᠡ ᠲᠡᠷᠡ ᠣᠭᠲᠣ ᠬᠠᠢᠬᠤᠷᠤᠯ ᠦᠭᠡᠢ ᠰᠡᠩᠳᠡ ᠮᠡᠩᠳᠡ ᠱᠠᠲᠤ ᠪᠠᠷ ᠪᠠᠭᠤᠨ ᠣᠳᠤᠯᠠ᠃ ᠲᠡᠷᠡ ᠭᠤᠳᠤᠮᠵᠢᠨ ᠳ᠋ᠤ᠌ ᠭᠠᠷᠤᠭᠠᠳ ᠨᠢᠭᠡ ᠴᠦ᠍ ᠮᠣᠷᠢᠨ ᠲᠡᠷᠭᠡ ᠲᠡᠢ ᠳᠠᠭᠠᠷᠢᠯᠳᠤᠭᠰᠠᠨ ᠦᠭᠡᠢ᠃ ᠲᠡᠳᠡ ᠭᠠᠵᠠᠷ ᠪᠦᠬᠦᠨ ᠡᠴᠡ ᠡᠷᠢᠵᠦ᠂ ᠮᠣᠷᠢᠨ ᠲᠡᠷᠭᠡ ᠬᠠᠷᠠᠭᠳᠠᠮᠠᠭᠴᠠ ᠬᠣᠯᠠ ᠡᠴᠡ ᠬᠠᠰᠬᠢᠷᠤᠨ ᠳᠠᠭᠤᠳᠠᠨᠠ᠃
ᠲᠡᠳᠡ ᠰᠧᠢᠨᠧ ᠭᠣᠣᠯ ᠤ᠋ᠨ ᠬᠥᠪᠡᠭᠡ ᠳᠠᠭᠠᠵᠤ ᠮᠤᠬᠤᠷᠳᠠᠨ ᠶᠠᠪᠤᠬᠤ ᠪᠥᠭᠡᠳ ᠴᠡᠴᠡᠷᠡᠨ ᠲᠠᠭᠵᠢᠷᠠᠲᠠᠯᠠ ᠲᠠᠭᠠᠷᠠᠵᠠᠢ᠃ ᠲᠡᠭᠡᠭᠰᠡᠭᠡᠷ ᠭᠣᠣᠯ ᠤ᠋ᠨ ᠡᠷᠭᠢ ᠳᠡᠭᠡᠷᠡ ᠡᠴᠡ ᠰᠥᠨᠢ ᠶᠠᠪᠤᠳᠠᠭ ᠨᠢᠭᠡ ᠮᠠᠭᠤ ᠮᠣᠷᠢᠨ ᠲᠡᠷᠭᠡ ᠣᠯᠪᠠ᠃ ᠡᠢᠮᠦᠷᠬᠦᠦ ᠲᠡᠷᠭᠡ ᠫᠠᠷᠢᠰ ᠲᠤ᠌ ᠰᠥᠨᠢ ᠯᠡ ᠦᠵᠡᠭᠳᠡᠳᠡᠭ᠂ ᠡᠳᠦᠷ ᠨᠢ ᠲᠡᠷᠡ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠮᠠᠭᠤᠬᠠᠢ ᠳᠦᠷᠢ ᠪᠠᠢᠳᠠᠯ ᠡᠴᠡ ᠪᠠᠨ ᠪᠣᠯᠤᠭᠠᠳ ᠭᠠᠷᠴᠤ ᠢᠷᠡᠳᠡᠭ ᠦᠭᠡᠢ ᠪᠣᠯᠤᠯᠲᠠᠢ᠃
ᠮᠣᠷᠢᠨ ᠲᠡᠷᠭᠡ ᠲᠡᠳᠡᠨ ᠢ᠋ ᠮᠠᠷᠲ᠋ᠢᠨ ᠵᠡᠭᠡᠯᠢ ᠶ᠋ᠢᠨ ᠰᠠᠭᠤᠴᠠᠨ ᠤ᠋ ᠬᠢᠨᠢ ᠡᠭᠦᠳᠡᠨ ᠳ᠋ᠦ᠍ ᠰᠢᠭᠤᠳ ᠠᠪᠴᠢᠷᠠᠪᠠ᠃ ᠲᠡᠷᠡ ᠵᠦᠳᠡᠷᠡᠩᠭᠦᠢ ᠪᠡᠷ ᠭᠡᠷ ᠲᠡᠭᠡᠨ ᠣᠷᠣᠯᠠ᠃ ᠮᠠᠽᠢᠯᠳ᠋ ᠲᠤ᠌ ᠠᠪᠴᠤ ᠬᠡᠯᠡᠪᠡᠯ ᠨᠢᠭᠡ ᠶᠠᠪᠤᠳᠠᠯ ᠢ᠋ ᠳᠠᠭᠤᠰᠬᠠᠭᠰᠠᠨ ᠢ᠋ᠶ᠋ᠠᠷ ᠲᠣᠭᠠᠴᠢᠵᠤ ᠪᠣᠯᠤᠨᠠ᠃ ᠨᠥᠬᠥᠷ ᠨᠢ ᠠᠷᠪᠠᠨ ᠴᠠᠭ ᠲᠤ᠌ ᠶᠠᠮᠤᠨ ᠳ᠋ᠠᠭᠠᠨ ᠣᠴᠢᠬᠤ ᠪᠠᠷ ᠪᠣᠳᠣᠵᠤ ᠪᠠᠢᠪᠠ᠃
ᠲᠡᠷᠡ ᠨᠥᠮᠥᠷᠴᠦ ᠢᠷᠡᠭᠰᠡᠨ ᠬᠤᠪᠴᠠᠰᠤ ᠪᠠᠨ ᠲᠠᠢᠯᠵᠤ᠂ ᠲᠣᠯᠢᠨ ᠤ᠋ ᠡᠮᠦᠨᠡ ᠣᠴᠢᠪᠠ᠃ ᠤᠴᠢᠷ ᠨᠢ ᠡᠨᠡ ᠬᠦ᠌ ᠥᠩᠭᠡ ᠭᠡᠷᠡᠯᠲᠡᠢ ᠵᠢᠮᠰᠡᠭ ᠴᠢᠮᠡᠭ ᠪᠡᠶᠡ ᠳ᠋ᠦ᠍ᠨᠢ ᠪᠠᠢᠭᠰᠠᠭᠠᠷ ᠲᠤᠯᠠ ᠥᠪᠡᠷ ᠢ᠋ ᠪᠡᠨ ᠳᠠᠬᠢᠵᠤ ᠰᠠᠢᠲᠤᠷ ᠨᠠᠷᠢᠪᠴᠢᠯᠠᠬᠤ ᠭᠡᠰᠡᠨ ᠪᠠᠢᠵᠠᠢ᠃ ᠭᠡᠲᠡᠯᠡ ᠲᠡᠷᠡ ᠰᠣᠴᠢᠮᠠᠭ ᠬᠠᠰᠬᠢᠷᠤᠯᠠ᠂ ᠵᠡᠭᠦᠵᠦ ᠶᠠᠪᠤᠭᠰᠠᠨ ᠰᠣᠨᠳᠣᠷ ᠨᠢ ᠠᠯᠠᠭᠠ ᠪᠣᠯᠵᠠᠢ᠃
ᠬᠤᠪᠴᠠᠰᠤ ᠪᠠᠨ ᠪᠠᠷᠤᠭ ᠲᠠᠢᠴᠢᠭᠰᠠᠨ ᠨᠥᠬᠥᠷ ᠨᠢ:
《ᠶᠠᠭᠤ ᠪᠣᠯᠪᠠ?》 ᠭᠡᠵᠦ ᠠᠰᠠᠭᠤᠪᠠ᠃
ᠮᠠᠽᠢᠯᠳ᠋ ᠠᠶᠤᠨ ᠡᠯᠦᠢᠷᠡᠵᠦ ᠲᠡᠭᠦᠨ ᠦ᠌ ᠤᠷᠤᠭᠤ ᠡᠷᠭᠢᠨ ᠬᠠᠷᠠᠭᠠᠳ:
《ᠪᠢ ᠁ ᠪᠢ ᠁ ᠪᠢ ᠹᠯᠧᠰᠵᠧ ᠬᠠᠲᠤᠨ ᠤ᠋ ᠰᠣᠨᠳᠣᠷ ᠢ᠋ ᠭᠡᠭᠡᠵᠡᠢ》 ᠭᠡᠪᠡ᠃
ᠯᠦᠸᠠᠼᠢ ᠤᠬᠠᠭᠠᠨ ᠨᠢ ᠭᠠᠷᠴᠤ᠂ ᠤᠴᠢᠷ ᠢ᠋ᠶ᠋ᠠᠨ ᠣᠯᠬᠤ ᠦᠭᠡᠢ ᠪᠣᠯᠬᠤ ᠳ᠋ᠠᠭᠠᠨ ᠡᠭᠴᠡᠯᠡᠨ ᠵᠣᠭᠰᠣᠭᠠᠳ:
《ᠶᠠᠭᠤ! ᠁ ᠶᠠᠭᠠᠬᠢᠪᠠ! ᠁ ᠡᠢᠮᠦ ᠶᠠᠪᠤᠳᠠᠯ ᠭᠡᠵᠦ ᠬᠠᠮᠢᠭᠠ ᠪᠠᠢᠬᠤ ᠪᠣᠢ!》 ᠭᠡᠪᠡ᠃
ᠲᠡᠷᠡ ᠮᠣᠷᠢᠨ ᠴᠠᠮᠴᠠᠨ ᠤ᠋ ᠨᠤᠭᠤᠯᠤᠭᠠᠰᠤ᠂ ᠳ᠋ᠠᠴᠠᠩ ᠤ᠋ᠨ ᠨᠤᠭᠤᠯᠤᠭᠠᠰᠤ ᠪᠠᠷ ᠡᠷᠢᠵᠦ᠂ ᠪᠦᠬᠦ ᠬᠠᠷᠮᠠᠨ ᠰᠠᠪᠠᠨ ᠳᠣᠲᠣᠭᠤᠷ ᠪᠡᠳᠡᠷᠢᠪᠡ᠃ ᠶᠠᠭ ᠣᠯᠤᠭᠰᠠᠨ ᠦᠭᠡᠢ᠃
《ᠴᠢ ᠦᠳᠡᠰᠢᠯᠡᠭᠡ ᠶ᠋ᠢᠨ ᠭᠠᠵᠠᠷ ᠡᠴᠡ ᠭᠠᠷᠬᠤ ᠦᠶᠡ ᠳ᠋ᠦ᠍ ᠪᠠᠢᠭᠰᠠᠨ ᠢ᠋ ᠨᠢ ᠯᠠᠪ ᠮᠡᠳᠡᠵᠦ ᠪᠠᠢᠨᠠ ᠤᠤ?》 ᠭᠡᠵᠦ ᠨᠥᠬᠥᠷ ᠨᠢ ᠠᠰᠠᠭᠤᠪᠠ᠃
《ᠮᠡᠳᠡᠵᠦ ᠪᠠᠢᠨᠠ᠃ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠶᠠᠮᠤᠨ ᠤ᠋ ᠭᠤᠲᠤᠮ ᠳ᠋ᠤ᠌ ᠶᠠᠪᠤᠵᠤ ᠪᠠᠢᠬᠤ ᠳ᠋ᠠᠭᠠᠨ ᠪᠢ ᠲᠡᠭᠦᠨ ᠢ᠋ ᠲᠡᠮᠲᠡᠷᠢᠵᠦ ᠦᠵᠡᠭᠰᠡᠨ ᠶᠦᠮ᠃ 》
《ᠭᠡᠲᠡᠯᠡ᠂ ᠬᠡᠷᠪᠡ ᠭᠤᠳᠤᠮᠵᠢᠨ ᠳ᠋ᠤ᠌ ᠭᠡᠭᠡᠭᠰᠡᠨ ᠪᠣᠯ ᠪᠢᠳᠡ ᠯᠠᠪ ᠴᠢᠮᠡᠭᠡ ᠶ᠋ᠢ ᠨᠢ ᠰᠣᠨᠣᠰᠬᠤ ᠪᠠᠢᠭᠰᠠᠨ᠃ ᠲᠡᠷᠭᠡᠨ ᠳᠣᠲᠣᠷᠠ ᠯᠠ ᠭᠡᠭᠡᠴᠢᠬᠡᠵᠡᠢ ᠳᠡ᠃ 》
《ᠲᠡᠢᠮᠦ᠂ ᠪᠠᠷᠤᠭ ᠯᠠ ᠲᠠᠭᠠᠷᠠᠨᠠ᠃ ᠴᠢ ᠲᠡᠷᠭᠡᠨ ᠦ᠌ ᠨᠣᠮᠧᠷ ᠢ᠋ ᠴᠡᠭᠡᠵᠢᠯᠡᠭᠰᠡᠨ ᠦᠦ?》
《ᠴᠡᠭᠡᠵᠢᠯᠡᠭᠰᠡᠨ ᠦᠭᠡᠢ᠃ ᠴᠢ᠂ ᠴᠢ ᠠᠩᠬᠠᠷᠤᠭᠰᠠᠨ ᠦᠭᠡᠢ ᠦᠦ?》
《ᠦᠭᠡᠢ᠃ 》
ᠲᠡᠳᠡᠨ ᠤᠬᠠᠭᠠ ᠭᠠᠷᠲᠠᠯᠠ ᠰᠠᠨᠳᠤᠷᠬᠤ ᠳ᠋ᠠᠭᠠᠨ ᠪᠡᠶᠡ ᠪᠡᠨ ᠬᠠᠷᠠᠭᠠᠳ ᠭᠥᠯᠢᠷᠡᠯᠡ᠂ ᠲᠡᠭᠡᠵᠦ ᠲᠡᠭᠡᠵᠦ ᠯᠦᠸᠠᠼᠢ ᠳᠠᠬᠢᠨ ᠬᠤᠪᠴᠠᠯᠠᠪᠠ᠃
《ᠪᠢ ᠶᠠᠪᠤᠶᠠ》 ᠭᠡᠳ ᠲᠡᠷᠡ: 《ᠶᠠᠪᠤᠭᠰᠠᠨ ᠵᠠᠮ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠠᠬᠢᠨ ᠨᠢᠭᠡ ᠤᠳᠠᠭᠠ ᠶᠠᠪᠤᠵᠤ ᠦᠵᠡᠶᠡ᠂ ᠣᠯᠴᠢᠬᠠᠬᠤ ᠮᠠᠭᠠᠳ ᠦᠭᠡᠢ》 ᠭᠡᠪᠡ᠃
ᠲᠡᠷᠡ ᠭᠠᠷᠤᠭᠠᠳ ᠶᠠᠪᠤᠯᠠ᠃ ᠮᠠᠽᠢᠯᠳ᠋ ᠦᠳᠡᠰᠢᠯᠡᠭᠡ ᠳ᠋ᠦ᠍ ᠡᠮᠦᠰᠦᠭᠰᠡᠨ ᠬᠤᠪᠴᠠᠰᠤ ᠪᠠᠷ ᠢ᠋ᠶ᠋ᠠᠨ ᠪᠠᠢᠬᠤ ᠪᠥᠭᠡᠳ ᠣᠷᠣᠨ ᠳᠡᠭᠡᠷᠡ ᠪᠡᠨ ᠭᠠᠷᠴᠤ ᠤᠨᠲᠠᠬᠤ ᠶ᠋ᠢᠨ ᠴᠦ᠍ ᠴᠢᠳᠠᠯ ᠦᠭᠡᠢ ᠪᠣᠯᠵᠠᠢ᠃ ᠵᠣᠷᠢᠭ ᠢ᠋ᠶ᠋ᠠᠨ ᠣᠭᠲᠣᠬᠠᠨ ᠴᠤ᠌ ᠰᠡᠷᠭᠦᠭᠡᠵᠦ ᠴᠢᠳᠠᠬᠤ ᠦᠭᠡᠢ ᠲᠤᠯᠠ ᠶᠠᠭᠤ ᠶ᠋ᠢ ᠴᠦ᠍ ᠰᠠᠨᠠᠵᠤ ᠪᠣᠳᠣᠬᠤ ᠦᠭᠡᠢ ᠪᠡᠷ ᠨᠢᠭᠡ ᠰᠠᠨᠳᠠᠯᠢ ᠳᠡᠭᠡᠷᠡ ᠳᠡᠮᠡᠢᠯᠡ ᠮᠡᠯᠡᠷᠡᠨ ᠰᠠᠭᠤᠨᠠ᠃
ᠳᠣᠯᠣᠭᠠᠨ ᠴᠠᠭ ᠤ᠋ᠨ ᠪᠠᠷᠤᠭ ᠢ᠋ᠶ᠋ᠠᠷ ᠨᠥᠬᠥᠷ ᠨᠢ ᠬᠠᠷᠢᠵᠤ ᠢᠷᠡᠯᠡ᠃ ᠶᠠᠭᠤ ᠴᠤ᠌ ᠣᠯᠤᠭᠰᠠᠨ ᠦᠭᠡᠢ᠃
ᠪᠦᠷ ᠰᠡᠭᠦᠯ ᠳ᠋ᠡᠭᠡᠨ ᠯᠦᠸᠠᠼᠢ ᠴᠠᠭᠳᠠᠭᠠ ᠶ᠋ᠢᠨ ᠲᠢᠩᠬᠢᠮ ᠳ᠋ᠦ᠍ ᠣᠴᠢᠪᠠ᠃ ᠡᠯᠡ ᠰᠣᠨᠢᠨ ᠤ᠋ ᠭᠠᠵᠠᠷ ᠢ᠋ᠶ᠋ᠠᠷ ᠣᠴᠢᠪᠠ᠃ ᠱᠠᠩ ᠵᠠᠷᠯᠠᠨ ᠡᠷᠢᠭᠦᠯᠪᠡ᠃ ᠠᠯᠢᠪᠠ ᠪᠦᠬᠦᠢ ᠲᠡᠷᠭᠡᠨ ᠦ᠌ ᠭᠠᠵᠠᠷ ᠢ᠋ᠶ᠋ᠠᠷ ᠴᠤ᠌ ᠣᠴᠢᠵᠤ ᠡᠷᠢᠪᠡ᠃ ᠶᠡᠷᠦ ᠡᠴᠡ ᠥᠴᠦᠬᠡᠨ ᠴᠦ᠍ ᠭᠡᠰᠡᠨ ᠭᠣᠷᠢᠳᠠᠯᠭᠠ ᠪᠠᠢᠬᠤ ᠯᠠ ᠭᠠᠵᠠᠷ ᠪᠦᠬᠦᠨ ᠳ᠋ᠦ᠍ ᠲᠡᠷᠡ ᠪᠦᠷ ᠣᠴᠢᠵᠠᠢ᠃
ᠮᠠᠽᠢᠯᠳ᠋ ᠡᠢᠮᠦ ᠵᠣᠯ ᠦᠭᠡᠢ ᠭᠠᠮᠰᠢᠭ ᠲᠣᠳᠬᠠᠷ ᠲᠤ᠌ ᠲᠤᠯᠭᠠᠷᠠᠭᠠᠳ᠂ ᠡᠳᠦᠷᠵᠢᠨ ᠬᠦᠯᠢᠶᠡᠨ ᠰᠠᠭᠤᠵᠤ᠂ ᠡᠳᠦᠷᠵᠢᠨ ᠰᠣᠴᠢᠨ ᠲᠡᠪᠡᠳᠡᠭᠰᠡᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠥᠩᠭᠡᠷᠡᠨᠡ᠃ ᠣᠷᠣᠢ ᠨᠢ ᠯᠦᠸᠠᠼᠢ ᠵᠢᠪᠡᠬᠡᠢ ᠴᠠᠭᠠᠨ ᠴᠢᠷᠠᠢᠯᠠᠭᠠᠳ ᠬᠠᠷᠢᠵᠤ ᠢᠷᠡᠯᠡ᠂ ᠶᠠᠭᠤ ᠴᠤ᠌ ᠣᠯᠤᠭᠰᠠᠨ ᠦᠭᠡᠢ᠃
《ᠨᠠᠢᠵᠠ ᠳ᠋ᠠᠭᠠᠨ ᠵᠠᠬᠢᠳᠠᠯ ᠥᠭᠭᠦᠭᠰᠡᠨ ᠳᠡᠭᠡᠷᠡ》 ᠭᠡᠵᠦ ᠲᠡᠷᠡ ᠬᠡᠯᠡᠭᠡᠳ 《ᠰᠣᠨᠳᠣᠷ ᠤ᠋ᠨ ᠲᠣᠯᠣᠭᠠᠢ ᠨᠢ ᠡᠪᠳᠡᠷᠡᠭᠡᠳ ᠵᠠᠰᠠᠭᠤᠯᠵᠤ ᠪᠠᠢᠨᠠ ᠭᠡᠵᠦ ᠬᠡᠯᠡ᠃ ᠢᠩᠭᠢᠪᠡᠯ ᠪᠢᠳᠡ ᠠᠷᠭᠠ ᠡᠷᠢᠬᠦ ᠴᠠᠭ ᠲᠠᠢ ᠪᠣᠯᠤᠨᠠ》 ᠭᠡᠪᠡ᠃
ᠮᠠᠽᠢᠯᠳ᠋ ᠲᠡᠭᠦᠨ ᠦ᠌ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠵᠠᠬᠢᠳᠠᠯ ᠶᠠᠪᠤᠭᠤᠯᠵᠠᠢ᠃
ᠨᠢᠭᠡ ᠭᠠᠷᠠᠭ ᠥᠩᠭᠡᠷᠡᠭᠡᠳ ᠲᠡᠳᠡᠨ ᠦ᠌ ᠠᠯᠢᠪᠠ ᠭᠣᠷᠢᠳᠠᠯᠭᠠ ᠴᠥᠮ ᠲᠠᠰᠤᠷᠠᠪᠠ᠃
ᠯᠦᠸᠠᠼᠢ ᠲᠠᠪᠤᠨ ᠨᠠᠰᠤ ᠨᠡᠮᠡᠭᠳᠡᠨ ᠬᠥᠭᠰᠢᠷᠡᠭᠰᠡᠨ ᠰᠢᠭ ᠪᠣᠯᠵᠠᠢ᠃ ᠲᠡᠷᠡ:
《ᠠᠷᠭᠠ ᠵᠦᠢ ᠡᠷᠢᠵᠦ ᠡᠨᠡ ᠵᠢᠮᠰᠡᠭ ᠢ᠋ ᠲᠥᠯᠥᠶᠡ》 ᠭᠡᠵᠦ ᠰᠢᠢᠳᠦᠨ ᠬᠡᠯᠡᠪᠡ᠃
ᠳᠠᠷᠠᠭᠠ ᠡᠳᠦᠷ ᠨᠢ᠂ ᠲᠡᠷᠡ ᠰᠣᠨᠳᠣᠷ ᠢ᠋ ᠠᠭᠤᠯᠵᠤ ᠪᠠᠢᠭᠰᠠᠨ ᠬᠠᠢᠷᠴᠠᠭ ᠢ᠋ᠶ᠋ᠠᠨ ᠠᠪᠤᠭᠠᠳ ᠬᠠᠢᠷᠴᠠᠭ ᠳᠡᠭᠡᠷᠡᠬᠢ ᠫᠠᠢᠵᠠ ᠲᠡᠮᠳᠡᠭ ᠦ᠋ᠨ ᠪᠢᠴᠢᠭᠡᠰᠦ ᠶᠣᠰᠣᠭᠠᠷ ᠲᠡᠷᠡ ᠬᠦ᠌ ᠱ᠌ᠢᠷᠦ ᠰᠤᠪᠤᠳ ᠤ᠋ᠨ ᠫᠦᠰᠡᠨ ᠳ᠋ᠦ᠍ ᠣᠴᠢᠪᠠ᠃ ᠳᠠᠩᠵᠢᠶᠠᠳ ᠵᠥᠩᠳᠡᠭᠡᠨ ᠣᠯᠠᠨ ᠳᠠᠩᠰᠠ ᠬᠠᠷᠠ ᠤᠷᠪᠠᠭᠤᠯᠵᠤ ᠦᠵᠡᠭᠡᠳ:
《ᠬᠠᠲᠤᠭᠲᠠᠢ᠂ ᠡᠨᠡ ᠰᠣᠨᠳᠣᠷ ᠢ᠋ ᠪᠢ ᠬᠤᠳᠠᠯᠳᠤᠭᠰᠠᠨ ᠦᠭᠡᠢ᠃ ᠬᠠᠢᠷᠴᠠᠭ ᠢ᠋ ᠨᠢ ᠯᠡ ᠬᠤᠳᠠᠯᠳᠤᠭᠰᠠᠨ》 ᠭᠡᠪᠡ᠃
ᠲᠡᠭᠡᠭᠡᠳ ᠲᠡᠳᠡ ᠱ᠌ᠢᠷᠦ ᠰᠤᠪᠤᠳ ᠤ᠋ᠨ ᠡᠨᠡ ᠫᠦᠰᠡᠨ ᠡᠴᠡ ᠲᠡᠷᠡ ᠫᠦᠰᠡᠨ ᠳ᠋ᠦ᠍ ᠣᠴᠢᠵᠤ᠂ ᠴᠡᠭᠡᠵᠢᠯᠡᠵᠦ ᠪᠠᠢᠭᠠ ᠬᠡᠮᠵᠢᠶᠡ ᠪᠡᠷ ᠢ᠋ᠶ᠋ᠡᠨ ᠠᠳᠠᠯᠢ ᠱᠤᠤᠬᠠᠨ ᠰᠣᠨᠳᠣᠷ ᠢ᠋ ᠪᠡᠳᠡᠷᠢᠪᠡ᠃ ᠬᠣᠶᠠᠭᠤᠯᠠ ᠪᠠᠨ ᠶᠠᠳᠠᠷᠠᠬᠤ ᠶ᠋ᠢᠨ ᠶᠡᠬᠡ ᠪᠡᠷ ᠶᠠᠳᠠᠷᠠᠵᠤ᠂ ᠴᠤᠴᠠᠬᠤ ᠶ᠋ᠢᠨ ᠶᠡᠬᠡ ᠪᠡᠷ ᠴᠤᠴᠠᠵᠤ ᠡᠪᠡᠳᠴᠢᠯᠡᠨ ᠬᠡᠪᠲᠡᠬᠦ ᠳ᠋ᠦ᠍ ᠣᠢᠷᠠᠳᠴᠠᠢ᠃
ᠬᠠᠭᠠᠨ ᠤ᠋ ᠣᠷᠳᠣᠨ ᠤ᠋ ᠭᠤᠳᠤᠮᠵᠢᠨ ᠤ᠋ ᠨᠢᠭᠡ ᠫᠦᠰᠡᠨ ᠳ᠋ᠦ᠍ ᠲᠡᠳᠡᠨ ᠦ᠌ ᠪᠡᠳᠡᠷᠢᠵᠦ ᠪᠠᠢᠭᠰᠠᠨ ᠲᠠᠢ ᠨᠢ ᠶᠠᠭ ᠠᠳᠠᠯᠢ ᠠᠯᠮᠠᠰ ᠡᠷᠳᠡᠨᠢ ᠶ᠋ᠢᠨ ᠰᠣᠨᠳᠣᠷ ᠲᠡᠳᠡᠨ ᠳ᠋ᠦ᠍ ᠳᠠᠭᠠᠷᠢᠯᠳᠤᠯᠠ᠃ ᠦᠨᠡ ᠨᠢ ᠳᠥᠷᠪᠡᠨ ᠲᠦᠮᠡᠨ ᠹᠷᠠᠩᠺ ᠪᠠᠢᠪᠠ᠃ ᠳᠠᠩᠵᠢᠶᠠᠳ ᠦᠨᠡ ᠪᠡᠨ ᠪᠠᠭᠤᠷᠠᠭᠤᠯᠤᠭᠠᠳ ᠭᠤᠷᠪᠠᠨ ᠲᠦᠮᠡ ᠵᠢᠷᠭᠤᠭᠠᠨ ᠮᠢᠩᠭᠠ ᠪᠣᠯᠭᠠᠪᠠ᠃
ᠲᠡᠳᠡ ᠳᠠᠩᠵᠢᠶᠠᠳ ᠲᠤ᠌ ᠭᠤᠷᠪᠠᠨ ᠡᠳᠦᠷ ᠦ᠋ᠨ ᠳᠣᠲᠣᠷᠠ ᠪᠤᠤ ᠬᠤᠳᠠᠯᠳᠤᠭᠠᠷᠠᠢ ᠭᠡᠵᠦ ᠭᠤᠶᠤᠵᠠᠢ᠃ ᠬᠡᠷᠪᠡ ᠬᠣᠶᠠᠳᠤᠭᠠᠷ ᠰᠠᠷᠠ ᠶ᠋ᠢᠨ ᠰᠡᠭᠦᠯᠴᠢ ᠡᠴᠡ ᠡᠮᠦᠨᠡ ᠤᠭ ᠤ᠋ᠨ ᠰᠣᠨᠳᠣᠷ ᠢ᠋ᠶ᠋ᠠᠨ ᠣᠯᠪᠠᠯ ᠳᠠᠩᠵᠢᠶᠠᠳ ᠡᠨᠡ ᠰᠣᠨᠳᠣᠷ ᠢ᠋ᠶ᠋ᠠᠨ ᠭᠤᠷᠪᠠᠨ ᠲᠦᠮᠡ ᠳᠥᠷᠪᠡᠨ ᠮᠢᠩᠭᠠ ᠪᠠᠷ ᠪᠤᠴᠠᠭᠠᠨ ᠠᠪᠤᠨᠠ ᠭᠡᠵᠦ ᠲᠡᠳᠡ ᠭᠡᠷᠡ ᠬᠢᠵᠡᠢ᠃ ᠯᠦᠸᠠᠼᠢ ᠳ᠋ᠤ᠌ ᠡᠴᠢᠭᠡ ᠨᠢ ᠦᠯᠡᠳᠡᠭᠡᠵᠦ ᠥᠭᠭᠦᠭᠰᠡᠨ ᠨᠢᠭᠡ ᠲᠦᠮᠡ ᠨᠠᠢ᠍ᠮᠠᠨ ᠮᠢᠩᠭᠠᠨ ᠹᠷᠠᠩᠺ ᠪᠡᠯᠡᠨ ᠪᠠᠢᠪᠠ᠃ ᠥᠭᠡᠷᠡ ᠶ᠋ᠢ ᠨᠢ ᠪᠤᠰᠤᠳ ᠡᠴᠡ ᠵᠢᠭᠡᠯᠡᠬᠦ ᠳ᠋ᠦ᠍ ᠬᠦᠷᠴᠡᠢ᠃
ᠲᠡᠷᠡ ᠵᠣᠭᠣᠰ ᠵᠢᠭᠡᠯᠡᠵᠦ ᠭᠠᠷᠤᠯᠠ᠃ ᠡᠭᠦᠨ ᠡᠴᠡ ᠨᠢᠭᠡ ᠮᠢᠩᠭᠠᠨ ᠹᠷᠠᠩᠺ᠂ ᠲᠡᠭᠦᠨ ᠡᠴᠡ ᠲᠠᠪᠤᠨ ᠵᠠᠭᠤᠨ ᠹᠷᠠᠩᠺ᠂ ᠡᠨᠳᠡ ᠡᠴᠡ ᠲᠠᠪᠤᠨ ᠯᠤᠢᠵᠢ᠂ ᠲᠡᠨᠳᠡ ᠡᠴᠡ ᠭᠤᠷᠪᠠᠨ ᠯᠤᠢᠵᠢ ᠵᠢᠭᠡᠯᠡᠨᠡ᠃ ᠥᠷᠢ ᠶ᠋ᠢᠨ ᠪᠠᠷᠢᠮᠲᠠ ᠳ᠋ᠤ᠌ ᠭᠠᠷ ᠤ᠋ᠨ ᠦᠰᠦᠭ ᠵᠥᠩᠳᠡᠭᠡᠨ ᠵᠢᠷᠤᠵᠤ᠂ ᠬᠥᠷᠥᠩᠭᠡ ᠪᠡᠨ ᠬᠥᠨᠲᠡᠷᠬᠦ ᠭᠡᠷᠡ ᠪᠣᠯᠵᠣᠭᠠ ᠠᠯᠢ ᠣᠯᠠᠨ ᠲᠣᠭᠲᠠᠪᠠ᠃ ᠲᠡᠷᠡ ᠥᠨᠳᠥᠷ ᠬᠦᠦ ᠲᠡᠢ ᠵᠢᠭᠡᠯᠡᠯᠭᠡ ᠲᠠᠯᠪᠢᠭᠴᠢ ᠪᠠ ᠡᠨᠳᠡ ᠲᠡᠨᠳᠡᠬᠢ ᠠᠳᠠᠯᠢ ᠪᠤᠰᠤ ᠤᠯᠤᠰ ᠤ᠋ᠨ ᠬᠠᠷᠢᠶᠠᠲᠤ ᠵᠢᠭᠡᠯᠡᠯᠭᠡ ᠲᠠᠯᠪᠢᠭᠴᠢ ᠲᠤᠩ ᠣᠯᠠᠨ ᠬᠥᠮᠦᠰ ᠲᠡᠢ ᠶᠠᠪᠤᠯᠴᠠᠯᠠ᠃ ᠲᠡᠷᠡ ᠰᠡᠭᠦᠯ ᠦ᠋ᠨ ᠬᠠᠭᠠᠰ ᠨᠠᠰᠤᠨ ᠤ᠋ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠴᠤ᠌ ᠪᠣᠳᠣᠬᠤ ᠴᠢᠯᠥᠭᠡ ᠦᠭᠡᠢ ᠪᠡᠷ ᠬᠦᠷᠦᠭᠰᠡᠨ ᠭᠠᠵᠠᠷ ᠪᠦᠬᠦᠨ ᠭᠠᠷ ᠤ᠋ᠨ ᠦᠰᠦᠭ ᠢ᠋ᠶ᠋ᠡᠨ ᠠᠶᠤᠯᠲᠠᠢ ᠪᠠᠷ ᠵᠢᠷᠤᠬᠤ ᠪᠣᠯᠪᠠᠴᠤ ᠢᠲᠡᠭᠡᠯ ᠢ᠋ᠶ᠋ᠡᠨ ᠬᠠᠳᠠᠭᠠᠯᠠᠵᠤ ᠴᠢᠳᠠᠬᠤ ᠡᠰᠡᠬᠦ ᠪᠡᠨ ᠴᠦ᠍ ᠦᠯᠦ ᠮᠡᠳᠡᠨᠡ᠃ ᠢᠷᠡᠭᠡᠳᠦᠢ ᠶ᠋ᠢᠨ ᠭᠡᠮᠰᠢᠯ᠂ ᠪᠦᠬᠦ ᠪᠡᠶᠡ ᠶ᠋ᠢ ᠨᠢ ᠣᠷᠢᠶᠠᠨ ᠠᠪᠬᠤ ᠭᠡᠵᠦ ᠪᠠᠢᠭᠠ ᠬᠡᠷᠴᠡᠭᠡᠢ ᠰᠢᠷᠦᠭᠦᠨ ᠶᠠᠳᠠᠭᠤᠷᠠᠯ᠂ ᠪᠡᠶᠡ ᠮᠠᠬᠠᠪᠣᠳ ᠤ᠋ᠨ ᠡᠪᠡᠷᠰᠢᠶᠡᠯ᠂ ᠣᠶᠤᠨ ᠤᠬᠠᠭᠠᠨ ᠤ᠋ ᠭᠠᠰᠠᠯᠠᠩ ᠡᠨᠡ ᠪᠦᠬᠦ ᠰᠦᠷᠳᠡᠭᠦᠯᠦᠯ ᠦ᠋ᠨ ᠳᠣᠣᠷᠠ ᠯᠦᠸᠠᠼᠢ᠂ ᠬᠤᠳᠠᠯᠳᠤᠭᠠᠨ ᠤ᠋ ᠯᠠᠩᠭᠦᠢ ᠳᠡᠭᠡᠷᠡ ᠭᠤᠷᠪᠠᠨ ᠲᠦᠮᠡ ᠵᠢᠷᠭᠤᠭᠠᠨ ᠮᠢᠩᠭᠠᠨ ᠹᠷᠠᠩᠺ ᠲᠠᠯᠪᠢᠭᠠᠳ ᠲᠡᠷᠡ ᠬᠦ᠌ ᠰᠢᠨᠡ ᠰᠣᠨᠳᠣᠷ ᠢ᠋ ᠠᠪᠤᠯᠠ᠃
ᠮᠠᠽᠢᠯᠳ᠋ ᠬᠠᠲᠤᠨ ᠰᠣᠨᠳᠣᠷ ᠢ᠋ ᠬᠦᠷᠭᠡᠵᠦ ᠣᠴᠢᠬᠤ ᠳ᠋ᠤᠨᠢ ᠹᠯᠧᠰᠵᠧ ᠬᠠᠲᠤᠨ ᠦᠯᠦ ᠲᠠᠭᠠᠰᠢᠶᠠᠭᠰᠠᠨ ᠪᠠᠢᠳᠠᠯ ᠲᠠᠢ ᠪᠠᠷ:
《ᠡᠷᠲᠡᠬᠡᠨ ᠠᠪᠴᠢᠷᠠᠵᠤ ᠥᠭᠭᠦᠭᠰᠡᠨ ᠪᠣᠯ ᠲᠠᠭᠠᠷᠠᠬᠤ ᠶᠤᠮ᠃ ᠪᠢ ᠬᠡᠷᠡᠭᠯᠡᠮᠡᠷ ᠶᠦᠮᠰᠡᠨ》 ᠭᠡᠵᠡᠢ᠃
ᠹᠯᠧᠰᠵᠧ ᠬᠠᠲᠤᠨ ᠬᠠᠢᠷᠴᠠᠭ ᠢ᠋ ᠨᠡᠭᠡᠭᠡᠭᠰᠡᠨ ᠦᠭᠡᠢ᠂ ᠬᠡᠷᠪᠡ ᠣᠷᠣᠯᠠᠭᠤᠯᠤᠭᠰᠠᠨ ᠡᠳ᠋ ᠪᠠᠢᠬᠤ ᠶ᠋ᠢ ᠮᠡᠳᠡᠪᠡᠯ᠂ ᠲᠡᠷᠡ ᠶᠠᠭᠤ ᠰᠠᠨᠠᠬᠤ ᠪᠣᠯ? ᠶᠠᠭᠤ ᠭᠡᠬᠦ ᠪᠣᠯ? ᠡᠨᠡ ᠨᠠᠢᠵᠠ ᠶ᠋ᠢ ᠪᠡᠨ ᠬᠤᠯᠠᠭᠠᠢᠴᠢ ᠭᠡᠵᠦ ᠪᠣᠳᠣᠬᠤ ᠦᠭᠡᠢ ᠪᠠᠢᠬᠠ ᠳᠠ ? ᠭᠡᠵᠦ ᠬᠠᠢᠷᠴᠠᠭ ᠢ᠋ ᠨᠡᠭᠡᠭᠡᠬᠦ ᠡᠴᠡ ᠨᠠᠢᠵᠠ ᠨᠢ ᠵᠣᠪᠠᠵᠤ ᠪᠠᠢᠯᠠ᠃
ᠮᠠᠽᠢᠯᠳ᠋ ᠬᠠᠲᠤᠨ ᠦᠭᠡᠭᠦᠦ ᠬᠥᠮᠦᠨ ᠦ᠌ ᠬᠦᠴᠢᠷ ᠪᠡᠷᠬᠡᠰᠢᠶᠡᠯᠲᠦ ᠠᠮᠢᠳᠤᠷᠠᠯ ᠢ᠋ ᠮᠡᠳᠡᠵᠦ ᠢᠷᠡᠯᠡ᠃ ᠲᠡᠭᠡᠭᠡᠳ ᠡᠷᠡᠮᠡᠬᠡᠢ ᠵᠣᠷᠢᠭ ᠢᠯᠡᠷᠡᠭᠦᠯᠵᠦ ᠡᠷᠡᠰ ᠰᠢᠭᠤᠷᠬᠠᠢ ᠰᠠᠨᠠᠭᠠ ᠲᠣᠭᠲᠠᠨ ᠡᠨᠡ ᠬᠦ᠌ ᠠᠶᠤᠮᠰᠢᠭᠲᠤ ᠥᠷᠢ ᠶ᠋ᠢ ᠲᠥᠯᠥᠬᠦ ᠪᠣᠯᠵᠠᠢ᠃ ᠠᠷᠭᠠ ᠰᠠᠮᠪᠠᠭᠠ ᠭᠠᠷᠭᠠᠨ ᠲᠥᠯᠥᠵᠦ ᠡᠬᠢᠯᠡᠪᠡ᠃ ᠰᠢᠪᠡᠭᠴᠢᠨ ᠢ᠋ᠶ᠋ᠡᠨ ᠶᠠᠪᠤᠭᠤᠯᠤᠭᠠᠳ᠂ ᠣᠷᠣᠨ ᠰᠠᠭᠤᠴᠠ ᠰᠢᠯᠵᠢᠭᠦᠯᠵᠦ ᠪᠢᠴᠢᠬᠠᠨ ᠰᠠᠷᠠᠪᠴᠢᠨ ᠤ᠋ ᠠᠰᠠᠷ ᠢ᠋ ᠬᠥᠯᠥᠰᠥᠯᠡᠨ ᠰᠠᠭᠤᠪᠠ᠃
ᠮᠠᠽᠢᠯᠳ᠋ ᠭᠡᠷ ᠦ᠋ᠨ ᠳᠣᠲᠣᠷᠠᠬᠢ ᠠᠯᠢᠪᠠ ᠪᠣᠷᠣ ᠪᠦᠳᠦᠭᠦᠨ ᠠᠵᠢᠯ ᠪᠠ ᠲᠣᠭᠣᠭᠠᠨ ᠭᠡᠷ ᠦ᠋ᠨ ᠶᠠᠷᠰᠢᠭ ᠲᠠᠢ ᠠᠷᠰᠠᠷ ᠠᠵᠢᠯ ᠢ᠋ ᠮᠡᠳᠡᠵᠦ ᠠᠪᠤᠯᠠ᠃ ᠠᠶᠠᠭᠠ ᠰᠢᠨᠠᠭᠠ᠂ ᠫᠢᠯᠠ ᠲᠠᠪᠠᠭ ᠤᠭᠠᠭᠰᠠᠭᠠᠷ ᠲᠣᠰᠣ ᠪᠣᠯᠤᠭᠰᠠᠨ ᠫᠧᠩᠰᠡᠨ ᠦ᠌ ᠠᠮᠠᠰᠠᠷ᠂ ᠲᠣᠭᠣᠭᠠᠨ ᠤ᠋ ᠢᠷᠣᠭᠠᠷ ᠲᠤ᠌ ᠦᠷᠦᠭᠳᠡᠵᠦ ᠲᠡᠭᠦᠨ ᠦ᠌ ᠪᠤᠯᠪᠠᠷᠠᠢ ᠴᠠᠭᠠᠨ ᠭᠠᠷ ᠪᠦᠳᠦᠭᠦᠨ ᠬᠦᠳᠡᠷ ᠪᠣᠯᠤᠯᠠ᠃ ᠬᠤᠵᠢᠷ ᠢ᠋ᠶ᠋ᠠᠷ ᠬᠠᠨᠲᠠᠭᠠᠵᠠ ᠤᠭᠠᠵᠤ᠂ ᠵᠦᠯᠭᠦᠭᠦᠷ ᠤᠭᠠᠵᠤ᠂ ᠣᠯᠣᠰᠣᠨ ᠳᠡᠭᠡᠰᠦᠨ ᠳᠡᠭᠡᠷᠡ ᠳᠡᠯᠭᠡᠨ ᠬᠠᠲᠠᠭᠠᠨᠠ᠃ ᠥᠷᠯᠥᠭᠡ ᠪᠦᠷᠢ ᠬᠣᠭ ᠨᠣᠪᠰᠢ ᠪᠠᠨ ᠠᠰᠠᠷ ᠤ᠋ᠨ ᠭᠤᠳᠤᠮᠵᠢᠨ ᠳ᠋ᠤ᠌ ᠠᠪᠠᠴᠢᠵᠤ᠂ ᠠᠰᠠᠷ ᠤ᠋ᠨ ᠳᠣᠣᠷᠠ ᠡᠴᠡ ᠤᠰᠤ ᠠᠪᠴᠤ ᠠᠰᠠᠷ ᠳᠡᠭᠡᠷᠡ ᠭᠠᠷᠭᠠᠨᠠ᠂ ᠢᠩᠭᠢᠵᠦ ᠠᠰᠠᠷ ᠢ᠋ ᠳᠡᠭᠡᠭᠰᠢ ᠳᠣᠭᠣᠭᠰᠢ ᠰᠢᠪᠲᠤ ᠶᠠᠪᠤᠬᠤ ᠳ᠋ᠠᠭᠠᠨ ᠬᠠᠶᠠ ᠵᠣᠭᠰᠣᠵᠤ ᠠᠮᠢᠰᠬᠤᠭᠠ ᠠᠪᠤᠨᠠ᠃ ᠲᠡᠷᠡ ᠶᠠᠳᠠᠭᠤ ᠵᠦᠳᠡᠭᠦᠦ ᠡᠮᠡᠭᠲᠡᠢ ᠲᠡᠢ ᠠᠳᠠᠯᠢ ᠬᠤᠪᠴᠠᠯᠠᠵᠤ᠂ ᠰᠠᠭᠰᠤ ᠲᠣᠬᠣᠢᠯᠠᠨ ᠵᠢᠮᠢᠰ ᠦ᠋ᠨ ᠫᠦᠰᠡ᠂ ᠠᠬᠠᠷ ᠰᠠᠬᠠᠷ ᠬᠡᠷᠡᠭᠯᠡᠬᠦᠨ ᠦ᠌ ᠳᠡᠯᠭᠡᠭᠦᠷ᠂ ᠮᠢᠬᠠᠨ ᠤ᠋ ᠬᠤᠳᠠᠯᠳᠤᠭᠠ ᠪᠠᠷ ᠶᠠᠪᠤᠵᠤ ᠦᠨᠡ ᠪᠤᠯᠢᠶᠠᠯᠳᠤᠨ ᠡᠯᠡᠭᠯᠡᠯ ᠬᠠᠷᠢᠶᠠᠯ ᠬᠦᠯᠢᠶᠡᠵᠦ᠂ ᠲᠡᠷᠡ ᠬᠦ᠌ ᠬᠣᠮᠰᠠ ᠮᠥᠩᠭᠥ ᠪᠡᠨ ᠨᠢᠭᠡ ᠮᠥᠩᠭᠥ ᠨᠢᠭᠡ ᠮᠥᠩᠭᠥ ᠪᠡᠷ ᠠᠷᠪᠢᠯᠠᠨᠠ᠃
ᠰᠠᠷᠠ ᠪᠦᠷᠢ ᠬᠠᠭᠤᠴᠢᠨ ᠥᠷᠢ ᠶ᠋ᠢᠨ ᠢ᠋ᠶ᠋ᠡᠨ ᠨᠢᠭᠡ ᠬᠡᠰᠡᠭ ᠢ᠋ ᠲᠥᠯᠥᠵᠦ᠂ ᠨᠢᠭᠡ ᠪᠠᠭᠠ ᠰᠢᠨᠡ ᠥᠷᠢ ᠲᠠᠯᠪᠢᠨᠠ᠂ ᠢᠩᠭᠢᠵᠦ ᠲᠥᠯᠥᠬᠦ ᠬᠤᠭᠤᠴᠠᠭᠠ ᠪᠠᠨ ᠤᠷᠲᠤᠳᠬᠠᠨᠠ᠃
ᠨᠥᠬᠥᠷ ᠨᠢ ᠣᠷᠣᠢ ᠪᠣᠯᠭᠠᠨ ᠠᠷᠠᠯᠵᠢᠶᠠᠴᠢᠨ ᠤ᠋ ᠳᠠᠩᠰᠠ ᠬᠠᠷᠠ ᠶ᠋ᠢ ᠬᠠᠭᠤᠯᠤᠨᠠ᠃ ᠦᠷᠭᠦᠯᠵᠢ ᠰᠥᠨᠢ ᠳᠦᠯᠢ ᠪᠣᠯᠲᠠᠯᠠ ᠨᠢᠭᠡ ᠨᠢᠭᠤᠷ ᠲᠠᠭᠠᠨ ᠲᠠᠪᠤᠨ ᠮᠥᠩᠭᠥᠨ ᠦ᠌ ᠬᠥᠯᠥᠰᠥ ᠲᠡᠢ ᠡᠬᠡ ᠨᠣᠣᠷᠠᠭ ᠢ᠋ ᠰᠡᠢᠷᠡᠭᠦᠯᠦᠨ ᠪᠢᠴᠢᠨᠡ᠃
ᠡᠢᠮᠦᠷᠬᠦᠦ ᠠᠮᠢᠳᠤᠷᠠᠯ ᠠᠷᠪᠠᠨ ᠵᠢᠯ ᠦᠷᠭᠦᠯᠵᠢᠯᠡᠯᠡ᠃
ᠠᠷᠪᠠᠳᠤᠭᠠᠷ ᠵᠢᠯ ᠦ᠋ᠨ ᠵᠢᠯ ᠦ᠋ᠨ ᠡᠴᠦᠰ ᠲᠦ᠍ ᠥᠷᠢ ᠪᠡᠨ ᠲᠥᠯᠥᠵᠦ ᠳᠠᠭᠤᠰᠬᠠᠪᠠ᠃ ᠲᠡᠷᠡ ᠬᠦ᠌ ᠥᠨᠳᠥᠷ ᠬᠦᠦ ᠬᠢᠭᠡᠳ ᠬᠦᠦ ᠡᠴᠡ ᠨᠢ ᠬᠦᠦ ᠲᠥᠷᠥᠭᠰᠡᠨ ᠢ᠋ ᠬᠦᠷᠲᠡᠯᠡ ᠴᠥᠮ ᠲᠥᠯᠥᠵᠦ ᠪᠠᠷᠠᠯᠠ᠃
ᠮᠠᠽᠢᠯᠳ᠋ ᠬᠠᠲᠤᠨ ᠡᠳᠦᠭᠡ ᠮᠡᠳᠡᠭᠳᠡᠬᠦᠢᠴᠡ ᠬᠥᠭᠰᠢᠷᠡᠵᠡᠢ᠃ ᠣᠳᠣ ᠦᠭᠡᠭᠦᠦ ᠶᠠᠳᠠᠭᠤ ᠭᠡᠷ ᠦ᠋ᠨ ᠬᠦᠳᠡᠷ ᠴᠢᠬᠢᠷᠡᠭ ᠬᠥᠳᠡᠯᠮᠦᠷᠢᠴᠢ ᠪᠦᠰᠡᠭᠦᠢ ᠪᠣᠯᠵᠠᠢ᠃ ᠦᠰᠦ ᠪᠡᠨ ᠬᠠᠰᠢ ᠶᠠᠰᠢᠬᠠᠨ ᠣᠷᠢᠶᠠᠵᠤ᠂ ᠠᠯᠴᠢᠭᠤᠷ ᠢ᠋ᠶ᠋ᠠᠨ ᠬᠡᠯᠲᠡᠷᠬᠡᠢ ᠬᠠᠵᠠᠭᠠᠢᠬᠠᠨ ᠪᠣᠭᠣᠵᠤ᠂ ᠮᠣᠨᠴᠣᠭᠣᠷ ᠬᠦᠷᠢᠨ ᠭᠠᠷ ᠢ᠋ᠶ᠋ᠠᠨ ᠭᠠᠷᠭᠠᠨ᠂ ᠳᠡᠭᠡᠷᠡ ᠳᠠᠭᠤ ᠪᠠᠷ ᠦᠭᠡ ᠶᠠᠷᠢᠵᠤ᠂ ᠲᠣᠮᠣ ᠰᠠᠭᠤᠯᠠᠭᠠ ᠲᠠᠢ ᠤᠰᠤ ᠪᠠᠷ ᠱᠠᠯᠠ ᠤᠭᠠᠵᠤ ᠶᠠᠪᠤᠳᠠᠭ ᠪᠣᠯᠵᠠᠢ᠃ ᠭᠡᠲᠡᠯᠡ ᠵᠠᠷᠢᠮ ᠦᠶᠡᠰ ᠨᠥᠬᠥᠷ ᠢ᠋ᠶ᠋ᠡᠨ ᠠᠵᠢᠯ ᠳ᠋ᠤ᠌ ᠶᠠᠪᠤᠭᠰᠠᠨ ᠤ᠋ ᠰᠡᠭᠦᠯᠡᠷ ᠴᠣᠩᠬᠣᠨ ᠤ᠋ ᠳᠡᠷᠭᠡᠳᠡ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠰᠠᠭᠤᠵᠤ᠂ ᠲᠡᠷᠡ ᠣᠷᠣᠢ ᠬᠡᠴᠢᠨᠡᠨ ᠭᠤᠸᠠ ᠦᠵᠡᠰᠬᠦᠯᠡᠩ᠂ ᠬᠥᠮᠦᠨ ᠳ᠋ᠦ᠍ ᠬᠡᠴᠢᠨᠡᠨ ᠲᠠᠴᠢᠶᠠᠭᠳᠠᠵᠤ ᠪᠠᠢᠯᠠ ᠳᠠ ! ᠭᠡᠵᠦ ᠲᠡᠷᠡ ᠵᠢᠯ ᠦ᠋ᠨ ᠦᠳᠡᠰᠢᠯᠡᠭᠡ ᠶ᠋ᠢ ᠰᠠᠨᠠᠭᠠᠯᠵᠠᠨᠠ᠃
ᠲᠡᠷᠡ ᠦᠶᠡᠰ ᠬᠡᠷᠪᠡ ᠰᠣᠨᠳᠣᠷ ᠢ᠋ ᠭᠡᠭᠡᠭᠰᠡᠨ ᠦᠭᠡᠢ ᠰᠠᠨ ᠪᠣᠯ ᠮᠠᠽᠢᠯᠳ᠋ ᠣᠳᠣ ᠶᠠᠮᠠᠷᠰᠢᠤ ᠪᠠᠢᠬᠤ ᠪᠣᠯ? ᠬᠡᠨ ᠮᠡᠳᠡᠬᠦ ᠪᠣᠢ? ᠬᠥᠮᠦᠨ ᠦ᠌ ᠶᠠᠪᠤᠳᠠᠯ ᠬᠡᠴᠢᠨᠡᠨ ᠵᠢᠭᠲᠡᠢ᠂ ᠬᠡᠴᠢᠨᠡᠨ ᠣᠭᠣᠰᠣᠷ ᠪᠠᠷᠢᠭᠤᠯ ᠦᠭᠡᠢ ᠪᠠᠢᠳᠠᠭ ᠶᠤᠮ ᠪᠣᠢ? ᠥᠴᠦᠬᠡᠨ ᠪᠠᠭᠠ ᠤᠴᠢᠷ ᠲᠤ᠌ ᠴᠢᠮᠠᠶ᠋ᠢ ᠲᠠᠮᠤᠯᠠᠵᠤ ᠴᠤ᠌ ᠪᠣᠯᠤᠨᠠ᠂ ᠴᠢᠮᠠᠶ᠋ᠢ ᠵᠢᠷᠭᠠᠭᠤᠯᠵᠤ ᠴᠤ᠌ ᠪᠣᠯᠤᠨᠠ!
ᠨᠢᠭᠡ ᠭᠠᠷᠠᠭ ᠤ᠋ᠨ ᠡᠳᠦᠷ ᠮᠠᠽᠢᠯᠳ᠋ ᠬᠥᠭᠵᠢᠶᠡᠨᠲᠦ ᠴᠡᠴᠡᠷᠯᠢᠭ ᠲᠦ᠍ ᠣᠴᠢᠵᠤ ᠵᠤᠭᠠᠯᠠᠨ᠂ ᠨᠢᠭᠡᠨ ᠭᠠᠷᠠᠭ ᠤ᠋ᠨ ᠶᠠᠳᠠᠷᠠᠭᠠ ᠪᠠᠨ ᠭᠠᠷᠭᠠᠵᠤ ᠶᠠᠪᠤᠪᠠ᠃ ᠲᠡᠭᠡᠵᠦ ᠪᠠᠢᠲᠠᠯᠠ ᠬᠡᠦᠬᠡᠳ ᠳᠠᠭᠠᠭᠤᠯᠤᠭᠰᠠᠨ ᠨᠢᠭᠡ ᠡᠬᠡᠨᠡᠷ ᠵᠤᠭᠠᠴᠠᠵᠤ ᠶᠠᠪᠤᠬᠤ ᠶ᠋ᠢ ᠭᠡᠨᠡᠳᠲᠡ ᠠᠵᠢᠪᠠ᠃ ᠶᠡᠷᠦ ᠨᠢ ᠬᠠᠷᠢᠨ ᠹᠯᠧᠰᠵᠧ ᠬᠠᠲᠤᠨ ᠪᠠᠢᠭᠰᠠᠨ ᠪᠥᠭᠡᠳ ᠲᠡᠷᠡ ᠮᠥᠨ ᠵᠠᠯᠠᠭᠤ ᠪᠠᠷ ᠢ᠋ᠶ᠋ᠠᠨ᠂ ᠰᠡᠳᠬᠢᠯ ᠬᠥᠳᠡᠯᠭᠡᠮᠡ ᠰᠠᠢᠬᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠢᠯᠠ᠃
ᠮᠠᠽᠢᠯᠳ᠋ ᠬᠠᠲᠤᠨ ᠤ᠋ ᠰᠡᠳᠬᠢᠯ ᠬᠢᠵᠠᠭᠠᠯᠠᠰᠢ ᠦᠭᠡᠢ ᠬᠥᠳᠡᠯᠪᠡ᠃ ᠬᠦᠷᠴᠦ ᠣᠴᠢᠭᠠᠳ ᠹᠯᠧᠰᠵᠧ ᠬᠠᠲᠤᠨ ᠲᠠᠢ ᠦᠭᠡ ᠶᠠᠷᠢᠨᠠ ᠤᠤ? ᠶᠠᠷᠢᠶᠠᠨ ᠦᠭᠡᠢ ᠵᠠᠪᠠᠯ ᠣᠴᠢᠬᠤ ᠬᠡᠷᠡᠭᠲᠡᠢ᠃ ᠲᠡᠷᠡ ᠥᠷᠢ ᠲᠥᠯᠥᠭᠡᠰᠦ ᠪᠡᠨ ᠴᠥᠮ ᠲᠥᠯᠦᠴᠢᠬᠡᠭᠰᠡᠨ ᠪᠣᠯᠬᠣᠷ ᠲᠡᠭᠦᠨ ᠢ᠋ᠶ᠋ᠡᠨ ᠴᠥᠮ ᠢ᠋ ᠲᠣᠭᠠᠴᠢᠵᠤ ᠪᠣᠯᠤᠨᠠ᠂ ᠶᠠᠭᠠᠬᠢᠭᠠᠳ ᠪᠣᠯᠬᠤ ᠦᠭᠡᠢ ᠪᠢᠯᠡ?
ᠲᠡᠷᠡ ᠬᠦᠷᠦᠭᠡᠳ ᠣᠴᠢᠪᠠ᠃
《ᠴᠢ ᠰᠠᠢᠨ ᠤᠤ᠂ ᠵᠢᠶᠠᠨ᠋ᠧ᠃ 》
ᠨᠥᠭᠥᠭᠡᠳᠡᠬᠢ ᠨᠢ ᠲᠡᠭᠦᠨ ᠢ᠋ ᠣᠭᠲᠣᠬᠠᠨ ᠴᠤ᠌ ᠲᠠᠨᠢᠭᠰᠠᠨ ᠦᠭᠡᠢ᠃ ᠡᠭᠡᠯ ᠠᠷᠠᠳ ᠤ᠋ᠨ ᠨᠢᠭᠡ ᠡᠬᠡᠨᠡᠷ ᠢᠩᠭᠢᠵᠦ ᠳᠣᠲᠣᠨᠣᠴᠢᠷᠬᠠᠨ ᠳᠠᠭᠤᠳᠠᠭᠰᠠᠨ ᠳ᠋ᠤ᠌ ᠲᠡᠷᠡ ᠤᠴᠢᠷ ᠦᠭᠡᠢ ᠰᠣᠴᠢᠵᠠᠢ᠃
《ᠭᠡᠪᠡᠴᠦ ᠁ ᠬᠠᠲᠤᠭᠲᠠᠢ ᠁ ᠪᠢ ᠮᠡᠳᠡᠬᠦ ᠦᠭᠡᠢ ᠁ ᠴᠢ ᠯᠠᠪ ᠠᠨᠳᠠᠭᠤᠷᠠᠭᠠ ᠪᠢᠵᠡ》 ᠭᠡᠵᠦ ᠲᠡᠷᠡ ᠡᠭᠡᠷᠡᠨ ᠲᠡᠭᠡᠷᠡᠨ ᠬᠡᠯᠡᠪᠡ᠃
《ᠠᠨᠳᠠᠭᠤᠷᠠᠭᠠ ᠦᠭᠡᠢ᠃ ᠪᠢ ᠮᠠᠽᠢᠯᠳ᠋ ᠯᠦᠸᠠᠼᠢ ᠮᠥᠨ᠃ 》
ᠨᠠᠢᠵᠠ ᠨᠢ ᠬᠠᠰᠬᠢᠷᠴᠤ ᠠᠪᠤᠭᠠᠳ:
《ᠠ! ᠁ᠮᠢᠨᠦ ᠬᠥᠭᠡᠷᠦᠬᠦᠢ ᠮᠠᠽᠢᠯᠳ᠋ ᠴᠢ ᠶᠠᠭᠠᠬᠢᠭᠠᠳ ᠡᠢᠮᠦ ᠪᠣᠯᠴᠢᠬᠠᠪᠠ! ᠁》 ᠭᠡᠯᠡ᠃
《ᠲᠡᠢᠮᠦ ᠠ᠋᠂ ᠣᠯᠠᠨ ᠵᠢᠯ ᠠᠭᠤᠯᠵᠠᠭᠰᠠᠨ ᠦᠭᠡᠢ᠂ ᠡᠳᠡᠭᠡᠷ ᠵᠢᠯ ᠦ᠋ᠳ ᠲᠦ᠍ ᠪᠢ ᠭᠠᠰᠢᠭᠤᠨ ᠵᠦᠳᠡᠭᠦᠷᠢ ᠶ᠋ᠢ ᠵᠥᠩᠳᠡᠭᠡᠨ ᠠᠮᠰᠠᠯᠠ᠃ ᠬᠠᠷᠢᠨ ᠴᠥᠮ ᠴᠢᠨᠦ ᠤᠴᠢᠷ ᠢ᠋ᠶ᠋ᠠᠷ ᠰᠢᠦ! ᠁》
《ᠮᠢᠨᠦ ᠤᠴᠢᠷ ᠢ᠋ᠶ᠋ᠠᠷ ᠭᠡᠨᠡ? ᠁ ᠡᠨᠡ ᠶᠠᠭᠤ ᠭᠡᠰᠡᠨ ᠦᠭᠡ ᠪᠣᠢ?》
《ᠴᠢ ᠨᠠᠳᠠ ᠵᠢᠭᠡᠯᠡᠭᠦᠯᠵᠦ ᠥᠭᠭᠦᠭᠰᠡᠨ ᠲᠡᠷᠡ ᠰᠣᠨᠳᠣᠷ ᠢ᠋ᠶ᠋ᠠᠨ ᠮᠠᠷᠲᠠᠭᠠ ᠦᠭᠡᠢ ᠪᠢᠵᠡ᠂ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠶᠠᠮᠤᠨ ᠤ᠋ ᠦᠳᠡᠰᠢᠯᠡᠭᠡ ᠳ᠋ᠦ᠍ ᠣᠴᠢᠬᠤ ᠳ᠋ᠠᠭᠠᠨ ᠮᠢᠨᠦ ᠵᠡᠭᠦᠭᠰᠡᠨ ᠲᠡᠷᠡ᠃ 》
《ᠮᠠᠷᠲᠠᠭᠠ ᠦᠭᠡᠢ᠃ ᠶᠠᠭᠠᠬᠢᠭᠠ ᠭᠡᠵᠦ?》
《ᠶᠠᠭᠠᠬᠢᠭᠠ ᠭᠡᠵᠦ ᠭᠡᠨᠡ? ᠪᠢ ᠲᠡᠭᠦᠨ ᠢ᠋ ᠴᠢᠨᠢ ᠭᠡᠭᠡᠴᠢᠬᠡᠭᠰᠡᠨ᠃ 》
《ᠬᠠᠮᠢᠭᠠ ᠡᠴᠡ ᠳᠠ ! ᠴᠢ ᠬᠡᠵᠢᠶᠡᠨᠡᠢ ᠨᠠᠳᠠ ᠪᠤᠴᠠᠭᠠᠭᠠᠳ ᠥᠭᠭᠦᠭᠰᠡᠨ ᠯᠡ ᠳᠡ᠃ 》
《ᠮᠢᠨᠦ ᠴᠢᠮᠠ ᠳ᠋ᠤ᠌ ᠪᠤᠴᠠᠭᠠᠵᠤ ᠥᠭᠭᠦᠭᠰᠡᠨ ᠨᠢ ᠥᠭᠡᠷᠡ ᠨᠢᠭᠡ᠂ ᠴᠢᠨᠦᠬᠢ ᠲᠡᠢ ᠡᠭᠡᠭᠡ ᠢᠵᠢᠯ ᠶᠦᠮ᠃ ᠴᠢ ᠪᠣᠳᠣ ᠳᠠ᠂ ᠪᠢᠳᠡ ᠠᠷᠪᠠᠨ ᠵᠢᠯ ᠦ᠋ᠨ ᠬᠦᠴᠦ ᠬᠥᠳᠡᠯᠮᠦᠷᠢ ᠪᠡᠷ ᠲᠡᠭᠦᠨ ᠦ᠌ ᠦᠨᠡ ᠥᠷᠲᠡᠭ ᠢ᠋ ᠰᠠᠶᠢ ᠲᠥᠯᠥᠵᠦ ᠳᠠᠭᠤᠰᠤᠯᠠ᠃ ᠴᠢᠨᠦ ᠮᠡᠳᠡᠭᠡᠵᠢ ᠪᠡᠷ ᠪᠢᠳᠡ ᠮᠡᠲᠦ ᠶ᠋ᠢᠨ ᠶᠠᠭᠤ ᠴᠤ᠌ ᠦᠭᠡᠢ ᠬᠥᠮᠦᠨ ᠳ᠋ᠦ᠍ ᠡᠨᠡ ᠬᠠᠷᠢᠨ ᠬᠢᠯᠪᠠᠷ ᠬᠡᠷᠡᠭ ᠪᠢᠰᠢ ᠰᠢᠦ! ᠁ ᠭᠡᠪᠡᠴᠦ ᠬᠡᠷᠡᠭ ᠤᠴᠢᠷ ᠲᠣᠭᠣᠷᠢᠨ ᠥᠩᠭᠡᠷᠡᠵᠡᠢ᠂ ᠪᠢ ᠴᠦ᠍ ᠲᠤᠩ ᠪᠠᠶᠠᠷᠲᠠᠢ ᠪᠠᠢᠨᠠᠮ᠃ 》
ᠹᠯᠧᠰᠵᠧ ᠬᠠᠲᠤᠨ ᠠᠯᠬᠤᠬᠤ ᠪᠠᠨ ᠵᠣᠭᠰᠣᠭᠠᠳ:
《ᠴᠢ ᠨᠢᠭᠡ ᠡᠷᠳᠡᠨᠢ ᠶ᠋ᠢᠨ ᠰᠣᠨᠳᠣᠷ ᠬᠤᠳᠠᠯᠳᠤᠵᠤ ᠠᠪᠤᠭᠠᠳ ᠨᠠᠳᠠ ᠲᠥᠯᠥᠭᠰᠡᠨ ᠭᠡᠵᠦ ᠴᠢ ᠬᠡᠯᠡᠪᠡ ᠦᠦ?》 ᠭᠡᠪᠡ᠃
《ᠲᠡᠢᠮᠦ ᠲᠡᠢᠮᠦ᠃ ᠴᠢ ᠲᠡᠷᠡ ᠦᠶᠡᠰ ᠮᠡᠳᠡᠭᠰᠡᠨ ᠦᠭᠡᠢ ᠭᠡᠵᠦ ᠦᠦ? ᠢᠬᠡᠷᠡ ᠶᠦᠮ ᠰᠢᠭ ᠢᠵᠢᠯ ᠶᠦᠮ ᠴᠢᠨᠢ ᠳᠡ᠃ 》
ᠲᠡᠭᠡᠭᠡᠳ ᠮᠠᠽᠢᠯᠳ᠋ ᠴᠢᠩ ᠦᠨᠡᠨᠴᠢ ᠰᠡᠳᠬᠢᠯ ᠢ᠋ᠶ᠋ᠡᠷ ᠢᠨᠢᠶᠡᠪᠡ᠃
ᠹᠯᠧᠰᠵᠧ ᠬᠠᠲᠤᠨ ᠤ᠋ ᠰᠡᠳᠬᠢᠯ ᠬᠦᠴᠦᠲᠡᠢ ᠳᠣᠭᠳᠣᠯᠵᠤ᠂ ᠬᠣᠶᠠᠷ ᠭᠠᠷ ᠢ᠋ ᠨᠢ ᠠᠳᠬᠤᠵᠤ ᠠᠪᠤᠭᠠᠳ:
《ᠠᠢ!ᠮᠢᠨᠦ ᠬᠥᠭᠡᠷᠦᠬᠦᠢ ᠮᠠᠽᠢᠯᠳ᠋! ᠬᠠᠷᠢᠨ ᠮᠢᠨᠦ ᠲᠡᠷᠡ ᠰᠣᠨᠳᠣᠷ ᠬᠠᠭᠤᠷᠮᠠᠭ ᠡᠳ᠋ ᠶᠦᠮ᠃ ᠭᠠᠢᠭᠤᠢ ᠳ᠋ᠠᠭᠠᠨ ᠲᠠᠪᠤᠨ ᠵᠠᠭᠤᠨ ᠹᠷᠠᠩᠺ ᠬᠦᠷᠦᠨᠡ! ᠁》 ᠭᠡᠪᠡ᠃