ᠡᠷᠡᠬᠡᠢ ᠳᠠᠷᠤᠮᠠ ᠵᠠᠢ - ᠯ ᠂ ᠲᠥᠳᠥᠪ Эрхий дарам зай - Л ᠂ Түдэв
862ᠡᠷᠡᠬᠡᠢ ᠳᠠᠷᠤᠮᠠ ᠵᠠᠢ
［ ᠮᠣᠩᠭᠣᠯ］ ᠯ ᠊ ᠲᠦᠳᠦᠪ
ᠵᠢᠷᠤᠭᠠᠴᠢ ᠵᠢᠮᠪᠠ ᠶ᠋ᠢᠨ ᠪᠠᠭᠠ ᠵᠠᠯᠠᠭᠤ ᠠ᠋ᠴᠠ ᠡᠬᠢᠯᠡᠭᠡᠳ ᠬᠢᠵᠢᠶᠡᠯ ᠨᠠᠰᠤ ᠶ᠋ᠢ ᠬᠦᠷᠲᠡᠯᠡ ᠦᠵᠡᠵᠦ ᠥᠩᠭᠡᠷᠡᠭᠦᠯᠦᠭᠰᠡᠨ ᠠᠮᠢᠳᠤᠷᠠᠯ ᠳ᠋ᠤᠨᠢ ᠣᠯᠠᠨ ᠶᠠᠩᠵᠤ ᠶ᠋ᠢᠨ ᠵᠠᠬᠢᠶᠠᠯᠠᠭᠠ ᠂ ᠡᠭᠦᠷᠭᠡ ᠂ ᠭᠤᠶᠤᠯᠲᠠ ᠲᠣᠬᠢᠶᠠᠵᠤ ᠪᠠᠢᠯᠠ ᠃ ᠵᠠᠷᠢᠮ ᠨᠢ ᠴᠠᠢ ᠴᠢᠨᠠᠬᠤ ᠵᠠᠭᠤᠷᠠ ᠪᠦᠲᠦᠭᠡᠴᠢᠬᠡᠮᠡᠷ ᠂ ᠵᠠᠷᠢᠮ ᠨᠢ ᠵᠤᠨ ᠂ ᠨᠠᠮᠤᠷ ᠊ᠣᠨ ᠵᠢᠷᠭᠤᠭᠠᠨ ᠰᠠᠷᠠ ᠳ᠋ᠤ᠌ ᠠᠷᠠᠢᠬᠠᠨ ᠪᠠᠷᠠᠮᠠᠷ ᠶᠠᠩᠵᠤ ᠶᠠᠩᠵᠤ ᠶ᠋ᠢᠨ ᠶᠠᠭᠤᠮᠠ ᠪᠠᠢᠵᠤ ᠪᠢᠯᠡ ᠃ ᠲᠡᠷᠡ ᠪᠦᠬᠦᠨ ᠢ᠋ ᠵᠢᠷᠤᠵᠤ ᠂ ᠰᠡᠢᠯᠵᠦ ᠂ ᠵᠣᠷᠭᠣᠵᠤ᠂ ᠵᠦᠯᠭᠦᠵᠦ ᠤᠷᠠᠯᠠᠨ ᠪᠦᠲᠦᠭᠡᠭᠰᠡᠭᠡᠷ ᠡᠳᠦᠢ ᠬᠦᠷᠴᠡᠢ ᠃ ᠴᠠᠢ ᠴᠢᠨᠠᠬᠤ ᠵᠠᠭᠤᠷᠠ ᠪᠦᠲᠦᠭᠡᠭᠰᠡᠨ ᠶᠠᠭᠤᠮᠠᠨ ᠳ᠋ᠤᠨᠢ ᠠᠭᠲᠠ ᠮᠣᠷᠢ ᠂ ᠠᠲᠠᠨ ᠲᠡᠮᠡᠭᠡ ᠶ᠋ᠢᠨ ᠱᠠᠩ ᠴᠤ᠌ ᠥᠭᠴᠦ ᠪᠠᠢᠯᠠ ᠃ ᠵᠤᠨ ᠂ ᠨᠠᠮᠤᠷ ᠊ᠣᠨ ᠵᠢᠷᠭᠤᠭᠠᠨ ᠰᠠᠷᠠ ᠳ᠋ᠤ᠌ ᠴᠤᠤ ᠪᠠᠭᠲᠠᠭᠠᠨ ᠬᠢᠭᠰᠡᠨ ᠳ᠋ᠦ᠍ᠨᠢ ᠰᠣᠨᠣᠮ ᠬᠠᠳᠠᠭ ᠲᠡᠳᠦᠢᠬᠡᠨ ᠊ᠥ ᠬᠠᠷᠠᠮᠵᠢ ᠥᠭᠳᠡᠭ ᠬᠥᠮᠦᠨ ᠴᠦ᠍ ᠪᠠᠢᠪᠠ ᠃ ᠵᠢᠮᠪᠠ ᠵᠢᠷᠤᠭᠠᠴᠢ ᠲᠡᠷᠡ ᠪᠦᠬᠦᠨ ᠢ᠋ ᠶᠡᠬᠡ ᠶ᠋ᠢ ᠶᠡᠬᠡ ᠭᠡᠬᠦ ᠦᠭᠡᠢ ᠂ ᠪᠠᠭᠠ ᠶ᠋ᠢ ᠪᠠᠭᠠ ᠭᠡᠬᠦ ᠦᠭᠡᠢ ᠠᠪᠳᠠᠭ ᠯᠠ ᠪᠠᠢᠯᠠ ᠃
ᠬᠠᠷᠢᠨ ᠡᠨᠡ ᠤᠳᠠᠭᠠ ᠬᠡᠵᠢᠶᠡ ᠴᠦ᠍ ᠪᠣᠳᠣᠵᠤ ᠰᠠᠨᠠᠵᠤ ᠪᠠᠢᠭᠠ ᠦᠭᠡᠢ ᠵᠠᠬᠢᠶᠠᠯᠠᠭᠠ ᠲᠠᠢ ᠤᠴᠠᠷᠠᠵᠠᠢ ᠃ ᠵᠠᠬᠢᠶᠠᠯᠠᠭᠠ ᠨᠢ ᠴᠦ᠍ ᠂ ᠱᠠᠩ ᠬᠠᠷᠠᠮᠵᠢ ᠨᠢ ᠴᠦ᠍ ᠶᠡᠷᠦ ᠪᠤᠰᠤ ᠶ᠋ᠢᠨ ᠶᠠᠭᠤᠮᠠ ᠪᠠᠢᠯᠠ ᠃
《 ᠨᠢᠭᠡ ᠢᠮᠠᠬᠤ（ ᠼᠦᠨ ）ᠪᠤᠶᠤ ᠡᠷᠡᠬᠡᠢ ᠳᠠᠷᠤᠮᠠ ᠵᠠᠢᠨ ᠳ᠋ᠤ᠌ ᠮᠢᠩᠭᠠᠨ ᠵᠠᠭᠠᠨ ᠂ ᠡᠰᠡᠪᠡᠯ ᠭᠤᠷᠪᠠᠨ ᠵᠠᠭᠤᠨ ᠪᠤᠷᠬᠠᠨ ᠪᠠᠭᠲᠠᠭᠠᠨ ᠵᠢᠷᠤᠵᠤ ᠪᠣᠭᠳᠠ ᠡᠵᠡᠨ ᠬᠠᠭᠠᠨ ᠳ᠋ᠤ᠌ ᠡᠷᠭᠦᠨ ᠪᠠᠷᠢᠬᠤ ᠡᠭᠡᠯᠵᠢ ᠳ᠋ᠦ᠍ ᠰᠣᠨᠢᠨ ᠶᠠᠭᠤᠮᠠ ᠪᠣᠯᠭᠠᠨ ᠠᠪᠴᠤ ᠢᠷᠡ 》 ᠭᠡᠵᠦ ᠵᠢᠷᠤᠭᠠᠴᠢ ᠲᠡᠭᠦᠨ ᠊ᠥ ᠲᠣᠯᠣᠭᠠᠢ ᠳᠡᠭᠡᠷᠡ ᠶᠡᠬᠡ ᠡᠵᠡᠨ ᠊ᠥ ᠨᠡᠷᠡ ᠪᠡᠷ ᠯᠦᠩᠳᠦᠩ ᠵᠠᠷᠯᠢᠭ ᠪᠠᠭᠤᠵᠠᠢ ᠃ ᠬᠡᠷᠪᠡ ᠲᠡᠷᠡ ᠵᠠᠷᠯᠢᠭ ᠢ᠋ ᠪᠦᠲᠦᠭᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠣᠯ ᠨᠢᠭᠦᠯ ᠠᠯᠳᠠᠰ ᠪᠣᠯᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠂ ᠠᠮᠢ ᠨᠠᠰᠤᠨ ᠳ᠋ᠤᠨᠢ ᠬᠠᠯᠠ ᠲᠠᠢ ᠭᠡᠵᠦ ᠲᠡᠷᠡ ᠬᠦ᠌ ᠠᠶᠤᠮᠰᠢᠭ᠍ᠲᠤ ᠲᠤᠰᠢᠶᠠᠯ ᠢ᠋ ᠳᠠᠮᠵᠢᠭᠤᠯᠵᠤ ᠢᠷᠡᠭᠰᠡᠨ ᠬᠥᠮᠦᠨ ᠵᠠᠪᠰᠠᠷ ᠠ᠋ᠴᠠ ᠨᠢ ᠡᠷᠴᠢ ᠶ᠋ᠢ ᠨᠡᠮᠡᠨ ᠴᠢᠩᠭᠠᠯᠠᠵᠤ ᠳᠠᠪᠬᠤᠷ ᠰᠦᠷᠳᠡᠭᠦᠯᠵᠡᠢ ᠃
《 ᠨᠢᠭᠡᠨ ᠢᠮᠠᠬᠤ（ ᠼᠦᠨ ） ᠳ᠋ᠦ᠍ ᠮᠢᠩᠭᠠᠨ ᠵᠠᠭᠠᠨ 》 ᠭᠡᠰᠡᠨ ᠦᠭᠡ ᠶ᠋ᠢ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠬᠤ ᠴᠤ᠌ ᠱᠠᠭᠠᠷᠳᠠᠯᠭᠠ ᠦᠭᠡᠢ ᠂ ᠲᠡᠢᠮᠦ ᠤᠳᠬᠠ ᠦᠭᠡᠢ ᠰᠢᠬᠠᠮ ᠵᠦᠢᠯ ᠭᠡᠳᠡᠭ ᠢ᠋ ᠨᠠᠭᠠᠳᠤ ᠵᠠᠬᠠ ᠶ᠋ᠢᠨ ᠤᠬᠠᠭᠠᠨ ᠊ᠣ ᠪᠠᠭᠠᠬᠠᠨ ᠪᠡᠯᠡ ᠲᠡᠢ ᠬᠥᠮᠦᠨ ᠴᠦ᠍ ᠣᠢᠯᠠᠭᠠᠵᠤ ᠪᠠᠢᠯᠠ ᠃ ᠪᠣᠭᠳᠠ ᠡᠵᠡᠨ ᠡᠴᠡ ᠲᠡᠢᠮᠦ ᠯᠦᠩᠳᠦᠩ ᠵᠠᠷᠯᠢᠭ ᠪᠠᠭᠤᠭᠰᠠᠨ ᠢ᠋ ᠰᠣᠨᠣᠰᠤᠭᠰᠠᠨ ᠬᠥᠮᠦᠨ ᠪᠣᠯᠭᠠᠨ ᠵᠢᠷᠤᠭᠠᠴᠢ ᠶ᠋ᠢ ᠦᠷᠦ ᠡᠪᠡᠳᠴᠦ ᠪᠠᠢᠯᠠ ᠃ 《ᠬᠠᠷᠭᠠᠨᠠ ᠶ᠋ᠢᠨ ᠨᠣᠣᠰᠣ ᠲᠡᠭᠦᠵᠦ ᠢᠰᠡᠭᠡᠢ ᠬᠢᠬᠦ 》 ᠭᠡᠭᠴᠢ ᠪᠣᠯᠬᠤ ᠨᠢ ᠠ᠋ ᠭᠡᠬᠦ ᠨᠢ ᠪᠠᠢᠬᠤ ᠳ᠋ᠤ᠌ ᠵᠠᠷᠢᠮ ᠨᠢ ᠪᠠᠰᠠ 《 ᠤᠷᠠᠨ ᠲᠠᠢ ᠤᠲᠠᠰᠤ ᠪᠢᠲᠡᠭᠡᠢ ᠪᠤᠯᠢᠶᠠᠯᠳᠤ ᠂ ᠤᠬᠠᠭᠠᠨᠲᠠᠨ ᠲᠠᠢ ᠦᠭᠡ ᠪᠢᠲᠡᠭᠡᠢ ᠪᠤᠯᠢᠶᠠᠯᠳᠤ 》ᠭᠡᠵᠡᠭᠡᠵᠦ ᠪᠠᠢᠯᠠ ᠃ ᠲᠡᠷᠡ ᠪᠦᠬᠦᠨ ᠵᠢᠮᠪᠠ ᠵᠢᠷᠤᠭᠠᠴᠢ ᠳ᠋ᠤ᠌ ᠫᠠᠳ ᠦᠭᠡᠢ ᠬᠡᠷᠡᠭ ᠃ ᠲᠡᠭᠦᠨ ᠊ᠥ ᠡᠮᠦᠨᠡ ᠡᠴᠡ ᠬᠡᠨ ᠴᠦ᠍ ᠲᠡᠷᠡ ᠬᠡᠴᠡᠭᠦᠦ ᠠᠵᠢᠯ ᠢ᠋ ᠪᠦᠲᠦᠭᠡᠭᠡᠳ ᠥᠭᠬᠦ ᠦᠭᠡᠢ ᠨᠢ ᠯᠠᠪᠲᠠᠢ ᠃ ᠥᠪᠡᠷ ᠢ᠋ᠶ᠋ᠡᠨ ᠯᠡ ᠰᠢᠢᠳᠬᠦ ᠤᠴᠢᠷᠲᠠᠢ ᠃ ᠲᠡᠢᠨ ᠬᠦ᠌ ᠬᠡᠳᠦᠨ ᠬᠣᠨᠣᠭ ᠪᠣᠳᠣᠯ ᠪᠣᠯᠤᠨ ᠶᠠᠪᠤᠯᠠ ᠃ ᠡᠷᠡᠬᠡᠢ ᠳᠠᠷᠤᠮᠠ ᠵᠠᠢ ᠳ᠋ᠤ᠌ ᠮᠢᠩᠭᠠᠨ ᠵᠠᠭᠠᠨ ᠪᠠᠢᠲᠤᠭᠠᠢ ᠨᠢᠭᠡ ᠵᠠᠭᠠᠨ ᠢ᠋ ᠯᠡ ᠠᠷᠠᠢ ᠶᠠᠳᠠᠨ ᠪᠠᠭᠲᠠᠭᠠᠵᠤ ᠵᠢᠷᠤᠬᠤ ᠶᠤᠮ ᠳᠠ ᠭᠡᠬᠦ ᠡᠴᠡ ᠥᠭᠡᠷᠡ ᠪᠣᠳᠣᠯ ᠲᠣᠯᠣᠭᠠᠢ ᠳ᠋ᠤᠨᠢ ᠣᠷᠣᠵᠤ ᠢᠷᠡᠭᠰᠡᠨ ᠦᠭᠡᠢ ᠃ ᠪᠣᠭᠳᠠ ᠡᠵᠡᠨ ᠊ᠥ ᠳᠠᠭᠠᠭᠠᠯᠭᠠᠪᠤᠷᠢ ᠭᠦᠢᠴᠡᠯᠳᠦᠭᠦᠯᠬᠦ ᠬᠤᠭᠤᠴᠠᠭᠠ ᠪᠣᠭᠣᠨᠢ ᠪᠣᠯᠬᠣᠷ ᠡᠳᠦᠷ ᠬᠣᠨᠣᠭ ᠪᠦᠷᠢ ᠲᠡᠭᠦᠨ ᠳ᠋ᠦ᠍ ᠦᠨᠡᠲᠡᠢ ᠪᠠᠢᠯᠠ ᠃ ᠥᠩᠭᠡᠷᠡᠬᠦ ᠬᠣᠨᠣᠭ ᠪᠣᠯᠭᠠᠨ ᠨᠢ ᠵᠢᠷᠤᠭᠠᠴᠢ ᠶ᠋ᠢ ᠭᠣᠨᠢᠭ᠍ᠲᠦ ᠲᠡᠭᠦᠰᠬᠡᠯ ᠤᠷᠤᠭᠤ ᠣᠢᠷᠠᠲᠤᠭᠤᠯᠤᠨᠠ ᠃ ᠲᠡᠢᠨ ᠰᠡᠳᠬᠢᠯ ᠊ᠥᠨ ᠬᠢᠮᠤᠷᠠᠯ ᠳᠤᠮᠳᠠ ᠨᠡᠯᠢᠶᠡᠳ ᠣᠯᠠᠨ ᠬᠣᠨᠣᠭ ᠥᠩᠭᠡᠷᠡᠭᠡᠨ ᠪᠣᠳᠣᠯᠠ ᠃ ᠵᠢᠷᠤᠭᠠᠴᠢ ᠮᠠᠨᠢ ᠪᠢᠷ ᠂ ᠴᠠᠭᠠᠰᠤ ᠪᠠᠨ ᠭᠠᠷ ᠲᠠᠭᠠᠨ ᠪᠠᠷᠢᠭ᠍ᠰᠠᠨ ᠦᠭᠡᠢ ᠃ ᠰᠡᠳᠬᠢᠯ ᠣᠶᠤᠨ ᠳ᠋ᠠᠭᠠᠨ ᠲᠤᠩᠭᠠᠨ ᠰᠢᠢᠳᠴᠦ ᠂ ᠨᠢᠳᠦᠨ ᠊ᠥ ᠪᠡᠨ ᠡᠮᠦᠨᠡ ᠬᠡᠢ ᠠᠭᠠᠷ ᠲᠤ᠌ ᠦᠵᠡᠬᠦ ᠪᠡᠷ ᠪᠣᠯᠤᠭᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠲᠡᠷᠡ ᠪᠢᠷ ᠪᠣᠳᠣᠭ ᠨᠡᠢᠯᠡᠭᠦᠯᠳᠡᠭ ᠦᠭᠡᠢ ᠵᠠᠩ ᠲᠠᠢ ᠠᠵᠢ ᠃
ᠬᠣᠨᠣᠭ ᠬᠤᠭᠤᠴᠠᠭᠠ ᠨᠢᠰᠬᠦ ᠮᠡᠲᠦ ᠥᠩᠭᠡᠷᠡᠭᠰᠡᠭᠡᠷ ᠯᠡ ᠪᠠᠢᠯᠠ ᠃ ᠵᠢᠷᠤᠭᠠᠴᠢ ᠶ᠋ᠢᠨ ᠰᠡᠳᠬᠢᠯ ᠰᠢᠨᠠᠯᠤᠭᠰᠠᠭᠠᠷ ᠯᠠ ᠪᠠᠢᠯᠠ ᠃ ᠬᠣᠰᠢᠭᠤ ᠨᠤᠲᠤᠭ ᠊ᠣᠨ ᠬᠢᠨᠢ ᠴᠦ᠍ ᠂ ᠲᠠᠨᠢᠯ ᠨᠥᠬᠥᠳ ᠨᠢ ᠴᠦ᠍ ᠴᠥᠮ ᠲᠤᠰᠠ ᠪᠣᠯᠬᠤ ᠶ᠋ᠢ ᠬᠢᠴᠢᠶᠡᠨᠡ ᠃ ᠭᠡᠪᠡᠴᠦ ᠦᠨᠡᠬᠡᠷ ᠰᠡᠳᠬᠢᠰᠢ ᠦᠭᠡᠢ ᠂ ᠪᠡᠶᠡᠯᠡᠰᠢ ᠦᠭᠡᠢ ᠶᠠᠭᠤᠮᠠᠨ ᠳ᠋ᠤ᠌ ᠬᠠᠷᠢᠭᠤ ᠣᠯᠳᠠᠭᠰᠠᠨ ᠦᠭᠡᠢ ᠃ ᠵᠢᠷᠤᠭᠠᠴᠢ ᠶ᠋ᠢᠨ ᠲᠦᠮᠡᠨ ᠤᠬᠠᠭᠠᠨ ᠂ ᠮᠢᠩᠭᠠᠨ ᠠᠷᠭᠠ ᠴᠤ᠌ ᠲᠤᠰᠠ ᠪᠣᠯᠤᠭᠰᠠᠨ ᠦᠭᠡᠢ ᠃ ᠲᠡᠭᠡᠲᠡᠯᠡ ᠬᠠᠪᠤᠷ ᠊ᠣᠨ ᠨᠢᠭᠡᠨ ᠡᠳᠦᠷ ᠵᠢᠷᠤᠭᠠᠴᠢ ᠭᠡᠷ ᠊ᠥᠨ ᠢ᠋ᠶ᠋ᠡᠨ ᠭᠠᠳᠠᠨᠠ ᠭᠡᠶᠦᠷᠡᠨ ᠰᠠᠭᠤᠵᠤ ᠪᠠᠢᠬᠤ ᠶ᠋ᠢ ᠬᠠᠷᠠᠭᠰᠠᠨ ᠭᠤᠶᠤᠯᠭᠠᠴᠢᠨ ᠡᠷᠡ ᠳᠡᠷᠭᠡᠳᠡ ᠨᠢ ᠣᠴᠢᠵᠠᠢ ᠃
–– ᠶᠠᠭᠤᠨ ᠳ᠋ᠠᠭᠠᠨ ᠰᠢᠨᠠᠯᠤᠨᠠ ᠪᠣᠢ ? ᠭᠡᠵᠦ ᠲᠡᠷᠡ ᠰᠢᠭᠤᠳ ᠠᠰᠠᠭᠤᠬᠤ ᠳ᠋ᠤ᠌ ᠂ ᠵᠢᠷᠤᠭᠠᠴᠢ ᠲᠡᠭᠦᠨ ᠳ᠋ᠦ᠍ ᠬᠠᠮᠤᠭ ᠵᠣᠪᠠᠯᠠᠩ ᠢ᠋ᠶ᠋ᠠᠨ ᠶᠠᠷᠢᠪᠠ ᠃ ᠭᠤᠶᠤᠯᠭᠠᠴᠢᠨ ᠠᠩᠬᠠᠷᠬᠤ ᠶ᠋ᠢᠨ ᠶᠡᠬᠡ ᠪᠡᠷ ᠠᠩᠬᠠᠷᠴᠤ ᠰᠣᠨᠣᠰᠤᠭᠠᠳ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠦᠨ ᠄
–– ᠠᠢ ᠮᠡᠳᠡᠬᠦ ᠦᠭᠡᠢ ᠃ ᠰᠠᠨᠠᠭᠠᠨ ᠳ᠋ᠤ᠌ ᠪᠠᠭᠲᠠᠬᠤ ᠦᠭᠡᠢ ᠶᠠᠭᠤᠮᠠ ᠪᠠᠢᠨᠠ ᠃ ᠭᠣᠶᠣᠯᠭᠠ ᠪᠠᠷ ᠠᠮᠢ ᠵᠢᠭᠤᠬᠤ ᠭᠤᠴᠢ ᠳᠥᠴᠢᠨ ᠵᠢᠯ ᠳ᠋ᠦ᠍ ᠮᠥᠨ ᠴᠦ᠍ ᠣᠯᠠᠨ ᠬᠥᠮᠦᠨ ᠲᠡᠢ ᠠᠭᠤᠯᠵᠠᠵᠤ ᠮᠥᠨ ᠴᠦ᠍ ᠶᠡᠬᠡ ᠶᠠᠭᠤᠮᠠ ᠰᠣᠨᠣᠰᠤᠯᠠ ᠃ ᠡᠢᠮᠦ ᠯᠦᠩᠳᠦᠩ ᠭᠠᠷᠴᠤ ᠭᠡᠵᠦ ᠣᠳᠣ ᠯᠠ ᠠᠩᠬᠠ ᠤᠳᠠᠭᠠ ᠲᠤᠭᠤᠯᠵᠤ ᠪᠠᠢᠨᠠ ᠭᠡᠰᠡᠨ ᠢ᠋ᠶ᠋ᠡᠨ ᠦᠷᠴᠢᠯᠡᠭᠡᠲᠦ ᠳᠤᠬᠤ ᠪᠠᠨ ᠢᠯᠢᠵᠦ ᠄
–– ᠪᠠᠢᠵᠠ ! ᠨᠢᠭᠡᠨ ᠢᠮᠠᠬᠤ（ ᠼᠦᠨ ）ᠵᠠᠢ ᠳ᠋ᠤ᠌ ᠮᠢᠩᠭᠠᠨ ᠵᠠᠭᠠᠨ ᠵᠢᠷᠤ ᠭᠡᠵᠦ ᠠᠢᠯᠠᠳᠤᠭᠰᠠᠨ ᠶᠤᠮ ᠪᠣᠯ ᠬᠥᠮᠦᠨ ᠊ᠥ ᠰᠠᠨᠠᠭᠠᠨ ᠳ᠋ᠤ᠌ ᠪᠠᠭᠲᠠᠭᠠᠳ ᠯᠠ ᠲᠡᠭᠡᠵᠡᠢ ᠳ᠋ᠠ ᠃ ᠠᠢᠯᠠᠳᠴᠤ ᠪᠣᠯᠤᠭᠰᠠᠨ ᠶᠠᠭᠤᠮᠠ ᠶ᠋ᠢ ᠬᠢᠵᠦ ᠪᠣᠯᠤᠯ ᠦᠭᠡᠢ ᠳ᠋ᠠ ᠃ ᠴᠢ ᠶᠠᠮᠠᠷ 《 ᠲᠠᠶ᠋ᠢᠭ (ᠬᠣᠶᠠᠷ ᠬᠡᠯᠡᠨ ᠊ᠥ ᠦᠭᠡᠰ ᠢ᠋ ᠲᠣᠬᠣᠭᠠᠵᠤ ᠣᠷᠴᠢᠭᠤᠯᠤᠭᠰᠠᠨ ᠲᠣᠯᠢ ᠪᠢᠴᠢᠭ ) ᠦᠵᠡᠭᠡ ᠦᠭᠡᠢ ᠪᠢᠴᠢᠭᠡᠴᠢ ᠂ ᠮᠠᠶᠢᠭ᠋ ᠦᠵᠡᠭᠡ ᠦᠭᠡᠢ ᠵᠢᠷᠤᠭᠠᠴᠢ 》 ᠪᠢᠰᠢ ᠳ᠋ᠠ ᠭᠡᠵᠦ ᠬᠡᠯᠡᠪᠡ ᠃
ᠨᠡᠭᠡᠷᠡᠨ ᠬᠥᠮᠦᠨ ᠊ᠥ ᠤᠬᠠᠭᠠᠨ ᠳ᠋ᠤ᠌ ᠪᠠᠭᠲᠠᠭᠠᠳ ᠵᠠᠷᠯᠢᠭ ᠯᠦᠩᠳᠦᠩ ᠪᠣᠯᠤᠭᠠᠳ ᠪᠠᠭᠤᠵᠤ ᠢᠷᠡᠭᠰᠡᠨ ᠶᠦ᠍ᠮ ᠪᠣᠯ ᠶᠠᠭᠠᠬᠢᠭᠠᠳ ᠬᠢᠵᠦ ᠪᠣᠯᠳᠠᠭ ᠦᠭᠡᠢ ᠪᠢᠯᠡ ᠭᠡᠰᠡᠨ ᠪᠣᠳᠣᠯ ᠵᠢᠷᠤᠭᠠᠴᠢ ᠶ᠋ᠢ ᠡᠵᠡᠮᠳᠡᠪᠡ ᠃
–– ᠮᠠᠢ ᠂ ᠮᠢᠨᠦ ᠬᠤᠪᠢ ᠶ᠋ᠢ ᠬᠦᠷᠲᠡ ! ᠭᠡᠵᠦ ᠵᠢᠷᠤᠭᠠᠴᠢ ᠬᠡᠯᠡᠭᠡᠳ ᠭᠤᠶᠤᠯᠭᠠᠴᠢᠨ ᠳ᠋ᠤ᠌ ᠦᠳᠡ ᠶ᠋ᠢᠨ ᠬᠣᠭᠣᠯᠠ ᠪᠠᠨ ᠦᠭᠬᠦᠯᠡ ᠃ ᠱᠠᠭᠠᠨᠲᠤ ᠴᠢᠮᠥᠭᠡ ᠶ᠋ᠢ ᠲᠡᠷᠡ ᠠᠳᠢᠰ ᠬᠦᠷᠲᠡᠬᠦ ᠮᠡᠲᠦ ᠬᠣᠶᠠᠷ ᠭᠠᠷᠳᠠᠨ ᠠᠪᠤᠭᠠᠳ ᠰᠢᠭᠤᠳ ᠯᠠ ᠡᠪᠦᠷᠲᠦᠯᠡᠪᠡ ᠃
–– ᠵᠠ ᠳᠠᠪᠬᠤᠷ ᠳᠡᠪᠡᠯᠲᠦ ᠨᠢ ᠶᠠᠪᠤᠶᠠ ᠲᠠ ! ᠵᠠᠭᠠᠨ ᠊ᠣ ᠪᠠᠨ ᠵᠢᠷᠤᠭ ᠢ᠋ ᠮᠥᠳᠳᠥᠬᠡᠨ ᠳᠠᠭᠤᠰᠬᠠᠭᠠᠷᠠᠢ ! ᠭᠡᠵᠦ ᠢᠷᠦᠭᠡᠭᠡᠳ ᠪᠣᠰᠴᠤ ᠣᠳᠪᠠ ᠃ ᠬᠣᠢᠨᠠ ᠠ᠋ᠴᠠ ᠨᠢ ᠵᠢᠷᠤᠭᠠᠴᠢ ᠬᠡᠰᠡᠭ ᠵᠠᠭᠤᠷᠠ ᠪᠣᠳᠣᠯᠭᠠᠰᠢᠷᠠᠨ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠨᠢᠭᠡᠨ ᠶᠠᠭᠤᠮᠠ ᠰᠠᠨᠠᠵᠤ ᠄
–– ᠬᠦᠢ ᠳᠠᠪᠬᠤᠷ ᠳᠡᠪᠡᠯᠲᠦ ᠂ ᠬᠥᠶᠢ ᠳᠠᠪᠬᠤᠷ ᠳᠡᠪᠡᠯᠲᠦ ! ᠭᠡᠵᠦ ᠬᠠᠰᠬᠢᠴᠢᠨ ᠳᠠᠭᠤᠳᠠᠵᠤ ᠪᠣᠰᠤᠨ ᠬᠠᠷᠠᠢᠪᠠ ᠃ ᠭᠤᠶᠤᠯᠭᠠᠴᠢᠨ ᠠᠶᠤᠬᠤ ᠮᠡᠲᠦ ᠴᠣᠴᠢᠨ ᠵᠣᠭ ᠲᠤᠰᠤᠭᠰᠠᠨ ᠢ᠋ᠶ᠋ᠠᠨ ᠡᠷᠭᠢᠵᠦ ᠬᠠᠷᠠᠪᠠ ᠃ ᠵᠢᠷᠤᠭᠠᠴᠢ ᠭᠦᠶᠦᠨ ᠬᠦᠷᠴᠦ ᠲᠡᠭᠦᠨ ᠊ᠥ ᠵᠠᠳᠠᠭᠠᠢ ᠡᠩᠭᠡᠷ ᠤᠷᠤᠭᠤ ᠰᠢᠷᠲᠡᠨ ᠭᠥᠯᠢᠷᠡᠪᠡ ᠃ ᠰᠠᠶᠢ ᠥᠭᠭᠦᠭᠰᠡᠨ ᠱᠠᠭᠠᠨᠲᠤ ᠴᠢᠮᠥᠭᠡ ᠪᠡᠨ ᠪᠤᠴᠠᠭᠠᠵᠤ ᠠᠪᠬᠤ ᠨᠢ ᠭᠡᠵᠦ ᠠᠶᠤᠬᠤ ᠰᠢᠭ᠋ ᠭᠤᠶᠤᠯᠭᠠᠴᠢᠨ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠡᠩᠭᠡᠷ ᠢ᠋ᠶ᠋ᠡᠨ ᠳᠠᠷᠤᠪᠠ ᠃ ᠲᠡᠷᠡ ᠭᠤᠶᠤᠯᠭᠠᠴᠢᠨ ᠳᠥᠷᠪᠡᠨ ᠳᠠᠪᠬᠤᠷ ᠳᠡᠪᠡᠯ ᠲᠡᠢ ᠠᠵᠢ ᠃ ᠡᠬᠢᠯᠡᠭᠡᠳ ᠲᠠᠷᠮᠠᠨ ᠬᠦᠷᠮᠡ ᠂ ᠳᠠᠷᠠᠭᠠ ᠨᠢ ᠰᠠᠷᠮᠠᠢ ᠳᠡᠪᠡᠯ ᠂ ᠳᠣᠣᠷᠠ ᠨᠢ ᠳᠠᠯᠢᠩᠪᠤᠨ ᠴᠣᠪᠴᠠᠭᠠ ( ᠵᠤᠪᠴᠠᠭᠠ ) ᠶᠠᠩᠪᠣᠨ ᠲᠡᠷᠯᠢᠭ ᠳᠠᠪᠬᠤᠷᠯᠠᠨ ᠡᠮᠦᠰᠴᠡᠢ ᠃ ᠡᠪᠦᠯ ᠂ ᠵᠤᠨ ᠂ ᠨᠠᠮᠤᠷ ᠊ᠣᠨ ᠪᠦᠬᠦ ᠯᠡ ᠬᠤᠪᠴᠠᠰᠤ ᠪᠠᠨ ᠭᠠᠭᠴᠠ ᠪᠡᠶᠡ ᠳ᠋ᠡᠭᠡᠨ ᠡᠮᠦᠰᠴᠦ ᠶᠠᠪᠤᠳᠠᠭ ᠪᠣᠯᠬᠣᠷ ᠲᠡᠭᠦᠨ ᠢ᠋ ᠳᠠᠪᠬᠤᠷ ᠳᠡᠪᠡᠯᠲᠦ ᠭᠡᠵᠦ ᠣᠯᠠᠨ ᠢ᠋ᠶ᠋ᠠᠷ ᠨᠡᠷᠡᠯᠡᠵᠡᠢ ᠃ ᠴᠠᠭ ᠳᠤᠯᠠᠭᠠᠷᠠᠬᠤ ᠶ᠋ᠢᠨ ᠬᠢᠷᠢ ᠪᠡᠷ ᠳᠠᠪᠬᠤᠷ ᠳᠡᠪᠡᠯ ᠢ᠋ᠶ᠋ᠡᠨ ᠨᠢᠭᠡ ᠨᠢᠭᠡ ᠪᠡᠷ ᠨᠢ ᠲᠠᠢᠯᠵᠤ ᠨᠢᠮᠭᠡᠯᠡᠨ ᠴᠥᠭᠡᠯᠡᠳᠡᠭ ᠠᠵᠢ ᠃
ᠵᠢᠷᠤᠭᠠᠴᠢ ᠲᠡᠭᠦᠨ ᠊ᠥ ᠳᠠᠪᠬᠤᠷ ᠳᠠᠪᠬᠤᠷ ᠮᠥᠷᠲᠡᠭᠡᠨ ᠲᠣᠪᠴᠢ ᠰᠢᠯᠪᠢ ᠦᠭᠡᠢ ᠰᠢᠬᠠᠮ ᠵᠠᠭᠠᠮᠠ ᠤᠷᠤᠭᠤ ᠬᠡᠰᠡᠭ ᠵᠠᠭᠤᠷᠠ ᠬᠠᠷᠠᠵᠤ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ ᠄
–– ᠳᠠᠪᠬᠤᠷ ᠳᠡᠪᠡᠯᠲᠦ ᠴᠢᠮᠠ ᠳ᠋ᠤ᠌ ᠥᠭᠯᠢᠭᠡ ᠶᠡᠬᠡ ᠣᠯᠳᠠᠬᠤ ᠪᠣᠯᠲᠤᠭᠠᠢ ! ᠭᠡᠵᠦ ᠢᠷᠦᠭᠡᠭᠡᠳ ᠭᠡᠷ ᠥᠭᠡᠳᠡ ᠪᠡᠨ ᠪᠤᠴᠠᠵᠤ ᠭᠦᠶᠦᠬᠦ ᠲᠣᠭᠠᠨ ᠊ᠣ ᠶᠠᠪᠤᠯᠠ ᠃ ᠳᠠᠪᠬᠤᠷ ᠳᠡᠪᠡᠯᠲᠦ ᠭᠤᠶᠤᠯᠭᠠᠴᠢᠨ ᠬᠡᠰᠡᠭ ᠵᠠᠭᠤᠷᠠ ᠡᠷᠡᠭᠡᠯᠡᠵᠦ ᠭᠠᠢᠬᠠᠭᠰᠠᠨ ᠢ᠋ᠶ᠋ᠠᠨ ᠴᠠᠭᠠᠰᠢᠬᠢ ᠮᠥᠷ ᠢ᠋ᠶ᠋ᠡᠨ ᠬᠥᠭᠡᠭᠡᠨ ᠠᠮᠠᠨ ᠳ᠋ᠠᠭᠠᠨ ᠪᠤᠪᠠᠲᠤᠨᠠᠨ ᠦᠭᠡᠯᠡᠭᠰᠡᠭᠡᠷ ᠣᠳᠴᠠᠢ ᠃
ᠵᠢᠮᠪᠠ ᠵᠢᠷᠤᠭᠠᠴᠢ ᠰᠢᠭᠤᠳ ᠯᠠ ᠭᠡᠷ ᠲᠡᠭᠡᠨ ᠣᠷᠣᠵᠤ ᠡᠷᠡᠬᠡᠢ ᠳᠠᠷᠤᠮᠠ ᠳᠥᠷᠪᠡᠯᠵᠢᠨ ᠴᠠᠭᠠᠰᠤ ᠬᠠᠢᠴᠢᠯᠠᠪᠠ ᠃ ᠪᠢᠷ ᠢ᠋ᠶ᠋ᠡᠨ ᠪᠣᠳᠣᠭ ᠲᠤ᠌ ᠨᠡᠢᠯᠡᠵᠦ ᠡᠷᠡᠬᠡᠢ ᠳᠠᠷᠤᠮᠠ ᠴᠠᠭᠠᠰᠤᠨ ᠳᠡᠭᠡᠷᠡ ᠪᠡᠨ ᠬᠣᠶᠠᠷ ᠪᠦᠲᠦᠨ ᠵᠠᠭᠠᠨ ᠢ᠋ ᠭᠠᠳᠠᠭᠠ ᠬᠦᠷᠢᠶᠡᠨ ᠳ᠋ᠦ᠍ᠨᠢ ᠲᠤᠯᠭᠠᠵᠤ ᠂ ᠬᠣᠭᠣᠷᠣᠨᠳᠣ ᠨᠢ ᠥᠴᠦᠬᠡᠨ ᠴᠦ᠍ ᠵᠠᠢ ᠦᠭᠡᠢ ᠪᠡᠷ ᠬᠥᠯ ᠲᠣᠯᠣᠭᠠᠢ ᠪᠠᠷ ᠨᠢ ᠵᠥᠷᠢᠭᠦᠯᠡᠨ ᠵᠢᠷᠤᠪᠠ ᠃ ᠬᠣᠶᠠᠷ ᠵᠠᠭᠠᠨ ᠊ᠣ ᠪᠠᠨ ᠳᠣᠲᠣᠭᠤᠷᠬᠢ ᠴᠠᠭᠠᠨ ᠵᠠᠢᠨ ᠳ᠋ᠤ᠌ ᠲᠠᠪᠤ ᠲᠠᠪᠤᠨ ᠵᠠᠭᠤ ᠪᠠᠷ ᠨᠢ ᠳᠠᠪᠬᠤᠷ ᠵᠢᠷᠤᠭᠠᠰᠤ ᠭᠠᠷᠭᠠᠯᠠ ᠃ ᠬᠠᠮᠤᠭ ᠊ᠣᠨ ᠭᠣᠣᠯ ᠳ᠋ᠠᠬᠢ ᠵᠢᠷᠤᠭᠠᠰᠤ ᠪᠠᠷᠤᠭ ᠯᠠ ᠴᠡᠭ ᠲᠡᠳᠦᠢ ᠪᠣᠯᠪᠠᠴᠤ ᠵᠠᠭᠠᠨ ᠊ᠣ ᠳᠦᠷᠰᠦ ᠮᠡᠳᠡᠭᠳᠡᠬᠦ ᠪᠡᠷ ᠪᠣᠯᠪᠠ ᠃ ᠨᠢᠭᠡᠨ ᠼᠦᠨ ᠵᠠᠢ ᠳ᠋ᠤ᠌ ᠲᠡᠢᠨ ᠬᠦ᠌ ᠮᠢᠩᠭᠠᠨ ᠵᠠᠭᠠᠨ ᠢ᠋ ᠪᠠᠭᠲᠠᠭᠠᠨ ᠵᠢᠷᠤᠵᠤ ᠴᠢᠳᠠᠯᠠ ᠃ ᠳᠠᠪᠬᠤᠷ ᠳᠡᠪᠡᠯᠲᠦ ᠭᠤᠶᠤᠯᠭᠠᠴᠢᠨ ᠊ᠣ ᠳᠦᠷᠢ ᠲᠥᠷᠬᠦ ᠡᠢᠨ ᠬᠦ᠌ ᠮᠢᠩᠭᠠᠨ ᠵᠠᠭᠠᠨ ᠪᠣᠯᠤᠨ ᠠᠮᠢᠯᠠᠵᠠᠢ ᠃《 ᠲᠠᠶ᠋ᠢᠭ ᠦᠵᠡᠭᠡ ᠦᠭᠡᠢ ᠪᠢᠴᠢᠭᠡᠴᠢ ᠂ ᠮᠠᠶᠢᠭ᠋ ᠦᠵᠡᠭᠡ ᠦᠭᠡᠢ ᠵᠢᠷᠤᠭᠠᠴᠢ 》 ᠪᠢᠰᠢ ᠭᠡᠳᠡᠭ ᠢ᠋ ᠨᠢ ᠵᠢᠮᠪᠠ ᠳ᠋ᠤ᠌ ᠲᠡᠷᠡ ᠪᠠᠰᠠ ᠤᠬᠠᠭᠠᠷᠠᠭᠤᠯᠵᠤ ᠥᠭᠴᠡᠢ ᠃ ᠮᠡᠷᠭᠡᠨ ᠪᠠᠭ᠍ᠰᠢ ᠨᠢ ᠳᠡᠭᠡᠷᠡ ᠪᠢᠰᠢ ᠲᠡᠷᠡ ᠳᠣᠣᠷᠠ ᠪᠠᠢᠭᠰᠠᠨ ᠢ᠋ ᠴᠦ᠍ ᠮᠡᠳᠡᠵᠡᠢ ᠃
ᠡᠷᠡᠬᠡᠢ ᠳᠠᠷᠤᠮᠠ ᠵᠠᠢ ᠳ᠋ᠤ᠌ ᠪᠠᠭᠲᠠᠭᠰᠠᠨ ᠲᠡᠷᠡ ᠮᠢᠩᠭᠠᠨ ᠵᠠᠭᠠᠨ ᠡᠵᠡᠨ ᠳᠡᠭᠡᠳᠦᠰ ᠊ᠥᠨ ᠰᠣᠨᠢᠨ ᠶᠠᠭᠤᠮᠠ ᠶ᠋ᠢᠨ ᠰᠠᠩ ᠬᠥᠮᠥᠷᠭᠡ ᠳ᠋ᠦ᠍ ᠣᠷᠣᠵᠤ ᠦᠯᠡᠳᠡᠭᠰᠡᠨ ᠪᠣᠯᠪᠠᠴᠤ ᠶᠠᠳᠠᠭᠤ ᠭᠤᠶᠤᠯᠭᠠᠴᠢᠨ ᠊ᠣ ᠤᠬᠠᠭᠠᠨ ᠠ᠋ᠴᠠ ᠲᠥᠷᠥᠭᠰᠡᠨ ᠢ᠋ ᠬᠡᠨ ᠴᠦ᠍ ᠲᠡᠷᠡ ᠴᠠᠭ ᠲᠤ᠌ ᠰᠡᠵᠢᠭ ᠠᠪᠤᠯ ᠦᠭᠡᠢ ᠥᠩᠭᠡᠷᠡᠵᠡᠢ ᠃
ᠢᠷᠡᠯᠲᠡ ᠄ 《 ᠠᠩᠬᠠ ᠳᠤᠮᠳᠠᠳᠤ ᠶᠢᠨ ᠡᠪᠦᠯ ᠦᠨ ᠠᠮᠠᠷᠠᠯᠲᠠ ᠶᠢᠨ ᠤᠩᠰᠢᠭᠤ》 ᠠᠴᠠ ᠬᠠᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠭᠠᠸᠠ
ᠬᠢᠨᠠᠭᠴᠢ᠄ ᠲᠤᠭᠴᠢ ᠰᠠᠷᠠᠨᠠ