ᠳᠤᠭᠲᠤᠢ ᠶᠢᠨ ᠳᠣᠲᠤᠷᠠᠬᠢ ᠬᠥᠮᠦᠨ-ᠠ᠊᠂ ᠫ᠂ ᠴᠧᠬᠤᠸДугтуйн доторх хүн-А, п, Чехов
397ᠳᠤᠭᠲᠤᠢ ᠶᠢᠨ ᠳᠣᠲᠤᠷᠠᠬᠢ ᠬᠥᠮᠦᠨ
ᠠ᠊᠂ ᠫ᠂ ᠴᠧᠬᠤᠸ
᠁ᠮᠢᠨᠦ ᠨᠥᠬᠥᠷ ᠭᠷᠧᠭ ᠬᠡᠯᠡᠨ ᠦ᠌ ᠪᠠᠭᠰᠢ ᠪᠸᠯᠢᠺᠤᠸ ᠭᠡᠭᠴᠢ ᠬᠣᠶᠠᠷ ᠰᠠᠷᠠ ᠶ᠋ᠢᠨ ᠡᠮᠦᠨᠡᠬᠡᠨ ᠮᠠᠨ ᠤ᠋ ᠬᠣᠲᠠ ᠳ᠋ᠤ᠌ ᠨᠠᠰᠤ ᠪᠠᠷᠠᠭᠰᠠᠨ ᠪᠢᠯᠡ᠃ ᠦᠨᠡᠬᠡᠷ ᠬᠠᠴᠢᠨ ᠬᠥᠮᠦᠨ ᠰᠠᠨ᠃ ᠶᠠᠮᠠᠷ ᠰᠠᠢᠬᠠᠨ ᠴᠡᠯᠮᠡᠭ ᠡᠳᠦᠷ ᠴᠦ᠍ ᠲᠡᠷᠡ ᠤᠰᠤᠨ ᠤ᠋ ᠭᠤᠲᠤᠯ ᠡᠮᠦᠰᠴᠦ᠂ ᠪᠣᠷᠣᠭᠠᠨ ᠤ᠋ ᠰᠢᠭᠦᠷ ᠪᠠᠷᠢᠨ᠂ ᠪᠠᠰᠠ ᠵᠠᠪᠠᠯ ᠬᠥᠪᠥᠩ ᠬᠤᠪᠴᠠᠰᠤ ᠲᠠᠢ ᠶᠠᠪᠤᠳᠠᠭ ᠪᠠᠢᠭᠰᠠᠨ ᠶᠤᠮ᠃ ᠡᠩ ᠦ᠋ᠨ ᠴᠠᠭ ᠲᠤ᠌ ᠪᠣᠷᠣᠭᠠᠨ ᠤ᠋ ᠰᠢᠭᠦᠷ ᠢ᠋ᠶ᠋ᠡᠨ ᠲᠣᠭᠳᠣᠢ ᠳ᠋ᠤ᠌ ᠬᠢᠵᠦ᠂ ᠴᠠᠭ ᠢ᠋ᠶ᠋ᠠᠨ ᠰᠠᠷᠠᠯ ᠢᠯᠭᠢᠨ ᠲᠣᠭᠳᠣᠢ ᠳ᠋ᠤ᠌ ᠬᠢᠳᠡᠭ ᠪᠥᠭᠡᠳ ᠬᠠᠷᠠᠨᠳᠠ ᠶ᠋ᠢᠨ ᠲᠣᠩᠭᠣᠷᠠᠭ ᠨᠢ ᠴᠦ᠍ ᠲᠣᠭᠳᠣᠢ ᠳᠣᠲᠣᠷᠠ ᠬᠢᠯᠲᠠᠲᠠᠢ ᠪᠠᠢᠳᠠᠭ᠃ ᠨᠢᠭᠤᠷ ᠴᠢᠷᠠᠢ ᠨᠢ ᠴᠦ᠍ ᠦᠷᠭᠦᠯᠵᠢ ᠳᠡᠪᠡᠯ ᠦ᠋ᠨ ᠢ᠋ᠶ᠋ᠡᠨ ᠪᠣᠰᠬᠠᠭᠰᠠᠨ ᠵᠠᠭᠠᠮᠠᠨ ᠳᠣᠲᠣᠷᠠ ᠰᠢᠷᠭᠢᠵᠦ ᠪᠠᠢᠳᠠᠭ ᠲᠤᠯᠠ ᠮᠥᠨ ᠲᠣᠭᠳᠣᠢ ᠪᠣᠢ ᠮᠡᠲᠦ ᠦᠵᠡᠭᠳᠡᠨᠡ᠃ ᠪᠠᠰᠠ ᠨᠢᠳᠦᠨ ᠳ᠋ᠡᠭᠡᠨ ᠪᠠᠷᠠᠭᠠᠨ ᠰᠢᠯ ᠬᠢᠵᠦ᠂ ᠵᠤᠵᠠᠭᠠᠨ ᠨᠣᠣᠰᠣᠨ ᠴᠠᠮᠴᠠ ᠡᠮᠦᠰᠴᠦ᠂ ᠴᠢᠬᠢ ᠪᠡᠨ ᠬᠥᠪᠥᠩ ᠢ᠋ᠶ᠋ᠡᠷ ᠪᠥᠭᠯᠡᠳᠡᠭ᠃ ᠮᠣᠷᠢᠨ ᠲᠡᠷᠭᠡᠨ ᠳ᠋ᠦ᠍ ᠰᠠᠭᠤᠬᠤ ᠳ᠋ᠠᠭᠠᠨ ᠲᠡᠷᠭᠡᠨ ᠦ᠌ ᠪᠦᠷᠬᠦᠭᠦᠯ ᠢ᠋ ᠪᠣᠰᠬᠠᠭᠤᠯᠳᠠᠭ᠃ ᠨᠢᠭᠡ ᠯᠡ ᠦᠭᠡ ᠪᠡᠷ ᠬᠡᠯᠡᠪᠡᠯ᠂ ᠲᠡᠷᠡ ᠬᠥᠮᠦᠨ ᠦᠷᠭᠦᠯᠵᠢ ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢ ᠬᠠᠯᠢᠰᠤᠨ ᠪᠦᠷᠬᠦᠭᠦᠯ ᠳ᠋ᠦ᠍ ᠳᠤᠭᠲᠤᠢᠯᠠᠵᠤ᠂ ᠭᠠᠳᠠᠨᠠ ᠶ᠋ᠢᠨ ᠨᠥᠯᠦᠭᠡ ᠡᠴᠡ ᠲᠤᠰᠠᠭᠠᠷᠯᠠᠵᠤ ᠰᠠᠯᠭᠠᠬᠤ ᠭᠡᠰᠡᠨ ᠰᠢᠭ ᠪᠣᠳᠣᠯ ᠲᠠᠢ ᠪᠠᠢᠭᠰᠠᠨ ᠪᠢᠯᠡ᠃ ᠪᠣᠳᠠᠲᠤ ᠠᠮᠢᠳᠤᠷᠠᠯ ᠲᠡᠭᠦᠨ ᠢ᠋ ᠬᠠᠳᠬᠤᠵᠤ ᠠᠶᠤᠯᠭᠠᠵᠤ ᠪᠠᠢᠳᠠᠭ ᠲᠤᠯᠠ ᠬᠡᠵᠢᠶᠡᠳᠡ ᠰᠡᠳᠬᠢᠯ ᠵᠣᠪᠠᠵᠤ ᠪᠠᠢᠳᠠᠭ᠃ ᠢᠮᠠᠭᠲᠠ ᠯᠠ ᠥᠩᠭᠡᠷᠡᠭᠰᠡᠨ ᠦ᠌ ᠪᠤᠶᠤ ᠶᠡᠷᠦ ᠪᠠᠢᠭᠠᠳᠤᠢ ᠶᠠᠭᠤᠮᠠ ᠶ᠋ᠢ ᠮᠠᠭᠲᠠᠳᠠᠭ ᠨᠢ ᠥᠪᠡᠷ ᠦ᠋ᠨ ᠠᠶᠤᠮᠠᠬᠠᠢ ᠪᠠ ᠣᠳᠣ ᠶ᠋ᠢᠨ ᠶᠠᠭᠤᠮᠠ ᠶ᠋ᠢ ᠵᠢᠭᠰᠢᠨ ᠦᠵᠡᠳᠡᠭ ᠢ᠋ᠶ᠋ᠡᠨ ᠵᠥᠪᠲᠥᠭᠡᠬᠦ ᠶ᠋ᠢᠨ ᠲᠥᠯᠥᠭᠡ ᠪᠠᠢᠵᠤ ᠮᠡᠳᠡᠨᠡ᠃ ᠪᠠᠰᠠ ᠲᠡᠭᠦᠨ ᠦ᠌ ᠵᠢᠭᠠᠵᠤ ᠪᠠᠢᠭᠠ ᠡᠷᠲᠡᠨ ᠦ᠌ ᠬᠡᠯᠡ ᠨᠢ ᠴᠦ᠍ ᠦᠨᠡᠨ ᠳ᠋ᠡᠭᠡᠨ ᠪᠣᠳᠠᠲᠤ ᠠᠮᠢᠳᠤᠷᠠᠯ ᠡᠴᠡ ᠨᠢᠭᠤᠭᠳᠠᠬᠤ ᠳ᠋ᠤᠨᠢ ᠬᠠᠯᠬᠠ ᠪᠣᠯᠬᠤ ᠤᠰᠤᠨ ᠭᠤᠲᠤᠯ᠂ ᠪᠣᠷᠣᠭᠠᠨ ᠤ᠋ ᠰᠢᠬᠦᠷ ᠲᠡᠢ ᠠᠳᠠᠯᠢ ᠵᠦᠢᠯ ᠪᠠᠢᠵᠠᠢ᠃
ᠪᠸᠯᠢᠺᠤᠸ ᠥᠪᠡᠷ ᠦ᠋ᠨ ᠦᠵᠡᠯ ᠰᠠᠨᠠᠭᠠ ᠪᠠᠨ ᠴᠤ᠌ ᠮᠥᠨ ᠲᠣᠭᠳᠣᠢ ᠳᠣᠲᠣᠷᠠ ᠳᠠᠯᠳᠠᠯᠠᠬᠤ ᠶ᠋ᠢ ᠶᠡᠬᠡᠳᠡ ᠬᠢᠴᠢᠶᠡᠨ ᠣᠷᠣᠯᠳᠣᠳᠠᠭ᠃ ᠁ ᠬᠣᠲᠠ ᠳ᠋ᠤ᠌ ᠵᠦᠴᠦᠭᠡ ᠶ᠋ᠢᠨ ᠺᠯᠦ᠋ᠪ ᠪᠤᠶᠤ ᠤᠩᠰᠢᠯᠭᠠ ᠶ᠋ᠢᠨ ᠭᠠᠵᠠᠷ᠂ ᠴᠠᠢ ᠶ᠋ᠢᠨ ᠭᠠᠵᠠᠷ ᠪᠠᠢᠭᠤᠯᠬᠤ ᠶ᠋ᠢ ᠵᠠᠰᠠᠭ ᠵᠠᠬᠢᠷᠭᠠ ᠡᠴᠡ ᠵᠥᠪᠰᠢᠶᠡᠷᠡᠭᠰᠡᠨ ᠢ᠋ ᠦᠵᠡᠪᠡᠯ᠂ ᠪᠸᠯᠢᠺᠤᠸ ᠲᠣᠯᠣᠭᠠᠢ ᠰᠡᠭᠰᠦᠷᠦᠨ ᠨᠠᠮ ᠳᠠᠭᠤᠨ ᠢ᠋ᠶ᠋ᠠᠷ:
《ᠬᠡᠯᠡᠯᠭᠡᠨ ᠦᠭᠡᠢ᠂ ᠪᠣᠯᠬᠤ ᠨᠢ ᠴᠦ᠍ ᠪᠣᠯᠤᠨᠠ᠂ ᠰᠠᠢᠨ ᠯᠠ ᠬᠡᠷᠡᠭ᠃ ᠭᠡᠪᠡᠴᠦ ᠶᠠᠮᠠᠷ ᠨᠢᠭᠡᠨ ᠶᠠᠪᠤᠳᠠᠯ ᠭᠠᠷᠤᠭᠤᠵᠠᠢ》 ᠭᠡᠨᠡ᠃
ᠡᠭᠦᠨᠴᠢᠯᠡᠨ ᠠᠯᠢᠪᠠ ᠨᠢᠭᠡᠨ ᠳᠦᠷᠢᠮ ᠲᠣᠭᠲᠠᠭᠠᠯ᠂ ᠡᠩ ᠦ᠋ᠨ ᠶᠣᠰᠣ ᠵᠢᠷᠤᠮ ᠡᠴᠡ ᠵᠥᠷᠢᠴᠡᠭᠰᠡᠨ ᠶᠠᠪᠤᠳᠠᠯ ᠭᠠᠷᠪᠠᠯ᠂ ᠬᠡᠳᠦᠢᠪᠡᠷ ᠲᠡᠭᠦᠨ ᠳ᠋ᠦ᠍ ᠬᠣᠯᠪᠣᠭᠳᠠᠯ ᠦᠭᠡᠢ ᠪᠣᠯᠪᠠᠴᠤ ᠲᠡᠷᠡ ᠡᠳᠦᠷ ᠲᠡᠷᠡ ᠤᠴᠢᠷ ᠲᠤ᠌ ᠶᠡᠬᠡᠯᠡ ᠭᠤᠨᠢᠭᠯᠠᠨ ᠭᠤᠳᠤᠷᠠᠳᠠᠭ ᠪᠠᠢᠯᠠ᠃ ᠬᠡᠷᠪᠡ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠶ᠋ᠢᠨ ᠰᠤᠷᠤᠭᠴᠢ ᠦᠢᠮᠡᠭᠡᠨ ᠭᠠᠷᠭᠠᠭᠰᠠᠨ ᠭᠡᠬᠦ ᠶᠠᠷᠢᠶᠠ ᠴᠤᠤᠷᠬᠠᠯ ᠭᠠᠷᠬᠤ᠂ ᠡᠰᠡᠬᠦᠯᠡ ᠡᠮᠡᠭᠲᠡᠢ ᠪᠠᠭᠰᠢ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠲᠠᠢ ᠬᠠᠮᠲᠤ ᠶᠠᠪᠤᠵᠤ ᠦᠳᠡᠰᠢ ᠣᠷᠣᠢ ᠪᠤᠴᠠᠵᠤ ᠢᠷᠡᠪᠡᠯ ᠪᠸᠯᠢᠺᠤᠸ ᠤ᠋ᠨ ᠰᠡᠳᠬᠢᠯ ᠶᠡᠬᠡᠳᠡ ᠵᠣᠪᠠᠵᠤ᠂ ᠰᠡᠵᠢᠭᠯᠡᠯ᠂ ᠲᠣᠭᠳᠣᠢ ᠳᠣᠲᠣᠷᠠᠬᠢ ᠵᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠢᠳᠡᠨ ᠢ᠋ ᠦᠨᠡᠬᠡᠷ ᠰᠢᠨᠠᠯᠭᠠᠳᠠᠭ ᠪᠢᠯᠡ᠃ ᠡᠮᠡᠭᠲᠡᠢᠴᠦᠳ ᠦ᠋ᠨ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠰᠠᠬᠢᠯᠭᠠ ᠦᠭᠡᠢᠳᠡᠵᠦ ᠪᠠᠢᠨᠠ᠂ ᠬᠢᠴᠢᠶᠡᠯ ᠦ᠋ᠨ ᠲᠠᠰᠤᠭ ᠳᠣᠲᠣᠷᠠ ᠡᠷᠡᠭᠲᠡᠢᠴᠦᠳ ᠦ᠋ᠨ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠶ᠋ᠢᠨ ᠰᠤᠷᠤᠭᠴᠢ ᠴᠤ᠌ ᠭᠡᠰᠡᠨ ᠪᠦᠷ ᠰᠠᠬᠢᠯᠭᠠ ᠦᠭᠡᠢᠳᠡᠵᠦ ᠪᠠᠢᠨᠠ᠂ ᠬᠢᠴᠢᠶᠡᠯ ᠦ᠋ᠨ ᠭᠡᠷ ᠳᠣᠲᠣᠷᠠ ᠱᠤᠤᠭᠢᠶᠠᠨ ᠦᠢᠮᠡᠭᠡᠨ ᠲᠡᠢ ᠪᠠᠢᠨᠠ᠃ ᠠᠶᠠ᠂ ᠡᠨᠡ ᠦᠯᠦ ᠵᠣᠬᠢᠬᠤ ᠪᠠᠢᠳᠠᠯ᠂ ᠡᠷᠬᠡ ᠪᠠᠷᠢᠭᠴᠢᠳ ᠤ᠋ᠨ ᠴᠢᠬᠢᠨ ᠳ᠋ᠦ᠍ ᠣᠷᠣᠬᠤ ᠪᠣᠯᠤᠭᠤᠵᠠᠢ᠂ ᠶᠠᠮᠠᠷ ᠨᠢᠭᠡᠨ ᠪᠤᠳᠤᠯᠢᠶᠠᠨ ᠭᠠᠷᠤᠭᠤᠵᠠᠢ ᠭᠡᠵᠦ ᠶᠠᠩᠰᠢᠨᠠ᠃ ᠪᠠᠰᠠ ᠶᠡᠷᠦ ᠨᠢ ᠬᠣᠶᠠᠳᠤᠭᠠᠷ ᠠᠩᠭᠢ ᠡᠴᠡ ᠫᠸᠲᠷᠤᠸ ᠢ᠋᠂ ᠳᠥᠷᠪᠡᠳᠦᠭᠡᠷ ᠠᠩᠭᠢ ᠡᠴᠡ ᠶᠸᠭᠤᠷᠤᠸ ᠢ᠋ ᠬᠥᠭᠡᠭᠡᠪᠡᠯ ᠰᠠᠢᠨ ᠰᠠᠢᠬᠠᠨ ᠪᠣᠯᠬᠤ ᠶᠤᠮ ᠭᠡᠨᠡ᠃ ᠶᠠᠭᠠᠬᠢᠭᠠᠳ ᠶᠤᠮ ᠪᠤᠤ ᠮᠡᠳᠡ! ᠲᠡᠭᠦᠨ ᠦ᠌ ᠭᠠᠰᠠᠯᠤᠯᠲᠠ ᠭᠤᠳᠤᠷᠠᠯᠲᠠ ᠪᠠ ᠥᠭᠡᠳᠡ ᠦᠭᠡᠢ ᠴᠣᠩᠬᠢᠭᠠᠷ ᠴᠢᠷᠠᠢ ᠳᠡᠭᠡᠷᠡᠬᠢ ᠪᠠᠷᠠᠭᠠᠨ ᠥᠩᠭᠡ ᠶ᠋ᠢᠨ ᠨᠢᠳᠦᠨ ᠰᠢᠯ ᠨᠢ ᠪᠢᠳᠡᠨ ᠢ᠋ ᠰᠢᠨᠠᠯᠭᠠᠵᠤ ᠳᠠᠷᠤᠭᠰᠠᠭᠠᠷ ᠪᠠᠢᠭᠠᠳ ᠫᠸᠲᠷᠤᠸ ᠶᠸᠭᠤᠷᠦᠸ ᠬᠣᠶᠠᠷ ᠤ᠋ᠨ ᠰᠠᠬᠢᠯᠭᠠ ᠪᠠᠲᠤ ᠶ᠋ᠢᠨ ᠦᠨᠡᠯᠡᠯᠲᠡ ᠡᠴᠡ ᠨᠢ ᠳ᠋ᠦᠩ ᠬᠠᠰᠤᠭᠤᠯᠵᠤ ᠬᠣᠶᠠᠭᠤᠯᠠ ᠶ᠋ᠢ ᠬᠣᠷᠢᠭᠤᠯᠤᠭᠠᠳ᠂ ᠰᠡᠭᠦᠯ ᠳ᠋ᠦ᠍ᠨᠢ ᠬᠣᠶᠠᠭᠤᠯᠠ ᠶ᠋ᠢ ᠬᠥᠭᠡᠭᠡᠯᠭᠡᠵᠦ ᠰᠠᠨᠠᠭᠠ ᠨᠢ ᠠᠮᠠᠷᠠᠭᠰᠠᠨ ᠪᠢᠯᠡ᠃ ᠁
ᠪᠸᠯᠢᠺᠤᠸ ᠪᠢᠳᠡ ᠬᠣᠶᠠᠷ ᠨᠢᠭᠡ ᠪᠠᠢᠷᠢ ᠳ᠋ᠤ᠌ ᠬᠠᠮᠲᠤ ᠰᠠᠭᠤᠵᠤ ᠪᠠᠢᠭᠰᠠᠨ᠃ ᠁ ᠪᠸᠯᠢᠺᠤᠸ ᠤ᠋ᠨ ᠤᠨᠲᠠᠬᠤ ᠲᠠᠰᠤᠭ ᠨᠢ ᠬᠠᠢᠷᠴᠠᠭ ᠮᠡᠲᠦ ᠵᠢᠵᠢᠭ᠂ ᠬᠡᠪᠲᠡᠬᠦ ᠣᠷᠣ ᠳ᠋ᠤᠨᠢ ᠪᠢᠲᠡᠭᠦᠦ ᠬᠥᠰᠢᠭᠡ ᠲᠠᠲᠠᠭᠤᠰᠤᠲᠠᠢ ᠪᠠᠢᠳᠠᠭ ᠪᠥᠭᠡᠳ ᠣᠷᠣᠨ ᠳ᠋ᠠᠭᠠᠨ ᠬᠡᠪᠲᠡᠮᠡᠭᠴᠡ ᠬᠥᠨᠵᠢᠯᠡ ᠪᠡᠷ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠪᠠᠨ ᠪᠦᠲᠡᠭᠡᠨᠡ᠃ ᠲᠠᠰᠤᠭ ᠳᠣᠲᠣᠷᠠ ᠨᠢ ᠬᠠᠯᠠᠭᠤᠨ ᠪᠦᠭᠴᠢᠮ᠂ ᠲᠦᠭᠵᠢᠭᠰᠡᠨ ᠬᠠᠭᠠᠯᠭᠠ ᠨᠢ ᠬᠠᠤᠭᠢᠨᠠᠨ ᠳᠤᠤᠭᠠᠷᠤᠨᠠ᠂ ᠬᠣᠭᠣᠯᠠᠨ ᠭᠡᠷ ᠡᠴᠡ ᠨᠢ ᠠᠶᠤᠮᠰᠢᠭᠲᠤ ᠰᠠᠨᠠᠭᠠ ᠠᠯᠳᠠᠬᠤ ᠮᠡᠲᠦ ᠳᠠᠭᠤᠨ ᠰᠣᠨᠣᠰᠳᠠᠨᠠ᠃ ᠁ ᠪᠸᠯᠢᠺᠤᠸ᠂ ᠬᠥᠨᠵᠢᠯᠡ ᠶ᠋ᠢᠨ ᠢ᠋ᠶ᠋ᠡᠨ ᠳᠣᠲᠣᠷᠠ ᠠᠶᠤᠵᠤ ᠳᠠᠭᠵᠢᠨ ᠬᠡᠪᠲᠡᠳᠡᠭ᠃ ᠬᠥᠮᠦᠨ ᠢᠷᠡᠭᠡᠳ ᠠᠯᠠᠴᠢᠬᠠᠬᠤ ᠪᠣᠯᠪᠠ ᠤᠤ᠂ ᠬᠤᠯᠠᠭᠠᠢᠴᠢ ᠣᠷᠣᠵᠤ ᠢᠷᠡᠬᠦ ᠪᠣᠯᠪᠠ ᠤᠤ ᠭᠡᠵᠦ ᠡᠮᠢᠶᠡᠭᠰᠡᠭᠡᠷ᠂ ᠰᠥᠨᠢ ᠲᠤᠷᠰᠢ ᠮᠠᠭᠤᠬᠠᠢ ᠵᠡᠭᠦᠳᠦ ᠵᠡᠭᠦᠳᠦᠯᠡᠳᠡᠭ ᠪᠠᠢᠵᠠᠢ᠃ ᠥᠷᠯᠥᠭᠡ ᠪᠢᠳᠡ ᠬᠠᠮᠲᠤ ᠪᠠᠷ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠣᠴᠢᠬᠤ ᠵᠠᠮ ᠳ᠋ᠤ᠌ ᠴᠢᠷᠠᠢ ᠨᠢ ᠤᠢᠳᠬᠠᠷ ᠲᠠᠢ ᠵᠡᠪᠡᠬᠡᠢᠷᠡᠨ ᠴᠠᠢᠵᠤ ᠪᠠᠢᠳᠠᠭ᠃ ᠪᠢᠳᠡᠨ ᠦ᠌ ᠣᠴᠢᠵᠤ ᠶᠠᠪᠤᠭᠠ ᠣᠯᠠᠨ ᠬᠥᠮᠦᠰ ᠪᠦᠬᠦᠢ ᠰᠤᠷᠭᠠᠭᠤᠯᠢ ᠲᠡᠭᠦᠨ ᠢ᠋ ᠠᠶᠤᠯᠭᠠᠨ ᠵᠢᠭᠰᠢᠭᠦᠯᠵᠦ ᠪᠣᠢ ᠨᠢ ᠡᠷᠬᠡᠲᠡᠨ ᠪᠦᠬᠦᠨ ᠡᠴᠡ ᠨᠢ ᠢᠯᠡᠳᠲᠡ ᠦᠵᠡᠭᠳᠡᠨᠡ᠃ ᠨᠠᠳᠠ ᠲᠠᠢ ᠬᠠᠮᠲᠤ ᠶᠠᠪᠤᠬᠤ ᠳ᠋ᠤᠨᠢ ᠴᠤ᠌ ᠬᠠᠵᠢᠭ ᠵᠠᠩ ᠲᠠᠢ ᠲᠡᠭᠦᠨ ᠳ᠋ᠦ᠍ ᠶᠡᠬᠡ ᠬᠡᠴᠡᠭᠦᠦ ᠰᠠᠨᠠᠭᠳᠠᠵᠤ ᠪᠠᠢᠭᠠ ᠨᠢ ᠢᠯᠡᠷᠬᠡᠢ ᠪᠠᠢᠳᠠᠭ᠃
ᠲᠠᠪᠤᠨ ᠰᠠᠷᠠ ᠶ᠋ᠢᠨ ᠨᠢᠭᠡᠨ ᠦ᠌ ᠭᠠᠷᠠᠭ ᠤ᠋ᠨ ᠡᠳᠦᠷ᠂ ᠪᠠᠭᠰᠢ ᠰᠤᠷᠤᠭᠴᠢᠳ ᠴᠥᠮ ᠰᠤᠷᠭᠠᠭᠤᠯᠢ ᠳᠡᠭᠡᠷᠡ ᠴᠤᠭᠯᠠᠷᠠᠭᠠᠳ ᠣᠢ ᠤᠷᠤᠭᠤ ᠶᠠᠪᠠᠭᠠᠨ ᠶᠠᠪᠤᠬᠤ ᠪᠠᠷ ᠬᠡᠯᠡᠯᠴᠡᠭᠰᠡᠨ ᠲᠤᠯᠠ ᠡᠨᠡ ᠡᠳᠦᠷ ᠪᠢᠳᠡ ᠭᠡᠷ ᠡᠴᠡ ᠪᠡᠨ ᠭᠠᠷᠴᠤ ᠶᠠᠪᠤᠬᠤ ᠳ᠋ᠤ᠌ ᠪᠸᠯᠢᠺᠤᠸ ᠤ᠋ᠨ ᠨᠢᠭᠤᠷ ᠪᠠᠷᠠᠭᠠᠨ ᠡᠭᠦᠯᠡᠨ ᠡᠴᠡ ᠪᠠᠰᠠ ᠴᠢᠨᠠᠭᠰᠢ ᠪᠠᠢᠪᠠ᠃
ᠪᠢ ᠲᠡᠭᠦᠨ ᠢ᠋ ᠦᠷᠦ ᠡᠪᠡᠳᠪᠡ᠃ ᠪᠢᠳᠡ ᠶᠠᠪᠤᠵᠤ ᠪᠠᠢᠭᠰᠠᠨ ᠴᠢᠨᠢ ᠭᠡᠨᠡᠳᠲᠡ ᠺᠤᠸᠨᠯᠸᠨᠺᠤ ᠳᠤᠭᠤᠢ ᠤᠨᠤᠨ ᠢᠷᠡᠪᠡ᠃ ᠬᠣᠢᠨᠠ ᠡᠴᠡ ᠸᠠᠷᠸᠨᠺᠠ ᠮᠥᠨ ᠳᠤᠭᠤᠢ ᠤᠨᠤᠵᠤ᠂ ᠴᠢᠷᠠᠢ ᠨᠢ ᠤᠯᠠᠢᠵᠤ᠂ ᠵᠦᠳᠡᠷᠡᠭᠰᠡᠨ ᠮᠠᠶᠢᠭᠲᠠᠢ ᠶᠠᠪᠤᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠪᠠᠶᠠᠷ ᠴᠡᠩᠭᠡᠯ ᠲᠡᠢ ᠪᠠᠢᠪᠠ᠃
《ᠪᠢᠳᠡ ᠤᠷᠢᠳᠠᠪᠠᠷ ᠶᠠᠪᠤᠵᠤ ᠪᠠᠢᠶᠠ᠃ ᠥᠨᠥᠳᠥᠷ ᠮᠠᠰᠢ ᠰᠠᠢᠬᠠᠨ ᠡᠳᠦᠷ ᠪᠠᠢᠨᠠ! ᠰᠠᠢᠬᠠᠨ ᠭᠡᠳᠡᠭ ᠨᠢ ᠶᠠᠭᠠᠬᠢᠬᠤ ᠪᠢᠯᠡ!》 ᠭᠡᠵᠦ ᠸᠠᠷᠸᠨᠺᠠ ᠬᠠᠰᠬᠢᠷᠤᠭᠠᠳ᠂ ᠬᠣᠶᠠᠭᠤᠯᠠ ᠠᠯᠠᠭᠠ ᠪᠣᠯᠪᠠ᠃
ᠪᠸᠯᠢᠺᠤᠸ ᠮᠠᠨᠢ ᠰᠦᠷᠳᠡᠨ ᠠᠶᠤᠭᠰᠠᠨ ᠮᠡᠲᠦ ᠪᠣᠯᠵᠤ᠂ ᠴᠢᠷᠠᠢ ᠨᠢ ᠬᠥᠬᠡᠷᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠬᠤᠪᠠᠬᠠᠢᠷᠠᠨ ᠴᠠᠢᠵᠤ᠂ ᠮᠡᠯᠡ ᠭᠠᠢᠬᠠᠵᠤ ᠴᠡᠯ ᠬᠥᠬᠡᠷᠡᠨ ᠨᠠᠳᠠ ᠡᠴᠡ ᠠᠰᠠᠭᠤᠭᠰᠠᠨ ᠨᠢ:
《ᠠᠢ ᠪᠤᠷᠬᠠᠨ ᠮᠢᠨᠢ! ᠡᠨᠡ ᠶᠠᠭᠤ ᠪᠣᠯᠪᠠ ? ᠮᠢᠨᠦ ᠬᠠᠷᠠᠭᠠ ᠨᠠᠮᠠᠶ᠋ᠢ ᠬᠠᠭᠤᠷᠴᠤ ᠪᠠᠢᠨᠠ ᠤᠤ? ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠶ᠋ᠢᠨ ᠪᠠᠭᠰᠢ ᠪᠠᠢᠭᠠᠳ ᠥᠬᠢᠨ ᠬᠥᠮᠦᠨ ᠲᠡᠢ ᠳᠤᠭᠤᠢ ᠤᠨᠤᠵᠤ ᠶᠠᠪᠤᠬᠤ ᠨᠢ ᠵᠣᠬᠢᠰᠲᠠᠢ ᠬᠡᠷᠡᠭ ᠦᠦ?》 ᠭᠡᠬᠦ ᠳ᠋ᠦ᠍ ᠪᠢ:
《ᠵᠣᠬᠢᠰ ᠦᠭᠡᠢ ᠶᠠᠭᠤ ᠪᠠᠢᠬᠤ ᠪᠣᠢ? ᠤᠨᠤᠵᠤ ᠯᠠ ᠪᠠᠢᠭ᠂ ᠪᠠᠶᠠᠷ ᠴᠡᠩᠭᠡᠯᠲᠡᠢ ᠵᠤᠭᠠᠴᠠᠭ》 ᠭᠡᠬᠦ ᠳ᠋ᠦ᠍ ᠪᠸᠯᠢᠺᠤᠸ ᠮᠢᠨᠦ ᠲᠠᠢᠪᠤᠩ ᠪᠠᠢᠳᠠᠯ ᠢ᠋ ᠬᠠᠷᠠᠵᠤ ᠭᠠᠢᠬᠠᠨ ᠬᠠᠰᠬᠢᠷᠤᠨ: 《ᠲᠠ ᠶᠠᠭᠤ ᠬᠡᠯᠡᠵᠦ ᠪᠠᠢᠨᠠ ᠪᠣᠢ?》 ᠭᠡᠳ ᠭᠡᠯᠮᠡᠭᠳᠡᠭᠰᠡᠨ ᠳ᠋ᠡᠭᠡᠨ ᠴᠢᠨᠠᠭᠰᠢ ᠶᠠᠪᠤᠬᠤ ᠶ᠋ᠢ ᠪᠣᠯᠢᠵᠤ ᠭᠡᠷ ᠲᠡᠭᠡᠨ ᠪᠤᠴᠠᠪᠠ᠃
ᠮᠠᠷᠭᠠᠰᠢ ᠨᠢ ᠪᠸᠯᠢᠺᠤᠸ ᠮᠥᠨ ᠯᠡ ᠭᠠᠷ ᠢ᠋ᠶ᠋ᠠᠨ ᠨᠤᠬᠤᠯᠠᠵᠤ ᠰᠡᠳᠬᠢᠯ ᠰᠠᠨᠠᠭᠠ ᠨᠢ ᠠᠮᠤᠷ ᠦᠭᠡᠢ ᠪᠠᠢᠪᠠ᠃ ᠨᠢᠭᠤᠷ ᠴᠢᠷᠠᠢ ᠡᠴᠡ ᠨᠢ ᠦᠵᠡᠬᠦ ᠳ᠋ᠦ᠍ ᠡᠪᠡᠳᠴᠢᠨ ᠳ᠋ᠦ᠍ ᠨᠡᠷᠪᠡᠭᠳᠡᠭᠰᠡᠨ ᠨᠢ ᠢᠯᠡᠳᠲᠡ ᠮᠡᠳᠡᠭᠳᠡᠨᠡ᠃ ᠢᠩᠭᠢᠵᠦ ᠪᠠᠢᠭᠠᠳ ᠬᠢᠴᠢᠶᠡᠯ ᠪᠠᠭᠤᠬᠤ ᠡᠴᠡ ᠤᠷᠢᠳ ᠬᠠᠷᠢᠴᠢᠬᠠᠭᠰᠠᠨ ᠨᠢ ᠲᠡᠭᠦᠨ ᠦ᠌ ᠨᠢᠭᠡ ᠨᠠᠰᠤᠨ ᠳ᠋ᠤ᠌ ᠠᠩᠬᠠ ᠤᠳᠠᠭᠠ ᠭᠠᠷᠤᠭᠰᠠᠨ ᠶᠠᠪᠤᠳᠠᠯ ᠪᠢᠯᠡ᠃ ᠦᠳᠡ ᠶ᠋ᠢᠨ ᠬᠣᠭᠣᠯᠠ ᠴᠤ᠌ ᠢᠳᠡᠭᠰᠡᠨ ᠦᠭᠡᠢ᠃ ᠲᠡᠷᠡ ᠬᠢᠷᠢ ᠵᠤᠨ ᠤ᠋ ᠴᠠᠭ ᠪᠣᠯᠴᠢᠬᠠᠭᠰᠠᠨ ᠪᠣᠯᠪᠠᠴᠤ ᠪᠸᠯᠢᠺᠤᠸ ᠳᠤᠯᠠᠭᠠᠨ ᠬᠤᠪᠴᠠᠯᠠᠵᠤ ᠪᠦᠷᠦᠢ ᠪᠡᠷ ᠺᠤᠸᠨᠯᠸᠨᠺᠤ ᠶ᠋ᠢᠨ ᠭᠡᠷ ᠤᠷᠤᠭᠤ ᠮᠠᠢᠵᠢᠭᠢᠨᠠᠪᠠ᠃ ᠸᠠᠷᠸᠨᠺᠠ ᠭᠡᠷ ᠲᠡᠭᠡᠨ ᠪᠠᠢᠭᠠ ᠦᠭᠡᠢ ᠲᠤᠯᠠ ᠭᠠᠭᠴᠠᠬᠠᠨ ᠳᠡᠭᠦᠦ ᠲᠡᠢ ᠨᠢ ᠤᠴᠠᠷᠠᠵᠠᠢ᠃
《ᠮᠣᠷᠢᠯᠠᠵᠤ ᠰᠠᠭᠤ》 ᠭᠡᠵᠦ ᠺᠤᠸᠨᠯᠸᠨᠺᠤ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠴᠤ ᠬᠦᠢᠲᠡᠨ ᠢ᠋ᠶ᠋ᠡᠷ ᠥᠭᠦᠯᠡᠪᠡ᠃ ᠪᠸᠯᠢᠺᠤᠸ ᠤᠳᠠᠰᠬᠢᠭᠡᠳ ᠤᠢᠳᠬᠠᠷ ᠲᠠᠢ ᠳᠣᠣᠷᠠ ᠳᠠᠭᠤᠨ ᠢ᠋ᠶ᠋ᠠᠷ ᠥᠭᠦᠯᠡᠭᠰᠡᠨ ᠨᠢ:
《ᠪᠢ ᠪᠣᠯ ᠤᠳᠠᠭᠠᠨ ᠵᠢᠯ ᠠᠯᠪᠠ ᠬᠠᠭᠠᠵᠤ ᠪᠣᠢ ᠪᠥᠭᠡᠳ ᠬᠠᠷᠢᠨ ᠲᠠ ᠰᠠᠶᠢ ᠠᠯᠪᠠ ᠬᠠᠭᠠᠵᠤ ᠡᠬᠢᠯᠡᠵᠦ ᠪᠣᠢ ᠲᠤᠯᠠ ᠪᠢ ᠠᠬᠠ ᠬᠥᠮᠦᠨ ᠦ᠌ ᠬᠤᠪᠢ ᠳ᠋ᠤ᠌ ᠲᠠᠨ ᠢ᠋ ᠢᠳᠬᠠᠬᠤ ᠶᠠᠪᠤᠳᠠᠯ ᠪᠣᠯ ᠮᠢᠨᠦ ᠡᠭᠦᠷᠭᠡ ᠭᠡᠵᠦ ᠪᠣᠳᠣᠨᠠ᠃ ᠲᠠ ᠳᠤᠭᠤᠢ ᠤᠨᠤᠵᠤ ᠵᠤᠭᠠᠴᠠᠵᠤ ᠪᠠᠢᠨᠠ᠂ ᠡᠨᠡ ᠪᠣᠯ ᠵᠠᠯᠠᠭᠤᠰ ᠢ᠋ ᠬᠥᠮᠦᠵᠢᠭᠦᠯᠦᠭᠴᠢ ᠬᠥᠮᠦᠨ ᠳ᠋ᠦ᠍ ᠶᠡᠷᠦ ᠵᠣᠬᠢᠰ ᠦᠭᠡᠢ ᠬᠡᠷᠡᠭ!》 ᠭᠡᠪᠡ᠃
《ᠶᠠᠭᠠᠬᠢᠭᠠᠳ ᠲᠡᠷᠡ ᠪᠣᠢ?》 ᠭᠡᠵᠦ ᠺᠤᠸᠨᠯᠸᠨᠺᠤ ᠪᠦᠳᠦᠭᠦᠨ ᠳᠠᠭᠤᠨ ᠢ᠋ᠶ᠋ᠠᠷ ᠠᠰᠠᠭᠤᠪᠠ᠃
《ᠮᠢᠬᠠᠢᠯ ᠰᠸᠢᠴᠧ ᠮᠢᠨᠢ᠂ ᠡᠭᠦᠨ ᠳ᠋ᠦ᠍ ᠲᠠᠢᠯᠪᠤᠷᠢᠯᠠᠬᠤ ᠬᠡᠷᠡᠭ ᠶᠠᠭᠤ ᠪᠠᠢᠬᠤ ᠪᠣᠢ! ᠡᠨᠡ ᠨᠢ ᠣᠢᠯᠠᠭᠠᠮᠵᠢ ᠦᠭᠡᠢ ᠪᠠᠢᠨᠠ ᠭᠡᠵᠦ ᠦᠦ! ᠬᠡᠷᠪᠡ ᠪᠠᠭᠰᠢ ᠨᠢ ᠳᠤᠭᠤᠢ ᠲᠠᠢ ᠶᠠᠪᠤᠬᠤ ᠠᠬᠤᠯᠠ ᠰᠤᠷᠤᠭᠴᠢᠳ ᠢ᠋ ᠶᠠᠭᠠᠬᠢᠵᠤ ᠰᠠᠢᠨ ᠵᠦᠭ ᠵᠢᠯᠣᠭᠣᠳᠬᠤ ᠪᠣᠢ? ᠲᠡᠳᠡ ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠬᠥᠯ ᠬᠢᠵᠦ ᠶᠠᠪᠤᠬᠤ ᠬᠥᠮᠦᠰ ᠯᠡ ᠪᠣᠯᠤᠨᠠ! ᠳᠤᠭᠤᠢ ᠤᠨᠤᠬᠤ ᠶ᠋ᠢ ᠵᠥᠪᠰᠢᠶᠡᠷᠡᠭᠰᠡᠨ ᠲᠣᠳᠣᠷᠬᠠᠢ ᠬᠠᠤᠯᠢ ᠦᠭᠡᠢ ᠤᠴᠢᠷ ᠡᠴᠡ ᠪᠣᠯᠬᠤ ᠦᠭᠡᠢ ᠰᠢᠦ᠃ ᠥᠴᠥᠭᠡᠳᠦᠷ ᠪᠢ ᠦᠨᠡᠬᠡᠷ ᠠᠶᠤᠵᠤ ᠰᠣᠴᠢᠪᠠ! ᠪᠢ ᠲᠠᠨ ᠤ᠋ ᠡᠭᠡᠴᠢ ᠶ᠋ᠢ ᠦᠵᠡᠮᠡᠭᠴᠡ ᠨᠢᠳᠦ ᠪᠦᠷᠬᠦᠵᠦ ᠬᠠᠷᠠᠩᠭᠤᠢᠯᠠᠪᠠ᠃ ᠨᠢᠭᠡᠨ ᠠᠪᠠᠬᠠᠢ ᠡᠰᠡᠬᠦᠯᠡ ᠨᠢᠭᠡᠨ ᠥᠬᠢᠨ ᠬᠥᠮᠦᠨ ᠬᠠᠷᠢᠨ ᠳᠤᠭᠤᠢ ᠤᠨᠤᠬᠤ ᠭᠡᠰᠡᠨ ᠴᠢᠨᠢ - ᠡᠨᠡ ᠦᠨᠡᠬᠡᠷ ᠠᠶᠤᠮᠰᠢᠭᠲᠠᠢ ᠠᠵᠢ!》
《ᠲᠠᠨ ᠤ᠋ ᠰᠠᠨᠠᠭᠠ ᠪᠠᠷ ᠪᠣᠯ ᠶᠠᠭᠠᠬᠢᠬᠤ ᠪᠣᠢ?》
《ᠨᠠᠳᠠ᠂ ᠲᠠᠨ ᠢ᠋ ᠢᠳᠬᠠᠬᠤ ᠯᠠ ᠬᠡᠷᠡᠭᠲᠡᠢ ᠪᠠᠢᠨᠠ᠂ ᠮᠢᠬᠠᠢᠯ ᠰᠸᠢᠴᠧ ᠮᠢᠨᠢ᠃ ᠲᠠ ᠪᠣᠯ ᠵᠠᠯᠠᠭᠤ ᠬᠥᠮᠦᠨ᠂ ᠢᠷᠡᠭᠡᠳᠦᠢ ᠪᠣᠯ ᠡᠮᠦᠨᠡ ᠴᠢᠨᠢ ᠰᠠᠷᠠᠭᠤᠯ ᠪᠠᠢᠨᠠ᠃ ᠲᠠ ᠶᠠᠭᠤᠮᠠᠨ ᠳ᠋ᠤ᠌ ᠪᠣᠯᠭᠣᠮᠵᠢᠲᠠᠢ ᠪᠠᠢᠪᠠᠯ ᠵᠣᠬᠢᠨᠠ᠃ ᠬᠠᠷᠢᠨ ᠲᠠ ᠶᠡᠷᠦ ᠶᠠᠭᠤᠮᠠ ᠶ᠋ᠢ ᠦᠯᠦ ᠣᠢᠰᠢᠶᠠᠬᠤ ᠮᠠᠶᠢᠭᠲᠠᠢ ᠪᠠᠢᠨᠠ ᠰᠢᠦ᠃ ᠲᠠ ᠬᠡ ᠤᠭᠠᠯᠵᠠ ᠲᠠᠢ ᠴᠠᠮᠴᠠ ᠡᠮᠦᠰᠴᠦ ᠭᠤᠳᠤᠮᠵᠢᠨᠠ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠨᠣᠮ ᠲᠡᠪᠡᠷᠢᠨ ᠶᠠᠪᠤᠳᠠᠭ ᠡᠴᠡ ᠪᠠᠨ ᠣᠳᠣ ᠬᠠᠷᠢᠨ ᠪᠠᠰᠠ ᠳᠤᠭᠤᠢ ᠤᠨᠤᠳᠠᠭ ᠪᠣᠯᠪᠠ᠃ ᠲᠠ ᠡᠭᠡᠴᠢ ᠲᠡᠢ ᠪᠡᠨ ᠳᠤᠭᠤᠢ ᠤᠨᠤᠵᠤ ᠪᠣᠢ ᠶ᠋ᠢᠨ ᠲᠤᠬᠠᠢ ᠰᠤᠷᠭᠠᠭᠤᠯᠢ ᠶ᠋ᠢᠨ ᠳᠠᠷᠤᠭᠠ ᠮᠡᠳᠡᠵᠦ᠂ ᠴᠢᠨᠠᠭᠰᠢᠳᠠ ᠰᠠᠢᠳ ᠮᠡᠳᠡᠪᠡᠯ ᠶᠠᠭᠠᠬᠢᠬᠤ ᠪᠢᠯᠡ᠃ ᠶᠠᠮᠠᠷ ᠰᠠᠢᠨ ᠪᠠᠢᠬᠤ ᠪᠣᠢ᠃ 》
《ᠡᠭᠡᠴᠢ ᠪᠢᠳᠡ ᠬᠣᠶᠠᠷ ᠤ᠋ᠨ ᠳᠤᠭᠤᠢ ᠤᠨᠤᠵᠤ ᠪᠠᠢᠭᠠ ᠨᠢ ᠬᠡᠨ ᠳ᠋ᠦ᠍ ᠴᠦ᠍ ᠬᠦᠷᠲᠡᠭᠡᠯ ᠦᠭᠡᠢ ᠬᠡᠷᠡᠭ᠃ ᠶᠡᠷᠦ ᠮᠢᠨᠦ ᠬᠤᠪᠢ ᠶ᠋ᠢᠨ ᠬᠡᠷᠡᠭ ᠲᠦ᠍ ᠣᠷᠣᠯᠴᠠᠭᠰᠠᠨ ᠬᠥᠮᠦᠨ ᠢ᠋ ᠪᠢ ᠬᠥᠭᠡᠭᠡᠵᠦ ᠭᠠᠷᠭᠠᠨᠠ》 ᠭᠡᠵᠦ ᠺᠤᠸᠨᠯᠸᠨᠺᠤ ᠬᠡᠯᠡᠵᠦ ᠨᠢᠭᠤᠷ ᠨᠢ ᠤᠯᠠᠢᠪᠠ᠃
ᠪᠸᠯᠢᠺᠤᠸ ᠤ᠋ᠨ ᠴᠢᠷᠠᠢ ᠬᠤᠪᠠᠬᠠᠢ ᠪᠣᠯᠤᠨ ᠪᠣᠰᠴᠤ ᠵᠣᠭᠰᠣᠪᠠ᠃
《ᠬᠡᠷᠪᠡ ᠲᠠ ᠨᠠᠳᠠ ᠲᠠᠢ ᠡᠢᠮᠦ ᠮᠠᠶᠢᠭ ᠢ᠋ᠶ᠋ᠠᠷ ᠶᠠᠷᠢᠪᠠᠯ ᠪᠢ ᠴᠢᠨᠠᠭᠰᠢᠳᠠ ᠦᠷᠭᠦᠯᠵᠢᠯᠡᠵᠦ ᠦᠯᠦ ᠴᠢᠳᠠᠨᠠ᠂ ᠮᠢᠨᠦ ᠳᠡᠷᠭᠡᠳᠡ ᠡᠷᠬᠡ ᠪᠠᠷᠢᠭᠴᠢᠳ ᠤ᠋ᠨ ᠲᠤᠬᠠᠢ ᠡᠢᠮᠦ ᠦᠭᠡ ᠪᠢᠲᠡᠭᠡᠢ ᠶᠠᠷᠢ ᠭᠡᠵᠦ ᠭᠤᠶᠤᠶᠠ᠂ ᠲᠠ ᠡᠷᠬᠡ ᠪᠠᠷᠢᠭᠴᠢᠳ ᠢ᠋ ᠬᠦᠨᠳᠦᠯᠡᠬᠦ ᠬᠡᠷᠡᠭᠲᠡᠢ ᠰᠢᠦ》 ᠭᠡᠬᠦ ᠳ᠋ᠦ᠍ᠨᠢ ᠺᠤᠸᠨᠯᠸᠨᠺᠤ ᠠᠭᠤᠷ ᠲᠠᠢ ᠬᠠᠷᠠᠵᠤ:
《ᠡᠷᠬᠡ ᠪᠠᠷᠢᠭᠴᠢᠳ ᠤ᠋ᠨ ᠲᠤᠬᠠᠢ ᠪᠢ ᠶᠠᠮᠠᠷ ᠮᠠᠭᠤ ᠶᠠᠭᠤᠮᠠ ᠶᠠᠷᠢᠭᠰᠠᠨ ᠪᠣᠢ? ᠴᠢ ᠲᠣᠨᠢᠯ᠂ ᠪᠢ ᠰᠢᠳᠤᠷᠭᠤ ᠰᠢᠯᠤᠭᠤᠨ ᠬᠥᠮᠦᠨ᠂ ᠴᠢᠮᠠ ᠰᠢᠭ᠋ ᠡᠢᠮᠦ ᠠᠪᠤᠭᠠᠢ ᠲᠠᠢ ᠶᠠᠷᠢᠬᠤ ᠳᠤᠷᠠ ᠦᠭᠡᠢ ᠪᠠᠢᠨᠠ᠃ ᠪᠢ ᠶᠡᠷᠦ ᠳᠠᠯᠳᠠ ᠭᠠᠵᠠᠷ ᠬᠣᠪ ᠦᠭᠡ ᠬᠡᠯᠡᠬᠦ ᠬᠥᠮᠦᠰ ᠢ᠋ ᠲᠤᠩ ᠶᠡᠬᠡ ᠵᠢᠭᠰᠢᠳᠡᠭ!》 ᠭᠡᠪᠡ᠃
ᠪᠸᠯᠢᠺᠤᠸ ᠤ᠋ᠨ ᠰᠡᠳᠬᠢᠯ ᠰᠠᠮᠠᠭᠤᠷᠠᠨ ᠲᠦᠷᠭᠡᠨ ᠬᠥᠳᠡᠯᠭᠡᠭᠡᠨ ᠢ᠋ᠶ᠋ᠡᠷ ᠳᠡᠪᠡᠯ ᠢ᠋ᠶ᠋ᠡᠨ ᠡᠮᠦᠰᠬᠦ ᠳ᠋ᠦ᠍ ᠴᠢᠷᠠᠢ ᠳ᠋ᠤᠨᠢ ᠠᠶᠤᠭᠰᠠᠨ ᠪᠠᠢᠳᠠᠯ ᠢᠯᠡᠷᠡᠵᠦ ᠪᠠᠢᠪᠠ᠃ ᠡᠢᠮᠦ ᠪᠦᠳᠦᠭᠦᠯᠢᠭ ᠰᠢᠷᠦᠭᠦᠨ ᠦᠭᠡ ᠶ᠋ᠢ ᠪᠸᠯᠢᠺᠤᠸ ᠠᠩᠬᠠ ᠤᠳᠠᠭᠠ ᠰᠣᠨᠣᠰᠴᠤ ᠪᠣᠢ ᠪᠢᠵᠡ ᠳᠡ᠃
ᠪᠸᠯᠢᠺᠤᠸ ᠬᠠᠭᠠᠯᠭᠠ ᠪᠠᠷ ᠱᠠᠲᠤᠨ ᠤ᠋ ᠲᠠᠪᠴᠠᠩ ᠳᠡᠭᠡᠷᠡ ᠭᠠᠷᠴᠤ:
《ᠲᠠ ᠶᠠᠭᠤ ᠶᠠᠷᠢᠭᠰᠠᠨ ᠴᠤ᠌ ᠬᠠᠮᠢᠭᠠ ᠦᠭᠡᠢ᠂ ᠳᠤᠷᠠ ᠪᠠᠷ ᠪᠣᠯ᠂ ᠪᠢ ᠭᠠᠭᠴᠠ ᠬᠦ᠌ ᠲᠠᠨ ᠳ᠋ᠤ᠌ ᠤᠷᠢᠳᠠ ᠡᠴᠡ ᠰᠡᠷᠡᠮᠵᠢᠯᠡᠭᠦᠯᠦᠶᠡ: ᠪᠢᠳᠡ ᠬᠣᠶᠠᠷ ᠤ᠋ᠨ ᠶᠠᠷᠢᠶᠠ ᠶ᠋ᠢ ᠬᠥᠮᠦᠨ ᠰᠣᠨᠣᠰᠤᠭᠰᠠᠨ ᠪᠠᠢᠬᠤ ᠮᠠᠭᠠᠳ᠃ ᠡᠢᠮᠦ ᠳ᠋ᠦ᠍ ᠪᠢᠳᠡᠨ ᠦ᠌ ᠶᠠᠷᠢᠶᠠ ᠶ᠋ᠢ ᠴᠢᠨᠠᠭᠰᠢ ᠭᠠᠵᠢᠭᠤᠳᠠᠭᠤᠯᠬᠤ ᠦᠭᠡᠢ ᠪᠠ ᠶᠠᠭᠤᠮᠠ ᠪᠣᠯᠭᠠᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠳᠠᠷᠤᠭᠠ ᠳ᠋ᠤ᠌ ᠪᠢᠳᠡ ᠬᠣᠶᠠᠷ ᠤ᠋ᠨ ᠶᠠᠷᠢᠯᠴᠠᠭᠰᠠᠨ ᠶᠠᠷᠢᠶᠠ ᠶ᠋ᠢᠨ ᠭᠣᠣᠯ ᠢ᠋ ᠮᠡᠳᠡᠭᠦᠯᠦᠨᠡ᠂ ᠪᠢ ᠢᠩᠭᠢᠬᠦ ᠦᠭᠡᠢ ᠦᠯᠦ ᠪᠣᠯᠤᠨᠠ》 ᠭᠡᠪᠡ᠃
《ᠮᠡᠳᠡᠭᠦᠯᠦᠨᠡ ᠭᠡᠨᠡ? ᠴᠢᠩᠭᠢ᠂ ᠣᠴᠢᠵᠤ ᠮᠡᠳᠡᠭᠦᠯ!》
ᠺᠤᠸᠨᠯᠸᠨᠺᠤ᠂ ᠪᠸᠯᠢᠺᠤᠸ ᠤ᠋ᠨ ᠠᠷᠤ ᠡᠴᠡ ᠨᠢ ᠳᠡᠪᠡᠯ ᠦ᠋ᠨ ᠵᠠᠭᠠᠮᠠ ᠶ᠋ᠢ ᠨᠢ ᠪᠠᠷᠢᠵᠤ᠂ ᠱᠠᠲᠤ ᠤᠷᠤᠭᠤ ᠲᠦᠯᠬᠢᠭᠰᠡᠨ ᠳ᠋ᠦ᠍ ᠲᠡᠷᠡ ᠤᠰᠤᠨ ᠭᠤᠲᠤᠯ ᠵᠡᠷᠭᠡ ᠶᠠᠭᠤᠮᠠᠰ ᠲᠠᠢ ᠪᠠᠨ ᠵᠡᠷᠭᠡ ᠪᠡᠷ ᠫᠢᠷᠭᠢᠨᠠᠭᠤᠯᠤᠨ ᠳᠣᠣᠷᠠᠲᠤ ᠳᠠᠪᠬᠤᠷ ᠬᠦᠷᠲᠡᠯᠡ ᠥᠩᠬᠥᠷᠢᠨ ᠤᠨᠠᠪᠠ᠃ ᠱᠠᠲᠤ ᠨᠢ ᠥᠨᠳᠥᠷ ᠡᠭᠴᠡᠪᠲᠦᠷ ᠪᠣᠯᠪᠠᠴᠤ ᠲᠡᠷᠡ ᠬᠠᠷᠢᠨ ᠮᠡᠨᠳᠦ ᠥᠩᠬᠥᠷᠢᠨ ᠪᠠᠭᠤᠭᠠᠳ ᠥᠨᠳᠡᠢᠨ ᠪᠣᠰᠴᠤ᠂ ᠨᠢᠳᠦᠨ ᠰᠢᠯ ᠦ᠋ᠨ ᠢ᠋ᠶ᠋ᠡᠨ ᠪᠦᠲᠦᠨ ᠡᠰᠡᠬᠦ ᠶ᠋ᠢ ᠲᠡᠮᠲᠡᠷᠢᠨ᠂ ᠬᠠᠮᠠᠷ ᠢ᠋ᠶ᠋ᠠᠨ ᠪᠠᠷᠢᠵᠤ ᠦᠵᠡᠪᠡ᠃ ᠭᠡᠪᠡᠴᠦ ᠲᠡᠭᠦᠨ ᠢ᠋ ᠱᠠᠲᠤᠨ ᠳᠡᠭᠡᠷᠡ ᠥᠩᠭᠥᠷᠢᠳᠡᠵᠦ ᠪᠠᠢᠬᠤ ᠦᠶᠡ ᠳ᠋ᠦ᠍ ᠸᠠᠷᠸᠨᠺᠠ ᠬᠣᠶᠠᠷ ᠬᠠᠲᠤᠭᠲᠠᠢ ᠶ᠋ᠢᠨ ᠬᠠᠮᠲᠤ ᠢᠷᠡᠵᠦ ᠬᠠᠷᠠᠵᠠᠭᠠᠵᠤ ᠪᠠᠢᠭᠰᠠᠨ ᠨᠢ ᠪᠸᠯᠢᠺᠤᠸ ᠲᠤ᠌ ᠶᠠᠭᠤᠮᠠ ᠪᠦᠬᠦᠨ ᠡᠴᠡ ᠠᠶᠤᠯ ᠲᠠᠢ ᠪᠠᠢᠵᠠᠢ᠃ ᠪᠣᠳᠣᠬᠤ ᠳ᠋ᠤ᠌᠂ ᠢᠨᠢᠶᠡᠳᠦᠮ ᠳᠣᠭᠣᠭᠢ ᠪᠣᠯᠬᠤ ᠡᠴᠡ ᠬᠦᠵᠦᠭᠦᠦ ᠪᠡᠨ ᠪᠤᠯᠭᠤᠯᠵᠤ᠂ ᠬᠥᠯ ᠢ᠋ᠶ᠋ᠡᠨ ᠬᠤᠭᠤᠯᠪᠠᠯ ᠳᠡᠭᠡᠷᠡ ᠭᠡᠵᠦ ᠰᠠᠨᠠᠬᠤ ᠪᠢᠵᠡ᠃ ᠣᠳᠣ ᠪᠦᠬᠦ ᠬᠣᠲᠠ ᠮᠡᠳᠡᠵᠦ᠂ ᠰᠤᠷᠭᠠᠭᠤᠯᠢ ᠶ᠋ᠢᠨ ᠳᠠᠷᠤᠭᠠ᠂ ᠴᠢᠨᠠᠭᠰᠢ ᠰᠠᠢᠳ ᠲᠤ᠌ ᠬᠦᠷᠭᠡᠪᠡᠯ - ᠠᠢ᠂ ᠶᠠᠮᠠᠷ ᠨᠢᠭᠡ ᠶᠠᠪᠤᠳᠠᠯ ᠭᠠᠷᠤᠭᠤᠵᠠᠢ ᠳᠠ ! ᠡᠴᠦᠰ ᠲᠦ᠋ᠨᠢ ᠵᠠᠷᠯᠢᠭ ᠢ᠋ᠶ᠋ᠠᠷ ᠠᠵᠢᠯ ᠢ᠋ᠶ᠋ᠠᠨ ᠬᠠᠯᠠᠭᠳᠠᠬᠤ ᠮᠠᠭᠠᠳ᠃ ᠁
ᠪᠸᠯᠢᠺᠤᠸ ᠢ᠋ ᠥᠨᠳᠡᠢᠵᠦ ᠪᠣᠰᠬᠤ ᠳ᠋ᠤ᠌᠂ ᠸᠠᠷᠸᠨᠺᠠᠲᠡᠭᠦᠨ ᠢ᠋ ᠰᠠᠶᠢ ᠲᠠᠨᠢᠵᠤ᠂ ᠬᠠᠴᠢᠨ ᠰᠣᠨᠢᠨ ᠪᠢᠴᠢᠬᠠᠨ ᠴᠢᠷᠠᠢ᠂ ᠦᠷᠴᠢᠢᠭᠰᠡᠨ ᠳᠡᠪᠡᠯ᠂ ᠤᠰᠤᠨ ᠤ᠋ ᠭᠤᠲᠤᠯ ᠵᠡᠷᠭᠡ ᠤᠷᠤᠭᠤ ᠨᠢ ᠬᠠᠷᠠᠵᠤ ᠶᠠᠭᠤ ᠪᠣᠯᠤᠭᠰᠠᠨ ᠢ᠋ ᠦᠯᠦ ᠮᠡᠳᠡᠨ ᠭᠠᠢᠬᠠᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠬᠥᠯ ᠠᠯᠳᠠᠵᠤ ᠤᠨᠠᠭᠰᠠᠨ ᠪᠠᠢᠬᠤ ᠭᠡᠵᠦ ᠪᠣᠳᠣᠭᠠᠳ ᠡᠰᠡ ᠲᠡᠰᠪᠦᠷᠢᠯᠡᠨ ᠪᠠᠢᠰᠢᠩ ᠳᠦᠭᠦᠷᠡᠩ ᠴᠤᠤᠷᠢᠶᠠᠲᠤᠭᠤᠯᠤᠨ 《ᠬᠠ ᠬᠠ ᠬᠠ!》 ᠭᠡᠵᠦ ᠢᠨᠢᠶᠡᠳᠦ ᠠᠯᠳᠠᠪᠠ᠃
ᠡᠨᠡ ᠬᠦ᠌ ᠴᠤᠤᠷᠢᠶᠠᠲᠤ 《ᠬᠠ ᠬᠠ ᠬᠠ》 ᠭᠡᠰᠡᠨ ᠢᠨᠢᠶᠡᠳᠦ ᠠᠯᠢᠪᠠ ᠶ᠋ᠢ ᠡᠴᠦᠰᠯᠡᠭᠦᠯᠪᠡ᠃ ᠲᠤᠭᠤᠷᠪᠢᠵᠤ ᠪᠠᠢᠭᠰᠠᠨ ᠤᠷᠤᠭ ᠢ᠋ ᠡᠴᠦᠰᠯᠡᠭᠦᠯᠪᠡ᠃ ᠪᠸᠯᠢᠺᠤᠸ ᠤ᠋ᠨ ᠨᠢᠭᠡ ᠨᠠᠰᠤ ᠶ᠋ᠢ ᠡᠴᠦᠰᠯᠡᠭᠦᠯᠪᠡ᠃ ᠪᠸᠯᠢᠺᠤᠸ᠂ ᠸᠠᠷᠸᠨᠺᠠ ᠶᠠᠭᠤ ᠬᠡᠯᠡᠭᠰᠡᠨ ᠢ᠋ ᠴᠦ᠍ ᠲᠤᠭᠤᠯᠤᠭᠰᠠᠨ ᠦᠭᠡᠢ᠂ ᠶᠠᠭᠤ ᠴᠤ᠌ ᠣᠯᠵᠤ ᠬᠠᠷᠠᠭᠰᠠᠨ ᠦᠭᠡᠢ ᠰᠢᠭᠤᠳ ᠭᠡᠷ ᠲᠡᠭᠡᠨ ᠡᠭᠡᠵᠦ ᠢᠷᠡᠭᠡᠳ ᠰᠢᠷᠡᠭᠡᠨ ᠳᠡᠭᠡᠷᠡᠬᠢ ᠸᠠᠷᠸᠨᠺᠠ ᠶ᠋ᠢᠨ ᠵᠢᠷᠤᠭ ᠢ᠋ ᠠᠪᠴᠤ ᠬᠠᠶᠠᠭᠠᠳ᠂ ᠣᠷᠣᠨ ᠳ᠋ᠠᠭᠠᠨ ᠣᠷᠣᠵᠤ ᠬᠡᠪᠲᠡᠨ ᠳᠠᠬᠢᠨ ᠶᠡᠷᠦ ᠪᠣᠰᠤᠭᠰᠠᠨ ᠦᠭᠡᠢ ᠪᠢᠯᠡ᠃ ᠁
ᠪᠢᠳᠡ ᠪᠤᠯᠠᠰᠢᠨ ᠳᠡᠭᠡᠷᠡ ᠡᠴᠡ ᠪᠠᠶᠠᠷᠲᠠᠢᠬᠠᠨ ᠪᠤᠴᠠᠵᠠᠭᠠᠯᠠ᠃ ᠭᠡᠪᠡᠴᠦ ᠭᠠᠷᠠᠭ ᠪᠣᠯᠤᠭᠠᠳᠤᠢ ᠪᠠᠷ ᠠᠮᠢᠳᠤᠷᠠᠯ ᠮᠥᠨ ᠯᠡ ᠥᠨᠥᠬᠢ ᠤᠢᠳᠬᠠᠷ ᠲᠠᠢ᠂ ᠤᠳᠬᠠ ᠠᠭᠤᠯᠭᠠ ᠦᠭᠡᠢ᠂ ᠤᠬᠠᠭᠠᠨ ᠲᠥᠬᠥᠭᠡ ᠨᠢ ᠣᠯᠳᠠᠬᠤ ᠦᠭᠡᠢ ᠪᠠᠢᠳᠠᠯ ᠳ᠋ᠠᠭᠠᠨ ᠣᠷᠣᠪᠠ᠃ ᠰᠠᠢᠵᠢᠷᠠᠭᠰᠠᠨ ᠶᠠᠭᠤᠮᠠ ᠣᠭᠲᠣ ᠠᠯᠠᠭᠠ᠃ ᠪᠢᠳᠡ ᠪᠸᠯᠢᠺᠤᠸ ᠢ᠋ ᠪᠤᠯᠠᠰᠢᠯᠠᠭᠰᠠᠨ ᠪᠣᠯᠪᠠᠴᠤ ᠲᠡᠭᠦᠨ ᠰᠢᠭ ᠲᠣᠭᠳᠣᠢ ᠳᠣᠲᠣᠷᠠᠬᠢ ᠬᠥᠮᠦᠨ ᠪᠠᠰᠠ ᠬᠡᠴᠢᠨᠡᠨ ᠪᠠᠢᠬᠤ ᠶ᠋ᠢ ᠪᠤᠤ ᠮᠡᠳᠡ᠂ ᠬᠣᠢᠰᠢᠳᠠ ᠴᠤ᠌ ᠬᠡᠴᠢᠨᠡᠨ ᠭᠠᠷᠬᠤ ᠶ᠋ᠢ ᠬᠡᠨ ᠮᠡᠳᠡᠬᠦ ᠶᠦᠮ!