ᠮᠥᠩᠭᠥᠨ ᠤ ᠬᠣᠷᠣᠬᠠᠢ- ᠪᠠᠯᠽᠠᠺМөнгөний хорхой-бэлзак
382ᠮᠥᠩᠭᠥᠨ ᠤ ᠬᠣᠷᠣᠬᠠᠢ
ᠪᠠᠯᠽᠠᠺ
ᠲᠡᠷᠡ ᠦᠶᠡ᠂ ᠭᠷᠠᠨᠳᠧᠲ ᠳᠠᠯᠠᠨ ᠵᠢᠷᠭᠤᠭᠠᠨ ᠨᠠᠰᠤᠨ ᠤ᠋ ᠪᠠᠨ ᠨᠢᠭᠤᠷ ᠢ᠋ ᠦᠵᠡᠭᠰᠡᠨ ᠪᠠᠢᠪᠠ᠃ ᠬᠣᠶᠠᠷ ᠵᠢᠯ ᠡᠴᠡ ᠨᠡᠰᠢ ᠲᠡᠭᠦᠨ ᠦ᠌ ᠬᠠᠷᠠᠮᠴᠢ ᠰᠡᠳᠬᠢᠯ ᠨᠢ ᠨᠢᠭᠡ ᠬᠥᠮᠦᠨ ᠦ᠌ ᠤᠳᠠᠭᠠᠨ ᠵᠢᠯ ᠵᠤᠵᠠᠭᠠᠨ ᠬᠣᠨᠣᠭ ᠤ᠋ᠨ ᠠᠯᠢᠪᠠ ᠲᠠᠴᠢᠶᠠᠯ ᠪᠠ ᠰᠢᠨᠤᠯ ᠤ᠋ᠨ ᠠᠳᠠᠯᠢ ᠪᠠᠷ ᠤᠯᠠᠮ ᠯᠠ ᠨᠡᠮᠡᠭᠳᠡᠵᠦ ᠤᠯᠠᠮ ᠯᠠ ᠠᠢᠬᠤᠪᠲᠤᠷ ᠪᠣᠯᠪᠠ᠃ ᠠᠵᠢᠭᠯᠠᠯᠲᠠ ᠶ᠋ᠢᠨ ᠦᠷᠡ ᠳ᠋ᠦᠩ ᠢ᠋ ᠦᠨᠳᠦᠰᠦᠯᠡᠪᠡᠯ᠂ ᠬᠠᠷᠠᠮᠴᠢ ᠰᠡᠳᠬᠢᠯᠲᠡᠨ᠂ ᠵᠡᠷᠯᠢᠭ ᠰᠠᠨᠠᠭᠠᠲᠠᠨ ᠵᠡᠷᠭᠡ ᠭᠠᠭᠴᠠ ᠮᠤᠵᠢᠭᠤᠳᠠ ᠬᠦᠰᠡᠯᠲᠡᠨ ᠪᠦᠬᠦᠨ ᠦ᠌ ᠬᠠᠢᠷᠠ ᠰᠡᠳᠬᠢᠯ ᠨᠢ ᠶᠡᠷᠦ ᠳ᠋ᠡᠭᠡᠨ ᠥᠪᠡᠷᠰᠡᠳ ᠦ᠋ᠨ ᠲᠠᠴᠢᠶᠠᠯ ᠤ᠋ᠨ ᠢ᠋ᠶ᠋ᠠᠨ ᠪᠡᠯᠭᠡ ᠲᠡᠮᠳᠡᠭ ᠪᠣᠯᠤᠭᠰᠠᠨ ᠨᠢᠭᠡᠨ ᠵᠦᠢᠯ ᠦ᠋ᠨ ᠶᠠᠭᠤᠮᠠᠨ ᠤᠷᠤᠭᠤ ᠣᠨᠴᠣᠭᠣᠢ ᠲᠠᠰᠢᠭᠤᠷᠠᠭᠰᠠᠨ ᠪᠠᠢᠳᠠᠭ ᠪᠠᠢᠨᠠ᠃ ᠠᠯᠲᠠ ᠦᠵᠡᠪᠡᠯ ᠠᠳᠬᠤᠨ ᠳ᠋ᠠᠭᠠᠨ ᠣᠷᠣᠭᠤᠯᠬᠤ ᠭᠡᠬᠦ ᠨᠢ ᠭᠷᠠᠨᠳᠧᠲ ᠦ᠋ᠨ ᠪᠠᠷᠢᠮᠲᠠᠯᠠᠭᠰᠠᠨ ᠬᠡᠨᠡᠭᠡ ᠶᠦᠮ᠃ ᠲᠡᠭᠦᠨ ᠦ᠌ ᠡᠵᠡᠷᠬᠡᠮᠡᠭᠡᠢᠯᠡᠬᠦ ᠬᠡᠮᠵᠢᠶᠡ ᠨᠢ ᠮᠥᠨ ᠬᠠᠷᠠᠮᠴᠢ ᠰᠡᠳᠬᠢᠯ ᠢ᠋ᠶ᠋ᠡᠨ ᠳᠠᠭᠠᠯᠳᠤᠨ ᠨᠡᠮᠡᠭᠳᠡᠵᠦ ᠪᠠᠢᠪᠠ᠃ ᠬᠡᠷᠪᠡ ᠡᠬᠡᠨᠡᠷ ᠢ᠋ᠶ᠋ᠡᠨ ᠦᠬᠦᠭᠰᠡᠨ ᠦ᠌ ᠳᠠᠷᠠᠭᠠ ᠡᠳ᠋ ᠬᠥᠷᠥᠩᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠮᠢᠶᠠᠷᠤᠯᠲᠠ ᠶ᠋ᠢ ᠬᠠᠷᠠ ᠬᠢᠮᠤᠰᠤᠨ ᠲᠡᠳᠦᠢ ᠴᠦ᠍ ᠭᠡᠰᠡᠨ ᠰᠤᠯᠠ ᠲᠠᠯᠪᠢᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠬᠠᠮᠢᠶᠠᠷᠴᠤ ᠴᠢᠳᠠᠬᠤ ᠦᠭᠡᠢ ᠯᠡ ᠪᠣᠯ ᠵᠢᠷᠤᠮ ᠰᠥᠷᠴᠦ ᠶᠣᠰᠣ ᠵᠥᠷᠢᠴᠡᠭᠰᠡᠨ ᠶᠠᠪᠤᠳᠠᠯ ᠭᠡᠵᠦ ᠪᠣᠳᠣᠵᠤ ᠪᠠᠢᠪᠠ᠃ ᠶᠠᠭᠠᠬᠢᠬᠤ ᠪᠣᠢ! ᠡᠳ᠋ ᠬᠥᠷᠥᠩᠭᠡ ᠶ᠋ᠢᠨ ᠲᠣᠭᠠ ᠬᠡᠮᠵᠢᠶᠡ ᠪᠡᠨ ᠥᠬᠢᠨ ᠳ᠋ᠡᠭᠡᠨ ᠮᠡᠳᠡᠭᠦᠯᠬᠦ ᠦᠦ᠂ ᠬᠥᠳᠡᠯᠬᠦ ᠬᠥᠷᠥᠩᠭᠡ ᠪᠡᠨ ᠪᠦᠭᠦᠳᠡ ᠶ᠋ᠢ ᠨᠢᠭᠡ ᠯᠡ ᠳᠣᠣᠷᠠ ᠳᠠᠩᠰᠠᠯᠠᠨ ᠳᠠᠭᠤᠳᠠᠯᠭᠠ ᠶ᠋ᠢᠨ ᠬᠤᠳᠠᠯᠳᠤᠭᠠᠨ ᠳ᠋ᠤ᠌ ᠣᠷᠣᠭᠤᠯᠬᠤ ᠤᠤ? ᠁
《ᠲᠡᠭᠡᠪᠡᠯ ᠥᠪᠡᠷ ᠢ᠋ᠶ᠋ᠡᠨ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠣᠭᠣᠯᠠᠢ ᠳᠡᠭᠡᠷᠡ ᠬᠢᠲᠤᠭᠠ ᠲᠠᠯᠪᠢᠵᠤ ᠪᠠᠢᠭᠠ ᠬᠡᠷᠡᠭ ᠪᠣᠯᠤᠨᠠ!》ᠭᠡᠵᠦ ᠭᠷᠠᠨᠳᠧᠲ ᠲᠠᠷᠢᠶᠠᠨ ᠳ᠋ᠠᠭᠠᠨ ᠦᠵᠦᠮ ᠦ᠋ᠨ ᠣᠷᠢᠶᠠᠩᠭᠤ ᠪᠠᠨ ᠪᠠᠢᠴᠠᠭᠠᠨ ᠦᠵᠡᠵᠦ ᠶᠠᠪᠤᠭᠰᠠᠭᠠᠷ ᠪᠠᠢᠵᠤ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠳᠤᠤᠭᠠᠷᠪᠠ᠃
ᠲᠡᠭᠡᠭᠡᠳ ᠡᠴᠦᠰ ᠲᠡᠭᠡᠨ ᠵᠣᠷᠢᠯᠭᠠ ᠪᠠᠨ ᠲᠣᠭᠲᠠᠭᠠᠵᠤ ᠣᠷᠣᠢ ᠶ᠋ᠢᠨ ᠬᠣᠭᠣᠯᠠᠨ ᠤ᠋ ᠦᠶᠡ ᠪᠡᠷ ᠰᠡᠦᠮᠦᠷ ᠲᠡᠭᠡᠨ ᠪᠤᠴᠠᠨ᠂ ᠢᠦᠭᠧᠨ᠋ᠸ ᠲᠡᠭᠡᠨ ᠪᠠᠭᠤᠨ ᠥᠭᠴᠦ᠂ ᠲᠣᠯᠢᠭᠠᠨᠠᠨ ᠪᠢᠯᠳᠠᠤᠴᠢᠯᠠᠵᠤ᠂ ᠠᠷᠭᠠᠳᠠᠨ ᠬᠠᠭᠤᠷᠴᠤ ᠪᠠᠢᠭᠠᠳ ᠦᠬᠦᠨ ᠦᠬᠦᠲᠡᠯᠡ ᠭᠡᠷ ᠦ᠋ᠨ ᠡᠵᠡᠨ ᠦ᠌ ᠡᠷᠬᠡ ᠰᠦᠷ ᠢ᠋ᠶ᠋ᠡᠨ ᠬᠠᠳᠠᠭᠠᠯᠠᠵᠤ᠂ ᠭᠣᠣᠯ ᠢ᠋ᠶ᠋ᠠᠨ ᠲᠠᠰᠤᠷᠠᠨ ᠲᠠᠰᠤᠷᠠᠲᠠᠯᠠ ᠬᠡᠳᠦᠨ ᠵᠠᠭᠤᠨ ᠲᠦᠮᠡᠨ ᠲᠥᠭᠥᠷᠢᠭ ᠦ᠋ᠨ ᠡᠳ᠋ ᠬᠥᠷᠥᠩᠭᠡ ᠶ᠋ᠢᠨ ᠶᠡᠬᠡ ᠡᠷᠬᠡ ᠶ᠋ᠢ ᠠᠳᠬᠤᠬᠤ ᠳ᠋ᠠᠭᠠᠨ ᠰᠠᠭᠠᠳ ᠦᠭᠡᠢ ᠪᠣᠯᠭᠠᠬᠤ ᠪᠠᠷ ᠰᠢᠢᠳᠴᠡᠢ᠃ ᠡᠨᠡ ᠡᠪᠦᠭᠡᠨ ᠡᠷᠳᠡᠨᠢ ᠶ᠋ᠢᠨ ᠰᠠᠩ ᠤ᠋ᠨ ᠲᠦᠯᠬᠢᠭᠦᠷ ᠢ᠋ᠶ᠋ᠡᠨ ᠠᠪᠴᠤ᠂ ᠬᠦᠷᠢᠶᠡᠨ ᠦ᠌ ᠬᠠᠭᠠᠯᠭᠠ ᠪᠠᠨ ᠥᠪᠡᠷ ᠢ᠋ᠶ᠋ᠡᠨ ᠨᠡᠭᠡᠭᠡᠭᠡᠳ᠂ ᠰᠠᠮ ᠢ᠋ᠶ᠋ᠠᠷ ᠠᠰᠠᠷ ᠳᠡᠭᠡᠷᠡ ᠭᠠᠷᠤᠨ᠂ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠭᠰᠠᠨ ᠳ᠋ᠤ᠌᠂ ᠢᠦᠭᠧᠨ᠋ᠸ ᠤᠷᠠᠯᠢᠭ ᠰᠠᠢᠬᠠᠨ ᠬᠢᠴᠡ ᠲᠡᠢ ᠵᠠᠰᠠᠯ ᠵᠢᠮᠰᠡᠭ ᠦ᠋ᠨ ᠬᠠᠢᠷᠴᠠᠭ ᠢ᠋ᠶ᠋ᠠᠨ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠣᠷᠣ ᠳᠡᠭᠡᠷᠡ ᠡᠷᠭᠦᠵᠦ ᠲᠠᠯᠪᠢᠭᠰᠠᠨ ᠪᠠᠢᠵᠠᠢ᠃ ᠲᠡᠭᠡᠭᠡᠳ ᠭᠷᠠᠨᠳᠧᠲ ᠦ᠋ᠨ ᠡᠵᠡᠭᠦᠢ ᠶ᠋ᠢ ᠵᠠᠪᠳᠤᠵᠤ ᠡᠬᠡ ᠥᠬᠢᠨ ᠬᠣᠶᠠᠭᠤᠯᠠ ᠴᠠᠷᠯᠧᠰ ᠦ᠋ᠨ ᠡᠬᠡ ᠶ᠋ᠢᠨ ᠱᠤᠭᠤᠮᠠᠯ ᠬᠥᠷᠥᠭ ᠳᠡᠭᠡᠷᠡ ᠡᠴᠡ ᠴᠠᠷᠯᠧᠰ ᠦ᠋ᠨ ᠵᠢᠰᠦ ᠴᠢᠷᠠᠢ ᠶ᠋ᠢ ᠰᠢᠨᠵᠢᠵᠦ ᠪᠠᠢᠪᠠ᠃
ᠡᠪᠦᠭᠡᠨ ᠢ᠋ ᠬᠠᠭᠠᠯᠭᠠ ᠲᠦᠯᠬᠢᠨ ᠣᠷᠣᠬᠤ ᠳ᠋ᠤ᠌:
《ᠴᠣᠬᠣ ᠤᠷᠤᠭᠤᠯ ᠬᠣᠶᠠᠷ ᠨᠢ ᠶᠠᠭ ᠯᠠ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠪᠠᠢᠨᠠ!》 ᠭᠡᠵᠦ ᠢᠦᠭᠧᠨ᠋ᠸ ᠬᠡᠯᠡᠵᠦ ᠪᠠᠢᠪᠠ᠃
ᠨᠥᠬᠥᠷ ᠦ᠋ᠨ ᠬᠢᠨᠢ ᠨᠢᠳᠦ ᠠᠯᠲᠠᠨ ᠬᠠᠢᠷᠴᠠᠭ ᠳᠡᠭᠡᠷᠡ ᠭᠥᠯᠢᠷᠡᠨ ᠲᠤᠰᠤᠭᠰᠠᠨ ᠪᠠᠢᠬᠤ ᠶ᠋ᠢ ᠬᠠᠷᠠᠮᠠᠭᠴᠠ ᠪᠠᠨ ᠭᠷᠠᠨᠳᠧᠲ ᠦ᠋ᠨ ᠠᠪᠠᠭᠠᠢ:
《ᠲᠡᠭᠷᠢ ᠥᠷᠥᠰᠢᠶᠡ ᠠ᠋!》 ᠭᠡᠵᠦ ᠬᠠᠰᠬᠢᠷᠪᠠ᠃
ᠡᠪᠦᠭᠡᠨ᠂ ᠥᠯᠥᠨ ᠪᠠᠷᠰ ᠤᠨᠲᠠᠭᠠ ᠬᠡᠦᠬᠡᠳ ᠲᠦ᠍ ᠣᠷᠣᠬᠤ ᠮᠡᠲᠦ ᠵᠠᠰᠠᠯ ᠵᠢᠮᠰᠡᠭ ᠦ᠋ᠨ ᠬᠠᠢᠷᠴᠠᠭ ᠤᠷᠤᠭᠤ ᠨᠢ ᠤᠬᠤᠰᠬᠢᠨ ᠳᠠᠭᠠᠷᠢᠪᠠ᠃
《ᠶᠠᠮᠠᠷ ᠶᠠᠭᠤᠮᠠ ᠪᠣᠢ?》 ᠭᠡᠵᠦ ᠡᠪᠦᠭᠡᠨ ᠡᠷᠳᠡᠨᠢ ᠶ᠋ᠢᠨ ᠬᠠᠢᠷᠴᠠᠭ ᠢ᠋ ᠴᠣᠩᠬᠣ ᠤᠷᠤᠭᠤ ᠪᠠᠷᠢᠨ ᠣᠴᠢᠭᠠᠳ 《ᠬᠠ᠂ ᠰᠢᠵᠢᠷ ᠠᠯᠲᠠ! ᠰᠢᠵᠢᠷ ᠠᠯᠲᠠ!》 ᠭᠡᠵᠦ ᠬᠠᠰᠬᠢᠷᠴᠤ ᠪᠠᠢᠪᠠ᠃ ᠲᠡᠭᠡᠭᠡᠳ 《ᠶᠠᠮᠠᠷ ᠶᠡᠬᠡ ᠠᠯᠲᠠ ᠪᠣᠢ! ᠬᠣᠶᠠᠷ ᠵᠢᠩ ᠪᠠᠢᠨᠠ ᠰᠢᠦ᠃ ᠬᠠ! ᠬᠠ! ᠴᠠᠷᠯᠧᠰ ᠡᠭᠦᠨ ᠢ᠋ ᠴᠢᠮᠠ ᠲᠠᠢ ᠭᠤᠸᠠ ᠦᠵᠡᠰᠬᠦᠯᠡᠩᠲᠦ ᠠᠯᠲᠠᠨ ᠵᠣᠭᠣᠰ ᠢ᠋ᠶ᠋ᠠᠷ ᠰᠣᠯᠢᠭᠰᠠᠨ ᠪᠢᠵᠡ᠂ ᠲᠡᠢᠮᠦ ᠤᠤ᠂ᠦᠭᠡᠢ ᠦᠦ? ᠶᠠᠭᠠᠬᠢᠭᠠᠳ ᠨᠠᠳᠠ ᠡᠷᠲᠡᠬᠡᠨ ᠬᠡᠯᠡᠭᠰᠡᠨ ᠦᠭᠡᠢ ᠪᠣᠢ? ᠡᠨᠡ ᠠᠷᠠᠯᠵᠢᠶᠠ ᠴᠢᠨᠢ ᠰᠠᠢᠨ ᠠᠷᠠᠯᠵᠢᠶᠠ ᠪᠣᠯᠵᠠᠢ᠃ ᠬᠣᠩᠭᠣᠷ ᠮᠢᠨᠢ᠂ ᠴᠢ ᠶᠣᠰᠣᠲᠠᠢ ᠮᠢᠨᠦ ᠥᠬᠢᠨ ᠮᠥᠨ ᠪᠠᠢᠨᠠ᠂ ᠪᠢ ᠮᠡᠳᠡᠯᠡ》 ᠭᠡᠪᠡ᠃
ᠢᠦᠭᠧᠨ᠋ᠸ ᠦ᠋ᠨ ᠳᠥᠷᠪᠡᠨ ᠮᠥᠴᠡ ᠨᠢ ᠳᠠᠭᠵᠢᠨᠠ᠃ ᠡᠪᠦᠭᠡᠨ:
《ᠡᠨᠡ ᠴᠢᠨᠢ ᠴᠠᠷᠯᠧᠰ ᠦ᠋ᠨ ᠶᠠᠭᠤᠮᠠ ᠪᠢᠰᠢ ᠭᠡᠵᠦ ᠦᠦ?》 ᠭᠡᠪᠡ᠃
《ᠮᠥᠨ᠂ ᠠᠪᠤ ᠠ᠋᠂ ᠡᠨᠡ ᠬᠠᠢᠷᠴᠠᠭ ᠮᠢᠨᠦ ᠪᠢᠰᠢ᠂ ᠡᠨᠡ ᠪᠣᠯ ᠬᠠᠯᠳᠠᠰᠢ ᠦᠭᠡᠢ ᠠᠷᠢᠭᠤᠨ ᠨᠠᠨᠳᠢᠨ ᠶᠠᠭᠤᠮᠠ ᠪᠠᠢᠭᠠ ᠶᠤᠮ᠂ ᠨᠠᠳᠠ ᠬᠠᠳᠠᠭᠠᠯᠠᠭᠤᠯᠤᠭᠰᠠᠨ ᠶᠠᠭᠤᠮᠠ ᠶᠤᠮ᠃ 》
《ᠴᠠᠰᠢ᠂ ᠴᠠᠰᠢ᠂ ᠴᠠᠰᠢ! ᠲᠡᠷᠡ ᠬᠥᠮᠦᠨ ᠴᠢᠨᠦ ᠭᠡᠷ ᠦ᠋ᠨ ᠬᠥᠷᠥᠩᠭᠡ ᠶ᠋ᠢ ᠴᠢᠨᠢ ᠠᠪᠤᠭᠰᠠᠨ ᠲᠤᠯᠠ ᠴᠢᠮᠠ ᠳ᠋ᠤ᠌ ᠲᠥᠯᠥᠵᠦ ᠥᠭᠬᠦ ᠶᠣᠰᠣᠲᠠᠢ᠃ 》
《ᠠᠪᠤ ᠁》
ᠭᠷᠠᠨᠳᠧᠲ ᠬᠢᠲᠤᠭᠠ ᠪᠠᠨ ᠰᠤᠭᠤᠯᠵᠤ ᠠᠯᠲᠠ ᠡᠴᠡ ᠨᠢ ᠨᠢᠭᠡ ᠬᠡᠰᠡᠭ ᠬᠣᠪᠬᠣᠯᠤᠶᠠ ᠭᠡᠵᠦ ᠪᠣᠳᠣᠭᠠᠳ ᠨᠥᠬᠥᠭᠡ ᠬᠠᠢᠷᠴᠠᠭ ᠢ᠋ᠶ᠋ᠠᠨ ᠤᠷᠢᠳᠠ ᠪᠠᠷ ᠰᠠᠨᠳᠠᠯᠢ ᠳᠡᠭᠡᠷᠡ ᠲᠠᠯᠪᠢᠮᠠᠭᠴᠠ ᠢᠦᠭᠧᠨ᠋ᠸ ᠤᠬᠤᠰᠬᠢᠨ ᠪᠤᠯᠢᠶᠠᠬᠤ ᠭᠡᠬᠦ ᠳ᠋ᠦ᠍ ᠱᠠᠯᠠᠮᠠᠴᠢᠨ ᠤ᠋ ᠨᠢᠳᠦ ᠬᠠᠢᠷᠴᠠᠭ ᠥᠬᠢᠨ ᠬᠣᠶᠠᠷ ᠡᠴᠡ ᠪᠠᠨ ᠣᠭᠲᠣ ᠰᠠᠯᠬᠤ ᠦᠭᠡᠢ ᠪᠠᠢᠭᠰᠠᠨ ᠲᠤᠯᠠ ᠥᠬᠢᠨ ᠢ᠋ᠶ᠋ᠡᠨ ᠴᠢᠩᠭᠠ ᠲᠦᠯᠬᠢᠮᠡᠭᠴᠡ ᠥᠬᠢᠨ ᠨᠢ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠣᠷᠣ ᠳᠡᠭᠡᠷᠡ ᠤᠨᠠᠪᠠ᠃
《ᠨᠣᠶᠠᠨ ᠮᠢᠨᠢ! ᠨᠣᠶᠠᠨ ᠮᠢᠨᠢ》 ᠭᠡᠵᠦ ᠢᠦᠭᠧᠨ᠋ᠸ ᠦ᠋ᠨ ᠡᠬᠡ ᠬᠠᠰᠬᠢᠷᠤᠨ ᠣᠷᠣ ᠳᠡᠭᠡᠷᠡ ᠪᠡᠨ ᠪᠣᠰᠴᠤ ᠰᠠᠭᠤᠪᠠ᠃
ᠭᠷᠠᠨᠳᠧᠲ ᠬᠢᠲᠤᠭᠠ ᠪᠠᠨ ᠰᠤᠭᠤᠯᠵᠤ ᠬᠣᠪᠬᠣᠯᠬᠤ ᠭᠡᠪᠡ᠃ ᠢᠦᠭᠧᠨ᠋ᠸ ᠦᠳᠲᠡᠷ ᠰᠥᠭᠥᠳᠴᠦ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠷᠭᠡᠳᠡ ᠮᠥᠯᠬᠥᠨ ᠣᠴᠢᠭᠠᠳ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠡᠷᠭᠦᠵᠦ ᠬᠠᠰᠬᠢᠷᠤᠨ:
《ᠠᠪᠤ ᠠ᠋ ᠠᠪᠤ᠂ ᠳ᠋ᠾᠷᠠ ᠡᠬᠡ ᠪᠤᠷᠬᠠᠨ ᠤ᠋ ᠨᠢᠭᠤᠷ ᠳᠡᠭᠡᠷᠡ᠂ ᠵᠠᠭᠠᠯᠮᠠᠢ ᠳᠡᠭᠡᠷᠡᠬᠢ ᠾᠷᠢᠰᠲ᠋ᠣᠰ ᠤ᠋ᠨ ᠨᠢᠭᠤᠷ ᠳᠡᠭᠡᠷᠡ᠂ ᠮᠢᠩᠭᠠᠨ ᠪᠤᠷᠬᠠᠨ ᠤ᠋ ᠨᠢᠭᠤᠷ ᠳᠡᠭᠡᠷᠡ᠂ ᠬᠣᠢᠲᠤ ᠶ᠋ᠢᠨ ᠰᠦᠨᠡᠰᠦ ᠪᠡᠨ ᠪᠣᠳᠣ᠂ ᠮᠢᠨᠦ ᠠᠮᠢᠳᠤ ᠶ᠋ᠢᠨ ᠨᠢᠭᠤᠷ ᠳᠡᠭᠡᠷᠡ ᠲᠠ ᠲᠡᠭᠦᠨ ᠢ᠋ ᠪᠤᠤ ᠬᠥᠳᠡᠯᠭᠡ! ᠡᠨᠡ ᠵᠠᠰᠠᠯ ᠵᠢᠮᠰᠡᠭ ᠦ᠋ᠨ ᠬᠠᠢᠷᠴᠠᠭ ᠪᠣᠯ ᠮᠢᠨᠦ ᠶᠠᠭᠤᠮᠠ ᠪᠢᠰᠢ᠂ ᠲᠠᠨ ᠤ᠋ ᠴᠤ᠌ ᠶᠠᠭᠤᠮᠠ ᠪᠢᠰᠢ᠂ ᠪᠡᠲᠡᠷᠡᠭᠰᠡᠨ ᠰᠠᠳᠤᠨ ᠤ᠋ ᠮᠢᠨᠢ ᠶᠠᠭᠤᠮᠠ ᠪᠠᠢᠭᠠ ᠶᠤᠮ᠂ ᠨᠠᠳᠠ ᠬᠠᠳᠠᠭᠠᠯᠠᠭᠤᠯᠤᠭᠰᠠᠨ ᠶᠤᠮ᠂ ᠪᠢ ᠤᠭ ᠬᠡᠪ ᠢ᠋ᠶ᠋ᠡᠷ ᠨᠢ ᠪᠤᠴᠠᠭᠠᠨ ᠥᠭᠭᠦᠨᠡ》 ᠭᠡᠵᠦ ᠬᠡᠯᠡᠪᠡ᠃
《ᠴᠢᠮᠠ ᠳ᠋ᠤ᠌ ᠬᠠᠳᠠᠭᠠᠯᠠᠭᠤᠯᠤᠭᠰᠠᠨ ᠶᠤᠮ ᠪᠣᠯ ᠴᠢ ᠶᠠᠭᠤ ᠭᠡᠵᠦ ᠭᠠᠷᠭᠠᠵᠤ ᠦᠵᠡᠭᠰᠡᠨ ᠶᠦᠮ? ᠦᠵᠡᠬᠦ ᠴᠢᠨᠢ ᠭᠠᠷ ᠬᠦᠷᠬᠦ ᠡᠴᠡ ᠨᠡᠩ ᠴᠦ᠍ ᠪᠣᠯᠳᠠᠭ ᠦᠭᠡᠢ ᠶᠠᠪᠤᠳᠠᠯ᠃ 》
《ᠠᠪᠤ ᠠ᠋᠂ ᠡᠪᠳᠡᠵᠦ ᠪᠣᠯᠬᠤ ᠦᠭᠡᠢ ᠰᠢᠦ᠂ ᠲᠠ ᠨᠠᠮᠠᠶ᠋ᠢ ᠬᠥᠮᠦᠨ ᠦ᠌ ᠨᠢᠭᠤᠷ ᠬᠠᠷᠠᠵᠤ ᠪᠣᠯᠬᠤ ᠦᠭᠡᠢ ᠪᠣᠯᠭᠠᠯᠠ ᠰᠢᠦ! ᠠᠪᠤ᠂ ᠰᠣᠨᠣᠰᠴᠤ ᠪᠠᠢᠨᠠ ᠤᠤ?》
《ᠨᠣᠶᠠᠨ ᠮᠢᠨᠢ᠂ ᠪᠢ ᠴᠢᠮᠠ ᠡᠴᠡ ᠭᠤᠶᠤᠶᠠ》 ᠭᠡᠵᠦ ᠡᠵᠢ ᠨᠢ ᠳᠠᠬᠢᠨ ᠬᠡᠯᠡᠪᠡ᠃
《ᠠᠪᠤ ᠠ᠋!》 ᠭᠡᠵᠦ ᠢᠦᠭᠧᠨ᠋ᠸ ᠨᠢᠭᠡ ᠶᠡᠬᠡ ᠬᠠᠰᠬᠢᠷᠬᠤ ᠳ᠋ᠤ᠌ ᠨᠠᠨᠤᠩ ᠴᠤ᠌ ᠠᠶᠤᠵᠤ ᠠᠰᠠᠷ ᠳᠡᠭᠡᠷᠡ ᠭᠦᠶᠦᠨ ᠭᠠᠷᠴᠤ ᠢᠷᠡᠪᠡ᠃
ᠢᠦᠭᠧᠨ᠋ᠸ ᠨᠢᠭᠡᠨ ᠬᠢᠲᠤᠭᠠ ᠰᠢᠭᠦᠷᠡᠨ ᠠᠪᠴᠤ ᠵᠡᠪᠰᠡᠭ ᠪᠣᠯᠭᠠᠪᠠ᠃
《ᠶᠠᠭᠠᠬᠢᠬᠤ ᠨᠢ ᠪᠣᠢ?》 ᠭᠡᠵᠦ ᠭᠷᠠᠨᠳᠧᠲ ᠬᠦᠢᠲᠡᠨ ᠢ᠋ᠶ᠋ᠡᠷ ᠢᠨᠢᠶᠡᠨ ᠠᠰᠠᠭᠤᠪᠠ᠃
《ᠨᠣᠶᠠᠨ᠂ ᠨᠣᠶᠠᠨ᠂ ᠴᠢ ᠮᠢᠨᠦ ᠵᠢᠷᠦᠬᠡ ᠶ᠋ᠢ ᠰᠤᠭᠤᠯᠤᠯᠠ!》 ᠭᠡᠵᠦ ᠢᠦᠭᠧᠨ᠋ᠸ ᠦ᠋ᠨ ᠡᠵᠢ ᠬᠠᠰᠬᠢᠷᠪᠠ᠃
《ᠠᠪᠤ ᠠ᠋᠂ ᠴᠢᠨᠦ ᠬᠢᠲᠤᠭᠠ ᠠᠯᠲᠠᠨ ᠬᠠᠢᠷᠴᠠᠭ ᠡᠴᠡ ᠵᠢᠭᠠᠬᠠᠨ ᠯᠠ ᠬᠡᠯᠲᠡᠯᠪᠡᠯ ᠪᠢ ᠡᠨᠡ ᠬᠢᠲᠤᠭᠠ ᠪᠠᠷ ᠠᠮᠢ ᠨᠠᠰᠤ ᠪᠠᠨ ᠡᠴᠦᠰᠯᠡᠭᠦᠯᠦᠨᠡ᠃ ᠴᠢ ᠮᠢᠨᠦ ᠡᠵᠢ ᠶ᠋ᠢ ᠬᠥᠨᠥᠭᠡᠵᠦ ᠡᠴᠦᠰ ᠦ᠋ᠨ ᠠᠮᠢᠰᠬᠤᠯ ᠳᠡᠭᠡᠷᠡ ᠨᠢ ᠬᠦᠷᠭᠡᠭᠡᠳ ᠣᠳᠣ ᠪᠠᠰᠠ ᠥᠪᠡᠷ ᠦ᠋ᠨ ᠲᠥᠷᠥᠭᠰᠡᠨ ᠬᠡᠦᠬᠡᠨ ᠢ᠋ᠶ᠋ᠡᠨ ᠠᠯᠠᠬᠤ ᠭᠡᠵᠦ ᠪᠠᠢᠨᠠ᠂ ᠪᠣᠯᠵᠠᠢ᠂ ᠲᠡᠭᠡᠪᠡᠯ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠣᠷᠣ ᠦᠭᠡᠢ ᠪᠣᠯᠤᠶᠠ!》
ᠭᠷᠠᠨᠳᠧᠲ ᠬᠢᠲᠤᠭᠠ ᠪᠠᠨ ᠵᠠᠰᠠᠯ ᠵᠢᠮᠰᠡᠭ ᠦ᠋ᠨ ᠬᠠᠢᠷᠴᠠᠭ ᠤᠷᠤᠭᠤ ᠴᠢᠭᠯᠡᠭᠦᠯᠵᠦ᠂ ᠥᠬᠢᠨ ᠢ᠋ᠶ᠋ᠡᠨ ᠬᠠᠷᠠᠵᠤ ᠵᠣᠭᠰᠣᠨ ᠶᠠᠭᠠᠬᠢᠬᠤ ᠪᠠᠨ ᠡᠰᠡ ᠰᠢᠢᠳᠪᠦᠷᠢᠯᠡᠨ ᠲᠠᠲᠠᠭᠠᠯᠵᠠᠵᠤ ᠪᠠᠢᠪᠠ᠃
《ᠴᠢ ᠲᠡᠭᠡᠵᠦ ᠴᠢᠳᠠᠨᠠ ᠤᠤ? ᠢᠦᠭᠧᠨ᠋ᠸ?》 ᠭᠡᠵᠦ ᠡᠪᠦᠭᠡᠨ ᠬᠡᠯᠡᠪᠡ᠃ 《ᠴᠢᠳᠠᠨᠠ ᠰᠢᠦ᠂ ᠨᠣᠶᠠᠨ》 ᠭᠡᠵᠦ ᠢᠦᠭᠧᠨ᠋ᠸ ᠦ᠋ᠨ ᠡᠬᠡ ᠬᠡᠯᠡᠪᠡ᠃
《ᠡᠨᠡ ᠴᠢᠨᠢ ᠬᠡᠯᠡᠪᠡᠯ ᠬᠢᠳᠡᠭ ᠬᠥᠮᠦᠨ᠂ ᠠᠪᠤᠭᠠᠢ ᠲᠠ ᠡᠨᠡ ᠶᠠᠪᠤᠬᠤ ᠨᠠᠰᠤᠨ ᠳ᠋ᠠᠭᠠᠨ ᠭᠠᠭᠴᠠ ᠤᠳᠠᠭᠠ ᠴᠤ᠌ ᠭᠡᠰᠡᠨ ᠰᠣᠶᠣᠨ ᠳᠣᠲᠣᠷᠠ ᠶᠠᠪᠤᠵᠤ ᠪᠣᠯᠤᠨᠠ ᠪᠣᠢ ᠳᠠ ?》 ᠭᠡᠵᠦ ᠨᠠᠨᠤᠩ ᠬᠠᠰᠬᠢᠷᠪᠠ᠃
ᠭᠷᠠᠨᠳᠧᠲ ᠠᠯᠲᠠ ᠤᠷᠤᠭᠤ ᠨᠢᠭᠡ ᠬᠠᠷᠠᠵᠤ ᠥᠬᠢᠨ ᠤᠷᠤᠭᠤ ᠪᠠᠨ ᠨᠢᠭᠡ ᠬᠠᠷᠠᠨ ᠬᠡᠰᠡᠭ ᠮᠡᠯᠡᠷᠡᠪᠡ᠃ ᠭᠷᠠᠨᠳᠧᠲ ᠦ᠋ᠨ ᠠᠪᠠᠭᠠᠢ ᠤᠬᠠᠭᠠ ᠠᠯᠳᠠᠪᠠ᠃
《ᠠᠪᠤᠭᠠᠢ ᠲᠠ ᠬᠠᠷᠠᠬᠤ ᠦᠭᠡᠢ ᠦᠦ᠂ ᠬᠠᠲᠤᠨ ᠠᠮᠢ ᠲᠠᠯᠪᠢᠴᠢᠬᠠᠯᠠ!》 ᠭᠡᠵᠦ ᠨᠠᠨᠤᠩ ᠬᠠᠰᠬᠢᠷᠪᠠ᠃
《ᠲᠦᠢ᠂ ᠥᠬᠢᠨ ᠠ᠋᠂ ᠪᠢᠳᠡ ᠭᠠᠭᠴᠠ ᠬᠠᠢᠷᠴᠠᠭ ᠤ᠋ᠨ ᠲᠥᠯᠥᠭᠡ ᠠᠭᠤᠷᠯᠠᠵᠠᠭᠠᠬᠤ ᠪᠠᠨ ᠪᠣᠯᠢᠶᠠ᠂ ᠠᠪᠤᠭᠠᠳ ᠶᠠᠪᠤ!》
ᠱᠠᠯᠠᠮᠠᠴᠢᠨ ᠳᠣᠣᠷᠠ ᠪᠠᠨ ᠵᠠᠰᠠᠯ ᠵᠢᠮᠰᠡᠭ ᠦ᠋ᠨ ᠬᠠᠢᠷᠴᠠᠭ ᠢ᠋ ᠣᠷᠣ ᠳᠡᠭᠡᠷᠡ ᠬᠠᠶᠠᠪᠠ᠃ 《ᠨᠠᠨᠤᠩ᠂ ᠴᠢ ᠶᠠᠪᠤᠵᠤ ᠹᠧᠷᠯᠠᠩ ᠠᠪᠤᠭᠠᠢ ᠶ᠋ᠢ ᠵᠠᠯᠠᠵᠤ ᠢᠷᠡ᠃ - ᠪᠣᠯᠵᠠᠢ᠂ ᠬᠠᠲᠤᠨ ᠮᠢᠨᠢ》 ᠭᠡᠳ ᠭᠷᠠᠨᠳᠧᠲ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠠᠷ ᠢ᠋ ᠦᠨᠦᠰᠴᠦ 《ᠵᠠ᠂ ᠪᠢᠳᠡ ᠡᠪᠯᠡᠷᠡᠪᠡ᠃ ᠣᠳᠣ ᠬᠠᠮᠢᠶᠠ ᠦᠭᠡᠢ᠃ - ᠲᠡᠢᠮᠦ ᠪᠣᠢ ᠳᠠ᠂ ᠥᠬᠢᠨ ᠮᠢᠨᠢ? ᠣᠳᠣ ᠬᠠᠲᠠᠭᠰᠠᠨ ᠲᠠᠯᠬᠠ ᠢᠳᠡᠬᠦ ᠬᠡᠷᠡᠭ ᠦᠭᠡᠢ᠂ ᠶᠠᠭᠤ ᠯᠠ ᠢᠳᠡᠬᠦ ᠳᠤᠷᠠ ᠲᠠᠢ ᠪᠣᠯ ᠶᠠᠭᠤ ᠪᠠᠨ ᠢᠳᠡᠵᠦ ᠪᠣᠢ ᠁ ᠠ! ᠡᠵᠢ ᠨᠢ ᠨᠢᠳᠦ ᠪᠡᠨ ᠨᠡᠭᠡᠭᠡᠯᠡ᠃ ᠁ ᠠᠢ᠂ ᠡᠵᠢ ᠨᠢ᠂ ᠵᠢᠭᠠᠬᠠᠨ ᠡᠵᠢ ᠨᠢ᠂ ᠰᠠᠢᠨ ᠡᠵᠢ ᠨᠢ᠂ ᠣᠳᠣ ᠪᠣᠯᠵᠠᠢ! ᠬᠦᠢ᠂ ᠴᠢ ᠬᠠᠷᠠ ᠳᠠ᠂ ᠪᠢ ᠢᠦᠭᠧᠨ᠋ᠸ ᠢ᠋ ᠲᠡᠪᠡᠷᠢᠵᠦ ᠪᠠᠢᠨᠠ᠃ ᠥᠬᠢᠨ ᠴᠢᠨᠢ ᠦᠶᠡᠯᠢᠳ ᠳᠡᠭᠦᠦ ᠳ᠋ᠡᠭᠡᠨ ᠳᠤᠷᠠ ᠲᠠᠢ ᠶᠤᠮ᠂ ᠲᠡᠭᠦᠨ ᠳ᠋ᠦ᠍ ᠮᠣᠷᠳᠠᠪᠠᠯ ᠮᠣᠷᠳᠠᠭ᠂ ᠬᠠᠢᠷᠴᠠᠭ ᠢ᠋ ᠨᠢ ᠴᠠᠰᠢ ᠬᠢᠵᠦ ᠬᠠᠳᠠᠭᠠᠯᠠᠭ᠃ ᠴᠢ ᠮᠢᠨᠢ ᠯᠡ ᠤᠷᠲᠤ ᠨᠠᠰᠤᠯᠠ᠂ ᠬᠥᠭᠡᠷᠦᠬᠦᠢ ᠴᠢ ᠮᠢᠨᠢ᠃ ᠬᠦᠢ᠂ ᠴᠢ ᠪᠡᠶᠡ ᠪᠡᠨ ᠨᠢᠭᠡ ᠬᠥᠳᠡᠯᠭᠡᠵᠦ ᠨᠠᠳᠠ ᠦᠵᠡᠭᠦᠯᠦᠭᠡᠷᠡᠢ! ᠪᠢ ᠴᠢᠮᠠ ᠳ᠋ᠤ᠌ ᠬᠡᠯᠡᠶᠡ᠂ ᠴᠢ ᠪᠤᠷᠬᠠᠨ ᠤ᠋ ᠮᠡᠨᠳᠦᠯᠡᠭᠰᠡᠨ ᠡᠳᠦᠷ ᠬᠠᠮᠤᠭ ᠤ᠋ᠨ ᠶᠡᠬᠡ ᠨᠡᠷᠡ ᠴᠤᠤ ᠭᠠᠷᠬᠤᠢᠴᠠ᠂ ᠰᠡᠦᠮᠦᠷ ᠲᠦ᠍ ᠤᠷᠢᠳᠤ ᠡᠮᠦᠨᠡ ᠭᠠᠷᠤᠭᠠᠳᠤᠢ ᠲᠠᠬᠢᠯᠭᠠ ᠠᠪᠴᠤ ᠶᠠᠪᠤᠭᠠᠷᠠᠢ》 ᠭᠡᠪᠡ᠃
《ᠲᠡᠭᠷᠢ ᠠ᠋᠂ ᠡᠬᠡᠨᠡᠷ ᠬᠡᠦᠬᠡᠳ ᠲᠡᠭᠡᠨ ᠴᠢ ᠢᠩᠭᠢᠵᠦ ᠶᠠᠭᠠᠬᠢᠵᠤ ᠪᠣᠯᠤᠨᠠ ᠪᠣᠢ!》 ᠭᠡᠵᠦ ᠬᠡᠯᠡᠭᠰᠡᠨ ᠭᠷᠠᠨᠳᠧᠲ ᠦ᠋ᠨ ᠠᠪᠠᠭᠠᠢ ᠶ᠋ᠢᠨ ᠳᠠᠭᠤᠨ ᠲᠤᠩ ᠰᠤᠯᠠᠬᠠᠨ ᠰᠣᠨᠣᠰᠳᠠᠪᠠ᠃
《ᠳᠠᠬᠢᠭᠠᠳ ᠶᠠᠭᠠᠬᠢᠭᠰᠠᠨ ᠴᠤ᠌ ᠢᠩᠭᠢᠬᠦ ᠦᠭᠡᠢ᠂ ᠶᠠᠭᠠᠬᠢᠭᠰᠠᠨ ᠴᠤ᠌ ᠢᠩᠭᠢᠬᠦ ᠦᠭᠡᠢ᠂ ᠬᠥᠭᠡᠷᠦᠬᠦᠢ ᠴᠢ ᠮᠢᠨᠢ᠂ ᠬᠠᠷᠠᠵᠤ ᠪᠠᠢ》 ᠭᠡᠵᠦ ᠱᠠᠯᠠᠮᠠᠴᠢᠨ ᠬᠡᠯᠡᠪᠡ᠃
ᠭᠷᠠᠨᠳᠧᠲ ᠨᠢᠭᠤᠴᠠ ᠭᠡᠷ ᠡᠴᠡ ᠪᠡᠨ ᠨᠢᠭᠡ ᠪᠠᠭᠯᠠᠭᠠ ᠯᠤᠢᠵᠢ ᠠᠪᠴᠢᠷᠠᠵᠤ ᠣᠷᠣ ᠳᠡᠭᠡᠷᠡ ᠰᠢᠲᠠᠪᠠ᠃
ᠭᠷᠠᠨᠳᠧᠲ ᠵᠣᠭᠣᠰ ᠢ᠋ᠶ᠋ᠠᠨ ᠭᠠᠷ ᠳᠡᠭᠡᠷᠡ ᠪᠡᠨ ᠴᠣᠬᠢᠯᠠᠨ ᠨᠠᠭᠠᠳᠬᠤ ᠶ᠋ᠢᠨ ᠳᠠᠭᠠᠤ: 《ᠢᠦᠭᠧᠨ᠋ᠸ ᠬᠠᠲᠤᠨ ᠠ᠋᠂ ᠡᠭᠦᠨ ᠢ᠋ ᠲᠠ ᠨᠠᠷ ᠲᠤ᠌ ᠥᠭᠬᠦᠶᠡ᠂ ᠬᠦᠢ᠂ ᠬᠠᠲᠤᠨ ᠠ᠋᠂ ᠴᠢ ᠰᠡᠳᠬᠢᠯ ᠢ᠋ᠶ᠋ᠡᠨ ᠲᠠᠢᠪᠤᠰᠢᠷᠠᠭᠤᠯ᠂ ᠬᠤᠷᠳᠤᠬᠠᠨ ᠰᠠᠢᠨ ᠪᠣᠯᠤᠭᠠᠴᠢ᠂ ᠴᠢ ᠮᠢᠨᠢ ᠶᠠᠭᠤ ᠠᠪᠤᠶᠠ ᠭᠡᠪᠡᠯ ᠶᠠᠭᠤ ᠪᠠᠢᠨᠠ᠂ ᠢᠦᠭᠧᠨ᠋ᠸ ᠴᠦ᠍ ᠮᠥᠨ ᠠᠳᠠᠯᠢ᠂ ᠬᠠᠷᠠ ᠳᠠ᠂ ᠡᠨᠡ ᠨᠢᠭᠡ ᠵᠠᠭᠤᠨ ᠠᠯᠲᠠᠨ ᠯᠤᠢᠵᠢ ᠶ᠋ᠢ ᠪᠣᠯ ᠢᠦᠭᠧᠨ᠋ᠸ ᠲᠦ᠍ ᠥᠭᠬᠦᠯᠡ᠂ ᠴᠢ ᠡᠭᠦᠨ ᠢ᠋ ᠳᠠᠬᠢᠭᠠᠳ ᠬᠥᠮᠦᠨ ᠳ᠋ᠦ᠍ ᠥᠭᠴᠢᠬᠡᠬᠦ ᠦᠭᠡᠢ ᠪᠣᠢ ᠳᠠ᠂ ᠢᠦᠭᠧᠨ᠋ᠸ?》 ᠭᠡᠵᠦ ᠪᠠᠢᠪᠠ᠃
ᠭᠷᠠᠨᠳᠧᠲ ᠦ᠋ᠨ ᠠᠪᠠᠭᠠᠢ ᠥᠬᠢᠨ ᠲᠡᠢ ᠪᠡᠨ ᠥᠭᠡᠳᠡ ᠥᠭᠡᠳᠡ ᠡᠴᠡ ᠪᠡᠨ ᠰᠢᠷᠳᠡᠯᠴᠡᠨ ᠭᠠᠢᠬᠠᠨᠠ᠃
《ᠠᠪᠤ ᠠ᠋᠂ ᠵᠣᠭᠣᠰ ᠢ᠋ᠶ᠋ᠠᠨ ᠴᠠᠰᠢ ᠨᠢ ᠬᠤᠷᠢᠶᠠ᠂ ᠪᠢᠳᠡᠨ ᠳ᠋ᠦ᠍ ᠵᠥᠪᠬᠡᠨ ᠴᠢᠨᠦ ᠬᠠᠢᠷᠠ ᠰᠡᠳᠬᠢᠯ ᠯᠡ ᠬᠡᠷᠡᠭᠲᠡᠢ᠃ 》
《ᠲᠠᠭᠠᠷᠠᠵᠤ ᠪᠠᠢᠨᠠ᠂ ᠴᠣᠬᠣᠮ ᠲᠠᠭᠠᠷᠠᠵᠤ ᠪᠠᠢᠨᠠ》 ᠭᠡᠳ ᠭᠷᠠᠨᠳᠧᠲ ᠠᠯᠲᠠᠨ ᠯᠤᠢᠵᠢ ᠪᠠᠨ ᠲᠠᠭᠠᠷᠴᠤᠭᠯᠠᠵᠤ᠂ 《ᠪᠢᠳᠡ ᠡᠪ ᠨᠠᠢᠷᠲᠠᠢ ᠰᠠᠢᠬᠠᠨ ᠠᠮᠢᠳᠤᠷᠠᠵᠠᠭᠠᠶᠠ᠃ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠠᠰᠠᠷ ᠡᠴᠡ ᠪᠠᠨ ᠪᠠᠭᠤᠵᠤ ᠬᠣᠭᠣᠯᠠᠨ ᠤ᠋ ᠭᠡᠷ ᠲᠡᠭᠡᠨ ᠣᠴᠢᠵᠤ ᠣᠷᠣᠢ ᠶ᠋ᠢᠨ ᠬᠣᠭᠣᠯᠠ ᠪᠠᠨ ᠢᠳᠡᠵᠡᠭᠡᠶᠡ᠃ ᠡᠳᠦᠷ ᠪᠦᠷᠢ ᠬᠣᠶᠠᠷ ᠲᠦᠩᠽᠢ ᠶ᠋ᠢᠨ ᠮᠥᠷᠥᠢ ᠲᠡᠢ ᠨᠠᠭᠠᠳᠤᠮ ᠨᠠᠭᠠᠳᠤᠶᠠ᠂ ᠲᠠ ᠨᠠᠷ ᠬᠠᠨᠲᠠᠯᠠ ᠨᠠᠭᠠᠳᠴᠤ ᠪᠠᠢ! ᠬᠠᠲᠤᠨ ᠠ᠋᠂ ᠪᠣᠯᠤᠨᠠ ᠤᠤ?》 ᠭᠡᠪᠡ᠃
《ᠠᠢ᠂ ᠶᠠᠭᠠᠬᠢᠭᠠᠳ ᠪᠣᠯᠬᠤ ᠦᠭᠡᠢ ᠪᠠᠢᠬᠤ ᠪᠣᠢ ᠳᠠ᠂ ᠲᠡᠭᠡᠬᠦ ᠨᠢ ᠴᠢᠮᠠ ᠳ᠋ᠤ᠌ ᠰᠠᠢᠬᠠᠨ ᠰᠠᠨᠠᠭᠳᠠᠬᠤ ᠪᠣᠯᠪᠠᠴᠤ ᠪᠢ ᠪᠣᠰᠴᠤ ᠴᠢᠳᠠᠬᠤ ᠦᠭᠡᠢ ᠰᠢᠦ》 ᠭᠡᠵᠦ ᠳᠥᠩᠭᠡᠵᠢ ᠠᠮᠢᠰᠬᠤᠭᠠ ᠲᠠᠢ ᠪᠠᠢᠭᠰᠠᠨ ᠡᠪᠡᠳᠴᠢᠨ ᠲᠡᠢ ᠡᠬᠡᠨᠡᠷ ᠨᠢ ᠬᠠᠷᠢᠭᠤᠯᠪᠠ᠃
《ᠬᠥᠭᠡᠷᠦᠬᠦᠢ ᠬᠠᠲᠤᠨ ᠮᠢᠨᠢ᠂ ᠪᠢ ᠴᠢᠮᠠᠶ᠋ᠢ ᠶᠠᠭᠠᠬᠢᠵᠤ ᠶᠡᠬᠡ ᠬᠠᠢᠷᠠᠯᠠᠳᠠᠭ ᠢ᠋ ᠴᠢ ᠮᠡᠳᠡᠬᠦ ᠦᠭᠡᠢ᠂ - ᠴᠢᠮᠠᠶ᠋ᠢ ᠪᠠᠰᠠ ᠶᠠᠭᠠᠬᠢᠵᠤ ᠬᠠᠢᠷᠠᠯᠠᠨᠠ ᠪᠣᠢ᠂ ᠥᠬᠢᠨ ᠮᠢᠨᠢ!》 ᠭᠡᠵᠦ ᠱᠠᠯᠠᠮᠠᠴᠢᠨ ᠬᠡᠯᠡᠪᠡ᠃
ᠭᠷᠠᠨᠳᠧᠲ ᠥᠬᠢᠨ ᠢ᠋ᠶ᠋ᠡᠨ ᠲᠡᠪᠡᠷᠢᠵᠦ ᠡᠷᠭᠦᠵᠦ ᠪᠠᠢᠪᠠ᠃
《ᠬᠠᠷᠠᠭᠠᠴᠢ! ᠮᠠᠭᠤᠳᠠᠯᠳᠤᠴᠢᠬᠠᠭᠠᠳ ᠳᠠᠷᠠᠭᠠ ᠨᠢ ᠥᠬᠢᠨ ᠢ᠋ᠶ᠋ᠡᠨ ᠲᠡᠪᠡᠷᠢᠵᠦ ᠪᠠᠢᠨᠠ᠂ ᠶᠠᠭᠠᠬᠢᠭᠰᠠᠨ ᠰᠠᠢᠬᠠᠨ ᠰᠡᠳᠬᠢᠯ ᠪᠣᠢ᠂ ᠢᠦᠭᠧᠨ᠋ᠸ ᠮᠢᠨᠢ! ᠁ ᠬᠠᠲᠤᠨ ᠴᠢ ᠬᠠᠷᠠᠭᠠᠴᠢ᠂ ᠪᠢᠳᠡ ᠬᠣᠶᠠᠷ ᠣᠳᠣ ᠶᠠᠭᠠᠬᠢᠵᠤ ᠶᠡᠬᠡ ᠬᠤᠪᠢᠯᠤᠭᠰᠠᠨ ᠪᠠᠢᠨᠠ ᠪᠣᠢ》 ᠭᠡᠳ ᠭᠷᠠᠨᠳᠧᠲ ᠪᠠᠰᠠ ᠨᠥᠭᠥᠭᠡ ᠵᠠᠰᠠᠯ ᠵᠢᠮᠰᠡᠭ ᠦ᠋ᠨ ᠬᠠᠢᠷᠴᠠᠭ ᠢ᠋ ᠵᠢᠭᠠᠵᠤ: 《ᠡᠭᠦᠨ ᠢ᠋ ᠪᠡᠨ ᠳᠠᠯᠳᠠ ᠬᠢᠴᠢᠬᠡ᠂ ᠠᠪᠤᠭᠠᠳ ᠶᠠᠪᠤ᠂ ᠪᠢᠲᠡᠭᠡᠢ ᠠᠶᠤ᠃ ᠪᠢ ᠡᠨᠡ ᠬᠠᠢᠷᠴᠠᠭ ᠢ᠋ ᠳᠠᠬᠢᠵᠤ ᠳᠤᠷᠠᠳᠬᠤ ᠦᠭᠡᠢ᠂ ᠡᠭᠦᠷᠢᠳᠡ ᠳᠤᠷᠠᠳᠬᠤ ᠦᠭᠡᠢ》 ᠭᠡᠵᠦ ᠢᠦᠭᠧᠨ᠋ᠸ ᠲᠦ᠍ ᠬᠡᠯᠡᠪᠡ᠃
ᠲᠡᠭᠡᠵᠦ ᠪᠠᠢᠲᠠᠯᠠ ᠰᠡᠦᠮᠦᠷ ᠦ᠋ᠨ ᠬᠠᠮᠤᠭ ᠤ᠋ᠨ ᠶᠡᠬᠡ ᠨᠡᠷᠡᠲᠡᠢ ᠡᠮᠴᠢ ᠹᠧᠷᠯᠠᠩ ᠠᠪᠤᠭᠠᠢ ᠢᠷᠡᠪᠡ᠃ ᠡᠪᠡᠳᠴᠢᠨ ᠲᠡᠢ ᠬᠥᠮᠦᠨ ᠢ᠋ ᠨᠢ ᠦᠵᠡᠵᠦ ᠳᠠᠭᠤᠰᠤᠭᠠᠳ ᠭᠷᠠᠨᠳᠧᠲ ᠲᠦ᠍: 《ᠬᠠᠲᠤᠨ ᠤ᠋ ᠴᠢᠨᠢ ᠡᠪᠡᠳᠴᠢᠨ ᠬᠦᠨᠳᠦ ᠪᠠᠢᠨᠠ᠂ ᠰᠠᠨᠠᠭᠠ ᠰᠡᠳᠬᠢᠯ ᠢ᠋ ᠨᠢ ᠣᠭᠲᠣ ᠲᠡᠪᠡᠳᠡᠭᠦᠯᠬᠦ ᠦᠭᠡᠢ᠂ ᠬᠢᠴᠢᠶᠡᠩᠭᠦᠢᠯᠡᠨ ᠰᠤᠪᠢᠯᠠᠵᠤ ᠨᠢᠮᠪᠠᠢ ᠰᠠᠢᠬᠠᠨ ᠠᠷᠠᠴᠢᠯᠠᠪᠠᠯ ᠨᠠᠮᠤᠷ ᠤ᠋ᠨ ᠰᠡᠭᠦᠯ ᠪᠣᠯᠲᠠᠯᠠ ᠲᠡᠰᠬᠦ ᠮᠠᠭᠠᠳ ᠦᠭᠡᠢ》 ᠭᠡᠵᠦ ᠰᠢᠭᠤᠳᠬᠠᠨ ᠬᠡᠯᠡᠪᠡ᠃
《ᠵᠣᠭᠣᠰ ᠶᠡᠬᠡ ᠬᠡᠷᠡᠭᠯᠡᠬᠦ ᠦᠦ? ᠡᠮ ᠤᠤᠭᠤᠬᠤ ᠬᠡᠷᠡᠭᠲᠡᠢ ᠪᠠᠢᠨᠠ ᠤᠤ?》
《ᠡᠮ ᠳᠡᠮᠡᠢ ᠬᠡᠷᠡᠭ ᠦᠭᠡᠢ᠂ ᠰᠤᠪᠢᠯᠠᠬᠤ ᠶᠠᠪᠤᠳᠠᠯ ᠴᠢᠬᠤᠯᠠ》 ᠭᠡᠵᠦ ᠬᠡᠯᠡᠭᠡᠳ ᠡᠮᠴᠢ ᠲᠡᠰᠬᠡᠯ ᠦᠭᠡᠢ ᠢᠨᠢᠶᠡᠮᠰᠦᠭᠯᠡᠪᠡ᠃
《ᠹᠧᠷᠯᠠᠩ ᠠᠪᠤᠭᠠᠢ᠂ ᠲᠠ ᠪᠣᠯ ᠨᠡᠷᠡ ᠲᠥᠷᠥ ᠲᠡᠢ ᠬᠥᠮᠦᠨ᠃ ᠪᠢ ᠲᠠᠨ ᠢ᠋ ᠪᠦᠷᠢᠨ ᠢᠲᠡᠭᠡᠨᠡ᠂ ᠲᠠ ᠬᠡᠳᠦᠢ ᠳ᠋ᠦ᠍ ᠢᠷᠡᠵᠦ ᠦᠵᠡᠬᠦ ᠭᠡᠵᠦ ᠪᠣᠳᠣᠪᠠᠯ ᠲᠡᠷᠡ ᠴᠠᠭ ᠲᠠᠭᠠᠨ ᠢᠷᠡᠵᠦ ᠪᠠᠢᠭᠠᠷᠠᠢ᠃ ᠮᠢᠨᠦ ᠬᠠᠲᠤᠨ ᠢ᠋ ᠪᠣᠰᠬᠠᠵᠤ ᠥᠭᠬᠦ ᠶ᠋ᠢ ᠬᠦᠰᠡᠶᠡ᠃ ᠮᠠᠨ ᠤ᠋ ᠭᠡᠷ ᠦ᠋ᠨ ᠬᠢᠨ ᠦ᠌ ᠠᠯᠢᠪᠠ ᠪᠦᠬᠦᠨ ᠨᠢ ᠴᠥᠮ ᠳᠣᠲᠣᠷᠠ ᠪᠠᠨ ᠪᠠᠢᠳᠠᠭ ᠡᠴᠡ ᠪᠣᠯᠵᠤ ᠭᠠᠳᠠᠨᠠ ᠡᠴᠡ ᠨᠢ ᠬᠠᠷᠠᠬᠤ ᠳ᠋ᠤ᠌ ᠮᠡᠳᠡᠭᠳᠡᠬᠦ ᠦᠭᠡᠢ ᠪᠣᠯᠪᠠᠴᠤ ᠪᠢ ᠲᠡᠭᠦᠨ ᠳ᠋ᠡᠭᠡᠨ ᠪᠣᠯ ᠲᠤᠢᠯ ᠤ᠋ᠨ ᠶᠡᠬᠡ ᠬᠠᠢᠷᠠᠲᠠᠢ ᠪᠠᠢᠳᠠᠭ ᠶᠤᠮ ᠰᠢᠦ᠃ ᠲᠡᠳᠡᠭᠡᠷ ᠬᠡᠷᠡᠭ ᠮᠢᠨᠦ ᠰᠡᠳᠬᠢᠯ ᠢ᠋ ᠪᠦᠷ ᠡᠬᠢ ᠠᠳᠠᠭ ᠦᠭᠡᠢ ᠰᠠᠮᠠᠭᠤᠷᠠᠭᠤᠯᠤᠭᠰᠠᠨ ᠶᠤᠮ᠃ ᠨᠠᠳᠠ ᠪᠠᠰᠠ ᠰᠡᠳᠬᠢᠯ ᠦ᠋ᠨ ᠵᠣᠪᠠᠯᠠᠩ ᠪᠠᠢᠨᠠ᠃ ᠳᠡᠭᠦᠦ ᠦᠬᠦᠭᠰᠡᠨ ᠡᠴᠡ ᠬᠣᠢᠰᠢ ᠰᠡᠳᠬᠢᠯ ᠵᠣᠪᠠᠭᠠᠬᠤ ᠬᠡᠷᠡᠭ ᠮᠢᠨᠦ ᠭᠡᠷ ᠲᠦ᠍ ᠣᠷᠣᠵᠤ ᠢᠷᠡᠭᠰᠡᠨ ᠶᠦᠮ᠃ ᠪᠢ ᠲᠡᠭᠦᠨ ᠦ᠌ ᠲᠥᠯᠥᠭᠡ ᠫᠠᠷᠢᠰ ᠲᠤ᠌ ᠵᠣᠭᠣᠰ ᠪᠠᠷᠠᠯᠠ ᠁ ᠲᠣᠭᠠ ᠲᠣᠮᠰᠢ ᠦᠭᠡᠢ ᠣᠯᠠᠨ ᠵᠣᠭᠣᠰ ᠪᠠᠷᠠᠭᠰᠠᠨ! ᠲᠡᠭᠡᠭᠡᠳ ᠪᠠᠰᠠ ᠡᠳᠦᠢ ᠪᠣᠯᠲᠠᠯᠠ ᠳᠠᠭᠤᠰᠤᠭᠠᠳᠤᠢ᠃ ᠵᠠ ᠪᠠᠶᠠᠷᠲᠠᠢ᠂ ᠠᠪᠤᠭᠠᠢ ᠮᠢᠨᠢ᠃ ᠮᠢᠨᠦ ᠬᠠᠲᠤᠨ ᠪᠣᠰᠬᠤ ᠭᠣᠷᠢᠳᠠᠯ ᠲᠠᠢ ᠯᠠ ᠪᠣᠯ ᠪᠤᠰᠬᠠᠵᠤ ᠥᠭᠬᠦ ᠶ᠋ᠢ ᠨᠠᠢᠳᠠᠶᠠ᠃ ᠵᠠᠭᠤ ᠬᠣᠶᠠᠷ ᠵᠠᠭᠤᠨ ᠹᠷᠠᠩᠺ ᠣᠷᠣᠭᠰᠠᠨ ᠴᠤ᠌ ᠰᠠᠪᠠᠭᠠ ᠦᠭᠡᠢ᠃ 》
ᠡᠬᠡᠨᠡᠷ ᠢ᠋ᠶ᠋ᠡᠨ ᠡᠳᠡᠭᠡᠭᠡᠬᠦ ᠶ᠋ᠢ ᠭᠷᠠᠨᠳᠧᠲ ᠶᠠᠭᠠᠬᠢᠵᠤ ᠶᠡᠬᠡ ᠬᠦᠰᠡᠪᠡᠴᠦ (ᠤᠴᠢᠷ ᠨᠢ ᠲᠡᠭᠦᠨ ᠦ᠌ ᠡᠬᠡᠨᠡᠷ ᠦᠬᠦᠪᠡᠯ ᠭᠡᠷᠢᠶᠡᠰ ᠢ᠋ ᠨᠢ ᠳᠠᠩᠰᠠᠯᠠᠬᠤ ᠪᠣᠯᠤᠨᠠ᠂ ᠡᠨᠡ ᠨᠢ ᠭᠷᠠᠨᠳᠧᠲ ᠦ᠋ᠨ ᠵᠢᠷᠦᠬᠡ ᠶ᠋ᠢ ᠰᠤᠭᠤᠯᠬᠤ ᠶᠠᠪᠤᠳᠠᠯ ᠠᠵᠢ) ᠡᠵᠢ ᠥᠬᠢᠨ ᠬᠣᠶᠠᠷ ᠲᠤ᠌ ᠰᠡᠳᠬᠢᠯ ᠦ᠋ᠨ ᠬᠢᠨᠢ ᠶᠣᠰᠣᠭᠠᠷ ᠬᠠᠨᠳᠤᠵᠤ ᠨᠢᠭᠡᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠰᠠᠢᠮᠰᠤᠷᠠᠬᠤ ᠣᠪᠣᠷ ᠢ᠋ᠶ᠋ᠠᠷ ᠲᠡᠳᠡᠨ ᠢ᠋ ᠭᠠᠢᠬᠠᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠢᠦᠭᠧᠨ᠋ᠸ ᠠᠴᠢᠯᠠᠯ ᠤ᠋ᠨ ᠳᠡᠭᠡᠳᠦ ᠪᠡᠷ ᠠᠰᠠᠷᠠᠨ ᠰᠤᠪᠢᠯᠠᠭᠰᠠᠨ ᠪᠣᠯᠪᠠᠴᠤ ᠭᠷᠠᠨᠳᠧᠲ ᠦ᠋ᠨ ᠠᠪᠠᠭᠠᠢ ᠮᠥᠨ ᠯᠡ ᠦᠬᠦᠯ ᠦ᠋ᠨ ᠵᠠᠮ ᠢ᠋ᠶ᠋ᠠᠷ ᠤᠷᠤᠭᠤᠳᠠᠭᠰᠠᠭᠠᠷ ᠪᠠᠢᠪᠠ᠃ ᠡᠢᠮᠦ ᠨᠠᠰᠤᠨ ᠳᠡᠭᠡᠷᠡ ᠪᠡᠨ ᠬᠦᠨᠳᠦ ᠡᠪᠡᠳᠴᠢᠨ ᠣᠯᠤᠭᠰᠠᠨ ᠪᠦᠰᠡᠭᠦᠢ ᠬᠥᠮᠦᠨ ᠪᠦᠬᠦᠨ ᠦ᠌ ᠠᠳᠠᠯᠢ ᠪᠠᠷ᠂ ᠲᠡᠷᠡ ᠠᠪᠠᠭᠠᠢ ᠶ᠋ᠢᠨ ᠪᠡᠶᠡ ᠡᠳᠦᠷ ᠡᠴᠡ ᠡᠳᠦᠷ ᠴᠢᠷᠠᠢ ᠵᠢᠰᠦ ᠠᠯᠳᠠᠵᠤ᠂ ᠨᠠᠮᠤᠷ ᠤ᠋ᠨ ᠮᠣᠳᠣᠨ ᠤ᠋ ᠨᠠᠪᠴᠢ ᠮᠡᠲᠦ ᠬᠡᠪᠡᠷᠡᠭᠰᠢᠵᠦ ᠪᠠᠢᠪᠠ᠃ ᠨᠠᠷᠠᠨ ᠤ᠋ ᠭᠡᠷᠡᠯ ᠮᠣᠳᠣᠨ ᠤ᠋ ᠨᠠᠪᠴᠢᠰ ᠢ᠋ ᠰᠢᠵᠢᠷ ᠠᠯᠲᠠᠨ ᠥᠩᠭᠡ ᠪᠡᠷ ᠭᠡᠷᠡᠯᠲᠦᠭᠦᠯᠬᠦ ᠠᠳᠠᠯᠢ ᠳ᠋ᠧᠪᠠᠵᠠᠨ ᠤ᠋ ᠭᠢᠯᠪᠠᠭᠠ ᠲᠡᠭᠦᠨ ᠢ᠋ ᠭᠡᠢᠭᠦᠯᠦᠨᠡ᠃ ᠠᠮᠢᠳᠤ ᠳ᠋ᠠᠭᠠᠨ ᠲᠡᠭᠦᠨ ᠰᠢᠭ ᠶᠠᠪᠤᠭᠰᠠᠨ ᠬᠥᠮᠦᠨ ᠯᠡ ᠦᠬᠦᠬᠦ ᠳ᠋ᠡᠭᠡᠨ ᠡᠢᠮᠦ ᠪᠠᠢᠬᠤ ᠶᠣᠰᠣᠲᠠᠢ᠂ ᠬᠦᠯᠢᠴᠡᠩᠭᠦᠢ ᠠᠮᠤᠷᠯᠢᠩᠭᠤᠢ ᠪᠠᠷ ᠶᠢᠷᠲᠢᠨᠴᠦ ᠶ᠋ᠢᠨ ᠤᠯᠠᠭᠠᠨ ᠲᠣᠭᠣᠰᠣᠨ ᠡᠴᠡ ᠠᠩᠭᠢᠵᠢᠷᠠᠵᠤ᠂ ᠴᠣᠬᠣᠮ ᠨᠢᠭᠡᠨ ᠾᠷᠢᠰᠲ᠋ᠣᠰ ᠱᠠᠰᠢᠨᠲᠠᠨ ᠤ᠋ ᠦᠬᠦᠯ ᠢ᠋ᠶ᠋ᠡᠷ ᠦᠬᠦᠨᠡ᠂ ᠲᠡᠭᠦᠨ ᠦ᠌ ᠦᠬᠦᠯ ᠨᠢ ᠡᠷᠬᠢᠮ ᠳᠡᠭᠡᠳᠦ᠂ ᠠᠭᠤᠤ ᠶᠡᠬᠡ ᠶᠦᠮ᠃
1822 ᠣᠨ ᠤ᠋ ᠠᠷᠪᠠᠳᠤᠭᠠᠷ ᠰᠠᠷᠠ ᠬᠦᠷᠦᠭᠡᠳ ᠲᠡᠷᠡ ᠠᠪᠠᠭᠠᠢ ᠶ᠋ᠢᠨ ᠡᠷᠬᠢᠮ ᠰᠠᠢᠨ ᠵᠠᠩ ᠠᠭᠠᠯᠢ᠂ ᠠᠨᠴᠧᠯ ᠮᠡᠲᠦ ᠠᠮᠤᠷᠯᠢᠩᠭᠤᠢ ᠰᠡᠳᠬᠢᠯ ᠬᠢᠭᠡᠳ ᠥᠬᠢᠨ ᠢ᠋ᠶ᠋ᠡᠨ ᠦᠷᠦ ᠡᠪᠡᠳᠦᠨ ᠬᠠᠢᠷᠠᠯᠠᠬᠤ ᠨᠢ ᠤᠷᠢᠳᠤ ᠪᠠᠨ ᠤᠯᠠᠮ ᠣᠨᠴᠣᠭᠣᠢ ᠳᠣᠪᠣᠢᠵᠠᠢ ; ᠲᠡᠷᠡ ᠭᠠᠭᠴᠠ ᠴᠤ᠌ ᠭᠣᠮᠣᠳᠠᠯ ᠤ᠋ᠨ ᠦᠭᠡ ᠦᠭᠡᠢ ᠪᠡᠷ ᠪᠣᠳᠢ ᠰᠡᠳᠬᠢᠯᠳᠦ ᠬᠣᠨᠢ ᠮᠡᠲᠦ ᠨᠢᠰᠦᠨ ᠡᠴᠦᠰᠯᠡᠪᠡ᠃ ᠲᠡᠷᠡ ᠠᠪᠠᠭᠠᠢ ᠡᠨᠡ ᠶᠢᠷᠲᠢᠨᠴᠦ ᠳᠡᠭᠡᠷᠡ᠂ ᠨᠢᠭᠡ ᠨᠠᠰᠤᠨ ᠤ᠋ ᠭᠤᠨᠢᠭᠲᠤ ᠠᠮᠢᠳᠤᠷᠠᠯ ᠤ᠋ᠨ ᠢ᠋ᠶ᠋ᠠᠨ ᠳᠤᠮᠳᠠᠬᠢ ᠭᠠᠭᠴᠠ ᠡᠶᠡᠯᠳᠡᠭ ᠨᠠᠭᠠᠯᠢᠩᠬᠠᠢ ᠬᠠᠨᠢ ᠪᠠᠨ ᠣᠷᠬᠢᠨ ᠶᠠᠳᠠᠨᠠ᠂ - ᠲᠡᠭᠦᠨ ᠦ᠌ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠦ᠋ᠨ ᠬᠡᠳᠦᠨ ᠬᠠᠷᠠᠴᠠ ᠨᠢ ᠥᠬᠢᠨ ᠦ᠌ ᠪᠡᠨ ᠢᠷᠡᠭᠡᠳᠦᠢ ᠶ᠋ᠢᠨ ᠵᠣᠪᠠᠯᠠᠩᠲᠤ ᠠᠮᠢᠳᠤᠷᠠᠯ ᠢ᠋ ᠬᠡᠯᠡᠵᠦ ᠥᠭᠴᠦ ᠪᠠᠢᠬᠤ ᠰᠢᠭ᠋ ᠪᠠᠢᠯᠠ᠃ ᠡᠨᠡ ᠬᠦ᠌ ᠥᠪᠡᠷ ᠲᠡᠢ ᠨᠢ ᠠᠳᠠᠯᠢ ᠪᠣᠳᠢ ᠰᠡᠳᠬᠢᠯᠳᠦ ᠬᠤᠷᠠᠭᠠ ᠥᠨᠥᠴᠢᠨ ᠥᠷᠥᠭᠡᠰᠦᠨ ᠢ᠋ᠶ᠋ᠡᠷ ᠡᠨᠡ ᠬᠠᠷᠠ ᠠᠮᠢᠨᠴᠢ ᠶᠢᠷᠲᠢᠨᠴᠦ ᠳᠡᠭᠡᠷᠡ ᠬᠣᠴᠣᠷᠴᠤ᠂ ᠬᠥᠮᠦᠨ ᠲᠡᠭᠦᠨ ᠢ᠋ ᠳᠤᠷᠠ ᠵᠣᠷᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠤᠶᠠᠴᠢᠬᠤ ᠶ᠋ᠢ ᠪᠣᠳᠣᠭᠠᠳ ᠬᠠᠮᠤᠭ ᠪᠡᠶᠡ ᠨᠢ ᠴᠡᠴᠡᠷᠡᠨᠡ᠃
《ᠬᠡᠦᠬᠡᠨ ᠮᠢᠨᠢ᠂ ᠵᠣᠯ ᠵᠢᠷᠭᠠᠯ ᠭᠡᠳᠡᠭ ᠪᠣᠯ ᠭᠠᠭᠴᠠ ᠬᠦ᠌ ᠲᠡᠭᠷᠢ ᠳᠡᠭᠡᠷᠡ ᠯᠡ ᠪᠠᠢᠳᠠᠭ ᠶᠤᠮ ᠰᠢᠦ᠂ ᠴᠢ ᠬᠣᠵᠢᠮ ᠬᠣᠢᠰᠢ ᠳ᠋ᠠᠭᠠᠨ ᠮᠡᠳᠡᠬᠦ ᠶᠦᠮ》 ᠭᠡᠵᠦ ᠠᠮᠢᠰᠬᠤᠯ ᠲᠠᠯᠪᠢᠬᠤ ᠡᠴᠡ ᠪᠠᠨ ᠡᠮᠦᠨᠡ ᠬᠡᠦᠬᠡᠨ ᠳ᠋ᠡᠭᠡᠨ ᠬᠡᠯᠡᠵᠡᠢ᠃
ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠢᠦᠭᠧᠨ᠋ᠸ ᠪᠠᠰᠠ ᠨᠡᠩ ᠰᠢᠨᠡ ᠰᠢᠯᠲᠠᠭᠠᠨ ᠨᠤᠭᠤᠳ ᠡᠴᠡ ᠪᠣᠯᠵᠤ᠂ ᠡᠨᠡ ᠬᠦ᠌ ᠥᠪᠡᠷ ᠢ᠋ᠶ᠋ᠡᠨ ᠳᠣᠲᠣᠷᠠ ᠨᠢ ᠲᠥᠷᠥᠵᠦ᠂ ᠳᠣᠲᠣᠷᠠ ᠨᠢ ᠵᠣᠪᠠᠯᠠᠩ ᠵᠦᠳᠡᠭᠦᠷᠢ ᠠᠮᠰᠠᠭᠰᠠᠭᠠᠷ ᠢᠷᠡᠭᠰᠡᠨ᠂ ᠡᠬᠡ ᠨᠢ ᠡᠭᠡᠭᠡ ᠰᠠᠶᠢ ᠳᠣᠲᠣᠷᠠ ᠨᠢ ᠠᠮᠢᠰᠬᠤᠯ ᠬᠤᠷᠢᠶᠠᠭᠰᠠᠨ ᠭᠡᠷ ᠡᠴᠡ ᠪᠡᠨ ᠠᠯᠬᠤᠮ ᠬᠣᠯᠠᠳᠠᠬᠤ ᠶ᠋ᠢ ᠪᠣᠯᠢᠶᠠ ᠭᠡᠵᠦ ᠪᠣᠳᠣᠬᠤ ᠪᠣᠯᠪᠠ᠃ ᠢᠦᠭᠧᠨ᠋ᠸ ᠭᠡᠷ ᠲᠡᠭᠡᠨ ᠴᠣᠩᠬᠣᠨ ᠤ᠋ ᠪᠠᠨ ᠨᠢᠳᠦ ᠨᠤᠭᠦᠳ᠂ ᠡᠪᠡᠰᠦᠨ ᠣᠯᠪᠤᠭᠲᠤ ᠰᠠᠨᠳᠠᠯᠢ ᠵᠡᠷᠭᠡ ᠶ᠋ᠢ ᠬᠠᠷᠠᠭᠠᠳ ᠲᠡᠰᠬᠡᠯ ᠦᠭᠡᠢ ᠨᠢᠯᠪᠤᠰᠤ ᠤᠨᠠᠭᠠᠪᠠ᠃ ᠢᠦᠭᠧᠨ᠋ᠸ᠂ ᠪᠢ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠰᠡᠳᠬᠢᠯ ᠢ᠋ ᠡᠨᠳᠡᠭᠦᠦ ᠣᠢᠯᠠᠭᠠᠭᠰᠠᠨ ᠶᠤᠮ ᠪᠠᠢᠨᠠ ᠭᠡᠵᠦ ᠪᠣᠳᠣᠪᠠ᠃ ᠤᠴᠢᠷ ᠨᠢ ᠡᠳᠦᠭᠡ ᠡᠴᠢᠭᠡ ᠨᠢ ᠲᠡᠭᠦᠨ ᠳ᠋ᠦ᠍ ᠲᠣᠩ ᠶᠡᠬᠡ ᠵᠥᠭᠡᠯᠡᠨ᠂ ᠲᠤᠩ ᠶᠡᠬᠡ ᠬᠠᠯᠠᠭᠤᠨ ᠳᠣᠲᠣᠨᠣ ᠬᠠᠨᠳᠤᠬᠤ ᠪᠣᠯᠵᠤ᠂ ᠰᠤᠭᠤᠳᠠᠨ ᠶᠠᠪᠤᠵᠤ ᠦᠳᠡ ᠶ᠋ᠢᠨ ᠬᠣᠭᠣᠯᠠ ᠪᠠᠨ ᠢᠳᠡᠨᠡ᠃ ᠬᠡᠳᠦᠨ ᠴᠠᠭ ᠢ᠋ᠶ᠋ᠠᠷ ᠨᠢᠳᠦ ᠰᠠᠯᠭᠠᠯ ᠦᠭᠡᠢ ᠰᠢᠷᠲᠡᠬᠦ ᠬᠠᠷᠠᠴᠠ ᠨᠢ ᠶᠡᠬᠡᠯᠡ ᠡᠨᠡᠷᠢᠩᠭᠦᠢ ᠪᠣᠯᠤᠭᠰᠠᠨ ᠰᠢᠭ᠋ ᠪᠠᠢᠪᠠ᠃ ᠥᠬᠢᠨ ᠨᠢ ᠲᠡᠭᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠠᠯᠲᠠ ᠪᠠᠷ ᠴᠢᠳᠬᠤᠭᠳᠠᠭᠰᠠᠨ ᠬᠥᠮᠦᠨ ᠮᠡᠲᠦ ᠬᠠᠷᠠᠭᠳᠠᠵᠤ ᠪᠠᠢᠵᠠᠢ᠃
ᠡᠪᠦᠭᠡᠨ ᠱᠠᠯᠠᠮᠠᠴᠢᠨ ᠤ᠋ ᠵᠠᠩ ᠲᠤᠢᠯ ᠤ᠋ᠨ ᠶᠡᠬᠡ ᠬᠤᠪᠢᠷᠠᠵᠤ᠂ ᠥᠬᠢᠨ ᠦ᠌ ᠪᠡᠨ ᠡᠮᠦᠨᠡ ᠬᠡᠵᠢᠶᠡᠳᠡ ᠴᠡᠴᠡᠷᠡᠨ ᠳᠠᠭᠵᠢᠵᠤ ᠪᠠᠢᠬᠤ ᠪᠣᠯᠵᠠᠢ᠃ ᠡᠨᠡ ᠬᠦ᠌ ᠪᠠᠢᠳᠠᠯ ᠢ᠋ ᠦᠵᠡᠭᠰᠡᠨ ᠨᠠᠨᠤᠩ ᠪᠣᠯᠤᠨ ᠺᠷᠦᠱᠧᠸ ᠨᠠᠷ᠂ ᠨᠠᠰᠤ ᠨᠢ ᠥᠨᠳᠥᠷ ᠪᠣᠯᠤᠭᠰᠠᠨ ᠤ᠋ ᠰᠢᠯᠲᠠᠭᠠᠨ ᠪᠤᠶᠤ ᠴᠢᠨᠠᠭᠰᠢᠯᠠᠪᠠᠯ ᠵᠠᠷᠢᠮ ᠨᠢᠭᠡᠨ ᠡᠷᠬᠡᠲᠡᠨ ᠨᠢ ᠨᠢᠭᠡᠨᠲᠡ ᠡᠳ᠋ᠯᠡᠭᠡ ᠦᠭᠡᠢ ᠪᠣᠯᠤᠭᠰᠠᠨ ᠴᠤ᠌ ᠶᠤᠮ ᠤᠤ ᠭᠡᠵᠦ ᠪᠣᠳᠣᠨ ᠰᠡᠳᠬᠢᠯ ᠵᠣᠪᠠᠵᠤ ᠪᠠᠢᠯᠠ᠃ ᠭᠡᠪᠡᠴᠦ ᠭᠡᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠣᠢ ᠭᠠᠰᠢᠭᠤ ᠬᠢᠬᠦ ᠪᠣᠯᠤᠭᠰᠠᠨ ᠲᠡᠷᠡ ᠡᠳᠦᠷ᠂ ᠣᠷᠣᠢ ᠶ᠋ᠢᠨ ᠬᠣᠭᠣᠯᠠᠨ ᠤ᠋ ᠳᠠᠷᠠᠭᠠ ᠡᠪᠦᠭᠡᠨ ᠦ᠌ ᠨᠢᠭᠤᠴᠠ ᠶ᠋ᠢ ᠮᠡᠳᠡᠬᠦ ᠴᠣᠷᠢ ᠶ᠋ᠢᠨ ᠭᠠᠭᠴᠠ ᠬᠥᠮᠦᠨ ᠪᠣᠯᠬᠤ ᠪᠠᠲᠤᠯᠠᠭᠠ ᠶ᠋ᠢᠨ ᠬᠥᠮᠦᠨ ᠰᠠᠭᠤᠵᠤ ᠪᠠᠢᠬᠤ ᠦᠶᠡ ᠳ᠋ᠦ᠍᠂ ᠡᠪᠦᠭᠡᠨ ᠱᠠᠯᠠᠮᠠᠴᠢᠨ ᠤ᠋ ᠰᠣᠨᠢᠨ ᠬᠠᠴᠢᠨ ᠬᠥᠳᠡᠯᠪᠦᠷᠢ ᠲᠠᠢᠯᠪᠤᠷᠢᠯᠠᠭᠳᠠᠪᠠ᠃
ᠬᠣᠭᠣᠯᠠᠨ ᠤ᠋ ᠰᠢᠷᠡᠭᠡ ᠪᠡᠨ ᠬᠤᠷᠢᠶᠠᠵᠤ ᠡᠭᠦᠳᠡ ᠪᠡᠨ ᠴᠢᠩᠭᠠ ᠬᠠᠭᠠᠭᠠᠳ ᠭᠷᠠᠨᠳᠧᠲ ᠢᠦᠭᠧᠨ᠋ᠸ ᠲᠦ᠍:
《ᠮᠢᠨᠦ ᠤᠬᠠᠭᠠᠨ ᠲᠠᠢ ᠥᠬᠢᠨ ᠠ᠋᠂ ᠴᠢ ᠣᠳᠣ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠡᠷᠬᠡ ᠶ᠋ᠢ ᠵᠠᠯᠭᠠᠮᠵᠢᠯᠠᠬᠤ ᠪᠣᠯᠪᠠ᠂ ᠪᠢᠳᠡᠨ ᠦ᠌ ᠬᠣᠭᠣᠷᠣᠨᠳᠣᠬᠢ ᠪᠠᠭᠠ ᠰᠠᠭᠠ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠨᠢᠭᠡ ᠲᠡᠰᠢ ᠪᠣᠯᠭᠠᠬᠤ ᠬᠡᠷᠡᠭᠲᠡᠢ ᠪᠠᠢᠨᠠ᠃ - ᠲᠡᠢᠮᠦ ᠤᠤ ᠦᠭᠡᠢ ᠦᠦ᠂ ᠺᠷᠦᠱᠧᠸ ᠠ᠋?》 ᠭᠡᠪᠡ᠃
《ᠲᠡᠢᠮᠦ᠃ 》
《ᠵᠠᠪᠠᠯ ᠥᠨᠥᠳᠥᠷ ᠭᠦᠢᠴᠡᠳᠬᠡᠬᠦ ᠦᠭᠡᠢ ᠪᠣᠯ ᠪᠣᠯᠬᠤ ᠦᠭᠡᠢ ᠭᠡᠵᠦ ᠦᠦ᠂ ᠠᠪᠤ ᠠ᠋?》
《ᠲᠡᠢᠮᠦ ᠲᠡᠢᠮᠦ᠂ ᠬᠣᠩᠭᠣᠷ ᠮᠢᠨᠢ᠃ ᠪᠢ ᠪᠣᠯ ᠬᠡᠷᠡᠭ ᠶᠠᠪᠤᠳᠠᠯ ᠢ᠋ ᠬᠡᠬᠦᠳᠡᠭ ᠳᠡᠭᠡᠨ ᠬᠠᠳᠠᠭᠠᠯᠠᠭᠠᠳ ᠪᠠᠢᠵᠤ ᠴᠢᠳᠠᠳᠠᠭ ᠦᠭᠡᠢ ᠬᠥᠮᠦᠨ᠃ ᠴᠢ ᠶᠠᠭᠠᠬᠢᠯᠠ ᠴᠤ᠌ ᠭᠡᠰᠡᠨ ᠨᠠᠮᠠᠶ᠋ᠢ ᠵᠣᠪᠠᠭᠠᠶᠠ ᠭᠡᠵᠦ ᠪᠣᠳᠣᠬᠤ ᠦᠭᠡᠢ ᠪᠣᠢ ᠳᠠ᠃ 》
《ᠠ᠋! ᠠᠪᠤ ᠁》
《ᠵᠠ᠂ ᠲᠡᠭᠡᠪᠡᠯ ᠡᠨᠡ ᠣᠷᠣᠢ ᠪᠦᠭᠦᠳᠡ ᠶ᠋ᠢ ᠭᠦᠢᠴᠡᠳᠬᠡᠵᠦ ᠳᠠᠭᠤᠰᠬᠠᠶᠠ᠃ 》
《ᠲᠠ ᠨᠠᠳᠠ ᠪᠠᠷ ᠶᠠᠭᠤ ᠬᠢᠯᠭᠡᠬᠦ ᠭᠡᠰᠡᠨ ᠶᠦᠮ?》
《ᠬᠣᠩᠭᠣᠷ ᠮᠢᠨᠢ᠂ ᠡᠨᠡ ᠬᠠᠷᠢᠨ ᠨᠠᠳᠠ ᠬᠠᠮᠢᠶᠠ ᠦᠭᠡᠢ ᠶᠠᠪᠤᠳᠠᠯ᠃ - ᠺᠷᠦᠱᠧᠸ ᠮᠢᠨᠢ ᠴᠢ ᠬᠡᠯᠡᠭᠡᠳ ᠥᠭ᠃ 》
《ᠠᠪᠠᠭᠠᠢ ᠮᠢᠨᠢ᠂ ᠭᠷᠠᠨᠳᠧᠲ ᠭᠤᠸᠠᠢ ᠪᠣᠯ ᠡᠳ᠋ ᠬᠥᠷᠥᠩᠭᠡ ᠪᠡᠨ ᠬᠤᠪᠢᠶᠠᠬᠤ ᠴᠤ᠌ ᠳᠤᠷᠠ ᠦᠭᠡᠢ᠂ ᠬᠤᠳᠠᠯᠳᠤᠬᠤ ᠴᠤ᠌ ᠳᠤᠷᠠ ᠦᠭᠡᠢ᠂ ᠨᠡᠩ ᠢᠯᠠᠩᠭᠤᠶᠠ ᠪᠡᠯᠡᠨ ᠵᠣᠭᠣᠰ ᠪᠣᠯᠭᠠᠨ ᠬᠤᠪᠢᠯᠭᠠᠵᠤ ᠶᠡᠬᠡ ᠭᠠᠢᠯᠢ ᠲᠤᠰᠢᠶᠠᠬᠤ ᠤᠯᠠᠮ ᠳᠤᠷᠠ ᠦᠭᠡᠢ ᠪᠠᠢᠨᠠ᠃ ᠲᠡᠢᠮᠦ ᠡᠴᠡ ᠴᠢ ᠠᠪᠤ ᠲᠠᠢ ᠪᠠᠨ ᠬᠠᠮᠲᠤ ᠪᠣᠢ ᠡᠳ᠋ ᠬᠥᠷᠥᠩᠭᠡ ᠪᠡᠨ ᠳᠠᠩᠰᠠᠯᠠᠭᠤᠯᠬᠤ ᠡᠷᠬᠡ ᠪᠡᠨ ᠬᠠᠶᠠᠬᠤ ᠁》
《ᠺᠷᠦᠱᠧᠸ ᠭᠤᠸᠠᠢ᠂ ᠲᠠᠨ ᠤ᠋ ᠡᠳᠡᠭᠡᠷ ᠦᠭᠡ ᠴᠢᠨᠢ ᠯᠠᠪ ᠦᠨᠡᠨ ᠶᠦᠮ ᠪᠣᠢ ᠳᠠ᠂ ᠬᠡᠦᠬᠡᠳ ᠲᠦ᠍ ᠬᠡᠯᠡᠮᠡᠷ ᠦᠭᠡ ᠪᠣᠢ ᠳᠠ ?》
《ᠪᠢ ᠬᠡᠯᠡᠵᠦ ᠪᠠᠷᠠᠶᠠ᠂ ᠭᠷᠠᠨᠳᠧᠲ ᠠᠪᠤᠭᠠᠢ᠃ 》
《ᠵᠠ ᠰᠠᠢᠨ ᠪᠠᠢᠨᠠ᠂ ᠨᠠᠢᠵᠠ ᠮᠢᠨᠢ᠂ ᠮᠢᠨᠦ ᠥᠬᠢᠨ ᠲᠠ ᠬᠣᠶᠠᠷ ᠮᠢᠨᠦ ᠬᠤᠪᠢ ᠶ᠋ᠢᠨ ᠡᠳ᠋ ᠬᠥᠷᠥᠩᠭᠡ ᠶ᠋ᠢ ᠪᠤᠯᠢᠶᠠᠬᠤ ᠪᠠᠷ ᠯᠠ ᠦᠭᠡᠢ ᠶᠦᠮ᠂ - ᠲᠡᠢᠮᠦ ᠪᠣᠢ ᠳᠠ᠂ ᠬᠣᠩᠭᠣᠷ ᠮᠢᠨᠢ?》
《ᠦᠭᠡᠢ᠂ ᠲᠡᠭᠡᠭᠡᠳ ᠺᠷᠦᠱᠧᠸ ᠭᠤᠸᠠᠢ᠂ ᠲᠠ ᠨᠠᠳᠠ ᠪᠠᠷ ᠴᠣᠬᠣᠮ ᠶᠠᠭᠤ ᠬᠢᠯᠭᠡᠬᠦ ᠭᠡᠳ ᠪᠠᠢᠭᠠ ᠶᠤᠮ?》 ᠭᠡᠵᠦ ᠢᠦᠭᠧᠨ᠋ᠸ ᠶᠠᠷᠰᠢᠭᠯᠠᠨ ᠠᠰᠠᠭᠤᠪᠠ᠃
《ᠡᠨᠡ᠂ ᠴᠢ ᠡᠨᠡ ᠳᠠᠩᠰᠠᠨ ᠳᠡᠭᠡᠷᠡ ᠭᠠᠷ ᠤ᠋ᠨ ᠦᠰᠦᠭ ᠵᠢᠷᠤᠵᠤ᠂ ᠭᠷᠠᠨᠳᠧᠲ ᠬᠠᠲᠤᠭᠲᠠᠢ ᠶ᠋ᠢ ᠵᠠᠯᠭᠠᠮᠵᠢᠯᠠᠬᠤ ᠡᠷᠬᠡ ᠪᠡᠨ ᠬᠠᠶᠠᠵᠤ᠂ ᠭᠷᠠᠨᠳᠧᠲ ᠨᠣᠶᠠᠨᠲᠠᠨ ᠤ᠋ ᠬᠢ ᠲᠡᠢ ᠬᠠᠮᠲᠤ ᠪᠠᠢᠭᠠ ᠡᠳ᠋ ᠬᠥᠷᠥᠩᠭᠡ ᠪᠡᠨ ᠴᠥᠮ ᠪᠦᠷᠢᠨ ᠢ᠋ᠶ᠋ᠡᠷ ᠨᠢ ᠭᠷᠠᠨᠳᠧᠲ ᠨᠣᠶᠠᠨᠲᠠᠨ ᠳ᠋ᠤ᠌ ᠲᠤᠰᠢᠶᠠᠨ ᠬᠠᠮᠢᠶᠠᠷᠤᠭᠤᠯᠵᠤ᠂ ᠣᠷᠣᠯᠭᠠ ᠶ᠋ᠢ ᠨᠢ ᠮᠥᠨ ᠭᠷᠠᠨᠳᠧᠲ ᠨᠣᠶᠠᠨᠲᠠᠨ ᠳ᠋ᠤ᠌ ᠡᠵᠡᠮᠰᠢᠭᠦᠯᠵᠦ᠂ ᠥᠪᠡᠷ ᠲᠡᠭᠡᠨ ᠭᠠᠭᠴᠠ ᠬᠦ᠌ ᠬᠡᠢᠰᠪᠦᠷᠢ ᠡᠵᠡᠮᠰᠢᠯ ᠦ᠋ᠨ ᠡᠷᠬᠡ ᠦᠯᠡᠳᠡᠭᠡᠬᠦ ᠪᠡᠨ ᠲᠣᠳᠣᠷᠬᠠᠢᠯᠠ ᠁》
《ᠲᠠᠨ ᠤ᠋ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢ ᠪᠢ ᠣᠭᠲᠣ ᠣᠢᠯᠠᠭᠠᠬᠤ ᠦᠭᠡᠢ ᠪᠠᠢᠨᠠ》 ᠭᠡᠵᠦ ᠢᠦᠭᠧᠨ᠋ᠸ ᠬᠠᠷᠢᠭᠤᠯᠤᠭᠠᠳ 《ᠲᠡᠷᠡ ᠭᠡᠷᠡ ᠪᠢᠴᠢᠭ ᠢ᠋ᠶ᠋ᠡᠨ ᠨᠠᠳᠠ ᠥᠭᠴᠦ ᠬᠠᠮᠢᠭᠠ ᠨᠢ ᠭᠠᠷ ᠤ᠋ᠨ ᠦᠰᠦᠭ ᠵᠢᠷᠤᠬᠤ ᠶ᠋ᠢ ᠵᠢᠭᠠᠭᠠᠳ ᠠᠯᠢ》 ᠭᠡᠪᠡ᠃
ᠭᠷᠠᠨᠳᠧᠲ ᠡᠪᠦᠭᠡᠨ ᠦ᠌ ᠬᠠᠷᠠᠴᠠ ᠢᠦᠭᠧᠨ᠋ᠸ ᠭᠡᠷᠡ ᠪᠢᠴᠢᠭ ᠬᠣᠶᠠᠷ ᠳᠡᠭᠡᠷᠡ ᠴᠢᠯᠥᠭᠡ ᠵᠠᠪ ᠦᠭᠡᠢ ᠡᠭᠡᠯᠵᠢᠯᠡᠨ ᠲᠣᠰᠴᠤ᠂ ᠮᠠᠩᠨᠠᠢ ᠡᠴᠡ ᠨᠢ ᠬᠥᠯᠥᠰᠥ ᠪᠠᠳᠬᠤᠵᠤ ᠲᠠᠰᠤᠷᠠᠯᠲᠠ ᠦᠭᠡᠢ ᠠᠷᠴᠢᠨᠠ᠃
《ᠬᠣᠩᠭᠣᠷ ᠮᠢᠨᠢ᠂ ᠡᠨᠡ ᠬᠦ᠌ ᠭᠡᠷᠡ ᠪᠢᠴᠢᠭ ᠢ᠋ ᠠᠪᠠᠴᠢᠵᠤ ᠬᠢᠨᠠᠯᠲᠠ ᠶ᠋ᠢᠨ ᠮᠠᠲ᠋ᠧᠷᠢᠶᠠᠯ ᠪᠣᠯᠭᠠᠬᠤ ᠳ᠋ᠤ᠌ ᠶᠡᠬᠡ ᠬᠡᠮᠵᠢᠶᠡᠨ ᠦ᠌ ᠵᠣᠭᠣᠰ ᠵᠠᠷᠤᠴᠠᠭᠤᠯᠳᠠᠭ ᠶᠤᠮ᠃ ᠴᠢ ᠥᠪᠡᠷ ᠦ᠋ᠨ ᠬᠥᠭᠡᠷᠦᠬᠦᠢᠯᠡᠯᠲᠦ ᠡᠬᠡ ᠪᠡᠨ ᠵᠠᠯᠭᠠᠮᠵᠢᠯᠠᠬᠤ ᠡᠷᠬᠡ ᠪᠡᠨ ᠶᠠᠮᠠᠷ ᠴᠤ᠌ ᠨᠥᠬᠥᠴᠡᠯ ᠦᠭᠡᠢ ᠪᠡᠷ ᠬᠠᠶᠠᠵᠤ᠂ ᠥᠪᠡᠷ ᠦ᠋ᠨ ᠢᠷᠡᠭᠡᠳᠦᠢ ᠪᠡᠨ ᠨᠠᠳᠠ ᠨᠠᠢᠳᠠᠪᠠᠯ ᠪᠢ ᠮᠠᠰᠢ ᠳᠤᠷᠠᠲᠠᠢ᠃ ᠪᠢ ᠰᠠᠷᠠ ᠪᠦᠷᠢ ᠴᠢᠮᠠ ᠳ᠋ᠤ᠌ ᠵᠠᠭᠤᠨ ᠹᠷᠠᠩᠺ ᠤ᠋ᠨ ᠶᠡᠬᠡ ᠬᠦᠦ ᠥᠭᠬᠦᠶᠡ᠃ ᠢᠩᠭᠢᠭᠡᠳ ᠴᠢ ᠬᠡᠳᠦᠨ ᠤᠳᠠᠭᠠ ᠮᠢᠰᠰᠠ ᠪᠡᠯᠡᠳᠬᠡᠵᠦ ᠬᠡᠨ ᠬᠡᠨ ᠢ᠋ᠶ᠋ᠡᠨ ᠵᠠᠯᠠᠬᠤ ᠶ᠋ᠢ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠪᠣᠯ᠁ ᠡᠩ! ᠰᠠᠷᠠ ᠪᠦᠷᠢ ᠵᠠᠭᠤᠨ ᠹᠷᠠᠩᠺ ᠪᠣᠯᠬᠤ ᠪᠣᠢ ᠤᠤ?》
《ᠲᠠ ᠶᠠᠭᠠᠬᠢᠶᠠ ᠯᠠ ᠭᠡᠪᠡᠯ ᠲᠡᠭᠡᠵᠦ ᠯᠡ ᠪᠠᠢ᠂ ᠠᠪᠤ ᠠ᠋᠃ 》
《ᠠᠪᠠᠬᠠᠢ᠂ ᠡᠨᠡ ᠪᠠᠢᠳᠠᠯ ᠢ᠋ᠶ᠋ᠠᠷ ᠪᠣᠯ ᠴᠢᠮᠠ ᠳ᠋ᠤ᠌ ᠶᠠᠭᠤ ᠴᠤ᠌ ᠦᠯᠡᠳᠡᠬᠦ ᠦᠭᠡᠢ ᠪᠣᠯᠤᠨᠠ ᠰᠢᠦ ᠭᠡᠵᠦ ᠪᠢ ᠴᠢᠮᠠ ᠳ᠋ᠤ᠌ ᠬᠡᠯᠡᠬᠦ ᠬᠠᠷᠢᠭᠤᠴᠠᠯᠭᠠ ᠪᠠᠢᠨᠠ ᠁》
《ᠲᠡᠭᠷᠢ ᠠ᠋᠂ ᠲᠡᠷᠡ ᠨᠠᠳᠠ ᠶᠠᠭᠤᠨ ᠤ᠋ ᠬᠠᠮᠢᠶᠠ ᠪᠠᠢᠬᠤ ᠪᠣᠢ!》 ᠭᠡᠵᠦ ᠢᠦᠭᠧᠨ᠋ᠸ ᠬᠠᠷᠢᠭᠤᠯᠪᠠ᠃
《ᠪᠢᠲᠡᠭᠡᠢ ᠢᠯᠡᠭᠦᠦ ᠦᠭᠡ ᠶᠠᠷᠢ᠂ ᠺᠷᠦᠱᠧᠸ ᠠ᠋᠃ - ᠬᠡᠯᠡᠪᠡᠯ ᠬᠠᠤᠯᠢ ᠰᠢᠦ》 ᠭᠡᠳ ᠭᠷᠠᠨᠳᠧᠲ ᠡᠪᠦᠭᠡᠨ ᠥᠬᠢᠨ ᠦ᠌ ᠪᠡᠨ ᠭᠠᠷ ᠢ᠋ ᠭᠠᠷ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠵᠤ ᠢᠯᠪᠢᠨ: 《 ᠢᠦᠭᠧᠨ᠋ᠸ᠂ ᠴᠢ ᠯᠠᠪ ᠬᠣᠵᠢᠮ ᠭᠡᠮᠰᠢᠬᠦ ᠦᠭᠡᠢ ᠶᠦᠮ᠂ ᠴᠢ ᠪᠣᠯ ᠢᠲᠡᠭᠡᠯ ᠨᠠᠢᠳᠠᠪᠤᠷᠢᠲᠤ ᠥᠬᠢᠨ᠂ ᠲᠡᠢᠮᠦ ᠪᠣᠢ ᠳᠠ ?》 ᠭᠡᠪᠡ᠃
《ᠡᠩ! ᠠᠪᠤ ᠁》
ᠭᠷᠠᠨᠳᠧᠲ ᠡᠪᠦᠭᠡᠨ ᠲᠡᠭᠦᠨ ᠢ᠋ ᠪᠠᠶᠠᠷ ᠲᠠᠢ ᠪᠠᠷ ᠴᠢᠩᠭᠠ ᠲᠡᠪᠡᠷᠢᠵᠦ ᠪᠠᠷᠤᠭ ᠠᠮᠢᠰᠬᠤᠭᠠ ᠠᠪᠴᠤ ᠪᠣᠯᠬᠤ ᠦᠭᠡᠢ ᠪᠣᠯᠭᠠᠪᠠ᠃
《ᠪᠣᠯᠤᠯᠠ᠂ ᠥᠬᠢᠨ ᠮᠢᠨᠢ᠂ ᠴᠢ ᠨᠠᠳᠠ ᠠᠮᠢᠳᠤᠷᠠᠬᠤ ᠵᠠᠮ ᠣᠯᠭᠣᠪᠠ᠃ ᠪᠢ ᠠᠮᠢ ᠲᠠᠢ ᠪᠣᠯᠪᠠ᠃ ᠭᠡᠪᠡᠴᠦ ᠡᠨᠡ ᠪᠣᠯ ᠴᠢ ᠨᠠᠳᠠ ᠥᠷᠢ ᠲᠥᠯᠥᠵᠦ ᠪᠠᠢᠭᠠ ᠶᠠᠪᠤᠳᠠᠯ ᠶᠤᠮ᠃ ᠢᠩᠭᠢᠭᠡᠳ ᠪᠢᠳᠡ ᠳᠠᠩᠰᠠ ᠴᠠᠢᠷᠠᠭᠤᠯᠪᠠ᠃ ᠡᠨᠡ ᠪᠣᠯ ᠶᠣᠰᠣᠲᠠᠢ ᠰᠢᠳᠤᠷᠭᠤ ᠲᠡᠭᠰᠢ ᠠᠷᠠᠯᠵᠢᠶᠠ ᠮᠠᠢᠮᠠᠢ ᠳ᠋ᠤ᠌ ᠲᠣᠭᠠᠴᠢᠭᠳᠠᠨᠠ᠃ ᠬᠥᠮᠦᠨ ᠦ᠌ ᠠᠮᠢᠳᠤᠷᠠᠯ ᠭᠡᠳᠡᠭ ᠪᠣᠯ ᠨᠢᠭᠡ ᠶᠣᠰᠣᠨ ᠤ᠋ ᠠᠷᠠᠯᠵᠢᠶᠠ ᠮᠠᠢᠮᠠᠢ ᠶᠤᠮ᠃ ᠪᠢ ᠴᠢᠮᠠᠶ᠋ᠢ ᠢᠷᠥᠭᠡᠶᠡ! ᠴᠢ ᠪᠣᠯ ᠡᠷᠬᠢᠮ ᠰᠠᠢᠨ ᠵᠠᠩ ᠠᠭᠠᠯᠢ ᠲᠠᠢ ᠥᠬᠢᠨ᠂ ᠠᠪᠤ ᠳ᠋ᠠᠭᠠᠨ ᠡᠯᠪᠡᠷᠢᠯᠲᠡᠢ ᠥᠬᠢᠨ᠃ ᠴᠢ ᠣᠳᠣ ᠶᠠᠭᠤ ᠬᠢᠶᠡ ᠭᠡᠪᠡᠯ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠪᠣᠯ᠃ 》
ᠭᠷᠠᠨᠳᠧᠲ ᠡᠪᠦᠭᠡᠨ᠂ ᠭᠠᠢᠬᠠᠨ ᠮᠡᠯᠡᠷᠡᠭᠰᠡᠨ ᠺᠷᠦᠱᠧᠸ ᠤᠷᠤᠭᠤ ᠬᠠᠷᠠᠵᠤ: 《ᠪᠠᠶᠠᠷᠲᠠᠢ᠂ ᠮᠠᠷᠭᠠᠰᠢ ᠠᠭᠤᠯᠵᠠᠶᠠ᠂ ᠲᠠ ᠰᠢᠭᠦᠬᠦ ᠬᠣᠷᠢᠶᠠᠨ ᠤ᠋ ᠨᠠᠷᠢᠨ ᠪᠢᠴᠢᠭ ᠦ᠋ᠨ ᠨᠣᠶᠠᠨ ᠲᠠᠢ ᠤᠴᠠᠷᠠᠵᠤ ᠡᠷᠬᠡ ᠪᠡᠨ ᠬᠠᠶᠠᠬᠤ ᠭᠡᠷᠡ ᠪᠢᠴᠢᠭ ᠪᠡᠯᠡᠳᠬᠡᠭᠦᠯᠬᠦ ᠶ᠋ᠢ ᠬᠦᠰᠡᠶᠡ᠃ ᠲᠠ ᠨᠢᠭᠡ ᠲᠤᠰᠠ ᠪᠣᠯᠤᠭᠠᠴᠢ》 ᠭᠡᠪᠡ᠃
ᠮᠠᠷᠭᠠᠰᠢ ᠦᠳᠡ ᠳ᠋ᠦ᠍ᠨᠢ ᠭᠠᠷ ᠤ᠋ᠨ ᠦᠰᠦᠭ ᠵᠢᠷᠤᠵᠤ ᠢᠦᠭᠧᠨ᠋ᠸ ᠰᠠᠢᠨ ᠳᠤᠷᠠ ᠡᠴᠡ ᠪᠠᠨ ᠡᠷᠬᠡ ᠪᠡᠨ ᠬᠠᠶᠠᠪᠠ᠃
ᠭᠡᠲᠡᠯᠡ ᠡᠬᠢᠨ ᠦ᠌ ᠵᠢᠯ ᠦ᠋ᠨ ᠡᠴᠦᠰ ᠪᠣᠯᠤᠭᠰᠠᠨ ᠠᠲᠠᠯᠠ ᠡᠪᠦᠭᠡᠨ ᠱᠠᠯᠠᠮᠠᠴᠢᠨ ᠥᠬᠢᠨ ᠳ᠋ᠡᠭᠡᠨ ᠥᠭᠭᠦᠨᠡ ᠭᠡᠵᠦ ᠠᠮᠠᠯᠠᠭᠰᠠᠨ ᠰᠠᠷᠠ ᠪᠦᠷᠢ ᠶ᠋ᠢᠨ ᠵᠠᠭᠤᠨ ᠹᠷᠠᠩᠺ ᠨᠢ ᠪᠠᠷᠠ ᠰᠡᠭᠦᠳᠡᠷ ᠦᠭᠡᠢ ᠪᠠᠢᠯᠠ᠃ ᠡᠨᠡ ᠲᠤᠬᠠᠢ ᠢᠦᠭᠧᠨ᠋ᠸ ᠶᠠᠷᠢᠶᠠ ᠬᠥᠭᠡᠷᠦᠭᠡ ᠶ᠋ᠢᠨ ᠳᠤᠮᠳᠠ ᠳᠤᠷᠠᠳᠤᠭᠠᠳ ᠠᠪᠤᠭᠰᠠᠨᠠ ᠭᠷᠠᠨᠳᠧᠲ ᠠᠪᠤᠭᠠᠢ ᠴᠢᠷᠠᠢ ᠤᠯᠠᠢᠭᠠᠳ ᠨᠢᠭᠤᠴᠠ ᠭᠡᠷ ᠲᠡᠭᠡᠨ ᠭᠦᠶᠦᠨ ᠣᠷᠣᠵᠤ᠂ ᠠᠴᠢ ᠬᠦᠦ ᠡᠴᠡ ᠪᠡᠨ ᠲᠤᠩ ᠬᠢᠮᠳᠠᠬᠠᠨ ᠦᠨᠡ ᠪᠡᠷ ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ ᠠᠯᠲᠠᠨ ᠵᠢᠮᠰᠡᠭ ᠦ᠋ᠨ ᠢ᠋ᠶ᠋ᠡᠨ ᠭᠤᠷᠪᠠᠨ ᠤ᠋ ᠨᠢᠭᠡ ᠶ᠋ᠢ ᠠᠪᠤᠭᠠᠳ ᠪᠠᠭᠤᠵᠤ ᠢᠷᠡᠪᠡ᠃
《ᠥᠬᠢᠨ ᠮᠢᠨᠢ ᠳᠡ 》 ᠭᠡᠳ ᠭᠷᠠᠨᠳᠧᠲ ᠠᠪᠤᠭᠠᠢ ᠶᠣᠵᠣᠯᠠᠭᠰᠠᠨ ᠠᠶᠠᠯᠭᠠ ᠪᠠᠷ 《ᠡᠭᠦᠨ ᠢ᠋ᠶ᠋ᠡᠷ ᠮᠢᠩᠭᠠ ᠬᠣᠶᠠᠷ ᠵᠠᠭᠤᠨ ᠹᠷᠠᠩᠺ ᠤ᠋ᠨ ᠢ᠋ᠶ᠋ᠠᠨ ᠲᠥᠯᠥᠪᠦᠷᠢ ᠪᠣᠯᠭᠠᠬᠤ ᠤᠤ?》 ᠭᠡᠪᠡ᠃
《ᠢᠯᠢ᠂ ᠠᠪᠤ ᠮᠢᠨᠢ᠂ ᠨᠡᠭᠡᠷᠡᠨ ᠡᠨᠡ ᠪᠦᠭᠦᠳᠡ ᠶ᠋ᠢ ᠨᠠᠳᠠ ᠥᠭᠬᠦ ᠨᠢ ᠦᠦ?》
《ᠬᠣᠢᠲᠤᠨ ᠵᠢᠯ ᠪᠢ ᠴᠢᠮᠠ ᠳ᠋ᠤ᠌ ᠪᠠᠰᠠ ᠡᠳᠦᠢ ᠦᠭᠬᠦᠶᠡ》 ᠭᠡᠵᠦ ᠬᠡᠯᠡᠭᠰᠡᠭᠡᠷ ᠠᠯᠲᠠᠨ ᠵᠢᠮᠰᠡᠭ ᠢ᠋ ᠬᠣᠷᠮᠣᠢᠪᠴᠢ ᠶ᠋ᠢᠨ ᠬᠠᠷᠮᠠᠨ ᠳ᠋ᠤᠨᠢ ᠬᠢᠵᠦ: 《ᠵᠠ ᠳᠠ᠂ ᠳᠡᠮᠡᠢ ᠤᠳᠠᠬᠤ ᠦᠭᠡᠢ ᠲᠡᠭᠦᠨ ᠦ᠌ ᠲᠣᠯᠣᠭᠠᠢ ᠶ᠋ᠢᠨ ᠵᠠᠰᠠᠯ ᠪᠦᠷ ᠴᠢᠨᠦᠬᠢ ᠪᠣᠯᠬᠤ ᠨᠢ ᠠ᠋》 ᠭᠡᠵᠦ ᠭᠠᠷ ᠢ᠋ᠶ᠋ᠠᠨ ᠱᠦᠷᠭᠦᠭᠡᠭᠰᠡᠭᠡᠷ ᠬᠡᠯᠡᠪᠡ᠃ ᠭᠷᠠᠨᠳᠧᠲ ᠠᠪᠤᠭᠠᠢ ᠥᠬᠢᠨ ᠦ᠌ ᠪᠡᠨ ᠬᠠᠢᠷᠠ ᠰᠡᠳᠬᠢᠯ ᠢ᠋ ᠠᠰᠢᠭᠯᠠᠵᠤ ᠣᠯᠵᠠ ᠲᠠᠢ ᠮᠠᠢᠮᠠᠢ ᠬᠢᠭᠰᠡᠨ ᠳ᠋ᠡᠭᠡᠨ ᠶᠡᠬᠡ ᠯᠡ ᠪᠠᠶᠠᠰᠤᠭᠰᠠᠨ ᠪᠠᠢᠨᠠ᠃ ᠬᠡᠯᠡᠬᠦ ᠳ᠋ᠦ᠍ ᠡᠢᠮᠦ ᠴᠦ᠍ ᠭᠷᠠᠨᠳᠧᠲ ᠡᠪᠦᠭᠡᠨ ᠪᠠᠰᠠ ᠬᠠᠷᠠᠬᠠᠨ ᠡᠷᠡᠭᠦᠯ ᠲᠡᠩᠬᠡᠯᠡᠭᠦᠨ ᠪᠣᠯᠪᠠᠴᠤ ᠥᠬᠢᠨ ᠳ᠋ᠡᠭᠡᠨ ᠠᠵᠤ ᠲᠥᠷᠥᠬᠦ ᠳᠠᠮ ᠲᠣᠨᠣ ᠵᠢᠭᠠᠬᠤ ᠭᠡᠵᠦ ᠪᠣᠳᠣᠵᠠᠢ᠃ ᠲᠡᠭᠡᠭᠡᠳ ᠬᠣᠶᠠᠷ ᠵᠢᠯ ᠳᠠᠷᠠᠭᠠᠯᠠᠨ ᠢᠦᠭᠧᠨ᠋ᠸ ᠢ᠋ ᠬᠠᠷᠠᠵᠤ ᠪᠠᠢᠭᠠᠳ ᠬᠣᠭᠣᠯᠠ ᠬᠣᠰᠢ ᠳᠠᠭᠤᠳᠠᠭᠤᠯᠬᠤ ᠪᠠ ᠥᠷᠢ ᠰᠢᠷᠢ ᠬᠤᠷᠢᠶᠠᠯᠭᠠᠪᠠ᠃ ᠭᠷᠠᠨᠳᠧᠲ ᠠᠭᠠᠵᠢᠮ ᠢ᠋ᠶ᠋ᠠᠷ ᠡᠳ᠋ᠯᠡᠩ ᠦ᠋ᠨ ᠢ᠋ᠶ᠋ᠡᠨ ᠭᠠᠵᠠᠷ ᠲᠠᠷᠢᠶᠠᠨ ᠤ᠋ ᠨᠡᠷᠡᠢᠳᠦᠯ ᠦ᠋ᠨ ᠠᠭᠤᠯᠭᠠ ᠶ᠋ᠢ ᠢᠦᠭᠧᠨ᠋ᠸ ᠲᠦ᠍ ᠬᠡᠯᠡᠵᠦ ᠥᠭᠴᠡᠢ᠃ ᠢᠩᠭᠢᠵᠦ ᠭᠤᠷᠪᠠᠨ ᠵᠢᠯ ᠦ᠋ᠨ ᠨᠢᠭᠤᠷ ᠢ᠋ ᠦᠵᠡᠬᠦ ᠦᠶᠡ ᠳ᠋ᠦ᠍ ᠭᠷᠠᠨᠳᠧᠲ ᠠᠪᠤᠭᠠᠢ ᠶ᠋ᠢᠨ ᠬᠠᠷᠠᠮᠴᠢ ᠬᠡᠪᠴᠡᠭ ᠵᠠᠩ ᠰᠤᠷᠲᠠᠯ ᠨᠢ ᠥᠬᠢᠨ ᠢ᠋ᠶ᠋ᠡᠨ ᠣᠪᠣᠭᠠ ᠴᠠᠭᠠᠷᠠᠭᠤᠯᠵᠤ ᠳᠠᠳᠤᠯᠭᠠᠵᠢᠭᠤᠯᠤᠭᠰᠠᠨ ᠡᠴᠡ ᠭᠷᠠᠨᠳᠧᠲ ᠠᠪᠤᠭᠠᠢ ᠵᠣᠷᠢᠭ ᠣᠷᠣᠵᠤ ᠭᠠᠯ ᠲᠣᠭᠣᠭᠠᠨ ᠤ᠋ ᠭᠡᠷ ᠦ᠋ᠨ ᠲᠦᠯᠬᠢᠭᠦᠷ ᠢ᠋ ᠢᠦᠭᠧᠨ᠋ᠸ ᠲᠦ᠍ ᠠᠳᠬᠤᠭᠤᠯᠵᠤ ᠭᠡᠷ ᠦ᠋ᠨ ᠠᠵᠢᠯ ᠢ᠋ ᠵᠢᠩᠬᠢᠨᠢ ᠡᠵᠡᠮᠰᠢᠭᠦᠯᠪᠡ᠃ᠳᠠᠳᠤᠯᠭᠠᠵᠢᠭᠤᠯᠤᠭᠰᠠᠨ
ᠡᠨᠡ ᠮᠡᠲᠦᠴᠢᠯᠡᠨ ᠲᠠᠪᠤᠨ ᠵᠢᠯ ᠥᠩᠭᠡᠷᠡᠯᠡ᠂ ᠢᠦᠭᠧᠨ᠋ᠸ ᠡᠴᠢᠭᠡ ᠥᠬᠢᠨ ᠬᠣᠶᠠᠷ ᠤ᠋ᠨ ᠴᠤᠯᠭᠤᠢ ᠤᠢᠳᠬᠠᠷᠲᠤ ᠠᠮᠢᠳᠤᠷᠠᠯ ᠳ᠋ᠤ᠌ ᠶᠠᠷᠢᠵᠤ ᠲᠣᠭᠠᠴᠢᠮᠠᠷ ᠶᠠᠭᠤᠮᠠ ᠴᠤ᠌ ᠠᠯᠠᠭᠠ᠂ ᠬᠡᠵᠢᠶᠡᠳᠡ ᠨᠢᠭᠡ ᠯᠡ ᠬᠥᠭ ᠦ᠋ᠨ ᠤᠴᠢᠷ ᠶᠠᠪᠤᠳᠠᠯ ᠢ᠋ ᠴᠠᠭ ᠤ᠋ᠨ ᠵᠡᠭᠦᠦ ᠠᠳᠠᠯᠢ ᠣᠨᠣᠪᠴᠢᠲᠠᠢ ᠬᠢᠳᠡᠭ ᠪᠠᠢᠪᠠ᠃ ᠭᠷᠠᠨᠳᠧᠲ ᠠᠪᠠᠬᠠᠢ ᠶ᠋ᠢᠨ ᠭᠤᠨᠢᠭ ᠭᠡᠮᠦᠷᠬᠡᠯ ᠴᠦ᠍ ᠨᠢᠭᠡᠮᠦᠰᠦᠨ ᠢᠯᠡᠷᠬᠡᠢ ᠨᠢᠭᠤᠴᠠ ᠪᠣᠯᠵᠠᠢ᠃ ᠡᠨᠡ ᠠᠪᠠᠬᠠᠢ ᠶ᠋ᠢᠨ ᠭᠤᠨᠢᠭᠯᠠᠯ ᠤ᠋ᠨ ᠰᠢᠯᠲᠠᠭᠠᠨ ᠢ᠋ ᠣᠯᠠᠨ ᠬᠥᠮᠦᠰ ᠰᠠᠷᠠᠨ ᠮᠡᠳᠡᠵᠦ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠰᠡᠦᠮᠦᠷ ᠦ᠋ᠨ ᠬᠥᠮᠦᠰ ᠲᠡᠭᠦᠨ ᠢ᠋ ᠬᠠᠢᠷᠠ ᠰᠡᠳᠬᠢᠯᠭᠡ ᠶ᠋ᠢᠨ ᠲᠤᠬᠠᠢ ᠲᠠᠭᠠᠪᠤᠷᠢᠯᠠᠯ ᠳ᠋ᠠᠭᠠᠨ ᠭᠡᠷᠡᠴᠢ ᠪᠣᠯᠤᠮᠠᠷ ᠨᠢᠭᠡ ᠦᠭᠡ ᠶ᠋ᠢ ᠥᠪᠡᠷ ᠦ᠋ᠨ ᠬᠢᠨᠢ ᠠᠮᠠᠨ ᠡᠴᠡ ᠰᠣᠨᠣᠰᠤᠭᠰᠠᠨ ᠦᠭᠡᠢ ᠶᠦᠮ᠃ ᠠᠪᠠᠬᠠᠢ ᠶ᠋ᠢᠨ ᠶᠠᠪᠤᠯᠴᠠᠳᠠᠭ ᠬᠥᠮᠦᠰ ᠭᠡᠪᠡᠯ ᠬᠡᠳᠦᠨ ᠺᠷᠦᠱᠧᠸ ᠪᠣᠯᠤᠨ ᠲᠡᠳᠡᠨ ᠦ᠌ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠳᠠᠭᠠᠭᠤᠯᠵᠤ ᠢᠷᠡᠭᠰᠡᠭᠡᠷ ᠪᠠᠢᠭᠠᠳ ᠳᠠᠰᠤᠯᠴᠠᠭᠰᠠᠨ ᠨᠠᠢᠵᠠ ᠨᠠᠷ ᠪᠢᠯᠡ᠃ ᠲᠡᠳᠡ ᠠᠪᠠᠬᠠᠢ ᠳ᠋ᠤ᠌ ᠸᠢᠰᠲ᠋ᠤ᠋ ᠬᠥᠵᠥᠷ ᠵᠢᠭᠠᠵᠤ ᠥᠭᠭᠦᠭᠡᠳ ᠣᠷᠣᠢ ᠪᠦᠷᠢ ᠢᠷᠡᠵᠦ ᠨᠠᠭᠠᠳᠳᠠᠭ ᠪᠣᠯᠵᠠᠢ᠃
1827 ᠣᠨ ᠳ᠋ᠤ᠌ ᠢᠦᠭᠧᠨ᠋ᠸ ᠦ᠋ᠨ ᠡᠴᠢᠭᠡ ᠨᠢ ᠡᠪᠦᠭᠡᠷᠡᠬᠦ ᠶ᠋ᠢᠨ ᠡᠷᠬᠡᠨ ᠳ᠋ᠦ᠍ ᠠᠷᠭᠠ ᠪᠤᠰᠤ ᠥᠬᠢᠨ ᠢ᠋ᠶ᠋ᠡᠨ ᠲᠠᠷᠢᠶᠠᠯᠠᠩ ᠠᠳᠠᠯ ᠤ᠋ᠨ ᠨᠢᠭᠤᠴᠠ ᠳ᠋ᠤ᠌ ᠣᠷᠣᠯᠴᠠᠭᠤᠯᠬᠤ ᠪᠣᠯᠤᠭᠰᠠᠨ ᠪᠠ ᠬᠦᠴᠢᠷ ᠵᠦᠢᠯ ᠲᠣᠬᠢᠶᠠᠯᠳᠤᠪᠠᠯ ᠲᠡᠭᠦᠨ ᠢ᠋ ᠪᠠᠲᠤᠯᠠᠭᠠ ᠶ᠋ᠢᠨ ᠬᠥᠮᠦᠨ ᠺᠷᠦᠱᠧᠸ ᠯᠤᠭᠡ ᠵᠥᠪᠳᠡᠭᠦᠯᠳᠡᠭ - ᠺᠷᠦᠱᠧᠸ ᠦ᠋ᠨ ᠴᠢᠩ ᠦᠨᠡᠨᠴᠢ ᠰᠡᠳᠬᠢᠯ ᠢ᠋ ᠭᠷᠠᠨᠳᠧᠲ ᠡᠪᠦᠭᠡᠨ ᠭᠦᠨᠡ ᠢᠲᠡᠭᠡᠳᠡᠭ ᠶᠦᠮ᠃ ᠲᠡᠭᠡᠭᠡᠳ ᠡᠨᠡ ᠵᠢᠯ ᠦ᠋ᠨ ᠡᠴᠦᠰ ᠲᠦ᠍ ᠭᠷᠠᠨᠳᠧᠲ ᠡᠪᠦᠭᠡᠨ ᠨᠠᠶᠠᠨ ᠬᠣᠶᠠᠷᠲᠠᠢ ᠳ᠋ᠠᠭᠠᠨ ᠭᠠᠢ ᠪᠣᠯᠵᠤ ᠮᠡᠨᠡᠭ ᠡᠪᠡᠳᠴᠢᠨ ᠳ᠋ᠦ᠍ ᠨᠡᠷᠪᠡᠭᠳᠡᠭᠡᠳ ᠦᠳᠲᠡᠷ ᠬᠦᠨᠳᠦᠷᠡᠵᠡᠢ᠃ ᠹᠧᠷᠯᠠᠩ ᠡᠮᠴᠢ ᠭᠷᠠᠨᠳᠧᠲ ᠡᠪᠦᠭᠡᠨ ᠦ᠌ ᠡᠪᠡᠳᠴᠢᠨ ᠢ᠋ ᠡᠳᠡᠭᠡᠷᠡᠰᠢ ᠦᠭᠡᠢ ᠡᠪᠡᠳᠴᠢᠨ ᠭᠡᠵᠦ ᠲᠣᠳᠣᠯᠠᠪᠠ᠃
ᠤᠳᠠᠯ ᠦᠭᠡᠢ ᠡᠨᠡ ᠳᠡᠯᠡᠬᠡᠢ ᠳ᠋ᠦ᠍ ᠭᠠᠭᠴᠠᠭᠠᠷ ᠦᠯᠡᠳᠡᠨᠡ ᠭᠡᠵᠦ ᠪᠣᠳᠣᠬᠤ ᠳ᠋ᠠᠭᠠᠨ ᠢᠦᠭᠧᠨ᠋ᠸ᠂ ᠡᠴᠢᠭᠡ ᠳ᠋ᠡᠭᠡᠨ ᠣᠨᠴᠠ ᠳᠣᠲᠣᠨᠣ ᠪᠠᠢᠵᠤ ᠡᠨᠡ ᠬᠦ᠌ ᠬᠠᠮᠤᠭ ᠡᠴᠦᠰ ᠦ᠋ᠨ ᠬᠠᠢᠷᠠ ᠰᠡᠳᠬᠢᠯ ᠢ᠋ᠶ᠋ᠡᠨ ᠰᠠᠢᠲᠤᠷ ᠢᠯᠡᠳᠬᠡᠶᠡ ᠭᠡᠵᠦ ᠪᠣᠳᠣᠵᠤ ᠪᠠᠢᠵᠠᠢ᠃ ᠢᠨᠠᠭ ᠤ᠋ᠨ ᠰᠡᠳᠬᠢᠯ ᠬᠥᠪᠬᠡᠯᠵᠡᠭᠰᠡᠨ ᠠᠯᠢᠪᠠ ᠬᠡᠦᠬᠡᠨᠴᠦᠳ ᠦ᠋ᠨ ᠠᠳᠠᠯᠢ ᠢᠦᠭᠧᠨ᠋ᠸ ᠦ᠋ᠨ ᠪᠣᠳᠣᠯ ᠳᠣᠲᠣᠷᠠ ᠢᠨᠠᠭ ᠳᠤᠷᠠᠯᠠᠯ ᠪᠣᠯ ᠪᠦᠬᠦᠢᠯᠡ ᠶᠢᠷᠲᠢᠨᠴᠦ ᠶ᠋ᠢᠨ ᠠᠮᠢᠨ ᠰᠦᠨᠡᠰᠦ ᠭᠡᠵᠦ ᠰᠠᠨᠠᠭᠳᠠᠵᠤ ᠪᠠᠢᠭᠰᠠᠨ ᠴᠤ᠌ ᠴᠠᠷᠯᠧᠰ ᠳᠡᠷᠭᠡᠳᠡ ᠨᠢ ᠪᠠᠢᠭᠰᠠᠨ ᠦᠭᠡᠢ᠃ ᠢᠦᠭᠧᠨ᠋ᠸ᠂ ᠡᠪᠦᠭᠡᠨ ᠡᠴᠢᠭᠡ ᠪᠡᠨ ᠴᠣᠬᠣᠮ ᠬᠦ᠌ ᠴᠢᠩ ᠰᠡᠳᠬᠢᠯ ᠢ᠋ᠶ᠋ᠡᠷ ᠠᠰᠠᠷᠠᠵᠤ ᠪᠢᠯᠡ᠃ ᠭᠷᠠᠨᠳᠧᠲ ᠠᠪᠤᠭᠠᠢ ᠵᠥᠨᠥᠬᠦ ᠳᠠᠰᠢ ᠬᠠᠨᠳᠤᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠮᠥᠩᠭᠥᠨ ᠦ᠌ ᠬᠣᠷᠣᠬᠠᠢ ᠶ᠋ᠢᠨ ᠵᠠᠩ ᠴᠢᠨᠠᠷ ᠨᠢ ᠮᠥᠨ ᠬᠦ᠌ ᠲᠥᠷᠥᠯᠬᠢ ᠠᠪᠢᠶᠠᠰ ᠤ᠋ᠨ ᠬᠤᠪᠢ ᠪᠠᠷ ᠳᠠᠮᠵᠢᠨ ᠬᠠᠪᠰᠤᠷᠴᠤ ᠪᠠᠢᠭᠰᠠᠨ ᠪᠣᠯᠬᠣᠷ ᠡᠨᠡ ᠬᠥᠮᠦᠨ ᠦᠬᠦᠨ ᠦᠬᠦᠲᠡᠯᠡ ᠪᠡᠨ ᠣᠭᠲᠣᠬᠠᠨ ᠴᠤ᠌ ᠬᠤᠪᠢᠷᠠᠭᠰᠠᠨ ᠦᠭᠡᠢ ᠶᠦᠮ᠃
ᠬᠠᠷᠠ ᠥᠷᠯᠦᠭᠡ ᠡᠴᠡ ᠠᠪᠤᠭᠠᠳ ᠭᠷᠠᠨᠳᠧᠲ ᠡᠪᠦᠭᠡᠨ ᠡᠷᠭᠢᠭᠦᠯᠭᠡᠨ ᠲᠦᠰᠢᠯᠭᠡᠲᠦ ᠰᠠᠨᠳᠠᠯᠢ ᠳᠡᠭᠡᠷᠡ ᠰᠠᠭᠤᠵᠤ᠂ ᠤᠨᠲᠠᠬᠤ ᠥᠷᠥᠭᠡᠨ ᠦ᠌ ᠲᠤᠭᠤᠷᠭᠠ ᠶ᠋ᠢᠨ ᠬᠢᠰᠠ ᠪᠣᠯᠤᠨ ᠨᠢᠭᠤᠴᠠ ᠭᠡᠷ ᠦ᠋ᠨ ᠡᠭᠦᠳᠡᠨ ᠦ᠌ ᠬᠣᠭᠣᠷᠣᠨᠳᠣ ᠬᠥᠮᠦᠨ ᠢ᠋ᠶ᠋ᠡᠷ ᠨᠡᠰᠢ ᠴᠠᠰᠢ ᠲᠦᠯᠬᠢᠭᠦᠯᠦᠨᠡ᠂ ᠨᠢᠭᠤᠴᠠ ᠭᠡᠷ ᠲᠡᠭᠡᠨ ᠰᠢᠵᠢᠷ ᠠᠯᠲᠠ ᠣᠪᠣᠭᠠᠯᠠᠭᠰᠠᠨ ᠢ᠋ ᠬᠡᠯᠡᠬᠦ ᠶᠠᠭᠤ ᠪᠠᠢᠬᠤᠪ᠃ ᠭᠷᠠᠨᠳᠧᠲ ᠡᠪᠦᠭᠡᠨ ᠣᠭᠲᠣ ᠬᠥᠳᠡᠯᠬᠦ ᠦᠭᠡᠢ ᠰᠠᠭᠤᠬᠤ ᠳ᠋ᠠᠭᠠᠨ ᠴᠤ᠌ ᠭᠡᠳ ᠥᠪᠡᠷ ᠢ᠋ ᠪᠡᠨ ᠰᠠᠬᠢᠭᠴᠢ ᠬᠥᠮᠦᠨ ᠪᠣᠯᠭᠠᠨ ᠲᠡᠮᠦᠷ ᠬᠠᠪᠲᠠᠰᠤᠲᠠᠢ ᠬᠠᠭᠠᠯᠭᠠ ᠪᠣᠯᠤᠨ ᠲᠡᠭᠦᠨ ᠢ᠋ ᠡᠷᠭᠢᠵᠦ ᠦᠵᠡᠬᠦ ᠪᠡᠷ ᠢᠷᠡᠭᠰᠡᠨ ᠬᠥᠮᠦᠨ ᠬᠣᠶᠠᠷ ᠢ᠋ ᠰᠡᠵᠢᠭᠲᠡᠢ ᠬᠠᠷᠠᠴᠠ ᠪᠠᠷ ᠡᠭᠡᠯᠵᠢᠯᠡᠨ ᠬᠠᠷᠠᠳᠠᠭ᠃ ᠶᠠᠯᠢᠭᠦᠢ ᠳᠠᠭᠤ ᠴᠢᠮᠡᠭᠡ ᠭᠠᠷᠤᠮᠠᠭᠴᠠ ᠯᠠ ᠤᠴᠢᠷ ᠰᠢᠯᠲᠠᠭᠠᠨ ᠢ᠋ ᠠᠰᠠᠭᠤᠭᠠᠳ ᠪᠠᠢᠳᠠᠭ᠃ ᠲᠡᠷᠡᠴᠢᠯᠡᠨ ᠬᠦᠷᠢᠶᠡᠨ ᠳᠣᠲᠣᠷᠠ ᠨᠣᠬᠠᠢ ᠡᠪᠰᠢᠶᠡᠬᠦ ᠶ᠋ᠢ ᠬᠦᠷᠲᠡᠯᠡ ᠣᠯᠤᠭᠠᠳ ᠰᠣᠨᠣᠰᠴᠢᠬᠠᠳᠠᠭ ᠢ᠋ ᠨᠢ ᠪᠠᠲᠤᠯᠠᠭᠠ ᠶ᠋ᠢᠨ ᠬᠥᠮᠦᠨ ᠺᠷᠦᠱᠧᠸ ᠶᠡᠬᠡᠳᠡ ᠭᠠᠢᠬᠠᠪᠠ᠃ ᠭᠷᠠᠨᠳᠧᠲ ᠡᠪᠦᠭᠡᠨ ᠢ᠋ ᠦᠵᠡᠬᠦ ᠳ᠋ᠦ᠍ ᠤᠬᠠᠭᠠᠨ ᠰᠠᠨᠠᠭᠠ ᠡᠲᠡᠢ ᠪᠤᠳᠠᠢ ᠰᠢᠭ᠋ ᠪᠣᠯᠪᠠᠴᠤ ᠬᠥᠮᠦᠨ ᠲᠠᠷᠢᠶᠠᠨ ᠲᠦᠷᠢᠶᠡᠰᠦ ᠬᠦᠷᠭᠡᠵᠦ ᠢᠷᠡᠬᠦ᠂ ᠲᠠᠷᠢᠶᠠᠯᠠᠩ ᠬᠠᠮᠢᠶᠠᠷᠤᠭᠴᠢ ᠲᠠᠢ ᠳᠠᠩᠰᠠ ᠪᠣᠳᠣᠬᠤ ᠪᠤᠶᠤ ᠪᠠᠷᠢᠮᠲᠠ ᠪᠢᠴᠢᠭ ᠦ᠋ᠨ ᠡᠳᠦᠷ ᠬᠤᠭᠤᠴᠠᠭᠠ ᠲᠣᠭᠲᠠᠬᠤ ᠦᠶᠡ ᠳ᠋ᠦ᠍ ᠲᠡᠷᠡ ᠮᠠᠨᠢ ᠳᠣᠣᠷᠠ ᠪᠠᠨ ᠰᠡᠷᠭᠡᠢ ᠪᠣᠯᠳᠠᠭ ᠰᠠᠨ᠃ ᠢᠩᠭᠢᠭᠡᠳ ᠲᠡᠷᠡ ᠡᠷᠭᠢᠭᠦᠯᠭᠡᠨ ᠲᠦᠰᠢᠯᠭᠡᠲᠦ ᠰᠠᠨᠳᠠᠯᠢ ᠪᠠᠨ ᠲᠦᠯᠬᠢᠭᠦᠯᠵᠦ ᠨᠢᠭᠤᠴᠠ ᠭᠡᠷ ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᠬᠦᠷᠴᠦ ᠥᠬᠢᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠡᠭᠦᠳᠡ ᠶ᠋ᠢ ᠨᠡᠭᠡᠭᠡᠯᠭᠡᠭᠡᠳ ᠬᠠᠷᠠᠵᠤ ᠪᠠᠢᠭᠠᠳ ᠤᠭᠤᠲᠠ ᠲᠠᠢ ᠵᠣᠭᠣᠰ ᠤ᠋ᠳ ᠢ᠋ ᠰᠡᠮᠡᠬᠡᠷ ᠣᠪᠣᠭᠠᠯᠠᠭᠤᠯᠵᠤ ᠪᠠᠷᠠᠪᠠᠯ ᠡᠭᠦᠳᠡ ᠶ᠋ᠢ ᠭᠠᠢᠭᠤᠢ ᠰᠠᠢᠨ ᠬᠠᠭᠠᠵᠤ ᠣᠷᠬᠢᠳᠠᠭ᠃ ᠲᠡᠭᠡᠭᠡᠳ ᠥᠬᠢᠨ ᠨᠢ ᠥᠨᠥᠬᠢ ᠡᠷᠬᠢᠮ ᠴᠤᠬᠠᠭ ᠲᠦᠯᠬᠢᠭᠦᠷ ᠢ᠋ ᠪᠤᠴᠠᠭᠠᠵᠤ ᠥᠭᠭᠦᠭᠰᠡᠨ ᠬᠣᠢᠨᠠ ᠡᠯᠢᠭᠡᠪᠴᠢ ᠶ᠋ᠢᠨ ᠬᠠᠷᠮᠠᠨ ᠳ᠋ᠠᠭᠠᠨ ᠰᠢᠷᠭᠤᠭᠤᠯᠵᠤ᠂ ᠪᠠᠢᠨ ᠳᠠᠬᠢᠨ ᠳᠠᠷᠤᠯᠬᠢᠯᠠᠵᠤ ᠦᠵᠡᠭᠡᠳ᠂ ᠦᠭᠡ ᠳᠠᠭᠤ ᠦᠭᠡᠢ ᠬᠠᠭᠤᠴᠢᠨ ᠣᠷᠣᠨ ᠳ᠋ᠠᠭᠠᠨ ᠬᠠᠷᠢᠳᠠᠭ ᠶᠤᠮ᠃ ᠭᠷᠠᠨᠳᠧᠲ ᠡᠪᠦᠭᠡᠨ ᠦ᠌ ᠬᠠᠭᠤᠴᠢᠨ ᠨᠠᠢᠵᠠ ᠺᠷᠦᠱᠧᠸ ᠦ᠋ᠨ ᠪᠣᠳᠣᠬᠤ ᠪᠠᠷ ᠴᠠᠷᠯᠧᠰ ᠭᠷᠠᠨᠳᠧᠲ ᠬᠡᠷᠪᠡ ᠬᠠᠷᠢᠵᠤ ᠢᠷᠡᠬᠦ ᠦᠭᠡᠢ ᠪᠣᠯ᠂ ᠡᠨᠡ ᠵᠣᠭᠣᠰ ᠮᠥᠩᠭᠥ ᠲᠡᠢ ᠭᠠᠭᠴᠠᠬᠠᠨ ᠥᠬᠢᠨ ᠨᠢ ᠯᠠᠪᠲᠠᠶᠠ ᠲᠡᠭᠦᠨ ᠦ᠌ ᠳᠠᠷᠤᠭᠠ ᠲᠤᠰᠢᠶᠠᠯ ᠲᠠᠢ ᠠᠴᠢ ᠬᠦᠦ ᠯᠤᠭᠡ ᠭᠡᠷᠯᠡᠬᠦ ᠪᠣᠯᠬᠣᠷ ᠺᠷᠦᠱᠧᠸ ᠬᠤᠪᠢ ᠳᠠᠬᠢᠨ ᠬᠥᠩᠭᠡᠨ ᠱᠥᠩᠭᠡᠨ ᠪᠣᠯᠵᠤ ᠡᠳᠦᠷ ᠪᠦᠷᠢ ᠭᠷᠠᠨᠳᠧᠲ ᠦ᠋ᠨ ᠵᠠᠬᠢᠶᠠ ᠵᠠᠷᠯᠢᠭ ᠢ᠋ ᠬᠦᠯᠢᠶᠡᠵᠦ ᠹᠷᠤᠹᠧᠩ ᠳ᠋ᠦ᠍ ᠬᠦᠷᠴᠦ ᠲᠠᠷᠢᠶᠠᠨ ᠭᠠᠵᠠᠷ ᠢ᠋ᠶ᠋ᠠᠷ᠂ ᠪᠡᠯᠴᠢᠭᠡᠷ ᠢ᠋ᠶ᠋ᠡᠷ᠂ ᠦᠵᠦᠮ ᠦ᠋ᠨ ᠬᠦᠷᠢᠶᠡᠯᠡᠩ ᠢ᠋ᠶ᠋ᠡᠷ ᠣᠴᠢᠵᠤ ᠭᠷᠠᠨᠳᠧᠲ ᠡᠪᠦᠭᠡᠨ ᠢ᠋ ᠣᠷᠣᠯᠠᠨ ᠬᠤᠷᠢᠶᠠᠯᠲᠠ ᠶ᠋ᠢ ᠬᠤᠳᠠᠯᠳᠤᠨ ᠭᠠᠷᠭᠠᠭᠠᠳ᠂ ᠨᠢᠭᠤᠴᠠ ᠭᠡᠷ ᠲᠦ᠍ ᠡᠴᠡᠨᠡ ᠬᠤᠷᠢᠶᠠᠭᠰᠠᠨ ᠤᠭᠤᠲᠠ ᠤᠭᠤᠲᠠ ᠵᠣᠭᠣᠰ ᠢ᠋ ᠰᠢᠵᠢᠷ ᠠᠯᠲᠠ ᠪᠣᠯᠭᠠᠨ ᠰᠣᠯᠢᠳᠠᠭ ᠪᠠᠢᠵᠠᠢ᠃
ᠡᠪᠦᠭᠡᠨ ᠡᠴᠦᠰ ᠲᠡᠭᠡᠨ ᠦᠬᠦᠯ ᠦ᠋ᠨ ᠳᠠᠪᠠᠭᠠᠨ ᠳ᠋ᠤ᠌ ᠭᠠᠷᠪᠠ᠃ ᠲᠡᠷᠡ ᠬᠡᠳᠦᠨ ᠡᠳᠦᠷ ᠡᠪᠦᠭᠡᠨ ᠦ᠌ ᠬᠦᠳᠡᠷᠯᠢᠭ ᠪᠡᠶᠡ ᠨᠢ ᠠᠮᠢ ᠲᠠᠯᠪᠢᠬᠤ ᠱᠠᠲᠤᠨ ᠳ᠋ᠠᠭᠠᠨ ᠣᠷᠣᠯᠠ᠃ ᠲᠡᠷᠡ ᠮᠠᠨᠢ ᠲᠤᠭᠤᠷᠭᠠ ᠶ᠋ᠢᠨ ᠬᠢᠰᠠ ᠶ᠋ᠢᠨ ᠳᠡᠷᠭᠡᠳᠡ ᠨᠢᠭᠤᠴᠠ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠡᠮᠦᠨᠡ ᠰᠠᠭᠤᠨᠠ᠃ ᠬᠤᠴᠢᠭᠰᠠᠨ ᠬᠥᠨᠵᠢᠯᠡ ᠪᠡᠨ ᠳᠡᠭᠡᠭᠰᠢ ᠪᠡᠨ ᠴᠢᠩᠭᠠᠭᠠᠵᠤ᠂ ᠪᠡᠶᠡ ᠪᠡᠨ ᠴᠢᠩᠭᠠ ᠣᠷᠢᠶᠠᠬᠤ ᠶ᠋ᠢᠨ ᠳᠠᠭᠠᠤ ᠨᠠᠨᠤᠩ ᠳ᠋ᠤ᠌:
《ᠴᠢᠩᠭᠠ ᠣᠷᠢᠶᠠ᠂ ᠴᠢᠩᠭᠠ ᠣᠷᠢᠶᠠ᠂ ᠮᠢᠨᠦ ᠶᠠᠭᠤᠮᠠ ᠶ᠋ᠢ ᠪᠢᠲᠡᠭᠡᠢ ᠬᠤᠯᠠᠭᠠᠢ ᠳ᠋ᠤ᠌ ᠠᠯᠲᠠ》 ᠭᠡᠵᠦ ᠠᠮᠠᠨ ᠳ᠋ᠠᠭᠠᠨ ᠦᠭᠡᠯᠡᠨᠡ᠃
ᠭᠷᠠᠨᠳᠧᠲ ᠡᠪᠦᠭᠡᠨ ᠦ᠌ ᠪᠣᠢ ᠪᠦᠬᠦᠢ ᠠᠮᠢᠵᠢᠷᠠᠯ ᠤ᠋ᠨ ᠬᠦᠴᠦ ᠴᠢᠳᠠᠯ ᠨᠢ ᠪᠦᠷ ᠯᠡ ᠨᠢᠳᠦᠨ ᠳ᠋ᠡᠭᠡᠨ ᠭᠦᠶᠦᠵᠡᠢ᠂ ᠨᠢᠳᠦ ᠪᠡᠨ ᠴᠢᠳᠠᠨ ᠶᠠᠳᠠᠨ ᠨᠡᠭᠡᠭᠡᠬᠦ ᠪᠦᠷᠢ ᠳ᠋ᠦ᠍ ᠬᠠᠷᠠᠴᠠ ᠨᠢ ᠡᠳ᠋ ᠡᠷᠳᠡᠨᠢᠰ ᠳᠦᠭᠦᠷᠡᠩ ᠬᠠᠳᠠᠭᠠᠯᠠᠭᠰᠠᠨ ᠨᠢᠭᠤᠴᠠ ᠭᠡᠷ ᠦ᠋ᠨ ᠡᠭᠦᠳᠡ ᠤᠷᠤᠭᠤ ᠲᠤᠰᠤᠨᠠ᠃
《ᠲᠡᠨᠳᠡ ᠪᠠᠢᠨᠠ ᠤᠤ? ᠲᠡᠨᠳᠡ ᠪᠠᠢᠨᠠ ᠤᠤ?》 ᠭᠡᠵᠦ ᠠᠰᠠᠭᠤᠬᠤ ᠳᠠᠭᠤᠨ ᠳ᠋ᠤᠨᠢ ᠬᠡᠴᠡᠭᠦᠦ ᠶᠡᠬᠡ ᠭᠡᠯᠮᠡᠵᠦ ᠲᠡᠪᠡᠳᠡᠭᠰᠡᠨ ᠪᠠᠢᠳᠠᠯ ᠢᠯᠡᠷᠡᠨᠡ᠃
《ᠲᠡᠨᠳᠡ ᠪᠡᠨ ᠪᠠᠢᠭᠰᠠᠭᠠᠷ ᠠ᠋᠂ ᠠᠪᠤ ᠠ᠋᠃ 》
《ᠰᠢᠵᠢᠷ ᠠᠯᠲᠠ ᠪᠠᠨ ᠰᠠᠢᠨ ᠰᠠᠬᠢ! ᠁ ᠠᠪᠴᠢᠷᠠᠭᠠᠳ ᠮᠢᠨᠦ ᠡᠮᠦᠨᠡ ᠳᠡᠯᠭᠡ!》 ᠢᠦᠭᠧᠨ᠋ᠸ ᠠᠯᠲᠠᠨ ᠯᠤᠢᠵᠢ ᠶ᠋ᠢ ᠰᠢᠷᠡᠭᠡᠨ ᠳᠡᠭᠡᠷᠡ ᠠᠰᠬᠠᠭᠰᠠᠨ ᠳ᠋ᠤ᠌ ᠭᠷᠠᠨᠳᠧᠲ ᠬᠡᠳᠦᠨ ᠴᠠᠭ ᠨᠢᠳᠦ ᠰᠠᠯᠭᠠᠯ ᠦᠭᠡᠢ ᠰᠢᠷᠳᠡᠨ ᠰᠠᠭᠤᠳᠠᠭ᠃ ᠡᠨᠡ ᠨᠢ ᠶᠠᠭ ᠯᠠ ᠰᠠᠶᠢ ᠶᠠᠭᠤᠮᠠ ᠲᠠᠨᠢᠬᠤ ᠪᠣᠯᠤᠭᠰᠠᠨ ᠬᠡᠦᠬᠡᠳ ᠨᠢᠭᠡ ᠶᠠᠭᠤᠮᠠ ᠶ᠋ᠢ ᠮᠡᠬᠡᠢᠷᠡᠨ ᠬᠠᠷᠠᠳᠠᠭ ᠰᠢᠭ᠋ ᠪᠥᠭᠡᠳ ᠮᠥᠨ ᠪᠠᠰᠠ ᠬᠡᠦᠬᠡᠳ ᠠᠳᠠᠯᠢ ᠴᠢᠳᠠᠨ ᠶᠠᠳᠠᠨ ᠢᠨᠢᠶᠡᠮᠰᠦᠭᠯᠡᠵᠦ ᠪᠠᠢᠳᠠᠭ᠃ ᠵᠠᠷᠢᠮ ᠳ᠋ᠠᠭᠠᠨ ᠭᠷᠠᠨᠳᠧᠲ ᠪᠠᠰᠠ:
《ᠢᠩᠭᠢᠵᠦ ᠰᠠᠭᠤᠪᠠᠯ ᠰᠡᠳᠬᠢᠯ ᠳ᠋ᠦ᠍ ᠮᠢᠨᠢ ᠳᠤᠯᠠᠭᠠᠬᠠᠨ ᠶᠤᠮ ᠠ᠋!》 ᠭᠡᠵᠦ ᠬᠡᠯᠡᠬᠦ ᠦᠶᠡ ᠳ᠋ᠦ᠍ ᠡᠭᠡᠭᠡ ᠯᠡ ᠴᠡᠩᠭᠡᠯ ᠦ᠋ᠨ ᠣᠷᠣᠨ ᠳ᠋ᠤ᠌ ᠪᠠᠢᠭᠠ ᠶᠤᠮ ᠰᠢᠭ᠋ ᠪᠠᠢᠳᠠᠯ ᠴᠢᠷᠠᠢ ᠳ᠋ᠤᠨᠢ ᠮᠡᠳᠡᠭᠳᠡᠨᠡ᠃ ᠲᠤᠰ ᠲᠣᠭᠣᠷᠢᠭ ᠤ᠋ᠨ ᠬᠠᠷᠠ ᠯᠠᠮᠠ ᠢᠷᠡᠵᠦ ᠭᠷᠠᠨᠳᠧᠲ ᠡᠪᠦᠭᠡᠨ ᠳ᠋ᠦ᠍ ᠦᠬᠦᠯ ᠦ᠋ᠨ ᠮᠠᠨᠢ ᠠᠢᠯᠠᠳᠬᠤ ᠦᠶᠡ ᠳ᠋ᠦ᠍ ᠵᠠᠭᠠᠯᠮᠠᠢ᠂ ᠵᠤᠯᠠ ᠶ᠋ᠢᠨ ᠲᠠᠯᠪᠢᠭᠤᠷ᠂ ᠷᠠᠰᠢᠶᠠᠨ ᠬᠢᠭᠰᠡᠨ ᠮᠥᠩᠭᠥᠨ ᠲᠣᠨᠣᠭᠯᠠᠯ ᠲᠠᠢ ᠬᠤᠮᠬᠠ ᠵᠡᠷᠭᠡ ᠶ᠋ᠢ ᠠᠪᠴᠢᠷᠠᠮᠠᠭᠴᠠ ᠦᠬᠦᠭᠡᠳ ᠬᠡᠳᠦᠨ ᠴᠠᠭ ᠪᠣᠯᠤᠭᠰᠠᠨ ᠭᠡᠮᠡᠷ ᠨᠢᠳᠦ ᠨᠢ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠠᠮᠢ ᠣᠷᠣᠵᠤ ᠨᠡᠭᠡᠭᠡᠭᠳᠡᠭᠡᠳ ᠲᠡᠳᠡᠭᠡᠷ ᠬᠡᠷᠡᠭᠰᠡᠯ ᠢ᠋ ᠨᠢᠳᠦ ᠴᠠᠪᠴᠢᠯ ᠦᠭᠡᠢ ᠰᠢᠷᠳᠡᠬᠦ ᠪᠥᠭᠡᠳ ᠬᠠᠮᠠᠷ ᠳᠡᠭᠡᠷᠡᠬᠢ ᠠᠰᠢᠭ ᠨᠢ ᠴᠦ᠍ ᠬᠠᠮᠤᠭ ᠡᠴᠦᠰ ᠦ᠋ᠨ ᠤᠳᠠᠭᠠ ᠬᠥᠳᠡᠯᠵᠦ ᠠᠪᠤᠪᠠ᠃ ᠬᠠᠷᠠ ᠯᠠᠮᠠ ᠠᠯᠲᠠ ᠪᠤᠯᠬᠠᠮᠠᠯ ᠵᠠᠭᠠᠯᠮᠠᠢ ᠶ᠋ᠢ ᠤᠷᠤᠭᠤᠯ ᠳ᠋ᠤᠨᠢ ᠬᠦᠷᠭᠡᠵᠦ᠂ ᠾᠷᠢᠰᠲ᠋ᠣᠰ ᠤ᠋ᠨ ᠠᠷᠢᠭᠤᠨ ᠬᠥᠷᠥᠭ ᠢ᠋ ᠦᠨᠦᠰᠦᠭᠦᠯᠬᠦ ᠭᠡᠰᠡᠨ ᠳ᠋ᠦ᠍ ᠭᠷᠠᠨᠳᠧᠲ ᠡᠪᠦᠭᠡᠨ ᠬᠥᠮᠦᠨ ᠰᠣᠴᠢᠭᠠᠮᠠᠷ ᠪᠠᠢᠳᠠᠯ ᠭᠠᠷᠭᠠᠵᠤ᠂ ᠵᠠᠭᠠᠯᠮᠠᠢ ᠶ᠋ᠢ ᠨᠢ ᠪᠤᠯᠢᠶᠠᠵᠤ ᠠᠪᠬᠤ ᠭᠡᠯᠡ᠃ ᠡᠨᠡ ᠬᠠᠮᠤᠭ ᠡᠴᠦᠰ ᠦ᠋ᠨ ᠣᠷᠣᠯᠳᠣᠯᠭᠠ ᠨᠢ ᠲᠡᠭᠦᠨ ᠢ᠋ ᠡᠷᠯᠢᠭ ᠲᠦ᠍ ᠵᠠᠯᠠᠴᠢᠬᠠᠯᠠ᠃ ᠢᠦᠭᠧᠨ᠋ᠸ ᠢ᠋ᠶ᠋ᠡᠨ ᠳᠠᠭᠤᠳᠠᠬᠤ ᠳ᠋ᠤ᠌ ᠢᠦᠭᠧᠨ᠋ᠸ ᠨᠢ ᠡᠮᠦᠨᠡ ᠨᠢ ᠰᠥᠭᠥᠳᠦᠨ ᠴᠡᠯ ᠬᠦᠢᠲᠡᠨ ᠪᠣᠯᠤᠭᠰᠠᠨ ᠭᠠᠷ ᠢ᠋ ᠨᠢ ᠦᠨᠦᠰᠴᠦ᠂ ᠨᠢᠯᠪᠤᠰᠤ ᠤᠨᠠᠭᠠᠪᠠᠴᠤ ᠡᠴᠢᠭᠡ ᠨᠢ ᠣᠯᠵᠤ ᠦᠵᠡᠬᠦ ᠡᠴᠡ ᠪᠡᠨ ᠥᠩᠭᠡᠷᠡᠵᠡᠢ᠃
《ᠠᠪᠤ ᠠ᠋᠂ ᠨᠠᠮᠠᠶ᠋ᠢ ᠢᠷᠥᠭᠡᠭᠡᠴᠢ ᠳᠡ᠃ 》
《ᠠᠯᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠠᠢᠨ ᠬᠢᠮᠠᠭᠠᠳᠠᠵᠤ ᠶᠠᠪᠤ!ᠮᠢᠨᠦ ᠲᠡᠨᠳᠡ ᠣᠴᠢᠵᠤ ᠳᠠᠩᠰᠠ ᠪᠠᠨ ᠲᠤᠰᠢᠶᠠ!》 ᠭᠡᠰᠡᠨ ᠡᠨᠡ ᠬᠠᠮᠤᠭ ᠰᠡᠭᠦᠯ ᠦ᠋ᠨ ᠦᠭᠡ ᠨᠢ ᠾᠷᠢᠰᠲ᠋ᠣᠰ ᠤ᠋ᠨ ᠱᠠᠰᠢᠨ ᠪᠣᠯ ᠮᠥᠩᠭᠥᠨ ᠦ᠌ ᠬᠣᠷᠤᠬᠠᠢᠴᠤᠳ ᠤ᠋ᠨ ᠪᠣᠯᠬᠤ ᠶᠣᠰᠣᠲᠠᠢ ᠭᠡᠰᠡᠨ ᠢ᠋ ᠭᠡᠷᠡᠴᠢᠯᠡᠵᠡᠢ᠃