ᠥᠷᠯᠥᠭᠡ（ ᠬᠡᠯᠡ ᠪᠢᠴᠢᠭ – ᠶᠢᠰᠦᠳᠦᠭᠡᠷ ᠳᠡᠪᠲᠡᠷ）Өглөө（ Хэл бичиг – Есдүгээр дэвтэр）
565ᠥᠷᠯᠥᠭᠡ
ᠦᠷ ᠦ᠋ᠨ ᠭᠡᠭᠡᠨ ᠳ᠋ᠦ᠍ ᠠᠭᠤᠯᠠᠰ ᠤ᠋ᠨ ᠣᠷᠣᠢ ᠳᠦᠩᠭᠦᠶ᠋ᠢᠨ ᠰᠦᠭᠯᠡᠶ᠋ᠢᠵᠦ ᠂ ᠨᠠᠭᠠᠳᠤᠮ ᠲᠠᠯᠠ ᠨᠠᠮ ᠰᠡᠯᠡᠭᠦᠨ ᠃
ᠤᠷᠠᠯᠠᠮᠠ ᠰᠡᠮᠬᠡᠨ ᠪᠣᠰᠤᠭᠠᠳ ᠰᠠᠭᠠᠯᠢ ᠶ᠋ᠢᠨ ᠳᠡᠪᠡᠯ ᠢ᠋ᠶ᠋ᠡᠨ ᠡᠮᠦᠰᠴᠦ ᠽᠠᠨᠳᠠᠨ ᠰᠠᠭᠤᠯᠠᠭᠠ ᠪᠠᠨ ᠲᠣᠬᠣᠶ᠋ᠢᠯᠠᠭᠠᠳ ᠡᠭᠦᠳᠡ ᠪᠡᠨ ᠰᠡᠪ ᠰᠡᠮᠬᠡᠨ ᠬᠠᠭᠠᠭᠠᠳ ᠭᠠᠷᠪᠠ ᠃
ᠤᠷᠠᠯᠠᠮᠠ ᠬᠦᠢᠲᠡᠨ ᠤᠰᠤ ᠪᠠᠷ ᠨᠢᠭᠤᠷ ᠭᠠᠷ ᠢ᠋ᠶ᠋ᠠᠨ ᠤᠬᠢᠶᠠᠭᠠᠳ ᠂ ᠬᠥᠪ ᠬᠥᠩᠭᠡᠨ ᠠᠯᠬᠤᠭᠰᠠᠭᠠᠷ ᠲᠤᠭᠤᠯ ᠤ᠋ᠨ ᠵᠡᠯᠡ ᠳᠡᠭᠡᠷᠡ ᠣᠴᠢᠭᠠᠳ ᠂ ᠬᠠᠯᠵᠠᠨ ᠲᠤᠭᠤᠯ ᠢ᠋ᠶ᠋ᠠᠨ ᠴᠢᠭᠲᠠ ᠠ᠋ᠴᠠ ᠨᠢ ᠲᠠᠯᠪᠢᠵᠤ ᠢᠪᠢᠯᠭᠡᠪᠡ ᠃ ᠲᠠᠯᠠ ᠶ᠋ᠢᠨ ᠡᠯᠢᠭᠡᠨ ᠳ᠋ᠦ᠍ ᠨᠣᠶ᠋ᠢᠷᠰᠤᠭᠰᠠᠨ ᠰᠢᠪᠠᠭᠤᠳ ᠱᠤᠯᠤᠭᠠᠨᠠ ᠨᠢᠰᠦᠯᠴᠡᠭᠡᠳ ᠂ ᠨᠠᠮ ᠭᠦᠮ ᠪᠠᠶ᠋ᠢᠲᠠᠯ ᠠᠭᠠᠵᠢᠮ ᠢ᠋ᠶ᠋ᠠᠷ ᠬᠤᠪᠢᠷᠠᠵᠤ ᠭᠠᠵᠠᠷ ᠪᠣᠯᠭᠠᠨ ᠳ᠋ᠤ᠌ ᠳᠠᠭᠤ ᠴᠢᠮᠡᠭᠡ ᠭᠠᠷᠴᠤ ᠡᠬᠢᠯᠡᠪᠡ ᠃
ᠰᠠᠭᠠᠯᠢᠴᠢᠨ ᠪᠦᠰᠡᠭᠦᠢ ᠶ᠋ᠢᠨ ᠤᠷᠠᠨ ᠬᠤᠷᠤᠭᠤ ᠪᠠᠷ ᠰᠢᠪᠲᠤᠷᠴᠤ ᠪᠠᠶ᠋ᠢᠬ᠋ᠠ ᠦᠨᠢᠶᠡᠨ ᠰᠦᠨ ᠦ᠌ ᠬᠥᠭᠡᠰᠦᠷᠡᠨ ᠪᠠᠭᠤᠬᠤ ᠳᠠᠭᠤ ᠥᠨᠳᠥᠷ ᠠᠭᠤᠯᠠᠨ ᠠ᠋ᠴᠠ ᠪᠠᠭᠤᠳᠠᠭ ᠬᠦᠷᠬᠢᠷᠡ ᠰᠢᠭ ᠬᠦᠷᠴᠢᠭᠢᠨᠡᠨ ᠠᠶᠠᠲᠠᠶ᠋ᠢᠬᠠᠨ ᠰᠣᠨᠣᠰᠳᠠᠨᠠ ᠃
ᠲᠤᠭ ᠨᠣᠶ᠋ᠢᠷ ᠲᠠᠭᠠᠨ ᠪᠠᠶ᠋ᠢᠬᠰᠠᠨ ᠰᠡᠴᠡᠨᠬᠦᠦ ᠭᠡᠨᠡᠳᠲᠡ ᠰᠡᠷᠢᠵᠦ ᠂ ᠡᠵᠢ ᠪᠡᠨ ᠦᠨᠢᠶᠡ ᠰᠠᠭᠠᠵᠤ ᠪᠠᠶ᠋ᠢᠬᠤ ᠶ᠋ᠢ ᠮᠠᠲᠠᠮᠠᠭᠴᠠ ᠂ ᠪᠤᠭᠳᠤᠰᠬᠢᠨ ᠪᠣᠰᠴᠤ ᠬᠤᠪᠴᠠᠰᠤ ᠬᠤᠨᠠᠷ ᠢ᠋ᠶ᠋ᠠᠨ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠰᠢᠭ ᠴᠢᠪᠬᠢᠲᠡᠯᠡ ᠡᠮᠦᠰᠴᠢᠬᠡᠭᠡᠳ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠷᠭᠡᠳᠡ ᠭᠦᠶᠦᠨ ᠬᠦᠷᠴᠡᠢ ᠃
ᠦᠷ ᠦ᠋ᠨ ᠭᠡᠭᠡ ᠤᠯᠠᠮ ᠢ᠋ᠶ᠋ᠠᠷ ᠳᠤᠯᠠᠶ᠋ᠢᠵᠤ ᠰᠡᠷᠭᠦᠯᠡᠩ ᠬᠦᠦ ᠶ᠋ᠢᠨ ᠲᠤᠩᠭᠠᠯᠠᠭ ᠬᠥᠭᠡᠷᠦᠬᠦᠨ ᠴᠢᠷᠠᠢ ᠲᠣᠪ ᠲᠣᠳᠣ ᠬᠠᠷᠠᠭᠳᠠᠨᠠ ᠃
《 ᠬᠦᠦ ᠮᠢᠨᠢ ᠤᠨᠲᠠᠵᠤ ᠪᠠᠶ᠋ᠢᠬᠤ ᠦᠭᠡᠢ ᠶᠠᠭᠤᠨ ᠳ᠋ᠤ᠌ ᠪᠣᠰᠤᠭᠠᠳ ᠢᠷᠡᠪᠡ ᠳᠠ 》 ᠭᠡᠵᠦ ᠤᠷᠠᠯᠠᠮᠠ ᠬᠠᠯᠵᠠᠨ ᠲᠤᠭᠤᠯ ᠢ᠋ᠶ᠋ᠠᠨ ᠬᠣᠶᠠᠳᠠᠬᠢ ᠢᠪᠢᠯᠭᠡᠬ᠋ᠰᠡᠨ ᠢ᠋ᠶ᠋ᠡᠨ ᠲᠠᠲᠠᠵᠤ ᠦᠨᠢᠶᠡ ᠪᠡᠨ ᠦᠷᠭᠦᠯᠵᠢᠯᠡᠨ ᠰᠠᠭᠠᠨᠠ ᠃
《 ᠡᠵᠢ ᠠ᠋ ᠂ ᠪᠢ ᠢᠪᠢᠯᠭᠡᠵᠦ ᠦᠭᠭᠦᠶᠡ ᠂ ᠲᠡᠭᠡᠪᠡᠯ ᠬᠤᠷᠳᠤᠨ ᠪᠢᠰᠢ ᠦᠦ 》 ᠭᠡᠵᠦ ᠰᠡᠴᠡᠨᠬᠦᠦ ᠳᠠᠳᠮᠠᠭᠠᠢ ᠢᠪᠢᠯᠭᠡᠴᠢᠨ ᠶᠦ᠍ᠮ ᠰᠢᠬ ᠬᠡᠯᠡᠭᠡᠳ ᠬᠠᠷᠢᠭᠤ ᠬᠦᠯᠢᠶᠡᠵᠦ ᠵᠣᠭᠰᠣᠨᠠ ᠃
《 ᠲᠡᠭᠡᠬᠦ ᠤᠤ ᠂ ᠬᠦᠦ ᠮᠢᠨᠢ ᠂ ᠴᠢ ᠪᠣᠯ ᠥᠴᠥᠭᠡᠳᠦᠷᠬᠡᠨ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠶᠠᠪᠤᠭᠰᠠᠨ ᠬᠡᠦᠬᠡᠳ ᠰᠢᠦ 》 ᠭᠡᠬᠦ ᠳ᠋ᠦ᠍ ᠰᠡᠴᠡᠨᠬᠦᠦ ᠲᠣᠷᠮᠣᠭᠣᠷ ᠨᠢᠳᠦ ᠪᠡᠨ ᠪᠦᠯᠲᠡᠯᠵᠡᠭᠦᠯᠦᠨ ᠄
《 ᠪᠠᠭᠰᠢ ᠪᠢᠳᠡᠨ ᠳ᠋ᠦ᠍ ᠠᠪᠤ ᠡᠵᠢ ᠳ᠋ᠡᠭᠡᠨ ᠲᠤᠰᠠᠯᠠᠵᠤ ᠠᠵᠢᠯ ᠬᠥᠳᠡᠯᠮᠦᠷᠢ ᠬᠢᠵᠦ ᠪᠠᠢ ᠭᠡᠵᠦ ᠵᠠᠬᠢᠭᠰᠠᠨ ᠶᠤᠮ 》 ᠭᠡᠪᠡ ᠃ ᠤᠷᠠᠨᠯᠮᠡ ᠄
《 ᠠ ᠲᠡᠶ᠋ᠢᠮᠦ ᠦᠦ? ᠬᠥᠭᠡᠷᠦᠬᠦᠢ ᠰᠠᠢᠨ ᠬᠦᠦ ᠪᠠᠶ᠋ᠢᠨᠠ ᠂ ᠲᠡᠭᠡᠪᠡᠯ ᠴᠢ ᠲᠡᠷᠡ ᠬᠠᠷᠠ ᠬᠠᠯᠵᠠᠨ ᠢ᠋ᠶ᠋ᠠᠨ ᠲᠠᠯᠪᠢᠴᠢᠬᠠ ᠳᠠ 》 ᠭᠡᠯᠡ ᠃
《 ᠳᠠᠷᠠᠭᠠᠯᠠᠪᠠᠯ ᠠᠯᠢ ᠨᠢ ᠪᠣᠢ? 》
《 ᠤᠯᠠᠭᠠᠨ ᠪᠥᠭᠡᠷᠡ ᠠᠯᠠᠭ ᠢ᠋ᠶ᠋ᠠᠨ ᠃ 》
《 ᠲᠡᠭᠦᠨ ᠦ᠌ ᠳᠠᠷᠠᠭᠠ ᠨᠢ? 》
《 ᠱᠠᠭᠠᠵᠠᠭᠠᠢ ᠠᠯᠠᠭ ᠢ᠋ᠶ᠋ᠠᠨ ᠃ 》
《 ᠳᠠᠷᠠᠭᠠ ᠨᠢ? 》
《 ᠲᠣᠶ᠋ᠢᠮᠣᠭ ᠤ᠋ᠨ ᠲᠤᠭᠤᠯ ᠊ᠢ ᠃ 》
《 ᠣᠳᠣ ᠪᠢ ᠬᠠᠷᠠ ᠲᠤᠭᠤᠯ ᠢ᠋ᠶ᠋ᠠᠨ ᠲᠠᠯᠪᠢᠬᠤ ᠤᠤ? 》
《 ᠲᠡᠭᠡ ᠳᠡ ᠂ ᠬᠦᠦ ᠮᠢᠨᠢ ᠂ ᠬᠠᠷᠠ ᠲᠤᠭᠤᠯ ᠴᠢᠨᠢ ᠥᠭᠡᠳᠡᠩ ᠰᠢᠭ ᠪᠠᠶ᠋ᠢᠨᠠ ᠰᠢᠦ ᠃ 》
《 ᠣᠳᠣ ᠠᠪᠤ ᠶ᠋ᠢᠨ ᠰᠢᠷᠠ ᠲᠠᠷᠯᠠᠨ ᠊ᠢ ᠲᠠᠯᠪᠢᠬᠤ ᠤᠤ? 》
《 ᠲᠡᠭᠡ ᠠ᠋ ᠂ ᠬᠦᠦ ᠮᠢᠨᠢ ᠂ ᠲᠡᠷᠡ ᠴᠢᠨᠢ ᠪᠠᠬᠠᠨ ᠣᠷᠣᠭᠠ ᠶᠤᠮ ᠰᠢᠦ ᠂ ᠬᠢᠴᠢᠶᠡᠭᠡᠷᠡᠢ! 》
《 ᠵᠦᠭᠡᠷ ᠠ᠋ ᠂ ᠡᠵᠢ ᠠ᠋ ᠂ ᠡᠨᠡ ᠲᠤᠭᠤᠯ ᠬᠦᠵᠦᠭᠦᠦ ᠪᠡᠨ ᠮᠠᠭᠠᠵᠢᠭᠤᠯᠬᠤ ᠳᠤᠷᠠᠲᠠᠢ ᠶᠤᠮ ᠃ ᠬᠦᠷᠡᠩ ᠭᠤᠨᠵᠢᠨ ᠤ᠋ ᠬᠦᠷᠡᠩ ᠲᠤᠭᠤᠯ ᠊ᠢ ᠶᠠᠭᠠᠬᠢᠨᠠ ᠪᠣᠢ? 》
《 ᠡᠬᠡ ᠳ᠋ᠦ᠍ ᠨᠢ ᠲᠠᠯᠪᠢᠭᠠᠳ ᠥᠭᠴᠢᠭᠡ ᠃ ᠭᠤᠨᠵᠢᠨ ᠦᠨᠢᠶᠡ ᠰᠦ ᠪᠠᠭᠠᠲᠠᠢ ᠪᠠᠶ᠋ᠢᠲᠠᠭ ᠶᠤᠮ ᠃ ᠲᠤᠭᠤᠯ ᠨᠢ ᠰᠠᠢᠨ ᠴᠠᠳᠤᠭ ᠠ᠋ ᠃ 》
《 ᠡᠵᠢ ᠶ᠋ᠢᠨ ᠰᠠᠷᠠᠲᠤ ᠤᠯᠠᠭᠠᠨ ᠲᠤᠭᠤᠯ ᠲᠡᠯᠡᠦᠯᠦᠭᠡᠳ ᠯᠡ ᠪᠠᠶ᠋ᠢᠨᠠ ᠃ 》
《 ᠲᠡᠭᠡᠯᠭᠦᠢ ᠳᠡ ᠂ ᠲᠤᠭᠤᠯ ᠦ᠋ᠳ ᠪᠦᠷ ᠡᠬᠡ ᠪᠡᠨ ᠬᠥᠬᠥᠵᠦ ᠪᠠᠶ᠋ᠢᠬᠤ ᠶᠤᠮ ᠴᠢᠨᠢ ᠲᠡᠷᠡ ᠪᠠᠰᠠ ᠠᠲᠠᠭᠠᠷᠬᠠᠬᠤ ᠦᠭᠡᠢ ᠶᠠᠭᠠᠬᠢᠨᠠ ᠪᠣᠢ!》
《 ᠤᠷᠵᠢ ᠡᠳᠦᠷ ᠦ᠋ᠨ ᠲᠤᠭᠤᠯᠯᠠᠭᠰᠠᠨ ᠬᠠᠷᠠ ᠪᠥᠭᠡᠷᠡ ᠠᠯᠠᠭ ᠤ᠋ᠨ ᠪᠣᠭᠣᠨ ᠴᠣᠬᠣᠷ ᠲᠤᠭᠤᠯ ᠊ᠢ ᠲᠠᠯᠪᠢᠭᠠᠳ ᠥᠭᠴᠢᠭᠡᠬᠦ ᠤᠤ! ᠡᠵᠢ ᠠ᠋? 》 ᠭᠡᠵᠦ ᠰᠡᠴᠡᠨᠬᠦᠦ ᠬᠡᠯᠡᠬᠦ ᠳ᠋ᠦ᠍ ᠤᠷᠠᠯᠠᠮᠠ ᠄
《 ᠪᠢᠲᠡᠭᠡᠢ ᠳᠡᠯᠪᠢ ᠬᠦᠦ ᠮᠢᠨᠢ ᠂ ᠰᠢᠷᠠ ᠤᠭᠤᠷᠠᠭ ᠲᠠᠭᠠᠨ ᠬᠡᠲᠦᠷᠬᠡᠢ ᠴᠠᠳᠪᠠᠯ ᠬᠦᠷᠦᠪᠵᠢᠬᠦ ᠨᠢ ᠤᠳᠠᠭᠠᠨ ᠪᠣᠯᠳᠠᠭ ᠶᠤᠮ ᠃ ᠰᠢᠷᠠ ᠤᠭᠤᠷᠠᠭ ᠊ᠢ ᠨᠢ ᠰᠢᠪᠬᠠᠷᠲᠠᠯᠠ ᠰᠠᠭᠠᠭᠠᠳ ᠰᠦᠵᠢᠭᠰᠡᠨ ᠬᠣᠶ᠋ᠢᠨᠠ ᠴᠠᠳᠲᠠᠯᠠ ᠭᠥᠭᠦᠭᠦᠯᠦᠶᠡ ᠳᠡ! 》 ᠭᠡᠨᠡ ᠃
ᠨᠠᠷᠠ ᠰᠢᠷᠭᠠᠯᠳᠠᠨ ᠮᠠᠨᠳᠤᠬᠤ ᠳ᠋ᠤ᠌ ᠂ ᠵᠡᠯᠡ ᠳᠡᠭᠡᠷᠡ ᠰᠠᠭᠤᠯᠠᠭᠠ ᠰᠠᠭᠤᠯᠠᠭᠠ ᠪᠠᠷ ᠰᠦ ᠮᠡᠯᠮᠡᠯᠵᠡᠨ ᠂ ᠡᠵᠢ ᠬᠦᠦ ᠬᠣᠶᠠᠷ ᠭᠠᠩᠭᠠᠷ ᠭᠣᠩᠭᠣᠷ ᠶᠠᠷᠢᠯᠴᠠᠨᠠ ᠃
ᠡᠵᠢ ᠨᠢ ᠭᠡᠵᠦ ᠰᠠᠭᠠᠯᠢ ᠰᠦᠨ ᠳ᠋ᠡᠭᠡᠨ ᠴᠠᠭᠠᠷᠠᠭᠰᠠᠨ ᠰᠠᠷᠠᠭᠤᠯ ᠲᠠᠯᠠ ᠶ᠋ᠢᠨ ᠰᠠᠯᠮᠠᠭᠠᠢ ᠮᠠᠯᠴᠢᠨ ᠃
ᠬᠦᠦ ᠨᠢ ᠭᠡᠵᠦ ᠳᠣᠯᠣᠭᠠᠨ ᠨᠠᠰᠤᠲᠠᠢ ᠪᠣᠯᠪᠠᠴᠤ ᠦᠨᠢᠶᠡ ᠲᠤᠭᠤᠯ ᠢ᠋ᠶ᠋ᠠᠨ ᠠᠨᠳᠠᠳᠠᠭ ᠦᠭᠡᠢ ᠲᠠᠯᠠ ᠶ᠋ᠢᠨ ᠮᠣᠩᠭᠣᠯ ᠤ᠋ᠨ ᠠᠵᠢᠯᠰᠠᠭ ᠬᠦᠦ ᠪᠢᠯᠡ ᠃
ᠠᠯᠤᠰ ᠵᠡᠷᠭᠡᠯᠡᠳᠡᠭᠡ ᠠᠶ᠋ᠢᠯ ᠤ᠋ᠨ ᠠᠷᠭᠠᠯ ᠤ᠋ᠨ ᠤᠲᠤᠭᠠ ᠠᠰ ᠳᠡᠭᠡᠭᠰᠢ ᠰᠤᠪᠤᠷᠠᠬᠤ ᠳ᠋ᠤ᠌ ᠡᠵᠢ ᠬᠦᠦ ᠬᠣᠶᠠᠷ ᠦᠨᠢᠶᠡ ᠪᠡᠨ ᠪᠡᠯᠴᠢᠭᠡᠷ ᠤᠷᠤᠭᠤ ᠵᠠᠯᠠᠵᠤ ᠂ ᠲᠤᠭᠤᠯ ᠢ᠋ᠶ᠋ᠠᠨ ᠨᠤᠭᠤ ᠶ᠋ᠢᠨ ᠵᠥᠭᠡᠯᠡᠨ ᠨᠣᠭᠣᠭᠠ ᠤᠷᠤᠭᠤ ᠬᠥᠭᠡᠭᠡᠯᠡ ᠃
ᠲᠤᠭᠤᠯ ᠢ᠋ᠶ᠋ᠠᠨ ᠴᠠᠳᠬᠠᠵᠤ ᠰᠦ ᠪᠡᠨ ᠰᠠᠭᠠᠯᠭᠠᠭᠰᠠᠨ ᠦᠨᠢᠶᠡᠳ ᠠᠭᠠᠵᠢᠮ ᠢ᠋ᠶ᠋ᠠᠷ ᠪᠡᠯᠴᠢᠭᠡᠷ ᠲᠡᠭᠡᠨ ᠭᠠᠷᠪᠠ ᠃
ᠴᠠᠳᠲᠠᠯᠠ ᠬᠥᠬᠥᠭᠡᠳ ᠬᠠᠨᠲᠠᠯᠠ ᠪᠠᠨ ᠦᠯᠭᠡᠬ᠋ᠰᠡᠨ ᠲᠤᠭᠤᠯ ᠦ᠋ᠳ ᠵᠥᠭᠡᠯᠡᠨ ᠨᠣᠭᠣᠭᠠ ᠶ᠋ᠢ ᠳᠤᠷᠠ ᠲᠠᠢ ᠳᠤᠷᠠ ᠦᠭᠡᠢ ᠬᠡᠯᠡ ᠪᠡᠷ ᠢ᠋ᠶ᠋ᠡᠨ ᠣᠷᠢᠶᠠᠵᠤ ᠲᠠᠰᠤᠯᠤᠭᠠᠳ ᠨᠢᠭᠡ ᠨᠢᠭᠡ ᠪᠡᠨ ᠳᠠᠭᠠᠵᠤ ᠠᠯᠢᠶᠠᠷᠬᠠᠨ ᠲᠣᠭᠯᠠᠯᠳᠤᠨᠠ ᠃
ᠬᠦᠦ ᠨᠢ ᠥᠷᠯᠥᠭᠡ ᠶ᠋ᠢᠨ ᠴᠠᠢ ᠪᠠᠨ ᠤᠤᠭᠤᠭᠠᠳ ᠥᠴᠥᠭᠡᠳᠦᠷ ᠦ᠋ᠨ ᠵᠢᠭᠠᠯᠭᠠᠭᠰᠠᠨ ᠬᠢᠴᠢᠶᠡᠯ ᠢ᠋ᠶ᠋ᠡᠨ ᠲᠣᠷᠴᠢᠭᠢᠨᠠᠲᠠᠯᠠ ᠤᠩᠰᠢᠬᠤ ᠳ᠋ᠤ᠌ ᠡᠵᠢ ᠨᠢ ᠴᠢᠷᠠᠢ ᠳ᠋ᠠᠭᠠᠨ ᠪᠠᠶᠠᠷ ᠤ᠋ᠨ ᠣᠴᠢ ᠭᠢᠯᠠᠯᠵᠠᠭᠤᠯᠵᠤ ᠵᠤᠤᠮᠠᠯᠵᠠᠨ ᠢᠨᠢᠶᠡᠨᠡ ᠃
ᠬᠦᠦ ᠬᠥᠬᠡ ᠲᠣᠷᠭᠠᠨ ᠲᠡᠷᠯᠢᠭ ᠢ᠋ᠶ᠋ᠡᠨ ᠳᠡᠭᠳᠡᠢᠳᠡᠯᠡ ᠪᠦᠰᠡᠯᠡᠵᠦ ᠂ ᠨᠣᠪ ᠨᠣᠭᠣᠭᠠᠨ ᠪᠣᠭᠴᠣ ᠪᠠᠨ ᠲᠢᠪ ᠲᠡᠭᠰᠢᠬᠡᠨ ᠡᠭᠦᠷᠦᠭᠡᠳ ᠄
《 ᠡᠵᠢ ᠠ᠋ ᠪᠠᠶᠠᠷᠲᠠᠢ ᠂ ᠪᠢ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠶᠠᠪᠤᠯᠠ 》 ᠭᠡᠯᠡ ᠃
《 ᠮᠢᠨᠦ ᠬᠦᠦ ᠵᠠᠮ ᠳ᠋ᠤ᠌ ᠪᠠᠨ ᠪᠢᠲᠡᠭᠡᠢ ᠨᠠᠭᠠᠳ ᠂ ᠬᠤᠷᠳᠤᠨ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠪᠠᠨ ᠣᠴᠢᠭᠠᠷᠠᠢ! 》
《 ᠦᠳᠡ ᠳ᠋ᠦ᠍ ᠵᠥᠭᠡᠬᠡᠢ ᠲᠡᠢ ᠠᠭᠠᠷᠴᠠ ᠵᠢᠭᠤᠷᠠᠵᠤ ᠢᠳᠡᠶᠡ ᠂ ᠡᠵᠢ ᠠ᠋ ᠃ 》
《ᠲᠡᠭᠡ ᠬᠦᠦ ᠮᠢᠨᠢ ᠂ ᠲᠡᠭᠡ! ᠡᠵᠢ ᠨᠢ ᠬᠤᠷᠤᠳ ᠬᠢᠵᠦ ᠪᠢᠰᠢᠯᠠᠭ ᠳᠠᠷᠤᠭᠠᠳ ᠂ ᠲᠣᠭᠣᠭᠠ ᠨᠡᠷᠡᠵᠦ ᠠᠭᠠᠷᠴᠠ ᠱᠦᠭᠦᠭᠳ ᠪᠠᠶ᠋ᠢᠶᠠ ᠃ 》 ᠲᠡᠷᠲᠡᠭᠡ ᠬᠣᠯᠠ ᠬᠠᠷᠠᠭᠠᠨ ᠤ᠋ ᠦᠵᠦᠭᠦᠷ ᠲᠦ᠍ ᠬᠠᠷᠠᠭᠳᠠᠬᠤ ᠰᠤᠷᠭᠠᠭᠤᠯᠢ ᠳ᠋ᠠᠭᠠᠨ ᠰᠡᠴᠡᠨᠬᠦᠦ ᠬᠠᠨᠢᠲᠠᠨ ᠲᠠᠢ ᠪᠠᠨ ᠬᠠᠮᠲᠤ ᠶᠠᠪᠤᠪᠠ ᠃
ᠲᠠᠯᠠ ᠶ᠋ᠢᠨ ᠮᠠᠯᠴᠢᠨ ᠤ᠋ ᠥᠷᠯᠥᠭᠡ ᠡᠶ᠋ᠢᠮᠦ ᠯᠡ ᠪᠠᠶ᠋ᠢᠲᠠᠭ ᠰᠠᠨ ᠪᠢᠯᠡ ᠃
ᠥᠷᠯᠥᠭᠡ᠂ ᠲᠤᠩᠭᠠᠯᠠᠭ ᠰᠠᠢᠬᠠᠨ ᠥᠷᠯᠥᠭᠡ ᠃
ᠥᠷᠯᠥᠭᠡ ᠂ ᠡᠳᠦᠷ ᠦ᠋ᠨ ᠠᠵᠢᠯ ᠤ᠋ᠨ ᠡᠬᠢᠯᠡᠯ ᠃
ᠠᠯᠪᠠᠨ ᠵᠢᠷᠤᠮ ᠤ᠋ᠨ ᠲᠠᠪᠤᠨ ᠵᠢᠯ ᠦ᠋ᠨ ᠳᠦᠷᠢᠮᠲᠦ ᠪᠠᠭᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠦᠵᠡᠬᠦ
ᠬᠡᠯᠡ ᠪᠢᠴᠢᠭ ᠶᠢᠰᠦᠳᠦᠭᠡᠷ ᠳᠡᠪᠲᠡᠷ
*
ᠥᠪᠥᠷ ᠮᠤᠩᠭ᠋ᠤᠯ ᠤ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ ᠨᠠᠶ᠋ᠢᠷᠠᠭᠤᠯᠤᠨ ᠬᠡᠪᠯᠡᠪᠡ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠢᠨᠬᠤᠸᠠ ᠨᠣᠮ ᠤ᠋ᠨ ᠳᠡᠯᠭᠡᠭᠦᠷ ᠲᠠᠷᠬᠠᠪᠠ
ᠤᠯᠠᠭᠠᠨᠬᠠᠳᠠ ᠶ᠋ᠢᠨ ᠭᠤᠷᠪᠠᠳᠤᠭᠠᠷ ᠬᠡᠪᠯᠡᠬᠦ ᠦᠢᠯᠡᠳᠪᠦᠷᠢ ᠬᠡᠪᠯᠡᠪᠡ
1991 ᠣᠨ ᠤ᠋ ᠭᠤᠷᠪᠠᠨ ᠰᠠᠷᠠ ᠳ᠋ᠤ᠌ ᠠᠩᠬᠠᠳᠤᠭᠠᠷ ᠬᠡᠪ ᠊ᠢ ᠬᠢᠪᠡ
1996 ᠣᠨ ᠤ᠋ ᠳᠥᠷᠪᠡᠨ ᠰᠠᠷᠠ ᠳ᠋ᠤ᠌ ᠵᠢᠷᠭᠤᠭᠠᠳᠤᠭᠠᠷ ᠤᠳᠠᠭᠠ ᠬᠡᠪᠯᠡᠪᠡ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠲᠣᠲᠣᠭᠡᠷᠡᠯ
ᠬᠢᠨᠠᠭᠴᠢ ᠄ ᠣᠤᠠᠬᠠᠨᠰᠣᠡ