ᠴᠦᠳᠡᠩ ᠬᠤᠲᠠᠯᠲᠤᠭᠴᠢ ᠦᠬᠢᠨ-ᠠᠨᠳᠧᠷᠰᠸᠨ Чүдэнз худалдагч охин-Андерсен
491ᠴᠦᠳᠡᠩ ᠬᠤᠲᠠᠯᠲᠤᠭᠴᠢ ᠦᠬᠢᠨ
ᠠᠨᠳᠧᠷᠰᠸᠨ
ᠲᠩᠷᠢ ᠮᠠᠰᠢ ᠬᠦᠢᠲᠡᠨ ᠪᠠᠶ᠋ᠢᠪᠠ ᠃ ᠴᠠᠰᠤ ᠣᠷᠣᠭᠰᠠᠭᠠᠷ ᠂ ᠬᠠᠷᠠ ᠪᠦᠷᠦᠢ ᠪᠣᠯᠪᠠ ᠃ ᠡᠨᠡ ᠰᠥᠨᠢ ᠪᠣᠯ ᠨᠢᠭᠡ ᠵᠢᠯ ᠦ᠋ᠨ ᠬᠠᠮᠤᠭ ᠡᠴᠦᠰ ᠦ᠋ᠨ ᠰᠥᠨᠢ –– ᠪᠢᠲᠡᠭᠦᠨ ᠦ᠌ ᠰᠥᠨᠢ ᠪᠢᠯᠡ ᠃ ᠡᠨᠡ ᠬᠦᠢᠲᠡᠨ ᠬᠠᠷᠠᠩᠭᠤᠢ ᠰᠥᠨᠢ ᠂ ᠬᠥᠯ ᠲᠣᠯᠣᠭᠠᠢ ᠨᠢᠴᠦᠭᠦᠨ ᠨᠢᠭᠡᠨ ᠪᠢᠴᠢᠬᠠᠨ ᠥᠬᠢᠨ ᠵᠡᠭᠡᠯᠢ ᠳᠡᠭᠡᠷᠡ ᠶᠠᠪᠤᠵᠤ ᠪᠠᠶ᠋ᠢᠪᠠ ᠃ ᠲᠡᠷᠡ ᠭᠡᠷ ᠡᠴᠡ ᠪᠡᠨ ᠴᠢᠷᠭᠡᠦᠯ ᠱᠠᠬᠠᠢ ᠲᠠᠢ ᠭᠠᠷᠤᠭᠰᠠᠨ ᠶᠤᠮ ᠪᠠᠶ᠋ᠢᠵᠠᠢ ᠃ ᠭᠡᠪᠡᠴᠦ ᠲᠡᠷᠡ ᠨᠢ ᠶᠠᠮᠠᠷ ᠲᠤᠰᠠ ᠪᠣᠯᠬᠤ ᠪᠣᠢ? ᠡᠵᠢ ᠶ᠋ᠢᠨ ᠬᠢᠨᠢ ᠡᠮᠦᠰᠴᠦ ᠪᠠᠶ᠋ᠢᠬᠰᠠᠨ ᠲᠣᠮᠣ ᠱᠠᠬᠠᠢ ᠶᠤᠮ ᠪᠠᠶ᠋ᠢᠨᠠ ᠃ ᠥᠬᠢᠨ ᠴᠠᠷᠳᠠᠮᠠᠯ ᠵᠠᠮ ᠣᠭᠲᠣᠯᠬᠤ ᠦᠶᠡ ᠳ᠋ᠦ᠍ ᠬᠣᠶᠠᠷ ᠮᠣᠷᠢᠨ ᠲᠡᠷᠭᠡ ᠨᠢᠰᠬᠦ ᠮᠡᠲᠦ ᠳᠠᠪᠬᠢᠨ ᠢᠷᠡᠬᠦᠯᠡᠷ ᠰᠠᠨᠳᠤᠷᠤᠨ ᠳᠤᠲᠠᠭᠠᠨ ᠵᠠᠶ᠋ᠢᠯᠠᠬᠤ ᠳ᠋ᠤ᠌ ᠬᠣᠶᠠᠷ ᠱᠠᠬᠠᠢ ᠨᠢ ᠰᠤᠭᠤᠷᠠᠨ ᠦᠰᠦᠷᠪᠡ ᠃ ᠨᠢᠭᠡ ᠨᠢ ᠡᠷᠢᠭᠡᠳ ᠣᠯᠳᠠᠭᠰᠠᠨ ᠦᠭᠡᠢ ᠃ ᠨᠥᠭᠥᠭᠡ ᠶ᠋ᠢ ᠨᠢ ᠨᠢᠭᠡ ᠬᠦᠦ ᠣᠯᠵᠤ ᠠᠪᠤᠭᠠᠳ ᠳᠤᠲᠠᠭᠠᠪᠠ ᠃ ᠲᠡᠷᠡ ᠬᠣᠵᠢᠮ ᠬᠡᠦᠬᠡᠳ ᠲᠡᠢ ᠪᠣᠯᠪᠠᠯ ᠥᠯᠥᠭᠡᠢ ᠬᠢᠬᠦ ᠶᠦ᠍ᠮ ᠭᠡᠨᠡ ᠃
ᠣᠳᠣ ᠡᠨᠡ ᠥᠬᠢᠨ ᠬᠥᠯ ᠨᠢᠴᠦᠭᠦᠨ ᠶᠠᠪᠤᠬᠤ ᠯᠠ ᠬᠡᠷᠡᠭᠲᠡᠢ ᠪᠣᠯᠪᠠ ᠃ ᠪᠡᠭᠡᠷᠡᠭᠡᠳ ᠪᠢᠴᠢᠬᠠᠨ ᠬᠥᠯ ᠨᠢ ᠬᠥᠬᠡᠷᠡᠵᠡᠢ ᠃ ᠬᠠᠭᠤᠴᠢᠨ ᠪᠠᠩᠵᠠᠯ ᠤ᠋ᠨ ᠬᠢᠨᠢ ᠬᠠᠷᠮᠠᠨ ᠳ᠋ᠤ᠌ ᠠᠷᠪᠢᠨ ᠴᠦᠳᠡᠩ ᠪᠠᠶ᠋ᠢᠬᠰᠠᠨ ᠪᠥᠭᠡᠳ ᠭᠠᠷ ᠲᠠᠭᠠᠨ ᠪᠠᠰᠠ ᠨᠢᠭᠡ ᠪᠠᠭᠴᠠ ᠠᠳᠬᠤᠵᠤ ᠪᠠᠶ᠋ᠢᠪᠠ ᠃ ᠪᠦᠬᠦᠯᠢ ᠡᠳᠦᠷ ᠲᠡᠷᠡ ᠨᠢᠭᠡ ᠲᠣᠯᠣᠭᠠᠢ ᠴᠦᠳᠡᠩ ᠴᠦ᠍ ᠬᠤᠳᠠᠯᠳᠤᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠂ ᠨᠢᠭᠡ ᠮᠥᠩᠭᠥ ᠴᠦ᠍ ᠣᠯᠤᠭᠰᠠᠨ ᠦᠭᠡᠢ ᠃
ᠬᠥᠭᠡᠷᠦᠬᠦᠢ ! ᠲᠡᠷᠡ ᠥᠬᠢᠨ ᠲᠤᠩ ᠶᠡᠬᠡ ᠲᠠᠭᠠᠷᠠᠵᠤ ᠲᠤᠩ ᠶᠡᠬᠡ ᠥᠯᠥᠰᠴᠡᠢ ᠃ ᠲᠡᠷᠡ ᠵᠡᠭᠡᠯᠢ ᠪᠡᠷ ᠪᠠᠭᠲᠠᠴᠠᠨ ᠴᠡᠴᠡᠷᠡᠵᠦ ᠠᠯᠬᠤᠵᠤ ᠶᠠᠪᠤᠬᠤ ᠨᠢ ᠠᠶ᠋ᠢᠬᠤᠪᠲᠤᠷ ᠶᠡᠬᠡ ᠭᠤᠨᠢᠭᠲᠠᠢ ᠬᠠᠷᠠᠭᠳᠠᠨᠠ ᠃ ᠴᠠᠰᠤᠨ ᠯᠠᠪᠰᠠ ᠠᠯᠲᠠᠨ ᠰᠢᠷᠠ ᠭᠡᠵᠢᠭᠡᠨ ᠳᠡᠭᠡᠷᠡ ᠨᠢ ᠪᠠᠭᠤᠵᠤ ᠪᠠᠶ᠋ᠢᠯᠠ ᠃ ᠪᠤᠷᠵᠢᠭᠠᠷ ᠭᠡᠵᠢᠭᠡ ᠨᠢ ᠮᠥᠷᠥ ᠤᠷᠤᠭᠤ ᠨᠢ ᠪᠠᠭᠤᠭᠠᠳ ᠲᠤᠶ᠋ᠢᠯ ᠤ᠋ᠨ ᠭᠣᠶᠣ ᠬᠠᠷᠠᠭᠳᠠᠨᠠ ᠃ ᠭᠡᠪᠡᠴᠦ ᠬᠥᠭᠡᠷᠦᠬᠦᠢ ᠥᠬᠢᠨ ᠡᠨᠡ ᠪᠦᠬᠦᠨ ᠊ᠢ ᠠᠩᠬᠠᠷᠤᠯ ᠦᠭᠡᠢ ᠶᠠᠪᠤᠨᠠ ᠃ ᠴᠣᠩᠬᠣ ᠪᠦᠷᠢ ᠡᠴᠡ ᠳ᠋ᠧᠩ ᠦ᠋ᠨ ᠭᠡᠷᠡᠯ ᠲᠤᠶᠠᠭᠠᠷᠠᠨ ᠬᠡᠷᠡᠯᠳᠦᠵᠦ ᠵᠡᠭᠡᠯᠢ ᠪᠡᠷ ᠰᠢᠷᠠᠭᠰᠠᠨ ᠭᠠᠯᠠᠭᠤᠨ ᠮᠢᠬᠠᠨ ᠤ᠋ ᠰᠠᠢᠬᠠᠨ ᠦᠨᠦᠷ ᠬᠠᠩᠬᠤᠯᠤᠨᠠ ᠃ ᠤᠴᠢᠷ ᠨᠢ ᠡᠨᠡ ᠰᠥᠨᠢ ᠪᠣᠯ ᠪᠢᠲᠡᠭᠦᠨ ᠦ᠌ ᠰᠥᠨᠢ ᠪᠠᠶ᠋ᠢᠯᠠ ᠂ ᠥᠬᠢᠨ ᠡᠭᠦᠨ ᠊ᠢ ᠬᠡᠷᠬᠢᠨ ᠮᠠᠷᠲᠠᠬᠤ ᠪᠢᠯᠡ ᠃ ᠥᠬᠢᠨ ᠨᠢᠭᠡᠨ ᠪᠠᠶ᠋ᠢᠰᠢᠩ ᠤ᠋ᠨ ᠪᠤᠯᠤᠩ ᠳ᠋ᠤ᠌ ᠬᠥᠯ ᠢ᠋ᠶ᠋ᠡᠨ ᠬᠤᠮᠢᠵᠤ ᠠᠲᠤᠷᠢᠨ ᠰᠠᠭᠤᠬᠤ ᠳ᠋ᠤ᠌ ᠬᠠᠷᠢᠨ ᠤᠯᠠᠮ ᠲᠠᠭᠠᠷᠠᠬᠤ ᠰᠢᠭ᠋ ᠪᠣᠯᠪᠠ ᠃ ᠭᠡᠪᠡᠴᠦ ᠲᠡᠷᠡ ᠭᠡᠷ ᠲᠡᠭᠡᠨ ᠬᠠᠷᠢᠬᠤ ᠠ᠋ᠴᠠ ᠠᠶᠤᠨᠠ ᠃ ᠤᠴᠢᠷ ᠨᠢ ᠨᠢᠭᠡ ᠲᠣᠯᠣᠭᠠᠢ ᠴᠦᠳᠡᠩ ᠴᠦ᠍ ᠬᠤᠳᠠᠯᠳᠤᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠂ ᠨᠢᠭᠡ ᠮᠥᠩᠭᠥ ᠴᠦ᠍ ᠣᠯᠤᠭᠰᠠᠨ ᠦᠭᠡᠢ ᠲᠤᠯᠠ ᠠᠪᠤ ᠨᠢ ᠲᠡᠭᠦᠨ ᠊ᠢ ᠯᠠᠪ ᠵᠣᠳᠣᠬᠤ ᠶᠤᠮ ᠃ ᠲᠡᠷᠡ ᠮᠥᠷᠲᠡᠭᠡᠨ ᠲᠡᠭᠦᠨ ᠦ᠌ ᠭᠡᠷ ᠨᠢ ᠴᠦ᠍ ᠵᠡᠭᠡᠯᠢ ᠲᠡᠢ ᠠᠳᠠᠯᠢ ᠬᠦᠢᠲᠡᠨ ᠶᠦ᠍ᠮ ᠃ ᠲᠡᠳᠡ ᠵᠥᠪᠬᠡᠨ ᠨᠢᠭᠡᠨ ᠪᠠᠶ᠋ᠢᠰᠢᠩ ᠤ᠋ᠨ ᠳᠡᠭᠡᠪᠦᠷ ᠳᠣᠣᠷᠠ ᠣᠷᠣᠩᠨᠠᠳᠠᠭ ᠪᠥᠭᠡᠳ ᠲᠡᠭᠦᠨ ᠦ᠌ ᠪᠡᠨ ᠲᠣᠮᠣ ᠲᠣᠮᠣ ᠨᠦᠬᠡ ᠨᠤᠭᠦᠳ ᠊ᠢ ᠡᠪᠡᠰᠦ ᠂ ᠮᠠᠭᠤ ᠪᠥᠰ ᠢ᠋ᠶ᠋ᠡᠷ ᠪᠥᠭᠯᠡᠨ ᠳᠤᠯᠠᠭᠠᠯᠠᠭᠰᠠᠨ ᠪᠣᠯᠪᠠᠴᠤ ᠰᠠᠯᠬᠢᠨ ᠮᠥᠨ ᠯᠡ ᠨᠡᠪᠲᠡ ᠦᠯᠢᠶᠡᠳᠡᠭ ᠪᠠᠶ᠋ᠢᠨᠠ ᠃
ᠥᠬᠢᠨ ᠦ᠌ ᠪᠢᠴᠢᠬᠠᠨ ᠬᠣᠶᠠᠷ ᠭᠠᠷ ᠨᠢ ᠪᠡᠭᠡᠷᠡᠭᠡᠳ ᠪᠠᠷᠤᠭ ᠮᠡᠳᠡᠭᠡ ᠦᠭᠡᠢ ᠪᠣᠯᠵᠠᠢ ᠃ ᠠ ! ᠭᠠᠭᠴᠠ ᠲᠣᠯᠣᠭᠠᠢ ᠴᠦᠳᠡᠩ ᠴᠦ᠍ ᠶᠠᠭᠠᠮᠠᠢ ᠂ ᠲᠡᠭᠦᠨ ᠳ᠋ᠦ᠍ ᠲᠤᠰᠠ ᠪᠣᠯᠬᠤ ᠪᠠᠶ᠋ᠢᠬᠤ ! ᠡᠨᠡ ᠥᠬᠢᠨ ᠵᠢᠷᠦᠬᠡ ᠭᠠᠷᠭᠠᠵᠤ ᠨᠢᠭᠡ ᠲᠣᠯᠣᠭᠠᠢ ᠴᠦᠳᠡᠩ ᠰᠤᠭᠤᠯᠵᠤ ᠠᠪᠤᠭᠠᠳ ᠬᠡᠷᠡᠮ ᠳ᠋ᠦ᠍ ᠵᠤᠷᠠᠭᠠᠳ ᠨᠣᠴᠣᠭᠠᠪᠠᠯ ᠭᠠᠷ ᠢ᠋ᠶ᠋ᠠᠨ ᠳᠤᠯᠠᠭᠠᠴᠠᠭᠤᠯᠵᠤ ᠴᠢᠳᠠᠬᠤ ᠪᠣᠯᠪᠠ ᠤᠤ ? ᠭᠡᠵᠦ ᠪᠣᠳᠣᠪᠠ ᠃ ᠲᠡᠭᠡᠭᠡᠳ ᠨᠢᠭᠡ ᠶ᠋ᠢ ᠰᠤᠭᠤᠯᠵᠤ ᠱᠣᠷ ᠬᠢᠲᠡᠯᠡ ᠵᠤᠷᠠᠵᠤ ᠨᠣᠴᠣᠭᠠᠬᠤ ᠳ᠋ᠤ᠌ ᠳᠥᠯᠥ ᠪᠠᠳᠠᠷᠠᠪᠠ ! ᠶᠠᠭᠠᠬᠢᠭᠰᠠᠨ ᠬᠠᠯᠠᠭᠤᠨ ᠳᠤᠯᠠᠭᠠᠨ ᠂ ᠭᠡᠭᠡᠨ ᠰᠠᠷᠠᠭᠤᠯ ᠳᠥᠯᠥ ᠪᠣᠢ ᠂ ᠯᠠ ᠶ᠋ᠢᠨ ᠳᠥᠯᠥ ᠠᠳᠠᠯᠢ ᠪᠠᠶ᠋ᠢᠪᠠ ᠃ ᠲᠡᠷᠡ ᠪᠢᠲᠡᠭᠦᠯᠡᠨ ᠠᠪᠴᠤ ᠳᠤᠯᠠᠭᠠᠴᠠᠪᠠ ᠃ ᠡᠨᠡ ᠪᠣᠯ ᠨᠢᠭᠡᠨ ᠰᠣᠨᠢᠨ ᠵᠢᠭᠲᠡᠢ ᠭᠠᠯ ᠪᠠᠶ᠋ᠢᠯᠠ ! ᠲᠡᠷᠡ ᠥᠬᠢᠨ ᠳ᠋ᠦ᠍ ᠶᠠᠭ ᠯᠠ ᠭᠡᠷᠡᠯ ᠲᠠᠲᠠᠭᠰᠠᠨ ᠰᠢᠷᠠ ᠭᠠᠤᠯᠢᠨ ᠴᠢᠬᠢ ᠲᠡᠢ ᠂ ᠭᠠᠤᠯᠢᠨ ᠬᠥᠯ ᠲᠡᠢ ᠲᠣᠮᠣ ᠬᠢᠰᠠ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠰᠠᠭᠤᠭᠰᠠᠨ ᠮᠡᠲᠦ ᠰᠠᠨᠠᠭᠳᠠᠪᠠ ᠃ ᠬᠢᠰᠠ ᠳ᠋ᠤ᠌ ᠭᠠᠯ ᠳᠦᠷᠡᠯᠵᠡᠨ ᠬᠠᠪᠤᠲᠠᠢ ᠳᠤᠯᠠᠭᠠᠨ ᠪᠣᠯᠪᠠ ᠃ ᠭᠡᠪᠡᠴᠦ ᠶᠠᠮᠠᠷ ᠤᠴᠢᠷ ᠠ᠋ᠴᠠ ᠶᠤᠮ ᠪᠤᠤ ᠮᠡᠳᠡ ᠂ ᠥᠬᠢᠨ ᠬᠥᠯ ᠢ᠋ᠶ᠋ᠡᠨ ᠵᠢᠭᠢᠨ ᠡᠭᠡᠭᠡᠬᠦ ᠭᠡᠲᠡᠯᠡ ᠴᠦᠳᠡᠩ ᠤᠨᠲᠠᠷᠠᠭᠠᠳ ᠬᠢᠰᠠ ᠨᠢ ᠴᠦ᠍ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠵᠠᠢ ᠃ ᠥᠬᠢᠨ ᠤᠨᠲᠠᠷᠠᠭᠰᠠᠨ ᠴᠦᠳᠡᠩ ᠦ᠋ᠨ ᠡᠰᠢ ᠶ᠋ᠢ ᠪᠠᠷᠢᠭᠠᠳ ᠲᠡᠨᠳᠡ ᠪᠡᠨ ᠰᠠᠭᠤᠭᠰᠠᠭᠠᠷ ᠪᠠᠶ᠋ᠢᠯᠠ ᠃
ᠲᠡᠷᠡ ᠪᠠᠰᠠ ᠨᠢᠭᠡ ᠶ᠋ᠢ ᠵᠤᠷᠠᠪᠠ ᠃ ᠴᠦᠳᠡᠩ ᠨᠢ ᠨᠣᠴᠣᠵᠤ ᠭᠡᠷᠡᠯᠲᠦᠪᠡ ᠃ ᠭᠡᠷᠡᠯ ᠨᠢ ᠲᠤᠭᠤᠷᠭᠠᠨ ᠳᠡᠭᠡᠷᠡ ᠲᠤᠰᠤᠭᠰᠠᠨ ᠳ᠋ᠤ᠌ ᠲᠤᠭᠤᠷᠭᠠ ᠨᠢᠮᠭᠡᠨ ᠬᠬᠢᠪ ᠮᠡᠲᠦ ᠭᠡᠷᠡᠯ ᠲᠠᠲᠠᠭᠠᠳ ᠥᠬᠢᠨ ᠳ᠋ᠦ᠍ ᠭᠡᠷ ᠦ᠋ᠨ ᠳᠣᠲᠣᠷᠠᠬᠢ ᠨᠢ ᠬᠦᠷᠲᠡᠯᠡ ᠦᠵᠡᠭᠳᠡᠬᠦ ᠪᠣᠯᠪᠠ ᠃ ᠴᠠᠪ ᠴᠠᠭᠠᠨ ᠪᠦᠲᠡᠭᠡᠯᠭᠡ ᠲᠡᠢ ᠰᠢᠷᠡᠭᠡᠨ ᠳᠡᠭᠡᠷᠡ ᠨᠠᠷᠢᠨ ᠬᠢᠴᠡ ᠲᠡᠢ ᠰᠠᠢᠬᠠᠨ ᠠᠶᠠᠭᠠ ᠲᠠᠪᠠᠭ ᠦ᠋ᠳ ᠥᠷᠥᠵᠦ ᠂ ᠭᠡᠳᠡᠰᠦᠨ ᠳᠣᠲᠣᠷᠠ ᠨᠢ ᠠᠯᠮᠤᠷᠠᠳ ᠂ ᠭᠦᠢᠯᠡᠰᠦ ᠲᠦᠭᠦᠷᠭᠡᠭᠰᠡᠨ ᠰᠢᠷᠠᠭᠰᠠᠨ ᠭᠠᠯᠠᠭᠤ ᠠ᠋ᠴᠠ ᠠᠩᠬᠢᠯᠤᠮᠠ ᠬᠠᠯᠠᠭᠤᠨ ᠠᠭᠤᠷ ᠰᠠᠪᠰᠠᠵᠤ ᠪᠠᠶ᠋ᠢᠪᠠ ᠃ ᠨᠡᠩ ᠬᠠᠴᠢᠨ ᠭᠡᠪᠡᠯ ᠥᠨᠥᠬᠢ ᠭᠠᠯᠠᠭᠤ ᠨᠢᠷᠤᠭᠤᠨ ᠳᠡᠭᠡᠷᠡ ᠪᠡᠨ ᠬᠠᠳᠬᠤᠭᠤᠯᠤᠭᠰᠠᠨ ᠬᠢᠲᠤᠭᠠ ᠰᠡᠷᠡᠭᠡ ᠲᠡᠢ ᠪᠡᠨ ᠲᠠᠪᠠᠭ ᠠ᠋ᠴᠠ ᠪᠠᠨ ᠦᠰᠦᠷᠦᠨ ᠭᠠᠷᠤᠭᠠᠳ ᠱᠠᠯᠠ ᠳᠡᠭᠡᠭᠦᠷ ᠬᠠᠶ᠋ᠢᠪᠠᠩ ᠳᠠᠶ᠋ᠢᠪᠠᠩ ᠠᠯᠬᠤᠭᠰᠠᠭᠠᠷ ᠰᠢᠭᠤᠳ ᠬᠥᠭᠡᠷᠦᠬᠦᠢ ᠥᠬᠢᠨ ᠤᠷᠤᠭᠤ ᠢᠷᠡᠪᠡ ᠃ ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠴᠦᠳᠡᠩ ᠨᠢ ᠤᠨᠲᠠᠷᠠᠪᠠ ᠃ ᠡᠮᠦᠨᠡ ᠨᠢ ᠮᠥᠨ ᠬᠦ ᠬᠦᠢᠲᠡᠨ ᠴᠡᠪᠳᠡᠭ ᠲᠤᠭᠤᠷᠭᠠ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠶ᠋ᠢᠯᠠ ᠃
ᠬᠥᠭᠡᠷᠦᠬᠦᠢ ᠥᠬᠢᠨ ᠪᠠᠰᠠ ᠨᠢᠭᠡ ᠶ᠋ᠢ ᠵᠤᠷᠠᠪᠠ ᠃ ᠡᠨᠡ ᠤᠳᠠᠭᠠ ᠲᠡᠷᠡ ᠂ ᠭᠣᠶᠣ ᠰᠠᠢᠬᠠᠨ ᠰᠦᠯᠳᠡ ᠮᠣᠳᠣᠨ ᠳᠣᠣᠷᠠ ᠰᠠᠭᠤᠵᠤ ᠪᠠᠶ᠋ᠢᠪᠠ ᠃ ᠡᠨᠡ ᠰᠦᠯᠳᠡ ᠮᠣᠳᠣ ᠲᠡᠭᠦᠨ ᠳ᠋ᠦ᠍ ᠨᠢᠳᠤᠨᠤᠨ ᠵᠢᠯ ᠦ᠋ᠨ ᠢᠰᠦᠢᠰ ᠪᠤᠷᠬᠠᠨ ᠤ᠋ ᠮᠠᠨᠳᠤᠯᠠᠭᠰᠠᠨ ᠡᠳᠦᠷ ᠪᠠᠶᠠᠨ ᠬᠤᠳᠠᠯᠳᠤᠭᠠᠴᠢᠨ ᠤ᠋ ᠰᠢᠯ ᠡᠭᠦᠳᠡ ᠪᠡᠷ ᠬᠠᠷᠠᠭᠳᠠᠭᠰᠠᠨ ᠲᠡᠷᠡ ᠰᠦᠯᠳᠡ ᠮᠣᠳᠣᠨ ᠠ᠋ᠴᠠ ᠴᠤ᠌ ᠪᠦᠳᠦᠭᠦᠨ ᠪᠥᠭᠡᠳ ᠭᠣᠶᠣ ᠰᠠᠨᠠᠭᠳᠠᠪᠠ ᠃ ᠮᠣᠳᠣᠨ ᠤ᠋ ᠨᠣᠭᠣᠭᠠᠨ ᠮᠥᠴᠢᠷ ᠦ᠋ᠳ ᠦ᠋ᠨ ᠳᠡᠭᠡᠭᠦᠷ ᠬᠡᠳᠦᠨ ᠮᠢᠩᠭᠠᠨ ᠯᠠ ᠳᠤᠸᠠᠯᠠᠨ ᠨᠣᠴᠣᠵᠤ ᠂ ᠳᠡᠯᠭᠡᠭᠦᠷ ᠬᠤᠳᠠᠯᠳᠤᠭᠠᠨ ᠤ᠋ ᠴᠣᠩᠬᠣ ᠪᠠᠷ ᠦᠵᠡᠭᠳᠡᠵᠦ ᠪᠠᠶ᠋ᠢᠬᠰᠠᠨ ᠮᠠᠰᠢ ᠣᠯᠠᠨ ᠭᠣᠶᠣ ᠰᠠᠢᠬᠠᠨ ᠵᠢᠷᠤᠭ ᠦ᠋ᠳ ᠲᠡᠢ ᠠᠳᠠᠯᠢᠬᠠᠨ ᠵᠢᠷᠤᠭ ᠦ᠋ᠳ ᠥᠭᠡᠳᠡ ᠡᠴᠡ ᠨᠢ ᠠᠨᠢᠪᠴᠢᠵᠤ ᠪᠠᠶ᠋ᠢᠪᠠ ᠃ ᠪᠢᠴᠢᠬᠠᠨ ᠥᠬᠢᠨ ᠵᠢᠷᠤᠭ ᠤᠷᠤᠭᠤ ᠭᠠᠷ ᠢ᠋ᠶ᠋ᠠᠨ ᠰᠠᠷᠪᠠᠶ᠋ᠢᠲᠠᠯᠠ ᠴᠦᠳᠡᠩ ᠨᠢ ᠪᠠᠰᠠ ᠯᠠ ᠤᠨᠲᠠᠷᠠᠪᠠ ᠃ ᠰᠦᠯᠳᠡ ᠮᠣᠳᠣ ᠳᠡᠭᠡᠷᠡᠬᠢ ᠯᠡ ᠨᠤᠭᠤᠳ ᠤᠯᠠᠮ ᠤᠯᠠᠮ ᠬᠥᠭᠡᠷᠦᠨ ᠳᠡᠭᠳᠡᠭᠰᠡᠭᠡᠷ ᠰᠡᠭᠦᠯ ᠳ᠋ᠡᠭᠡᠨ ᠣᠭᠲᠠᠷᠭᠤᠢ ᠳ᠋ᠠᠬᠢ ᠭᠢᠯᠠᠯᠵᠠᠨ ᠰᠠᠴᠤᠷᠠᠭᠰᠠᠨ ᠣᠳᠣᠳ ᠠᠳᠠᠯᠢ ᠪᠣᠯᠪᠠ ᠃ ᠲᠩᠷᠢ ᠡᠴᠡ ᠨᠢᠭᠡᠨ ᠣᠳᠣ ᠭᠡᠷᠡᠯ ᠲᠡᠳᠡᠨ ᠰᠤᠪᠤᠷᠠᠪᠠ ᠃
《 ᠨᠢᠭᠡᠨ ᠬᠥᠮᠦᠨ ᠦᠬᠦᠬᠦ ᠭᠡᠵᠦ ᠪᠠᠶ᠋ᠢᠨᠠ ᠳᠠ 》 ᠭᠡᠵᠦ ᠲᠡᠷᠡ ᠥᠬᠢᠨ ᠬᠡᠯᠡᠯᠡ ᠃ ᠤᠴᠢᠷ ᠨᠢ ᠡᠮᠡᠭᠡ ᠡᠵᠢ ᠨᠢ ᠠᠮᠢᠳᠤ ᠪᠠᠶ᠋ᠢᠬᠤ ᠳ᠋ᠠᠭᠠᠨ 《 ᠨᠢᠭᠡ ᠣᠳᠣ ᠰᠤᠪᠤᠷᠠᠪᠠᠯ ᠨᠢᠭᠡ ᠬᠥᠮᠦᠨ ᠦ᠌ ᠰᠦᠨᠡᠰᠦ ᠳ᠋ᠧᠪᠠᠵᠠᠨ ᠳ᠋ᠤ᠌ ᠣᠴᠢᠵᠤ ᠪᠠᠶ᠋ᠢᠬ᠋ᠠ ᠨᠢ ᠲᠡᠷᠡ ᠶᠤᠮ 》 ᠭᠡᠵᠦ ᠲᠡᠭᠦᠨ ᠳ᠋ᠦ᠍ ᠶᠠᠷᠢᠳᠠᠭ ᠪᠠᠶ᠋ᠢᠬᠰᠠᠨ ᠪᠠᠶ᠋ᠢᠵᠠᠢ ᠃
ᠲᠡᠷᠡ ᠪᠠᠰᠠ ᠨᠢᠭᠡ ᠴᠦᠳᠡᠩ ᠲᠤᠭᠤᠷᠭᠠᠨ ᠳ᠋ᠤ᠌ ᠵᠤᠷᠠᠪᠠ ᠃ ᠡᠨᠡ ᠤᠳᠠᠭᠠ ᠣᠷᠴᠢᠨ ᠲᠣᠭᠣᠷᠢᠨ ᠊ᠢ ᠥᠪᠴᠢ ᠭᠡᠢᠭᠦᠯᠦᠭᠰᠡᠨ ᠭᠡᠷᠡᠯ ᠳᠣᠲᠣᠷᠠ ᠡᠮᠡᠭᠡ ᠡᠵᠢ ᠨᠢ ᠮᠥᠨ ᠲᠡᠶ᠋ᠢᠨ ᠬᠦ ᠡᠶᠡᠯᠳᠡᠭ ᠵᠥᠭᠡᠯᠡᠨ ᠡᠨᠡᠷᠢᠩᠭᠦᠢ ᠬᠠᠶ᠋ᠢᠷᠠᠲᠠᠢ ᠳᠦᠷᠢ ᠪᠡᠷ ᠵᠣᠭᠰᠣᠵᠤ ᠪᠠᠶ᠋ᠢᠬᠤ ᠨᠢ ᠲᠣᠪ ᠲᠣᠳᠣᠷᠬᠠᠢ ᠬᠠᠷᠠᠭᠳᠠᠨᠠ ᠃
《 ᠡᠮᠡᠭᠡ ᠡᠵᠢ ᠠ᠋ ! 》 ᠭᠡᠵᠦ ᠥᠬᠢᠨ ᠳᠠᠭᠤᠳᠠᠭᠠᠳ ᠄ 《 ᠨᠠᠮᠠ ᠶ᠋ᠢ ᠪᠡᠨ ᠠᠪᠤᠭᠠᠳ ᠶᠠᠪᠤ ᠠ᠋ ! ᠡᠨᠡ ᠴᠦᠳᠡᠩ ᠤᠨᠲᠠᠷᠠᠬᠤ ᠲᠠᠢ ᠵᠡᠷᠭᠡ ᠲᠠ ᠪᠠᠰᠠ ᠴᠤ᠌ ᠭᠠᠯ ᠲᠠᠢ ᠬᠢᠰᠠ ᠠᠳᠠᠯᠢ ᠂ ᠰᠠᠢᠬᠠᠨ ᠦᠨᠦᠷ ᠬᠠᠩᠬᠤᠯᠤᠭᠰᠠᠨ ᠲᠡᠷᠡ ᠰᠢᠷᠠᠭᠰᠠᠨ ᠭᠠᠯᠠᠭᠤ ᠠᠳᠠᠯᠢ ᠂ ᠭᠣᠶᠣ ᠦᠵᠡᠰᠬᠦᠯᠡᠩᠲᠦ ᠰᠦᠯᠳᠡ ᠮᠣᠳᠣ ᠠᠳᠠᠯᠢ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠬᠤ ᠶ᠋ᠢ ᠪᠢ ᠮᠡᠳᠡᠵᠦ ᠪᠠᠶ᠋ᠢᠨᠠ ! 》 ᠭᠡᠪᠡ ᠃
ᠥᠬᠢᠨ ᠡᠮᠡᠭᠡ ᠡᠵᠢ ᠪᠡᠨ ᠠᠪᠴᠤ ᠬᠣᠴᠣᠷᠬᠤ ᠭᠡᠵᠦ ᠴᠦᠳᠡᠩ ᠢ᠋ᠶ᠋ᠡᠨ ᠪᠠᠭᠴᠠ ᠪᠠᠷ ᠨᠢ ᠨᠣᠴᠣᠭᠠᠪᠠ ᠃ ᠡᠨᠡ ᠪᠠᠭᠴᠠ ᠴᠦᠳᠡᠩ ᠡᠴᠡ ᠬᠤᠷᠴᠠ ᠭᠡᠷᠡᠯ ᠭᠠᠷᠴᠤ ᠡᠳᠦᠷ ᠮᠡᠲᠦ ᠭᠡᠭᠡᠨ ᠪᠣᠯᠪᠠ ᠃ ᠡᠮᠡᠭᠡ ᠡᠵᠢ ᠨᠢ ᠬᠡᠵᠢᠶᠡ ᠴᠦ᠍ ᠡᠶ᠋ᠢᠮᠦ ᠰᠦᠷᠯᠢᠭ ᠥᠨᠳᠥᠷ ᠭᠤᠸ᠋ᠠ ᠰᠠᠢᠬᠠᠨ ᠪᠠᠶ᠋ᠢᠬᠰᠠᠨ ᠦᠭᠡᠢ ᠪᠢᠯᠡ ᠃ ᠡᠮᠡᠭᠡ ᠡᠵᠢ ᠨᠢ ᠥᠬᠢᠨ ᠢ᠋ᠶ᠋ᠡᠨ ᠲᠡᠪᠡᠷᠢᠵᠦ ᠠᠪᠤᠭᠠᠳ ᠬᠠᠯᠠᠭᠤᠨ ᠡᠯᠢᠭᠡᠨ ᠳ᠋ᠡᠭᠡᠨ ᠨᠠᠭᠠᠯᠳᠤᠭᠤᠯᠤᠨ ᠂ ᠬᠣᠶᠠᠭᠤᠯᠠ ᠰᠠᠷᠠᠭᠤᠯ ᠲᠤᠶᠠᠭᠠᠨ ᠳᠤᠮᠳᠠᠭᠤᠷ ᠂ ᠰᠠᠢᠬᠠᠨ ᠬᠥᠭᠵᠢᠶᠡᠨ ᠳᠣᠲᠣᠭᠤᠷ ᠨᠢᠰᠦᠨ ᠣᠳᠪᠠ ᠃ ᠥᠨᠳᠥᠷ ᠡᠴᠡ ᠥᠨᠳᠥᠷ ᠨᠢᠰᠴᠦ ᠂ ᠲᠡᠷᠡ ᠬᠦ ᠳᠠᠭᠠᠷᠠᠳᠠᠭ ᠦᠭᠡᠢ ᠂ ᠥᠯᠥᠰᠳᠡᠭ ᠦᠭᠡᠢ ᠂ ᠭᠠᠰᠠᠯᠠᠩ ᠵᠣᠪᠠᠯᠠᠩ ᠦᠭᠡᠢ ᠣᠷᠣᠨ ᠳ᠋ᠤ᠌ ᠨᠢᠰᠦᠨ ᠣᠳᠪᠠ ᠃
ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠡᠨᠡ ᠥᠬᠢᠨ ᠬᠡᠷᠡᠮ ᠦ᠋ᠨ ᠪᠤᠯᠤᠩ ᠳ᠋ᠤ᠌ ᠬᠣᠶᠠᠷ ᠬᠠᠴᠠᠷ ᠨᠢ ᠭᠦᠨ ᠤᠯᠠᠭᠠᠨ ᠪᠣᠯᠤᠭᠠᠳ ᠢᠨᠢᠶᠡᠮᠰᠦᠭᠯᠡᠨ ᠰᠠᠭᠤᠵᠤ ᠪᠠᠶ᠋ᠢᠪᠠ ᠃ ᠲᠡᠷᠡ ᠥᠬᠢᠨ ᠦᠬᠦᠴᠢᠬᠡᠵᠡᠢ ᠃ ᠪᠢᠲᠡᠭᠦᠨ ᠦ᠌ ᠰᠥᠨᠢ ᠬᠥᠯᠳᠡᠵᠦ ᠦᠬᠦᠵᠡᠢ ᠃ ᠰᠢᠨᠡ ᠵᠢᠯ ᠦ᠋ᠨ ᠨᠠᠷᠠᠨ ᠮᠠᠨᠳᠤᠵᠤ ᠪᠢᠴᠢᠬᠠᠨ ᠬᠡᠭᠦᠷ ᠳᠡᠭᠡᠷᠡ ᠨᠢ ᠲᠤᠰᠤᠭᠰᠠᠨ ᠪᠠᠶ᠋ᠢᠯᠠ ᠃ ᠬᠥᠭᠡᠷᠦᠬᠦᠢ ᠥᠬᠢᠨ ᠤᠨᠲᠠᠷᠠᠭᠰᠠᠨ ᠴᠦᠳᠡᠩ ᠦ᠋ᠨ ᠮᠣᠳᠣ ᠪᠠᠨ ᠪᠠᠷᠢᠭᠰᠠᠨ ᠬᠡᠪ ᠢ᠋ᠶ᠋ᠡᠷ ᠰᠠᠭᠤᠵᠤ ᠪᠠᠶ᠋ᠢᠪᠠ ᠃
《 ᠡᠨᠡ ᠥᠬᠢᠨ ᠳᠤᠯᠠᠭᠠᠴᠠᠬᠤ ᠭᠡᠵᠦ ᠰᠠᠨᠠᠭᠰᠠᠨ ᠪᠠᠶ᠋ᠢᠵᠠᠢ ᠁ 》 ᠭᠡᠵᠦ ᠬᠥᠮᠦᠰ ᠶᠠᠷᠢᠯᠴᠠᠨᠠ ᠃ ᠭᠡᠪᠡᠴᠦ ᠡᠨᠡ ᠥᠬᠢᠨ ᠬᠡᠴᠢᠨᠡᠨ ᠭᠣᠶᠣ ᠰᠠᠢᠬᠠᠨ ᠶᠠᠭᠤᠮᠠᠰ ᠦᠵᠡᠵᠦ ᠪᠠᠶ᠋ᠢᠬᠰᠠᠨ ᠪᠠ ᠶᠠᠭᠠᠬᠢᠭᠰᠠᠨ ᠶᠡᠬᠡ ᠪᠠᠶᠠᠷ ᠵᠢᠷᠭᠠᠯᠲᠠᠢ ᠪᠠᠷ ᠡᠮᠡᠭᠡ ᠡᠵᠢ ᠲᠡᠢ ᠪᠡᠨ ᠬᠣᠶᠠᠭᠤᠯᠠ ᠰᠢᠨᠡ ᠵᠢᠯ ᠦ᠋ᠨ ᠪᠠᠶᠠᠷ ᠲᠤ᠌ ᠱᠤᠩᠪᠠᠵᠤ ᠣᠳᠤᠭᠰᠠᠨ ᠊ᠢ ᠬᠡᠨ ᠴᠦ᠍ ᠮᠡᠳᠡᠬᠦ ᠦᠭᠡᠢ ᠶᠦ᠍ᠮ ᠃
ᠢᠷᠡᠯᠲᠡ ᠄ ᠠᠯᠪᠠᠨ ᠵᠢᠷᠤᠮ ᠤ᠋ᠨ ᠲᠠᠪᠤᠨ ᠵᠢᠯ ᠦ᠋ᠨ ᠳᠦᠷᠢᠮᠲᠦ ᠪᠠᠭᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠦᠵᠡᠬᠦ
ᠬᠡᠯᠡ ᠪᠢᠴᠢᠭ ᠂ ᠶᠢᠰᠦᠳᠦᠭᠡᠷ ᠳᠡᠪᠲᠡᠷ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠦᠯᠵᠡᠶ᠋ᠢᠪᠠᠭᠠᠲᠤᠷ
ᠬᠢᠨᠠᠭᠴᠢ ᠄ ᠣᠤᠠᠬᠠᠨᠰᠣ ᠠ᠋