ᠠᠩᠭᠠᠢᠵᠤ ᠢᠳᠡᠭᠡᠳ ᠲᠠᠩᠭᠠᠢᠵᠤ ᠬᠡᠪᠲᠡᠨᠡ-ᠵᠦᠢᠷ ᠰᠡᠴᠡᠨ ᠦᠭᠡАнгайж идээд тангайж хэвтэнэ-зүйр цэцэн үг
2932ᠵᠦᠢᠷ ᠰᠡᠴᠡᠨ ᠦᠭᠡ
ᠠᠩᠭᠠᠶ᠋ᠢᠵᠤ ᠢᠳᠡᠭᠡᠳ ᠲᠠᠩᠭᠠᠶ᠋ᠢᠵᠤ ᠬᠡᠪᠲᠡᠨᠡ-ᠵᠦᠢᠷ ᠰᠡᠴᠡᠨ ᠦᠭᠡ
ᠬᠥᠮᠦᠨ ᠢᠳᠡᠬᠦ ᠲᠤᠲᠤᠮ ᠬᠣᠪᠳᠣᠭ ᠪᠣᠯᠵᠤ
ᠤᠨᠲᠠᠬᠤ ᠲᠤᠲᠤᠮ ᠵᠠᠯᠬᠠᠭᠤ ᠪᠣᠯᠤᠨᠠ᠂
ᠤᠨᠲᠠᠬᠤ ᠨᠣᠶ᠋ᠢᠷ ᠲᠠᠭᠠᠨ ᠳᠠᠷᠤᠭᠳᠠᠪᠠᠯ
ᠳᠣᠷᠣᠶ᠋ᠢᠲᠠᠬᠤ ᠶ᠋ᠢᠨ ᠲᠡᠮᠳᠡᠭ᠂
ᠤᠤᠭᠤᠵᠤ ᠢᠳᠡᠬᠦ ᠶ᠋ᠢ ᠬᠥᠭᠡᠭᠡᠴᠡᠯᠳᠦᠪᠡᠯ
ᠦᠭᠡᠶ᠋ᠢᠷᠡᠬᠦ ᠶ᠋ᠢᠨ ᠲᠡᠮᠳᠡᠭ᠃
ᠮᠣᠩᠭᠣᠯᠴᠤᠳ ᠵᠠᠯᠬᠠᠭᠤ ᠬᠥᠮᠦᠨ ᠊ᠢ
ᠠᠩᠭᠠᠶ᠋ᠢᠵᠤ ᠢᠳᠡᠭᠡᠳ ᠲᠠᠩᠭᠠᠶ᠋ᠢᠵᠤ ᠬᠡᠪᠲᠡᠨᠡ᠃
ᠤᠤᠭᠤᠵᠤ ᠢᠳᠡᠬᠦ ᠳ᠋ᠡᠭᠡᠨ ᠤᠷᠭᠠ ᠶ᠋ᠢᠨ ᠮᠣᠷᠢ ᠰᠢᠭ᠋
ᠤᠷᠤᠭᠰᠢ ᠶᠠᠪᠤᠬᠤ ᠳ᠋ᠠᠭᠠᠨ ᠤᠷᠭᠤᠭᠠ ᠬᠠᠳᠠ ᠭᠡᠵᠦ ᠰᠢᠭᠦᠮᠵᠢᠯᠡᠳᠡᠭ᠃
ᠠᠯᠵᠠᠭᠤᠷᠠᠪᠠᠯ ᠵᠣᠪᠠᠯᠠᠩ ᠢᠷᠡᠨᠡ᠂
ᠠᠵᠢᠯᠯᠠᠪᠠᠯ ᠵᠢᠷᠭᠠᠯ ᠢᠷᠡᠨᠡ ᠰᠢᠦ᠃
ᠬᠡᠵᠢᠶᠡᠳᠡ ᠴᠢᠳᠠᠬᠤ ᠦᠭᠡᠢ ᠭᠡᠵᠦ ᠪᠤᠤ ᠬᠡᠯᠡ᠂
ᠠᠷᠭᠠ ᠡᠷᠢ᠂ ᠰᠢᠯᠲᠠᠭ ᠪᠤᠤ ᠡᠷᠢ!
ᠬᠢᠭᠰᠡᠨ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠡᠳᠦᠷ ᠪᠦᠷᠢ ᠰᠢᠭᠦ᠂
ᠪᠤᠰᠤᠳ ᠲᠤ᠌ ᠠᠮᠠᠯᠠᠭᠰᠠᠨ ᠢ᠋ᠶ᠋ᠠᠨ ᠵᠠᠪᠠᠯ ᠪᠡᠶᠡᠯᠡᠭᠦᠯ!
ᠠᠷᠪᠠᠨ ᠦᠭᠡ ᠡᠴᠡ ᠨᠢᠭᠡ ᠶ᠋ᠢ ᠲᠣᠭᠲᠠᠭᠠ ᠂
ᠠᠷᠪᠠᠨ ᠬᠥᠮᠦᠨ ᠡᠴᠡ ᠨᠢᠭᠡ ᠶ᠋ᠢ ᠲᠠᠨᠢ!
ᠥᠭᠡᠳᠡᠯᠡᠬᠦ ᠬᠥᠮᠦᠨ ᠥᠪᠡᠷ ᠲᠡᠢ ᠪᠡᠨ ᠲᠡᠮᠡᠴᠡᠳᠡᠭ᠂
ᠤᠷᠤᠭᠤᠳᠠᠬᠤ ᠬᠥᠮᠦᠨ ᠪᠤᠰᠤᠳ ᠲᠠᠢ ᠲᠡᠮᠡᠴᠡᠳᠡᠭ᠃
ᠴᠢᠷᠮᠠᠶ᠋ᠢᠵᠤ ᠯᠠ ᠪᠠᠢ!
ᠴᠠᠭ ᠨᠢ ᠪᠣᠯᠪᠠᠯ ᠠᠵᠠ ᠵᠢᠷᠭᠠᠯ ᠬᠠᠭᠠᠯᠭᠠ ᠶ᠋ᠢ ᠴᠢᠨᠢ ᠲᠣᠭᠰᠢᠨᠠ᠃
ᠨᠢᠰᠳᠡᠭ ᠪᠣᠯᠭᠠᠨ ᠰᠢᠪᠠᠭᠤ ᠪᠢᠰᠢ! ᠰᠢᠮᠠᠭᠤᠯ ᠴᠤ᠌ ᠪᠠᠶ᠋ᠢᠵᠤ ᠪᠣᠯᠤᠨᠠ᠃
ᠨᠡᠢᠯᠡᠳᠡᠭ ᠪᠣᠯᠭᠠᠨ ᠨᠥᠬᠥᠳ ᠪᠢᠰᠢ᠂ ᠨᠣᠬᠠᠳ ᠴᠤ᠌ ᠪᠠᠶ᠋ᠢᠵᠤ ᠪᠣᠯᠤᠨᠠ᠃
ᠢᠲᠡᠭᠰᠡᠨ ᠪᠣᠯᠭᠠᠨ ᠬᠣᠭᠣᠯᠠ ᠪᠢᠰᠢ᠂ ᠬᠣᠣᠷ ᠴᠤ᠌ ᠪᠠᠶ᠋ᠢᠵᠤ ᠪᠣᠯᠤᠨᠠ᠃
ᠢᠷᠡᠭᠰᠡᠨ ᠪᠣᠯᠭᠠᠨ ᠰᠠᠢᠨ ᠬᠥᠮᠦᠨ ᠪᠢᠰᠢ᠂ ᠰᠠᠭᠠᠷ ᠬᠥᠮᠦᠨ ᠴᠦ᠍ ᠪᠠᠶ᠋ᠢᠵᠤ ᠪᠣᠯᠤᠨᠠ᠃
ᠵᠠᠷᠢᠮ ᠬᠥᠮᠦᠨ ᠲᠡᠢ ᠶᠠᠪᠤᠯᠴᠠᠬᠤ ᠳ᠋ᠤ᠌ ᠪᠠᠨ ᠬᠣᠨᠢᠨ ᠤ᠋ ᠮᠢᠬᠠ ᠢᠳᠡᠬᠦ ᠰᠢᠭ ᠰᠠᠨᠠᠭᠠ ᠠᠮᠤᠷ ᠪᠠᠢ!
ᠵᠠᠷᠢᠮ ᠬᠥᠮᠦᠨ ᠲᠡᠢ ᠬᠠᠷᠢᠯᠴᠠᠬᠤ ᠳ᠋ᠤ᠌ ᠪᠠᠨ ᠵᠢᠭᠠᠰᠤᠨ ᠤ᠋ ᠮᠢᠬᠠ ᠢᠳᠡᠬᠦ ᠰᠢᠭ ᠪᠣᠯᠭᠣᠮᠵᠢᠯᠠᠬᠤ ᠬᠡᠷᠡᠭᠲᠡᠢ ᠰᠢᠦ!
ᠬᠢᠬᠦ ᠦᠭᠡᠢ ᠬᠥᠮᠦᠨ ᠦ᠌ ᠦᠭᠡ ᠨᠢ ᠣᠯᠠᠨ
ᠬᠥᠭᠵᠢᠬᠦ ᠦᠭᠡᠢ ᠭᠠᠯ ᠤ᠋ᠨ ᠤᠲᠤᠭᠠ ᠨᠢ ᠶᠡᠬᠡ᠃
ᠶᠠᠷᠢᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠶᠠᠪᠤᠭᠰᠠᠨ ᠨᠢ ᠳᠡᠭᠡᠷᠡ᠂
ᠬᠡᠯᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠬᠢᠭᠰᠡᠨ ᠨᠢ ᠳᠡᠭᠡᠷᠡ᠃
ᠭᠦᠶᠦᠬᠦ ᠨᠣᠬᠠᠢ ᠳ᠋ᠤ᠌ ᠭᠦᠶᠦᠬᠦ ᠦᠭᠡᠢ ᠨᠣᠬᠠᠢ ᠰᠠᠭᠠᠳ ᠭᠡᠳᠡᠭ ᠢ᠋ᠶ᠋ᠡᠷ
ᠪᠦᠲᠦᠭᠡᠶᠡ ᠭᠡᠪᠡᠯ ᠪᠡᠷᠬᠡ ᠡᠴᠡ ᠪᠤᠤ ᠠᠶᠤ!
ᠬᠢᠶᠡ ᠭᠡᠪᠡᠯ ᠬᠡᠯᠡᠬᠦ ᠡᠴᠡ ᠪᠤᠤ ᠠᠶᠤ!
ᠠᠮᠢᠳᠤᠷᠠᠯ ᠠᠵᠢᠯ ᠢ᠋ᠶ᠋ᠠᠷ ᠳᠡᠭᠵᠢᠷᠡᠳᠡᠭ᠂
ᠠᠮᠵᠢᠯᠲᠠ ᠴᠢᠷᠮᠠᠶ᠋ᠢᠯᠲᠠ ᠪᠠᠷ ᠢᠷᠡᠳᠡᠭ ᠶᠦ᠍ᠮ᠃
ᠠᠭᠤᠴᠢᠯᠠᠵᠤ ᠴᠢᠳᠠᠳᠠᠭ ᠬᠦᠯᠢᠴᠡᠩᠭᠦᠢ ᠬᠥᠮᠦᠨ ᠪᠣᠯ ᠬᠣᠯᠠ ᠶ᠋ᠢ ᠪᠣᠳᠣᠳᠠᠭ᠂ ᠰᠡᠳᠬᠢᠯ ᠲᠣᠭᠲᠠᠭᠤᠨ ᠳᠣᠲᠣᠷ ᠲᠠᠮᠢᠷ ᠲᠠᠢ ᠬᠥᠮᠦᠨ ᠶᠦ᠍ᠮ᠃
ᠪᠤᠰᠤᠳ ᠊ᠢ ᠠᠭᠤᠴᠢᠯᠠᠬᠤ ᠨᠢ ᠤᠴᠢᠷ ᠶᠠᠪᠤᠳᠠᠯ ᠊ᠢ ᠨᠢ ᠲᠤᠩᠭᠠᠨ ᠨᠠᠷᠢᠪᠴᠢᠯᠠᠵᠤ ᠪᠠᠶ᠋ᠢᠬᠤ ᠶᠠᠪᠤᠳᠠᠯ᠂
ᠰᠡᠳᠬᠢᠯ ᠠᠭᠤᠵᠢᠭᠤ ᠬᠥᠮᠦᠨ ᠳ᠋ᠦ᠍ ᠡᠯᠡᠭᠯᠡᠯ ᠳᠣᠷᠣᠮᠵᠢᠯᠠᠯ ᠬᠠᠪᠢᠳᠠᠵᠤ ᠴᠢᠳᠠᠳᠠᠭ ᠦᠭᠡᠢ᠂
ᠠᠭᠤᠷ ᠬᠢᠯᠢᠩ ᠨᠢ ᠨᠡᠪᠲᠡᠶ᠋ᠢᠵᠤ ᠳᠡᠶ᠋ᠢᠯᠳᠡᠭ᠋ ᠦᠭᠡᠢ᠃
ᠠᠭᠤᠴᠢᠯᠠᠵᠤ ᠬᠦᠯᠢᠶᠡᠴᠡᠵᠦ ᠪᠠᠶ᠋ᠢᠲᠠᠯᠠ ᠵᠥᠪ ᠪᠤᠷᠤᠭᠤ ᠰᠠᠢᠨ ᠮᠠᠭᠤ ᠨᠢ ᠠᠶᠠᠨᠳᠠᠭᠠᠨ ᠢᠯᠭᠠᠷᠠᠨᠠ᠃
ᠠᠭᠤᠷᠯᠠᠪᠠᠯ ᠥᠰᠢᠶᠡᠲᠡᠨ ᠣᠯᠠᠨ᠂
ᠠᠭᠤᠴᠢᠯᠠᠪᠠᠯ ᠨᠥᠬᠥᠷ ᠣᠯᠠᠨ ᠭᠡᠳᠡᠭ ᠶᠦ᠍ᠮ᠃
ᠮᠢᠨᠦ ᠬᠦᠦ ᠪᠣᠯᠵᠤ ᠪᠠᠶ᠋ᠢᠨᠠ᠂ ᠬᠣᠵᠢᠮ ᠰᠠᠢᠨ ᠡᠷᠡ ᠪᠣᠯᠤᠨᠠ ᠭᠡᠵᠦ ᠬᠡᠦᠬᠡᠳ ᠢ᠋ᠶ᠋ᠡᠨ ᠵᠣᠷᠢᠭᠵᠢᠭᠤᠯᠵᠤ ᠢᠲᠡᠭᠡᠯ ᠵᠣᠷᠢᠭ ᠲᠠᠢ ᠬᠥᠮᠦᠨ ᠪᠣᠯᠭᠠᠭᠠᠷᠠᠢ!
ᠠᠭᠤᠯᠠ ᠶ᠋ᠢᠨ ᠴᠢᠨᠡᠭᠡᠨ ᠠᠯᠲᠠ ᠮᠥᠩᠭᠥ ᠬᠠᠳᠠᠭᠠᠯᠠᠭᠰᠠᠨ ᠴᠤ᠌ ᠦᠷᠡᠵᠦ ᠰᠦᠢᠳᠬᠡᠪᠡᠯ ᠳᠣᠣᠷᠠ ᠪᠠᠨ ᠳᠠᠭᠤᠰᠬᠠᠴᠢᠬᠠᠨᠠ᠃
ᠬᠠᠷᠢᠨ ᠢᠲᠡᠭᠡᠯ ᠵᠣᠷᠢᠭ ᠪᠣᠯ ᠳᠠᠭᠤᠰᠬᠠᠬᠤ ᠴᠤ᠌ ᠦᠭᠡᠢ ᠥᠪ ᠬᠥᠷᠥᠩᠭᠡ!
ᠠᠭᠤᠲᠠᠯᠠᠬᠤ ᠲᠤᠲᠤᠮ
ᠡᠲᠯᠡᠬᠦ ᠲᠤᠲᠤᠮ ᠨᠡᠮᠡᠭᠲᠡᠬᠦ ᠡᠴᠡ ᠪᠢᠰᠢ ᠬᠣᠷᠣᠭᠳᠠᠬᠤ ᠦᠭᠡᠢ ᠭᠠᠶ᠋ᠢᠬᠠᠮᠰᠢᠬᠲᠠᠢ ᠪᠠᠶ᠋ᠢᠲᠠᠭ᠃
ᠡᠷᠡ ᠬᠥᠮᠦᠨ ᠵᠣᠷᠢᠭᠰᠠᠨ ᠳ᠋ᠠᠭᠠᠨ
ᠡᠮᠡᠭᠡᠯ ᠲᠡᠢ ᠮᠣᠷᠢ ᠬᠠᠷᠠᠶ᠋ᠢᠬᠰᠠᠨ ᠳ᠋ᠠᠭᠠᠨ ᠭᠡᠳᠡᠭ ᠰᠢᠦ᠃
ᠭᠡᠷ ᠪᠦᠯᠢ ᠶ᠋ᠢᠨ ᠳᠣᠲᠣᠷᠠ ᠪᠠᠨ ᠢᠯᠠᠭᠴᠢ ᠪᠣᠯᠬᠤ ᠭᠡᠵᠦ ᠵᠢᠳᠬᠦᠬᠦ ᠨᠢ ᠠᠵᠤ ᠠᠮᠢᠳᠤᠷᠠᠯ ᠳ᠋ᠤ᠌ ᠮᠠᠰᠢ ᠬᠣᠣᠷᠲᠠᠢ!
ᠢᠯᠠᠭᠴᠢ ᠪᠣᠯᠬᠤ ᠶ᠋ᠢ ᠬᠦᠰᠡᠪᠡᠯ ᠠᠭᠤᠴᠢᠯᠠᠬᠤ ᠣᠷᠣᠨ ᠵᠠᠢ ᠦᠭᠡᠢ ᠪᠣᠯᠤᠨᠠ᠃
ᠨᠢᠭᠡ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠢᠯᠠᠬᠤ ᠪᠣᠯᠤᠭᠠᠳ ᠠᠭᠤᠴᠢᠯᠠᠬᠤ ᠬᠣᠶᠠᠷ ᠵᠡᠷᠭᠡ ᠣᠷᠣᠰᠢᠬᠤ ᠳ᠋ᠤ᠌ ᠪᠡᠷᠬᠡ ᠪᠠᠶ᠋ᠢᠲᠠᠭ᠂
ᠠᠭᠤᠴᠢᠯᠠᠬᠤ ᠪᠣᠯ ᠡᠶᠡ ᠡᠪᠲᠡᠢ ᠵᠣᠯ ᠵᠢᠷᠭᠠᠯ ᠲᠠᠢ ᠭᠡᠷ ᠪᠦᠯᠢ ᠶ᠋ᠢᠨ ᠰᠠᠭᠤᠷᠢ ᠶᠤᠮ᠃
ᠡᠩᠭᠡᠷ ᠳᠠᠭᠠᠪᠠᠯ ᠳᠤᠯᠠᠭᠠᠨ
ᠡᠶᠡ ᠳᠠᠭᠠᠪᠠᠯ ᠨᠠᠶ᠋ᠢᠷ ᠭᠡᠳᠡᠭ ᠰᠢᠦ ᠳᠧ!
ᠠᠯᠲᠠᠨ ᠨᠠᠷᠠ ᠢᠯᠴᠢ ᠭᠡᠷᠡᠯ ᠬᠠᠶ᠋ᠢᠷᠠᠯᠠᠵᠤ
ᠠᠪᠤ ᠡᠵᠢ ᠠᠮᠢ ᠨᠠᠰᠤ ᠣᠯᠭᠣᠭᠰᠠᠨ ᠶᠤᠮ᠃
ᠠᠯᠲᠠ ᠮᠥᠩᠭᠥ ᠶ᠋ᠢ ᠣᠯᠵᠤ ᠪᠣᠯᠤᠨᠠ᠂
ᠠᠪᠤ ᠡᠵᠢ ᠳᠠᠬᠢᠵᠤ ᠣᠯᠳᠠᠬᠤ ᠦᠭᠡᠢ ᠭᠡᠳᠡᠭ᠃
ᠠᠪᠤ ᠡᠵᠢ ᠨᠠᠰᠤᠲᠠᠨ ᠲᠣᠮᠣᠭᠠᠲᠠᠨ ᠢ᠋ᠶ᠋ᠠᠨ ᠪᠢᠳᠡ ᠭᠠᠭᠴᠠ ᠥᠨᠥᠳᠥᠷ ᠯᠡ ᠪᠢᠰᠢ᠂
ᠡᠳᠦᠷ ᠪᠦᠷᠢ ᠠᠴᠢᠯᠠᠵᠤ ᠬᠦᠨᠳᠦᠯᠡᠵᠦ ᠶᠠᠪᠤᠶᠠ!
ᠮᠣᠩᠭᠣᠯᠴᠤᠳ ᠬᠡᠦᠬᠡᠳ ᠢ᠋ᠶ᠋ᠡᠨ ᠰᠤᠷᠭᠠᠬᠤ ᠳ᠋ᠤ᠌ ᠪᠠᠨ ᠳᠤᠷᠠ ᠰᠣᠨᠢᠷᠬᠠᠯ ᠊ᠢ ᠨᠢ ᠮᠠᠰᠢ ᠠᠩᠬᠠᠷᠳᠠᠭ᠂
ᠬᠡᠦᠬᠡᠳ ᠦ᠋ᠨ ᠳᠤᠷᠠ ᠰᠣᠨᠢᠷᠬᠠᠯ ᠪᠣᠯ ᠲᠡᠳᠡᠨ ᠦ᠌ ᠥᠪᠡᠷᠮᠢᠴᠡ ᠠᠪᠢᠶᠠᠰ ᠴᠢᠳᠠᠪᠤᠷᠢ ᠨᠢ ᠶᠦ᠍ᠮ᠃
ᠡᠨᠡ ᠳᠤᠷᠠ ᠰᠣᠨᠢᠷᠬᠠᠯ ᠠ᠋ᠴᠠ ᠨᠢ ᠠᠯᠪᠠᠳᠠᠵᠤ ᠰᠠᠯᠭᠠᠪᠠᠯ ᠠᠪᠢᠶᠠᠰ ᠴᠢᠳᠠᠪᠤᠷᠢ ᠨᠢ ᠦᠭᠡᠢ ᠪᠣᠯᠤᠭᠠᠳ ᠶᠠᠭ ᠮᠠᠰᠢᠨ ᠬᠥᠮᠦᠨ ᠰᠢᠭ ᠬᠡᠵᠢᠶᠡᠳᠡ ᠬᠥᠮᠦᠨ ᠦ᠌ ᠵᠢᠯᠣᠭᠣᠳᠬᠤ ᠶ᠋ᠢ ᠬᠦᠯᠢᠶᠡᠳᠡᠭ ᠪᠣᠯᠴᠢᠬᠠᠨᠠ᠃
ᠢᠩᠭᠢᠬᠦᠯᠡᠷ ᠮᠣᠩᠭᠣᠯᠴᠤᠳ ᠤᠷᠭᠤᠭᠰᠠᠨ ᠦᠭᠡᠢ ᠤᠬᠠᠭᠠᠨ ᠊ᠢ ᠨᠢ ᠤᠭᠯᠠᠵᠤ ᠪᠤᠤ ᠰᠤᠷᠭᠠ ᠂
ᠳᠠᠭᠠᠭᠤᠯᠵᠤ ᠰᠤᠷᠭᠠ᠂ ᠳᠠᠷᠤᠯᠠᠵᠤ ᠪᠤᠤ ᠰᠤᠷᠭᠠ ᠭᠡᠵᠦ ᠶᠠᠷᠢᠳᠠᠭ᠃
ᠪᠤᠰᠤᠳ ᠤ᠋ᠨ ᠠᠴᠢ ᠲᠤᠰᠠ ᠶ᠋ᠢ ᠦᠨᠡᠯᠡᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ ᠶᠦ᠍ᠮ᠃
ᠵᠢᠱ᠌ᠢᠶᠡ ᠨᠢ᠄ ᠦᠭᠡ ᠶᠠᠷᠢᠶᠠ ᠤᠴᠢᠷ ᠶᠣᠰᠣᠭᠠᠷ ᠵᠢᠭᠠᠵᠤ ᠰᠤᠷᠭᠠᠭᠰᠠᠨ ᠤ᠋ ᠠᠴᠢ ᠲᠤᠰᠠ ᠶ᠋ᠢ ᠶᠠᠭᠠᠬᠢᠵᠤ ᠦᠨᠡᠯᠡᠬᠦ ᠪᠣᠢ?
ᠳᠠᠬᠢᠭᠠᠳ ᠬᠡᠯᠡᠬᠦ ᠳ᠋ᠦ᠍ ᠴᠠᠩᠭᠠᠭᠠᠳ ᠠᠮᠢ ᠲᠠᠰᠤᠷᠠᠮᠠᠷ ᠪᠠᠶ᠋ᠢᠭᠠ ᠬᠥᠮᠦᠨ ᠳ᠋ᠦ᠍ ᠨᠢᠭᠡ ᠠᠶᠠᠭᠠ ᠬᠦᠢᠲᠡᠨ ᠤᠰᠤ ᠥᠭᠬᠦ ᠳ᠋ᠦ᠍ ᠯᠡ ᠠᠮᠢ ᠶ᠋ᠢ ᠨᠢ ᠠᠪᠤᠷᠠᠳᠠᠭ᠂
ᠭᠡᠪᠡᠴᠦ ᠠᠶᠠᠭᠠ ᠬᠦᠢᠲᠡᠨ ᠤᠰᠤ ᠶ᠋ᠢ ᠮᠥᠩᠭᠥ ᠪᠡᠷ ᠪᠣᠳᠣᠪᠠᠯ ᠶᠠᠭᠤ ᠴᠤ᠌ ᠪᠢᠰᠢ ᠪᠣᠯᠤᠨᠠ᠃
ᠴᠢᠮᠬᠢᠭᠡᠳ ᠦᠭᠬᠦᠪᠡᠴᠦ ᠬᠦᠨᠡᠰᠦ᠂
ᠴᠢᠬᠡ ᠬᠠᠷᠠᠪᠠᠴᠤ ᠬᠠᠶ᠋ᠢᠷᠠ ᠭᠡᠳᠡᠭ ᠦ᠋ᠨ ᠶᠣᠰᠣ ᠨᠢ ᠡᠨᠡ ᠶᠦ᠍ᠮ ᠃
ᠨᠠᠷᠠ ᠲᠠᠢ ᠰᠠᠷᠠ ᠲᠠᠢ ᠲᠩᠷᠢ ᠰᠠᠢᠬᠠᠨ
ᠨᠠᠭᠠᠳᠤᠮ ᠲᠠᠢ ᠢᠨᠢᠶᠡᠳᠦᠮ ᠲᠡᠢ ᠠᠶ᠋ᠢᠯ ᠰᠠᠢᠬᠠᠨ ᠭᠡᠳᠡᠭ᠃
ᠱᠣᠭ ᠢᠨᠢᠶᠡᠳᠦᠮ ᠨᠢ ᠬᠥᠮᠦᠨ ᠦ᠌ ᠭᠤᠨᠢᠭ ᠊ᠢ ᠤᠬᠢᠶᠠᠵᠤ᠂ ᠰᠡᠳᠬᠢᠯ ᠊ᠢ ᠰᠡᠷᠭᠦᠭᠡᠳᠡᠭ
ᠠᠮᠢᠳᠤᠷᠠᠯ ᠤ᠋ᠨ ᠳᠠᠪᠤᠰᠤ ᠶᠤᠮ᠃
ᠠᠵᠤ ᠠᠮᠢᠳᠤᠷᠠᠯ ᠨᠠᠭᠠᠳᠤᠮ ᠱᠣᠭ ᠢ᠋ᠶ᠋ᠠᠷ ᠳᠤᠲᠠᠪᠠᠯ
ᠬᠣᠭᠣᠯᠠ ᠪᠤᠳᠠᠭᠠ ᠳᠠᠪᠤᠰᠤ ᠦᠭᠡᠢ ᠰᠢᠭ ᠪᠣᠯᠳᠠᠭ᠃
ᠱᠣᠭ ᠢᠨᠢᠶᠡᠳᠦᠮ ᠊ᠢ ᠴᠠᠭ ᠭᠠᠵᠠᠷ ᠤᠴᠢᠷ ᠶᠠᠪᠤᠳᠠᠯ ᠊ᠢ ᠲᠤᠩᠭᠠᠨ ᠡᠪᠯᠢᠭ ᠬᠡᠷᠡᠭᠯᠡᠭᠡᠷᠡᠢ᠃
ᠨᠠᠭᠠᠳᠴᠤ ᠶᠠᠪᠤᠬᠤ ᠨᠢ ᠨᠠᠰᠤᠨ ᠤ᠋ ᠵᠢᠷᠭᠠᠯ
ᠢᠨᠢᠶᠡᠯᠴᠡᠵᠦ ᠶᠠᠪᠤᠬᠤ ᠨᠢ ᠡᠳᠦᠷ ᠦ᠋ᠨ ᠵᠢᠷᠭᠠᠯ ᠭᠡᠳᠡᠭ ᠰᠢᠦ!
ᠠᠴᠢ ᠰᠠᠨᠠᠪᠠᠯ ᠤᠷᠤᠭᠤᠳᠠᠨᠠ᠂
ᠠᠴᠢ ᠬᠠᠷᠢᠭᠤᠯᠪᠠᠯ ᠥᠭᠡᠳᠡᠯᠡᠨᠡ ᠭᠡᠵᠦ
ᠪᠤᠰᠤᠳ ᠲᠤ᠌ ᠲᠤᠰᠠ ᠬᠦᠷᠭᠡᠭᠰᠡᠨ ᠬᠥᠮᠦᠨ
ᠠᠴᠢ ᠬᠠᠷᠢᠭᠤᠯᠬᠤ ᠶ᠋ᠢ ᠪᠤᠰᠤᠳ ᠠ᠋ᠴᠠ ᠱᠠᠭᠠᠷᠳᠠᠬᠤ᠃ ᠭᠠᠪᠢᠶᠠᠷᠬᠠᠬᠤ ᠶ᠋ᠢ ᠴᠡᠭᠡᠷᠯᠡᠳᠡᠭ ᠶᠦ᠍ᠮ᠃
ᠪᠤᠰᠤᠳ ᠊ᠢ ᠲᠤᠰᠠᠯᠠᠬᠤ ᠨᠢ ᠪᠤᠶᠠᠨ ᠬᠤᠷᠢᠶᠠᠵᠤ ᠪᠠᠶ᠋ᠢᠭᠠ ᠪᠣᠯᠪᠠᠴᠤ
ᠪᠤᠴᠠᠭᠠᠭᠠᠳ ᠬᠠᠷᠢᠭᠤ ᠰᠠᠨᠠᠪᠠᠯ ᠪᠤᠶᠠᠨ ᠨᠢ ᠬᠠᠷᠢᠨᠠ ᠭᠡᠵᠦ ᠪᠤᠭᠤᠷᠤᠯᠴᠤᠳ ᠬᠡᠯᠡᠳᠡᠭ᠃
ᠲᠤᠰᠠᠯᠠᠭᠰᠠᠨ ᠢ᠋ᠶ᠋ᠠᠨ ᠨᠢᠭᠡ ᠬᠣᠷᠣᠮ ᠳ᠋ᠤ᠌ ᠮᠠᠷᠲᠠ᠂
ᠲᠤᠰᠠᠯᠠᠭᠤᠯᠤᠭᠰᠠᠨ ᠢ᠋ᠶ᠋ᠠᠨ ᠨᠢᠭᠡ ᠨᠠᠰᠤᠨ ᠳ᠋ᠤ᠌ ᠪᠠᠨ ᠴᠡᠭᠡᠵᠢᠯᠡ! ᠭᠡᠳᠡᠭ ᠨᠢ ᠡᠨᠡ ᠶᠦ᠍ᠮ᠃
ᠠᠵᠠ ᠵᠢᠷᠭᠠᠯ ᠭᠡᠳᠡᠭ ᠥᠪᠡᠷ ᠦ᠋ᠨ ᠭᠡᠷ ᠲᠦ᠍ ᠤᠷᠭᠤᠳᠠᠭ ᠵᠦᠢᠯ ᠪᠣᠯᠬᠤ ᠠ᠋ᠴᠠ ᠪᠢᠰᠢ᠂ ᠠᠶ᠋ᠢᠯ ᠤ᠋ᠨ ᠭᠡᠷ ᠡᠴᠡ ᠲᠡᠭᠦᠳᠡᠭ ᠵᠦᠢᠯ ᠪᠢᠰᠢ ᠠ᠋!
ᠭᠡᠷ ᠲᠡᠭᠡᠨ ᠪᠠᠶ᠋ᠢᠬᠤ ᠰᠠᠢᠬᠠᠨ᠂
ᠭᠡᠷ ᠪᠦᠯᠢ ᠪᠡᠷ ᠢ᠋ᠶ᠋ᠡᠨ ᠬᠠᠮᠲᠤ ᠪᠠᠶ᠋ᠢᠬᠤ ᠵᠢᠷᠭᠠᠯᠲᠠᠢ!
ᠠᠪᠤ ᠡᠵᠢ ᠠᠬᠠ ᠳᠡᠭᠦᠦ ᠲᠥᠷᠥᠯ ᠲᠡᠢ ᠪᠠᠶ᠋ᠢᠬᠤ ᠰᠠᠢᠬᠠᠨ᠂
ᠠᠪᠤ ᠡᠵᠢ ᠠᠬᠠ ᠳᠡᠭᠦᠦ ᠲᠥᠷᠥᠯ ᠲᠡᠢ ᠪᠡᠨ ᠬᠠᠮᠲᠤ ᠪᠠᠶ᠋ᠢᠬᠤ ᠵᠢᠷᠭᠠᠯᠲᠠᠢ!
ᠠᠶ᠋ᠢᠯ ᠭᠡᠷ ᠪᠣᠯ ᠠᠵᠠ ᠵᠢᠷᠭᠠᠯ ᠤ᠋ᠨ ᠥᠯᠥᠭᠡᠢ ᠶᠦ᠍ᠮ᠃
ᠡᠵᠢ ᠶ᠋ᠢᠨ ᠰᠦ ᠪᠡᠷ ᠬᠥᠯ ᠳ᠋ᠦ᠍ ᠣᠷᠣᠵᠤ᠂
ᠠᠪᠤ ᠶ᠋ᠢᠨ ᠠᠴᠢ ᠪᠠᠷ ᠬᠥᠮᠦᠨ ᠪᠣᠯᠤᠨᠠ ᠭᠡᠳᠡᠭ᠃
ᠵᠢᠯ ᠳ᠋ᠦ᠍ ᠲᠠ ᠠᠪᠤ ᠡᠵᠢ ᠲᠡᠢ ᠪᠡᠨ ᠬᠡᠳᠦᠨ ᠬᠣᠨᠣᠭ ᠬᠠᠮᠲᠤ ᠪᠠᠶ᠋ᠢᠲᠠᠭ ᠤᠤ?
ᠲᠡᠳᠡᠨ ᠊ᠢ ᠪᠡᠨ ᠬᠡᠳᠦᠢ ᠨᠠᠰᠤᠯᠠᠨᠠ ᠭᠡᠵᠦ ᠰᠠᠨᠠᠳᠠᠭ ᠤᠤ?
ᠠᠮᠠᠷᠠᠯᠲᠠ ᠪᠣᠯᠵᠤ ᠪᠠᠶ᠋ᠢᠨᠠ ᠠᠪᠤ ᠡᠵᠢ ᠳ᠋ᠡᠭᠡᠨ ᠣᠴᠢᠭᠠᠷᠠᠢ᠂
ᠠᠭᠤᠯᠵᠠᠭᠠᠳ ᠦᠨᠦᠰᠦᠭᠦᠯ!ᠦᠵᠡᠭᠰᠡᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠶᠠᠷᠢ᠃
ᠲᠡᠳᠡᠨ ᠳ᠋ᠦ᠍ ᠪᠠᠶᠠᠷ ᠪᠣᠯᠤᠨᠠ᠂
ᠲᠠᠨ ᠳ᠋ᠤ᠌ ᠪᠤᠶᠠᠨ ᠪᠣᠯᠤᠨᠠ᠃
ᠠᠮᠠᠨ ᠤ᠋ ᠪᠡᠯᠭᠡ ᠬᠠᠮᠢᠭᠠᠰᠢ ᠪᠠᠨ ᠪᠣᠯ᠂
ᠠᠰᠢᠳᠠ ᠶ᠋ᠢᠨ ᠪᠡᠯᠭᠡ ᠲᠡᠶ᠋ᠢᠰᠢ ᠪᠡᠨ ᠭᠡᠳᠡᠭ᠃
ᠡᠪᠡᠳᠴᠢᠨ ᠲᠡᠢ ᠬᠡᠪᠲᠡᠵᠦ ᠪᠠᠶ᠋ᠢᠬᠰᠠᠨ ᠬᠥᠮᠦᠨ ᠊ᠢ ᠬᠡᠶ᠋ᠢᠰᠴᠦ ᠢᠷᠡᠭᠰᠡᠨ ᠡᠪᠡᠳᠴᠢᠨ ᠴᠢᠨᠢ ᠬᠣᠭ ᠦᠭᠡᠢ ᠠᠷᠢᠯᠤᠭ᠂
ᠬᠡᠶ᠋ᠢᠮᠣᠷᠢ ᠴᠣᠭ ᠴᠢᠨᠢ ᠮᠠᠨᠳᠤᠵᠤ
ᠬᠡᠵᠢᠶᠡᠳᠡ ᠡᠷᠡᠭᠦᠯ ᠶᠠᠪᠤᠭ! ᠭᠡᠵᠦ ᠢᠷᠦᠭᠡᠬᠦ ᠳ᠋ᠦ᠍ ᠳᠣᠣᠷᠠ ᠪᠠᠨ ᠴᠣᠭ ᠵᠢᠪᠬᠤᠭᠠ ᠨᠢ ᠰᠠᠶ᠋ᠢᠵᠢᠷᠠᠨ ᠬᠦᠴᠦ ᠲᠠᠮᠢᠷ ᠨᠢ ᠨᠡᠮᠡᠭᠲᠡᠭᠰᠡᠨ ᠰᠢᠭ ᠪᠣᠯᠤᠨᠠ᠃
ᠢᠷᠦᠭᠡᠯ ᠪᠡᠯᠭᠡᠳᠡᠯ ᠊ᠢ ᠮᠣᠩᠭᠣᠯᠴᠤᠳ ᠢᠷᠡᠭᠡᠳᠦᠢ ᠶ᠋ᠢᠨ ᠠᠵᠢᠯ ᠦᠢᠯᠡᠰ ᠰᠠᠢᠨ ᠰᠠᠢᠬᠠᠨ ᠤ᠋ ᠬᠥᠲᠥᠯᠦᠭᠴᠢ ᠪᠡᠷ ᠦᠵᠡᠳᠡᠭ᠃
ᠮᠣᠩᠭᠣᠯ ᠬᠥᠮᠦᠨ ᠪᠡᠯᠡᠭ ᠢ᠋ᠶ᠋ᠡᠷ ᠭᠡᠳᠡᠭ ᠨᠢ ᠡᠶ᠋ᠢᠮᠦ ᠤᠴᠢᠷ ᠲᠠᠢ ᠶᠤᠮ᠃
ᠦᠰᠦᠭ ᠬᠠᠳᠠᠭᠴᠢ᠄ᠲᠣᠲᠣᠭᠡᠷᠡᠯ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠱᠠᠭᠰᠠᠯ
ᠬᠢᠨᠠᠭᠴᠢ᠄ ᠣᠤᠠᠬᠠᠨᠰᠣᠠ ᠂ ᠠᠯᠲᠠᠨ ᠠᠭᠤᠯᠠ