ᠰᠡᠭᠦᠯ ᠰᠢᠷᠪᠠᠲᠠᠭ ᠴᠢᠨᠣᠠ（ ᠬᠡᠯᠡ ᠪᠢᠴᠢᠭ – ᠶᠢᠰᠦᠳᠦᠭᠡᠷ ᠳᠡᠪᠲᠡᠷ）Сүүл шарвадаг чоно（ Хэл бичиг – Есдүгээр дэвтэр）
591ᠰᠡᠭᠦᠯ ᠰᠢᠷᠪᠠᠲᠠᠭ ᠴᠢᠨᠣᠠ
ᠴᠢᠨᠣᠠ ᠤᠨᠠᠭᠤᠯᠢ ᠳ᠋ᠤ᠌ ᠤᠨᠠᠭᠠᠳ ᠬᠡᠷᠬᠢᠨ ᠦᠰᠦᠷᠦᠭᠰᠡᠨ ᠴᠦ᠍ ᠭᠠᠷᠴᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠬᠥᠭᠰᠢᠨ ᠬᠣᠨᠢ ᠴᠠᠭᠠᠨᠠ ᠠ᠋ᠴᠠ ᠠᠯᠭᠤᠷ ᠠᠯᠬᠤᠵᠤ ᠢᠷᠡᠬᠦ ᠶ᠋ᠢ ᠴᠢᠨᠣᠠ ᠬᠠᠷᠠᠭᠠᠳ ᠶᠡᠬᠡᠳᠡ ᠪᠠᠶᠠᠷᠯᠠᠵᠤ᠄
《 ᠨᠠᠶ᠋ᠢᠵᠠ ᠠ᠋ ᠬᠦ᠌ ! ᠨᠥᠬᠥᠷᠯᠡᠯ ᠢ᠋ᠶ᠋ᠡᠨ ᠪᠣᠳᠣᠪᠠᠯ ᠨᠠᠳᠠ ᠵᠢᠭᠠᠬᠠᠨ ᠲᠤᠰᠠᠯᠠᠭᠠᠴᠢ ! 》ᠭᠡᠵᠦ ᠳᠠᠭᠤᠳᠠᠪᠠ᠃
ᠬᠥᠭᠰᠢᠨ ᠬᠣᠨᠢ᠄《 ᠴᠢ ᠬᠡᠨ ᠭᠡᠭᠴᠢ ᠪᠣᠢ ? ᠶᠠᠭᠠᠬᠢᠭᠠᠳ ᠠᠩᠴᠢᠨ ᠤ᠋ ᠤᠨᠠᠭᠤᠯᠢ ᠳ᠋ᠤ᠌ ᠤᠨᠠᠴᠢᠬᠠᠪᠠ ? 》ᠭᠡᠵᠦ ᠠᠰᠠᠭᠤᠪᠠ᠃
ᠴᠢᠨᠣᠠ ᠰᠢᠳᠤᠷᠭᠤ ᠨᠢᠭᠦᠯᠡᠰᠦᠩᠭᠦᠢ ᠳᠦᠷᠢ ᠪᠡᠷ ᠣᠪᠯᠠᠵᠤ ᠄
《 ᠴᠢ ᠲᠠᠨᠢᠬᠤ ᠦᠭᠡᠢ ᠶᠦ᠍ᠮ ᠦᠦ ? ᠪᠢ ᠪᠣᠯ ᠨᠢᠭᠡ ᠰᠢᠳᠤᠷᠭᠤ ᠨᠣᠬᠠᠢ ᠶᠤᠮ ᠰᠢᠦ᠃ ᠤᠨᠠᠭᠤᠯᠢ ᠳ᠋ᠤ᠌ ᠤᠨᠠᠭᠰᠠᠨ ᠲᠠᠬᠢᠶᠠ ᠶ᠋ᠢ ᠠᠪᠤᠷᠠᠬᠤ ᠪᠠᠷ ᠪᠡᠶᠡ ᠪᠡᠨ ᠴᠥᠯᠡᠨ ᠦᠰᠦᠷᠴᠦ ᠣᠷᠣᠭᠠᠳ ᠭᠠᠷᠴᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠴᠢᠬᠠᠪᠠ᠃ ᠠᠢ ! ᠡᠨᠡᠷᠢᠩᠭᠦᠢ ᠰᠡᠳᠬᠢᠯᠲᠡᠨ ᠮᠢᠨᠢ ᠨᠠᠮᠠᠶ᠋ᠢ ᠬᠥᠭᠡᠷᠦᠬᠦᠶ᠋ᠢᠯᠡᠭᠡᠴᠢ ᠳᠡ ! 》ᠭᠡᠪᠡ᠃
ᠬᠥᠭᠰᠢᠨ ᠬᠣᠨᠢ ᠲᠡᠭᠦᠨ ᠊ᠢ ᠠᠵᠢᠬᠯᠠᠰᠬᠢᠭᠠᠳ᠄
《 ᠴᠢ ᠦᠨᠡᠬᠡᠷ ᠨᠣᠬᠠᠢ ᠭᠡᠵᠦ ᠤᠤ ? ᠶᠠᠭᠠᠬᠢᠭᠠᠳ ᠴᠢᠨᠣᠠ ᠲᠠᠢ ᠲᠥᠰᠲᠡᠢ ᠶᠦ᠍ᠮ ᠪᠣᠢ ? ᠨᠠᠮᠠᠶ᠋ᠢ ᠶᠠᠭᠤᠨ ᠳ᠋ᠤ᠌ ᠴᠢᠨᠣᠠ ᠶ᠋ᠢᠨ ᠬᠠᠷᠠᠴᠠ ᠪᠠᠷ ᠬᠠᠷᠠᠬᠤ ᠨᠢ ᠪᠣᠢ ? 》 ᠭᠡᠵᠦ ᠢᠲᠡᠭᠡᠯ ᠮᠠᠭᠤᠲᠠᠶ᠋ᠢᠬᠠᠨ ᠠᠰᠠᠭᠤᠪᠠ ᠃
ᠴᠢᠨᠣᠠ ᠶᠠᠭᠠᠷᠠᠨ ᠨᠢᠳᠦ ᠪᠡᠨ ᠠᠨᠢᠵᠤ᠄
《 ᠪᠢ ᠪᠣᠯ ᠴᠢᠨᠣᠠ ᠪᠠᠷᠢᠳᠠᠭ ᠨᠣᠬᠠᠢ ᠪᠣᠯᠬᠣᠷ ᠴᠢᠨᠣᠠ ᠲᠠᠢ ᠪᠠᠬᠠᠨ ᠲᠥᠰᠲᠡᠢ ᠶᠦ᠍ᠮ᠃ ᠭᠡᠪᠡᠴᠦ ᠴᠢ ᠪᠤᠤ ᠰᠡᠵᠢᠭᠯᠡᠭᠡᠴᠢ᠂ ᠪᠢ ᠪᠣᠯ ᠥᠪ ᠦᠨᠡᠨ ᠨᠣᠬᠠᠢ ᠰᠢᠦ᠃ ᠪᠢ ᠮᠠᠰᠢ ᠡᠶᠡᠯᠰᠡᠭ ᠵᠠᠩ ᠲᠠᠢ᠃ ᠪᠢ ᠪᠠᠰᠠ ᠰᠡᠭᠦᠯ ᠢ᠋ᠶ᠋ᠡᠨ ᠰᠢᠷᠪᠠᠵᠤ ᠴᠢᠳᠠᠨᠠ᠃ ᠴᠢ ᠢᠲᠡᠭᠡᠬᠦ ᠦᠭᠡᠢ ᠪᠣᠯ ᠬᠠᠷᠠᠵᠤ ᠪᠠᠢ᠂ ᠪᠢ ᠴᠢᠮᠠ ᠳ᠋ᠤ᠌ ᠰᠡᠭᠦᠯ ᠰᠢᠷᠪᠠᠵᠤ ᠦᠭᠭᠦᠶᠡ 》ᠭᠡᠪᠡ᠃
ᠴᠢᠨᠣᠠ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠪᠠᠲᠤᠯᠠᠬᠤ ᠪᠠᠷ ᠱᠣᠳᠣᠩ ᠰᠡᠭᠦᠯ ᠢ᠋ᠶ᠋ᠡᠨ ᠬᠡᠳᠦᠨᠲᠡ ᠰᠢᠷᠪᠠᠵᠤ ᠭᠠᠷᠪᠠ᠃《 ᠫᠠᠰ ᠫᠠᠰ ᠫᠠᠰ 》ᠬᠢᠲᠡᠯᠡ ᠰᠢᠷᠪᠠᠬᠤ ᠶ᠋ᠢ ᠨᠢ ᠳᠠᠭᠠᠵᠤ ᠤᠨᠠᠭᠤᠯᠢ ᠳᠣᠲᠣᠷᠠᠬᠢ ᠲᠣᠭᠣᠰᠣ ᠰᠢᠷᠣᠢ ᠪᠤᠵᠢᠭᠢᠨᠠᠪᠠ᠃
ᠬᠥᠭᠰᠢᠨ ᠬᠣᠨᠢ ᠠᠷᠤ ᠲᠠᠰᠢ ᠪᠠᠨ ᠤᠬᠤᠷᠢᠭᠠᠳ᠄
《 ᠴᠢᠨᠦ ᠰᠡᠭᠦᠯ ᠰᠢᠷᠪᠠᠳᠠᠭ ᠨᠢ ᠴᠦ᠍ ᠦᠨᠡᠨᠲᠡᠢ᠃ ᠭᠡᠲᠡᠯᠡ ᠰᠡᠭᠦᠯ ᠰᠢᠷᠪᠠᠳᠠᠭ ᠯᠠ ᠶᠤᠮ ᠪᠣᠯ ᠨᠣᠬᠠᠢ ᠭᠡᠵᠦ ᠢᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ᠃ ᠴᠢ ᠬᠡᠨ · ᠴᠢ ᠦᠨᠡᠬᠡᠷ ᠨᠣᠬᠠᠢ ᠭᠡᠵᠦ ᠤᠤ ? 》ᠭᠡᠪᠡ᠃
ᠴᠢᠨᠣᠠ ᠪᠠᠬᠠᠨ ᠰᠠᠨᠳᠤᠷᠴᠤ᠄
《 ᠦᠨᠡᠨ ᠠ᠋ ᠦᠨᠡᠨ᠂ ᠢᠲᠡᠭᠡᠬᠦ ᠦᠭᠡᠢ ᠪᠣᠯ ᠠᠮᠠᠯᠳᠠᠪᠠᠴᠤ ᠪᠣᠯᠤᠨᠠ᠃ ᠲᠦᠷᠭᠡᠯᠡᠭᠡᠴᠢ᠂ ᠲᠦᠷᠭᠡᠯᠡᠭᠡᠴᠢ ! ᠨᠥᠬᠥᠷᠯᠡᠯ ᠢ᠋ᠶ᠋ᠡᠨ ᠪᠣᠳᠣᠪᠠᠯ ᠨᠠᠳᠠ ᠲᠤᠰᠠᠯᠠᠭᠠᠴᠢ · ᠴᠢ ᠬᠥᠯ ᠢ᠋ᠶ᠋ᠡᠨ ᠰᠤᠩᠭᠠᠭᠠᠳ ᠥᠭᠪᠡᠯ ᠪᠣᠯᠴᠢᠬᠠᠨᠠ᠃ ᠪᠢ ᠭᠠᠷᠴᠤ ᠣᠴᠢᠪᠠᠯ ᠠᠴᠢ ᠶ᠋ᠢ ᠴᠢᠨᠢ ᠬᠠᠷᠢᠭᠤᠯᠤᠨᠠ᠃ ᠪᠢ ᠦᠰᠦ ᠶ᠋ᠢ ᠴᠢᠨᠢ ᠢᠯᠢᠵᠦ ᠪᠥᠭᠡᠰᠦ ᠶ᠋ᠢ ᠴᠢᠨᠢ ᠠᠯᠠᠵᠤ ᠦᠭᠭᠦᠨᠡ ᠃ ᠦᠨᠡᠨ ᠰᠢᠦ᠂ ᠪᠢ ᠬᠣᠨᠢᠨ ᠳ᠋ᠤ᠌ ᠲᠤᠩ ᠬᠠᠶ᠋ᠢᠷᠠᠲᠠᠢ᠂ ᠢᠯᠠᠩᠭᠤᠶᠠ ᠬᠥᠭᠰᠢᠨ ᠬᠣᠨᠢᠨ ᠳ᠋ᠤ᠌ ᠣᠨᠴᠠ ᠬᠠᠶ᠋ᠢᠷᠠᠲᠠᠢ ᠶᠤᠮ 》 ᠭᠡᠵᠦ ᠪᠠᠴᠢᠮᠳᠠᠨ ᠬᠡᠯᠡᠪᠡ᠃
ᠬᠥᠭᠰᠢᠨ ᠬᠣᠨᠢ ᠪᠠᠰᠠ ᠰᠡᠵᠢᠭ ᠠᠷᠢᠯᠤᠭᠰᠠᠨ ᠦᠭᠡᠢ ᠳᠠᠬᠢᠨ ᠨᠢᠭᠡ ᠠᠯᠬᠤᠮ ᠤᠬᠤᠷᠢᠭᠠᠳ᠄
《 ᠪᠠᠶ᠋ᠢᠵᠠ · ᠪᠢ ᠪᠣᠳᠣᠯᠬᠢᠯᠠᠵᠤ ᠦᠵᠡᠶᠡ 》ᠭᠡᠪᠡ ᠃
ᠡᠨᠡ ᠦᠶᠡ ᠳ᠋ᠦ᠍ ᠴᠢᠨᠣᠠ ᠨᠢᠭᠡᠨᠲᠡ ᠪᠤᠷᠤᠩᠬᠤᠢ ᠨᠢ ᠬᠥᠳᠡᠯᠵᠦ ᠠᠮᠠ ᠪᠠᠨ ᠠᠩᠭᠠᠶ᠋ᠢᠨ ᠰᠣᠶᠣᠭᠠ ᠪᠠᠨ ᠶᠣᠷᠲᠣᠶ᠋ᠢᠯᠭᠠᠭᠠᠳ᠄
《 ᠮᠠᠭᠤ ᠬᠥᠭᠰᠢᠨ ᠭᠠᠶ᠋ᠢᠬᠠᠯ ᠴᠢ ! ᠲᠦᠷᠭᠡᠨ ᠨᠡᠰᠢ ᠪᠡᠨ ᠢᠷᠡᠬᠦ ᠦᠭᠡᠢ ᠶᠦ᠍ᠮ ᠤᠤ ? 》ᠭᠡᠵᠦ ᠵᠠᠩᠳᠤᠷᠪᠠ᠃
ᠬᠥᠭᠰᠢᠨ ᠬᠣᠨᠢ ᠲᠡᠭᠦᠨ ᠊ᠢ ᠬᠢᠨᠠᠮᠠᠭᠠᠢ ᠬᠠᠷᠠᠵᠤ ᠠᠪᠤᠭᠰᠠᠨ ᠢ᠋ᠶ᠋ᠠᠨ ᠯᠠᠪ ᠯᠠᠪᠳᠠᠭᠤᠨ ᠢ᠋ᠶ᠋ᠠᠷ᠄
《 ᠴᠢ ᠴᠢᠨᠢ ᠴᠢᠨᠣᠠ ᠶᠤᠮ ᠪᠠᠶ᠋ᠢᠨᠠ ᠳᠠ᠂ ᠪᠢ ᠰᠣᠶᠣᠭᠠ ᠶ᠋ᠢ ᠴᠢᠨᠢ ᠬᠠᠷᠠᠯᠠ᠃ ᠨᠢᠳᠤᠨᠤᠨ ᠴᠢ ᠠᠮᠢ ᠶ᠋ᠢ ᠮᠢᠨᠢ ᠠᠪᠤᠨ ᠠᠯᠳᠠᠭᠰᠠᠨ ᠶᠤᠮ᠃ ᠣᠳᠣ ᠴᠢ ᠶᠠᠭᠠᠬᠢᠵᠤ ᠪᠠᠰᠢᠷᠯᠠᠭᠰᠠᠨ ᠴᠤ᠌ ᠮᠡᠬᠡᠯᠡᠵᠦ ᠴᠢᠳᠠᠬᠤ ᠠ᠋ᠴᠠ ᠬᠣᠯᠠᠳᠴᠠᠢ᠃ ᠵᠠ· ᠪᠠᠶᠠᠷᠲᠠᠢ ! 》ᠭᠡᠵᠦ ᠬᠡᠯᠡᠭᠡᠳ ᠴᠢᠨᠠᠭᠰᠢ ᠣᠳᠪᠠ᠃
ᠢᠷᠡᠯᠲᠡ ᠄
ᠲᠠᠪᠤᠨ ᠵᠢᠯ ᠦ᠋ᠨ ᠳᠦᠷᠢᠮᠲᠦ ᠪᠠᠭᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠦᠵᠡᠬᠦ < ᠬᠡᠯᠡ ᠪᠢᠴᠢᠭ > ᠶᠢᠰᠦᠳᠦᠭᠡᠷ ᠳᠡᠪᠲᠡᠷ ※
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ ᠨᠠᠶ᠋ᠢᠷᠠᠭᠤᠯᠤᠨ ᠬᠡᠪᠯᠡᠭᠦᠯᠪᠡ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠢᠨᠬᠤᠸᠠ ᠨᠣᠮ ᠤ᠋ᠨ ᠳᠡᠯᠭᠡᠭᠦᠷ ᠲᠠᠷᠬᠠᠭᠠᠪᠠ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠮᠣᠩᠭᠣᠯ ᠪᠢᠴᠢᠭ ᠬᠡᠪᠯᠡᠬᠦ ᠦᠢᠯᠡᠳᠪᠦᠷᠢ ᠬᠡᠪᠯᠡᠪᠡ
1981 ᠣᠨ ᠤ᠋ 5 ᠰᠠᠷᠠ ᠳ᠋ᠤ᠌ ᠬᠣᠶᠠᠳᠤᠭᠠᠷ ᠬᠡᠪ ᠢ᠋ ᠬᠢᠪᠡ
1984 ᠣᠨ ᠤ᠋ 4 ᠰᠠᠷᠠ ᠳ᠋ᠤ᠌ ᠳᠥᠷᠪᠡᠳᠦᠭᠡᠷ ᠤᠳᠠᠭᠠ ᠶ᠋ᠢᠨ ᠬᠡᠪᠯᠡᠯ ᠡᠴᠡ ᠰᠣᠩᠭᠣᠪᠠ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠦᠵᠢᠶᠡᠳ · ᠡᠷᠲᠡᠨᠢᠴᠡᠴᠡᠭ᠌
ᠬᠢᠨᠠᠭᠴᠢ ᠄ ᠣᠤᠠᠬᠠᠨᠰᠣᠠ ᠂ ᠲᠣ᠋ · ᠨᠠᠨᠳᠢᠨ
2023᠂ 03᠂ 23