ᠬᠠᠭᠠᠨ ᠪ ᠰᠢᠨᠡ ᠬᠤᠪᠴᠠᠰᠤ（ ᠬᠡᠯᠡ ᠪᠢᠴᠢᠭ – ᠶᠢᠰᠦᠳᠦᠭᠡᠷ ᠳᠡᠪᠲᠡᠷ）Хааны шинэ хувцас（ Хэл бичиг – Есдүгээр дэвтэр）
461ᠬᠠᠭᠠᠨ ᠪ ᠰᠢᠨᠡ ᠬᠤᠪᠴᠠᠰᠤ
ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌ ᠨᠢᠭᠡᠨ ᠬᠠᠭᠠᠨ ᠪᠠᠶ᠋ᠢᠵᠢ ᠪᠢᠯᠡ᠃ ᠲᠡᠷᠡ ᠬᠠᠭᠠᠨ ᠰᠢᠨᠡ ᠰᠠᠢᠬᠠᠨ ᠬᠤᠪᠴᠠᠰᠤᠨ ᠳ᠋ᠤ᠌ ᠮᠠᠰᠢ ᠳᠤᠷᠠ ᠲᠠᠢ ᠲᠤᠯᠠ ᠬᠠᠮᠤᠭ ᠮᠥᠩᠭᠥ ᠪᠡᠨ ᠬᠤᠪᠴᠠᠰᠤᠨ ᠤ᠋ ᠲᠥᠯᠥᠭᠡ ᠦᠷᠡᠳᠡᠭ ᠪᠥᠭᠡᠳ ᠴᠡᠷᠢᠭ ᠢ᠋ᠶ᠋ᠡᠨ ᠣᠭᠲᠣ ᠪᠣᠳᠣᠬᠤ ᠦᠭᠡᠢ᠂ ᠲᠢᠶᠠᠲᠷ ᠲᠤ᠌ ᠣᠴᠢᠬᠤ ᠦᠭᠡᠢ᠂ ᠠᠩ ᠬᠦᠷᠦᠭᠡ ᠬᠢᠬᠦ ᠦᠭᠡᠢ ᠪᠠᠶ᠋ᠢᠲᠠᠭ ᠪᠠᠶ᠋ᠢᠵᠠᠢ᠃ ᠬᠠᠭᠠᠨ ᠰᠢᠨᠡ ᠬᠤᠪᠴᠠᠰᠤ ᠪᠠᠨ ᠦᠵᠡᠭᠦᠯᠬᠦ ᠳ᠋ᠦ᠍ ᠬᠡᠷᠡᠭ ᠲᠡᠢ ᠪᠣᠯ ᠡᠳᠡᠭᠡᠷ ᠊ᠢ ᠬᠠᠶᠠ ᠰᠠᠨᠠᠨᠠ᠃ ᠡᠳᠦᠷ ᠪᠣᠯ ᠴᠠᠭ ᠪᠦᠷᠢ ᠳ᠋ᠦ᠍ ᠡᠮᠦᠰᠬᠦ ᠲᠤᠰᠬᠠᠢ ᠬᠤᠪᠴᠠᠰᠤ ᠲᠠᠢ ᠠᠭᠰᠠᠨ ᠪᠢᠯᠡ᠃ ᠪᠤᠰᠤᠳ ᠬᠠᠭᠠᠨ ᠸᠠᠩ ᠦ᠋ᠳ ᠊ᠢ ᠶᠡᠬᠡ ᠴᠢᠭᠤᠯᠭᠠᠨ ᠤ᠋ ᠲᠠᠩᠬᠢᠮ ᠳ᠋ᠤ᠌ ᠪᠣᠢ ᠭᠡᠳᠡᠭ ᠪᠣᠯ᠂ ᠡᠨᠡ ᠬᠠᠭᠠᠨ ᠊ᠢ ᠬᠠᠭᠠᠨ ᠬᠤᠪᠴᠠᠰᠤ ᠡᠮᠦᠰᠬᠦ ᠲᠠᠩᠬᠢᠮ ᠳ᠋ᠤ᠌ ᠰᠠᠭᠠᠲᠠᠵᠤ ᠪᠣᠢ ᠭᠡᠳᠡᠭ ᠪᠢᠯᠡ᠃
ᠬᠠᠭᠠᠨ ᠤ᠋ ᠶᠡᠬᠡ ᠨᠡᠶ᠋ᠢᠰᠯᠡᠯ ᠳ᠋ᠦ᠍ ᠣᠯᠠᠨ ᠴᠥᠮ ᠵᠢᠷᠭᠠᠯ ᠴᠡᠩᠭᠡᠯ ᠢ᠋ᠶ᠋ᠡᠷ ᠰᠠᠭᠤᠳᠠᠭ ᠪᠥᠭᠡᠳ ᠡᠳᠦᠷ ᠪᠦᠷᠢ ᠭᠠᠳᠠᠭᠠᠳᠤ ᠶ᠋ᠢᠨ ᠬᠥᠮᠦᠰ ᠣᠯᠠᠨ ᠢᠷᠡᠨᠡ᠃ ᠨᠢᠭᠡᠨ ᠡᠳᠦᠷ ᠬᠣᠶᠠᠷ ᠯᠤᠶ᠋ᠢᠪᠠᠷᠴᠢᠨ ᠢᠷᠡᠵᠦ᠄
《 ᠪᠢᠳᠡ ᠪᠣᠯ ᠲᠠᠩᠰᠤᠭ ᠡᠳ᠋ ᠲᠣᠷᠭᠠ ᠶ᠋ᠢ ᠨᠡᠬᠡᠳᠡᠭ ᠬᠥᠮᠦᠨ ᠮᠥᠨ᠃ ᠮᠠᠨ ᠤ᠋ ᠨᠡᠬᠡᠭᠰᠡᠨ ᠬᠬᠢᠪ ᠲᠣᠷᠭᠠᠨ ᠤ᠋ ᠥᠩᠭᠡ ᠬᠡ ᠶᠢᠷᠲᠢᠨᠴᠦ ᠳ᠋ᠦ᠍ ᠬᠣᠣᠰ ᠦᠭᠡᠢ ᠰᠠᠶᠢᠬᠠᠨ ᠠ᠋ᠴᠠ ᠭᠠᠳᠠᠨᠠ ᠪᠠᠰᠠ ᠨᠢᠭᠡ ᠵᠦᠢᠯ ᠦ᠋ᠨ ᠡᠷᠳᠡᠮ ᠪᠣᠢ᠃ ᠲᠡᠷᠡ ᠡᠳ᠋ ᠢ᠋ᠶ᠋ᠡᠷ ᠬᠢᠭᠰᠡᠨ ᠬᠤᠪᠴᠠᠰᠤ ᠶ᠋ᠢ ᠦᠬᠡᠨᠴᠡ ᠲᠡᠨᠡᠭ ᠪᠤᠶᠤ ᠡᠰᠡᠬᠦᠯᠡ ᠥᠪᠡᠷ ᠦ᠋ᠨ ᠲᠤᠰᠢᠶᠠᠯ ᠳ᠋ᠠᠭᠠᠨ ᠲᠡᠩᠴᠡᠬᠦ ᠦᠭᠡᠢ ᠬᠥᠮᠦᠨ ᠣᠯᠵᠤ ᠦᠵᠡᠳᠡᠭ ᠦᠭᠡᠢ ᠪᠢᠯᠡ 》ᠭᠡᠵᠦ ᠴᠤᠤ ᠲᠠᠷᠬᠠᠭᠠᠭᠰᠠᠨ ᠳ᠋ᠤ᠌ ᠬᠠᠭᠠᠨ ᠄ ᠠᠶᠠ᠂ ᠶᠠᠮᠠᠷ ᠰᠣᠨᠢᠨ ᠡᠷᠳᠡᠮ ᠲᠡᠢ ᠬᠤᠪᠴᠠᠰᠤ ᠪᠣᠢ ! ᠪᠢ ᠲᠡᠭᠦᠨ ᠊ᠢ ᠣᠯᠪᠠᠯ᠂ ᠮᠢᠨᠦ ᠤᠯᠤᠰ ᠤ᠋ᠨ ᠳᠣᠲᠣᠷᠠ ᠪᠣᠢ ᠰᠡᠴᠡᠨ ᠲᠡᠨᠡᠭ ᠬᠥᠮᠦᠨ ᠊ᠢ ᠢᠯᠭᠠᠨ ᠲᠠᠨᠢᠵᠤ᠂ ᠮᠢᠨᠦ ᠠᠯᠪᠠᠨ ᠤ᠋ ᠬᠥᠮᠦᠰ᠂ ᠨᠣᠭᠳᠠᠭᠰᠠᠨ ᠠᠯᠪᠠᠨ ᠲᠤᠰᠢᠶᠠᠯ ᠳ᠋ᠠᠭᠠᠨ ᠲᠡᠨᠭᠴᠡᠭᠰᠡᠨ ᠡᠰᠡᠬᠦ ᠶ᠋ᠢ ᠮᠡᠳᠡᠵᠦ ᠪᠣᠯᠤᠨᠠ ᠭᠡᠵᠦ ᠰᠡᠳᠬᠢᠪᠡ᠃
ᠪᠢ ᠡᠨᠡ ᠡᠳ᠋ ᠊ᠢ ᠨᠡᠬᠡᠭᠦᠯᠰᠦᠭᠡᠢ ᠭᠡᠵᠦ ᠲᠡᠷᠡ ᠬᠣᠶᠠᠷ ᠯᠤᠶ᠋ᠢᠪᠠᠷᠴᠢᠨ ᠳ᠋ᠤ᠌ ᠬᠠᠭᠠᠨ ᠰᠠᠩ ᠠ᠋ᠴᠠ ᠥᠴᠢᠨᠡᠨ ᠲᠥᠴᠢᠨᠡᠨ ᠮᠥᠩᠭᠥ ᠭᠠᠷᠭᠠᠵᠤ ᠥᠭᠭᠦᠭᠰᠡᠨ ᠳ᠋ᠦ᠍ ᠲᠡᠷᠡ ᠬᠣᠶᠠᠷ ᠪᠠᠴᠢᠲᠤ ᠯᠤᠶ᠋ᠢᠪᠠᠷᠴᠢᠨ ᠡᠮᠦᠨᠡ ᠪᠡᠨ ᠪᠥᠰ ᠨᠡᠬᠡᠬᠦ ᠮᠠᠰᠢᠨ ᠊ᠢ ᠬᠣᠶᠠᠷ ᠰᠠᠭᠤᠷᠢ ᠲᠠᠯᠪᠢᠵᠤ᠂ ᠬᠣᠭᠣᠰᠣᠨ ᠮᠠᠰᠢᠨ ᠤ᠋ ᠡᠮᠦᠨᠡ ᠶᠡᠬᠡ ᠯᠡ ᠬᠢᠴᠢᠶᠡᠨ ᠨᠡᠬᠡᠬᠦ ᠪᠠᠶ᠋ᠢᠲᠠᠯ ᠭᠠᠷᠭᠠᠨ ᠰᠠᠭᠤᠵᠤ᠂ ᠲᠡᠷᠢᠭᠦᠨ ᠵᠡᠷᠭᠡ ᠶ᠋ᠢᠨ ᠰᠠᠢᠨ ᠲᠣᠷᠭᠠ ᠮᠢᠨᠳᠠᠰᠤ᠂ ᠰᠢᠵᠢᠷ ᠠᠯᠲᠠ ᠶ᠋ᠢ ᠪᠠᠶ᠋ᠢᠨ ᠪᠠᠶ᠋ᠢᠨ ᠬᠠᠭᠠᠨ ᠰᠠᠩ ᠠ᠋ᠴᠠ ᠠᠪᠴᠢᠷᠠᠵᠤ᠂ ᠲᠤᠯᠤᠮ ᠳ᠋ᠠᠭᠠᠨ ᠬᠢᠵᠦ ᠬᠠᠭᠤᠴᠢᠨ ᠮᠠᠰᠢᠨ ᠤ᠋ ᠡᠮᠦᠨᠡ ᠬᠠᠷᠠᠩᠭᠤᠢ ᠰᠥᠨᠢ ᠪᠣᠯᠲᠠᠯᠠ ᠰᠠᠭᠤᠵᠤ ᠬᠢᠴᠢᠶᠡᠨ ᠨᠡᠬᠡᠬᠦ ᠳᠦᠷᠢ ᠦᠵᠡᠭᠦᠯᠦᠨᠡ᠃
ᠬᠠᠭᠠᠨ ᠡᠨᠡ ᠬᠣᠶᠠᠷ ᠬᠡᠴᠢᠨᠡᠨ ᠨᠡᠬᠡᠭᠰᠡᠨ ᠪᠣᠯ ᠭᠡᠵᠦ ᠪᠣᠳᠣᠪᠠ᠃ ᠭᠡᠲᠡᠯᠡ ᠲᠤᠰᠢᠶᠠᠯ ᠳ᠋ᠠᠭᠠᠨ ᠲᠡᠩᠴᠡᠬᠦ ᠦᠭᠡᠢ ᠪᠤᠶᠤ ᠲᠡᠨᠡᠭ ᠮᠠᠩᠬᠤᠤ ᠬᠥᠮᠦᠨ ᠪᠣᠯ ᠲᠡᠷᠡ ᠡᠳ᠋ ᠊ᠢ ᠣᠯᠵᠤ ᠦᠵᠡᠳᠡᠭ ᠦᠭᠡᠢ ᠭᠡᠵᠦ ᠰᠠᠨᠠᠵᠤ ᠳᠣᠲᠣᠷᠠ ᠪᠠᠨ ᠪᠠᠬᠠᠨ ᠡᠮᠢᠶᠡᠪᠡᠴᠦ ᠪᠢ ᠬᠤᠪᠢ ᠳ᠋ᠠᠭᠠᠨ ᠵᠣᠪᠠᠯᠲᠠ ᠦᠭᠡᠢ ᠪᠢᠵᠡ ᠭᠡᠵᠦ ᠰᠡᠳᠬᠢᠪᠡ᠃ ᠭᠡᠪᠡᠴᠦ ᠲᠡᠷᠡ ᠡᠳ᠋ ᠊ᠢ ᠪᠠᠶ᠋ᠢᠴᠠᠭᠠᠨ ᠦᠵᠡᠭᠦᠯᠦᠷᠡ ᠥᠭᠡᠷᠡ ᠬᠥᠮᠦᠨ ᠊ᠢ ᠲᠣᠮᠢᠯᠠᠬᠤ ᠪᠠᠷ ᠲᠣᠭᠲᠠᠪᠠ᠃ ᠨᠡᠶ᠋ᠢᠰᠯᠡᠯ ᠦ᠋ᠨ ᠣᠯᠠᠨ ᠲᠦᠮᠡᠨ ᠴᠥᠮ ᠲᠡᠷᠡ ᠨᠡᠬᠡᠵᠦ ᠪᠣᠢ ᠡᠳ᠋ ᠦ᠋ᠨ ᠭᠠᠶ᠋ᠢᠬᠠᠮᠰᠢᠬᠲᠤ ᠴᠢᠳᠠᠯ ᠊ᠢ ᠰᠣᠨᠣᠰᠤᠭᠰᠠᠨ ᠲᠤᠯᠠ ᠬᠥᠮᠦᠨ ᠪᠦᠷᠢ ᠠᠶ᠋ᠢᠯ ᠠᠶ᠋ᠢᠮᠠᠭ ᠤ᠋ᠨ ᠢ᠋ᠶ᠋ᠠᠨ ᠲᠡᠨᠡᠭ ᠊ᠢ ᠦᠵᠡᠬᠦ ᠭᠡᠵᠦ ᠶᠡᠬᠡ ᠬᠦᠯᠢᠶᠡᠨᠡ᠃ ᠬᠠᠭᠠᠨ᠄
《 ᠡᠪᠦᠭᠡᠨ ᠰᠢᠳᠠᠷ ᠰᠠᠶ᠋ᠢᠳ ᠢ᠋ᠶ᠋ᠠᠨ ᠶᠠᠪᠤᠭᠤᠯᠰᠤᠭᠠᠢ᠃ ᠲᠡᠷᠡ ᠪᠣᠯ ᠲᠤᠰᠢᠶᠠᠯ ᠳ᠋ᠠᠭᠠᠨ ᠴᠣᠬᠣᠮ ᠲᠡᠩᠴᠡᠬᠦ ᠰᠢᠳᠤᠷᠭᠤ ᠰᠡᠴᠡᠨ ᠬᠥᠮᠦᠨ ᠮᠥᠨ ᠲᠤᠯᠠ ᠲᠡᠷᠡ ᠡᠳ᠋ ᠊ᠢ ᠰᠠᠢᠨ ᠢ᠋ᠶ᠋ᠠᠷ ᠦᠵᠡᠵᠦ ᠴᠢᠳᠠᠬᠤ ᠪᠢᠯᠡ 》 ᠭᠡᠵᠦ ᠰᠠᠢᠬᠠᠨ ᠰᠠᠨᠠᠭᠠᠲᠤ ᠡᠪᠦᠭᠡᠨ ᠰᠠᠶ᠋ᠢᠳ ᠊ᠢ ᠶᠠᠪᠤᠭᠤᠯᠤᠭᠰᠠᠨ ᠳ᠋ᠤ᠌᠂ ᠡᠪᠦᠭᠡᠨ ᠰᠠᠶ᠋ᠢᠳ᠂ ᠲᠡᠷᠡ ᠬᠣᠶᠠᠷ ᠯᠤᠶ᠋ᠢᠪᠠᠷᠴᠢᠨ ᠤ᠋ ᠬᠣᠭᠣᠰᠣᠨ ᠮᠠᠰᠢᠨ ᠤ᠋ ᠡᠮᠦᠨᠡ ᠰᠠᠭᠤᠵᠤ ᠨᠡᠬᠡᠬᠦ ᠳᠦᠷᠢᠮ ᠦᠵᠡᠭᠦᠯᠦᠨ ᠪᠠᠶ᠋ᠢᠬ᠋ᠠ ᠭᠠᠵᠠᠷ ᠣᠴᠢᠭᠠᠳ᠂ ᠠᠢ ᠲᠡᠭᠷᠢ ᠮᠢᠨᠢ᠂ ᠨᠢᠳᠦᠨ ᠳ᠋ᠦ᠍ ᠦᠵᠡᠭᠳᠡᠬᠦ ᠶᠠᠭᠤᠮᠠ ᠠᠯᠠᠭᠠ ᠪᠠᠶ᠋ᠢᠨᠠ ᠰᠢᠦ ᠭᠡᠵᠦ ᠪᠣᠳᠣᠭᠠᠳ ᠨᠢᠳᠦ ᠪᠡᠨ ᠪᠦᠯᠲᠡᠶ᠋ᠢᠯᠭᠡᠨ ※ ᠦᠵᠡᠬᠦ ᠳ᠋ᠦ᠍ ᠲᠡᠷᠡ ᠬᠣᠶᠠᠷ ᠯᠤᠶ᠋ᠢᠪᠠᠷᠴᠢᠨ᠂ ᠡᠪᠦᠭᠡᠨ ᠰᠠᠶ᠋ᠢᠳ ᠊ᠢ ᠣᠶ᠋ᠢᠷᠠᠲᠤᠨ ᠢᠷᠡᠵᠦ ᠦᠵᠡᠭᠲᠦᠨ ᠭᠡᠵᠦ᠂ ᠬᠣᠭᠣᠰᠣᠨ ᠭᠠᠵᠠᠷ ᠵᠢᠭᠠᠵᠤ᠂ ᠡᠨᠡ ᠲᠣᠷᠭᠠᠨ ᠤ᠋ ᠥᠩᠭᠡ ᠬᠡ ᠰᠠᠢᠬᠠᠨ ᠪᠠᠶ᠋ᠢᠨᠠ ᠤᠤ ᠭᠡᠵᠦ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠬᠥᠭᠡᠷᠦᠬᠦᠢ ᠲᠡᠷᠡ ᠡᠪᠦᠭᠡᠨ ᠰᠠᠶ᠋ᠢᠳ᠂ ᠨᠢᠳᠦ ᠪᠡᠨ ᠪᠦᠯᠲᠡᠶ᠋ᠢᠲᠡᠯᠡ ᠦᠵᠡᠪᠡᠴᠦ ᠬᠣᠭᠣᠰᠣᠨ ᠭᠠᠵᠠᠷ ᠶᠠᠭᠤᠨ ᠪᠠᠶ᠋ᠢᠬᠤ ᠠᠵᠢ᠃ ᠳᠡᠮᠡᠢ ᠯᠡ ᠪᠤᠯᠲᠠᠶ᠋ᠢᠲᠠᠯᠠ ᠦᠵᠡᠵᠦ ᠦᠵᠡᠭᠡᠳ᠂ ᠠᠢ ᠲᠡᠭᠷᠢ ᠮᠢᠨᠢ᠂ ᠪᠢ ᠲᠡᠨᠡᠭ ᠮᠠᠩᠬᠤᠤ ᠪᠠᠶ᠋ᠢᠨᠠ ᠰᠢᠦ᠃ ᠡᠭᠦᠨ ᠊ᠢ ᠪᠤᠰᠤᠳ ᠲᠤ᠌ ᠮᠡᠳᠡᠭᠳᠡᠵᠦ ᠪᠣᠯᠬᠤ ᠦᠭᠡᠢ ᠰᠢᠦ᠃ ᠡᠰᠡᠬᠦᠯᠡ ᠪᠢ ᠲᠤᠰᠢᠶᠠᠯ ᠳ᠋ᠠᠭᠠᠨ ᠲᠡᠩᠴᠡᠬᠦ ᠦᠭᠡᠢ ᠪᠠᠶ᠋ᠢᠨᠠ ᠰᠢᠦ᠃ ᠶᠠᠭᠤ ᠴᠤ᠌ ᠪᠣᠯᠤᠭᠰᠠᠨ ᠡᠨᠡ ᠡᠳ᠋ ᠊ᠢ ᠦᠵᠡᠭᠰᠡᠨ ᠦᠭᠡᠢ ᠭᠡᠵᠦ ᠬᠡᠯᠡᠵᠦ ᠪᠣᠯᠬᠤ ᠦᠭᠡᠢ ᠭᠡᠵᠦ ᠪᠠᠶ᠋ᠢᠲᠠᠯᠠ ᠲᠡᠷᠡ ᠬᠣᠶᠠᠷ ᠪᠠᠴᠢᠲᠤ ᠯᠤᠶ᠋ᠢᠪᠠᠷᠴᠢᠨ ᠤ᠋ ᠨᠢᠭᠡ ᠨᠢ᠄
《 ᠲᠠ ᠶᠠᠭᠤᠨ ᠳ᠋ᠤ᠌ ᠦᠭᠡ ᠳᠠᠭᠤᠨ ᠦᠭᠡᠢ ᠪᠠᠶ᠋ᠢᠬᠤ ᠪᠣᠢ ? 》 ᠭᠡᠰᠡᠨ ᠳ᠋ᠦ᠍᠂ ᠡᠪᠦᠭᠡᠨ ᠰᠠᠶ᠋ᠢᠳ ᠨᠢᠳᠦᠨ ᠳ᠋ᠡᠭᠡᠨ ᠰᠢᠯ ᠵᠡᠭᠦᠵᠦ᠄
《 ᠠᠶᠠ᠂ ᠡᠨᠡ ᠶᠠᠭᠤᠲᠠᠢ ᠰᠠᠢᠬᠠᠨ ᠲᠣᠷᠭᠠ ᠪᠣᠢ᠂ ᠥᠩᠭᠡ ᠬᠡ ᠨᠢ ᠶᠠᠭᠤᠲᠠᠢ ᠰᠠᠢᠬᠠᠨ ᠪᠣᠢ᠃ ᠲᠠᠨ ᠤ᠋ ᠨᠡᠬᠡᠭᠰᠡᠨ ᠡᠨᠡ ᠡᠳ᠋ ᠮᠢᠨᠦ ᠰᠠᠨᠠᠭᠠᠨ ᠳ᠋ᠤ᠌ ᠶᠡᠬᠡ ᠯᠡ ᠨᠡᠢᠯᠡᠯᠴᠡᠭᠰᠡᠨ ᠊ᠢ ᠪᠢ ᠬᠠᠭᠠᠨ ᠳ᠋ᠤ᠌ ᠤᠯᠠᠮᠵᠢᠯᠠᠨ ᠠᠶ᠋ᠢᠯᠠᠳᠬᠠᠰᠤᠭᠠᠢ 》ᠭᠡᠪᠡ᠃ ᠲᠡᠷᠡ ᠬᠣᠶᠠᠷ ᠯᠤᠶ᠋ᠢᠪᠠᠷᠴᠢᠨ ᠡᠪᠦᠭᠡᠨ ᠰᠠᠶ᠋ᠢᠳ ᠲᠤ᠌ ᠲᠠᠯᠠ ᠥᠭᠴᠦ ᠶᠣᠰᠣᠯᠠᠭᠠᠳ᠂ ᠨᠡᠬᠡᠭᠰᠡᠨ ᠭᠡᠳᠡᠭ ᠲᠡᠷᠡ ᠡᠳ᠋ ᠦ᠋ᠨ ᠢ᠋ᠶ᠋ᠡᠨ ᠥᠩᠭᠡ ᠶ᠋ᠢ ᠵᠢᠭᠠᠵᠤ ᠶᠡᠷᠦ ᠪᠤᠰᠤ ᠶ᠋ᠢᠨ ᠬᠡ ᠶ᠋ᠢ ᠲᠠᠶ᠋ᠢᠯᠪᠤᠷᠢᠯᠠᠨ ᠬᠡᠯᠡᠭᠰᠡᠨ ᠳ᠋ᠦ᠍ ᠡᠪᠦᠭᠡᠨ ᠰᠠᠶ᠋ᠢᠳ ᠬᠢᠴᠢᠶᠡᠨ ᠰᠣᠨᠣᠰᠴᠤ ᠴᠡᠭᠡᠵᠢᠨ ᠳ᠋ᠡᠭᠡᠨ ᠲᠡᠮᠳᠡᠭᠯᠡᠭᠡᠳ᠂ ᠪᠤᠴᠠᠵᠤ ᠬᠠᠭᠠᠨ ᠳ᠋ᠠᠭᠠᠨ ᠮᠥᠨ ᠶᠣᠰᠣᠭᠠᠷ ᠨᠢ ᠠᠶ᠋ᠢᠯᠠᠤᠠᠬᠠᠪᠠ᠃
ᠲᠡᠷᠡ ᠬᠣᠶᠠᠷ ᠯᠤᠶ᠋ᠢᠪᠠᠷᠴᠢᠨ ᠡᠪᠦᠭᠡᠨ ᠰᠠᠶ᠋ᠢᠳ ᠊ᠢ ᠪᠤᠴᠠᠭᠰᠠᠨ ᠬᠣᠶ᠋ᠢᠨᠠ᠂ ᠠᠯᠲᠠ᠂ ᠮᠥᠩᠭᠥ᠂ ᠲᠣᠷᠭᠠ ᠶ᠋ᠢ ᠪᠠᠶ᠋ᠢᠨ ᠪᠠᠶ᠋ᠢᠨ ᠱᠠᠭᠠᠷᠳᠠᠨ᠂ ᠨᠡᠬᠡᠬᠦ ᠨᠢ ᠤᠷᠢᠳᠤᠬᠢ ᠠ᠋ᠴᠠ ᠨᠡᠩ ᠢᠯᠡᠭᠦᠦ ᠪᠣᠯᠤᠭᠠᠳ᠂ ᠠᠪᠴᠢᠷᠠᠭᠰᠠᠨ ᠪᠦᠭᠦᠳᠡ ᠶ᠋ᠢ ᠴᠥᠮ ᠥᠪᠡᠷ ᠦ᠋ᠨ ᠠᠪᠳᠠᠷᠠ ᠲᠤᠯᠤᠮ ᠳ᠋ᠠᠭᠠᠨ ᠬᠢᠬᠦ ᠲᠤᠯᠠ ᠮᠠᠰᠢᠨ ᠳᠡᠭᠡᠷᠡ ᠪᠡᠨ ᠲᠡᠷᠡ ᠠᠯᠲᠠ ᠮᠥᠩᠭᠥᠨ ᠡᠴᠡ ᠰᠢᠷᠬᠡᠭ ᠦ᠋ᠨ ᠲᠡᠳᠦᠢ ᠴᠦ᠍ ᠦᠭᠡᠢ᠂ ᠮᠥᠨ ᠯᠡ ᠤᠷᠢᠳᠤᠬᠢ ᠠᠳᠠᠯᠢ ᠬᠣᠭᠣᠰᠣᠨ ᠮᠠᠰᠢᠨ ᠤ᠋ ᠡᠮᠦᠨᠡ ᠰᠠᠭᠤᠵᠤ ᠶᠡᠬᠡ ᠯᠡ ᠬᠢᠴᠢᠶᠡᠨ ᠨᠡᠬᠡᠬᠦ ᠪᠠᠶ᠋ᠢᠲᠠᠯ ᠦᠵᠡᠭᠦᠯᠦᠨᠡ᠃
ᠬᠠᠭᠠᠨ ᠪᠠᠰᠠ ᠳᠠᠬᠢᠨ ᠨᠢᠭᠡ ᠲᠦᠰᠢᠮᠡᠯ ᠊ᠢ ᠶᠠᠪᠤᠭᠤᠯᠵᠤ ᠦᠵᠡᠭᠦᠯᠦᠭᠰᠡᠨ ᠳ᠋ᠦ᠍ ᠤᠷᠢᠳᠤᠬᠢ ᠰᠠᠶ᠋ᠢᠳ ᠤ᠋ᠨ ᠠᠳᠠᠯᠢ ᠪᠣᠯᠵᠤ ᠨᠢᠳᠦᠨ ᠦ᠌ ᠬᠠᠮᠤᠭ ᠬᠦᠴᠦᠨ ᠊ᠢ ᠰᠢᠪᠬᠠᠨ ᠭᠠᠷᠭᠠᠵᠤ᠂ ᠶᠠᠭᠠᠬᠢᠵᠤ ᠦᠵᠡᠪᠡᠴᠦ ᠬᠣᠭᠣᠰᠣᠨ ᠮᠠᠰᠢᠨ ᠠ᠋ᠴᠠ ᠥᠭᠡᠷᠡ ᠶᠠᠭᠤᠮᠠ ᠦᠵᠡᠭᠳᠡᠬᠦ ᠦᠭᠡᠢ ᠪᠠᠶ᠋ᠢᠪᠠ᠃ ᠭᠡᠲᠡᠯᠡ ᠬᠣᠶᠠᠷ ᠯᠤᠶ᠋ᠢᠪᠠᠷᠴᠢᠨ᠄
《 ᠮᠠᠨ ᠤ᠋ ᠨᠡᠬᠡᠵᠦ ᠪᠠᠶ᠋ᠢᠬ᠋ᠠ ᠡᠨᠡ ᠡᠳ᠋᠂ ᠠᠳᠠᠪᠠᠰᠢ(1) ᠲᠠᠩᠰᠤᠭ ᠰᠠᠢᠬᠠᠨ ᠡᠳ᠋ ᠪᠢᠵᠡ 》ᠭᠡᠳ ᠣᠭᠲᠣ ᠪᠠᠶ᠋ᠢᠬᠤ ᠦᠭᠡᠢ ᠡᠳ᠋ ᠦ᠋ᠨ ᠥᠩᠭᠡ ᠬᠡ ᠶ᠋ᠢ ᠲᠠᠶ᠋ᠢᠯᠪᠤᠷᠢᠯᠠᠨ ᠵᠢᠭᠠᠭᠰᠠᠨ ᠳ᠋ᠤ᠌ ᠲᠡᠷᠡ ᠲᠦᠰᠢᠮᠡᠯ᠄《 ᠪᠢ ᠲᠡᠨᠡᠭ ᠪᠢᠰᠢ ᠪᠢᠯᠡ᠂ ᠪᠣᠳᠣᠪᠠᠯ ᠡᠨᠡ ᠰᠠᠢᠬᠠᠨ ᠬᠡᠷᠬᠡᠮ ᠲᠤᠰᠢᠶᠠᠯ ᠳ᠋ᠠᠭᠠᠨ ᠲᠡᠩᠴᠡᠬᠦ ᠦᠭᠡᠢ ᠪᠠᠶ᠋ᠢᠬᠤ ᠨᠢ ᠪᠢᠵᠡ᠃ ᠡᠭᠦᠨ ᠊ᠢ ᠪᠢ ᠬᠥᠮᠦᠨ ᠳ᠋ᠦ᠍ ᠪᠤᠤ ᠮᠡᠳᠡᠭᠳᠡᠶᠡ 》ᠭᠡᠳ ᠦᠵᠡᠭᠰᠡᠨ ᠦᠭᠡᠢ ᠡᠳ᠋ ᠦ᠋ᠨ ᠥᠩᠭᠡ ᠬᠡ ᠶ᠋ᠢ ᠱᠠᠭᠰᠢᠨ ᠮᠠᠭᠲᠠᠭᠠᠳ᠂ ᠬᠠᠭᠠᠨ ᠳ᠋ᠠᠭᠠᠨ ᠣᠴᠢᠵᠤ ᠭᠠᠶ᠋ᠢᠬᠠᠮᠰᠢᠬᠲᠠᠢ ᠰᠠᠢᠬᠠᠨ ᠡᠳ᠋ ᠪᠠᠶ᠋ᠢᠨᠠ ᠭᠡᠵᠦ ᠠᠶ᠋ᠢᠯᠠᠤᠠᠬᠠᠪᠠ᠃
ᠬᠣᠲᠠ ᠶ᠋ᠢᠨ ᠣᠯᠠᠨ ᠬᠥᠮᠦᠨ ᠴᠥᠮ ᠡᠨᠡ ᠲᠠᠩᠰᠤᠭ ᠡᠳ᠋ ᠊ᠢ ᠭᠠᠶ᠋ᠢᠬᠠᠨ ᠬᠡᠯᠡᠯᠴᠡᠨᠡ᠃ ᠬᠠᠭᠠᠨ ᠥᠪᠡᠷ ᠢ᠋ᠶ᠋ᠡᠨ ᠲᠡᠷᠡ ᠡᠳ᠋ ᠊ᠢ ᠦᠵᠡᠰᠦᠭᠡᠢ ᠭᠡᠵᠦ ᠨᠢᠭᠡᠨ ᠡᠳᠦᠷ ᠤᠷᠢᠲᠠᠵᠤ ᠣᠴᠢᠭᠰᠠᠨ ᠲᠦᠰᠢᠮᠡᠯ ᠦ᠋ᠨ ᠬᠠᠮᠲᠤ᠂ ᠰᠢᠳᠠᠷ ᠲᠤ᠌ ᠶᠠᠪᠤᠬᠤ ᠣᠯᠠᠨ ᠊ᠢ ᠰᠣᠩᠭᠣᠨ ᠳᠠᠭᠠᠭᠤᠯᠵᠤ᠂ ᠲᠡᠷᠡ ᠬᠣᠶᠠᠷ ᠵᠠᠯᠢᠲᠤ ᠯᠤᠶ᠋ᠢᠪᠠᠷᠴᠢᠨ ᠤ᠋ ᠡᠮᠦᠨᠡ ᠣᠴᠢᠭᠰᠠᠨ ᠳ᠋ᠤ᠌᠂ ᠲᠡᠷᠡ ᠬᠣᠶᠠᠷ ᠬᠠᠭᠠᠨ ᠊ᠢ ᠦᠵᠡᠭᠡᠳ ᠤᠲᠠᠰᠤ ᠦᠭᠡᠢ ᠬᠣᠭᠣᠰᠣᠨ ᠮᠠᠰᠢᠨ ᠤ᠋ ᠡᠮᠦᠨᠡ ᠰᠠᠭᠤᠵᠤ᠂ ᠬᠠᠮᠤᠭ ᠴᠢᠳᠠᠯ ᠢ᠋ᠶ᠋ᠠᠨ ᠭᠠᠷᠭᠠᠵᠤ ᠨᠡᠬᠡᠬᠦ ᠳᠦᠷᠢ ᠦᠵᠡᠭᠦᠯᠦᠨᠡ᠃ ᠬᠣᠶᠠᠷ ᠰᠢᠳᠤᠷᠭᠤ ᠲᠦᠰᠢᠮᠡᠯ ᠣᠷᠣᠭᠰᠢ ᠳᠠᠪᠰᠢᠵᠤ᠂ ᠪᠤᠰᠤᠳ ᠬᠥᠮᠦᠨ ᠊ᠢ ᠲᠡᠷᠡ ᠨᠡᠬᠡᠵᠦ ᠪᠠᠶ᠋ᠢᠬ᠋ᠠ ᠡᠳ᠋ ᠊ᠢ ᠦᠵᠡᠬᠦ ᠪᠣᠯᠪᠠ ᠤᠤ ᠭᠡᠵᠦ ᠬᠣᠭᠣᠰᠣᠨ ᠮᠠᠰᠢᠨ ᠤ᠋ ᠵᠦᠭ ᠵᠢᠭᠠᠵᠤ᠄
《 ᠬᠠᠭᠠᠨᠲᠠᠨ ᠡᠨᠡ ᠭᠠᠶ᠋ᠢᠬᠮᠰᠢᠬᠲᠤ ᠡᠳ᠋ ᠦ᠋ᠨ ᠥᠩᠭᠡ ᠬᠡ ᠶ᠋ᠢ ᠠᠩᠬᠠᠷᠤᠨ ᠦᠵᠡᠮᠦ᠂ ᠦᠨᠡᠬᠡᠷ ᠭᠠᠶ᠋ᠢᠠᠬᠠᠮᠰᠢᠬᠲᠠᠢ ᠪᠤᠰᠤ ᠤᠤ ? 》 ᠭᠡᠰᠡᠨ ᠳ᠋ᠦ᠍ ᠬᠠᠭᠠᠨ ᠭᠠᠶ᠋ᠢᠬᠠᠨ᠄《 ᠠᠶᠠ᠂ ᠡᠨᠡ ᠶᠠᠮᠠᠷ ᠵᠢᠭᠲᠡᠢ ᠪᠣᠢ ? ᠮᠢᠨᠦ ᠨᠢᠳᠦᠨ ᠳ᠋ᠦ᠍ ᠶᠠᠭᠤᠮᠠ ᠣᠭᠲᠣ ᠦᠵᠡᠭᠳᠡᠬᠦ ᠦᠭᠡᠢ ᠪᠠᠶ᠋ᠢᠨᠠ᠃ ᠡᠨᠡ ᠶᠠᠮᠠᠷ ᠢᠷᠣᠠ ᠪᠣᠢ ? ᠪᠢ ᠲᠡᠨᠡᠭ ᠮᠠᠩᠬᠤᠤ ᠪᠣᠯᠪᠠ ᠤᠤ᠂ ᠡᠰᠡᠪᠡᠯ ᠪᠢ ᠬᠠᠭᠠᠨ ᠤ᠋ ᠲᠤᠰᠢᠶᠠᠯ ᠳ᠋ᠠᠭᠠᠨ ᠲᠡᠩᠴᠡᠬᠦ ᠦᠭᠡᠢ ᠪᠠᠶ᠋ᠢᠬᠤ ᠶᠤᠮ ᠤᠤ ? ᠡᠨᠡ ᠶᠠᠮᠠᠷ ᠬᠡᠴᠡᠭᠦᠦ ᠬᠡᠷᠡᠭ ᠪᠢᠯᠡ ! 》ᠭᠡᠳ ᠥᠨᠳᠥᠷ ᠳᠠᠭᠤ ᠪᠠᠷ᠄
《 ᠠᠶᠠ᠂ ᠶᠠᠭᠤᠲᠠᠢ ᠰᠠᠢᠬᠠᠨ ᠡᠳ᠋ ᠪᠣᠢ ? ᠮᠢᠨᠦ ᠰᠠᠨᠠᠭᠠᠨ ᠳ᠋ᠤ᠌ ᠴᠢᠪ ᠭᠡᠮᠡᠨ ᠨᠡᠶ᠋ᠢᠯᠡᠯᠴᠡᠪᠡ 》ᠭᠡᠵᠦ᠂ ᠲᠡᠷᠢᠭᠦᠨ ᠊ᠢ ᠵᠥᠪᠰᠢᠶᠡᠨ ᠭᠡᠬᠢᠵᠦ(2) ᠂ ᠬᠣᠭᠣᠰᠣᠨ ᠮᠠᠰᠢᠨ ᠊ᠢ ᠦᠵᠡᠨ ᠣᠭᠲᠣ ᠶᠠᠭᠤᠮᠠ ᠦᠵᠡᠭᠳᠡᠭᠰᠡᠨ ᠦᠭᠡᠢ ᠪᠡᠨ ᠬᠡᠯᠡᠭᠰᠡᠨ ᠦᠭᠡᠢ ᠳ᠋ᠦ᠍᠂ ᠣᠯᠠᠨ ᠳᠠᠭᠠᠭᠰᠠᠳ ᠨᠢ ᠴᠥᠮ ᠨᠢᠳᠦ ᠪᠡᠨ ᠪᠦᠯᠲᠡᠶ᠋ᠢᠲᠡᠯᠡ ᠪᠡᠨ ᠦᠵᠡᠪᠡᠴᠦ᠂ ᠣᠭᠲᠣ ᠶᠠᠭᠤᠮᠠ ᠣᠯᠵᠤ ᠦᠵᠡᠭᠰᠡᠨ ᠦᠭᠡᠢ ᠲᠤᠯᠠ ᠳᠡᠮᠡᠢ ᠯᠡ ᠬᠠᠭᠠᠨ ᠊ᠢ ᠳᠠᠭᠠᠵᠤ᠄
《 ᠠᠶᠠ᠂ ᠶᠠᠭᠤᠲᠠᠢ ᠰᠠᠢᠬᠠᠨ ᠪᠣᠢ ! ᠠᠶᠠ᠂ ᠶᠠᠭᠤᠲᠠᠢ ᠰᠠᠢᠬᠠᠨ ᠪᠣᠢ ! ᠦᠨᠡᠬᠡᠷ ᠭᠠᠶ᠋ᠢᠬᠠᠯᠲᠠᠢ᠂ ᠦᠨᠡᠬᠡᠷ ᠰᠠᠢᠬᠠᠨ ! 》ᠭᠡᠵᠦ ᠪᠦᠭᠦᠳᠡᠭᠡᠷ ᠶᠡᠬᠡ ᠯᠡ ᠪᠠᠶᠠᠷᠯᠠᠬᠤ ᠪᠠᠶ᠋ᠢᠲᠠᠯ ᠦᠵᠡᠭᠦᠯᠵᠦ᠂ ᠬᠠᠭᠠᠨ ᠊ᠢ ᠳᠠᠷᠠᠭᠠ ᠡᠳᠦᠷ ᠶᠡᠬᠡ ᠶᠣᠰᠣᠯᠠᠯ ᠢ᠋ᠶ᠋ᠠᠷ ᠵᠠᠯᠠᠷᠠᠬᠤ ᠳ᠋ᠠᠭᠠᠨ ᠡᠨᠡ ᠡᠳ᠋ ᠢ᠋ᠶ᠋ᠡᠷ ᠬᠢᠭᠰᠡᠨ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠦᠭᠲᠦᠨ ᠭᠡᠵᠦ ᠠᠶ᠋ᠢᠯᠠᠤᠠᠬᠠᠬᠰᠠᠨ ᠳ᠋ᠤ᠌ ᠬᠠᠭᠠᠨ ᠲᠡᠷᠡ ᠬᠣᠶᠠᠷ ᠯᠤᠶ᠋ᠢᠪᠠᠷᠴᠢᠨ ᠳ᠋ᠤ᠌ ᠭᠠᠪᠢᠶᠠᠨ ᠤ᠋ ᠵᠠᠭᠠᠯᠮᠠᠢ ᠲᠡᠮᠳᠡᠭ ᠱᠠᠩᠨᠠᠵᠤ᠂《 ᠬᠠᠭᠠᠨ ᠤ᠋ ᠰᠢᠳᠠᠷ ᠨᠠᠷᠢᠨ ᠨᠡᠬᠡᠭᠴᠢᠳ 》ᠭᠡᠵᠦ ᠴᠣᠯᠠ ᠥᠭᠪᠡ᠃ ᠶᠣᠰᠣᠯᠠᠯ ᠤ᠋ᠨ ᠤᠷᠢᠳ ᠰᠥᠨᠢ ᠲᠡᠷᠡ ᠬᠣᠶᠠᠷ ᠯᠤᠶ᠋ᠢᠪᠠᠷᠴᠢᠨ ᠨᠣᠶ᠋ᠢᠷ ᠦᠭᠡᠢ ᠬᠣᠨᠣᠵᠤ᠂ ᠠᠷᠪᠠ ᠭᠠᠷᠤᠢ ᠯᠠ ᠰᠢᠲᠠᠭᠠᠨ᠂ ᠬᠠᠭᠠᠨ ᠳ᠋ᠤ᠌ ᠰᠢᠨᠡ ᠬᠤᠪᠴᠠᠰᠤ ᠣᠶᠣᠵᠤ ᠪᠠᠶ᠋ᠢᠬᠤ ᠪᠠᠶ᠋ᠢᠲᠠᠯ ᠦᠵᠡᠭᠦᠯᠵᠦ ᠬᠣᠭᠣᠰᠣᠨ ᠮᠠᠰᠢᠨ ᠠ᠋ᠴᠠ ᠨᠡᠬᠡᠭᠰᠡᠨ ᠡᠳ᠋ ᠊ᠢ ᠠᠪᠬᠤ ᠪᠠᠶ᠋ᠢᠲᠠᠯ ᠭᠠᠷᠭᠠᠵᠤ᠂ ᠲᠣᠮᠣ ᠬᠠᠶ᠋ᠢᠴᠢ ᠪᠠᠷ ᠬᠠᠶ᠋ᠢᠴᠢᠯᠠᠨ ᠤᠲᠠᠰᠤ ᠦᠭᠡᠢ ᠵᠡᠭᠦᠦ ᠪᠡᠷ ᠣᠶᠣᠵᠤ《 ᠵᠠ᠂ ᠬᠠᠭᠠᠨᠲᠠᠨ ᠲᠠᠨ ᠤ᠋ ᠬᠤᠪᠴᠠᠰᠤ ᠪᠡᠯᠡᠨ ᠪᠣᠯᠪᠠ 》 ᠭᠡᠰᠡᠨ ᠳ᠋ᠦ᠍ ᠬᠠᠭᠠᠨ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠣᠯᠠᠨ ᠨᠡᠷᠡᠲᠦ ᠲᠦᠰᠢᠮᠡᠯ ᠊ᠢ ᠳᠠᠭᠠᠭᠤᠯᠤᠨ ᠢᠷᠡᠪᠡ᠃
ᠬᠣᠶᠠᠷ ᠯᠤᠶ᠋ᠢᠪᠠᠷᠴᠢᠨ ᠶᠠᠭᠤᠮᠠ ᠪᠠᠷᠢᠭᠰᠠᠨ ᠪᠠᠶ᠋ᠢᠲᠠᠯ ᠦᠵᠡᠭᠦᠯᠦᠨ ᠭᠠᠷ ᠢ᠋ᠶ᠋ᠠᠨ ᠡᠷᠭᠦᠵᠦ᠄
《 ᠦᠵᠡᠭᠲᠦᠨ ᠡᠨᠡ ᠪᠣᠯ ᠥᠮᠥᠳᠥ᠂ ᠡᠨᠡ ᠪᠣᠯ ᠴᠠᠮᠴᠠ᠂ ᠡᠨᠡ ᠪᠣᠯ ᠨᠥᠮᠥᠷᠭᠡ᠂ ᠡᠨᠡ ᠪᠣᠯ ᠪᠤᠰᠤᠳ ᠳᠣᠲᠣᠭᠠᠳᠤ ᠬᠤᠪᠴᠠᠰᠤ ᠮᠥᠨ᠃ ᠴᠥᠮ ᠠᠭᠠᠯᠵᠢᠨ ᠤ᠋ ᠰᠢᠯᠦᠰᠦ ᠮᠡᠲᠦ ᠬᠥᠩᠭᠡᠨ ᠲᠤᠯᠠ ᠡᠮᠦᠰᠦᠭᠰᠡᠨ ᠬᠥᠮᠦᠨ ᠣᠭᠲᠣ ᠡᠮᠦᠰᠦᠭᠰᠡᠨ ᠢ᠋ᠶ᠋ᠡᠨ ᠮᠡᠳᠡᠬᠦ ᠦᠭᠡᠢ᠂ ᠲᠡᠶ᠋ᠢᠮᠦ ᠰᠣᠨᠢᠨ ᠡᠷᠳᠡᠮ ᠲᠡᠢ ᠪᠣᠯᠠᠢ 》 ᠭᠡᠰᠡᠨ ᠳ᠋ᠦ᠍ ᠦᠨᠡᠨ ᠳ᠋ᠡᠭᠡᠨ ᠲᠡᠶ᠋ᠢᠮᠦ ᠬᠤᠪᠴᠠᠰᠤ ᠦᠭᠡᠢ ᠲᠤᠯᠠ ᠬᠠᠭᠠᠨ ᠊ᠢ ᠳᠠᠭᠠᠭᠰᠠᠨ ᠲᠦᠰᠢᠮᠡᠳ ᠪᠦᠭᠦᠳᠡᠭᠡᠷ ᠨᠢᠳᠦ ᠪᠡᠨ ᠪᠦᠯᠲᠡᠶ᠋ᠢᠯᠭᠡᠨ ᠬᠣᠭᠣᠰᠣᠨ ᠭᠠᠵᠠᠷ ᠊ᠢ ᠳᠡᠮᠡᠢ ᠯᠡ ᠰᠢᠷᠲᠡᠨ ᠦᠵᠡᠨᠡ᠃ ᠬᠣᠶᠠᠷ ᠯᠤᠶ᠋ᠢᠪᠠᠷᠴᠢᠨ᠄
《 ᠬᠠᠭᠠᠨᠲᠠᠨ ᠬᠠᠭᠤᠴᠢᠨ ᠬᠤᠪᠴᠠᠰᠤ ᠪᠠᠨ ᠬᠠᠯᠠᠬᠤ ᠪᠣᠯᠪᠠ ᠤᠤ᠂ ᠪᠢᠳᠡ ᠲᠣᠯᠢᠨ ᠤ᠋ ᠡᠮᠦᠨᠡ ᠬᠠᠭᠠᠨ ᠤ᠋ ᠰᠢᠨᠡ ᠬᠤᠪᠴᠠᠰᠤ ᠶ᠋ᠢ ᠴᠢᠨᠢ ᠡᠮᠦᠰᠬᠡᠶᠡ 》ᠭᠡᠰᠡᠨ ᠳ᠋ᠦ᠍᠂ ᠬᠠᠭᠠᠨ ᠬᠠᠭᠤᠴᠢᠨ ᠬᠤᠪᠴᠠᠰᠤ ᠪᠠᠨ ᠲᠠᠶ᠋ᠢᠯᠪᠠ᠃ ᠬᠣᠶᠠᠷ ᠪᠠᠴᠢᠲᠡᠨ᠂ ᠬᠠᠭᠠᠨ ᠳ᠋ᠤ᠌ ᠰᠢᠨᠡ ᠬᠤᠪᠴᠠᠰᠤ ᠶ᠋ᠢ ᠨᠢ ᠡᠮᠦᠰᠬᠡᠬᠦ ᠪᠠᠶ᠋ᠢᠲᠠᠯ ᠭᠠᠷᠭᠠᠵᠤ ᠠᠭᠠᠰᠢᠯᠠᠨᠠ᠃ ᠬᠠᠭᠠᠨ ᠲᠣᠯᠢᠨ ᠤ᠋ ᠡᠮᠦᠨᠡ ᠢᠨᠠᠭᠰᠢ ᠴᠢᠨᠠᠭᠰᠢ ᠶᠠᠪᠤᠵᠤ᠂ ᠪᠡᠶᠡ ᠪᠡᠨ ᠦᠵᠡᠨᠡ᠃ ᠣᠯᠠᠨ ᠪᠦᠭᠦᠳᠡᠭᠡᠷ᠄
《 ᠠᠶᠠ᠂ ᠡᠨᠡ ᠬᠤᠪᠴᠠᠰᠤᠨ ᠤ᠋ ᠥᠩᠭᠡ ᠬᠡ ᠶᠠᠭᠤᠲᠠᠢ ᠦᠵᠡᠰᠬᠦᠯᠡᠩ ᠰᠠᠶᠢᠬᠠᠨ ᠪᠣᠢ᠃ ᠮᠠᠨ ᠤ᠋ ᠬᠠᠭᠠᠨ ᠳ᠋ᠤ᠌ ᠶᠠᠭᠤᠲᠠᠢ ᠰᠠᠢᠨ ᠵᠣᠬᠢᠬᠤ ᠠᠵᠢ᠃ ᠠᠶᠠ᠂ ᠡᠨᠡ ᠦᠨᠡᠬᠡᠷ ᠵᠣᠬᠢᠬᠤ ᠠᠵᠢ᠃ ᠠᠶᠠ᠂ ᠡᠨᠡ ᠦᠨᠡᠬᠡᠷ ᠮᠠᠰᠢ ᠡᠷᠬᠢᠮ ᠬᠤᠪᠴᠠᠰᠤ ᠪᠠᠶ᠋ᠢᠨᠠ ! 》ᠭᠡᠵᠦ ᠬᠠᠰᠬᠢᠷᠤᠯᠳᠤᠪᠠ᠃ ᠭᠡᠲᠡᠯᠡ ᠶᠣᠰᠣᠯᠠᠯ ᠊ᠢ ᠤᠳᠤᠷᠢᠳᠬᠤ ᠲᠦᠰᠢᠮᠡᠯ ᠢᠷᠡᠵᠦ᠄
《 ᠭᠠᠳᠠᠨᠠ ᠶᠡᠬᠡ ᠶᠣᠰᠣᠯᠠᠯ ᠢ᠋ᠶ᠋ᠠᠷ ᠵᠠᠯᠠᠷᠠᠬᠤ ᠲᠥᠷᠥ ᠶ᠋ᠢᠨ ᠶᠡᠬᠡ ᠰᠢᠭᠦᠷ ᠊ᠢ ᠵᠠᠯᠠᠵᠤ᠂ ᠬᠠᠭᠠᠨ ᠊ᠢ ᠬᠦᠯᠢᠶᠡᠵᠦ ᠪᠠᠶ᠋ᠢᠨᠠ 》ᠭᠡᠵᠦ ᠠᠶ᠋ᠢᠯᠠᠤᠠᠬᠠᠬᠰᠠᠨ ᠳ᠋ᠤ᠌ ᠬᠠᠭᠠᠨ᠄
《 ᠵᠠ᠂ ᠪᠢ ᠪᠡᠯᠡᠨ ᠪᠣᠯᠪᠠ 》ᠭᠡᠳ ᠡᠮᠦᠰᠦᠭᠰᠡᠨ ᠬᠤᠪᠴᠠᠰᠤ ᠴᠢᠮᠡᠭᠯᠡᠯ ᠢ᠋ᠶ᠋ᠡᠨ ᠨᠠᠷᠢᠪᠴᠢᠯᠠᠨ ᠦᠵᠡᠵᠦ ᠪᠠᠶ᠋ᠢᠬᠤ ᠪᠠᠶ᠋ᠢᠲᠠᠯ ᠭᠠᠷᠭᠠᠵᠤ᠂ ᠲᠣᠯᠢᠨ ᠤ᠋ ᠡᠮᠦᠨᠡ ᠵᠣᠷᠢᠮᠠᠭ ᠢ᠋ᠶ᠋ᠠᠷ ᠨᠢᠭᠡ ᠬᠣᠶᠠᠷ ᠤᠳᠠᠭᠠ ᠡᠷᠭᠢᠴᠡᠨ ᠪᠡᠶᠡ ᠶ᠋ᠢ ᠦᠵᠡᠭᠡᠳ᠄
《 ᠡᠨᠡ ᠬᠤᠪᠴᠠᠰᠤ ᠨᠠᠳᠠ ᠶᠠᠪ ᠴᠠᠪ ᠵᠣᠬᠢᠭᠰᠠᠨ ᠪᠢᠰᠢ ᠦᠦ ? 》ᠭᠡᠳ ᠭᠠᠷᠤᠭᠰᠠᠨ ᠳ᠋ᠤ᠌ ᠬᠠᠭᠠᠨ ᠤ᠋ ᠨᠥᠮᠥᠷᠭᠡ ᠶ᠋ᠢᠨ ᠤᠷᠲᠤ ᠬᠣᠷᠮᠣᠢ ᠶ᠋ᠢ ᠪᠠᠷᠢᠬᠤ ᠬᠥᠮᠦᠰ ᠲᠡᠷᠡ ᠭᠠᠶ᠋ᠢᠬᠠᠮᠰᠢᠬᠲᠤ ᠬᠤᠪᠴᠠᠰᠤ ᠶ᠋ᠢ ᠦᠵᠡᠭᠳᠡᠬᠦ ᠦᠭᠡᠢ ᠭᠡᠵᠦ ᠬᠡᠯᠡᠬᠦ ᠡᠴᠡ ᠪᠡᠨ ᠡᠮᠢᠶᠡᠬᠦ ᠲᠤᠯᠠ ᠠᠷᠭᠠ ᠪᠤᠶᠤ ᠭᠠᠷ ᠢ᠋ᠶ᠋ᠠᠨ ᠬᠠᠭᠠᠨ ᠤ᠋ ᠨᠥᠮᠥᠷᠭᠡ ᠶ᠋ᠢᠨ ᠬᠣᠷᠮᠣᠢ ᠶ᠋ᠢ ᠪᠠᠷᠢᠬᠤ ᠪᠠᠶ᠋ᠢᠲᠠᠯ ᠦᠵᠡᠭᠦᠯᠵᠦ ᠳᠡᠮᠡᠢ ᠯᠡ ᠭᠠᠷ ᠢ᠋ᠶ᠋ᠠᠨ ᠡᠷᠭᠦᠨ ᠶᠠᠪᠤᠨᠠ᠃ ᠬᠠᠭᠠᠨ᠂ ᠲᠥᠷᠥ ᠶ᠋ᠢᠨ ᠶᠡᠬᠡ ᠰᠢᠬᠦᠷ ᠦ᠋ᠨ ᠳᠣᠣᠷᠠ ᠮᠠᠰᠢ ᠶᠡᠬᠡᠮᠰᠦᠭ ᠪᠠᠶ᠋ᠢᠲᠠᠯ ᠢ᠋ᠶ᠋ᠠᠷ ᠵᠠᠯᠠᠷᠠᠨ ᠶᠠᠪᠤᠬᠤ ᠳ᠋ᠤ᠌᠂ ᠭᠤᠳᠤᠮᠵᠢ ᠵᠡᠭᠡᠯᠢ ᠶ᠋ᠢᠨ ᠭᠠᠵᠠᠷ ᠬᠤᠷᠠᠯᠳᠤᠭᠰᠠᠨ ᠢᠷᠭᠡᠨ᠂ ᠪᠠᠶ᠋ᠢᠰᠢᠩ ᠤ᠋ᠨ ᠴᠣᠩᠬᠣ ᠪᠠᠷ ᠦᠵᠡᠭᠴᠢ ᠣᠯᠠᠨ ᠪᠦᠭᠦᠳᠡᠭᠡᠷ᠄
《 ᠠᠶᠠ᠂ ᠲᠡᠭᠷᠢ ᠠ᠋᠂ ᠮᠠᠨ ᠤ᠋ ᠬᠠᠭᠠᠨ ᠤ᠋ ᠬᠤᠪᠴᠠᠰᠤ ᠦᠨᠡᠬᠡᠷ ᠠᠳᠠᠯᠢᠳᠬᠠᠰᠢ ᠦᠭᠡᠢ ᠰᠠᠢᠬᠠᠨ ᠬᠤᠪᠴᠠᠰᠤ ᠪᠠᠶ᠋ᠢᠨᠠ᠂ ᠬᠠᠭᠠᠨ ᠤ᠋ ᠪᠡᠶᠡ ᠳ᠋ᠦ᠍ ᠶᠡᠬᠡ ᠯᠡ ᠵᠣᠬᠢᠰᠲᠠᠢ ᠰᠠᠶᠢᠬᠠᠨ ᠬᠤᠪᠴᠠᠰᠤ ᠪᠠᠶ᠋ᠢᠨᠠ ! 》ᠭᠡᠵᠦ ᠲᠡᠮᠡᠴᠡᠯᠳᠦᠨ ᠬᠠᠰᠬᠢᠷᠤᠯᠳᠤᠵᠤ᠂ ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢ ᠲᠡᠨᠡᠭ ᠮᠠᠩᠬᠤᠤ ᠪᠤᠶᠤ ᠡᠰᠡᠬᠦᠯᠡ ᠠᠯᠪᠠᠨ ᠲᠤᠰᠢᠶᠠᠯ ᠳ᠋ᠠᠭᠠᠨ ᠲᠡᠩᠴᠡᠬᠦ ᠦᠭᠡᠢ ᠬᠥᠮᠦᠨ ᠭᠡᠵᠦ ᠬᠡᠯᠡᠭᠳᠡᠬᠦ ᠡᠴᠡ ᠵᠣᠪᠠᠬᠤ ᠲᠤᠯᠠ ᠡᠰᠡ ᠦᠵᠡᠭᠰᠡᠨ ᠴᠦ᠍ ᠦᠵᠡᠭᠰᠡᠨ ᠪᠠᠶ᠋ᠢᠲᠠᠯ ᠭᠠᠷᠭᠠᠨ ᠴᠤᠤᠭᠢᠯᠳᠤᠨᠠ᠃
ᠬᠠᠭᠠᠨ ᠤ᠋ ᠣᠯᠠᠨ ᠬᠤᠪᠴᠠᠰᠤᠨ ᠤ᠋ ᠳᠣᠲᠣᠷᠠ ᠠ᠋ᠴᠠ ᠡᠭᠦᠨ ᠦ᠌ ᠠᠳᠠᠯᠢ ᠣᠯᠠᠨ ᠊ᠢ ᠭᠠᠶ᠋ᠢᠠᠬᠠᠭᠤᠯᠤᠭᠰᠠᠨ ᠬᠤᠪᠴᠠᠰᠤ ᠨᠢᠭᠡ ᠴᠦ᠍ ᠦᠭᠡᠢ ᠪᠢᠯᠡ᠃ ᠢᠩᠭᠢᠵᠦ ᠶᠠᠪᠤᠲᠠᠯᠠ ᠭᠡᠨᠡᠳᠲᠡ ᠨᠢᠭᠡᠨ ᠪᠢᠴᠢᠬᠠᠨ ᠬᠡᠦᠬᠡᠳ᠄
《 ᠠᠶᠠ᠂ ᠮᠠᠨ ᠤ᠋ ᠬᠠᠭᠠᠨ ᠴᠢᠷᠠᠮᠠᠨ ᠨᠢᠴᠦᠭᠦᠨ ᠶᠠᠪᠤᠵᠤ ᠪᠠᠶ᠋ᠢᠨᠠ ! 》ᠭᠡᠵᠦ ᠬᠠᠰᠬᠢᠷᠤᠭᠰᠠᠨ ᠳ᠋ᠤ᠌᠂ ᠲᠡᠭᠦᠨ ᠦ᠌ ᠡᠴᠢᠭᠡ ᠨᠢ᠄
《 ᠠᠶᠠ᠂ ᠲᠡᠭᠷᠢ ᠠ᠋᠂ ᠡᠨᠡ ᠪᠠᠭᠠ ᠬᠡᠦᠬᠡᠳ ᠦ᠋ᠨ ᠭᠣᠶᠠᠴᠢ (3) ᠦᠭᠡᠢ ᠦᠨᠡᠨ ᠦᠭᠡ ᠶ᠋ᠢ ᠰᠣᠨᠣᠰᠤᠭᠲᠤᠨ 》ᠭᠡᠪᠡ᠃ ᠣᠯᠠᠨ ᠬᠥᠮᠦᠨ᠂ ᠲᠡᠷᠡ ᠬᠡᠦᠬᠡᠳ ᠦ᠋ᠨ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢ ᠪᠡᠶᠡ ᠪᠠᠶᠠᠨ ᠳ᠋ᠠᠭᠠᠨ ᠰᠠᠮ ᠳᠠᠮᠵᠢᠭᠤᠯᠤᠨ ᠬᠡᠯᠡᠭᠰᠡᠭᠡᠷ ᠬᠤᠷᠠᠭᠰᠠᠨ ᠣᠯᠠᠨ ᠪᠦᠭᠦᠳᠡ᠄
《 ᠡᠨᠡ ᠬᠠᠭᠠᠨ ᠬᠤᠪᠴᠠᠰᠤ ᠦᠭᠡᠢ ᠨᠢᠴᠦᠭᠦᠨ ᠶᠠᠪᠤᠵᠤ ᠪᠠᠶ᠋ᠢᠨᠠ 》ᠭᠡᠯᠴᠡᠪᠡ᠃ ᠲᠡᠷᠡ ᠨᠢᠭᠡ ᠬᠡᠦᠬᠡᠳ᠄
《 ᠬᠠᠭᠠᠨ ᠤᠯᠠᠭᠠᠨ ᠨᠢᠴᠦᠭᠦᠨ ᠶᠠᠪᠤᠵᠤ ᠪᠠᠶ᠋ᠢᠨᠠ 》ᠭᠡᠵᠦ ᠬᠠᠰᠬᠢᠷᠤᠨ ᠴᠤᠤᠭᠢᠯᠳᠤᠭᠰᠠᠨ ᠳ᠋ᠤ᠌ ᠬᠠᠭᠠᠨ᠂ ᠣᠯᠠᠨ ᠤ᠋ ᠬᠡᠯᠡᠯᠴᠡᠬᠦ ᠲᠡᠷᠡ ᠦᠭᠡ ᠶ᠋ᠢ ᠵᠥᠪ ᠭᠡᠵᠦ ᠪᠣᠳᠣᠵᠤ ᠣᠯᠤᠭᠠᠳ ᠶᠡᠬᠡᠳᠡ ᠢᠴᠢᠭᠰᠡᠨ ᠪᠣᠯᠪᠠᠴᠤ ᠠᠷᠭᠠ ᠪᠤᠶᠤ ᠨᠢᠭᠡᠨᠲᠡ ᠢᠩᠭᠢᠵᠦ ᠭᠠᠷᠤᠭᠰᠠᠨ ᠠ᠋ᠴᠠ ᠬᠤᠪᠴᠠᠰᠤ ᠲᠠᠢ ᠬᠥᠮᠦᠨ ᠰᠢᠭ ᠶᠠᠪᠤᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠣᠯᠪᠠ ᠭᠡᠵᠦ ᠤᠯᠠᠮ ᠶᠡᠬᠡᠮᠰᠦᠭ ᠪᠠᠶ᠋ᠢᠲᠠᠯ ᠭᠠᠷᠭᠠᠵᠤ ᠶᠠᠪᠤᠬᠤ ᠳ᠋ᠤ᠌ ᠬᠠᠭᠠᠨ ᠤ᠋ ᠨᠥᠮᠥᠷᠭᠡ ᠶ᠋ᠢᠨ ᠬᠣᠷᠮᠣᠢ ᠶ᠋ᠢ ᠶᠣᠰᠣᠯᠠᠨ ᠪᠠᠷᠢᠬᠤ ᠬᠥᠮᠦᠨ ᠴᠢᠷᠠᠢ ᠪᠠᠨ ᠲᠥᠪ ᠪᠣᠯᠭᠠᠵᠤ᠂ ᠬᠣᠷᠮᠣᠢ ᠶ᠋ᠢ ᠪᠠᠷᠢᠬᠤ ᠮᠡᠲᠦ ᠭᠠᠷ ᠢ᠋ᠶ᠋ᠠᠨ ᠡᠷᠭᠦᠨ ᠶᠠᠪᠤᠨᠠ᠃
ᠵᠠᠰᠠᠯᠲᠠ᠄ ᠪᠦᠯᠲᠢᠢᠯᠭᠡᠨ ※ — ᠪᠦᠯᠲᠡᠶ᠋ᠢᠯᠭᠡᠨ᠃
ᠲᠠᠶ᠋ᠢᠯᠪᠤᠷᠢ᠄ (1) ᠠᠳᠠᠪᠠᠰᠢ — ᠦᠨᠡᠬᠡᠷ᠂ ᠴᠣᠬᠣᠮ ᠬᠦ᠃
(2) ᠭᠡᠬᠢᠵᠦ — ᠲᠣᠯᠣᠭᠠᠢ ᠳᠣᠬᠢᠵᠤ᠃
(3) ᠭᠣᠶᠠᠴᠢ — ᠬᠠᠭᠤᠷᠮᠠᠭ᠂ ᠵᠠᠰᠠᠳᠠᠭ ᠃
ᠢᠷᠡᠯᠲᠡ ᠄
ᠲᠠᠪᠤᠨ ᠵᠢᠯ ᠦ᠋ᠨ ᠳᠦᠷᠢᠮᠲᠦ ᠪᠠᠭᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠦᠵᠡᠬᠦ < ᠬᠡᠯᠡ ᠪᠢᠴᠢᠭ > ᠶᠢᠰᠦᠳᠦᠭᠡᠷ ᠳᠡᠪᠲᠡᠷ ※
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ ᠨᠠᠶ᠋ᠢᠷᠠᠭᠤᠯᠤᠨ ᠬᠡᠪᠯᠡᠭᠦᠯᠪᠡ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠢᠨᠬᠤᠸᠠ ᠨᠣᠮ ᠤ᠋ᠨ ᠳᠡᠯᠭᠡᠭᠦᠷ ᠲᠠᠷᠬᠠᠭᠠᠪᠠ
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠮᠣᠩᠭᠣᠯ ᠪᠢᠴᠢᠭ ᠬᠡᠪᠯᠡᠬᠦ ᠦᠢᠯᠡᠳᠪᠦᠷᠢ ᠬᠡᠪᠯᠡᠪᠡ
1981 ᠣᠨ ᠤ᠋ 5 ᠰᠠᠷᠠ ᠳ᠋ᠤ᠌ ᠬᠣᠶᠠᠳᠤᠭᠠᠷ ᠬᠡᠪ ᠢ᠋ ᠬᠢᠪᠡ
1984 ᠣᠨ ᠤ᠋ 4 ᠰᠠᠷᠠ ᠳ᠋ᠤ᠌ ᠳᠥᠷᠪᠡᠳᠦᠭᠡᠷ ᠤᠳᠠᠭᠠ ᠶ᠋ᠢᠨ ᠬᠡᠪᠯᠡᠯ ᠡᠴᠡ ᠰᠣᠩᠭᠣᠪᠠ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠨᠠᠷᠠᠨᠰᠣᠶᠣᠯ
ᠬᠢᠨᠠᠭᠴᠢ ᠄ ᠣᠤᠠᠬᠠᠨᠰᠣᠠ ᠂ ᠲᠣ᠋ · ᠨᠠᠨᠳᠢᠨ