ᠪᠠᠶᠠᠨ ᠨᠠᠮᠤᠷ ᠤᠨ ᠮᠠᠭᠲᠠᠭᠠᠯ Баян намрын магтаал
414ᠪᠠᠶᠠᠨ ᠨᠠᠮᠤᠷ ᠤᠨ ᠮᠠᠭᠲᠠᠭᠠᠯ
ᠡᠭᠡᠰᠢᠭᠲᠦ ᠬᠤᠭᠤᠷ ᠢᠶ᠋ᠠᠨ ᠳᠠᠲᠠᠯᠠ ᠳ᠋ᠠ
ᠡᠷᠬᠢᠪᠴᠢ ᠶ᠋ᠢ ᠨᠢ ᠮᠤᠰᠬᠢᠭᠠᠳ ᠬᠥᠭᠯᠡᠯᠡ ᠳ᠋ᠠ
ᠡᠯᠪᠡᠭ ᠬᠤᠷᠢᠶᠠᠯᠲᠠ ᠲᠠᠢ ᠨᠠᠮᠤᠷ ᠢᠶ᠋ᠠᠨ
ᠡᠭᠡᠰᠢᠭᠯᠡᠨ ᠡᠭᠡᠰᠢᠭᠯᠡᠨ ᠬᠣᠯᠪᠣᠶᠠ ᠳ᠋ᠠ ᠃
ᠲᠠᠪᠤᠨ ᠲᠠᠷᠢᠶᠠ ᠬᠠᠯᠢᠭᠤᠷᠠᠭᠰᠠᠨ
ᠲᠠᠩᠰᠤᠭ ᠰᠠᠶ᠋ᠢᠬᠠᠨ ᠨᠠᠮᠤᠷ ᠰᠢᠦ ᠂
ᠲᠠᠷᠢᠶᠠᠴᠢᠨ ᠲᠦᠮᠡᠨ ᠢ ᠪᠠᠶᠠᠰᠬᠠᠭᠰᠠᠨ
ᠲᠡᠯᠭᠡᠷ ᠰᠠᠶ᠋ᠢᠬᠠᠨ ᠨᠠᠮᠤᠷ ᠰᠢᠦ ᠂
ᠵᠢᠯ ᠵᠢᠯ ᠲᠠᠢ ᠡᠲᠡᠭᠡᠳ ᠶᠤᠮ ᠂
ᠵᠦᠢᠲᠡᠢ ᠰᠠᠶ᠋ᠢᠬᠠᠨ ᠨᠠᠮᠤᠷ ᠰᠢᠦ ᠃
ᠵᠣᠭᠣᠰ ᠪᠤᠳᠠᠭᠠ ᠪᠠᠷ ᠡᠯᠪᠡᠭ ᠶᠤᠮ ᠂
ᠵᠢᠷᠭᠠᠯᠲᠠᠢ ᠰᠠᠶ᠋ᠢᠬᠠᠨ ᠨᠠᠮᠤᠷ ᠰᠢᠦ ᠃
ᠣᠨ ᠣᠨ ᠲᠠᠢ ᠣᠨᠳᠣᠣ ᠶᠤᠮ ᠂
ᠣᠷᠣᠯᠭᠠ ᠰᠠᠶ᠋ᠢᠲᠠᠢ ᠨᠠᠮᠤᠷ ᠰᠢᠦ ᠃
ᠣᠯᠠᠨ ᠲᠦᠮᠡᠨ ᠪ ᠰᠡᠳᠬᠢᠯ ᠢ
ᠤᠷᠮᠠᠰᠢᠭᠤᠯᠵᠤ ᠴᠢᠳᠠᠭᠰᠠᠨ ᠨᠠᠮᠤᠷ ᠰᠢᠦ ᠃
ᠬᠥᠮᠦᠨ ᠬᠥᠮᠦᠨ ᠦ ᠬᠦᠴᠦ ᠶ᠋ᠢ
ᠬᠥᠳᠡᠯᠭᠡᠵᠦ ᠴᠢᠳᠠᠭᠰᠠᠨ ᠨᠠᠮᠤᠷ ᠰᠢᠦ ᠂
ᠬᠥᠳᠡᠯᠮᠦᠷᠢ ᠲᠡᠮᠡᠴᠡᠯ ᠦᠨ ᠤᠷᠤᠯᠳᠤᠭᠠᠨ ᠢ
ᠥᠷᠨᠢᠭᠦᠯᠵᠦ ᠴᠢᠳᠠᠭᠰᠠᠨ ᠨᠠᠮᠤᠷ ᠰᠢᠦ ᠃
ᠭᠡᠷ ᠭᠡᠷ ᠦᠨ ᠢᠳᠡᠪᠬᠢᠵᠢᠯ ᠢ
ᠪᠠᠳᠠᠷᠠᠭᠤᠯᠵᠤ ᠴᠢᠳᠠᠭᠰᠠᠨ ᠨᠠᠮᠤᠷ ᠰᠢᠦ ᠂
ᠭᠡᠰᠢᠭᠦᠨ ᠲᠦᠮᠡᠨ ᠦ ᠵᠣᠷᠢᠭ ᠢ
ᠳᠠᠶ᠋ᠢᠴᠢᠯᠠᠵᠤ ᠴᠢᠳᠠᠭᠰᠠᠨ ᠨᠠᠮᠤᠷ ᠰᠢᠦ ᠃
ᠱᠠᠩ ᠲᠠᠢ ᠲᠠᠷᠢᠶᠠᠨ ᠤ ᠬᠢᠨᠢ ᠵᠢᠷᠤᠬᠠ ᠨᠢ ᠨᠢᠭᠡ ᠂
ᠱᠣᠣᠭᠢᠭᠠᠳ ᠳᠠᠪᠠᠯᠭᠠᠯᠠᠬᠤ ᠨᠠᠶ᠋ᠢᠭᠤᠭᠠ ᠨᠢ ᠨᠢᠭᠡ ᠂
ᠰᠢᠷᠠᠯᠠᠭᠠᠳ ᠪᠣᠯᠪᠠᠰᠤᠷᠠᠭᠰᠠᠨ ᠥᠩᠭᠡ ᠨᠢ ᠨᠢᠭᠡ ᠂
ᠱᠠᠯᠠᠮᠠᠭᠠᠶ᠋ᠢᠯᠠᠨ ᠬᠠᠳᠤᠬᠤ ᠶ᠋ᠢᠨ ᠵᠣᠷᠢᠭ ᠨᠢ ᠨᠢᠭᠡ ᠂
ᠢᠪᠠᠯᠵᠠᠭᠠᠳ ᠬᠠᠯᠢᠭᠤᠷᠠᠬᠤ ᠠ᠋ᠴᠠ ᠭᠡᠰᠡᠭ ᠨᠢ ᠨᠢᠭᠡ ᠂
ᠢᠷᠯᠡᠭᠰᠡᠨ ᠬᠠᠳᠤᠭᠤᠷ ᠤᠨ ᠬᠢᠨᠢ ᠭᠠᠩ ᠨᠢ ᠨᠢᠭᠡ ᠂
ᠢᠳᠡᠪᠬᠢᠯᠡᠨ ᠬᠠᠳᠤᠬᠤ ᠠ᠋ᠴᠠ ᠵᠣᠷᠢᠭ ᠨᠢ ᠨᠢᠭᠡ ᠂
ᠢᠨᠢᠶᠡᠯᠴᠡᠭᠡᠳ ᠬᠥᠭᠡᠷᠥᠯᠳᠦᠬᠦ ᠡᠴᠡ ᠨᠠᠷᠭᠢᠶᠠᠨ ᠨᠢ ᠨᠢᠭᠡ ᠂
ᠪᠥᠯᠥᠭᠯᠡᠭᠡᠳ ᠮᠣᠷᠳᠠᠬᠤ ᠠ᠋ᠴᠠ ᠠᠢ᠍ᠢ᠍ᠯ ᠨᠢ ᠨᠢᠭᠡ ᠂
ᠪᠥᠯᠬᠦᠮᠳᠡᠭᠡᠳ ᠠᠵᠢᠯᠯᠠᠬᠤ ᠠ᠋ᠴᠠ ᠨᠥᠬᠦᠷᠯᠡᠯ ᠨᠢ ᠨᠢᠭᠡ ᠂
ᠪᠥᠭᠴᠥᠢᠭᠡᠳ ᠬᠠᠳᠤᠬᠤ ᠠ᠋ᠴᠠ ᠡᠪ ᠨᠢ ᠨᠢᠭᠡ ᠂
ᠪᠠᠭᠠᠲᠤᠷᠯᠠᠨ ᠬᠤᠷᠢᠶᠠᠬᠤ ᠠ᠋ᠴᠠ ᠡᠷᠴᠢ ᠨᠢ ᠨᠢᠭᠡ ᠂
ᠲᠠᠷᠢᠶᠠᠴᠢᠨ ᠲᠦᠮᠡᠨ ᠪᠠᠶᠠᠷᠯᠠᠬᠤ ᠳ᠋ᠠᠭᠠᠨ
ᠲᠠᠬᠢᠶᠠᠨ ᠳᠠᠭᠤᠨ ᠢᠶ᠋ᠠᠷ ᠡᠷᠲᠡᠯᠡᠵᠦ ᠯᠡ ᠪᠤᠢ ᠂
ᠲᠠᠩᠰᠤᠭ ᠨᠠᠮᠤᠷ ᠤᠨ ᠬᠤᠷᠢᠶᠠᠯᠲᠠ ᠭᠡᠳ
ᠲᠡᠷᠭᠡᠯ ᠰᠠᠷᠠ ᠶ᠋ᠢ ᠤᠭᠲᠤᠵᠤ ᠯᠡ ᠪᠣᠢ ᠃
ᠭᠡᠰᠢᠭᠦᠨ ᠲᠦᠮᠡᠨ ᠪᠠᠶᠠᠰᠬᠤ ᠳ᠋ᠠᠭᠠᠨ
ᠭᠡᠭᠡᠷᠡᠬᠦ ᠡᠴᠡ ᠡᠮᠦᠨᠡ ᠮᠣᠷᠳᠠᠵᠤ ᠯᠡ ᠪᠣᠢ ᠂
ᠣᠯᠠᠨ ᠲᠦᠮᠡᠨ ᠴᠢᠨᠢ ᠣᠮᠣᠭᠰᠢᠬᠤ ᠳ᠋ᠠᠭᠠᠨ
ᠣᠳᠣᠳ ᠢ ᠤᠭᠲᠤᠭᠠᠳ ᠠᠵᠢᠯᠯᠠᠵᠤ ᠯᠡ ᠪᠣᠢ ᠃
ᠡᠭᠦᠳᠡ ᠪᠡᠨ ᠲᠦᠭᠵᠢᠵᠦ ᠣᠨᠢᠰᠤᠯᠠᠭᠠᠳ
ᠥᠷᠯᠥᠭᠡ ᠦᠳᠡᠰᠢ ᠶ᠋ᠢ ᠲᠡᠮᠡᠴᠡᠵᠡᠢ ᠂
ᠥᠯᠥᠭᠡᠢ ᠲᠡᠢ ᠨᠢᠯᠬᠠ ᠬᠡᠦᠬᠡᠳ ᠢ ᠪᠡᠨ
ᠦᠵᠦᠭᠦᠷ ᠲᠦ᠍ ᠨᠢ ᠠᠪᠠᠴᠢᠭᠠᠳ ᠠᠵᠢᠯᠯᠠᠵᠠᠢ ᠃
ᠬᠠᠨᠵᠤᠨ ᠠ᠋ᠴᠠ ᠪᠠᠨ ᠪᠣᠰᠬᠤ ᠦᠭᠡᠢ ᠪᠠᠶ᠋ᠢᠭᠰᠠᠨ ᠬᠥᠮᠦᠨ
ᠬᠠᠳᠤᠭᠤᠷ ᠢᠶ᠋ᠠᠨ ᠪᠢᠯᠡᠭᠦᠳᠡᠭᠡᠳ ᠰᠠᠨᠳᠤᠷᠴᠠᠢ ᠂
ᠬᠠᠰᠢᠶᠠᠨ ᠠ᠋ᠴᠠ ᠪᠠᠨ ᠭᠠᠷᠬᠤ ᠦᠭᠡᠢ ᠪᠠᠶ᠋ᠢᠭᠰᠠᠨ ᠬᠥᠮᠦᠨ
ᠬᠠᠨᠴᠤᠢ ᠰᠢᠮᠠᠯᠠᠭᠠᠳ ᠤᠷᠣᠯᠴᠠᠵᠠᠢ ᠃
ᠳᠠᠬᠤᠯ ᠡᠪᠡᠳᠴᠢᠨ ᠲᠡᠢ ᠪᠠᠶ᠋ᠢᠭᠰᠠᠨ ᠬᠥᠮᠦᠨ
ᠲᠡᠩᠬᠡᠷᠡᠵᠦ ᠪᠣᠰᠤᠭᠠᠳ ᠰᠠᠶ᠋ᠢᠵᠢᠷᠠᠵᠠᠢ ᠂
ᠲᠠᠪᠠ ᠪᠠᠷ ᠢᠶ᠋ᠠᠨ ᠵᠠᠯᠠᠷᠠᠵᠤ ᠪᠠᠶ᠋ᠢᠭᠰᠠᠨ ᠬᠥᠮᠦᠨ
ᠲᠣᠭᠣᠷᠢᠬᠤ ᠪᠠᠨ ᠮᠠᠷᠲᠠᠭᠠᠳ ᠵᠠᠰᠠᠷᠠᠵᠠᠢ ᠃
ᠬᠥᠭᠰᠢᠨ ᠪᠤᠭᠤᠷᠤᠯ ᠨᠠᠰᠤᠲᠠᠨ ᠨᠤᠭᠤᠳ
ᠬᠦᠴᠦ ᠪᠡᠨ ᠬᠠᠠᠮᠲᠤᠷᠠᠭᠠᠳ ᠳᠤᠰᠠᠯᠠᠯᠴᠠᠵᠠᠢ ᠂
ᠬᠡᠦᠬᠡᠳ ᠪᠢᠴᠢᠬᠠᠨ ᠪᠠᠭᠠᠴᠤᠳ ᠪᠠᠰᠠ
ᠬᠠᠳᠤᠵᠤ ᠬᠤᠷᠢᠶᠠᠭᠠᠳ ᠳᠡᠮᠵᠢᠯᠴᠡᠵᠡᠢ ᠃
ᠨᠠᠮᠤᠷ ᠤᠨ ᠨᠠᠷᠠᠨ ᠲᠥᠭᠡᠨᠡᠭ ᠭᠡᠳ
ᠪᠠᠰᠤᠵᠤ ᠬᠠᠳᠤᠬᠤ ᠨᠢ ᠣᠯᠠᠨ ᠪᠤᠢ ᠂
ᠨᠠᠰᠤᠲᠠᠨ ᠪᠣᠯᠣᠭᠰᠠᠨ ᠴᠤ᠌ ᠬᠣᠴᠣᠷᠬᠤ ᠦᠭᠡᠢ ᠭᠡᠳ
ᠪᠠᠭᠠᠲᠤᠷᠯᠠᠵᠤ ᠬᠠᠳᠤᠬᠤ ᠨᠢ ᠠᠷᠪᠢᠨ ᠪᠤᠢ ᠃
ᠠᠢ᠍ᠢ᠍ᠯ ᠡᠷᠦᠬᠡ ᠨᠤᠭᠦᠳ ᠬᠣᠭᠣᠷᠤᠨᠳᠤ ᠪᠠᠨ
ᠮᠥᠷᠥᠢᠴᠡᠵᠦ ᠬᠠᠳᠤᠬᠤ ᠨᠢ ᠠᠷᠪᠢᠨ ᠪᠤᠢ ᠂
ᠠᠭᠰᠢᠷᠠᠭᠠ ᠵᠠᠯᠠᠭᠤᠴᠤᠳ ᠳᠣᠲᠣᠷᠠ ᠪᠠᠨ
ᠤᠷᠤᠯᠳᠤᠵᠠᠭᠠᠵᠤ ᠬᠠᠳᠤᠬᠤ ᠨᠢ ᠣᠯᠠᠨ ᠪᠤᠢ ᠃
ᠰᠠᠭᠠᠭ ᠨᠠᠷᠢᠮᠤ ᠮᠢᠨᠢ ᠲᠥᠷᠥᠯᠡ ᠭᠡᠳ
ᠰᠠᠭᠠᠬᠠᠯᠲᠠ ᠠᠢ᠍ᠢ᠍ᠯ ᠢᠶ᠋ᠠᠷ ᠢᠶ᠋ᠠᠨ ᠬᠡᠯᠡᠯᠴᠡᠵᠦ ᠯᠠ ᠪᠤᠢ ᠂
ᠰᠠᠨᠠᠭᠰᠠᠨ ᠠ᠋ᠴᠠ ᠡᠯᠪᠡᠭ ᠬᠣᠷᠢᠶᠠᠴᠢᠬᠠᠯᠡ ᠭᠡᠳ
ᠰᠠᠩ ᠬᠥᠮᠥᠷᠭᠡ ᠪᠡᠨ ᠶᠡᠬᠡᠳᠬᠡᠵᠦ ᠯᠡ ᠪᠤᠢ ᠃
ᠪᠤᠷᠴᠠᠭ ᠰᠢᠰᠢ ᠮᠢᠨᠢ ᠲᠥᠷᠦᠴᠢᠯᠡ ᠭᠡᠳ
ᠪᠤᠯᠲᠤ ᠣᠯᠠᠨ ᠢᠶ᠋ᠠᠷ ᠢᠶ᠋ᠠᠨ ᠶᠠᠷᠢᠯᠴᠠᠵᠤ ᠯᠠ ᠪᠤᠢ ᠂
ᠪᠣᠳᠤᠭᠰᠠᠨ ᠠ᠋ᠴᠠ ᠬᠠᠷᠢᠨ ᠳᠠᠪᠠᠴᠢᠬᠠᠯᠠ ᠭᠡᠳ
ᠪᠤᠭᠤᠷᠤᠯ ᠨᠠᠰᠤᠲᠠᠨ ᠨᠤᠭᠤᠳ ᠨᠢ ᠮᠥᠰᠢᠶᠡᠵᠦ ᠯᠡ ᠪᠤᠢ ᠃
ᠬᠠᠪᠤᠷ ᠤᠨ ᠪᠡᠯᠡᠳᠬᠡᠯ ᠨᠢ ᠨᠠᠮᠤᠷ ᠲᠤ᠌ ᠭᠡᠵᠦ
ᠬᠥᠭᠰᠢᠳ ᠨᠠᠰᠤᠲᠠᠳ ᠶᠠᠷᠢᠯᠴᠠᠳᠠᠭ ᠰᠠᠨ ᠂
ᠬᠠᠷᠢᠭᠤᠴᠠᠯᠭᠠ ᠶ᠋ᠢᠨ ᠰᠠᠶ᠋ᠢᠨ ᠨᠢ ᠬᠤᠷᠢᠶᠠᠯᠲᠠ ᠳ᠋ᠤ᠌ ᠭᠡᠵᠦ
ᠬᠥᠮᠦᠨ ᠪᠦᠬᠦᠨ ᠮᠠᠭᠲᠠᠳᠠᠭ ᠰᠠᠨ ᠃
ᠪᠠᠭᠰᠢ ᠶ᠋ᠢᠨ ᠰᠠᠶ᠋ᠢᠨ ᠨᠢ ᠬᠥᠮᠦᠵᠢᠯ ᠳ᠋ᠦ᠍ ᠭᠡᠵᠦ
ᠪᠠᠭᠠ ᠶᠡᠬᠡ ᠪᠡᠷ ᠢᠶ᠋ᠡᠨ ᠬᠡᠯᠡᠯᠴᠡᠳᠡᠭ ᠰᠠᠨ ᠂
ᠪᠠᠶᠠᠵᠢ ᠤᠨ ᠰᠠᠭᠤᠷᠢ ᠨᠢ ᠬᠥᠳᠡᠯᠮᠦᠷᠢ ᠳ᠋ᠦ᠍ ᠭᠡᠵᠦ
ᠪᠦᠭᠦᠳᠡ ᠣᠯᠠᠨ ᠢᠶ᠋ᠠᠷ ᠢᠶ᠋ᠠᠨ ᠦᠨᠡᠯᠡᠳᠡᠭ ᠰᠠᠨ ᠃
ᠪᠣᠷᠣᠭᠠᠨ ᠰᠠᠯᠬᠢᠨ ᠳ᠋ᠤ᠌ ᠬᠣᠣᠷᠲᠠᠭᠳᠠᠭᠰᠠᠨ ᠦᠭᠡᠢ
ᠪᠠᠬᠠᠷᠤᠮᠠ ᠰᠠᠶ᠋ᠢᠬᠠᠨ ᠨᠠᠮᠤᠷ ᠰᠢᠦ ᠂
ᠪᠣᠭᠣᠵᠢ ᠲᠠᠢ ᠲᠠᠷᠢᠶᠠ ᠶ᠋ᠢ ᠸᠠᠯᠠᠭᠣᠯᠣᠭᠰᠠᠨ ᠦᠭᠡᠢ
ᠪᠠᠶᠠᠷᠯᠠᠭᠣᠯᠣᠮᠡ ᠰᠠᠶ᠋ᠢᠬᠠᠨ ᠨᠠᠮᠤᠷ ᠰᠢᠦ ᠃
ᠮᠥᠨᠳᠥᠷ ᠬᠢᠷᠠᠭᠤᠨ ᠳ᠋ᠤ᠌ ᠳᠠᠭᠠᠷᠢᠭᠳᠠᠭᠰᠠᠨ ᠦᠭᠡᠢ
ᠮᠠᠰᠢ ᠰᠠᠶ᠋ᠢᠬᠠᠨ ᠨᠠᠮᠤᠷ ᠰᠢᠦ ᠂
ᠮᠠᠯ ᠭᠠᠬᠠᠢ ᠳ᠋ᠤ᠌ ᠰᠦᠢᠳᠬᠡᠭᠳᠡᠭᠰᠡᠨ ᠦᠭᠡᠢ
ᠮᠠᠭᠲᠠᠭᠠᠯ ᠰᠠᠶ᠋ᠢᠲᠠᠢ ᠨᠠᠮᠤᠷ ᠰᠢᠦ ᠃
ᠳᠠᠭᠠᠭᠠᠴᠢᠯᠠᠯᠲᠠ ᠶ᠋ᠢᠨ ᠳᠥᠷᠢᠮ ᠢ ᠶᠠᠪᠤᠭᠤᠯᠤᠭᠰᠠᠨ ᠠ᠋ᠴᠠ
ᠣᠷᠣᠯᠭᠠ ᠭᠡᠳᠡᠭ ᠴᠢᠨᠢ ᠬᠡᠮᠵᠢᠶᠡ ᠦᠭᠡᠢ ᠂
ᠲᠠᠷᠬᠠᠨ ᠣᠳᠣᠬᠢᠴᠢᠯᠠᠯᠲᠠ ᠵᠦᠭ ᠵᠠᠮᠨᠠᠭᠰᠠᠨ ᠠ᠋ᠴᠠ
ᠣᠮᠣᠭ ᠭᠡᠳᠡᠭ ᠴᠢᠨᠢ ᠬᠢᠵᠠᠭᠠᠷ ᠦᠭᠡᠢ ᠃
ᠬᠠᠷᠢᠭᠤᠴᠠᠯᠭᠠ ᠶ᠋ᠢᠨ ᠳᠥᠷᠢᠮ ᠢ ᠬᠡᠷᠡᠭᠵᠢᠭᠦᠯᠦᠭᠰᠡᠨ ᠡᠴᠡ
ᠬᠤᠷᠢᠶᠠᠯᠲᠠ ᠭᠡᠳᠡᠭ ᠴᠢᠨᠢ ᠶᠠᠷᠢᠶᠠᠨ ᠥᠬᠡᠢ ᠂
ᠬᠠᠰᠢᠷ ᠲᠠᠷᠢᠶᠠᠴᠢᠨ ᠤ ᠴᠠᠷᠮᠠᠶ᠋ᠢᠭᠰᠠᠨ ᠠ᠋ᠴᠠ
ᠤᠨᠠᠯᠲᠠ ᠭᠡᠳᠡᠭ ᠴᠢᠨᠢ ᠬᠡᠯᠡᠯᠭᠡᠨ ᠦᠭᠡᠢ ᠃
ᠪᠠᠳᠮᠠ ᠯᠢᠩᠬᠤᠠ ᠴᠡᠴᠡᠭ ᠦᠳ ᠢ
ᠪᠠᠬᠠᠷᠴᠤ ᠰᠣᠨᠢᠷᠬᠠᠭᠠᠳ ᠪᠠᠷᠠᠨᠠ ᠤᠤ ᠳ᠋ᠠ ⁈
ᠪᠠᠶᠠᠨ ᠨᠠᠮᠤᠷ ᠤᠨ ᠬᠤᠷᠢᠶᠠᠯᠲᠠ ᠪᠠᠨ
ᠪᠠᠬᠠᠳᠤᠵᠤ ᠬᠣᠯᠪᠤᠭᠠᠳ ᠪᠠᠷᠠᠨᠠ ᠤᠤ ᠳ᠋ᠠ ⁈
ᠲᠠᠯᠠ ᠨᠤᠲᠤᠭ ᠤᠨ ᠴᠡᠴᠡᠭ ᠦᠳ ᠢ
ᠲᠣᠭᠣᠷᠢᠵᠤ ᠦᠵᠡᠭᠡᠳ ᠪᠠᠷᠠᠨᠠ ᠤᠤ ᠳ᠋ᠠ ⁈
ᠲᠠᠩᠰᠤᠭ ᠨᠠᠮᠤᠷ ᠤᠨ ᠬᠤᠷᠢᠶᠠᠯᠲᠠ ᠶ᠋ᠢ
ᠲᠣᠭᠠᠴᠢᠵᠤ ᠳᠠᠭᠤᠯᠠᠭᠠᠳ ᠳᠠᠭᠣᠰᠣᠨᠡ ᠤᠤ ᠳ᠋ᠠ ⁈
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠰᠠᠷᠠᠭᠣᠨ
ᠬᠢᠨᠠᠭᠴᠢ ᠄ ᠣᠳᠬᠠᠨᠰᠤᠡ